သီလ၀ါတွင် ရင်းနှီးမြှုပ်နှံသူ ၉၄ ဦးမှ ဒေါ်လာ သန်း ၁၁၉၀ အထိ ရှိလာပြီး လက်ရှိတွင် Zone (B) Phase-3 ဖော်ထုတ်ရန် စီမံချက်များ စတင်နေ

သီလ၀ါ အထူးစီးပွားရေးဇုန်တွင် ရင်းနှီးမြှုပ်နှံသူ ၉၄ ဦးမှ ဒေါ်လာ သန်း ၁၁၉၀ အထိ မြှုပ်နှံမှုရှိလာပြီး လက်ရှိတွင် Zone (B) Phase-3 ဖော်ထုတ်ရန် စီမံချက်များ စတင်နေပြီဖြစ်ကြောင်း သီလ၀ါအများပိုင်ကုမ္ပဏီ MTSH ဥက္ကဋ္ဌ ဦးဝင်းအောင်က ပြောကြားသည်။

“ကျွန်တော်တို့အနေနဲ့ ၂၀၁၇-၂၀၁၈ ခုနှစ်အတွင်း သီလ၀ါ SEZ မှာ ခြောက်နိုင်ငံက Investors ၁၂ ဦး၊ အမေရိကန်ဒေါ်လာ သန်း ၁၄၀ ဖိုး ထပ်မံရင်းနှီးမြှုပ်နှံဖို့ ဆွဲဆောင်နိုင်ခဲ့ပါတယ်။ ဒါကြောင့် အရင်က ရင်းနှီးမြှုပ်နှံသူ ၈၂ ဦးဆီက အမေရိကန်ဒေါ်လာ သန်း ၁၀၅၀ ရှိခဲ့တာက အခုဆိုရင် ရင်းနှီးမြှုပ်နှံသူ ၉၄ ဦးနဲ့ အမေရိကန်ဒေါ်လာသန်း ၁၁၉၀ ရှိလာပြီ ဖြစ်ပါတယ်။ ဒါ့အပြင် ဇုန် (A) မှာ စုစုပေါင်း စက်ရုံမြေကွက်တွေရဲ့ ၉၇ ရာခိုင်နှုန်း၊ Zone (B) Phase-1 မှာ ၆၁ ရာခိုင်နှုန်း ကို အောင်မြင်စွာ ရောင်းချထားနိုင်ခဲ့ပြီးလည်း ဖြစ်ပါတယ်။ လက်ရှိမှာ Zone (B) Phase-2 ရဲ့ တည်ဆောက်ရေးလုပ်ငန်းတွေ စတင်နေပြီဖြစ်ပြီး အနာဂတ်မှာ ပြည်ပတိုက်ရိုက် ရင်းနှီးမြှုပ်နှံမှု FDI တွေ အလုံးအရင်းနဲ့ လျင်မြန်စွာ ၀င်ရောက်လာမယ့် အချိန်အတွက် ကြိုတင် မျှော်မှန်းပြီး Zone (B) Phase-3 ကိုလည်း ဖော်ထုတ်ဖို့ စီမံချက်တွေ စတင်ချမှတ် ဆောင်ရွက်နေပြီ ဖြစ်ပါတယ်” ဟု ဦးဝင်းအောင်က ပြောကြားသည်။

လက်ရှိတွင် မြန်မာ-ဂျပန်သီလ၀ါ ကုမ္ပဏီ MJTD မှ အကောင်အထည်ဖော် ဆောင်ရွက်နေသည့် သီလ၀ါအထူးစီးပွားရေးဇုန်ရှိ စက်မှုနယ်မြေများသည် MTH ၏ အကြီးမားဆုံး ၀င်ငွေအရင်းအမြစ်ဖြစ်ပြီး ဇုန်(A) ရှိ ငှားရမ်းနိုင်သော မြေဟတ်တာ ၃၀၀ အနက်တွင် ၉၆ ရာခိုင်နှုန်းသည် ကုမ္ပဏီ ၈၁ ခုသို့ အငှားချနိုင်ခဲ့ပြီး ဖြစ်သည်။ ဇုန် (B)၊ အဆင့် (၁) တွင် ငှားရမ်းနိုင်သော စုစုပေါင်း မြေဧရိယာ ၈၃ ဟက်တာအနက်မှ ၄၀ ရာခိုင်နှုန်းသည် ကုမ္ပဏီရှစ်ခုသို့ အငှားချခဲ့ပြီးဖြစ်၍ ဇုန် (ဘီ)၊ အဆင့် (၂) တွင် ငှားရမ်းနိုင်သော မြေဧရိယာ ၅၉ ဟက်တာကို လက်ရှိတွင် တည်ဆောက် အကောင်အထည်ဖော်နေသည်။ အဆိုပါ စက်မှုနယ်မြေများမှ မြေနေရာ ငှားရမ်းမှုမှရရှိသည့် ၀င်ငွေများအပြင် လျှပ်စစ်မီး၊ ရေနှင့် ထိန်းသိမ်းစောင့်ရှောက်မှု ၀န်ဆောင်ခများကိုလည်း ပုံမှန်ဝင်ငွေအဖြစ် ရရှိနေကြောင်း သိရသည်။

ထိုသို့ ၀င်ငွေရရှိနေသော်လည်း သီလ၀ါ အများပိုင်ကုမ္ပဏီအနေဖြင့် ၂၀၁၇-၂၀၁၈ ဘဏ္ဍာနှစ်တွင် MJTD အပါအ၀င် တွဲဖက်ကုမ္ပဏီများမှ အမြတ်ရရှိမှု ကျဆင်းသဖြင့် စံချိန်တင် ၀င်ငွေလျော့ကျမှု ဖြစ်ပေါ်ထားကာ အခွန်ဆောင်ပြီး အသားတင်အမြတ် ကျပ် ၁၂ ဘီလျံကျော်သာ ရရှိထားပြီး ကျပ် ၁၀ ဘီလျံကျော် လျော့ကျမှု ဖြစ်ပေါ်ထားသည်။ ထိုသို့ အမြတ်ရရှိမှု လျော့ကျသဖြင့် အစုရှယ်ယာများအပေါ် အမြတ်ခွဲဝေရာတွင်လည်း ရှယ်ယာတစ်စု ကျပ် ၂၃၀ သာ ခွဲဝေပေးမည်ဖြစ်ပြီး အဆိုပါ အမြတ်ဝေစုမှာ ဘဏ္ဍာနှစ် သုံးနှစ်အတွင်း အနည်းဆုံး ဖြစ်လာခဲ့သည်။

သီလ၀ါအထူးစီးပွားရေးဇုန်တွင် နိုင်ငံ ၁၇ နိုင်ငံမှ ရင်းနှီးမြှုပ်နှံမှုပမာဏ ဒေါ်လာ ၁၄၉၁ သန်းကျော် မြှုပ်နှံလျက်ရှိပြီး ဖွဲ့စည်းမှတ်ပုံတင်ပြီးသည့် ကုမ္ပဏီအားလုံး အွန်လိုင်းစနစ်ဖြင့် ပြန်လည်မှတ်ပုံတင်ရမည်

၂၀၁၈ခုနှစ် ဇူလိုင်လကုန်အထိရရှိသော စာရင်းများအရ သီလ၀ါအထူးစီးပွားရေးဇုန် တွင် နိုင်ငံပေါင်း ၁၇နိုင်ငံမှ ရင်းနှီးမြှုပ်နှံမှု လုပ်ငန်းပေါင်း ၉၇ ခုကို ခွင့်ပြုမိန့်ထုတ်ပေးထားပြီး ရင်းနှီးမြှုပ်နှံမှုပမာဏဒေါ်လာ ၁၄၉၁ သန်းကျော်ရှိကာ လုပ်ငန်း ၅၂ခုမှာ စီးပွားဖြစ် လည်ပတ်လုပ်ကိုင်လျက်ရှိကြောင်း သီလ၀ါ အထူးစီးပွားရေးဇုန်စီမံခန့်ခွဲမှုကော်မတီမှ သိရသည်။

“ဇုန်အတွင်း စက်ရုံများမှာ လုပ်ကိုင်နေတဲ့ လုပ်သားတွေအနေနဲ့ လုပ်သားအခွင့်အရေးဆိုင်ရာ တည်ဆဲဥပဒေပါအခွင့်အရေးတွေ အကာအကွယ်တွေခံစားနိုင်ဖို့ အလုပ်ခန့်ထားမှုဆိုင်ရာ သဘောတူစာချုပ်ချုပ်ဆိုလုပ်ကိုင်ရန် တိုက်တွန်းဆောင်ရွက်နေပါတယ်။ ဒီလိုဆောင်ရွက်ရာမှာ အမြဲတမ်းလုပ်သားပေါင်း ၄၅၀၀ ကျော်ဟာ စာချုပ်ချုပ်ဆိုပြီး ဖြစ်ပါတယ်” ဟု သီလ၀ါအထူးစီးပွားရေးဇုန် စီမံခန့်ခွဲမှုကော်မတီမှ တာဝန်ရှိသူတစ်ဦးက ပြောကြားသည်။

သီလ၀ါအထူးစီးပွားရေးဇုန်တွင် စက်ရုံများရှိ အမြဲတမ်းလုပ်သားများ၊ အလုပ်သင်များ၊ အချိန်ပိုင်းဝန်ထမ်းများနှင့်ဆောက်လုပ်ဆဲ စက်ရုံများ၏ တည်ဆောက်ရေးလုပ်ငန်းခွင်များနှင့် ဇုန်အဆောက်အအုံဆိုင်ရာ တည်ဆောက်မှုများလည်းရှိရာ ယင်းတို့တွင် ကန်ထရိုက်စနစ်လုပ်ငန်းများ အပါအ၀င်ဆောက်လုပ်ရေးလုပ်ငန်းမျိုးစုံ၌ လုပ်ကိုင်သူတစ်သောင်းကျော်ရှိသဖြင့် သီလ၀ါအထူးစီးပွားရေးဇုန်တွင် နေ့စဉ်အလုပ်လုပ်နေသူပေါင်း ၁၅၀၀၀ အတွက် လုပ်ငန်းခွင်ကြီးဖြစ်နေကြောင်း ၎င်းက ဆက်လက်ပြောကြားသည်။

မြန်မာကုမ္ပဏီ ဥပဒေအသစ်သည် ၂၀၁၈ ခုနှစ် သြဂုတ်၁ရက်တွင် စတင်အကောင်အထည်ဖော်ခဲ့ရာ သီလ၀ါအထူးစီးပွားရေးဇုန်ရှိ ဖွဲ့စည်းမှတ်ပုံတင်ပြီးသည့် ကုမ္ပဏီအားလုံးသည်လည်း အွန်လိုင်းစနစ်ဖြင့် ပြန်လည်မှတ်ပုံတင်ရမည်ဖြစ်ကြောင်း သိရသည်။

သီလ၀ါအထူးစီးပွားရေးဇုန်စီမံခန့်ခွဲမှု ကော်မတီသည် ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန၊ ပြည်တွင်းအခွန်များ ဦးစီးဌာနတို့ ပူးပေါင်း၍ သီလ၀ါအထူးစီးပွားရေးဇုန်အတွင်းရှိ ရင်းနှီးမြှုပ်နှံသူကုမ္ပဏီများအတွက် မြန်မာကုမ္ပဏီဥပဒေအသစ်ဆိုင်ရာနှင့် အွန်လိုင်းဖြင့် ကုမ္ပဏီပြန်လည်မှတ်ပုံတင်ခြင်းကို သီလ၀ါအထူးစီးပွားရေးဇုန် အုပ်ချုပ်မှုရုံး၌ လုပ်ငန်းရှင်များနှင့် ဆွေးနွေးခဲ့ကြောင်း သိရသည်။

လက်ရှိအချိန်တွင် လုပ်ငန်းများကို အီလက်ထရောနစ်စနစ်ဖြင့် သုံးစွဲရန်ကြိုးပမ်းနေရာ အကောက်ခွန်ရှင်းလင်းခြင်းကို မြန်မာအလိုအလျောက် အကောက်ခွန်ရှင်းလင်းစနစ် (MACCS) သုံးစွဲ၍လည်းကောင်း၊ ထုတ်ကုန်သွင်းကုန်ကိစ္စများ၊ ဗီဇာကိစ္စများ၊ ကုမ္ပဏီ မှတ်ပုံတင်ကိစ္စ၊ ရင်းနှီးမြှုပ်နှံမှုအဆိုပြုလွှာ တင်ခြင်းကိစ္စတို့ကို အွန်လိုင်းစနစ်တင်ပြ ဆောင်ရွက်နေပြီဖြစ်ရာ ကုမ္ပဏီများပြန်လည် မှတ်ပုံတင်ခြင်းနှင့်ဝင်ငွေခွန်ကိစ္စကိုပါ တိုးချဲ့နိုင်ရန် ကြိုးပမ်းနေကြောင်း သိရသည်။

၂၀၁၄ ခုနှစ် မြန်မာအထူးစီးပွားရေးဇုန် ဥပဒေအရ မြန်မာနိုင်ငံတွင်သီလ၀ါ၊ ထားဝယ်နှင့် ကျောက်ဖြူအထူးစီးပွားရေးဇုန်များကို အကောင်အထည်ဖော်နိုင်ရေး ဆောင်ရွက်လျက်ရှိရာ သီလ၀ါအထူးစီးပွားရေးဇုန်တွင် ဇုန်Aသည် အကောင်အထည်ဖော် ဆောင်ရွက်ပြီး စီးလုနီးပါးရှိပြီဖြစ်ပြီး ဇုန်B ကို ဆက်လက်အကောင်အထည်ဖော်နေပြီ ဖြစ်သည်။

 

တရုတ်က အမေရိကန်နိုင်ငံသို့ တင်ပို့မည့်ထုတ်ကုန်များကို အခြေခံအဆောက်အအုံနှင့် လျှပ်စစ်မီးအဆင်သင့်ရှိသည့် သီလ၀ါ အထူးစီးပွားရေးဇုန်အတွင်း အမြန်ဆုံးလာရောက် ရင်းနှီးမြှုပ်နှံနိုင်ရေး လာရောက်ဆွေးနွေး

ဇွန် ၂၀ ရက်က ပြုလုပ်သည့် Myanmar-Korea Investment Seminar အခမ်းအနားကို တွေ့ရစဉ် (ဓာတ်ပုံ-ဇေယျာငြိမ်း)

တရုတ်နိုင်ငံက အမေရိကန်နိုင်ငံသို့ တင်ပို့မည့် ထုတ်ကုန်များကို အခြေခံ အဆောက်အအုံနှင့် လျှပ်စစ်မီးအဆင့်သင့်ရှိသည့် သီလ၀ါအထူးစီးပွားရေးဇုန်အတွင်း အမြန်ဆုံး လာရောက်ရင်းနှီးမြှုပ်နှံ ထုတ်လုပ်နိုင်ရေးအတွက် ဆွေးနွေးနေကြောင်း ဇွန် ၂၀ ရက်က Lotte Hotel တွင် ပြုလုပ်သည့် Myanmar-Korea Investment Seminar အခမ်းအနားမှ သိရသည်။

“တချို့လုပ်ငန်းရှင်တွေ တရုတ်နိုင်ငံက အမေရိကန်နိုင်ငံကို ပို့မယ့်ဟာမျိုးတွေ မြန်မာနိုင်ငံထဲကို အမြန်ဆုံးလာရောက်ပြီး ရင်းနှီးမြှုပ်နှံဖို့ စဉ်စားနေတယ်။ တချို့တွေလာပြီး ဆွေးနွေးနေတယ်။ အထူးသဖြင့် အခြေခံအဆောက်အအုံရှိပြီးသား လျှပ်စစ်လည်း အဆင်သင့်ရှိနေတယ်။ SEZ တွေမှာ လာပြီးလုပ်ဖို့ရှိတယ်” ဟု ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ဒုတိယညွှန်ကြားရေးမှူးချုပ် ဦးသန်းအောင်ကျော်က ပြောကြားသည်။

ယင်းကဲ့သို့ ရွှေ့ပြောင်းကာ လုပ်ကိုင်လာမည့် လုပ်ငန်းမျာအတွက် မြန်မာနိုင်ငံဘက်မှလည်း အမြန်ဆုံးလက်ခံပြီး ဆောင်ရွက်ပေးနိုင်ရန်ကိုလည်း ပြင်ဆင်ထားရှိကြောင်း သိရသည်။

“မြန်မာကတော့ ဒါကိုအမြန်ဆုံးလက်ခံပြီး ဆောင်ရွက်ပေးဖို့ ကျွန်တော်တို့က ပြင်ဆင်ထားပါတယ်” ဟု ဦးသန်းအောင်ကျော်က ပြောကြားသည်။

၂၀၁၈ခုနှစ် ဧပြီလကုန်အထိ သီလ၀ါ အထူးစီးပွားရေးဇုန်တွင် နိုင်ငံပေါင်း ၁၇ နိုင်ငံ၏ စုစုပေါင်းရင်းနှီးမြှုပ်နှံမှုပမာဏ ဒေါ်လာ ၁ ဒသမ ၃၇၄ ဘီလျံကျော်အထိ ၀င်ရောက် မြှုပ်နှံထားမှုအနက် စင်ကာပူနိုင်ငံက ဒေါ်လာ ၅၀၃ သန်းကျော်ဖြင့် ထိပ်ဆုံးမှ ရပ်တည်လျက်ရှိကြောင်း သီလ၀ါအထူးစီးပွားရေးဇုန် စီမံခန့်ခွဲမှုကော်မတီမှ သိရသည်။

၂၀၁၈ ခုနှစ် ဧပြီလကုန်အထိရရှိသော စာရင်းများအရ သီလ၀ါအထူးစီးပွားရေးဇုန်တွင် စင်ကာပူနိုင်ငံက ဒေါ်လာ ၅၀၃ ဒသမ ၇၁ သန်းဖြင့် စုစုပေါင်းရင်းနှီးမြှုပ်နှံမှု၏ ၃၆ ဒသမ ၆၅ ရာခိုင်နှုန်းဖြင့် အများဆုံးဖြစ်သည်။

သီလ၀ါ အထူးစီးပွားရေးဇုန်၌ နိုင်ငံတကာမှ လုပ်ငန်းရှင်များက စက်မှုလုပ်ငန်းများ အများဆုံးဝင်ရောက် လုပ်ကိုင်လျက်ရှိကြောင်း သီလ၀ါအထူးစီးပွားရေးဇုန် စီမံခန့်ခွဲမှုကော်မတီမှ သိရသည်။

၂၀၁၈ ခုနှစ် ဧပြီလအကုန်အထိ သီလ၀ါ အထူးစီးပွားရေးဇုန်အတွင်း စက်မှုကဏ္ဍတွင် လုပ်ငန်းပေါင်း ၇၀၊ သယ်ယူပို့ဆောင်ရေး ကဏ္ဍတွင် လုပ်ငန်းတစ်ခု၊ ကုန်သွယ်မှု လုပ်ငန်းကဏ္ဍတွင် ကိုးခု၊ ၀န်ဆောင်မှုလုပ်ငန်းကဏ္ဍတွင် လေးခု၊ အိမ်ခြံမြေကဏ္ဍတွင် တစ်ခုနှင့် ဟိုတယ်လုပ်ငန်းတွင်တစ်ခု စသည်ဖြင့် အသီးသီး ၀င်ရောက်ထားကြောင်း သီလ၀ါ အထူးစီးပွားရေးဇုန် စီမံခန့်ခွဲမှုကော်မတီမှ သိရသည်။

မြန်မာနိုင်ငံအတွင်းသို့ ၀င်ရောက်ထားသည့် တရုတ်နိုင်ငံ၏ ရင်းနှီးမြှုပ်နှံမှုကို လေ့လာကြည့်ပါက ၁၉၈၈-၁၉၈၉ ဘဏ္ဍာနှစ်က စတင်ကာ ၂၀၁၈ ခုနှစ် မေလအကုန်အထိ ဒေါ်လာဘီလျံ ၂၀ ကျော်အထိ ၀င်ရောက်ထားကာ စုစုပေါင်း နိုင်ငံခြားရင်းနှီးမြှုပ်နှံမှု ပမာဏ၏ ၂၆ ရာခိုင်နှုန်းကျော်အထိရှိကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်၏ စာရင်းများအရ သိရသည်။

၁၉၈၈-၁၉၈၉ ဘဏ္ဍာနှစ်က စတင်ကာ ၂၀၁၈ ခုနှစ် မေလအကုန်အထိ မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၁၄၈၀ ကျော်အထိ ၀င်ရောက်ထားပြီး စုစုပေါင်း ရင်းနှီးမြှုပ်နှံမှုပမာဏ အမေရိကန်ဒေါ်လာ ၇၆ ဘီလျံကျော်အထိ ရှိသည်။