အခွန်လျှော့ချရန် တောင်းဆိုနေသော်လည်း အာဆီယံနိုင်ငံများနှင့် နှိုင်းယှဉ်ပါက ၀င်ငွေခွန်နှင့် ကုန်သွယ်လုပ်ငန်းခွန်များမှာ သင့်တင့်သော နှုန်းထားများဖြစ်၍ နှုန်းထားတိုးမြှင့်မှု မပြုသင့်ဟု ပြည်သူ့ငွေစာရင်း ပူးပေါင်းကော်မတီ အကြံပြု

အခွန်လျှော့ချရန် တောင်းဆိုမှုများ ရှိနေသော်လည်း လက်ရှိ ကောက်ခံနေသည့် ၀င်ငွေခွန်နှင့် ကုန်သွယ်လုပ်ငန်းခွန်များမှာ အာဆီယံနိုင်ငံများနှင့် နှိုင်းယှဉ်ပါက သင့်တင့်သော နှုန်းထားများဖြစ်ကြောင်းနှင့် နှုန်းထား တိုးမြှင့်မှု မပြုသင့်ကြောင်း ပြည်သူ့ငွေစာရင်း ပူးပေါင်းကော်မတီက အကြံပြုထားသည်။

မြန်မာနိုင်ငံတွင် လက်ရှိ ကောက်ခံနေသော ၀င်ငွေခွန် ၂၅ ရာခိုင်နှုန်းနှင့် ကုန်သွယ်လုပ်ငန်းခွန် ငါးရာခိုင်နှုန်းမှာ အာဆီယံနိုင်ငံများနှင့် နှိုင်းယှဉ်မှုအရ သင့်တင့်သော နှုန်းထားများဖြစ်သည်ဟု ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ၏ “ပြည်ထောင်စုစာရင်းစစ်ချုပ်၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် လေ့လာတွေ့ရှိချက်နှင့် သဘောထားမှတ်ချက်” အစီရင်ခံစာတွင် ဖော်ပြထားသည်။

ထို့ပြင် အာဆီယံနိုင်ငံများတွင် မြန်မာနိုင်ငံ၏ အခွန်ရငွေနှင့် ဂျီဒီပီအချိုးမှာ ၄ ဒသမ ၉ ရာခိုင်နှုန်းသာ ရှိပြီး အာဆီယံနိုင်ငံများတွင် အနည်းဆုံး ဖြစ်နေကြောင်း ပြည်သူ့ငွေစာရင်း ပူးပေါင်းကော်မတီက Heritage Foundation ၏ 2015 Macro Economic Data နှင့် Index of Economic Freedom အစီရင်ခံစာတို့ကို ကိုးကား၍ ဖော်ပြထားသည့် ၀ီကီပီဒီးယားရှိ ကမ္ဘာ့နိုင်ငံများ၏ အခွန်အကောက်ရငွေနှင့် ဂျီဒီပီ အချိုးဇယားကို ကိုးကား ဖော်ပြထားသည်။

မြန်မာနိုင်ငံအနေဖြင့် အခွန်ရရှိမှု အနည်းဆုံးနှင့် ဂျီဒီပီတွင် အခွန်ပါဝင်မှုအချိုး နည်းပါးနေသော်လည်း အခွန်ရရှိမှု နှစ်စဉ် မြင့်တက်နေပြီး လာမည့် ၂၀၁၈-၂၀၁၉ ဘဏ္ဍာနှစ် အခွန်လျာထားချက်တွင်လည်း ၂၀၁၇-၂၀၁၈ ဘဏ္ဍာနှစ်ထက် ဘီလျံ ၁၀၀၀ ကျော် တိုးမြှင့်ရရှိရန် ခန့်မှန်းထားသည်။

နှစ်အလိုက် အခွန်ရရှိမှုများတွင် ၂၀၁၃- ၂၀၁၄ ဘဏ္ဍာနှစ်တွင် အခွန်အကောက်ရငွေ ကျပ် ၄၄၅၉ ဘီလျံရှိပြီး အခွန်နှင့် ဂျီဒီပီအချိုး မှာ ၇ ဒသမ ၆၉ ဖြစ်ကာ ၂၀၁၄-၂၀၁၅ ဘဏ္ဍာနှစ်တွင် အခွန်အကောက်ရငွေ ကျပ် ၆၅၁၈ ဘီလျံရှိပြီး အခွန်နှင့် ဂျီဒီပီအချိုးမှာ ၉ ဒသမ ၉၉ အထိ အမြင့်ဆုံး ဖြစ်ခဲ့သည်။ ၂၀၁၅-၂၀၁၆ ဘဏ္ဍာနှစ် အခွန်အကောက်ရငွေ ကျပ် ၆၃၁၄ ဘီလျံရှိပြီး အခွန်နှင့် ဂျီဒီပီအချိုးမှာ ၈ ဒသမ ၆၈ ဖြစ်ကာ ၂၀၁၆-၂၀၁၇ ဘဏ္ဍာနှစ်တွင် အခွန်အကောက်ရငွေ ကျပ် ၇၁၂၂ ဘီလျံရှိပြီး အခွန်နှင့် ဂျီဒီပီအချိုးမှာ ၈ ဒသမ ၉၃ သာ ရှိခဲ့သည်။

အခွန်နှင့် ဂျီဒီပီအချိုးမှာ နှစ်စဉ် ကျဆင်းနေသော်လည်း အခွန်ရရှိမှုတွင် များပြားနေခြင်းနှင့် ကျဆင်းနေသော မြန်မာ့စီးပွားရေး ပြန်လည် ဆွဲတင်နိုင်ရန် လုပ်သာကိုင်သာရှိသော အခွန်နှုန်းလျှော့ချမှု တစ်ရပ်ကို လုပ်ငန်းရှင်များက တောင်းဆိုနေသကဲ့သို့ ၀င်ငွေရလမ်း မပြနိုင်သည့်သူများ ပေးဆောင်ရသည့် စည်းကြပ်မှုမှ လွတ်ကင်းနေသော အခွန်ရာခိုင်နှုန်း ၃၀ ကောက်ခံမှု ကင်းလွတ်ခွင့်ပေးရန်၊ အခွန်နှုန်းကို ငါးရာခိုင်နှုန်းသို့ တစ်နှစ်၊ နှစ်နှစ် ကင်းလွတ်ခွင့် ပေးရန်နှင့် အလုပ်လျှော့ချမှုများ ရှိလာကြောင်း စေပိုင် ကုမ္ပဏီဥက္ကဋ္ဌ ဦးမောင်ဝိတ်က နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား သြဂုတ် ၂၇ ရက်က နေပြည်တော်တွင် ကျင်းပသည့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် လုပ်ငန်းရှင်များ တွေ့ဆုံပွဲတွင် တင်ပြခဲ့ပြီး MCEA ဥက္ကဋ္ဌ ဦးရှိန်ဝင်းကလည်း အခွန်နှုန်းထားများ လျှော့ချရန်နှင့် အခွန်ရရှိမှု လျော့ကျပါက ၎င်း၏ ပိုင်ဆိုင်မှုမှ စိုက်လျော်မည်ဟု ဒေါ်အောင်ဆန်းစုကြည်ကို ကတိပေးခဲ့သည်။

“အခွန်နှုန်းထားတွေက သုံးရာခိုင်နှုန်း၊ ငါးရာခိုင်နှုန်း တောင်းဆိုနေတာမျိုး မဟုတ်ဘဲ လုပ်သာကိုင်သာရှိတဲ့ နှုန်းထားတစ်ခုကို လျှော့ချသင့်တယ်။ သုံးရာခိုင်နှုန်း ၊ ငါးရာခိုင်နှုန်းကတော့ နည်းလွန်းတယ်” ဟု စီးပွားရေးပညာရှင် ဒေါက်တာ အောင်ကိုကိုက ဆိုသည်။

ထိုသို့ လုပ်ငန်းရှင်များက အခွန်လျှော့ချ ခိုင်းနေသော်လည်း လက်ရှိတွင် အခွန်ရရှိမှု နည်းပါးနေသည်ဟု စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း က ပြောကြားသည်။

“အခွန်လျှော့ချ ခိုင်းနေပေမယ့် အခွန်ရရှိမှုတွေက လျော့နည်းနေပါတယ်။ ဒီနှစ်ခုကို ဘယ်လို အပေးအယူ (Compromise) လုပ်မလဲဆိုတာကို အဖြေရှာဖို့ လိုပါတယ်” ဟု ဦးစိုးဝင်းက ပြောကြားသည်။

 

အခွန်နှုန်း လျှော့ချမှုကြောင့် အခွန်ရရှိမှု လျော့ကျပါက မိမိ၏ စည်းစိမ်မှ စိုက်လျော်မည်ဟု MCEA ဥက္ကဋ္ဌ ဦးရှိန်ဝင်းက နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ကတိပေး

အခွန်နှုန်း လျှော့ချမှုကြောင့် အခွန်ရရှိမှု လျော့ကျပါက မိမိ၏ စည်းစိမ်မှ စိုက်လျော်မည် ဖြစ်ကြောင်း မြန်မာနိုင်ငံ ဆောက်လုပ်ရေးလုပ်ငန်းရှင်များအသင်းချုပ် (MCEA) ဥက္ကဋ္ဌ ဦးရှိန်ဝင်းက နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို သြဂုတ် ၂၇ ရက်တွင် ကတိပေး ပြောကြားသည်။

မြန်မာနိုင်ငံ ဆောက်လုပ်ရေး လုပ်ငန်းရှင်များအသင်းချုပ်ဥက္ကဋ္ဌ ဦးရှိန်ဝင်းက သြဂုတ် ၂၇ ရက်တွင် နေပြည်တော်၌ ကျင်းပသည့် ဆွေးနွေးပွဲတွင် အခွန်ကင်းလွတ်ခွင့်များနှင့် ပတ်သက်ပြီး စီးပွားရေး ပညာရှင်များ က အခွန်ကင်းလွတ်ခွင့်မှာ နိုင်ငံ့စီးပွားရေး တိုးတက်မှုအတွက် အထောက်အကူ မဖြစ်ကြောင်း ဒေါ်အောင်ဆန်းစုကြည်က ပြောကြားခဲ့မှုအပေါ် အခွန်နှုန်း လျှော့ချမှုကြောင့် အခွန်ရရှိမှု လျော့ကျပါက မိမိ၏ စည်းစိမ်မှ စိုက်လျော်မည်ဟု ကတိပေးခဲ့ခြင်း ဖြစ်သည်။

ယင်းသို့ တောင်းဆိုနေသည်မှာ ၀ယ်ယူသူအတွက်သာ ဖြစ်ကြောင်းနှင့် အစိုးရက ဖြေလျှော့ပေးစေလိုကြောင်း ဦးရှိန်ဝင်းက ဆိုသည်။

“အာမခံပြီးတော့ ကျွန်တော် ပြောချင်ပါတယ်။ စီးပွားရေးပညာရှင် တချို့က အခွန်လျှော့တာကို လက်မခံဘူးဆိုရင် ကျွန်တော် ဒီနေ့ အသင်းကိုယ်စား အာမခံပါတယ်။ ၂၀၁၆ ခုနှစ်မှာ အခြေပစ္စည်းကရတဲ့ အခွန်အခ လိုင်းတားလိုက်ပါ။ ပေါင်းထားပါ။ ဒုတိယ ၂၀၁၇ ခုနှစ်မှာ အခြေပစ္စည်းကရတဲ့ တိုက်ခန်းတွေက ရတဲ့ငွေ အခွန်အခရတဲ့ငွေ လိုင်းတားလိုက်ပါ။ ၂၀၁၈ မှာ ရမယ့်ငွေ လိုင်းတားလိုက်ပါ။ ကျွန်တော်တို့ အခွန်နှုန်းတွေ ၀ယ်ယူသူတွေအတွက် လျှော့ပြီးမှ ၂၀၁၉ ခုနှစ်မှာ အကယ်၍များ ၂၀၁၈ ထက်ကို ကျသွားမယ်ဆိုရင် လိုအပ်တဲ့ ဘဏ္ဍာငွေအားလုံးကို ကျွန်တော်တို့ မြန်မာနိုင်ငံ ဆောက်လုပ်ရေးဆိုင်ရာ လုပ်ငန်းရှင်အသင်းဥက္ကဌ တစ်ယောက်အနေနဲ့ ကျွန်တော်တို့အားလုံး စုပေါင်းပြီးတော့ ဖြည့်တင်းပြီးတော့ လျော်ပါမယ်။ မှတ်ထားပါ။ ဘယ်သူမှ မလျော်ဘူးဆိုရင် ကျွန်တော် ဥက္ကဋ္ဌတစ်ယောက်အနေနဲ့ နိုင်ငံအတွက် အသင်းအတွက် ကျွန်တော့်ရှိတဲ့ စည်းစိမ်တွေကို စိုက်ပြီးတော့ နိုင်ငံတော်ကို ပေးသွင်းလိုက်မှာ ဖြစ်ပါတယ်” ဟု ဦးရှိန်ဝင်းက ဆိုသည်။

ဦးရှိန်ဝင်း၏ ပြောစကားကို ကတိက၀တ်အနေဖြင့် မှတ်ထားမည် ဖြစ်ကြောင်း ဒေါ်အောင်ဆန်းစုကြည်က တုံ့ပြန်ပြောကြားသည်။

“ကျေးဇူးတင်ပါတယ်။ မှတ်ထားလိုက်မယ်နော်။ အဲဒီလိုပေါ့နော် ကျွန်မတို့ အခွန်အခတွေနဲ့ ပတ်သက်လို့ အခြားကိစ္စတွေလည်း ပါတာပေါ့။ ကွန်ဒိုမီနီယံ ဥပဒေနဲ့ ပတ်သက်ပြီးတော့ အားတက်တဲ့ အတွက်လည်း ၀မ်းသာပါတယ်။ ငါးနှစ်လုံးလုံး ရုံးကန်ရကျိုး နပ်တယ်လို့ ကျွန်မတို့ ဒီလိုပဲ သုံးသပ်ပါရမှာ ဖြစ်ပါတယ်။ အခွန်နဲ့ ပတ်သက်လို့တော့ နိုင်ငံတစ်နိုင်ငံက အခွန်ကောက်တယ် ဆိုတာ ဘာကြောင့်ကောက်လဲ ဆိုတာကတော့ အားလုံးကတော့ သိပြီးသားလို့ ထင်ပါတယ်။ ကျွန်မထပ်ပြီးတော့ ပြောချင်ပါတယ်။ နိုင်ငံတစ်နိုင်ငံဟာ သိက္ခာရှိရှိနဲ့ ရပ်တည်ဖို့ဆိုရင် အခွန်အနေနဲ့ ပြည်သူအတွက် သုံးပေးဖို့အတွက် ရှိဖို့လိုပါတယ်။ အခွန်တွေ ကောက်တယ်ဆိုတာဟာ အစိုးရအတွက် မဟုတ်ပါဘူး။ အစိုးရ၀န်ကြီးတွေ အတွက်လည်း မဟုတ်ပါဘူး။ ကျွန်မတို့ နိုင်ငံအတွက် ပြန်ပြီးတော့ သုံးဖို့အတွက် ဖြစ်ပါတယ်။ ဒါကြောင့်မို့ အခွန်တွေ ကောက်တယ်ဆိုတာဟာ ကျွန်မတို့ရဲ့ စီးပွားရေးလုပ်နေတဲ့ ပုဂ္ဂိုလ်တွေ ကျွန်မတို့ရဲ့ ပြည်သူတွေကို ဒဏ်ပေးချင်လို့လည်း မဟုတ်ပါဘူး။ ပြည်သူများရော စီးပွားရေး လုပ်ငန်းရှင်များရော ချွေးနှဲစားနဲ့ ရထားတဲ့ ငွေတွေကနေ ဖြတ်ယူချင်လို့ မရပါဘူး။ နိုင်ငံအတွက် သုံးဖို့ပါ။ ဒါကြောင့်မို့ အခွန်နဲ့ ပတ်သက်လို့ရှိရင် ကျွန်မတို့နိုင်ငံတင် မဟုတ်ဘူး နိုင်ငံတိုင်း နိုင်ငံတိုင်းမှာ စကားပြောစရာ အများကြီးဖြစ်လာပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။

နိုင်ငံ့အသုံးစရိတ်အား အခွန်ကောက်ခံရရှိမှုမှသာ အသုံးပြုမည်ဖြစ်ပြီး သယံဇာတ ရောင်းချပြီး နိုင်ငံအသုံးစရိတ်အား ရှာဖွေမည် မဟုတ်ကြောင်း၊ လုပ်ငန်းရှင်များ အနေဖြင့်လည်း ၀ိုင်းဝန်းကူညီပေးကြရန် လိုအပ်ကြောင်း နိုင်ငံတော်၏ အတိုင်ပင်ခံပုဂ္ဂိုလ်က ဆက်လက် ပြောကြားသည်။

“ အခွန်အကောက်တွေ မရှိဘဲ ရှိတဲ့ သယံဇာတတွေကို ရောင်းချပြီး ငွေရှာတဲ့ကိစ္စမျိုး ကျွန်မတို့ မလုပ်ချင်ဘူး။ တည်ငြိမ်တဲ့ နိုင်ငံတစ်ခု ဖွံ့ဖြိုးတိုးတက်မှု ရေရှည်ခိုင်မာဖို့ နိုင်ငံတစ်ခုဆိုလို့ရှိရင် အခွန်အကောက်တွေဟာ နိုင်ငံအသုံးစရိတ်အတွက် လုံလုံလောက်လောက်ရှိဖို့ဟာ အင်မတန်မှ လိုပါတယ်။ အဲဒီဟာတွေအတွက်လည်း ကျွန်မတို့ စီးပွားရေးလုပ်ငန်းရှင်များ အားလုံး ၀ိုင်းပြီးတော့ ကူညီပေးဖို့လည်း လိုအပ်ပါတယ်။ ဒါကြောင့် မို့ မလိုအပ်ဘဲနဲ့ ကျွန်မတို့အခွန်တွေ မကောက်ချင်ပါဘူး” ဟု ဒေါ်အောင်ဆန်းစုကြည်က ဆိုသည်။

ဝင်ငွေရလမ်း မပြနိုင်သည့် အခွန်ရာခိုင်နှုန်း ၃၀ ကို ကင်းလွတ်ခွင့် ပေးရန်၊ အခွန်နှုန်းကို ငါးရာခိုင်နှုန်းသို့ တစ်နှစ်၊ နှစ်နှစ် ကင်းလွတ်ခွင့် ပေးရန်နှင့် လုပ်သားလျှော့ချရမှုများ ရှိလာနေကြောင်း ဦးမောင်ဝိတ် တင်ပြ အလုပ်လက်မဲ့နှုန်း တက်မလာကြောင်းနှင့် အခွန်လွတ်ငြိမ်းခွင့်ပေးခြင်းမှာ နိုင်ငံ့စီးပွားရေး တိုးတက်မှုအတွက် အကျိုးမဖြစ်ကြောင်း ဒေါ်အောင်ဆန်းစုကြည် တုံ့ပြန်

နိုင်ငံတော်၏ အတိုင်ပင်ခံပုဂ္ဂိုလ်နှင့် စီးပွားရေး လုပ်ငန်းရှင်များ တွေ့ဆုံပွဲတွင် ဒေါ်အောင်ဆန်းစုကြည် အဖွင့်စကား ပြောကြားနေမှုကို တွေ့ရစဉ်

ဝင်ငွေရလမ်း မပြနိုင်သည့်သူများ ပေးဆောင်ရသည့် စည်းကြပ်မှုမှ လွတ်ကင်းနေသော အခွန် ၃၀ ရာခိုင်နှုန်း ကောက်ခံမှု ကင်းလွတ်ခွင့်ပေးရန်၊ အခွန်နှုန်းကို ငါးရာခိုင်နှုန်း သို့ တစ်နှစ်၊ နှစ်နှစ် ကင်းလွတ်ခွင့် ပေးရန်နှင့် အလုပ်လျှော့ချမှုများ ရှိလာနေကြောင်း စီးပွားရေး လုပ်ငန်းရှင်ဖြစ်သူ စေပိုင်ကုမ္ပဏီဥက္ကဋ္ဌ ဦးမောင်ဝိတ်က တင်ပြခဲ့ပြီး အလုပ်လက်မဲ့နှုန်း တက်မလာကြောင်းနှင့် အခွန်လွတ်ငြိမ်းခွင့် (Tax Amnesty) ပေးခြင်းမှာ နိုင်ငံ့စီးပွားရေး တိုးတက်မှုအတွက် အကျိုးမဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တုံ့ပြန်ပြောကြားသည်။

ဆောက်လုပ်ရေး လုပ်ငန်းများ ပြိုလဲနေမှုနှင့် ပတ်သက်ပြီး ဦးမောင်ဝိတ်က နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား သြဂုတ် ၂၇ ရက်က နေပြည်တော်တွင် ကျင်းပသည့် နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နှင့် လုပ်ငန်းရှင်များ တွေ့ဆုံပွဲတွင် တင်ပြခဲ့ခြင်းဖြစ်ပြီး ဒေါ်အောင်ဆန်းစုကြည်က ထိုသို့ တုံ့ပြန်ခဲ့ခြင်း ဖြစ်သည်။

“လက်ရှိ အခြေအနေမှာ စီးပွားရေး လုပ်ငန်းတွေဟာ အရောင်းအ၀ယ်နှေးကွေးမှုကို ပြင်းပြင်းထန်ထန် ရင်ဆိုင်နေရပါတယ်။ အကျိုးဆက်အနေနဲ့ လုပ်ငန်း တော်တော်များများမှာ လုပ်ငန်းတွေ လျှော့ချလိုက်ရတဲ့ အခြေအနေ ရောက်နေပါတယ်။ ဒီအတွက် ကျွန်တော်တို့က လုပ်ငန်းတွေရော လုပ်သားတွေပါ လျှော့ချရတဲ့ အခြေအနေ ရှိနေပါတယ်။ ဒီလိုလျှော့ချလိုက်တဲ့အခါမှာ လုပ်ငန်း ရပ်ဆိုင်းခံရတဲ့ ၀န်ထမ်းတွေနဲ့ အခြေခံလုပ်သားတွေဟာ ၀င်ငွေရပ်ဆိုင်း ခံရတာနဲ့ အတူတူ ဖြစ်သွားပါတယ်။ ကျွန်တော်တို့ ယနေ့ကြုံတွေ့နေရတဲ့ ကုန်ဈေးနှုန်းကို ဖြေရှင်းရာမှာလည်း ၀င်ငွေဟာ အဓိက ဖြစ်နေပါတယ်။ ကျွန်တော်တို့ရဲ့ အရောင်းအ၀ယ်နှေးကွေးခြင်းကို တင်ပြခြင်း ဖြစ်ပါတယ်။ လုပ်ငန်း ဘာကြောင့်နှေးကွေးလည်း ပြန်ကြည့်တဲ့အခါမှာ အဓိက အကြောင်းရင်းကတော့ ရင်းနှီးမြှုပ်နှံသူတွေရဲ့ စောင့်ကြည့်ပါဦးမယ် ဆိုတဲ့ ယူဆချက်တစ်ခုကြောင့် ဖြစ်ပါတယ်။ ရင်းနှီးမြှုပ်နှံသူတွေ ဘာကို စောင့်ကြည့်နေသလဲဆိုရင် သူတို့မြှုပ်နှံမှုတွေ ဆုံးရှုံးနိုင်ခြေ နည်းတယ်။ အမြတ်ရနိုင်ခြေ များတယ်ဆိုတဲ့ အခြေအနေကို စောင့်ကြည့်နေခြင်း ဖြစ်ပါတယ်။ ဒီအချက် သေချာတယ်ဆိုရင် ကျွန်တော်တို့ ဈေးကွက်ထဲ ၀င်လာမှာဖြစ်ပြီး ဒီအချက် မသေချာရင် ကျွန်တော်တို့ ဈေးကွက်ထဲက ပြန်ထွက်သွားမှာပဲ ဖြစ်ပါတယ်။ ကျွန်တော်တို့ စီးပွားရေးလုပ်ငန်းများ ပြန်လည် လန်းဆန်းလာဖို့ဟာ ရင်းနှီးမြှုပ်နှံသူတွေ အလုံးအရင်းနဲ့ ကျွန်တော်တို့ ဈေးကွက်ထဲ ၀င်ရောက်လာဖို့ပဲ ဖြစ်ပါတယ် အမေခင်ဗျ။ အဲဒီလို ၀င်ရောက်လာဖို့ အချက်များစွာ လေ့လာတွေ့ရှိတဲ့ အထဲက အချက်နှစ်ခုကို ရှာဖွေ ဆောင်ရွက်ပေးဖို့ တင်ပြအပ်ပါတယ်။ ပထမဆုံးအနေနဲ့ ဘဏ်ချေးငွေ အတိုးနှုန်း ဖြစ်ပါတယ်။ ဘဏ်ချေးငွေဟာ ၁၃ ကျပ်ဖြစ်နေတဲ့အတွက် လုပ်ငန်းတွေဟာ တွက်ချေမကိုက်တဲ့ အခြေအနေ ဖြစ်နေပါတယ်။ ဒီဟာကို ကိုးရာခိုင်နှုန်း သို့မဟုတ် ရှစ်ရာခိုင်နှုန်း။ ယာယီအားဖြင့် တစ်နှစ် သို့မဟုတ် နှစ်နှစ် လျှော့ချပေးဖို့ လိုအပ်နေတယ်လို့ တင်ပြလိုပါတယ်။ ဒုတိယအချက် အနေနဲ့ အခွန်နှုန်းထားများ ဖြစ်ပါတယ်။ လုပ်ငန်းတစ်ခု စတင်ပြီ ဆိုလို့ရှိရင် အခြေပစ္စည်း ၀ယ်ယူရပါတယ်။ ၀ယ်ယူပြီဆိုတာနဲ့ အခွန် ၃၀ ရာခိုင်နှုန်း ဆောင်နေရပါတယ်။ လုပ်ငန်း မစသေးဘူး ၃၀ ရာခိုင်နှုန်း ဆောင်နေရတာဖြစ်တဲ့အတွက် ဒီအခွန်ကို ငါးရာခိုင်နှုန်းကို တစ်နှစ် သို့မဟုတ် နှစ်နှစ် လျှော့ချပေးဖို့ တင်ပြပါတယ်။ နောက်ထပ် တစ်ခုကတော့ အခြေခံပစ္စည်းတွေ ၀ယ်ရင် ဘဏ်ချေးငွေနဲ့ကို ၃၀ ရာခိုင်နှုန်း ပေးနေရတာ ဖြစ်ပါတယ်။ ချေးငွေနဲ့ ၀ယ်တဲ့သူတွေက ၃၀ ရာခိုင်နှုန်း ပေးနေရတာဖြစ်လို့ ဒီ ၃၀ ရာခိုင်နှုန်းကိုလည်း ကင်းလွတ်ခွင့်ပေးဖို့ကိုလည်း တင်ပြလိုပါတယ်” ဟု ဦးမောင်ဝိတ်က ပြောကြားသည်။

ထို့ပြင် မြန်မာနိုင်ငံသားများ ရင်းနှီးမြှုပ်နှံမှု စတင်ပါက ကနဦးမြှုပ်နှံငွေ (Paid-up Capital) ကို အခွန်ဆောင်ပြီးကြောင်း တင်ပြနေရပြီး နိုင်ငံခြားသားများမှာ တင်ပြရန် မလိုအပ်ကြောင်းနှင့် နိုင်ငံခြားသားများနည်းတူ Paid-up Capital ကို အခွန်ဆောင်ပြီး ဖြစ်ကြောင်း ပြစရာမလိုကြောင်း ပြဋ္ဌာန်းပေးစေလိုသည်ဟု ဦးမောင်ဝိတ်က အခွန်ကင်းလွတ်ခွင့်များကို အသားပေး တင်ပြခဲ့ပြီး ထိုသို့ အခွန်ကင်းလွတ်ခွင့်များ ပေးပါက ရင်းနှီးမြှုပ်နှံသူများ အများအပြား ၀င်ရောက်လာမည်ဟု ဦးမောင်ဝိတ်က ဆက်လက် ပြောကြားသည်။

မြန်မာနိုင်ငံတွင် အခွန်ကောက်ခံမှုများနှင့် ပတ်သက်ပြီး ရာခိုင်နှုန်း ၃၀ ပေးဆောင်ရခြင်းမှာ ၀င်ငွေရလမ်း မပြနိုင်သည့် ငွေများကိုသာ စည်းကြပ်မှုမှ လွတ်ကင်းနေသော ငွေများကိုသာ အခွန် ၃၀ ရာခိုင်နှုန်း ကောက်ခံနေခြင်းဖြစ်ပြီး ၀င်ငွေရလမ်း ပြနိုင်သည့် အခွန်ဆောင်ထားသည့် ငွေများဖြစ်ပါက အခွန်ရာခိုင်နှုန်း ၃၀ ပေးဆောင်ရမည် မဟုတ်ကြောင်း ပြည်ထောင်စု၏ အခွန်အကောက်ဥပဒေ နှစ်စဉ်ထုတ်ပြန်ချက်များတွင် ဖော်ပြထားသည်။

ဦးမောင်ဝိတ်က တင်ပြ တောင်းဆိုသည့် အခွန်ကင်းလွတ်ခွင့်များနှင့် လုပ်သားလျှော့ချရမှုများနှင့် ပတ်သက်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “ ကျွန်မတို့ စီးပွားရေး အခြေအနေကို ကြည့်လို့ရှိရင် အဘက်ဘက်က ကြည့်ရပါတယ်။ တစ်ဖက်တည်းက ကြည့်လို့ မရပါဘူး။ ဥပမာဆိုရင် တချို့အလုပ်တွေမှာ အလုပ်တွေ မဖြစ်တာတွေကြောင့် အလုပ်သမားတွေကို အလုပ်ကနေ ရပ်ဆိုင်းလိုက်တယ် ဆိုပေမဲ့ ကျွန်မတို့ နိုင်ငံရဲ့နောက်ဆုံးကြည့်လိုက်တဲ့ Data တွေအရ အလုပ်လက်မဲ့နှုန်းက တက်မလာဘူး ဆိုတာ သတိပြုမိပါတယ်။ တချို့နေရာတွေမှာတော့ အလုပ်သမားတွေကို ရပ်ဆိုင်းနေတယ် ဆိုပေမဲ့ တချို့နေရာတွေမှာ ဆက်ပြီးတော့ ၀င်နေတယ် ဆိုတာကို သတိပြုမိဖို့ လိုအပ်မှာ ဖြစ်ပါတယ်။ နောက်တစ်ခုကလည်း ဘဏ်တိုးနှုန်းပေါ့။ ရင်းနှီးမြှုပ်နှံသူတွေက ဒါတွေကို မဆုံးရှုံးချင်ဘူး။ မဆုံးရှုံးဖို့ အာမခံချက် စောင့်နေတယ်ဆိုတာကို ကျွန်မတစ်ခုတော့ ပြောချင်တယ်။ စီးပွားရေး လုပ်ငန်းရှင်ဆိုတာ စွန့်စားရဲရတယ်။ အအောင်မြင်ဆုံး စီးပွားရေး လုပ်ငန်းရှင်ဆိုတာ ၁၀၀ ရာခိုင်နှုန်း အောင်မြင်မယ်ဆိုမှ ၀င်လာတာ မဟုတ်ပါဘူး။ တခြားသူတွေ မလုပ်ရဲတဲ့ မလုပ်တတ်တဲ့လုပ်ဖို့ မစဉ်းစားတာတွေကို စွန့်စားပြီးတော့ အတိုင်းအတာ တစ်ခုရှိလို့သာ အင်မတန်မှ အောင်မြင်သွားကြတာပါ။ ၁၀၀ ရာခိုင်နှုန်း ဘယ်သူကမှ အာမခံချက် မပေးနိုင်ပါဘူး။ ဥပမာပြောရမယ်ဆိုရင် ဒေါ်လာဈေးပေါ့။ ဒေါ်လာဈေးဟာ ပြင်ပကမ္ဘာကနေ ရိုက်ခတ်လာတာ။ ကျွန်မတို့က ပြင်ပကမ္ဘာကနေ ရိုက်ခတ်လာတဲ့ စီးပွားရေး အခြေအနေကို ထိန်းချုပ်ထားလို့ မရဘူး။ ၁၀၀ ရာခိုင်နှုန်း စိတ်ပူစရာ မရှိဘူးဆိုတာတော့ ကျွန်မတို့က ဘယ်တော့မှ အာမခံချက် ပေးလို့မရဘူး။ တချို့ကိစ္စတွေကတော့ အစိုးရအနေနဲ့ လုပ်ပေးနိုင်တာတွေကို သေချာ စဉ်းစားပြီးတော့ လုပ်ပေးပါမယ်။ ဥပမာအားဖြင့် အခွန်အခနဲ့ ပတ်သက်ပြီး စီးပွားရေး ပညာရှင်ကြီးများဟာ အခွန်လွတ်ကင်းမှုတွေ ပေးတာကို သဘောမတူသူတွေ ရှိပါတယ်။ စီးပွားရေးပညာ ရှုထောင့်ကနေ ကြည့်ရင် အခွန်လွတ်ကင်းမှုတွေ များများပေးတာဟာ နိုင်ငံ့ရဲ့ စီးပွားရေး တိုးတက်မှုအတွက် အကျိုးမရှိဘူးဆိုပြီး အကြံပြုတဲ့ စီးပွားရေးပညာရှင်တွေ ရှိပါတယ်။ ကျွန်မတို့ အစိုးရက အဘက်ဘက်ကိုလည်း နားထောင်ရပါတယ်။ အဘက်ဘက်ကိုလည်း ချိန်ဆရပါတယ်။ စီးပွားရေး တစ်ကွက်ကိုလည်း ကြည့်လို့မရဘူး။ နှစ်ကွက် သုံးကွက်ကိုလည်း ကြည့်လို့ မရပါဘူး။ တစ်နိုင်ငံလုံးရဲ့ လိုအပ်ချက်ကို ကြည့်ရုံမကဘူး။ ကမ္ဘာ့ရဲ့ ရေစီးကြောင်းကိုလည်း ကြည့်ရပါတယ်။ ဒါပေမဲ့ အချက်နှစ်ချက်ကိုတော့ အလေးအနက်ထားပြီး တိုင်ပင်ပေးပါ့မယ်။ မလုပ်ဘူး၊ လုပ်မယ်ကတော့ ဒီမှာတော့ ဘယ်လိုမှ ပြတ်ပြတ်သားသား အဖြေပေးလို့တော့ မရသေးပါဘူး” ဟု တုံ့ပြန်ပြောကြားသည်။