စီးပွားရေး ကျပ်တည်းမှုနဲ့အတူ အလုပ်ရှင် အလုပ်သမားကြား ပဋိပက္ခများကို ဘယ်လိုဖြေရှင်းကြမလဲ

ဒဂုံဆိပ်ကမ်းစက်မှုဇုန်ရှိ ဖုယွင်အထည်ချုပ်စက်ရုံရှေ့တွင် စက်ရုံအလုပ်သမားများ ဆန္ဒထုတ်ဖော်နေသည်ကို တွေ့ရစဉ် (ဓာတ်ပုံ-ရှိုင်းလင်းအောင်)

မနက်မိုးလင်းလို့ မျက်စိနှစ်လုံးပွင့်ပြီ ဆိုတာနဲ့ အခြေခံလူတန်းစား အလုပ်သမားတွေဟာ လုပ်ငန်းခွင်ကိုယ်စီဝင်ဖို့ စတင်ပြင်ဆင်ကြရပါတယ်။ သူတို့အလုပ်လုပ်တဲ့ လုပ်ငန်းခွင်တွေ မတူကြပေမဲ့ အိမ်ကနေ အလုပ်ကို ရောက်ဖို့ နေရာမျိုးစုံက နေ သွားရတာကတော့ အတူတူပါပဲ။ ကားမှတ်တိုင်တွေ၊ လမ်းထိပ်တွေမှာ မိမိတို့ လုပ်ငန်းခွင်တွေကို ကိုယ်စီသွားနေတဲ့လူတွေ အများကြီးထဲမှာ အသိသာဆုံး လူတွေကတော့ စက်ရုံ၊ အလုပ်ရုံတွေမှာလုပ်တဲ့ အလုပ်သမားတွေပါပဲ။ ထမင်းချိုင့်၊ ရေဘူး စတာတွေ ထည့်ထားတဲ့ ဆွဲခြင်းလေးတွေဆွဲပြီး အလုပ်ချိန်မီဖို့ ခပ်သုတ်သုတ် သွားလာနေတဲ့ အလုပ်သမားတွေကို မနက်စောစောမှာ တွေ့နိုင်ပါတယ်။

မြန်မာနိုင်ငံရဲ့ စီးပွားရေးမြို့တော်ဖြစ်တဲ့ ရန်ကုန်မြို့မှာ စက်မှုဇုန် ၂၉ ခုနဲ့ သီလ၀ါ အထူးစီးပွားရေးဇုန် တစ်ခုရှိပါတယ်။ ဒီစက်မှုဇုန်တွေမှာ စက်မှု၊ လက်မှုကဏ္ဍမျိုးစုံနဲ့စက်ရုံ၊ အလုပ်ရုံတွေ လုပ်ကိုင်လည်ပတ် နေကြပါတယ်။ စက်ရုံ၊ အလုပ်ရုံတွေထဲမှာ အလုပ်သမားတွေနဲ့ အလုပ်ရှင်တွေဟာ စိတ်အေးချမ်းသာစွာနဲ့ လုပ်ကိုင်နေကြတယ်လို့ မထင်ပါနဲ့။ သူတို့ကြားထဲမှာ အဆင်မပြေမှု အမျိုးမျိုး၊ အကြောင်းအမျိုးမျိုးကြောင့် အလုပ်သမား ဆန္ဒပြနေတဲ့ စက်ရုံတွေလည်း အများကြီး ရှိနေပါတယ်။

အလုပ်သမားတွေ ဘာကြောင့် ဆန္ဒပြကြတာလဲ

အလုပ်သမား ဆန္ဒပြမှုတွေဟာ များသောအားဖြင့် နှစ်မျိုးနှစ်စား ရှိပါတယ်။ ဒါကတော့ ဥပဒေပါ ရပိုင်ခွင့်တွေကို တောင်းဆိုတာနဲ့ အကျိုးစီးပွားလိုချင်လို့ တောင်းဆိုတာဆိုပြီး ကွဲပြားပါတယ်။ ပထမတစ်ခုက ဥပဒေပြဋ္ဌာန်းချက်မှာပါတဲ့ အနည်းဆုံး လုပ်အားခ၊ အချိန်ပို လုပ်အားခ၊ ရှောင်တခင်ခွင့်၊ လုပ်သက်ခွင့်၊ ဆေးခွင့် စတာတွေအပြင် အခြားအလုပ်သမား ရပိုင်ခွင့်တွေကို မပေးလို့ ဆန္ဒပြတာပါ။ အမှန်တကယ်က ဥပဒေပါ အခွင့်အရေးတွေ မရခဲ့ရင် ဆန္ဒပြ တောင်းဆိုစရာတောင် မလိုပါဘူး။ အလုပ်ရှင်ဘက်က ပေးကိုပေးရမှာပါ။ ဒါက အလုပ်သမား ဥပဒေတွေမှာ ပြဋ္ဌာန်းပြီးသား ဖြစ်တာကိုး။

ဒုတိယတစ်ခုဖြစ်တဲ့ အကျိုးစီးပွားလိုချင်လို့ တောင်းဆိုတာကတော့ အနည်းဆုံး လုပ်ခထက် ပိုရချင်တာ၊ ကျွမ်းကျင်ကြေးတွေ ပိုရချင်တာနဲ့ အလုပ်သမား ဥပဒေတွေထဲမှာမပါတဲ့ အခြားသော အခွင့်အရေးတွေ ရချင်လို့ တောင်းဆိုတာပဲ ဖြစ်ပါတယ်။ တချို့အလုပ်သမား ဆန္ဒပြမှုတွေကတော့ ဥပဒေပါ ရပိုင်ခွင့်တွေမရလို့ ရအောင်ပေးဖို့ တောင်းဆိုတာနဲ့ အခြားအခွင့် အရေးတွေ လိုချင်လို့ဆိုပြီး နှစ်ခုပေါင်းပြီး ဆန္ဒပြတာတွေလည်း ရှိပါတယ်။

ဆန္ဒပြတဲ့နေရာမှာ လုပ်ငန်းခွင်ထဲမှာ အလုပ်မလုပ်ဘဲ ဆန္ဒပြတာ၊ စက်ရုံရှေ့မှာ လုပ်ငန်းခွင်မ၀င်ဘဲ ဆန္ဒပြတာနဲ့ စက်ရုံရှေ့မှာ နေ့ရောညပါ သပိတ်စခန်းဖွင့် သပိတ်မှောက်ဆန္ဒပြ တောင်းဆိုတာဆိုပြီး ကွဲပြားပါသေးတယ်။ ဆန္ဒပြမှုတွေ ဘယ်လိုပဲ ကွဲပြားကွဲပြား စက်ရုံတစ်ရုံမှာ အလုပ်သမားတွေ ဆန္ဒပြပြီဆိုရင် သေချာတာကတော့ သူတို့အတွက် အဆင်မပြေမှုတွေ အမှန်တကယ်   ကြုံတွေ့နေရလို့ပါပဲ။ လုပ်ငန်းခွင်ထဲမှာ အစစအရာရာ အဆင်ပြေချောမွေ့ နေတယ်ဆိုရင် ဘယ်အလုပ်သမားကမှ အလကားနေရင်း ဆန္ဒပြနေမှာ မဟုတ်ပါဘူး။

အလုပ်သမား ဆန္ဒပြမှုတွေကြောင့် ဘာတွေဖြစ်လာနိုင်သလဲ

စက်ရုံတစ်ရုံမှာ အလုပ်သမားတွေ အလုပ်မလုပ်ဘဲ ဆန္ဒပြပြီဆိုရင် အလုပ်ရှင်ဘက်မှာရော၊ အလုပ်သမားဘက်မှာရော ထိခိုက်နစ်နာမှုတွေ ရှိလာနိုင်ပါတယ်။ အလုပ်သမားတွေ အလုပ်မလုပ်ဘဲ ဆန္ဒပြပြီဆိုရင် အဲဒီစက်ရုံရဲ့ ကုန်ထုတ်စွမ်းအားကစပြီး ကျဆင်းလာပါပြီ။ အလုပ်သမား အနည်းငယ်သာ ဆန္ဒပြနေတာဆိုရင် သိပ်မသိသာပေမဲ့ ရာနဲ့ချီတဲ့ အလုပ်သမားတွေ ဆန္ဒပြပြီဆိုရင် လုပ်ငန်းလည်ပတ်မှု မရပ်ဆိုင်းသွားရင်တောင် ကုန်ထုတ်လုပ်မှုမှာ ထိခိုက်လာပါပြီ။ အလုပ်သမား ဆန္ဒပြမှုတွေက အလုပ်ရှင် အတွက်ရော အလုပ်သမား အတွက်ရော မကောင်းပါဘူး။ နှစ်ဦးနှစ်ဖက်စလုံးအတွက် ထိခိုက်နစ်နာမှုတွေ ရှိနေပါတယ်။

အလုပ်ရှင်ဘက်က ကြည့်မယ်ဆိုရင် အလုပ်သမားတွေ အလုပ်မလုပ်ဘဲ ဆန္ဒပြနေတဲ့အတွက် နိုင်ငံခြားကို အချိန်မီ တင်ပို့ရမယ့် အ၀တ်အထည်တွေ မပို့နိုင်တဲ့ကိစ္စကို မလွဲမသွေ တွေ့ကြုံလာရနိုင်ပါတယ်။ အလုပ်သမားဘက်က ကြည့်မယ်ဆိုရင်လည်း စက်ရုံရှေ့ဝင်ပေါက်၊ ထွက်ပေါက် ပိတ်ဆို့ဆန္ဒပြတာကြောင့် အလုပ်ရှင်ဘက်က အမှုဖွင့် တိုင်ကြားမှုကို ခံရနိုင်ပါတယ်။

“ဆန္ဒပြတာကပြပေါ့။ လွတ်လွတ်လပ်လပ် ပြခွင့်ရှိပါတယ်။ သူတို့ အဆင်မပြေတာတွေရှိရင် ပြလို့တော့ရတာပေါ့။ ဒါပေမဲ့ လုပ်ငန်းကို ထိခိုက်လာတာကတော့ မကောင်းဘူးပေါ့။ အဲဒီလိုလုပ်ငန်း ထိခိုက်လာရင် အထည်တွေကို သင်္ဘောနဲ့ တင်ရမဲ့နေ့ရောက်လို့ မတင်နိုင်ဘူးဆိုရင် ကျွန်တော်တို့လို လုပ်ငန်းရှင်အတွက်က အများကြီး ထိခိုက်ပါတယ်။ ရမယ့်ငွေက မရတော့ဘူးပေါ့။ နိုင်ငံခြားကို ပို့ရမယ့်အချိန်မှာ အချိန်မီမပို့နိုင်ရင် သင်္ဘောက ထွက်သွားမယ်။ ဒီမှာက မတင်ဖြစ်ရင် ဒီရဲ့စရိတ်တွေက အများကြီး ရှိတာပေါ့။ အထည်တွေ မရောက်လို့ ငွေမရရင် အလုပ်သမားခတွေ ပေးရတဲ့အခါမှာ ဒုက္ခဖြစ်တာပေါ့” လို့ ရန်ကုန်တိုင်းဒေသကြီး ရွှေပေါက္ကံစက်မှုဇုန် ဥက္ကဋ္ဌဦးဖေလှိုင်က ပြောပါတယ်။

၂၀၁၂ ခုနှစ် အလုပ်သမားရေးရာ အငြင်းပွားမှု ဖြေရှင်းရေးဥပဒေရဲ့ အခန်း(၈) ၄၀ မှာ “ဥပဒေနဲ့အညီ ညှိနှိုင်းခြင်း ဖျန်ဖြေခြင်းနဲ့ ခုံသမာဓိအဖွဲ့ဖြင့် ဆုံးဖြတ်ချက်တို့ကို မလုပ်ရသေးဘဲနဲ့ အလုပ်ပိတ်ခြင်း၊ သပိတ်မှောက်ခြင်း မပြုလုပ်ရ” လို့ ပြဋ္ဌာန်းထားတာကို တွေ့ရပါတယ်။

အလုပ်သမားဆန္ဒပြမှုတွေ ဖြစ်လာခဲ့ရင် ညှိနှိုင်းဖျန်ဖြေရေး လမ်းကြောင်းအဆင့်ဆင့်နဲ့ သွားရမယ် ဆိုပေမယ့် လိုအပ်တဲ့အချိန်ထက် ပိုကြာတာတွေက အလုပ်သမားတွေ ရဲ့ တောင်းဆိုမှုတွေကို လုပ်ငန်းရှင်တွေကပဲ မလိုက်လျောတာလား၊ မြို့နယ်ညှိနှိုင်း ဖျန်ဖြေရေး ရုံးတွေကပဲ ဆွေးနွေးမှုတွေက လိုအပ်ချက်တွေ ရှိနေတာလားဆိုပြီး မြန်မာနိုင်ငံ စက်မှုလက်မှုနှင့် ၀န်ဆောင်မှု လုပ်ငန်းပေါင်းစုံ အလုပ်သမားသမဂများ အဖွဲ့ချုပ် (MICS) ရဲ့ အတွင်းရေးမှူး ဦးသက်နှင်းအောင်က မေးခွန်းထုတ် ပြောကြားခဲ့ပါတယ်။

“အငြင်းပွားမှုတွေ ဖြစ်လာပြီဆိုရင် ညှိနှိုင်းမှု Process နဲ့သွားရပါမယ်။ တကယ်လို့ အလုပ်သမားတွေက အကျိုးစီးပွားဆိုင်ရာပဲ ဖြစ်ဖြစ်၊ အခွင့်အရေးပိုင်း ဆိုင်ရာပဲဖြစ်ဖြစ် အလုပ်မလုပ်ဘဲ သပိတ်မှောက် ဆန္ဒပြမယ်ဆိုရင်  တည်ဆဲဥပဒေအရ သွားရမှာပေါ့။ ဒါပေမဲ့ ကျွန်တော်တို့ အလုပ်သမားတွေရဲ့ နိုင်ငံရေးရေချိန်က နည်းပါးတယ်။ အဲဒီတော့ တောင်းဆိုချက်တွေ မြန်မြန်ရအောင် အပြင်ထွက်စက်ရုံရဲ့ ၀င်ပေါက်ထွက်ပေါက်တွေပိတ်ပြီး သပိတ်မှောက်ကြတယ်။ ဒါက ဥပဒေနဲ့ မညီဘူး။ စက်ရုံဝင်၊ ထွက် ပေါက်ကို ပိတ်ပြီး သပိတ်မှောက် တဲ့အခါမှာ အလုပ်ရှင်ရဲ့ ကုန်ထုတ် လုပ်မှုကို ထိခိုက်တယ်။ နိုင်ငံခြား Export Import တွေ နောက်ကျကုန်တာရှိတယ်။ အလုပ်ရှင်ဘက်က တရားစွဲမှုတွေ လုပ်နိုင်တယ်။ လုပ်လည်း လုပ်နေပါတယ်။ အဲဒီတော့ ဒါက နှစ်ဖက်စလုံး အထိနာတဲ့ နည်းလမ်းပါ။ အလုပ်သမားလည်း တရားစွဲခံရလို့ နာပါတယ်။ အလုပ်ရှင်လည်း ကုန်ပစ္စည်းတွေ ဆုံးရှုံးလို့ နာပါတယ်။ ဒါပေမဲ့ ဒီနေရာမှာ မေးခွန်းထုတ်ချင်တာက အငြင်းပွားမှု ဖြေရှင်းတဲ့အခါမှာ ဘာလို့ လိုအပ်တဲ့ အချိန်ကာလထက် ပိုကြာတာလဲဆိုတာ စဉ်းစားရမယ်။ ကျွန်တော်တို့ အလုပ်သမားတွေရဲ့ တောင်းဆိုချက်တွေကို အလုပ်ရှင်ကပဲ မလိုက်လျောတာလား။ ဒါမှမဟုတ် မြို့နယ်ညှိနှိုင်းဖျန်ဖြေ အဖွဲ့တွေရဲ့ ညှိနှိုင်းဆွေးနွေးမှုကပဲ လိုအပ်တာလားဆိုတာ စဉ်းစားရမယ်” လို့ ဦးသက်နှင်းအောင်က ပြောပါတယ်။

အလုပ်သမား ဆန္ဒပြမှုတွေဖြစ်လို့ အငြင်းပွားစရာတွေ ရှိလာပြီဆိုရင် ညှိနှိုင်းဖျန်ဖြေရေး လမ်းကြောင်းက အချိန်ကြာတယ်ဆိုတာ မှန်ပါတယ်။ အလုပ်ရှင် ကိုယ်စားလှယ်နဲ့ အလုပ်သမား ကိုယ်စားလှယ်တွေ မြို့နယ်ညှိနှိုင်းဖျန်ဖြေရေးရုံးမှာ ညှိ ကြတယ်ဆိုရင် အလုပ်ရှင်ကိုယ်စား တွေ ရုံးကို မလာတာတို့၊ နိုင်ငံခြားသားပိုင်တဲ့ စက်ရုံဆိုရင် အလုပ်သမားတွေ တောင်းဆိုချက်ကို သူဌေးကို ပြန်တင်ပြရတာတို့စတဲ့ အကြောင်းပြချက် အမျိုးမျိုးတွေကြောင့် အငြင်းပွားမှုတွေ ဖြေရှင်းတဲ့နေရာမှာ မလိုအပ်ဘဲ အချိန်တွေ ကြာတတ်ပါတယ်။

လုပ်ခလစာတိုးမြှင့်ရေး အပါအ၀င် အလုပ်သမား အခွင့်အရေးများအတွက် စက်မှုဇုန်တစ်ခုတွင် အလုပ်သမားများ ဆန္ဒပြနေစဉ်

အငြင်းပွားမှုတွေ ဖြေရှင်းတဲ့အခါ အစိုးရနှစ်ခု ဘာတွေကွာလဲ

အလုပ်ရှင်၊ အလုပ်သမား အ ငြင်းပွားမှုဖြစ်စဉ်တွေကို အစိုးရနှစ်ခုနဲ့ ချိတ်ဆက်နှိုင်းယှဉ် ကြည့်မယ်ဆိုရင် အရင် USDP အစိုးရ လက်ထက်မှာ အငြင်းပွားမှုတွေ ဖြေရှင်းပေးရတဲ့ အရေအတွက်က အခု NLD အစိုးရလက်ထက်မှာ ဖြေရှင်းနေရတဲ့ အမှုတွေထက် နှစ်ဆ၊ သုံးဆလောက် ပိုများပါတယ်လို့ သိရပါတယ်။

“အစိုးရနှစ်ခု ယှဉ်ကြည့်မယ်ဆိုရင် ပြီးခဲ့တဲ့ အစိုးရ USDP ပါတီ အစိုးရလက်ထက်မှာ ဖြေရှင်းခဲ့ရတဲ့ အလုပ်သမား အငြင်းပွားမှုတွေက လက်ရှိ (NLD) အစိုးရလက်ထက်မှာ ဖြေရှင်းရမဲ့ အမှုတွေထက် နှစ်ဆ သုံးဆ ပိုများတယ်။ ပြီးခဲ့တဲ့အစိုးရက ဘာလို့ Industrial Relationship ကို တည်ငြိမ်အောင် လုပ်ထားနိုင်သလဲဆိုရင် ညှိနှိုင်းဖြေရှင်းတဲ့ နေရာမှာ မြန်မြန်ဆန်ဆန်ပြီးအောင်လို့ ဖြေရှင်းတယ်။ ခုံသမာဓိနဲ့ ခုံသမာဓိ ကောင်စီရဲ့ဆုံးဖြတ်ချက်တွေနဲ့ ပြီးအောင်လုပ်ကြတယ်။ သို့သော် NLD အစိုးရလက်ထက်မှာ အဲဒီပုံစံ မဟုတ်တော့ဘူး။ တစ်ဦးချင်း အငြင်းပွားမှုဆိုရင် တရားရုံးကို သွားဆိုပြီး လုပ်ကြတယ်။ ပြဿနာက ဘာတက်လဲဆိုတော့ ကျွန်တော် တို့ အလုပ်သမားတွေက တစ်ဦးချင်း အငြင်းပွားမှုဆိုပြီး တရားရုံးကို သွားနိုင်တဲ့ အင်အားနည်းပါတယ်။ အဲဒီတော့ ဥပဒေကို အယုံအကြည် မရှိတော့ဘဲ ညှိနှိုင်းဖျန်ဖြေရေး လမ်းကြောင်းကို လက်မခံတော့ဘူး။ ပြီးတော့ ညှိနှိုင်းဖျန်ဖြေရေး အဖွဲ့က ချလိုက်တဲ့ ဆုံးဖြတ်ချက်ကို မလိုက်နာရင် ပေးဆောင်ရမဲ့ ပြစ်ဒဏ်ကလည်း လူရယ်ချင်စရာကြီး ဖြစ်နေပါ တယ်။ ဒီဥပဒေမှာ ထိရောက်တဲ့ပြစ်ဒဏ် ပါတယ်ဆိုရင် ကျွန်တော်တို့ အလုပ်သမားတွေက သပိတ်မှောက်မှာ မဟုတ်ပါဘူး။ ညှိနှိုင်းဖျန်ဖြေတဲ့ လမ်းကြောင်းကို သွားမှာဖြစ်ပါတယ်။ NLD အစိုးရ လက်ထက်မှာ သပိတ်မှောက်မှုတွေ မဖြစ်အောင် တတ်နိုင်သမျှ တားဆီးပါတယ်။ ဒါပေမဲ့ သက်ဆိုင်ရာ တိုင်းဒေသကြီး အစိုးရနဲ့ အလုပ်သမား ၀န်ကြီးဌာနဘက်က ပူးပေါင်းဆောင်ရွက်မှု အရမ်းအားနည်းတယ်။ ပွင့်ပွင့်လင်းလင်းပြောရရင် အလုပ်သမား အငြင်းပွားမှုတွေကို ကြန့်ကြာနေတဲ့ဟာ၊ အယုံအကြည် မရှိတာတွေ ဖြစ်လာတယ်” လို့ MICS ရဲ့ အတွင်းရေးမှူး ဦးသက်နှင်းအောင်က ပြောပါတယ်။

အခု အစိုးရလက်ထက်မှာ အလုပ်သမား ဆန္ဒပြတောင်းဆိုမှုတွေက အရင်အစိုးရ လက်ထက်ကထက် ပိုနည်းလာပေမယ့် အငြင်းပွားမှုတွေ ဖြေရှင်းတဲ့နေရာမှာ အချိန်ကာလ ပိုကြာလာတာကို တွေ့ရပါတယ်။ ဒီလို အချိန်ကြာတာက အလုပ်ရှင်တွေအတွက် ကိစ္စမရှိပေမဲ့ မရှိဆင်းရဲသား အလုပ်သမားတွေ အတွက်တော့ အဆင်မပြေလှပါဘူး။

အငြင်းပွားမှု ဖြေရှင်းရေးလမ်းကြောင်းက အလုပ်သမားတွေအတွက် ဘယ်လိုအခက်အခဲတွေ ဖြစ်နေလဲ

အလုပ်ရှင်နဲ့ အလုပ်သမားအကြား အငြင်းပွားမှုတွေ ဖြစ်လာပြီဆိုရင် တစ်ဦးချင်းအငြင်းပွားမှုနဲ့ စုပေါင်း အငြင်းပွားမှုဆိုပြီး နှစ်မျိုး ကွဲပြားပါတယ်။ ဖြေရှင်းရတဲ့ ပုံစံ ချင်းကလည်း ကွဲပြားပါတယ်။ အငြင်း ပွားမှုတစ်ခုဖြစ်ရင် စက်ရုံထဲမှာ အလုပ်ရှင်နဲ့ အလုပ်သမားတွေ အ ရင်ဦးဆုံး ညှိကြရပါတယ်။ အဆင် မပြေရင် မြို့နယ်ညှိနှိုင်းဖျန်ဖြေရေး ရုံးက ညှိနှိုင်းဖျန်ဖြေရေးအဖွဲ့ရှေ့မှာ အလုပ်ရှင် ကိုယ်စားလှယ်တွေနဲ့ အလုပ်သမား ကိုယ်စားလှယ်တွေဟာ ဆွေးနွေးရပါတယ်။ ဒီအဆင့်မှာ အဆင်မပြေဘူးဆိုရင် မြို့နယ် ညှိနှိုင်းဖျန်ဖြေရေးက တစ်ဦးချင်း အငြင်းပွားမှုလား၊ စုပေါင်း အငြင်းပွားမှုလားဆိုပြီး ခွဲခြမ်းစိတ်ဖြာပြီး တစ်ဦးချင်း အငြင်းပွားမှုဆိုရင် သက်ဆိုင်ရာတရားရုံးကို လွှဲအပ်ရပါတယ်။

တစ်ဦးချင်း အငြင်းပွားမှုကို တရားရုံးမှာ အမှုရင်ဆိုင် ဖြေရှင်းမယ်ဆိုရင် မြန်မာနိုင်ငံ တရားစီရင်ရေးစနစ်ရဲ့ အချိန်ကာလကြာမြင့်မှုတွေ၊ မိသားစု စားဝတ်နေရေးတွေကြောင့် အလုပ်ထုတ်ခံရလို့ ၀င်ငွေမရှိတော့တဲ့ အလုပ်သမားအတွက် ဒီကိစ္စဟာ အဆင်မပြေနိုင်ပါဘူး။ ဒီတော့ အလုပ်သမားတွေဟာ ညှိနှိုင်းဖျန်ဖြေရေး လမ်းကြောင်းရဲ့အတိုင်း မသွားကြတော့ဘဲ တောင်းဆိုမှုတွေ မြန်မြန်ရအောင် စက်ရုံအရှေ့မှာ ပိတ်ဆို့ ဆန္ဒပြမှုတွေ လုပ်လာကြတာလို့ မြင်မိပါတယ်။

စုပေါင်းအငြင်းပွားမှုဖြစ်တယ် ဆိုရင်တော့ မြို့နယ်ညှိနှိုင်း ဖျန်ဖြေရေးမှာ ညှိလို့အဆင်မပြေရင် တိုင်းခုံသမာဓိအဖွဲ့နဲ့ နေပြည်တော် ခုံကောင်စီကို ဆက်တက်လို့ရပြီး ခုံသမာဓိကောင်စီက ဆုံးဖြတ်ချက် တစ်ခုခု ချမှတ်ပါတယ်။ ဥပမာ-အလုပ်ရှင်က အကြောင်းပြချက် တစ်ခုနဲ့ စက်ရုံအလုပ်သမား သမဂ္ဂခေါင်းဆောင်၊ အဖွဲ့ဝင်၊ ဒါမှမဟုတ် အလုပ်သမား တစ်ယောက်ယောက်ကို အလုပ်က ထုတ်လိုက်တယ်ဆို ပါစို့။ ဒါကို ခုံသမာဓိအဖွဲ့က အလုပ် သမားကို အလုပ်ပြန်ခန့်ဖို့ ဆုံးဖြတ် ချက်ချလိုက်တယ်။ ခုံသမာဓိက ဆုံးဖြတ်ချက်ချတဲ့ အတိုင်းဆိုရင် အလုပ်ထုတ်ခံရတဲ့ အလုပ်သမားကို အလုပ်ပြန်ခန့်ရမှာပါ။ ဒါပေမဲ့ အလုပ်ရှင်တွေဘက်က ဒီအလုပ်သမားကို ပြန်မခန့်တာတွေ များပါတယ်။

ဒီလို ခုံသမာဓိအဖွဲ့ရဲ့ ဆုံးဖြတ်ချက်ကို မလိုက်နာတဲ့ အလုပ်ရှင်ဟာ တရားစွဲဆိုခံရမှာဖြစ်ပြီး၂၀၁၄ ခုနှစ်မှာ ပြဋ္ဌာန်းခဲ့တဲ့ အလုပ်သမား ရေးရာအငြင်းပွားမှု ဖြေရှင်းရေး ဥပဒေကို ပြင်ဆင်သည့် ဥပဒေမှာ ပါတဲ့ ပြစ်ဒဏ်အရ ငွေဒဏ် ၁၀သိန်း ချမှတ်အရေးယူခံရမှာ ဖြစ်ပါတယ်။

ဒီငွေဒဏ်ဟာ အလုပ်ရှင်တွေ အတွက် မပြောပလောက်တဲ့ဥပဒေ ဖြစ်နေပါသေးတယ်။ ဒီထက် ပြင်းထန်တဲ့ဥပဒေ ချမှတ်မယ်ဆိုရင် ပိုအဆင်ပြေပါလိမ့်မယ်။

အလုပ်သမားရေးရာ အငြင်းပွားမှု ဖြေရှင်းရေးဥပဒေမှာ ထောင်ဒဏ်ထည့်သင့်၊ မသင့်

အခုလက်ရှိမှာ ၂၀၁၄ ခုနှစ်က ပြဌာန်းခဲ့တဲ့ အလုပ်သမားရေးရာ အငြင်းပွားမှု ဖြေရှင်းရေးဥပဒေကို ပြင်ဆင်သည့် ဥပဒေမှာ ပြစ်ဒဏ်ကို ထပ်မံပြင်ဆင်ဖို့ ဆောင်ရွက်နေပါတယ်။ လက်ရှိဥပဒေထဲမှာ ငွေဒဏ်တွေသာ ပါဝင်တဲ့ အတွက်ကြောင့် လုပ်ငန်းရှင်တွေအနေနဲ့ ဒီပြစ်ဒဏ်ကို အလွယ်တကူ ချိုးဖောက်နိုင်တဲ့ အတွက် အခုလက်ရှိထက် ပိုပြင်းထန်တဲ့ ပြစ်ဒဏ်ချမှတ်ဖို့အတွက် အလုပ်သမားတွေနဲ့ အလုပ်သမား အဖွဲ့အစည်းတွေဘက်က လိုလားနေကြပါတယ်။ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနကတော့ အလုပ်သမားရေးရာ အငြင်းပွားမှု ဖြေရှင်းရေးဥပဒေမှာ ထောင်ဒဏ်ထည့်သွင်း ဖော်ပြမယ်ဆိုရင် နိုင်ငံခြား ရင်းနှီးမြှုပ်နှံသူတွေကို ထိခိုက်လာနိုင်တယ် ဆိုတာကြောင့် သဘောမတူကြောင်းနဲ့ ထောင်ဒဏ်ထည့်သွင်းမှုကို သဘောမတူကြောင်း လွှတ်တော်ကို တင်ပြထားပါတယ်။ ILO ကလည်း ထောင်ဒဏ်ထည့်သွင်း ဖော်ပြမှုကို သဘောမတူကြောင်း ကြေညာချက် ထုတ်ပြန်ထားပါတယ်။

ဒီဥပဒေဟာ အတည်ပြု ပြဋ္ဌာန်းတာ မရှိသေးပါဘူး။ ဥပဒေ အတည်ပြုပြဋ္ဌာန်းပြီဆိုရင် ဘာတွေ ဆက်ဖြစ်မလဲ ဆိုတော့တော့ စိတ်ဝင်စားစရာ ကောင်းပါတယ်။

အလုပ်သမား ဆန္ဒပြမှုတွေ စက်ရုံတစ်ရုံ တိုးတက်ဖို့ အဟန့်အတား ဖြစ်သလို နိုင်ငံရဲ့စီးပွားရေး ဖွံ့ဖြိုးတိုးတက်ဖို့လည်း အဟန့်အတား ဖြစ်နေပါတယ်။ နိုင်ငံတစ်နိုင်ငံ စီးပွားရေး ဖွံ့ဖြိုးတိုးတက်ဖို့ဆိုရင် စက်မှု၊ လက်မှုကဏ္ဍ ဖွံ့ဖြိုးတိုးတက်မှုက အရေးကြီးပါတယ်။ ဖွံ့ဖြိုးတိုးတက်ဖို့ အရှိန်ယူနေတဲ့ မြန်မာနိုင်ငံရဲ့ စက်မှု၊ လက်မှုကဏ္ဍမှာ အလုပ်ရှင်တွေနဲ့ အလုပ်သမားတွေကြား ဆန္ဒပြမှုတွေ မရှိဘဲ အဆင်ပြေပြေ ဖြစ်နေမယ်ဆိုရင် ပိုကောင်းပါလိမ့်မယ်။ အလုပ်သမား ဆန္ဒပြမှုတွေ ဖြစ်လာခဲ့ရင်လည်း အလုပ်သမား၊ အလုပ်ရှင်တွေကြားမှာ ဆွေးနွေးညှိနှိုင်းမှုတွေ ပြေလည်ဖို့ မျှော်လင့်မိပါတယ်။ ဒါ့အပြင် အငြင်းပွားမှုတွေ ဖြေရှင်းတဲ့နေရာမှာ အလုပ်ရှင်ဘက်ရော အလုပ်သမားတွေ ဘက်ရော နှစ်ဖက်စလုံးအတွက် ထိခိုက်နစ်နာမှုတွေ မရှိဘဲ မျှတတဲ့ ဥပဒေတွေ ပေါ်ထွက်လာမယ်လို့ မျှော်လင့်မိပါတယ်။

 

အနိမ့်ဆုံးလုပ်ခလစာနှင့် ကုန်ဈေးနှုန်းဒဏ်ကြောင့် ဘ၀များခါးနေသည်

အနိမ့်ဆုံးလုပ်ခလစာနှင့် ၀န်ထမ်းလိုအပ်ချက်များကို ဆန္ဒပြတောင်းဆိုနေသည့် စက်မှုဇုန်ဝန်ထမ်းများအား တွေ့ရစဉ်

လက်ထဲက ပိုက်ဆံကို ကြည့်ရင်း မကြည်ကြည်လှိုင် သက်ပြင်းရှည်ကြီး ချမိသည်။ ယခုလတွင် အလုပ်ပါးသည့်အတွက် လခနှင့် OT ပေါင်းမှ လခက နှစ်သိန်းမပြည့်ချင်။ သူ့အတွက် တစ်လစာ သုံးငွေ ငါးသောင်းကိုဖယ်ပြီး ကျန်သည့်ငွေ တစ်သိန်းခွဲခန့်ကို ရွာမှ မိဘနှစ်ပါးအတွက် ဆေးဖိုးနှင့် စားစရိတ် လွှဲပေးရန် ဘဏ်သို့ ခြေဦးလှည့်ခဲ့သည်။

မကြည်ကြည်လှိုင်သည် ဧရာဝတီတိုင်း၊ မြန်အောင်မြို့နယ်၊ ကညွှတ်ကုန်း ကျေးရွာသူဖြစ်ပြီး မွေးချင်းမောင်နှမ သုံးယောက်အနက် အငယ်ဆုံးသမီးလည်း ဖြစ်သည်။ အကြီးနှစ်ယောက်က အိမ်ထောင်ကျသွားသဖြင့် ကျန်ရှိသည့် မိဘနှစ်ပါးကို သူ၏ လုပ်ခလစာလေးဖြင့် ရှာဖွေကျွေးမွေး နေသူလည်း ဖြစ်သည်။

မကြည်ကြည်လှိုင် ရန်ကုန်သို့ ရောက်ခဲ့သည်မှာ လေးနှစ်ခန့်ရှိပြီ ဖြစ်သည်။ ရန်ကုန်ရောက်သည့်နေ့မှစ၍ အထည်ချုပ် လုပ်ငန်းများတွင် ၀င်ရောက်လုပ်ကိုင်ရင်း မိဘနှစ်ပါးကို ရှာဖွေကျွေးမွေးခဲ့သည်။ သူ၏ မိဘနှစ်ပါး အသက်အရွယ် ကြီးရင့်လာသည့်အတွက် ကျန်းမာရေးမကောင်း၊ ချူချာသည်။ ဖခင်ဖြစ်သူက နာတာရှည်ရောဂါဖြစ်ပြီး မိခင်ဖြစ်သူက မျက်လုံးခွဲထားရသည်။ တစ်လထက်တစ်လ မိဘနှစ်ပါး၏ စားစရိတ်ထက် ဆေးကုသစရိတ်ကို အလျင်မီအောင် မကြည်ကြည်လှိုင်တစ်ယောက် ဖြည့်ဆည်းပေးရသည်။

မကြည်ကြည်လှိုင်၏ အသက်မှာ ၂၅ နှစ်ဖြစ်သော်လည်း လူငယ်ပီပီ အပျော်အပါးကို မမက်အား။ လစဉ်သူသုံးဖို့ ဖယ်ထားသည့် ငွေငါးသောင်းထဲမှ အဆောင်လခနှင့် စားစရိတ်အတွက် လောက်ငအောင် မနည်းခြိုးခြံခြွေတာ၍ နေထိုင်ခဲ့သည်မှာ ရန်ကုန်ကို စရောက်ကတည်းကပင်။

အဆောင်ငှားခက တစ်လကို ငါးသောင်း။ သူငယ်ချင်းတစ်ယောက်နဲ့ စပ်တူနေထိုင်သည့်အတွက် အဆောင်ငှားခက တစ်လကို နှစ်သောင်းခွဲ ရှိနေသည်။ လစဉ် သူသုံးဖို့ ငွေငါးသောင်းက အဆောင်ငှားခနဲ့တင် နှစ်သောင်းခွဲ ပလုံသွားပြီဖြစ်သည်။ ကျန်ငွေ နှစ်သောင်းခွဲဖြင့် တစ်လလုံး သူဘယ်လိုများ ရုန်းကန်နေသနည်း။

“ညီမက တစ်လကို နှစ်သိန်းရတယ်ဆိုရင် ညီမအတွက် အဆောင်ခနဲ့ စားစရိတ်ကို ငါးသောင်းလောက်ပဲ ဖယ်ပြီး ကျန်တဲ့တစ်သိန်းခွဲကို မိဘတွေဆီပို့တယ်။ ညီမကတော့ တစ်လလုံး ငါးသောင်းနဲ့ လောက်အောင် သုံးတယ်။ ဘာလို့ဆိုတော့ အိမ်မှာက စားစရိတ်ထက် မိဘတွေရဲ့ ဆေးဖိုးက ပိုအရေးကြီးနေတော့ သူတို့ကို ပိုပြီးပေးရတာ” ဟု ဆိုနင့်စွာဖြင့် သူကဆိုသည်။

လစဉ် ငွေကြေးမလောက်ငမှုများ ရှိနေသော်လည်း သူငယ်ချင်းများ၏ ဖေးမမှုကြောင့် ယနေ့အထိ သူ့ဘ၀က အဆင်မပြေမှု သံသရာထဲတွင် တ၀ဲလည်လည် ဖြစ်နေတုန်းပင်။

“ညီမမှ မပို့ရင်လည်း အိမ်မှာက မိဘတွေကို စောင့်ရှောက်ပြီး ကျွေးမွေးမယ့်သူက မရှိဘူး။ အခက်အခဲတွေက အများကြီးပဲ။ ပြီးရင် စားရေးသောက်ရေးအပြင် မိဘတွေရဲ့ ဆေးဖိုးဝါးခကလည်း ရှိသေးတယ်။ မိဘနှစ်ပါးစလုံးကလည်း အသက်ကြီးပြီဆိုတော့ အလုပ်က မလုပ်နိုင်ဘူး” ဟု မကြည်ကြည်လှိုင်က ဆိုသည်။

နယ်မှ မိဘနှစ်ပါး၏ စားစရိတ်နှင့် ဆေးဖိုးကို လစဉ်အလျင်မီနိုင်ဖို့ မကြည်ကြည်လှိုင်တစ်ယောက် ထမင်းတစ်နပ်ပဲ စားခဲ့ရသည့် နေ့ပေါင်းက မရေတွက်နိုင်၊ ရေသောက်ဗိုက်မှောက် အိပ်ခဲ့ရသည့် ညပေါင်းက မမှတ်မိလောက်အောင် နက်ခဲ့သည်။

ရန်ကုန်မြို့တွင် လှိုင်သာယာ၊ ရွှေလင်ပန်း၊ ရွှေပြည်သာ၊ ရွှေပေါက္ကံ၊ မင်္ဂလာဒုံ၊ တောင်ဒဂုံ၊ မြောက်ဒဂုံ၊ ဒဂုံဆိပ်ကမ်း၊ မြောက်ဥက္ကလာနှင့် တောင်ဥက္ကလာမြို့နယ်များရှိ စက်မှုဇုန်များ အပါအ၀င် စက်မှုဇုန်ပေါင်း ၂၉ ဇုန်ရှိကြောင်း အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ၀န်ကြီးဌာန၏ စာရင်းများအရ သိရသည်။

မြန်မာနိုင်ငံတွင် အထည်ချုပ်စက်ရုံ ၃၅၀ ခန့်ရှိနေပြီး ၀န်ထမ်း ၂၄၀၀၀၀ ရှိတဲ့အနက် ၉၀ ရာခိုင်နှုန်းမှာ အမျိုးသမီးများ ဖြစ်ကြသည်။ အထည်ချုပ်စက်ရုံမှ အလုပ်သမား အများအပြားသည် ဧရာဝတီတိုင်း ဒေသကြီးနှင့် ရခိုင်ပြည်နယ်တို့မှ လာကြသည်။

ဧရာဝတီတိုင်းဒေသကြီးသည် ၂၀၀၈ ခုနစ်တွင် နာဂစ်မုန်တိုင်းကို ဆိုးဆိုးရွားရွား ခံခဲ့ရပြီး ရခိုင်ပြည်နယ်မှာလည်း ၂၀၁၀ ခုနစ်တွင် ဂီရိမုန်တိုင်းဒဏ်ကို ခံခဲ့ရသော ဒေသဖြစ်သည်။ သိန်းနှင့်ချီသော ယင်းဒေသခံပြည်သူများ၏ အိုးအိမ်နှင့် အသက်မွေးဝမ်းကျောင်း လုပ်ငန်းများ ပျက်စီးဆုံးရှုံးမှုများကြောင့် အသက်ရှင် ရပ်တည်နိုင်ရန် ရန်ကုန်မြို့က စက်မှုဇုန်များကဲ့သို့သော နေရာများတွင် လုပ်ကိုင်၍ ရွှေ့ပြောင်းအခြေချ လာခြင်းဖြစ်သည်။

ထို့ပြင် အစိုးရ၊ တပ်မတော်နှင့် ခရိုနီကြီးများ၏ စီမံကိန်းကို အကြောင်း ပြုတောင်းဆုပြည့်ခဲ့ကြသည့် အ တွက် ကျေးရွာနေပြည်သူများက သူ တို့၏ လယ်ယာမြေများကို စွန့်ခွာ၍ ရန်ကုန်မြို့သို့ ရွှေ့ပြောင်းလာခြင်း ကလည်း စက်မှုဇုန်တွင် အလုပ်လုပ်ကိုင်သူများလာရန်နှင့် ကျူးကျော် နေထိုင်မှုတွေဖြစ်လာရန်အတွက် ပင်မသွေးကြော တစ်ခုလို ဖြစ်နေသည်။

၂၀၁၅ သြဂုတ်တွင် အနည်းဆုံး အခကြေးငွေ တစ်နေ့ကျပ် ၃၆၀၀ ကို အတည်ပြုခဲ့ပြီး စက်တင်ဘာ ၁ ရက်တွင် အသက်ဝင်ခဲ့သော်လည်း အလုပ်သမား ၁၅ ဦးနှင့် အောက် လုပ်ငန်းငယ်များမှာ ယခုနှုန်းထားနှင့် သက်ဆိုင်ခြင်း မရှိပေ။

၂၀၁၅ စက်တင်ဘာ ၁ ရက် တွင် အနည်းဆုံးအခကြေးငွေ စတင် ကျင့်သုံးပြီးနောက်ပိုင်း လုပ်ငန်းရှင် များဘက်က အချိန်မှန်ကြေး၊ ရက်မှန် ကြေး၊ ကျွမ်းကျင်အဆင့်ဘောနပ်၊ ဆုကြေးငွေနှင့် ဖယ်ရီခများကို ရပ် ဆိုင်းလိုက်သည့်အတွက်  လစာတိုး သော်လည်း ရရှိသည့်နှုန်းထားမှာမူ ယခင်အတိုင်းပင်ဖြစ်နေသည်။

ထို့ပြင် အနည်းဆုံးအခကြေး ငွေ ကျပ် ၃၆၀၀ ဟု ဆိုသော်လည်း အလုပ်သင် သုံးလအတွက် တစ်နေ့လျှင် အနည်းဆုံးအခကြေးငွေ ကျပ် ၁၈၀၀၊ အစမ်းခန့်ကာလ သုံးလအ တွက် ကျပ် ၂၇၀၀ အဖြစ် အဆင့်ခွဲ ထားသည့် စနစ်လည်း ရှိသေးသည်။ ထိုသို့ ခြောက်လလုပ်ကိုင်ပြီးမှသာ အလုပ်ရှင်ဘက်က အလုပ်ခန့်အပ် လျှင် ငွေကျပ် ၃၆၀၀ ကို စတင်ရရှိ မည်ဖြစ်သည်။ ထို့ကြောင့် မြန်မာနိုင်ငံတွင် သတ်မှတ်ထားသည့် အနိမ့် ဆုံး လုပ်ခလစာသည် အမြင့်ဆုံးတွင် ရှိနေသည့် အနေအထားပင်။

ယင်းအနည်းဆုံးအခကြေးငွေ ဥပဒေသည် မြန်မာနိုင်ငံ၏ အိမ်နီးချင်းနိုင်ငံ ဘင်္ဂလားဒေ့ရ်ှနှင့် မတိမ်းမယိမ်း ဖြစ်စေခဲ့သော်လည်း ကမ္ဘောဒီယား၊ ဗီယက်နမ်တို့ထက် နိမ့်ကျသောကြောင့် အာရှဒေသအတွင်း အနိမ့်ဆုံး ဖြစ်ခဲ့သည်။

ရှေ့ပြေးအသံ (Progressive Voice) ၏ ၂၀၁၆ ခုနစ် ဒီဇင်ဘာက ထုတ်ပြန်ခဲ့သော အစီရင်ခံစာတွင် တွေ့ဆုံမေးမြန်းခဲ့သည့် အထည်ချုပ် အလုပ်သမား ၉၅ ရာခိုင်နှုန်းက ပုံ မှန်အားဖြင့် တစ်ပတ်လျှင် ခြောက်ရက် အလုပ်လုပ်ကြရသည် ဟူ၍လည်းကောင်း၊ အလုပ်သမား ၈၈ ရာခိုင် နှုန်းမှာ ပုံမှန်အားဖြင့် တစ်ရက်လျှင် ၁၀ နာရီနှင့်အထက် အလုပ်လုပ်ကြရသည် ဟူ၍လည်းကောင်း ဖြေကြားခဲ့သည်။ အလုပ်သမားများ အနေဖြင့် အချိန်ပိုလုပ်ရန် ငြင်းဆန်မှု နည်းခြင်းက အကြောင်းအမျိုးမျိုးကြောင့် ဖြစ်နိုင်ပြီး ငြင်းဆန်နိုင်ကြောင်း မသိခြင်း၊ လူနေမှုစရိတ်မြင့်တက်နေ သည်ကို ရင်ဆိုင်နိုင်ရန် အချိန်ပို လုပ်ခလစာ လိုအပ်ခြင်း သို့မဟုတ် တစ်ခါတစ်ရံ အတင်းအကျပ်စေခိုင်း ခံရခြင်းနှင့် ခြိမ်းခြောက်အနိုင်ကျင့် ခံရခြင်းတို့ ပါဝင်ကြောင်း အစီရင်ခံက ဆိုသည်။

အနည်းဆုံးအခကြေးငွေ သတ်မှတ်ခြင်းကြောင့် အထည်ချုပ်လုပ်ငန်း အပါအ၀င် ကုန်ထုတ်လုပ်ငန်း တစ်ခုလုံးတွင် အလုပ်သမားတစ်ဦး ချင်း၏ ပျှမ်းမျှလစာ တိုးမြင့်လာ သော်လည်း အလုပ်သမားအများစု အတွက်မူ လူနေမှုစရိတ်က လောက်ငမှု မရှိသေးပေ။ အဘယ်ကြောင့်ဆို သော် ငွေကြေးဖောင်းပွမှုနှင့် ကုန် ဈေးနှုန်းကြီးမြင့်လာမှုကြောင့် အလုပ်သမားများမှာ အနည်းဆုံးအခ ကြေးငွေ မသတ်မှတ်မီ ကာလများကဲ့သို့ပင် ၀မ်းရေးအတွက် အလျင်မီအောင် ရုန်းကန်လှုပ်ရှားနေရဆဲ ဖြစ်သည်။

၂၀၁၅ ခုနစ် စက်တင်ဘာ ၁ ရက်က စတင်အသက်ဝင်ခဲ့သည့် အနည်းဆုံး အခကြေးငွေ တစ်ရက် ကျပ် ၃၆၀၀ သတ်မှတ်ပြီးနောက်ပိုင်း သုံးလအတွင်း အခြေခံ စားသောက်ကုန်များ၏ ဈေးနှုန်းများ တရိပ်ရိပ် ဖြင့် ထိုးတက်လာခဲ့သည်။ ထို့ပြင် အဆောင်ငှားရမ်းခများပါ တိုးမြင့်လာသည့်အတွက် အလုပ်သမားများ၏ လုပ်ခလစာ တိုးခြင်းသည် စကားအရာသာ ထင်ခဲ့သည်။

အခြေခံ စားသောက်ကုန်ထဲတွင် အထင်ရှားဆုံးပြရမည် ဆိုပါက ယခင် ကန်စွန်းရွက် တစ်စည်းကို ကျပ် ၁၅၀၊ ၂၀၀ ခန့်သာ ပေးရသော်လည်း အနည်းဆုံး အခကြေးငွေ သတ်မှတ်ပြီး နောက်ပိုင်းတွင် ကျပ် ၃၀၀ အထိ ဖြစ်လာခဲ့သည်။ ထို့ပြင် နေ့စဉ်စားနေရသည့် ဆန်ဈေး၊ ဆီဈေးနှင့် နောက်ဖေးမီးချောင်သုံး ကုန်ပစ္စည်းများ၏ ဈေးနှုန်းများမှာလည်း အနည်းဆုံး အခကြေးငွေ သတ်မှတ်ပြီး သုံးလအတွင်း တရိပ်ရိပ် မြင့်တက်လာသည်။

ဆန်ဈေးနှုန်းမှာ ၂၀၁၅ ခုနစ် စက်တင်ဘာတွင် ဖျာပုံပေါ်ဆန်း တစ်အိတ်လျှင် ကျပ် ၄၄၀၀၀ရှိရာမှ နိုဝင်ဘာတွင် ကျပ် ၄၅၅၀၀ သို့ လည်းကောင်း၊ ရွှေဘိုပေါ်ဆန်း တစ် အိတ်လျှင် ကျပ် ၅၁၅၀၀ မှ ကျပ် ၅၄၀၀၀ သို့လည်းကောင်း၊ မြောင်းမြ ပေါ်ဆန်းတစ်အိတ်လျှင် ကျပ် ၄၄၅၀၀ မှ ကျပ် ၄၇၀၀၀ သို့လည်း ကောင်း၊ ဧည့်မထတစ်အိတ်လျှင် ကျပ် ၂၅၀၀၀ မှ ကျပ်၂၈၀၀၀ သို့ လည်းကောင်း၊ ငစိန်တစ်အိတ်လျှင် ကျပ်၂၀၀၀၀ မှ ကျပ်၂၁၅၀၀ သို့ လည်းကောင်း အသီးသီး ဈေးတက် လာခဲ့သည်။ ယင်းဈေးနှုန်းများ သည် ရန်ကုန်မြို့တွင်း ရောင်းချနေသော ဆန်ဆိုင်အချို့မှ ကောက်ယူထားသည့်ဈေးနှုန်းများဖြစ်ပြီး ဈေးနှုန်း အနည်းငယ် အပြောင်းအလဲ ရှိနိုင် သော်လည်း ဆန်ဈေးနှုန်းက တက် သည်မှာ အသေအချာပင်။

ဆန်၊ ဆီ၊ ဆား၊ ငရုတ်၊ ကြက်သွန် စသည့် စားသောက်ကုန်ပစ္စည်းများသည် မြန်မာနိုင်ငံတွင် ပြည်သူများ နေ့စဉ်စားသောက်နေရသည့် အစားအသောက်များဖြစ်သည်။ ယင်းအခြေခံ စားသောက်ကုန်ဈေးနှုန်းများ တက်လာသည့်အတွက် အခြေခံစက်ရုံ၊ အလုပ်ရုံ အလုပ်သမားများမှာ အနည်းဆုံး အခကြေးငွေ ကျပ်  ၃၆၀၀ တိုးမြင့်ရရှိခဲ့သော်လည်း ဒုံရင်းဘ၀၌သာ ကျင်လည်ရုန်းကန်နေရဆဲ ဖြစ်သည်။

“ကုန်ဈေးနှုန်းကတော့ တစ်လနဲ့ တစ်လ မတူဘူး။ အရင်လတုန်းက ဆိုရင်တောင် ဆန်တစ်ပြည်ကို ကျပ် ၂၀၀၀ လောက်နဲ့ ၀ယ်လို့ရ သေးတယ်။ အခုလက်ရှိမှာ ကျပ် ၂၅၀၀ တန်လောက်မှ ဆန်က ကောင်းကောင်းကန်းကန်း စားရတာ။ ကျပ် ၁၈၀၀၊ ကျပ် ၁၅၀၀ ဆို တာက ဆန်ကွဲကို စားနေရတဲ့အ တိုင်းပဲ။ ကုန်ဈေးနှုန်းတွေ ဒီလိုမြင့်တက်လာတဲ့အပေါ်မှာ အလုပ်သမားတွေအနေနဲ့ လုပ်ခလစာက ဖူလုံမှု မရှိဘူး။ ဖူလုံမှု မရှိတဲ့အပေါ်မှာ ကုန်ဈေးနှုန်းကလည်း အနောက်ကနေ အချိန်နဲ့ တစ်ပြေးညီ မြင့်တက်လာတော့ ကျွန်မတို့ရဲ့ လုပ်အားက လုပ်သာလုပ်နေရတယ်။ ကျွန်မတို့ အလုပ်သမားတွေမှာ သင့်တင့်မျှတတဲ့ စားသောက်နေထိုင်မှုမျိုးကို အခုချိန်အထိ မရရှိသေးဘူး” ဟု အထည်ချုပ်စက်ရုံမှ အလုပ်သမ တစ်ဦးက ပြောသည်။

အနည်းဆုံးအခကြေးငွေ ဥပဒေအရ နှစ်နှစ်ပြည့်လျှင် အနည်းဆုံး အခကြေးငွေကို ပြန်လည်သတ်မှတ် ရမည်ဟု ပြဋ္ဌာန်းထားသော်လည်း သုံးနှစ်အကြာ ၂၀၁၈ ခုနစ် မေလရောက်မှ အနည်းဆုံး အခကြေးငွေကို ကျပ် ၃၆၀၀ မှ ကျပ် ၄၈၀၀ သို့ တိုးမြှင့်သတ်မှတ်နိုင်ခဲ့သည်။

ထိုသို့ အနည်းဆုံး အခကြေးငွေကို တစ်ရက်လျှင် ကျပ် ၄၈၀၀ သို့ တိုးမြှင့်သတ်မှတ်ပြီး နောက်ပိုင်းတွင် အမေရိကန်- တရုတ် ကုန်သွယ်ရေး စစ်ပွဲကြောင့် ပြည်တွင်း၌ နိုင်ငံခြား ငွေလဲလှယ်နှုန်း စံချိန်တင် မြင့်တက်ခဲ့ပြီး မြန်မာကျပ်ငွေတန်ဖိုး ကိုးရာခိုင်နှုန်းအထိ ကျခဲ့သည်။

မြန်မာနိုင်ငံတွင် အဓိက စီးပွား ရေးပြဿနာများဖြစ်သည့် ကုန်သွယ်ရေး လိုငွေများခြင်း၊ ပို့ကုန် နည်းပါးခြင်း၊ ဘတ်ဂျက်လိုငွေ များပြားခြင်း၊ ပြည်တွင်းပြည်ပ ရင်းနှီးမြုပ်နှံမှု နည်းပါးခြင်း၊ စီးပွားရေး တိုးတက်မှု ကျဆင်းခြင်း၊ ဈေးကွက်အတွင်း ဒေါ်လာလိုအပ်ချက် များပြားခြင်း စသည့် ပြဿနာများကို မဖြေရှင်းနိုင်သော အချိန်တွင် နိုင်ငံခြားငွေ လဲလှယ်နှုန်း မြင့်တက်ခဲ့ပြီး မြန်မာကျပ်ငွေတန်ဖိုး ကျဆင်းခဲ့ခြင်းက နိုင်ငံ့စီးပွားရေးကိုသာမက အခြေခံ လူတန်းစားများအထိပါ ရိုက်ခတ်ခဲ့သည်။

မြန်မာကျပ်ငွေ ကျဆင်းသည့်အပြင် ငွေကြေးဖောင်းပွမှုနှင့် ကုန်ဈေးနှုန်း မြင့်တက်လာမှုကြောင့် အနည်းဆုံး အခကြေးငွေကို တိုးမြှင့်သတ်မှတ်ခဲ့သော်လည်း အခြေခံအလုပ်သမား လူတန်းစားများ၏ ၀င်ငွေနှင့် ထွက်ငွေမှာ ပိုလျှံဖို့ထက် အကြွေးမတင်လျှင်ပင် ကျေးဇူးတင်ရမည့်ကိန်း ဆိုက်နေသည်။

လက်ရှိတွင် ဆန်၊ ဆီ၊ ဆား၊ ငရုတ်၊ ကြက်သွန် စသည့် အခြေခံ စားသောက်ကုန်များ၏ ဈေးနှုန်းများသည် တရိပ်ရိပ် ဈေးတက်လျက်ရှိသည်။ ရန်ကုန်မြို့အတွင်း ရောင်းချနေသည့် ဈေးများတွင် ကန်စွန်းရွက် တစ်စည်းကိုပင် ကျပ် ၄၀၀ ဖြင့် ၀ယ် စားနေရသည်။ ကြက်ဥတစ်လုံးလျှင် အရွယ်အစားလိုက်၍ ကျပ် ၁၂၀ မှ ၁၇၀၊ ဘဲဥတစ်လုံးလျှင် အရွယ်အစားလိုက်၍ ကျပ် ၁၄၀ မှ ကျပ် ၂၀၀ အထိ ဈေးနှုန်းက ရှိနေသည်။

ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းကမူ ကုန်ဈေးနှုန်းမြင့်တက်ရာတွင် အခြေခံ စားသောက်ကုန်များ အများကြီး ပြောင်းလဲသွားခြင်း မရှိကြောင်း ဘီဘီစီ သတင်းဌာနနှင့် တွေ့ဆုံမေးမြန်းခန်းတွင် ဖြေကြားခဲ့သည်။

စီမံကိန်းနဲ့ ဘဏ္ဍာရေးဝန်ကြီးဌာန ဗဟိုစာရင်းအင်းအဖွဲ့၏ လစဉ်ပုံမှန် ထုတ်ပြန်နေသည့် မြန်မာနိုင်ငံ၏ စားသုံးသူ ဈေးဆနှုန်းနှင့် ငွေကြေးဖောင်းပွမှုနှုန်း အခြေအနေ အစီရင်ခံစာများတွင် အခြေခံ စားသောက်ကုန် ဈေးနှုန်းများ လစဉ်မြင့်တက်လျက်ရှိသည်။

“ကုန်ဈေးနှုန်းတွေတက်လာတော့ ညီမတို့ ရတဲ့လစာနဲ့ သိပ်ပြီး အဆင်မပြေတော့ဘူး။ အခု စက်ရုံမှာ နိုင်ငံခြားက Order မရတော့ O.T လည်းမခေါ်တော့ဘူး။ O.T ဆင်းနေရရင် လစာပိုရတော့ အဆင်ပြေတာ ပေါ့။ O.T လည်းမရှိတော့ရော အဆင်မပြေတော့ဘူး။ တစ်လလုံး ပျက်ရက်မရှိဆင်းမှ လစာကျပ် ၁၉၀၀၀၀ လောက်ပဲရတယ်။ အရင် ကန်စွန်းရွက်တစ်စည်း ကျပ် ၂၀၀ ပဲ။ ပြီးတော့ ကျပ် ၃၀၀ ကနေ အခု ကျပ် ၄၀၀ ဖြစ်လာပြီ။ ကြက်သွန်၊ အာလူးတို့ ငါးတို့ ဈေးတွေတက်လာတယ်။ အလုပ်အကိုင်က မကောင်းရတဲ့အထဲ ကုန်ဈေးနှုန်းက တက်လာတော့ မိသားစုနည်းတဲ့သူဆို ကိစ္စမရှိပေမဲ့ မိသားစုများတဲ့ သူဆိုရင် အဆင်မပြေဘူးပေါ့။ အဆောင်ခ၊ အခန်းခ၊ ရေဖိုး၊ မီးဖိုး၊ စားသောက်စရိတ်တွေနဲ့ အ၀တ်အစားတွေ ဘာတွေ ၀ယ်လိုက်ရင် တစ်လတစ်လ အပိုအလျှံဆိုတာ သိပ်မရှိဘူး။ နယ်က မိသားစုဆီလည်း တစ်လကို ကိုးသောင်း၊ တစ်သိန်းလောက် ပြန်ပို့ရသေးတယ်” ဟု ဧရာဝတီတိုင်း၊ မြန်အောင်မြို့၊ သပြေကုန်းကျေးရွာမှ ရန်ကုန်သို့ လာရောက် အလုပ်လုပ်နေသူ မကြည်ပြာက လက်ရှိကြုံတွေ့နေရသည့် အခက်အခဲများကို ပြောပြသည်။

ထို့ပြင် ရသည့်လခမှာ အဆောင်စရိတ်၊ စားစရိတ်နှင့် မိဘများထံ ငွေပို့ရသည့်အတွက် ဈေးပေါသည့် အစားသောက်များကိုသာ ၀ယ်ယူစားသောက်ရခြင်းကြောင့် ကျန်းမာရေးချူချာမှုများလည်း ရှိလာသည်ဟု အလုပ်သမားများက ဆိုသည်။

“ကုန်ဈေးနှုန်းတွေ မြင့်တက်လာတဲ့အတွက် ကျွန်မတို့ ၀ယ်မစားနိုင်ဘူး။ ဒီလို ၀ယ်မစားနိုင်တဲ့အတွက် ဈေးပေါတဲ့ဟာတွေကို ၀ယ်ရတယ်။ အဲဒီတော့ အလုပ်သမားတွေက အလုပ်လည်း ပင်ပန်းတယ်။ အစားအသောက် အာဟာရကိုလည်း သင့်တင့်လျောက်ပတ်အောင် မစားနိုင်တဲ့ ကျန်းမာရေးတွေ ထိခိုက်လာတာ ရှိတယ်” ဟု ပိတ်သိမ်းလိုက်သည့် Seduno အထည်ချုပ်စက်ရုံမှ အလုပ်သမ မနှင်းသဇင်က ဆိုသည်။

အနည်းဆုံး အခကြေးငွေ ကျပ် ၄၈၀၀ တိုးမြှင့် သတ်မှတ်လိုက်သော်လည်း လုပ်ငန်းရှင်များဘက်မှ အလုပ်သမားများ လစဉ်ရရှိနေသည့် အခြားခံစားခွင့်များကို မပေးတော့သည့်အတွက် မည်သို့မျှ ထူးခြားသွားခြင်း မရှိကြောင်း အလုပ်သမားများက ဆိုသည်။

ပြီးခဲ့သည့် ဇွန်လက လှိုင်သာယာစက်မှုဇုန် (၂) မှ ကြာဆန်စက်ရုံ တစ်ရုံတွင် အခြားခံစားခွင့်များ မရတော့သည်ကို မကျေနပ်သည့် အလုပ်သမားများက စုပေါင်း၍ ဆန္ဒပြရာ၌ စက်ရုံမှ လုပ်သက်လျော်ကြေးပေးပြီး အလုပ်မှ ထုတ်ပယ်လိုက်သောကြောင့် အလုပ်လက်မဲ့ဘ၀သို့ ရောက်ရှိသွားသည့် အလုပ်သမားများလည်း ရှိနေသည်။

“အခြားစက်ရုံတွေမှာ သွားလျှောက်ထားပေမဲ့ မခေါ်သေးဘူး။ ကျွန်မက အသက် ၃၀ ကျော်ပြီ ဆိုတော့ တခြားစက်ရုံတွေက အသက်ကြီးလို့ဆိုပြီး အလုပ်မခေါ်ချင်ကြဘူး။ သူတို့က၂၀ ကျော်လေးပဲ အလုပ်ခန့်ချင်ကြတာ။ အလုပ်ကမရှိပါဘူးဆိုမှ ကုန်ဈေးနှုန်းက တက်လာတော့ အဆင်မပြေပါဘူး။ အိမ်ကနေတောင် ပိုက်ဆံပြန်တောင်းနေရတယ်။ ဖြစ်နိုင်ရင် အလုပ်လေး တစ်ခုလောက် အမြန်လိုချင်တယ်။ အလုပ်မရခင် သူငယ်ချင်းတွေဆီက ပိုက်ဆံချေးပြီး စားသောက်နေရတာပေါ့။ အိမ်ကလည်း အဲဒီအကြောင်းတွေ မသိဘူး” ဟု အလုပ်ထုတ်ပယ် ခံထားရသည့် အလုပ်သမတစ်ဦးက ဆိုသည်။

အလုပ်သမားများဘက်တွင် ၀င်ငွေနှင့် ထွက်ငွေ မလောက်ငသည့် ပြဿနာများ ရှိနေသကဲ့သို့ အလုပ်ရှင် ဘက်တွင်လည်း အထည်ချုပ်လုပ်ငန်းကဏ္ဍ၌ သယ်ယူပို့ဆောင်စရိတ် ကြီးမြင့်မှုနှင့် အလုပ်သမား ပြဿနာများက ကြီးမားသည့် စိန်ခေါ်မှု ဖြစ်နေသည့်အတွက် စက်ရုံအချို့ ပိတ်သိမ်းမှုများ ရှိနေသည်။

ကုန်ထုတ်လုပ်မှု အထွက်နည်းခြင်း၊ အချိန်မီ Export မလုပ်နိုင်ခြင်း၊ စက်ရုံငှားရမ်းခ ကြီးမြင့်ခြင်းနှင့် အနိမ့်ဆုံး လုပ်ခလစာ တိုးမြင့်လာခြင်းတို့ကြောင့် လှိုင်သာယာမြို့နယ်တွင် ဖွင့်ထားသည့် Seduno (Myanmar) အထည်ချုပ်စက်ရုံ ရုတ်တရက် ပိတ်သိမ်းခဲ့သည်။ စက်ရုံအနေဖြင့် ၀န်ထမ်းများအား လုပ်ခလစာနှင့် ဥပဒေပါ နစ်နာကြေးများကို ဇွန် ၃၀ ရက်က ထုတ်ပေးသည်ဟု ထုတ်ပြန်သည်။

Seduno (Myanmar) အထည်ချုပ်စက်ရုံ ပိတ်သိမ်းပြီး မကြာမီအချိန်တွင် လှိုင်သာယာမြို့နယ်မှ အထည်ချုပ်စက်ရုံ အပါအ၀င် စက်ရုံ ၁၄ ရုံမှာ သုံးလအတွင်း ပိတ်သိမ်းခဲ့သည့် သတင်းက ပျံ့နှံ့ခဲ့သည်။ ပိတ်သိမ်းသွားသည့် စက်ရုံအရေအတွက်မှာ ၂၀၁၈ ခုနှစ် မေ ၇ ရက်မှ ဇူလိုင် ၁၀ ရက်အထိ ၁၄ ရုံရှိနေပြီး မိကျောင်းပီနံအိတ်စက်ရုံ၊ ပုလဲအထည်ချုပ်စက်ရုံ၊ ၀ါးဟားဟား ရေခဲမုန့်စက်ရုံ၊ မြတ်ပန်းမွှေး သနပ်ခါးစက်ရုံ၊ ရေခဲတောင် အအေးခန်းစက်ရုံ၊ Cham Zon အထည်ချုပ်စက်ရုံ၊ Success Time ဖိနပ်စက်ရုံ၊ Beauty Place လူသုံးကုန်စက်ရုံ၊ Kuwahara အထည်စစ်စက်ရုံ၊ TMP ငါးဖမ်းပိုက်စက်ရုံ၊ မြို့မဆင်ဖြူတော် ပဲသန့်စင်စက်ရုံ၊ United Knitting Myanmar Co.,Ltd ခြေအိတ်စက်ရုံ၊ Popular အထည်ချုပ်စက်ရုံနှင့် North Shore အထည်ချုပ်စက်ရုံတို့ ဖြစ်ကြောင်း သတင်းထွက်ခဲ့သည်။

“ကျွန်မတို့ဆီကို စက်မှုဇုန် ဥက္ကဋ္ဌက ပို့ထားတာပါ။ စက်ရုံပိတ်သိမ်းတာ ဘာကြောင့် ပိတ်သိမ်းတာလဲဆိုတာ ရှိပါတယ်။ တချို့ဟာတွေက ခေတ်နဲ့မလျော်ညီတော့လို့ ပိတ်သိမ်းရတာမျိုးတွေလည်း ရှိပါတယ်။ ခေတ်နဲ့မလျော်ညီတော့ဘူး။ ပြိုင်ဘက်တွေ ရောက်လာတယ်။ ရပ်တည်နိုင်စွမ်းမရှိလို့ ပိတ်သိမ်းတာတွေ ရှိပါတယ်။ ဘာကြောင့် ပိတ်သိမ်းသလဲ ဆိုတာကို သူတို့က အကြောင်းပြချက် ရှိပါလိမ့်မယ်” ဟု ရန်ကုန်တိုင်းဒေသကြီး လွှတ်တော် ဘဏ္ဍာရေး၊ စီမံကိန်းနှင့် စီးပွားရေး ကော်မတီဥက္ကဋ္ဌ ဒေါ်စန္ဒာမင်းက ပြောကြားသည်။

ကုန်သည်စက်မှု အသင်းချုပ် (UMFCCI) မှ တွဲဖက်အတွင်းရေးမှူး ဒေါ်ခိုင်ခိုင်နွယ်က “စက်ရုံတွေ ပိတ်တယ်လို့ကြားတယ်။ ပိတ်ဖို့ရှိတယ်လို့ ကြားတယ်။ အဓိကကတော့ ထုတ်လုပ်မှုလုပ်ငန်း အလုပ်ပေါ့။ ထုတ်လုပ်မှုလုပ်တဲ့ အလုပ်ရုံတွေက နိုင်ငံခြား ရင်းနှီးမြှုပ်နှံတာလည်း ရှိတယ်။ ပြည်တွင်းရင်းနှီး မြှုပ်နှံတာလည်း ရှိတယ်။ ထုတ်လုပ်မှု အပိုင်းမှာပဲ နိုင်ငံနဲ့ ပြည်တွင်း ပူးပေါင်းလို့ဖြစ်စေ၊ ပြင်ပပို့ ထုတ်လုပ်တာရှိတယ်။ ပိတ်သွားတဲ့ ရုံတွေထဲမှာ လေ့လာရသလောက် နိုင်ငံခြားပိုင်တဲ့ လူ ၈၀၀၊ ၉၀၀ လောက်ရှိတဲ့ရုံလည်း ပိတ်တယ်လို့ ကြားတယ်။ ပြည်တွင်း လုပ်ငန်းလေးတွေ ပိတ်တယ်လို့လည်း ကြားတယ်။ နောက်ဆုံး ရေခဲမုန့်ထုတ်တဲ့ ပြည်တွင်းအလုပ်ရုံ ပိတ်တာလည်း ကြားတယ်” ဟု ဆိုသည်။

ယင်းကိစ္စနှင့် ပတ်သက်၍ လှိုင်သာယာစက်မှုဇုန်ရှိ စက်ရုံ ၁၄ ရုံသည် အားလုံးပိတ်သိမ်းခြင်း မဟုတ်ဘဲ အနည်းငယ်သာ ပိတ်သိမ်းခြင်းဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့မှ ရခိုင်တိုင်းရင်းသားလူမျိုး ရေးရာဝန်ကြီး ဦးဇော်အေးမောင်က ပြောကြားသည်။

“လှိုင်သာယာ စက်မှုဇုန်မှာရှိတဲ့ စက်ရုံ ၁၄ ရုံ အားလုံး ပိတ်သွားတယ်ဆိုတာ မဟုတ်ပါဘူး။ ပိတ်တယ်ဆိုတာ နည်းနည်းပါးပါးလေး ပိတ်တာပါ။ ကျန်တဲ့စက်ရုံတွေက နေရာ ရွှေ့တာရွှေ့တယ်။ ပေါင်းတာက ပေါင်းတယ်။ အဲဒီတော့ ဒီဟာက ရန်ကုန်တိုင်းမှာ စက်ရုံတစ်ရုံပြီးတစ်ရုံ ပိတ်တယ်ဆိုတာ မဟုတ်ပါဘူး” ဟု ၀န်ကြီး ဦးဇော်အေးမောင်က ဆို သည်။

ထို့ပြင် ရန်ကုန်တိုင်းဒေသကြီးတွင် အလုပ်အကိုင်ရှားပါးပြီး အလုပ်သမားများ အလုပ်ပြုတ်တော့မည်ဆိုသည့် ကိစ္စသည် ဟုတ်မှန်မှု မရှိကြောင်း ၀န်ကြီးက ငြင်းဆန်ထား သည်။

မြန်မာနိုင်ငံအနေဖြင့် အထည်ချုပ်လုပ်ငန်း ရေရှည်တည်တံ့ခိုင်မြဲရေးအတွက် အလှမ်းဝေးနေသေးသည်ဟု ၂၀၁၆ ခုနှစ် ဒီဇင်ဘာက ထုတ်ပြန်ခဲ့သော ရှေ့ပြေးအသံ (Progressive Voice) ၏ “အနိမ့်ဆုံးကို မြှင့်တင်ပေးခြင်း” အစီရင်ခံစာ၌ ဖော်ပြထားသည်။

လက်ရှိအချိန်တွင် စီးပွားရေးမကောင်းသည့်အတွက် စက်ရုံအချို့ ပိတ်သိမ်းမှုများ ရှိနေခြင်းကြောင့် အလုပ်လက်မဲ့ဦးရေ ပိုများလာနိုင်သည့်အပြင် အလုပ်ရှင်ဘက်မှ တိမ်းရှောင်သွားသည့်အတွက် လုပ်ခလစာ မရသေးသည့် အလုပ်သမားများလည်း ရှိနေသည်။ ပြီးခဲ့သည့် ဇူလိုင်လတွင် ပခုက္ကူစက်မှုဇုန်က Myanmar Fu Fung အထည်ချုပ်စက်ရုံမှ အလုပ်ရှင်မှာ တိမ်းရှောင်သွားသည့်အတွက် စက်ရုံအလုပ်သမား ၃၀၀ ကျော် အနေဖြင့် လုပ်ခလစာရရှိရန် ဌာနဆိုင်ရာ တာဝန်ရှိသူများနှင့် ဆွေးနွေးညှိနှိုင်းနေရဆဲ ဖြစ်သည်။

ထိုသတင်းများကို ကြားသိရချိန်တွင် မကြည်ကြည်လှိုင် တစ်ယောက် တုန်လှုပ်ချောက်ချားမိသည်ဟု ဆိုသည်။ သူတစ်ယောက်တည်းအတွက် ဆိုလျှင်မူ ကိစ္စမရှိသော်လည်း လက်ရှိအချိန်တွင် နာမကျန်းဖြစ်နေသည့် မိဘနှစ်ပါး၏ စားစရိတ်နှင့် ဆေးကုသစရိတ်ကို ထောက်ပံ့ပေးနေရသည့်အတွက် စိုးရိမ်နေခြင်းဖြစ်သည်။

မိသားစု စားဝတ်နေရေးအတွက် အခြေအနေအရ အထည်ချုပ်စက်ရုံတွင် မိဝေးဖဝေး လာရောက် အလုပ်လုပ် နေရသော်လည်း မကြည်ကြည်လှိုင်က သူ့တွင် ရည်မှန်းချက် တစ်ခုရှိကြောင်း ဖွင့်ဟသည်။

“ပိုက်ဆံစုပြီးရင် ရွာမှာ အိမ်ဆိုင်လေး တစ်ဆိုင်လောက်တည်ပြီး မိဘတွေကို ရှာကျွေးမယ်လို့ စိတ်ကူး ထားတယ်” ဟု မကြည်ကြည်လှိုင်က အားပါးတရဆိုသည်။

 

Good Morning မုန့်စက်ရုံတွင် အနည်းဆုံး လုပ်ခ ကျပ် ၄၈၀၀ ရရှိသော်လည်း အခြားခံစားခွင့်များ မရတော့သဖြင့် လုပ်သား ၁၀၀ ကျော် ဆန္ဒပြလျက်ရှိရာ နှစ်ပတ်ကျော်သည်အထိ တောင်းဆိုမှုများ မရသေး

ရန်ကုန်တိုင်းဒေသကြီး လှိုင်သာယာမြို့နယ် ရွှေသံလွင်စက်မှုဇုန် သံလွင်လမ်းရှိ Good Morning မုန့်စက်ရုံတွင် အနည်းဆုံး လုပ်ခ တစ်ရက် ကျပ် ၄၈၀၀ ရရှိသော်လည်း အခြားခံစားခွင့်များ မရတော့သဖြင့် အလုပ်သမား ၁၀၀ ကျော် ဆန္ဒပြလျက်ရှိရာ နှစ်ပတ်ကျော် ကြာသည်အထိ တောင်းဆိုမှုများ မရသေးကြောင်း ဇူလိုင် ၅ ရက်က သိရသည်။

အလုပ်သမားများသည် ဇွန်၂၂ ရက်က စတင်ကာ အချက်ရှစ်ချက် ရရှိရန် စက်ရုံရှေ့တွင် လုပ်ငန်းခွင်မ၀င်ဘဲ ဆန္ဒပြ တောင်းဆိုခဲ့ခြင်း ဖြစ်သည်။

“အခုထိ အဆင်မပြေသေးဘူး။ တောင်းဆိုထားတဲ့ အချက်တွေထဲမှာ ပိုက်ဆံနဲ့ ပတ်သက်တဲ့ အချက်တွေက အဆင်မပြေဘူး။ ကျန်တဲ့ အချက်တွေကိုတော့ လိုက်လျောပေးမယ် ပြောတာပဲ။ အဆင်မပြေတာတွေက အချိန်ပိုကြေးကို လခစား ဥပဒေအတိုင်း တွက်ချက်ပေးဖို့ရယ်၊ ရက်မှန်ကြေးကို နှစ်ခါခွဲပေးဖို့ ကိစ္စရယ်၊ အရင်ကပေးတဲ့ ထောက်ပံ့ကြေး တစ်လ ကျပ် ၁၅၀၀၀ ပေးဖို့ တောင်းဆိုထားတာတွေ မရသေးဘူး။ ကျွန်တော်တို့ကတော့ မရမချင်း ဆန္ဒပြနေမှာပဲ”ဟု ဆန္ဒပြ အလုပ်သမား လှိုင်မျိုးဝင်းက ပြောကြားသည်။

အလုပ်သမားများ နှစ်ပတ်ကျော်ကြာ ဆန္ဒပြတောင်းဆိုမှုများနှင့် ပတ်သက်၍ စက်ရုံတာဝန်ရှိသူကို မေးမြန်းရာ “ကျွန်တော်တို့က ဥပဒေအတိုင်း ၄၈၀၀ ပေးထားတာပဲ။ အဲဒါကို သူတို့က ပိုတောင်းတဲ့ကိစ္စမှာ ကုမ္ပဏီက ချမ်းသာမှ ပေးလို့ရမှာလေ” ဟု အဆိုပါစက်ရုံ၏ မန်နေဂျာက ပြောကြားသည်။

အလုပ်သမားများ၏ တောင်းဆိုချက်များမှာ အချိန်ပို လုပ်ခကြေးငွေကို လစား ဥပဒေအတိုင်း တွက်ချက်ပေးရန်၊ ဖြတ်တောက်ထားသော ထောက်ပံ့ကြေးအား ယခင်အတိုင်း ကျပ် ၁၅၀၀၀ ပြန်ပေးရန်၊ အလုပ်ဝင်ချိန်အား EC စာချုပ်ပါအတိုင်း သတ်မှတ်ပေးရန်၊ ရက်မှန်ကြေး ကျပ် ၁၅၀၀၀ အား ရှေ့ ၁၅ ရက် အတွင်း အလုပ်ပျက်လျှင် ကျပ် ၇၅၀၀ သာ ဖြတ်တောက်ရန်နှင့် နောက် ၁၅ ရက်အတွင်း အလုပ်ပျက်လျှင် ကျပ် ၇၅၀၀ သာ ဖြတ်တောက်ရန်၊ ယခင် အနည်းဆုံးအခကြေးငွေထက် ပိုပေးထားသော ၀န်ထမ်းများအား ယခင် ခံစားခွင့်အတိုင်း ပြန်လည် ခံစားခွင့်ပေးရန်၊ Warehouse Department မှ ၀န်ထမ်းများအား အခြားဝန်ထမ်းများနှင့် တန်းတူအခွင့်အရေး ပေးရန်၊ တောင်းဆိုမှု ပြုလုပ်နေသော ၀န်ထမ်းများအား ခွဲခြားဆက်ဆံခြင်း၊ ဖိအားပေးခြင်း၊ အလုပ်မှထုတ်ခြင်း မပြု လုပ်ရန်၊ စက်ရုံဝန်းအတွင်း စက်ဘီး၊ ဆိုင်ကယ်များထားရန် နေရာပြုလုပ်ပေးရန် စသည်တို့ဖြစ်ကြောင်း သိရသည်။

အနည်းဆုံးလုပ်ခ ကျပ် ၄၈၀၀ အား သမ္မတက မေလအတွင်း အတည်ပြုလက်မှတ် ထိုးပေးရန်ရှိကြောင်း ပြည်ထောင်စုဝန်ကြီး ပြောကြား

အနည်းဆုံး လုပ်ခလစာ ကျပ် ၄၈၀၀ အား သမ္မတက မေလအတွင်း အတည်ပြုလက်မှတ် ထိုးပေးရန်ရှိကြောင်း အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ၀န်ကြီးဌာနက စုံစမ်းသိရှိရသည်။

အနည်းဆုံး လုပ်ခလစာအား တစ်နာရီလျှင် ကျပ် ၆၀၀၊ တစ်ရက်လျှင် ကျပ် ၄၈၀၀ အဖြစ် အဆိုပြုနှုန်းထား ထွက်ရှိခဲ့သည်မှာ ကြာမြင့်နေပြီ ဖြစ်သော်လည်း လက်ရှိအချိန်ထိ သမ္မတက အတည်ပြုလက်မှတ် ထိုးပေးခြင်း မရှိသေးပေ။

သမ္မတက အတည်ပြုလက်မှတ် ထိုးပေးခြင်း မရှိသေးသော်လည်း အချို့စက်ရုံ၊ အလုပ်ရုံများက အလုပ်သမားများကို အနည်းဆုံး လုပ်ခလစာ ကျပ် ၄၈၀၀ နှုန်းဖြင့် ပေးနေပြီ ဖြစ်သော်လည်း အချို့စက်ရုံ၊ အလုပ်ရုံများမှာ ကျပ် ၄၈၀၀ နှုန်းအတိုင်း လုပ်အားခပေးချေခြင်း မရှိသေးကြောင်း သိရသည်။

“အနည်းဆုံး အခကြေးငွေကို ၀န်ကြီး ဌာနအနေနဲ့ သမ္မတရုံးကို မတင်ဘူး ဆိုတာတွေက မဟုတ်ပါဘူး။ တင်ရမယ့် အစီအစဉ်က ကော်မတီတစ်ခုကို တင်ရတယ်။ အဲဒီကော်မတီက လာမည့်အပတ်မှာ အစည်းအဝေး ကျင်းပမယ်။ အဲ့ဒီမှာ တင်ပြီးရင် အစိုးရအဖွဲ့ ကက်ဘိနက်ကို တင်ရမယ်။ ကက်ဘိနက်ကို တင်ပြီးရင်တော့ အတည်ဖြစ်ပါတယ်။ သမ္မတကြီးရဲ့ မိန့်ခွန်းမှာလည်း ကျပ် ၄၈၀၀ သတ်မှတ်ထားတယ်လို့ ပြောထားတဲ့အတွက် ဒီဟာက မလွဲမသွေ အတည်ဖြစ်တဲ့ကိစ္စ ဖြစ်ပါတယ်” ဟု အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန ပြည်ထောင်စုဝန်ကြီး ဦးသိန်းဆွေက ဧပြီ ၂၈ ရက်တွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနနှင့် ILO တို့ ပူးပေါင်း ပြုလုပ်သော မြန်မာ့လုပ်ငန်းခွင် ဘေးအန္တရာယ် ကင်းရှင်းရေးနှင့် ကျန်းမာရေးနေ့ အခမ်းအနားတွင် မီဒီယာများ၏ မေးမြန်းမှုများကို ဖြေကြားရာတွင် ထည့်သွင်းပြောကြားသည်။

အနည်းဆုံး လုပ်ခလစာ တစ်ရက် ကျပ် ၄၈၀၀ ကို မေလအတွင်း အလုပ်သမားများ အကျိုးခံစားခွင့် ရရှိနိုင်ကြောင်းကို အလုပ်သမား ၀န်ကြီးဌာန အမြဲတမ်း အတွင်းဝန် ဦးမျိုးအောင်က “အနည်းဆုံး အခကြေးငွေကို မေလထဲမှာ သမ္မတက အတည်ပြုလက်မှတ် ထိုးပေးဖို့ ရှိနိုင်တယ်။ မကြာခင်မှာ အစည်းအဝေးတစ်ခု ပြီးတာနဲ့ အတည်ပြု ဖြစ်ပါတယ်” ဟု ဧပြီ ၃၀ ရက်တွင် ပြောကြားသည်။

အနည်းဆုံး အခကြေးငွေ သတ်မှတ်ချက်ကို ၂၀၁၅ ခုနှစ်တွင် အစိုးရက တစ်နာရီလျှင်၄၅၀ကျပ်၊ တစ်ရက် ၃၆၀၀ ကျပ်အဖြစ် ပထမအကြိမ် သတ်မှတ်ခဲ့သည်။ ယခုထွက်ရှိမည့် ဒုတိယအကြိမ် အနည်းဆုံး အခကြေးငွေ သတ်မှတ်ချက်တစ်ရက် ကျပ် ၄၈၀၀ နှင့် လုပ်သား ၁၀ ဦးနှင့် အထက်လုပ်ငန်းများတွင် အနည်းဆုံး အခကြေးငွေ နှုန်းထားအတိုင်း လစာပေးချေရမည်ဟု မတ် ၅ ရက်တွင် အနည်းဆုံး အခကြေးငွေ သတ်မှတ်ရေး ကော်မတီက သတ်မှတ်ခဲ့ပြီး သမ္မတက ယင်းသတ်မှတ်ချက်ကို လက်မှတ်ရေးထိုး၍ အတည်ပြုရန်သာ လိုတော့ခြင်းဖြစ်သည်။

အဆိုပါ တစ်ရက်လုပ်ခကြေးငွေ ပြန်လည်ပြင်ဆင် သတ်မှတ်နိုင်ရန်အတွက် တနိုင်ငံလုံးရှိ အလုပ်သမား အဖွဲ့အစည်းများ၊ အလုပ်ရှင်များ၊ အစိုးရတို့ ညှိနှိုင်းဆွေးနွေးခဲ့ကြောင်း သိရပြီး ယင်းကဲ့သို့ သတ်မှတ်ခဲ့ခြင်း ဖြစ်ကြောင်း သိရသည်။

 

အနည်းဆုံးအခကြေးငွေ ကျပ် ၄၈၀၀ သတ်မှတ်မှုမှာ ယခင် ကျပ် ၃၆၀၀ သတ်မှတ်စဉ်ကဖြစ်ပေါ်ခဲ့သည့် နိုင်ငံခြားငွေလဲနှုန်းအတိုင်းသာ ဖြစ်ကြောင်းနှင့် နိုင်ငံ့ဝန်ထမ်းများကို အချိုးကျတိုးပေးရန် အစိုးရတွင် အခက်အခဲကြုံနေကြောင်း ပြည်ထောင်စုဝန်ကြီး ပြောကြား

အနည်းဆုံးအခကြေးငွေ ကျပ် ၄၈၀၀ သတ်မှတ်မှုမှာ ယခင် ၂၀၁၅ ခုနှစ် ကျပ် ၃၆၀၀ သတ်မှတ်စဉ်က ဖြစ်ပေါ်ခဲ့သည့် နိုင်ငံခြားငွေလဲနှုန်း ပမာဏခန့်သာဖြစ်ကြောင်း၊ ပုဂ္ဂလိက၀န်ထမ်းများကို အနိမ့်ဆုံးလုပ်ခလစာ တိုးမြှင့်မှုကြောင့် နိုင်ငံ့ဝန်ထမ်းများကို အချိုးကျလစာတိုးပေးရမည့် အခြေအနေ ဖြစ်နေသော်လည်း အစိုးရတွင် ဘတ်ဂျက်လိုငွေများနေခြင်းနှင့် အချိုးကျတိုးပေးရန် အစိုးရတွင် အခက်အခဲကြုံနေရကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ဒီဇင်ဘာ ၃၀ ရက်တွင် ပြောကြားသည်။

အနည်းဆုံးအခကြေးငွေ သတ်မှတ်မှုကို နှစ်နှစ်တစ်ကြိမ်ပြင်ဆင်ရန် သတ်မှတ်ရာတွင် ၂၀၁၅ ခုနှစ်က ကျပ် ၃၆၀၀ သတ်မှတ်ခဲ့ပြီး ၂၀၁၇ ခုနှစ် ဒီဇင်ဘာ ၂၉ ရက်တွင် ကျပ် ၄၈၀၀ သတ်မှတ်ခဲ့ကြောင်း ဦးသိန်းဆွေက ပြောကြားသည်။

လက်ရှိ လုပ်ခလစာ တိုးမြှင့်မှုတွင် အလုပ်ရှင်များဘက်မှ ကျပ် ၄၀၀၀၊ အလုပ်သမားများဘက်မှ ကျပ် ၅၆၀၀ နှင့် အလုပ်သမား အဖွဲ့အစည်းတစ်ခုက ကျပ် ၆၅၀၀ အထိ တင်ပြခဲ့ကြောင်း၊ မြန်မာနိုင်ငံ၏ လက်ရှိအနည်းဆုံးအခကြေးငွေမှာ လာအိုနိုင်ငံထက် ပင်နည်းပါးနေသည့် အခြေအနေတွင်  အနည်း ဆုံးအခကြေးငွေသတ်မှတ်ရေးဆိုင်ရာ အမျိုးသားကော်မတီအနေဖြင့် ဘက်စုံချိန်ထိုးဆုံးဖြတ်၍ကျပ် ၄၈၀၀ သတ်မှတ်ခဲ့ခြင်းဖြစ်ကြောင်း ဦးသိန်းဆွေက ပြောကြားသည်။

“ပုဂ္ဂလိက၀န်ထမ်းတွေကို လစာတိုးပေးမယ်ဆိုရင် ကျွန်တော်တို့ အစိုးရ၀န်ထမ်းတွေမှာလည်း အထိအခိုက်ရှိပါလိမ့်မယ်။ ဒါကိုလည်း ကျွန်တော်တို့ အသေးစိတ်စဉ်းစားရပါတယ်။ လက်ရှိအနေအထားမှာ ၃၆၀၀ ပေးတယ်ဆိုရာမှာ ကျွန်တော်တို့ ၀န်ထမ်းတွေက ၄၀၀၀ လောက် ပေးထားတာ ဖြစ်ပါတယ်။ သူတို့ကို တိုးပေးမယ်ဆိုရင် ကျွန်တော်တို့ ၀န်ထမ်းတွေကိုလည်း အချိုးညီစွာ တိုးပေးရပါမယ်။ တိုးပေးဖို့လည်း ကျွန်တော်တို့အစိုးရမှာလည်း လိုငွေပြဘတ်ဂျက် ဖြစ်နေပါတယ်။ တိုးပေးဖို့လည်း အခက်အခဲတွေ ရှိပါတယ်။ နိုင်ငံတော်၏အတိုင်ပင်ခံပုဂ္ဂိုလ်ကလည်း လစာတိုးပေးဖို့ မရှိသေးဘူး။ သူတို့ရဲ့ Facility ပဲ တိုးဖို့ရှိပါတယ်လို့ ပြောထားပါတယ်။ ကျွန်တော်တို့အစိုးရမှာ တိုးပေးဖို့ အခက်အခဲတွေရှိနေပေမယ့် ကျွန်တော်တို့ ပြန်ပြီးတော့ စဉ်းစားတဲ့အခါမှာ လက်ရှိ ကုန်ဈေးနှုန်း၊ အိမ်နီးချင်းနိုင်ငံတွေရဲ့ လုပ်ခလစာ၊ ငွေဖောင်းပွမှုနှုန်း၊ နိုင်ငံခြားငွေလဲနှုန်း စသည်ဖြင့် ချိန်ထိုးပြီး စဉ်းစားပါတယ်။  ဥပမာအားဖြင့် လာအိုနိုင်ငံဆိုရင် ကျွန်တော်တို့ အနည်းဆုံးလုပ်ခများသလို အလုပ်ချိန်မှာလည်း တစ်ရက် ရှစ်နာရီတောင် မပြည့်တာ ရှိပါတယ်။ သူ့ရဲ့ရုံးပိတ်ရက်တွေကလည်း နည်းပါးတာ သဘောပေါက်ပါတယ်။ သတ်မှတ်တဲ့ အနေအထားလေးက ဘာလဲဆိုရင် မူလသတ်မှတ်ခဲ့တဲ့ ၂၀၁၅ ခုနှစ်တုန်းက နိုင်ငံခြားငွေလဲနှုန်းမှာ နှစ်ဒေါ်လာဝန်းကျင် ရှိနေပြီးတော့ အဲဒီအချိန်မှာ သူများတွေက သုံးဒေါ်လာလောက် ဖြစ်နေပါတယ်။ အစစအရာရာ ချိန်ထိုးပြီးတော့ ကျွန်တော်တို့ သတ်မှတ်ရာမှာ ၂၀၁၅ ခုနှစ်တုန်းက နိုင်ငံခြားငွေလဲနှုန်းက တစ်ဒေါ်လာကို ကျပ် ၁၀၀၀ ၀န်းကျင်ပဲရှိပြီး လက်ရှိကာလမှာ ကျပ် ၁၃၅၀ ၀န်းကျင်ပါ။ လက်ရှိ ၄၈၀၀ ကို ကျွန်တော်တို့ က ပြန်တွက်တဲ့အခါကျတော့ နိုင်ငံခြားငွေလဲနှုန်း များလာတဲ့အတိုင်းပဲ ဖြစ်ပါတယ်” ဟု ပြည်ထောင်စုဝန်ကြီးက ပြောကြားသည်။

လက်ရှိ အနည်းဆုံးအခကြေးငွေကို ကျပ် ၄၀၀၀ မှ ကျပ် ၄၈၀၀ အကြား သတ်မှတ်ရန်တင်ပြသည့် ပြည်နယ်နှင့် တိုင်းဒေသကြီး ခုနစ်ခု၊ ကျပ် ၄၈၀၀ သတ်မှတ်ရန် တောင်းဆိုသည့် ပြည်နယ်နှင့် တိုင်းဒေသကြီးခြောက်ခုနှင့် ကျပ် ၄၈၀၀ နှင့် ကျပ် ၅၂၀၀ အကြား သတ်မှတ်ရန်အဆိုပြုသည့် တိုင်းဒေသကြီးတစ်ခုနှင့် မန္တလေးတိုင်းဒေသကြီးမှာ ကျပ် ၄၃၀၀ မှ ကျပ် ၆၃၀၀ အကြားသတ်မှတ်ရန် တင်ပြခဲ့ကြောင်း၊ လက်ရှိ ကျပ် ၄၈၀၀ သတ် မှတ်မှုကို ရက်ပေါင်း ၆၀ အတွင်း ကန့်ကွက်နိုင်ပြီး ကန့်ကွက်မှုများကို အလေးထားစဉ်းစားပေးမည်ဖြစ်ကြောင်း ဦးသိန်းဆွေက ဆိုသည်။

“ရက်ပေါင်း ၆၀ အတွင်းမှာ ကန့်ကွက်မှုမရှိရင် အစိုးရအဖွဲ့ကို တင်ပြပြီးတော့ အတည်ပြုသွားမယ်” ဟု ၎င်းက ပြောကြားသည်။

လက်ရှိတွင် အလုပ်ရှင်များက အဆိုပါ ကျပ် ၄၈၀၀ ကို များသည်ဟု ယူဆနေသကဲ့သို့ အလုပ်သမားများမှာလည်း နည်းသည်ဟု ထင်မြင်နေသည်။ အလုပ်ရှင်များအနေဖြင့် များသည်ဟု ထင်မြင်နေသော်လည်း လက်ရှိ အာဆီယံတွင် အနည်းဆုံးလုပ်အားခသတ်မှတ်မှုများတွင် မြန်မာနိုင်ငံမှာ အနည်းဆုံး၌ပင်ရှိနေပြီး လက်ရှိတိုးမြှင့်သည့် ပမာဏမှာပင် ၃ ဒသမ ၅၃ ဒေါ်လာခန့်သာရှိနေရာ လာအိုနိုင်ငံမှာ တစ်ရက်လုပ်ခလစာ ၃ ဒသမ ၆၈ ဒေါ်လာ၊ ကမ္ဘောဒီးယားနိုင်ငံမှာ ၄ ဒသမ ၆၇ ဒေါ်လာ၊ အင်ဒို နီးရှားနိုင်ငံမှာ ၃ ဒသမ ၃၃ ဒေါ်လာနှင့် ၈ ဒသမ ၃၅ ဒေါ်လာအကြား၊ ဗီယက်နမ်နိုင်ငံ မှာ ၄ ဒသမ ၉၂ ဒေါ်လာမှ ၅ ဒသမ ၅၅ ဒေါ်လာအကြား၊  မလေးရှားနိုင်ငံမှာ ၇ ဒသမ ၂၇  ဒေါ်လာမှ ၇ ဒသမ ၉၀ ဒေါ်လာအကြား ရှိနေကြောင်း ILO ၏ စာရင်းများအရ သိရသည်။

အနည်းဆုံး အခကြေးငွေ တစ်ရက် ကျပ် ၄၈၀၀ သည် အခြေခံအလုပ်သမား တစ်ယောက်၏ တစ်နေ့တာ ကုန်ကျစရိတ်ကို လုံလောက်စေမည် မဟုတ်သဖြင့် ကန့်ကွက်ကြောင်း (MICS-TUsF) ထုတ်ပြန်

အနည်းဆုံး အခကြေးငွေ တစ်ရက် ကျပ် ၅၆၀၀ ရရှိရေး အထည်ချုပ်စက်ရုံ အလုပ်သမားများ ဆန္ဒထုတ်ဖော်နေသည်ကို ယခုလပိုင်းအတွင်း တွေ့ရစဉ် (ဓာတ်ပုံ – ကြည်နိုင်)

အနည်းဆုံး လုပ်ခလစာ သတ်မှတ်ရေးဆိုင်ရာ အမျိုးသားကော်မတီ အစည်းအဝေး ဆုံးဖြတ်ချက်အရ အနည်းဆုံးအခကြေးငွေ အဆိုပြုနှုန်းထား တစ်ရက် ကျပ် ၄၈၀၀ သည် အခြေခံအလုပ်သမား တစ်ယောက်၏ တစ်ရက်တာ ကုန်ကျစရိတ်ကို လုံလောက်စေမည် မဟုတ်သဖြင့် ယင်းနှုန်းထားအား ကန့်ကွက်ကြောင်း မြန်မာနိုင်ငံ စက်မှုလက်မှုနှင့် ၀န်ဆောင်မှု လုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) က ဒီဇင်ဘာ ၃၀ ရက်တွင် သတင်းထုတ်ပြန်သည်။

သတင်းထုတ်ပြန်ချက်တွင် မြန်မာနိုင်ငံရှိ အလုပ်သမားများသည် နည်းပါးသော လုပ်ခလစာဖြင့် အသက်မွေးဝမ်းကျောင်း ပြုနေရပြီး ယခုသတ်မှတ်သော ကျပ် ၄၈၀၀ သည် အခြေခံအလုပ်သမားများအတွက် လုံလောက်မှု မရှိသော နှုန်းထားဖြစ်ပြီး ကောက်ယူရရှိသော ကုန်ကျစရိတ် စစ်တမ်းများအရ အခြေခံအလုပ်သမား တစ်ယောက်၏ တစ်ရက်တာ ကုန်ကျစရိတ်ကိုပင် လုံလောက်စေမည် မဟုတ်သဖြင့် အဆိုပါနှုန်းထားကို ကန့်ကွက်ကြောင်း ဖော်ပြထားသည်။

အနည်းဆုံး အခကြေးငွေ နည်းဥပဒေ အခန်း(၅) ပုဒ်မ (၁၉) အရ အလုပ်သမားငါးဦးအထက် လုပ်ငန်းများ အကျုံးဝင်သည်ဟု အတိအကျပြဋ္ဌာန်းထားသော်လည်း အနည်းဆုံးလုပ်ခလစာ သတ်မှတ်ရေးဆိုင်ရာ အမျိုးသားကော်မတီ စတုတ္ထအကြိမ် အစည်းအဝေးမှ အလုပ်သမား ၁၀ ဦးအထက် အကျုံးဝင်ကြောင်း ဆုံးဖြတ်သည်ဟု သိရှိရသဖြင့် ဥပဒေနှင့်အညီ မလုပ်ဆောင်သော အမျိုးသားကော်မတီအား ကန့်ကွက်ရှုတ်ချကြောင်း သတင်းထုတ်ပြန်ချက်တွင် ဆက်လက် ဖော်ပြထားသည်။

အနည်းဆုံး အခကြေးငွေ နည်းဥပဒေ ပုဒ်မ (၃၇) အရ မြန်မာနိုင်ငံ စက်မှုလက်မှုနှင့် ၀န်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) သည် စတုတ္ထအကြိမ် အမျိုးသားကော်မတီ ဆုံးဖြတ်ချက်များအား အပြင်းအထန် ကန့်ကွက်ပါကြောင်း သဘောထားထုတ်ပြန်ချက်တွင် ဖော်ပြထားသည်ကို တွေ့ရသည်။

“အမျိုးသားကော်မတီက ၄၈၀၀ သတ်မှတ်ထားတယ်။ ကျွန်တော်တို့ ကောက်ယူထားတဲ့ စစ်တမ်းတွေအရ အနည်းဆုံး လုပ်ခလစာသည် တစ်ရက်ကို ၅၆၀၀ လောက်ရမှ အလုပ်သမားတွေရဲ့ တစ်ရက်တာ ကုန်ကျစရိတ်ကိုပြေလည်စေမှာ ဖြစ်ပါတယ်။ အဲဒါကြောင့် အမျိုးသားကော်မတီက ထုတ်ပြန်လိုက်တဲ့ ၄၈၀၀ နှုန်းထားကို ကန့်ကွက်တာ ဖြစ်ပါတယ်”ဟု မြန်မာနိုင်ငံ စက်မှုလက်မှုနှင့် ၀န်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ်မှ အထွေထွေအတွင်းရေးမှူး ဦးသက်နှင်းအောင်က ပြောကြားသည်။

ဒီဇင်ဘာ ၂၉ ရက်တွင် နေပြည်တော်ရှိ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတွင် အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီ၏ စတုတ္ထအကြိမ်မြောက် အစည်းအဝေးကို ပြုလုပ်ခဲ့သည်။
ယင်းအစည်းအဝေး ဆုံးဖြတ်ချက်အရ အနည်းဆုံး အခကြေးငွေ အဆိုပြုနှုန်းထားမှာ တစ်ရက်လျှင် ကျပ် ၄၈၀၀ ဖြစ်ပြီး အလုပ်သမား ၁၀ ဦးနှင့်အထက် လုပ်ငန်းများတွင် အကျုံးဝင်သည်ဟု သတ်မှတ်ခဲ့သည်။ အဆိုပါဆုံးဖြတ်ချက်ကို ကန့်ကွက်လိုပါက ရက်ပေါင်း ၆၀ အတွင်း အမျိုးသားကော်မတီသို့ ကန့်ကွက်လွှာပေးပို့နိုင်ကြောင်း သိရသည်။

အနည်းဆုံး အခကြေးငွေ ပြန်လည်သတ်မှတ်ရေးနှင့် ပတ်သက်ပြီး ညှိနှိုင်းဆွေးနွေးသည့် ကာလအတွင်းကလည်း အလုပ်သမားအစုအဖွဲ့များကလည်း အနည်းဆုံး လုပ်ခလစာ တစ်ရက်လျှင် ကျပ် ၅၆၀၀ ရရှိရန် ဆန္ဒထုတ်ဖော် တောင်းဆိုမှုများ ပြုလုပ်ခဲ့သည်။

အနည်းဆုံး အခကြေးငွေကို ဒီဇင်ဘာလကုန်တွင် ထုတ်ပြန် ကြေညာပေးမည်ဟု ဆို

အနည်းဆုံးလုပ်ခ တစ်ရက်လျှင် ကျပ် ၅၆၀၀ သတ်မှတ်ပေးရန် အလုပ်သမားများက နိုဝင်ဘာလအတွင်းက ဆန္ဒထုတ်ဖော် တောင်းဆိုစဉ် (ဓာတ်ပုံ- ကြည်နိုင်)

အလုပ်ရှင်နှင့် အလုပ်သမားများ အငြင်းပွားနေသည့် အနည်းဆုံး အခကြေးငွေနှင့် ပတ်သက်၍ ဒီဇင်ဘာလကုန်တွင် ထုတ်ပြန်ကြေညာမည်ဟု မျှော်မှန်းထားကြောင်း အနည်းဆုံးအခကြေးငွေနှင့် အလုပ်သမားအခွင့်အရေးဆိုင်ရာ ပူးပေါင်းဆောင်ရွက်ရေးကော်မတီဝင် ကိုနန္ဒာစစ်အောင်က ဒီဇင်ဘာ ၂၅ ရက်တွင် The Daily Eleven သတင်းစာသို့ ပြောကြားသည်။

“မနေ့က အလုပ်ရုံဆွေးနွေးပွဲမှာ လုပ်ငန်းရှင်တွေရော၊ အလုပ်သမား ကိုယ်စားလှယ်တွေရော၊ ၀န်ကြီးဌာနဘက်ကရော တွေ့ဆုံဆွေးနွေးကြတယ်။ ဒီဇင်ဘာလကုန်လောက်မှာ အနည်းဆုံး အခကြေးငွေနဲ့ပတ်သက်ပြီး အဆိုပြုနှုန်းထား တစ်ခု ထွက်လာအောင် ကြိုးစားပေးမယ်လို့တော့ ပြည်ထောင်စုဝန်ကြီး ဦးသိန်းဆွေကတော့ ပြောသွားတယ်။ အဲဒီအချိန်လောက်မှာ အနည်းဆုံးအခကြေးငွေနဲ့ ပတ်သက်ပြီး နှုန်းထားတစ်ခု ထွက်လာဖို့ မျှော်မှန်းထားပါတယ်”ဟု အနည်းဆုံး အခကြေးငွေနှင့် အလုပ်သမားအခွင့်အရေးဆိုင်ရာ ပူးပေါင်းဆောင်ရွက်ရေးကော်မတီဝင် ကိုနန္ဒာစစ်အောင်က ပြောကြားသည်။

ဒီဇင်ဘာ ၂၃ ရက်က အနည်းဆုံးအခကြေးငွေ ပြင်ဆင်သတ်မှတ်ပေးရေးအတွက် ရန်ကုန်မြို့ ချက်ထရီယန်ဟိုတယ်၌ အနည်းဆုံးအခကြေးငွေ ပြင်ဆင်သတ်မှတ်နိုင်ရေး အလုပ်ရုံဆွေးနွေးပွဲ ပြုလုပ်ခဲ့ပြီး အဆိုပါဆွေးနွေးပွဲတွင် အစိုးရ၊ အလုပ်ရှင်၊ အလုပ်သမား သုံးပွင့်ဆိုင်နှင့် အခြားအဖွဲ့အစည်းများ ဆွေးနွေးညှိနှိုင်းခဲ့ကြောင်း သိရသည်။

အနည်းဆုံး အခကြေးငွေနှင့် ပတ်သက်၍ မျှတသည့်နှုန်းထားတစ်ခု ပေါ်လာရန်လိုအပ်ပြီး လုပ်ငန်းရှင်များ၏ အကျိုးအမြတ်ကို ကြည့်၍ သင့်တင့်သည့်နှုန်းထားကို သတ်မှတ်ရန် လိုအပ်ကြောင်း ကိုနန္ဒာစစ်အောင်က ဆက်လက်ပြောကြားသည်။

နေထိုင်စားသောက်ရေး ကျပ်တည်းသဖြင့် တစ်နေ့လျှင် အနည်းဆုံး အခကြေးငွေ ကျပ် ၅၆၀၀ ထက်မနည်း အမြန်ဆုံး သတ်မှတ်ပေးရန် လှိုင်သာယာမြို့နယ်တွင် အလုပ်သမား ထောင်နှင့်ချီ၍ ဆန္ဒထုတ်ဖော်

တစ်နေ့လုပ်ခ ကျပ် ၅၆၀၀ သတ်မှတ်ရေး စက်ရုံပေါင်းစုံမှ အလုပ်သမားများ လှိုင်သာယာမြို့နယ်အတွင်း ဒီဇင်ဘာ ၃ ရက်က ဆန္ဒထုတ်ဖော်စဉ် (ဓာတ်ပုံ-ကြည်နိုင်)

ကုန်ဈေးနှုန်းများ မြင့်မားနေမှုနှင့်အတူ နေထိုင်စားသောက်ရေး ကျပ်တည်းနေသဖြင့် တစ်နေ့လျှင် အနည်းဆုံး အခကြေးငွေ ကျပ် ၅၆၀၀ ထက်မနည်း အမြန်ဆုံး သတ်မှတ်ပေးရေးအတွက် ဒီဇင်ဘာ ၃ ရက် နံနက် ၉ နာရီ တွင် လှိုင်သာယာမြို့နယ်၌ အလုပ်သမား ထောင်နှင့်ချီ၍ ဆန္ဒထုတ်ဖော်ခဲ့ကြသည်။

ထိုသို့ဆန္ဒထုတ်ဖော်မှုကို အနည်းဆုံး အခကြေးငွေနှင့် အလုပ်သမား အခွင့်အရေးဆိုင်ရာ ပူးပေါင်းဆောင်ရွက်ရေး ကော်မတီမှ ဦးဆောင်၍ ရန်ကုန်တိုင်းဒေသကြီး အတွင်းမှ ရွှေပြည်သာမြို့နယ်၊ မင်္ဂလာဒုံမြို့နယ်၊ လှိုင်သာယာမြို့နယ်၊ တောင်ဒဂုံမြို့နယ်၊ ဒဂုံဆိပ်ကမ်းမြို့နယ်၊ သန်လျင်မြို့နယ်၊ လှိုင်မြို့နယ်၊ မှော်ဘီမြို့နယ်၊ လှည်းကူးမြို့နယ်နှင့် ပဲခူးမြို့၊ သာယာဝတီမြို့၊ ဆွာမြို့ စသည်တို့မှ အလုပ်သမားများက တစ်နေ့လျှင် အနည်းဆုံး အခကြေးငွေ ကျပ် ၅၆၀၀ ထက်မနည်း အမြန်ဆုံး သတ်မှတ်ရေးအတွက် ဆန္ဒထုတ်ဖော် ခဲ့ကြကြောင်း သိရသည်။

“အဓိက,ကတော့ အလုပ်သမားတွေအတွက် တစ်နေ့ကို ကျပ် ၅၆၀၀ ထက်မနည်း ရရှိရေးအတွက် ဆန္ဒထုတ်ဖော်တာပါ။ အနည်းဆုံး အလုပ်ခကြေးငွေ ဥပဒေက နှစ်နှစ်တစ်ခါ ပြင်ရတာပေါ့။ အခုက နှစ်နှစ်ကျော်သွားပြီ။ မပြင်နိုင်သေးဘူး။ အနည်းဆုံး လုပ်ခကြေးငွေ သတ်မှတ်ရေးကော်မတီ ဆိုတာရှိတယ်။ အလုပ်သမားသမဂ္ဂ ကိုယ်စားလှယ်တွေနဲ့ ရေးဆွဲထားတာပါ။ အဲဒီကော်မတီကနေ နှုန်းထားတွေကို သုတေသန လုပ်ကြတာပါ။ သုတေသနရလဒ် မထွက်သေးခင်မှာကို အလုပ်သမား ၀န်ကြီးဌာနကနေ ၄၄၀၀ နဲ့ ၄၈၀၀ ကြား လျာထားတယ်ဆိုတဲ့ကိစ္စ ပေါ်လာတယ်။ အဲဒီအတွက် ကျွန်တော်တို့က ၅၆၀၀ တောင်းတယ်။ အရင်တုန်းက ၃၆၀၀ သတ်မှတ်တုန်းက သုံးဒေါ်လာနဲ့ သတ်မှတ်ထားတာပါ။ သုံးဒေါ်လာကို ၁၂၀၀ သတ်မှတ်လို့ ၃၆၀၀ ဖြစ်တာပါ။ အခုချိန်မှာ ဒေါ်လာဈေးက ၁၃၅၀ ဖြစ်နေတယ်။ သုံးဒေါ်လာနဲ့ပြောရင်တောင် ၄၀၈၀ လောက်ရှိတယ်။ ကမ္ဘောဒီးယားလို နိုင်ငံမှာတောင် ခြောက်ဒေါ်လာ ဖြစ်နေပြီ။ အဲဒီအတွက် မြန်မာနိုင်ငံမှာ ၅၆၀၀ ရရှိရေးအတွက် တောင်းဆိုတာပါ။ အလုပ်သမားတစ်ယောက် အတွက်ကတော့ တစ်နေ့ကို ၅၆၀၀ ကျော်ရမှကို ရပ်တည်ဖို့အတွက် ဖြစ်နိုင်ပါတယ်” ဟု အနည်းဆုံး အခကြေးငွေနှင့် အလုပ်သမား အခွင့်အရေးဆိုင်ရာ ပူးပေါင်းဆောင်ရွက်ရေး ကော်မတီအဖွဲ့ဝင် ကိုနန္ဒာစစ်အောင်က ပြောကြားသည်။

အလုပ်သမားများ လမ်းလျှောက်ဆန္ဒထုတ်ဖော်မှုကို လှိုင်သာယာမြို့နယ် ရန်ကုန်-ပုသိမ်လမ်း မီးခွက်ဈေး အောက်ထပ်မှ တပင်ရွှေထီးလမ်းအတိုင်း လှိုင်သာယာမြို့နယ်အား ကစားကွင်းအထိ လမ်းလျှောက်ဆန္ဒ ထုတ်ဖော်ခဲ့ပြီး ‘အနည်းဆုံးအခကြေးငွေ တစ်ရက်လျှင် ၅၆၀၀ ကျပ်ထက်မနည်း အမြန်ဆုံးသတ်မှတ်ရေး ဒို့အရေး’ စာသားပါ ဗီနိုင်းများကို ကိုင်ဆောင်၍ ကြွေးကြော်လမ်းလျှောက် ဆန္ဒထုတ်ဖော်ခဲ့ကြောင်း သိရသည်။

“ဒီဆန္ဒထုတ်ဖော်ပွဲမှာ ပါဝင်ရတာက ကိုယ်ကိုယ်တိုင်လည်း အလုပ်သမားဖြစ်တယ်။ အလုပ်လုပ်နေရတဲ့သူလည်း ဖြစ်ပြီးတော့ မြန်မာနိုင်ငံ တစ်ခုလုံးက အလုပ်သမားတွေနဲ့ ထပ်တူဖြစ်တဲ့အတွက် ဆန္ဒထုတ်ဖော်ပွဲမှာ ပါဝင်ဖြစ်တာပါ။ မပြေလည်မှုတွေဆိုရင် ကုန်ဈေးနှုန်းက အဆမတန် တက်နေတယ်။ နေရေးထိုင်ရေး အတွက်ကလည်း အဆောင်ခတွေ၊ မီးခတွေက အဆမတန် အရမ်းတက်လာတယ်။ အဲဒီအတွက် ကျွန်မတို့အတွက် မလုံလောက်ဘူး ဖြစ်နေတယ်။ ၀င်ငွေထွက်ငွေ မမျှဘူး။ ထွက်ငွေက များနေတယ်။ အဲဒီလို အခက်အခဲမျိုးတွေ ရှိပါတယ်။ ပြောရရင် ဒီမှာက နယ်ကလာလုပ်တဲ့ အလုပ်သမားတွေဆိုရင် တော်တော်များများ ဒုက္ခရောက်နေတဲ့သူတွေ ရှိတယ်။ အဲဒီအတွက် ၃၆၀၀ နဲ့ မလုံလောက်တဲ့အတွက် ၅၆၀၀ ရရှိရေးကို တောင်းဆိုရတာပါ” ဟု အလုပ်သမား မမြသက်မွန်က ပြောကြားသည်။

မြန်မာနိုင်ငံတွင် အနည်းဆုံးလုပ်ခ တစ်ရက်လျှင် ကျပ် ၃၆၀၀ ကို ၂၀၁၅ ခုနှစ် စက်တင်ဘာ ၁ ရက်က စတင်သတ်မှတ်ပေးခဲ့ပြီး အနည်းဆုံး အခကြေးငွေ သတ်မှတ်ရေး ဥပဒေပါ ပြဋ္ဌာန်းချက်တွင် နှစ်နှစ်လျှင် တစ်ကြိမ် ပြင်ဆင်သတ်မှတ်ပေးရန်တွင် ပြဋ္ဌာန်းထားကြောင်း သိရသည်။

“အနည်းဆုံး အခကြေးငွေ သတ်မှတ်ရေး ဥပဒေပါ ပြဋ္ဌာန်းချက်တွေကို ၀န်ကြီးဌာနရဲ့ ဆောင်ရွက်ချက်တွေဟာ မလေးစားရာ ရောက်နေတယ်။ ပုဒ်မ ၅ (ဇ) အရ နှစ်နှစ်လျှင် တစ်ကြိမ်၊ ပထမဆုံး ထုတ်ပြန်ထားတာက ၂၀၁၅ ခုနှစ် သြဂုတ် ၂၈ ရက် ထုတ်ပြန်ထားတယ်။ ၂၀၁၅ စက်တင်ဘာ ၁ ရက်မှ သက်ရောက်တယ်။ အခုက  နှစ်နှစ်တစ်ကြိမ်ကျော်ပြီး အတွင်းမှာ ၀န်ကြီးဌာနက ဥပဒေကို မလိုက်နာသလို ဖြစ်နေပြီ။ ၀န်ကြီးဌာနရဲ့ တရားဝင် ထုတ်ပြန်ချက်အရက မေလမှ ထုတ်ပြန်နိုင်မယ်ဆိုတော့ အလွန်ကြန့်ကြာနေပြီ။ ၀န်ကြီးကိုယ်တိုင်က လွှတ်တော်ကို တင်မယ်ပဲ ပြောနေတာ ဥပဒေမှာ မပါဘူး။ ဥပဒေမှာက အလုပ်သမား ၀န်ကြီးဌာနက ပြည်ထောင်စု အစိုးရအဖွဲ့ရဲ့ သဘောတူညီချက်နဲ့ ထုတ်ပြန်ရမှာ။ အဲဒီတော့ ၀န်ကြီးဌာနဘက်က ဥပဒေ မညီတာ များတဲ့အခါမှာ အလုပ်သမားတွေ ဘက်ကလည်း ဒါတွေဆောင်ရွက်တာ ဖြစ်လာတယ်။  လက်ရှိဝန်ကြီးဌာနရဲ့ လုပ်ဆောင်ချက်တွေဟာ ဥပဒေနဲ့မညီဘူး ဆိုတာကို ကျွန်တော် ပြောချင်ပါတယ်” ဟု အနည်းဆုံး အခကြေးငွေနှင့် အလုပ်သမား အခွင့်အရေးဆိုင်ရာ ပူးပေါင်းဆောင်ရွက်ရေး ကော်မတီဝင်ရှေ့နေ ဦးဌေးက ပြောကြားသည်။

ယခုကဲ့သို့ တစ်ရက်လျှင် ကျပ် ၅၆၀၀ ရရှိရေးအတွက် NLD အစိုးရလက်ထက်တွင် အလုပ်သမားများ ဆန္ဒထုတ်ဖော်မှု လေးကြိမ်ခန့် ပြုလုပ်ထားကြောင်း သိရပြီး ပြီးခဲ့သည့် သြဂုတ် ၁၃ ရက်ကလည်း  ကုန်ဈေးနှုန်းများ မြင့်မားနေသဖြင့် တစ်နေ့လျှင် အနည်းဆုံးအခကြေးငွေ ကျပ် ၅၆၀၀ အမြန်ဆုံး သတ်မှတ်ပေးရေး အပါအ၀င် အချက်ငါးချက် ရရှိရေးအတွက် လှိုင်သာယာမြို့နယ်တွင် အလုပ်သမား ၂၀၀၀ ခန့်က တောင်းဆို ဆန္ဒထုတ်ဖော်ခဲ့ကြသည်။

အလားတူ ပြီးခဲ့သည့်  နိုဝင်ဘာ ၂၄ ရက် ကလည်း အနည်းဆုံးအခကြေးငွေ တစ်ရက်လျှင် ကျပ် ၅၆၀၀ ထက်မနည်း အမြန်ဆုံးသတ်မှတ်ပေးရေး ကမ်ပိန်းလှုပ်ရှားမှုကို ရန်ကုန်တိုင်းဒေသကြီး အပါအ၀င် အခြားမြို့နယ် ၁၁ မြို့နယ်၌ တစ်ပြိုင်တည်း ပြုလုပ်ခဲ့ကြောင်း သိရသည်။

 

တစ်နိုင်ငံလုံးတွင် အလုပ်မခွဲခြားဘဲ အနိမ့်ဆုံး လုပ်ခလစာအား ကျပ် ၄၀၀၀ မှ ၄၈၀၀ ကြား သတ်မှတ်ရန် ဆုံးဖြတ်ခဲ့ပြီး တိုင်းနှင့်ပြည်နယ်တွင် ပြန်လည်ညှိနှိုင်းရန် ညွှန်ကြား

တစ်နိုင်ငံလုံးတွင် အလုပ်မခွဲခြားဘဲ အနိမ့်ဆုံးလုပ်ခလစာအား ကျပ် ၄၀၀၀ မှ ၄၈၀၀ ကြား အကြမ်းဖျင်းသတ်မှတ်ရန် အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီ၏ တတိယအကြိမ်ညှိနှိုင်း အစည်းအဝေးတွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန ပြည်ထောင်စုဝန်ကြီးက ဆုံးဖြတ်ခဲ့ကြောင်း သိရသည်။

ယင်းကဲ့သို့ သတ်မှတ်ထားသည့် အနိမ့်ဆုံးလုပ်ခလစာအား သက်ဆိုင်ရာတိုင်းနှင့် ပြည်နယ်အသီးသီးတွင် ပြန်လည်ညှိနှိုင်းရန် ပြည်ထောင်စုဝန်ကြီး ဦးသိန်းဆွေက ညွှန်ကြားခဲ့ကြောင်း သိရသည်။

“ဒီအစည်းအဝေးမှာကတော့ လာမယ့်အနည်းဆုံး လုပ်ခကြေးငွေကိုလည်း တိုင်းဒေသကြီးနဲ့ ပြည်နယ် မခွဲခြားတော့ဘူး။ အလုပ်လည်း မခွဲခြားတော့ဘူး။ ယခင်နှစ်ကလိုပဲ တစ်ပြေးညီသတ်မှတ်မယ်။ အရင်က ၃၆၀၀ သတ်မှတ်ထားတာပေါ့။ အဲဒီအတိုင်းပဲ တစ်ပြည်လုံးမှာ သတ်မှတ်ထားဖို့ ဆုံးဖြတ်ထားတယ်။ ကျွန်တော်ကတော့ ကြားချပေးပြီးတော့မှ ၄၀၀၀ ကနေ ၄၈၀၀ ကြားကို သတ်မှတ်ပေးမယ်။ ဒါကိုလည်း တိုင်းဒေသကြီးနဲ့ ပြည်နယ်မှာ ပြန်ပြီးတော့ နည်းနည်းလေးညှိလိုက်ပါ” ဟု ပြည်ထောင်စုဝန်ကြီးက ပြောကြားသည်။

ပြည်ထောင်စုနယ်မြေ အပါအ၀င် ပြည်နယ်နှင့် တိုင်းဒေသကြီးအသီးသီးမှ အဆိုပါအစည်းအဝေးတွင် တစ်ရက်အဆိုပြုနှုန်းထား တင်ပြခဲ့ရာ အနိမ့်ဆုံးလုပ်ခကြေးငွေအဖြစ် ကျပ် ၄၀၀၀ မှ အများဆုံးကျပ် ၆၄၀၀ အထိရှိပြီး အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးက အထက်ပါကဲ့သို့ ဈေးနှုန်းသတ်မှတ်ခဲ့ခြင်းဖြစ်သည်။

သတ်မှတ်ထားသည့် အနိမ့်ဆုံးလုပ်ခလစာ နှုန်းထားများအား သက်ဆိုင်ရာတိုင်းဒေသကြီး ပြည်နယ်များရှိ SME များ၊ Formal၊ Informal များ၊ စက်ရုံ၊ အလုပ်ရုံများနှင့် အထည်ချုပ်စက်ရုံများတွင် ဆက်လက်ဆွေးနွေး ညှိနှိုင်းရမည်ဖြစ်ပြီး လာမည့်ဒီဇင်ဘာလတွင် ကျင်းမည့်အစည်းအဝေးတွင် အနိမ့်ဆုံးလုပ်ခလစာ သတ်မှတ်မည်ဖြစ်ကြောင်း သိရသည်။

ထို့ပြင် ယခင်အလုပ်သမား ၁၅ ဦးအထက်ရှိသည့် လုပ်ငန်းများအား အနိမ့်ဆုံးလုပ်ခ သတ်မှတ်ခဲ့ခြင်းဖြစ်ပြီး လက်ရှိတွင် တိုင်းနှင့်ပြည်နယ်မှ တင်ပြရာတွင် ယခင်အတိုင်းထားရှိရန်နှင့် လူဦးရေမသတ်မှတ်ရန် တင်ပြမှုများရှိကြောင်း သိရသည်။

ပြည်ထောင်စုဝန်ကြီး ဦးသိန်းဆွေက “တိုင်းနဲ့ ပြည်နယ်က တင်ပြလာတာကတော့ သုံးလေးခုလောက်ရှိတယ်။ တချို့က ၁၀ ဦးသတ်မှတ်ပါ။ တချို့လည်း ငါးဦးသတ်မှတ်ပါ။ တချို့လည်း ဘာမှမသတ်မှတ်ပါနဲ့။ ဒါလေးကို ပြန်ညှိပေးပါလို့ ဒီအစည်းအဝေးက ဆုံးဖြတ်လိုက်ပါတယ်” ဟုပြောကြားသည်

 

အနိမ့်ဆုံး လုပ်ခလစာ ပြန်လည်သတ်မှတ်ရန် ရန်ကုန်တိုင်း စက်မှုဇုန်များအတွင်းရှိ အလုပ်သမားများအား စစ်တမ်းကောက်ယူခဲ့ရာ တစ်ရက် ကျပ် ၄၄၀၀ မှ ၆၄၀၀ အကြား ရရှိလို

အနိမ့်ဆုံး လုပ်ခ ကျပ် ၅၆၀၀ သတ်မှတ်ပေးရန် ၂၀၁၇ ခုနှစ် မတ်လတွင် လှိုင်သာယာမြို့နယ်အတွင်း အလုပ်သမားများ ဆန္ဒထုတ်ဖော်နေစဉ်

အနိမ့်ဆုံး လုပ်ခလစာ ပြန်လည်သတ်မှတ်ရန် ရန်ကုန်တိုင်းဒေသကြီး စက်မှုဇုန်များအတွင်းရှိ အလုပ်သမားများအား စစ်တမ်းကောက်ယူခဲ့ရာ တစ်ရက် ကျပ် ၄၄၀၀ မှ ၆၄၀၀ အကြား ရရှိလိုကြောင်း သိရသည်။

အနိမ့်ဆုံး လုပ်ခလစာ ပြန်လည်သတ်မှတ်ရန်အတွက် ရန်ကုန်တိုင်းဒေသကြီး အနည်းဆုံး အခကြေးငွေ သတ်မှတ်ရေး စာတမ်းကော်မတီမှ အဖွဲ့ခြောက်ဖွဲ့ခွဲကာ လှိုင်သာယာ၊ ရွှေပြည်သာ၊ တောင်ဒဂုံ၊ မြောက်ဥက္ကလာ၊ တောင်ဥက္ကလာ၊ ဒဂုံမြို့သစ် (အရှေ့ပိုင်း) နှင့် ဒဂုံမြို့သစ် (မြောက်ပိုင်း) စသည့် စက်မှုဇုန်များရှိ အလုပ်သမားများကို လုပ်သားထု အခြေခံကုန်ကျစရိတ်များအား သြဂုတ် ၂၉ ရက်က စတင်၍ ၁၀ ရက်ကြာ စစ်တမ်းကောက်ယူခဲ့ရာမှ အဆိုပါ တစ်ရက် ကျပ် ၄၄၀၀ မှ ကျပ် ၆၄၀၀ အကြား နှုန်းထားအား ရရှိခဲ့ခြင်း ဖြစ်သည်။

“နှုန်းထား တစ်ခုတည်းကို ဆုံးဖြတ်ပြီး ပြောခွင့်တော့ မရှိသေးဘူး။ အမျိုးသားအဆင့်ကို ဆက်တင်ရမှာလေ။ ရန်ကုန်တိုင်းအနေနဲ့ ဘယ်လောက်ကနေ ဘယ်လောက်ဆိုပြီး နှုန်းထားတော့ အတိအကျ ထွက်ပါပြီ။ အဲဒါကတော့ ၄၄၀၀ ကနေ ၆၄၀၀ ကြားထဲမှာ ရရှိတယ်။ ဒီနှုန်းထားက ရန်ကုန်တိုင်းမှာ စာရင်းကောက်ပြီး ရရှိတဲ့ အချက်အလက်တွေအရပေါ့။ အလုပ်သမားတွေကို စစ်တမ်းကောက်ယူပြီး ရရှိတဲ့ တစ်ရက်အနိမ့်ဆုံး လုပ်ခလစာ နှုန်းထားကို အမျိုးသားအဆင့်ကို အစောဆုံးက စက်တင်ဘာ နောက်ဆုံးအပတ်နဲ့ နည်းနည်းနောက်ကျမယ် ဆိုရင်တော့ အောက်တိုဘာ ပထမအပတ်လောက်မှာ တင်သွားဖို့ ရှိတယ်”ဟု ရန်ကုန်တိုင်း အနိမ့်ဆုံးလုပ်ခလစာ ပြန်လည်သတ်မှတ်ရေးကော်မတီမှ အလုပ်သမားကိုယ်စားလှယ် ဦးထွန်းဝေက ဆိုသည်။

ရန်ကုန်တိုင်းဒေသကြီး အနည်းဆုံး အခကြေးငွေ သတ်မှတ်ရေးစာတမ်းကော်မတီသည် လှိုင်သာယာ၊ ရွှေပြည်သာ၊ မြောက် ဥက္ကလာ၊ တောင်ဥက္ကလာ၊ တောင်ဒဂုံ၊ မြောက်ဒဂုံနှင့် ဒဂုံအရှေ့ စသည့် စက်မှုဇုန်များအတွင်း ရှိ စက်ရုံ၊ အလုပ်ရုံများမှ အလုပ်သမား ၄၀၀ အား လုပ်သားထု အခြေခံကုန်ကျစရိတ်စစ်တမ်း ကောက်ယူခဲ့ခြင်းဖြစ်ကြောင်း သိရသည်။

လက်ရှိတွင် တိုင်းဒေသကြီးနှင့် ပြည်နယ် ၁၄ ခုအပြင် နေပြည်တော်ကောင်စီတို့မှ အဆင့်အနိမ့်ဆုံး လုပ်ခလစာ ပြန်လည်သတ်မှတ်ရန်အတွက် သက်ဆိုင်ရာ တိုင်းဒေသကြီး နှင့် ပြည်နယ်အလိုက် အနိမ့်ဆုံးလုပ်ခလစာ နှုန်းထားများ ကောက်ယူပြီး အမျိုးသားအဆင့်ကို တင်ရမည်ဖြစ်သည်။

အမျိုးသားအဆင့်တွင် အလုပ်ရှင်နှင့် အလုပ်သမားတို့ နှစ်ဖက်အတွက် ဖြစ်နိုင်သည့် အနိမ့်ဆုံး လုပ်ခလစာနှုန်းထားတစ်ခုကို သတ်မှတ်မည်ဖြစ်ကြောင်း သိရသည်။

အမျိုးသားအဆင့်က သတ်မှတ်လိုက်သည့် ယင်းနှုန်းထားကို ပြည်ထောင်စုအဆင့်က အတည်ပြုပေးမည် ဖြစ်ကြောင်း သိရသည်။ ပြည်ထောင်စုအဆင့်က သတ်မှတ်လိုက်သည့် အနိမ့်ဆုံး လုပ်ခလစာနှုန်းကို အလုပ်ရှင် သို့မဟုတ် အလုပ်သမားများဘက်က ကျေနပ်မှုမရှိပါက ပြန်လည် ကန့်ကွက်နိုင်ကြောင်း သိရသည်။

၂၀၁၅ ခုနှစ်တွင် အနိမ့်ဆုံး လုပ်ခလစာကို တစ်ရက်လျှင် ကျပ် ၃၆၀၀ ဖြင့် သတ်မှတ်ခဲ့ပြီး နှစ်နှစ်အကြာတွင် တစ်ကြိမ် ပြန်လည်သုံးသပ်နိုင်သည် ဟူသော အနည်းဆုံးအခကြေးငွေ ဥပဒေအရ အလုပ်သမားများအား စစ်တမ်းများကောက်ယူ၍ မြန်မာနိုင်ငံ၏ ဒုတိယအကြိမ်မြောက် အနိမ့်ဆုံး လုပ်ခလစာနှုန်းထားကို ထပ်မံသတ်မှတ်ရန် လုပ်ဆောင်နေခြင်း ဖြစ်သည်။

လက်ရှိ သတ်မှတ်ထားသော အနိမ့်ဆုံး လုပ်ခလစာ ကျပ် ၃၆၀၀ ကို ကျေနပ်မှုမရှိသဖြင့် အလုပ်သမားများက လုပ်ခလစာ တိုးမြှင့်ပေးရန် ဆန္ဒထုတ်ဖော် တောင်းဆိုမှုများ ဖြစ်ပွားလျက် ရှိသည်။

၂၀၁၅ ခုနှစ်က အစိုးရသတ်မှတ်ထားသည့် အနိမ့်ဆုံး လုပ်ခလစာ တစ်ရက် ကျပ် ၃၆၀၀ သည် ကုန်ဈေးနှုန်းမြင့်တက်မှု၊ အိမ်ငှားစရိတ် မြင့်တက်မှု၊ အထွေထွေ ကုန်ကျစရိတ်မြင့်တက်မှု စသည်တို့ကြောင့် အလုပ်သမားများအတွက် လုံလောက်မှု မရှိတော့ကြောင်း သိရပြီး ဒုတိယအကြိမ်မြောက် ထပ်မံ သတ်မှတ်သည့် အနိမ့်ဆုံး လုပ်ခလစာအား တစ်ရက်လျှင် ကျပ် ၅၆၀၀ တိုးမြှင့်ပေးရန် အလုပ်သမားများ စုပေါင်း၍ ဆန္ဒထုတ်ဖော် တောင်းဆိုမှုများ ပြုလုပ်ခဲ့ဖူးသည်။