တရုတ်နိုင်ငံက ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) သို့ Volvo အမျိုးအစား မော်တော်ယာဉ် ၁၀ စီး လှူဒါန်း

JMC တာဝန်ရှိသူများထံ မြန်မာနိုင်ငံဆိုင်ရာ တရုတ်နိုင်ငံသံအမတ်ကြီးက မော်တော်ယာဉ် ၁၀ စင်းအား လှူဒါန်းသည့် အခမ်းအနား ပြုလုပ်နေစဉ်

မြန်မာနိုင်ငံဆိုင်ရာ တရုတ်ပြည်သူ့ သမ္မတနိုင်ငံသံရုံးက ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) သို့ Volvo အမျိုးအစား မော်တော်ယာဉ် ၁၀ စီး ဇူလိုင် ၅ ရက်က လှူဒါန်းခဲ့သည်။

အဆိုပါ မော်တော်ယာဉ် လှူဒါန်းခြင်း အခမ်းအနားကို ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် ဇူလိုင် ၅ ရက်က ပြုလုပ်ပြီး မြန်မာနိုင်ငံဆိုင်ရာ တရုတ်သံအမတ်ကြီးနှင့် တာဝန်ရှိသူများ၊ ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ဥက္ကဋ္ဌ အပါအ၀င် တာဝန်ရှိသူများ၊ ပြည်နယ်နှင့်တိုင်းဒေသကြီးအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-S) များမှ ကိုယ်စားလှယ်များ၊ ငြိမ်းချမ်းရေးကော်မရှင်မှ တာဝန်ရှိသူများနှင့် စသည့် ပုဂ္ဂိုလ်များ တက်ရောက်ကြသည်။

JMC ကို ပြည်ထောင်စုအဆင့်၊ ပြည်နယ် (သို့မဟုတ်) တိုင်းဒေသကြီးအဆင့်နှင့် ဒေသအဆင့်ဟူ၍ ဖွဲ့စည်းထားသည်။

မော်တော်ယာဉ်များ လှူဒါန်းခြင်းနှင့် ပတ်သက်၍ မြန်မာနိုင်ငံဆိုင်ရာ တရုတ်သံအမတ်ကြီး Mr.Hong Liang က “ယခုအချိန် မြန်မာနိုင်ငံရဲ့ လိုအပ်ချက်အရ တရုတ်သံရုံးမှ JMC-U ထံ လုပ်ငန်းသုံး မော်တော်ယာဉ်တွေ လှူဒါန်းပေးအပ်ရခြင်းက JMC ၀န်ထမ်းတွေ သက်ဆိုင်ရာဒေသကို ပိုမိုလျင်မြန်စွာ သွားရောက်ပြီး လုပ်ငန်းများ လုပ်ဆောင်နိုင်ရန်နဲ့ လမ်းပန်းဆက်သွယ်ရေး အဆင်ပြေစေရန် ဖြစ်ပါတယ်။ ယခုအချိန် လှူဒါန်းတဲ့မော်တော်ယာဉ်တွေက JMC ရဲ့ စွမ်းဆောင်ရည် တိုးမြင့်ရေးအတွက် ဆောင်ရွက်ပေးနိုင်မယ်လို့ မျှော်လင့်ပါတယ်” ဟု ပြောကြားသည်။

ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီက မြန်မာနိုင်ငံ၏ သက်ဆိုင်ရာ ဘက်အသီးသီးကြား ပစ်ခတ်တိုက်ခိုက်မှု ရပ်စဲရေးကို စောင့်ကြည့်သည့် အရေးပါသော အဖွဲ့အစည်းဖြစ်ပြီး မြန်မာနိုင်ငံ ငြိမ်းချမ်းရေးလုပ်ငန်းစဉ်ကို တွန်းအားပေးရာတွင် အရေးပါသည့် အခန်းကဏ္ဍက ပါဝင်လျက်ရှိကြောင်း တရုတ်သံအမတ်ကြီးက ပြောကြားသည်။

“မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်က မြန်မာနိုင်ငံအောင်မြင်စွာ နိုင်ငံတော် အသွင်ကူးပြောင်းရေးနဲ့ တရုတ်-မြန်မာနယ်စပ်ဒေသ တည်ငြိမ်အေးချမ်းရေးအတွက် လွန်စွာအရေးပါပါတယ်။ မြန်မာနိုင်ငံရဲ့ တောင်းဆိုချက်အရ တရုတ်နိုင်ငံက မြန်မာနိုင်ငံ မြောက်ပိုင်းဒေသ ငြိမ်းချမ်းရေးလုပ်ငန်းစဉ်မှာ အပြုသဘောဆောင်တဲ့ အခန်းကဏ္ဍက ပါဝင်ပြီး သက်ဆိုင်ရာ ဘက်အသီးသီးကြားမှာ စေ့စပ်ညှိနှိုင်းပေးပြီး တက်ကြွတဲ့ ဖွံ့ဖြိုးတိုးတက်မှုတွေကို ရရှိနေပါတယ်” ဟု တရုတ်သံ အမတ်ကြီးက ပြောကြားသည်။

တရုတ်နိုင်ငံက မြန်မာနိုင်ငံ၏ ငြိမ်းချမ်းရေးလုပ်ငန်းစဉ်အတွက် ဆက်လက်ကူညီပြီး ထောက်ပံ့အားပေးသွားမည်ဖြစ်ကြောင်း သံအမတ်ကြီးက ပြောကြားသည်။

တရုတ်နိုင်ငံအနေဖြင့် မြန်မာနိုင်ငံနှင့် ထိစပ်နေသည့် ဒေသများရှိ တိုင်းရင်းသားလက်နက်ကိုင်အဖွဲ့များကို တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် ပါဝင်လာရန်အတွက် ငြိမ်းချမ်းရေး ညှိနှိုင်းဆောင်ရွက်ပေးမှုများကို တွေ့နေရကြောင်း JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားသည်။

“ဒီနေ့ တရုတ်ပြည်သူ့သမ္မတနိုင်ငံက မော်တော်ယာဉ် ၁၀ စီး လှူဒါန်းတဲ့အတွက် ကျွန်တော်တို့ JMC ကိုယ်စား JMC ဥက္ကဋ္ဌအနေနဲ့ အများကြီး ကျေးဇူးတင်ရှိပါကြောင်းနဲ့ တရုတ်ပြည်သူ့သမ္မတနိုင်ငံကလည်း ကျွန်တော်တို့ JMC ကို ကျွန်တော်တို့ တစ်နှစ်ကို တစ်သန်းနဲ့ ဒေါ်လာသုံးသန်းလည်း ယခင်က ကျွန်တော်တို့ လှူဒါန်းခဲ့တာ ရှိပါတယ်။ သို့သော်လည်း ကျွန်တော်တို့ လက်ရှိအနေအထားတော့ ကျွန်တော်တို့ ဒေါ်လာ ပြီးခဲ့တဲ့နှစ်က ဒေါ်လာငါးသိန်း ကျွန်တော်တို့ JMC ကို ရရှိပြီး ဖြစ်ပါတယ်။ နောင်မှာလည်း လှူဒါန်းမယ်လို့ ကတိပြုထားပြီးဖြစ်ပါတယ်။ ဒီအတွက်လည်း ကျွန်တော်တို့ JMC ကိုယ်စား အများကြီး ကျေးဇူးတင်ရှိပါတယ်” ဟု ဒုတိယ ဗိုလ်ချုပ်ကြီးရာပြည့်က ပြောကြားသည်။

ထို့အတူ JMC-U ဒုတိယဥက္ကဋ္ဌများကလည်း ထိုကဲ့သို့ JMC လုပ်ငန်းများ ဆောင်ရွက်ရန် မော်တော်ယာဉ်များ လှူဒါန်းသည့်အတွက် အထူးကျေးဇူးတင်ရှိကြောင်း ပြောကြားသည်။ ထို့နောက် တရုတ်သံအမတ်ကြီးနှင့် JMC တာဝန်ရှိသူများက အမှတ်တရ လက်ဆောင်ပစ္စည်းများ အပြန်အလှန် ပေးအပ်ကြပြီးနောက် အခမ်းအနားသို့ တက်ရောက်လာသူများက စုပေါင်းမှတ်တမ်းတင် ဓာတ်ပုံရိုက်ကူးခဲ့ကြသည်။

တပ်မတော်အနေဖြင့် လက်ရှိအစိုးရ လက်ထက်၌ပင် ခိုင်မြဲသော ငြိမ်းချမ်းရေး ရရှိလိုပြီး လက်နက်ကိုင် လမ်းစဉ်ဖြင့် ဖက်ဒရယ်ပြည်ထောင်စု တည်ဆောက်၍ မရဟု JMC-U ဥက္ကဋ္ဌ ပြောကြား

ဇူလိုင် ၃ ရက်က ပြုလုပ်သည့် JMC-U ၏ (၁၇) ကြိမ်မြောက် အစည်းအဝေးတွင် JMC-U ဥက္ကဋ္ဌ ဒုတိယဗိုလ်ချုပ်ကြီးရာပြည့် အမှာစကား ပြောကြားနေစဉ်

တပ်မတော်အနေဖြင့် လက်ရှိအစိုးရ လက်ထက်တွင်ပင် ခိုင်မြဲသော ငြိမ်းချမ်းရေး ရရှိလိုပြီး တပ်မတော် ကာကွယ်ရေး ဦးစီးချုပ်၏ ဆန္ဒမှာလည်း ထိုအတိုင်းပင်ဖြစ်ကာ လက်နက်ကိုင်လမ်းစဉ်ဖြင့် ဒီမိုကရေစီနှင့် ဖက်ဒရယ်စနစ်ကို အခြေခံသော ပြည်ထောင်စုကို တည်ဆောက်၍မရဟု ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC-U) ၏ (၁၇) ကြိမ်မြောက် အစည်းအဝေးတွင် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားသည်။

JMC-U ၏ (၁၇) ကြိမ်မြောက် အစည်းအဝေးကို ရန်ကုန်မြို့ ရွှေလီလမ်းရှိ အမျိုးသား ပြန်လည် သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် ဇူလိုင် ၃ ရက်မှ ၅ ရက်အထိ ကျင်းပနေပြီး အဆိုပါ အစည်းအဝေး အဖွင့်အမှာစကား ပြောကြားရာတွင် ဒုတိယဗိုလ်ချုပ်ကြီး ရာပြည့်က ထိုသို့ ပြောကြားခဲ့ခြင်း ဖြစ်သည်။

“လက်နက်ကိုင်လမ်းစဉ်နဲ့ ကျွန်တော်တို့ ဒီမိုကရေစီနဲ့ ဖက်ဒရယ်ကို အခြေခံတဲ့ ပြည်ထောင်စုကို ကျွန်တော်တို့ တည်ဆောက်လို့ရမှာ မဟုတ်ပါဘူး။ တိုင်းရင်းသားပြည်သူ အားလုံးကလည်း လက်နက်ကိုင် ပဋိပက္ခ ချုပ်ငြိမ်းပြီးတော့ ရေရှည်တည်တံ့ခိုင်မြဲတဲ့ ငြိမ်းချမ်းရေးကို ကျွန်တော်တို့ အမှန်တကယ် လိုလားလျက် ရှိပါတယ်။ ရေရှည်တည်တံ့ခိုင်မြဲတဲ့ ငြိမ်းချမ်းရေး ရရှိဖို့အတွက် NCA ဟာ ကျွန်တော်တို့ ငြိမ်းချမ်းရေးအတွက် တစ်ခုတည်းသော ကျွန်တော်တို့ မဟာဗျူဟာတစ်ခု ဖြစ်သလို NCA မှာ ပါဝင်တဲ့ ကတိက၀တ်များကိုလည်း လိုက်နာစောင့်ထိန်းဖို့ လိုအပ်ပါတယ်” ဟု JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ် ရေးထိုးထားသော လက်နက်ကိုင် အဖွဲ့အစည်း အချင်းချင်းများအကြား ပစ်ခတ်တိုက်ခိုက်မှုများ လျော့နည်းသွားစေရေး အလေးအနက်ထား ဆောင်ရွက်ရန် လိုအပ်နေပြီး ရေရှည်တည်တံ့သော ထာဝရငြိမ်းချမ်းရေးရရှိရေး အတွက် NCA သည် မဟာဗျူဟာတစ်ခု ဖြစ်သကဲ့သို့ NCA စာချုပ်တွင် ပါဝင်သည့် ကတိက၀တ် များကိုလည်း စောင့်ထိန်းလိုက်နာရန် လိုအပ်နေသည်ဟု ဒုတိယဗိုလ်ချုပ်ကြီး ရာပြည့်က ပြောကြားသည်။

“ကျွန်တော်တို့ တပ်မတော်အနေနဲ့ လက်ရှိကျွန်တော်တို့အစိုးရ ကာလမှာပဲ ခိုင်မြဲတဲ့ ငြိမ်းချမ်းရေး၊ ထာဝရ ငြိ်မ်းချမ်းရေးကို ရရှိလိုတဲ့ ဆန္ဒရှိပါတယ်။ ဒါကျွန်တော်တို့ တပ်မတော်အပြင် တပ်မတော် အကြီးအကဲကလည်း ဒီအတိုင်းပဲ ဆန္ဒရှိတာ ဖြစ်ပါတယ်” ဟု ဒုတိယဗိုလ်ချုပ်ကြီး ရာပြည့်က ပြောကြားသည်။

JMC-U ၏ (၁၇) ကြိမ်မြောက် အစည်းအဝေးတွင် (၁၆) ကြိမ်မြောက် အစည်းအဝေးနှင့် (၁၇) ကြိမ်မြောက် အစည်းအဝေး ကြားကာလအတွင်း ပစ်ခတ်တိုက်ခိုက်မှု ရပ်စဲရေးဆိုင်ရာ အကောင်အထည်ဖော်မှုများ၊ JMC အဆင့်ဆင့်၏ တာဝန်နှင့် လုပ်ပိုင်ခွင့်များ၊ ပဋိပက္ခများ ဖြေရှင်းနိုင်ရေးအတွက် NCA တွင် ၀ိဝါဒ ကွဲပြားနေသော ဝေါဟာရအချို့နှင့် ပတ်သက်၍ အဓိပ္ပါယ် ဖွင့်ဆိုချက်များကို နှစ်ဖက်အပြန်အလှန် ဆွေးနွေးသွားကြမည် ဖြစ်ကြောင်း သိရသည်။

JMC မှ အဆင့်ဆင့်သော ကော်မတီဝင်များ အနေဖြင့် JMC လုပ်ငန်းများ ဆောင်ရွက်ရာတွင် ဒို့တာဝန် အရေးသုံးပါးကို ရှေးရှု၍ ဒီမိုကရေစီနှင့် ဖက်ဒရယ်စနစ်ကို အခြေခံသော ပြည်ထောင်စုကို နိုင်ငံရေး ဆွေးနွေးပွဲရလဒ်များနှင့်အညီ တည်ဆောက်သွားနိုင်ရေးအတွက် JMC ဆိုင်ရာ ပြဋ္ဌာန်းချက်များနှင့် လုပ်ထုံးလုပ်နည်းများနှင့်အညီ တိတိကျကျ အကောင်အထည်ဖော် ဆောင်ရွက်သွားကြရန် ယခုအစည်းအဝေးတွင် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က တိုက်တွန်းခဲ့သည်။

“ငြိမ်းချမ်းရေးလုပ်ငန်းစဉ် အကောင်အထည်ဖော် ဆောင်ရွက်တဲ့နေရာမှာ ရေတိုရေရှည် ဆောင်ရွက်ရမယ့် လုပ်ငန်းများကို ခွဲခြားသိမြင်ပြီးတော့မှ ညှိနှိုင်းဆောင်ရွက်ဖို့ လိုအပ်ပါတယ်။ ညှိနှိုင်းဆောင်ရွက်ပြီးတော့မှ လိုအပ်တဲ့ အကောင်အထည် ဖော်မှုတွေကိုလည်း ဆက်လက် ဆောင်ရွက်သွားဖို့ လိုအပ်ပါတယ်။ ကြားကာလ အတွင်းမှာ ငြိမ်းချမ်းရေး လုပ်ငန်းစဉ်တွေ တိုးတက်အောင်မြင်မှု ရရှိအောင်လို့ ကျွန်တော်တို့ နောက်ကြောင်းပြန် စဉ်းစားတာမျိုးတွေ မပြုလုပ်ဘဲ ရှေ့ဆက်သွားရမယ့် လမ်းကြောင်းကိုပဲ စဉ်းစားဆောင်ရွက်မှသာလျှင် ကျွန်တော်တို့ ထာဝရငြိမ်းချမ်းရေးရရှိ ဆောင်ရွက်နိုင်မှာ ဖြစ်ပါတယ်” ဟု  JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားသည်။

ယုံကြည်မှု တည်ဆောက်ရာတွင် ပုဂ္ဂိုလ်ရေး ရင်းနှီးမှုကို အခြေခံ၍ အပြန်အလှန် ယုံကြည်မှု တည်ဆောက်သွားနိုင်ပါက ပိုမိုလွယ်ကူနိုင်သည်ဟု ယူဆရသည့်အတွက် အောက်ခြေတပ်မှူး အချင်းချင်း ခင်မင်ရင်းနှီးမှုရှိအောင် ဆောင်ရွက်ရန် အစည်းအဝေး ပြီးဆုံးချိန်တိုင်းတွင် တွေ့ဆုံမှု ပြုလုပ်ရန် လိုအပ်နေသည်ဟုလည်း ၎င်းက ပြောကြားသည်။

JMC ဆိုင်ရာလုပ်ငန်းများ အကောင်အထည်ဖော် ဆောင်ရွက်နိုင်မှုနှင့် ပတ်သက်၍ အားနည်းချက်၊ အားသာချက်များ၊ အကြံပြုချက်များကို ယခုအစည်းအဝေးတွင် ပွင့်ပွင့်လင်းလင်း ဆွေးနွေးကြရန် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က တိုက်တွန်းခဲ့သည်။

 

NCA လက်မှတ်ရေးထိုးထားသော RCSS နှင့် PNLO တို့ ကဒူးကြီးဒေသတွင် ပစ်ခတ်တိုက်ခိုက်မှုဖြစ်ပွား

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားကြသော ရှမ်းပြည်ပြန်လည်ထူထောင်ရေးကောင်စီ (RCSS) နှင့် ပအို့ဝ်အမျိုးသားလွတ်မြောက်ရေးအဖွဲ့ချုပ် (PNLO) တို့ ရှမ်းပြည်နယ် (တောင်ပိုင်း)၊ မောက်မယ်မြို့နယ် ကဒူးကြီးဒေသ မန့်စီရွာအနီးတွင် မေ ၁၁ ရက် နံနက်ပိုင်းက တိုက်ပွဲဖြစ်ပွားခဲ့ကြောင်း နှစ်ဖက်တပ်ဖွဲ့ထံမှ သိရသည်။

ရှမ်းပြည်ပြန်လည်ထူထောင်ရေးကောင်စီ (RCSS) တပ်ဖွဲ့ဝင်များ နယ်မြေကျွံလာသည့်အတွက် နှစ်ဖက်ရင်ဆိုင် တိုက်ပွဲဖြစ်ပွားခဲ့ခြင်းဖြစ်ပြီး ပစ်ခတ်တိုက်ခိုက်မှုသည် ၁၅ မိနစ်ခန့်ကြာမြင့်ခဲ့ကာ တိုက်ပွဲကြောင့် ထိခိုက်ဒဏ်ရာ ရရှိမှုများရှိခဲ့သည်ဟု ပအို့အမျိုးသားလွတ်မြောက်ရေးအဖွဲ့ချုပ် (PNLO) ၏ နာယကဗိုလ်မှူးကြီး ခွန်ဥက္ကာက ပြောကြားသည်။

သို့သော်လည်း ကဒူးကြီးဒေသတွင်ရှိသည့် RCSS တပ်စခန်းတစ်ခုကို PNLO က ၀င်ရောက်တိုက်ခိုက်ခြင်းကြောင့်သာ တိုက်ပွဲဖြစ်ပွားခဲ့ခြင်းဖြစ်ပြီး နှစ်ဖက်သွားလာလှုပ်ရှားမှုများနှင့် ပတ်သက်၍ တစ်ဖက်နှင့်တစ်ဖက် အသိပေး၍ လှုပ်ရှားသွားလာခြင်းဖြင့် ပစ်ခတ်တိုက်ခိုက်မှုများကို ရှောင်ရှားနိုင်ကြောင်း RCSS ပြောရေးဆိုခွင့်ရှိသူ တောင်ကြီးဆက်ဆံရေးရုံးတာဝန်ခံ ဒုတိယဗိုလ်မှူးကြီး စိုင်းဦးက ပြောကြားသည်။

“အောက်ခြေမှာ သူတို့အချင်းချင်း သိနေကြတာပဲ။ နှစ်ဖက်တိုက်ပွဲမဖြစ်တာလည်း ကြာနေပြီလေ။ နောက်ပြီးတော့ JMC မှာလည်း သူတို့ကတွေ့နေကြတာပဲ။ နှစ်ဖက်တပ်တွေ တွေ့ဖြစ်ကြတယ်ပေါ့။ အဲဒီတော့ ကျွန်တော်တို့က တိုက်ပွဲဖြစ်တယ်လို့ ကြားတော့တောင် အံ့သြနေသေးတယ်။ ဘယ်လိုဖြစ်တာလဲပေါ့။ အဲဒီတော့ ကျွန်တော်တို့အထက်လူကြီးက တစ်ဖက်နဲ့တစ်ဖက် သတင်းပေးပြီးသွားနေကြတာပဲ။ မဖြစ်သင့်ဘူးလို့ ပြောတာပေါ့” ဟု ဒုတိယဗိုလ်မှူးကြီး စိုင်းဦးက ပြောကြားသည်။

ပစ်ခတ်တိုက်ခိုက်မှုဖြစ်ပွားခဲ့သည့် လက်နက်ကိုင်အဖွဲ့အစည်း နှစ်ဖွဲ့သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် ပါဝင်လက်မှတ်ရေးထိုးထားကြသော တိုင်းရင်းသားလက်နက်ကိုင် အဖွဲ့အစည်းများဖြစ်ကြသည့်အတွက် ယခုပစ်ခတ်တိုက်ခိုက်မှုနှင့် ပတ်သက်၍ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC) တွင် တင်ပြဆွေးနွေးသွားမည်ဖြစ်ကြောင်း သိရသည်။

ပြီးခဲ့သည့် ၂၀၁၇ ခုနှစ်အတွင်းက ကဒူးကြီးဒေသ နာဟီးကျေးရွာဘက်တွင် ဖြစ်ပွားခဲ့သော RCSS နှင့် PNLO တို့၏တိုက်ပွဲကြောင့် ဒေသခံ ၂၀၀ ကျော် နေရပ်စွန့်ခွာ ထွက်ပြေးတိမ်းရှောင်ခဲ့ရပြီး ယခုဖြစ်စဉ်တွင်မူ နေရပ်စွန့်ခွာ ထွက်ပြေးတိမ်းရှောင်ရသူများ မရှိကြောင်း သိရသည်။

ပဋိပက္ခဖြစ်စဉ်များတွင် နှစ်ဖက်တပ်များ ပြန်လည်ရုပ်သိမ်းရေးနှင့် နောင်အလား တူဖြစ်စဉ်များ မဖြစ်ပေါ်စေရေး အလျင်အမြန် ညှိနှိုင်းဆွေးနွေးရန် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေး ပူးတွဲစောင့်ကြည့်ရေးကော်မတီ ဒုဥက္ကဋ္ဌ (၁) တိုက်တွန်း

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-U အစည်းအဝေးကို ရန်ကုန်မြို့တွင် ပြုလုပ်စဉ် (ဓာတ်ပုံ-ချမ်းဝေစိုး)

ပဋိပက္ခဖြစ်စဉ်များတွင် ထွက်ပြေး တိမ်းရှောင်နေရသည့် ပြည်သူများ၏ အကျိုးစီးပွားကို ထောက်ထားခြင်းအားဖြင့် ၎င်းတို့၏ အသက်မွေးဝမ်းကျောင်း ပြုရာဒေသများသို့ ပြန်လည်အခြေပြုနိုင်ရန် နှစ်ဖက်တပ်များ ပြန်လည်ရုပ်သိမ်းခြင်းနှင့် နောင်အလား တူဖြစ်စဉ်များမဖြစ်ပေါ်စေရန် ညှိနှိုင်းဆွေးနွေးမှုများ အလျင်အမြန် ပြုလုပ်သွားရန် လိုအပ်ကြောင်း ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေး ပူးတွဲစောင့်ကြည့်ရေးကော်မတီ JMC-U ဒုတိယဥက္ကဋ္ဌ (၁) တိုင်းရင်းသား လက်နက်ကိုင်အဖွဲ့များ ကိုယ်စားလှယ် ကရင်အမျိုးသားအစည်းအရုံး (KNU) မှ ဗိုလ်ချုပ်စောအိုင်းဇက်ဖိုးက တိုက်တွန်း ပြောကြားသည်။

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေး ပူးတွဲစောင့်ကြည့်ရေးကော်မတီ JMC-U ၏ ၁၆ ကြိမ်မြောက် တွေ့ဆုံဆွေးနွေးပွဲကို မေ ၁၀ ရက်မှ စတင်ကာ ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် ပြုလုပ် လျက်ရှိပြီး ယင်းအစည်းအဝေးတွင် အဖွင့်အမှာစကားပြောကြားရာ၌ ဗိုလ်ချုပ်စောအိုင်းဇက်ဖိုးက အထက်ပါအတိုင်း တိုက်တွန်းပြောကြားခဲ့ခြင်း ဖြစ်သည်။

ဗိုလ်ချုပ်စောအိုင်းဇက်ဖိုးက“NCA မှ တစ်ဆင့် နိုင်ငံရေးဆွေးနွေးပွဲများမှသည် ပြည်ထောင်စု ငြိမ်းချမ်းရေးဆီသို့ဆိုတဲ့ ဆောင်ပုဒ်ကို အကောင်အထည်ဖော်တဲ့နေရာမှာ အဟန့်အတားဖြစ်စေမယ့် မည်သည့်အပြုအမူမျိုးကိုမှ မပြုလုပ်ကြရန် အထူးသတိထားရမှာဖြစ်ပါတယ်။ ယုံကြည်မှုပျက်ပြားစေမည့် အပြုအမူများကို မလုပ်ဘဲ ယုံကြည်မှုမြင့်မား စေမည့် မည်သည့်အပြုအမူမျိုးကိုမဆို နှစ်ဖက် လက်နက်ကိုင်များမှ အပစ်အခတ်ရပ်စဲရေး ခိုင်မာစေရန်အတွက် ဖန်တီးယူဖို့ လိုအပ်ပါတယ်။ Rectove ဆိုတဲ့ တုံ့ပြန်ပြုမူခြင်း အဆင့်ထက် Proactive ဆိုတဲ့ ဖန်တီးယူခြင်းဖြင့် ယုံကြည်မှု တည်ဆောက်ခြင်းကို အ ထောက်အကူဖြစ်စေမှာဖြစ်ပါတယ်။ လက်နက်ကိုင် ထိတွေ့မှုများကိုလည်း ကာကွယ်နိုင်မှာ ဖြစ်ပါတယ်။ ကျွန်တော်တို့ လက်နက်ကိုင် နှစ်ဖက်စလုံးမှာ ကိုယ့်ယုံကြည်ချက်ဖြင့်ကို ပြည်သူလူထုအကျိုးစီးပွားကို စောင့်ရှောက်နေကြတာဖြစ်သလို ယခုပစ်ခတ်မှု ဖြစ်စဉ်များကြောင့် ထွက်ပြေးတိမ်းရှောင်နေရတဲ့ ပြည်သူလူထု၏ အကျိုးစီးပွားကိုထောက်ထားခြင်းအားဖြင့် ၎င်းတို့၏ မူရင်းအသက်မွေးဝမ်းကျောင်းပြုရာ ဒေသများတွင် ပြန်လည်အခြေပြုနိုင်ရန်အတွက် တပ်များပြန်လည်ရုပ်သိမ်းခြင်းနှင့် နှစ်ဖက်တပ်များအကြား ယခုဖြစ်စဉ်နှင့်အတူ နောင်အလားတူဖြစ်စဉ်များ မဖြစ်ပေါ်စေရန် ညှိနှိုင်းဆွေးနွေးမှုများ အလျင်အမြန် လုပ်သွားရန်တိုက်တွန်းလိုပါတယ်။ ဒါကြောင့်  JMC ရဲ့ အခြေခံမူများအတိုင်း ပဋိပက္ခများကို အင်အားသုံး ဖြေရှင်းခြင်းမပြုဘဲ ဘက်လိုက်မှုကင်းခြင်း၊ ပွင့်လင်းမြင်သာမှုရှိခြင်း၊ တရားမျှတမှုရှိခြင်း၊ ဂုဏ်သိက္ခာရှိခြင်းတို့နှင့်အတူ ညှိနှိုင်းအဖြေရှာသွားရန် တိုက်တွန်းလိုပါတယ်” ဟု ပြောကြားသည်။

ထို့ပြင် လက်ရှိအချိန်တွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA) လက်မှတ်ရေးထိုးလာခဲ့သည်မှာ နှစ်နှစ်ခွဲကျော်ကြာမြင့်လာပြီဖြစ်သော်လည်း နှစ်ဖက်တပ်များအကြား သံသယစိတ်နှင့် စိုးရိမ်စိတ်များ ရှိနေသေးသည်ကို အားလုံးလက်ခံကြရမည်ဖြစ်ကြောင်း၊ JMC အစည်းအဝေးများတွင် တစ်ဖက်နှင့်တစ်ဖက် ယုံကြည်မှုတည်ဆောက်ရန် တိုက်တွန်းနေကြောင်း၊ ထို့ကြောင့် NCA  နှင့် JMC အကောင်အထည်ဖော်မှုများကို သဘောပေါက် နားလည်ရန်အတွက် အလုပ်ရုံဆွေးနွေးပွဲများ နှင့် ရင်းနှီးမှု၊ ယုံကြည်မှုများတည်ဆောက်ရန်အတွက် အောက်ခြေနှစ်ဖက်တပ်မှူးများ တွေ့ဆုံသွားရန်ရှိကြောင်းကိုလည်း ၎င်းက ဆက်လက်ပြောကြားသည်။

သို့သော် ဗိုလ်ချုပ်စောအိုင်းဇက်ဖိုးက “ယုံကြည်မှုအဆင့်ဆိုသည်မှာ ဒေသတစ်ခု နှင့် တစ်ခုအကြား တူညီမှု မရှိသည်ကို အသိအမှတ်ပြုရမှာဖြစ်ပါတယ်။ ဒါကြောင့် အခြေအနေအမျိုးမျိုးကြောင့် ယုံကြည်မှုနည်းပါးနေသေးတဲ့ ဒေသတွေမှာ ဘာပဲလုပ်လုပ် အထူးသတိထားရမှာဖြစ်ပါတယ်။ ကြိုတင်ညှိနှိုင်းမှုများကို အချိန်ယူညှိနှိုင်းဖို့လိုအပ်ပါတယ်။ ဘာမဟုတ်တဲ့ အသေးအဖွဲအပြုအမူများသည်ပင် ရှိပြီးသား ယုံကြည်မှုတွေကိုပျက်ပြားစေနိုင်ပြီး လက်နက်ကိုင်ပဋိပက္ခအခြေအနေကို ပြန်လည်တွန်းပို့နိုင်ပါတယ်။ ဒါက လည်း လက်ရှိဖြစ်ပေါ်နေတဲ့ အခြေအနေများကို အခြေခံပြောကြားခြင်းဖြစ်ပါတယ်” ဟု ဆက်လက်ထည့်သွင်းပြောကြားသည်။

ထို့အတူ JMC-U ဥက္ကဋ္ဌ တပ်မတော်သားကိုယ်စားလှယ် ဒုတိယဗိုလ်ချုပ်ကြီး ရာပြည့်က လက်ရှိအနေအထားတွင်  JMC လက်မှတ်ရေးထိုးထားသည့် အဖွဲ့အစည်းများအကြား ပဋိပက္ခဖြစ်စဉ်များ အနည်းငယ်ရှိနေသည်ကို တွေ့ရသော်လည်း ကြီးမားသည့် ဖြစ်စဉ်များမဟုတ်ကြောင်း၊ ထိုကဲ့သို့ ပေါ်ပေါက်ရသည့် အကြောင်းရင်းများကို ပြန်လည်ဆန်းစစ်ရာတွင် ကော်မတီဝင်အချင်းချင်းများအကြား တွေ့ဆုံညှိနှိုင်းအဖြေရှာမှု အားနည်းနေသည်ကိုတွေ့ရကြောင်း၊ နောက်ကြောင်းပြန် စိုးရိမ်ပူပန်မှုများလည်း ရှိသည်ကို တွေ့ရကြောင်း၊ ထို့အတွက် ပွင့်လင်းမြင်သာမှု၊ တာဝန်ခံမှု၊ တာဝန်ယူမှုများနှင့် ရင်းနှီးစွာ ယုံကြည်မှု တည်ဆောက်သွားရန်လိုအပ်ကြောင်း၊ သို့မှသာ အေးချမ်းတည်ငြိမ်သည့် ဒေသဖွံ့ဖြိုးရေးလုပ်ငန်းများကို အပြန်အလှန် ယုံကြည်ကိုးစားမှုများနှင့်အတူ ရေရှည်ငြိမ်း ချမ်းရေးကို ဆက်လက်အကောင်အထည် ဖော်သွားနိုင်မည်ဟု ယုံကြည်ကြောင်း အဖွင့်အမှာစကားတွင် ထည့်သွင်း ပြောကြားခဲ့သည်။

JMC-U ၏ ၁၆ ကြိမ်မြောက်တွေ့ဆုံ ဆွေးနွေးပွဲကို မေ ၁၁ ရက်အထိ ပြုလုပ်သွားမည်ဖြစ်ပြီး အဆိုပါအစည်းအဝေးတွင် ကရင်ပြည်နယ်၊ ဖာပွန်ခရိုင်၊ လယ်မူပလော ဒေသတွင် ဖြစ်ပွားခဲ့သော တပ်မတော်နှင့် KNU လက်အောက်ခံ KNLA တပ်မဟာ (၅) တို့အကြား ထိတွေ့မှုများနှင့် ပတ်သက်၍ ထည့်သွင်းဆွေးနွေးသွားမည်ဖြစ်ကြောင်း JMC-U အတွင်းရေးမှူး (၂) တပ်မတော်သားကိုယ်စားလှယ် ဗိုလ်မှူးကြီး ၀ဏ္ဏအောင်က ပြောကြားထားသည်။