နှစ် ၃၀ ပြည့် လူထုဒီမိုကရေစီ အရေးတော်ပုံ အခမ်းအနား ကျင်းပနေစဉ် ဖမ်းဆီးခံခဲ့ရသည့် မြေယာအရေးတက်ကြွလှုပ်ရှားသူ၏ လေးကြိမ်မြောက် ရုံးချိန်းတွင် တရားလိုတစ်ဦးကို ဆက်လက်စစ်ဆေး

မြေယာအရေးတက်ကြွလှုပ်ရှားသူ ကိုအေးသိန်း (၀ဲမှယာ သုံးဦးမြောက်) အား ပြင်ဦးလွင်မြို့နယ်တရားရုံး ရုံးချိန်းတွင် တွေ့ရစဉ်

နှစ် ၃၀ ပြည့် ပုလဲရတုအထိမ်းအမှတ် ရှစ်လေးလုံးလူထုဒီမိုကရေစီ အရေးတော်ပုံ အခမ်းအနားကို မန္တလေးမြို့တွင် သြဂုတ် ၈ ရက်က ပြုလုပ်နေစဉ် ရဲတပ်ဖွဲ့၏ ဖမ်းဆီး ခေါ်ဆောင်ခြင်းခံခဲ့ရသည့် မြေယာအရေး တက်ကြွလှုပ်ရှားသူ ကိုအေးသိန်း၏ လေးကြိမ်မြောက် ရုံးချိန်းကို စက်တင်ဘာ ၁၃ ရက်က ပြင်ဦးလွင်မြို့နယ် တရားရုံးတွင် ချိန်းဆိုခဲ့ပြီး တရားလိုတစ်ဦးကို ဆက်လက် စစ်ဆေးခဲ့ကြောင်း သိရသည်။

မြေယာအရေးတက်ကြွလှုပ်ရှားသူ ကိုအေးသိန်းကို ပြင်ဦးလွင်မြို့နယ် ပြင်စာကျေးရွာတွင် ၂၀၁၆ ခုနှစ်အတွင်းက ထွန်းတုံးတိုက်ပွဲ ပြုလုပ်ခဲ့မှုကြောင့် ရာဇသတ်ကြီးဥပဒေပုဒ်မ ၄၂၇၊ ၄၄၇၊ ၄၄၀၊ ၄၂၀၊ ၃၉၂ အစရှိသည့် ပုဒ်မမျိုးစုံဖြင့် တရားလို အသီးသီးက အမှုဖွင့် တရားစွဲဆိုထားခြင်းဖြစ်ကြောင်း ဒေသခံတောင်သူများထံမှ သိရသည်။ စက်တင်ဘာ ၁၃ ရက်က ပြင်ဦးလွင်မြို့နယ်တရားရုံးတွင် စစ်ဆေးခဲ့သည့်အမှုတွင် မြေယာအရေး လှုပ်ရှားသူ ကိုအေးသိန်းနှင့်အတူ ဖမ်းဆီးခံထားရသည့် ဒေသခံတောင်သူနှစ်ဦးတို့ကိုပါ ရုံးထုတ်စစ်ဆေးခဲ့ကြောင်း သိရသည်။

“ဒီနေ့ ကိုအေးသိန်းအမှုတွေထဲက CB ဘဏ်က တရားလိုဖြစ်တဲ့ ဦးကိုကိုလွင်ကို စစ်ဆေးပါတယ်။ တခြားတရားလိုတွေက ဒီနေ့မလာတဲ့အတွက် တရားလိုတစ်ဦးကိုပဲ စစ်ဆေးနိုင်ခဲ့တာပါ။ စွဲဆိုထားတဲ့ပုဒ်မကတော့ ၄၄၇၊ ၄၂၇၊ ၃၉၂ စတဲ့ ပုဒ်မတွေပါ။ နောက်ရုံးချိန်းကို စက်တင်ဘာ ၂၀ ရက် ပြန်ချိန်းဆိုထားပါတယ်” ဟု မြေယာအရေးလှုပ်ရှားသူ ကိုအေးသိန်းဘက်နှင့် တောင်သူများဘက်မှ အခမဲ့ အမှုလိုက်ပါ ဆောင်ရွက်ပေးနေသည့် တရားလွှတ်တော်ရှေ့နေ ဦးနိုင်နိုင်ထွန်းက ပြောကြားသည်။

“ပြင်ဦးလွင်မြို့နယ်တရားရုံးမှာ ပုဒ်မမျိုးစုံတပ်ပြီး တရားစွဲဆိုထားတာမှာ ကျွန်တော်ကိုယ်တိုင်ကျူးလွန်ခြင်း မရှိတဲ့ ဓားပြမှု၊ လုယက်မှုလို ပုဒ်မတွေတပ်ပြီး တရားစွဲဆိုထားတာတွေက လွဲနေတယ်ဗျ။ ကျွန်တော်တို့က အဲဒီလို လုပ်ခဲ့တာ ဘာတစ်ခုမှမရှိပါဘူး။ အခုလို အာမခံမရနိုင်တဲ့ ပုဒ်မတွေတပ်ပြီး တရားစွဲဆိုတယ်ဆိုတာကလည်း သက်ဆိုင်ရာ ရဲတပ်ဖွဲ့နဲ့ တရားစွဲအဖွဲ့အစည်းတွေက မြေသိမ်းသူခရိုနီအလိုကျ တရားရုံးကို တရားစွဲ တင်ပို့လိုက်တယ်လို့ မြင်ပါတယ်” ဟု ပုဒ်မမျိုးစုံတို့ဖြင့် အမှုဖွင့်ဖမ်းဆီးခံထားရသည့် မြေယာအရေးတက်ကြွလှုပ်ရှားသူ ကိုအေးသိန်းက ပြောကြားသည်။

ဖမ်းဆီးခံခဲ့ရသည့် မြေယာအရေး တက်ကြွလှုပ်ရှားသူ ကိုအေးသိန်းမှာ ၂၀၁၆ ခုနှစ် အောက်တိုဘာလက ပြင်ဦးလွင်မြို့နယ် ပြင်စာကျေးရွာတွင် သိမ်းဆည်းမြေယာများ ပြန်လည်ရရှိရေး ဒေသခံတောင်သူများနှင့်အတူ ထွန်တုံးတိုက်ပွဲ ပြုလုပ်ခဲ့သဖြင့် ရာဇသတ်ကြီးဥပဒေပုဒ်မ ၄၂၇၊ ၄၄၇၊ ၄၄၀၊ ၄၂၀၊ ၂၉၄၊ ၃၉၂ အစရှိသည့် ပုဒ်မမျိုးစုံဖြင့် အမှုဖွင့်ခံထားရသူတစ်ဦးဖြစ်ပြီး ရဲတပ်ဖွဲ့မှ အမှုဖွင့်စဉ်ကပင် ဖမ်းဝရမ်းထုတ်ထားခြင်းခံထားရသူ တစ်ဦးဖြစ်ကြောင်း သိရသည်။ လက်ရှိ ဖမ်းဆီးခံထားရသည့် ကိုအေးသိန်းမှာ အဆိုပါပုဒ်မများအားလုံးဖြင့် ဆက်လက်ထုချေ ရှင်းလင်းကာ အမှုရင်ဆိုင်သွားရမည် ဖြစ်ကြောင်း သိရသည်။ ဌေးလှအောင်

မန္တလေးမြို့တွင် နှစ် (၃၀) ပြည့် လူထုဒီမိုကရေစီ အရေးတော်ပုံ အခမ်းအနား ကျင်းပစဉ် ဖမ်းဆီးခံရသည့် မြေယာအရေး တက်ကြွလှုပ်ရှားသူ၏ သုံးကြိမ်မြောက် ရုံးချိန်းတွင် တရားလိုတစ်ဦးအား စစ်ဆေး

နှစ် (၃၀) ပြည့် ပုလဲရတု အထိမ်းအမှတ် ရှစ်လေးလုံး လူထုဒီမိုကရေစီ အရေးတော်ပုံ အခမ်းအနားကို မန္တလေးမြို့ရှိ ဓမ္မသာလခန်းမတွင် သြဂုတ် ၈ ရက်က ပြုလုပ်နေစဉ် ရဲတပ်ဖွဲ့၏ ဖမ်းဆီးခေါ်ဆောင်ခြင်း ခံခဲ့ရသည့် မြေယာအရေး တက်ကြွလှုပ်ရှားသူ ကိုအေးသိန်း၏ သုံးကြိမ်မြောက် ရုံးချိန်းကို သြဂုတ် ၃၀ ရက်က ပြင်ဦးလွင်မြို့နယ် တရားရုံးတွင် ချိန်းဆိုခဲ့ပြီး တရားလိုတစ်ဦးအား ဆက်လက် စစ်ဆေးခဲ့ကြောင်း သိရသည်။

မြေယာအရေး တက်ကြွလှုပ်ရှားသူ ကိုအေးသိန်းအား ပြင်ဦးလွင်မြို့နယ် ပြင်စာကျေးရွာတွင် ၂၀၁၆ ခုနှစ်အတွင်းက ထွန်းတုံးတိုက်ပွဲ ပြုလုပ်မှုကြောင့် ရာဇသတ်ကြီး ဥပဒေပုဒ်မ ၄၂၇၊ ၄၄၇၊ ၄၄၀၊ ၄၂၀၊ ၂၉၄၊ ၅၀၆၊ ၃၉၂ အစရှိသည့် ပုဒ်မမျိုးစုံဖြင့် အမှုဖွင့် တရားစွဲဆိုထားခြင်း ဖြစ်သည်။

“ဒီနေ့ ကိုအေးသိန်း အမှုတွေထဲက တရားလို ဒေါ်သန်းသန်းလေးကို စစ်ဆေးပါတယ်။ တခြားတရားလိုတွေက ဒီနေ့ မလာတဲ့အတွက် တရားလို တစ်ဦးကိုပဲ စစ်ဆေးနိုင်ခဲ့တာပါ။ စွဲဆိုထားတဲ့ ပုဒ်မကတော့ ၄၄၇၊ ၄၂၇၊ ၄၂၀ စတဲ့ ပုဒ်မတွေပါ။ နောက်ရုံးချိန်းကို စက်တင်ဘာ ၆ ရက် ပြန်ချိန်းဆိုထားပါတယ်”ဟု မြေယာအရေး လှုပ်ရှားသူ ကိုအေးသိန်းဘက်က အခမဲ့ အမှုလိုက်ပါ ဆောင်ရွက်ပေးနေသည့် တရားလွှတ်တော်ရှေ့နေ ဦးနိုင်နိုင်ထွန်းက ပြောကြားသည်။

ဖမ်းဆီးခံခဲ့ရသည့် မြေယာအရေး တက်ကြွလှုပ်ရှားသူ ကိုအေးသိန်းမှာ ၂၀၁၆ ခုနှစ် အောက်တိုဘာက ပြင်ဦးလွင်မြို့နယ် ပြင်စာကျေးရွာတွင် သိမ်းဆည်းမြေယာများ ပြန်လည်ရရှိရေး ဒေသခံ တောင်သူများနှင့်အတူ ထွန်တုံးတိုက်ပွဲ ပြုလုပ်သဖြင့် ရာဇသတ်ကြီး ဥပဒေပုဒ်မ ၄၂၇၊ ၄၄၇၊ ၄၄၀၊ ၄၂၀၊ ၂၉၄၊ ၅၀၆၊ ၃၉၂ အစရှိသည့် ပုဒ်မမျိုးစုံဖြင့် အမှုဖွင့်ခံထားရသူ တစ်ဦးဖြစ်ပြီး ရဲတပ်ဖွဲ့က အမှုဖွင့်စဉ်ကပင် ဖမ်းဝရမ်း ထုတ်ထားခြင်း ခံထားရသူတစ်ဦး ဖြစ်ကြောင်း သိရသည်။

ဖမ်းဆီးခံထားရသည့် မြေယာအရေး လှုပ်ရှားသူ ကိုအေးသိန်းနှင့် အမှုတွဲတူသည့် ဒေသခံတောင်သူများနှင့် မြေယာအရေး တက်ကြွလှုပ်ရှားသူ နှစ်ဦးမှာ အချုပ်ဖြင့် ၁၃ လကျော်ကြာ အမှုရင်ဆိုင်ခဲ့ရပြီး ၂၀၁၈ ခုနှစ် ဇွန်တွင် ပြင်ဦးလွင်မြို့နယ် တရားရုံးက ပုဒ်မအချို့ကို ပယ်ဖျက်ကာ တရားရှင်လွှတ်ပေးခဲ့ပြီး အာမခံရရှိနိုင်သည့် ပုဒ်မဖြင့်သာ စွဲချက်အမိန့် ချမှတ်ခဲ့သည်။

နှစ် ၃၀ ပြည့် လူထု ဒီမိုကရေစီ အရေးတော်ပုံ အခမ်းအနား ကျင်းပနေစဉ် ဖမ်းဆီးခံခဲ့ရသည့် မြေယာအရေး တက်ကြွလှုပ်ရှားသူကို ပုသိမ်ကြီးမြို့နယ် တရားရုံးတွင် ငြိမ်းစုစီ ဥပဒေပုဒ်မ ၁၈ ဖြင့် ထပ်မံ တရားစွဲဆို

သြဂုတ် ၂၇ ရက် နံနက်ပိုင်းက ပုသိမ်ကြီးမြို့နယ် တရားရုံး ရုံးထုတ်တွင် မြေယာအရေး တက်ကြွလှုပ်ရှားသူ ကိုအေးသိန်းကို တွေ့ရစဉ်

နှစ် (၃၀) ပြည့် ပုလဲရတု အထိမ်းအမှတ် ရှစ်လေးလုံး လူထု ဒီမိုကရေစီ အရေးတော်ပုံ အခမ်းအနားကို မန္တလေးမြို့ရှိ ဓမ္မသာလခန်းမတွင် သြဂုတ် ၈ ရက်က ပြုလုပ်နေစဉ် မြေယာအရေး တက်ကြွလှုပ်ရှားနေသူ တစ်ဦးကို ရဲတပ်ဖွဲ့က လာရောက် ဖမ်းဆီးခေါ်ဆောင်သွားခဲ့ပြီး ပြင်ဦးလွင်မြို့နယ် တရားရုံး၌ ရာကြီးအမှုများဖြင့် တရားစွဲဆိုထားသည့်အပြင် ငြိမ်းစုစီ ဥပဒေပုဒ်မ ၁၈ ဖြင့် ပုသိမ်ကြီးမြို့နယ် တရားရုံးတွင် ထပ်မံအမှုဖွင့် တရားစွဲဆိုခြင်း ခံထားရကြောင်း သိရသည်။

မြေယာအရေး တက်ကြွလှုပ်ရှားသူ ကိုအေးသိန်းကို ၂၀၁၆ ခုနှစ်က ပုသိမ်ကြီးမြို့နယ် ရေတံခွန်တောင်ခြေရှိ စစ်မှုထမ်းဟောင်း လေ့ကျင့်ရေး သင်တန်းကျောင်းက သိမ်းဆည်းထားသည့် ယာမြေများအတွင်း ၀င်ရောက် ထွန်ယက်ကာ ထွန်တုံးတိုက်ပွဲ ပြုလုပ်ခဲ့ခြင်းကြောင့် မြို့နယ် ရဲတပ်ဖွဲ့မှူးက တရားလိုပြုလုပ်ကာ ငြိမ်းစုစီဥ ပဒေပုဒ်မ ၁၈ ဖြင့် အမှုဖွင့် တရားစွဲဆိုထားခဲ့ခြင်း ဖြစ်ကြောင်း ကိုအေးသိန်းက ဆိုသည်။ ယင်းသို့ ပုဒ်မ ၁၈ ဖြင့် အမှုဖွင့် တရားစွဲဆိုထားမှုနှင့် ပတ်သက်၍ သြဂုတ် ၂၇ ရက် နံနက်ပိုင်းက ပုသိမ်ကြီးမြို့နယ် တရားရုံး၌ ရုံးထုတ်ခဲ့ခြင်း ဖြစ်သည်။

“ဒီနေ့ ပုသိမ်ကြီးမြို့နယ် တရားရုံးမှာ ထပ်ပြီး တရားစွဲထားတဲ့ အမှုက ရေတံခွန်တောင်ခြေမှာရှိတဲ့ စစ်မှုထမ်းဟောင်းအဖွဲ့က သိမ်းဆည်းထားတဲ့ ယာမြေတွေနဲ့ ပတ်သက်ပြီး ကျွန်တော်တို့ တောင်သူတွေက တိုင်းဒေသကြီး အစိုးရအဖွဲ့ကို ကြိမ်ဖန်များစွာ စာတွေ တင်ပြခဲ့ပါတယ်။ အဲဒီလို တင်ပြခဲ့တာမှာ အဆင်မပြေခဲ့တာကြောင့် သပိတ်စခန်း ဖွင့်ခဲ့တာနဲ့ ပတ်သက်ပြီး အခုလို ပုဒ်မ ၁၈ နဲ့ တရားစွဲတာပါ။ အခုပုဒ်မ ၁၈ အမှုက အချိန်နှစ်နှစ် ကျော်ကြာမှ စပြီး စစ်ဆေးတဲ့အမှုပါ။ နောက်တစ်ခု ပြောချင်တာက ကျွန်တော့်ကို ရှစ်လေးလုံး အခမ်းအနားပွဲမှာ ဖမ်းတာကတော့ ပြည်သူ့အရေးတော်ပုံကြီးကို ကိုယ်ထိလက်ရောက် မထီမဲ့မြင်လုပ်ပြီးတော့ စော်ကားလိုက်တာပဲဗျ။ တကယ်ဆိုရင် ကျွန်တော့်ကို အဲဒီနေ့မတိုင်ခင် အချိန်မရွေး ဖမ်းလို့ရပါတယ်။ ရှစ်လေးလုံး အခမ်းအနားကို တစ်နည်း မဟုတ်တစ်နည်းနဲ့ အနှောင့်အယှက်ပေးတယ်လို့ ယူဆပါတယ်။ နောက်ပြီး ပြင်ဦးလွင်မြို့နယ် တရားရုံးမှာ ပုဒ်မမျိုးစုံတပ်ပြီး တရားစွဲဆိုထားတာမှာ ကျွန်တော်ကိုယ်တိုင် ကျူးလွန်ခြင်း မရှိတဲ့ ဓားပြမှု၊ လုယက်မှုလို ပုဒ်မတွေ တပ်ပြီးတော့ တရားစွဲဆိုထားတာတွေက လွဲနေတယ်။ ကျွန်တော်တို့က အဲဒီလိုလုပ်ခဲ့တာ ဘာတစ်ခုမှ မရှိပါဘူး။ အခုလို အာမခံမရနိုင်တဲ့ ပုဒ်မတွေ တပ်ပြီး တရားစွဲဆိုတယ် ဆိုတာကလည်း သက်ဆိုင်ရာ ရဲတပ်ဖွဲ့နဲ့ တရားစွဲအဖွဲ့အစည်းတွေက မြေသိမ်းသူ ခရိုနီအလိုကျနဲ့ လာဘ်ပေးလာဘ်ယူပြီး တရားရုံးကို တရားစွဲ တင်ပို့လိုက်တယ်လို့ မြင်ပါတယ်”ဟု ပုဒ်မမျိုးစုံတို့ ဖြင့် အမှုဖွင့် ဖမ်းဆီးခံထားရသည့် မြေယာအရေး တက်ကြွလှုပ်ရှားသူ ကိုအေးသိန်းက ပြောကြားသည်။

သိမ်းဆည်းယာမြေများ ပြန်လည်ရရှိရေး သပိတ်စခန်းဖွင့် တောင်းဆိုခဲ့ခြင်းကြောင့် ငြိမ်းချမ်းစွာ စုဝေးခွင့်နှင့် စီတန်းလှည့်လည်ခွင့်ဆိုင်ရာ ဥပဒေပုဒ်မ ၁၈ ဖြင့် ပုသိမ်ကြီးမြို့နယ် တရားရုံးတွင် အမှုဖွင့်ခံထားရသည့် မြေယာအရေး လှုပ်ရှားသူ၏ အမှုရုံးချိန်းကို စက်တင်ဘာ ၁၀ ရက်သို့ ဆက်လက် ချိန်းဆိုခဲ့ကြောင်း သိရသည်။ ပုသိမ်ကြီးမြို့နယ် တရားရုံးတွင် သြဂုတ် ၂၇ ရက်က ချိန်းဆိုခဲ့သည့် ရုံးချိန်း၌ တရားလိုပြသက်သေ ရပ်ကျေးအုပ်ချုပ်ရေးမှူး တစ်ဦးကို စစ်ဆေးရန် ချိန်းဆိုခဲ့သော်လည်း လာရောက်ခဲ့ခြင်း မရှိသဖြင့် အမှုစစ်ဆေးနိုင်ခြင်း မရှိခဲ့ကြောင်း သိရသည်။