‘ကရာကီနဲ့ ချန်ပီယံကာကွယ်ပွဲမှာ သုံးချီအတွင်း အပြီးသတ်မှာပါ’ ဆိုတဲ့ အောင်လအန်ဆန်

ဓာတ်ပုံ – ညီညီစိုးညွန့်

ONE MMA ၀ိတ်တန်းနှစ်ခုချန်ပီယံ အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံဆု ကာကွယ်ပွဲအဖြစ် အောက်တိုဘာ ၂၆ ရက်တွင် လက်ဘနွန်နိုင်ငံသား ကရာကီနှင့် ယှဉ်ပြိုင် ထိုးသတ်မည်ဖြစ်သည်။ ချန်ပီယံဆု ကာကွယ်ရန် ပြင်ဆင်မှုနှင့် ပတ်သက်၍ အောင်လအန်ဆန်အား အွန်လိုင်းမှတစ်ဆင့် မေးမြန်းမှုကို ဖော်ပြအပ်ပါသည်။

မစ်ဒယ်ဝိတ်တန်း ကမ္ဘာ့ချန်ပီယံဆု ကာကွယ်ပွဲအတွက် ပြင်ဆင်မှု

ဒီပြိုင်ပွဲအတွက် ရည်ရွယ်ပြီး လေ့ကျင့်လာတာ ၁၂ ပတ်လောက် ရှိပါပြီ။ သုံးလကျော်လောက် ပြင်ဆင်ချိန်ရတာကြောင့် ပြိုင်ပွဲမှာ အကောင်းဆုံးပုံစံနဲ့ ယှဉ်ပြိုင်ထိုးသတ်နိုင်မယ်လို့ ယုံကြည်ပါတယ်။

ကရာကီအပေါ်အမြင်

ကရာကီက ချုပ်တာကောင်းတယ်။ နပန်းလည်း ကျွမ်းကျင်တယ်။ Ground Fight ထိုးသတ်တာမှာ ကောင်းမွန်ပါတယ်။ ရှုံးပွဲမရှိ မှတ်တမ်းကလည်း သူ့ကို တွန်းအားဖြစ်စေမှာ သေချာပါတယ်။ သူ့ရဲ့အားနည်းချက်တစ်ခုက ကျွန်တော့်လောက် အတွေ့အကြုံ မရှိတာပါပဲ။ ကရာကီက ကိုးပွဲစလုံး အနိုင်ရထားတဲ့သူဖြစ်တာကြောင့် ယုံကြည်မှုအပိုင်းမှာ အမြင့်ဆုံး ရှိနေနိုင်ပါတယ်။ သူ့ရဲ့ထိုးသတ်ပုံတွေ၊ အားနည်းချက်၊ အားသာချက်တွေကို လေ့လာထားပါတယ်။

ယခုပွဲတွင် ထိုးသတ်မည့်ပုံစံ

တစ်ချီ၊ နှစ်ချီအတွင်း ပွဲသိမ်းနိုင်အောင် ကြိုးစားနေပါတယ်။ အများဆုံး သုံးချီထက် မပိုပါဘူး။ သုံးချီအတွင်း အပြီးသတ်မှာပါ။

ချန်ပီယံဆု ကာကွယ်နိုင်ရန် ပြင်ဆင်ထားမှု

ကစားသမားတိုင်းရဲ့ ရည်မှန်းချက်က ချန်ပီယံဖြစ်ဖို့ပါ။ ကျွန်တော် ထိုးသတ်နေတဲ့ MMA ပြိုင်ပွဲတစ်ခုတည်းကို ပြောရမယ်ဆိုရင် ကစားသမားတိုင်းက သူတို့ထိုးသတ်နေတဲ့ ၀ိတ်တန်းတိုင်းမှာ ချန်ပီယံဖြစ်ချင်ပါတယ်။ ဒါကြောင့် ကျွန်တော့်အနေနဲ့ ပိုပြီးခက်ခဲတဲ့ ပွဲတွေကို ယှဉ်ပြိုင်လာရပါတယ်။ ကျွန်တော့်ရဲ့ ပထမရည်မှန်းချက်က အောင်မြင်ခဲ့ပြီလို့ ပြောရမှာပါ။ မစ်ဒယ်ဝိတ်တန်းမှာ ကမ္ဘာ့ချန်ပီယံဆု ရယူနိုင်ခဲ့သလို လိုက်ဟဲဗီးဝိတ်မှာလည်း ကမ္ဘာ့ချန်ပီယံ ဖြစ်ခဲ့ပါတယ်။ ဒါပေမဲ့ ကျွန်တော့်ရဲ့ရည်မှန်းချက်တွေ မပြီးဆုံးသေးပါဘူး။ ချန်ပီယံဆုတွေ ကာကွယ်ဖို့ အစဉ်အမြဲ ကြိုးစားနေရပါတယ်။ အကောင်းဆုံးအသင်းနဲ့ လေ့ကျင့်နေပြီး သူများထက်သာအောင်၊ ကိုယ့်ကိုယ်ကိုယ်ကျွမ်းကျင်အောင် လေ့ကျင့်နေပါတယ်။ ကျွန်တော် ကမ္ဘာ့ချန်ပီယံဖြစ်နေပြီဆိုပြီး ရပ်တန့်မနေပါဘူး။ အမြဲတမ်းသင်ယူပြီး အရာရာတိုင်းမှာ ထိပ်ဆုံးက ရပ်တည်နိုင်ဖို့ ကြိုးစားနေပါတယ်။ ဒါမှ စွမ်းဆောင်ရည် တိုးတက်လာပြီး လိုချင်တဲ့ ရည်မှန်းချက်ကို ဆက်ထိန်းထားနိုင်မှာပါ။

ပွဲချိန်ပြည့် ထိုးသတ်နိုင်မည့် ကြံ့ခိုင်မှုရရန် နေထိုင်လေ့ကျင့်မှု

ကျွန်တော့်အနေနဲ့ အစားအသောက်ကို Program အတိုင်း စားသောက်ပါတယ်။ ဆရာဝန်နဲ့ ညှိနှိုင်းပြီး သတ်မှတ်ထားတဲ့အချိန်မှာ သတ်မှတ်ထားတဲ့ အစားအသောက်ကို စားသုံးပါတယ်။ ကုန်ခန်းသွားတဲ့အားအင်တွေ ဖြည့်တင်းဖို့ အင်အားပြည့်အစာတွေ စားသုံးသလို လေ့ကျင့်မှု ပြင်းပြင်းထန်ထန် လုပ်တဲ့အချိန်မှာ ပိုပြီးစားပါတယ်။ ကမ္ဘာ့ချန်ပီယံကာကွယ်ပွဲ ထိုးသတ်မယ်ဆိုရင် ငါးမိနစ် ငါးချီနဲ့ စုစုပေါင်း ၂၅ မိနစ်ကြာပါတယ်။ ဒီလို ၂၅ မိနစ်စလုံး ထိုးသတ်နိုင်မယ့် ကြံ့ခိုင်မှုရအောင် တစ်ရက်ကို အနည်းဆုံး လေး၊ ငါးနာရီ လေ့ကျင့်ရပါတယ်။ တစ်ပတ်မှာ လေ့ကျင့်ချိန် ပျမ်းမျှ နာရီ ၃၀ ကျော်ရှိပါတယ်။

အနာဂတ် အစီအစဉ်

၃၃ နှစ်ရှိပြီဖြစ်ပေမဲ့ အရမ်းကျန်းမာပါတယ်။ နှစ်နှစ်၊ သုံးနှစ်လောက် ဆက်ထိုးနိုင်ပါသေးတယ်။

အောင်လအန်ဆန်၏ စွမ်းရည်အပေါ် ONE Championship ဥက္ကဋ္ဌ ချီးကျူး

အောက်တိုဘာ ၂၆ ရက်တွင် MMA မစ်ဒယ်ဝိတ်တန်း ချန်ပီယံကာကွယ်ပွဲ ထိုးသတ်မည့် အောင်လအန်ဆန် (ဓာတ်ပုံ-ကောင်းထက်အောင်)

ONE Championship အဖွဲ့အစည်း ဥက္ကဋ္ဌနှင့် CEO ဖြစ်သူ Chatri Sityodtong က ONE မစ်ဒယ်ဝိတ်တန်းနှင့် လိုက်ဟဲဗီး ၀ိတ်တန်းကမ္ဘာ့ချန်ပီယံ အောင်လအန်ဆန်၏ စွမ်းရည်အပေါ် ချီးကျူးပြောဆိုမှုများ ပြုလုပ်ခဲ့သည်။

“ဘယ်အချိန်မဆို ကျွန်တော်တို့အားလုံး ရန်ကုန်ကိုသွားလည်ဖို့ အဆင်သင့်ရှိပါတယ်။ အောင်လအန်ဆန်ဟာ ၀ိတ်တန်းနှစ်ခုရဲ့ ချန်ပီယံတစ်ဦးပါ။ သူ့ကို သူ့နိုင်ငံသားတွေက အရမ်းချစ်ပါတယ်။ သူ့ရဲ့ MMA ယှဉ်ပြိုင် တိုက်ခိုက်တဲ့ စွမ်းဆောင်ရည်ကလည်း အံ့မခန်းပါပဲ။ သူ့မှာရှိတဲ့ စွမ်းဆောင်ရည်က ဘယ်သူ့ကိုမဆို အကောင်းဆုံး ယှဉ်ပြိုင်တိုက်ခိုက်နိုင်စွမ်း ရှိတယ်ဆိုတာကို ပြသနေပါတယ်။ အခုတော့ သူ့ရဲ့ MMA တိုက်ခိုက်မှုစွမ်းရည် အစစ်အမှန်ကို ထပ်မံပြသရတော့မှာပါ။ မိုဟာမက်ကရာကီက သူ့ရဲ့စွမ်းဆောင်နိုင်တဲ့ အရည်အချင်းကို စမ်းသပ်ပါလိမ့်မယ်။ မိုဟာမက်ကရာကီဟာ မစ်ဒယ်ဝိတ်တန်းမှာ ယုံမှားသံသယရှိစရာမလိုတဲ့ စိန်ခေါ်နိုင်သူတစ်ဦးပါ။ ကျွန်တော်တို့ မကြာခင်မှာ သုဝဏ္ဏအားကစားရုံအတွင်းကို သွားကြတာပေါ့” ဟု ၎င်းက MMA Weekly သို့ ပြောကြားသည်။

အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံကာကွယ်ပွဲအဖြစ် အောက်တိုဘာ ၂၆ ရက်တွင် ရန်ကုန်မြို့ရှိ အမျိုးသားအားကစားပြိုင်ပွဲရုံ (၁) သုဝဏ္ဏ၌ လက်ဘနွန်နိုင်ငံသား MMA ကစားသမား မိုဟာမက် ကရာကီနှင့် ထိုးသတ်ရမည်ဖြစ်သည်။ မိုဟာမက်ကရာကီသည် အသက် ၂၇ နှစ်ရှိပြီး MMA ပြိုင်ပွဲ ကိုးပွဲထိုးသတ်ထားရာ ကိုးပွဲစလုံး အနိုင်ရထားသည်။

အောင်မြင်မှုများစွာ ထပ်မံရယူလိုကြောင်း ၀ိတ်တန်းနှစ်ခုချန်ပီယံ အောင်လအန်ဆန် ပြောကြား

 

အောင်လအန်ဆန်၏လက်သီး ဟဆဲဂါဝါကို ထိမှန်နေစဉ် (ဓာတ်ပုံ-ညီညီစိုးညွန့်)

ONE မစ်ဒယ်ဝိတ်တန်းနှင့် လိုက်ဟဲဗီး ၀ိတ်တန်းချန်ပီယံ အောင်လအန်ဆန်က မစ်ဒယ်ဝိတ်တန်း ကမ္ဘာ့ချန်ပီယံဆု ကာကွယ်နိုင်သော်လည်း ယခုအောင်မြင်မှုမှာ အစသာရှိသေးကြောင်းနှင့် အောင်မြင်မှုများစွာ ထပ်မံ ရယူလိုကြောင်း ပြောကြားသည်။

အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံဆုကာကွယ်ပွဲတွင် ဂျပန်နိုင်ငံသား ဟဆဲဂါဝါကို အလဲထိုးအနိုင်ရသော်လည်း နောက်ဆုံးအချီထိ ထိုးသတ်ခဲ့ရ ပြီး ၃ မိနစ် ၁၈ စက္ကန့်မှသာ ပင့်လက်သီးဖြင့် အနိုင်ရခဲ့ခြင်းဖြစ်သည်။ နောက်ဆုံးအချီထိ ထိုးသတ်ခဲ့ရသောကြောင့် နှစ်ဦးစလုံး အထိနာခဲ့ရပြီး မျက်နှာတွင် ဖူးရောင်ဒဏ်ရာများရကာ ဆေးကုသမှုခံယူခဲ့ရသည်။ သို့သော် ဒဏ်ရာအခြေအနေမှာ ဆေးရုံတက်ရန် မလိုအပ်သောကြောင့် ပုံမှန်အတိုင်း ဆေးကုသမှု ခံယူခဲ့ရခြင်းဖြစ်သည်။ အောင်လအန်ဆန်က “ဒီပွဲအတွက် အကောင်းဆုံးပြင်ဆင်ပေးခဲ့တဲ့သူတွေ၊ ပံ့ပိုးပေးတဲ့သူတွေအားလုံးကို ကျေးဇူးတင်ပါတယ်။ ဟဆဲဂါဝါက အကောင်းဆုံး တိုက်ခိုက်ရေးသမားပါ။ သူဘယ်လောက်အထိကောင်းလဲဆိုတာ ပြိုင်ပွဲမှာ ပြသနိုင်ခဲ့ပါတယ်။ ခက်ခဲတဲ့ပွဲမှာ အနိုင်ရတဲ့အတွက် ၀မ်းသာပါတယ်။ တစ်ခဲနက်လာရောက်အားပေးခဲ့တဲ့ ပရိသတ်အားလုံးကိုလည်း ကျေးဇူးတင်ပါတယ်။ ကျွန်တော်ကတော့ ကမ္ဘာ့အကောင်းဆုံးဆိုတဲ့နေရာအတွက် ဆာလောင်နေဆဲဖြစ်ပါတယ်။ အခုအောင်မြင်မှုက အစပဲရှိပါသေးတယ်။ နောက်ထပ်အောင်မြင်မှုတွေ အများကြီးလိုချင်ပါတယ်။ ဒါကြောင့် အခုထက်ပိုပြီး ကြိုးစားမှာပါ။ အခုရထားတဲ့ ဒဏ်ရာတွေ ပျောက်သွားရင် နောက်ပွဲအတွက် ပြင်ဆင်မှာပါ”ဟု ပြောကြားသည်။ အောင်လအန်ဆန်သည် ONE မှ ကြီးမှူးကျင်းပနေသည့် MMA ပြိုင်ပွဲ ၀ိတ်တန်းနှစ်ခုတွင် ချန်ပီယံဆုရထားသည့် ဒုတိယမြောက်ကစားသမား ဖြစ်ပြီး ပထမဆုံး ချန်ပီယံကာကွယ်ပွဲတွင် နိုင်ပွဲရယူခဲ့ခြင်းဖြစ်သည်။

ဟဆဲဂါဝါကို အနိုင်ယူပြီး အောင်လအန်ဆန် အောင်ပွဲခံနေစဉ်

အောင်လအန်ဆန်သည် ကစားသမားဘ၀တစ်လျှောက် စုစုပေါင်း ၃၃ ပွဲယှဉ်ပြိုင်ထိုးသတ်ရာ ၂၃ ပွဲနိုင်၊ ၁၀ ပွဲရှုံးနိမ့်ထားသည်။  အောင်လအန်ဆန်သည် ကမ္ဘာ့ချန်ပီယံဆုကို ၂၀၁၇ ခုနှစ်တွင် စတင်ရယူနိုင်ခဲ့ပြီး ယခုနှစ် အတွင်း ၀ိတ်တန်းနှစ်ခု၏ ကမ္ဘာ့ချန်ပီယံဆု ကာကွယ်ပွဲများ ယှဉ်ပြိုင်ထိုးသတ်ရမည်ဖြစ်သည်။ အောင်လအန်ဆန်သည် လိုက်ဟဲဗီးဝိတ်တန်း ကမ္ဘာ့ချန်ပီယံဆုကာကွယ်ပွဲကို စက်တင်ဘာ ၂ ရက်တွင် ရန်ကုန်မြို့၌ ယှဉ်ပြိုင်ထိုးသတ်ရမည်ဖြစ်ပြီး ပြိုင်ဘက်ကစားသမားကိုမူ ONE Championship က ရွေး ချယ်မည်ဖြစ်ကြောင်း သိရသည်။

စိန်ခေါ်သူ ဂျပန်နိုင်ငံသား ဟာစီဂါဝါအား အနိုင်ရရှိသည့် အောင်လအန်ဆန် အား တပ်မတော်ကာကွယ်ရေးဦးစီးချုပ်၏ ဂုဏ်ပြုစာလွှာ နှင့် ငွေကျပ် သိန်း ၁၀၀ ချီးမြှင့်

Photo: တပ်မတော်ကာကွယ်ရေးဦးစီးချုပ်ရုံး

၂၀၁၈ ခုနှစ်၊ ဇွန်လ ၂၉ ရက် ညပိုင်းတွင် ရန်ကုန်မြို့ရှိ သုဝဏ္ဏမိုးလုံလေလုံ အားကစားရုံ၌ ကျင်းပပြုလုပ်သည့် ONE MIDDLEWEIGHT WORLD CHAMPIONSHIP ပြိုင်ပွဲတွင် အဓိကပွဲစဉ်အဖြစ် ယှဉ်ပြိုင်ထိုးသတ်သည့် MMA မစ်ဒယ်ဝိတ်တန်း လက်ရှိ ကမ္ဘာ့ချန်ပီယံဖြစ်သူ အောင်လအန်ဆန်အနေဖြင့် စိန်ခေါ်သူ ဂျပန်နိုင်ငံသား ဟာစီဂါဝါအား အား ငါးချီပြည့် ရေကုန်ရေခမ်းထိုးသတ်၍ အလဲထိုး အနိုင်ရခဲ့ကြောင်း သိရသည်။

မစ်ဒယ်ဝိတ်တန်းကမ္ဘာ့ချန်ပီယံကာကွယ်ပွဲတွင် ဂျပန်နိုင်ငံသား ဟာစီဂါဝါအား အလဲထိုး အနိုင်ယူနိုင်ခဲ့သည့် အောင်လအန်ဆန်အား တပ်မတော်ကာကွယ်ရေးဦးစီးချုပ်မှပေးပို့သည့် ဂုဏ်ပြုစာလွှာ နှင့် ဂုဏ်ပြုချီးမြှင့်ငွေ ကျပ်သိန်း ၁၀၀ တို့ကို တပ်မတော်ကာကွယ်ရေးဦးစီးချုပ်ကိုယ်စား ရန်ကုန် တိုင်းစစ်ဌာနချုပ် တိုင်းမှူး ဗိုလ်ချုပ် သက်ပုံက ယနေ့ညနေပိုင်းတွင် ရန်ကုန်မြို့ရှိ Rose Garden Hotel ၌ သွားရောက်ပေးအပ် ချီးမြှင့်ခဲ့သည်။

Photo: တပ်မတော်ကာကွယ်ရေးဦးစီးချုပ်ရုံး

ထို့နောက် လက်ရှိ လိုက်ဟဲဗီးဝိတ်တန်း ကမ္ဘာ့ချန်ပီယံနှင့်မစ်ဒယ်ဝိတ်တန်းကမ္ဘာ့ချန်ပီယံ အောင်လအန်ဆန်က ယခုလိုပေးအပ်ချီး မြှင့်ခြင်းအတွက် တပ်မတော်ကာကွယ်ရေး ဦးစီးချုပ်နှင့် တပ်မတော်(ကြည်း၊ရေ၊လေ)အရာရှိ၊ စစ်သည်၊ မိသားစု များအားလုံး ကိုကျေးဇူးတင်ရှိပါကြောင်း၊နောက်ထပ်ချန်ပီယံကာကွယ်ပွဲများတွင်လည်းနိုင်ငံနှင့်ပရိသတ် အတွက် အစွမ်းကုန် ကြိုးစားကာကွယ်သွားမည်ဖြစ်ကြောင်းပြောကြားပြီး တပ်မတော်ကာကွယ်ရေးဦးစီးချုပ်အား အမှတ် တရလက်ဆောင် လက်ဝှေ့အိတ်ကို ပေးအပ်ရာ တိုင်းမှူးကလက်ခံရယူခဲ့သည်။

ဂျပန်နိုင်ငံ၏ အကောင်းဆုံးတိုက်ခိုက်ရေးသမားဖြစ်သောကြောင့် ဟဆဲဂါဝါကို အောင်လအန်ဆန်နှင့် ကမ္ဘာ့ချန်ပီယံ စိန်ခေါ်ပွဲထိုးသတ်စေခြင်းဖြစ်သည်ဟု ONE Championship ထုတ်ပြန်

အောင်လအန်ဆန်နှင့် ဟဆဲဂါဝါအား ပွဲကြိုသတင်းစာရှင်းလင်းပွဲတွင် တွေ့ရစဉ်

 

ONE Championship အဖွဲ့အစည်းသည် မစ်ဒယ်ဝိတ်တန်းကမ္ဘာ့ချန်ပီယံဆု စိန်ခေါ်ပွဲအဖြစ် အောင်လအန်ဆန်နှင့် ထိုးသတ်မည့် ဟဆဲဂါဝါကို ဂျပန်နိုင်ငံ၏ အကောင်းဆုံး တိုက်ခိုက်ရေးသမားဖြစ်သောကြောင့် ရွေးချယ်ခဲ့ခြင်းဖြစ်ကြောင်း သိရသည်။

ONE Championship စီးပွားရေးဆိုင်ရာ အရာရှိချုပ် မစ္စတာဂျက်လင်မ်က “ကျွန်တော်တို့ အဖွဲ့အစည်းအနေနဲ့ MMAပြိုင်ပွဲတွေမှာ အကောင်းဆုံးပွဲတွေကိုပဲ ဖန်တီးနေပါတယ်။ အောင်လအန်ဆန်နဲ့ မူလထိုးဖို့ ရွေး ချယ်ထားတာက ဘစ်ဒက်ရ်ှနဲ့ လီအန်ဒရိုပွဲက အနိုင်ရတဲ့သူနဲ့ဖြစ်ပါတယ်။ ဒါပေမဲ့ လီအန်ဒရိုက ဒဏ်ရာကြောင့် နုတ်ထွက်သွားတာကြောင့် ဟဆဲဂါဝါနဲ့ အစားထိုးခဲ့တာပါ။ ဟဆဲဂါဝါက ဂျပန်နိုင်ငံရဲ့ အကောင်းဆုံး တိုက်ခိုက်ရေးသမားဖြစ်ပြီး မစ်ဒယ်ဝိတ်တန်း ကမ္ဘာ့ချန်ပီယံဆုကို စိန်ခေါ်နိုင်တဲ့ အနေအထားမှာ ရှိပါတယ်။ ဒါကြောင့် အောင်လအန်ဆန်နဲ့ ထိုးသတ်ဖို့ ရွေးချယ်ခဲ့တာပါ”ဟု ဇွန် ၂၇ ရက် ကျင်းပသည့် ပွဲကြိုသတင်းစာရှင်း လင်းပွဲတွင် ပြောကြားသည်။

အောင်လအန်ဆန်၏ မစ်ဒယ်ဝိတ်တန်း ကမ္ဘာ့ချန်ပီယံဆု ကာကွယ်ပွဲပါဝင်မည့် MMA ပြိုင်ပွဲကို ဇွန် ၂၉ ရက် (ယနေ့) ညနေ ၆ နာရီခွဲတွင် အမျိုးသား အားကစားပြိုင်ပွဲရုံ-၁ သုဝဏ္ဏ၌ ကျင်းပ မည်ဖြစ်ပြီး တွဲဆိုင်း ၁၀ ပွဲ ပါဝင်မည်ဖြစ်သည်။ ယင်းပြိုင်ပွဲတွင် မြန်မာကစားသမားများ ထိုးသတ်မည့် တွဲဆိုင်းတစ်ပွဲသာပါဝင်ပြီး စောဒါဝိတ်နှင့် မိုက်ရိုင်းပွဲကို ထပ်တိုးကျင်းပမည် ဖြစ်သည်။

အောင်လအန်ဆန်သည် ONE Championship မှ ကြီးမှူးကျင်းပနေသည့် MMA ပြိုင်ပွဲတွင် ၀ိတ်တန်းနှစ်ခု၏ချန်ပီယံ ဖြစ်ပြီး မစ်ဒယ်ဝိတ်တန်းနှင့် လိုက်ဟဲဗီးဝိတ်တန်းတွင် ချန်ပီယံဆုရရှိထားခြင်းဖြစ်သည်။ အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံဆုကာကွယ်ပွဲကို တစ်နှစ်အကြာတွင် ထိုးသတ်ရခြင်းဖြစ်ပြီး ယခုပွဲအတွက် ကိုးပတ် အချိန်ယူပြင်ဆင်ထားကြောင်း သိရသည်။

ONE Championship သည် အောင်လအန်ဆန်၏ ကမ္ဘာ့ချန်ပီယံဆု ကာကွယ်ပွဲများကို ရန်ကုန်မြို့၌သာ ကျင်းပမည်ဖြစ်ပြီး လိုက်ဟဲဗီးဝိတ်ကမ္ဘာ့ချန်ပီယံဆု ကာကွယ်ပွဲကိုလည်း ယခုနှစ်အတွင်း ထိုးသတ်မည်ဖြစ်သည်။ ဟဆဲဂါဝါသည် MMA ပြိုင်ပွဲတွင် ပထမဆုံး ယှဉ်ပြိုင်ထိုးသတ်ခြင်းဖြစ်ပြီး အနိုင်ရရှိရန် အချိန်ယူပြင်ဆင်ထားကြောင်း သိရသည်။

ဟဆဲဂါဝါနှင့်ပွဲမှာ ကစားသမားဘ၀ အကောင်းဆုံးပွဲဖြစ်လာမည်ဟု အောင်လအန်ဆန် သုံးသပ်

အောင်လအန်ဆန်အား ပွဲကြိုသတင်းစာရှင်းလင်းပွဲတွင် တွေ့ရစဉ် (ဓာတ်ပုံ-ညီညီစိုးညွန့်)

MMA မစ်ဒယ်ဝိတ်နှင့် လိုက်ဟဲဗီးဝိတ်တန်း ကမ္ဘာ့ချန်ပီယံ အောင်လအန်ဆန်က ဇွန် ၂၉ ရက်တွင် ယှဉ်ပြိုင်ထိုးသတ်မည့် မစ်ဒယ်ဝိတ်တန်း ကမ္ဘာ့ချန်ပီယံကာကွယ်ပွဲမှာ ကစားသမားဘ၀ အကောင်းဆုံးပွဲဖြစ်လာမည်ဟု သုံးသပ်ပြောကြားသည်။

အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံ ကာကွယ်ပွဲအတွက် ဧပြီကတည်းက လေ့ကျင့်မှုပြုလုပ်ခဲ့ပြီး ဂျပန် နိုင်ငံမှ နာမည်ကြီး တိုက်ခိုက်ရေးကစားသမား ဟဆဲဂါဝါနှင့် ရန်ကုန်မြို့၌ ယှဉ်ပြိုင်ထိုးသတ်ရမည်ဖြစ်သည်။

အောင်လအန်ဆန်က  “မစ်ဒယ်ဝိတ်တန်း ကမ္ဘာ့ချန်ပီယံဆုကာကွယ်ပွဲအတွက် လေ့ကျင့်ပြင်ဆင်နေတာ ကိုးပတ်ရှိပါပြီ။ ကမ္ဘာမှာ နံပါတ် (၁)ဖြစ်ချင်တယ်။ ကိုယ့်နိုင်ငံရဲ့ ဂုဏ်ကိုမြှင့်တင်ချင်တာကြောင့် အခုလို ပင်ပန်းခံပြီး ကြိုးစားနေတာပါ။ ဟဆဲဂါဝါက MMA ပြိုင်ပွဲမှာ အခုမှ စထိုးတာဖြစ်ပေမဲ့ ဂျပန်နိုင်ငံရဲ့ တိုက်ခိုက်ရေးမှာ အကောင်းဆုံး အဆင့်ရှိတဲ့သူပါ။ ဂျူဒိုကောင်းတယ်။ ဂျူဂျစ်ဆုမှာလည်း ကျွမ်းကျင်တယ်။ ကျွန်တော့်အနေနဲ့ ပေါ့ဆလို့မရဘဲ သတိထားပြီး ယှဉ်ပြိုင်ထိုးသတ်ရမှာပါ။ ဂျပန်လူမျိုးတွေက လွယ်လွယ်နဲ့ အရှုံးမပေးတတ်ပါဘူး။ အခုပွဲက လွယ်လွယ်နဲ့ အရှုံးမပေးတတ်တဲ့ မြန်မာနဲ့ ဂျပန်ကစားသမားတွေ ယှဉ်ပြိုင်ထိုးသတ်မှာဖြစ်ပါတယ်။ ဘယ်အချီနဲ့ပြီးမလဲဆိုတာ ပြောဖို့ခက်ပါတယ်။ အကြာကြီး ထိုးရ နိုင်ပါတယ်” ဟု ပြောကြားသည်။

အောင်လအန်ဆန်သည် ၂၀၁၇ ခုနှစ် ဇွန် ၃၀ ရက်က ရရှိခဲ့သည့် မစ်ဒယ်ဝိတ်တန်း ကမ္ဘာ့ချန်ပီယံဆုကို တစ်နှစ်အကြာတွင် ကာကွယ်ပွဲ ထိုးသတ်ရခြင်းဖြစ်သည်။