အာဆင်နယ်အသင်း ရာသီဝက်ကာလတွင် ပေါင် ၂၅ သန်းကျော် အမြတ်ရ

အာဆင်နယ်အသင်းသည် ယခုရာသီတွင် ချန်ပီယံလိဂ်ဝင်ခွင့် လွဲချော်ခဲ့သော်လည်း ကစားသမားများရောင်းချမှုကြောင့် ရာသီဝက်ကာလ ဘဏ္ဍာရေးရှင်းတမ်းတွင် ပေါင် ၂၅ သန်းကျော် အမြတ်ရခဲ့ကြောင်း သိရသည်။

အာဆင်နယ်အသင်းသည် ဆယ်စုနှစ်နှစ်ခုအတွင်း ပထမဆုံးအကြိမ် ချန်ပီယံလိဂ်ဝင်ခွင့် လွဲချော်ခဲ့သဖြင့် ရာသီဝက်ကာလ (နိုဝင်ဘာ ၃၀ ရက်အထိ) ၀င်ငွေရရှိမှုမှာ ပေါင် ၁၆၇ ဒသမ ၇ သန်းသာရှိပြီး ယခင်နှစ်ကာလတူထက် ပေါင် ၂၃ ဒသမ ၄ သန်း လျော့ကျသွားသည်။ သို့သော် နွေရာသီအပြောင်းအရွှေ့ကာလတွင် လာကာဇက်တစ်ဦးတည်းကိုသာ ပေါင် ၄၆ ဒသမ ၅ သန်းဖြင့်ခေါ်ယူခဲ့ပြီး ချိန်ဘာလိန်၊ ကီရင်ဂစ်ဘ်၊ ဂါဘရီယဲလ်၊ ဆက်ဇနီတို့ကို ပြန်လည်ရောင်းချခဲ့သောကြောင့် အခွန်မဆောင်မီ ပေါင် ၂၅ ဒသမ ၁ သန်း (အခွန်ဆောင်ပြီးလျှင် ပေါင် ၂၀ ဒသမ ၄ သန်း) အမြတ်ရရှိထားခြင်းဖြစ်သည်။ ရာသီဝက်ကာလ အမြတ်ငွေရရှိမှုမှာ ယခင်ရာသီထက် ပေါင် ၁၂ ဒသမ ၅ သန်း မြင့်တက်လာပြီး ကစားသမားရောင်းချရာမှ အမြတ်အစွန်းရရှိသဖြင့် အရန်ငွေကြေးမှာလည်း ပေါင် ၁၃၇ ဒသမ ၆ သန်းအထိ မြင့်တက်လာသည်။

ယုံကြည်စွာဖြင့် ဆက်လက်အားပေးရန် အသင်းပရိသတ်များအား အာဆင်နယ်နည်းပြ အာစင်ဝင်းဂါး လီဗာပူးလ်နှင့်ပွဲအပြီး တိုက်တွန်း

 

အာဆင်နယ်အသင်းနည်းပြ အာစင်ဝင်းဂါးသည် သြဂုတ် ၂၇ ရက်က ကစားခဲ့သည့် ပရီးမီးယားလိဂ်ပွဲစဉ်တွင် အဓိကပြိုင်ဘက် လီဗာပူးလ်အသင်းအား (၀-၄) ဂိုးဖြင့် ဂိုးပြတ်အရေးနိမ့်ခဲ့သည့် ပွဲအပြီး၌ ပရိသတ် များအနေဖြင့် အသင်းကို ယုံကြည်စွာဆက်လက်အားပေးရန် တောင်းဆိုခဲ့သည်။

“စိတ်ပျက်စရာပုံစံနဲ့ အရေးနိမ့်ခဲ့ပေမယ့် အသင်းပရိသတ်တွေအနေနဲ့ ကျွန်တော်တို့နဲ့အတူ ရှိနေဖို့ လိုအပ်ပါတယ်။ တစ်ခုတည်းသော အကြောင်းအရာက ကျွန်တော်တို့ ပြန်လာနိုင်ဖို့ လုပ်ဆောင်ရပါမယ်။ ပြီးတော့ ပရိသတ်တွေကို ပိုမိုဖျော်ဖြေမှုပေးနိုင်ဖို့ပါပဲ”  ဟု အာစင်ဝင်းဂါးက ပြောကြားခဲ့သည်။ သို့သော် ၎င်းက ယခုရှုံးပွဲတွင် အသင်းကစားသွားပုံမှာ ဘယ်လိုမှ လက်ခံနိုင်စရာမရှိကြောင်းလည်း ၀န်ခံခဲ့သည်။ အာစင်ဝင်းဂါးသည် ပြီးခဲ့သည့်ရာသီက FA ဖလား ရယူပေးပြီးနောက် အသင်းနှင့် နှစ်နှစ် သက်တမ်းတိုး စာချုပ်ချုပ်ဆိုခဲ့သူဖြစ်ပြီး နှစ်ပွဲဆက်အရေးနိမ့်မှုကြောင့် ရာထူးမှနုတ်ထွက်ရန် တောင်းဆိုမှုများ ပြန်လည်ပေါ်ထွက်လာခဲ့သည်။