၂၀၁၈-၂၀၁၉ ဘဏ္ဍာနှစ်အတွက် ပြည်သူ့လွှတ်တော်အနေဖြင့် အသုံးစရိတ် ကျပ် ၉၄၁၄ ဒသမ ၆၆၉ သန်း တောင်းခံထားပြီး ဧည့်ခံကျွေးမွေးစရိတ်အဖြစ် ကျပ် ၁၄၄၅ ဒသမ ၁၇၂ သန်း ထည့်သွင်းတင်ပြထား

ဇူလိုင် ၂၆ ရက်က ပြုလုပ်သည့် ပြည်ထောင်စုလွှတ်တော် အစည်းအဝေး ခေတ္တရပ်နားနေစဉ် လွှတ်တော်ကိုယ်စားလှယ်များအား တွေ့ရစဉ်

၂၀၁၈-၂၀၁၉ ဘဏ္ဍာနှစ်အတွက် ပြည်သူ့လွှတ်တော်အနေဖြင့် သာမန်အသုံးစရိတ် ကျပ်  ၉၂၃၂ ဒသမ ၂၃၂ သန်း၊ ငွေလုံးငွေရင်း အသုံးစရိတ် ကျပ် ၁၈၂ ဒသမ ၄၃၇ သန်း စုစုပေါင်း အသုံးစရိတ် ကျပ် ၉၄၁၄ ဒသမ ၆၆၉ သန်း တောင်းခံထားပြီး ဧည့်ခံကျွေးမွေးစရိတ်အဖြစ် ကျပ် ၁၄၄၅ ဒသမ ၁၇၂ သန်း (ကျပ် ၁ ဒသမ ၄ ဘီလျံကျော်) ထည့်သွင်းတင်ပြထားကြောင်း သိရသည်။

၂၀၁၈-၂၀၁၉ခု၊ဘဏ္ဍာရေးနှစ် အမျိုးသား စီမံကိန်းဥပဒေကြမ်းပါ စီမံကိန်းလုပ်ငန်းများနှင့် ပြည်ထောင်စု၏ ဘဏ္ဍာငွေအရအသုံးဆိုင်ရာ ဥပဒေကြမ်းပါ ရငွေသုံးငွေများနှင့် ပတ်သက်ပြီး ပြည်သူ့လွှတ်တော် ဒုတိယဥက္ကဋ္ဌ ဦးထွန်းထွန်းဟိန်က ပြည်ထောင်စု လွှတ်တော်သို့ တင်ပြခဲ့ခြင်းဖြစ်သည်။

ဦးထွန်းထွန်းဟိန်က “၂၀၁၈-၂၀၁၉ ဘဏ္ဍာနှစ်အတွက် ပြည်သူ့လွှတ်တော်ရုံးအနေနဲ့ သာမန်အသုံးစရိတ်အဖြစ် ကျပ် ၉၂၃၂ ဒသမ ၂၃၂ သန်း၊ ငွေလုံးငွေရင်းအသုံးစရိတ်အဖြစ် ကျပ် ၁၈၂ ဒသမ ၄၃၇ သန်း တောင်းခံထားပါတယ်”  ဟု ပြည်ထောင်စု လွှတ်တော်သို့ တင်ပြခဲ့သည်။

၂၀၁၈-၂၀၁၉  ဘဏ္ဍာနှစ်အတွက် ပြည်သူ့လွှတ်တော်ရုံး သာမန်အသုံးစရိတ်တွင် ပြည်သူ့လွှတ်တော် ပုံမှန်အစည်းအဝေးများ၊ ကော်မတီအစည်းအဝေးများ ကျင်းပရာတွင် လိုအပ်သော ရုံးအသုံးအဆောင်အတွက် အသုံးစရိတ်များ၊ ၀န်ထမ်းလစာများ ထပ်မံခန့်အပ်မည့်ဝန်ထမ်းများအတွက် လစာစရိတ်များ၊ ရွေးကောက်ခံကိုယ်စားလှယ်များ၊ ကော်မရှင်အဖွဲ့ဝင်များအတွက် စရိတ်ချီးမြှင့်ငွေ စုစုပေါင်း ကျပ် ၅၉၈၁ ဒသမ ၉၉၀ သန်း၊ တောင်းခံခဲ့ရာတွင် ဘဏ္ဍာရေးကော်မရှင်က ၅၉၇၇ ဒသမ ၉၉၀ သန်း ခွင့်ပြုပေးခဲ့ကြောင်း၊ ပြည်တွင်းခရီးသွားလာစရိတ်နှင့် ပြည်ပ ခရီးသွားကိုယ်စားလှယ် ခရီးစရိတ်အတွက် ကျပ် ၃၆၃ ဒသမ ၀၀၄ သန်းတောင်းခံခဲ့ရာ ဘဏ္ဍာရေး ကော်မရှင်က ခွင့်ပြုပေးခဲ့ကြောင်း၊ ပြင်ဆင် ထိန်းသိမ်းစရိတ်ခေါင်းစဉ်တွင် ကျပ် ၈၅ ဒသမ ၁၃၂ သန်းတောင်းခံခဲ့ရာ ဘဏ္ဍာရေးကော်မရှင်က ကျပ် ၆၂ ဒသမ ၉၇၀ သန်း ခွင့်ပြုပေးခဲ့ကြောင်း ဦးထွန်းထွန်းဟိန်က ပြောကြားသည်။

ပညာရေးနှင့် လူမှုရေးအသုံးစရိတ် ခေါင်းစဉ်တွင် ကျပ် ၁၀၇ ဒသမ ၀၀ တောင်းခံခဲ့ရာ ဘဏ္ဍာရေးကော်မရှင်က ခွင့်ပြုပေးခဲ့ကြောင်း၊ ဧည့်ခံကျွေးမွေးစရိတ်အတွက် ကျပ် ၁၄၄၅ ဒသမ ၁၇၂ သန်း တောင်းခံခဲ့ရာ ဘဏ္ဍာရေး ကော်မရှင်က ခွင့်ပြုပေးခဲ့ကြောင်း၊ စက်ကိရိယာ တန်ဆာပလာများ ၀ယ်ယူရန်အတွက် ကျပ် ၃၅ ဒသမ ၈၆၄ သန်း တောင်းခံခဲ့ရာ ဘဏ္ဍာရေးကော်မရှင်မှ ကျပ် ၂၆ ဒသမ ၇၇၈ သန်း ခွင့်ပြုပေးခဲ့ကြောင်း၊ ရုံးသုံးပရိဘောဂများ ၀ယ်ယူရန်အတွက် ကျပ် ၇ ဒသမ  ၆၅၀ သန်းတောင်းခံခဲ့ရာ ခွင့်ပြုပေးခဲ့ကြောင်း၊ ရုံးသုံးယာဉ်တစ်စီး ၀ယ်ယူရန် ကျပ် ၃၄ သန်း တောင်းခံခဲ့ရာ စီမံကိန်းနှင့်ဘဏ္ဍာရေးဝန်ကြီးဌာနနှင့် ဘဏ္ဍာရေးကော်မရှင်တို့က ဖြတ်တောက်ခဲ့ကြောင်း ဆက်လက်ပြောကြားသည်။

ပြည်သူ့လွှတ်တော်ရုံး၏ ၂၀၁၈-၂၀၁၉ ခု ဘဏ္ဍာရေးအတွက် သာမန်အသုံးစရိတ်အဖြစ် ကျပ် ၉၆၅၈ ဒသမ ၅၆၉ သန်းတောင်းခံခဲ့ရာ ဘဏ္ဍာရေးကော်မရှင်က ကျပ် ၉၆၃၀ ဒသမ ၁၅၇ သန်း ခွင့်ပြုပေးခဲ့ကြောင်း၊ ၂၀၁၈- ၂၀၁၉ ဘဏ္ဍာရေးနှစ်အတွင်း ပြည်သူ့လွှတ်တော် ရုံးဝန်ထမ်းများနေထိုင်ရန် အရာထမ်း အဆောက်အအုံတစ်လုံး၊ အမှုထမ်း အဆောက်အအုံတစ်လုံး၊ စုစုပေါင်းနှစ်လုံးအတွက် ကျပ် ၂၁၁၀ ဒသမ ၅၂၀ သန်းအား လျာထားတောင်းခံခဲ့သော်လည်း နေပြည်တော် ကောင်စီက တာဝန်ယူတည်ဆောက်မည်ဖြစ်သည့်အတွက် ပြည်သူ့လွှတ်တော်ရုံး၏ ငွေလုံးငွေရင်းအသုံးစရိတ်တွင် ထည့်သွင်းတောင်းခံခြင်းမပြုတော့ကြောင်း ဦးထွန်းထွန်းဟိန်က ပြည်ထောင်စုလွှတ်တော်သို့ တင်ပြခဲ့သည်။

၂၀၁၈-၂၀၁၉ ဘဏ္ဍာနှစ်အတွင်း ပြည်သူ့လွှတ်တော်ရုံး၏ သာမန်ရငွေအဖြစ် ကျပ် ၁ ဒသမ ၈၉၄ သန်းလျာထားကြောင်း၊ ယင်းသို့ လျာထားရာတွင် သတင်းစာဟောင်းများ ရောင်းရငွေ၊ မှတ်တမ်းစာအုပ်များ ရောင်းရငွေနှင့် ဆိုင်ခန်းငှားရမ်းခရငွေများဖြစ်ပြီး ပြည်သူ့လွှတ်တော်ရုံးအနေဖြင့် ငွေလုံးငွေရင်း ရငွေနှင့်ကြွေးမြီ ရငွေများ လျာထားခြင်း မရှိကြောင်း ဆက်လက်ပြောကြားသည်။