ငွေဆောင်ကမ်းခြေတွင် ဟိုတယ်ဇုန်များ တည်ဆောက်ရေးအတွက် ဦးပိုင်မှ သိမ်းဆည်းပြီးနောက် လုပ်ငန်းရှင်များထံ လွှဲပြောင်းပေးခဲ့သည့် မြေနေရာများနှင့် ပတ်သက်၍ မူလပိုင်ရှင်များအား နစ်နာကြေး ပေးအပ်နိုင်ရေး ညှိနှိုင်းဆောင်ရွက်ရာတွင် နစ်နာကြေး နည်းပါးနေကြောင်း သိရ

ငွေဆောင်ကမ်းခြေတွင် ၂၀၀၀ ပြည့်နှစ်၌ ဟိုတယ်ဇုန်များ တည်ဆောက်ရေးအတွက် ဒေသခံများပိုင်ဆိုင်သော မြေယာများကို ဦးပိုင်မှ သိမ်းဆည်းပြီးနောက် လုပ်ငန်းရှင်များထံ လွှဲပြောင်းပေးခဲ့သည့် မြေနေရာများနှင့် ပတ်သက်၍ သိမ်းဆည်းခံ မူလပိုင်ရှင်များမှ အစိုးရသစ် လက်ထက်တွင် တင်ပြတောင်းဆိုမှုများအပေါ် သိမ်းဆည်းခံ မြေပိုင်ရှင်များ မနစ်နာစေရေးအတွက် နစ်နာကြေးများကို ဧရာဝတီတိုင်းဒေသကြီး အစိုးရအဖွဲ့မှ ညှိနှိုင်းဆောင်ရွက် ပေးနိုင်ရေးအတွက် တိုင်းဒေသကြီး အစိုးရအဖွဲ့မှ ဦးဆောင်သည့် ညှိနှိုင်းဖြေရှင်း ဆောင်ရွက်ပေးရေး ကော်မတီတစ်ခုအား ဖွဲ့စည်းပြီး ညှိနှိုင်းဆောင်ရွက်ရာတွင် လုပ်ငန်းရှင်များမှ ပေးအပ်မည့် ငွေကြေးမှာ နည်းပါးနေပြီး ဒေသပေါက်ဈေးနှင့် ကွာဟမှုများ ရှိနေသောကြောင့် ဒေသခံများ လက်မခံနိုင်ကြောင်း သတင်းရရှိသည်။

၂၀၀၀ ပြည့်နှစ်တွင် ငွေဆောင်ကမ်းခြေရှိ ဒေသခံပြည်သူများ ပိုင်ဆိုင်သော အုန်းခြံများကို ဟိုတယ်ဇုန်များ တည်ဆောက်ရေးအတွက် မြန်မာ့စီးပွားရေး ဦးပိုင်လီမိတက်မှ သိမ်းဆည်းခဲ့ကြောင်း၊ သိမ်းဆည်းခဲ့စဉ်အချိန်က မူလပိုင်ရှင်အား စိုက်ပျိုးထားသည့် သီးပင်လျော်ကြေးများသာ ပေးအပ်ခဲ့ပြီးနောက် ပေ ၄၀ ပေ ၆၀ မြေကွက်များကိုသာ ချထားပေးခဲ့ကြောင်း၊ ယင်းနောက် ဟိုတယ်ဇုန် တည်ဆောက်ကာ လုပ်ငန်းရှင်များအား ချထားပေးခဲ့ပြီး ၂၀၁၀ ပြည့်နှစ်တွင် မြန်မာ့စီးပွားရေး ဦးပိုင်လီမိတက်မှ မြေယာများကို ပြန်လည်စွန့်လွှတ်၍ တိုင်းဒေသကြီး အစိုးရအဖွဲ့ထံ လွှဲပြောင်းပေးခဲ့ကြောင်း၊ တိုင်းဒေသကြီး အစိုးရမှလည်း သိမ်းဆည်းခံ ပြည်သူများထံ ပြန်လည်ပေးအပ်ခြင်း မရှိဘဲ လက်ရှိ လုပ်ငန်းလုပ်ဆောင်နေသည့် လုပ်ငန်းရှင်များကိုသာ ပြန်လည်ချထားပေးကြောင်း၊ မြေသိမ်းခံပြည်သူများမှ လက်ရှိအစိုးရသစ် လက်ထက်တွင် နစ်နာခဲ့သည့် သိမ်းဆည်းခံ မြေယာများ ပြန်လည်ရရှိရေးအတွက်တောင်း ဆိုမှုများအပေါ် မူလသိမ်းဆည်းခံပြည်သူ များ နစ်နာမှုများ မရှိရေးအတွက် တိုင်းဒေသ ကြီးအစိုးရမှ နစ်နာကြေးများရရှိရေး ညှိနှိုင်းဆောင်ရွက် ပေးခဲ့သော်လည်း လုပ်ငန်းရှင်များက ပေးအပ်လိုသော ငွေကြေးနှင့် မြေသိမ်းခံ ပြည်သူများမှ တောင်းဆိုသည့် နစ်နာကြေးငွေမှာ ကွာခြားမှုများ ရှိနေသောကြောင့် အငြင်းပွားနေမှုများကို ဖြေရှင်းဆောင်ရွက်နိုင်ရန် တိုင်းဒေသကြီး ၀န်ကြီးသုံးဦး ပါဝင်သည့် ဖြေရှင်းညှိနှိုင်း ဆောင်ရွက်ရေး ကော်မတီတစ်ခုအား ဖွဲ့စည်းကာ ညှိနှိုင်းဆောင်ရွက်ခဲ့ကြောင်း၊ နစ်နာကြေးကိစ္စများ ညှိနှိုင်းဆောင်ရွက်ရာတွင် လုပ်ငန်းရှင်များဘက်မှ သိမ်းဆည်းမြေများအား တစ်ဧကလျှင် ကျပ်သိန်း ၂၀ ခန့်သာ ပေးအပ်လိုပြီး ဒေသပေါက်ဈေးနှင့် နှိုင်းယှဉ်ပါ အဆပေါင်း ၅၀၀ ကျော် ကွာဟနေမှုကြောင့် မြေသိမ်းခံ ပြည်သူများ လုပ်ငန်းရှင်များနှင့် ကိုယ်တိုင်တွေ့ဆုံ ညှိနှိုင်းခွင့် တောင်းခံထားကြောင်း သိရသည်။

“ဟိုဘက်ကလည်း ပေးချင်တာကနည်းနည်းလေး လိုချင်တဲ့သူတွေကလည်း ဒီကိစ္စက ဟိုတယ်ဇုန် တည်ထောင်တဲ့ ကိစ္စတွေလေ။ သက္ကရာဇ် ၂၀၀၀ မှာ လုပ်ငန်းရှင်တစ်ဦးက သူ့သဘောနဲ့ သိမ်းလိုက်တာ မဟုတ်တော့ ဒါကို သုံးဦးသုံးဖလှယ် ကျေနပ်အောင်၊ အဆင်ပြေအောင် ညှိနှိုင်းပေးရမှာပေါ့။ အခုက မြေသိမ်းခံရသူတွေက လုပ်ငန်းရှင်တွေကို တွေ့ဖို့ပြောထားတယ် ဆိုပေမယ့် ဟိုဘက်ကလည်း တွေ့မှဖြစ်မှာဆိုတော့ ကျွန်တော်တို့က ညှိနှိုင်းဆောင်ရွက် ပေးနေပါတယ်။ ဒီကိစ္စက ညှိနှိုင်းလို့ မရဘူးဆိုရင် လုပ်ငန်းရှင်တွေကလည်း ဘာမှဆက်မလုပ်တတ်ဘူး။ မြေသိမ်းခံရ သူတွေကလည်း ဒီအတိုင်း ကြာနေမယ်။ ကျွန်တော်တို့ကလည်း ဗဟိုမြေယာ စိစစ်ရေး အဖွဲ့ထံကို ပြန်တင်ရမယ်ဆို အကုန်ကြာကုန်နိုင်တယ်” ဟု စည်ပင်သာယာရေးဝန်ကြီး ဦးကျော်မြင့်က ပြောကြားသည်။

မြေသိမ်းခံ ပြည်သူတစ်ဦးဖြစ်သူ ဦးလှမြင့်က “ကျွန်တေ်ာတို့ကတော့ ဒါကိုအမြန်ဆုံး ပြီးချင်တယ်။ ပေးတဲ့သူကလည်း ပေးနိုင်အောင်၊ ကျွန်တော်တို့လည်း ထိုက်သင့်တာရအောင် အစိုးရက ညှိနှိုင်းပေးပြီးတော့ ကျွန်တော်တို့ကို လုပ်ငန်းရှင်တွေနဲ့ တွေ့ပေးပေါ့။ အဲဒီလို ညှိနှိုင်းပေးစေချင်တယ်။ ဒေသပေါက်ဈေး ဆိုပေမယ့် ထိုက်သင့်တဲ့ နှုန်းထားတစ်ခုနဲ့ပေါ့။ အဲဒီလိုဖြစ်စေချင်တယ်” ဟုဆိုသည်။

ငွေဆောင်ကမ်းခြေတွင် မြေနေရာ အငြင်းပွားမှုများနှင့် ပတ်သက်၍ ဒေသခံ ပြည်သူများမှ မကြာခဏ ဆန္ဒထုတ်ဖော် တောင်းဆိုခဲ့သေးကြောင်း သိရသည်။

 

ငွေဆောင်ကမ်းခြေတွင် ချစ်သူများကျွန်းသို့ သွားရောက်ခဲ့သည့် လူငယ်လေးဦး ရေစီးဖြင့်မျောပါကာ တစ်ဦးပျောက်ဆုံး

ငွေဆောင်ကမ်းခြေတွင် ဇွန် ၃၀ ရက် နံနက် ၈ နာရီ မိနစ် ၃၀ ခန့်က ရန်ကုန်မြို့မှ လာရောက် အပန်းဖြေနေသည့် လူငယ်လေးဦးမှာ ငွေဆောင်ကမ်းခြေမှတစ်ဆင့် ချစ်သူများကျွန်းသို့ သွားရောက်ရာတွင် ရေစီးဖြင့်မျောပါမှု ဖြစ်ပွားခဲ့ပြီး တစ်ဦးပျောက်ဆုံးနေကြောင်း သတင်းရရှိသည်။

ဖြစ်စဉ်မှာ အဆိုပါနေ့တွင် ရန်ကုန်မြို့မှ ငွေဆောင်ကမ်းခြေသို့ လာရောက် အပန်းဖြေနေသည့် မောင်ကောင်းမြတ် အဖဦးမြသောင်း အသက် (၂၃ နှစ်)၊ မပြည့်ပြည့်၊ မောင်ကောင်းထက်ကျော်၊ မပန်းအိဖြူတို့မှာ ငွေဆောင်ကမ်းခြေတွင် ရေကူးပြီးနောက် ချစ်သူများကျွန်းသို့ ဖြတ်ကူးခဲ့စဉ် ရေစီးဖြင့် မျောပါခဲ့ပြီး ရေနစ်မြုပ်ခဲ့ကြကြောင်း၊ အနီးရှိ ဒေသခံများမှ ရေနစ်မြုပ်ရာနေရာတွင် လိုက်လံရှာဖွေရာ နံနက် ၉ နာရီ မိနစ် ၃၀ ခန့်တွင် မောင်ကောင်းထက်ကျော်၊ မပန်းအိဖြူနှင့် မပြည့်ပြည့်တို့အား ပြန်လည်ဆယ်ယူ ရရှိခဲ့ပြီး မောင်ကောင်းမြတ်မှာမူ ပျောက်ဆုံးသွားခဲ့ကြောင်း၊ ပြန်လည်ဆယ်ယူရရှိခဲ့သည့် လူငယ်သုံးဦးအား ငွေဆောင်ဆေးရုံသို့ ပို့ဆောင်ခဲ့ပြီး ပျောက်ဆုံးသွားသော မောင်ကောင်းမြတ်အား ဆက်လက်ရှာဖွေရာတွင် ဇွန်လ ၃၀ ရက် ညနေ ၄ နာရီအချိန်ထိ ရှာဖွေတွေ့ရှိရသေးခြင်း မရှိသေးကြောင်း သိရသည်။

“ရှာဖွေနေတုန်းဆိုတော့ ကျွန်တော်တို့ အမှုဖွင့်လှစ်တာတော့ မလုပ်သေးဘူး။ ဆက်လက်ရှာဖွေနေတယ်။ ကောင်မလေး တစ်ယောက်ကိုတော့ ပုသိမ်ဆေးရုံ လွှဲလိုက်တယ်။ ပြန်ဆယ်လို့ရတဲ့ သုံးယောက် စလုံးကတော့ အသက်အန္တရာယ် မစိုးရိမ်ရပါဘူး” ဟု ငွေဆောင်ရဲစခန်းမှ တာဝန်ကျအရာရှိတစ်ဦးက ပြောကြားသည်။

 

ငွေဆောင်ကမ်းခြေတွင် မိုးရာသီအတွင်း လှိုင်းလေကြီးမှုကြောင့် ခရီးသွားများ ပင်လယ်ရေမကူးရန် သတိပေးချက်များ ထုတ်ပြန်

ပင်လယ်ရေ (လုံးဝ) မကူးရ အသက်အန္တရာယ်ရှိသည် စာသားပါ ဆိုင်းဘုတ်ကို မြန်မာ-အင်္ဂလိပ် နှစ်ဘာသာဖြင့် စိုက်ထူထားစဉ်

ဧရာဝတီတိုင်းဒေသကြီး၏ နာမည်ကျော် ကမ်းခြေတစ်ခုဖြစ်သည့် ငွေဆောင်ကမ်းခြေမှာ မိုးရာသီအတွင်း လှိုင်းလေကြီးခြင်း၊ ရေဆွဲများ ရှိခြင်းကြောင့် အပန်းဖြေ လာရောက်ကြသည့် ခရီးသွားများအနေဖြင့် ပင်လယ်ရေကူးခြင်း မပြုလုပ်ရန် ဇွန် ၉ ရက်တွင် သတိပေးချက်များ ထုတ်ပြန်ခဲ့ကြောင်း သတင်းရရှိသည်။

ငွေဆောင်ကမ်းခြေမှာ မိုးတွင်းကာလအတွင်း လှိုင်းလေကြီးခြင်း၊ ရေဆွဲများ ပေါများခြင်းကြောင့် ရေကူးအပန်းဖြေသူများ အနေဖြင့် မကြာခဏ ရေနစ်ခြင်း၊ အသက်အန္တရာယ်ဖြင့် ကြုံတွေ့ရခြင်းများ ရှိခဲ့ရကြောင်း၊ မိုးတွင်းကာလတွင် အပန်းဖြေသူများ လာရောက်ခဲ့ပါကလည်း ပင်လယ်အတွင်း ရေဆင်းမကူးရန် ဟိုတယ်လုပ်ငန်းရှင်များ ဒေသဆိုင်ရာ တာဝန်ရှိသူများ ပူးပေါင်းကာ ကြပ်မတ်မှုများ လုပ်ဆောင်နေကြောင်း၊ ယင်းအပြင် ခရီးသွားပြည်သူများ လွယ်ကူစွာ သိရှိနိုင်ရေးအတွက် ငွေဆောင်ကမ်းခြေ အ၀င်ဝမှ စတင်၍ မိုးရာသီတွင် ပင်လယ်ရေ (လုံးဝ) မကူးရ အသက်အန္တရာယ်ရှိသည် စာသားပါ ဆိုင်းဘုတ်များကို မြန်မာ-အင်္ဂလိပ် နှစ်ဘာသာဖြင့် ခရီးသွားများ သွားလာလေ့ရှိသည့် နေရာများတွင် စိုက်ထူခြင်းများ ပြုလုပ်ထားရှိကြောင်း သိရသည်။

“ငွေဆောင်ကမ်းခြေက မိုးတွင်းကာလဆိုရင် ပင်လယ်ရေက လှိုင်းလေကြီးတယ်။ ဒေသအခေါ် ရေဆွဲတွေ ရှိတဲ့အခါကျတော့ ခရီးသွား ဧည့်သည်တွေကို မသိဘဲ ရေကူးမယ်ဆိုရင် အသက်အန္တရာယ်ရှိနိုင်ပြီး ရေနစ်တာတို့ ဘာတို့ ဆိုတာက နှစ်စဉ်နှစ်တိုင်း ခဏခဏ ကြုံတွေ့ရတယ်လေ။ အဲ့ဒါကြောင့်မို့ ဒါတွေမဖြစ်အောင် မိုးတွင်းကာလရောက်တိုင်း ဟိုတယ်ခရီးဌာနနဲ့ ငွေဆောင်ဟိုတယ်ဇုန်မှာရှိတဲ့ တာဝန်ရှိသူတွေ ဒေသအုပ်ချုပ်ရေးတွေနဲ့ ပူးပေါင်းပြီး သတိပေး ဆိုင်းဘုတ်တွေကို စိုက်ထူပေးတာပါ။ အဓိက,ကတော့ အသက်အန္တရာယ် ကင်းစေရေးအတွက် လုပ်ဆောင်တာပါ။ မြို့အ၀င် လမ်းဆုံမှာတစ်ခု၊ ကမ်းခြေဆင်းလမ်းမှာ တစ်ခုနဲ့ ချစ်သူများကျွန်းနားမှာတစ်ခု စိုက်ထူပေးထားပါတယ်။ မိုးရာသီဖြစ်တာကြောင့် လှိုင်းလေကြီးတယ်။ ရေမကူးပါနဲ့ဆိုပြီး မြန်မာအင်္ဂလိပ် နှစ်ဘာသာနဲ့ သတိပေးထားပါတယ်” ဟု ငွေဆောင်မြို့နယ် ဟိုတယ်နှင့် ခရီးသွားညွှန်ကြားမှု ဦးစီးဌာန လက်ထောက်ညွှန်ကြားရေးမှူး ဦးစိုးဝင်းက ပြောကြားသည်။

ဧရာဝတီတိုင်းဒေသကြီးအတွင်း ချောင်းသာ၊ ငွေဆောင်နှင့် ဂျော်ရန်ကျွန်း အပန်းဖြေစခန်း သုံးခုရှိသည့်အနက် ငွေဆောင်ကမ်းခြေမှာ ပြည်ပခရီးသွား ၀င်ရောက်မှု အများဆုံး ကမ်းခြေတစ်ခု ဖြစ်ကြောင်း သိရသည်။

ငွေဆောင်ကမ်းခြေတွင် ဟိုတယ်အခန်းပေါင်း ၁၃၇၀ ကျော်ရှိလာပြီး နှစ်စဉ်အခန်းတိုးတက်မှုနှုန်း ၁၂ ရာခိုင်နှုန်းရှိသော်လည်း ၂၀၁၇ ခုနှစ်တွင် ပျမ်းမျှအခန်းငှားရမ်းမှုပမာဏ ၆၈ ရာခိုင်နှုန်းသာရှိ

ဧရာဝတီတိုင်းဒေသကြီးရှိ ငွေဆောင်ကမ်းခြေတစ်နေရာကို တွေ့ရစဉ် (ဓာတ်ပုံ-၀င်းသူအောင်)

ငွေဆောင်ကမ်းခြေတွင် ဟိုတယ်အခန်းပေါင်း ၁၃၇၀ ကျော်ရှိလာပြီး နှစ်စဉ်အခန်းအရေအတွက် တိုးတက်မှုနှုန်း ၁၂ ရာခိုင်နှုန်းရှိသော်လည်း ၂၀၁၇ ခုနှစ်တွင် ပျမ်းမျှအခန်း ငှားရမ်းမှုပမာဏ ၆၈ ရာခိုင်နှုန်းသာရှိကြောင်း ကနေဒါအခြေစိုက် အိမ်ခြံမြေ၀န်ဆောင်မှုလုပ်ငန်း Colliers International ၏ ဈေးကွက်ဆိုင်ရာ သုံးသပ်ချက်အရ သိရသည်။

မြန်မာနိုင်ငံ၏ စီးပွားရေးအခွင့်အလမ်း စတင်ပွင့်လန်းခဲ့သည့် ၂၀၁၁ ခုနှစ်မှစ၍ ငွေဆောင်ကမ်းခြေသည် ပြည်တွင်းပြည်ပ ခရီးသွားများကို ပိုမိုဆွဲဆောင်နိုင်ခဲ့ပြီး အထူးသဖြင့် ရန်ကုန်မြို့နေ မိသားစုများအတွက် အားလပ်ရက် အပန်းဖြေရာ အဓိကကမ်းခြေတစ်ခု ဖြစ်လာသည်။ ခရီးသွားတိုးတက်လာမှုနှင့်အတူ ဟိုတယ်များ အခန်းငှားရမ်းမှုနှုန်းထား မြင့်တက်လာပြီး ဟိုတယ်များ၏ မတူကွဲပြားသည့် အဆောက်အအုံ၊ မြင်ကွင်း၊ ၀န်ဆောင်မှုများ အဆင့်မြှင့်ခြင်းဖြင့် ငွေဆောင်သည် ကမ္ဘာ့ခရီးသွားဈေးကွက်တွင် ရှေ့ဆက်နိုင်မည်ဖြစ်သည်။

နိုင်ငံရေးပြုပြင်ပြောင်းလဲမှု ပြုလုပ်ခဲ့သည့် ၂၀၁၁ ခုနှစ်မှစ၍ ဟိုတယ်နှင့် ခရီးသွားလုပ်ငန်းသည် နိုင်ငံ့စီးပွားရေးဖွံ့ဖြိုးတိုးတက်မှုအတွက် အရေးပါသည့် အစိတ်အပိုင်းတစ်ခုဖြစ်လာပြီး အရှေ့တောင်အာရှ ခရီးသွားဈေးကွက်တွင် အလားအလာကောင်းမွန်သည့် ဒေသတစ်ခု ဖြစ်လာခြင်းဖြစ်သည်။ မြန်မာနိုင်ငံ၏ အဓိက ခရီးသွားဒေသများဖြစ်သော ရန်ကုန်၊ ပုဂံ၊ အင်းလေး၊ မန္တလေး၊ ကျိုက်ထို၊ ငပလီကဲ့သို့ပင် ငွေဆောင်သည် ခရီးသွားများ ရွေးချယ်ရာ အထင်ကရဒေသတစ်ခု ဖြစ်လာပြီး ဟိုတယ်နှင့် ခရီးသွားလုပ်ငန်းကဏ္ဍ တိုးတက်မှုအတွက် အဓိကကမ်းခြေတစ်ခုလည်းဖြစ်သည်။

ငွေဆောင်ကမ်းခြေသည် ၁၇ ကီလိုမီတာရှည်လျားပြီး လမ်းပန်းဆက်သွယ်ရေး ကောင်းမွန်မှုနှင့် နေရာထိုင်ခင်း ရွေးချယ်စရာပေါများမှုကြောင့် ငပလီနှင့် မြိတ်ကျွန်းစုထက် ခရီးသွားများကို ဆွဲဆောင်ထားနိုင်သည်။ ၂၀၀၀ ပြည့်နှစ်က ဟိုတယ်အခန်းအရေအတွက် ၂၀၀ အောက်သာရှိရာမှ ၂၀၁၇ ခုနှစ်တွင် ၁၃၇၀ ကျော်ရှိလာပြီး ပျမ်းမျှအခန်းအရေအတွက် တိုးတက်မှုနှုန်း တစ်နှစ်လျှင် ၁၂ ရာခိုင်နှုန်း ရှိခဲ့သည်။

အခန်းအရေအတွက်၏ ၄၄ ရာခိုင်နှုန်းမှာ 3-4 Star အလယ်အလတ် အဆင့်အခန်း၊ ၂၁ ရာခိုင်နှုန်းမှာ 4-5 Star အဆင့်မြင့်အခန်း၊ ၁၈ ရာခိုင်နှုန်းမှာ 5 Star Luxury အဆင့်အခန်း၊ ၁၂ ရာခိုင်နှုန်းမှာ 2 Star အဆင့်အခန်း၊ ငါးရာခိုင်နှုန်းမှာ 1 Star အဆင့် အခန်းများဖြစ်ပြီး Colliers က ငွေဆောင်ကမ်းခြေ အနာဂတ်ဟိုတယ်ဈေးကွက်အတွက် 3 Star အခန်းများက အလားအလာအကောင်းဆုံးဟု သုံးသပ်ထားသည်။

ခရီးသွားဝင်ရောက်မှုနှုန်း နည်းပါးသောရာသီနှင့် များပြားသည့်ရာသီများတွင် အခန်းအမျိုးအစားအလိုက်ရှိ အခန်းငှားရမ်းရမှုနှုန်းများ ကွဲပြားပြီး အခန်းအားလုံး၏ ပျမ်းမျှနှစ်စဉ် အခန်းငှားရမ်းမှုပမာဏမှာ ခရီးသွားနည်းပါးသည့်အချိန်တွင် ၃၇ ရာခိုင်နှုန်း၊ ခရီးသွားများပြားသည့်အချိန်တွင် ၈၉ ရာခိုင်နှုန်းရှိကာ တစ်နှစ်ပတ်လုံး ပျမ်းမျှနှစ်စဉ် အခန်းငှားရမ်းမှုပမာဏမှာ ၆၈ ရာခိုင်နှုန်းသာရှိသည်။ ငွေဆောင်ကမ်းခြေရှိ ဟိုတယ်အားလုံး၏ ပျမ်းမျှအခန်းခနှုန်းထားမှာ တစ်ရက်လျှင် ဒေါ်လာ ၁၁၀ ဖြစ်ပြီး 3-4 Star အခန်းများက ၉၆ ဒသမ ၇၈ ဒေါ်လာ၊ 4-5 Star အခန်းများက ၁၇၅ ဒသမ ၄၁ ဒေါ်လာ၊ 5 Star Luxury အခန်းများက ၁၇၄ ဒသမ ၁၃ ဒေါ်လာဖြစ်ကြောင်း သိရသည်။

ငွေဆောင်မြို့နယ်ရှိ မြေသိမ်းခံပြည်သူနှစ်ဦး၏ ဘိုးဘွားပိုင်မြေများကို သိမ်းဆည်းသူခုနစ်ဦးနှင့် အသိမ်းခံမြေများကိစ္စ ကန့်ကွက်တရားစွဲဆိုထားစဉ် ကာလအတွင်း လယ (၃၀) ထုတ်ပေးခဲ့သူ ယခင်တိုင်းအစိုးရအဖွဲ့ အတွင်းရေးမှူးနှင့် မြေစာရင်းဦးစီးမှူးအား တိုင်းဒေသကြီးတရားလွှတ်တော်တွင် တရားစွဲဆို

ငွေဆောင်မြို့နယ်ရှိ မြေသိမ်းခံပြည်သူ ခုနစ်ဦးတို့၏ ဘိုးဘွားပိုင်မြေများကို လာရောက်ခြံခတ် သိမ်းဆည်းခဲ့သည်ဟုဆိုသော လုပ်ငန်းရှင်နှစ်ဦးနှင့် အသိမ်းခံမြေများကိစ္စ ကန့်ကွက်ခြင်း တရားစွဲဆိုခြင်းများ ပြုလုပ်နေစဉ်မှာပင် လယ (၃၀) ပုံစံထုတ်ပေးခဲ့သည့် ယခင်ဧရာဝတီတိုင်းဒေသကြီးအစိုးရအဖွဲ့ အတွင်းရေးမှူးနှင့် မြေစာရင်းဦးစီးမှူးတစ်ဦးအား နစ်နာသူမြေသိမ်းခံပြည်သူ ခုနစ်ဦးက မတ် ၂၀ ရက်တွင် ဧရာဝတီတိုင်းဒေသကြီး တရားလွှတ်တော်၌ တရားစွဲဆိုခဲ့ကြောင်း သိရသည်။

ဖြစ်စဉ်မှာ ငွေဆောင်မြို့နယ်ရှိ ဦးအေးမြင့်၊ ဦးအုန်းမြင့်၊ ဒေါ်မေရီမြင့်၊ ဒေါ်ငွေစု၊ ဦးခင်အောင်၊ ဦးဖိုးတုတ်၊ ဦးမြတ်ကျော်ဦး ပိုင်ဆိုင်သော နှစ်ပေါင်း ၄၀ ကျော် မြေခွန်ပြေစာများ ပေးဆောင်ထားသည့် ဘိုးဘွားပိုင်မြေ သုံးဧကကျော်အား ၂၀၁၄ ခုနှစ် အောက်တိုဘာတွင် လုပ်ငန်းရှင်နှစ်ဦးဖြစ်သည့် ဦးဇော်ဝင်းနှင့် ဦးသန်းဝင်းအောင်ဆိုသူ နှစ်ဦးက လာရောက်ခြံစည်းရိုးခတ်ခဲ့ကြောင်း၊ ယင်းသို့ ခြံစည်းရိုးလာခတ်သည်ကို မူလမြေပိုင်ရှင် ခုနစ်ဦးက နိုင်ငံတော်သမ္မတနှင့် အခြားသောသက်ဆိုင်ရာဌာနများကို တိုင်ကြားပြီး တရားစွဲဆိုမှုများ ပြုလုပ်ခဲ့ကြောင်း၊ သိမ်းဆည်းခံမြေယာများနှင့်ပတ်သက်၍ အငြင်းပွားနေစဉ်မှာပင် လာရောက်ခြံစည်းရိုးခတ် သိမ်းဆည်းခဲ့သူ ဦးဇော်ဝင်းနှင့် ဦးသန်းဝင်းအောင်တို့အား ဧရာဝတီတိုင်းဒေသကြီးအစိုးရအဖွဲ့ အတွင်းရေးမှူး ဦးအေးကျော်က ၂၀၁၅ ခုနှစ် စက်တင်ဘာ ၂ ရက်တွင် လယဥပဒေပုဒ်မ ၂၉/၃၀ အရဆိုကာ ဥယျာဉ်ခြံမြေအား အခြားနည်းအသုံးပြုခွင့် အမိန့်ပုံစံ ၁၅ (က) ထုတ်ပေးခဲ့ကြောင်း၊ ယင်းသို့ လယ (၃၀) ပုံစံထုတ်ပေးမှုကြောင့် မူလပိုင်ရှင် မြေပိုင်ရှင်များက ဘိုးဘွားပိုင်မြေများအား ခြံစည်းရိုးခတ်သိမ်းဆည်းခဲ့သည့် ဦးဇော်ဝင်း၊ ဦးသန်းဝင်းအောင် အပါအ၀င် လယ်ယာမြေအား အခြားနည်းသုံးစွဲ လယ (၃၀) ထုတ်ပေးခဲ့သည့် ယခင်တိုင်းအစိုးရအဖွဲ့ အတွင်းရေးမှူး ဦးအေးကျော်နှင့် မြေစာရင်းဦးစီးမှူး ဦးစန်းထွန်းတို့အား တရားမသီးခြားဥပဒေပုဒ်မ ၃၉ အရ တရားစွဲဆိုနိုင်ရန် တိုင်းဒေသကြီး တရားလွှတ်တော်သို့ လျှောက်ထားခဲ့ပြီး တိုင်းဒေသကြီး တရားလွှတ်တော်က တရားမကြီးမှု အမှတ် ၂/၂၀၁၈ ဖြင့် တရားစွဲဆိုမှုကို လက်ခံခဲ့ကြောင်း သိရသည်။

“ကျွန်တော်တို့မြေနေရာကို ဦးဇော်ဝင်းဆိုသူက ခြံလာခတ်တယ်။ အဲဒီလိုလာခတ်တော့ ကျွန်တော်တို့က သက်ဆိုင်ရာတာဝန်ရှိသူတွေကို တိုင်ကြားတဲ့အပြင် ကျွန်တော်တို့က လာရောက်ခြံခတ်တဲ့ ဦးဇော်ဝင်းကို ပုသိမ်မြို့နယ်တရားရုံးမှာ တရားစွဲခဲ့တယ်။ တရားစွဲနေစဉ်အချိန်မှာပဲ ကျွန်တော်တို့မြေနေရာကို ဦးဇော်ဝင်းနဲ့ ဦးသန်းဝင်းအောင်တို့အမည်နဲ့ လယ (၃၀) ပုံစံကို အရင်တိုင်းမင်းကြီး ဦးအေးကျော်နဲ့ မြို့နယ်မြေစာရင်းမှူး ဦးစန်းထွန်းတို့က ထုတ်ပေးခဲ့တယ်၊ ဥပဒေအရ ဒီလိုမျိုးထုတ်ပေးခွင့်မရှိဘူး။ ဒါ့ကြောင့် ကျွန်တော်တို့က အခု လယ (၃၀) ထုတ်ပေးခဲ့တဲ့ မင်းကြီးဟောင်း ဦးအေးကျော်ရော၊ မြေစာရင်းဦးစီးမှူး ဦးစန်းထွန်းရော၊ လာသိမ်းထားတဲ့ ဦးဇော်ဝင်းနဲ့ ဦးသန်းဝင်းအောင်တို့ကိုပါ တရားစွဲဆိုရတာပါ” ဟု မြေသိမ်းခံပြည်သူတစ်ဦးဖြစ်သူ ဦးအေးမြင့်က ဆိုသည်။

တရားစွဲဆိုမှုနှင့်ပတ်သက်၍ တရားလိုဘက်မှ ဥပဒေအကျိုးဆောင်အဖြစ် လိုက်ပါဆောင်ရွက်ပေးသူ တရားလွှတ်တော်ရှေ့နေ ဦးကြည်စွမ်က “တရားသူကြီးချုပ်ရဲ့ တရားခွင်ကနေ အမှုကိုလက်ခံခဲ့ပါတယ်။ ဧပြီ ၂ ရက်မှာ ထပ်မံပြီးတော့ ရုံးချိန်းထားပါတယ်” ဟုပြောကြားသည်။

ယင်းတရားစွဲဆိုမှုကို နစ်နာခဲ့သူပြည်သူများက ဖေဖော်ဝါရီ ၂၈ ရက်က ပထမအကြိမ်အဖြစ် တိုင်းဒေသကြီး တရားလွှတ်တော်သို့ တရားစွဲဆိုရန် လာရောက်ခဲ့ပြီး ထိုအချိန်က အမှုလက်ခံစစ်ဆေးမည့် တရားသူကြီးများ မစုံလင်သောကြောင့် တရားစွဲဆိုမှုကို လက်မခံခဲ့ဘဲ ဒုတိယအကြိမ်တရားစွဲရန် လျှောက်ထားမှသာ လက်ခံခဲ့ခြင်းဖြစ်ကြောင်း သိရသည်။

ငွေဆောင်ကမ်းခြေတွင် ဟိုတယ်ဇုန်များ တည်ဆောက်ရေးအတွက် ဦးပိုင်က သိမ်းပြီးနောက် လုပ်ငန်းရှင်များထံ လွှဲပြောင်းပေးခဲ့သည့် မြေနေရာများနှင့် ပတ်သက်၍ သိမ်းဆည်းခံမူလပိုင်ရှင်များ မနစ်နာစေရေးအတွက် နစ်နာကြေးများကို တိုင်းဒေသကြီးအစိုးရက ညှိနှိုင်းဆောင်ရွက်ပေးမည်

သိမ်းဆည်းခံရသည့် လယ်ယာမြေများ ပြန်လည်ရရှိရေး ငွေဆောင်ကမ်းခြေတွင် ၂၀၁၇ ဒီဇင်ဘာလအတွင်းက ဆန္ဒထုတ်ဖော်စဉ်

ငွေဆောင်ကမ်းခြေတွင် ၂၀၀၀ ပြည့်နှစ်၌ ဟိုတယ်ဇုန်များ တည်ဆောက်ရေးအတွက် ဒေသခံများ ပိုင်ဆိုင်သော မြေယာများကို ဦးပိုင်က သိမ်းပြီးနောက် လုပ်ငန်းရှင်များထံ လွှဲပြောင်းပေးခဲ့သည့် မြေနေရာများနှင့် ပတ်သက်၍ သိမ်းဆည်းခံ မူလပိုင်ရှင်များက အစိုးရသစ် လက်ထက်တွင် တင်ပြတောင်းဆိုမှုများအပေါ် သိမ်းဆည်းခံ မြေပိုင်ရှင်များ မနစ်နာစေရေးအတွက် နစ်နာကြေးများကို ဧရာဝတီတိုင်းဒေသကြီး အစိုးရအဖွဲ့က ညှိနှိုင်းဆောင်ရွက်ပေးမည် ဖြစ်ကြောင်း မတ်  ၆ ရက်တွင် ပုသိမ်မြို့၌ ပြုလုပ်သည့် ငွေဆောင်ကမ်းခြေ ဟိုတယ်လုပ်ငန်းရှင်များနှင့် တိုင်းဒေသကြီး အစိုးရအဖွဲ့ တွေ့ဆုံပွဲတွင် ၀န်ကြီးချုပ် ဦးလှမိုးအောင်က ပြောကြားခဲ့ကြောင်း သတင်းရရှိသည်။

၂၀၀၀ ပြည့်နှစ်တွင် ငွေဆောင်ကမ်းခြေ ရှိ ဒေသခံပြည်သူများ ပိုင်ဆိုင်သော အုန်းခြံများကို ဟိုတယ်ဇုန်များ တည်ဆောက်ရေးအတွက် မြန်မာ့စီးပွားရေးဦးပိုင်က သိမ်းဆည်းခဲ့ကြောင်း၊ သိမ်းဆည်းခဲ့စဉ်က မူလပိုင်ရှင်အား စိုက်ပျိုးထားသည့် သီးပင်လျော်ကြေးများသာ ပေးအပ်ခဲ့ပြီးနောက် ပေ ၄၀ ပေ ၆၀ မြေကွက်များသာ ချပေးခဲ့ကြောင်း၊ ယင်းနောက် ဟိုတယ်ဇုန် တည်ဆောက်ပြီး လုပ်ငန်းရှင်များအား ချထားပေးခဲ့ပြီး ၂၀၁၀ ပြည့်နှစ်တွင် မြန်မာ့စီးပွားရေးဦးပိုင်က မြေယာများကို ပြန်လည်စွန့်လွှတ်၍ တိုင်းဒေသကြီး အစိုးရအဖွဲ့ထံ လွှဲပြောင်းပေးခဲ့ကြောင်း၊ တိုင်းဒေသကြီး အစိုးရကလည်း သိမ်းဆည်းခံ ပြည်သူများထံ ပြန်လည်ပေးအပ်ခြင်း မရှိဘဲ လက်ရှိလုပ်ငန်း လုပ်ဆောင်နေသည့် လုပ်ငန်းရှင်များကိုသာ ပြန်လည်ချထားပေးကြောင်း၊ မြေသိမ်းခံ ပြည်သူများက နစ်နာခဲ့သည့် သိမ်းဆည်းခံ မြေယာများ ပြန်လည်ရရှိရေးအတွက် တောင်းဆိုမှုများအပေါ် မူလသိမ်းဆည်းခံ ပြည်သူများ နစ်နာမှုများ မရှိရေးအတွက် တိုင်းဒေသကြီး အစိုးရက နစ်နာကြေးများ ရရှိရေးအတွက် တိုင်းဒေသကြီး အစိုးရက ညှိနှိုင်းဆောင်ရွက်ပေးမည် ဖြစ်ကြောင်း သိရသည်။

“ဒီကိစ္စကလည်း ကျွန်တော်တို့ တိုင်းထဲမှာတော့ တော်တော်ကို ဖြေရှင်းရခက်တဲ့ ပြဿနာတစ်ရပ်အဖြစ် ရှိနေတာပါ။ ဘာကြောင့်လဲဆိုတော့ သက္ကရာဇ် ၂၀၀၀ မှာ ဟိုတယ်စပြီးတော့ ထူထောင်ခဲ့တယ်။ ထူထောင်ခဲ့ပြီးတော့ မူလပိုင်ရှင်က ဦးပိုင်ကုမ္ပဏီဖြစ်တယ်။ ဦးပိုင်ကနေမှတစ်ခါ ကျွန်တော်တို့ ဒီ ၂၀၁၀ ကျော်ကျော်လောက်မှာ တိုင်းဒေသကြီး အစိုးရကို လွှဲခဲ့တယ်။ မူလပိုင်ရှင်တွေက တင်ပြတာက ဟိုတယ်ဇုန်အဖြစ် စတင်ထူထောင်စဉ်တုန်းက တရားဝင်မြေသိမ်းမိန့်နဲ့ သိမ်းခဲ့တာ မဟုတ်ဘူး။ အမိန့်အာဏာနဲ့ပဲ သိမ်းခဲ့တာ ဖြစ်တယ်။ ပေးခဲ့တဲ့ လျော်ကြေးကလည်း အပင်လျော်ကြေးတို့ ပေ ၄၀ ပေ ၆၀ မြေကွက်အစား ပေးတာတို့ နည်းလမ်းတွေနဲ့ ဖြေရှင်းခဲ့တယ်။ အမှန်က ဒါက မြေသိမ်းမိန့် အနေနဲ့ ဆောင်ရွက်တဲ့နေရာမှာ သတ်မှတ်ထားတဲ့ ဖြေရှင်းနည်း မဟုတ်ဘူး။ သတ်မှတ်ထားတဲ့ ဖြေရှင်းနည်းကတော့ အဲဒီ အချိန်တုန်းက တရားဝင်သတ်မှတ်ခဲ့တဲ့ ဥပဒေနဲ့အညီ သိမ်းခဲ့ရင်တော့ ဒါတရားဝင်တယ်။ အခုက အဲဒီလို သိမ်းခဲ့တာ မဟုတ်တဲ့အတွက် မူလပိုင်ရှင်တွေက မူလသိမ်းခဲ့တဲ့ ဦးပိုင်က စွန့်လွှတ်ခဲ့တဲ့ အချိန်မှာလည်း မူလပိုင်ရှင်တွေ လက်ထဲကို ပြန်မပေးဘဲနဲ့ တိုင်းဒေသကြီး အစိုးရလက်ထဲကိုပဲ လွှဲခဲ့တယ်။ တိုင်းဒေသကြီး အစိုးရကလည်း မူလလုပ်ငန်း ဆောင်ရွက်နေတဲ့ သူတွေကိုပဲ ပြန်လည်လွှဲပြောင်းခဲ့တယ်ဆိုတော့ ဒီအပေါ်မှာ သူတို့အနေနဲ့ နစ်နာပါတယ်။ မြေယာရသင့်ရထိုက်ပါတယ်ဆိုပြီး တင်ပြလာတယ်။ မူလပိုင်ရှင်တွေကလည်း မြေစစ်ကော်မတီဆိုတဲ့ လယ်ယာမြေနဲ့ အခြားမြေများ သိမ်းဆည်းခံရမှု ညှိနှိုင်းဖြေရှင်းရေး ကော်မတီကို တိုင်ကြားထားတဲ့ကိစ္စ ဖြစ်တဲ့အတွက် အဲဒီကော်မတီကလည်း ခရိုင်ကော်မတီကနေ တိုင်းကော်မတီကို တင်ပြထားတဲ့ အဆင့်ရောက်နေပြီ။ လုပ်ငန်းရှင်တွေကလည်း မြေသိမ်းခံပြည်သူတွေ တောင်းဆိုတဲ့ မြေယာလျော်ကြေးက များလွန်းတာကြောင့် သူတို့ကလည်း အဆင့်ဆင့် ၀ယ်ယူခဲ့ရတာမို့ တိုင်းဒေသကြီး အစိုးရအနေနဲ့ သင့်လျော်ရာဈေးနှုန်း ညှိနှိုင်းပေးဖို့ တင်ပြလာတယ်။ ဒီပြဿနာက မြန်မြန်ဖြေရှင်းပြီးမှသာလျှင် တိုင်းဒေသကြီးရဲ့ အကျိုးစီးပွားရော ရင်းနှီးမြှုပ်နှံတဲ့သူတွေရဲ့ အကျိုးစီးပွားရော မူလပိုင်ရှင်တွေရဲ့ နစ်နာမှုရော ပြေလည်သွားမှာ ဖြစ်တဲ့အတွက် ဒီနေ့တွေ့ဆုံပွဲမှာ ဟိုတယ်လုပ်ငန်းရှင်တွေနဲ့ တိုင်းဒေသကြီးအစိုးရ တွေ့ဆုံပွဲမှာ ၀န်ကြီးချုပ် ကိုယ်တိုင်ကနေပြီးတော့ ဒီပြဿနာများကို အမြန်ဆုံး ဖြေရှင်းပေးပြီးတော့ တိုင်းဒေသကြီး အစိုးရအနေနဲ့ လုပ်ထုံးလုပ်နည်းများအရရော ညှိနှိုင်းဖြေရှင်းမှုအရရော ပေါင်းစပ်ပြီးတော့ ဖြေရှင်းပေးသွားပါ့မယ်လို့ အကြောင်းပြန်ခဲ့တယ်” ဟု ဧရာဝတီတိုင်းဒေသကြီး အစိုးရအဖွဲ့ဝင် စည်ပင်သာယာရေးဝန်ကြီး ဦးကျော်မြင့်က ပြောကြားသည်။

ငွေဆောင်ကမ်းခြေတွင် မြေနေရာ အငြင်းပွားမှုများနှင့် ပတ်သက်၍ ဒေသခံပြည်သူများ မကြာခဏ ဆန္ဒထုတ်ဖော် တောင်းဆိုခဲ့ကြောင်း သိရသည်။

 

ငွေဆောင်ဒေသခံများထံမှ မြေယာသိမ်းဆည်းထားပြီးနောက် နစ်နာကြေးများ မပေးအပ်သေးဘဲ ခွင့်ပြုချက်မဲ့ တည်ဆောက်နေသည့် ဟိုတယ်များကို အရေးယူရန် တို်င်းအစိုးရညွှန်ကြား

ငွေဆောင်မြို့တွင် ဟိုတယ်ဇုန်များ တည်ဆောက်ရေးအတွက် ဟုဆိုကာ ၂၀၀၀ ပြည့်နှစ်တွင် ဒေသခံပြည်သူများ၏ အုန်းခြံများအား နစ်နာကြေး တစ်စုံတစ်ရာ မပေးဘဲ သိမ်းဆည်းခဲ့ပြီးနောက် ဟိုတယ်များ တည်ဆောက်နေမှုကို ဒေသခံပြည်သူများက တိုင်ကြားခဲ့ပြီးနောက် ဧရာဝတီတိုင်းဒေသကြီး အစိုးရအဖွဲ့မှ မြေယာလျော်ကြေး ပြဿနာများကို ဖြေရှင်းနိုင်မှု မပြီးပြတ်သေးခင်အထိ အဆောက်အအုံအသစ်များ ဆောက်လုပ်ခြင်းကို တားမြစ်ထားသော်လည်း လိုက်နာမှုမရှိဘဲ ဆက်လက် တည်ဆောက်မှုများ ရှိနေသည့် ဟိုတယ်များကို စည်ပင်သာယာရေး အဖွဲ့များ ဥပဒေဖြင့် အရေးယူဆောင်ရွက်ရန် တိုင်းဒေသကြီး အစိုးရအဖွဲ့မှ ညွှန်ကြားထားကြောင်း သတင်းရရှိသည်။

ဖြစ်စဉ်မှာ ငွေဆောင်ကမ်းခြေ၌ ဟိုတယ်ဇုန်များ တည်ဆောက်ရေး အတွက်ဟုဆိုကာ ၂၀၀၀ ပြည့်နှစ်တွင် ဒေသခံပြည်သူ ၂၄၈ ဦးထံမှ အုန်းခြံမြေဧက ၃၁၅ ဧကကျော် ကို ထိုစဉ်က မြေယာလျော်ကြေးမပေးဘဲ သိမ်းဆည်းခဲ့ကြောင်း၊ သိမ်းဆည်းခံခဲ့ရစဉ်က မူလပိုင်ရှင်ပြည်သူများအား ခြံအတွင်းစိုက် ပျိုးထားသည့် အုန်ပင်တစ်ပင်လျှင် ကျပ် ၄၅၀၀ နှုန်း သတ်မှတ်၍သာ ပေးချေခဲ့ကြောင်း၊ ၂၀၁၂ ခုနှစ်တွင် သိမ်းဆည်းခံ လယ်ယာမြေများ စုံစမ်းစစ်ဆေးရေးကော်မရှင် ဖွဲ့စည်းပြီးနောက် မြေသိမ်းခံပြည်သူများက သိမ်းဆည်းခံ အုန်းခြံများအတွက် ထိုက်သင့်သည့်  နစ်နာကြေးအား ပေးလျော်ပေးရန်နှင့် လုပ်ငန်းအကောင်အထည်ဖော် ဆောင်ရွက်ခြင်း မရှိသည့် မြေယာများအား မူလပိုင်ရှင်ပြည်သူများထံ ပြန်လည်ပေးအပ်ရန် တိုင်ကြားခဲ့ကြောင်း၊ အဆိုပါ တိုင်ကြားမှုများကြောင့် မြေသိမ်းခံပြည်သူများနှင့် လက်ရှိမြေနေရာ ရယူထားသည့် ဟိုတယ်လုပ်ငန်းရှင်များ အကြားတွင် မြေယာနစ်နာကြေးများ ညှိနှိုင်းနေစဉ် ကာလအတွင်း သိမ်းဆည်းထားသည့် မြေ နေရာများပေါ်၌ အဆောက်အအုံအသစ်များ ထပ်မံဆောက်လုပ်ခြင်းမရှိရန် တိုင်းဒေသကြီး အစိုးရအဖွဲ့မှ ညွှန်ကြားခဲ့ကြောင်း၊ ယင်းညွှန်ကြားချက်ကို လိုက်နာဆောင်ရွက်ခြင်း မရှိဘဲ အဆောက်အအုံ အသစ်များ ဆောက်လုပ်နေသည့် ဟိုတယ်လုပ်ငန်းရှင်များကို စည်ပင်သာယာရေး ဥပဒေအရ အရေးယူဆောင်ရွက်ရန် တိုင်းဒေသကြီး အစိုးရအဖွဲ့မှ ဆုံးဖြတ်ခဲ့ကြောင်း တိုင်းဒေသကြီး အစိုးရအဖွဲ့ထံမှ သိရသည်။

ငွေဆောင်မြို့တွင် ဟိုတယ်ဇုန်အဖြစ် သိမ်းဆည်းခံမြေယာများမှ အသုံးမပြုသော မြေယာများ ပြန်လည်ရရှိရေးနှင့် နစ်နာကြေးများရရှိရေး၊ သိမ်းဆည်းထားသည့် မြေများပေါ်တွင် အဆောက်အအုံအသစ်များ ထပ်မံမဆောက်လုပ်ရေးအတွက် မြေသိမ်းခံပြည်သူများမှ ဇန်န၀ါရီ ၂၀ ရက်တွင် ဆန္ဒထုတ်ဖော် ခဲ့သေးကြောင်း သိရသည်။

 

ငွေဆောင်ဟိုတယ်ဇုန်အတွင်း မြေယာပြဿနာကြောင့် ဆောက်လုပ်ခွင့်တားမြစ်ထားသော ဟိုတယ်အချို့ ဆက်လက်တည်ဆောက်နေသဖြင့် တိုင်းဒေသကြီးအစိုးရထံ တင်ပြ

ငွေဆောင်ဟိုတယ်ဇုန်အတွင်း အဆောက်အအုံသစ် ဆောက်လုပ်နေသည်ကို တွေ့ရစဉ်

ဧရာဝတီတိုင်းဒေသကြီး ပုသိမ်မြို့နယ် ငွေဆောင်ကမ်းခြေ ဟိုတယ်ဇုန်အတွင်း မြေယာပြဿနာကြောင့် ဆောက်လုပ်ခွင့် တားမြစ်ထားသော ဟိုတယ်အချို့ တည်ဆောက်ရေး လုပ်ငန်းများ ဆက်လက်လုပ်ဆောင်နေသောကြောင့် တိုင်းဒေသကြီးအစိုးရထံ တင်ပြထားကြောင်း ဇန်န၀ါရီ ၉ ရက်က ငွေဆောင်မြို့နယ် စည်ပင်သာယာကော်မတီမှ သိရသည်။

ငွေဆောင် ဟိုတယ်ဇုန်အတွင်း ဒေသခံ မူလတောင်သူများ မြေယာသိမ်းဆည်းခံခဲ့ရပြီး မြေယာအငြင်းပွားမှုကြောင့် ဟိုတယ်အလုံး ၂၀ ကို တိုင်းဒေသကြီးအစိုးရက အဆောက်အအုံသစ် ထပ်မဆောက်ရန် တားမြစ်ထားသော်လည်း OCEAN BLUE ဟိုတယ်နှင့် GRAND NGWESAUNG ဟိုတယ်တို့က ဆက်လက်လုပ်ဆောင်နေမှုကြောင့် ဒေသခံများက တင်ပြတိုင်ကြားလာသဖြင့် အကြိမ်ကြိမ် တားမြစ်ခဲ့သော်လည်း ဆက်လက်တည် ဆောက်နေသောကြောင့် ဖြေရှင်းဆောင်ရွက် နိုင်ရန် တိုင်းဒေသကြီးအစိုးရထံ တင်ပြရခြင်းဖြစ်ကြောင်း သိရသည်။

“ဒီဟိုတယ်နှစ်လုံးက ဆက်ဆောက်နေတော့ မြေယာအငြင်းပွားမှု ဖြစ်ထားတဲ့ မူလတောင်သူတွေက တိုင်ကြားလာလို့ တားမြစ်စာတွေ  နှစ်ကြိမ် သုံးကြိမ်ပို့တယ်။ လိုက်နာခြင်း မရှိတဲ့အတွက်ကြောင့် ကျွန်တော်တို့ စည်ပင်ဥပဒေအရ ကျွန်တော်တို့ ညှိနှိုင်းဖြေရှင်းလို့ တိုင်းဒေသကြီးအစိုးရထံ တင်ပြညှိနှိုင်းရမယ် ဆိုတာပါတဲ့အတွက်…” ဟု ငွေဆောင်မြို့ စည်ပင်သာယာရေးကော်မတီဥက္ကဋ္ဌ ဦးမျိုးမြင့်က ပြောကြားသည်။

အဆိုပါ မြေယာပြဿနာနှင့်ပတ်သက်၍ ဒေသခံ မူလတောင်သူများက အဆင့်ဆင့် တင်ပြတိုင်ကြားမှုများ ပြုလုပ်ခဲ့ပြီးနောက် တိုင်းဒေသကြီးအစိုးရက အဆောက်အအုံအသစ်များ ဆက်လက်ဆောက်လုပ်ခွင့်တား မြစ်ခဲ့ပြီးမြို့နယ် မြေယာစီမံခန်ခွဲမှုအဖွဲ့မှ စစ်ဆေးမှုများပြုလုပ်ကာ ပြန်လည်တင်ပြထားချိန်ဖြစ်၍ မူလတောင်သူများထံ တစ်စုံတစ်ရာ ပြန်လည်ဖြေရှင်းခြင်း မရှိသေးကြောင်း ဒေသခံ မူလတောင်သူများထံမှ သိရသည်။

“တိကျတဲ့အဖြေမထွက်သေးဘဲ အခုလို ဆက်ဆောက်နေတဲ့အတွက် မကျေနပ်ပါဘူး။ အဆင့်ဆင့် တင်ပြတိုင်ကြားသွားမှာပါ။ နောက်ဆုံးမရရင် ဆန္ဒဖော်ထုတ်မှုတွေပါ ပြုလုပ်သွားမှာပါ” ဟု ဒေသခံ မူလတောင်သူတစ်ဦးဖြစ်သူ ဦးတင်ထူးက ပြောကြားသည်။

အဆိုပါမြေယာပြဿနာမှာ ၂၀၀၀ ပြည့်နှစ်က ငွေဆောင်ကမ်းခြေဒေသတွင် ဒေသခံ မူလပိုင်ရှင် ၂၄၈ ဦးထံမှ အုန်းခြံမြေ ၃၁၅ ဧကကျော်ကို မြေလျော်ကြေးမပေးဘဲ  အုန်းပင်အရေအတွက်ဖြင့် သီးနှံလျော်ကြေးအဖြစ် ပေးချေကာ သိမ်းဆည်းခဲ့သောမြေယာများဖြစ်ပြီး ၂၀၁၅ ခုနှစ်တွင် အစိုးရက ဥယျာဉ်ခြံမြေကို အခြားနည်းအသုံးပြုခွင့် လန (၃၉) ကို ပြန်လည်ရုပ်သိမ်းခဲ့ပြီး ဒေသခံ မူလပိုင်ဆိုင်သူများထံ ပြန်လည်ပေးအပ်ရန် ညွှန်ကြားခဲ့သော်လည်း ဆောင်ရွက်နိုင်ခြင်းမရှိဘဲ ယခုကဲ့သို့ ဆက်လက်တည်ဆောက်နေခြင်းဖြစ်ကြောင်း ဒေသခံများထံမှ သိရသည်။