ဆီးရီးယားရှိ ရုရှားလေတပ် အခြေစိုက်စခန်းကို မောင်းသူမဲ့လေယာဉ်နှင့် တိုက်ခိုက်မှုများ မြင့်တက်လာ

သြဂုတ် ၂၀ ရက်တွင် အိုင်ဒလစ်ပြည်နယ်၌ ဆီးရီးယား အမျိုးသမီး တစ်ဦးအား ရုရှားစစ်သားတစ်ဦးက စကားပြောနေစဉ် (Photo : AFP)

ဆီးရီးယားရှိ ရုရှားလေတပ် အခြေစိုက်စခန်းတစ်ခုကို သူပုန်နှင့်ဂျီဟတ်တို့၏ မောင်းသူမဲ့လေယာဉ် တိုက်ခိုက်မှုများ မြင့်တက်လာခဲ့သော်လည်း ယင်းလေယာဉ်အားလုံး ပစ်ချခံခဲ့ရသည်ဟု စောင့်ကြည့်သည့် အဖွဲ့တစ်ဖွဲ့က သြဂုတ် ၂၄ ရက်တွင် ထုတ်ပြန်ခဲ့သည်။

“ဇူလိုင်ကနေစပြီး Hmeimim ကို မောင်းသူမဲ့ လေယာဉ်တိုက်ခိုက်မှုတွေ မြင့်တက်လာတယ်” ဟု ဆီးရီးယား လူ့အခွင့်အရေးဆိုင်ရာ စောင့်ကြည့်အဖွဲ့က စစ်ကြောင့်ပျက်စီးနေသည့် ဆီးရီးယားနိုင်ငံရှိ ရုရှား၏ အဓိက စစ်အခြေစိုက်စခန်းတစ်ခုကို ရည်ညွှန်းပြောကြားခဲ့သည်။ လက်နက်ကိုင် အတိုက်အခံများကို နှိမ်နင်းမှုအား ကူညီရန်အတွက် ရုရှားက ၂၀၁၅ ခုနှစ်တွင် ဆီးရီးယား အစိုးရ၏ဘက်မှ ၀င်ရောက်ကူညီခဲ့သည်။

ဇူလိုင်တွင် တိုက်ခိုက်မှု ၁၃ ကြိမ်နှင့် ယခုလတွင် တိုက်ခိုက်မှု ငါးကြိမ်ရှိခဲ့ပြီး ယခုနှစ်အစောပိုင်းမှစ၍ စုစုပေါင်း တိုက်ခိုက်မှု ၂၃ ကြိမ်ရှိခဲ့ကြောင်း ဗြိတိန်အခြေစိုက် ယင်းအဖွဲ့က ထုတ်ပြန်ခဲ့သည်။

ယင်းတိုက်ခိုက်မှုများတွင် အသေးစား မောင်းသူမဲ့လေယာဉ်၌ ဖောက်ခွဲရေးပစ္စည်းများ အပြည့်ပါသော်လည်း ယင်းမောင်းသူမဲ့လေယာဉ် အများစုကို ပစ်မှတ်များဆီသို့ မရောက်မီ ရုရှား(သို့မဟုတ်)ဆီးရီးယား လေကြောင်း ကာကွယ်ရေးများက ပစ်ချခဲ့ကြောင်း ဆီးရီးယား စောင့်ကြည့်အဖွဲ့၏ အကြီးအကဲ ရာမီအဗ္ဗဒယ်ရာမန်က အေအက်ဖ်ပီသို့ ပြောကြားခဲ့သည်။

ဆီးရီးယားရှိ ရုရှားတပ်ဖွဲ့ဝင်များအတွက် အဓိကစခန်းကို တိုက်ရိုက်ပစ်မှတ်ထား တိုက်ခိုက်နိုင်ကြောင်း ရုရှားအစိုးရထံသို့ တိုက်ခိုက်ရေးသမားများက သတင်းစကား ပေးပို့ခဲ့သည်ဟု အဗ္ဗဒယ်ရာမန်က ပြောကြားခဲ့သည်။

ယင်းတိုက်ခိုက်မှုများအတွက် ရုရှားနိုင်ငံခြားရေး ၀န်ကြီးဌာန၏ ပြောခွင့်ရပုဂ္ဂိုလ် မာရီရာဇာရိုဗာက အကြမ်းဖက်သမားများကို အပြစ်တင်ခဲ့သည်။

“Hmeimim မှာ မောင်းသူမဲ့လေယာဉ် တိုက်ခိုက်မှုတွေက အမြဲတမ်းလိုလို ဖြစ်လာပြီ။ ကျွန်မတို့ရဲ့ လေကြောင်း ကာကွယ်ရေးတွေက မောင်းသူမဲ့လေယာဉ် ၄၅ စင်းကို ပစ်ချခဲ့တယ်” ဟု ၎င်းက သြဂုတ် ၂၃ ရက်တွင် ပြောကြားခဲ့သည်။

ဇူလိုင်တွင်လည်း ယင်းတိုက်ခိုက်မှုများကို ဟန့်တား ဖျက်ဆီးနိုင်ခဲ့သည်ဟု ရုရှားစစ်တပ်ပြောခွင့်ရပုဂ္ဂိုလ် ဗိုလ်ချုပ်ကြီး အီဂေါကိုနာချင်ကော့က ယခုလအစောပိုင်းတွင် ပြောကြားခဲ့သည်။

Hmeimim လေတပ်အခြေစိုက်စခန်းသည် အိုင်ဒလစ်ပြည်နယ် အနောက်မြောက်ပိုင်းရှိ သူပုန်နှင့် ဂျီဟတ်တို့ ထိန်းချုပ်ထားသည့် နယ်မြေ၏ အနောက်အရပ်တွင် ရှိသည်။ အိုင်ဒလစ် ပြည်နယ်ကို ၎င်း၏ အုပ်ချုပ်မှုအောက် ပြန်လည်ရောက်ရှိစေရန် ရည်မှန်းထားသည်ဟု ဆီးရီးယားသမ္မတ ဘာရှားအယ်လ်အာဆတ်က ပြောကြားခဲ့သည်။

အိုင်ဒလစ်ပြည်နယ်၏ ထက်ဝက်ကျော်ကို ဂျီဟတ်အဖွဲ့ Hayat Tahrir al-Shan က ထိန်းချုပ်ထားပြီး ကျန်ရှိသည့် နယ်မြေများကို သူပုန်အဖွဲ့များက ထိန်းချုပ်ခဲ့သည်

ရုရှားကျောထောက် နောက်ခံပြု အစိုးရတပ်ဖွဲ့သည် မကြာမီ အိုင်ဒလစ်ပြည်နယ်၏ သေးငယ်သည့် အစိတ်အပိုင်းမျှကိုသာလျှင် ပစ်မှတ်ထားနိုင်ဖွယ် ရှိသည်ဟု လေ့လာသုံးသပ်သူများက ပြောကြားခဲ့သည်။

သူပုန်ထောက်ခံသည့် တူရကီနှင့် ဆီးရီးယားအစိုးရကို ထောက်ခံသည့် ရုရှားနိုင်ငံကြား ဆွေးနွေးပွဲများက သူပုန်နှင့် ဂျီဟတ်တို့ ထိန်းချုပ်ထားသည့် နောက်ဆုံးပြည်နယ်ဖြစ်သော အိုင်ဒလစ်ပြည်နယ်၏ ကံကြမ္မာကို ဆုံးဖြတ်ပေးမည်ဟု မျှော်လင့်ရသည်။

Ref : AFP

အဲဘတ်စ်က ဆိုလာစွမ်းအင်သုံး မောင်းသူမဲ့လေယာဉ်ကို ထုတ်ဖော်ပြသ

ဇူလိုင် ၁၇ ရက်တွင် လန်ဒန်အနောက်တောင်ပိုင်း၌ လေကြောင်းပြပွဲတွင် Zephyr လေယာဉ်ကို အမျိုးသမီးတစ်ဦးက ကြည့်နေစဉ် (Photo: AFP)

လေယာဉ်ထုတ်လုပ်သည့် ဥရောပ ဧရာမ စီးပွားရေးကော်ပိုရေးရှင်းအဲဘတ်စ်က ပင်လယ်ပြင်ထက်အမြင့်တွင် ပျံသန်းနိုင်ပြီး ဂြိုဟ်တုတစ်ခုကဲ့သို့ လုပ်ငန်းတာဝန်များ ဖြည့်ဆည်းပေးနိုင်သည့် Zephyr ဟု ခေါ်ဆိုသော ဆိုလာစွမ်းအင်သုံး မောင်းသူမဲ့ယာဉ် တစ်စင်းကို ဇူလိုင် ၁၈ ရက်တွင် ထုတ်ဖော်ပြသခဲ့သည်။

ယင်းမောင်းသူမဲ့ယာဉ်ကို ဗြိတိန်တွင် ပြုလုပ်သည့် Farnborough လေယာဉ်ပြပွဲတွင် ထုတ်ပြခဲ့ခြင်းဖြစ်သည်။ Zephyr S သည် ၎င်း၏ပွဲဦးထွက်ပျံသန်းမှုကို ဇူလိုင် ၁၁ ရက်တွင် အမေရိကန်ရှိ အရီဇိုးနား ပြည်နယ်တွင် ပြုလုပ်ခဲ့သည်ဟု အဲဘတ်စ်က ထုတ်ပြန်ခဲ့သည်။
“Zephyr S ရဲ့ ပွဲဦးထွက် ပျံသန်းမှုက လေယာဉ်ရဲ့ စွမ်းဆောင်နိုင်မှုတွေကို လက်တွေ့ပြသဖို့ ရည်ရွယ်တယ်” ဟု အဲဘတ်စ်က ထုတ်ပြန်ခဲ့သည်။ Zephyr S High Altitude Pseudo-Satellite (HAPS) ယာဉ်၏ တောင်ပံစွန်း နှစ်ခုအကြား အကွာအဝေးသည် ၂၅ မီတာ(၈၂ ပေ) ရှိပြီး အလေးချိန် ၂၅ ကီလိုမီတာ (၅၅ ပေါင်) အောက်သာ ရှိသည်။ ယင်းယာဉ်သည် ရာသီဥတုအခြေအနေနှင့် သမားရိုးကျ လေကြောင်းအသွားအလာအထက်တွင် ပင်လယ်ပြင်ထက်အမြင့် ၂၁,၀၀၀ မီတာ၌ ပျံသန်းနိုင်သည်။ နောက်ထပ်ထုတ်လုပ်ရန် စီစဉ်ထားသည့် Zephyr T ၏ တောင်ပံစွန်းသည် ၃၃ မီတာ ရှိမည်ဖြစ်သည်။

အဲဘတ်စ်သည် မြေပြင်သို့ မဆင်းသက်ဘဲ အထက်လေထုတွင် သုံးလကြာပျံသန်းနိုင်မည့် မောင်းသူမဲ့လေယာဉ်များကို တီထွင်ထုတ်လုပ်ရန် စီစဉ်နေသည်။ Zephyr S သည် လတ်တလောတွင် လောင်စာမဖြည့်ဘဲ ၁၄ ရက်ကြာ ပျံသန်းနိုင်သည်။

Ref: AFP

လက်နက်မတပ်ဆင်ထားသော ဆီးရီးယားမောင်းသူမဲ့ လေယာဉ်တစ်စင်းကို အစ္စရေးက ကြားဖြတ်ပစ်ချခဲ့

ဇူလိုင် ၁၁ ရက်တွင် အစ္စရေး၏ ပက်ထရိယော့ဒုံးဖြင့် ကြားဖြတ်ပစ်ချခဲ့သည့် ဆီးရီးယား မောင်းသူမဲ့လေယာဉ်၏ အစိတ်အပိုင်းကို Galilee ပင်လယ်ကမ်းရိုးတန်းတွင် ရှာဖွေနေကြစဉ် (Photo: AFP)

ကနဦးတွေ့ရှိမှုများအရ ထောက်လှမ်းရေးအတွက် ရည်ရွယ်ဖွယ်ရှိသည့် လက်နက်မတပ်ထားသော ဆီးရီးယားမောင်းသူမဲ့ လေယာဉ်တစ်စင်းအား ကြားဖြတ်ဟန့်တားရန် ပက်ထရိယော့ဒုံးတစ်စင်းအား ဇူလိုင် ၁၁ ရက်တွင် ပစ်လွှတ်ခဲ့ကြောင်း အစ္စရေးစစ်ဘက်က ထုတ်ပြန်ခဲ့သည်။ ထိုမောင်းသူမဲ့လေယာဉ် သို့မဟုတ် UAV သည် အစ္စရေးနှင့် သဘောတူထားသော ဆီးရီးယားအပစ်အခတ် ရပ်စဲရေး နယ်နိမိတ်ကို မရည်ရွယ်ဘဲ လမ်းလွဲ၍ ၀င်ရောက်လာခြင်း ဟုတ်၊ မဟုတ်ကို ရှင်းရှင်းလင်းလင်း မသိရသေးပေ။

ဆီးရီးယားမှ UAV တစ်စင်း ၀င်ရောက်လာခြင်းကြောင့် ပက်ထရိယော့ဒုံးဖြင့် ကြားဖြတ်ဟန့်တားခဲ့ရပြီး ဂိုလန်ကုန်းမြင့်နှင့် အီမက်ဟာယာဒင်ဒေသများတွင် အချက်ပေး ဥသြသံများ ထွက်ပေါ်ခဲ့ကြောင်း အစ္စရေးစစ်ဘက်က ကြေညာချက် ထုတ်ပြန်ခဲ့သည်။ အီမက်ဟာယာဒင်သည် အစ္စရေးသိမ်းယူထားသည့် ဂိုလန်ကုန်းမြင့်၏ အနောက်တောင်ပိုင်းတွင် တည်ရှိသည်။

ဂျော်ဒန်ပေါ်မှ ပျံသန်းလာခဲ့ပြီး အစ္စရေးနှင့် အပစ်အခတ်ရပ်စဲရေး နယ်နိမိတ်ကို ဖြတ်ကျော်ကာ ဆီးရီးယားဝေဟင်သို့ ပြန်လည်ဦးတည်ခဲ့သည့် ထိုမောင်းသူမဲ့လေယာဉ်အား အစ္စရေးတပ်များက ခြေရာခံခဲ့ကြောင်း၊ ဂျက်တိုက်လေယာဉ်လေးစင်းနှင့် ရဟတ်ယာဉ်နှစ်စင်းတို့က ထိုမောင်းသူမဲ့ လေယာဉ်နောက် ခြေရာခံခဲ့ကြောင်း စစ်ဘက်က ထုတ်ပြန်ခဲ့သည်။ ထိုမောင်းသူမဲ့လေယာဉ်သည် ရုရှားမှ မဟုတ်ကြောင်း အစ္စရေးက သိရှိခဲ့ပြီးနောက် ထိုလေယာဉ်အား ပက်ထရိယော့ဒုံးတစ်စင်းပစ်ခတ်၍ ကြားဖြတ်ဟန့်တားရန် ဆုံးဖြတ်ခဲ့ကြောင်း အစ္စရေးစစ်ဘက်ပြောခွင့်ရပုဂ္ဂိုလ် ဒုတိယဗိုလ်မှူးကြီးဂျိုနသန် ကွန်ရီကတ်စ်က ပြောကြားခဲ့သည်။

ထို UAV နှင့် ပက်ထရိယော့ဒုံး၏ အကြွင်းအကျန်များအား ဆီးရီးယားနှင့် အပစ်အခတ်ရပ်စဲရေး နယ်နိမိတ်အလွန် ခြောက်မိုင်ခန့်အကွာ Galilee ပင်လယ်၏ တောင်ဘက်ကမ်းရိုးတန်းတွင် တွေ့ရှိခဲ့ကြောင်း၊ လုံခြုံရေးဆိုင်ရာ စစ်ဆင်ရေးများကြောင့် ထိုပင်လယ်မှ လှေအားလုံးကို ထွက်ခွာကြရန် အစ္စရေးရဲတပ်ဖွဲ့က ညွှန်ကြားခဲ့ကြောင်း ကွန်ရီကတ်စ်က ပြောကြားခဲ့သည်။

အိမ်နီးချင်း ဆီးရီးယားတောင်ပိုင်းတွင် တိုက်ခိုက်မှုများစွာ ဖြစ်ပေါ်ခဲ့မှုကြောင့် အစ္စရေးသည် မကြာသေးမီ သီတင်းပတ်များအတွင်း တပ်လှန့်ထားခဲ့ပြီး ဆီးရီးယားနှင့် အစ္စရေးအကြား အပစ်အခတ်ရပ်စဲရေး နယ်နိမိတ်များကို လေးစားမှုရှိသင့်ကြောင်း သတိပေးချက် ထုတ်ပြန်ခဲ့သည်။ ဆီးရီးယားပြည်တွင်းစစ်ပွဲမှ တိုက်ခိုက်မှုများသည် ဂိုလန်ကုန်းမြင့်သို့ ရံဖန်ရံခါ ပျံ့နှံ့ခဲ့သည်။

အစ္စရေး၏ အဓိကရန်ဘက်ဖြစ်သော အီရန်အား အိမ်နီးချင်းဆီးရီးယားတွင် စစ်ရေးခြေကုပ်ရရှိမှုကို ခွင့်ပြုသွားမည်မဟုတ်ကြောင်း အစ္စရေးဝန်ကြီးချုပ်ဘင်ဂျမင်နေ တန်ယာဟုက အကြိမ်ကြိမ် သတိပေးထားသည်။ ပြီးခဲ့သော ဖေဖော်ဝါရီတွင်လည်း အီရန်က အစ္စရေးပိုင်နက်ထဲသို့ စေလွှတ်ခဲ့သည့် လက်နက်တပ်ဆင်ထားသော မောင်းသူမဲ့လေယာဉ်တစ်စင်းကို အစ္စရေးက ကြားဖြတ်ဟန့်တားခဲ့ရသည်။ နေတန်ယာဟုက ရုရှားသမ္မတဗလာဒီမာပူတင်နှင့် တွေ့ဆုံရန် ရုရှားသို့ သွားရောက်နေစဉ် ဇူလိုင် ၁၁ ရက်တွင် ထိုမောင်းသူမဲ့လေယာဉ်အား အစ္စရေးက ဟန့်တားခဲ့ခြင်းဖြစ်သည်။

Ref: AFP

တောင်တရုတ်ပင်လယ်ကို စောင့်ကြည်ရန် သြစတြေးလျက နည်းပညာမြင့် မောင်းသူမဲ့လေယာဉ်များကို ၀ယ်ယူ

ဇွန် ၂၆ ရက်က ကင်ဘာရာတွင် မောင်းသူမဲ့လေယာဉ် MQ-4C Triton ပုံစံတူ တစ်စင်းကို တွေ့ရစဉ် (Photo – AFP)

သြစတြေးလျသည် တောင်တရုတ်ပင်လယ် အပါအ၀င် ရေပိုင်နက်များကိုစောင့်ကြည့်ရေးနှင့် ပူးတွဲစစ်ဆင်ရေးတို့အတွက် နည်းပညာမြင့် အမေရိကန်မောင်းသူမဲ့ လေယာဉ်များကို ၀ယ်ယူရန်အတွက် သြစတြေးလျ ဒေါ်လာ ၇ ဘီလျံ (ဒေါ်လာ ၅ ဒသမ ၂ ဘီ လျံ) ရင်းနှီးမြှုပ်နှံမည်ဟု ဇွန် ၂၆ ရက်က ထုတ်ပြန်ခဲ့သည်။

သြစတြေးလျသည် ၎င်း၏ ကာကွယ်ရေးစွမ်းရည်ကို မြှင့်တင်ရန်အတွက် ရေငုပ်သင်္ဘောသစ်များ၊ ကမ်းလွန်ရေနံတင်သင်္ဘောများ အပါအ၀င် ကြီးမားလှသော သင်္ဘောတည်ဆောက်ရေး နည်းပညာမှတစ်ဆင့် စစ်ပြီးနောက်ပိုင်း ၎င်း၏ အကြီးမားဆုံးရေတပ် ရင်းနှီးမြှုပ်နှံမှုများကို စတင်နေသည်။       ယင်းအစီအစဉ်၏ တစ်စိတ်တစ်ပိုင်း အနေနှင့် အစိုးရသည် သြစတြေးလျဒေါ်လာ ၁ ဒသမ ၄ ဘီလျံဖြင့် MQ-4C Triton ရေပြင်ထောက်လှမ်းရေးမောင်းသူမဲ့ လေယာဉ်ခြောက်စင်းကို ၀ယ်ယူမည်ဖြစ်သည်။ ၂၀၂၃ နှစ်လယ်တွင် စတင်တာဝန်ထမ်းဆောင်မည့် ယင်းလေယာဉ်သစ်များသည် လက်ရှိအသုံးပြုနေသော P -8 A Poseidon လေယာဉ်ခုနစ်စင်းကို ပံ့ပိုးပေးနိုင်မည် ဖြစ်သည်။

“ဒီလေယာဉ်တွေဟာ ကျွန်တော်တို့ရဲ့ ရေငုပ်သင်္ဘောဖျက် စစ်အသုံးအဆောင်တွေ၊ ရေတပ်ပစ်ခတ်ရေးစွမ်းရည်တွေကို သိသိသာသာ တိုးတက်စေနိုင်ပါတယ်။ ပြီးတော့ ကျွန်တော်တို့ရဲ့ ကာကွယ်ရေးနဲ့ကယ်ဆယ်ရေး စွမ်းရည်တွေကို မြင့်တက်လာစေနိုင်မှာ ဖြစ်ပါတယ်” ၀န်ကြီးချုပ် မယ်ကွန်တန်ဘူးက ထုတ်ပြန်ချက်တွင် ဖော်ပြခဲ့သည်။

“ဒီရင်းနှီးမြှုပ်နှံမှုဟာ ကျွန်တော်တို့ရဲ့ နယ်စပ်တွေကို ကာကွယ်နိုင်မှာဖြစ်ပြီး ကျွန်တော်တို့ ဒေသကို ပိုပြီးလုံခြုံစေမှာ ဖြစ်ပါတယ်” ဟု ၀န်ကြီးချုပ်က ဆက်လက် ပြောကြားခဲ့သည်။

အမြင့်ပေများစွာ၌ ပျံသန်းနိုင်ကာခံနိုင်ရည်မြင့်မားသည့် MQ-4C Triton မောင်းသူမဲ့လေယာဉ်များသည် ၂၄ နာရီ ကျော်ကြာအောင် မစ်ရှင်များကို ထောက်ပံ့နိုင်ပြီး ယင်း၏ ရေမိုင် ၂၀၀၀ ၀န်းကျင်ပတ်လည်သို့ ၃၆၀ ဒီဂရီကြည့်နိုင်မည် ဖြစ်သည်။ ယခု မောင်းသူမဲ့လေယာဉ်များကို AP – 3 C Orion သူလျှိုလေယာဉ်များ၏ နေရာတွင် အစားထိုး အသုံးပြုမည် ဖြစ်သည်။ “ဒီလေယာဉ်တွေဟာ စောင့်ကြည့်ထောက်လှမ်းရေးပိုင်းမှာ  ကျွန်တော်တို့အတွက် စွမ်းဆောင်ရည် အများအပြားရရှိစေမှာ ဖြစ်ပါတယ်” ဟု ကာကွယ်ရေးဆိုင်ရာ စက်မှုလုပ်ငန်းဝန်ကြီးဌာန၀န်ကြီး ခရစ်စတိုဖာပိုင်က ပြောကြားခဲ့သည်။ စုစုပေါင်းအပြီးအစီး ကုန်ကျစရိတ်မှာ သြစတြေးလျ ဒေါ်လာ ၇ ဘီလျံရှိလိမ့်မည် ဖြစ်သည်။

ယင်းမောင်းသူမဲ့လေယာဉ်များကို အသုံးပြုပြီး သြစတြေးလျရေပိုင်နက်ထဲသို့  အခြားနိုင်ငံများ၏ ရေတပ်သင်္ဘောများ၊ လူမှောင်ခိုသင်္ဘောများ၊ တရားမ၀င်ငါးခိုးဖမ်းမှုများ အစရှိသည်တို့ကို စောင့်ကြည့်မည် ဖြစ်သည်။ ထို့ပြင် တောင်တရုတ်ပင်လယ်ထဲသို့ သြစတြေးလျ၏ စောင့်ကြည့်လေ့လာမှုများ ပြုလုပ်ရာတွင်လည်း ယင်းလေယာဉ်များကို အသုံးပြုသွားမည်ဟု သိရသည်။ “အခြားနိုင်ငံတကာ ရေပိုင်နက်တွေကို သွားနေသလို တောင်တရုတ် ပင်လယ်ထဲကိုလည်း လေယာဉ်နဲ့ဖြစ်စေ၊ သင်္ဘောနဲ့ဖြစ်စေ သွားခွင့်ရှိတယ်လို့ သြစတြေးလျက အခိုင်အမာယူဆပါတယ်” ဟု စက်မှုလုပ်ငန်းဝန်ကြီးက ဆိုသည်။

လက်ရှိတွင် သြစတြေးလျရေတပ်သည် အမေရိကန်အပါအ၀င် ပြည်ပနိုင်ငံများနှင့် တောင်တရုတ်ပင်လယ်ထဲတွင် ပူးတွဲစစ်ရေး လေ့ကျင့်မှုများ ပြုလုပ်နေသည်။

Ref; AFP