မန္တဆေးတက္ကသိုလ် ခန္ဓာဗေဒဌာနတွင် ခန္ဓာကိုယ် လှူဒါန်းသူများကို ဂုဏ်ပြုသောအားဖြင့် ကမ္ပည်းရေးထိုး ဆောင်ရွက်မည်

မန္တဆေးတက္ကသိုလ် ခန္ဓာဗေဒဌာနတွင် ခန္ဓာကိုယ်လှူဒါန်းသူများ စာရင်းကို တွေ့ရစဉ်

ဆေးတက္ကသိုလ်ကျောင်းသား၊ ကျောင်းသူများ စာသင်ကြားရာတွင် လက်တွေ့ အခြေခံဘာသာရပ် တစ်ခုဖြစ်သော ခန္ဓာဗေဒဘာသာရပ်ကို သင်ကြားရာ၌ အသုံးပြု လေ့လာရသော သင်ခန်းစာများအတွက် ရည်ရွယ်လှူဒါန်းသော ခန္ဓာကိုယ် အလှူရှင်များအား ဂုဏ်ပြုသောအားဖြင့် မန္တလေးဆေး တက္ကသိုလ် ခန္ဓာဗေဒဌာနတွင် အထိမ်းအမှတ်နံရံ ပြုလုပ်ကာ အမည်များကို ကမ္ပည်းရေးထိုး မှတ်တမ်းတင် သွားမည်ဖြစ်သည်။

လက်ရှိတွင် အထိမ်းအမှတ်နံရံအဖြစ် စတင်ပြုလုပ်ထားရှိနေပြီဖြစ်ပြီး ၂၀၁၃ ခုနှစ်မှစကာ ဆေးတက္ကသိုလ်သို့ ခန္ဓာကိုယ် လှူဒါန်းသည့် သူများအနက် ခန္ဓာကိုယ် ရရှိခဲ့သည့် အမည်များကို စကျင်ကျောက်တွင် အမည်ရေးထိုးကာ နှစ်အလိုက် ချိတ်ဆွဲဂုဏ်ပြုထားပြီး ၂၀၁၃ ခုနှစ် အရှေ့ပိုင်း အလှူရှင် အမည်စာရင်း များကိုလည်း ရှာဖွေပြုစု ဆောင်ရွက်သွားမည်ဖြစ်ကြောင်း သိရသည်။

“ဒီခန္ဓာကိုယ် အလှူရှင်တွေဆိုတာ အသက်မရှိပေမယ့် သင်ကြားရေးမှာ ဆရာတွေပါပဲ။ ဒါကြောင့် သူတို့ကို ၀ိညာဉ်မဲ့ ဆရာအဖြစ် ဂုဏ်ပြုတာတွေ ပြုလုပ်သလို သင်ကြားတဲ့ အခါတိုင်းမှာလည်း သူတို့ကိုရည်ရွယ်ပြီး ကျောင်းသား၊ ကျောင်းသူတွေကို မေတ္တာပို့ ဆုတောင်းတာတွေ ပြုလုပ်ရတယ်။ အဲဒီလိုပဲ ခန္ဓာကိုယ်တွေကို အသုံးပြု ကိုင်တွယ်တဲ့အခါ ကျင့်ဝတ်နဲ့အညီ ကိုယ်သင်ကြားမယ့် အပိုင်းကိုပဲ ကိုင်တွယ်ခွင့်ရှိပြီး ခွဲစိတ်ပြီးရင် သူ့နဂို ရှိပြီးသားအတိုင်း စနစ်တကျ ပြန်လုပ်ဆောင် ပေးရတယ်။ ကျောင်းသား၊ ကျောင်းသူတွေရဲ့စိတ်ထဲမှာ ဆရာများအဖြစ် အမြဲဂုဏ်ပြုနိုင်ဖို့ အထိမ်းအမှတ်နံရံ အနေနဲ့ လုပ်ဆောင်တာဖြစ်ပြီး လှလှပပ စနစ်တကျနဲ့ သပ်ရပ်မှုရှိဖို့ ထပ်လုပ်ဆောင်သွားမှာပါ။ အခုကတော့ နှစ်အလိုက် စကျင်ကျောက်ပေါ်မှာ နာမည်ရေးထိုးပြီး နံရံမှာ ချိတ်ဆွဲထားနိုင် ပါသေးတယ်” ဟု မန္တလေး ဆေးတက္ကသိုလ် ခန္ဓာဗေဒဌာနမှ ပါမောက္ခ ဌာနမှူး ပါမောက္ခ ဒေါက်တာလဘန်ခွန်က ပြောကြားသည်။

ပြုလုပ်ထားသည့် အထိမ်းအမှတ်နံရံတွင် ၂၀၁၃ ခုနှစ်မှ ၂၀၁၈ ခုနှစ်အထိ အလှူရှင် ဦးရေ ၈၀ ကျော်ရှိကြောင်း သိရသည်။

မန္တလေး ဆေးတက္ကသိုလ်သို့ ခန္ဓာကိုယ် လှူဒါန်းမှုမှာ တစ်နှစ်ထက်တစ်နှစ် များပြားလျက်ရှိပြီး ၂၀၁၈ ခုနှစ်တွင် ခန္ဓာကိုယ် လာရောက်ကြိုတင် လှူဒါန်းသည့် ဦးရေ ၇၀၀ ခန့်ရှိကြောင်းနှင့် Death Body ခန္ဓာကိုယ် ရရှိသည့် ဦးရေ ၂၀ ခန့်ရှိကြောင်း သိရသည်။

 

ပြည်လမ်းမပေါ်ရှိ ဆေးတက္ကသိုလ် (၁) ရှေ့မျက်နှာစာတွင် စီးပွားဖြစ်မဏ္ဍပ်ဆောက်လုပ်မှု တက္ကသိုလ်က ကန့်ကွက်ခဲ့ပြီးနောက် မဏ္ဍပ်ဆောက်လုပ်ခွင့် တရားဝင်ပိတ်သိမ်း

ဆေးတက္ကသိုလ် (၁) ရှေ့မျက်နှာစာတွင် စီးပွားဖြစ်မဏ္ဍပ် ဆောက်လုပ်မှု ရပ်နားထားသည်ကို တွေ့ရစဉ် (ဓာတ်ပုံ-စည်သူ)

ပြည်လမ်းမပေါ်ရှိ ဆေးတက္ကသိုလ် (၁) ကျောင်းရှေ့မျက်နှာစာတွင် စီးပွားဖြစ်မဏ္ဍပ်ဆောက်လုပ်မှုနှင့် ပတ်သက်၍ တက္ကသိုလ်ဘက်မှ ကန့်ကွက်ခဲ့ပြီးနောက် မဏ္ဍပ်ဆောက်လုပ်ခွင့် တရားဝင်ပိတ်သိမ်းလိုက်ပြီဖြစ်ကြောင်း ဆေးတက္ကသိုလ် (၁) ကျောင်းသားသမဂ္ဂမှ မတ် ၄ ရက်က အသိပေးကြေညာချက် ထုတ်ပြန်ခဲ့သည်။

ပြည်လမ်းမပေါ်ရှိ ဆေးတက္ကသိုလ် (၁) ကျောင်းရှေ့မျက်နှာစာတွင် စီးပွားဖြစ်မဏ္ဍပ် ဆောက်လုပ်မှုနှင့်ပတ်သက်၍ ကန့်ကွက်ကြောင်း အသိပေးကြေညာချက်ကို မတ် ၃ ရက် ညပိုင်းက ဆေးတက္ကသိုလ် (၁) ကျောင်းသားသမဂ္ဂက ထုတ်ပြန်ကြေညာကြောင်း၊ အဆိုပါကြေညာချက်တွင် ဆေးတက္ကသိုလ် (၁) ပြည်လမ်း Campus မျက်နှာစာ၌ စီးပွားဖြစ် သင်္ကြန်မဏ္ဍပ်ဆောက်လုပ်ခြင်း၊ တက္ကသိုလ်ဝင်းအတွင်း ကားပါကင်နှင့် Food Court၊ အဖျော်ယမကာအတွက် နေရာများထားရှိခြင်းတို့ကို ဆေးတက္ကသိုလ် (၁) ပါမောက္ခချုပ်၊ ပါမောက္ခ/ဌာနမှူးများ၊ ဆေးတက္ကသိုလ် (၁) ကျောင်းသားသမဂ္ဂနှင့် ကျောင်းသားကျောင်းသူများအားလုံးက လုံးဝ လုံးဝ သဘောမတူဘဲ တပေါင်းတစည်းတည်း ကန့်ကွက်ကြောင်းနှင့် အေးချမ်းစွာပညာသင်ကြားရသည့် တက္ကသိုလ်ဝင်းအတွင်း မည်သည့်အချိန်တွင်မျှ ဤကဲ့သို့ပြုမူခြင်းကို မည်သည့်အချိန်အခါကာလတွင်မျှ လက်ခံနိုင်ခြင်းမရှိဘဲ ယခုကိစ္စကိုလည်း ကျောင်းအာဏာပိုင် အဖွဲ့နှင့်တာဝန်ရှိသူများက ဖြေရှင်းဆောင်ရွက်နေကြောင်း ကြေညာချက်တွင် ရေးသားထားသည်။

ထိုကဲ့သို့ ကြေညာချက်ထုတ်ပြန်ခဲ့ပြီး မတ် ၄ ရက်၊ နံနက်ပိုင်းက ဆေးတက္ကသိုလ် (၁)၊ ပါမောက္ခချုပ်က သက်ဆိုင်ရာတာဝန်ရှိသူများ၊ ဆရာဆရာမများ၊ ကျောင်းသားကျောင်းသူများနှင့် အရေးပေါ် တွေ့ဆုံဆွေးနွေးပွဲပြုလုပ်ခဲ့ကြောင်း၊ အဆိုပါတွေ့ဆုံမှုအပြီး ဆေးတက္ကသိုလ် (၁) ကျောင်းသားသမဂ္ဂက အသိပေး ကြေညာချက်အမှတ်စဉ် (၂) ကို ထုတ်ပြန်ကြေညာခဲ့ကြောင်းနှင့် ယင်းကြေညာချက်တွင် ဆေးတက္ကသိုလ် (၁) ပြည်လမ်း၌ စီးပွားဖြစ်မဏ္ဍပ်ဆောက်လုပ်မှုကို တက္ကသိုလ်အုပ်ချုပ်ရေးအဖွဲ့၊ ကျောင်းသားသမဂ္ဂ၊ ကျောင်းသားကျောင်းသူများအားလုံးနှင့် ကျောင်းသားကျောင်းသူဟောင်းများအသင်းတို့က တစုတစည်းတည်းပင် ကန့်ကွက်ကြောင်း၊ ထိုသို့ကန့်ကွက်မှုနှင့်အတူ မဏ္ဍပ်ဆောက်လုပ်မှုကို ပြန်လည်ပိတ်သိမ်းကြောင်း အစိုးရအဖွဲ့နှင့်အတူ ဆောင်ရွက်ပြီးဖြစ်ကြောင်းနှင့် ဆေးတက္ကသိုလ် (၁) ပြည်လမ်းတွင် စီးပွားဖြစ်မဏ္ဍပ် လုံးဝရှိတော့မည်မဟုတ်ကြောင်း အသိပေးကြေညာခဲ့သည်။

“ဒီနေ့ဆရာကြီးက ကျွန်တော်တို့ကို ခေါ်ပြောပါတယ်။ ဒီကိစ္စကို ဖြေရှင်းပြီးသွားပြီ။ အစိုးရပိုင်းကလည်း ဒီဟာကို ခွင့်မပြုတော့ဘူးလို့ပြောပါတယ်။ မနေ့ညက Facebook မှာ Post တက်လာတော့မှ ဒီကိစ္စကိုသိတာပါ။ အခုက မူးယစ်သောက်စားနေတာမျိုးတွေလည်း မလိုလားဘူး။ ကျောင်းသားတွေလည်း ပါဝင်တာမဟုတ်ဘူး။ ပြီးတော့ စီးပွားဖြစ်လုပ်မယ့် မဏ္ဍပ်မျိုးဆိုတော့ ကျွန်တော်တို့အနေနဲ့ မထောက်ခံပါဘူး။ ကျွန်တော်တို့ တက္ကသိုလ်မှမဟုတ်ပါဘူး။ ဘယ်တက္ကသိုလ်မဆို တက္ကသိုလ်ပရ၀ဏ်မှာ သတ်မှတ်ထားတဲ့ စည်းကမ်းတွေရှိတယ်။ ဒါတွေနဲ့သွေဖည်နေသလို ဖြစ်နေတာပေါ့။ ယဉ်ကျေးမှုက တစ်ပိုင်းလေ။ ဒါက ကျောင်းဝင်းဖြစ်နေတော့ ကျောင်းရဲ့ခွင့်ပြုချက်တို့ဘာတို့နဲ့ စနစ်တကျပဲ လုပ်စေချင်တယ်။ ဆရာတွေပြောတာကတော့ သူတို့လည်း ဒီမဏ္ဍပ်ဆောက်မယ့်ကိစ္စကို မသိဘူးလို့ ပြောပါတယ်” ဟု ဆေးတက္ကသိုလ် (၁) ကျောင်းသားသမဂ္ဂမှဥက္ကဋ္ဌ မောင်ပြည့်ပိုင်ဟိန်းက ပြောကြားသည်။

“ဆေးတက္ကသိုလ် (၁) ၀င်းရှေ့မျက်နှာစာမှာ မဏ္ဍပ်ဆောက်ဖို့ဆိုပြီး လျှောက်ထားတာတော့ရှိတယ်။ လျှောက်ထားတဲ့သူက ဦးအောင်ဗိုလ်ဟိန်းနာမည်နဲ့ပါ။ မဏ္ဍပ်အမည်ကတော့ ကျွန်တော်မမှတ်မိလို့ပါ။ မဏ္ဍပ်ဆောက်ဖို့ တက္ကသိုလ်ဘက်က ကန့်ကွက်တယ်ဆိုရင်တော့ ကျွန်တော်တို့ဘက်က ပါမစ်ထုတ်ပေးဖို့ အစီအစဉ်မရှိပါဘူး။ အခုက လျှောက်ထားဆဲအဆင့်ပဲ ရှိသေးတာပါ” ရန်ကုန်မြို့တော် စည်ပင်သာယာရေးကော်မတီ၊ အင်ဂျင်နီယာဌာန (လမ်းနှင့်တံတား) မှ လက်ထောက်အင်ဂျင်နီယာ ဦးသန်းဟုတ်က ပြောကြားသည်။

ယခုနှစ်သင်္ကြန်တွင် ရန်ကုန်မြို့၌ ရေကစားမဏ္ဍပ် ၆၆ ခု ချပေးထားကြောင်း ဧပြီ ၃ ရက်က ပြုလုပ်သည့် ရန်ကုန်တိုင်းဒေသကြီး အစိုးရအဖွဲ့ရုံး အစည်းအဝေးတွင် ရန်ကုန်တိုင်းဒေသကြီး ရဲတပ်ဖွဲ့က ထုတ်ပြန်ကြေညာထားသည်။

ပြည်ပဆေးတက္ကသိုလ်များမှ အခြေခံဆေးပညာဘွဲ့နှင့် အလားတူဘွဲ့ရရှိသူ မြန်မာဆရာဝန်များ၊ ပြည်ပတွင်ဆေးကုသနေသော မြန်မာဆရာဝန်များအတွက် အထွေထွေ ဆေးကုသခွင့် လိုင်စင်ထုတ်ပေးရေး အရည်အချင်းစစ် စာမေးပွဲ ကျင်းပမည်

ပြည်ပနိုင်ငံများရှိ ဆေးတက္ကသိုလ်များမှ အခြေခံဆေးပညာဘွဲ့ MBBS နှင့်အလားတူ ဘွဲ့ရရှိထားသူ မြန်မာနိုင်ငံသားဆရာဝန်များနှင့် ပြည်ပနိုင်ငံများတွင် ဆေးကုသမှု လုပ်ငန်းများ ဆောင်ရွက်နေသော မြန်မာနိုင်ငံသားဆရာဝန်များအတွက် အထွေထွေ ဆေးကုသခွင့် လိုင်စင်ထုတ်ပေးရေး အရည်အချင်းစစ် စာမေးပွဲ (Myanmar Medical Licensing Examination MMLE) ကို ၂၀၁၈ ခုနှစ် မေလတွင် ကျင်းပသွားမည်ဖြစ်ကြောင်း မြန်မာနိုင်ငံ ဆေးကောင်စီမှ သိရသည်။

အဆိုပါ အရည်အချင်းစစ် စာမေးပွဲကို ၂၀၁၈ ခုနှစ် မေလတွင် ကျင်းပသွားမည်ဖြစ်ရာ စာမေးပွဲဝင်ရောက် ဖြေဆိုလိုသူများအနေဖြင့် မြန်မာနိုင်ငံဆေးကောင်စီရုံးသို့ ၂၀၁၈ ခုနှစ် မတ် ၃၀ ရက် ညနေ ၄ နာရီ နောက်ဆုံးထား လျှောက်ထားနိုင်ကြောင်း သိရသည်။

မြန်မာနိုင်ငံဆေးကောင်စီထံ တင်ပြရမည့် အချက်အလက်များကိုလည်း သတ်မှတ်ထားပြီး ယင်းတို့မှာ စာမေးပွဲဖြေဆိုခွင့်လျှောက်လွှာ (မြန်မာနိုင်ငံဆေးကောင်စီရုံးတွင် အခမဲ့ရယူနိုင်ကြောင်း)၊ နိုင်ငံသားစိစစ်ရေးကတ်ပြား မူရင်းနှင့်မိတ္တူတစ်စုံ၊ ဘွဲ့လက်မှတ်မူရင်းနှင့် မိတ္တူတစ်စုံ၊ အလုပ်သင် ဆရာဝန်ပြီးဆုံးကြောင်း ထောက်ခံစာမူရင်းနှင့် မိတ္တူတစ်စုံ၊ အမှတ်စာရင်းမူရင်းနှင့် မိတ္တူတစ်စုံ၊ ပြည်ပနိုင်ငံများတွင် ဆေးကုသမှုလုပ်ငန်းများ ဆောင်ရွက်နေသူဖြစ်ပါက အဆိုပါ နိုင်ငံများ၏ဆေးကောင်စီ (သို့မဟုတ်) အလားတူ အဖွဲ့အစည်းများမှ ထုတ်ပေးထားသော ဆေးကုသခွင့်လိုင်စင် (သို့မဟုတ်) Certificate of Good Standing မူရင်းနှင့် မိတ္တူတစ်စုံ၊ ပြည်ပနိုင်ငံတွင် နေထိုင်သူဖြစ်ပါက သက်တမ်းရှိ နိုင်ငံကူးလက်မှတ်မူရင်းနှင့် မိတ္တူတစ်စုံ၊ စာမေးပွဲကြေးငွေကျပ် သုံးသိန်းငါးသောင်းတိတိ ပေးသွင်းပြီးကြောင်း ပြေစာနှင့် တစ်လက်မပတ်လည် ရောင်စုံဓာတ်ပုံသုံးပုံ (နောက်ခံအပြာရောင်)တို့ လိုအပ်ကြောင်း သိရသည်။

စာမေးပွဲဖြေဆိုရမည့် မေးခွန်းလွှာတွင် ရေးဖြေမေးခွန်းလွှာ (၁) ဆေးပညာဘာသာရပ်၊ ကလေးကျန်းမာပညာဘာသာရပ်များနှင့် ၎င်းဘာသာရပ်များနှင့် နှီးနွှယ်သော အခြေခံဆေးပညာ ဘာသာရပ်များနှင့် ပတ်သက်သောမေးခွန်းလွှာ၊ ရေးဖြေမေးခွန်းလွှာ (၂) ခွဲစိတ်ကုဘာသာရပ်၊ သားဖွားမီးယပ် ပညာဘာသာရပ်များနှင့် ၎င်းဘာသာရပ်များနှင့်နှီးနွှယ်သော အခြေခံဆေးပညာဘာသာရပ်များနှင့် ပတ်သက်သောမေးခွန်းလွှာ၊ ဆေးလက်တွေ့ဘာသာရပ်၊ ရေးဖြေမေးခွန်းလွှာများကို ဖြေဆိုချိန် သုံးနာရီသတ်မှတ်၍ M.C.Q (Multiple Choice Question) minus system not carried over ပုံစံဖြင့် စစ်ဆေးသွားမည်ဖြစ်ကြောင်းနှင့် စာမေးပွဲနှင့် ပတ်သက်သော အသေးစိတ် အချက်အလက်များကို မြန်မာနိုင်ငံဆေးကောင်စီတွင် ထုတ်ပြန်ကြေညာထားကြောင်း သိရသည်။