သေနတ်ပစ်ခတ်မှုဖြစ်ပွားခဲ့သည့်အတွက် မြောက်ဦး သျှစ်သောင်း၊ ထုက္ကန်သိမ်၊ အံတော်သိမ်ဘုရားပွဲတော်၌ ညပွဲ ထည့်သွင်းကျင်းပမည်မဟုတ်ဟု သိရ

သေနတ်ပစ်ခတ်မှု ဖြစ်ပွားခဲ့သည့်အတွက် ရခိုင်ပြည်နယ် မြောက်ဦးမြို့တွင်ကျင်းပမည့် သျှစ်သောင်း၊ ထုက္ကန်သိမ်၊ အံတော်သိမ် ဘုရားပွဲတော်၌ ညပွဲထည့်သွင်းကျင်းပမည် မဟုတ်ဟု သိရှိရသည်။

အဆိုပါပွဲသည် ရခိုင်ပြည်နယ်အတွင်း အစည်ကားဆုံးဘုရားပွဲများတွင် တစ်ခုအပါအ၀င်ဖြစ်ပြီး နတ်တစ်ရာ၊ ပတ်တစ်ရာနှင့် ရိုးရာယဉ်ကျေးမှုများကို ဖော်ထုတ်သည့်ပွဲဖြစ်သည့်အပြင် ချောင်းအတွင်း လှေစီး၍ ရေပက်ခြင်းများကို ပြုလုပ်ကြလေ့ရှိသည့်အပြင် ကျင်ပွဲ၊ လှေပြိုင်ပွဲများကိုလည်း ထည့်သွင်းကျင်းပလေ့ရှိကြောင်း သိရသည်။

“ဒီနှစ်မှာ ညပွဲကို ထည့်သွင်းကျင်းပမှာ မဟုတ်ဘူး။ ဘာဖြစ်လို့လဲဆိုတော့ မကြာခင်က ပစ်ခတ်မှုဖြစ်ပွားခဲ့ပြီး ဒေသခံခုနစ်ဦး သေဆုံးကာ အများအပြားလည်း ဒဏ်ရာရရှိခဲ့တယ်ဆိုတော့ ညပွဲကိုမထည့်ဖို့ ဆရာတော်ကြီးတွေကလည်း သြ၀ါဒပေးတယ်ဆိုတော့ မလုပ်တော့ဘူးလို့ ဆုံးဖြတ်လိုက်ကြတယ်။ နောက်ထပ် ပြဿနာ တစ်စုံတစ်ခုမဖြစ်အောင် ကြိုတင်ပြင်ဆင်လိုက်တာဖြစ်တယ်။ ဒါပေမဲ့ နေ့ပွဲတွေကတော့ အရင်နှစ်တွေလို ကျင်ပွဲ၊ လှေပြိုင်ပွဲတွေကို ထည့်သွင်းကျင်းပသွားမှာဖြစ်တယ်” ဟု သျှစ်သောင်းဘုရားဂေါပကအဖွဲ့ဝင်တစ်ဦးက ပြောကြားသည်။

ထိုသို့ ညပွဲထည့်သွင်းမကျင်းပသည့်အတွက် ပွဲတော်စည်ကားမှုရှိမည် မဟုတ်ကြောင်းလည်း ဒေသခံများက သုံးသပ်ပြောဆိုကြပြီး ရပ်ဝေးရပ်နီးများကလည်း လာရောက်မှုနည်းနိုင်ကြောင်း သုံးသပ်ပြောဆိုကြသည်။

မြောက်ဦးမြို့တွင် စာပေဟောပြောပွဲ ကျင်းပခွင့်မရသည့်ကိစ္စရပ်နှင့် ပတ်သက်၍ လူစုလူဝေးဖြစ်ပေါ်ရာမှ ရဲစခန်းရှေ့သို့ ရောက်သွားကြရာမှ သေနတ်ဖြင့်ပစ်ခတ်မှုအထိ ဖြစ်ပေါ်ခဲ့ကာ ခုနစ်ဦးသေဆုံးပြီး ၁၂ ဦး ဒဏ်ရာရရှိခဲ့ကြောင်း သိရသည်။

မြောက်ဦးလေယာဉ်ကွင်းသစ်ကို အစိုးရနှင့်ပုဂ္ဂလိက ပူးပေါင်းဆောင်ရွက်သည့်စနစ် (PPP) ဖြင့် အကောင်အထည်ဖော် ဆောင်ရွက်မည်ဟုသိရ

မြောက်ဦးလေယာဉ်ကွင်း တည်ဆောက်နေသည်ကို တွေ့ရစဉ်

မြောက်ဦးလေယာဉ်ကွင်းသစ်ကို အစိုးရ-ပုဂ္ဂလိက ပူးပေါင်းဆောင်ရွက်သည့်စနစ် (PPP) ဖြင့် အကောင်အထည်ဖော် ဆောင်ရွက်ရန် ခွင့်ပြုချက်ရရှိထားပြီးဖြစ်ကြောင်း သိရသည်။

မြောက်ဦးလေယာဉ်ကွင်းသစ် အကောင်အထည်ဖော်မည့်ကိစ္စအား ဖေဖော်ဝါရီ ၁၃ ရက်ကထုတ်ပြန်သည့် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော် ဆောင်ရွက်ရေးကော်မတီ၏ လုပ်ငန်းဆောင်ရွက်မှုများနှင့်စပ်လျဉ်း၍ ပြည်သူသို့အစီရင်ခံစာတွင် ဖော်ပြထားချက်အရ သိရသည်။

မြောက်ဦးမြို့လေဆိပ်အသစ်သည် မြောက်ဦးမြို့၏ အရှေ့ဘက် ၄ ဒသမ ၅ မိုင်ခန့်အကွာ နန်းကျားကျေးရွာ အနောက်ဘက်တွင်တည်ရှိပြီး ရခိုင်ပြည်နယ်အစိုးရအဖွဲ့မှ ၂၀၁၅-၂၀၁၆ ဘဏ္ဍာနှစ် ခွင့်ပြုရန်ပုံငွေ ကျပ်သန်း ၂၀၀၀ နှင့် ၂၀၁၆-၂၀၁၇ ဘဏ္ဍာနှစ် ခွင့်ပြုရန်ပုံငွေကျပ်သန်း ၂၀၀၀ စုစုပေါင်း ကျပ်သန်း ၄၀၀၀ တို့ဖြင့် ဆုထူးစံကုမ္ပဏီက တာဝန်ယူတည်ဆောက်ခဲ့ပြီး ယခု ၂၀၁၇-၂၀၁၈ ဘဏ္ဍာနှစ်တွင် ရခိုင်ပြည်နယ်အတွက် ပြည်ထောင်စုအစိုးရ၏ ခွင့်ပြုရန်ပုံငွေမှာ ကျပ်သန်းပေါင်း ၁၄၂ ဒသမ ၃၉၃ သာ ခွင့်ပြုထားသောကြောင့် လေယာဉ်ကွင်းတည်ဆောက်ရေးလုပ်ငန်းအား ရပ်ဆိုင်းထားရကြောင်း သိရသည်။

မြောက်ဦးလေယာဉ်ကွင်း စီမံကိန်းအတွက် ခန့်မှန်းကုန်ကျငွေမှာ ကျပ် ၂၅ ဒသမ ၆၁ ဘီလျံဖြစ်ကြောင်း သိရသည်။ ရခိုင်ဘုရင်များ၏မြို့တော်ဖြစ်ခဲ့သည့် မြောက်ဦးမြို့တွင် ရှေးဟောင်းယဉ်ကျေးမှု အမွေအနှစ်လက်ရာ အများအပြားကျန်ရှိနေသေးပြီး မြောက်ဦးမြို့ကို ကုလသမဂ္ဂပညာရေး၊ သိပ္ပံနှင့် ယဉ်ကျေးမှုဆိုင်ရာအဖွဲ့အစည်း (ယူနက်စကို) ၏ ကမ္ဘာ့ယဉ်ကျေးမှုအမွေအနှစ် စာရင်းဝင်ဒေသအဖြစ် သတ်မှတ်နိုင်ရေး အကောင်အထည်ဖော် ဆောင်ရွက်လျက်ရှိကြောင်း သိရသည်။

သို့ရာတွင် လမ်းပန်းဆက်သွယ်ရေး အခြေအနေအရ မြောက်ဦးကို ကမ္ဘာလှည့်ခရီးသွား တစ်နှစ်လေးထောင်ခန့်သာ လာရောက်ကြောင်းနှင့် လေဆိပ်အသစ်တည်ဆောက်ပြီးလျှင် ခရီးသွားများ ပိုမိုဝင်ရောက်နိုင်မည်ဖြစ်ကြောင်း သိရသည်။

အလားတူ မာန်အောင်လေဆိပ် မူလလေယာဉ်ပြေးလမ်း ပေ ၄၅၀၀×၁၀၀ အား တောင်ဘက်သို့ Overrun ပေ ၂၀၀ နှင့် RESA Earth Levelling လုပ်ငန်း စတင်ဆောင်ရွက်လျက်ရှိကြောင်းနှင့် စစ်တွေလေဆိပ် ခရီးသည်အဆောက်အအုံ ပေ ၁၈၀×၆၀ တိုးချဲ့တည်ဆောက်ခြင်းလုပ်ငန်း ဆောင်ရွက်ပြီးဖြစ်ကြောင်း အစီရင်ခံစာတွင်ပါရှိသည်။

ပို့ဆောင်ရေးကဏ္ဍအနေဖြင့် ကုန်းလမ်းပို့ဆောင်ရေးတွင် မူလယာဉ်လိုင်း ၄၂ လိုင်းအပြင် ခြောက်လိုင်းထပ်မံ၍ တိုးချဲ့ပြေးဆွဲခွင့်ပြုနိုင်ခဲ့ကြောင်း၊ ရေကြောင်းပို့ဆောင်ရေးတွင် ရခိုင်ဒေသကမ်းရိုးတန်းနှင့် မြစ်ကြောင်းများတစ်လျှောက် သွားလာမှု အဆင်ပြေစေရေးအတွက် ကစ္ဆပနဒီ (၁) နှင့် (၂) ရေယာဉ်များ၊ အောင်တံခွန်ရေယာဉ်များ ပြေးဆွဲဆောင်ရွက်လျက်ရှိကြောင်း၊ အိန္ဒိယနိုင်ငံအစိုးရ၏ အထောက်အပံ့ဖြင့် တန်ချိန် ၃၀၀ မြစ်တွင်းသွား ရေယာဉ်ခြောက်စင်းကို ၂၆-၆-၂၀၁၇ ရက်မှစ၍ ပြေးဆွဲဆောင်ရွက်လျက်ရှိကြောင်း သိရသည်။

မြောက်ဦးအဓိကရုဏ်းနှင့်ပတ်သက်ပြီး နိုင်ငံတော်အဆင့်၊ ပြည်နယ်အဆင့် စုံစမ်းစစ်ဆေးနေဆဲဖြစ်ကြောင်း ရခိုင်ပြည်နယ်ရဲတပ်ဖွဲ့မှူး ပြောကြား

မြောက်ဦးအဓိကရုဏ်းနှင့် ပတ်သက်ပြီး နိုင်ငံတော်အဆင့်၊ ပြည်နယ်အဆင့် စုံစမ်းစစ်ဆေးနေဆဲဖြစ်ကြောင်း ရခိုင်ပြည်နယ်ရဲတပ်ဖွဲ့မှူး ရဲမှူးကြီးအောင်မြတ်မိုး၏ ပြောကြားချက်အရ သိရသည်။

မြောက်ဦးဖြစ်စဉ်နှင့်ပတ်သက်ပြီး စုံစမ်းစစ်ဆေးမှု အခြေအနေများကိုမေးမြန်းရာ ရခိုင်ပြည်နယ်ရဲတပ်ဖွဲ့မှူး ရဲမှူးကြီးအောင်မြတ်မိုးက “စုံစမ်းနေဆဲပဲဖြစ်ပါတယ်။ နိုင်ငံတော်အဆင့်ရော ပြည်နယ်အဆင့်ရော စုံစမ်းနေဆဲဖြစ်ပါတယ်။ သက်ဆိုင်ရာ တရားဥပဒေအတိုင်းလည်း ဆောင်ရွက်နေပါတယ်” ဟုပြောကြားသည်။

ဖေဖော်ဝါရီ ၁၄ ရက် နံနက်က ရခိုင်ပြည်နယ် ရဲတပ်ဖွဲ့တွင်ပြုလုပ်သော နိုင်ငံတော်လုံခြုံရေးအဖွဲ့အစည်းများ၏ အသွင်သဏ္ဌာန်ပုံစံဖြင့် ယူနီဖောင်းများဝတ်ဆင်ခြင်းမပြုရန် အသိပေးရှင်းလင်းခြင်း အခမ်းအနားပြီးဆုံးချိန် မီဒီယာများ၏မေးမြန်းမှုကို ယခုကဲ့သို့ ပြန်လည်ဖြေကြားခဲ့ခြင်းဖြစ်သည်။

မြောက်ဦးအဓိကရုဏ်းနှင့် ပတ်သက်ပြီး ရဲတပ်ဖွဲ့က နှိမ်နင်းရာတွင် လုပ်ထုံးလုပ်နည်းနှင့် ညီညွတ်မှုရှိမရှိ စုံစမ်းစစ်ဆေးရေးလုပ်ငန်းကို ဇန်န၀ါရီ ၂၀ ရက်က စတင်ခဲ့ခြင်းဖြစ်ပြီး အဆိုပါစုံစမ်းစစ်ဆေးရေးအဖွဲ့တွင် မြန်မာနိုင်ငံရဲတပ်ဖွဲ့မှ ပြည်နယ်ဒုတိယရဲတပ်ဖွဲ့မှူးအဆင့်ရှိသူ တစ်ဦး၊ ဒုတိယရဲမှူးကြီးအဆင့်ရှိသူ တစ်ဦးနှင့် ရဲမှူးအဆင့်ရှိသူတစ်ဦးတို့ ပါဝင်ကြောင်းနှင့် အဓိကရုဏ်းနှိမ်နင်းသည့်အခါ ဥပဒေနှင့်ညီညွတ်မှု ရှိ မရှိ သက်သေသာဓကစုံလင်စွာဖြင့် စစ်ဆေးသွားမည်ဖြစ်ပြီး စုံစမ်းစစ်ဆေးရေးအဖွဲ့ဖြင့် စစ်ဆေးပေါ်ပေါက်ချက်အရ တရားနည်းလမ်းတကျ ဆက်လက်ဆောင်ရွက်သွားရန်ရှိကြောင်း သိရသည်။

မြောက်ဦးဖြစ်စဉ်နှင့်ပတ်သက်ပြီး ရဲတပ်ဖွဲ့ဝင်များ၏ ဆောင်ရွက်ချက်များသည် လုပ်ထုံးလုပ်နည်းနှင့် ညီညွတ်မှု ရှိ မရှိ စုံစမ်းစစ်ဆေးရေးခုံရုံး ဖွဲ့စည်းဆောင်ရွက်သွားမည်ဖြစ်ကြောင်း သတင်းထုတ်ပြန်ထားသည်။

မြောက်ဦးအဓိကရုဏ်းနှင့်ပတ်သက်၍ သီးခြားလွတ်လပ်သည့် စုံစမ်းစစ်ဆေးရေး အဖွဲ့တစ်ရပ်ဖွဲ့စည်းကာ ဖြစ်စဉ်တစ်ရပ်လုံးတွင် ပါဝင်ပတ်သက်ခဲ့ကြသည့် အာဏာပိုင်အဖွဲ့များ၏ လုပ်ရပ်များသည် ဥပဒေနှင့် ညီ မညီ စစ်ဆေးဖော်ထုတ်ပြီး တာဝန်ရှိသူများအား အရေးယူပေးရန် ALD ပါတီက ကြေညာချက်ထုတ်ပြန် တိုက်တွန်းထားသည်။

အလားတူ မြောက်ဦးအကြမ်းဖက်မှုနှင့်ပတ်သက်၍ အစိုးရမဟုတ်သော ပြင်ပပုဂ္ဂိုလ်များဖြင့် စုံစမ်းရေးကော်မရှင်ဖွဲ့စည်းရန် စစ်တွေမြို့နယ် လူမှုအဖွဲ့အစည်းများ ကိုယ်စားပြုကော်မတီက ကြေညာချက်ထုတ်ပြန် တောင်းဆိုခဲ့သည်။

ဇန်န၀ါရီ ၁၆ ရက်က မြောက်ဦးမြို့တွင် ဖြစ်ပွားခဲ့သည့် အဓိကရုဏ်းကြောင့် ပြည်သူခုနစ်ဦးသေဆုံးပြီး ၁၂ ဦးအထိ ဒဏ်ရာရရှိခဲ့သည်။ ရခိုင်ပြည်နယ်လွှတ်တော်မှ ဖွဲ့စည်းသော မြောက်ဦးဖြစ်စဉ်နှင့်ပတ်သက်ပြီး စုံစမ်းစစ်ဆေးရေးအဖွဲ့ကို ဇန်န၀ါရီ ၂၉ ရက်တွင် လွှတ်တော်မှ အတည်ပြုခဲ့ကြောင်း သိရသည်။ သို့ရာတွင် လွှတ်တော်က အတည်ပြုထားသော စုံစမ်းစစ်ဆေးရေးအဖွဲ့သည် ကွင်းဆင်းစစ်ဆေးမှုများ မဆောင်ရွက်ရသေးကြောင်း သိရသည်။

မြောက်ဦးမြို့အဓိကရုဏ်းတွင် သေနတ်ကျည်ဆန် ထိမှန်သေဆုံးသူ ခုနစ်ဦးကို မြောက်ဦးသုသာန်၌ ဂူသွင်းသင်္ဂြိုဟ်

မြောက်ဦးမြို့အဓိကရုဏ်းတွင် သေဆုံးခဲ့သူ ခုနစ်ဦးကို မြောက်ဦးသုသာန်တွင် ဂူသွင်းသင်္ဂြိုဟ်စဉ်

ရခိုင်ပြည်နယ် မြောက်ဦးမြို့အဓိကရုဏ်းတွင် သေနတ်ဖြင့် ပစ်ခတ်မှုကြောင့် သေဆုံးသူခုနစ်ဦးအား မြောက်ဦးမြို့ သုသာန်တွင် ဂူသွင်းသင်္ဂြိုဟ်ခဲ့ပြီး လိုက်ပါပို့ဆောင်သူ နှစ်ထောင်ကျော်ရှိကြောင်း သိရသည်။

ဇန်န၀ါရီ ၁၆ ရက် ညပိုင်းက စာပေဟောပြောပွဲ ပျက်သွားသည့်အတွက် လူစုလူဝေးဖြင့် ဆန္ဒထုတ်ဖော်ခဲ့ပြီးနောက် ရဲစခန်းနှင့် ထွေအုပ်ရုံးရှေ့တွင် အကြမ်းဖက်မှုများဖြစ်ပွားခဲ့ရာ ရဲတပ်ဖွဲ့က သေနတ်ဖြင့် ပစ်ခတ်ခဲ့ခြင်းကြောင့် ဒဏ်ရာရရှိသူ ၁၂  ဦးရှိကာ ခုနစ်ဦး သေဆုံးခဲ့သည်။ သေဆုံးသူများ၏ အလောင်းကို ဇန်န၀ါရီ ၁၈ ရက် မွန်းတည့် ၁၂ နာရီတွင် မြောက်ဦးမြို့ သုသာန်၌ ဂူသွင်းသင်္ဂြိုဟ်ခဲ့ ခြင်းဖြစ်သည်။

ထိုသို့သေဆုံးသူများအနက် သေနတ် ထိမှန်ခြင်းမဟုတ်ဘဲ ရိုက်ပုတ်ခံရခြင်းကြောင့် သေဆုံးခဲ့ခြင်းဖြစ်သည်ဟု ဒေသခံများနှင့် မိသားစုဝင်များက သုံးသပ်ပြောဆိုလျက်ရှိသည်။

သေဆုံးသူတစ်ဦး၏ အစ်ကို ကိုလုံးလုံးကလည်း ရဲတပ်ဖွဲ့ဝင်များအား ထိထိရောက်ရောက် အရေးယူသင့်ကြောင်း၊  ယင်းသို့ အရေးယူပေးရန်အတွက်လည်း တောင်းဆိုလိုကြောင်း၊ သေဆုံးသူတစ်ဦးတွင် ထိုးကြိတ်ခံထားရသည်ဟု ယူဆရသေဒဏ်ရာများကို တွေ့ရကြောင်း ပြောကြားသည်။

သေဆုံးခဲ့သည့် ကိုညီညီကျော်၏ မိသားစုဝင် ဦးကျော်ဆွေက ဒီဖြစ်စဉ်မှာ ဦးဆောင်သူတွေက အထိန်းအကွပ်မရှိခဲ့တာကြောင့် အခုလိုမျိုးဖြစ်သွားတယ်လို့ သုံးသပ်မိပါတယ်။ မဖြစ်ခင်ကတည်းက ဖြစ်တော့မယ်ဆိုတာမျိုးကိုလည်း သူတို့သိနေတယ်။ ထိန်းကွပ်ဖို့အတွက်လည်း သူတို့မှာ တာဝန်ရှိတယ်။ နန်းတော်ရာကုန်းကို ကျွန်တော်ရောက်သွားတော့ ဦးဆောင်ကော်မတီတွေ ဘယ်သူမှ မရှိတော့ဘူး။ အဲဒါကြောင့် လူငယ်တွေက အုံကြွမှုဖြစ်လာပြီး အခုလိုပစ်ခတ်တဲ့အထိ ဖြစ်သွားရ တာလို့မြင်ပါတယ်”ဟု ပြောကြားသည်။

သို့သော်လည်း သေဆုံးသူများတွင် မတရားသဖြင့် သေဆုံးသူများရှိနေကြောင်း၊ အချို့ သော အလောင်းများတွင် ရိုက်နှက်ခံထားရသည်များကိုတွေ့ရကြောင်း ဖြစ်စဉ်ကို တွေ့ရှိခဲ့သူများ၏ ပြောကြားချက်များအရ သိရသည်။

ယင်းနှင့်ပတ်သက်ပြီး ဒေါ်မတင်ရွှေက “ဟောပြောပွဲ ပျက်သွားတဲ့အတွက် စိတ်မကောင်းဖြစ်မိတယ်။ အဲဒီကတစ်ဆင့် ရဲစခန်းရှေ့ကို ရောက်သွားတယ်။ တုတ်မပါ၊ ဓားမပါ သွားခဲ့ကြတာပါ။ အဲဒီကတစ်ဆင့် ခရိုင်ထွေအုပ်ရုံးကို သွားခဲ့တယ်။ ပထမမိုးပေါ်ထောင်ပစ်ပြီးနောက် ဆက်တိုက်ပစ်ခတ်ခဲ့တယ်။ လဲကျနေတဲ့ လူတွေကိုလည်း ကောက်ခွင့်မပေးခဲ့ဘူး။ နာရေးကားကိုခေါ်ပြီး အလောင်းကို သွားတောင်းတော့လည်း မရခဲ့ဘူး။ အဲဒီတုန်းက ကလေးတွေမသေသေးဘူးလို့ တွေ့ခဲ့ရပါ တယ်။ ရဲကဒဏ်ရာရတယ်ဆိုတဲ့ သတင်းဟာလည်း မဟုတ်ပါဘူး။ ဆေးရုံမှာ ဆေးကုသနေတဲ့ ရဲတစ်ယောက်မှ မတွေ့ရဘူး” ဟု ပြောကြားသည်။

ထို့ပြင် ဒေါ်အေးသန်းချေကလည်း လူငယ်များမှာ ဟောပြောပွဲကို နားထောင်လိုသည့်အတွက် သွားရောက်ခဲ့ခြင်းဖြစ်ကြောင်း၊ ဟန့်တားခြင်းမရှိဘဲ ထိုသို့ သေနတ်ဖြင့်ပစ်ခတ်ခဲ့ခြင်းကြောင့် သေဆုံးခဲ့ရခြင်းဖြစ်ကြောင်း ပြောကြားသည်။

“ဆန္ဒထုတ်ဖော်တာကို ဟန့်တားခြင်း မရှိဘဲ သေနတ်နဲ့သေအောင်အထိ ပစ်လိုက်တဲ့အတွက် ကျွန်မရဲ့ အစ်မသားတစ်ယောက်လည်း သေသွားတယ်။ နောက်ထပ်ကလေးတွေလည်း ထိတယ်။ သူတို့ဘယ် လောက်ရက်စက်လဲဆိုရင် ခဏလေးမှာ သုံးလေးယောက် ကျသွားတယ်။ ကျွန်မတူလေး သေနေတာကိုတောင် ကိုင်လို့မကြည့်ဘဲ တက်နင်းသွားတယ်။ ကျွန်မတို့ဘယ်လိုခံစားရမလဲဆိုတာ ကြည့်ပါ။ ကလေးတွေဟာ ရန်ရှာဖို့သွားတာလည်း မဟုတ်ဘူး။ ကျွန်မကိုယ်တိုင်မြင်တွေ့ခဲ့ရတာပါ” ဟု ဒေါ်အေးသန်းချေက ဆိုသည်။

ရဲတပ်ဖွဲ့က ယင်းဆန္ဒထုတ်ဖော်မှုအား တားဆီးခဲ့ရာတွင် လူစုခွဲရန် ရှေးဦးစွာသတိပေးအကြောင်းကြားခဲ့ကြောင်း၊ ထိန်းသိမ်းမှုအား လက်မခံဘဲ အကြမ်းဖက်လာသဖြင့် လူစုလူဝေးအတွင်းသို့ တီ ၅၆ နှင့် ဘီအေ ၉၄ သေနတ် ၁၀ ချက်ခန့် ပစ်ခတ်ခဲ့ကြောင်း အစိုးရက ထုတ်ပြန်ထားသည်။