ဒဂုံတောင်မြို့နယ်တွင် အမျိုးသားတစ်ဦးအား မင်းမဲ့စရိုက်ဆန်ဆန် ဓားဖြင့် ၀ိုင်းခုတ်သတ်ခဲ့သည့် ရာအိမ်မှူးပါ ခြောက်ဦးအား တရားရုံးဝင်းတံခါး ပိတ်ကာ အလုံပိတ်ယာဉ်ဖြင့် ရုံးထုတ် ရမန်ယူခဲ့ပြီး ရဲအင်အားအများအပြား အသုံးပြုခဲ့

ရာအိမ်မှူးပါ ခြောက်ဦးအား အလုံပိတ်ယာဉ်ဖြင့် ရုံးထုတ် ရမန်ယူလာစဉ်

ဒဂုံတောင်မြို့နယ်တွင် အမျိုးသားတစ်ဦးအား မင်းမဲ့စရိုက်ဆန်ဆန် ဓားဖြင့် ၀ိုင်းခုတ်သတ်ခဲ့သည့် ရာအိမ်မှူးပါ ခြောက်ဦးအား မြို့နယ်တရားရုံး ၀င်းတံခါးပိတ်ကာ အလုံပိတ်ယာဉ်ဖြင့် ဇူလိုင် ၁၆ ရက်က ရုံးထုတ် ရမန်ယူခဲ့သည်။

ရာအိမ်မှူးပါ ခြောက်ဦးအား ဇူလိုင် ၁၆ ရက် ညနေ ၄ နာရီခွဲကျော်တွင် ဒဂုံတောင်မြို့နယ် တရားရုံး၌ အလုံပိတ်ယာဉ်ဖြင့် တင်ဆောင်လာကာ ရုံးထုတ်ရမန်ယူခဲ့ခြင်း ဖြစ်သည်။ ယင်းသို့ ရုံးထုတ် ရမန်ယူချိန်တွင် တရားရုံးဝင်းအတွင်းရှိ လူများအား အပြင်သို့ ထွက်ခိုင်းခဲ့ပြီး တရားရုံး ၀င်းတံခါးကို ပိတ်ကာ ရဲတပ်ဖွဲ့အင်အား အများအပြား အသုံးပြုခဲ့သည်။

ထို့ပြင် တရားရုံးပိတ်ချိန် ၄ နာရီခွဲကျော်မှသာ အလုံပိတ်ယာဉ်ဖြင့် ဖမ်းဆီးထားသည့် ခြောက်ဦးအား ခေါ်ဆောင်လာကာ ရုံးထုတ် ရမန်ယူခဲ့သည်။

“တရားရုံးကို ပိတ်ချိန်မေးတော့ ၄ နာရီခွဲ ပြောတယ်။ ဒါပေမဲ့ သူတို့က ၄ နာရီ မိနစ် ၄၀ မှ အလုံပိတ်ကားကို သုံးပြီး ရုံးထုတ် ရမန်ယူတယ်။ ရဲလုံခြုံရေးတွေလည်း ချထားတယ်။ ဒါပေမဲ့ လာရောက် သတင်းယူတဲ့ မီဒီယာတွေ ဓာတ်ပုံရိုက်တာကို ရဲတပ်ဖွဲ့ဝင်တွေက တားမြစ်တယ်။ ဖမ်းဆီးခံထားရသူကို လာတွေ့တဲ့ လူတွေကလည်း ဖုန်းတွေနဲ့ သတင်းထောက်တွေကို ရိုက်တာတွေ ဘာတွေ တွေ့ရတယ်”ဟု အဆိုပါရုံးချိန်းသို့ သတင်းလာယူသည့် သတင်းထောက်တစ်ဦးက ဆိုသည်။

ယင်းဖြစ်စဉ်မှာ ဇူလိုင် ၁၃ ရက် ည ၉ နာရီကျော်ခန့်တွင် ဒဂုံတောင်မြို့နယ် ၁၄၀ ရပ်ကွက် ရတနာမေတ္တာလမ်းနေ သက်ဝေထူး (၃၆ နှစ်) အား အဆိုပါ ရပ်ကွက်အတွင်းရှိ ရာအိမ်မှူးနှင့် ၎င်း၏ ဆွေမျိုးများက ဓားဖြင့် ၀ိုင်းခုတ်သတ်ခဲ့ကြောင်း သိရသည်။

ဓားဖြင့် ၀ိုင်းခုတ်ခံရသဖြင့် သက်ဝေထူး မှာ ဦးခေါင်း၊ ခါးယာဘက်ခြမ်း၊ ယာပေါင်ရင်း၊ နောက်ကျောဝဲဘက်၊ ယာတင်ပါးအပေါ် တို့တွင် ဒဏ်ရာများရရှိကာ သေဆုံးခဲ့ကြောင်း သိရသည်။

ဖြစ်စဉ်နှင့် ပတ်သက်၍ ရဲမှတ်တမ်းတွင် သေဆုံးသူ သက်ဝေထူးမှာ အရက်မူးပြီး ရမ်းကားနေသည်ကို ရာအိမ်မှူးဖြစ်သူ ဦးနိုင်ဝင်း က ထိန်းသိမ်း တားဆီးစဉ် ဦးနိုင်ဝင်းအား သက်ဝေထူးက ပေါက်တူးဖြင့် လိုက်လံခုတ်ခဲ့ကြောင်း၊ ထိုသို့ ခုတ်သဖြင့် ဦးနိုင်ဝင်းနှင့် မိသားစုမှ တုတ်၊ ဓားတို့ဖြင့် ပြန်လည် ခုခံရာမှ သေဆုံးခဲ့ခြင်းဖြစ်သည်ဟု ရဲတပ်ဖွဲ့၏ မှုခင်းမှတ်တမ်းများအရ သိရသည်။

ယင်းသို့ ဖမ်းဆီးခံထားရသည့် သန်းနိုင်ဦး (၁၉ နှစ်) နှင့် နေလင်း (၁၆ နှစ်) တို့မှာ ဦးနိုင်ဝင်း (၄၃ နှစ်) ၏ သားများဖြစ်ပြီး ဦးချစ်လှ (၆၀ နှစ်) မှာ ဦးနိုင်ဝင်းနှင့် ယောက်ဖ တော်စပ်ကြောင်း၊ အောင်စိုး (၄၀ နှစ်)မှာ ဦးချစ်လှ၏ သားဖြစ်ပြီး အောင်သက်ပိုင်မှာ အောင်စိုး၏ သားဖြစ်ကြောင်း သိရသည်။

အဆိုပါဖြစ်စဉ်အား ဒဂုံတောင်မြို့မရဲစခန်းက (ပ) ၁၃၁၈/၂၀၁၈၊ ရာဇသတ်ကြီး ပုဒ်မ-၃၀၂/၁၁၄ ဖြင့် အမှုဖွင့်ထားကြောင်း သိရသည်။

ကျောက်တန်းမြို့နယ်တွင် ကျပ်သိန်း ၃၀၀ ကျော် အကြွေးတောင်းရာမှ မုဒိမ်းမှု ဖြစ်ပွားသည်ဟုဆိုကာ ပုဒ်မလေးခုဖြင့် အမှုဖွင့်ခံရသူများအနက် ငါးဦး အာမခံရထားပြီး အမှုမှာ လိမ်လည်တိုင်ကြားထားခြင်းဖြစ်ကြောင်း သိရ

ပုဒ်မ လေးခုဖြင့် တရားစွဲခံရပြီး အာမခံမရရှိခဲ့သူနှစ်ဦးအား မေ ၁၄ ရက်က ရုံးထုတ်လာသည်ကို တွေ့ရစဉ် (ဓာတ်ပုံ-အောင်မျိုးသန့်)

ကျောက်တန်းမြို့နယ်တွင် ကျပ်သိန်း ၃၀၀ ကျော် အကြွေးတောင်းရာမှ မုဒိမ်းမှုဖြစ်ပွားသည်ဟုဆိုကာ ပုဒ်မလေးခုဖြင့် အမှုဖွင့်ခံရသူများအနက် ငါးဦး အာမခံရထားပြီး အမှုမှာ လိမ်လည်တိုင်ကြားထားခြင်းဖြစ်ကြောင်း စွပ်စွဲခံရသူ မိသားစုဝင်များ၏ ပြောကြားချက်အရ သိရသည်။

အဆိုပါအမှုနှင့်ပတ်သက်ပြီး စွပ်စွဲခံရသူများမှာ ခုနစ်ဦးရှိပြီး မေ ၁၄ ရက်က ကျောက်တန်းမြို့နယ် တရားရုံးတွင် ပထမဆုံးအကြိမ် ရုံးထုတ်ရမန်ယူခဲ့ကာ မေ၂၄ ရက်သို့ ရုံးချိန်းပြန်လည်ချိန်းဆိုခဲ့ကြောင်း၊  ငါးဦးအား အာမခံပေးထားကြောင်း တောင်ပိုင်းခရိုင်ရဲတပ်ဖွဲ့မှ ရဲအရာရှိတစ်ဦးက ပြောကြားသည်။

တောင်ပိုင်းခရိုင်ရဲတပ်ဖွဲ့မှ ရဲအရာရှိတစ်ဦးက “နှစ်ဦးကတော့ ပုဒ်မ ၃၇၆ က အာမခံပေးလို့မရတော့ စခန်းမှာ ထိန်းသိမ်းထားပြီး စစ်ဆေးနေပါတယ်။ ကျန်တဲ့ ငါးဦးကတော့ အာမခံပေးလို့ရတဲ့ ပုဒ်မတွေဖြစ်လို့ အာမခံပေးထားပါတယ်။ ဒီနေ့တော့ စခန်းမှာ ထိန်းသိမ်းထားတဲ့နှစ်ဦးကို ကျောက်တန်းမြို့နယ် တရားရုံးမှာ ချုပ်ရက် ရမန်ယူမှာပါ။ တရားလို အမျိုးသမီးကိုတော့ သန်လျင်ဆေးရုံမှာ ဆေးစစ်နေပါတယ်” ဟု ပြောကြားသည်။

အဆိုပါအမှုမှာ လိမ်လည်တိုင်ကြားခံရသည့် အမှုဖြစ်ကြောင်း၊ တရားလိုအမျိုးသမီးက မေ ၁၄ ရက် ညနေ ၅ နာရီခန့်တွင် ကျောက်တန်းမြို့မရဲစခန်းသို့ လာရောက်ထွက်ဆိုခဲ့သည်ဟု ယင်းအမှုကို လိုက်လံကူညီဆောင် ရွက်ပေးသူ၏ ပြောကြားချက်ကို ကိုးကား၍ ဖမ်းဆီးခံထားရသူနှစ်ဦး၏ မိသားစုဝင် ကိုအောင်မျိုးက ပြောကြားသည်။

“ညနေ ၄ နာရီခွဲ ၅ နာရီ တရားလိုအမျိုးသမီး စခန်းကို ရောက်လာတယ်။ စခန်းရောက်တော့ စခန်းမှူးက နင်ထွက်ဆိုထားတာတွေက သုံးလေးမျိုးဖြစ်နေတယ်။ အဓမ္မ ပြုကျင့်တာ ဟုတ် မဟုတ် မေးတယ်။ အမျိုးသမီးက ပထမတော့ ၀န်မခံဘူး။ နောက်တော့မှ သူက အမှုကို လိမ်လည်တိုင်ထားမှန်း စခန်းမှာ ၀န်ခံသွားတယ်။ ကျွန်တော်တို့က အဲဒီအချိန်မှာ စခန်းအရှေ့မှာ ရှိနေတာပါ။  အဲဒီအမျိုးသမီး လိမ်လည်ထွက်ဆိုသွားတာကို ကျွန်တော်တို့ရဲ့အမှုကို လိုက်လံကူညီပေးတဲ့ သူငယ်ချင်းက ပြောပြတာပါ။ သူ့အမျိုးသားက ည ၈ နာရီလောက်မှာ စခန်းကို ရောက်လာပါတယ်” ဟု ကိုအောင်မျိုးက ဆက်လက်ပြောကြားသည်။

ယင်းဖြစ်စဉ်တွင် ဖမ်းဆီးခံထားရသူ နှစ်ဦးအနက် တစ်ဦးမှာ တောင်ဒဂုံမြို့နယ် ၁၀၆ ရပ်ကွက်တွင် ကုန်စုံဆိုင်ဖွင့်လှစ်ထားပြီး ကျန်တစ်ဦးမှာ လှိုင်သာယာမြို့နယ်တွင် သစ်အဟောင်းအရောင်းအ၀ယ် ပြုလုပ်နေသူဖြစ်ကြောင်း ကိုအောင်မျိုး၏ ပြောကြားချက်အရ သိရသည်။

ဖြစ်စဉ်တွင် ဖမ်းဆီးခံထားရပြီး မုဒိမ်းမှု ကျူးလွန်သည်ဟု စွပ်စွဲခံရသူနှစ်ဦးမှာ တရားလိုများအား သွားရောက်ခေါ်ဆောင်စဉ်တွင် ပါဝင်ခြင်း မရှိကြောင်း သိရသည်။

“အခုဖြစ်စဉ်နဲ့ပတ်သက်ပြီး ဖမ်းဆီးထားတာ တစ်ယောက်က ကျွန်တော့်ယောက်ဖ။ တစ်ယောက်က ကျွန်တော့်အစ်ကို။ ကျွန်တော့်အစ်ကိုနာမည်က မောင်ထွေး။ ယောက်ဖ နာမည်က ခင်မောင်(ခ)ပသားပါ။ အစ်ကိုက တောင်ဒဂုံ ၁၀၆ မှာကုန်စုံဆိုင်ဖွင့်တယ်။ အားရင် အားသလို တက္ကစီမောင်းတယ်။ ကျွန်တော့်ယောက်ဖကတော့ လှိုင်သာယာမှာ သစ်အဟောင်းတွေ အရောင်းအ၀ယ်လုပ်ပါတယ်။ တရားလိုမိန်းမရဲ့ ယောက်ျားက ဦးကျော်။ သူက ပစ္စည်းရမယ်ပြောတော့ ကျွန်တော့်ယောက်ဖနဲ့သိတဲ့ ကိုလတ်က ဦးကျော်နဲ့ မိတ်ဆက်ပေးတယ်။ ဦးကျော်က ဗိုလ်မှူးနဲ့ ရင်းနှီးပြီး အလုပ်လုပ်နေတဲ့သူပါ။ စစ်တပ်က ဗိုလ်မှူးက ဂိုဒေါင်တွေကို လေလံရထားတယ် ပြောတယ်။ အဲဒီအတွက်ကြောင့် ဗိုလ်မှူးကို ပိုက်ဆံပေးရမယ်ပြောတယ်။ အဲဒီတော့ ကျွန်တော့်ယောက်ဖက ယုံပြီးတော့ အလုပ်လုပ်မယ်ဆိုပြီး ပစ္စည်းတွေ၊ ဂိုဒေါင်တွေကို သွားကြည့်ပြီး ဈေးဖြတ်တယ်။ ပိုက်ဆံပေးတယ်။ ပထမဆုံးပိုက်ဆံစပေးတဲ့အချိန်မှာ ရှေ့နေတွေ ဘာတွေနဲ့ စာချုပ်ချုပ်တယ်။ သိန်း ၁၁၀ ပထမဆုံးတစ်ခေါက် ပေးလိုက်တယ်။ ပေးပြီးတဲ့နောက်ပိုင်းမှာ ပစ္စည်းရမယ်ပြောပြီးနောက် တစ်ခေါက်လာပြီး ပိုက်ဆံထပ်လာတောင်းတော့  သိန်း ၅၀ ပေးလိုက်တယ်။ နောက်တစ်ခေါက်ထပ်လာတော့ ၅၀ ပေးလိုက်၊ ၇၀ ပေးလိုက်၊ ၃၀ ပေးလိုက်နဲ့ အားလုံးပေါင်းလိုက်ရင် သိန်း ၃၆၀ လောက်ရှိပါတယ်။ အဲဒီလိုပေးပြီးတော့နောက်ပိုင်း သူတို့က ဟိုနေ့ရမယ်၊ ဒီနေ့ရမယ် သင်္ကြန်ပြီးရမယ်ပြောတယ်။ နောက်ဆုံးတစ်ခေါက်မှာ သုံး၊ လေးရက်နေတော့ ဖုန်းတွေဘာတွေ ပိတ်လိုက်တယ်။ မလာတော့ဘူး။ သူ့လူတွေထဲကပဲ ဒီလူနေတဲ့နေရာကို ကျွန်တော်တို့သိတယ်ပြောပြီး သူတို့ပဲ သူတို့ကားတွေနဲ့သွားခေါ်တယ်။ ခေါ်တာတော့ ဗိုလ်မှူးတစ်ယောက်ပါတယ်။ ကိုဝင်းနိုင်ဆိုတဲ့ အခုအချုပ်ကျပြီး အာမခံနဲ့ ပြန်လွတ်သွားတဲ့သူရယ်၊ ကိုသန်းနိုင်ရယ် အားလုံးပေါင်း ငါးယောက်လောက်ရှိမယ်။ သွားခေါ်တဲ့အထဲမှာ ကျွန်တော့်ယောက်ဖလည်း မပါဘူး။ ကျွန်တော့် အစ်ကိုလည်း မပါဘူး။ သူတို့က သူတို့ ကားတွေနဲ့ သွားခေါ်ပြီး လှိုင်သာယာကို ခေါ်လာခဲ့တယ်။ လှိုင်သာယာအိမ်မှာ ကျွန်တော့် ယောက်ဖပဲရှိတာပါ။ အစ်ကိုက တောင်ဒဂုံ ၁၀၆ မှာပါ။ ညကျမှလာပြီး ကျွန်တော့် အစ်မကို လာခေါ်တယ်။ ကျွန်တော့်အစ်မက သူ့ ယောက်ျားကို ဖမ်းသွားလို့ဆိုပြီး လှမ်းခေါ်လို့။ ကျွန်တော့်အစ်ကိုက ရဲစခန်းကို လိုက်ပို့ တာပါ။ လှိုင်သာယာခေါ်လာတဲ့အချိန်မှာ ဗိုလ်မှူးက ပိုက်ဆံတွေ ဘာလုပ်လိုက်လဲ။ ငါတို့ကို ပိုက်ဆံတွေလည်း လာမသွင်းဘူးမေးတယ်။ အဲဒါနဲ့ ဦးကျော်က ကျွန်တော် ကားဝယ်လိုက်တယ်။ ကျွန်တော့်မိန်းမကို ရွှေဝယ် ပေးလိုက်တယ် ပြောတယ်။ အဲဒီအချိန်တရားလို သူ့မိန်းမလည်းရှိတယ်။ သူ့မိန်းမကိုမေးတော့ ပိုက်ဆံပြန်သွားယူပေးမယ်လို့ ပြောတယ်။ အဲဒီအမျိုးသမီးက ရွှေတွေဘာတွေ ရောင်းပြီး သိန်း ၁၀၀ ရရ၊ ၁၅၀ ရရ ပေးမယ် လို့ပြောပြီး ပိုက်ဆံတွေ သွားပြန်ယူတယ်။  ပိုက်ဆံသွားယူနေတဲ့အချိန် အဲဒီမိန်းမကို ဖုန်းဆက်တော့ ၂ နာရီရောက်မယ်ပြောပြီး ညနေ ၄ နာရီထိုးသွားတယ်။ ဗိုလ်မှူးကတော့ ဒီမိန်းမ ငါတို့ကို ကလိမ်ကကျစ် ကျသွားပြီဆို ပြီး သူ့နောက်ကို လိုက်သွားကြတယ်။ ဖုန်း ဆက်တော့ အဲဒီမိန်းမက သာကေတရောက်နေတယ်ပြောတယ်။ ကျွန်တော့် ယောက်ဖလည်း ကားနဲ့ပါသွားတယ်။ သာကေတရောက်ပြီး ထပ်ပြီးဖုန်းဆက်တော့ ဒဂုံဆိပ်ကမ်း ရောက်နေတယ်ပြောလို့ ထပ်လိုက်သွားတယ်။ အဲဒီအချိန်မှာ ကျွန်တော့်ယောက်ဖကားထဲမှာ တရားလိုမိန်းမရဲ့ ယောက်ျားလည်းပါ တယ်။ အခုဖမ်းခံထားရတဲ့ သူတွေလည်း ပါတယ်။ ကျွန်တော့်အစ်ကိုတော့ မပါဘူး။ ဒဂုံ ဆိပ်ကမ်းက ပွိုင့်လက်ဖက်ရည်ဆိုင်မှာ ပိုက်ဆံယူဖို့စောင့်နေတုန်း မီးတန်းကားနဲ့ လာဖမ်းသွားတယ်။ အခု အဖမ်းခံထားရတဲ့ ခင်မောင် (ခ) ပသားက ကျွန်တော့် အစ်မရဲ့ ယောက်ျားပါ။ သူ့ယောက်ျားအဖမ်းခံရတယ် ဆိုပြီး ကျွန်တော့်အစ်ကိုဆီ ဖုန်းဆက်တော့ စခန်းကိုရောက်သွားတယ်။ စခန်းရောက်တော့ တရားလိုမိန်းမက လက်ညှိုးထိုးပြီး ကျွန်တော့်ယောက်ဖနဲ့ အစ်ကိုကို မုဒိမ်းကျင့်တယ် ပြောပါတယ်” ဟု ကိုအောင်မျိုးက ပြောကြားသည်။

တောင်ဒဂုံမြို့နယ် ၆၈ ရပ်ကွက် အုပ်ချုပ်ရေးမှူး ဦးစန်းမြင့်က “ဦးကျော် (တရားလိုအမျိုးသမီး၏ ခင်ပွန်း) က ဟိန္ဒူဘုရားကျောင်းက ဂေါပကလူကြီးလို့ ကြားတယ်။ ဆေးလည်းကုတယ်။ အခုဖြစ်တဲ့ကိစ္စက အရောင်းအ၀ယ် ကိစ္စတွေပါ။ သူက (တရားလိုအမျိုးသမီး၏ခင်ပွန်း) က ကုန်ကြမ်းရှာမယ်။ ဒီ ဘက်က ၀ယ်မယ့်သူ ၀ယ်လက်ရှာတဲ့ ပုံစံမျိုးနဲ့ အဲဒီလို ဆက်သွယ်တယ်လို့ သိရတယ်။ ဦးကျော်က လုပ်ငန်းမရှိပေမယ့် သူက အဆောက်အအုံ ဂိုဒေါင်ပျက်တွေကို တပ်ကနေ လေလံပစ်တဲ့ ဟာကိုဝယ်တယ်။ ဒီဘက်က အဖမ်းခံရတဲ့သူတွေက ၀ယ်လက်ရှာတယ်။ အဲဒီကနေ အဆက်အသွယ် ရပြီးတော့ လိမ်သွားတဲ့အခါကျမှ လိုက်ကြတာပါ။ ပိုက်ဆံတွေပါသွားတော့ သူ တို့ကို တွေ့မှဖြစ်မယ်။ လိုက်ရှာကြတယ်လို့ သိရပါတယ်” ဟု ပြောကြားသည်။

ယင်းသို့သောအခြေအနေတွင် လူမှုကွန်ရက် စာမျက်နှာများပေါ်တွင် ရေးသားထားသည့် အချက်အလက်အကြောင်းအရာများမှာ စွပ်စွဲခံရသည့်မိသားစုဝင်များနှင့် ကာယကံရှင်များ၏ ဂုဏ်သိက္ခာ ကျဆင်းစေသဖြင့် တရားဥပဒေအရ ဆက်လက်ဆောင်ရွက်သွားရန် အစီအစဉ်ရှိကြောင်းလည်း စွပ်စွဲခံရသည့် မိသားစုဝင်များကပြောကြားသည်။

ဖြစ်စဉ်မှာ မေ ၁၀ ရက်က ဖြစ်ပွားခဲ့ခြင်း ဖြစ်ပြီး ပြစ်မှုကျူးလွန်သည်ဟု ဆိုသည့် ၀င်းနိုင် ၅၂ နှစ် ၊ သန်းဝင်း ၄၇ နှစ် ၊ ၀င်းသိန်း ၃၈ နှစ်၊ ခင်မောင်(ခ)ပသား ၅၀ နှစ်၊ ဗိုလ်ကြီး ကောင်းခန့်ကျော် ၃၂ နှစ်နှင့် နောက်ထပ်စုံစမ်းဆဲ နှစ်ဦး စုစုပေါင်း တရားခံခုနစ်ဦးအား ပ-၁၇၇/၂၀၁၈ ၊ ရာဇသတ်ကြီးပုဒ်မ- ၃၇၆/ ၃၂၃/၃၄၂/၁၁၄ တို့ဖြင့် ကျောက်တန်းမြို့မ ရဲစခန်းတွင် အမှုဖွင့်ထားကာ တရားရင်ဆိုင်နေရခြင်းဖြစ်သည်။

တောင်ဒဂုံမြို့နယ်တွင် Community Recreation Center တည်ဆောက်ရန်အတွက် တင်ဒါခေါ်

ရန်ကုန်တိုင်းဒေသကြီး၊ တောင်ဒဂုံမြို့နယ်တွင် Community Recreation Center တည်ဆောက်ရန်အတွက် ပြည်တွင်းပြည်ပ အဖွဲ့အစည်းများအား ရန်ကုန်တိုင်းဒေသကြီး အစိုးရအဖွဲ့၊ တင်ဒါစိစစ်ကြီးကြပ်ရေးအဖွဲ့က မေ ၈ ရက်က တင်ဒါခေါ်ယူခဲ့ကြောင်း သိရသည်။

အဆိုပါတင်ဒါပုံစံများကို မေ ၉ ရက်မှစ၍ ရန်ကုန်တိုင်းဒေသကြီးအစိုးရအဖွဲ့ တင်ဒါစိစစ်ကြီးကြပ်ရေးအဖွဲ့ရုံး၊ ရန်ကုန်တိုင်းဒေသကြီး၊ ဒဂုံမြို့နယ်၊ အလုံလမ်းပေါ်ရှိ လွှတ်တော်ဂိတ်အမှတ် (၄)တွင် အခမဲ့ရယူနိုင်ကြောင်း သိရသည်။

တင်ဒါတင်သွင်းမည့် ကုမ္ပဏီသည် အဆိုပြုလွှာအပြည့်အစုံကို တင်ဒါစိစစ်ကြီး ကြပ်ရေးအဖွဲ့ရုံးသို့ ဇွန် ၈ ရက် နောက်ဆုံးထား၍ ပြန်လည်တင်သွင်းရမည်ဖြစ်ပြီး နောက်ကျတင်သွင်းသော တင်ဒါများကို လက်ခံစဉ်းစားမည်မဟုတ်ဘဲ အဆိုပြုလွှာများကို  ရန်ကုန်တိုင်းဒေသကြီးအစိုးရအဖွဲ့  တင်ဒါစိစစ်ကြီး ကြပ်ရေးအဖွဲ့က ဖွင့်ဖောက်စစ်ဆေးမည်ဖြစ်ကြောင်း သိရသည်။

တင်ဒါခေါ်ယူခြင်းနှင့်ပတ်သက်ပြီး သိရှိလိုသော အချက်အလက်များကို တင်ဒါစိစစ်ကြီးကြပ်ရေးအဖွဲ့၏ emailး tender@yangon.gov.mm မှတစ်ဆင့်သော်လည်းကောင်း၊ ရန်ကုန်တိုင်းဒေသကြီးအစိုးရအဖွဲ့ တင်ဒါစိစစ်ကြီးကြပ်ရေးအဖွဲ့ရုံး ဖုန်းနံပါတ် ၀၁-၈၃၀၂၄၇၇ သို့ ရုံးချိန်းအတွင်း ဆက်သွယ်မေးမြန်းနိုင်ကြောင်း သိရသည်။

တောင်ဒဂုံမြို့နယ် ၂၆ ရပ်ကွက်တွင် အသက် ၅၀ ကျော် အမျိုးသမီးတစ်ဦးကိုသတ်ပြီး ရွှေနှင့်ငွေများ ယူဆောင်တိမ်းရှောင်သွားသည့် ကျူးလွန်သူအား ထားဝယ်မြို့တွင် ဖမ်းဆီးရမိ

ဒဂုံမြို့သစ် (တောင်ပိုင်း) မြို့နယ်တွင် အသက် (၅၄ နှစ်) အရွယ် အမျိုးသမီးအားသတ်ပြီး ရွှေထည်၊ ငွေများနှင့် ဖုန်းပါယူဆောင်ကာ တိမ်းရှောင်သွားသည့် ကျူးလွန်သူအား ထားဝယ်မြို့တွင် ဧပြီ ၈ ရက်က ဖမ်းဆီးရမိပြီဖြစ်ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ သိရသည်။

ကျူးလွန်သူမှာ သီရိမောင်ဆိုသူ အမျိုးသားတစ်ဦးဖြစ်ပြီး သေဆုံးသူနှင့် Online တွင် သိကျွမ်းခဲ့ဖူးကြောင်းနှင့် အမျိုးသမီးအားသတ်ပြီးနောက် သေဆုံးသူ၏ နားကပ်တစ်ဖက်၊ ရွှေလက်စွပ်တစ်ကွင်း၊ ကျောက်ဖြူလက်စွပ်တစ်ကွင်း၊ Huawei လက်ကိုင်ဖုန်းတစ်လုံးနှင့် ငွေကျပ် ၃၈ သိန်းတို့ကို ယူဆောင်ထွက်ပြေးသွားကြောင်း သိရသည်။

တောင်ဒဂုံမြို့မရဲစခန်းမှ တာဝန်ကျရဲအရာရှိတစ်ဦးက “ကျူးလွန်သူကို ဖမ်းဆီးရမိပြီဆိုတာ ဟုတ်ပါတယ်။ ထားဝယ်မှာ သွားဖမ်းရတာပါ။ သွားဖမ်းတာဖြစ်လို့ ကျူးလွန်သူ ဒီကိုတော့ရောက်မလာသေးပါဘူး” ဟု ဧပြီ ၈ ရက် ညနေ ၅ နာရီ ၃၀ မိနစ်ခန့်က ပြောကြားသည်။

ဒဂုံမြို့သစ် (တောင်ပိုင်း) မြို့နယ်နေ ဦးဝင်းမြင့်သည် ၎င်း၏သားဖြစ်သူနှင့်အတူ နေပြည်တော်မှ နေအိမ်သို့ ဧပြီ ၃ ရက်နံနက် ၅ နာရီ ၃၀ မိနစ်ခန့်က ပြန်လည်ရောက်ရှိစဉ် နေအိမ်အတွင်းခန်း၌ ဇနီးဖြစ်သူ ဒေါ်နှင်းကြည်မှာ ပါးစပ်ကို ပုဆိုးစနှင့်ပိတ်၍ လည်ပင်းနှင့်တွဲလျက် ရစ်ပတ်ချည်နှောင်ထားကာ ပက်လက်အနေအထားဖြင့် ဓားဒဏ်ရာများ ရရှိသေဆုံးနေကြောင်းကိုသိရှိခဲ့၍ တောင်ဒဂုံမြို့မရဲစခန်းသို့ တိုင်းကြားခဲ့သည်။

ထို့နောက် အမှုဖြစ်ပွားသည့်နေရာသို့ အထူးအမှုစစ်အဖွဲ့မှ လာရောက်ကာ ဖြစ်ရပ်အား အသေးစိတ်စစ်ဆေးခဲ့ပြီး သဲလွန်စအထောက်အထားအဖြစ် အခင်းဖြစ်နေရာရှိ ရေချိုးခန်းအုတ်ကန်အတွင်းမှ စတီးဓားမတစ်ချောင်း၊ နေအိမ်ဝင်း သံပန်းတံခါးပိတ်သည့် သော့တစ်ချောင်းအပါအ၀င် သက်သေခံအထောက်အထားများကို သိမ်းဆည်းရရှိခဲ့ပြီး ဦးဝင်းမြင့်၏ သားဖြစ်သူပြောပြချက်အရ သေဆုံးသူ ဒေါ်နှင်းကြည်၏ နားကပ်တစ်ဖက်၊ ရွှေလက်စွပ်တစ်ကွင်း၊ ကျောက်ဖြူလက်စွပ်တစ်ကွင်း၊ Huawei လက်ကိုင်ဖုန်းတစ်လုံးနှင့် ငွေကျပ် ၃၈ သိန်းတို့ ပျောက်ဆုံးနေကြောင်းကိုပါ သိရှိခဲ့ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးက သိရသည်။

ဆက်လက်၍ အထူးအမှုစစ်အဖွဲ့က သေဆုံးသူ၏ နောက်ကြောင်းစုံစမ်းချက်များအရ သေဆုံးသူ ဒေါ်နှင်းကြည်မှာ Online မှတစ်ဆင့် မြေနီကုန်းတွင် တွန်းလှည်းဖြင့် သစ်သီးရောင်းသူ သီရိမောင်ဆိုသူနှင့် ခင်မင်ရင်းနှီးခဲ့ဟု စုံစမ်းသိရှိခဲ့ကြောင်း သိရသည်။

ကျူးလွန်သူ သီရိမောင်ဆိုသူသည် ကော့မှူးမြို့နယ်၊ ရှာဘွားကျေးရွာတွင် ကွမ်းခြံစိုက်ပျိုးရေးလုပ်ငန်း လုပ်ကိုင်ဖူးကြောင်း၊ ၎င်း၏ဇာတိမှာ မအူပင်မြို့နယ်၊ ၀ဲဒေါင့်ကျေးရွာဖြစ်ကြောင်း၊ ရန်ကုန်မြို့ မြေနီကုန်းဝန်းကျင်၌ သစ်သီးရောင်းချသည့် အလုပ်ကို လုပ်ကိုင်ကြောင်းနှင့် တနင်္သာရီတိုင်းဒေသကြီး၊ ထားဝယ်မြို့နယ်၊ မေတ္တာမြို့၊ ကတ္တာရာခီးကျေးရွာရှိ ရော်ဘာခြံတွင်လည်း လုပ်ကိုင်ဖူးကြောင်း၊ စုံစမ်းမှုများအရ ကျူးလွန်သူသည် တနင်္သာရီတိုင်းဒေသကြီး၊ ထားဝယ်မြို့နယ်၊ မေတ္တာမြို့သို့ ရောက်ရှိနေကြောင်း သိရသည်။

ထို့နောက် ရန်ကုန်တိုင်းဒေသကြီး ရဲတပ်ဖွဲ့မှူးရုံး၊ မှုခင်းအကူဌာနစုမှ တပ်ဖွဲ့ဝင်များသည် သီရိမောင်အား ထားဝယ်မြို့နယ်၊ မေတ္တာမြို့၊ ကတ္တာရာခီးကျေးရွာရှိ ရာဘာခြံ၌ ဧပြီ ၈ ရက် နံနက် ၁ နာရီတွင် ဖမ်းဆီးရမိခဲ့ပြီး ၎င်းထံမှ ပါဆုံးပစ္စည်းများဖြစ်သည့် ကျပ် ၁၃၈၈၀၀၀၊ သေဆုံးသူ ဒေါ်နှင်းကြည် ၀တ်ဆင်သည့် နားကပ်တစ်ဖက်၊ ရွှေလက်စွပ်တစ်ကွင်း၊ ကျောက်ဖြူလက်စွပ်တစ်ကွင်း၊ Huawei လက်ကိုင်ဖုန်းတစ်လုံးတို့ကို သိမ်းဆည်းရမိခဲ့ကြောင်း သိရသည်။

ကျူးလွန်သူ သီရိမောင်အား တောင်ဒဂုံမြို့မရဲစခန်းတွင် (ပ) ၆၉၈/၂၀၁၈၊ ရာဇသတ်ကြီးပုဒ်မ-၃၀၂ ဖြင့် အမှုဖွင့်ထားကြောင်းသိရပြီး ကျန်ရှိသည့် သက်သေခံငွေများရရှိရေး ဆက်လက်စစ်ဆေး ဆောင်ရွက်လျက်ရှိကြောင်း သိရသည်။

ဘုရားအလှူခံပုံးအတွင်းမှ ငွေကျပ် ၃၀၀ ခိုးယူသည်ဟုဆိုကာ ကလေးသုံးဦးအား ပုဒ်မ ၃၇၉ ဖြင့် အမှုဖွင့်ထားသည့်အပေါ် တောင်ဒဂုံမြို့နယ်တွင် ကန့်ကွက်ဆန္ဒပြရာ ရဲတပ်ဖွဲ့က တားဆီးသဖြင့် ရုန်းရင်းဆန်ခတ်ဖြစ်ပွား

ဆန္ဒထုတ်ဖော်နေသူများနှင့် ရဲတပ်ဖွဲ့ဝင်များ ရုန်းရင်းဆန်ခတ် ဖြစ်ပွားပြီး ကားပေါ်သို့ ခေါ်ဆောင်သွားသည်ကို စက်တင်ဘာ ၂၆ ရက်က တွေ့ရစဉ်

တောင်ဒဂုံမြို့နယ် အောင်ဗောဓိဘုရား အလှူခံပုံးအတွင်းမှ ငွေကျပ် ၃၀၀ ခိုးယူသည် ဟုဆိုကာ ကလေးသုံးဦးအား ပုဒ်မ ၃၇၉ ဖြင့် အမှုဖွင့်ထားသည့်အပေါ် စက်တင်ဘာ ၂၆ ရက် နံနက် ၉ နာရီကျော်တွင် ကန့်ကွက်ဆန္ဒထုတ်ဖော်ရာ ရဲတပ်ဖွဲ့က တားဆီးသဖြင့် ရဲတပ်ဖွဲ့ဝင်များနှင့် ဆန္ဒထုတ်ဖော်သူများအကြား ရုန်းရင်းဆန်ခတ် ဖြစ်ပွားခဲ့ကြောင်း သိရသည်။

ဒေါ်စန်းစန်းဝင်း (ခ) ဒေါ်လေးလေး ဦးဆောင်သော ဆန္ဒထုတ်ဖော်သူ ၂၀ ခန့်သည် ဗီနိုင်းများကိုင်ဆောင်၍ “ယခင်အစိုးရ လက်ထက်ကတည်းက အများပြည်သူ မသိရှိဘဲ ဖွဲ့စည်းထားသော မြို့နယ်ကျက်သရေဆောင် အောင်ဗောဓိဘုရားဂေါပက ပြန်လည်ဖွဲ့စည်းပေးရေး…ဒို့အရေး” “တောင်ဒဂုံမြို့နယ်အတွင်း တစ်ဦးတည်းပိုင် နာမည်ဖြင့် ရယူထားသော မီးတားကွင်းမြေများ ပြန်လည်ရရှိရေး …ဒို့အရေး” “လမ်းမပေါ်ရှိ စည်ပင်မြေများပေါ်တွင် ကျူးကျော်ခြံခတ်ထားခြင်းကို သက်ဆိုင်ရာဌာနများက စိစစ်အရေးယူ ဖယ်ရှားပေးရေး… ဒို့အရေး” “အောင်ဗောဓိဘုရား အလှူခံပုံးအတွင်းမှ ငွေ ၃၀၀ ကျပ်ခိုးယူသည်ဟု ကလေးသူငယ် သုံးဦးအား ပုဒ်မ ၃၇၉ ဖြင့် မတရားစွပ်စွဲထားသည့် မိဘရိပ်နိုင်ဦးနှင့် ဂေါပကလူကြီးများအား ဖယ်ရှားပေးရေး… ဒို့အရေး” စသည့် ကြွေးကြော်သံများဖြင့် လမ်းလျှောက်ချီတက် ဆန္ဒထုတ်ဖော်စဉ် ၅၆ လမ်းဆုံအကျော်တွင် တောင်ဒဂုံမြို့ နယ် ရဲတပ်ဖွဲ့ဝင်များက ဆန္ဒထုတ်ဖော်မှုအား အကြောင်းကြားမှုသည် ၄၈  နာရီမပြည့်သေးဟုဆိုကာ ရှေ့သို့ဆက်လက်ချီတက်ခြင်း မပြုရန် တားဆီးခဲ့ကြသည်။

ယင်းသို့ တားဆီးသဖြင့် ဆန္ဒထုတ်ဖော်သူများနှင့် ရဲတပ်ဖွဲ့ဝင်များအကြား တွန်းထိုးမှုများ ဖြစ်ပွားပြီးနောက် ရုန်းရင်းဆန်ခတ် ဖြစ်ပွားခဲ့ကြသည်။

ဆန္ဒထုတ်ဖော်ခြင်းအား တားဆီးခဲ့သည့် ရဲတပ်ဖွဲ့ဝင်များအား ဆန္ဒထုတ်ဖော်သူများက ဒေါ်စန်းစန်းဝင်း (ခ) ဒေါ်လေးလေးက တောင်ဒဂုံမြို့နယ်ရဲစခန်းသို့ စက်တင်ဘာ ၂၃ ရက် (စနေနေ့) ညနေ ၃ နာရီကတည်းက အကြောင်းကြားခဲ့သည့်အတွက် ၄၈ နာရီအား ကျော်လွန်နေပြီဖြစ်ကြောင်း ပြောဆိုခဲ့သော်လည်း ရဲတပ်ဖွဲ့ဝင်များက ၄၈ နာရီ မပြည့်ဟုဆိုကာ ပြန်လည်ပြောဆိုခဲ့သည်။

ဆန္ဒထုတ်ဖော်သူများနှင့် ရဲတပ်ဖွဲ့ဝင်များအကြား ရုန်းရင်းဆန်ခတ်ဖြစ်ပွားစဉ် ဆန္ဒပြခေါင်းဆောင် ဒေါ်စန်းစန်းဝင်း (ခ)ဒေါ်လေးလေးအား ရဲတပ်ဖွဲ့ဝင်များက ရဲကားပေါ်သို့ချုပ်နှောင်၍ မြို့နယ်အထွေထွေ အုပ်ချုပ်ရေးမှူးရုံးသို့ ဖမ်းဆီးခေါ်ဆောင် ခဲ့သည့်အတွက် ကျန်ဆန္ဒထုတ်ဖော်သူများသည်  ဒေါ်စန်းစန်းဝင်းအား လွှတ်ပေးရန် အော်ဟစ်ပြောဆိုကြပြီး လမ်းမနံဘေးတွင်ထိုင်၍ ရဲတပ်ဖွဲ့ဝင်များ ဖယ်ရှားပေးရန် တောင်းဆိုခဲ့ကြသည်။

ယင်းနောက် ရဲတပ်ဖွဲ့ဝင်များက ဆန္ဒထုတ်ဖော်နေသူများအား တောင်ဒဂုံမြို့နယ် အထွေထွေ အုပ်ချုပ်ရေးမှူးရုံးသို့ ခေါ်ဆောင်ခဲ့ပြီး မြို့နယ်ထွေအုပ်ရုံးတွင် ဒေါ်စန်းစန်းဝင်း အပါအ၀င် ဆန္ဒထုတ်ဖော်သူများနှင့် အထွေထွေအုပ်ချုပ်ရေးမှူး၊ တောင်ဒဂုံမြို့နယ်ရဲမှူး စသည့် တာဝန်ရှိသူများ တွေ့ဆုံခဲ့သည်။

တွေ့ဆုံရာ၌ တောင်ဒဂုံမြို့နယ် ရဲတပ်ဖွဲ့မှူးက ဒေါ်စန်းစန်းဝင်းသည် စခန်းသို့ ဆန္ဒထုတ်ဖော်ရန် လာရောက် အကြောင်းကြားချိန်သည် ၄၈ နာရီ မပြည့်သေးသည့်အတွက် ဆန္ဒပြ၍ မရကြောင်း ရှင်းလင်း ပြောကြားခဲ့ကြောင်း၊ ၄၈ နာရီကျော်လွန်မှ ဆန္ဒပြမည်ဆိုပါက ကန့်ကွက်မည် မဟုတ်ကြောင်း ပြောကြားသည်။

တောင်ဒဂုံမြို့နယ် အထွေထွေအုပ်ချုပ်ရေးမှူးကလည်း ရပ်ကွက်နှစ်ခုကြား မီးတားမြေအား မိဘရိပ်  ဦးနိုင်ဦး ခြံခတ်ထားခြင်းနှင့် ပတ်သက်၍ ယင်းဖြစ်စဉ်အား မည်သူမှ လာရောက်တိုင်တန်းခြင်း မရှိသေးကြောင်း ဆန္ဒထုတ်ဖော်သူများကို ပြောကြားသည်။

ဆန္ဒထုတ်ဖော်သူများသည် ရဲတပ်ဖွဲ့က ၄၈ နာရီ မပြည့်သေးဟုဆိုကာ တားဆီးမှုကြောင့် ၄၈ နာရီပြည့်သည့် စက်တင်ဘာ ၂၇ ရက် မွန်းလွဲ ၃ နာရီတွင် တောင်ဒဂုံမြို့နယ် အောင်ဗောဓိဘုရား အလှူခံပုံးအတွင်းမှ ငွေကျပ် ၃၀၀ ခိုးယူခဲ့သည်ဟုဆိုကာ ကလေးသုံးဦးအား ပုဒ်မ ၃၇၉ ဖြင့် အမှုဖွင့်ထားသည့်အပေါ် ထပ်မံ၍ ကန့်ကွက်ဆန္ဒ ထုတ်ဖော်သွားမည်ဖြစ်ကြောင်း သိရသည်။