မြောက်ဦးအဓိကရုဏ်းနှင့်ပတ်သက်ပြီး နိုင်ငံတော်အဆင့်၊ ပြည်နယ်အဆင့် စုံစမ်းစစ်ဆေးနေဆဲဖြစ်ကြောင်း ရခိုင်ပြည်နယ်ရဲတပ်ဖွဲ့မှူး ပြောကြား

မြောက်ဦးအဓိကရုဏ်းနှင့် ပတ်သက်ပြီး နိုင်ငံတော်အဆင့်၊ ပြည်နယ်အဆင့် စုံစမ်းစစ်ဆေးနေဆဲဖြစ်ကြောင်း ရခိုင်ပြည်နယ်ရဲတပ်ဖွဲ့မှူး ရဲမှူးကြီးအောင်မြတ်မိုး၏ ပြောကြားချက်အရ သိရသည်။

မြောက်ဦးဖြစ်စဉ်နှင့်ပတ်သက်ပြီး စုံစမ်းစစ်ဆေးမှု အခြေအနေများကိုမေးမြန်းရာ ရခိုင်ပြည်နယ်ရဲတပ်ဖွဲ့မှူး ရဲမှူးကြီးအောင်မြတ်မိုးက “စုံစမ်းနေဆဲပဲဖြစ်ပါတယ်။ နိုင်ငံတော်အဆင့်ရော ပြည်နယ်အဆင့်ရော စုံစမ်းနေဆဲဖြစ်ပါတယ်။ သက်ဆိုင်ရာ တရားဥပဒေအတိုင်းလည်း ဆောင်ရွက်နေပါတယ်” ဟုပြောကြားသည်။

ဖေဖော်ဝါရီ ၁၄ ရက် နံနက်က ရခိုင်ပြည်နယ် ရဲတပ်ဖွဲ့တွင်ပြုလုပ်သော နိုင်ငံတော်လုံခြုံရေးအဖွဲ့အစည်းများ၏ အသွင်သဏ္ဌာန်ပုံစံဖြင့် ယူနီဖောင်းများဝတ်ဆင်ခြင်းမပြုရန် အသိပေးရှင်းလင်းခြင်း အခမ်းအနားပြီးဆုံးချိန် မီဒီယာများ၏မေးမြန်းမှုကို ယခုကဲ့သို့ ပြန်လည်ဖြေကြားခဲ့ခြင်းဖြစ်သည်။

မြောက်ဦးအဓိကရုဏ်းနှင့် ပတ်သက်ပြီး ရဲတပ်ဖွဲ့က နှိမ်နင်းရာတွင် လုပ်ထုံးလုပ်နည်းနှင့် ညီညွတ်မှုရှိမရှိ စုံစမ်းစစ်ဆေးရေးလုပ်ငန်းကို ဇန်န၀ါရီ ၂၀ ရက်က စတင်ခဲ့ခြင်းဖြစ်ပြီး အဆိုပါစုံစမ်းစစ်ဆေးရေးအဖွဲ့တွင် မြန်မာနိုင်ငံရဲတပ်ဖွဲ့မှ ပြည်နယ်ဒုတိယရဲတပ်ဖွဲ့မှူးအဆင့်ရှိသူ တစ်ဦး၊ ဒုတိယရဲမှူးကြီးအဆင့်ရှိသူ တစ်ဦးနှင့် ရဲမှူးအဆင့်ရှိသူတစ်ဦးတို့ ပါဝင်ကြောင်းနှင့် အဓိကရုဏ်းနှိမ်နင်းသည့်အခါ ဥပဒေနှင့်ညီညွတ်မှု ရှိ မရှိ သက်သေသာဓကစုံလင်စွာဖြင့် စစ်ဆေးသွားမည်ဖြစ်ပြီး စုံစမ်းစစ်ဆေးရေးအဖွဲ့ဖြင့် စစ်ဆေးပေါ်ပေါက်ချက်အရ တရားနည်းလမ်းတကျ ဆက်လက်ဆောင်ရွက်သွားရန်ရှိကြောင်း သိရသည်။

မြောက်ဦးဖြစ်စဉ်နှင့်ပတ်သက်ပြီး ရဲတပ်ဖွဲ့ဝင်များ၏ ဆောင်ရွက်ချက်များသည် လုပ်ထုံးလုပ်နည်းနှင့် ညီညွတ်မှု ရှိ မရှိ စုံစမ်းစစ်ဆေးရေးခုံရုံး ဖွဲ့စည်းဆောင်ရွက်သွားမည်ဖြစ်ကြောင်း သတင်းထုတ်ပြန်ထားသည်။

မြောက်ဦးအဓိကရုဏ်းနှင့်ပတ်သက်၍ သီးခြားလွတ်လပ်သည့် စုံစမ်းစစ်ဆေးရေး အဖွဲ့တစ်ရပ်ဖွဲ့စည်းကာ ဖြစ်စဉ်တစ်ရပ်လုံးတွင် ပါဝင်ပတ်သက်ခဲ့ကြသည့် အာဏာပိုင်အဖွဲ့များ၏ လုပ်ရပ်များသည် ဥပဒေနှင့် ညီ မညီ စစ်ဆေးဖော်ထုတ်ပြီး တာဝန်ရှိသူများအား အရေးယူပေးရန် ALD ပါတီက ကြေညာချက်ထုတ်ပြန် တိုက်တွန်းထားသည်။

အလားတူ မြောက်ဦးအကြမ်းဖက်မှုနှင့်ပတ်သက်၍ အစိုးရမဟုတ်သော ပြင်ပပုဂ္ဂိုလ်များဖြင့် စုံစမ်းရေးကော်မရှင်ဖွဲ့စည်းရန် စစ်တွေမြို့နယ် လူမှုအဖွဲ့အစည်းများ ကိုယ်စားပြုကော်မတီက ကြေညာချက်ထုတ်ပြန် တောင်းဆိုခဲ့သည်။

ဇန်န၀ါရီ ၁၆ ရက်က မြောက်ဦးမြို့တွင် ဖြစ်ပွားခဲ့သည့် အဓိကရုဏ်းကြောင့် ပြည်သူခုနစ်ဦးသေဆုံးပြီး ၁၂ ဦးအထိ ဒဏ်ရာရရှိခဲ့သည်။ ရခိုင်ပြည်နယ်လွှတ်တော်မှ ဖွဲ့စည်းသော မြောက်ဦးဖြစ်စဉ်နှင့်ပတ်သက်ပြီး စုံစမ်းစစ်ဆေးရေးအဖွဲ့ကို ဇန်န၀ါရီ ၂၉ ရက်တွင် လွှတ်တော်မှ အတည်ပြုခဲ့ကြောင်း သိရသည်။ သို့ရာတွင် လွှတ်တော်က အတည်ပြုထားသော စုံစမ်းစစ်ဆေးရေးအဖွဲ့သည် ကွင်းဆင်းစစ်ဆေးမှုများ မဆောင်ရွက်ရသေးကြောင်း သိရသည်။

မြောက်ဦးမြို့နယ်အုပ်ချုပ်ရေးမှူးဟောင်း ဦးဘိုဘိုမင်းသိုက် အသတ်ခံရမှုနှင့်ပတ်သက်ပြီး ထွက်ပြေးနေသော သံသယတရားခံတစ်ဦး၏ တိန်ညိုကျေးရွာရှိနေအိမ် မီးလောင်

မီးလောင်နေသည့် သံသယတရားခံ၏ နေအိမ်အား တွေ့ရစဉ်

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက် အသတ်ခံရမှုနှင့် ပတ်သက်ပြီး ထွက်ပြေးနေသည့် သံသယတရားခံတစ်ဦး၏ တိန်ညိုကျေးရွာရှိ နေအိမ် မီးလောင်မှုဖြစ်ပွားခဲ့ကြောင်း တိန်ညိုကျေး ရွာအုပ်ချုပ်ရေးမှူး၏ ပြောကြားချက်အရ သိရသည်။

မီးလောင်မှုမှာ ဖေဖော်ဝါရီ ၅ ရက် နံနက် ၁ နာရီခန့်တွင် ဖြစ်ပွားခဲ့ခြင်းဖြစ်ပြီး မီးလောင်မှုကြောင့် နေအိမ်တစ်လုံးဆုံးရှုံးခဲ့ကြောင်း၊ မီးလောင်မှု ဖြစ်ပွားသည့်အချိန်တွင် နေအိမ်၌ တစ်ယောက်မျှမရှိကြောင်း၊ မီးလောင်မှုဖြစ်ပွားရသည့်အကြောင်းနှင့် ပတ်သက်ပြီး စစ်ဆေးလျက်ရှိကြောင်း သိရသည်။

မီးလောင်မှုဖြစ်ပွားသည့်နေအိမ်မှာ မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက် အသတ်ခံရမှုတွင် ပါဝင်သူတစ်ဦးဖြစ်သည်ဟု ရဲတပ်ဖွဲ့မှ ယူဆထားသည့် ဦးကျော်နိုင်ဆိုသူ၏ နေအိမ်ဖြစ်ကြောင်း သိရသည်။

“ဦးကျော်မြင့်ရဲ့ ထွက်ဆိုချက်အရ ဦးကျော်မြင့်၏အစ်ကို သိန်းထွန်း၊ သူ့ညီလင်မယားတို့ကို မေးမြန်းစရာရှိလို့ ခေါ်ဖို့ဆိုပြီး ကျွန်တော်အပါအ၀င် ဦးကျော်နိုင်ကိုခေါ်ဖို့ သွားတော့ အိမ်မှာမရှိဘူး။ ခရီးလွန်နေတယ် လို့ပြောတယ်။ အဲဒါနဲ့တစ်ဆက်တည်း ဦးကျော်နိုင်အိမ်က နံနက် ၁ နာရီလောက်မှာ မီးလောင်တာဖြစ်ပါတယ်။ အိမ်ရှေ့မှာ စားသောက်ဆိုင်ပုံစံမျိုးလည်းတွဲထားတယ်။ ဆုံးရှုံးမှုတန်ဖိုးက သိန်း ၅၀ လောက်ရှိတယ်လို့ မီးသတ်ဌာနကတော့ပြောသွားတယ်”ဟု ကျေးရွာအုပ်ချုပ်ရေးမှူး ဦးကျော်မိုးက ဆိုသည်။

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက် အသတ်ခံရမှုနှင့် ပတ်သက်ပြီး ရန်ကုန်မြို့၌ ဖမ်းဆီးခံခဲ့ရသည့် ဦးကျော်မြင့်၏ ထွက်ဆိုချက်အရ တိန်ညို ကျေးရွာတွင်နေထိုင်သူအချို့အား စစ်ဆေးလျက်ရှိကြောင်းသိရပြီး လက်ရှိတွင် တိန်ညို ရွာသားသုံးဦးအား ဖမ်းဆီးထားကြောင်း ကျေးရွာအုပ်ချုပ်ရေးမှူးက ဆက်လက်ပြောကြားသည်။

“ဦးကျော်မြင့်၊ ဦးအေးကျော်ထွန်းနဲ့ ဦးဘလှိုင်တို့သုံးဦးကို ဦးကျော်မြင့်ထွက်ဆိုချက်မှာပါရှိတဲ့အတွက် ခေါ်ယူစစ်ဆေးပြီးနောက်မှာ ဖမ်းဆီးလိုက်တာဖြစ်ပါတယ်။ ပုဒ်မကတော့ ၁၇ (၁) လို့ပြောပါတယ်။ နောက်ပြီး ဦးဝင်းဇော်နဲ့ ဇနီးကိုလည်း ခေါ်ယူ စစ်ဆေးနေပါတယ်”ဟု ဦးကျော်မိုးဦးက ပြောကြားသည်။

လက်ရှိတွင် ဦးဘိုဘိုမင်းသိုက်အသတ်ခံရမှုနှင့် ပတ်သက်ပြီး ရန်ကုန်မြို့တွင် လေးဦး၊ မြောက်ဦးမြို့ တိန်ညိုကျေးရွာတွင် နေထိုင်သူ သုံးဦး ဖမ်းဆီးခံထားရပြီး ဦးကျော်မြင့်၏ ထွက်ဆိုချက်များအရ ရဲတပ်ဖွဲ့က ခေါ်ယူစစ်ဆေးမှုများ ပြုလုပ်လျက်ရှိကြောင်း သိရသည်။

ဖေဖော်ဝါရီ ၃ ရက်နှင့် ၄ ရက်ကလည်း တိန်ညိုကျေးရွာတွင် သေနတ်များရှိသည်ဆိုသည့် သတင်းကြောင့် ရဲတပ်ဖွဲ့က အင်အားအများအပြားဖြင့် တိန်ညိုကျေးရွာရှိ နေအိမ်အချို့အား ၀င်ရောက်စစ်ဆေးခဲ့ပြီး တိန်ညိုကျေးရွာချောင်းအတွင်း ရှာဖွေမှုများ ပြုလုပ်ခဲ့သည်။

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်မှာ ဇန်န၀ါရီ ၃၀ ရက် ညနေ ၄ နာရီခွဲခန့်တွင် မြောက်ဦး- စစ်တွေကားလမ်းပေါ်ရှိ  ကျောက်တော်နှင့် ပုဏ္ဏားကျွန်းအကြား သရက်ချိုကျေးရွာအနီးတွင် လုပ်ကြံသတ်ဖြတ်ခံရခြင်းဖြစ်သည်။

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်မှာ မြောက်ဦး ပဋိပက္ခဖြစ်စဉ်ပြီးနောက် သုံးရက်အကြာ ဇန်န၀ါရီ ၁၉ ရက်တွင် ရခိုင်ပြည်နယ်အစိုးရအဖွဲ့ရုံးသို့ လက်ထောက်ညွှန်ကြားရေးမှူးရာထူးဖြင့် ပြောင်းရွှေ့ခံထားရပြီးနောက် ယင်းကဲ့သို့ လုပ်ကြံခံခဲ့ရခြင်းဖြစ်သည်။

ဇန်န၀ါရီ ၁၆ ရက်က ဖြစ်ပွားခဲ့သော မြောက်ဦးပဋိပက္ခဖြစ်စဉ်အတွင်း ရဲတပ်ဖွဲ့က သေနတ်ဖြင့် ပစ်ခတ်နှိမ်နင်းမှုကြောင့် ဒေသခံ ခုနစ်ဦးသေဆုံးကာ ၁၂ ဦး ဒဏ်ရာရရှိခဲ့ပြီး ယင်းဖြစ်စဉ်နှင့်ပတ်သက်၍ ရခိုင်ပြည်နယ် လွှတ်တော်က သီးခြားစုံစမ်းရေးကော်မတီ တစ်ရပ်ဖွဲ့စည်းခြင်းကို ဇန်န၀ါရီ ၂၉ ရက်က မဲခွဲဆုံးဖြတ် အတည်ပြုခဲ့သည်။ ယင်းကဲ့သို့ ပြည်နယ်လွှတ်တော်မှ မြောက်ဦးဖြစ်စဉ်စုံစမ်းရေးအဖွဲ့ကို အတည်ပြုဖွဲ့စည်းပြီး တစ်ရက်အကြာတွင် မြောက်ဦးပဋိပက္ခဖြစ်ပွားစဉ်အတွင်း မြောက်ဦး အုပ်ချုပ်ရေးမှူး တာဝန်ယူခဲ့ သူ ဦးဘိုဘိုမင်းသိုက် လုပ်ကြံခံခဲ့ရခြင်းမှာ လူအများအကြား စိတ်ဝင်စားမှုမြင့်တက်လာစေခဲ့သည်။

ဦးဘိုဘိုမင်းသိုက် လုပ်ကြံသတ်ဖြတ်ခံရမှုက မြောက်ဦးပဋိပက္ခ အဖြေရှာရေးအပေါ် ရှုပ်ထွေးစေသလား

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်အား ဒဏ်ရာများနှင့် သေဆုံးနေသည်ကို ဇန်န၀ါရီ ၃၀ ရက်က တွေ့ရစဉ်

မြန်မာနိုင်ငံတွင် ပြည်တွင်းပြည်ပမှ လတ်တလော စိတ်ဝင်စားနေသည့် ရခိုင်ပြည်နယ်အရေးတွင် ဇန်န၀ါရီလကုန်ပိုင်းက စိတ်ဝင်စားဖွယ် သတင်းတစ်ပုဒ် ထွက်ပေါ်ခဲ့သည်။ ယင်းသတင်းမှာ ရခိုင်ပြည်နယ် အထွေထွေအုပ်ချုပ်ရေးမှူးရုံးတွင် လက်ထောက်ညွှန်ကြားရေးမှူး အဖြစ် တာဝန်ထမ်းဆောင်နေသည့် ဦးဘိုဘိုမင်းသိုက် လုပ်ကြံခံရခြင်း ဖြစ်သည်။ ရခိုင်ပြည်နယ်တွင် ယင်းကဲ့သို့ အုပ်ချုပ်ရေးပိုင်းမှ ရာထူးကြီး ရရှိထားသူတစ်ဦး လုပ်ကြံသတ်ဖြတ်ခံရခြင်းမှာ ပထမဆုံးအကြိမ်ဟု ဆိုနိုင်သည်။

ဘယ်နေရာမှာ အသတ်ခံရတာလဲ

လုပ်ကြံသတ်ဖြတ်ခံရသူ ဦးဘိုဘိုမင်းသိုက်မှာ ရခိုင်ပြည်နယ် ပုဏ္ဏားကျွန်းမြို့နယ် မြောက်ဘက် ခုနစ်မိုင်ခန့်အကွာ ယိုးငူကျေးရွာနှင့် အောင်ဖြူပင်ကျေးရွာကြား သရက်ချိုကျေးရွာအနီး ရန်ကုန်-စစ်တွေ ကားလမ်း မိုင်တိုင်အမှတ် ၁၆၉/၀ နှင့် ၁၆၉/၁ ကြား၌ သတ်ဖြတ်ခံခဲ့ခြင်း ဖြစ်သည်။

ရဲတပ်ဖွဲ့၏ အဆိုအရ ဇန်န၀ါရီ ၃၀ ရက် ညနေ ၆ နာရီခန့်က CRV ယာဉ်တစ်စီး လမ်းယာဘက်နံဘေး ရေကြောင်းအတွင်း ကျောက်တော်ဘက်မှ ပုဏ္ဏားကျွန်းမြို့ဘက်သို့ ဦးတည်လျက် တိမ်းစောင်းနေပြီး ယာဉ်အောက်၌ အမျိုးသားတစ်ဦး ပိမိသေဆုံးနေကာ အနီးတွင် လက်ကိုင်ဖုန်း လေးလုံးနှင့် ငွေ၊ ပစ္စည်းအချို့ကို တွေ့ရှိခဲ့ရကြောင်း၊ သေဆုံးနေသည့် အမျိုးသားမှာ ရခိုင်ပြည်နယ် အထွေထွေအုပ်ချုပ်ရေးမှူးရုံးတွင် လက်ထောက်ညွှန်ကြားရေးမှူးအဖြစ် တာဝန်ထမ်းဆောင်နေသူ ဦးဘိုဘိုမင်းသိုက်ဖြစ်ကြောင်း၊ ၎င်းတွင် ရင်ညွန့်ထိုးသွင်းဒဏ်ရာ တစ်ချက်၊ ၀ဲယာနို့အုံအောက်ထိုးသွင်းဒဏ်ရာ တစ်ချက်စီ၊ ၀ဲယာလက်ပြင်ထိုးသွင်းဒဏ်ရာ ၁၂ ချက်နှင့် ၀ဲမျက်ခုံးပြတ်ရှဒဏ်ရာတစ်ချက် တွေ့ရှိရကြောင်း ထုတ်ပြန်ခဲ့သည်။

၎င်းတို့လိုက်ပါလာသောယာဉ်ကို ပတ်ဝန်းကျင်မှ တွေ့ရှိသောအချိန်တွင် တိမ်းမှောက်နေကြောင်း သိရသော်လည်း ဦးဘိုဘိုမင်းသိုက်မှာ ထိုးသွင်းဒဏ်ရာများကြောင့် သေဆုံးခဲ့ခြင်းဖြစ်ကြောင်း သိရသည်။ ဦးဘိုဘိုမင်းသိုက်မှာ မြောက်ဦးမြို့ ဖြစ်စဉ်နှင့်ပတ်သက်၍ စစ်ဆေးမှုခံယူရန် ဇန်န၀ါရီ ၂၅ ရက်တွင် စစ်တွေမြို့မှ မြောက်ဦးမြို့သို့ ပြန်လည်ရောက်ရှိပြီး စစ်ဆေးခံခဲ့ကာ ဇန်န၀ါ ရီ ၃၀ ရက်တွင် စစ်ဆေးခံမှုပြီးစီး၍ မွန်းလွဲ ၂ နာရီတွင် စစ်တွေမြို့သို့ ပြန်ရန် CRV မော်တော်ယာဉ်ဖြင့် ပြန်လည်ထွက်ခွာသွားကြောင်း၊ အဆိုပါ မော်တော်ယာဉ်မှာ တိမ်ညိုကျေးရွာ အုပ်ချုပ်ရေးမှူးဟောင်း ဦးကျော်မြင့် (၄၈ နှစ်) ပိုင် လိုင်စင်မဲ့ယာဉ်ဖြစ်ပြီး ဦးဘိုဘိုမင်းသိုက်နှင့် အတူ ဦးကျော်မြင့်၏သားနှင့် အခြားလူငယ်တစ်ဦး လိုက်ပါသွားကြောင်း၊ ဖြစ်စဉ်ဖြစ်ပွားပြီးနောက် ဦးကျော်မြင့်၏ သားအပါအ၀င် လူငယ်နှစ်ဦးမှာ ပျောက်ဆုံးနေကြောင်း၊ မျက်မြင်သက်သေအချို့၏ ပြောပြချက်အရ မော်တော်ယာဉ်ပေါ်တွင် ဦးဘိုဘိုမင်းသိုက်ပါ လေးဦးပါရှိပြီး ဦးဘိုဘိုမင်းသိုက်မှာ ကားမှောက်၍ ပိမိသေဆုံးကာ ကျန်သုံးဦးမှာ ကားလမ်းအနောက်ဘက်ရှိ တောင်ပေါ်သို့ တက်ပြေးသွားကြောင်း ရဲတပ်ဖွဲ့က ထုတ်ပြန်ခဲ့သည်။

ည ၇ နာရီ ၁၅ မိနစ်ခန့်တွင် မြို့နယ်ရဲတပ်ဖွဲ့မှူးနှင့်အဖွဲ့က အလောင်းအား ပုဏ္ဏားကျွန်းမြို့နယ် ဆေးရုံကြီးသို့ သွားရောက်ပို့ဆောင်နေစဉ် ကျန်ရှိခဲ့သည့် မော်တော်ယာဉ်မှာ ထပ်မံမီးလောင်သဖြင့် ပုဏ္ဏားကျွန်းမြို့နယ် မီးသတ်တပ်ဖွဲ့က သွားရောက်ငြှိမ်းသတ်ခဲ့ရပြီး မျက်မြင်သက်သေများ၏ အဆိုအရ ရဲတပ်ဖွဲ့က အလောင်းအား ဆေးရုံသို့ ပို့ဆောင်စဉ် မော်တော်ယာဉ်ကို လူနှစ်ဦးက မီးလာရှို့ခဲ့ခြင်းဖြစ်ကြောင်း သိရသည်။ လူသတ်မှုဟု သတ်မှတ်ထားသည့် ဖြစ်စဉ်တစ်ခုတွင် သက်သေခံပစ္စည်းဖြစ်သည့် မော်တော်ယာဉ် မီးရှို့ဖျက်ဆီးခံရခြင်းမှာ ရဲတပ်ဖွဲ့ဝင်များနှင့် ရခိုင်ပြည်နယ် အစိုးရအား အများစုက ဝေဖန်ခဲ့ကြပြီး မြန်မာနိုင်ငံ၏ တရားဥပဒေစိုးမိုးရေးမှာ မေးခွန်းထုတ်စရာ အခြေအနေ ဖြစ်ပေါ်ခဲ့သည်။

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်မှာ မြောက်ဦးပဋ္ဋိပက္ခဖြစ်စဉ်ပြီးနောက် သုံးရက်အကြာ ဇန်န၀ါရီ ၁၉ ရက်တွင် ရခိုင်ပြည်နယ်အစိုးရအဖွဲ့ရုံးသို့ လက်ထောက်ညွှန်ကြားရေးမှူး ရာထူးဖြင့် ပြောင်းရွှေ့ခံထားရပြီးနောက် ယင်းကဲ့သို့ လုပ်ကြံခံခဲ့ရခြင်း ဖြစ်သည်။

ဦးဘိုဘိုမင်းသိုက်မှာ မြောက်ဦးပဋိပက္ခဖြစ်စဉ် ဖြစ်ပွားချိန်တွင် မြို့နယ်အုပ်ချုပ်ရေးမှူး တာဝန်ထမ်းဆောင်နေသူလည်းဖြစ်ရာ ယခုကဲ့သို့ လုပ်ကြံခံခဲ့ရမှုမှာ မြောက်ဦးအရေးနှင့်ပတ်သက်ပြီး ပိုမိုစိတ်ဝင်စားဖွယ် ဖြစ်စေခဲ့သည်။

တရားခံတွေက ဘယ်သူလဲ

အသတ်ခံရသည့် မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်မှာ မြောက်ဦးပဋိပက္ခနှင့် ပတ်သက်ပြီး စစ်ဆေးခံရသူများတွင် တစ်ဦးအပါအ၀င်ဖြစ်ပြီး မြောက်ဦးမြို့တွင် စစ်ဆေးမှုခံယူအပြီး အပြန်တွင် ယင်းကဲ့သို့ အသတ်ခံရခြင်းဖြစ်သည်။

ထိုသို့အသတ်ခံရအပြီး တစ်ရက်အကြာ ဇန်န၀ါရီ ၃၁ ရက်တွင် လူသတ်မှုတွင် ပါဝင်သည်ဟု သံသယဖြစ်ဖွယ် လူအချို့အား ဖမ်းဆီးရမိခဲ့ကြောင်း ရဲတပ်ဖွဲ့က ထုတ်ပြန်ခဲ့သည်။ ယင်းသံသယတရားခံများမှာ စုစုပေါင်းလေးဦးဟု ထုတ်ပြန်ခဲ့ပြီး ၎င်းတို့အား ရန်ကုန်မြို့ မြို့နယ်နှစ်ခုတွင် ဖမ်းဆီးရမိခဲ့ခြင်းဖြစ်ကြောင်း သိရသည်။

တရားခံဟု ယူဆရသူများမှာ တိမ်ညိုကျေးရွာအုပ်ချုပ်ရေးမှူးဟောင်း ဦးကျော်မြင့်(ခ) ခိုင်ကျော်၊ ၎င်း၏ဇနီး ဒေါ်ကြည်ကြည်ဝင်း (၄၇ နှစ်)၊ ၎င်း၏ သားကြီးဖြစ်သူ မင်းသန်းဌေး (ခ) မင်းသန်းထိုက် (၂၀ နှစ်)၊ မင်းသန်းဌေး၏ဇနီး မခိုင်ဇာလှိုင် (၂၀ နှစ်) တို့ဖြစ်ကြောင်း ရဲတပ်ဖွဲ့က ထုတ်ပြန်ခဲ့သည်။

မင်းသန်းဌေးအား ရန်ကုန်တိုင်းဒေသကြီး မရမ်းကုန်းမြို့နယ် ရှစ်မိုင်မီးပွိုင့်အနီးတွင် ဇန်န၀ါရီ ၃၁ ရက် မွန်းတည့် ၁၂ နာရီခန့်တွင် ဖမ်းဆီးရမိခဲ့ပြီး ကျန်သုံးဦးအား သန်လျင်မြို့နယ် လက်ယက်စမ်းကျေးရွာ အုပ်စုကွက်သစ် (၃) နယ်မြေ မေတ္တာဂုဏ်ရောင် သီလရှင်ကျောင်းတွင် ည ၇ နာရီ ၄၅ မိနစ်တွင် ဖမ်းဆီးရမိခဲ့ခြင်းဖြစ်ကြောင်း ရဲတပ်ဖွဲ့က ထုတ်ပြန်ခဲ့ပြီး ယာဉ်နှစ်စီး၊ ကျပ်သိန်း ၇၅၀ ကို သိမ်းဆည်းရမိခဲ့ကြောင်း သိရသည်။

ရန်ကုန်မြို့ရှိ မြို့နယ်နှစ်ခုတွင် ဖမ်းဆီးရမိခဲ့သည့် တရားခံဟု ယူဆရသူများမှာ တိမ်ညိုကျေးရွာတွင် နေထိုင်သူများဖြစ်သည်ဟု သိရပြီး တိမ်ညိုကျေးရွာမှာ စံပြကျေးရွာတစ်ရွာဖြစ်ပြီး အိမ်ခြေ ၈၅၂ အိမ်၊ အိမ်ထောင်စု ၉၅၂ စု၊ စုစုပေါင်းလူဦးရေ ၃၈၁၄ ဦး နေထိုင်သည့် ရွာကြီးတစ်ရွာဖြစ်သည်။

ဖမ်းဆီးရမိသူများအနက် ဦးကျော်မြင့်မှာ တိမ်ညိုကျေးရွာ အုပ်ချုပ်ရေးမှူးဟောင်းဖြစ်ပြီး အခင်းဖြစ်နေ့က တိမ်ညိုကျေးရွာတွင် နေထိုင်ခြင်းမရှိကြောင်း၊ ထို့ပြင် တိမ်ညိုကျေးရွာရှိ ဦးကျော်မြင့်ပိုင် နေအိမ်ကို ချိပ်ပိတ်ထားကြောင်း လက်ရှိတိမ်ညိုကျေးရွာ၏ အုပ်ချုပ်ရေးမှူးက ဖေဖော်ဝါရီ ၁ ရက်က ပြောကြားသည်။

သို့သော် လက်ရှိအချိန်တွင် တိမ်ညိုကျေးရွာ တာဝန်ရှိသူများနှင့် ဆက်သွယ်မရသေးကြောင်း ရခိုင်ပြည်နယ် လွှတ်တော်ကိုယ်စားလှယ် ဦးထွန်းအောင်စိန်က ပြောကြားသည်။

“မနေ့ကအထိရတယ်။ အခုထိတော့ သတင်းမရသေးဘူး။ ကျွန်တော်က စစ်တွေလွှတ်တော်ရုံးမှာ ရောက်နေတော့ နယ်မြေသတင်းတွေကို သူတို့ဆီက ယူနေရတာ။ ဒီမနက် (ဖေဖော်ဝါရီ ၃ ရက်) တော့ ဖုန်းတွေဆက်တာ ဆက်လို့မရသေးဘူး။ တချို့ဖုန်းတွေက စက်ပိတ်ထားတယ်” ဟု ဦးထွန်းအောင်စိန်က ပြောကြားသည်။

တရားခံဟု ယူဆရသူများ နေထိုင်သည့် တိမ်ညိုကျေးရွာဈေးအနီးရှိ ချောင်းတွင် သေနတ်များ လွှင့်ပစ်ထားသည်ဟုဆိုကာ သက်ဆိုင်ရာရဲတပ်ဖွဲ့က ဖေဖော်ဝါရီ ၃ ရက်တွင် လာရောက်စစ်ဆေး ရှာဖွေမှုများ ပြုလုပ်ခဲ့သည်။

ဦးကျော်မြင့်၏ သမီးကြီးဖြစ်သူ ဒေါ်တင်တင်မြင့်က ဦးဘိုဘိုမင်းသိုက်ကိုလည်း သိရှိခြင်းမရှိကြောင်း၊ ဦးဘိုဘိုမင်းသိုက် အသတ်ခံရစဉ်က စီးနင်းလာသည့် ဟွန်ဒါ CRV အမျိုးအစားယာဉ်မှာ ဦးကျော်မြင့်ထံတွင် မရှိကြောင်း၊ ၎င်း၏ ယောက်ျားဖြစ်သူကိုလည်း စစ်ဆေးရန်အတွက်ဟုဆိုကာ ခေါ်ဆောင်သွားကြောင်း သိရသည်။

ဒေါ်တင်တင်မြင့်က “လက်ရှိ ကျေးရွာအုပ်ချုပ်ရေးမှူးဟောင်းနဲ့ ကျွန်မအိမ်ရှင် ဦးဝင်းဇော် အပါအ၀င် ခြောက်ယောက်ကို မနေ့က မနက် ၈ နာရီလောက်တည်းက မေးမြန်းစရာရှိတယ်ဆိုပြီး ခေါ်သွားတယ်။ အခု ညနေ ငါးနာရီခွဲအထိ ပြန်မရောက်ကြသေးဘူး။ ဖုန်းဆက်တော့ ကိစ္စမပြီးသေးဘူးလို့သာပြောတယ်။ လာလို့မရဘူးလို့သာ ပြောတယ်။ လောလောဆယ် ဖမ်းထားတာတော့ မဟုတ်ဘူးလို့ သိရတယ်။ ဒါပေမဲ့ ဖမ်းမလား မဖမ်းဘူးလားဆိုတာမျိုးတော့ မသိဘူး” ဟု ပြောကြားသည်။

ထိုသို့ ဖမ်းဆီးရမိသူများအား ရန်ကုန်တိုင်းဒေသကြီးရှိ သက်ဆိုင်ရာ မြို့နယ်များတွင် ဖေဖော်ဝါရီ ၁ ရက်က ရုံးထုတ်ခဲ့ပြီး ခရီးသွားရမန်ယူကာ ရခိုင်ပြည်နယ်သို့ လွှဲပြောင်းခဲ့သည်။ သို့သော် လက်ရှိအချိန်အထိ မိသားစုဝင်များအား ဆက်သွယ်မရသေးကြောင်း၊ ရန်ကုန်တွင် ဖမ်းဆီးထားသလား၊ ရခိုင်ပြည်နယ်သို့ လွှဲပြောင်းထားသလားဆိုသည်ကို မသိရှိသေးကြောင်း ဒေါ်တင်တင်မြင့်က ဆက်လက်ပြောကြားသည်။

ရခိုင်ပြည်နယ် မြောက်ဦးမြို့ တိမ်ညိုကျေးရွာတွင်မူ ရဲတပ်ဖွဲ့ဝင်များက အခြားသောနေအိမ်များကို ၀င်ရောက်ရှာဖွေခြင်းများလည်း ပြုလုပ်လျက်ရှိပြီး ယင်းကဲ့သို့ရှာဖွေမှုများကြောင့် ဒေသခံများ ထိတ်လန့်လျက်ရှိကြောင်း တိမ်ညိုကျေးရွာတွင် နေထိုင်သည့် အမည်မဖော်လိုသူ ဒေသခံတစ်ဦးက ဖေဖော်ဝါရီ ၃ ရက် ညနေက ပြောကြားထားသည်။

ရခိုင်ပြည်နယ်လွှတ်တော်က ဖွဲ့စည်းခဲ့တဲ့ မြောက်ဦးပဋိပက္ခဖြစ်စဉ် စုံစမ်းရေးအပေါ် ရိုက်ခတ်မှုတွေ ရှိလာနိုင်လား

ဇန်န၀ါရီ ၁၆ ရက်က ရခိုင်ပြည်နယ် မြောက်ဦးမြို့ နန်းရာကုန်းတွင်၂၃၃ နှစ်မြောက် ရခိုင့်အချုပ်အခြာအာဏာကျရှုံးခြင်း ၀မ်းနည်းအောက်မေ့ဖွယ် အခမ်းအနား ပြုလုပ်မည့် အစီအစဉ်ကို အာဏာပိုင်များက တားမြစ်ပိတ်ပင်မှုအပေါ် ကျင်းပခွင့်ရရှိရေး မြို့လူထုက ဆန္ဒထုတ်ဖော်ရာတွင် အာဏာပိုင်များက သေနတ်ဖြင့် ပစ်ခတ်မှုကြောင့် ခုနစ်ဦး သေဆုံးခဲ့ပြီး ဒဏ်ရာရရှိသူ ၁၂ ဦး ရရှိခဲ့သည်။

ယင်းဖြစ်စဉ်နှင့် ပတ်သက်ပြီး ဇန်န၀ါရီ ၂၉ ရက်တွင် ရခိုင်ပြည်နယ် လွှတ်တော်က စုံစမ်းစစ်ဆေးရေးအဖွဲ့တစ်ဖွဲ့ ဖွဲ့စည်းခဲ့သည်။၂၀၁၈ ခုနှစ် ဖွဲ့စည်းပုံအခြေခံဥပဒေပုဒ်မ ၁၆၇ တိုင်းဒေသကြီးသို့မဟုတ် ပြည်နယ်လွှတ်တော်ဆိုင်ရာဥပဒေ ပုဒ်မ၂၄၊ ၂၅ နှင့် ရခိုင်ပြည်နယ်လွှတ်တော်ဆိုင်ရာ နည်းဥပဒေ ၆၂၊ နည်းဥပဒေခွဲ (က)၊ (ခ) တို့အရ မြောက်ဦးမြို့ဖြစ်စဉ် စုံစမ်းစစ်ဆေးရေးအဖွဲ့ကို အဖွဲ့ဝင်ကိုးဦးဖြင့် ဖွဲ့စည်းခဲ့ခြင်းဖြစ်သည်။

ယင်းအဖွဲ့တွင် ပြည်နယ်လွှတ်တော် ကိုယ်စားလှယ်များဖြင့် ဖွဲ့စည်းထားခြင်းဖြစ်ပြီး စုံစမ်းစစ်ဆေးရာတွင် ဌာနဆိုင်ရာ အဖွဲ့အစည်းများ၊ ပြည်နယ်အဆင့် အဖွဲ့အစည်းများနှင့် မျက်မြင်သက်သေများကိုပါ စုံစမ်းစစ်ဆေးပြီး မှန်ကန်သည့် အချက်အလက်များ ဖော်ထုတ်မည်ဖြစ်သည်။

တွေ့ရှိချက်များကိုလည်း ကျောသားရင်သား ခွဲခြားခြင်းမပြုဘဲ အဖြစ်မှန်အတိုင်း ဖော်ထုတ်ရမည်ဟု ရခိုင်ပြည်နယ် လွှတ်တော်ဥက္ကဋ္ဌက အဆိုပါအဖွဲ့ စတင်ဖွဲ့စည်းသည့်နေ့တွင် လွှတ်တော်အတွင်း ထုတ်ဖော် ပြောကြားခဲ့သည်။

“မြောက်ဦးမြို့ကိစ္စနဲ့ ပတ်သက်လို့ တာဝန်ပေးအပ်ခြင်းခံရတဲ့ စုံစမ်း စစ်ဆေးရေးအဖွဲ့ကို မှာကြားချင်တာက တာဝန်ဝတ္တရားတွေကို လိုက်နာပါ။ လုပ်ပိုင်ခွင့်အတိုင်း တိကျစွာ ဆောင်ရွက်ပါ။ ဘယ်သူ့မျက်နှာကိုမှ မထောက်နဲ့။ အမှန်တရားဘက်က ရပ်တည်ဆောင်ရွက်ပါ။ လွှတ်တော်ရဲ့ အသံဟာ ပြည်သူရဲ့အသံဖြစ်ပါစေ” ဟု ရခိုင်ပြည်နယ်လွှတ်တော်ဥက္ကဋ္ဌ ဦးစံကျော်လှက ပြောကြားသည်။

ထိုသို့ ဖွဲ့စည်းပြီးတစ်ရက်အကြာတွင် မြောက်ဦးမြို့ အုပ်ချုပ်ရေးမှူးဟောင်း ဦးဘိုဘိုမင်းသိုက် သတ်ဖြတ်ခံခဲ့ရခြင်းဖြစ်သဖြင့် လူအများအကြားတွင် စိတ်ဝင်စားမှု မြင့်တက်လာခဲ့သည်။ ထို့အတူ လွှတ်တော်မှ ဖွဲ့စည်းခဲ့သည့် မြောက်ဦးမြို့ဖြစ်စဉ် စုံစမ်းစစ်ဆေးရေးကော်မတီမှာ ဖေဖော်ဝါရီ ၂ ရက်တွင် မြေပြင်စစ်ဆေးမှုများ ပြုလုပ်မည်ဟု ကြေညာခဲ့သော်လည်း ဦးဘိုဘိုမင်းသိုက် အသတ်ခံရမှုကြောင့် ၎င်းတို့၏ မြေပြင်စစ်ဆေးရေး လုပ်ငန်းစဉ်များမှာ နောက်ဆုတ်ခဲ့ရသည်။

“မြေပြင်မှာ တော်တော်ရှုပ်နေတယ်။ အခုအမှုက။ နောက်ပြီး ကျွန်တော့်မဲဆန္ဒနယ်မှာလည်း အဲဒါနဲ့ပတ်သက်ပြီး ဖမ်းဆီးစစ်ဆေးတာတွေ ရှိနေတော့ ဘယ်လိုမှ စလို့မရဘူး။ လောလောဆယ်တော့ ဆိုင်းငံ့ထားရတာပေါ့။ အခြေအနေ ပြန်ငြိမ်သွားမှ မြေပြင်စစ်ဆေးရေးကို လုပ်ရမယ်” ဟု အဆိုပါ စစ်ဆေးစုံစမ်းရေး အဖွဲ့၏ အတွင်းရေးမှူး မြောက်ဦးမြို့နယ်မှ ပြည်နယ်လွှတ်တော်ကိုယ်စားလှယ် ဦးထွန်းသာစိန်က ပြောကြားသည်။

လက်ရှိတွင် စုံစမ်းစစ်ဆေးရေးအဖွဲ့ အနေဖြင့် ဥပဒေ၊ နည်းဥပဒေအတွင်းမှ တိကျသေချာစေရန် လေ့လာမှုများ ပြုလုပ်လျက်ရှိကြောင်း၊ စုံစမ်းစစ်ဆေးမည့် အသေးစိတ် အခြေအနေများကို ထုတ်ဖော်ပြောကြားမည် မဟုတ်ကြောင်း၊ တွေ့ရှိချက်များကို အများပြည်သူသိရှိရန် လွှတ်တော်တွင်း ချပြဆွေးနွေးမည်ဖြစ်ကြောင်း ဦးထွန်းသာစိန်က ပြောကြားသည်။

ဦးဘိုဘိုမင်းသိုက် အသတ်ခံရခြင်းကြောင့် မြောက်ဦးဖြစ်စဉ်နှင့် ပတ်သက်ပြီး အတိုင်းအတာတစ်ခုအထိ ထိခိုက်မှုရှိသော်လည်း ကျန်ရှိသူများကို ဆက်လက်စစ်ဆေး မေးမြန်းသွားမည်ဖြစ်ကြောင်း ၎င်းက ဆက်လက်ပြောကြားသည်။

“သူအသတ်ခံရတာကတော့ ကျွန်တော်တို့အတွက် မေးစရာ လူတစ်ယောက် လျော့သွားတယ်။ ဒါပေမဲ့ ကျန်တဲ့သူတွေကိုလည်း မေးလို့ရတယ်။ အနည်းအများ ထိခိုက်မှုတော့ ရှိတာပေါ့။ ဒုမြို့နယ်ဦးစီးမှူးတို့ဘာတို့ကို မေးရမှာပေါ့။ နောက်တစ်ခုက သေနတ်ဒဏ်ရာ ရထားတဲ့သူတွေရှိတယ်။ သူတို့ကို ဖမ်းထားတာဆိုတော့ သက်ဆိုင်ရာတွေရဲ့ ခွင့်ပြုချက် ယူရမှာပေါ့။ လိုအပ်ရင် စုံစမ်းရေးအဖွဲ့ အနေနဲ့ အမိန့်ကြော်ငြာစာတွေ ဘာတွေထုတ်ရမှာပေါ့။ ဖမ်းထားတဲ့သူတွေကိုလည်း သူတို့ခွင့်ပြုချက်အတိုင်း မေးရမှာပေါ့။ သေချာတာကတော့ မြေပြင်ကို မဖြစ်မနေ ဆင်းရမယ်” ဟု ဦးထွန်းသာစိန်က ပြောကြားသည်။

စုံစမ်းစစ်ဆေးရေးအဖွဲ့၏ လက်ရှိအခြေအနေများအရ မြေပြင်စစ်ဆေးမှုများကို စတင်နိုင်ခြင်း မရှိသော်လည်း အခြေအနေများ ပြန်လည်ငြိမ်သက်သွားပါက ကွင်းဆင်း စစ်ဆေးရမည်ဖြစ်ကြောင်း၊ ယင်း အချိန်ကာလကို ပြောကြားနိုင်ခြင်း မရှိသေးကြောင်း သိရသည်။

ဦးဘိုဘိုမင်းသိုက် အသတ်ခံရသည့်ဖြစ်စဉ်မှာ မြောက်ဦးမြို့ဖြစ်စဉ်နှင့် ဆက်စပ်နိုင်သလားဟု မေးမြန်းမှုအပေါ် ဦးထွန်းသာစိန်က “အဲဒါနဲ့ ပတ်သက်လို့ ဘာမှမှတ်ချက်မပေးချင်ပါဘူး” ဟု ပြောကြားသည်။

လက်ရှိတွင် မြောက်ဦးမြို့ဖြစ်စဉ်နှင့်ပတ်သက်၍ စုံစမ်းစစ်ဆေးမှုများ စတင်ရန် ခြေလှမ်းပြင်နေသည့် အချိန်တွင် မြောက်ဦးမြို့ အုပ်ချုပ်ရေးမှူးဟောင်း အသတ်ခံရသည့် ဖြစ်စဉ်မှာ များစွာသံသယဖြစ်ဖွယ်ရာ အချက်များရှိနေသည်မှာ မငြင်းသာပေ။ အသတ်ခံရသူမှာလည်း ပြည်ထဲရေးဝန်ကြီးဌာန လက်အောက်ရှိ အထွေထွေအုပ်ချုပ်ရေး ဦးစီးဌာနတွင် လက်ထောက်ညွှန်ကြားရေးမှူးအဖြစ် တာဝန်ထမ်းဆောင်လျက်ရှိသူတစ်ဦးလည်းဖြစ်သည်။ ထို့ပြင် ပြည်သူအများကလည်း တရားဥပဒေစိုးမိုးရေးနှင့် ပတ်သက်၍ မေးခွန်းထုတ်နေချိန်တွင် ဦးဘိုဘိုမင်းသိုက် အသတ်ခံရမှုမှာ ယိုယွင်းလျက်ရှိသော တရားဥပဒေ စိုးမိုးရေးအတွက် ပြုပြင်ပြောင်းလဲရေးများ လုပ်ဆောင်ရမည်ကို မီးမောင်းထိုးပြနေခြင်းလည်း ဖြစ်သည်။

ရခိုင်ပြည်နယ်တွင် ဆန္ဒထုတ်ဖော်သည့်လူများကို သေနတ်ဖြင့် ပစ်ခတ်မှုမှာ အမျိုးသားဒီမိုကရေစီ အဖွဲ့ချုပ် အစိုးရတာဝန်ယူထားသည့် လက်ထက်တွင် ပထမဆုံးအကြိမ်လည်း ဖြစ်ပြီး ယင်းဖြစ်စဉ်အား အမှန်တရား ပေါ်ပေါက်စေရန် ရခိုင်ပြည်နယ်လွှတ်တော်က ကြိုးပမ်းလာချိန်တွင်ဖြစ်စဉ်၏ အဓိကတာဝန်ရယူခဲ့သူတစ်ဦး အသတ်ခံရခြင်းမှာ မေးခွန်းထုတ်စရာများစွာ ဖြစ်နေပြီ ဖြစ်သည်။

နောက်ဆက်တွဲသတင်းများအရ မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက် လုပ်ကြံခံရမှုကြောင့် သေဆုံးခြင်းဖြစ်ကြောင်း သိရ

ရခိုင်ပြည်နယ် မြောက်ဦးတွင် ဇန်န၀ါရီ ၁၆ ရက်နေ့က ပဋ္ဋိပက္ခဖြစ်စဉ်ပြီးနောက်တွင် မြောက်ဦးမြို့နယ် အုပ်ချုပ်ရေးမှူးရာထူးမှ ရခိုင်ပြည်နယ်အစိုးရအဖွဲ့ရုံးသို့ ပြောင်းရွှေ့ခံထားရသူ ဦးဘိုဘိုမင်းသိုက် မြောက်ဦး-စစ်တွေကားလမ်းတွင် လုပ်ကြံခံခဲ့ရပြီး ဒဏ်ရာများဖြင့်သေဆုံးခဲ့ကြောင်း နောက်ဆက်တွဲသတင်းများအရ သိရသည်။ ဇန်န၀ါရီ ၃၀ ရက်ညနေ ၄ နာရီခွဲအချိန်ခန့်တွင် မြောက်ဦး-စစ်တွေ ကားလမ်းပေါ်ရှိ ကျောက်တော်နှင့် ပုဏ္ဏားကျွန်းအကြား သရက်ချိုကျေးရွာအနီးတွင် ဦးဘိုဘိုမင်းသိုက်ကို ၄င်းစီးနင်းလာသော မော်တော်ယာဉ်နှင့်အတူ ဒဏ်ရာများဖြင့် သေဆုံးနေသည်ကို တွေ့ရှိခဲ့ရခြင်းဖြစ်ကြောင်း သိရသည်။

မြောက်ဦးမြို့နယ် အုပ်ချုပ်ရေးမှူးဟောင်းဖြစ်သူ ဦးဘိုဘိုမင်းသိုက်မှာ မြောက်ဦးပဋ္ဋိပက္ခဖြစ်စဉ်ပြီးနောက် သုံးရက်အကြာ ဇန်န၀ါရီ ၁၉ ရက်နေ့တွင် ရခိုင်ပြည်နယ်အစိုးရအဖွဲ့ရုံးသို့ လက်ထောက်ညွှန်ကြားရေးမှူးရာထူးဖြင့် ပြောင်းရွှေ့ခံထားရပြီးနောက် ယင်းကဲ့သို့ လုပ်ကြံခံခဲ့ရခြင်းလည်းဖြစ်သည်။

ဦးဘိုဘိုမင်းသိုက်သည် မြောက်ဦးပဋ္ဋိပက္ခဖြစ်စဉ်ဖြစ်ပွားချိန်တွင် မြို့နယ်အုပ်ချုပ်ရေးမှူး တာဝန်ထမ်းဆောင်နေသူလည်းဖြစ်ရာ ယခုကဲ့သိုလုပ်ကြံခံခဲ့ရမှုမှာ မြောက်ဦးအရေးနှင့်ပတ်သက်ပြီး ပိုမိုစိတ်ဝင်စားဖွယ်ဖြစ်စေခဲ့သည်။ ဦးဘိုဘိုမင်းသိုက်နှင့်အတူ အခင်းမဖြစ်မီတွင် ယာဉ်ပေါ်တွင် အမျိုးသား ၃ ဦးလည်းအတူပါရှိခဲ့သည်ဟုသိရပြီး လုပ်ကြံပြီးချိန်တွင် ယင်းတို့မှာ ထွက်ပြေးလွတ်မြောက်သွားခဲ့ကြောင်း စုံစမ်းသိရှိရသည်။ ၄င်းတို့လိုက်ပါလာသောယာဉ်ကို ပတ်ဝန်းကျင်မှ တွေ့ရှိသောအချိန်တွင် တိမ်းမှောက်နေကြောင်းသိရသော်လည်း ဦးဘိုဘိုမင်းသိုက်မှာ ထိုးသွင်းဒဏ်ရာများကြောင့် သေဆုံးခဲ့ခြင်းဖြစ်ကြောင်း ကနဦးသတင်းများအရ သိရသည်။

ယင်းကိစ္စနှင့်ပတ်သက်ပြီး သက်ဆိုင်ရာရဲတပ်ဖွဲ့မှ ဇန်န၀ါရီ ၃၀ ရက်ညပိုင်းအထိ သီးခြားအတည်ပြုချက်မပေးနိုင်သော်လည်း ရခိုင်ပြည်နယ်အစိုးရအဖွဲ့၏ အတွင်းရေမှူး ဦးတင်မောင်ဆွေကမူ ဒေသတွင်းမီဒီယာတစ်ခု၏ မေးမြန်းမှုအပေါ်ဖြေကြားရာတွင် ဦးဘိုဘိုမင်းသိုက်မှာ လုပ်ကြံခံရခြင်းဖြစ်ကြောင်းနှင့် ကားပေါ်တွင်ပါလာသူသုံးဦးက လုပ်ကြံထွက်ပြေးသွားခဲ့ခြင်းဖြစ်သည်ဟု ပြောကြားထားခဲ့သည်။ “သေဆုံးသွားတာ မှန်ပါတယ်။ ဒီကနေ့ ညနေ ၅ နာရီခန့်မှာ ပုဏ္ဍားကျွန်းမြို့နယ် သရက်ချိုကျေးရွာအနီး ကားလမ်းပေါ်မှာ ကားနဲ့သွားနေတုန်း လုပ်ကြံခံရတာဖြစ်ပါတယ်။ ကားပေါ်မှာအတူပါလာတဲ့ လူသုံးဦးက လုပ်ကြံပြီး ထွက်ပြေးသွားတယ်လို့ သိရပါတယ်” ဟု ဦးတင်မောင်ဆွေက ပြောကြားထားကြောင်း နရဉ္စရာသတင်းဌာနတွင် ဖော်ပြထားချက်အရ သိရသည်။

ထို့အပြင် ဦးဘိုဘိုမင်းသိုက် လိုက်ပါစီးနင်းလာသော မော်တော်ယာဉ်မှာ ရဲတပ်ဖွဲ့နှင့် တာဝန်ရှိသူများ၏ မှုခင်းဖြစ်စဉ်အပေါ် စစ်ဆေးချက်များရယူအပြီး ပြန်သွားချိန်တွင် ည ၈ နာရီခန့်က မီးရှို့ဖျက်ဆီးခံခဲ့ရကြောင်းလည်း သိရသည်။ ဖြစ်စဉ်အနီးရှိ ယိုးငူကျေးရွာမှ အုပ်ချုပ်ရေးမှူးဖြစ်သူ ဦးအောင်သိန်းရွှေက “ကျွန်တော်ရောက်သွားတော့ မြို့နယ်အဆင့်တာဝန်ရှိသူတွေ ရဲတွေကလည်း စစ်ဆေးချက်တွေယူပြီး ပြန်သွားတယ်။ စစ်ဆေးချက်ယူတော့ ငွေထုတ်တစ်ထုတ်နဲ့ ဖုန်းတွေတွေ့တယ်လို့ပြောတယ်။ အလောင်းကိုလည်း ကားနဲ့သယ်သွားတယ်၊ ချောက်ထဲကျနေတဲ့ကားကို လမ်းမအနီးကို ဘတ်ဟိုးတစ်စီးနဲ့တင်ပြီးထားခဲ့တယ်။ ဆိုတော့ ကျွန်တော်ကလည်းပြန်လာခဲ့တယ်။ အဲဒီတော့ ည ၈ နာရီလောက်မှာ အဲဒီကားကို မီးရှို့ခံရပါတယ်။ ကျွန်တော်လိုက်သွားတော့ ကားကမီးလောင်ပြီး ကျွမ်းနေပြီ။” ဟု Eleven Media Group သို့ ဇန်န၀ါရီ ၃၀ ရက် ည ၁၁ နာရီခွဲခန့်တွင် ပြောကြားခဲ့သည်။ ထို့အပြင် အခင်းဖြစ်စဉ်အနီးတွင်ရှိနေသော ဒေသခံတစ်ဦးကလည်း ဦးဘိုဘိုမင်းသိုက်၏ ရုပ်အလောင်းကို သက်ဆိုင်ရာက သယ်ဆောင်သွားပြီးနောက် မိနစ် ၃၀ ခန့်အကြာတွင် မော်တော်ယာဉ်ကို လူနှစ်ဦးက လာရောက်မီးရှို့ဖျက်ဆီးသည်ဟု ကြားသိရပြီး ကိုယ်တိုင်သွားရောက်ကြည့်ရှုချိန်တွင် မော်တော်ယာဉ်မှာ မီးလောင်ကျွမ်းနေပြီဖြစ်ကြောင်း ပြောကြားခဲ့သည်။

ဇန်န၀ါရီ ၁၆ ရက်က ဖြစ်ပွားခဲ့သော မြောက်ဦးပဋ္ဋိပက္ခဖြစ်စဉ်အတွင်း ရဲတပ်ဖွဲ့၏သေနတ်ပစ်ခတ်နှိမ်နင်းမှုကြောင့် ဒေသခံ ၇ ဦးသေဆုံးခဲ့ကာ ၁၂ ဦးဒဏ်ရာရရှိခဲ့ပြီး ယင်းဖြစ်စဉ်နှင့်ပတ်သက် ရခိုင်ပြည်နယ်လွှတ်တော်မှ သီးခြားစုံစမ်းရေးကော်တီတစ်ရပ် ဖွဲ့စည်းခြင်းကို ဇန်န၀ါရီလ ၂၉ ရက်နေ့က မဲခွဲဆုံးဖြတ်အတည်ပြုခဲ့သည်။

ယင်းကဲ့သို့ ပြည်နယ်လွှတ်တော်မှ မြောက်ဦးဖြစ်စဉ်စုံစမ်းရေးအဖွဲ့ကို အတည်ပြုဖွဲ့စည်းပြီး တစ်ရက်အကြာတွင် မြောက်ဦးပဋ္ဋိပက္ခဖြစ်ပွားစဉ်အတွင်း မြောက်ဦးအုပ်ချုပ်ရေးမှူးတာဝန်ယူခဲ့သူ ဦးဘိုဘိုမင်းသိုက် လုပ်ကြံခံခဲ့ရခြင်းမှာ လူအများအကြား စိတ်ဝင်စားမှုမြင့်တက်လာစေခဲ့သည်။

မြောက်ဦးမြို့နယ် အုပ်ချုပ်ရေးမှူးအဖြစ် တာဝန်ထမ်းဆောင်ခဲ့သော ဦးဘိုဘိုမင်းသိုက် သေဆုံး

မြောက်ဦးမြို့နယ် အုပ်ချုပ်ရေးမှူးဟောင်း ဦးဘိုဘိုမင်းသိုက်အား တွေ့ရစဉ်

မြောက်ဦးမြို့နယ် အုပ်ချုပ်ရေးမှူးအဖြစ် တာဝန်ထမ်းဆောင်ခဲ့ရာမှ ဇန်န၀ါရီလ ၁၆ ရက်နေ့က ဖြစ်ပွားခဲ့သည့် မြောက်ဦးဖြစ်စဉ် နောက်ပိုင်း ရခိုင်ပြည်နယ် အထွေထွေအုပ်ချုပ်ရေးရုံးသို့ လက်ထောက်ညွှန်ကြားရေးမှူးအဖြစ် ပြောင်းရွှေ့တာဝန် ပေးအပ်ခြင်းခံရသည့် ဦးဘိုဘိုမင်းသိုက်သည် ဇန်န၀ါရီလ ၃၀ ရက်တွင် သေဆုံးသွားကြောင်း ပုဏ္ဏားကျွန်းမြို့နယ် ရဲတပ်ဖွဲ့မှူး၏ အတည်ပြု ပြောကြားချက်အရ သိရသည်။

“ဖြစ်စဉ်က ဟုတ်ပါတယ်။ ကားမှောက်တာပဲ သိတယ်။ ဘယ်လိုဘာကြောင့် ဖြစ်ရတာလဲဆိုတာ စုံစမ်းဆဲပါ။ သေဆုံးတာမှန်ပါတယ်” ဟု ပုဏ္ဏားကျွန်းမြို့နယ် ရဲတပ်ဖွဲ့မှူး ရဲမှူးဘစုက ပြောကြားသည်။

ဖြစ်စဉ်မှာ ဇန်န၀ါရီလ ၃၀ ရက်၊ ညနေ ၄ နာရီခန့်က ရန်ကုန်စစ်တွေ အဝေးပြေးလမ်းမ၊ မြောက်ဦး – စစ်တွေလမ်းပိုင်း၊ ပုဏ္ဏားကျွန်းနဲ့ ကျောက်တော်ကြား၊ မိုင်တိုင်အမှတ် ၁၆၉ – ၁၇၀ကြားရှိ ဇရက်လျှို ကျေးရွာအနီးတွင် ယာဉ်မတော်တဆမှုဖြစ်ပွားပြီး သေဆုံးခဲ့ခြင်းဖြစ်ကြောင်း ကနဦးသတင်းအရ သိရသည်။

ဦးဘိုဘိုမင်းသိုက် သေဆုံးရခြင်းကို အသေးစိတ် စုံစမ်းနေဆဲဖြစ်ပြီး ကားတိမ်းမှောက်သည်ကိုသာ လတ်တလော သိရှိရသေးကြောင်း သိရသည်။

 

 

မြောက်ဦး အဓိကရုဏ်း ဖြစ်စဉ်အား စစ်ဆေးရန် ရခိုင်ပြည်နယ်လွှတ်တော်မှ ဖွဲ့စည်းသည့် အဖွဲ့ဝင်ကိုးဦးပါ မြောက်ဦးဖြစ်စဉ် သီးခြားစုံစမ်းစစ်ဆေးရေး အဖွဲ့ကို မဲခွဲဆုံးဖြတ် အတည်ပြုခဲ့

မြောက်ဦးဖြစ်စဉ် သီးခြားစုံစမ်းစစ်ဆေးရေး အဖွဲ့ကို ရခိုင်ပြည်နယ်အတွင်း မဲခွဲဆုံးဖြတ် အတည်ပြုစဉ်

မြောက်ဦး အဓိကရုဏ်းဖြစ်စဉ်အား စစ်ဆေးရန် ရခိုင်ပြည်နယ်လွှတ်တော်မှ ဖွဲ့စည်းသည့် အဖွဲ့ဝင်ကိုးဦးပါ မြောက်ဦးဖြစ်စဉ် စုံစမ်းစစ်ဆေးရေးအဖွဲ့ကို ဇန်န၀ါရီ ၂၉ ရက်က မဲခွဲဆုံးဖြတ် အတည်ပြုခဲ့ကြောင်း သိရသည်။

ရခိုင်ပြည်နယ်လွှတ်တော် အရေးပေါ် အစည်းအဝေးကို ဇန်န၀ါရီ ၂၉ ရက်တွင်ပြုလုပ်ရာ ယင်းအစည်းအဝေးတွင် မြောက်ဦးဖြစ်စဉ်နှင့် ပတ်သက်ပြီး စုံစမ်းစစ်ဆေးရေးအဖွဲ့ ဖွဲ့စည်းထားပြီး ဖြစ်သဖြင့် ယင်းအဖွဲ့အား အတည်ပြု မပြုကို ဆွေးနွေးခဲ့ရာ လွှတ်တော်မှ အတည်ပြုခဲ့ခြင်းဖြစ်သည်။

ယင်းသို့ မြောက်ဦးမြို့ဖြစ်စဉ် စုံစမ်းစစ်ဆေးရေးအဖွဲ့ ဖွဲ့စည်းခြင်းနှင့် ပတ်သက်၍ ရခိုင်ပြည်နယ် လွှတ်တော်ဥက္ကဋ္ဌမှ ပြည်နယ်လွှတ်တော်၏ သဘောထားကိုရယူကာ ကန့်ကွက်သူရှိသည့်အတွက် မတ်တတ်ရပ် မဲခွဲဆုံးဖြတ်ခဲ့ရကြောင်း၊ မဲခွဲရာတွင် ထောက်ခံမဲ ၂၀ မဲ၊ ကန့်ကွက်မဲ ၁၆ မဲ၊ ကြားနေ လေးမဲဖြင့် အတည်ပြုနိုင်ခဲ့ခြင်း ဖြစ်ကြောင်း သိရသည်။ ကန့်ကွက်သူများမှာ တပ်မတော်သား လွှတ်တော် ကိုယ်စားလှယ်များနှင့် NLD ပါတီမှ လွှတ်တော်ကိုယ်စားလှယ် အများစုဖြစ်ကြောင်း သိရသည်။

“ဘာကြောင့် ကန့်ကွက်တာလဲ ဆိုတာကို တစ်ခုတည်းပြောတာနဲ့စာလို့ရှိရင် ဒီလွှတ်တော်ရဲ့ အခြေအနေမှာ ဒီမြောက်ဦးဖြစ်စဉ် စုံစမ်းစစ်ဆေးရေးအဖွဲ့ ဖွဲ့စည်းဖို့ အရေးပေါ် အစည်းအဝေး ခေါ်တာပေါ့နော်။ ခေါ်လိုက်တော့ တပ်မတော်သား ကိုယ်စားလှယ်တွေထဲက ပြည်နယ်လုံခြုံရေးနဲ့ နယ်စပ်ရေးရာ ၀န်ကြီးက ကန့်ကွက်တယ်လို့ ပြောခဲ့တဲ့အပေါ်မှာ ကျွန်တော်တို့က ထောက်ခံခဲ့တယ်။ ဒါပေမဲ့ ဒီလွှတ်တော်ပိုင်းမှာ ဘာအကြောင်းကြောင့် ကန့်ကွက်ရလဲ။ ဘာအကြောင်းကြောင့် ဖြစ်ရလဲ ဆိုတာကို ပြောခဲ့တာ မရှိကြဘူး။ ဘာဖြစ်လို့လဲဆိုတော့ ကျွန်တော်တို့ ပြည်နယ်အစိုးရအဖွဲ့၊ ပြည်နယ်လွှတ်တော်ရဲ့လုပ်ပိုင်ခွင့်က ဟုတ်လား၊ မဟုတ်လား။ ဒါကျတော့ ဖွဲ့စည်းပုံ အခြေခံဥပဒေနဲ့ သွားပြီးတော့ ပြဿနာ ရှိနေတာကိုး။ ပြည်ထောင်စုရဲ့ လုပ်ပိုင်ခွင့်လား၊ ပြည်နယ်ရဲ့ လုပ်ပိုင်ခွင့်လား။ အခုလိုဖြစ်သွားတဲ့ ကိစ္စတွေမှာ တကယ့်တကယ့်မှာဆိုရင် ပြည်ထောင်စု အစိုးရကနေပြီးတော့ စုံစမ်းစစ်ဆေးရေးကော်မရှင် ဖွဲ့မယ်။ မြောက်ဦးဖြစ်စဉ်နဲ့ ပတ်သက်ပြီး သမ္မတကဖွဲ့မယ်။ နိုင်ငံတော် အတိုင်ပင်ခံက ဖွဲ့မယ် စသဖြင့်ပေါ့နော်။ အဲဒီလို ပြည်ထောင်စုအဆင့်က ဖွဲ့ပြီးတော့ လုပ်ရမယ့်ကိစ္စ ဖြစ်တယ်လို့ မြင်တဲ့အတွက် ကန့်ကွက်ခဲ့တာ ဖြစ်ပါတယ်” ဟု NLD ပါတီမှ ပြည်နယ်လွှတ်တော် ကိုယ်စားလှယ် ဦးမင်းအောင်က ပြောကြားသည်။

အဆိုပါ စုံစမ်းစစ်ဆေးရေး အဖွဲ့အား ဇန်န၀ါရီ ၂၅ ရက်က ရခိုင်ပြည်နယ် လွှတ်တော်ကိုယ်စားလှယ် ခုနစ်ဦး၊ ဥပဒေရေးရာနှင့် အခြားကိစ္စရပ်များဆိုင်ရာ အကြံပေးအဖွဲ့ဝင် နှစ်ဦး၊ စုစုပေါင်း ကိုးဦးဖြင့် ဖွဲ့စည်းခဲ့ခြင်း ဖြစ်ကြောင်း သိရသည်။

ယင်းသို့ ဖွဲ့စည်းခြင်းမှာ ရခိုင်ပြည်နယ် လွှတ်တော်အနေဖြင့် ၂၀၁၈ ခုနှစ်ဖွဲ့စည်းပုံ အခြေခံဥပဒေ ပုဒ်မ ၁၆၇ တိုင်းဒေသကြီး သို့မဟုတ် ပြည်နယ်လွှတ်တော်ဆိုင်ရာ ဥပဒေပုဒ်မ ၂၄ ၊ ၂၅ နှင့်ရခိုင်ပြည်နယ် လွှတ်တော်ဆိုင်ရာ နည်းဥပဒေ ၆၂ ၊  နည်းဥပဒေ ခွဲ (က)၊ (ခ) တို့အရ အပ်နှင်းထားသော လုပ်ပိုင်ခွင့်များကို ကျင့်သုံးလျက် မြောက်ဦးမြို့ဖြစ်စဉ်ကို စုံစမ်းစစ်ဆေးရေးအဖွဲ့အား ဖွဲ့စည်းခဲ့ခြင်းဖြစ်ကြောင်း သိရသည်။ အဆိုပါ စုံစမ်းရေးအဖွဲ့တွင် ဥက္ကဋ္ဌအဖြစ် မြေပုံမြို့နယ် မဲဆန္ဒနယ် အမှတ် ၁ ပြည်နယ်လွှတ်တော် ကိုယ်စားလှယ် ဦးအောင်ဝင်းက ဆောင်ရွက်မည်ဖြစ်ကြောင်း သိရသည်။

စုံစမ်းစစ်ဆေးရာတွင် ဌာနဆိုင်ရာ အဖွဲ့အစည်းများ၊ ပြည်နယ်အဆင့် အဖွဲ့အစည်းများနှင့် မျက်မြင်လူပုဂ္ဂိုလ်များကိုပါ စုံစမ်းစစ်ဆေးပြီး မှန်ကန်သည့် အချက်အလက်များကို ဖော်ထုတ်မည်ဖြစ်ကြောင်း သိရသည်။

“အဓိက စုံစမ်းမယ့်ဟာက ကျွန်တော်တို့ အဲဒီနေရာမှာ နှစ်ဖက်ရှိတယ်။ တစ်က ဆန္ဒထုတ်ဖော်တဲ့သူ၊ နောက်တစ်ခုက သံပန်းသံဇကာတွေကို ဖြိုဖျက်တယ်။ ပြီးတော့ ဆိုင်ကယ်တွေကားတွေကို ခဲတွေနဲ့ ပစ်ပေါက်တယ် ဆိုတဲ့ဟာတွေလည်း ကြားသိရတယ်။ ဒါတွေဟာ အမှန်တကယ် ဖြစ်ခဲ့သလား၊ ဖြစ်ခဲ့လို့ ရှိရင်လည်း တရားဥပဒေအရ အရေးယူပေါ့နော်။  နောက်တစ်ဖက်က လူစုဖြိုခွဲတဲ့အခါမှာ လူထုဖြိုခွဲပုံ အဆင့်ဆင့်အတိုင်း မဆောင်ရွက်ဘဲနဲ့ ကျည်စစ်ကျည်မှန်နဲ့ အဆင့်တွေကျော်ပြီး လုပ်တယ်လို့ ကြားနေရတယ်။ အဲ ဒါကြောင့် တစ်ဖက်မှာ အပြစ်ရှိသလို တစ်ဖက်မှာလည်း အပြစ်ရှိတယ်လို့ ထင်တယ်။ တစ်ဖက်ကို အပြစ်ချပြီးတော့ နောက်တစ်ဖက်ကို လွှတ်ထားမယ်ဆိုရင်လည်း ဒါဥပဒေနဲ့ မညီညွတ်ပါဘူး။ ဒါကြောင့် မျှမျှတတဖြစ်အောင် ဥပဒေ နည်းဥပဒေ အောက်မှာနေတဲ့သူတွေ အကုန်လုံးပေ့ါနော်။ ဒီဥပဒေတွေနဲ့ ကာကွယ်ရမှာ ဖြစ်သလို ဥပဒေကို ကျူးလွန်တဲ့သူတွေကိုလည်း တိတိကျကျ မှန်မှန်ကန်ကန် ဖော်ထုတ်ပြီးတော့ အရေးယူသွားရမှာ ဖြစ်ပါတယ်” ဟု စုံစမ်းစစ်ဆေးရေး အဖွဲ့အ တွင်းရေးမှူးဖြစ်သူ မြောက်ဦးမြို့နယ် ပြည်နယ်လွှတ်တော် ကိုယ်စားလှယ် ဦးထွန်းသာစိန်က ပြောကြားသည်။

စုံစမ်းစစ်ဆေးမှုကို ဖေဖော်ဝါရီ ၃ ရက် တွင် စတင်ဆောင်ရွက်မည်ဖြစ်ပြီး စုံစမ်းစစ်ဆေးမည့် အချိန်ကာလကို ကန့်သတ်ထားခြင်း မရှိကြောင်း သိရသည်။

ဇန်န၀ါရီ ၁၆ ရက်တွင် ရခိုင်ပြည်နယ် မြောက်ဦးမြို့ နန်းရာကုန်းတွင် ၂၃၃ နှစ် မြောက်ရခိုင့် အချုပ်အခြာအာဏာ ကျရှုံးခြင်း ၀မ်းနည်းအောက်မိဖွယ် အခမ်းအနားကျင်း ပပြုလုပ်မည့် အစီအစဉ်ကို အာဏာပိုင်များက တားမြစ်ပိတ်ပင်သဖြင့် လူထုက ဆန္ဒထုတ်ဖော်ရာတွင် အာဏာပိုင်များက သေနတ်ဖြင့် ပစ်ခတ်မှုကြောင့် ဒဏ်ရာရရှိသူ ၁၂ ဦးနှင့် သေဆုံးသူ ခုနစ်ဦးရှိခဲ့သည်။

 

ဒေါက်တာအေးမောင်နှင့် စာရေးဆရာ ဝေဟင်အောင်တို့အား ရသေ့တောင်မြို့နယ် တရားရုံးတွင် လုံခြုံရေးတင်းကျပ်စွာဖြင့် ပထမအကြိမ် ရုံးထုတ်

ဖမ်းဆီးခံထားရသည့် ဒေါက်တာအေးမောင်နှင့် စာရေးဆရာ ဝေဟင်အောင်တို့အား ဇန်န၀ါရီလ ၂၉ ရက်နေ့က ရသေ့တောင်မြို့နယ် တရားရုံးတွင် လုံခြုံရေး တင်းကျပ်စွာဖြင့် ပထမဆုံးအကြိမ် ရုံးထုတ်ခဲ့ကြောင်း သိရှိရသည်။

ယင်းသို့ရုံးထုတ်ရာတွင် စစ်တွေအကျဉ်းထောင်မှတစ်ဆင့် ကားဖြင့် စစ်တွေမြို့နယ်နှင့် ပုဏ္ဏားကျွန်း မြို့နယ်ကြားရှိ မင်းချောင်းတံတားဆိပ်ကမ်းမှ တစ်ဆင့် ရေကြောင်းလမ်းဖြင့် ပင်လယ်ပတ်လမ်းမှ ရသေ့တောင်မြို့သို့ နံနက်စောစောပိုင်းတွင် လုံခြုံရေး အစောင့်အကြပ်များ ပါဝင်သော စက်လှေငါးစီးဖြင့် လိုက်ပါပို့ဆောင်ခဲ့ခြင်းဖြစ်ပြီး ရသေ့တောင် တရားရုံးသို့ရောက်ရှိစဉ် မီဒီယာများ၊ မိသားစုဝင်များနှင့် တွေ့ဆုံခွင့် မရခဲ့ကြောင်းလည်း သိရှိရသည်။

“လွပ်လပ်မှုမရှိဘူးပေါ့၊ လုံခြုံရေးတွေကလည်း အများကြီး ချထားတယ်။ မိသားစုတွေနဲ့လည်း တွေ့ခွင့်မရဘူး။ သတင်းသမားတွေနဲ့လည်း တွေ့ခွင့်မပေးဘူး။ ဒီမိုကရေစီ အစိုးရတစ်ရပ်အနေနဲ့ အခုလိုမျိုး မလုပ်သင့်ဘူးလို့ ကျွန်မအနေနဲ့ မြင်ပါတယ်။ ပွင့်လင်းမြင်သာမှု မရှိတာကိုလည်း တွေ့ရတယ်။ ရုံးထုတ်မယ် ဆိုတာမျိုးကိုလည်း သတင်းပေးတာ မရှိဘူး။ စစ်တွေထောင်မှာတော့ သွားတွေ့လို့ရပါတယ်” ဟု စာရေးဆရာ ဝေဟင်အောင်၏ ဇနီးဖြစ်သူ ဒေါ်အေးအေးနွယ်က ပြောကြားခဲ့သည်။

အဆိုပါ ဒေါက်တာအေးမောင်နှင့် ဝေဟင်အောင်တို့အား ရုံးထုတ်ရာတွင် လုံခြုံရေး အစောင့်အကြပ်များစွာ ချထားဆောင်ရွက်ခဲ့သကဲ့သို့ ရသေ့တောင်မြို့တွင်လည်း လမ်းဆုံလမ်းခွများတွင် လုံခြုံရေးဆောင်ရွက်ထားရှိမှု များပြားခဲ့ကြောင်းနှင့် ရသေ့တောင်သို့ လာရောက်သော ကားလမ်းရှိ ကူးတို့အချို့ကိုလည်း နံနက်ပိုင်းက ပိတ်ထားခဲ့ကြောင်း ရှိရသည်။

ယင်းနှင့်ပတ်သက်ပြီး ဝေဟင်အောင်အမှုအား လိုက်ပါဆောင်ရွက်သူ ရှေ့နေဒေါ်အေးနုစိန်က “ဒီနေ့တော့ စစ်ဆေးတာ မဟုတ်ဘူး။ ရာဇသတ်ကြီး ဥပဒေ ၅၀၅(ခ)(ဂ)နဲ့စွဲတင်တဲ့တစ်မှုနဲ့ မရားအသင်းအက် ဥပဒေပုဒ်မ ၁၇ (၁)အရ စွဲတင်တဲ့အမှုတွေကို ဒီနေ့တရားရုံးက စွဲတင်တယ်ဆိုတဲ့အကြောင်း ရှင်းပြတာဖြစ်ပါတယ်။ ဖေဖော်ဝါရီ ၉ ရက်နေ့ကို နောက်ထပ်ရုံးချိန်တယ်။ စစ်တွေမှာလည်း နိုင်ငံတော် ပုန်ကန်မှုနဲ့ စွဲထားတဲ့တစ်မှု ရှိတယ်ဆိုတော့ ကျွန်မတို့ကတော့ ရသေ့တောင်မှာ စွဲဆိုထားတဲ့ ရာဇသတ်ကြီး အမှုအမှတ် ၉ နဲ့ ၁၁ ကို စစ်တွေခရိုင်ကို ပြောင်းပေးမယ်ဆိုတဲ့ သတင်းကို ကြားထားတယ်။ အခုတော့ ပြောင်းတယ်ဆိုတာ သေချာသွားပြီဖြစ်တယ်။ ကျွန်မကတော့ စာရေးဆရာ ဝေဟင်အောင်အတွက် အမှုလိုက်ပေးတာ ဖြစ်တယ်။ ဒီအမှုမှာတော့ ဒေါက်တာအေးမောင်ပါ သုံးဦးဆိုတော့ ဆရာနေဘုန်းသွန်းဝေ (ခ) ဦးဘသန်းစလုံးကို စွဲထားတဲ့အမှု ဖြစ်တဲ့အတွက် နေဘုန်းသွန်းဝေကိုတော့ ၃၁ ရက်နေ့ထိ ရုံးချိန်းရှိပါတယ်။ တာဝန်ခံမိတ္တူတွေကူးဖို့ စီစဉ်ထားပါတယ်။ ဒေါက်တာအေးမောင်မှာက ရှေ့နေမရောက်တဲ့အတွက် ကျွန်မက ကူးပြီးတော့ ဒေါက်တာကို အကူအညီပေးမယ် ဆိုတာကို ဒေါက်တာကို ပြောခဲ့ပါတယ်။ အခုကြုံတွေ့ရတဲ့ အခက်အခဲကို ဒေါက်တာအေးမောင်ရော ဝေဟင်အောင်ရော တင်ပြကြပါတယ်။ ရေလမ်းခရီးမှာ စက်လှေအသေးနဲ့ မပို့ဖို့ အတွက်လည်း တင်ပြခဲ့ကြတယ်။ လုံခြုံရေးကို အကြောင်းပြပြီးတော့ တင်းတင်းကြပ်ကြပ် လုပ်ထားတဲ့ အနေအထားပေါ့။ ဒါပေမယ့် လွန်လွန်ကဲကဲ အနေအထားကိုတော့ ကျွန်မတို့ မျက်မြင်ကိုယ်တွေ့ မြင်ရတာပါပဲ။ ကျွန်မက ကားလမ်းအတိုင်းလာတယ်။ အဲဒီမှာ ပြားချောင်းကြီးရွာ ရောက်တော့ ကူးတို့လှေကူးခွင့်မရဘူး။ ရွာတစ်ရွာနှစ်ရွာဖြတ်ပြီး တခြားနေရာကနေ အမြန်ရေယဉ်တစ်စီးနဲ့ ကူးတို့ကူးခဲ့ရတယ်။ မဟုတ်ရင် တရားရုံးကို ရောက်နိုင်မှာမဟုတ်ဘူး။ ဒီခေတ်ကြီးမှာ ဘာဖြစ်ဖို့ လွပ်လပ်စွာ သွားခွင့်တွေ သတင်းရယူခွင့်တွေ သိရှိပိုင်ခွင့်တွေကို ဒီမိုကရေစီခတ်ကို ချီတက်မယ်ဆိုတဲ့ နေရာမှာ အဲလောက်ထိ အတင်းအကြပ်တွေ ၊ အတားအဆီးတွေ မဖြစ်ကောင်းဘူးလို့ ကျွန်မတော့မြင်တယ်၊ ရုံးထုတ်တဲ့ အစီစဉ်မှာ လုံခြုံရေး ဆိုတာကိုတော့ အကြောင်းပြပါလိမ့်မယ်။ လက်ခုတ်ထဲကရေဆိုတော့ ကျွန်မတို့ ဘက်ကတော့ မကျေနပ်ဘူး ဆိုတာနဲ့ ခံစားရပါတယ်။ ခံပြင်းတယ် ဆိုတာလောက်နဲ့တော့ စောဒကတက်စရာ ရေရေရာရာ မရှိပါဘူး။ ဆောင်ရွက်ရမယ့် အပိုင်းမှာ လုပ်ထုံးလုပ်နည်းတွေထက် ဘောင်တွေကျော်နေသလား ဆိုတာ မျှတမှုနဲ့ ညီညွတ်မှုတွေကိုတော့ ဥပဒေရဲ့ အနှစ်သာရကို ဖော်ဆောင်နိုင်ဖို့ လိုတယ်လို့ ကျွန်မထင်ပါတယ်” ဟုလည်း ပြောကြားခဲ့သည်။

လုံခြုံရေးတင်းကြပ်စွာ ချထားဆောင်ရွက်ခြင်းအပေါ် မိသားစုဝင်များက အားမလိုအားမရ ဖြစ်နေကြပြီး လုပ်ထုံးလုပ်နည်းထက် ကျော်လွန်နေသည်ကို ထင်မြင်သုံးသပ် မိကြောင်းလည်း ပြောဆိုကြပြီး မီဒီယာများနှင့်လည်း တွေ့ဆုံပြောဆိုခွင့်ကိုလည်း ပေးသင့်ကြောင်း ပြောဆိုကြသည်။

ယင်းနှင့်ပတ်သက်ပြီး ဝေဟင်အောင်၏ အစ်ကိုဖြစ်သူ ဦးသိန်းဝင်းကလည်း “မိသားစုတွေနဲ့ တွေ့ခွင့်မရတာ စိတ်မကောင်း ဖြစ်မိတယ်။ ဒီမိုကရေစီဆိုတဲ့ နိုင်ငံတော်ကို ချီတက်နေတဲ့အချိန်မှာ ဘာတရား လွတ်လပ်ခွင့်မှလည်း မရှိဘူး။ မီဒီယာတွေနဲ့လည်း တွေ့ခွင့်မရဘူး။ သတင်းစာ လွတ်လပ်ခွင့် ဆိုတာဘာလဲ၊ မီဒီယာ လွတ်လပ်ခွင့်ဆိုတာ ဘာလဲလို့ မေးချင်တယ်။ မိသားစုတွေ အနေနဲ့ကတော့ အရမ်းခံစားရပါတယ်။ မီဒီယာတွေကို တွေ့ခွင့်ပေးပါ၊ မိသားစုတွေကို တွေ့ခွင့်ပေးပါလို့သာ ပြောချင်ပါတယ်” ဟုလည်း ပြောကြားခဲ့သည်။

မြောက်ဦးပဋိပက္ခဖြစ်စဉ်မှ ကွဲလွဲမှုများ

ရခိုင့်နိုင်ငံတော်ကျရှုံးခြင်း ၀မ်းနည်းအမှတ်တရ အခမ်းအနား ကျင်းပမည့်အပေါ် သက်ဆိုင်ရာဌာန အသီးသီးမှ ထုတ်ပြန်သည့်စာများကို တွေ့ရစဉ်

ရခိုင်ပြည်နယ်၊ မြောက်ဦးမြို့ရဲ့ နန်းတော်ရာကုန်းမှာ ရခိုင်ဘုရင့် နိုင်ငံတော် အချုပ်အခြာအာဏာ ကျဆုံးမှု (၂၃၃) နှစ်မြောက် အထိမ်းအမှတ် စာပေဟောပြောပွဲ တားမြစ်မှုအပေါ် ဒေသခံပြည်သူတွေက မကျေနပ်တာကြောင့် ပြီးခဲ့တဲ့ ဇန်န၀ါရီ ၁၆ ရက်ညက လူစုလူဝေး ဖြစ်ပေါ်ခဲ့ပါတယ်။

အဲဒီ လူစုလူဝေးက မြောက်ဦးမြို့အတွင်း ကြွေးကြော်သံတွေနဲ့ လှည့်လည်ချိန်မှာ ရဲတပ်ဖွဲ့ဝင်တွေနဲ့ ရုန်းရင်းဆန်ခတ် ဖြစ်ပွားခဲ့ပြီး အခြေအနေ ပိုမိုဆိုးရွားလာတာကြောင့် ရဲတပ်ဖွဲ့ဝင်တွေက သေနတ်နဲ့ ပစ်ခတ်တားဆီးရာမှာ ဒေသခံပြည်သူ ခုနစ်ဦး သေဆုံးပြီး ၁၂ ဦး ဒဏ်ရာရရှိခဲ့ပါတယ်။

ရုန်းရင်းဆန်ခတ်ဖြစ်ပွားမှုအတွင်း လူစုလူဝေးက ကျောက်ခဲတွေနဲ့ ပစ်ခတ်မှုကြောင့် ရဲတပ်ဖွဲ့ဝင် ၂၀ လောက် ထိခိုက်ဒဏ်ရာ ရရှိခဲ့တဲ့အပြင် ခရိုင်အထွေထွေ အုပ်ချုပ်ရေးမှူးရုံးဝင်းထဲက ၀န်ထမ်းဆိုင်ကယ်အချို့၊ ဌာနပိုင်မော်တော်ယာဉ်အချို့၊ ရုံးခန်းနဲ့ မှန်တံခါးများ ပျက်စီးခဲ့တယ်လို့ ပြန်ကြားရေးဝန်ကြီးဌာနက ဇန်န၀ါရီ ၁၇ ရက်က သတင်းထုတ်ပြန်ခဲ့ပါတယ်။

ဒီလို ပဋိပက္ခမဖြစ်ပေါ်မီ ဇန်န၀ါရီ ၁၅ ရက် ရခိုင်ပြည်နယ် ရသေ့တောင်မြို့နယ်မှာ ကျင်းပခဲ့တဲ့ ရခိုင်နိုင်ငံတော် အချုပ်အခြာ အာဏာကျဆုံးခြင်း (၂၃၃) နှစ်မြောက် ၀မ်းနည်းဖွယ် အထိမ်းအမှတ် စာပေဟောပြောပွဲမှာ ဒေါက်တာအေးမောင်နဲ့ စာရေးဆရာ ဝေဟင်အောင်တို့က ဟောပြောခဲ့ကြပါတယ်။

အဲဒီဟောပြောပွဲမှာ စာရေးဆရာ ဝေဟင်အောင်က “ရခိုင်ပြည်နယ် အချုပ်အခြာအာဏာ ကျဆုံးသွားသည်မှာ နှစ်ပေါင်း (၂၃၃) နှစ် ရှိခဲ့ပြီး လူမျိုးဆက် ငါးဆက်ခန့် ကင်းကွာခဲ့ကြောင်း၊ နိုင်ငံရေးတွင် လက်ဝါးဖြန့်တောင်း၍ မရသောကြောင့် လက်ညှိုးကွေးပြီးတောင်းသည့် အဖွဲ့ပေါ်ပေါက်လာရခြင်း ဖြစ်ကြောင်း၊ ယခုအချိန်တွင် ထွန်းမြတ်နိုင်ဦးဆောင်သော AA တပ်မတော်သည်လည်း ရခိုင်နိုင်ငံတော်နှင့် အချုပ်အခြာ ပြန်လည်ရရှိရေး၊ ဗမာ့ကျွန်အဖြစ်မှ လွတ်မြောက်ရေးအတွက် လက်နက်ကိုင် တိုက်ပွဲဝင်လျက်ရှိကြောင်း၊ ရသေ့တောင် မြို့နယ်သူ၊ မြို့နယ်သားများ အနေဖြင့်လည်း ဗမာ့ကျွန်အဖြစ်မှ လွတ်မြောက်ရန် အားလုံးတွင် တာဝန်ရှိကြောင်း၊ ယခုအချိန်သည် နိုင်ငံရေး အကျပ်အတည်းဖြစ်နေသည့် အချိန်ကာလဖြစ်နေ၍ မိမိတို့အတွက် အခွင့်အရေးသာနေသော အချိန်ဖြစ်ကြောင်း၊ ဗမာ့ကျွန်ဘ၀မှ လွတ်မြောက်နိုင်ရေးနှင့် လွတ်လပ်ရေး ရရှိရေးအတွက် တော်လှန်တိုက်ခိုက်ရန် အချိန်ကောင်းဖြစ်ကြောင်း၊ အားလုံးပါဝင်ကြရန် လိုအပ်ကြောင်း” စတဲ့ ဟောပြောချက်တွေကို ဟောပြောခဲ့တယ်လို့ ဇန်န၀ါရီ ၁၇ ရက်က ကျင်းပတဲ့ ရခိုင်ပြည်နယ်ဆိုင်ရာ ညှိနှိုင်းအစည်းအဝေးမှာ ရခိုင်ပြည်နယ်ဝန်ကြီးချုပ် ဦးညီပုနဲ့ ရဲချုပ်အောင်ဝင်းဦးတို့က တင်ပြခဲ့ပါတယ်။

ဒါ့အပြင် နောက်ထပ်ဟောပြောသူ တစ်ဦးဖြစ်တဲ့ ဒေါက်တာ အေးမောင်က “ဗမာများအနေဖြင့် ရခိုင်လူမျိုးများကို ဗမာ့ကျွန်အဖြစ်လောက်သာ ထားရှိပြီး တန်းတူ အခွင့်အရေးမပေးကြောင်း၊ အချုပ်အခြာအာဏာ ရရှိရေးအတွက် နည်းလမ်းနှစ်ခုသာရှိကြောင်း၊ လက်နက်ကိုင် တော်လှန်ရေးနည်းနှင့် ဆောင်ရွက်နေသည့် ပုဂ္ဂိုလ်များရှိကြောင်း၊ မိမိမှာ နောက်တစ်နည်းဖြစ်သော လူထုဗဟိုပြု နိုင်ငံရေးနည်းဖြင့် ဆောင်ရွက်လျက်ရှိကြောင်း၊ လက်ရှိ နိုင်ငံရေးအားနည်းချက်ကို အခွင့်ကောင်းယူ၍ ပန်းတိုင်ရောက်အောင် ဆောင်ရွက်သွားကြရန် တိုက်တွန်းလိုကြောင်း၊ နောက်နှစ်များစွာ ရောက်တိုင်းမှာ အချုပ်အခြာ အာဏာပြန်လည်ရယူလိုရေး စိတ်ဓာတ်မွေးရန်၊ လက်နက်ကိုင်တော်လှန်ရေးနှင့် လူထုဗဟိုပြုနိုင်ငံရေး အားလုံး၏ ပန်းတိုင်သည် အချုပ်အခြာအာဏာကို ပြန်လည်ရယူနိုင်ရေးသာဖြစ်ကြောင်း၊ လူထုကို စည်းရုံးခြင်း၊ လက်နက်ကိုင်တော်လှန်ခြင်းတို့ ပြုလုပ်ပြီး အာဏာရယူရန် နည်းမျိုးစုံဖြင့် အမျိုးသားလွတ်မြောက်ရေး တိုက်ပွဲကို ဆင်နွှဲပြီး ရည်မှန်းချက် ပန်းတိုင်သို့ သွားနေခြင်းဖြစ်ကြောင်း၊ ယခုလို ဟောပြောပွဲများ ကျင်းပခြင်းဖြင့် တစ်မျိုးသားလုံး ထားရှိသင့်သည့် ရည်မှန်းချက် ပန်းတိုင်ကို သိရှိပြီး အမျိုးသားရေးတစ်ရပ် အနေဖြင့် ပါဝင်ကူညီ ဆောင်ရွက်ရန် လိုအပ်ကြောင်း” ဟောပြောခဲ့တယ်လို့ တင်ပြခဲ့ပါတယ်။

ဒီလို ဟောပြောမှုတွေကြောင့် စာရေးဆရာ ဝေဟင်အောင်ကို ပြီးခဲ့တဲ့ ဇန်န၀ါရီ ၁၆ ရက် ညနေပိုင်းက စစ်တွေမြို့မှာ ရဲတပ်ဖွဲ့ဝင်တွေက ဖမ်းဆီးခဲ့ပြီး နိုင်ငံတော်အကြည်ညိုပျက်စေနမှု ပုဒ်မ ၅၀၅ (ခ)နဲ့ အမှုဖွင့်ထားတယ်လို့ ကနဦးသတင်း အချက်အလက်တွေအရ သိရပါတယ်။

မြောက်ဦး ပဋိပက္ခ

ပြီးခဲ့တဲ့ ဇန်န၀ါရီ ၁၆ ရက်က ဖြစ်ပွားခဲ့တဲ့ မြောက်ဦးပဋိပက္ခဖြစ်စဉ်နဲ့ ပတ်သက်လို့ နေပြည်တော် နိုင်ငံတော်သမ္မတအိမ်တော် အစည်းအဝေးခန်းမှာ ဇန်န၀ါရီ ၁၇ ရက်က ရခိုင်ပြည်နယ်ဆိုင်ရာ ညှိနှိုင်းအစည်းအဝေး ပြုလုပ်ခဲ့ပါတယ်။

ဒီအစည်းအဝေးကို နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီးကျော်ဆွေ၊ ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်၊ ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီး ဦးသောင်းထွန်း၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၊ ပြည်ထောင်စုရှေ့နေချုပ် ဦးထွန်းထွန်းဦး၊ ရခိုင်ပြည်နယ်ဝန်ကြီးချုပ် ဦးညီပု၊ သမ္မတရုံးဝန်ကြီးဌာန ဒုတိယ၀န်ကြီး ဦးမင်းသူ၊ နယ်စပ်ရေးရာ ၀န်ကြီးဌာန ဒုတိယ၀န်ကြီး ဗိုလ်ချုပ်သန်းထွဋ်၊ နိုင်ငံတော်အတိုင်ပင်ခံရုံးဝန်ကြီးဌာန ဒုတိယ၀န်ကြီး ဦးခင်မောင်တင်၊ ပြန်ကြားရေးဝန်ကြီးဌာန ဒုတိယ၀န်ကြီး ဦးအောင်လှထွန်း၊ မြန်မာနိုင်ငံရဲတပ်ဖွဲ့ ရဲချုပ်အောင် ၀င်းဦးနဲ့ တာဝန်ရှိသူတွေ တက်ရောက်ခဲ့ကြပါတယ်။

မြောက်ဦးပဋိပက္ခဖြစ်စဉ်နဲ့ ပတ်သက်လို့ ရခိုင်ပြည်နယ်ဝန်ကြီးချုပ် ဦးညီပုနဲ့ ရဲချုပ်အောင်ဝင်းဦးတို့က ရှင်းလင်းတင်ပြရာမှာ မြောက်ဦးမြို့နယ် နန်းတော်ရာကုန်းမှာ ပြုလုပ်မယ့် ဆင်အိုးကျောင်းတိုက် ဆရာတော်နဲ့ ဒေါက်တာ အေးမောင်တို့ ဟောပြောမယ့် ကိစ္စနဲ့ပတ်သက်ပြီး ရခိုင်ပြည်နယ်အစိုးရအဖွဲ့ကနေ ဇန်န၀ါရီ ၁၅ ရက် ရက်စွဲနဲ့ ဟောပြောပွဲနေရာ၊ အဆောက်အအုံတို့ကို စီမံခန့်ခွဲခွင့်ရှိသူရဲ့ ခွင့်ပြုချက် ရယူဆောင်ရွက်ဖို့နဲ့ လိုက်နာဆောင်ရွက်ခြင်း မရှိပါက ဥပဒေနဲ့အညီ အရေးယူဖို့ အကြောင်းကြားခဲ့တယ်လို့ ဆိုပါတယ်။

ရှေးဟောင်းသုတေသနနှင့် အမျိုးသားပြတိုက်ဦးစီးဌာန (မြောက်ဦးဌာနခွဲ) ကလည်း ဇန်န၀ါရီ ၁၅ ရက် နေ့စွဲပါစာနဲ့ အခမ်းအနား ကျင်းပမယ့်နေရာဟာ ရှေးယခင် မြောက်ဦးဘုရင်နန်းတော်ဖြစ်နေခြင်း၊ အမျိုးသားအမွေအနှစ် ဖြစ်တာကြောင့် သက်ဆိုင်ရာဌာနတွေရဲ့ ခွင့်ပြုချက်ရယူခြင်းမရှိဘဲ ကျင်းပနေမှုကို ခွင့်မပြုနိုင်ကြောင်းနဲ့ အခမ်းအနား မပြုလုပ်ဖို့ ညှိနှိုင်းမေတ္တာ ရပ်ခံကြောင်းကို အခမ်းအနားကျင်းပရေး ကော်မတီဆီ ကြိုတင်အကြောင်းကြားခဲ့တယ်လို့ ဆိုပါတယ်။

ဒါပေမဲ့ အဲဒီနေ့ နံနက်ပိုင်းက ပြုလုပ်တဲ့ အခမ်းအနား အစီအစဉ်ကို အာဏာပိုင်တွေက ခွင့်ပြုခဲ့ပြီး ညပိုင်းဟောပြောပွဲချိန်ကပ်မှ တားမြစ်ခဲ့တယ်လို့ ဒေသခံတွေက ဆိုပါတယ်။

“ခွင့်ပြုချက်မရဘဲ ပွဲလုပ်ရင် လုပ်တဲ့လူကိုရော ဟောပြောတဲ့သူတွေကိုပါ အရေးယူမယ်ဆိုတဲ့အတွက် ဘယ်သူမှ မထိခိုက်ရအောင် ပွဲကို ရုပ်သိမ်းလိုက်တယ်။ ပြည်သူတွေကိုလည်း ကျွန်တော်ကိုယ်တိုင် နားချပြောဆိုခဲ့ပါတယ်။ အစိုးရအဖွဲ့ရဲ့ ကက်ဘိနပ်ကနေ ဆုံးဖြတ်ပြီး ခွင့်ပြုချက်မရှိရင် မလုပ်ဆိုတဲ့ ဆုံးဖြတ်ချက်မျိုး ထွက်လာတယ်လို့ ကြားမိတယ်” လို့ မြောက်ဦးမြို့မှ လွှတ်တော်ကိုယ်စားလှယ် ဦးထွန်းသာစိန်က ပြောကြားပါတယ်။

ရခိုင်ဘုရင်နိုင်ငံတော် အချုပ်အခြာအာဏာကျဆုံးနေ့ ၀မ်းနည်း အထိမ်းအမှတ် အခမ်းအနားကို ၂၀၁၄ ခုနှစ်မှစပြီး နှစ်စဉ်ပြာသိုလကွယ်နေ့မှာ စတင်ကျင်းပခဲ့ပေမယ့် ဒီနှစ်ပြုလုပ်ဖို့ စီစဉ်ထားတဲ့ အခမ်းအနားကို ခွင့်ပြုချက်မရတဲ့ကိစ္စအပေါ် မကျေနပ်တာကြောင့် ဒေသခံ ပြည်သူတွေက မြို့နယ်အထွေထွေ အုပ်ချုပ်ရေးမှူးရုံးဆီ ချီတက်ဆန္ဒ ထုတ်ဖော်ခဲ့တာဖြစ်တယ်လို့ သိရပါတယ်။

“ပွဲမကျင်းပဖို့ ရဲကလာပြီး တားမြစ်တယ်။ ခွင့်ပြုချက်မရှိတဲ့အတွက် မကျင်းပရဘူးလို့ လာတားတာ ဖြစ်ပါတယ်။ မြို့နယ်အုပ်ချုပ်ရေးကထုတ်တဲ့ တားမြစ်စာလည်း ပါလာတယ်။ ဒါပေမဲ့ ကျွန်တော်တို့မှာက နှစ်စဉ်ကျင်းပတာဖြစ်တယ်။ အဲဒီလိုမျိုး တားမြစ်တာ မရှိဘူး။ အခုခွင့်ပြုချက်တင်မယ် ဆိုရင်လည်း တင်ဖို့က အချိန်မမီတော့ဘူး။ အဲ့ဒါကြောင့် ပွဲစီစဉ်သူတွေအနေနဲ့ ပွဲကိုရုပ်သိမ်းလိုက်တယ်။ အဲဒီမှာ ဒေသခံတွေက မကျေနပ်လို့ လမ်းပေါ်ဆန္ဒပြကြတာ ဖြစ်ပါတယ်” လို့ ပွဲစီစဉ်သူတွေထဲက တစ်ဦးဖြစ်တဲ့ ကိုထွန်းထွန်းက ဆိုပါတယ်။

ရခိုင်ဘုရင်နိုင်ငံတော် အချုပ်အခြာအာဏာကျဆုံးနေ့ ၀မ်းနည်းအထိမ်းအမှတ် အခမ်းအနား ကျင်းပခွင့်မရတာနဲ့ ပတ်သက်လို့ ၀ိဝါဒကွဲပြားမှုတွေ ရှိနေပြီး ဒီအပေါ်မှာ ရခိုင်အမျိုးသားပါတီ (ANP) က ဇန်န၀ါရီ ၁၈ ရက်က သဘောထား ကြေညာချက်တစ်စောင် ထုတ်ပြန်ခဲ့ပါတယ်။

ဒီကြေညာချက်ထဲမှာ ရခိုင်အမျိုးသားပါတီ (ANP) အနေနဲ့ ဆက်လက်လုပ်ဆောင်သွားမယ့် အချက်ငါးချက်ကို ထည့်သွင်း ဖော်ပြထားပါတယ်။

အဲဒီအချက် ငါးချက်ကတော့

(၁) ရခိုင့်နိုင်ငံတော်ကျဆုံးခြင်း ၀မ်းနည်းခြင်း အမှတ်တရ အခမ်းအနား ကျင်းပရေးကော်မတီ မြောက်ဦးမြို့၏ ဆောင်ရွက်မှု အဆင့်ဆင့်ကို စိစစ်သုံးသပ်ခြင်း။
(၂) မြောက်ဦးမြို့၊ ဒေသအာဏာပိုင်များနှင့် ဟောပြောပွဲဖြစ်မြောက်ရေး ကော်မတီတို့အကြား အခမ်းအနား ဆောင်ရွက်မှုဆိုင်ရာ ညွှန်ကြားစာများ၏ ဖြစ်စဉ်အဆင့်ဆင့်ကို စိစစ်သုံးသပ်ခြင်း။
(၃) အခင်းဖြစ်ပွားချိန် အဓိကရုဏ်း နှိမ်နင်းမှုဆိုင်ရာ ဆောင်ရွက်မှုများသည် တည်ဆဲဥပဒေ လုပ်ထုံးလုပ်နည်းများနှင့် ညီညွတ်မှု ရှိ၊ မရှိ ကိစ္စ။
(၄) အလွန်အကျွံ အင်အားသုံးဖြေရှင်းမှုနှင့် စပ်လျဉ်း၍ အရေးယူ ဆောင်ရွက်ပေးရေးကိစ္စ။
(၅) မြောက်ဦးမြို့ (၁၆.၁.၂၀၁၈) နေ့ ပဋိပက္ခဖြစ်စဉ်အတွင်း အသက်ဆုံးရှုံးရသူများနှင့် ထိခိုက်နစ်နာသူများ၏ မိသားစုဝင်များအပေါ် အစိုးရမှ တာဝန်ယူ စီမံဆောင်ရွက်မှုများ ပြုလုပ်ပေးရေးကိစ္စတို့ပဲ ဖြစ်ပါတယ်။

ဒီသဘောထား ကြေညာချက်နဲ့ ပတ်သက်လို့ ရခိုင်အမျိုးသားပါတီ ဒုတိယဥက္ကဋ္ဌ ဒေါ်အေးနုစိန်က “ကျွန်မတို့ အချက်ငါးချက်ကို ထုတ်ပြန်ပေးထားပါတယ်။ မြောက်ဦးမြို့က ရခိုင့်ဘုရင့်နိုင်ငံကျရှုံးတဲ့ အောက်မေ့ဖွယ် အခမ်းအနားကျင်းပဖို့ ဆောင်ရွက်တဲ့နေရာမှာ အဆင့်ဆင့် ဘယ်လိုဆောင်ရွက်ခဲ့တယ်ဆိုတာကို ကျွန်မတို့ လေ့လာစိစစ်ပြီးတော့ သုံးသပ်မယ်။ ဘယ်နေ့ကတည်းက ကြေညာထားလဲ။ ခွင့်ပြုချက်တွေက ဘယ်လိုရှိလဲ။ ပြုလုပ်မယ့် နန်းရာကုန်းနဲ့ ပတ်သက်ပြီး ခွင့်ပြုချက် ဘယ်လိုရှိခဲ့လဲ။ ဘယ်အချိန်ကျမှပဲ ရုပ်သိမ်းတာလဲ စသဖြင့် အဆင့်ဆင့် စိစစ်သွားမယ်။ ဒုတိယတစ်ချက်က အာဏာပိုင်တွေအနေနဲ့ ဒီကျင်းပရေးကော်မတီပိုင်းတွေမှာ အပြန်အလှန် ရည်ညွှန်းပြီးတော့ စာပို့တာရှိတယ်။ ဆိုတော့ ဒီဟာတွေရဲ့ အချက်အလက်တွေဟာ ဥပဒေမှာပြဋ္ဌာန်းတဲ့အတိုင်း အချိန်လုံလောက်ခဲ့သလား။ ကျွန်မတို့က လေ့လာစိစစ်သွားမယ်။ နောက်တစ်ခါ အဓိကရုဏ်းနှိမ်နင်းတဲ့အခါ တည်ဆဲဥပဒေ၊ လုပ်ထုံးလုပ်နည်းများနှင့်အညီ ဆောင်ရွက်ခဲ့သလားဆိုတာ စိစစ် လေ့လာသွားမယ်။ လက်တွေ့အနေအထားမှာ သတင်းထုတ်ပြန်ချက်တွေအရ ၁၀ ချက်လောက် ပစ်ခတ်တယ်ဆိုတာမျိုး သိထားတယ်။ ၁၀ ချက်ပစ်ခတ်ရတာဟာ အခု သေနတ်ဒဏ်ရာရပြီး သေတဲ့လူတွေ၊ မသေဘဲနဲ့ ဒဏ်ရာရပြီး ဆေးကုနေတဲ့လူတွေ၊ နောက် ဆေးမကုသရဲတဲ့လူတွေလည်း ရှိနေလိမ့်မယ်လို့ ကျွန်မတို့ယူဆတယ်။ သင်္ဂြိုဟ်ထားတဲ့ အလောင်းတွေမှာလည်း သေနတ် ဒဏ်ရာမရတဲ့သူတွေ ရှိနေတယ်။ ကျွန်မတို့ ပါတီက လေ့လာထားချက်တွေအရ သိရတယ်။ ဒီအဆင့်တွေအပေါ်မှာ အလွန်အကျွံ အင်အားသုံးခဲ့တယ်။ အလွန်အကျွံ ဆိုတာကတော့ အဓိကရုဏ်းတွေကို နှိမ်နင်းရင် အဆင့်ဆင့် ဘယ်လို ဆောင်ရွက်ရမယ်ဆိုတာ ဥပဒေ လုပ်ထုံး လုပ်နည်းတွေမှာ အတိအကျ ပြဋ္ဌာန်းထားပြီးသား ဖြစ်တယ်။ အဲဒါကို ဆောင်ရွက်ခဲ့သလား။ ဆိုတော့ ဒီနေ့လတ်တလော ကျွန်မတို့ မျက်မြင်အနေအထားအရတော့ အလွန်အကျွံ အင်အားကိုသုံးခဲ့တယ်လို့ ကျွန်မတို့ကတော့ သုံးသပ်တယ်။ ဒီအချက်တွေအပေါ်မှာ ဘယ်လိုအရေးယူ ဆောင်ရွက်မလဲဆိုတာက တစ်ချက်။ နောက်တစ်ချက်ကတော့ ဖြစ်ပျက်သွားတဲ့ အဖြစ်အပျက်တွေမှာ အသက်ဆုံးရှုံးသွားရသူတွေ၊ ထိခိုက်ဒဏ်ရာရတဲ့သူတွေ၊ ဒဏ်ရာရတဲ့သူတွေထဲမှာလည်း ဘ၀တစ်သက်တာလုံး လူလုံးမလှအောင် ဒုက္ခိတအဆင့်ကို ရောက်သွားမယ့် သူတွေလည်းရှိတယ်။ ဆိုတော့ သေသွားသူတွေရဲ့ ကျန်ရစ်သူမိသားစု၊ ဒဏ်ရာရသူတွေနဲ့ ဆက်စပ်တဲ့ မိသားစုတွေအပေါ် အစိုးရက ဘယ်လိုစီမံ ဆောင်ရွက်ပေးမလဲ။ ဒီအချက်တွေနဲ့ ပတ်သက်ပြီး ဘယ်လို ဆောင်ရွက်သွားမလဲဆိုပြီး ကျွန်မတို့ သဘောထား ထုတ်ပြန်ချက်ကို ထုတ်ရတာ ဖြစ်ပါတယ်” လို့ ပြောကြားပါတယ်။

ရုန်းရင်းဆန်ခတ်ဖြစ်ပွားမှု

ဇန်န၀ါရီ ၁၆ ရက် ညနေပိုင်းမှာတော့ အထွေထွေအုပ်ချုပ်ရေး ဦးစီးဌာနကနေ ဟောပြောပွဲ ပြုလုပ်ခွင့်မပြုကြောင်း တားမြစ်ခဲ့ပြီး လျှပ်စစ်မီးများ ဖြတ်တောက်ခဲ့တဲ့အတွက် ဟောပြောပွဲလာရောက်သူ ၄၀၀ လောက်က စတင်စုဝေးအော်ဟစ်မှုတွေ ပြုလုပ်ခဲ့ပါတယ်။

ည ၈ နာရီခွဲလောက်က နန်းရာကုန်းမှာ လူအင်အား ၅၀၀၀ လောက် စုဝေးရောက်ရှိလာပြီး ရန်ကုန်-စစ်တွေကားလမ်းအတိုင်း “ရခိုင်ပြည်နယ်လွတ်မြောက်ရေး ဒို့အရေး” လို့ အော်ဟစ်ကြွေးကြော်ကာ ခရိုင်ရုံးတည်ရှိရာဆီ လမ်းလျှောက်ဆူပူ ဆန္ဒပြခဲ့ပြီး ည ၉ နာရီလောက်မှာ လူအင်အား ၁၀၀၀၀ လောက် ဖြစ်လာတာကြောင့် ခရိုင်အုပ်ချုပ်ရေးမှူး၊ ခရိုင်ရဲတပ်ဖွဲ့မှူးနဲ့ ခရိုင်ဥပဒေ အရာရှိတို့က လူစုခွဲဖို့ Hand Speaker တွေနဲ့ ၁၅ ကြိမ်လောက် သတိပေး တားမြစ်ခဲ့တယ်လို့ အစိုးရ ထုတ်ပြန်ပါတယ်။

လူစုလူဝေးက ရဲတပ်ဖွဲ့ဝင် နှစ်ဦးဆီကနေ သေနတ်လုယူဖို့ ကြိုးစားခြင်း၊ လေးခွ၊ အုတ်ခဲကျိုး၊ ကျောက်ခဲတွေနဲ့ လုံခြုံရေးတပ်ဖွဲ့ဝင်တွေကို ပစ်ပေါက်ဆဲဆို ရန်ပြုတဲ့အပြင် ခရိုင်အုပ်ချုပ်ရေးမှူးရုံးခြံဝင်းတံခါးကို ရိုက်ချိုးဖျက်ဆီးပြီး ခရိုင်ရုံးဝင်းထဲသို့ ၀င်ရောက်လာခဲ့တယ်လို့ အစိုးရရဲ့ ထုတ်ပြန်ချက်မှာ ပါရှိပါတယ်။

လူစုလူဝေးထဲက လူတချို့ကနေ ခရိုင်ရုံး နိုင်ငံတော်အလံတိုင်မှာ အသင့်ပါလာတဲ့ ရခိုင်ပြည်နယ်အလံကို လွှင့်ထူခဲ့တဲ့အပြင် ခရိုင်အုပ်ချုပ်ရေးမှူးရုံးထဲကို ၀င်ရောက်ပြီး ကုလားထိုင်များ၊ မီးချောင်းများ၊ မော်တော်ယာဉ် လေးစီးနဲ့ မော်တော်ဆိုင်ကယ် ငါးစီးကို ဖျက်ဆီးခဲ့တယ်လို့ ထုတ်ပြန်ပါတယ်။

ဒီလိုအခြေအနေကို လုံခြုံရေး ရဲတပ်ဖွဲ့ဝင်တွေက တုတ်၊ ဒိုင်းတွေနဲ့ လူစုခွဲခဲ့ပေမယ့် ဆက်လက်အကြမ်းဖက်မှုတွေ ပြုလုပ်လာတာကြောင့် ခရိုင်စီမံခန့်ခွဲရေးအဖွဲ့ရဲ့ သဘောတူညီချက်နဲ့ ဘီအေ-၆၃ မောင်းပြန်ရိုင်ဖယ်နဲ့ အချက် ၂၀၊ ၁၂ ဗို့ပြောင်းချောသေနတ်နဲ့ အချက် ၄၀ လောက် မိုးပေါ်ထောင်ပြီး သတိပေး ပစ်ခတ်ခဲ့တယ်လို့ ဆိုပါတယ်။

လူစုလူဝေးထဲမှ တချို့က လုံခြုံရေး ရဲတပ်ဖွဲ့ဝင်တွေ ကိုင်ဆောင်ထားတဲ့ လက်နက်ကို လုယူဖို့ ကြိုးစားလာတာကြောင့် တာဝန်ရှိသူတွေကနေ ကျည်စစ်၊ ကျည်မှန်နဲ့ ပစ်ခတ်ရမယ်လို့ အကြိမ်ကြိမ် သတိပေးခဲ့ပေမယ့် ပိုမိုဆိုးရွားလာတဲ့အတွက် လုံခြုံရေးရဲတပ်ဖွဲ့ဝင်တွေက လူစုလူဝေးအတွင်း တီ-၅၆၊ ဘီအေ-၉၄ သေနတ်နဲ့ ၁၀ ချက်လောက် ပစ်ခတ် ရှင်းလင်းခဲ့တယ်လို့ အစိုးရက သတင်းထုတ်ပြန်ပါတယ်။ ခရိုင်ရုံးထဲကို ၀င်ရောက်လာတဲ့ လူစုလူဝေးက ၄၀၀၀ လောက်ရှိပြီး ရဲတပ်ဖွဲ့ဝင်အင်အားက ၃၀ လောက်သာ ရှိတယ်လို့ ထုတ်ပြန်ချက်မှာ ပါရှိပါတယ်။

ဦးဆောင်လှုပ်ရှားသူတွေနဲ့ ပါဝင်ပတ်သက်သူတွေကို ဆက်လက် ဖော်ထုတ်ပြီး ဥပဒေနဲ့အညီ အရေးယူ ဆောင်ရွက်သွားမှာဖြစ်ပြီး အရပ်သား သေဆုံးသူမှုနဲ့ ပတ်သက်လို့ သက်ဆိုင်ရာရဲစခန်းမှာ သေမှုသေခင်း ဖွင့်ထားကာ ရဲတပ်ဖွဲ့ဝင်တွေရဲ့ ဆောင်ရွက်ချက်တွေကိုလည်း လုပ်ထုံလုပ်နည်းနဲ့ ညီညွှတ်မှု ရှိ၊ မရှိ စုံစမ်းစစ်ဆေးရေးခုံရုံး ဖွဲ့စည်းသွားမယ်လို့ ထုတ်ပြန်ထားပါတယ်။

ဒါ့အပြင် ဇန်န၀ါရီ ၁၅ ရက်က ကျင်းပခဲ့တဲ့ ရသေ့တောင် ဟောပြောပွဲနဲ့ ပတ်သက်လို့ စာရေးဆရာ ဝေဟင်အောင်ကို ဥပဒေနဲ့အညီ အမှုဖွင့်ဆောင်ရွက်ထားပြီး ဒေါက်တာအေးမောင်ကို ဥပဒေနဲ့အညီ ဆက်လက်ဆောင်ရွက်သွားမယ်လို့ ထုတ်ပြန်ခဲ့ပါတယ်။

ရဲလုပ်ထုံးလုပ်နည်းနဲ့ ညီ၊ မညီ

မြောက်ဦးမြို့နယ်မှာ ဇန်န၀ါရီ ၁၆ ရက်က ဖြစ်ပွားခဲ့တဲ့ ပဋိပက္ခအတွင်း ပစ်ခတ်နှိမ်နင်းမှုကြောင့် လူ ခုနစ်ဦး သေဆုံးပြီး ၁၂ ဦး ဒဏ်ရာရရှိခဲ့တာကြောင့် လုံခြုံရေးရဲတပ်ဖွဲ့ဝင်တွေရဲ့ အဓိကရုဏ်းနှိမ်နင်းမှုအပေါ် ဝေဖန်မှုတွေ ရှိလာပါတယ်။

မြောက်ဦးပဋိပက္ခဖြစ်စဉ်အတွင်း နိုင်ငံတကာ Standard အရ အသိအမှတ်ပြုထားတဲ့ ရော်ဘာကျည်နဲ့ ပစ်တဲ့သေနတ်ကို အသုံးပြုခဲ့တယ်လို့ ရခိုင်ပြည်နယ် ရဲတပ်ဖွဲ့မှူး ရဲမှူးကြီး အောင်မြတ်မိုးက ဆိုပါတယ်။

“မနေ့ကဖြစ်စဉ်က လူအုပ်စုနဲ့ အဲဒီမှာ ဒီမြောက်ဦးမြို့ နန်းတော်ရာကုန်းမှာ စုဝေးပြီးတော့ ဟောပြောပွဲ ပုံစံမျိုးလုပ်ဖို့ လူ ၁၅၀၀၊ ၂၀၀၀ လောက်စုပါတယ်။ စုပြီးတော့ အဲဒီမှာ နိုင်ငံတော်အစိုးရကို ဆန့်ကျင်တဲ့ စကားတွေ၊ အကြည်ညိုပျက်စေမယ့် စကားတွေ ပြောတဲ့အတွက် ဒီဘက်က ခွင့်မပြုဘူး။ ခွင့်မပြုတဲ့ အပေါ်မှာ မကျေနပ်ဘဲနဲ့ ဆင်းလာပြီးတော့မှ ခရိုင်အုပ်ချုပ်ရေးမှူးရုံး၊ ခရိုင်ရဲတပ်ဖွဲ့မှူးရုံးကို ၀ိုင်းပြီးတော့မှ ရန်ပြုပါတယ်။ အဲဒီအတွက် ပစ်ခတ်ဖြိုခွဲလိုက်ရပါတယ်။ အဓိကရုဏ်းနှိမ်နင်းရေး သေနတ်လို့ ခေါ်ပါတယ်။ နိုင်ငံတကာ Standard အရ အသိအမှတ်ပြုထားတဲ့ ရော်ဘာကျည်နဲ့ ပစ်တဲ့သေနတ်ကို အသုံးပြုပါတယ်” လို့ ရဲမှူးကြီး အောင်မြတ်မိုးက ပြောကြားပါတယ်။

ရဲမှူးကြီး အောင်မြတ်မိုးရဲ့ ပြောကြားချက်အရ ရော်ဘာကျည်နဲ့ ပစ်တဲ့သေနတ်ကို အသုံးပြုတယ်ဆိုပေမယ့် အဓိကရုဏ်းနှိမ်နင်းမှုမှာ လူခုနစ်ဦးအထိ သေဆုံးသူ မြင့်မားခဲ့ခြင်းအတွက် ရဲတပ်ဖွဲ့ရဲ့ ကိုင်တွယ် ဖြေရှင်းမှုအပေါ် မေးခွန်းထုတ်စရာ ဖြစ်ခဲ့ပါတယ်။

သေဆုံးသူတွေရဲ့ ဒဏ်ရာကို စုံစမ်းကြည့်ရာမှာ ကျည်အစစ်နဲ့ပစ်တဲ့ ဒဏ်ရာတွေဖြစ်ပြီး ရော်ဘာကျည်နဲ့ ပစ်တာမဟုတ်ဘူးလို့ ၈၈ မျိုးဆက်သစ် လူမှုဖွံ့ဖြိုးရေးအဖွဲ့မှ ဦးခိုင်ဆန်းအောင်က ပြောပါတယ်။

“သူတို့ဆီမှာရတဲ့ ဒဏ်ရာတွေကို ကျွန်တော်တို့ စုံစမ်းကြည့်တော့ ကျည်အစစ်နဲ့ ပစ်တဲ့ဒဏ်ရာတွေလို့ သိရတယ်။ ရော်ဘာကျည်နဲ့ပစ်တာ မဟုတ်ပါဘူး။ စိုးရိမ်ရမယ့် အနေအထားမှာ ရှိနေတဲ့သူတွေလည်း ရှိနေပါတယ်။ အစိုးရကို ပြောချင်တာက ဒီဖြစ်စဉ်ကို သေချာစုံစမ်း စစ်ဆေးပေးစေချင်ပါတယ်။ ပြည်သူလူထုသိအောင် ချပြစေချင်ပါတယ်” လို့ ဦးခိုင်ဆန်းအောင်က ဆိုပါတယ်။

“သူတို့လက်ထဲမှာတော့ တုတ်ဓားတွေ မပါဘူး။ လူစုတာနဲ့ ပွဲမလုပ်ရကောင်းလားဆိုပြီး ဒေါကန်ပြီးသွားကြတဲ့သဘော ဖြစ်တယ်။ ဆိုတော့ လမ်းပေါ်မှာတွေ့တဲ့ ခဲကိုကောက်ပြီးတော့ ခရိုင်ရုံးကို ပေါက်ကြတယ်။ ကားတွေကို ရိုက်ကြတယ်။ အဲဒီလောက်အဆင့်ပဲ ရှိပါတယ်။ အဲဒီအဆင့်လောက်ကို လုံခြုံရေးတပ်ဖွဲ့ကတော့ပေါ့နော်။ လူထုကို ထိန်းတဲ့အနေနဲ့ သေနတ်ကို မိုးပေါ်ထောင်ပစ်လို့ရပါတယ်။ ရော်ဘာကျည်ကို အသုံးပြုလို့ရပါတယ်။ သို့မဟုတ် မျက်ရည်ယိုဗုံးခွဲပြီးတော့ လူစုခွဲလို့ ရပါတယ်။ အခုဟာက ကျည်ဆန် အစစ်ပါတဲ့ တည့်တည့်ပစ်တယ်။ ဒါဟာမဖြစ်သင့်ဘူးလို့ မြင်တယ်” လို့ မြောက်ဦးမြို့နယ် ရခိုင်ပြည်နယ် လွှတ်တော်ကိုယ်စားလှယ် ဦးထွန်းသာစိန်က ဆိုပါတယ်။

အရင်အစိုးရ လက်ထက်ကတည်းက အဓိကရုဏ်းနှိမ်နင်းတာနဲ့ ပတ်သက်လို့ မြန်မာနိုင်ငံရဲတပ်ဖွဲ့ကို ဥရောပသမဂ္ဂ (EU) ကနေ သင်တန်းပေးမှုတွေ ရှိပါတယ်။ ဒီလို အဓိကရုဏ်း နှိမ်နင်းရာမှာ အဆင့်နှစ်ဆင့်ရှိပြီး ပထမအဆင့်က အာဏာပိုင်တွေအနေနဲ့ ညှိနှိုင်းခြင်းနဲ့ ညှိနှိုင်းလို့မရပါက ဒုတိယအဆင့်အနေနဲ့ တားဆီးမှုတွေကို ပြုလုပ်ရတာဖြစ်တယ်လို့ ရန်ကုန်တိုင်း ရဲတပ်ဖွဲ့မှ အငြိမ်းစား ရဲမှူးတစ်ဦးက ဆိုပါတယ်။

“အီးယူသင်တန်းက အရင်လို မဟုတ်တော့ဘူး။ ညှိနှိုင်းတာတို့၊ ဖျန်ဖြေတာတို့ အရင်စရတယ်။ သူတို့နဲ့ သက်ဆိုင်ရာ သက်ဆိုင်ရာတွေပေါ့။ ဥပမာ- ဘုန်းကြီးနဲ့ဖြစ်ရင် ဘုန်းကြီးထဲက အကြီးအကဲတစ်ပါးနဲ့ တွေ့ပြီး ညှိနှိုင်းရတယ်။ ကျောင်းသားကိစ္စဆိုရင် ကျောင်းအုပ်၊ ပါမောက္ခတို့နဲ့ တွေ့ရတယ်။ ရပ်ကွက်ထဲမှာ ဖြစ်ရင်တော့ သက်ဆိုင်တဲ့ရပ်ကွက်လူကြီးနဲ့ ရှင်းရတာပေါ့။ သူတို့နဲ့ အဆင်ပြေမယ့်သူနဲ့ သူတို့ရင်ထဲက ဖြစ်နေတဲ့ဟာကို အရင်ထိတွေ့ပေးတဲ့သဘောပဲ။ အဲဒါတွေပြီးမှ တစ်ဆင့်ချင်းသွားတာပါ။ ၀ုန်းဒိုင်းသွားတဲ့ ပုံစံမဟုတ်ပါဘူး။ အရှိန်သေအောင် လုပ်ရပါတယ်။ ဥပဒေတွေကို ချပြရတယ်။ ဘယ်လိုလုပ်လို့ရတယ်ဆိုတဲ့ အဆင့်တွေကို သူတို့သိအောင်ပြောပြရတယ်။ တချို့က မသိဘူး။ မသိတော့ လမ်းကြောင်းတွေ ဘယ်လိုရှိလဲ သူတို့က မသိဘူး။ အဲဒီလို ရှင်းပြတာမှ မရဘဲတိုးလာရင် ဥပဒေကို ချိုးဖောက်တာပေါ့။ အဲဒီလိုမှ မဟုတ်ဘဲ သူတို့ဘက်က လုပ်ကိုလုပ်မယ်ဆိုပြီး ဆက်တိုးလာရင် ဥပဒေကို ချိုးဖောက်သွားပြီ။ အဲဒီလိုအချိန်ကျရင် သက်ဆိုင်ရာဘက်ကလည်း ဥပဒေအရ တားဆီးတာတွေ၊ ဟန့်တားတာတွေ လုပ်ရတော့မှာ။ လုံခြုံရေးနယ်မြေမှာတော့ မရဘူး။ လက်နက်ပါလာမယ် သို့မဟုတ် အကြမ်းဖက်လာမယ်ဆိုရင် on the spot လုပ်ရတော့မယ်။ တခြားနေရာဆိုရင်တော့ တစ်မျိုးပေါ့။ ရဲစခန်းတို့ ဘာတို့က လုံခြုံရေး ကန့်သတ်နယ်မြေတွေဖြစ်တယ်။ ကန့်သတ်နယ်မြေထဲကို ၀င်လာမယ်ဆို မရတော့ဘူး။ တစ်ဖက်ကလည်း မလုပ်နဲ့ဆိုတာကို လုပ်တာမျိုးဆိုရင် တစ်ခုခု ဖြစ်သွားနိုင်တာပေါ့။ အကောင်းဘက်နဲ့ ၀င်တာမဟုတ်ဘဲ အဆိုးဘက်နဲ့ဝင်တာ ဆိုရင်တော့ ဖျန်ဖြေလို့မရတော့ဘူး။ ရဲစခန်းမပြောနဲ့ ရဲကင်းထဲ ၀င်လာတောင်မရပါဘူး။ ဟန့်တားတာကိုမှ ၀င်လာရင် လုပ်သင့်တာကို လုပ်ရမှာပါ” လို့ ၎င်းက ပြောပါတယ်။

ဥရောပသမဂ္ဂ (EU) က လေ့ကျင့်သင်ကြားမှုတွေ ပြုလုပ်ခဲ့ပေမယ့် တကယ်ဖြစ်လာတဲ့အခါမှာ ရဲတပ်ဖွဲ့က စနစ်တကျ အသုံးမပြုတာကြောင့် ဒီလိုအဖြစ်အပျက်မျိုးတွေ ဖြစ်နေရတာလို့ Equality Myanmar မှ ဒါရိုက်တာ ဦးအောင်မျိုးမင်းက ထောက်ပြပြောဆိုပါတယ်။

“အဓိကကတော့ အဓိကရုဏ်း နှိမ်နင်းရေးအပိုင်းမှာ အားနည်းချက် ပြဿနာရှိတယ်လို့ မြင်ပါတယ်။ ဘာကြောင့်လဲဆိုတော့ လူစုလူဝေးနဲ့ ဖြစ်လာပြီဆိုရင် ဘယ်လိုဖြိုခွင်းရမလဲဆိုတာက အဆင့်ဆင့်ရှိတယ်။ ဥပမာဖြစ်ဖြစ်ချင်း ဘယ်လိုမျိုး သေနတ်နဲ့ အချက်ပေးရမလဲ၊ ဘယ်လိုခြောက်လှန့်ရမလဲ၊ မဖြစ်မနေ ပစ်မယ်ဆိုရင်တောင် အန္တရာယ်မဖြစ်အောင် ဘယ်လိုနေရာကို ပစ်ရမလဲဆိုတာတွေ ရဲတပ်ဖွဲ့တွေကို ပို့ချထားတာတွေ ရှိပါတယ်။ အထူးသဖြင့် EU ကနေ လေ့ကျင့်သင်ကြားပေးထားတာတွေ ရှိပါတယ်။ ဒါပေမဲ့ ဘယ်လိုပဲလေ့ကျင့် သင်ကြားပေးထားပေမယ့် တကယ်တမ်းဖြစ်လာတဲ့ စနစ်တကျ အသုံးမပြုတဲ့အတွက် ဒီလိုတွေဖြစ်လာတာပါ။ အဲဒါတွေကြောင့် ဖြစ်လာနိုင်တာပေါ့။ အဲဒါကြောင့် အဓိက အဓိကရုဏ်း ဖြေရှင်းမှုအပိုင်းကို ထောက်ပြချင်ပါတယ်” လို့ ဦးအောင်မျိုးမင်းက ဆိုပါတယ်။

ဒီလို ပစ်ခတ်မှုကို ကိုယ်တိုင်ကြုံတွေ့ခဲ့ရတဲ့ ကိုအောင်ဇော်မိုးက “ပွဲမလုပ်ရတဲ့အတွက် ကျွန်တော်တို့က ရဲစခန်းကို သွားမေးတယ်။ ခရိုင်ရဲစခန်းက ငါတို့နဲ့မဆိုင် ခရိုင်အုပ်ချုပ်ရေးနဲ့သာ ဆိုင်တယ်လို့ပြောတယ်။ အဲဒီမှာ ခရိုင်အုပ်ချုပ်ရေးရုံးရှေ့ကို ရောက်သွားတော့ လူတွေကလည်း ပိုများလာတယ်။ ဆန္ဒထုတ်ဖော်တယ်။ အစပိုင်းတော့ မိုးပေါ်ထောင်ပစ်တယ်။ ခဏနေရင် ဒဲ့ပစ်တော့တာပါပဲ” လို့ ဆိုပါတယ်။

လူစုလူဝေးကို ပစ်ခတ်တဲ့အတွက် ပြင်းထန်တဲ့ သဘောမျိုးဖြစ်သွားတယ်လို့ တရားလွှတ်တော်ရှေ့နေဦးဌေးက မှတ်ချက်ပြုပါတယ်။

ဒေါက်တာအေးမောင်ကို ဖမ်းဆီး

အမ်းမြို့နယ် ပြည်သူ့လွှတ်တော်ကိုယ်စားလှယ် ဒေါက်တာအေးမောင်ကို ဇန်န၀ါရီ ၁၈ ရက်မှာ စစ်တွေမြို့က သူရဲ့နေအိမ်မှာ ရဲတပ်ဖွဲ့ဝင်တွေက လာရောက် ဖမ်းဆီးခဲ့ပြီး စစ်တွေအကျဉ်းထောင်မှာ ထိန်းသိမ်းထားပါတယ်။

ရသေ့တောင်မြို့နယ် ဟောပြောပွဲမှာ ဟောပြောချက်တွေနဲ့ ပတ်သက်လို့ ဒေါက်တာအေးမောင်နဲ့ စာရေးဆရာဝေဟင်အောင်ကို ဇန်န၀ါရီ ၁၆ ရက်က ကျင်းပခဲ့တဲ့ ရခိုင်ပြည်နယ် အစိုးရအဖွဲ့ အစည်းအဝေး အမှတ်စဉ်(၄/၂၀၁၈)ကနေ သူတို့နှစ်ဦးကို နိုင်ငံတော်သစ္စာဖောက်ဖျက် ပုန်ကန်မှု ရာဇသတ်ကြီးပုဒ်မ ၁၂၁ (ခ) (ဂ)၊ နိုင်ငံတော်အကြည်ညိုပျက်စေမှု ရာဇသတ်ကြီး ပုဒ်မ ၅၀၅ (ခ) (ဂ)၊ မတရားအသင်းအက်ဥပဒေပုဒ်မ (၁၇) (၁) (၂) တို့ ဖြင့် အမှုဖွင့်တရားစွဲဆိုသွားဖို့ ဆုံးဖြတ်ခဲ့ပြီး ရသေ့တောင် ရဲစခန်းက ဇန်န၀ါရီ ၁၆ ရက်မှာ မတရားအသင်းအက်ဥပဒေပုဒ်မ ၁၇ (၁) ဖြင့် အမှုဖွင့်ထားတယ်လို့ အစိုးရက သတင်းထုတ်ပြန်ခဲ့ပါတယ်။

ဒီအပေါ်မှာ ဒေါက်တာအေးမောင်က ဟောပြောခဲ့တာတွေနဲ့ ပတ်သက်လို့ အဲဒီပုဒ်မတွေက စပ်အပ်မယ်မထင်ဘူးလို့ သူ့ကို မဖမ်းဆီးခင်အချိန်မှာ DVB သတင်းဌာနကို ဖြေကြားသွားပါတယ်။

ဒေါက်တာအေးမောင်ဟာ လွှတ်တော်ကိုယ်စားလှယ်တစ်ဦး ဖြစ်တဲ့အတွက် နိုင်ငံတော်ဖွဲ့စည်းပုံ အခြေခံဥပဒေ ဖော်ပြချက်အရ ပြည်သူ့လွှတ်တော်အစည်းအဝေး တက်ရောက်နေတဲ့ ပြည်သူ့လွှတ်တော် ကိုယ်စားလှယ်တစ်ဦးကို ဖမ်းဆီးဖို့ လိုအပ်ပါက ခိုင်လုံသော အထောက်အထားကို ပြည်သူ့လွှတ်တော်ဥက္ကဋ္ဌထံ တင်ပြရမှာဖြစ်ပြီး ဥက္ကဋ္ဌရဲ့ ကြိုတင်ခွင့်ပြုချက်မရရှိဘဲ ဖမ်းဆီးခြင်းမပြုရလို့ ပြဋ္ဌာန်းထားပါတယ်။

ဒီကိစ္စနဲ့ ပတ်သက်လို့ ပြည်သူ့ လွှတ်တော်ကိုယ်စားလှယ် ဒေါက်တာအေးမောင်ကို ဖမ်းဆီးဖို့ ပြည်သူ့လွှတ်တော်ဥက္ကဋ္ဌ ဦးဝင်းမြင့်ဆီကနေ ခွင့်ပြုချက် ရရှိထားတယ်လို့ နိုင်ငံတော်အတိုင်ပင်ခံရုံး ၀န်ကြီးဌာန ညွှန်ကြားရေးမှူးချုပ် ဦးဇော်ဌေးက ပြောကြားထားပါတယ်။

ဒေါက်တာအေးမောင်ဟာ ရခိုင်အမျိုးသားပါတီ (ANP) ဥက္ကဋ္ဌအဖြစ် တာဝန်ယူခဲ့သူဖြစ်ပြီး လက်ရှိအချိန်မှာတော့ ပါတီဥက္ကဋ္ဌတာဝန်ကနေ နုတ်ထွက်စာတင်ထားသူ ဖြစ်ပါတယ်။

သေဆုံးသူတွေအတွက် အသုဘ အခမ်းအနား

ရခိုင်ပြည်နယ် မြောက်ဦးမြို့ အဓိကရုဏ်းမှာ သေနတ်နဲ့ ပစ်ခတ်ခံရမှုကြောင့် သေဆုံးသွားတဲ့ ခုနစ်ဦးကို ဇန်န၀ါရီ ၁၈ ရက်က မြောက်ဦးမြို့ သုသာန်မှာ ဂူသွင်းသင်္ဂြိုဟ်ခဲ့ပြီး လိုက်ပါပို့ဆောင်သူ ထောင်နဲ့ချီ ရှိခဲ့ပါတယ်။

ဒီအသုဘအခမ်းအနားမှာ ဒေသခံတွေနဲ့ သေဆုံးသူ မိသားစုဝင်တွေရဲ့ ပြောကြားချက်တွေအရ သေဆုံးသူတွေထဲမှာ သေနတ်ထိမှန်ခြင်းမဟုတ်ဘဲ ရိုက်နှက်ခံရမှုကြောင့် သေဆုံးခဲ့တာတွေလည်း ရှိနေတယ်လို့ သိရပါတယ်။

သေဆုံးသူတစ်ဦးရဲ့ အစ်ကိုဖြစ်သူ ကိုလုံးလုံးက သေဆုံးသူတစ်ဦးရဲ့ ခန္ဓာကိုယ်ပေါ်မှာ ထိုးကြိတ်ထားသလိုမျိုး ယူဆရတဲ့ ဒဏ်ရာတွေကို တွေ့ရှိရတယ်လို့ ဆိုပါတယ်။

“ဟောပြောပွဲ ပျက်သွားတဲ့အတွက် စိတ်မကောင်းဖြစ်မိတယ်။ အဲဒီကတစ်ဆင့် ရဲစခန်းရှေ့ကို ရောက်သွားတယ်။ တုတ်မပါ၊ ဓားမပါ သွားခဲ့ကြတာပါ။ အဲဒီကတစ်ဆင့် ခရိုင်ထွေအုပ်ရုံးကို သွားခဲ့တယ်။ ပထမ မိုးပေါ်ထောင်ပစ်ပြီးနောက် ဆက်တိုက်ပစ်ခတ်ခဲ့တယ်။ လဲကျနေတဲ့ လူတွေကိုလည်း ကောက်ခွင့်မပေးခဲ့ဘူး။ နာရေးကားကိုခေါ်ပြီး အလောင်းကို သွားတောင်းတော့လည်း မရခဲ့ဘူး။ အဲဒီတုန်းက ကလေးတွေ မသေသေးဘူးလို့ တွေ့ခဲ့ရပါတယ်” လို့ ဒေါ်တင်ရွှေက ပြောပါတယ်။

သေဆုံးသူတစ်ဦးရဲ့ အဒေါ်ဖြစ်သူ ဒေါ်အေးသိန်းကြည်က “ဆန္ဒထုတ်ဖော်တာကို ဟန့်တားခြင်းမရှိဘဲ သေနတ်နဲ့သေအောင်အထိ ပစ်လိုက်တဲ့အတွက် ကျွန်မရဲ့ အစ်မသားတစ်ယောက်လည်း သေသွားတယ်။ နောက်ထပ်ကလေးတွေလည်း ထိတယ်။ သူတို့ဘယ်လောက် ရက်စက်လဲဆိုရင် ခဏလေးမှာ သုံးလေးယောက် ကျသွားတယ်။ ကျွန်မ တူလေး သေနေတာကိုတောင် ကိုင်လို့မကြည့်ဘဲ တက်နင်းသွားတယ်။ ကျွန်မတို့ ဘယ်လိုခံစားရမလဲဆိုတာ ကြည့်ပါ။ ကလေးတွေဟာ ရန်ရှာဖို့သွားတာလည်း မဟုတ်ဘူး။ ကျွန်မကိုယ်တိုင် မြင်တွေ့ခဲ့ရတာပါ” လို့ ဆိုပါတယ်။

ဇန်န၀ါရီ ၁၆ ရက် မြောက်ဦးပဋိပက္ခဖြစ်စဉ်အပြီး နောက်တစ်နေ့မှာ အစိုးရကနေ ထုတ်ပြန်ခဲ့တဲ့ ကနဦး ထုတ်ပြန်ချက်ထဲမှာ လုံခြုံရေးရဲတပ်ဖွဲ့ဝင် ၂၀ လောက် ဒဏ်ရာရခဲ့တယ်လို့ ထုတ်ပြန်ခဲ့ပေမယ့် ဆေးရုံမှာ ကုသနေတဲ့ ရဲတစ်ယောက်ကိုမှ မတွေ့ရဘူးလို့ ဒေသခံတွေကဆိုတဲ့အတွက် ကွဲလွဲမှုတွေ ရှိနေပါတယ်။

“ရဲက ဒဏ်ရာရတယ်ဆိုတဲ့ သတင်းဟာလည်း မဟုတ်ပါဘူး။ ဆေးရုံမှာ ဆေးကုသနေတဲ့ ရဲတစ်ယောက်မှ မတွေ့ရဘူး” လို့ ဒေါ်တင်ရွှေက ဆိုပါတယ်။

ဒီကိစ္စအပေါ်မှာ ရခိုင်ပြည်နယ် ရဲတပ်ဖွဲ့မှူး ရဲမှူးကြီးအောင်မြတ်မိုးက “အဲဒီဖြစ်စဉ်မှာလည်း ရဲတပ်ဖွဲ့ဝင်တွေကလည်း အယောက် ၂၀ ခန့် ခရိုင်ရဲတပ်ဖွဲ့မှူး အပါအ၀င် ဒဏ်ရာရတာ ရှိပါတယ်။ ဒီဖြစ်စဉ်နဲ့ ပတ်သက်လို့ အဓိကရုဏ်းနှိမ်နင်းတဲ့ နည်းလမ်းအတိုင်း အဆင့်ဆင့် ဆောင်ရွက်သွားသလဲဆိုတာကို စုံစမ်းစစ်ဆေးရေးအဖွဲ့နဲ့ စစ်နေပါတယ်။ စစ်ဆေးပေါ်ပေါက်ချက်အရ တရားနည်းလမ်းတကျ ဆောင်ရွက်ခဲ့သလား၊ ဥပဒေမဲ့ ဆောင်ရွက်ခဲ့သလား။ ဒီအပေါ်မှာ မူတည်ပြီးတော့ ဆောင်ရွက်သွားဖို့ ရှိပါတယ်” လို့ ပြောကြားပါတယ်။

မြောက်ဦးပဋိပက္ခဖြစ်စဉ်မှာ လူခုနစ်ဦးသေဆုံးပြီး ၁၂ ဦး ဒဏ်ရာရရှိခဲ့တာနဲ့ ပတ်သက်လို့ ရခိုင်တိုင်းရင်းသားတွေကြားမှာ ‘မြောက်ဦးလူသတ်ပွဲ’ ဆိုပြီး ပြင်းပြင်းထန်ထန် ဝေဖန်ပြောကြားမှုတွေလည်း ရှိနေပါတယ်။

ဒီဖြစ်စဉ်ကိုကြည့်ပါက မြောက်ဦးမြို့ရဲ့ နန်းတော်ရာကုန်းမှာ ရခိုင်ဘုရင့်နိုင်ငံတော် အချုပ်အခြာအာဏာကျဆုံးမှု ၂၃၃ နှစ်မြောက် အထိမ်းအမှတ် စာပေဟောပြောပွဲကို တားမြစ်ရာကနေ ဖြစ်လာတာကို တွေ့ရမှာပါ။ ၂၀၁၄ ခုနှစ်နောက်ပိုင်း နှစ်စဉ်ကျင်းပခဲ့တာ ဖြစ်ပေမယ့် ဒီနှစ်ကျမှ ဘာကြောင့် ပိတ်ပင်ရတယ်ဆိုတာကို ရခိုင်တိုင်းရင်းသားတွေက မေးခွန်းထုတ်နေကြပါတယ်။ ဒါ့အပြင် ဒီအခမ်းအနားကို တခြားမြို့နယ်တွေမှာ ကျင်းပခဲ့ပေမယ့် မြောက်ဦးမြို့ကျမှ တားမြစ်ခံရမှုကလည်း စဉ်းစားစရာ ဖြစ်လာပါတယ်။

ဒီကိစ္စနဲ့ပတ်သက်လို့ ဒေါက်တာအေးမောင်က သူဖမ်းဆီးမခံရမီအချိန်မှာ အခုလို ရှင်းပြခဲ့ပါတယ်။

“မြောက်ဦးဘက်က ကျွန်တော့်ကို ဖုန်းဆက်တယ်။ ပွဲစီစဉ်ကျင်းပမယ့် ပုဂ္ဂိုလ်တွေဘက်ကနေပေါ့။ ပွဲနဲ့ပတ်သက်လို့ သူတို့ခွင့်ပြုမိန့်ကို တင်ထားတယ်။ လုပ်ရိုးလုပ်စဉ်အတိုင်း ရှေးဟောင်းသုတေသနဌာနကို တင်ထားတယ်။ သူတို့ကလည်း ခွင်ပြုတယ်ဆိုတာမျိုးပေါ့ဗျာ။ သို့သော်လည်း အနီးကပ်ပြီးခါမှ ၁ နာရီ ၂ နာရီ (မွန်းလွဲ) ၀န်းကျင်လောက်မှာပဲ မြို့နယ်အာဏာပိုင်တွေက ငြိမ်း၊ စု၊ စီနဲ့တင်ဖို့ ပြောတယ်။ အဲဒီအတွက် ငြိမ်း၊ စု၊ စီဥပဒေအရ တင်နိုင်ဖို့အတွက် မြို့နယ်ရဲတပ်ဖွဲ့မှာ ရောက်နေတယ်။ အဲဒါကြောင့် ဆရာ့ရဲ့ အဖေနာမည်ရယ် အမေနာမည်ရယ် မှတ်ပုံတင်နံပါတ်ရယ် ကျွန်တော်တို့ကိုပေးပါလို့ တောင်းနေကြတယ်။ …။ ဆိုလိုတာက ပွဲလမ်းသဘင်နဲ့ ပတ်သက်ရင် အထွေထွေ အုပ်ချုပ်ရေးဦးစီးဌာနမှာ လုပ်ပိုင်ခွင့်ရှိတယ်။ ဒါကြောင့် သူတို့က ကြိုလျှောက်တယ်။ ကျွန်တော် မှတ်မိသလောက် ဇန်န၀ါရီ ၁၃ ရက်နေ့ ထင်တယ်။ အဲဒီရက်စွဲနဲ့ပွဲကျင်းပခွင့် ပါမစ်ကိုပေးတယ်။ ဒါထွေအုပ်ရဲ့ဟာနော်။ သို့သော်လည်း ညနေပိုင်းမှာ ငြိမ်းစုစီနဲ့ တင်ပါဆိုတဲ့အခါမှာ ၄၈ နာရီ ကြိုတင်ရတာဆိုမို့လို့ မြို့နယ်ရဲတပ်ဖွဲ့က ခွင့်မပြုဘူး။ ပါမစ်က တစ်ခုတော့ရှိတယ်။ ငြိမ်း၊ စု၊ စီနဲ့ ခွင့်မပြုဘူးဆိုတော့ ကျွန်တော်တို့က ဟောပြောလို့မရတော့ဘူး” လို့ သူက ရှင်းပြပါတယ်။

ဒီလို ဟောပြောပွဲ တားမြစ်မှုအပေါ် မကျေနပ်မှုကြောင့် ဒေသခံပြည်သူတွေက ဆန္ဒပြရာကနေ ရဲတပ်ဖွဲ့ဝင်တွေနဲ့ အဓိကရုဏ်းပုံစံဖြစ်ခဲ့ပြီး သေနတ်နဲ့ ပစ်ခတ်ရာမှာ ဆယ်ကျော်သက်အရွယ် လူငယ်လူရွယ်တွေ အပါအ၀င် ခုနစ်ဦး သေဆုံးခဲ့တာဟာ စိတ်မကောင်းစရာပါ။

မြောက်ဦးအဓိကရုဏ်းမှာ ဒေသခံ ပြည်သူခုနစ်ဦး သေဆုံးပြီး ၁၂ ဦး ဒဏ်ရာရရှိတာနဲ့ ပတ်သက်လို့ ရဲတပ်ဖွဲ့ဝင်တွေရဲ့ နှိမ်နင်းမှုဟာ လုပ်ထုံးလုပ်နည်းနဲ့ ညီညွတ်မှု ရှိ၊ မရှိ စုံစမ်းစစ်ဆေးမှု စတင်နေပြီလို့ ရခိုင်ပြည်နယ်ရဲတပ်ဖွဲ့မှူး ရဲမှူးကြီး အောင်မြတ်မိုးက ဆိုပါတယ်။

နေပြည်တော်မှာ ဇန်န၀ါရီ ၁၇ ရက်က ကျင်းပခဲ့တဲ့ ရခိုင်ပြည်နယ်ဆိုင်ရာ ညှိနှိုင်းအစည်းအဝေးမှာ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မြောက်ဦးမြို့နယ်တွင် ဖြစ်ပွားခဲ့သော လူစုလူဝေးဖြင့် အကြမ်းဖက်မှုကြောင့် ရခိုင်တိုင်းရင်းသားများ သေဆုံးမှု၊ ဒဏ်ရာရရှိမှုများနှင့်အတူ ရဲတပ်ဖွဲ့ဝင်များ ဒဏ်ရာရရှိမှု ဖြစ်ပွားခဲ့ခြင်းအတွက် ၀မ်းနည်းမိပါကြောင်း၊ ဖြစ်စဉ်၊ ဖြစ်ရပ်အမှန်ကို အမြန်ဆုံး စစ်ဆေးဖော်ထုတ်ပြီး ဥပဒေချိုးဖောက်သူများကို ဥပဒေနှင့်အညီ အရေးယူ ဆောင်ရွက်သွားရန် ဖြစ်ကြောင်းနှင့် တည်ငြိမ်အေးချမ်းရေးနှင့် တရားဥပဒေစိုးမိုးရေးကို အလေးထား ဆောင်ရွက်ရန်ဖြစ်ကြောင်းကို အဖွင့်အမှာ စကားပြောကြားရာမှာ ထည့်သွင်း ပြောကြားခဲ့ပါတယ်။

၁၉၈၈ ခုနှစ်နောက်ပိုင်း ဖြစ်ပွားခဲ့တဲ့ အရေးအခင်းတွေ၊ ပဋိပက္ခ ဖြစ်စဉ်တွေနဲ့ ဆန္ဒပြပွဲတွေဖြစ်တဲ့ ၉၆ အောက်တိုဘာ အရေးအခင်း၊ ၂၀၀၇ ရွှေဝါရောင်တော်လှန်ရေးနဲ့ ဒီမိုကရေစီစနစ်ကို စတင်ကူးပြောင်းခဲ့တဲ့ သမ္မတဟောင်း ဦးသိန်းစိန် အစိုးရလက်ထက်မှာလည်း မအူပင် မလက်တိုပဋိပက္ခ၊ လက်ပံတောင်းတောင် ပဋိပက္ခနဲ့ လက်ပံတန်းကျောင်းသားသပိတ်တွေကို အာဏာပိုင်တွေက ဖြေရှင်းရာမှာ မြောက်ဦး အဓိကရုဏ်းဖြစ်စဉ်လောက် လူအသေအပျောက်မများနိုင်ဘူးလို့ ပြောဆိုဝေဖန်မှုတွေ ရှိနေပါတယ်။

ဘာပဲဖြစ်ဖြစ် နိုင်ငံရေးအရ အကဲဆတ်နေတဲ့ ရခိုင်ပြည်နယ် မြောက်ဦးမြို့မှာ ဇန်န၀ါရီ ၁၆ ရက် ည ၇ နာရ်ီကနေ ၁၀ နာရီကျော်အထိ နာရီပိုင်းအတွင်း ဆန္ဒပြမှုမှာ လူခုနစ်ဦးသေဆုံးပြီး ၁၂ ဦး ဒဏ်ရာရစေခဲ့တဲ့အထိ အာဏာပိုင်တွေရဲ့ ဖြေရှင်းမှုကြောင့် မြောက်ဦးမြို့ရဲ့ သွေးမြေကျမှုကတော့ ဆိုးရွားလှတဲ့ မှတ်တမ်းအဖြစ်နဲ့ သမိုင်းမှာ ထင်ကျန်ခဲ့ပြီဖြစ်ပါတယ်။

ဒီကိစ္စနဲ့ပတ်သက်လို့ ဒေါက်တာအေးမောင်က “နန်းရာကုန်း အ၀န်းအ၀ိုင်းမှာ ဖြစ်လာမယ့် လူဦးရေ ထူထပ်မှုနဲ့ အခုလိုဖျက်လိုက်တယ်ဆိုရင် ဖြစ်လာမယ့် အကျိုးသက်ရောက်မှုနဲ့ အေးအေးဆေးဆေး ကျင်းပခွင့်ပေးလိုက်ရင် ဖြစ်လာမယ့် အကျိုးသက်ရောက်မှုနဲ့ ယှဉ်ပြရမှာပေါ့။ အစိုးရတစ်ရပ်အနေနဲ့။ တာဝန်ရှိတဲ့ပုဂ္ဂိုလ်က။ တကယ်တော့ ခုနကပြောသလို ဖျက်ကိုဖျက်ရမယ်။ အဲဒါမျိုးသူတို့ဘက်က ဆုံးဖြတ်ရင် အထိအခိုက်အနည်းဆုံးနဲ့ ဘယ်လိုဒီပြဿနာကိုဖြေရှင်းမှာလဲ။ ရဲတပ်ဖွဲ့ရဲ့ လုပ်ရိုးလုပ်စဉ် ဒီလိုဖြစ်ရင် ဘယ်လိုထုံးတမ်း အစဉ်အလာရှိသလဲ။ ဒိုင်းတို့၊ ရော်ဘာတုတ်တို့၊ မျက်ရည်ယိုဗုံးတို့ရှိတာပဲ။ ပုဒ်မ ၁၄၄ ထုတ်တာတို့၊ ၀မ်နင်ပေးတာတို့၊ ကြေညာတာတို့၊ ရော်ဘာကျည်သုံးတို့ လုပ်ရမှာပေါ့ဗျ။ လိုအပ်ရင် မီးသတ်တို့ဘာတို့၊ ပတ်ဝန်းကျင်ကို မီးတွေလင်းအောင်လုပ်မှာတို့ လုပ်ရမှပေါ့ဗျ။ အချိန်တိုအတွင်း လုပ်လို့ရပါတယ် ဒီခေတ်က။ ဘာမှပြင်ဆင်တာတို့ ဘာတို့မရှိဘဲနဲ့ ဒီလိုမျိုးဖြစ်လာနိုင်တာကို ကြိုသိပါလျက်နဲ့။ ဒီလိုမျိုး လုပ်လိုက်တာဟာ ချဉ်းကပ်ပုံမှားတယ်။ ဒီလိုမျိုးလုပ်လိုက်တာဟာ ပြည်နယ်အစိုးရတစ်ရပ်အနေနဲ့ တော်တော်လေး စဉ်းစားဆင်ခြင်မှု နည်းတယ်လို့ ကျွန်တော်ကတော့ စွဲချက်တင်တယ်ဗျ။ အဲဒီလုပ်ရပ်ဟာ ပြည်ထောင်စုအစိုးရကို သွားထိခိုက်မှာပေါ့” လို့ သူအဖမ်းမခံရမီ အချိန်တုန်းက ဆက်သွယ်မေးမြန်းရာမှာ ပြန်လည် ဖြေကြားခဲ့ပါတယ်။