မြောက်ပိုင်း တိုင်းရင်းသား လက်နက်ကိုင် အဖွဲ့များ နေပြည်တော်မှ ပြန်လည်ထွက်ခွာ

ခေတ္တတည်းခိုသည့် ဟိုတယ်မှ ပြန်လည်ထွက်ခွာရန် ပြင်ဆင်နေသည့် မြောက်ပိုင်းတိုင်းရင်းသား လက်နက်ကိုင်အဖွဲ့ ခေါင်းဆောင်အချို့အား တွေ့ရစဉ် (ဓာတ်ပုံ – မင်းနိုင်စိုး)

နေပြည်တော်တွင် ပြုလုပ်လျက်ရှိသည့် ပြည်ထောင်စု ငြိမ်းချမ်းရေး ညီလာခံ – ၂၁ ရာစုပင်လုံ တတိယ အစည်းအဝေးသို့ တက်ရောက်လာသော မြောက်ပိုင်းမဟာမိတ် တိုင်းရင်းသား လက်နက်ကိုင် အဖွဲ့များသည် ဇူလိုင် ၁၄ ရက်တွင် နေပြည်တော်မှ ပြန်လည်ထွက်ခွာ သွားပြီဖြစ်သည်။

အကြီးအကဲတချို့၏ ကျန်းမာရေး မကောင်းမှုကြောင့် သတင်းစာရှင်းလင်းပွဲ မပြုလုပ်ရခြင်းဖြစ်ပြီး ငြိမ်းချမ်းရေး လုပ်ငန်းစဉ် ဆက်ရှိနေမည် ဖြစ်သည့်အတွက် (အစိုးရ၊ တပ်မတော်နှင့်တွေ့ဆုံရန်) ပြန်လာမည်ဟု ဗိုလ်ချုပ်ဂွန်မော်က ပြောကြားသည်။

”ဝ” အဖွဲ့ (UWSP/UWSA)၊ ကချင်တိုင်းရင်းသား လက်နက်ကိုင်အဖွဲ့ (KIO/KIA)၊ ကိုးကန့် လက်နက်ကိုင်အဖွဲ့ (MNDAA)၊ တအန်းလက်နက်ကိုင်အဖွဲ့ (TNLA)၊ ရခိုင်လက်နက်ကိုင်အဖွဲ့ (AA) တို့သည်  နေပြည်တော်တွင် ခေတ္တတည်းခို နေထိုင်သည့် Horizon Lake View ဟိုတယ်မှ မွန်းလွဲပိုင်းတွင် နေပြည်တော်မှ တရုတ်နိုင်ငံ ကူမင်းမြို့သို့ တိုက်ရိုက်လေကြောင်းဖြင့် ထွက်ခွာသွားခြင်းဖြစ်သည်။

ထို့ပြင် မိုင်းလားအဖွဲ့ (NDAA) သည် မြောက်ပိုင်းမဟာမိတ် နေပြည်တော်မှ ဇူလိုင် ၁၄ ရက် နံနက်ပိုင်းတွင် ပုဂံသို့ ကားဖြင့်လည်းကောင်း၊ ရှမ်းပြည်တိုးတက်ရေးပါတီ (SSPP/SSA)သည် ၎င်းတို့၏ ဌာနချုပ်သို့ ဇူလိုင် ၁၄ ရက်တွင်ပင် ကားလမ်းခရီးဖြင့် လည်းကောင်း အသီးသီး ပြန်လည်ထွက်ခွာသွားသည်။

မြောက်ပိုင်း မဟာမိတ်တိုင်းရင်းသား လက်နက်ကိုင်အဖွဲ့များတွင် ”ဝ” အဖွဲ့ (UWSP/UWSA)၊ ကချင်အဖွဲ့ (KIO/KIA) မိုင်းလားအဖွဲ့ (NDAA)၊ ရှမ်းပြည်တိုးတက်ရေးပါတီ (SSPP) တို့သည် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇူလိုင် ၁၁ ရက်တွင် လည်းကောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ဇူလိုင် ၁၂ ရက်တွင်လည်းကောင်း တွေ့ဆုံခဲ့ကြသည်။

ကိုးကန့်အဖွဲ့ (MNDAA)၊ တအန်းအဖွဲ့ (TNLA)၊ ရခိုင်အဖွဲ့ (AA) တို့သည် ဇူလိုင် ၁၁ ရက်တွင် ဒုတိယ တပ်မတော် ကာကွယ်ရေးဦးစီးချုပ်နှင့် လည်းကောင်း ဇူလိုင် ၁၂ ရက်တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်န်းစုကြည်နှင့် လည်းကောင်း တွေ့ဆုံခဲ့ကြသည်။

အစိုးရအကြီးအကဲ၊ တပ်မတော်အကြီးအကဲများနှင့် မြောက်ပိုင်းမဟာမိတ် တိုင်းရင်းသား လက်နက်ကိုင် အဖွဲ့များ၏ အဆိုပါ တွေ့ဆုံမှုများတွင် ပြည်တွင်းငြိမ်းချမ်းရေး တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) တွင် ပါဝင်လက်မှတ်ရေးထိုးရေး စသည့်ကိစ္စရပ်များကို ဆွေးနွေးခဲ့ကြကြောင်း သိရသည်။

အစိုးရ၏ ငြိမ်းချမ်းရေးကော်မရှင်နှင့် မြောက်ပိုင်းတိုင်းရင်းသားလက်နက်ကိုင် အဖွဲ့များ တွေ့ဆုံ

အစိုးရ၏ ငြိမ်းချမ်းရေးကော်မရှင်နှင့် NCA မထိုးရသေးသည့် မြောက်ပိုင်းတိုင်းရင်း သားလက်နက်ကိုင်အဖွဲ့များသည်  နေပြည်တော်ရှိ Horizon Lake View ဟိုတယ်တွင် ဇူလိုင် ၁၃ ရက် မွန်းလွဲပိုင်းက တွေ့ဆုံခဲ့သည်။

ထိုသို့တွေ့ဆုံမှုအပြီးတွင်  ငြိမ်းချမ်းရေး ကော်မရှင် ဒုတိယဥက္ကဋ္ဌ ဦးသိန်းဇော်က ငြိမ်းချမ်းရေးလုပ်ငန်းစဉ် ဖော်ဆောင်နိုင်ရေးအတွက် NCA လက်မှတ်ရေးထိုးထားခြင်း မရှိသေးသော တိုင်းရင်းသားလက်နက်ကိုင်အဖွဲ့များနှင့် မကြာခဏတွေ့ဆုံရန် စီစဉ်ထားကြောင်း ပြောကြားသည်။

“မကြာမကြာတွေ့မှပဲ ငြိမ်းချမ်းရေးဆိုတာ ဖော်ဆောင်လို့ရမှာပေါ့။ ဟုတ်တယ်မလား။ အဲဒီတော့ မကြာမကြာတွေ့ဖို့လည်း ကျွန်တော်တို့ အစီအစဉ်လုပ်ပြီးသားပါ။ နောက်လာခဲ့တဲ့ တိုင်းရင်းသားခေါင်းဆောင်တွေအနေနဲ့ နိုင်ငံတော်အတိုင်ပင်ခံနဲ့ တွေ့ပြီးတော့  နိုင်ငံတော်အစိုးရရဲ့ သဘောထားတွေလည်း သူတို့အားလုံးသိသွားပြီ။ တပ်မတော်ကာ ကွယ်ရေးဦးစီးချုပ်နဲ့ ဒုတိယတပ်မတော်ကာကွယ်ရေး ဦးစီးချုပ်တို့နဲ့တွေ့ဆုံပြီးတော့လည်း တပ်မတော်ရဲ့ သဘောထားတွေလည်း သူတို့အားလုံးသိသွားပြီ။ ဆိုတော့ ဒီဘက်က သဘောထားတွေ သိပြီးသွားလို့ သူတို့ဘက်က သဘောထားကလည်း ဒီဘက်ကသဘောထားနဲ့ ညှိနှိုင်းလို့ရသွားပြီဆိုရင်တော့ အခြေအနေကောင်းတွေ ထွက်ပေါ်လာမှာပေါ့” ဟု ဦးသိန်းဇော်က ပြောကြားသည်။

NCA လက်မှတ်ရေးထိုးထားခြင်း မရှိသေးသော တိုင်းရင်းသားလက်နက်ကိုင်အဖွဲ့များနှင့် မကြာခဏ တွေ့ဆုံ၍ ယုံကြည်မှု တည်ဆောက်ပြီးမှသာ ငြိမ်းချမ်းရေး ဖော်ဆောင်၍ရမည်ဖြစ်သည်ဟု  ၎င်းက ဆိုသည်။

ထိုသို့ တွေ့ဆုံရာတွင် ကိုးကန့်အဖွဲ့ (MNDAA) ၊ တအန်းအဖွဲ့ (TNLA) ၊ ရခိုင်အဖွဲ့ (AA) တို့နှင့်လည်း တွေ့ဆုံသွားမည်ဖြစ်ပြီး မြောက်ပိုင်းမဟာမိတ် တိုင်းရင်းသား လက်နက်ကိုင်အဖွဲ့ခုနစ်ဖွဲ့ကို တစ်ဖွဲ့ချင်းစီ လည်းကောင်း စုပေါင်း၍လည်းကောင်း တွေ့ဆုံသွားမည်ဟု ဦးသိန်းဇော်က ပြောကြားသည်။

ငြိမ်းချမ်းရေးလုပ်ငန်းစဉ်သည် နိုင်ငံတော်၏ လုံခြုံရေးနှင့် ပတ်သက်နေသော ကိစ္စဖြစ်သည့်အတွက် သတင်းထုတ်ပြန်၍ရသည့် အချက်များကို သတင်းထုတ်ပြန်ပေးသွားမည်ဖြစ်ပြီး သတင်းထုတ်ပြန်၍ မရသည့် အချက်များ ရှိပါက သတင်းထုတ်ပြန်ပေးမည် မဟုတ်ကြောင်း ပြောကြားသည်။ မင်းနိုင်စိုး