ရန်ကုန်တိုင်းဒေသကြီးအစိုးရအနေဖြင့် မြို့သစ်စီမံကိန်းများ အကောင်အထည်ဖော်ရာတွင် အမှန်တကယ် လိုအပ်မှု ရှိ၊ မရှိ သေချာစိစစ်ပြီးမှ ဆောင်ရွက်ရန် သမ္မတဦးဝင်းမြင့် ပြောကြား

ရန်ကုန်တိုင်းဒေသကြီး အစိုးရအနေဖြင့် မြို့သစ်စီမံကိန်းများ အကောင်အထည်ဖော် ဆောင်ရွက်ရာတွင် အမှန်တကယ်လိုအပ်မှု ရှိ၊ မရှိ သေချာစိစစ်ပြီးမှ ဆောင်ရွက်ရန် သမ္မတဦးဝင်းမြင့်က ဇူလိုင် ၂၉ ရက်တွင် ရန်ကုန်တိုင်း အစိုးရအဖွဲ့ဝင်များ၊ ဌာနဆိုင်ရာများ၊ လွှတ်တော်ကိုယ်စားလှယ်များနှင့် တွေဆုံစဉ် မှာကြားခဲ့ကြောင်း ပန်းဘဲတန်းမဲဆန္ဒနယ် အမှတ် (၁) တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။

သမ္မတ ဦးဝင်းမြင့်သည် ရန်ကုန်တိုင်း အစိုးရအဖွဲ့ဝင်များ၊ ဌာနဆိုင်ရာများ၊ လွှတ်တော်ကိုယ်စားလှယ်များနှင့် တွေ့ဆုံရာတွင် အုပ်ချုပ်ရေး၊ တရားစီရင်ရေးနှင့် ဥပဒေပြုရေးစသည့် မဏ္ဍိုင်ကြီးသုံးရပ်ကို အဓိကထား ဆွေးနွေးမှာကြားခဲ့ကြောင်း သိရသည်။

ဦးသန်းနိုင်ဦးက “တိုင်းအစိုးရက လုပ်မယ့်စီမံကိန်းတွေနဲ့ပတ်သက်လို့ အထူးသဖြင့် သူပြောသွားတာကတော့ မြို့သစ်စီမံကိန်းလို ကိစ္စမျိုးဆိုရင် သေချာအလေးထားပြီးတော့ တကယ်လိုအပ်ချက်ရှိတယ်ဆိုရင်တော့ အလေးထားပြီး ဆောင်ရွက်ဖို့ပြောသွားတယ်။ နောက်တစ်ခုက တကယ်ကိုပဲ လိုအပ်နေပြီလား။ မြို့သစ်တွေဖော်ထုတ်ပြီးတော့ အဲဒီမြို့သစ်တွေက လမ်းတွေတံတားတွေ ပြည့်ပြည့်စုံစုံဖြစ်ပြီးလား အိမ်ရာတွေပြည့်ပြီလား။ တချို့က ဒီဘက်ကမြို့သစ်၊ တစ်ဖက်မှာ လယ် ကွင်း ဒါမျိုးတွေဖြစ်ပြီးတော့ ဖရိုဖရဲနဲ့ အဟောသိကံဖြစ်သွားမှာမျိုး သမ္မတကြီးက မလိုလားတဲ့ပုံစံမျိုးပြောသွားပါတယ်။ တကယ်လို့ လိုအပ်တယ်ဆိုရင် သေသေချာချာစိစစ်ပြီးတော့မှ ဆောင်ရွက်ဖို့ကိစ္စတွေကို သမ္မတကြီးက အလေးပေး ပြောသွားပါတယ်” ဟု ပြောကြားသည်။

ထို့ပြင် နိုင်ငံတော်သမ္မတအနေဖြင့် မြို့သစ်များတည်ပြီး လူမရှိသူမရှိဖြစ်နေမည့် အခြေအနေကို စိုးရိမ်ကြောင်းလည်း ထည့်သွင်းပြောကြားသွားသည်ဟု ဒဂုံမဲဆန္ဒနယ် အမှတ် (၂) မှ တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက မီဒီယာများကို ပြောကြားသည်။

“နောက်တစ်ခါ မြို့သစ်စီမံကိန်းတွေပေါ့။ မေးခွန်းပြန်ထုတ်ပါတယ်။ ရန်ကုန်တိုင်းဒေသကြီး အစိုးရအဖွဲ့တင်ပြပြီးတဲ့အခါမှာ ယခင် တည်ဆောက်ပြီးသား မြို့သစ်တွေမှာတောင် လူများ နေထိုင်မှုမရှိသေးဘဲနဲ့ မြို့သစ်ကို ဖော်မလား။ ဟိုဘက်မှာလည်း မြို့သစ်က ဖော်လိုက်တဲ့အခါမှာ ဟိုဟာလည်း လူမရှိ၊ အရင်ဖော်တဲ့နေရာမှာလည်း လူမရှိ ခြောက်တီး ခြောက်ကပ်ဖြစ်နေမယ်။ ဒါတွေကိုတော့ သတိထားပြီးတော့ စီမံဆောင်ရွက်ပါဆိုတဲ့ဟာကို လမ်းညွန်သွားတယ်။ ၀န်ကြီးချုပ်ကြီး တင်ပြတဲ့အခါမှာ မြို့သစ်စီမံကိန်းကိုပဲ သူ ဦးတည်ပြောပါတယ်။ အခုရှိတဲ့ မြို့ဟောင်းတွေမှာရော လူတွေနေပါလားလို့ မေးသွားတယ်။ လူမရှိ သူမရှိနဲ့ မြို့သစ်တွေတည်ပြီး လူမရှိသူမရှိနဲ့ ခြောက်တီးခြောက်ကပ်ဖြစ်နေမှာကို စိုးရိမ်တယ်။ မင်းတို့ အဲဒါတွေ ကြည့်ပြီးတော့ စီမံပါဦးလို့ ပြောသွားတယ်”  ဟု ဦးကျော်ဇေယျက ပြောကြားသည်။

မြို့သစ်စီမံကိန်းသည် ဗဟိုခွာစနစ်အရ အကောင်အထည်ဖော်ရမည်မှန်သော်လည်း ရေရှည်စီမံကိန်းဖြစ်သည့်အတွက် လွှတ်တော်၏ ဆုံးဖြတ်ချက်ကိုအတည်ပြုရယူပြီးမှသာ ဆက်လုပ်စေချင်ကြောင်း ဦးကျော်ဇေယျက ၎င်း၏အမြင်ကိုလည်း ထည့်သွင်းပြောကြားသွားသည်။

“မြို့သစ်စီမံကိန်းကတော့ အန်ကယ်ရဲ့ တစ်ဦးချင်းအနေအထားကတော့ မြို့သစ်စီမံကိန်းဟာ အကောင်အထည်ဖော်ရမှာ မှန်တယ်။ မြို့တော်ဝန်ကြီးလည်း ရှင်းပြတယ်။ ဗဟိုခွာစနစ်ပေါ့လေ။ မြို့ထဲမှာ ကျပ်နေတာတွေကို လူထုကို အပြင်ဆွဲထုတ်တာ။ အဲဒါတွေကတော့ သူကတော့ သူ့အမြင်နဲ့ ပြောသွားတာပေါ့။ အန်ကယ်တို့ကတော့ မြို့သစ် စီမံကိန်းဟာ Long Time Plan ကြီးပဲ။  ရှေရည် Plan ကြီး။ သူတို့ ကုမ္ပဏီအနေနဲ့လည်း လေ့လာနေတယ်။ အသေးစိတ် မသိသေးဘူး။ အသေးစိတ် သူတို့ လေ့လာနေတာတွေကို အန်ကယ်တို့ကို ပြန်တင်ပြပါ။ တင်ပြပါမှ အန်ကယ်တို့ လွှတ်တော်ကနေ ဆုံးဖြတ်မယ်။ ဆုံးဖြတ်ပြီးတော့ အတည်ပြုချက်ရယူပြီးမှ ဆက်လုပ်စေချင်တယ်။ အန်ကယ့်အမြင်ကတော့ လောလောဆယ်မှာ မလုပ်စေချင်ပါဘူး။ အန်ကယ်အနေနဲ့ ဒါဟာ ရေရှည်စီမံကိန်းကြီးဖြစ်တဲ့အတွက် နိုင်ငံ့အနေအထားကလည်း မြို့သစ်မလိုသေးဘူးလေ။ အန်ကယ့် အမြင်ပြောတာပါ။ ဒါတော့ လွှတ်တော်ကနေ ပြန်ပြီးတော့ ၀ိုင်းဝန်းဆုံးဖြတ်ရမယ့်ဟာပါ” ဟု ဦးကျော်ဇေယျက ပြောကြားသည်။

စစ်တွေ ကမ်းနားမြို့သစ် စီမံကိန်းလုပ်ငန်း ဆောင်တာများ ပြီးစီးမှု မရှိသေးသဖြင့် မြေကွက်ရောင်းချမှု ရပ်ဆိုင်းထားရန် ရခိုင်ပြည်နယ်အစိုးရအဖွဲ့ ညွှန်ကြားထားဟု ဆို

ရခိုင်ပြည်နယ်အစိုးရအဖွဲ့နှင့် ကိုရီးယားနိုင်ငံအခြေစိုက် BXT International တို့ ပူးပေါင်း အကောင်အထည်ဖော်ဆောင်ရွက်နေပြီး ၂၀၁၈ ခုနှစ် ဇန်န၀ါရီတွင် စတင်ရောင်းချခဲ့သည့် မြေကွက်ရောင်းချမှုများအား ရခိုင်ပြည်နယ် အစိုးရအဖွဲ့တားမြစ်ချက်အရ ရပ်ဆိုင်းထားရကြောင်း သိရသည်။

ရခိုင်ပြည်နယ်အစိုးရနှင့် BXT International တို့က မြေဧက ၉၀ ကျော်ပေါ်တွင် အကောင်အထည်ဖော်မည့် စစ်တွေကမ်းနား မြို့သစ်စီမံကိန်းအတွက် မြေတစ်စတုရန်းပေလျှင် ကျပ်သောင်းဂဏန်းဖြင့် ရောင်းချမည်ဖြစ်ကြောင်း ၂၀၁၇ ခုနှစ် ဒီဇင်ဘာ ၂၈ ရက် တွင် စီမံကိန်းမြေကွက်များ တာဝန်ခံရောင်းချပေးမည့် iMynamar House.com မှ ရန်ကုန်မြို့၌ မိတ်ဆက်မှုပြုခဲ့ကာ ရခိုင်ပြည်နယ် အစိုးရအဖွဲ့ဝန်ကြီး ဦးကျော်လွင်က အဖွင့်အမှာစကားပြောကြားသည်။ ၂၀၁၈ ခုနှစ် ဇန်န၀ါရီ ၆ ရက် ၇ ရက်များတွင် ရန်ကုန်မြို့ နိုဗိုတယ်ဟိုတယ်၌ တစ်ပေပတ်လည် ကျပ် ၂၅၀၀၀ ဖြင့် ရောင်းချရာ ကျပ် ၂၆ ဘီလျံကျော်ဖိုး ရောင်းချနိုင်ခဲ့သည်ဟု iMynamar House.com မှ သတင်းထုတ်ပြန်ခဲ့သည်။

“လုပ်ငန်းဆောင်တာတွေ မပြီးသေးတဲ့အတွက် မြေကွက်ရောင်းချမှုတွေ ရပ်ဆိုင်းထားဖို့ အစိုးရအဖွဲ့က အမိန့်စာထားပါတယ်။ ဒါကြောင့်မို့ ရောင်းချမှုတွေကို ခဏရပ်ဆိုင်းထားပါတယ်။ ဒါပေမဲ့ ပြီးခဲ့တဲ့ဇန်န၀ါရီတုန်းက မြေကွက်စရောင်းချိန်မှာ ဘီလျံ ၂၀ ဖိုးလောက် ရောင်းချထားပြီးပါပြီ။ ဒါပေမဲ့ ငွေအပြည့်အ၀ ယူထားပြီးတာတော့ မဟုတ်ဘဲ စိတ်ဝင်စားကြေး ၁၀ သိန်းဆီပဲ ယူထားတာဖြစ်ပါတယ်” ဟု စီမံကိန်းမြေကွက်များ တာဝန်ခံရောင်းချပေးမည့် iMynamar House.com မှ MD ဦးနေမင်းသူက မေ ၄ ရက်တွင် ပြောကြားသည်။

အဆိုပါမြို့သစ်စီမံကိန်း အကောင်အထည်ဖော်ဆောင်ရာတွင် ရခိုင်ပြည်နယ် အစိုးရမှ ရာခိုင်နှုန်း ၃၀ နှင့် ကျန်ရာခိုင်နှုန်း ၇၀ ကို တောင်ကိုရီးယားနိုင်ငံအခြေစိုက် BXT International ကုမ္ပဏီမှ ပိုင်ဆိုင်မည်ဖြစ်ပြီး ရခိုင်ပြည်နယ်အစိုးရအနေဖြင့် နည်းဥပဒေပိုင်းဆိုင်ရာ၊ ဥပဒေပိုင်းဆိုင်ရာနှင့်မြေယာ ကိစ္စများအတွက် လုပ်ဆောင်ပြီး BXT International မှ ကျန်ရင်းနှီးမြှုပ်နှံသည့် ငွေကြေးများ၊ မြေဖို့သည့်နည်းပညာ စသည်ဖြင့် တာဝန်ယူထားကြောင်းနှင့် ၀ယ်ယူမည့်မြေအတွက် ရခိုင်ပြည်နယ်အစိုးရက ဂရန်ထုတ်ပေး မည်ဖြစ်ကြောင်း သတင်းစာရှင်းလင်းပွဲတွင် ပြောကြားထားသည်။

ပဲခူးတိုင်းဒေသကြီး၏ ပထမဆုံးဖြစ်လာမည့် အနာဂတ်စီးပွားရေး ဖွံ့ဖြိုးရေးဇုန်ကို ပြည်မြို့တွင် တည်ဆောက်မည်

ဧပြီ ၂၈ ရက်က ဇီးအုပ်ကျောင်းတွင် ဒေသခံတောင်သူများနှင့် တွေ့ဆုံဆွေးနွေးနေစဉ်

ပဲခူးတိုင်းဒေသကြီး၏ ပထမဆုံးဖြစ်လာမည့် အနာဂတ်စီးပွားရေး ဖွံ့ဖြိုးရေးဇုန်ကို ပြည်မြို့တွင် တည်ဆောက်မည်ဖြစ်ကြောင်း သိရသည်။

အဆိုပါဇုန်ကို ပြည်မြို့နယ်၊ ဇီးအုပ်ကျေးရွာအုပ်စု ပြည်-အောင်လံ အဝေးပြေးကားလမ်းဘေးရှိ လယ်မြေများပေါ်တွင် အကောင်အထည်ဖော်သွားမည်ဖြစ်ကာ စီမံကိန်းနှင့်ပတ်သက်၍ ဌာနဆိုင်ရာများ၊ လွှတ်တော်ကိုယ်စားလှယ်၊ ကုမ္ပဏီတာဝန်ရှိသူများ၊ ဒေသခံလယ်သမားများ တွေ့ဆုံပွဲကို ဇီးအုပ် မူလတန်းကျောင်းတွင် ဧပြီ ၂၈ ရက် နံနက်ပိုင်းတွင် ပြုလုပ်ခဲ့ကြကြောင်း သိရသည်။

“ဒါ ပဲခူးတိုင်းဒေသကြီးရဲ့ ပထမဆုံး မြို့သစ်စီမံကိန်းဖြစ်လာမယ်။ ကျွန်တော်တို့ အစိုးရသစ်လက်ထက်မှာ ယခင်ပုံဖော်တဲ့ မြို့သစ်စီမံကိန်းတွေနဲ့မတူတဲ့ စနစ်ကျတဲ့ မြို့သစ်စီမံကိန်းဖြစ်အောင် အတတ်နိုင်ဆုံး စောင့်ကြည့်ထိန်းကျောင်း လုပ်ဆောင်သွားမယ်။ အခုဆောက်မယ့်နေရာက လယ်တွေလျှပ်စစ်မြစ်ရေတင် လုပ်ငန်းနဲ့စိုက်တဲ့လယ်တွေ ဖြစ်တယ်။ အစိုးရလျှပ်စစ် မြစ်ရေတင်လုပ်ငန်းက အရှုံးပေါ်နေလို့ လျှပ်စစ်နဲ့ မြစ်ရေတင်ခြင်းကို ရပ်တယ်။ ဒီတောင်သူတွေက မြို့သစ်စီမံကိန်းတစ်ခု အကောင်အထည်ဖော်ချင်ပါတယ်ဆိုလို့ တောင်းဆိုလို့ အစိုးရအဖွဲ့နဲ့ ချိတ်ဆက်ပေးတယ်။ အစိုးရအဖွဲ့ကလည်း စီမံကိန်းကြီးတဲ့အတွက် လုပ်ငန်းရှင်၊ အစိုးရ၊ တောင်သူသုံးဦးသုံးဖလှယ် ပူးပေါင်းလုပ်ဆောင်မှု ပုံသဏ္ဌာန်နဲ့ အကောင်အထည်ဖော်ဖို့ လမ်းညွှန်တဲ့အတွက် အကောင်အထည်ဖော်ဖို့ လုပ်ဆောင်နေတာပါ။ အဓိက,ကတော့ တောင်သူတွေတောင်းဆိုလို့ လုပ်တာပါ” ဟု ပြည်မြို့နယ် တိုင်းဒေသကြီးလွှတ်တော် ကိုယ်စားလှယ်ဦးကျော်ဇေယျက ပြောကြားသည်။

အဆိုပါစီမံကိန်း တည်ဆောက်မည့်နေရာမှာ ၃၆၂ ဧက အကျယ်အ၀န်းရှိ လယ်မြေများပေါ်တွင် မြန်မာငွေကျပ် ၁၅ ဘီလျံ အကုန်အကျခံ အကောင်အထည်ဖော်မည်ဖြစ်ကာ တောင်သူလယ်သမားများအတွက် ၁ ဧကလျှင် ပေ ၄၀×၆၀၊ မြေကွက်နှစ်ကွက်ပေးမည်ဖြစ်ကာ ကွန်ကရစ်လမ်း၊ မီးနှင့် မြို့သစ်စီမံကိန်း ပုံသဏ္ဌာန် အကောင်အထည်ဖော်ပေးမည်ဖြစ်ကြောင်း သိရသည်။

“မြို့သစ်စီမံကိန်း အကောင်အထည်ဖော်ဖို့အတွက် ဒီတောင်သူတွေဆီကနေ အကြမ်းဖျင်းပေါ့။ လုပ်ငန်းကော်မတီလေး ဖွဲ့ထားပါတယ်။ အဲဒီလုပ်ငန်းကော်မတီကနေ လယ်ယာမြေလုပ်ပိုင်ခွင့် လွှဲပြောင်းပေးအပ်ပွဲဖြစ်ပါတယ်။ တောင်သူများလိုအပ်ချက်ကို ဦးတည်ပြီးညှိနိုင်းတဲ့အခါမှာ တောင်သူမြေယာပိုင်ဆိုင်မှုပေါ်မှာ မူတည်ပြီး တစ်ဧကကို နှစ်ကွက်နှုန်းပေးမယ်။ တောင်သူတွေနဲ့ သဘောတူညီမှု ရထားပါတယ်။ သက်ဆိုင်ရာ သတ်မှတ်ပေးထားတဲ့ မြို့ပြအင်္ဂါရပ်နဲ့အညီ လမ်းတွေလျှပ်စစ်မီးတွေပါရမယ်။ ဒီအပေါ်မှာ ညှိနှိုင်းကြတာဖြစ်ပါတယ်။ ဒါတွေကလည်း အကောင်အထည်ဖော်တဲ့သူဘက်က ဆောင်ရွက်ပေးသွားဖို့ သဘောတူညီချက်ရခဲ့ပါတယ်” ဟု စီမံကိန်းကို အကောင်အထည်ဖော်မည့် ကောင်းသစ်ဟိန်းကုမ္ပဏီ၏ MD ဦးဝင်းခိုင်က ဆိုသည်။

လယ်မြေများမှာ တောင်သူ ၉၉ ဦး လုပ်ကိုင်စားသောက်နေသည့် မြေများဖြစ်ကာ တောင်သူများအနေဖြင့် စီမံကိန်းကို သဘောတူညီမှုရှိကာ အမြန်အကောင်အထည်ဖော်ရန်နှင့် အာမခံချက်များအတိုင်း အရည်အသွေးပြည့်ဝသည့် အကောင်အထည်ဖော်မှုကို လိုလားကြောင်း တောင်သူများက ဆိုသည်။

ဆောက်လုပ်ရေး လုပ်ငန်းတွေ ကောင်းချင်သလား … မြို့သစ်စီမံကိန်းတွေ ရွှေ့ဆိုင်းလိုက်ပါ

ဒဂုံမြို့သစ် (အရှေ့ပိုင်း) မြို့နယ်အတွင်းရှိ တန်ဖိုးနည်းအိမ်ရာများကို တွေ့ရစဉ် (ဓာတ်ပုံ-ရှိုင်းလင်းအောင်)

(၁)

၂၀၁၈ ခုနှစ် ပြည်ထောင်စုရဲ့ အခွန်အကောက် ဥပဒေကြမ်းမှာပါတဲ့ အခွန်ကင်းလွတ်ခွင့် ပေးထားတဲ့ ပုဒ်မ ၂၅ ကို ကျင့်သုံးဖို့ မသင့်လျော်တဲ့အတွက် ပြည်ထောင်စုလွှတ်တော် ဥပဒေကြမ်း ပူးပေါင်းကော်မတီဝင် အများစုက လက်ခံထားသလို လွှတ်တော်ကိုယ်စားလှယ် အများစုကလည်း ကန့်ကွက်တဲ့အတွက် ဒီဥပဒေမှာပါတဲ့ အခွန်လျှော့ချမယ့် (Tax Holiday) အခွင့်အလမ်း နည်းသွားပြီလို့ ဆိုရမှာဖြစ်ပါတယ်။

ဒါကြောင့် အခွန်ဖြေလျှော့တဲ့ အစီအစဉ်နဲ့ ပတ်သက်ပြီး လွှတ်တော် ကိုယ်စားလှယ်တွေရဲ့ ဆွေးနွေး ဆုံးဖြတ်မှုတွေအပေါ် ဝေဖန်သံတွေလည်း ထွက်လာတာ တွေ့ရပါတယ်။ ဒီလို ဝေဖန်တာကိုကြည့်ရင် ဆောက်လုပ်ရေးကဏ္ဍနဲ့ ဆက်စပ်တဲ့ လုပ်ငန်းရှင်အချို့နဲ့ မြို့သစ်စီမံကိန်းနဲ့ ဆက်စပ် ပတ်သက်သူ လုပ်ငန်းရှင်အချို့ ပါဝင်နေတာကို တွေ့ရပါတယ်။ ဒီနေရာမှာ စဉ်းစားစရာကတော့ လက်ရှိ တိုင်းပြည်ရဲ့ စီးပွားရေးအခြေအနေမှာ ဆောက်လုပ်ရေးကဏ္ဍ တစ်ခုတည်းအတွက်ပဲ ဘာကြောင့် ဇောင်းပေးနေကြတာလဲ။ တိုင်းပြည်ရဲ့ အခွန်ပေါ်လစီမှာ ငွေကြေးခ၀ါချမှု (Money Laundaring) နဲ့ ဆောက်လုပ်ရေးကဏ္ဍ တိုးတက်မှု အခြေအနေတွေ ဘယ်လိုဆက်စပ်သလဲ။ သေချာသုံးသပ်ဖို့တော့ လိုပါတယ်။

အရင်ဆုံး အစိုးရတစ်ရပ်အနေနဲ့ အခွန်ကောက်ပြီဆိုရင် ကောက်တဲ့အခွန်ဟာ နိုင်ငံအခြေအနေနဲ့ ညီညွတ်မျှတတဲ့ အရအသုံးငွေကြေးစနစ် ပေါ်ပေါက်စေပြီး ငွေကြေးလည်ပတ်မှုကို မှန်ကန်စေတဲ့ ငွေကြေးဖောင်းပွမှု မဖြစ်အောင် ထိန်းညှိရတာ ဖြစ်တယ်။ ပြည်တွင်းစားသုံးမှု၊ ရင်းနှီးမြှုပ်နှံမှုနဲ့ စုဆောင်းမှုတွေကို အခွန်အကောက်စနစ်က ထိန်းညှိပေးဖို့၊ ကုန်ဈေးနှုန်း တည်ငြိမ်ဖို့အတွက် အထောက်အကူဖြစ်ဖို့၊ ဓနအင်အား မျှတစေဖို့၊ စီးပွားရေး ဖွံ့ဖြိုးတိုးတက်မှုအတွက် အထောက်အကူဖြစ်စေဖို့၊ နိုင်ငံရဲ့စီးပွားရေး ရည်မှန်းချက်တွေ အကောင်အထည်ဖော်ရေးကို အထောက်အကူဖြစ်စေဖို့နဲ့ ပြည်တွင်းစက်မှုလုပ်ငန်းတွေကို အကာအကွယ်ပေးဖို့ဆိုတဲ့ အချက်တွေအပေါ် ချိန်ထိုးပြီး အခွန်ပေါ်လစီ တစ်ရပ်ကို ချမှတ်စဉ်းစားရတာ ဖြစ်ပါတယ်။ အစိုးရရဲ့ အခွန်ပေါ်လစီ လွဲချော်သွားရင် အဲဒီရဲ့ အကျိုးသက်ရောက်မှုဟာ တိုင်းပြည်အတွက် များစွာ ထိခိုက်နစ်နာစေတယ်ဆိုတာ အားလုံးသိပြီး ဖြစ်ပါတယ်။

ဒါကြောင့်ပဲ ၂၀၁၈ ပြည်ထောင်စုရဲ့ အခွန်အကောက် ဥပဒေကြမ်းမှာပါရှိတဲ့ ပုဒ်မ ၂၅ ပြဋ္ဌာန်းချက် “ပြည်တွင်းနေ နိုင်ငံသားနှင့် ပြည်ပနေနိုင်ငံသား၏ ပြည်ပမှ ၀င်ငွေရလမ်း တစ်ခုခု သို့မဟုတ် စီးပွားရေးလုပ်ငန်း တစ်ခုခုကို ဆောင်ရွက်ခဲ့သော်လည်း အကြောင်းအမျိုးမျိုးကြောင့် အခွန်ပေးဆောင်ရန် လစ်ဟင်းခဲ့သော သို့မဟုတ် လျော့နည်းပေးဆောင်ခဲ့သော ၀င်ငွေများ၊ နှစ်တစ်နှစ်အတွင်း ပြည်တွင်း၌ မြေ၊ အဆောက်အအုံနှင့် ယင်းအဆောက်အအုံ၏ အဓိက အစိတ်အပိုင်းများ အပါအ၀င်ဖြစ်သော မရွှေ့မပြောင်းနိုင်သည့် ပစ္စည်း သို့မဟုတ် ရွှေနှင့် အခြားအဖိုးတန်ပစ္စည်းများ အပါအ၀င် ယာဉ်ကဲ့သို့သော ရွှေ့ပြောင်းနိုင်သောပစ္စည်းများ ထိတွေ့ကိုင်တွယ်၍ မရသော ပစ္စည်းများကို ၀ယ်ယူခြင်း၊ တည်ဆောက်ခြင်း၊ ရယူခြင်း၊ ရင်းနှီးမြှုပ်နှံခြင်း၊ အစုရှယ်ယာ ထည့်ဝင်ခြင်း စသည်တို့အတွက် အသုံးပြုသည့် ငွေကြေးများ၊ လက်ဝယ်ရှိ ငွေကြေးတို့နှင့် ပတ်သက်၍ အောက်ပါ အခွန်နှုန်းထားများအတိုင်း အခွန်ကျသင့်စေရမည်၊ ၀င်ငွေခွန် ဥပဒေအရ ဒဏ်ငွေတပ်ရိုက်ခြင်း မပြုရ၊ သို့ရာတွင် တရားမ၀င် ရရှိသည့် ပစ္စည်းများ ပိုင်ဆိုင်ခြင်း၊ ရောင်းဝယ်ခြင်းတို့နှင့် လည်းကောင်း ငွေကြေးခ၀ါချမှု တိုက်ဖျက်ရေး ဥပဒေအရ အရေးယူသည့် ကိစ္စရပ်များနှင့် လည်းကောင်း သက်ဆိုင်ခြင်း မရှိစေရ” ဆိုတဲ့အချက်ဟာ တိုင်းပြည်စီးပွားရေးအတွက် ကြောက်စရာကောင်းလို့ ပြင်းပြင်းထန်ထန် ကန့်ကွက်ကြတာ ဖြစ်ပါတယ်။ အဲဒီတော့ အခွန်ပေါ်လစီမှာ ဆောက်လုပ်ရေးလုပ်ငန်းတွေ တိုးတက်လာဖို့နဲ့ တစ်ဖက်တစ်လမ်းက တိုင်းပြည်ရဲ့ စီးပွားရေး ပြန်လည်ဦးမော့လာဖို့ အခုလို ဘယ်က ထွက်လာကြမှန်းမသိတဲ့ ငွေမည်းတွေ သုံးရာခိုင်နှုန်း ဆောင်ပြီး ငွေဖြူဖြစ်အောင် လုပ်မယ်။ တိုင်းပြည်မှာ ငွေကြေးဖောင်းပွမှု အဆိုးရွားဆုံး ဖြစ်လာမယ်။ ပြည်တွင်း SME လုပ်ငန်းတွေ ပြိုလဲသွားနိုင်ပြီး အိမ်ခြံမြေဈေးတွေ ကမောက်ကမ ဖြစ်မယ်။ ဘဏ်တွေ ပြိုလဲသွားနိုင်တဲ့အထိ အကျိုးဆက်ဆိုးကျိုးတွေက ကြီးမားနက်ရှိုင်းပါတယ်။

(၂)

ဒီနေရာမှာ နိုင်ငံရဲ့ ဆောက်လုပ်ရေးကဏ္ဍကို ကြည့်ရင် မြို့သစ်တွေကို အဓိကလုပ်ဖို့ ရည်ရွယ်နေတာ တွေ့ရတယ်။ ရှိပြီးသား နေရာတွေမှာ လမ်း၊ တံတား၊ မီး အခြေခံ အဆောက်အအုံပိုင်း ကောင်းမွန်အောင် တိုးတက်ဖွံ့ဖြိုးအောင် လုပ်ဖို့ထက် မြို့တွေကို ထပ်ချဲ့ဖို့ ပြင်ဆင်နေကြတယ်။ ရန်ကုန်၊ မန္တလေးမြို့ကြီးတွေမှာ မီဂါစီးတီးတွေ ဖြစ်အောင် ဖန်တီးနေတယ်။ မီဂါစီးတီးတွေကို အကောင်အထည်ဖော်ဖို့ အရေးကြီးဆုံးအချက်က မြန်မာနိုင်ငံရဲ့ လက်ရှိ အနေအထားဟာ အခြား နိုင်ငံတကာက မီဂါစီးတီးတွေမှာလို ငွေကြေးပမာဏ စီးဝင် လည်ပတ်နိုင်နေပြီလား၊ ရင်းနှီးမြှုပ်နှံမယ့် Investor တွေ ရှိနေပြီလား၊ လက်ရှိ GDP အခြေအနေနဲ့ရော အဆင်ပြေနိုင်မလား စဉ်းစားဖို့ လိုပါတယ်။

နိုင်ငံတွင်းမှာ တရားဥပဒေစိုးမိုးမှုက မေးခွန်းထုတ်စရာ ဖြစ်နေတယ်။ တည်ငြိမ်မှုမရှိဘူး၊ စစ်ပွဲတွေ ဖြစ်လာနိုင်တဲ့ အခြေအနေမျိုးလည်း တွေ့ရတယ်။ ဒီလိုအနေအထားမှာ နိုင်ငံတကာက ရင်းနှီးမြှုပ်နှံမှုတွေက ဘယ်လို စီးဝင်နိုင်မလဲ။ တရုတ်ရဲ့ ရင်းနှီးမြှုပ်နှံမှုတွေ ၀င်လာမယ်လို့ တွက်ချက်မှုတွေ ရှိနေတယ်။ ဒါပေမဲ့ တရုတ်ဟာ စီးပွားရေးမှာ OBOR ကို အခြေခံပြီး မဟာဗျူဟာနဲ့ သွားတယ်။ ဒီစီမံကိန်းတစ်လျှောက်မှာရှိတဲ့ ပထ၀ီ အနေအထားအရ အရေးပါတဲ့ နေရာအချို့မှာ စီးပွားရေးဇုန်တွေ လုပ်ဖို့လောက်ပဲ စဉ်းစားပါလိမ့်မယ်။ အဓိက ကတော့ သူတို့ ရဲ့ ပိုးလမ်းမ စီမံကိန်းအတွက် လိုအပ်တဲ့ လမ်းပန်းဆက်သွယ်ရေးကိုတော့ အဓိကလုပ်ဖို့ ရှိပါလိမ့်မယ်။ လမ်းပန်းဆက်သွယ်ရေးအတွက် အဓိက လုပ်ဆောင်မယ်ဆိုရင် သူတို့အတွက် ကျောက်ဖြူ-ကူမင်းရထားလမ်း စီမံကိန်းဟာ ပြန်လည်စတင်ဖို့အတွက် အစိုးရနဲ့ ပြန်လည် ညှိနှိုင်းနိုင်ခြင်း မရှိသေးသလို ကျောက်ဖြူ အထူးစီးပွားရေးဇုန်ကလည်း လက်ရှိအခြေအနေမှာ ခရိုနီတိုင်ကွန်းတစ်စုရဲ့ မဖြစ်နိုင်တဲ့ တောင်းဆိုမှုတွေနဲ့ ရှေ့မဆက်နိုင်သေးပါဘူး။ နောက်တစ်ခုက မန္တလေးကို ဗဟိုပြုပြီးတော့ ကျောက်ဖြူနဲ့ ရန်ကုန်ကို ချိတ်ဆက်သွားမယ့် စင်္ကြံဟာလည်း လက်ရှိအခြေအနေမှာ အခြေခံအဆောက်အအုံအတွက်ပဲ လုပ်ဆောင်ပေးဖို့ တောင်းဆိုနေတာကို သတိပြုဖို့ လိုအပ်မှာဖြစ်ပြီးတော့ ရန်ကုန်မြို့သစ်ဆီ ချိတ်ဆက်မယ့် OBOR စီမံကိန်းဟာ ရန်ကုန်မြို့သစ်မှာ မြေတွေ အများကြီးဝယ်ပြီးတော့ အိမ်တွေ၊ တိုက်ခန်းတွေ တည်ဆောက်ဖို့ဆိုတာ လတ်တလောမှာ ဖြစ်နိုင်ဖို့မရှိတာ သတိပြုဖို့ လိုအပ်ပါတယ်။

(၃)

မြို့သစ်စီမံကိန်း တစ်ခုဆိုတာ ဖွံ့ဖြိုးတိုးတက်မှု အခြေခံအဆောက်အအုံတွေ အများအပြား လိုအပ်တဲ့အထဲမှာ ရေ၊ လျှပ်စစ်မီး၊ လမ်းတံတားတွေ အဓိကလိုအပ်ပြီး လှိုင်သာယာလို နေရာမျိုးဟာ ဖွံ့ဖြိုးတိုးတက်ဖို့ အနှစ် ၃၀ လောက် အချိန်ယူခဲ့တာတောင် တံတား လေးစင်း၊ ငါးစင်း ဖြစ်လာတာတောင် လှိုင်သာယာမှာ နေနေရတဲ့ ပြည်သူတွေဟာ ရန်ကုန်မြို့ထဲကို မနက်ဆိုလာပြီး အလုပ်လုပ်၊ ညနေကျရင် မြို့ပြင်ကို အလုံးအရင်းနဲ့ ပြန်ထွက်နေတဲ့ ဖြစ်စဉ်တွေ လက်ရှိအချိန်အထိ ဖြစ်နေဆဲဖြစ်ပါတယ်။ လက်ရှိ စတင်မယ့် ရန်ကုန်မြို့သစ် စီမံကိန်းဟာ အစိုးရ လက်ကျန်သက်တမ်း သုံးနှစ်လောက်နဲ့ နတ်ရေကန်ထဲ ထိုးချလိုက်သလို နေ့ချင်းညချင်း အောင်မြင်လာမှာ မဟုတ်သလို ရေ၊ မီး၊ လမ်းတံတားကိုလည်း အစိုးရက ချက်ချင်း လုပ်ဆောင်ပေးနိုင်တာ မဟုတ်တာကြောင့် နေထိုင်မယ့် ပြည်သူတွေကလည်း တစ်ခဲနက် လာနေနိုင်တာ မဟုတ်ပါဘူး။

ဒီလို တစ်ခဲနက် လာနေနိုင်ဖို့မရှိတဲ့ မြို့သစ်စီမံကိန်း တစ်ခုကို ရေရှည်အတွက်ပဲ အကောင်အထည်ဖော်ဖို့ လိုအပ်ပါတယ်။ ဒါ့အပြင် မြို့သစ်စီမံကိန်းဆိုတဲ့ နေရာမှာ တစ်ပြေးညီ ဖွံ့ဖြိုးတိုးတက်ဖို့ ရည်မှန်းချက်တွေလည်း ချထားနိုင်ဖို့ လိုအပ်ပါတယ်။ ဥပမာအားဖြင့် ရန်ကုန်ကို အလုပ်အကိုင်အတွက် စုပြုံတိုးနေရတဲ့ ပြည်သူတွေကို ကြည့်မယ်ဆိုရင် အညာက ပြည်သူတွေနဲ့ မြစ်ဝကျွန်းပေါ်ဒေသက ပြည်သူတွေပါ။ ရန်ကုန်မြို့မှာ မြို့သစ်တွေ တည်မယ့်အစား၊ လမ်းပန်းဆက်သွယ်ရေး ကောင်းပြီး ရေလမ်းရော ကုန်းလမ်းရော ရှိနိုင်တဲ့ ပင်လယ်ဘက် ထွက်ပေါက်ပါရှိတဲ့ ပုသိမ်မြို့မှာ စက်မှုဇုန်တွေ၊ စက်မှုလုပ်ငန်းတွေ ဧရာဝတီတိုင်းဖက်မှာ မြို့သစ်တွေ တည်သင့်တာပါ။ မြေလည်းပေါတယ်။ လုပ်အားလည်းပေါတယ်၊ အဲဒီနေရာတွေမှာ မတည်ဘဲနဲ့ ငွေမည်းတွေ ၀င်လာနိုင်ခြေကြောင့် ဝေဖန်ခံနေရတဲ့ ရန်ကုန်မြို့သစ် စီမံကိန်းကိုပဲ အစိုးရနှစ်ဆက်တိတိ တည်ဖို့ အားသွန်ခွန်စိုက် လုပ်နေတာကို ပြန်ကြည့်မယ်ဆိုရင် ဒီ ရန်ကုန်မြို့သစ် စီမံကိန်းဟာ မြေဈေးကစားလိုသူတွေနဲ့ မြေလက်ဦးမှု ရယူထားသူတွေရဲ့ စနက်တွေ အများကြီးပါနေတာကို သိနိုင်မှာ ဖြစ်ပါတယ်။ ရန်ကုန်မြို့ တစ်ဖက်ကမ်းမှာ မြို့သစ်တွေ တည်မယ့်အချက်က ရန်ကုန်မြို့မှာရှိနေတဲ့ ဆောက်လုပ်ရေး လုပ်ငန်းတွေကို အကုန်လုံး ပြိုကျသွားစေနိုင်ပါတယ်။ လက်ရှိ ငွေကြေးခ၀ါချမှု ပုဒ်မနောက်ကွယ်မှာလည်း မြို့သစ်စီမံကိန်း ဦးဆောင် လုပ်ကိုင်နေတဲ့သူတွေက အဓိကနေရာက ပါဝင်နေတယ်လို့ ရှုမြင်ခံနေရပါတယ်။ ဥပမာအားဖြင့် ဟံသာဝတီလေယာဉ်ကွင်းစီမံကိန်း ပျက်သွားပြီးတော့ ကွမ်းခြံကုန်း လေယာဉ်ကွင်းဆိုတာကလည်း၊ အဓိပ္ပာယ်လုံးဝ မရှိနိုင်သလို ဟံသာဝတီလေဆိပ် စီမံကိန်းဟာ နိုင်ငံ့အနာဂတ်အတွက် အရေးပါတဲ့ စီမံကိန်းဖြစ်တာကြောင့် မဖြစ်မနေ ပြည်လည် တည်ဆောက်နိုင်ဖို့ ညှိနှိုင်းမှု ပြန်လုပ်ကြမယ့် အခြေအနေပါ။ ဒီလို ရန်ကုန်မြို့နဲ့ ချိတ်ဆက်နိုင်မယ့် ရန်ကုန်မြို့နဲ့ ဟံသာဝတီလေယာဉ်ကွင်းစီမံကိန်း ကြားထဲမှာ မြေနေရာလွတ်တွေ အများကြီးရှိနေပါတယ်။ အဲဒီလို နေရာကြားထဲမှာ အများကြီး ဖွံ့ဖြိုးအောင် လုပ်ပေးလို့ ရနေတာကို မလုပ်ဆောင်ဘဲ မြေနေရာလက်ဦးမှု ရယူထားသူတွေအတွက် ဆက်ပြီး အကောင်အထည်ဖော်ပေးမယ့် ရန်ကုန်မြို့သစ် စီမံကိန်းဟာ မြန်မာနိုင်ငံအတွက် စိတ်ပျက်စရာတစ်ခု ဖြစ်လာပြီး သာမန်ပြည်သူတွေ အထိနာစေတဲ့ ငွေဖောင်းပွမှုတွေပဲ ဖြစ်လာပါလိမ့်မယ်။

လှိုင်သာယာမြို့နယ်ရှိ ကျန်စစ်မင်း တန်ဖိုးနည်းအိမ်ရာစီမံကိန်းမှ အိမ်ရာတိုက်ခန်းများကို တွေ့ရစဉ် ( ဓာတ်ပုံ – ကြည်နိုင်)

(၄)

ပြည်သူတွေ ၀ယ်ယူနိုင်စွမ်းရှိတဲ့ အိမ်ရာ စီမံကိန်းဟာ ကျပ် သိန်း ၂၀၀ အောက် တိုက်ခန်းတွေပါ။ ဒီလိုအခြေအနေမျိုးမှာ အစိုးရဟာ တန်ဖိုးနည်းအိမ်ရာစီမံကိန်း အများအပြားကို အမြန်ဆုံး အကောင်အထည်ဖော်ပေးဖို့ပဲ အဓိက လုပ်ဆောင်ရမှာ ဖြစ်ပါတယ်။
တန်ဖိုးနည်းအိမ်ရာ စီမံကိန်းတွေကို အကောင်အထည်ဖော်မယ်ဆိုရင်လည်း လက်ရှိ မှားယွင်းနေတဲ့ တန်ဖိုးနည်းအိမ်ရာ စီမံကိန်းတွေဟာ အခြားဖွံ့ဖြိုးမှု စီမံကိန်းတွေ၊ လမ်းတွေ၊ ဘတ်စ်ကားမှတ်တိုင်တွေနဲ့ ချိတ်ဆက်ပေးနိုင်မှု မရှိဘဲ ကွင်းခေါင်ခေါင်မှာ ထီးထီးကြီး တစ်ခုတည်း ရှိနေတာမျိုး မလုပ်သင့်တော့ပါဘူး။ အနည်းဆုံးတော့ တန်ဖိုးနည်းအိမ်ရာ အချင်းချင်း လက်လှမ်းမီတဲ့ အနေအထားဖြစ်ဖို့ လိုအပ်သလို တစ်နေ့ထက်တစ်နေ့ စိုးရိမ်စရာ ဖြစ်လာနေတဲ့ တရားဥပဒေစိုးမိုးရေး ကင်းမဲ့မှုပြဿနာကြောင့် ပြည်သူတွေ ဘေးကင်းလုံခြုံစေမယ့် စီမံကိန်းတွေလည်း ပါဝင်ဖို့ လိုအပ်ပါတယ်။ ဒီလို ပြည်သူတွေ လက်လှမ်းမီနိုင်တဲ့ တန်ဖိုးနည်းအိမ်ရာ စီမံကိန်းတွေကို လွယ်လင့်တကူ လုပ်ဆောင်မပေးဘဲ မြို့သစ်စီမံကိန်း ဆိုတာကြီးကို တဖွဖွအော်နေတာ အဓိပ္ပာယ် လုံးဝမရှိပါဘူး။

တစ်သက်လုံး အဖက်လုပ်မခံခဲ့ရတဲ့ ဆောက်လုပ်ရေးလုပ်သားတွေကို အခုငွေမည်းခ၀ါချ အခွန်ကင်းလွတ်ခွင့်ရရေးမှာ အသုံးချလာတာမျိုးကလည်း မဖြစ်သင့်ပါဘူး။ ဆောက်လုပ်ရေးကဏ္ဍဟာ တိုင်းပြည်ရဲ့ ဂျီဒီပီမှာ ပါဝင်မှု ၁၀ ရာခိုင်နှုန်းအောက်ပဲရှိပြီး လုပ်သားပါဝင်မှုဟာ ငါးရာခိုင်နှုန်းလောက်ပဲ ရှိပါတယ်။ ဘယ်လိုနိုင်ငံတွေပဲ လေ့လာလေ့လာ ဆောက်လုပ်ရေးလုပ်ငန်းတွေ ကောင်းလွန်းလို့ နိုင်ငံတိုးတက်သွားတယ်ဆိုတာ မရှိဘဲ ဆောက်လုပ်ရေးတွေ ပြိုကျတာကြောင့် အစိုးရက ၀င်ပြီးတော့ ထောက်ကူပေးရလို့ တိုင်းပြည် ကြွေးနွံနစ်သွားတဲ့ ဖြစ်စဉ်တွေပဲ ရှိနေတာပါ။ ငွေမည်းခ၀ါချချင်တဲ့ အချိန်ကျမှ တစ်သက်လုံးက အဖက်မလုပ်ခဲ့တဲ့ လုပ်သားတွေကို အသုံးချနေတာဟာ မျှတမှုမရှိပါဘူး။

လက်ရှိ ငွေမည်းခ၀ါချလိုသူတွေက တောင်းဆိုနေတာဟာ ဆောက်လုပ်ရေးလုပ်ငန်း ဖွံ့ဖြိုးမှုအတွက်လည်းမဟုတ်ဘဲ မြေကွက်ကြီးကြီးတွေ ပိုက်ဘောမိနေတဲ့၊ ဘဏ်မှာ ပေါင်ထားရတဲ့လူတွေက သူတို့ ပိုက်ဘောကို လွတ်ရင်ပြီးရော ကန်ထုတ်ချင်နေတဲ့ သူတွေပါ။ အရင်ခေတ်အဆက်ဆက်၊ အခွင့်အရေးတွေ ရထားတဲ့သူတွေက သူတို့မြေကွက်တွေ လူလတ်တန်းစားတွေလက်ထဲ အမြန်ထုတ်နိုင်ဖို့အတွက် လုပ်တဲ့ပြဿနာထုပ်ကြီးပါ။

သူတို့ပြေလည်ဖို့အတွက်ပဲ တောင်းဆိုပြီး ကျန်တဲ့တိုင်းပြည်နဲ့ ပြည်သူကို လုံးဝထည့် မတွက်ဘဲ တောင်းဆိုနေတဲ့ ငွေမည်းခ၀ါချ ဖြစ်စဉ်တစ်ခုလို့ပဲ သုံးသပ်ရပါမယ်။ ဆောက်လုပ်ရေး လုပ်ငန်းကျဆင်းမှုနဲ့ မဆိုင်ပါဘူး၊ ဆောက်လုပ်ရေးလုပ်ငန်းက ကွန်ဒိုတွေ မရောင်းရတာ ၀ယ်အားမရှိလို့၊ ၀ယ်အားမရှိတာက အခွန်ကြောင့် မဟုတ်ပါဘူး။ ကိုယ့်ဘာသာ ခိုင်မာချင်မှ အခွန်ဆောင်ကြတဲ့ အခြေအနေပါ။ လက်ရှိမှာ စနစ်တကျ အခွန်ကောက်နေတာဆိုလို့ မြေကွက်ပဲရှိပါတယ်။  ငွေမည်းခ၀ါချ ပုဒ်မဖြစ်လာလို့လည်း ကွန်ဒိုတွေ အရောင်းအ၀ယ်ဖြစ်လာမယ်၊ တိုက်ခန်းတွေ အရောင်းအ၀ယ်ဖြစ်လာမယ်လို့ ပြောလို့မရပါဘူး။ ဘာကြောင့်လဲဆိုတော့ ပြည်သူအများစုဟာ ကျပ်သိန်း ၂၀၀ အထက် တိုက်ခန်းတွေကို ၀ယ်ယူနိုင်စွမ်း လုံးဝမရှိလို့ပါ။ ဒီငွေမည်း ခ၀ါချပုဒ်မဟာ အဓိကကတော့ ငွေမည်းပိုင်ရှင်တွေ ငွေဖော်ဖို့ လုပ်တာပါပဲ။

ငွေမည်းခ၀ါချပုဒ်မသာ အောင်မြင်သွားမယ်ဆိုရင် ငွေကြေးဖောင်းပွသွားမယ်။ ပြည်သူတွေ ခံလိုက်ရမယ်။ လူလတ်တန်းစားတချို့ ဦးသိန်းစိန်လက်ထက်ကလိုပဲ ပိုက်ဘောတွေ ထပ်မိမယ်။ ဘဏ်တွေ ထိခိုက်ပြိုကျသွားမယ်။ ဒီလိုဆိုးကျိုးတွေ ဖြစ်လာနိုင်တဲ့ အခြေအနေမျိုးမှာ ငွေမည်းခ၀ါချပုဒ်မလေး တစ်ခုနဲ့ မဖြစ်နိုင်သေးဘူး၊ စနစ်တကျ ဥပဒေနဲ့ လုပ်ရမယ်လို့ လွှတ်တော်အမတ်တွေ ဆွေးနွေးဆုံးဖြတ်တာ မှန်ကန်ကောင်းမွန်တဲ့ လုပ်ရပ်ဖြစ်ပါတယ်။

စနစ်တကျဥပဒေနဲ့ Tax Holiday လုပ်မယ်ဆိုရင်၊ ၀င်လာမယ့် ငွေမည်းတွေကို ထိန်းကျောင်းနိုင်မယ့် အခြေအနေမျိုးနဲ့ ခ၀ါချခွင့် ပေးမယ်ဆိုရင် တိုင်းပြည်အတွက် ကောင်းကျိုးများစွာရမှာ ဖြစ်ပါတယ်။

ဒီလို ဥပဒေတစ်ခုနဲ့ စနစ်တကျလုပ်ပေးမှာကို ဘာလို့ တိုင်ကွန်းကြီးတွေ၊ ဆောက်လုပ်ရေး လုပ်ငန်းရှင်ကြီးတွေက မနှစ်မြို့ဘဲ ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေမှာ တင်းကျပ်မှုမပါတဲ့ ပုဒ်မလေးတွေနဲ့ပဲ ခ၀ါချခြင်နေကြတာလဲ။

ဒီအဖြေရဲ့ နောက်ကွယ်မှာ မြို့သစ် စီမံကိန်းမှာ မြေဈေးကစားပြီး တည်ဆောက်ရေး လုပ်ငန်းတွေလုပ်မယ့်သူတွေ သေချာပေါက်ရှိနေတာကို မြင်တွေ့နေရပါတယ်။

လက်ရှိ အိမ်ခြံမြေဈေးကွက် ကျဆင်းနေတယ်ဆိုပေမယ့် ရန်ကုန်အိမ်ခြံမြေဈေးဟာ သင့်တင့်မျှတတဲ့ဈေးနှုန်း မဖြစ်သေးပါ ဘူး။ အိမ်ခြံမြေဈေးဟာ ပုံမှန်ထက် နှစ်ဆနီးပါးဈေးကြီး နေပါသေးတယ်။ ဒါပေမဲ့ အိမ်ခြံမြေဟာ ပြိုကျလို့ တိုင်းပြည်စီးပွားရေး ပြိုကျနေတာ တစ်ခုတည်းမဟုတ်ပါဘူး။

မတည်ငြိမ်တဲ့ မြန်မာ့နိုင်ငံအခြေအနေနဲ့ ခေတ်အဆက်ဆက် နိုင်ငံခြားရင်းနှီးမြှုပ်နှံမှုကိုပဲ မှီခိုခဲ့ပြီး နိုင်ငံခြားရင်းနှီးမြှုပ်နှံမှု ကျဆင်းတာနဲ့ တိုင်းပြည်စီးပွားရေးကျဆင်းတဲ့ အခြေအနေကနေ ရုန်းထွက်နိုင်ဖို့ပဲ လိုအပ်နေတာပါ။ မြန်မာနိုင်ငံ အခြေအနေကြောင့် နိုင်ငံခြားရင်းနှီးမြှုပ်နှံမှု အခုလောလောဆယ်က တစ်နှစ်၊ နှစ်နှစ်အတွင်းကတော့ ကျဆင်းနိုင်ပါတယ်။ စစ်ပွဲတွေ၊ ပဋိပက္ခတွေ ရှိနိုင်ပါတယ်။ နိုင်ငံတကာမှာလည်း တိုင်းပြည်ပုံရိပ် ထိခိုက်ကျဆင်းနေတဲ့ အချိန်မှာ ခရိုနီ၊ တိုင်ကွန်းတွေအတွက် မြို့သစ်တစ်မြို့ တည်ဖို့ဆိုတာ လုံးဝအဓိပ္ပာယ် မရှိပါဘူး။

မြို့သစ်တည်ဖို့အတွက်၊ သူတို့ဘဏ်မှာ ပေါင်ထားတဲ့ မြေကွက်တွေ ဈေးကောင်းရလာဖို့အတွက်၊ ဘဏ်တွေက ပိုက်ဘောမိနေတဲ့ မြေကွက်ကြီးတွေ ဘဏ်မှာအဆင်ပြေသွားဖို့အတွက် နှစ်ပေါင်းများစွာ အခွန်ရှောင်ခဲ့တဲ့ ခရိုနီကြီးတွေအတွက် အခွန်ချပေးရမယ်ဆိုတာ လုံးဝအဓိပ္ပာယ်မရှိတဲ့အပြင် မြန်မာပြည်ရဲ့ အခွန်စနစ် လုံးလုံးပျက်စီးသွားပါလိမ့်မယ်။

လှိုင်သာယာမြို့နယ်ရှိ ကျန်စစ်မင်း တန်ဖိုးနည်းအိမ်ရာစီမံကိန်းမှ အိမ်ရာတိုက်ခန်းများကို တွေ့ရစဉ် ( ဓာတ်ပုံ – ကြည်နိုင်)

(၅)

လွှတ်တော်ကိုယ်စားလှယ်တွေ လက်ခံခဲ့တဲ့ ငွေမည်းခ၀ါချပုဒ်မကို ဥပဒေတစ်ခုအဖြစ် သီးသန့်ရေးဆွဲမယ်ဆိုတာ မှန်ကန်တဲ့ လမ်းကြောင်းဖြစ်သလို အစိုးရနဲ့ တိုင်းပြည်ကို ထိခိုက်နစ်နာနိုင်တာတွေ သီးသန့်ပြန်ပြီး ဆွေးနွေးတာမျိုးနဲ့ တိုင်းပြည်ကဏ္ဍစုံ မထိခိုက်အောင် လုပ်ရမှာပါ။ Tax Amnesty ပေးမယ်ဆို ဘာကြောင့်ပေးမယ်။ ဘယ်လိုနှုန်းထားတွေပေးမယ်။ ဘာကြောင့်ပေးသင့်တယ်ဆိုတာ အပြန်အလှန်ဆွေးနွေးပြီးတော့ ငွေကြေးခ၀ါချမှုကို မူးယစ်ဆေးဝါးတွေရဲ့ငွေတွေ၊ အကြမ်းဖက်သမားတွေရဲ့ ငွေတွေ စီးဝင်မလာအောင် ထိန်းသိမ်းပြီးတော့ ဥပဒေတစ်ခုနဲ့ လုပ်ပေးရမှာ ဖြစ်ပါတယ်။ ဒီလို လွှတ်တော်က မှန်ကန်တဲ့လမ်းကြောင်းနဲ့ လုပ်မယ့်ဥပဒေကို လက်မခံချင်ကြဘဲ ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေမှာ ငွေမည်း ခ၀ါချပုဒ်မလေးပါမလာရင်ကို အခုချက်ခြင်း တိုင်းပြည်တစ်ခုလုံး စုတ်ပြတ်သတ်သွားမတတ် အော်နေတာ ဘာကြောင့်ပါလဲ။  ငွေမည်းခ၀ါချချင်တဲ့ လက်တစ်ဆုပ်စာ လူတစ်စု၊ မြို့သစ်တည်ဆောက်မယ့် လက်တစ်ဆုပ်စာ လူတစ်စုနဲ့ အကျင့်ပျက် ထိပ်တန်းအရာရှိကြီးတချို့ရဲ့ ကိုယ်ကျိုးရှာ လုပ်ကွက်တွေထဲကို ၀င်မသွားဖို့ အစိုးရရော၊ လွှတ်တော်တစ်ရပ်လုံးက တိုင်းပြည်အတွက် မှန်ကန်တဲ့ ဆုံးဖြတ်ချက်ချနိုင်ဖို့ အရေးကြီးပါတယ်။

တိုင်းပြည်စီးပွားရေး ကျဆင်းနေတဲ့ အချိန်ဆိုပေမယ့် လက်ရှိအချိန်မှာ အစိုးရဟာ တိုင်းပြည်အနာဂတ် စီးပွားရေးတိုးတက်ဖို့ မှန်ကန်တဲ့ လမ်းကြောင်းပေါ်မှာ လျှောက်လှမ်းနေချိန် ဖြစ်ပါတယ်။ SME တွေ ဖွံ့ဖြိုးဖို့ ချေးငွေအတိုးနှုန်းတွေ လျှော့ချပေးနေတယ်။  လျှပ်စစ်ဓာတ်အားကာလတိုမှာ နှစ်ဆတိုးဖို့ အာမခံချက်ပေးထားတယ်။ လမ်းပန်းဆက်သွယ်ရေးကောင်းမွန်ဖို့၊ တစ်ပြေးညီဖွံ့ဖြိုးတိုးတက်ဖို့ မှန်ကန်တဲ့ လမ်းကြောင်းပေါ်မှာ ရှိနေတယ်။ ဒီလိုအခြေအနေမျိုးမှာ လက်တစ်ဆုပ်စာလူတစ်စုရဲ့ မြှူဆွယ်ဖြားယောင်းမှုမှာ ကျရှုံးသွားရင်၊ မြေဈေးကစားမှုတွေ ဖောင်းပွမှုတွေ အရှိန်ကုန်လို့ ရပ်တန့်သွားချိန်မှာ လက်ရှိစီးပွားရေးကျဆင်းမှုထက် များပြားတဲ့ ဆိုးကျိုးတွေ ဖြစ်လာပါလိမ့်မယ်။

တိုင်းပြည်ဘဏ္ဍာငွေမကုန်အောင် လက်ရှိမှာ PPP စနစ်နဲ့ စီမံကိန်းတွေ လုပ်ဆောင်မယ်လို့ ကြံရွယ်နေသံတွေလည်း ကြားနေရပါတယ်။ PPP စနစ်ဟာ မြန်မာနိုင်ငံမှာ ကြွေးကြော်နေတာ နှစ်ပေါင်းမနည်းတော့ပါဘူး။ ဒါပေမဲ့ ဘာကြောင့်မအောင်မြင်သလဲဆိုရင် အစိုးရက ပွင့်လင်းမြင်သာမှုမရှိဘဲ စီမံကိန်းတွေကို ပေးချင်တဲ့ကုမ္ပဏီတွေ လက်သိပ်ထိုးပြီး ပေးနေတဲ့အချက်တွေနဲ့ PPP ကြောင့် ကုမ္ပဏီတွေက အခွန်အခတွေ တိုးကောက်လာရင် ၀န်ပိမယ့်ပြည်သူတွေ ကန့်ကွက်ကြလို့ မြန်မာ့နည်းမြန်မာ့ဟန် လက်သိပ်ထိုး PPP ဟာ မအောင်မြင်တာပါ။ အစိုးရအနေနဲ့ PPP ကို အောင်မြင်အောင်သွားချင်တယ်ဆိုရင် PPP နဲ့ လုပ်ဆောင်မယ့် စီမံကိန်းတွေရဲ့ ကောင်းကျိုး၊ ဆိုးကျိုးကို ပြည်သူတွေ နားလည်လက်ခံအောင် အရင်ဆုံးချပြဖို့ လိုအပ်ပါတယ်။ ငါတို့ အစိုးရဖြစ်နေပြီ။ အရင်လိုပဲ လက်သိပ်ထိုး PPP ဆက်လုပ်နေမယ်ဆို အစိုးရ PPP ဟာ အောင်မြင်မှာမဟုတ်သလို ဒီမိုကရေစီအစိုးရရဲ့ ဂုဏ်သိက္ခာကိုလည်း လက်သိပ်ထိုး PPP က ရိုက်ချိုးသလို ဖြစ်စေပါလိမ့်မယ်။

အနှစ်ချုပ်ပြောရမယ်ဆိုရင် လက်မတင်လေးမှာ လွှတ်တော်က ငွေမည်းခ၀ါချပုဒ်မကို ဖြုတ်ချဖို့ ခိုင်မာတဲ့ ဥပဒေပြုမယ်ဆိုတဲ့ ဆုံးဖြတ်ချက်လမ်းကြောင်းဟာ တိုင်းပြည်နဲ့ အစိုးရအတွက် လွှတ်တော်ရဲ့ မှန်ကန်တဲ့ ဆုံးဖြတ်ချက်ပါ။

အစိုးရအနေနဲ့ဆိုရင်လည်း SME တွေ ဖွံ့ဖြိုးဖို့ ချေးငွေအတိုးနှုန်းတွေ လျှော့ချပေးနေတာ၊ လျှပ်စစ်ဓာတ်အားကာလတိုမှာ နှစ်ဆတိုးဖို့ အာမခံချက်ပေးထားတာ၊ လမ်းပန်းဆက်သွယ်ရေးကောင်းမွန်ဖို့၊ တစ်ပြေးညီဖွံ့ ဖြိုးတိုးတက်ဖို့ မှန်ကန်တဲ့ လမ်းကြောင်းပေါ်မှာ ရှိနေတာတွေကို ပိုပြီးတော့ သွက်လက်အောင် ကြိုးနီယန္တရားတွေကို လျှော့ဖို့လိုအပ်နေပြီး လက်ရှိမှာ Doing Business အဆင့် တက်လာအောင် လုပ်ဆောင်နေတဲ့ လမ်းကြောင်းဟာ ကြိုးနီစနစ်ကို ဖျက်ဖို့အတွက်လည်း အများကြီး အထောက်အကူ ဖြစ်လာစေမှာပါ။

ခရိုနီတိုင်ကွန်းတွေနဲ့ တရုတ်မြေဈေး ကစားသူတွေအတွက် မြို့သစ်စီမံကိန်း မဖြစ်မနေ လုပ်ဆောင်တော့မယ်ဆိုရင်လည်း မသိနားမလည်တဲ့ ပြည်သူတွေကို အကြံပေးချင်တာက မြို့သစ်ထဲမှာ Infrastructure တွေအတွက် ငွေတွေ အများကြီးထည့်ဖို့ လုံးဝမလုပ်သင့်ပါဘူးလို့ အကြံပေးချင်ပါတယ်။

ငွေမည်းတွေနဲ့ ဈေးကစားမှု ကြီးစိုးနေနိုင်တဲ့ စီမံကိန်းကြောင့် မြေဈေးတွေ အကုန်ကမောက်ကမ ဖြစ်လာနိုင်ပါလိမ့်မယ်။ လက်ရှိ တုံ့ဆိုင်းမှုလိုမျိုး ထပ်ဖြစ်သွားရင် ပြည်သူတွေ ပိုက်ဘောမိပြီး ဘယ်တော့မှ ငွေပြန်မရမယ့် အခြေအနေတွေ ဖြစ်လာစေပါလိမ့်မယ်။ အထူးသဖြင့် ဒီလိုစီးပွားရေးတုံ့ဆိုင်းနေတဲ့ ကာလမှာ လက်ရှိရှိနေတဲ့ မြို့ဟောင်းက နေရာကောင်းတွေမှာပဲ ရင်းနှီးမြှုပ်နှံသင့်ပါတယ်။

ဆောက်လုပ်ရေးလုပ်ငန်းတွေ မကောင်းမွန်တာက အခွန်နဲ့သက်ဆိုင်မှုမရှိပါဘူး။ ဒီလို မသက်ဆိုင်တဲ့အချက်ကို တစ်နပ်စား ဥာဏ်နဲ့ ငွေမည်းခ၀ါချဖို့ ကြိုးစားတာကို လွှတ်တော်က လက်မတင်လေးရပ်တန့်နိုင်ခဲ့တာ၊ အစိုးရက တင်ပြလာတဲ့ Tax Amnesty ကို ဖြစ်လာနိုင်တဲ့ ဆိုးကျိုးတွေသုံးသပ်ပြီး ဥပဒေပြုဖို့ လုပ်ဆောင်မယ်ဆိုတာဟာ NLD အစိုးရမို့ NLD လွှတ်တော်က အတည်ပြုမှာ ပါဆိုတဲ့ ဝေဖန်မှုတွေကို တိတ်ဆိတ်စေတဲ့အပြင် အစိုးရလုပ်တိုင်း ငုံ့မခံတဲ့ Check & Balance လုပ်နိုင်တဲ့ လွှတ်တော်ကို ပြည်သူ တွေရလာပြီဆိုတာတွေ့ရလို့ ၀မ်းသာစရာဖြစ်ပြီး NLD လွှတ်တော်ကို မှတ်ကျောက်တင်ရမှာ ဖြစ်ပါတယ်။

ဒီလို ပြည်သူတွေအတွက် ၀မ်းသာစရာ ဆုံးဖြတ်ချက်က ခိုင်မာဖို့တော့ လိုအပ်မှာ အမှန်ပဲဖြစ်ပါတယ်။ မူးယစ်ဆေးဝါးကငွေတွေ၊ အစ္စလာမ္မစ် အစွန်းရောက်အကြမ်းဖက်တွေရဲ့ ငွေတွေ စီးဝင်မလာအောင် ကာကွယ်ရမယ့် တာဝန်ဟာ ဥပဒေနဲ့ စနစ်တကျလုပ်ဆောင်မှပဲ ကာကွယ်နိုင်ပါလိမ့်မယ်။ ဒီလိုငွေမည်းခ၀ါချပုဒ်မကို ဥပဒေအဖြစ် အသွင်ပြောင်းတော့မယ်ဆိုရင်လည်း SME တွေအတွက် အထူးအခွန်လျှော့ချတာ၊ မှန်မှန်ကန်ကန် လုပ်ဆောင်နေတဲ့ လုပ်ငန်းစုတွေ ပြည်သူတွေအတွက် အခွန်ဆောင်ခဲ့တဲ့ကာလတွေကို ပြန်လည်ချီးမြှောက်တဲ့အနေနဲ့ ၀င်ငွေခွန် သက်သာခွင့်ပေးတဲ့ အချက်မျိုးတွေကိုလည်း ထည့်သွင်းရေးဆွဲပေးသင့်ကြောင်း အကြံပြုလိုပါတယ်။

လွှတ်တော်ကို မတင်ဘဲ စီမံကိန်းတွေ လုပ်ဆောင်လို့ ရသလား

လှည်းကူးမြို့နယ်အတွင်း ယခု တည်ဆောက်မည့် Eco Green City အိမ်ရာစီမံကိန်းမြေနေရာသည် ယခင်က ကျူးကျော်ဟုဆိုကာ နေအိမ်များကို သက်ဆိုင်ရာက ဇွန် ၁၂ ရက် ဖြိုဖျက်စဉ်က မြင်ကွင်း (ဓာတ်ပုံ – အောင်မျိုးသန့်)

ဒီဇင်ဘာ ၂၃ ရက်တွင် ရန်ကုန်တိုင်းဒေသကြီး အစိုးရအဖွဲ့က အမြန်လမ်းမကြီး သုံးမိုင် တစ်ဖာလုံ လှည်းကူးမြို့နယ်ရှိ ဧက ၁၄၀၀ ကျော်တွင် အိမ်ရာစီမံကိန်းတစ်ခု လုပ်ဆောင်မည်ဟုဆိုကာ အုတ်မြစ်ချ အခမ်းအနားတစ်ခု ပြုလုပ်ခဲ့သည်။ အဆိုပါ စီမံကိန်းမှာ Eco Green City ဟု အမည်ပေးထားပြီး Alliancestar Group of Company က အကောင်အထည်ဖော် ဆောင်ရွက်မည်ဟု ရန်ကုန်တိုင်းဒေသကြီး အစိုးရအဖွဲ့က ထုတ်ပြန်ကြေညာထားသည်။
ယင်းစီမံကိန်းအား ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဝင်းခိုင် တက်ရောက်ခဲ့ပြီး ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းလည်း တက်ရောက်ခဲ့သည်။ သို့သော် တန်ဖိုးကို အသေးစိတ်ထုတ်ပြန်ခြင်း မရှိသည့် ယင်းစီမံကိန်းအား ရန်ကုန်တိုင်းဒေသကြီး လွှတ်တော် ကိုယ်စားလှယ်အများစု သိရှိခဲ့ခြင်းမရှိပေ။ ယင်းစီမံကိန်းအား မီဒီယာများတွင် ဖော်ပြထားမှုအရသာ သိရှိခဲ့ခြင်းဖြစ်ပြီး အစိုးရအဖွဲ့က လွှတ်တော်တွင် လာရောက်တင်ပြ ရှင်းလင်းခြင်း မရှိကြောင်း ရန်ကုန်တိုင်းဒေသကြီး လွှတ်တော်ကိုယ်စားလှယ်များက ပြောကြားသည်။

“လှည်းကူးက စီမံကိန်းဆိုရင် လွှတ်တော်ကိုယ်စားလှယ်တွေ တစ်ယောက်မှ မသိလိုက်ဘူး။ တိုင်းလွှတ်တော်တင် မကဘူး။ ပြည်သူ့လွှတ်တော်မှာလည်း မသိရဘူး။ အဲဒီက လုပ်ဖော်ကိုင်ဖက်တွေကို မေးကြည့်တော့။ လွှတ်တော်က အဲဒီစီမံကိန်းနဲ့ ပတ်သက်ပြီး လုပ်နေတယ်ဆိုတာကို ဂျာနယ်တွေမှာ ဖွင့်ပွဲပါမှ သိရတယ်” ဟု ဒဂုံမြို့နယ် မဲဆန္ဒနယ်မှ တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ပြောကြားသည်။

အလားတူ သင်္ဃန်းကျွန်းမြို့နယ် မဲဆန္ဒနယ်အမှတ် (၁) မှ ဦးနေဘုန်းလတ်ကလည်း ယင်းစီမံကိန်းမှာ လွှတ်တော်တွင် လာရောက် ပြောဆို ရှင်းလင်းတင်ပြထားသည့် စီမံကိန်း မဟုတ်ကြောင်း၊ ပန္နက်ချအခမ်းအနား ပြုလုပ်ကြောင်း မီဒီယာများတွင် ဖော်ပြမှသာ သိရှိခဲ့ခြင်းဖြစ်သည်ဟု ပြောကြားသည်။

အဆိုပါ စီမံကိန်းမှာ ရွှေသံလွင်ကုမ္ပဏီ လက်အောက်ရှိ Alliance star ကုမ္ပဏီက တာဝန်ယူ အကောင်အထည်ဖော်မည် ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့မှ ထုတ်ပြန်ကြေညာခဲ့ပြီး စီမံကိန်း အသေးစိတ် အခြေအနေများနှင့် ပတ်သက်၍ ဒီဇင်ဘာ ၃၀ ရက်အထိ ထုတ်ပြန်ထားခြင်း မရှိပေ။

ယင်းစီမံကိန်းမှာ ယခင်အစိုးရ လက်ထက်က ခွင့်ပြုပေးထားခြင်း ဖြစ်သည်ဟု လှည်းကူးမြို့နယ် ပြည်သူ့လွှတ်တော်ကိုယ်စားလှယ် ဦးသိန်းနိုင်က ပြောကြားထားပြီး စီမံကိန်း အသေးစိတ်နှင့်ပတ်သက်ပြီး တိတိကျကျ မသိသေးကြောင်း သိရသည်။

“ဒီစီမံကိန်းက ပြည်ထောင်စုအဆင့် မဟုတ်တဲ့အတွက် အသေးစိတ် မသိရဘူး။ အခမ်းအနားတုန်းက ရှင်းပြတာလောက်ပဲ သိတယ်။ ပိုပြီးတော့ မသိသေးဘူး။ ဒါက တိုင်းဒေသကြီးက လုပ်တဲ့ စီမံကိန်းပါ။ သူတို့ဟာနဲ့ ဘယ်လိုလုပ်ခဲ့လဲ မသိရဘူး” ဟု လှည်းကူးမြို့နယ် ပြည်သူ့လွှတ်တော်ကိုယ်စားလှယ် ဦးသိန်းနိုင်က ပြောကြားသည်။

အဆိုပါ လှည်းကူးအိမ်ရာ စီမံကိန်းနှင့် ပတ်သက်ပြီး ရန်ကုန်တိုင်းဒေသကြီး လွှတ်တော်တွင် မေးခွန်းများ မေးမြန်းသွားမည်ဖြစ်ပြီး အစိုးရအဖွဲ့၏ ဖြေကြားမှုအပေါ် မူတည်၍ အဆိုအဖြစ် ပြောင်းလဲသင့်ပါက အဆိုအဖြစ် ပြောင်းလဲသွားမည်ဖြစ်ကြောင်း ဒဂုံမြို့နယ် မဲဆန္ဒနယ်အမှတ် (၁) တိုင်းဒေသကြီး လွှတ်တော်ကိုယ်စားလှယ်၊ ဘဏ္ဍာရေး၊ စီမံကိန်းနှင့် စီးပွားရေးကော်မတီ အတွင်းရေးမှူး ဦးကျော်ဇေယျက ပြောကြားသည်။

“အန်ကယ်တို့အနေနဲ့တော့ ပြန်စမယ့် လွှတ်တော်မှာ မေးခွန်းမေးမယ်။ အဲဒီပေါ်မှာ ပြန်ဖြေတဲ့အပေါ် မူတည်ပြီးတော့ အဆိုအဖြစ် ပြောင်းရင်ပြောင်းမယ်။ ကြားဖြတ်မေးခွန်းအပေါ်မှာ အစိုးရအဖွဲ့က ဘယ်လိုတုံ့ပြန်မလဲ ဆိုတာ မသိသေးဘူး။ အဲဒီအပေါ်မှာ အဆိုအနေနဲ့ တင်သင့်ရင် တင်မယ်လို့ စီစဉ်ထားတယ်” ဟု ဦးကျော်ဇေယျက ပြောကြားသည်။

အဆိုပါ စီမံကိန်းမှာ ဒုတိယအကြိမ် ရန်ကုန်တိုင်းဒေသကြီး လွှတ်တော် စတုတ္ထပုံမှန် အစည်းအဝေးတွင် ရန်ကုန်မြို့ပြ မဟာဗျူဟာစီမံကိန်း နောက်ဆက်တွဲအဖြစ် လွှတ်တော်သို့ တင်ပြခဲ့ပြီး လွှတ်တော်ကိုယ်စားလှယ်များက သီးခြားစီမံကိန်းအဖြစ် တင်ပြရန် အကြောင်းပြန်ခဲ့ကြောင်း၊ စီမံကိန်းအသေးစိတ် အချက်အလက်များကို လွှတ်တော်သို့ တင်ပြခဲ့ခြင်း မရှိဘဲ စီမံကိန်းကို အကောင်အထည်ဖော်ခြင်း ဖြစ်သည်ဟု တိုင်းဒေသကြီး လွှတ်တော် ကိုယ်စားလှယ်များက ပြောကြားသည်။

ပြည်သူ့လွှတ်တော်ဥက္ကဋ္ဌ ဦးဝင်းမြင့် အမျိုးသားဒီမိုကရေစီအဖွဲ့ချုပ်၏ ရန်ကုန်တိုင်းပါတီဝင်များနှင့် တွေ့ဆုံရာတွင် စီမံကိန်းမှန်သမျှ လွှတ်တော်သို့ တင်ပြပြီးမှသာ လုပ်ဆောင်ရမည်ဟု ပြောကြားထားသည်။ သို့သော် လက်ရှိ လုပ်ကိုင်မည့် လှည်းကူးစီမံကိန်းမှာ လွှတ်တော်ကိုယ်စားလှယ်များ သိရှိခဲ့ခြင်းမရှိပေ။

“အန်ကယ်တို့ ပြည်သူ့လွှတ်တော် ဥက္ကဋ္ဌကြီးက ပြောထားတာ ရှိတယ်။ အဲဒါ ပါတီဌာနချုပ်မှာပဲ ပါတီဝင်တွေလည်း အများကြီးရှိတယ်။ ရန်ကုန်အစိုးရအဖွဲ့လည်း ပါတယ်။ စီမံကိန်းတွေက လွှတ်တော်ကို မဖြတ်ဘဲနဲ့တော့ မိုးပေါ်ကတောင် ပျံလို့မရဘူးဆိုပြီး ပြောထားတယ်။ ၂၀၀၈ အခြေခံ ဥပဒေထဲမှာလည်း ရှိပြီးသား။ တိုင်းဒေသကြီးအစိုးရက စီမံကိန်းတွေကို လွှတ်တော်ကို တင်ပြရမယ်ဆိုတာ ပြဋ္ဌာန်းထားပြီးသား” ဟု ဦးကျော်ဇေယျက ပြောကြားသည်။

စီမံကိန်းများနှင့် ပတ်သက်ပြီး ဒီမိုကရေစီစနစ်တွင် လွှတ်တော်သို့ လာရောက်ရှင်းပြကာ တာဝန်ယူမှု၊ တာဝန်ခံမှုများဖြင့်သာ ဆောင်ရွက်ရမည် ဖြစ်ကြောင်း၊ သို့သော် ဥပဒေ၏ အားနည်းချက်အဖြစ် မှတ်ယူရမည့် မည်သည့် လုပ်ငန်းအမျိုးအစားအား စီမံကိန်းအဖြစ် သတ်မှတ်မည်၊ မည်သည့် လုပ်ငန်းအား လုပ်ငန်းအသေးအဖြစ် သတ်မှတ်မည်ဆိုသည့် အဓိပ္ပာယ်ဖွင့်ဆိုချက် မရှိကြောင်း၊ လှည်းကူးတွင် အကောင်အထည်ဖော်မည့် လုပ်ငန်းမှာ စီမံကိန်းအမျိုးအစားတွင် ပါဝင်ကြောင်း သင်္ဃန်းကျွန်း မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဦးနေဘုန်းလတ်က ပြောကြားသည်။

“ဥပဒေထဲမှာတော့ စီမံကိန်း လုပ်မယ်ဆိုရင် လွှတ်တော်ရဲ့သဘောတူညီချက်ကို ယူရမယ်လို့ကို ဖော်ပြထားတယ်။ ဒါပေမဲ့ ပြဿနာက ဘာလဲဆိုတော့ စီမံကိန်းဆိုတာက ဘာကိုပြောတာလဲ။ တချို့ဟာတွေဆိုရင် အစိုးရလုပ်ပိုင်ခွင့်နဲ့ လုပ်တာတွေ ရှိတယ်။ ဒါပေမဲ့ နည်းနည်းကြီးသွားပြီဆိုရင် လွှတ်တော်ကို ခွင့်ပြုချက်ယူရမှာပေါ့။ အဲဒီမှာ ပြဿနာက စီမံကိန်းက ဘာကိုပြောတာလဲ။ လုပ်ငန်းသေးလေးတွေက ဘာကိုပြောတာလဲ။ ဥပဒေမှာ အဓိပ္ပာယ်ဖွင့်ထားတာ မရှိဘူး။ အဲဒါက ဥပဒေရဲ့ဟာကွက်။ လှည်းကူးကိစ္စဆိုရင် စီမံကိန်းကြီးဗျာ။ အမှန်မှာ စလို့ကို မရဘူး။ ဘာမှ လုပ်လို့မရဘူး။ အစိုးရအဖွဲ့မှာ လုပ်ပိုင်ခွင့် မရှိဘူး။ လွှတ်တော်ကိုတင်၊ သဘောတူရင်လုပ်ပေါ့။ ဒါက ဥပဒေကိုကျော်လွန်တဲ့ သဘောမှာရှိတယ်။ ဒါပေမဲ့ ပြန်ညွှန်းလို့ရတာက ဒါကြီးက စီမံကိန်းမဟုတ်ဘူးလို့ ပြောရင် ဘယ်လိုလုပ်မလဲ။ ဒါက ဥပဒေရဲ့ ဟာကွက်ဖြစ်တာလေ” ဟု ဦးနေဘုန်းလတ်က ပြောကြားသည်။

ယင်းအခြေအနေများကြောင့် စီမံကိန်းများဟု သတ်မှတ်ရန် ဥပဒေပြဋ္ဌာန်းမှုများ ပြုလုပ်ရန် လိုအပ်ကြောင်း၊ သို့မှသာ လုပ်ငန်းများ အဆင်ပြေချောမွေ့မည် ဖြစ်ကြောင်း ဦးနေဘုန်းလတ်က သူ၏အမြင်ကို ပြောကြားသည်။

လှည်းကူးအိမ်ရာစီမံကိန်း ကဲ့သို့သော လုပ်ငန်းများမှာ လွှတ်တော်သို့ တင်သွင်းပြီး အတည်ပြုချက် ရယူပြီးမှသာ လုပ်ဆောင်ရမည့် စီမံကိန်းအမျိုးအစားဖြစ်ကြောင်း လွှတ်တော်ကိုယ်စားလှယ်များက ဆိုသည်။

“လှည်းကူးလို စီမံကိန်းတွေ၊ YBS လို စီမံကိန်းတွေက လွှတ်တော်ကို ဖြတ်ကိုဖြတ်ရမယ်။ အန်ကယ်တို့ အနေနဲ့ကလည်း ကိုယ့်အစိုးရဆိုတော့ သိပ်မပြောကြတာ။ သူတို့ကလည်း အထက်ကပဲ ခိုင်းတယ်။ လာပြောတာတွေက ရှိတယ်။ အန်ကယ်တို့ ကော်မတီအနေနဲ့ကတော့ အဲဒီလိုမျိုးကို သဘောမတူဘူး။ လွှတ်တော်ကို ပွင့်လင်းမြင်သာမှုရှိစွာ ချပြရမယ်” ဟု ဦးကျော်ဇေယျက ပြောကြားသည်။

■ လှည်းကူးစီမံကိန်းက အရင်အစိုးရ သတ်မှတ်ခဲ့တဲ့ စီမံကိန်းလား

လှည်းကူးစီမံကိန်းမှာ ယခင်အစိုးရ လက်ထက်တွင် သတ်မှတ်ခဲ့သည့် မေးခွန်းအား တိုင်းဒေသကြီး လွှတ်တော် ကိုယ်စားလှယ်များကို မေးမြန်းရာတွင် တိကျသော အဖြေအား မရရှိခဲ့ပေ။ ထို့ပြင် ရန်ကုန်တိုင်းဒေသကြီး အစိုးရအဖွဲ့က လွှတ်တော်သို့ တင်ပြခဲ့သည့် မြို့သစ်စီမံကိန်းများတွင် အဆိုပါ လှည်းကူးစီမံကိန်းမှာ နောက်ဆက်တွဲအဖြစ်သာ တင်သွင်းခဲ့သည့် စီမံကိန်းတစ်ခု ဖြစ်သည်။

အဆိုပါ အခြေအနေနှင့် ပတ်သက်ပြီး လွှတ်တော်မှ အသေးစိတ်တင်ပြရန် ပြောကြားခဲ့သော်လည်း လွှတ်တော် ပြီးဆုံးချိန်အထိ ရန်ကုန်တိုင်းဒေသကြီး အစိုးရအဖွဲ့မှ တင်ပြနိုင်ခဲ့ခြင်း မရှိကြောင်း လွှတ်တော်ကိုယ်စားလှယ်များက ပြောကြားသည်။

“စီမံကိန်းဥပဒေ အကြံပြုတုန်းကတော့ လုပ်မယ်ဆိုတာကို တစ်ခါ ရှင်းပြဖူးတယ်။ အပြင်မှာ တစ်ခေါက်ပေါ့။ ရန်ကုန်မဟာဗျူဟာ စီမံကိန်းကို ရှင်းပြတာပါတယ်။ ဒါပေမဲ့ အသေးစိတ်တော့ မဟုတ်ဘူး။ ၀န်ကြီးချုပ်ကိုယ်တိုင် လာရှင်းပြတယ်။ စတုတ္ထအကြိမ် လွှတ်တော်မှာ နောက်ဆက်တွဲဆိုပြီး ထည့်တယ်။ ကိုယ်စားလှယ်တွေက စီမံကိန်းအနေနဲ့ တင်ပြပါဆိုပြီး ပြောခဲ့တာ” ဟု လှိုင်မြို့နယ် မဲဆန္ဒနယ်အမှတ် (၁) တိုင်းဒေသကြီးလွှတ်တော် ကိုယ်စားလှယ် ဦးကျော်ကျော်ထွန်းက ပြောကြားသည်။

ထိုသို့ နောက်ဆက်တွဲ အနေဖြင့် တင်ပြမှုအား လွှတ်တော်က လက်မခံခြင်းကြောင့် အသေးစိတ်တင်ပြရန် ပြန်လည် အကြောင်းကြားခဲ့သော်လည်း ပဉ္စမအကြိမ်လွှတ်တော် ပြီးဆုံးချိန်အထိ လာရောက်တင်ပြခြင်း မရှိခဲ့ကြောင်း ဦးကျော်ဇေယျက ပြောကြားသည်။

“သို့သော်လည်းပဲ လွှတ်တော်မှာ နောက်ဆက်တွဲ အနေနဲ့ တင်ပြတာ လက်မခံပါဘူးဆိုပြီး လွှတ်တော်ကိုယ်စားလှယ်တွေက ထကန့်ကွက်ကြတော့ လွှတ်တော်သာ ပြီးသွားတယ်။ အဲဒီဟာက ပြန်မတက်လာတော့ဘူး။ အန်ကယ်တို့ကတော့ စောင့်ကြည့်နေတာ။ ဘာထပ်လာဦးမလဲ ဆိုပြီးတော့။ ဒါပေမဲ့ ပြန်မလာတော့ဘူး” ဟု ဦးကျော်ဇေယျက ပြောကြားသည်။

ယခင်အစိုးရက ရန်ကုန်တိုင်းဒေသကြီး နှင့် ပတ်သက်သည့် မြို့သစ်စီမံကိန်းများ ပြုလုပ်မည်ဆိုသည့် နေရာများမှာ ကြည့်မြင်တိုင်မြို့နယ်ရှိ လယ်မြေ ၁၅၄၅ ဧက၊ ဆိပ်ကြီး ခနောင်တိုမြို့နယ်ရှိ လယ်မြေ ၈၇ ဧက၊ တွံတေးမြို့နယ်ရှိ လယ်မြေ ၁၆၇၈၉ ဧကတွင် အကောင်အထည်ဖော်မည်ဟု သတ်မှတ်ထားခဲ့သည်။

ယင်းစီမံကိန်းအတွက် အကောင်အထည်ဖော်မည့် ကုမ္ပဏီအဖြစ် ရန်ကုန်အနောက်တောင်ဒေသဖွံ့ဖြိုးရေး အများနှင့်သက်ဆိုင်သောကုမ္ပဏီ၊ Business Capital City Development Ltd ၊ ရွှေပုပ္ပားအပြည်ပြည်ဆိုင်ရာ ဆောက်လုပ်ရေး ကုမ္ပဏီတို့ စုပေါင်းဖွဲ့စည်းထားသော Consortium အား Developer အဖြစ် သတ်မှတ်ထားခဲ့သည်။

ယခုအစိုးရ လက်ထက်တွင် မူလစာချုပ် ချုပ်ဆိုခဲ့သည့် ကုမ္ပဏီသုံးခုကို ခေါ်ယူညှိနှိုင်းခဲ့သည်။ ညှိနှိုင်းခဲ့သည့် အကြောင်းရင်းမှာ အကောင်အထည်ဖော်မည့် စီမံကိန်းပမာဏ ကြီးမားခြင်း၊ ပြည်သူလူထူ၏ ဘ၀လူနေမှု မြင့်မားစေမည့် စီမံကိန်းဖြစ်ခြင်း၊ မဟာရန်ကုန်၏ အနာဂတ်ရည်မှန်းချက် ဖြစ်သော ဖွံ့ဖြိုးတိုးတက်မှု နောက်ကျလျက်ရှိသော ဒေသများကို တစ်ပြေးညီ တိုးတက်ဖွံ့ဖြိုးလာစေရေး၊ အလုပ်အကိုင် အခွင့်အလမ်းများ တိုးတက်လာစေရေး၊ ကုမ္ပဏီအနည်းငယ်မှ လက်ဝါးကြီးအုပ် လုပ်ကိုင်မည့်အစား နိုင်ငံသားလုပ်ငန်းရှင်များ ပါဝင်လုပ်ကိုင်ခွင့် ရရှိစေရေးတို့ကို ရှေးရှုပြီး ခေါ်ယူညှိနှိုင်းခဲ့ခြင်းဖြစ်ပြီး ယင်းတွေ့ဆုံ ညှိနှိုင်းမှုများအရ ယခင်အစိုးရနှင့် ချုပ်ဆိုခဲ့သော စာချုပ်အား ပြန်လည် ဖျက်သိမ်းခဲ့သည်။

သို့သော် ယခုလုပ်ကိုင်မည့် လှည်းကူးစီမံကိန်းနှင့် ပတ်သက်ပြီး လွှတ်တော်သို့ အကြမ်းဖျင်း တင်သွင်းမှုသာရှိခဲ့ပြီး တိကျရေရာသော အဖြေများမရှိခြင်းကြောင့် မေးခွန်းထုတ်ရန် များစွာကျန်ရှိနေသေးကြောင်း ဦးကျော်ဇေယျက ပြောကြားသည်။

ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းကမူ အဆိုပါ လှည်းကူးတွင် ပြုလုပ်မည့် Eco Green City အိမ်ရာစီမံကိန်း ပန္နက်တင်မင်္ဂလာနှင့် စီမံကိန်းဆိုင်ရာ ရှင်းလင်းပွဲတွင် ယခုစီမံကိန်းမှာ လှည်းကူးမြို့၏ အလားအလာကောင်းပေါင်း များစွာရှိနေသည့် မြို့တစ်မြို့ဖြစ်ပြီး အစိုးရအဖွဲ့သစ်၏ ပထမဆုံးဦးဆုံး တည်ဆောက်မည့် အကြီးမားဆုံး စီမံကိန်းကြီးတစ်ခု ဖြစ်ကြောင်း၊ လှည်းကူးမြို့နယ်တွင် ယင်းကဲ့သို့ စီမံကိန်းကြီးတစ်ရပ်ကို တည်ဆောက်နိုင်သည့်အတွက် မြို့၏ ဖွံ့ဖြိုးတိုးတက်မှုများကို များစွာ အထောက်အကူပြုနိုင်ပြီး ရန်ကုန်မြို့၏ ဖွံ့ဖြိုးတိုးတက်မှုအတွက်လည်း များစွာအရေးပါကြောင်း၊ စီမံကိန်းအား တိုင်းဒေသကြီးအစိုးရအဖွဲ့မှ အနီးကပ်ကြီးကြပ် ကွပ်ကဲသွားမည် ဖြစ်ကြောင်း ပြောကြားထားသည်။

■ လွှတ်တော်ကို မတင်ပြဘဲ လုပ်ကိုင်ခဲ့တဲ့ စီမံကိန်းတွေ ရှိသလား

လွှတ်တော်သို့ တင်ပြခြင်းမရှိဘဲ အကောင်အထည်ဖော် ဆောင်ရွက်ခဲ့သည့် စီမံကိန်းများလည်း ရှိပြီး အထင်သာဆုံး ဥပမာအဖြစ် အဆိုပါ လှည်းကူးစီမံကိန်းမှာ လတ်တလော လုပ်ကိုင်ခဲ့သည့် စီမံကိန်းတစ်ခုသာ ဖြစ်ကြောင်း လွှတ်တော်ကိုယ်စားလှယ်အချို့ က တညီတညွတ်တည်း ပြောကြားသည်။

အချို့သော လုပ်ငန်းများမှာ တိုင်းဒေသကြီး အစိုးရအဖွဲ့၏ အခွင့်အာဏာဖြင့် လုပ်ကိုင်ဆောင်ရွက်နိုင်သည့် လုပ်ငန်းများရှိသော်လည်း စီးပွားရေးအရ ကြီးမားကျယ်ပြန့်သည့် စီမံကိန်းများဖြစ်ပါက လွှတ်တော်သို့ တင်သွင်းရမည် ဖြစ်ကြောင်း ကျောက်တံတား မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ပြောကြားသည်။

“စီမံကိန်းတွေ အားလုံးကတော့ တိုင်းလွှတ်တော်ကို တင်စရာမလိုတာတွေ ရှိတယ်။ သို့ပေမဲ့ ရန်ကုန်တစ်တိုင်းလုံးနဲ့ သက်ဆိုင်တဲ့ဟာမျိုးတွေ ဆိုရင်တော့ တင်ရတယ်။ ဥပမာ စတုတ္ထအကြိမ် လွှတ်တော်တုန်းကဆိုရင် မြို့သစ်စီမံကိန်းဆိုပြီး တင်တယ်။ အဲဒါမျိုးက သေချာတယ်။ လွှတ်တော်ကိုဖြတ်ဖို့ လိုတယ်။ ဆိုတော့ အဲဒီတုန်းက လွှတ်တော်က သေသေချာချာ ပြည့်ပြည့်စုံစုံလေး တင်ပြပေးပါဆိုပြီး ပြောလိုက်တယ်လေ။ အဲဒီတုန်းက စီမံကိန်းကို လွှတ်တော်က အတည်မပြုလိုက်ဘူး။ အဲဒီလိုလေးတွေ ရှိတယ်။ ဆိုတော့ များသောအားဖြင့်ကတော့ အခုလည်း စီမံကိန်းတွေ ကြားရတယ်။ တိုင်းအစိုးရက လုပ်တယ်။ သေချာတာကတော့ လွှတ်တော်ကတော့ မသိတာတွေ များတယ်။ ကိစ္စတိုင်းတော့ မဟုတ်ဘူးပေါ့။ လွှတ်တော်ကိုဖြတ်ဖို့ လိုတယ်ဆိုရင်တော့ လွှတ်တော်ကိုဖြတ်ဖို့ လိုကိုလိုအပ်တယ်။ တချို့ဟာတွေကတော့ တိုင်းအစိုးရ အာဏာနဲ့ပဲ သွားလို့ရတာတွေလည်း ရှိပါတယ်။ မြို့သစ်စီမံကိန်းလို ဟာမျိုးတွေဆိုရင် ဖြတ်ကို ဖြတ်ရမယ့် ဟာတွေ။ ဒါတွေက စီးပွားရေးအရလည်း အရမ်းကို ကြီးထွားတဲ့လုပ်ငန်းတွေ။ ဒါဆိုရင် လွှတ်တော်ကို ဖြတ်ရမယ်”ဟု ဒေါ် ကြည်ပြာက ပြောကြားသည်။

အချို့သော လုပ်ငန်းများမှာ လွှတ်တော်သို့ တင်ပြစရာမလိုသည့် လုပ်ငန်းများ ရှိသော်လည်း သက်ဆိုင်ရာ နယ်မြေခံလွှတ်တော် ကိုယ်စားလှယ်အား အသိပေး အကြောင်းကြားသင့်ကြောင်း ဒေါ်ကြည်ပြာက ပြောကြားသည်။

“ကိုယ့်အစိုးရ ကိုယ့်လွှတ်တော် ဖြစ်နေတဲ့အခါကျတော့ တချို့ကိစ္စလေးတွေက လွှတ်တော်ကို ဖြတ်စရာမလိုပေမယ့် သူ့မြို့နယ်နဲ့ သက်ဆိုင်တဲ့ ဟာမျိုးလေးတွေဆိုရင် မြို့နယ်ဆိုင်ရာ ကိုယ်စားလှယ်တွေကို ပေးသိထားရင် ကောင်းတာပေါ့။ မြို့နယ်ဆိုင်ရာ ကိုယ်စားလှယ်တွေ အနည်းဆုံးတော့ သိထားရင် စီမံဆောင်ရွက်ရတာ အဆင်ပြေမယ်။ တချို့ကိုယ်စားလှယ်တွေဆိုရင် ကိုယ့်မြို့နယ်ကို ၀န်ကြီးလာသွားတယ် ဆိုတာတောင် မသိလိုက်ဘူး။ ထွေအုပ်ပဲသိတဲ့ အဖြစ်တွေရှိတယ်။ ဘက်ညီညီနဲ့ အလုပ်လုပ်နိုင်ဖို့ မျှော်လင့်တယ်။ အစိုးရအဖွဲ့က မပြောမဆိုဘဲနဲ့ လုပ်နေတာတွေတော့ မဟုတ်ဘူး။ တချို့ကိစ္စလေးတွေမှာ ဟနေတာတွေတော့ ရှိတယ်”ဟု ဒေါ်ကြည်ပြာက ဆိုသည်။

ထို့ပြင် လွှတ်တော်သို့ တင်ပြခဲ့သော်လည်း တက်သုတ်ရိုက် တင်သွင်းခဲ့သည့် လုပ်ငန်းများလည်း ရှိကြောင်း၊ ထိုသို့ တက်သုတ်ရိုက် တင်သွင်းခဲ့သဖြင့် လုပ်ငန်း၏ အားသာချက်၊ အားနည်းချက်များကို လွှတ်တော်တွင်း တင်သွင်းဆွေးနွေးနိုင်ရန် အချိန်လုံလောက်မှု မရှိကြောင်း၊ တိုင်းဒေသကြီး အစိုးရအဖွဲ့အနေဖြင့် လုပ်ငန်းများ လုပ်ဆောင်ရာတွင် တိကျသေချာသော မူဝါဒများချမှတ်ရန် လိုအပ်ကြောင်း တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက အကြံပြုပြောကြားသည်။

“တချို့စီမံကိန်းတွေဆိုရင် ကပ်ပြီးတော့ လုပ်တယ်။ အထင်သာဆုံးကတော့ YBS ပေါ့။ အဲဒါကိုထားလိုက်ဦး။ အန်ကယ်တို့လည်း မေးခဲ့တယ်။ ကားတွေကို G to G ၀ယ်တာတွေ ဘာတွေကိုပေါ့။ အဲဒီအချိန် ကျောင်းကားဆိုပြီး ပေါ်လာတယ်။ ဘယ်သူမှ မသိကြဘူး။ ကျောင်းအုပ်ဆရာကြီးတွေဆိုရင် ကျောင်းဖွင့်ခါနီးမှ သိခဲ့တယ်။ အဲဒါက အစပိုင်းမှာ တော်တော်လေးကို လှုပ်ခတ်သွားတယ်။ အဲဒါကျောင်းအုပ်တွေကို ခေါ်ပြောတယ်။ အဲဒါနဲ့ သူတို့ အခက်အခဲကို ပြောတယ်။ အဲဒီလိုပြောတော့ ကိုယ်တွေမှာလည်း အဖြေမရှိဘူး။ အဲဒါနဲ့ ဒေါ်နီလာကျော်နဲ့ တွေ့တယ်။ အစ်မ အဲဒီကိစ္စ ဒီလိုလားဆိုပြီး မေးရတယ်။ အဲဒါနဲ့ လွှတ်တော်ထဲမှာ ဆွေးနွေးရတယ်။ အဲဒီလိုမျိုးတွေချည်းပဲ။ အဲဒီမှာ အခက်အခဲတွေကို ဆွေးနွေးပြောပြတော့မှ အခုကျောင်းဖွင့်ရာသီမှာတော့ သိပ်မလုပ်ပါဘူး။ သူတို့မှာထားတဲ့ ကားတွေကလည်း မရောက်သေးတော့ နောက်ပွင့်ကားတွေကိစ္စက ပြန်ငြိမ်သွားတယ်။ ကားတွေ ရောက်လာတော့ နောက်ပွင့်ကားတွေနဲ့ ကျောင်းကား မလုပ်ရဘူး ဖြစ်ပြန်ရော။ အဲဒီမှာ ကားတွေက ဈေးများတော့ ဘယ်ကျောင်းမှ မ၀ယ်နိုင်ဘူး။ ကားပိုင်ရှင်တွေကလည်း မ၀ယ်နိုင်ဘူး။ အဲဒါ နဲ့ ကျောင်းသုံးကျောင်းကို ပိုင်းလော့အနေနဲ့ စမ်းမယ်ဖြစ်ပြန်ရော။ အခုတော့ နောက်ပွင့်ကားတွေနဲ့တော့ မပြေးတော့ဘူး။ ဒါပေမဲ့ သူတို့ကားတွေကလည်း ဈေးကို မတတ်နိုင်တော့ ဘယ်သူမှလည်း မ၀ယ်နိုင်သေးဘူး။ အခုလည်း ပြေးနေတဲ့ ကျောင်းကားတွေကို YRTA သတ်မှတ်ချက်နဲ့ ကိုက်မကိုက် စစ်ဆေးဦးမယ်။ ဒါပေမဲ့ စဉ်းစားစရာက ဘယ်လိုစစ်မှာလဲ။ YRTA က ဥပဒေတောင် မထွက်သေးဘူး။ အဲဒါကလည်း ပြဿနာတွေ လာဦးမယ်။ အန်ကယ်တို့က ကန့်လန့်တိုက်တာ မဟုတ်ဘူး။ စနစ်တကျ လုပ်စေချင်တာ။ ဥပမာ တစ်ခုဆိုရင် ကျောင်းကားကို အရစ်ကျနဲ့ ရောင်းပေးမယ်တဲ့ဆိုပြီး ပြောထားတာ ရှိတယ်။ ယာဉ်ပိုင်ရှင်တွေက ကိုယ်စားလှယ်တွေကို မေးတာပေါ့။ အဲဒီတော့ ကျွန်တော်ကလည်း မေးတာပေါ့။ အစ်မကြီး ဘယ်လိုပုံစံမျိုးနဲ့လဲ။ အရစ်ကျက ဘယ်နှနှစ်လဲ။ ဘယ်လို ငွေသွင်းရမလဲ ဆိုတာကိုမေးတော့ အဲဒါကိုလည်း ရေရေရာရာ မပြောနိုင်ဘူး။ မူဝါဒမရှိဘူး ဖြစ်နေတယ်။ အစိုးရအဖွဲ့က လုပ်သာလုပ်တယ် အောက်ခြေမသိမ်းဘူး။ အဝေးကြီး ကြည့်စရာမလိုဘူး။ YBS ဆို တစ်နေ့တော့ အောင်မြင်မှာပါ။ ဒါပေမဲ့ ဆုံးရှုံးမှုများများနဲ့ ပေးဆပ်မှုများများနဲ့ အောင်မြင်တာတော့ သိပ်သဘာဝမကျဘူး။ အန်ကယ်တို့က ပြောင်းတာကို ကန့်ကွက်တာ မဟုတ်ဘူး။ စနစ်တကျ လေးလုပ်ဖို့ပဲ ပြောတာ”ဟု ဦးကျော်ဇေယျက ပြောကြားသည်။

အစိုးရအဖွဲ့နေဖြင့် စီမံခန့်ခွဲမှု အပိုင်းများတွင် လုပ်ကိုင် ဆောင်ရွက်နိုင်သော်လည်း စီမံကိန်းအဖြစ် အကောင်အထည်ဖော်မည် ဆိုပါက လုပ်ချင်တိုင်းလုပ်ရန် အခွင့်မရှိကြောင်း၊ လွှတ်တော်၏ တာဝန်မှာ အစိုးရအဖွဲ့ လုပ်ကိုင်ဆောင်ရွက်မည့် စီမံကိန်းများကို အပြုသဘောဆောင်သည့် အကြံပြုချက်များ ပေးရမည့်တာဝန် ရှိကြောင်း ဦးနေဘုန်းလတ်က ပြောကြားသည်။

“စီမံခန့်ခွဲမှုကတော့ အစိုးရက လုပ်လို့ရတယ်။ စီမံကိန်း ဖြစ်သွားရင်တော့ အစိုးရက လုပ်ချင်တိုင်း လုပ်လို့မရဘူး။ တံတားတစ်စင်း ဆောက်ရင်တောင် ကျွန်တော်တို့ဆီမှာ ဘတ်ဂျက်တောင်းရတယ်။ YBS တုန်းကဆိုရင် ဘတ်ဂျက်တော့ တောင်းလိုက်တယ်။ အဲဒါကို ဘယ်မှာသုံးမလဲ ဆိုတာကို သေချာရှင်းပြထားခြင်း မရှိတော့ ကျွန်တော်တို့မှာ လုပ်ရကိုင်ရတာ နည်းနည်းခက်တယ်”ဟု ဦးနေဘုန်းလတ် က ပြောကြားသည်။

စီမံကိန်းများ၊ ရှေ့ဆက်လုပ်ကိုင်မည့် လုပ်ငန်းစဉ်များကို လွှတ်တော်ကိုယ်စားလှယ်များအား ပြောကြားထားခြင်း မရှိခြင်း၊ တိကျ သေချာသော မူဝါဒချမှတ်ထားခြင်း မရှိသောကြောင့် လူထုနှင့်တွေ့ဆုံရာတွင် များစွာအခက်အခဲ ရှိကြောင်း ဘုရင့်နောင်ဈေး ပြောင်းရွှေ့မည့်ကိစ္စကို ဥပမာပေးကာ ဦးကျော်ဇေယျ က ပြောကြားသည်။

“ဘုရင့်နောင်ဈေးကိစ္စဆိုရင် မနေ့က (ဒီဇင်ဘာ ၂၉ ရက်) မှ သွားလေ့လာ မေးမြန်းတာ။ အဲဒီက လွှတ်တော်ကိုယ်စားလှယ်လည်း ပါတယ်။ လုပ်ငန်းရှင်တွေက ဆိုင်ခန်းကို ငှားချင်တယ်။ ပြင်ချင်တယ်။ ဒါပေမဲ့ သေချာတဲ့ ဆုံးဖြတ်ချက်က မကျတော့ လုပ်ငန်းရှင်တွေက မလုပ်ရဲဘူး။ အန်ကယ်တို့ သွားစစ်တော့ မပြတ်မသားပြောထားတော့ သူတို့မှာ ဘာဆက်လုပ်ရမှန်း မသိဘူး။ အဲဒါတွေကို ၀န်ကြီးချုပ်က ပြတ်ပြတ်သားသား ပြောသင့်တယ်။ အဲဒီကိစ္စကို လွှတ်တော်ကလည်း မသိ၊ လုပ်ငန်းရှင်တွေကလည်း ပြတ်ပြတ်သားသား မသိတော့ သူတို့က ဘယ်သူ့ အားကိုးရမလဲ မသိဘူး။ ဒါကလည်း စီမံကိန်းတစ်ခုပဲ။ ပြတ်ပြတ်သားသား ရှိရမယ်။ အကောင်အထည်ဖော်တာကို လုပ်ငန်းရှင်တွေကသိမှ သူတို့ ဘယ်လိုလုပ်ရမလဲ ဆိုတာသိမှာ။ နောက်ပြီးတော့ ကားတွေကိုလည်း ဒီအတိုင်းပဲ။ အဲဒီမှာရှိတဲ့ ကုန်ကားတွေကိုလည်း အာဆီယံပုံစံ လုပ်မယ်ပြောထားတယ်။ အဲဒါမှ မဆုံးသေးဘူး။ ယာဉ်ကြော ကျပ်တည်းလို့ မင်းတို့ကားတွေ မသုံးတော့ဘူး။ တစ်ခါ ရေလမ်းကြောင်းကနေ ကုန်တွေ ပို့ရမယ်ဆိုပြီး လုပ်ပြန်ရော။ ကုန်းလမ်းကြောင်းတောင်မှ မပြီးသေးဘူး။ အကောင်အထည်လည်း မပေါ်သေးဘူး။ ရေလမ်းကြောင်းက လုပ်မယ်ဆိုပြီး ပြောထားသေးတယ်။ ရေလမ်းကြောက လုပ်မယ်ဆိုပြီး ပြောထားတဲ့ စီမံကိန်းကလည်း ဘယ်လိုလုပ်မှာလဲ ဘာလဲဆိုတာလည်း မသိရသေးဘူး။ အဲဒါတွေက ၀န်ကြီးချုပ်က ပြောသွားတော့ ၀န်ကြီးချုပ် ဆိုတာကလည်း ရိုးရိုးကိုယ်စားလှယ်နဲ့ မတူဘူးလေ။ ရိုးရိုးကိုယ်စားလှယ်က ပြောတာနဲ့ ၀န်ကြီးချုပ်ကပြောတဲ့ဟာ ပိုလေးနက်တယ်။ သူပြောတဲ့စကားပေါ်မှာ အခြေပြုပြီး စီးပွားရေးသမားတွေက စောင့်ပြီး နားစွင့်မှာပဲ။ အန်ကယ်လည်း စီးပွားရေးသမားဆို ၀န်ကြီးချုပ်ပြောတဲ့ စကားကို နားစွင့်မှာပဲ။ သူက ပြတ်ပြတ်သားသားပြော။ ခင်ဗျားတို့ ကားတွေ ဘယ်နေ့နောက်ဆုံး သယ်စရာမလိုတော့ဘူး။ ရေလမ်းကြောင်းကနေ အကောင်အထည်ဖော်မယ်။ အဲဒီလိုလည်း မဟုတ်ဘူး။ အလုပ်လုပ်မယ့် သူတွေက ဘာလုပ်လို့ ဘာကိုင်ရမလဲ မသိဘူးဖြစ်နေတယ်။ အဲဒီတော့ လွှတ်တော် ကိုယ်စားလှယ်တွေဆီကို လာတယ်။ မေးတယ်။ အန်ကယ်တို့မှာလည်း သူတို့ကို ပြန်ဖြေရမယ့် အဖြေမရှိဘူး။ တချို့ဟာတွေက သူတို့ ( အစိုးရအဖွဲ့) ပြောထားပြီး အကောင်အထည် မဖော်တာတွေ ရှိတယ်။အဲဒါတွေဆိုရင် ဘယ်သူမှလည်း မသိလိုက်ဘူး။ ကြည့်မြင်တိုင်မှာဆိုရင် မြို့သစ်စီမံကိန်း လုပ်မယ်ဆိုပြီး ပြောထားတာ ရှိတယ်။ မိုးကုန်ရင် အကောင်အထည်ဖော်မယ်ဆိုပြီး ပြောထားတာ။ အဲဒါက လွှတ်တော်မှာလည်း လိပ်ခဲတည်းလည်း ဖြစ်နေတုန်း။ မြို့သစ်က ဒလဘက်ကို ပြောင်းသွားတယ်။ အဲဒီမှာ တချို့ ဒေသခံတွေကလည်း သဘောကျတာ ရှိသလို သဘောမကျတာလည်း ရှိတယ်။ သို့သော်လည်းပဲ အစိုးရအဖွဲ့က ၀န်ကြီးချုပ်ကိုယ်တိုင် လုပ်ရမယ့်အဆင့် မဟုတ်သေးဘူး။ သူ ဒီစီမံကိန်းတွေ လုပ်ချင်တယ်။ လွှတ်တော်ကိုပြောမယ်။ ဒေသခံ ကိုယ်စားလှယ်ကလည်း ဆွေးနွေးမယ်။ အန်ကယ်တို့ စီမံကိန်းကော်မတီကလည်း ကြည့်မယ်။ အပြန်အလှန် ဆွေးနွေးမယ်ဆိုရင် လုပ်ငန်းတွေ ချောမွေ့တာပေါ့” ဟု ဦးကျော်ဇေယျက ပြောကြားသည်။

■ လွှတ်တော်က အစိုးရကို ထိန်းကျောင်းမှု အားနည်းနေပြီလား

သက်တမ်း နှစ်နှစ်ကျော်လာပြီ ဖြစ်သည့် ရန်ကုန်တိုင်းဒေသကြီး အစိုးရအဖွဲ့အား ရန်ကုန်တိုင်းဒေသကြီး လွှတ်တော်အနေဖြင့် ထိန်းကျောင်း တည့်မတ်နိုင်ပြီလား ဆိုသည့် မေးမြန်းမှုအပေါ် တိုင်းဒေသကြီးလွှတ်တော် ကိုယ်စားလှယ် ဦးနေဘုန်းလတ်က “လွှတ်တော်က အစိုးရကို ထိန်းကျောင်းနိုင်ပြီလို့ မယူဆဘူး။ ကျွန်တော်တို့ လွှတ်တော်က မေးခွန်းတွေ မေးတယ်။ အဆိုတွေ တင်တယ်။ အတိုင်းအတာ တစ်ခုအထိတော့ ဘတ်ဂျက်တွေ စိစစ်ဖြတ်တောက်တာ ရှိတယ်။ လိုအပ်တဲ့ မေးခွန်းတွေလည်း မေးနေတာပဲ။ ဒါပေမဲ့ အဲဒီအပေါ်မှာ အစိုးရအနေနဲ့ တာဝန်ယူ ဆောင်ရွက်မှုပေါ့။ နောက်တစ်ခုကတော့ လေးစားမှုပေါ့။ အဲဒါကတော့ အခုထိတော့ အားရစရာမရှိဘူး။ အထူးသဖြင့် ထောက်ပြချင်တာက လွှတ်တော်က အဆိုတစ်ခုကို အတည်ပြုလိုက်တယ်ပေါ့။ တကယ်တမ်း လွှတ်တော်မှာ အဆိုတစ်ခု အတည်ပြုလိုက်ပြီဆိုရင် အစိုးရအနေနဲ့ တော်တော်လေးကို အလေးအနက်ထားပြီးတော့ လုပ်ငန်းစဉ်တွေ လိုက်ရမှာ။ ဒါပေမဲ့ အခုတော့ အဲဒီလိုလိုက်တာ မရှိဘူး။ အဆိုတင်တယ်။ အတည်ပြုတာပဲ အဖတ်တင်တယ်။ ထိထိရောက်ရောက် မရှိဘူး။ ကျွန်တော်မြင်တာကတော့ လွှတ်တော်က အစိုးရကို ထိန်းကျောင်းနိုင်တယ် ဆိုတာထက် လွှတ် တော်ရဲ့မေးခွန်းတွေ၊ အဆိုတွေကို အစိုးရအနေနဲ့ တာဝန်ယူဆောင်ရွက်မှု အားနည်းတယ်” ဟု ဦးနေဘုန်းလတ်က ပြောကြားသည်။

အချို့သော အခြေအနေများတွင် ရန်ကုန်တိုင်းဒေသကြီး အစိုးရအဖွဲ့နှင့် လွှတ်တော်ကိုယ်စားလှယ်များ ပူးပေါင်းဆောင်ရွက်မှုကြောင့် လုပ်ငန်းများ အကောင်အထည် ပေါ်ခဲ့သော်လည်း အဆင်မပြေမှုများလည်း ရှိကြောင်း တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ပြောကြားသည်။

“ညဈေးလို ဟာမျိုးဆိုရင် အစ်မကလည်း အဆိုတင်တယ်။ ဒါပေမဲ့ ညဈေး ဖွင့်ဖို့ လုပ်ဖို့ ပြောတာ မဟုတ်ဘူး။ မြို့ထဲမှာက လမ်းဘေးဈေးသည်ကိစ္စတွေနဲ့ တော်တော်အဆင်မပြေဘူး။ အဲဒါကြောင့် ဒါတွေနဲ့ပတ်သက်ပြီး စီမံပေးပါဆိုပြီး တင်လိုက်တာ။ သူတို့ကလည်း ညဈေးလုပ်ဖို့ အစီအစဉ်ကလည်း ရှိနေတော့ ညဈေးဆိုပြီး ဖြစ်သွားတာ။ အဲဒီအထိက အဆင်ပြေသေးတယ်။ ပြဿနာက ဘာရှိလဲဆိုတော့ ညဈေးလုပ်မယ်ဆိုတော့ အစ်မတို့ ကိုယ်စားလှယ်တွေက လိုက်ကူညီကြတယ်။ ဒါပေမဲ့ ပွင့်ပွင့်လင်းလင်းပြောရရင် တကယ်စီမံတာက စည်ပင်။ အဲဒီအချိန်မှာ အဆင်မပြေတာလေးတွေ တွေ့လာတယ်။ တကယ်တမ်းပြောရရင်လည်း ညဈေးက မအောင်မြင်ဘူးလို့ ပြောရမယ်” ဟု ဒေါ်ကြည်ပြာက ပြောကြားသည်။

အစိုးရအဖွဲ့၏ လုပ်ဆောင်ချက်များ၊ ဆက်လက် လုပ်ဆောင်ရမည့် အခြေအနေများနှင့် ပတ်သက်ပြီး ရန်ကုန်တိုင်းဒေသကြီး လွှတ်တော်တွင် တိုင်းဒေသကြီးအစိုးရ၏ ကတိက၀တ် အာမခံချက်များနှင့် လွှတ်တော် အခွင့်အရေးကော်မတီကို ဖွဲ့စည်းထားပြီး အဆိုပါကော်မတီ၏ ဥက္ကဋ္ဌဖြစ်သူ ပုဇွန်တောင်မဲဆန္ဒနယ် အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဦးခင်မောင်ဝင်းက အစိုးရအနေဖြင့် လွှတ်တော်နှင့် ပူးပေါင်း ဆောင်ရွက်မှုများကို ယခုထက်ပိုမို လုပ်ကိုင်မည်ဆိုပါက ပြုပြင်ပြောင်းလဲမှုများ လျင်မြန်မည်ဖြစ်ကြောင်း ပြောကြားသည်။

“အခုလည်း ပူးပေါင်း ဆောင်ရွက်နေတယ်။ သူတို့ရဲ့ ကတိက၀တ်တွေ။ အာမခံချက်တွေ၊ လွှတ်တော်က အဆိုတွေကို အကောင်အထည်ဖော်တယ်။ ဒီထက်ပို လက်တွဲလုပ်ကိုင်ရင် ပိုမြန်တာပေါ့။ အခုလည်း တိုင်းဒေသကြီး အစိုးရအဖွဲ့က လက်တွဲ လုပ်ဆောင်နေပါတယ်” ဟု ပုဇွန်တောင်မဲဆန္ဒနယ်မှ တိုင်းဒေသကြီး လွှတ်တော်ကိုယ်စားလှယ် ဦးခင်မောင်ဝင်းက ပြောကြားသည်။

ဒီမိုကရေစီစနစ်တွင် မဏ္ဍိုင်သုံးရပ် အနေဖြင့် အပြန်အလှန် ထိန်းကျောင်းမှု အားကောင်းရန် လိုအပ်ပြီး ယင်းသို့ အားကောင်းမှသာ ဒီမိုကရေစီ အလေ့အကျင့်များ ရှင်သန်နိုင်မည် ဖြစ်ကြောင်း လွှတ်တော် ကိုယ်စားလှယ်များက တညီတညွတ်တည်း ပြောကြားသည်။

“ဒီမိုကရေစီနိုင်ငံတွေမှာတော့ အုပ်ချုပ်ရေးမဏ္ဍိုင်ရော၊ ဥပဒေပြုရေးမဏ္ဍိုင်ရော အပြန်အလှန် ထိန်းကျောင်းမှု အားကောင်းဖို့ လိုအပ်တယ်။ ပွင့်ပွင့်လင်းလင်း ပြောရရင် ကိုယ့်အစိုးရ ကိုယ့်လွှတ်တော် ထိန်းကျောင်းစရာက သိပ်မလိုဘူး။ ဒါပေမဲ့လည်း ပွင့်လင်းမြင်သာမှုရှိစွာ လွှတ်တော်အနေနဲ့လည်း လွှတ်တော်ကိုယ်စားလှယ်တွေက မြေပြင် အခြေအနေတွေကို အနီးစပ်ဆုံးဖြစ်တဲ့ သူတွေဖြစ်တော့ အစိုးရအဖွဲ့ကို တိုက်တွန်းတာတွေ၊ တောင်းဆိုတာတွေ ရှိတယ်ပေါ့။ အဲဒီလိုအခါမျိုးမှာ တစ်ယောက်နဲ့ တစ်ယောက် လွှတ်တော်ကိုယ်စားလှယ်ကလည်း မြေပြင်မှာ တကယ်ထိတွေ့နေရတဲ့ အခြေအနေဆိုတော့ သူတို့တောင်းဆိုတာကိုလည်း အစိုးရက လုပ်ပေးစေချင်တယ်။ သူတို့မှာက လုပ်ဆောင်နိုင်တဲ့ မက်ဂနက်ဇင်ကြီး ရှိတယ်။ လုပ်ပေးနိုင်တာတွေ ရှိတယ်။ အဲဒီလိုမျိုးလေး ဖြစ်စေချင်တာ။ အခုကတော့ နည်းနည်း လိုအပ်နေတယ်။ အခုကကျတော့ အစိုးရအနေနဲ့လည်း လုပ်ဆောင်ရတာတွေ များတာက မှန်ပါတယ်။ အဲဒါကိုလည်း နားလည်ပါတယ်။ ကိုယ်စားလှယ်တွေကလည်း မြေပြင်မှာ တကယ်ထိ တွေ့နေရတဲ့ သူတွေဖြစ်နေတော့ လုပ်ပေးစေချင်တဲ့ အနေအထားလေးတွေကိုလည်း ဂရုစိုက်စေချင်တယ်။ အဆိုတွေ၊ မေးခွန်းတွေကိုပေါ့” ဟု တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ပြောကြားသည်။

လွှတ်တော် ကိုယ်စားလှယ်များအနေဖြင့် လွှတ်တော်ဘက်မှ ရပ်တည်၍ ပြောနေုခြင်း မဟုတ်ကြောင်း၊ ဒီမိုကရေစီစနစ်၏ မူအရသာ လုပ်ကိုင်ဆောင်ရွက်နေခြင်း ဖြစ်ကြောင်း၊ အပြန်အလှန် လေးစားမှုမရှိပါက ဒီမိုကရေစီ ပုံဖျက်ခံရနိုင်ကြောင်း တိုင်းဒေသကြီး လွှတ်တော်ကိုယ်စားလှယ် ဦးနေဘုန်းလတ်က ပြောကြားသည်။

“ဒီမိုကရေစီစနစ်ကို ခိုင်မာစေချင်တယ် ဆိုရင်တော့ အစိုးရအနေနဲ့ လွှတ်တော်ကို ဒီထက်ပို အလေးထားသင့်တယ်။ အုပ်ချုပ်ရေး အာဏာကို ပေးလိုက်တယ်ဆိုတာ လုပ်ချင်တာလုပ်ဖို့ ပေးလိုက်တာ မဟုတ်ဘူး။ အားလုံးနဲ့ တိုင်ပင်ဆွေးနွေးပြီး လုပ်သင့်လုပ်ထိုက်တာကို လုပ်ဖို့ လူထုက ပေးအပ်လိုက်တာ။ မဏ္ဍိုင်သုံးရပ်က အပြန်အလှန် လေးစားမှုတစ်ခုနဲ့ ဖြတ်သန်းသင့်တယ်။ နို့မို့ဆိုရင်တော့ ဒီမိုကရေစီကို ပုံဖျက်တဲ့ သဘောပဲ။ လိုတဲ့ ပိုက်ဆံတော့ လွှတ်တော်မှာ လာလာတောင်းတယ်။ ဘာတွေလုပ်မယ် ဆိုတာတော့ ဘာတွေလဲဆိုတာ ရှင်းရှင်းလင်းလင်း မသိရဘူး။ လွှတ်တော်ကိုယ်စားလှယ်မို့လို့ လွှတ်တော်ဘက်က ပြောနေတာလည်း မဟုတ်ဘူး။ ဒီမိုကရေစီစနစ် ရှင်သန်အားကောင်းဖို့ဆိုရင် မဏ္ဍိုင်တစ်ခုနဲ့တစ်ခု လေးစားမှုရှိဖို့ လိုအပ်တယ်။ ဒါတွေက ဒီမိုကရေစီရဲ့ မူပဲ” ဟု ဦးနေဘုန်းလတ်က ပြောကြားသည်။

ရခိုင်ပြည်နယ်အစိုးရနှင့် BXT International တို့က မြေဧက ၉၀ ကျော်ပေါ်တွင် အကောင်အထည်ဖော်မည့် စစ်တွေကမ်းနား မြို့သစ်စီမံကိန်းအတွက် မြေတစ်စတုရန်းပေလျှင် ကျပ်သောင်းဂဏန်းဝန်းကျင်ဖြင့် ရောင်းချမည်

ရခိုင်ပြည်နယ်အစိုးရနှင့် BXT International တို့က မြေဧက ၉၀ ကျော်ပေါ်တွင် အကောင်အထည်ဖော်မည့် စစ်တွေကမ်းနား မြို့သစ်စီမံကိန်းအတွက် မြေတစ်စတုရန်းပေလျှင် ကျပ်သောင်းဂဏန်းဝန်းကျင်ဖြင့် ရောင်းချမည်ဖြစ်ကြောင်း ဒီဇင်ဘာ ၂၈ ရက်က ရန်ကုန်မြို့ Central ဟိုတယ်တွင် ကျင်းပသည့် စီမံကိန်းမိတ်ဆက်ပွဲမှ သိရသည်။

အဆိုပါစီမံကိန်းတွင် စုပေါင်းအိမ်ရာ၊ လက်လီလက်ကားဈေးကွက်၊ အလယ်အလတ်အမြင့်ရှိသော ကွန်ဒိုမီနီယံများ၊ ဂိုဒေါင်နှင့် ပို့ဆောင်ရေးဆိုင်ရာ ၀န်ဆောင်မှုများ၊ ကုန်သွယ်မှုစီးပွားရေးဇုန်၊ ငါးစက်ရုံများ၊ အပန်းဖြေနေရာများ ပါဝင်မည်ဖြစ်ပြီး မြေဈေးနှုန်းအနေဖြင့် စစ်တွေမြို့လယ်တွင် မြေတစ်စတုရန်းပေ ကျပ်နှစ်သိန်းမှ ကျပ်ငါးသိန်းအကြား ရှိနေချိန်တွင် အဆိုပါစစ်တွေကမ်းနား မြို့သစ်စီမံကိန်းမှ မြေများကို တစ်စတုရန်းပေလျှင် ကျပ်သောင်းဂဏန်းဖြင့် ရောင်းချမည်ဖြစ်ကြောင်း စီမံကိန်းမြေကွက်များ တာဝန်ခံ ရောင်းချပေးမည့် iMyanmar House.com မှ မန်နေးဂျင်းဒါရိုက်တာ ဦးနေမင်းသူက ပြောကြားသည်။

“မြေဖို့တဲ့ ကုန်ကျစရိတ်အနေနဲ့ ဒေါ်လာသန်းပေါင်းများစွာ မြှုပ်နှံထားပြီး စီမံကိန်းက လက်ရှိမှာ ရာခိုင်နှုန်း ၅၀ ပြီးစီးနေပြီ ဖြစ်ပါတယ်။ ရင်းနှီးမြှုပ်နှံထားမှုက လက်ရှိ ဒေါ်လာ ၁၀ သန်းလောက်မြှုပ်နှံထားပြီး ကျွန်တော်တို့က လမ်း၊ မီး၊ ရေ စတဲ့ အခြေခံအဆောက်အအုံတွေကို ဆောင်ရွက်ပေးမှာ ဖြစ်ပါတယ်။ တစ်နှစ်ကနေ နှစ်နှစ်အကြား အရစ်ကျစနစ်နဲ့လည်း ရောင်းချမှာဖြစ်ပြီးတော့ ဈေးနှုန်းကိုတော့ ဇန်န၀ါရီ ၆ ရက် နိုဗိုတယ် ဟိုတယ်မှာ စတင်ရောင်းချမယ့်အချိန်မှာ ကြေညာပါမယ်။ အတိအကျတော့ပြောလို့ မရသေးပါဘူး” ဟု iMyanmarHouse.com မှ မန်နေးဂျင်းဒါရိုက်တာ ဦးနေမင်းသူက ပြောကြားသည်။

စီမံကိန်းအကောင်အထည်ဖော်ဆောင်ရာတွင် ရခိုင်ပြည်နယ်အစိုးရမှ ရာခိုင်နှုန်း ၃၀ နှင့် ကျန်ရာခိုင်နှုန်း ၇၀ ကို တောင်ကိုရီးယားနိုင်ငံအခြေစိုက် BXT International ကုမ္ပဏီမှပိုင်ဆိုင်မည်ဖြစ်ပြီး ရခိုင်ပြည်နယ် အစိုးရအနေဖြင့် နည်းဥပဒေပိုင်းဆိုင်ရာ၊ ဥပဒေပိုင်းဆိုင်ရာနှင့် မြေယာကိစ္စများအတွက် လုပ်ဆောင်ပြီး BXT International မှ ကျန်ရင်းနှီးမြှုပ်နှံသည့် ငွေကြေးများ၊ မြေဖို့သည့် နည်းပညာစသည်ဖြင့် တာဝန်ယူထားကြောင်းနှင့် ၀ယ်ယူမည့်မြေအတွက် ရခိုင်ပြည်နယ် အစိုးရက ဂရန်ထုတ်ပေးမည်ဖြစ်ကြောင်း ရခိုင်ပြည်နယ်လျှပ်စစ်၊ စက်မှုနှင့် လမ်းပန်းဆက်သွယ်ရေးဝန်ကြီး ဦးအောင်ကျော်ဇံက ပြောကြားသည်။

ထို့ပြင် ရခိုင်ပြည်နယ်သည် ဖွံ့ဖြိုးမှုအနိမ့်ဆုံး ပြည်နယ်ဖြစ်သဖြင့် ရင်းနှီးမြှုပ်နှံမှုတွင် အခွန်ကင်းလွတ်ခွင့်ကာလများစွာရရှိခြင်း၊ မြေဈေးနှုန်းချိုသာခြင်း၊ တရုတ်နိုင်ငံ၏ အဓိကစီမံကိန်းဖြစ်သည့် ကျောက်ဖြူအထူး စီးပွားရေးဇုန်၊ အိန္ဒိယနိုင်ငံနှင့် လုပ်ကိုင်နေသည့် ကုလားတန်ဆိပ်ကမ်း စသည်ဖြင့် ချိတ်ဆက်မှုများ ရှိနေသည့်အပြင် နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် အကောင်အထည်ဖော်ဆောင်နေသည့် UEHRD စီမံကိန်းမှာ ပဋိပက္ခဖြစ်ပွားရာ ဒေသအတွက် ဦးတည်ထားသည်ဆိုသော်လည်း ရခိုင်ပြည်နယ်တစ်ခုလုံးနှင့် သက်ဆိုင်သဖြင့် အဆိုပါမြို့သစ်စီမံကိန်းမှာ ရခိုင်ပြည်နယ် ဖွံ့ဖြိုးရေးအတွက် အထောက်အကူပြုမည်ဖြစ်ကြောင်း ရခိုင်ပြည်နယ် လျှပ်စစ်၊ စက်မှုနှင့် လမ်းပန်းဆက်သွယ်ရေးဝန်ကြီး ဦးအောင်ကျော်ဇံက ဆက်လက်ပြောကြားသည်။

ထို့ပြင် စီမံကိန်းအပေါ် ကနဦးကန့်ကွက်မှုများ ကြုံခဲ့ရသော်လည်း မြို့နေပြည်သူလူထု ဆန္ဒအတိုင်း လုပ်ဆောင်နိုင်သဖြင့် ကန့်ကွက်မှုများမရှိတော့ဘဲ အောင်မြင်အောင် အကောင်အထည်ဖော် ဆောင်ရွက်နိုင်ပြီဖြစ်ကြောင်း ဦးအောင်ကျော်ဇံက ဆက်လက်ပြောကြားသည်။

“ဒီစီမံကိန်းအကောင်အထည်ပေါ်လာတာနဲ့ အလုပ်အကိုင်တွေ ဖန်တီးပေးနိုင်မှာ ဖြစ်သလို ရင်းနှီးမြှုပ်နှံမှုတွေ ပိုမိုများပြားလာစေမှာ ဖြစ်ပါတယ်။ ရခိုင်ပြည်နယ်မှာ မတည်ငြိမ်မှုတွေ ရှိတယ်ဆိုပေမဲ့ စစ်တွေမှာ ကျွန်တော်နေတဲ့ သုံးနှစ်အတွင်းမှာ မတည်ငြိမ်မှု လုံးဝမရှိခဲ့တာကြောင့် ဒီစီမံကိန်းကို ရဲရဲဝံ့ဝံ့ အကောင်အထည်ဖော်ခဲ့တာပါ” ဟု BXT International ၏ ဥက္ကဋ္ဌ Mr.Steve Park က ရခိုင်ပြည်နယ်တွင် ပဋိပက္ခရှိနေသော်လည်း နေရာအချို့တွင်သာ ဖြစ်နေခြင်းကြောင့် မြှုပ်နှံမှုပြုခဲ့ကြောင်း ပြောကြားသည်။

Sittwe Waterfront မြို့သစ်စီမံကိန်း၏ အဓိကအားသာချက်များအဖြစ် မြန်မာနိုင်ငံ၏ ရေထွက်ပစ္စည်းများတင်ပို့ရာ အဓိက ပင်လယ်ဆိပ်ကမ်းဖြစ်လာနိုင်ခြင်း၊ ပင်လယ်ကို မျက်နှာမူထားသည့် အိမ်ရာတိုက်ခန်းများတွင် အဆင့်မီနေထိုင်နိုင်ခြင်း၊ နိုင်ငံတကာ ရင်းနှီးမြှုပ်နှံမှု တိုးလာနိုင်ခြင်း၊ ရခိုင်ပြည်နယ်အတွင်း အဆင့်မီမြို့သစ်တစ်ခု ပေါ်ထွက်လာပြီး စီးပွားရေးအခွင့်အလမ်း တိုးမြင့်လာခြင်းနှင့် ပုဏ္ဏားကျွန်းစက်မှုဇုန်နှင့် ချိတ်ဆက်မှုအဖြစ် ဆတ်ရိုးကျတံတားဖွင့်လှစ်ပြီးပါက မိနစ် ၃၀ အတွင်း သွားလာနိုင်ခြင်းစသည့် အားသာချက်များ ရရှိနိုင်မည်ဖြစ်ကာ စီမံကိန်းအတွက် မြန်မာနိုင်ငံ ရင်းနှီးမြှုပ်နှံမှုကော်မရှင်မှ ၂၀၁၆ ခုနှစ် မတ်လတွင် ခွင့်ပြုချက်ရရှိထားပြီးဖြစ်ကြောင်း သိရသည်။

“ဒီစစ်တွေမြို့သစ်စီမံကိန်းဟာ ရခိုင်ပြည်နယ် ဖွံ့ဖြိုးတိုးတက်ရေးအတွက် အလွန်အရေးပါတဲ့ အခန်းကဏ္ဍတစ်ခုအနေနဲ့ ရှိမှာဖြစ်ပါတယ်။ နိုင်ငံတကာအဆင့်မီ ဟိုတယ်တွေ၊ စားသောက်ဆိုင်တွေ၊ ကွန်ဒိုအခန်းတွေ၊ စုပေါင်းအိမ်ရာတွေ၊ ကုန်သွယ်မှုစီးပွားရေးဇုန်တွေ ပါဝင်တာဖြစ်တာကြောင့် မြန်မာနိုင်ငံရဲ့ အထူးစီးပွားရေးဇုန်အဖြစ်တည်ရှိလာမှာ ဖြစ်ပါတယ်။ ဒီစီမံကိန်းက မြေကွက်တွေကို ကျွန်တော်တို့ ၀က်ဘ်ဆိုက်ကနေ တာဝန်ယူရောင်းချပေးသွားမှာ ဖြစ်ပါတယ်။ စစ်တွေကမြေဈေးဟာ တစ်စတုရန်းပေကို ကျပ်နှစ်သိန်းကနေ ကျပ်ငါးသိန်းရှိနေချိန်မှာ ဒီစီမံကိန်းမြေနေရာတွေကို ကျပ်သောင်းဂဏန်းသာ ကျသင့်တဲ့နှုန်းထားနဲ့ ရောင်းချပေးသွားမှာ ဖြစ်ပါတယ်” ဟု iMyanmarHouse.com မှ ဦးနေမင်းသူက ပြောကြားသည်။