ရခိုင်အရေးကိစ္စနှင့် ပတ်သက်၍ ဗြိတိန်လွှတ်တော်အမတ်များ၏ လှုပ်ရှားဆောင်ရွက်မှုနှင့် ဥရောပသမဂ္ဂ နိုင်ငံခြားရေးရာကောင်စီ အစည်းအဝေး၌ ဆုံးဖြတ်ခဲ့သော မြန်မာနိုင်ငံအပေါ် ဆုံးဖြတ်ချက်နှင့်ပတ်သက်၍ တပ်မတော်က သတင်းထုတ်ပြန်

ရခိုင်အရေးကိစ္စနှင့်ပတ်သက်၍ ဗြိတိန်လွှတ်တော်အမတ်များ၏ လှုပ်ရှားဆောင်ရွက်မှုနှင့် ဥရောပသမဂ္ဂ နိုင်ငံခြားရေးရာကောင်စီအစည်းအဝေး၌ ဆုံးဖြတ်ခဲ့သည့် မြန်မာနိုင်ငံအပေါ် ဆုံးဖြတ်ချက်နှင့်ပတ်သက်၍ တပ်မတော်က မတ် ၆ ရက် ညပိုင်းတွင် ၎င်းတို့၏ Facebook လူမှုကွန်ရက်စာမျက်နှာမှတစ်ဆင့် သတင်းထုတ်ပြန်ခဲ့သည်။

အဆိုပါသတင်းထုတ်ပြန်ချက်တွင် အချက် ၁၇ ချက်ပါဝင်ပြီး ပြီးခဲ့သည့်ဖေဖော်ဝါရီ ၂၆ ရက်ကပြုလုပ်သည့် ဥရောပသမဂ္ဂ (အီးယူ) အဖွဲ့ဝင် နိုင်ငံခြားရေးဝန်ကြီးများပါဝင်သော ဥရောပသမဂ္ဂနိုင်ငံခြားရေးရာ ကောင်စီအစည်းအဝေးက မြန်မာနိုင်ငံအပေါ်ဆုံးဖြတ်ချက် (Conclusion) အနေဖြင့် ဘင်္ဂါလီဒုက္ခသည်များအား ဆက်လက်အကူအညီပေးရေး၊ မီဒီယာများ၊ ကုလသမဂ္ဂ လူ့အခွင့်အရေးကောင်စီ၏ Fact-Finding Mission အား လွတ်လပ်ခွင့်ပေးရေးနှင့် ပူးပေါင်းဆောင်ရွက်ရေး၊ လူ့အခွင့်အရေး အခြေအနေဆိုင်ရာ အစီရင်ခံစာတင်သွင်းသူနှင့် ဆက်လက်ပူးပေါင်းဆောင်ရွက်ရေး၊ အပြည်ပြည်ဆိုင်ရာ ရာဇ၀တ်ခုံရုံး (ICC) ၏အခွင့်အာဏာဖြင့် ဆုံးဖြတ်ဆောင်ရွက်မှုကို လက်ခံနိုင်ရေး၊ မြန်မာနိုင်ငံနှင့် ကာကွယ်ရေး ပူးပေါင်းဆောင်ရွက်မှုကို အနိမ့်ဆုံးသို့လျှော့ချသွားရန်နှင့် လူ့အခွင့်အရေးချိုးဖောက်မှုများတွင် တာဝန်ရှိသော မြန်မာ့တပ်မတော်မှ အဆင့်မြင့်အရာရှိကြီးများအား ဦးတည်၍ ကန့်သတ်ပိတ်ဆို့မှုများပြုလုပ်ရန် အဆိုပြုလွှာ အမြန်ဆုံးတင်သွင်းရေး ဆုံးဖြတ်ခဲ့ကြောင်း၊ ယင်းဆုံးဖြတ်ချက်မျိုး ထွက်လာစေရန်အတွက် ၂၀၁၈ ခုနှစ်၊ ဖေဖော်ဝါရီ ၂၁ ရက်နေ့စွဲဖြင့် ဗြိတိန် အောက်လွှတ်တော်အမတ် Rushanara Ali ဦးဆောင်၍ အောက်လွှတ်တော်အမတ် ၁၀၂ ဦးတို့က မြန်မာ့တပ်မတော်ခေါင်းဆောင်များအား ရခိုင်ပြည်နယ်၊ ဘင်္ဂါလီပဋိပက္ခဖြစ်စဉ်နှင့် ပတ်သက်၍ ထပ်မံဖိအားပေး၊ နိုင်ငံတကာရာဇ၀တ်မှုခုံရုံး (ICC) သို့လွှဲပြောင်းပေးရန် တိုက်တွန်းကြောင်း စာတစ်စောင်အား ဗြိတိန်နိုင်ငံခြားရေးဝန်ကြီး Boris Johnson ထံသို့ပေးပို့ခဲ့ပြီး ဖေဖော်ဝါရီ ၂၆ ရက်တွင်ပြုလုပ်မည့် ဥရောပသမဂ္ဂ နိုင်ငံခြားရေးကောင်စီ အစည်းအဝေး၌ ထည့်သွင်းဆွေးနွေးရန် တောင်းဆိုခဲ့ကြောင်း သတင်းထုတ်ပြန်ချက်တွင် ဖော်ပြသည်။

ထိုသို့ ဗြိတိန်အောက်လွှတ်တော်အမတ်များက ပေးပို့ခဲ့သောစာတွင် မြန်မာစစ်ဘက်မှ ထိုးစစ်ဆင်မှုများကြောင့် ဘင်္ဂါလီဒုက္ခသည်များ (မူရင်းတွင်ရိုဟင်ဂျာဟုဖော်ပြ) ဖိနှိပ်ခံနေရမှုများ၊ ဘင်္ဂလားဒေ့ရ်ှနိုင်ငံဘက်သို့ ထွက်ပြေးရမှုများ၊ သတ်ဖြတ်ခံရမှုများ၊ စစ်ဘက်နှင့်လုံခြုံရေးတပ်ဖွဲ့များ၊ စစ်ဘက်က ထောက်ကူပေးသော လူအုပ်များနှင့် ပြည်သူ့စစ်များက ဘင်္ဂါလီများ (မူရင်းတွင်ရိုဟင်ဂျာဟုဖော်ပြ) အမျိုးသမီး ထောင်ပေါင်းများစွာအား အဓမ္မပြုကျင့်ခံရမှုများရှိသော်လည်း တပ်မတော်ကို ထိန်းချုပ်နိုင်ခြင်းမရှိသောကြောင့် မြန်မာအစိုးရသည် ဘင်္ဂါလီဒုက္ခသည်များ (မူရင်းတွင်ရိုဟင်ဂျာဟုဖော်ပြ) ဘေးကင်းစွာ ပြန်လာရေးအတွက် အာမခံချက်ပေးရန် နည်းလမ်းမရှိနိုင်ကြောင်း၊ အစိုးရသက်တမ်း နှစ်နှစ်နီးပါး ကြာမြင့်ပြီဖြစ်သော်လည်း ကော်မတီများစွာ ဖွဲ့စည်းနေခြင်းမှတစ်ပါး မြန်မာနိုင်ငံရှိ ရိုဟင်ဂျာများ၏ အရပ်ဘက်လူ့အခွင့်အရေးနှင့် လူသားချင်းစာနာထောက်ထားမှု တိုးတက်အောင် လက်တွေ့ဆောင်ရွက်ပေးနိုင်ခြင်းမရှိဟုလည်း စွပ်စွဲထားသည့်အပြင် တပ်မတော်ကာကွယ်ရေးဦးစီးချုပ်အနေဖြင့် နိုင်ငံအတွင်း တိုင်းရင်းသားအုပ်စုများနှင့် ပဋိပက္ခကို ကြီးထွားအောင်သာ စိတ်လိုက်မာန်ပါ ဆောင်ရွက်နေပြီး ငြိမ်းချမ်းရေးလုပ်ငန်းစဉ်ကို ခြိမ်းခြောက်နှောင့်ယှက်နေကြောင်း၊ ယင်းပဋိပက္ခများတွင် အရပ်သားများ သေကျေဒဏ်ရာရစေအောင် နှစ်များစွာအတွင်း ပထမဆုံးအကြိမ်အဖြစ် ဂျက်တိုက်လေယာဉ်များ အသုံးပြုမှုကို တိုးမြှင့်လုပ်ဆောင်နေကြောင်း၊ ဒီမိုကရေစီနည်းကျ ရွေးကောက်တင်မြှောက်ထားသော အစိုးရ၏ ပြုပြင်ပြောင်းလဲရေး အဆိုပြုချက်များကို စစ်ဘက်က ခန့်အပ်သောဝန်ကြီးဌာနများက ဆိုးရွားစွာနှောင့်ယှက်ဖျက်ဆီးနေကြောင်းဟုလည်း ရေးသားစွပ်စွဲချက်များပါကြောင်း တပ်မတော်၏ သတင်းထုတ်ပြန်မှုတွင်ပါရှိသည်။

ထိုသို့ ဗြိတိန်အောက်လွှတ်တော်အမတ်များက ပေးပို့ခဲ့သောစာနှင့်ပတ်သက်ပြီး ရိုဟင်ဂျာ (Rohingya) ဆိုသော မြန်မာပြည်သူလူထုအားလုံးက လက်မခံသည့်အသုံးအနှုန်းအား တောက်လျှောက်သုံးနှုန်းထားကြောင်း၊ ယင်းကဲ့သို့ စွပ်စွဲချက်များသည် ရခိုင်ပဋိပက္ခ စတင်ချိန်ကပင် အစဉ်တစ်စိုက် စွပ်စွဲလာသည့် စွပ်စွဲချက်များဖြစ်ကြောင်း စွပ်စွဲချက်တစ်ခုချင်းအလိုက် မဟုတ်မမှန်ကြောင်းကို နိုင်ငံတော်အစိုးရ၏ ရခိုင်ပဋိပက္ခနှင့်သက်ဆိုင်သော သတင်းစာရှင်းလင်းပွဲ၊ ထုတ်ပြန်ချက်တို့၌ ဖော်ပြထားပြီးဖြစ်သည့်အပြင် ရခိုင်ပဋိပက္ခနှင့်ပတ်သက်၍ ဖြစ်စဉ်မှန်များအား တပ်မတော် သတင်းမှန်ပြန်ကြားရေးအဖွဲ့က ၁၀ ကြိမ်ထုတ်ပြန်ခဲ့ကြောင်း အဆိုပါသတင်းနှင့်ပတ်သက်ပြီး တပ်မတော်၏ မတ် ၆ ရက် ညပိုင်းသတင်းထုတ်ပြန်မှု အမှတ်စဉ် ၅ တွင်ပါရှိသည်။

ထို့အပြင် ဗြိတိန်အောက်လွှတ်တော်အမတ်များ ပေးပို့ခဲ့သော စာနှင့်ပတ်သက်ပြီး တပ်မတော်က ၎င်းတို့၏ထုတ်ပြန်ချက် အမှတ်စဉ် ၆ မှ အမှတ်စဉ် ၁၇ အထိ အချက်အလက်များဖြင့် ဖြေရှင်းထားသည်ကို တွေ့ရသည်။

အင်းဒင်ကျေးရွာအနီး တွေ့ရှိခဲ့သည့် အလောင်းများနှင့်ပတ်သက်ပြီး လူ့အခွင့်အရေးကောင်စီ၏ လွတ်လပ်သော နိုင်ငံတကာ အချက်အလက် စုံစမ်းရှာဖွေရေးအဖွဲ့နှင့် ဂျာနယ်လစ်များ သတင်းရယူခွင့်ပေးရန် ဥရောပသမဂ္ဂထုတ်ပြန်

အင်းဒင်ကျေးရွာအနီးတွေ့ရှိခဲ့သည့် အလောင်းများနှင့် ပတ်သက်ပြီး လူ့အခွင့်အရေးဆိုင်ရာကောင်စီ၏ လွတ်လပ်သော နိုင်ငံတကာ အချက်အလက် စုံစမ်းရှာဖွေရေးအဖွဲ့ နှင့် ဂျာနယ်လစ်များ သတင်းရယူခွင့်ပေးရန် မြန်မာနိုင်ငံဆိုင်ရာ ဥရောပသမဂ္ဂသံရုံး၊ မြန်မာနိုင်ငံဆိုင်ရာ ဥရောပသမဂ္ဂအဖွဲ့ဝင် နိုင်ငံများမှ သံရုံးအကြီးအကဲများ၊ မြန်မာ နိုင်ငံဆိုင်ရာ နော်ဝေနိုင်ငံ သံရုံးအကြီးအကဲတို့ ပူးပေါင်းပြီး ထုတ်ပြန်ကြေငြာချက်အား ဇန်န၀ါရီ ၁၁ ရက်တွင် ထုတ်ပြန်ခဲ့ကြောင်း သိရသည်။

ထုတ်ပြန်ချက်တွင် မြန်မာ့တပ်မတော်သည် မွတ်စလင် ၁၀ ဦးအား သတ်ဖြတ်ခဲ့ကြောင်း ပထမဆုံးအကြိမ်အဖြစ် ၀န်ခံခဲ့ပါသည်။ သတ်ဖြတ်ခံရသူ ၁၀ ဦး၏ အလောင်းများကို မောင်တော ခရိုင် အင်းဒင်ကျေးရွာ အနီး အစုအပြုံလိုက် မြှုပ်နှံထားသော သင်္ချိုင်းနေရာတွင် ရှာဖွေတွေ့ရှိခဲ့ခြင်း ဖြစ်သည်ဟု ဖော်ပြထားသည်။

အဆိုပါ လုပ်ရပ်များ ကျူးလွန်ခြင်းအတွက် တာဝန်ရှိသောသူများအား တာဝန်ခံမှု ရှိစေရေး သေချာစေရန် ရခိုင်ပြည်နယ်မြောက်ပိုင်းတွင် ဖြစ်ခဲ့သော အကြမ်းဖက်မှု ဖြစ်ရပ်များ အားလုံးကို ဖော်ထုတ်ရန် စေ့စပ်သေချာပြီး ယုံကြည်စိတ်ချရသော စုံစမ်းစစ်ဆေးရေးတစ်ရပ် အရေးတကြီး လိုအပ်ချက်ကို အတည် ပြုလျက်ရှိကြောင်း၊ ယခုကဲ့သို့ ကြီးမားသော လူ့အခွင့်အရေး ချိုးဖောက်မှုများအား လုပ်ဆောင်သည့် ပြစ်မှုကျူးလွန်သူများကို ပြစ် ဒဏ်ခံရခြင်းမှ ကင်းလွတ်နေခြင်းများကို ရပ်တန့်ရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် ဥရောပသမဂ္ဂသည် မြန်မာ နိုင်ငံအစိုးရအား လူ့အခွင့်အရေးကောင်စီ၏ လွတ်လပ်သော နိုင်ငံတကာအချက်အလက် စုံစမ်းရှာဖွေရေးအဖွဲ့နှင့် ဂျာနယ်လစ်များ အပါအ၀င် အခြားလွတ်လပ်သောလေ့လာ သူများနှင့် အပြည့်အ၀ ပူးပေါင်းဆောင်ရွက်ပါရန်နှင့် ပဋိပက္ခဖြစ်ပွားနေသော နေရာတိုင်းဆီသို့ ၎င်းတို့၏အတားအဆီးမရှိ လွတ်လပ် လုံခြုံစွာ သတင်းရယူပိုင်ခွင့်ကို နှောင့်နှေးခြင်း မရှိဘဲ ပေးအပ်ပါရန် ထပ်လောင်းတောင်း ဆိုအပ်သည်ဟု ထုတ်ပြန်ချက်တွင် ဖော်ပြထားသည်။

တရားမ၀င် ငါးဖမ်းခြင်းအတွက် ဗီယက်နမ်ကို ဥရောပသမဂ္ဂက သတိပေး

စက်တင်ဘာ  ၁၄ ရက်က ဗီယက်နမ်အလယ်ပိုင်း ကမ်းရိုးတန်းသို့ မုန်တိုင်းမ၀င်ရောက်မီ ငါးဖမ်းဆိပ်ကမ်း တစ်ခု၌ ငါးဖမ်းလှေများအား ဆိုက်ကပ်ထားစဉ် (Photo : AFP)

တရားမ၀င် ငါးဖမ်းခြင်းကို ဗီယက်နမ်က ထိရောက်စွာ မကိုင်တွယ်လျှင် ဗီယက်နမ်၏ ပင်လယ်စာ ပို့ကုန်လုပ်ငန်းအား ပိတ်ပင်အရေးယူနိုင်ကြောင်း ဥရောပသမဂ္ဂက အောက်တိုဘာ ၂၃ ရက်တွင် ပြောကြားခဲ့ပြီး ဗီယက်နမ်ကို အ၀ါကတ်ပြ သတိပေးခဲ့သည်။

အဖွဲ့ဝင် ၂၈ နိုင်ငံရှိသော ဥရောပသမဂ္ဂ၏ အုပ်ချုပ်ရေးအဖွဲ့ဖြစ်သော ဥရောပကော်မရှင်က ဗီယက်နမ်သည် တရားမ၀င် ငါးဖမ်းခြင်းအား သင့်တော်သော အချိန်ကာလ တစ်ခုအတွင်း ဖြေရှင်းသင့်ကြောင်း ပြောကြားခဲ့သော်လည်း နောက်ဆုံးအချိန် သတ်မှတ်ပေးမှုကို မဆောင်ရွက်ခဲ့ပေ။

“ဗီယက်နမ် ငါးဖမ်းသင်္ဘောတွေက တရားမ၀င် ငါးဖမ်းမှုတွေကြောင့် ပစိဖိတ်သမုဒ္ဒရာတွေထဲမှာ အဏ္ဏ၀ါဟေဂဗေဒ စနစ်ကို သက်ရောက်မှုကို ကျွန်တော်တို့ မျက်ကွယ် မပြုထားနိုင်ပါဘူး” ဟု ဥရောပ ငါးလုပ်ငန်းရေးရာ ကော်မရှင်နာမင်းကြီး သာမိနူဗေလာက ပြောကြားခဲ့သည်။ ဗီယက်နမ် အာဏာပိုင်များအား တရားမ၀င် ငါးဖမ်းမှုတိုက်ဖျက်ရေးကို အရှိန်မြှင့်ဆောင်ရွက်ရန် တိုက်တွန်းထားပြီး ထိရောက်စွာ မဆောင်ရွက်လျှင် အရေးယူဆောင်ရွက်ရန် ဆုံးဖြတ်နိုင်ကြောင်း ဗေလာက ထပ်မံပြောကြားခဲ့သည်။

တရားမ၀င် ငါးဖမ်းမှုကို တိုက်ဖျက်ရန် နည်းပညာဆိုင်ရာ ပံ့ပိုးမှုပေးမည်ဟု ဥရောပသမဂ္ဂက ဗီယက်နမ်ကို ကမ်းလှမ်းထားခဲ့ကြောင်း ဗေလာက ပြောကြားခဲ့သည်။

ဗီယက်နမ်သည် တရားမ၀င်ငါးဖမ်းမှုကို အပြစ်ပေးရန် ထိရောက်သည့်စနစ် မရှိကြောင်း ထို့ပြင် အိမ်နီးချင်း ကျွန်းနိုင်ငံငယ်များ၏ ရေပိုင်နက်တွင် ဗီယက်နမ်ငါးဖမ်း သင်္ဘောများ၏ ငါးဖမ်းခြင်းကို ဗီယက်နမ်က  ဟန့်တားမှု မရှိသလောက်ဖြစ်ကြောင်း ဥရောပကော်မရှင်က ပြောကြားခဲ့သည်။

ဗီယက်နမ်သည် ပင်လယ်စာထုတ်ကုန်များ တင်ပို့မှုတွင် ကမ္ဘာ့ထိပ်တန်း ၁၀ နိုင်ငံစာရင်းဝင် ဖြစ်ကြောင်း ကုလသမဂ္ဂစားနပ် ရိက္ခာနှင့် စိုက်ပျိုးရေးအဖွဲ့ FAO က ပြောကြားခဲ့သည်။ တရားမ၀င်ငါးဖမ်းမှုကို ဟန့်တားရန် ပျက်ကွက်မှုအတွက် ယင်းနိုင်ငံမှ ငါးလုပ်ငန်း ထုတ်ကုန်များကို ဥရောပသမဂ္ဂက ပိတ်ဆို့အရေးယူနိုင်သည်။ ကမ္ဘာတွင် ငါးအများဆုံး တင်သွင်းသူဖြစ်သော ဥရောပသမဂ္ဂသည် တရားမ၀င် ငါးဖမ်းမှုကို တိုက်ဖျက်ရန်နှင့် အဏ္ဏ၀ါသယံဇာတအား ရေရှည်အသုံးပြုနိုင်ရေး အားပေးရန်အတွက် ပိတ်ဆို့အရေးယူမှု ဆောင်ရွက်နိုင်သည့် ကွပ်ကဲမှု စည်းမျဉ်းကို ၂၀၁၀ ပြည့်နှစ်တွင် စတင်ကျင့်သုံးခဲ့သည်။ ကမ္ဘာတွင် နှစ်စဉ်ဖမ်းဆီးရမိသော ငါးများ၏ ၁၅ ရာခိုင်နှုန်းထက်မနည်း တန် ၁၁ သန်းမှ ၂၆ သန်းကြားသည် တရားမ၀င် ဖမ်းဆီးမှုဖြစ်ပြီး ယူရို ၈ ဘီလျံမှ ၁၉ ဘီလျံကြား တန်ဖိုးရှိသည်။

Ref : AFP