မြန်မာရွှေ့ပြောင်း အလုပ်သမားများ စီးနင်းလာသည့် ယာဉ်တစ်စီး မဲဆောက် – ဘန်ကောက်လမ်း ကီလိုမီတာ ၆၆-၆၇ ကြား တောင်အဆင်းလမ်းတွင် အရှိန်လွန် တိမ်းမှောက်ပြီး တစ်ဦးသေဆုံးကာ ၁၁ ဦးဒဏ်ရာရ

တိမ်းမှောက်မှု ဖြစ်ပွားခဲ့သော မြန်မာရွှေ့ပြောင်း အလုပ်သမားများ စီးနင်းလာသည့်ယာဉ်အား တွေ့ရစဉ်

ထိုင်းနိုင်ငံသို့ MoU လုပ်သားအဖြစ် သွားရောက်လုပ်ကိုင်မည့် မြန်မာရွှေ့ပြောင်း အလုပ်သမားများ စီးနင်းလာသည့်ယာဉ်သည် မဲဆောက်-ဘန်ကောက်လမ်း ကီလိုမီတာ ၆၆ -၆၇ ကြား တောင်အဆင်းလမ်း နေရာတွင် စက်တင်ဘာ ၁ ရက် နံနက် ၀၀း၃၀ အချိန် တိမ်းမှောက်ခဲ့ပြီး ၁၁ ဦး ဒဏ်ရာရရှိကာ တစ်ဦးသေဆုံးခဲ့ကြောင်း သိရသည်။

ထိုင်းနိုင်ငံ တာ့ခ်ခရိုင် တာ့ခ်မြိုနယ် မဲဆောက်-ဘန်ကောက်လမ်းအတိုင်း မောင်းနှင်လာသည့် ထိုင်း ၁၂ ဘီးယာဉ်အမှတ် ၃၀-၀၄၂၇ တွင် New Three Diamond Co.,Ltd မှ MoU စနစ်ဖြင့် စေလွှတ်သူ အလုပ်သမား ကျား ၁၀ ဦး၊မ ၃၈ ဦး၊ ပြင်ပခရီးသည် ၁၂ ဦး၊ စုစုပေါင်း ၆၀ တို့ လိုက်ပါလာပြီး ကီလိုမီတာ ၆၆-၆၇ ကြား အရောက်တွင် အရှိန်လွန် တိမ်းမှောက်ခဲ့ကြောင်း သိရသည်။

ယာဉ်တိမ်းမှောက်မှုကြောင့် အဆိုပါ ကုမ္ပဏီက စေလွှတ်သူ မြန်မာလုပ်သား မောင်ကျော်ဇောဟိန်း (ဘ) ဦးစံမောင်၊ PP.No.MD.014456၊ မဲခေါင်ကျေးရွာ၊ အောင်လံမြို့နယ်၊ မကွေးတိုင်းဒေသကြီးနေသူမှာ ပွဲချင်းပြီး သေဆုံးခဲ့ပြီး အလုပ်သမား မခင်အေး မွန်(ဘ)ဦးသန်းဌေး၊ မော်လမြိုင်နေသူသည် ၀ဲ၊ ယာ ခြေနှစ်ချောင်းကျိုး (စိုးရိမ်ရ) ဒဏ်ရာ၊ အခြားသုံးဦး (စိစစ်ဆဲဖြစ်သလို ပွန်းပဲ့ဒဏ်ရာရသူများ အပါအ၀င် မြန်မာလုပ်သား အများအပြား ဒဏ်ရာရရှိခဲ့သည်။

အခင်းဖြစ်နေရာသို့ သွားရောက်ခဲ့သူ ဖိဂျိုးက “ဒဏ်ရာရသူ ၁၂ ဦးမှာ တစ်ယောက် သေဆုံးခဲ့ပါတယ်။ လေးယောက်ကတော့ ပြင်းထန်တယ်၊ ကျန်တဲ့သူတွေကတော့ နည်းနည်းပါပါးပဲ ဒဏ်ရာရတယ်” ဟုဆိုသည်။

ဖြစ်စဉ်ကြောင့် တာ့ခရိုင်ရဲတပ်ဖွဲ့ မဲဆောက်မြို့နယ် ရဲတပ်ဖွဲ့၊ တာ့ခ်နှင့် မဲဆောက် ဆေးရုံကြီး၊ Rescue လူမှုကယ်ဆယ်ရေး တာဝန်ရှိသူများသည် စက်တင်ဘာ ၁ ရက် နံနက် ၁ နာရီက ရောက်ရှိလာပြီး သေဆုံး၊ ဒဏ်ရာရရှိသူများအား တာခ်ဆေးရုံသို့ လည်းကောင်း၊ ကျန်အလုပ်သမားအား တာ့ခ်ရဲစခန်းရိပ်သာသို့ လည်းကောင်း ပို့ဆောင်ပေးခဲ့ကြောင်း သိရသည်။

၎င်းတို့ထံ တာ့ခရိုင်အုပ်ချုပ်ရေးမှူး ကျလိန်လစ်စခွန်စ၀်ပါ နယ်ဘက်၊ စစ်ဘက်တာဝန်ရှိသူများ၊ New Three Diamond Co.,Ltd မှ M.D ဦးအေးကိုပါ တာဝန်ရှိသူအချို့ သွားရောက်ကူညီ ဆောင်ရွက်ပေးလျက်ရှိကြောင်း သိရသည်။

ပြည်တွင်း၌ အလုပ်အကိုင်ရှားပါးခြင်း၊ လုပ်ခလစာ နည်းပါးခြင်းတို့ကြောင့် လုပ်အားခ ပိုမိုရရှိသည့် ထိုင်းနိုင်ငံသို့ မြန်မာနိုင်ငံသား ရွှေ့ပြောင်းလုပ်သားများ နေ့စဉ် ၅၀၀ ခန့် ထွက်ခွာလျက်ရှိပြီး မဲဆောက်-ဘန်ကောက် လမ်းတွင် ကားမီးလောင်ခြင်း၊ ယာဉ်တိမ်းမှောက်ခြင်းတို့ကြောင့် မြန်မာလုပ်သားများ သေဆုံး၊ ဒဏ်ရာရသူ အများအပြား ရှိခဲ့ပြီ ဖြစ်ကြောင်း သိရသည်။

 

သြဂုတ်လ ပထမပတ်အတွင်း အထောက်အထားမဲ့ မြန်မာလုပ်သား ၇၀၀ ကျော်ကို ထိုင်းနိုင်ငံမှ ပြန်ပို့

သြဂုတ်လပထမပတ်အတွင်း အထောက်အထားမဲ့ မြန်မာလုပ်သား ၇၀၀ ကျော်ကို ထိုင်းနိုင်ငံမှ ပြန်ပို့ခဲ့ကြောင်း ထိုင်းနိုင်ငံဆိုင်ရာ မြန်မာအလုပ်သမား သံအရာရှိ ဦးစန်းမောင်ဦးထံမှ သိရသည်။

ထိုင်းနိုင်ငံတွင် စတင်အသက်ဝင်နေပြီဖြစ်သည့် အထောက်အထားမဲ့ နိုင်ငံခြားသား အလုပ်သမား ဖမ်းဆီးမှုကို ဇူလိုင် ၁ ရက်မှ စတင်ဆောင်ရွက်လျက်ရှိကြောင်း သိရသည်။

ထိုင်း-မြန်မာ နှစ်နိုင်ငံသဘောတူညီချက်အရ ဖမ်းဆီးရရှိထားသော မြန်မာလုပ်သားများကို ပြန်လည်ပေးပို့ ခဲ့ခြင်းဖြစ်ကြောင်း သိရသည်။

“အခုရက်ပိုင်းက ပြန်ပို့ပေးရတဲ့သူများတယ်။ ဘာလို့လဲဆိုတော့ အလယ်ပိုင်း ဘန်ကောက်နဲ့ ဘန်ကောက် အနီးတစ်ဝိုက်ဘက်က ဖမ်းဆီးထားတဲ့ကားတွေ ပါလာတာဆိုတော့ လူပိုများတယ်။ အခုအပတ် ပြန်ပို့ပေးရတဲ့ သူတွေက မဲဆောက်ဘက်က လူတွေများတယ်။ ရနောင်းနဲ့ မယ်ဆိုင်ဘက်ကလူတွေ သိပ်မပါဘူး။ ရနောင်းဘက်က လူတွေက ကော့သောင်းဘက်ကို ပို့ပေးရတာဆိုတော့ အခုတလော ကော့သောင်းဘက်မှာ မိုးတအားရွာနေလို့ လှေနဲ့သွားရတာ အန္တရာယ်ဖြစ်မှာစိုးလို့ ပြန်မပို့သေးတာ” ဟု ဦးစန်းမောင်ဦးက ပြောကြားသည်။

 

ထိုင်းတွင် အထောက်အထားမဲ့ မြန်မာအလုပ်သမားများ အပါအ၀င် ပြည်ပအလုပ်သမားများကို ဖမ်းဆီးနေပြီး ဖမ်းဆီးခံရသူများအား ဒဏ်ငွေအပြင် ပြည်ဝင်ခွင့် နှစ်နှစ်ပိတ်မည်

ထိုင်းမှ ပြန်လည်ရောက်ရှိလာသည့် မြန်မာရွှေ့ပြောင်း လုပ်သားများအား တွေ့ရစဉ်

ထိုင်းနိုင်ငံအတွင်းရှိ မှတ်ပုံမတင်ရသေးသည့် နိုင်ငံခြားသား အလုပ်သမားများကို ထိုင်းအာဏာပိုင်အဖွဲ့စုံက ဇူလိုင် ၁ ရက်က စတင်ဖမ်းဆီးနေပြီး ပထမဆုံးအဖြစ် နိုင်ငံခြားသား အလုပ်သမား၂၂ ဦး ဖမ်းဆီးခံခဲ့ရကြောင်း ထိုင်းနိုင်ငံထုတ် The Nation သတင်းစာတွင် ဖော်ပြထားသည်။

မြန်မာရွှေ့ပြောင်းလုပ်သား သန်းနှင့်ချီ အလုပ်လုပ်ကိုင်နေသည့် ထိုင်းနိုင်ငံတွင် ၂၀၁၇ ခုနှစ်က ပြဋ္ဌာန်းခဲ့သည့် နိုင်ငံခြားသား အလုပ်သမား စီမံခန့်ခွဲရေး အက်ဥပဒေအရ မှတ်ပုံတင်ထားခြင်း မရှိသည့် တရားမ၀င် အလုပ်သမားများကို ဥပဒေအရ အရေးယူရန် ဇူလိုင် ၁ ရက်မှစတင်ပြီး ထိုင်းရဲတပ်ဖွဲ့၊ လ၀က အပါအ၀င် အဖွဲ့ပေါင်း ၁၁၃ ဖွဲ့ဖြင့် ထိုင်းနိုင်ငံတ၀န်းရှိ စက်ရုံအလုပ်ရုံများကို စစ်ဆေးခဲ့ခြင်းဖြစ်ပြီး မှတ်ပုံတင်ထားခြင်း မရှိသည့် အလုပ်သမား၂၂ ဦးနှင့် အလုပ်ရှင်ကို ဖမ်းဆီးခဲ့ခြင်းဖြစ်သည်။

အဆိုပါ ဖမ်းဆီးခဲ့သည့် အလုပ်သမားများကို ဥပဒေအရ အရေးယူမည့်အပြင် ထိုင်းနိုင်ငံသို့ ၀င်ရောက်ခွင့် နှစ်နှစ်ပိတ်ပင်မည် ဖြစ်ကာ အလုပ်သမားများကို ခိုင်းစေသည့် အလုပ်ရှင်ကိုလည်း စီမံချက်အတိုင်း အရေးယူသွားမည် ဖြစ်ကြောင်း ထိုင်းအလုပ်အကိုင်ဌာနမှ ညွှန်ကြားရေးမှူးချုပ် Anurak Tossarat က ပြောကြားသည်။

“မှတ်ပုံတင်ထားခြင်း မရှိတဲ့ အလုပ်သမားတွေကိုရော သူတို့ကို မှတ်ပုံမတင်ခိုင်းခဲ့တဲ့ အလုပ်ရှင်ကိုပါ စီမံချက်အတိုင်း တိတိကျကျ ကျွန်တော်တို့ ဆက်လက် လုပ်ဆောင်သွားမှာပါ” ဟု Anurak Tossarat က ပြောကြားသည်။ မှတ်ပုံမတင်ရသေးသည့် မြန်မာလုပ်သားများမှာ ဇွန်လလယ်မှ စတင်ပြီး ဖမ်းဆီးမှု မပြုလုပ်ခင် ဇွန် ၃၀ အထိ မြ၀တီနယ်စပ် ၀င်ပေါက်မှတစ်ဆင့် မြန်မာနိုင်ငံသို့ ပြန်လည်ဝင်ရောက် လာမှုမှာ တစ်သိန်းခန့် ရှိနေပြီး ဇွန် ၃၀ ရက်တစ်ရက်တည်းတွင် ပြန်လာသူ တစ်ထောင်ကျော်ရှိကြောင်း သိရသည်။

မှတ်ပုံတင်ထားခြင်း မရှိသည့် အလုပ်သမားများမှာ ဥပဒေအရ ဒဏ်ငွေဘတ်ငါးထောင်မှ ငါးသောင်းထိ ပေးဆောင်ရမည်ဖြစ်ပြီး ထိုင်းနိုင်ငံအတွင်း အလုပ်လုပ်ခွင့်နှစ်နှစ် ပိတ်ပင်ခံရမည်ဖြစ်သည်။

ထိုသို့ထိုင်းအစိုးရမှ လိုက်လံဖမ်းဆီးသည့် ဇူလိုင် ၂ ရက်မှာပင် အထောက်အထားမဲ့ မြန်မာလုပ်သား ၉၀ နီးပါးခန့် ဖမ်းဆီးခံခဲ့ရကြောင်း ထိုင်းရောက် မြန်မာလုပ်သားအရေး ဆောင်ရွက်နေသည့် မြန်မာပြည်သားများအရေး ပူးတွဲလှုပ်ရှားမှု ကော်မတီဥက္ကဋ္ဌ ဦးမိုးကြိုးက ပြောကြားသည်။

“ဒီနေ့ မဲဆောက်တစ်မြို့လုံး ဈေးသည် ၂၀ ယောက်နဲ့ အထောက်အထားမဲ့ ၇၀ စုစုပေါင်း ၉၀ ယောက် ဖမ်းဆီးခံရပါတယ်။ ညမိုးကုတ်ဂိတ်မှာ တွေ့ရတဲ့ လူ ၁၀၀ ကျော်က ကြခတ်တော ဘုန်းကြီးကျောင်းမှာ တိမ်းရှောင်ကြတာ ဖြစ်သလို တခြားဘုန်းကြီး ကျောင်းမှာလည်း ရှိတယ်တဲ့။၂ ရပ်ကွက်နဲ့  ၄ ရပ်ကွက်ရှိ ကျွန်းတောမှာလည်း လာရှောင်နေတာ တွေ့ရပါတယ်။ သောင်ရင်းမြစ် ကမ်းနားတစ်လျှောက်မှာရှိတဲ့ စက်ရုံအလုပ်ရုံက တရားဝင် မှတ်ပုံတင်ထားပြီး ရွှေ့ပြောင်းအလုပ်သမားက တရားမ၀င် ဖြစ်နေတာရယ်၊ စက်ရုံအလုပ်ရုံရောလူပါ တရားမ၀င်ဖြစ်နေတဲ့ (အိမ်တွင်းမှု အလုပ်ရုံငယ်) တွေပါ တစ်မနက်ရှောင် ညနေပြန်တဲ့ စနစ်နဲ့ပါ” ဟု ဇူလိုင်လ ၂ ရက် ည ၁၀ နာရီက ပြောကြားသည်။

ထို့ပြင်ဆောက်လုပ်ရေး၊ ပန်းရန်လုပ်ငန်းခွင်နှင့် ဈေးအတွင်း လုပ်ငန်းခွင်စက်ရုံ အလုပ်ရုံများ၌ ဖမ်းဆီးမှုများ ရှိလာခဲ့ရာ မြ၀တီမြိုသို့ ရှောင်တိမ်းလာသူများလည်း ရှိကြောင်း သိရသည်။

မဲဆောက်မြို့ ဆိတ်ခြံတန်းလျားတွင် အထောက်အထားမဲ့ဖြင့် ၁၅ နှစ်ခန့် နေထိုင်ခဲ့ပြီး ဖမ်းဆီးခံရသူ မဘီက “ဒီနေ့ မနက်အစောကြီးပဲ။ အိပ်ရာက မထရသေးဘူး။ စဖမ်းပြီ။ တန်းလျားမှာ နေသူတွေကို ခေါ်ထုတ်ပြီး စစ်ဆေးပါတယ်။ ဘတ်ရှိသူ၊ CI ရှိသူ၊ ပတ်စ်ပို့ရှိသူ၊ ခြောက်ညအိပ် ခုနစ်ရက် သွားလာနေထိုင်ခွင့် လက်မှတ် ကိုင်ဆောင်ထားသူတွေကို မဖမ်းဘူး။ ဘာမှမရှိသူတွေကို ဖမ်းတာ။ ပြီးနေရပ်ကို ပြန်ပို့တဲ့အတွက် ဒီကိုရောက်လာတာပါ” ဟု ပြောကြားသည်။

 

ထိုင်းနိုင်ငံ၌ အထောက်အထားမဲ့ ရွှေ့ပြောင်းလုပ်သားများအား ဖမ်းဆီးရေး လုပ်ဆောင်ရန် တစ်ရက်အလိုတွင် နေရပ်ပြန်လာသူ မြန်မာရွှေ့ပြောင်းလုပ်သား တစ်ထောင်နီးပါးရှိ

မြ၀တီ ကျောက်လုံးကြီး ပြန်လည်ကြိုဆိုရေးစခန်းသို့ ရောက်ရှိလာသော မြန်မာရွှေ့ပြောင်း လုပ်သားများအား တွေ့ရစဉ်

ထိုင်းနိုင်ငံအတွင်း အထောက်အထားမဲ့ ရွှေ့ပြောင်းလုပ်သားများအား ဖမ်းဆီးရေးလုပ်ရန် တစ်ရက်အလို ဇွန် ၃၀ ရက် နေရပ်ပြန်လာသူ မြန်မာလုပ်သား တစ်ထောင်နီးပါးရှိပြီး တစ်နှစ်အတွင်း မိခင်နိုင်ငံသို့ ပြန်လည် ရောက်ရှိလာသူ ၈၆၀၀၀ ခန့်ရှိပြီ ဖြစ်ကြောင်း မြ၀တီပြန်လည် ကြိုဆိုရေးစခန်းမှ သိရသည်။

ထိုင်းနိုင်ငံအတွင်း၂၀၁၇ ခုနှစ် ဇွန် ၂၅ ရက်က ပြင်ဆင်လိုက်သည့် အလုပ်ရှင် အလုပ်သမား ဥပဒေသစ် အပြောင်းအလဲကြောင့် အထောက်အထား မပြည့်စုံသူ၊ အထောက်အထား မရှိသူများမှာ ဇွန်၂၉ ရက်ကစ၍ နေရပ်ရင်းသို့ ပြန်လာခဲ့ကြရာ၂၀၁၈ ခုနှစ် ဇွန် ၃၀ ရက်အထိ ပြန်လည်ရောက်ရှိလာ သူ ၈၆၀၀၀ ခန့်ရှိပြီ ဖြစ်ကြောင်း သိရသည်။

ထိုင်းနိုင်ငံအတွင်း အထောက်အထားမဲ့ ရွှေ့ပြောင်းလုပ်သားများအား ယခင်နှစ် ဖမ်းဆီးရေး ရပ်ဆိုင်းကာလ ပထမ ခြောက်လ၊ ဒုတိယ (၆) လျော့ပေါ့ပြီး အထောက်အထားမဲ့များအား ဇွန် ၃၀ ရက် နောက်ဆုံးထား၍ အထောက်အထား ပြုလုပ်ကာ မြန်မာအလုပ်သမား သံအရာရှိရုံးမှလည်း တိုက်တွန်းထားပြီး ဇူလိုင် ၁ ရက်တွင် အဖွဲ့စုံပါဝင်သော ပူးပေါင်းအဖွဲ့ဖြင့် ဖမ်းဆီးအရေးယူတော့မည် ဖြစ်ကြောင်း သိရသည်။

မြ၀တီ ကျောက်လုံးကြီး ပြန်လည်ကြိုဆိုရေးစခန်းသို့ ဇွန် ၂၉ ရက်တွင် မြန်မာလုပ်သား ၅၆၄ ဦး၊ ဇွန် ၃၀ ရက်တွင် နံနက်ပိုင်းတွင် ၂၆၅ ဦး၊ နေ့လယ်ပိုင်းတွင် ၃၀၀ ဦးနှင့် ညနေပိုင်းတွင်၂၄၀ ဦးတို့ ပြန်လည် ရောက်ရှိခဲ့သည်။

မြ၀တီမြို့ ကြိုဆိုရေးစခန်းသို့ ရောက်ရှိလာသူများမှာ နေရပ်သို့အပြီးတိုင် ပြန်လာသူများ ပါဝင်သလို အထောက်အထား ပြုလုပ်ပြီး ထိုင်းနိုင်ငံသို့ ပြန်လည်ထွက်ခွာကာ အလုပ်လုပ်ကိုင်ကြမည့်သူ အများအပြား ပါဝင်ကြောင်း သိရသည်။

ဇွန် ၃၀ ရက်က မြ၀တီ ပြန်လည်ကြိုဆိုရေးစခန်းသို့ ရောက်ရှိလာသူ ပဲခူးတိုင်းဒေသကြီး ဒိုက်ဦးမြို့နယ်မှ ကိုဝင်းစိုးက “ပတ်စ်ပို့ မရှိဘူးလေ။ လကုန်ရင် ဖမ်းတော့မယ်ဆိုတော့ ပြန်လာရတာပေါ့။ ပတ်စ်ပို့လုပ်ပြီးရင် ပြန်တက်မှာပါ။ ထိုင်းမှာ အလုပ်လုပ်ရတာ အဆင်ပြေတယ်လေ။ ဖမ်းမယ်ဆီးမယ်ဆိုတော့ ကြောက်ရတာပေါ့။ ကိုယ့်နိုင်ငံမှာ နေထိုင်လုပ်ကိုင် စားသောက်ဖို့လည်း စီစဉ်ရပါတယ်” ဟု ပြောကြားသည်။

မြ၀တီနယ်စပ်တွင် ပြန်လည်ကြိုဆိုရေးစခန်း ဖွင့်လှစ်ထားရှိသော်လည်း အခြားထိုင်းနိုင်ငံနှင့် ထိစပ်နေသော နယ်စပ်မြို့များတွင် ကြိုဆိုရေးစခန်း ဖွင့်လှစ်ထားခြင်း မရှိ၍ အထောက်အထားမဲ့ မြန်မာလုပ်သားများ နေရပ်ပြန်ရန် ခက်ခဲနေသည်ဟု အလုပ်သမားအရေး ဆောင်ရွက်နေသူများက ပြောကြားသည်။

“ကျွန်တော်တို့ ကြားတာတော့ တနင်္သာရီတိုင်း ကော့သောင်းနှင့် မောတောင်နယ်စပ်တွေမှာ ပြန်လည်ကြိုဆိုရေး စခန်းတွေ ဖွင့်လှစ်ထားတာ မရှိတော့ နေရပ်ပြန်မယ့် အလုပ်သမားတွေက အခက်ခဲတွေ တွေ့နေရတယ်” ဟု အလုပ်သမားရေး ဆောင်ရွက်နေသူ ကိုစောမောင်က ပြောကြားသည်။

ထိုင်းတောင်ပိုင်းတွင် အလုပ်လုပ်ကိုင်နေကြသူ မြန်မာအလုပ်သမားမှာ နေရပ်သို့ ပြန်လာရာတွင် ရနောင်းနှင့် ကော့သောင်းလမ်းကို အားထားပြီး ပြန်နေရခြင်း ဖြစ်သည်။ ထိုင်းအစိုးရ စီမံချက်ဖြင့် ဖမ်းစီးမည့် ကာလအတွင်း တရားမ၀င် နေထိုင်ကြောင်း စစ်ဆေးတွေ့ရှိသော အလုပ်သမားများသည် ဒဏ်ငွေဘတ်ငါးထောင်မှ ငါးသောင်းအထိ ပေးဆောင်ရမည်ဖြစ်ပြီး ထိုင်းနိုင်ငံသုိ့ ပြန်လည်ဝင်ရောက် အလုပ်လုပ်ကိုင်ခွင့် နှစ်နှစ်တိတိ ပိတ်ပင်ခံရမှာ ဖြစ်သလို ထိုင်းအလုပ်ရှင်များ အနေဖြင့် ခွင့်ပြုချက်မရှိဘဲ အလုပ်သမားများ ခန့်ထားခြင်း၊ တားဆီးပိတ်ပင်ထားသည့် လုပ်ငန်းအမျိုးအစားများ စေခိုင်းခြင်း စစ်ဆေးတွေ့ရှိပါက အလုပ်သမား တစ်ဦးလျှင် ဒဏ်ငွေဘတ်တစ်သောင်းမှ တစ်သိန်းအထိ ပေးဆောင်ရမည်ဟု ထုတ်ပြန်ထားသည်။

ထိုင်းအလုပ်ရှင်များသည် ထိုကဲ့သို့အမှု ထပ်မံကျူးလွန်ပါက ထောင်ဒဏ်နှစ်နှစ်နှင့် ဒဏ်ငွေ ဘတ်ငါးသောင်းမှ နှစ်သိန်းအထိ ပေးဆောင်ရမည်ဟု သိရသည်။

 

မြန်မာ့ ကျွမ်းကျင်လုပ်သားများ ပြည်တွင်းသို့ ပြန်ဝင်လာရန် ပြည်တွင်း ထိပ်တန်းကုမ္ပဏီများ စင်ကာပူသို့ သွားရောက်ပြီး အလုပ်နေရာ ထောင်နှင့်ချီ ခေါ်ယူမည်

မြန်မာ့ ကျွမ်းကျင်လုပ်သားများ ပြည်တွင်းသို့ ပြန်ဝင်လာရန် ပြည်တွင်း ထိပ်တန်းကုမ္ပဏီများ စင်ကာပူသို့ သွားရောက်ပြီး အလုပ်နေရာ ထောင်နှင့်ချီ ခေါ်ယူမည်ဖြစ်ကြောင်း သိရသည်။

နိုင်ငံတကာသို့ ရောက်ရှိနေသော ကျွမ်းကျင်လုပ်သားများကို ပြည်တော်ပြန်လာပြီး နိုင်ငံ၏ စီးပွားရေး ဖွံ့ဖြိုးတိုးတက်ရေး အထောက်အကူပြုစေနိုင်ရန်အတွက် မြန်မာနိုင်ငံအတွင်းမှ ထိပ်တန်းကုမ္ပဏီကြီးများနှင့်အတူ JobNet.com.mm ပူးပေါင်းပြီး အလုပ်နေရာ ထောင်နှင့်ချီ ခေါ်ယူမည်ဖြစ်သည်။ အဆိုပါ အလုပ်အကိုင်ပြပွဲကို စင်ကာပူနိုင်ငံရှိ Raffle City Convention Centre တွင် ဇူလိုင် ၁၄ ရက်နှင့် ၁၅ ရက်တို့တွင် နံနက် ၉ နာရီမှ ည ၉ နာရီအထိ ပြုလုပ်မည် ဖြစ်သည်။

“ကျွန်တော်တို့အနေနဲ့ တိုင်းပြည်အတွင်းမှာ စီးပွားရေး ဖွံ့ဖြိုးတိုးတက်မှုရဲ့ အခြေခံဟာ လူ့စွမ်းအားအရင်းအမြစ် ဖွံ့ဖြိုးရေးနဲ့ တိုက်ရိုက် အချိုးကျနေတယ် ဆိုတာကို အပြည့်အ၀ ယုံကြည်ထားပါတယ်။ ဒါကြောင့်ပဲ နိုင်ငံအတွင်းကို ကျွမ်းကျင်လုပ်သားတွေ ပြန်လည် ရောက်ရှိလာပြီး နိုင်ငံစီးပွားရေး တိုးတက်ရာမှာ အထောက်အကူပြုဖို့အတွက် ဒီလို အလုပ်အကိုင်ပြပွဲမျိုးကို ကျင်းပတာပဲ ဖြစ်ပါတယ်” ဟု JobNet.com.mm ၏ အမှုဆောင်အရာရှိချုပ် Mr Justin Sway က ပြောကြားသည်။

စင်ကာပူနိုင်ငံရောက် မြန်မာနိုင်ငံသားများအတွက် ရည်ရွယ်ပြီး ပြုလုပ်သည့် အဆိုပါ အလုပ်အကိုင်ပြပွဲတွင် မြန်မာနိုင်ငံ အခြေစိုက် ပြည်တွင်း၊ ပြည်ပ ကုမ္ပဏီကြီးများက အလုပ်အကိုင် နေရာပေါင်း ၂၀၀၀ ကျော်ကို ခေါ်ယူသွားမည်ဖြစ်ကြောင်း JobNet.com.mm မှ အုပ်ချုပ်မှု ဒါရိုက်တာ Mr. Matt De Luca က ပြောကြားသည်။

စက်မှုကုန်ထုတ်၊ အုပ်ချုပ်ရေး၊ လူ့စွမ်းအားအရင်းအမြစ် စီမံခန့်ခွဲမှု၊ စာရင်းအင်းပညာ၊ အင်ဂျင်နီယာ၊ သတင်းအချက်အလက် နည်းပညာ Information Technology ၊ ဈေးကွက်စီမံခန့်ခွဲခြင်း၊ လူထုဆက်ဆံရေး၊ ဈေးကွက် အရောင်းကျွမ်းကျင် စသည့် ကဏ္ဍများအတွက် အလုပ်အကိုင်များကို ခေါ်ယူမည်ဟု JobNet.com.mm မှ သိရသည်။

အဆိုပါ အလုပ်အကိုင်ပြပွဲသို့ ထိပ်တန်း ကုမ္ပဏီများဖြစ်သည့် CB Bank , CDSG, MPT, Myanmar Net, MPRL, RMA နှင့် Oway တို့ အပါအ၀င် ကုမ္ပဏီပေါင်း ၂၀ ၀န်းကျင်ခန့်က ၎င်းတို့ ကုမ္ပဏီအတွက် အလုပ်အကိုင်များကို ကိုယ်တိုင်ကိုယ်ကျ လာရောက် ခေါ်ယူမည်ဖြစ်ပြီး ပြပွဲလာရောက်သူများ အနေဖြင့် JobNet.com.mm မှ ထောင်ပေါင်းများစွာသော အလုပ်အကိုင်များကိုလည်း လျှောက်ထားနိုင်ကြောင်း သိရသည်။

သုံးလအတွင်း ပြည်ပနိုင်ငံများသို့ မြန်မာလုပ်သား ငါးသောင်းကျော် အလုပ်လုပ်ရန် ထွက်ခွာ

ယခုနှစ် ဇန်န၀ါရီမှ မတ်လအထိ သုံးလအတွင်း ပြည်ပနိုင်ငံများသို့ မြန်မာအလုပ်သမား ငါးသောင်းကျော် အလုပ်လုပ်ရန် ထွက်ခွာသွားကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ လအလိုက် ထုတ်ပြန်သည့် အလုပ်အကိုင် ခန့်အပ်ထားမှုစာရင်းအရ သိရသည်။

ဇန်န၀ါရီမှ မတ်လကုန်အထိ အိမ်နီးချင်း ထိုင်းနိုင်ငံ အပါအ၀င် ပြည်ပနိုင်ငံများသို့ အလုပ်လုပ်ရန် ထွက်ခွာသူပေါင်း ၅၀၅၀၀ ဦးရှိကြောင်း သိရသည်။ ဇန်န၀ါရီလအတွင်း ပြည်ပသို့ အလုပ်လုပ်ကိုင်ရန် ထွက်ခွာသူပေါင်းမှာ ၁၈၁၁၉ ဦးရှိပြီး အိမ်နီးချင်း ထိုင်းနိုင်ငံသို့ သွားရောက် အလုပ်လုပ်ကိုင်သူပေါင်းမှာ အများဆုံးဖြစ်ကာ ၁၆၉၈၈ ဦးရှိသည်။

ဖေဖော်ဝါရီလအတွင်း ပြည်ပနိုင်ငံများသို့ ထွက်ခွာအလုပ်လုပ်သူပေါင်း ၁၅၆၅၃ ဦးရှိပြီး ထိုင်းနိုင်ငံသို့ ထွက်ခွာအလုပ်လုပ်သူ ၁၅၁၀၉ ဦးရှိကြောင်း သိရသည်။

မတ်လအတွင်း ပြည်ပနိုင်ငံများသို့ အလုပ်လုပ်ရန် ထွက်ခွာသွားသူ ၁၇၈၅၉ ဦးရှိပြီး ထိုင်းနိုင်ငံသို့ ထွက်ခွာသွားသူပေါင်း ၁၅၈၈၁ ဦးရှိကြောင်း သိရသည်။

ထို့ပြင် ပြည်တွင်း အလုပ်အကိုင်နေရာတွင် သုံးလအတွင်း ၆၀၉၆၄ ဦးကို ခန့်ထားနိုင်ကြောင်း အဆိုပါ ၀န်ကြီးဌာနက ထုတ်ပြန်ထားသည်။

ဇန်န၀ါရီလအတွင်း အစိုးရအလုပ်တွင် ၉၉၂ ဦး၊ ပုဂ္ဂလိကအလုပ်အကိုင်တွင် ၂၁၀၅၂ ဦး၊ စုစုပေါင်း ၂၂၀၄၄ ဦးကို အလုပ်ခန့်ထားနိုင်ခဲ့ကြောင်း ဖေဖော်ဝါရီလအတွင်း အစိုးရအလုပ်တွင် ၁၉၀၁ ဦး၊ ပုဂ္ဂလိကအလုပ်တွင် ၂၀၀၁၆ ဦး၊ စုစုပေါင်း ၂၁၉၁၇ ဦးကို အလုပ်ခန့်ထားနိုင်ခဲ့ကြောင်းနှင့် မတ်လအတွင်း အစိုးရအလုပ်တွင် ၇၄၃ ဦး ပုဂ္ဂလိကအလုပ်တွင် ၁၄၂၀၆ ဦး စုစုပေါင်း ၁၅၀၀၃ ဦးကို အလုပ်ခန့်အပ်နိုင်ခဲ့သည်ဟု ၀န်ကြီးဌာနက ထုတ်ပြန်သည်။

မလေးရှားနိုင်ငံတွင် ထိန်းသိမ်းခံထားရသည့် မြန်မာနိုင်ငံသားဟုဆိုသူ အမျိုးသား ၅၀ နှင့် အမျိုးသမီး ငါးဦး စုစုပေါင်း ၅၅ ဦးအား စစ်ဆေးရာ မှန်ကန်ကြောင်း တွေ့ရှိရသဖြင့် မြန်မာနိုင်ငံသို့ ပြန်ပို့ရန် စီစဉ်

မလေးရှားနိုင်ငံ ကွာလာလမ်ပူမြို့မှ Bukit Jalil လူဝင်မှုကြီးကြပ်ရေးနှင့် ထိန်းသိမ်းရေးစခန်းတွင် ထိန်းသိမ်းခံထားရသော မြန်မာနိုင်ငံသားဟုဆိုသူ အမျိုးသား ၅၀ ဦး နှင့် အမျိုးသမီး ငါးဦး စုစုပေါင်း ၅၅ ဦးတို့အား စစ်ဆေးရာ အချက်အလက်များ မှန်ကန်သဖြင့် မြန်မာနိုင်ငံသို့ ပြန်ပို့နိုင်ရန် စီစဉ် ဆောင်ရွက်လျက်ရှိကြောင်း မလေးရှားနိုင်ငံရှိ မြန်မာသံရုံး၏ သတင်းထုတ်ပြန်ချက်အရ သိရသည်။

Bukit Jalil လူဝင်မှုကြီးကြပ်ရေးနှင့် ထိန်းသိမ်းရေးစခန်းရှိ မြန်မာနိုင်ငံသားဟုဆိုသူ အမျိုးသား ၅၀ ဦးနှင့် အမျိုးသမီး ငါးဦး စုစုပေါင်း ၅၅ ဦးတို့ကို မြန်မာသံရုံးမှ တာဝန်ရှိသူများက တွေ့ဆုံကာ ၎င်းတို့၏ အခက်အခဲများ၊ ကျန်းမာရေး အခြေအနေများကို မေးမြန်း၍ မြန်မာနိုင်ငံသား ဟုတ်၊ မဟုတ် လိုအပ်သည့် အချက်အလက်များကို မတ် ၂၉ ရက်က မေးမြန်း စိစစ်ခဲ့ကြောင်း၊ ထိုသို့ စိစစ်ရာ ၅၅ ဦးစလုံးသည် မြန်မာနိုင်ငံသားများ ဖြစ်ကြောင်း စိစစ်တွေ့ရှိရပြီး အမိမြန်မာနိုင်ငံသို့ ပြန်လိုကြောင်း သိရသဖြင့် C of I များ အခမဲ့ ထုတ်ပေးခဲ့ပြီး မြန်မာနိုင်ငံသို့ ပြန်နိုင်ရေး စီစဉ် ဆောင်ရွက်ပေးခဲ့ကြောင်း ယင်းကြောင့် လာမည့် ရက်သတ္တပတ်အတွင်း မြန်မာနိုင်ငံသို့ ပြန်လည် ပို့ဆောင်နိုင်မည်ဖြစ်ကြောင်း ထုတ်ပြန်ချက်တွင် ပါရှိသည်။

ထို့ပြင် မြန်မာသံရုံး အနေဖြင့် အချက်အလက် ပြည့်စုံစွာ တင်ပြနိုင်သည့် မြန်မာနိုင်ငံသား မှန်ကန်သူများ၊ မြန်မာနိုင်ငံသို့ ပြန်လိုသူများကို လုပ်ထုံးလုပ်နည်းနှင့်အညီ မြန်မာနိုင်ငံသို့ ပြန်လည် ထွက်ခွာနိုင်ရေး စီစဉ်ဆောင်ရွက်ပေးနေကြောင်းနှင့် အချက်အလက် ပြည့်စုံစွာ မတင်ပြနိုင်သဖြင့် လတ်တလော နိုင်ငံသား မှန်ကန်ကြောင်း စိစစ်နိုင်ခြင်း မရှိသေးသူများ ရှိပါကလည်း မြန်မာနိုင်ငံသို့ သက်ဆိုင်ရာ ၀န်ကြီးဌာနများနှင့် ဆက်သွယ်ညှိနှိုင်း၍ အတည်ပြုချက် လျင်လျင်မြန်မြန် ရရှိရေးအတွက် စီစဉ် ဆောင်ရွက်ပေးမည် ဖြစ်ကြောင်း မလေးရှားနိုင်ငံရှိ လူဝင်မှုကြီးကြပ်ရေးနှင့် ထိန်းသိမ်းရေး စခန်းများတွင် အကြောင်းအမျိုးမျိုးကြောင့် ထိန်းသိမ်း ခံထားရသည့် မြန်မာနိုင်ငံသားများ မိမိနိုင်ငံသို့ အမြန်ဆုံး ပြန်လည် ထွက်ခွာနိုင်ရေးအတွက် မြန်မာသံရုံး၊ ကွာလာလမ်ပူမြို့မှ သံရုံးဝန်ထမ်းများသည် သက်ဆိုင်ရာ ထိန်းသိမ်းရေး စခန်းများသို့ သွားရောက်၍ လူတွေ့ စစ်ဆေးမေးမြန်းခြင်းများ ပြုလုပ်ပြီး နိုင်ငံသား စိစစ်ရေး လုပ်ငန်းစဉ်များကို စနစ်တကျ ဆောင်ရွက်လျက် ရှိကြောင်း မြန်မာနိုင်ငံရှိ မလေးရှားသံရုံးက ဧပြီ ၆ ရက်တွင် သတင်းထုတ်ပြန်သည်။ နေမျိုးဝင်း

မြန်မာနှစ်သစ်ကူးသင်္ကြန် ဆင်နွှဲရန် နေရပ်ပြန်လာသူ မြန်မာလုပ်သား သောင်းနှင့်ချီရှိနေကြောင်း သိရ

မြန်မာနှစ်သစ်ကူးသင်္ကြန် ဆင်နွှဲရန် နေရပ်ပြန်လာသူ မြန်မာလုပ်သားများအား မြ၀တီဘက်ခြမ်းတွင် တွေ့ရစဉ်

အတာသင်္ကြန်ခွင့်ရက် ဒုတိယမြောက်နေ့ ဖြစ်သော ဧပြီ ၆ ရက်တွင် နေရပ် မြန်မာနိုင်ငံသို့ ပြန်လာသူ မြန်မာရွှေ့ပြောင်းလုပ်သား သောင်းနှင့်ချီ၍ရှိကြောင်း သိရသည်။

ထိုင်းအစိုးရ၏ သင်္ကြန်ခွင့်ပြန်ရက် ၂၅ ရက်ကို နိုင်ငံဖြတ်ကျော် အထွေထွေ ၀န်ဆောင်စရိတ် အခမဲ့ ဆောင်ရွက်ပေးသည့် ဧပြီ ၅ ရက်မှစ၍ အလုံးအရင်းဖြင့် နေရပ်သို့ ပြန်လာနေကြရာ ဒုတိယနေ့တွင် နံနက် ၉ နာရီခန့်ကတည်းက တံတားပေါ်မှ ပြန်သူ ၇၀၀၀ ကျော်ရှိပြီဖြစ်ပြီး သောင်းရင်းဖြတ်ကျော် စက်လှေဂိတ်များမှ ပြန်လာကြသူများ ရှိကြောင်း သိရသည်။

နေရပ်ပြန်လာကြသူများမှာ လူငယ်များဖြစ်ပြီး သူငယ်ချင်း အပေါင်းသင်းများနှင့် ပျော်ပျော်ပါးပါး နှစ်သစ်ကူးပွဲ ဆင်နွှဲရန် ဖြစ်ကာ လူလတ်ပိုင်းများ အနေဖြင့် သားသမီး ရှင်ပြု၊ အလှူပြုလုပ်ရန် ပြန်လာခဲ့ကြသည်ဟု ဆိုသည်။

“ကျွန်တော်တို့ကတော့ ထိုင်းမှာလုပ်နေတာလည်း သုံးနှစ်ရှိပါပြီ။ အမေတို့နဲ့ ထားခဲ့တဲ့ သားလေးကို ရှင်ပြုချင်လို့ မဖြစ်မနေ ပြန်လာခဲ့တာ ဖြစ်ပါတယ်။ အမေ၊ အဖေနဲ့ သားလေးကို လွမ်းတာလည်း ပါတာပေါ့” ဟု  နေရပ်ပြန်လာသူ ချောင်းဆုံမြို့နယ်မှ ကိုချစ်ထွန်းက ပြောကြားသည်။

နေရပ်ပြန်သူ များပြားရခြင်းနှင့် ပတ်သက်၍ မြန်မာရွှေ့ပြောင်း လုပ်သားများအား ကူညီဆောင်ရွက်ပေးနေသူ KTG လူမှုကူညီရေးရုံးမှ မန်နေဂျင်းဒါရိုက်တာ ကိုသာကြီးက “ဒီနေ့မနက်မှာပဲ တံတားက ပြန်လာတာ ၇၀၀၀ ကျော်သွားပါပြီ။ ဒါထိုင်းအစိုးရရဲ့ အခမဲ့ ၀န်ဆောင်ခကြောင့်လို့ ပြောရပါမယ်။ ဒါပေမဲ့ ဧပြီ ၃၀ ရက်မတိုင်ခင် ထိုင်းကို ပြန်ဝင်ဖို့တော့ လိုပါတယ်” ဟု ပြောကြားသည်။

ထို့အတူ မြန်မာနိုင်ငံဘက်ခြမ်း၌လည်း နေရပ်ပြန် မြန်မာနိုင်ငံသား ရွှေ့ပြောင်းလုပ်သားများ၏ ပတ်စ်ပို့စာအုပ်များကို ငွေကြေးတစ်စုံတစ်ရာ မယူဘဲ အခမဲ့ ပြည်ဝင်ခွင့် တံဆိပ်တုံး ထုပေးလျက်ရှိကြောင်း သိရသည်။

နေရပ်ပြန် မြန်မာရွှေ့ပြောင်းလုပ်သားများ များပြားခြင်းကြောင့် မြို့တွင်း၌ ယာဉ်ကြောပိတ်ဆို့မှုများ ဖြစ်ပေါ်လျက်ရှိကာ ယာဉ်လိုင်းမဲ့ ပြင်ပမှ ပြေးဆွဲသော ခရီးသည်ပို့ဆောင်ရေး ကားခဈေးနှုန်းမှာလည်း အနည်းငယ် မြင့်တက်စပြုနေပြီ ဖြစ်ကြောင်း သိရသည်။ ထို့အတူ တစ်ဖက်တွင်လည်း  မိသားစု ၀မ်းရေး ဖြေရှင်းရန် လုပ်အားခ ပိုမိုရရှိသည့် ထိုင်းနိုင်ငံဘက်သို့ နေ့စဉ်ရာနှင့်ချီ ထွက်ခွာလျက်ရှိကြောင်း သိရသည်။

ယာဉ်မီးလောင်မှုကြောင့် သေဆုံးသွားသူများအတွက် ရသင့်ရထိုက်သည့် နစ်နာကြေးများရရှိရန် ထိုင်းအစိုးရက တာဝန်ယူမည်ဖြစ်ကြောင်း ပြည်ထောင်စုဝန်ကြီး ဦးသိန်းဆွေ ပြောကြား

မြန်မာ အလုပ်သမားများ စီးနင်းလာသည့်ယာဉ် မီးလောင်ကျွမ်းနေသည်ကို တွေ့ရစဉ် (ဓာတ်ပုံ-AAC )

ထိုင်းအစိုးရအနေဖြင့် ယာဉ်မီးလောင်မှုကြောင့် သေဆုံးသွားသူများအတွက် ရသင့်ရထိုက်သည့် နစ်နာကြေးများ ရရှိရန် တာဝန်ယူမည်ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန ပြည်ထောင်စုဝန်ကြီး ဦးသိန်းဆွေက ပြောကြားသည်။

ထိုင်းနိုင်ငံသို့ အလုပ်သွားလုပ်မည့် မြန်မာအလုပ်သမားများ စီးနင်းလာသည့် ယာဉ်တစ်စီး မီးလောင်မှုကြောင့် သေဆုံးသွားသူများအတွက် မည်ကဲ့သို့ လုပ်ဆောင်နေသလဲဟု သတင်းမီဒီယာများက ဧပြီ ၃ ရက်က ပြုလုပ်သည့် ထိုင်းနိုင်ငံရှိ ငါးဖမ်းလုပ်ငန်းတွင် လုပ်ကိုင်နေသော ရွှေ့ပြောင်းအလုပ်သမားများ ကြုံတွေ့နေသည့် ဘေးအန္တရာယ်များကို သိရှိနားလည်၍ ကာကွယ်တားဆီးရေးဆိုင်ရာ အလုပ်ရုံဆွေးနွေးပွဲအပြီး မေးမြန်းမှုကို  အထက်ပါကဲ့သို့ ပြည်ထောင်စုဝန်ကြီးက ပြန်လည်ဖြေကြား ခဲ့ခြင်းဖြစ်သည်။

“ဥပဒေပိုင်းဆိုင်ရာ ဆိုရင်တော့ ထိုင်းအစိုးရဘက်ကိုယ်ကလည်း သတင်းစာမျက်နှာဖုံးမှာ ပါလာတယ်။ တော်တော်လေး သူတို့က အလေးထား ဆောင်ရွက်ပါတယ်။ အလုပ်သမားတွေက လုပ်ငန်းခွင်တော့ မရောက်သေးဘူးပေါ့။ အဲဒီအတွက်ကို သူတို့ရသင့်ရထိုက်တဲ့ နစ်နာကြေးတွေ ပြီးတော့ အသက်အာမခံကြေးတွေ ပေးကိုပေးရမယ့် ငွေကြေးတွေကိုလည်းပဲရဖို့ သူတို့ဘက်ကလည်း တာဝန်ယူပါတယ်။ မြန်မာနိုင်ငံဘက်ကလည်းပဲ လူမှုဝန်ထမ်း ၀န်ကြီးဌာနကလည်းပဲ ထောက်ပံ့မှုတွေ လုပ်ထားတယ်။ အလုပ်သမား ၀န်ကြီးဌာနကလည်းပဲ ထောက်ပံ့မှုတွေ လုပ်ထားပါတယ်။ အလားတူ ကုမ္ပဏီဘက်လည်းပဲ ဂရုနာကြေး သေဆုံးသွားတဲ့ မိသားစုတွေအတွက် ပံ့ပိုးကူညီပေးနေပါတယ်” ဟု ပြည်ထောင်စုဝန်ကြီးက ပြောကြားသည်။

မြန်မာနိုင်ငံမှ ထိုင်းနိုင်ငံသို့ MoU စနစ်ဖြင့် သွားရောက်အလုပ်လုပ်ကိုင်ရန် Star Pioneer အေဂျင်စီမှ တာဝန်ယူ ပို့ဆောင်သည့် အလုပ်သမား ၄၇ ဦး စီးနင်းလိုက်ပါ လာသည့် မှန်လုံယာဉ်မှာ မတ် ၃၀ ရက်နံနက် အစောပိုင်းက ထိုင်းနိုင်ငံ တာ့ခ်ခရိုင်အတွင်း မီးလောင်ကျွမ်းမှုကြောင့် မြန်မာလုပ်သား ၂၀ သေဆုံးခဲ့သည်။ အဆိုပါဖြစ်စဉ် ဖြစ်ပွားစဉ်က ပြည်ထောင်စုဝန်ကြီး ဦးသိန်းဆွေမှာ ထိုင်းနိုင်ငံသို့ ရောက်ရှိနေပြီး ထိုင်းအလုပ်သမားဝန်ကြီးနှင့် တွေ့ဆုံဆွေးနွေးလျက်ရှိကြောင်း ၎င်းကဆိုသည်။

 

ရွှေ့ပြောင်းလုပ်သားများအား ဗီဇာနှင့် အလုပ်လုပ်ခွင့်ပါမစ် သက်တမ်းတိုးပေးသည့် ကာလကို ထိုင်းအလုပ်အကိုင်ဌာနမှ ရက်ထပ်တိုးပေးမည် မဟုတ်ဟု ငြင်းဆန်ခဲ့သည့်အတွက် ထိုင်းရောက် မြန်မာလုပ်သားများ အခက်အခဲကြုံ

ဗီဇာနှင့် အလုပ်လုပ်ခွင့်ပါမစ် သက်တမ်းတိုးရန် စောင့်ဆိုင်းနေသည့် မြန်မာရွှေ့ပြောင်း လုပ်သားများကို တွေ့ရစဉ် (ဓာတ်ပုံ-AAC)

ထိုင်းရောက် ရွှေ့ပြောင်းလုပ်သားများအား ဗီဇာနှင့်အလုပ်လုပ်ခွင့်ပါမစ် သက်တမ်းတိုးပေးသည့်ကာလ ကုန်ဆုံးရန် ရက်ပိုင်းမျှသာ လိုတော့ပြီး သိန်းနှင့်ချီသည့် အလုပ်သမားများ သက်တမ်းတိုးရန် ကျန်ရှိနေစဉ် ထိုင်းအလုပ်အကိုင်ဌာနမှ အချိန်ကာလကို ထပ်တိုးပေးမည် မဟုတ်ဟု ငြင်းဆန်ခဲ့ကြောင်း ထိုင်းအခြေစိုက် သတင်းများတွင် ဖော်ပြထားသည်။

ထိုင်းနိုင်ငံအတွင်းရှိ အထောက်အထား ကိုင်ဆောင်ထားသည့် ရွှေ့ပြောင်းလုပ်သားများအတွက် ထိုင်းအစိုးရမှ  ဗီဇာနှင့် အလုပ်လုပ်ခွင့်ပါမစ် သက်တမ်းတိုးခြင်း လုပ်ငန်းများကို ဖေဖော်ဝါရီ ၅ ရက်မှ မတ် ၃၁ ရက်အထိ OSS Data Entry စခန်းများတွင် လုပ်ဆောင်ပေးနေသော်လည်း ၀န်နှင့်အား မမျှမှုကြောင့် သက်တမ်းတိုးရခြင်း မရှိသေးသည့် အလုပ်သမား သိန်းနှင့်ချီ ကျန်ရှိနေသည်။ သို့သော် ထိုင်းအလုပ်အကိုင်ဌာနမှ ဗီဇာနှင့် အလုပ်လုပ်ခွင့်ပါမစ် သက်တမ်းတိုးပေးသည့် အချိန်ကာလကို ထပ်တိုးပေးမည် မဟုတ်ဘဲ သတ်မှတ်ရက်တွင် ပိတ်သိမ်းမည်ဖြစ်ကြောင်း ပြောဆိုခဲ့သည့်အတွက် ရွှေ့ပြောင်းအလုပ်သမားများနှင့် လုပ်ငန်းရှင်များအနေဖြင့် အခက်တွေ့လျက်ရှိကြောင်း သိရသည်။

ထိုင်းနိုင်ငံ မဟာချိုင်အခြေစိုက် AAC အဖွဲ့မှ ကိုရဲမင်း “အခုက အလုပ်သမားတွေအနေနဲ့ ဘယ်လိုမှ မမီတော့ဘူး။ သူတို့ သတ်မှတ်ထားတဲ့ရက်က ၄ ရက်လောက်ပဲ လိုတော့တာ။ သက်တမ်းမတိုးရသေးတဲ့ အလုပ်သမားတွေက သိန်းနဲ့ချီ ကျန်သေးတယ်။ တကယ်လို့ သက်တမ်းတိုးပေးတဲ့ ကာလကို ထပ်ပြီးမတိုးပေးဘူး ဆိုရင်တော့ ထိုင်းရဲတွေအကြိုက် ဖြစ်သွားမှာပဲ။ အလုပ်သမား အများအပြား ဖမ်းဆီးခံရမယ်။ နောက်တစ်ခုက ပွဲစားတွေအနေနဲ့ ခွင်တွေဖြစ်လာနိုင်တယ်။ ဗီဇာအတုတွေ၊ အလုပ်လုပ်ခွင့်ပါမစ် အတုတွေ လုပ်ပေးတာတွေ ဖြစ်လာနိုင်တယ်။ အလုပ်သမားတွေအနေနဲ့ အများကြီး ဒုက္ခရောက်သွားနိုင်ခြေ ရှိပါတယ်” ဟု မတ် ၂၆ ရက်က ပြောကြားသည်။

ထိုင်းရောက် မြန်မာလုပ်သားများ အနေဖြင့် ဗီဇာနှင့် အလုပ်လုပ်ခွင့် သက်တမ်းတိုးခြင်းကာလကို ထပ်မံတိုးပေးရန် လိုလားလျက်ရှိပြီး မြန်မာအစိုးရအနေဖြင့် ညှိနှိုင်းဆောင်ရွက် ပေးစေလိုကြောင်း ၎င်းကပြောကြားသည်။

“အဓိကပြဿနာက ထိုင်းအလုပ်သမား ၀န်ကြီးဌာနက သတ်မှတ်ပေးထားတဲ့ရက်က အရမ်းတိုပါတယ်။ နှစ်သန်းနီးပါးရှိတဲ့ အလုပ်သမားတွေအနေနဲ့ ဒီကာလတိုတိုလေးထဲမှာ ဗီဇာသက်တမ်းနဲ့ အလုပ်လုပ်ခွင့်ပါမစ် သက်တမ်းတိုးဖို့ လုပ်ဆောင်ရတာ အချိန်မလုံလောက်ပါဘူး။ နှစ်နိုင်ငံအစိုးရအနေနဲ့ ဒီပြဿနာကို ဖြေရှင်းပေးဖို့ လိုအပ်ပါတယ်” ဟု ထိုင်းရောက် ရွှေ့ပြောင်းလုပ်သား တစ်ဦးဖြစ်သူ ကိုနိုင်လင်းထက်က ပြောကြားသည်။

ထိုင်းရွှေ့ပြောင်း လုပ်သားများအဖွဲ့မှ ဗီဇာနှင့် အလုပ်လုပ်ခွင့် သက်တမ်းတိုးခြင်း အချိန်ကာလကို ထပ်တိုးပေးရန်အတွက် ပြီးခဲ့သည့် မတ် ၂၃ ရက်က ထိုင်းအလုပ်သမား ၀န်ကြီးဌာနသို့ အိတ်ဖွင့်ပေးစာ ပေးပို့ခဲ့သော်လည်း ထိုင်းအလုပ်သမား ညွှန်ကြားရေး ဦးစီးဌာန ညွှန်ကြားရေးမှူးချုပ် Anurak Tossarat က အလုပ်သမား ၀န်ကြီးဌာန အနေဖြင့် ဗီဇာသက်တမ်းနှင့် အလုပ်လုပ်ခွင့်ပါမစ် သက်တမ်းတိုးခြင်း လုပ်ငန်းကို ရက်ထပ်မံ တိုးပေးမည် မဟုတ်ကြောင်းနှင့် အလုပ်ရှင်နှင့် အလုပ်သမားများ အနေဖြင့် မှတ်ပုံတင်ခြင်းကို အချိန်ဆွဲခြင်းသည် ပြဿနာများ ရှည်လျားစေမည်ဟု ထိုင်းအခြေစိုက် The Nation သတင်းစာက ဖော်ပြထားသည်။

ထိုင်းနိုင်ငံ တစ်ဝန်းလုံးတွင် တရားဝင်ရောက်ရှိ အလုပ်လုပ်ကိုင်နေကြသည့် ရွှေ့ပြောင်းမြန်မာ လုပ်သားများမှာ နှစ်သန်းခန့် ရှိနိုင်မည် ဖြစ်ကြောင်း ခန့်မှန်းထားပြီး မြန်မာလုပ်သား သိန်းနှင့်ချီ အလုပ်လုပ်ခွင့်ပါမစ်နှင့် ဗီဇာသက်တမ်းတိုးခြင်း လုပ်ငန်းများကို လုပ်ဆောင်ရန် ကျန်ရှိနေပြီး ထိုင်းရဲတပ်ဖွဲ့ အနေဖြင့် သတ်မှတ်ရက်ဖြစ်သည့် မတ် ၃၁ ရက် ကုန်ဆုံးပါက ဥပဒေအရ ဖမ်းဆီးအရေးယူမည် ဖြစ်ကြောင်း သတိပေး ပြောဆိုထားသည်။

ထိုင်းအလုပ်သမားဝန်ကြီးဌာန အနေဖြင့် အလုပ်လုပ်ခွင့်ပါမစ် သက်တမ်းနှင့် ဗီဇာသက်တမ်းတိုးပေးသည့် သက်တမ်းကို ထပ်မံတိုးမြှင့်ပေးခြင်း မရှိသဖြင့် မြန်မာရွှေ့ပြောင်း လုပ်သားများမှာ ညအိပ်စောင့်ဆိုင်းပြီး သက်တမ်းတိုးခြင်းများကို ပြုလုပ်ခဲ့ရကြောင်း ထိုင်းရောက် မြန်မာလုပ်သားများနှင့် လူမှုအဖွဲ့အစည်းများထံမှ သိရသည်။