ကားအင်ဂျင် မီးလောင်မှုဖြစ်ပွားခြင်းနှင့် ဆက်စပ်၍ BMW ရုံးကို တောင်ကိုရီးယားရဲက ၀င်ရောက်စီးနင်း

သြဂုတ် ၁၄ ရက်တွင် ဆိုးလ်၌ BMW ဆားဗစ်စင်တာတစ်ခုအနီး BMW ကားများအား တွေ့ရစဉ် (Photo: AP)

ကားအင်ဂျင် ဒါဇင်ပေါင်းများစွာ မီးလောင်ကျွမ်းမှုများနှင့် ဆက်စပ်လျက် သြဂုတ် ၃၀ ရက်တွင် တောင်ကိုရီးယားရဲက ဂျာမန်ကားလုပ်ငန်း BMW ၏ ဆိုးလ်ရုံးချုပ်ကို စီးနင်းခဲ့သည်။ မော်တော်ယာဉ် ချို့ယွင်းချက်များကို ကုမ္ပဏီက ဖုံးကွယ်ထားခြင်း ရှိ၊ မရှိ အရာရှိများကို စုံစမ်းစစ်ဆေးနေပြီး စာရွက်စာတမ်းများနှင့် အခြားသောပစ္စည်းများကို သိမ်းဆည်းခဲ့ကြောင်း ဆိုးလ်မြို့ ရဲတပ်ဖွဲ့၏ ဥာဏမှုခင်းဌာနစိတ်မှ အရာရှိက ပြောကြားခဲ့သည်။

နောက်ထပ် အသေးစိတ် အချက်အလက်များကို ၎င်းကပြောကြားရန် ငြင်းဆန်ခဲ့သော်လည်း စုံစမ်းစစ်ဆေးရေးသမား ၃၀ ပါသောအဖွဲ့ ပါဝင်ခဲ့သည်ဟု ယွန်ဟပ်သတင်း အေဂျင်စီက ပြောကြားသည်။ “အမှန်တရား ပေါ်လာဖို့ ကျွန်တော်တို့ သေသေချာချာ စုံစမ်းသွားမှာဖြစ်ပါတယ်” ဟု ရဲတစ်ဦး၏ ပြောဆိုချက်ကို ယွန်ဟပ်က ကိုးကားဖော်ပြခဲ့သည်။ BMW ကားများ မီးလောင်မည်စိုးသဖြင့် ကားပါကင်တချို့က အဆိုပါကားများကိုလက်ခံရန် ငြင်းဆန်ခဲ့ခြင်းနှင့်အတူ ယခုနှစ်တွင် လက်ရှိအချိန်အထိ BMW ကား ၄၀ စီးကျော် မီးစွဲလောင်ခဲ့သည်ဟူသော သတင်းများ ထွက်ပေါ်လာခဲ့ပြီးနောက် ယခုစီးနင်းမှုပြုလုပ်ခဲ့ခြင်း ဖြစ်သည်။

ဘေးကင်းရေး စစ်ဆေးချက်များ ပြုလုပ်ရခြင်းမရှိသေးသော BMW ကားများကို ယခုလတွင် လမ်းပေါ်တွင် မောင်းနှင်ခွင့် ယာယီပိတ်ပင်မှုပြုလုပ်ခဲ့ပြီး ၎င်း၏ဒေသတွင်းလုပ်ငန်းခွဲ၊ ၎င်းတို့၏ထိပ်တန်းတာဝန်ရှိသူ ကိုးဦးနှင့် လုပ်ငန်းတို့အား ရာဇ၀တ်ကြောင်းအရ စုံစမ်းစစ်ဆေးပေးရန် BMW ကားပိုင်ရှင်တို့က တိုင်ကြားခဲ့ကြသည်ဟု ဆိုသည်။

Ref: AFP

BMW က ဟန်ဂေရီ၌ တည်ဆောက်မည့် ပထမဆုံးကားစက်ရုံအတွက် ယူရိုတစ်ဘီလျံမြှုပ်နှံမည်

၂၀၁၂ ခုနှစ် မတ် ၂၃ ရက်တွင် ဂျာမနီတောင်ပိုင်း ဒင်ဂိုဖင်းမြို့၌ BMW ၏ ကားတပ်ဆင်ရေးစက်ရုံတစ်ရုံကို တွေ့ရစဉ် (Photo: AFP)

BMW ကားကုမ္ပဏီက ဟန်ဂေရီတွင် တည်ဆောက်မည့် ကားစက်ရုံသစ်အတွက် ယူရိုတစ်ဘီလျံ (ဒေါ်လာ ၁ ဒသမ ၂ ဘီလျံ) ရင်းနှီးမြှုပ်နှံသွားမည်ဖြစ်ကြောင်း ဇူလိုင် ၃၁ ရက်တွင် ပြောကြားခဲ့သည်။ BMW သည် လုပ်ခလစာနည်းပါးသော ဥရောပအလယ်ပိုင်းတွင် ကားစက်ရုံများ တည်ဆောက်နေကြသည့် ၎င်း၏မိတ်ဖက် ဂျာမန်ကားကုမ္ပဏီများနည်းတူ စက်ရုံတည်ဆောက်ရန် လုပ်ဆောင်နေခြင်းဖြစ်သည်။ အဆိုပါ ကားစက်ရုံအား နိုင်ငံအရှေ့ပိုင်းရှိ ဒီဘရီဆန်မြို့အနီးတွင် တည်ဆောက်မည်ဖြစ်ပြီး တစ်နှစ်လျှင် ကားအစီးရေ ၁၅၀၀၀၀ ထုတ်လုပ်မည်ဖြစ်ကာ သမားရိုးကျ ဘက်ထရီကားများနှင့် လျှပ်စစ်စွမ်းအင်သုံးကားများပါ ထုတ်လုပ်မည် ဖြစ်သည်။ အလုပ်အကိုင် နေရာ ၁၀၀၀ ကျော်နီးပါး ဖန်တီးပေးနိုင်လိမ့်မည်ဟု ခန့်မှန်းထားကြသည်။

ကားစက်ရုံတည်ဆောက်ရန် ဒီဘရီဆန်မြို့အား ရွေးချယ်ရခြင်းမှာ အခြေခံအဆောက်အအုံ ကောင်းမွန်ခြင်း၊ သင့်လျော်သော ထောက်ပံ့ပို့ဆောင်ရေးနှင့် စီမံဖွဲ့စည်းမှုများ ရှိခြင်းတို့ကြောင့်ဖြစ်ကြောင်း BMW က ပြောကြားခဲ့သည်။ ဟန်ဂေရီ နိုင်ငံခြားရေးဝန်ကြီး ပီတာဆီဂျာတိုက စက်ရုံသစ် တည်ဆောက်ရန်အတွက် ဆွေးနွေးပွဲများသည် ၁၄ လအထိ ကြာမြင့်ခဲ့ကြောင်း၊ ကုမ္ပဏီ၏ ဆုံးဖြတ်ချက်သည် ဟန်ဂေရီနိုင်ငံအတွက် ကြီးမားသော အောင်မြင်မှုကြီးဖြစ်ကြောင်း ပြောကြားခဲ့သည်။ BMW ကုမ္ပဏီ သည် ပြိုင်ဘက် Audi နှင့် Mercedes-Benz ကုမ္ပဏီများကဲ့သို့ ဂျာမနီ၏ ပျမ်းမျှလုပ်ခ လစာထက် သုံးပုံတစ်ပုံ လျော့နည်းသော ဟန်ဂေရီတွင် ရင်းနှီးမြှုပ်နှံနေသည်။ BMW သည် ဥရောပတွင် ကားစက်ရုံ ၁၂ ရုံ တည်ဆောက်ထားကာ ဂျာမနီ၌ ရှစ်ရုံ၊ ဗြိတိန်၌ သုံးရုံ၊ သြစတြီးယား၌တစ်ရုံ ပါဝင်သည်။

Ref: AFP