ပြည်တွင်း၌ ပုဂ္ဂလိကဆေးရုံဆိုင်ရာ ရင်းနှီးမြှုပ်နှံမှုလုပ်ငန်းဆောင်ရွက်ပါက MIC ၏ သတ်မှတ်ချက် ခုနစ်ချက်နှင့်အညီ ပြည့်စုံအောင် ဆောင်ရွက်ရမည်

ပြည်တွင်း၌ ပုဂ္ဂလိကဆေးရုံဆိုင်ရာများ ရင်းနှီးမြှုပ်နှံမှု ဆောင်ရွက်မည်ဆိုပါက (MIC) ၏ သတ်မှတ်ထားသည့် စည်းကမ်းချက် ခုနစ်ချက်နှင့်အညီ ပြည့်စုံအောင် ဆောင်ရွက်ရမည် ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) မှ သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင်၏ အမိန့်ကြော်ငြာစာအမှတ် (၁၅/၂၀၁၇) အပိုဒ် (ဃ) အပိုဒ်ခွဲ (၉) ပါ ကျန်းမာရေးနှင့် အားကစားဝန်ကြီးဌာန၏ အတည်ပြုချက် ရယူဆောင်ရွက်ရမည့် လုပ်ငန်းများအတွက် လုပ်အပ်သည့် စံသတ်မှတ်ချက်များတွင် ဖော်ပြထားသည်။

အဆိုပါ အမိန့်ကြော်ငြာစာအရ ပြည်တွင်း၌ ပုဂ္ဂလိကဆေးရုံ လုပ်ငန်းဆိုင်ရာ ရင်းနှီးမြှုပ်နှံမည့်သူများအတွက် သတ်မှတ်ချက်များသည် ပတ်ဝန်းကျင်ကို ထိခိုက်မှု မရှိစေရေး၊ ကူးစက်ရောဂါ မပြန့်ပွားစေရေးနှင့် စွန့်ပစ်ပစ္စည်းများကို သတ်မှတ်ထားသော စံနှင့်အညီ စနစ်တကျ စွန့်ပစ်ရေးတို့အတွက် ဆောင်ရွက်ထားရမည် ဖြစ်သည်။

သန့်ရှင်းသော သောက်ရေ၊ သုံးရေ လုံလောက်စွာ ရရှိစေရေးအတွက် စီစဉ်ဆောင်ရွက်ခြင်း၊ ရေနှင့် မိလ္လာစနစ်ကို စနစ်တကျ စီစဉ်ဆောင်ရွက်ခြင်း၊ ဘေးအန္တရာယ် ကြိုတင်ကာကွယ်မှုနှင့် အရေးပေါ် ကယ်ဆယ်ရေးအတွက် စနစ်တကျ စီစဉ်ဆောင်ရွက် ထားရမည်ဖြစ်ကြောင်း ဖော်ပြထားသည်။

ထို့ပြင် ကောင်းမွန်သော ဆက်သွယ်ရေးစနစ်ရှိခြင်း၊ လျှပ်စစ်မီး (၂၄) နာရီပတ်လုံး ရရှိရေးအတွက် စီစဉ်ဆောင်ရွက်ထားခြင်းနှင့် သေဆုံးသူ လူနာများအတွက် သတ်မှတ်ထားသည့် အစီအစဉ်များ စသည့် စံသတ်မှတ်ချက် (၇) ခုကို ပြည့်စုံအောင် ဆောင်ရွက်ထားရမည် ဖြစ်ကြောင်း ရင်းနှီးမြှုပ်နှံမှုကော်မရှင်မှ သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးရာတွင် လုပ်ငန်း၏ စီးပွားရေးတွက် ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက် ရရှိနိုင်မှု၊ ပြည်တွင်းပြည်ပ ဈေးကွက် အခြေအနေ၊ ပြည်တွင်း စားသုံးရန် လိုအပ်ချက်၊ နည်းပညာ ဆီလျော်မှု၊ တီထွင်ဆန်းသစ်မှု၊ နည်းပညာ လွှဲပြောင်းရရှိမှု၊ ပတ်ဝန်းကျင် ထိခိုက်မှုနှင့် လူမှုရေးထိခိုက်မှု ထိန်းသိမ်းကာကွယ်ရေး ဆောင်ရွက်မှုအစီအမံများ၊ တာဝန်ယူမှုရှိသော ရင်းနှီးမြှုပ်နှံမှုဖြစ်ခြင်းနှင့် တည်ဆဲ ဥပဒေများကို လိုက်နာခြင်း စသည့် အချက်များကို အခြေခံ၍ စိစစ်ခြင်းဖြစ်ကြောင်း သိရသည်။

ပြည်နယ်နှင့် တိုင်းဒေသကြီးများရှိ ရင်းနှီးမြှုပ်နှံမှုကော်မတီများက ရင်းနှီးမြှုပ်နှံမှု ပမာဏ ဒေါ်လာ ငါးသန်း သို့မဟုတ် ကျပ်သန်း ၆၀၀၀ အထိရှိသည့် ရင်းနှီးမြှုပ်နှံမှု လုပ်ငန်းများကို ခွင့်ပြုပေးလျက် ရှိကြောင်း၊ လက်ရှိအချိန်၌ ပြည်နယ်နှင့် တိုင်းဒေသကြီးများတွင်လည်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) တစ်နည်းအားဖြင့် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ရုံးများကို ဖွင့်လှစ်ထားပြီ ဖြစ်သည်။

၂၀၃၀ ပြည့်နှစ်အထိ မြန်မာနိုင်ငံတွင်းသို့ နိုင်ငံခြား တိုက်ရိုက် ရင်းနှီးမြှုပ်နှံမှုတန်ဖိုး ဒေါ်လာ သန်းထောင်ပေါင်း ၁၄၀ အထိ ရရှိရန် ရည်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။

လက်ရှိအချိန်တွင်မူ ကာလရှည်နိုင်ငံခြား တိုက်ရိုက် ရင်းနှီးမြှုပ်နှံမှုတိုးမြှင့်ရေးဆိုင်ရာ စီမံကိန်းကို ပြင်ဆင်ပြီး ပြန်လည် သုံးသပ်လျက်ရှိကြောင်း ၀န်ကြီးဦးကျော်ဝင်းက ဆက်လက်ပြောကြားသည်။

တိုင်းရင်းဆေးပညာ ဦးစီးဌာန ညွှန်ကြားရေးမှူးချုပ် ဒေါက်တာဒေါ်ရီရီမြင့်အား ပါမောက္ခချုပ် (ဆေးရုံအုပ်ကြီး/ကုသရေး) အဖြစ် ရန်ကုန်ပြည်သူ့ ဆေးရုံကြီးသို့ ပြောင်းရွှေ့ခန့်ထား

ကျန်းမာရေးနှင့် အားကစားဝန်ကြီးဌာန၊ တိုင်းရင်းဆေးပညာ ဦးစီးဌာန ညွှန်ကြားရေးမှူးချုပ် ဒေါက်တာဒေါ်ရီရီမြင့်အား ပါမောက္ခချုပ် (ဆေးရုံအုပ်ကြီး၊ ကုသရေး) အဖြစ် ရန်ကုန်ပြည်သူ့ဆေးရုံကြီးသို့ ပြောင်းရွှေ့ခန့်ထားကြောင်း ဇန်န၀ါရီ ၃၀ ရက်က ထုတ်ပြန်ကြေညာခဲ့သည်။

၂၀၁၇ ခုနှစ်အတွင်းက တိုင်းရင်းဆေးကောင်စီ၊ မြန်မာနိုင်ငံ တိုင်းရင်းဆေးဝါး ထုတ်လုပ်သူများနှင့် လုပ်ငန်းရှင်များအသင်း၊ မြန်မာနိုင်ငံ တိုင်းရင်းဆေးဆရာ အသင်းမှ နာယကများ အပါအ၀င် တာဝန်ရှိသူများ၊ တိုင်းရင်းဆေးလောကသားများ စုပေါင်းလက်မှတ်ရေးထိုး၍ တိုင်းရင်းဆေးပညာ ဦးစီးဌာန၊ ညွှန်ကြားရေးမှူးချုပ် နေရာတွင် ဆရာဝန်ဘွဲ့ရများအစား တိုင်းရင်းဆေးပညာရှင်များသာ ခန့်ထားပေးရန် ကျန်းမာရေးနှင့် အားကစား ၀န်ကြီးဌာန၊ ပြည်ထောင်စုဝန်ကြီးထံ အကြိမ်ကြိမ် တောင်းဆိုမှုများ ပြုလုပ်ခဲ့ကြောင်းနှင့် ၂၀၁၇ ခုနှစ် သြဂုတ် ၇ ရက်က တိုင်းရင်းဆေးပညာလောက တိုးတက်လာစေရန်အတွက် ညွှန်ကြားရေးမှူးချုပ်ရာထူး နေရာတွင် အရည်အချင်းရှိသူကို ပြောင်းလဲခန့်အပ်ပေးရန်နှင့် လူမှန်နေရာမှန်ဖြစ်ရေး လုပ်ဆောင်ပေးရန် အစိုးရသစ်တွင် တာဝန်ရှိကြောင်း သနပ်ပင်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးမြင့်ဦးက ပြောကြားသည်။

ထိုစဉ်က ပြည်သူ့လွှတ်တော် ကိုယ်စားလှယ် ဦးမြင့်ဦးက ပြောကြားရာတွင် တိုင်းရင်းဆေးပညာ ဦးစီးဌာနရှိ ညွှန်ကြားရေးမှူးချုပ်သည် တိုင်းရင်းဆေးဆရာ မဟုတ်သည့်အပြင် ပြည်ထောင်စုဝန်ကြီး သိရှိခြင်းမရှိဘဲ  အမိန့်ညွှန်ကြားချက်များ ထုတ်ပြန်ခြင်း၊ ပြည်ထောင်စုဝန်ကြီး၏ ညွှန်ကြားချက်များကို လိုက်နာခြင်း မရှိဘဲ တိုင်းရင်းဆေးပညာရပ်များအပေါ်  ဖိနှိပ်ခြင်းများ ပြုလုပ်နေခြင်းကြောင့် အရေးယူပေးရန်လည်း တိုင်းရင်းဆေးဆရာများနှင့် လွှတ်တော်ကိုယ်စားလှယ်က လက်မှတ်ရေးထိုး၍ ကျန်းမာရေးနှင့် အားကစား ၀န်ကြီးဌာန ပြည်ထောင်စုဝန်ကြီးထံ တင်ပြထားကြောင်း ပြောကြားခဲ့သည်။

ထို့ပြင် တိုင်းရင်းဆေးဝါး မှတ်ပုံတင်နှင့် ထုတ်လုပ်ခွင့်လိုင်စင်များ လျှောက်ထားရာတွင် မလိုလားအပ်ဘဲ စစ်ဆေးမှုများ ပြုလုပ်ခြင်းကြောင့် အချိန်သုံးနှစ်အထိ ကြာမြင့်မှုများ ရှိနေကြောင်း ဦးမြင့်ဦးက ပြောကြားသည်။

၂၀၁၇ ခုနှစ် ဇူလိုင်၂၅ ရက်က သနပ်ပင် မဲဆန္ဒနယ်မှ ပြည်သူ့လွှတ်တော်ကိုယ်စား လှယ် ဦးမြင့်ဦးသည် မြန်မာနိုင်ငံ တိုင်းရင်းဆေးကောင်စီ ဥပဒေကြမ်းကို ပြည်သူ့လွှတ်တော်တွင် တင်သွင်းခဲ့ကြောင်းနှင့် ဥပဒေကြမ်း ရေးဆွဲရခြင်း ရည်ရွယ်ချက်တွင် တိုင်းရင်းဆေးကောင်စီသည် ဒီမိုကရေစီစနစ်နှင့် လျော်ညီသော လွတ်လပ်စွာ ရပ်တည်ဆောင်ရွက်နိုင်သည့် အဖွဲ့အစည်းတစ်ရပ် ဖြစ်ပေါ်လာစေရန်၊ တိုင်းရင်းဆေးပညာ၏ အဓိပ္ပာယ် ဖွင့်ဆိုချက်အား ပြည်သူ့ကျန်းမာရေး စောင့်ရှောက်မှုကို ထိရောက်စွာ ဖော်ဆောင်ပေးနိုင်သော အဓိပ္ပာယ် ပြည့်ဝသည့် ဖွင့်ဆိုချက် ဖြစ်လာစေရန်၊ တိုင်းရင်းသားရိုးရာ ဆေးပညာရပ်များအား ဖော်ထုတ်အားပေး မြှင့်တင်နိုင်ရန်၊ အရည်အသွေးပြည့်ဝ၍ ထိရောက်မှုနှင့် လုံခြုံမှုရှိသော တိုင်းရင်းဆေးပညာဖြင့် ကျန်းမာရေး စောင့်ရှောက်မှု ပေးနိုင်ရန်၊ တိုင်းရင်းဆေး ဆရာများအား မိမိတို့၏ ကျင့်ဝတ်သိက္ခာနှင့် စည်းကမ်းများကို လိုက်နာစေရေး ကြီးကြပ်ထိန်းသိမ်းရန် စသည်တို့ ပါဝင်ကြောင်း သိရသည်။

တိုင်းရင်းဆေးပညာ ဦးစီးဌာန၊ ညွှန်ကြားရေးမှူးချုပ်နေရာ ပြောင်းလဲမှုနှင့် ပတ်သက်၍ မြန်မာနိုင်ငံ တိုင်းရင်းဆေးဆရာအသင်း (ဗဟို) ဒုတိယဥက္ကဋ္ဌ၊ ပြည်ထောင်စုဝန်ကြီး အကြံပေးအဖွဲ့ဝင် ဦးပေါညိမ်းက “ကျွန်တော်တို့ တိုင်းရင်းဆေးလောကသားတွေ တင်ပြတဲ့ကိစ္စကို အဆင်ပြေအောင် စီစဉ်ဆောင်ရွက်ပေးတဲ့ အတွက် ပြည်ထောင်စုဝန်ကြီးကိုလည်း ကျေးဇူးတင်ပါတယ်။ ကျွန်တော်တို့ တင်ပြထားတဲ့ ကိစ္စတွေကို သမာသမတ်နဲ့လည်း လုပ်ပေးတယ်။ ကတိလည်း တည်တဲ့အတွက်ကြောင့် ကျေးဇူးတင်တာပါ။ ကျွန်တော်တို့ အနေနဲ့လည်း အခုညွှန်ကြားရေးမှူးချုပ်နေရာကို တိုင်းရင်းဆေးပညာရပ်နဲ့ ကိုက်ညီကောင်းမွန်တဲ့သူကိုပဲ ရွေးတင်သွားဖို့ လုပ်မှာပါ” ဟု ဇန်န၀ါရီ ၃၀ ရက် နံနက်က ပြောကြားသည်။

၂၀၁၈ ခုနှစ် ဇန်န၀ါရီ ၁၀ ရက်က ကျန်းမာရေးနှင့် အားကစား ၀န်ကြီးဌာန လက်အောက်ရှိ တိုင်းရင်းဆေးပညာ ဦးစီးဌာန၏ ညွှန်ကြားရေးမှူးချုပ်ရာထူး နေရာတွင် ဆရာဝန်ဘွဲ့ရများအစား တိုင်းရင်းဆေးပညာရှင်များကို ခန့်ထားပေးရန်အတွက် အင်အားတစ်ထောင့်ငါးရာကျော်ဖြင့် ဆန္ဒထုတ်ဖော်မည်ဆိုသည့် အကြောင်းနှင့် ပတ်သက်၍ မြန်မာနိုင်ငံ တိုင်းရင်းဆေးပညာရှင်အသင်းက သတင်းစာရှင်းလင်းပွဲပြုလုပ်၍ ပြောကြားသည်။ ထိုစဉ်က ယင်းဆန္ဒထုတ်ဖော်မှုကို ဇန်န၀ါရီ ၂၁ ရက်တွင် ရန်ကုန်မြို့၊ တာမွေမြို့နယ်၊ ကျိုက္ကဆံကွင်းအတွင်း ပြုလုပ်မည်ဟု ပြောကြားသည်။ သို့သော် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး၏ မေတ္တာရပ်ခံမှုကြောင့် ယင်းဆန္ဒထုတ်ဖော်မှုပြုလုပ်ရန် အစီအစဉ်ကို တစ်လရွှေ့ဆိုင်းခဲ့သည်။

“ညွှန်ကြားရေးမှူးချုပ်နေရာ အပြောင်းအလဲကိစ္စနဲ့ ပတ်သက်ပြီး ကျွန်တော်တို့ တိုင်းရင်းဆေးလောကသားတွေ တောင်းဆိုတာကို ကျန်းမာရေး ပြည်ထောင်စုဝန်ကြီးက ရာနှုန်းပြည့် ဖြည့်ဆည်းပေးလိုက်တယ်လို့ ပြောရမှာပေါ့။ ကျွန်တော်တို့အနေနဲ့ ဆန္ဒပြဖို့လည်း အစီအစဉ် မရှိတော့ပါဘူး။ နောက်ထပ်လည်း ဘာတွေလုပ်ပေးမယ် ဆိုတာလည်း ၀န်ကြီးက ကတိပေးထားတယ်။ ညွှန်ချုပ်နေရာမှာ တိုင်းရင်းဆေး ပညာရှင်တွေ ခန့်အပ်ဖို့ မဟုတ်သေးတောင်မှ နောင်တစ်ချိန် တိုင်းရင်းဆေးပညာရှင်အတွက် လမ်းဖွင့်ပေးထားမယ်ပေါ့။ ဘာကြောင့်လဲဆိုတော့ ချက်ချင်းကြီး ညွှန်ချုပ်နေရာအတွက်တို့ တိုင်းရင်းဆေး ဆရာတွေထဲမှာ လောလောဆယ် ရှိမနေသေးဘူး။ ဒါကို အမြန်ဆုံးရအောင်တော့ လုပ်ပေးမယ်လို့ ပြောပါတယ်။ နောက်ထပ်ညွှန်ချုပ်ခန့်ဖို့ကတော့ ကြာမယ့်သဘောမှာ ရှိပါတယ်” ဟု တိုင်းရင်းဆေးပညာရှင် ဦးဝင်းဇော်က ပြောကြားသည်။

ဆန္ဒထုတ်ဖော်ပွဲပြုလုပ်ရန် စီစဉ်ခဲ့စဉ်က တစ်နိုင်ငံလုံးရှိ တိုင်းရင်းဆေးဆရာများ၊ တိုင်းရင်းဆေးပညာများကို စိတ်ဝင်စားသူများ၊ တိုင်းရင်းဆေးပညာရှင် အသင်းဝင်ဟောင်းများ၊ ကောင်စီဝင်များ၊ ပြည်ထောင်စုဝန်ကြီး အကြံပေး ဆရာကြီး အချို့နှင့် တိုင်းရင်းဆေးဝါး ထုတ်လုပ်သည့် လုပ်ငန်းရှင်အချို့လည်း ပါဝင်မည်ဖြစ်သည်။

 

ရန်ကုန်ဆေးရုံကြီးဝင်းရှိ အစားအသောက် အရောင်းဆိုင်များအား တရားဝင် သတ်မှတ်ထားသည့် စားသောက်ဆိုင်တန်း များတွင်သာ ရောင်းချရန် ဆေးရုံစည်းကမ်း ထိန်းသိမ်းရေးအဖွဲ့က အသိပေး

ရန်ကုန်ပြည်သူ့ဆေးရုံကြီး ဦးနှောက်နှင့် အာရုံကြောဌာန ဘက်ခြမ်းတွင် ဆေးရုံစည်းကမ်း ထိန်းသိမ်းရေးအဖွဲ့က ဈေးရောင်းချမှုနှင့် ပတ်သက်သော အသိပေး ကြေညာချက်ကို ကပ်ထားစဉ် (ဓာတ်ပုံ-ကြည်နိုင်)

ရန်ကုန်ပြည်သူ့ဆေးရုံကြီး ၀င်းအတွင်းရှိ အစားအသောက် အရောင်းဆိုင်များ၊ ထမင်းဆိုင်များနှင့် ကွမ်းယာ၊ ဆေးလိပ် အရောင်းဆိုင်များ စသည့်ဆိုင်များအား တရားဝင် သတ်မှတ်ထားသည့် စားသောက်ဆိုင်တန်း များတွင်သာ ရောင်းချရန် ဆေးရုံကြီး အုပ်ချုပ်ရေးနှင့် စည်းကမ်းထိန်းသိမ်းရေး အဖွဲ့က အသိပေးထားကြောင်း သိရသည်။

ဆေးရုံအုပ်ချုပ်ရေးနှင့် စည်းကမ်းထိန်းသိမ်းရေး အဖွဲ့က ထုတ်ပြန်ထားသော အသိပေး ကြေညာချက်တွင် ဆေးရုံကြီး ဧရိယာအတွင်း တရားဝင် သတ်မှတ်ထားရှိသော စားသောက်ဆိုင်တန်းများတွင် သတ်မှတ်ချက်အတိုင်း ရောင်းချခြင်းကို ဆောင်ရွက်ရန်နှင့် အခြားမည်သည့် နေရာတွင်မှ ဈေးရောင်းချခြင်း၊ ကွမ်းယာဆေးလိပ် ရောင်းချခြင်း၊ အစားအသောက်များ ရောင်းချခြင်းမပြုရန်၊ ဆိုက်ကားဝင်ရောက်ခြင်း၊ လူနာအတင်အချမှလွဲ၍ အငှားယာဉ်များ ရပ်နားခြင်းမပြုရန် ဆေးရုံအုပ်ချုပ်ရေးနှင့် စည်းကမ်းထိန်းသိမ်းရေး အဖွဲ့က ထုတ်ပြန်ကြေညာ ထားကြောင်းနှင့် အသိပေး ကြေညာမှုအား လိုက်နာဆောင်ရွက်ခြင်း မရှိပါက ရောင်းချသော ပစ္စည်းနှင့် အသုံးအဆောင်များအား ဖျက်သိမ်းရန် သိမ်းဆည်းခြင်း၊ တရားဥပဒေအရ အရေးယူ ဆောင်ရွက်ခြင်းတို့ကို ပြုလုပ်မည်ဖြစ်ကြောင်း ကြေညာထားသည်။

“ဆေးရုံဝင်းထဲမှာ ကွမ်းယာ၊ ဆေးလိပ် မရောင်းဖို့ ကျွန်မတို့ လှည့်ပတ်ကြည့်ရှုတဲ့အခါ အမြဲဖယ်ပါတယ်။ ခက်တာကလည်း အဲဒီလို ဈေးဆိုင်တွေက ရွေ့လျားဆိုင်လေးတွေဖြစ်တယ်။ ဖယ်လိုက်တယ်။ အပြင်ရောက်သွားတယ်။ အပြင်မှာလည်း လစ်ရင်လစ်သလို ပြန်ဝင်တယ်။ အမြဲတမ်းလိုက်ပြီး ကွမ်းယာဆေးလိပ် မရောင်းဖို့ လိုက်ပြောနေဖို့ကလည်း အဆင်မပြေဘူးလေ။ ပြောပြီးလည်း မလိုက်နာ ကြတာတွေလည်း ရှိတာပေါ့။ ဆေးရုံမှာ အစားအသောက် အရောင်းဆိုင်တွေအတွက် သီးသန့် စားသောက်ဆိုင်တန်းတွေ လုပ်ပေးထားတယ်။ ဒါပေမဲ့ အဲဒီမှာ မရောင်းကြဘဲ အပြင်ထွက်ရောင်းကြတယ်။ ဈေးဆိုင်တန်းမှာ စနစ်တကျ မရောင်းတာနဲ့ ပတ်သက်လို့ အစီအစဉ်တစ်ခုလုပ်ဖို့ စီစဉ်နေပါတယ်။ သူတို့က သေချာနေရာပေးထားတဲ့ နေရာမှာ မရောင်းဘဲနဲ့ ဆေးရုံဝင်းထဲမှာပဲ ရောင်းကြတယ်။ ဆရာဝန်၊ ဆရာမတွေ ကားရပ်တဲ့နေရာတို့၊ လူနာတင်ယာဉ်သွားတဲ့ နေရာတို့မှာ ရောင်းကြတယ်။ ဒီကိစ္စကို ၀န်ကြီးဌာန အပါအ၀င် အဖွဲ့အစည်းတွေနဲ့ အစီအစဉ်တကျ ဆောင်ရွက်ဖို့ ရှိပါတယ်။ အခုက ပညာပေးကာလ ပြီးသွားပြီ။ ရောင်းချသူတွေက စည်းကမ်းထပ်ဖောက်လို့ရှိရင် အရေးယူမှု အပိုင်းကို ညှိနှိုင်းပြီး လုပ်တော့မှာပါ။ အခုပြုပြင်ဖို့ အချိန်ပေးထားတယ်။ စည်းကမ်းမလိုက်နာတဲ့အပေါ် မူတည်ပြီး အရေးယူမှုတွေ လုပ်သွားမှာပါ” ဟု ရန်ကုန်ပြည်သူ့ ဆေးရုံကြီးမှ ဆေးရုံအုပ် ဒေါက်တာခင်သိင်္ဂီမြင့်က ပြောကြားသည်။

ဆေးရုံအုပ်ချုပ်ရေးအဖွဲ့က ဈေးဆိုင်တန်းတွင် ရောင်းချခွင့်ရရှိသည့် ဈေးသည်များ လိုက်နာရန် စည်းကမ်းချက် ၂၁ ချက် ထုတ်ပြန်ထားကြောင်းနှင့် စည်းကမ်းချက်များ ထုတ်ပြန်ထားသော်လည်း ဈေးရောင်းချသူများက လိုက်နာမှု အားနည်းလျက်ရှိကြောင်း သိရသည်။

စည်းကမ်းချက် ၂၁ ချက်တွင် သတ်မှတ်ထားသော မိမိဆိုင်ခန်းနေရာတွင်သာ စနစ်တကျ ရောင်းချရမည်ဖြစ်ပြီး သတ်မှတ်ဆိုင်ခန်း နေရာမှအပ ဆေးရုံဝင်းအတွင်းနှင့်အပြင်  အခြားနေရာများတွင် သွားရောက်ရောင်းချခြင်း မပြုရန်၊ ညအိပ်နေထိုင်ခွင့် လုံးဝခွင့်မပြု၊ အသင့်ချက်ပြုတ်ထားသော ဟင်းလျာများကိုသာ ရောင်းချရမည်ဖြစ်ပြီး ဈေးဆိုင်အတွင်းနှင့် ဆေးရုံဝင်းအတွင်း ချက်ပြုတ်ကြော်လှော် ရောင်းချခြင်း မပြုရန်၊ ဆိုင်ခန်းတစ်ခန်းလျှင် အမှိုက်ပုံး တစ်ပုံးစီ အနည်းဆုံးထားရှိပြီး အမှိုက်များအား သတ်မှတ်နေရာသို့ မိမိအစီအစဉ်ဖြင့် နေ့စဉ်စွန့်ပစ်ရန်၊ ဆိုင်ပတ်ဝန်းကျင်တွင် အညစ်အကြေးစွန့်ခြင်း လုံးဝမပြုလုပ်ရန်၊ ဆိုင်ခန်းများတွင် ကွမ်းယာ၊ ဆေးလိပ်၊ အရက်၊ မူးယစ်ဆေးဝါးများ ရောင်းချခြင်း လုံးဝမပြုလုပ်ရန် စသည့်အချက်များအား အသိပေးထားဖြစ်ကြောင်းနှင့် စည်းကမ်းချက်များ ဖောက်ဖျက်ကျူးလွန်ပါက ဈေးရောင်းချခွင့် ပိတ်သိမ်း၍ ဆိုင်ခန်းအား ပြန်လည်သိမ်းယူခြင်း ခံရမည့်အပြင် တည်ဆဲဥပဒေအရ အရေးယူသွားမည်ဖြစ်ကြောင်း အသိပေး ကြေညာထားသည်။

 

နိုင်ငံပိုင် ဆေးရုံကြီးများတွင် တစ်နှစ်လျှင် လူနာသန်းနှင့်ချီ တက်ရောက် ကုသနေသည့်အတွက် အရေးပေါ် လူနာကယ်ဆယ်ရေး အပါအ၀င် ဆေးရုံအလိုက် အဆင့်မြှင့်တင်နေ

ရန်ကုန်တိုင်းဒေသကြီး အတွင်းရှိ ခုတင် ၁၅၀၀ အထက် ပြည်သူ့ဆေးရုံကြီး တစ်ခုအား တွေ့ရစဉ်

နိုင်ငံပိုင် ပြည်သူ့ဆေးရုံကြီးများတွင် တစ်နှစ်လျှင် လူနာဦးရေသန်းနှင့်ချီ တက်ရောက်ကုသ နေသည့်အတွက် ဆေးရုံကြီးများတွင် အရေးပေါ်လူနာ ကယ်ဆယ်ရေးလုပ်ငန်း အပါအ၀င် ဆေးရုံအလိုက် လိုအပ်သော အဆင့်မြှင့်တင်ခြင်း လုပ်ငန်းများကို လုပ်ဆောင်လျက်ရှိကြောင်း  ကျန်းမာရေးနှင့် အားကစား ၀န်ကြီးဌာနမှ သိရသည်။

ဝန်ကြီးဌာနမှ တရားဝင်ရရှိသည့် အချက်အလက်များအရ ပြီးခဲ့သည့် ၂၀၁၆ ခုနှစ် တစ်နှစ်တာ ကာလအတွင်း တစ်နိုင်ငံလုံးရှိ ပြည်သူ့ဆေးရုံကြီးများတွင် တက်ရောက်ဆေးကုသခဲ့သည့် ပြင်ပလူနာ ကိုးသန်းကျော်၊ အတွင်းလူနာ ၂ ဒသမ ၅ သန်းကျော်တို့ကို ကျန်းမာရေး စောင့်ရှောက်မှု ပေးခဲ့ကြောင်းနှင့် ဆေးကုသမှုခံယူသူ လူနာဦးရေ နှစ်စဉ်မြင့်တက်လျက် ရှိသည့်အတွက် ပြည်သူ့ဆေးရုံကြီးများကို အဆင့်မြှင့်တင် လျက်ရှိကြောင်း သိရသည်။

ထို့ပြင် ရန်ကုန်တိုင်းဒေသကြီး အတွင်းရှိ သန်လျင်၊ လှိုင်သာယာ၊ အင်းစိန်၊ မြောက်ဥက္ကလာပနှင့် သင်္ဃန်းကျွန်း ဆေးရုံကြီးများကို ယခင်ကထက် အဆင့်မြှင့်တင်နေပြီး အရေးပေါ်လူနာ ကယ်ဆယ်ရေး လုပ်ငန်းအတွက် လိုအပ်သော လူအင်အား၊ စက်ပစ္စည်း များကိုလည်း တိုးချဲ့လုပ်ဆောင်ပေးလျက် ရှိကြောင်းနှင့် ရန်ကုန်တိုင်း ဒေသကြီးတွင် အထူးကုဆေးရုံ ၁၄ ရုံ၊ သင်ကြားရေးဆေးရုံ သုံးရုံ၊ ခုတင် ၅၀၀ ဆံ့ နှစ်ရုံ၊ ခုတင် ၂၀၀ ဆံ့လေးရုံ၊ ခုတင် ၁၀၀ ဆံ့ဆေးရုံတစ်ရုံ၊ ခုတင် ၅၀ ဆံ့နှင့် ၂၅ ခုတင်ဆံ့ဆေးရုံ ၁၁ ရုံစီ၊ ၁၆ ခုတင်ဆံ့ ဆေးရုံ လေးရုံ၊ တိုက်နယ်ဆေးရုံ ၃၃ ရုံရှိပြီး စုစုပေါင်းဆေးရုံ ၈၃ ရုံရှိကြောင်း   နှင့် ခွင့်ပြုခုတင်စုစုပေါင်း ၁၁၄၃၅ ခုတင်ရှိ ကြောင်းနှင့် တစ်နိုင်ငံလုံး အတိုင်းအတာဖြင့် ကျေးလက်ကျန်းမာရေးဌာနပေါင်း ၁၇၇၈ ခု ဆောက်လုပ်ထားပြီး ကျေးလက်ကျန်းမာရေး ဌာနခွဲပေါင်း ၉၀၈၃ခုရှိကြောင်း သိရသည်။

လက်ရှိ မြန်မာနိုင်ငံလူဦးရေ၏ ၁၀ ဒသမ ၅ ရာခိုင်နှုန်း (၂ ဒသမ ၅ သန်း) သည် ဆီးချို သွေးချိုဖြစ်ပွားမှုရှိနေပြီး ဆီးချို သွေးချိုဖြစ် ပွားနိုင်ခြေရှိသူ အကြိုလူနာဦးရေမှာ ၁၉ ဒသမ ၇ ရာခိုင်နှုန်း (၅ သန်း) ရှိနေကြောင်း၊  သွေး တိုးရောဂါရှိသူ ၂၆ ဒသမ ၄ ရာ ခိုင်နှုန်း (၆ ဒသမ ၃ သန်း)၊ သွေးထဲတွင် အဆီဓာတ်များ နေသူ ၃၆ ဒသမ ၇ ရာ ခိုင်နှုန်း (၈ ဒသမ ၈ သန်း)၊ ၀သူ ၅ ဒသမ ၅ ရာခိုင်နှုန်း (၁ ဒသမ ၃သန်း)၊ အ၀လွန်သူ ၂၂ ဒသမ ၄ ရာခိုင်နှုန်း (၅ ဒသမ ၃သန်း)၊ ဆေးလိပ်သောက်သူ ၂၆ ဒသမ ၁ ရာခိုင်နှုန်း (၆ ဒသမ ၂ သန်း)၊  ကွမ်း စားသူ ၄၃ ဒသမ ၂ ရာခိုင်နှုန်း (၁၀ ဒသမ ၃ သန်း)၊ အရက်သောက်သူ ၁၉ ဒသမ ၈ ရာခိုင်နှုန်း (၄ ဒသမ ၇ သန်း) နှင့် အရက် အလွန်အကျွံသောက်သူ ၁၀ ဒသမ ၃ ရာခိုင် နှုန်း (၂ ဒသမ ၄ သန်း )ရှိကြောင်း သိရသည်။

နိုင်ငံများ၏ ဖွံ့ဖြိုးတိုးတက်မှု၊ လူတို့၏ နေထိုင်စားသောက်မှု၊ လူနေမှု ပုံစံပြောင်းလဲမှုတို့ကြောင့် သွေးတိုး၊  ဆီးချိုသွေးချို၊ အ၀လွန်၊ နှလုံးသွေးကြောပိတ်၊ လေဖြတ်၊ ကင်ဆာရောဂါနှင့် နာတာရှည် အဆုတ်ရောင်ရောဂါ စသည့် ကူးစက်ခြင်းကြောင့် မဟုတ်သော ရောဂါများ ဖြစ်ပွားမှုမှာ ဖွံ့ဖြိုးပြီးနိုင်ငံများ၊ ဖွံ့ဖြိုးဆဲနိုင်ငံများတွင်ပါ တစ်နေ့တခြား တိုးပွားလျက်ရှိကြောင်းနှင့် ယင်းရောဂါများ၏ ဖြစ်ပွားမှုနှုန်းသာမက ယင်းရောဂါများ၏ နောက်ဆက်တွဲ ပြဿနာများ ဖြစ်ပွားမှု၊ ယင်းရောဂါများကြောင့် သေဆုံးမှုများသည်လည်း လျင်မြန်စွာ တိုးပွားလျက်ရှိကြောင်း သိရသည်။

မြန်မာနိုင်ငံတွင် ပြီးခဲ့သော ဆယ်စုနှစ်တစ်ခုကျော်မှ စတင်ကာ ဆီးချို သွေးချိုရောဂါ အပါအ၀င် အခြားမကူးစက်နိုင်သော ရောဂါများဖြစ်သည့် နှလုံး၊ သွေးတိုး၊ ဆီးချို၊ ကင်ဆာ စသည့်ရောဂါများ ဖြစ်ပွားမှုမှာ မြင့်တက်လာပြီး အဓိကအားဖြင့် အစားအသောက်နှင့် လူနေမှုပုံစံများ ပြောင်းလဲမှုကြောင့် ဖြစ်ကြောင်း၊ အ၀လွန်ခြင်းများလည်း များပြားလာရာ ယင်းနှင့်ဆက်နွှယ်သည့် နှလုံး၊ အသည်း အဆီဖုံးသည့် ရောဂါများ တွဲဖက်ဖြစ်ပွားလာသည်ကို သက်ငယ်ပိုင်းများတွင်ပါ တွေ့ရှိလာရကြောင်း ပြည်သူ့ကျန်းမာရေး ဦးစီးဌာနမှ သိရသည်။