ထောက်ကြန်မြို့ ရဲစခန်းအနီးရှိ စားသောက်ဆိုင်၌ သံဃာတစ်ပါးကို ၀ိုင်းဝန်းရိုက်နှက်ခဲ့သည့် အမှုနှင့် ပတ်သက်၍ မင်္ဂလာဒုံမြို့နယ် တရားရုံးတွင် တရားလို ထောက်ကြန့်စခန်းမှူးအား စတင်စစ်ဆေး

ထောက်ကြန်မြို့ ရဲစခန်းအနီးရှိ စားသောက်ဆိုင်၌ သံဃာတစ်ပါးကို ၀ိုင်းဝန်းရိုက်နှက်ခဲ့သည့် အမှုနှင့် ပတ်သက်၍ မင်္ဂလာဒုံမြို့နယ် တရားရုံးတွင် တရားလို ထောက်ကြန့်စခန်းမှူးအား ဒီဇင်ဘာ ၂၉ ရက်က စတင်စစ်ဆေးခဲ့ကြောင်း မင်္ဂလာဒုံမြို့နယ် တရားရုံးမှ သိရသည်။

အဆိုပါ စားသောက်ဆိုင်တွင် သံဃာတစ်ပါးကို ၀ိုင်းဝန်းရိုက်နှက်ခဲ့သည့် အမှုအတွက် ဆိုင်ပိုင်ရှင် အပါအ၀င် နှစ်ဦးကို ပုဒ်မလေးခုဖြင့် မင်္ဂလာဒုံမြို့နယ်တရားရုံး၌ ဒီဇင်ဘာ ၁၅ ရက်က စတင်တရားစွဲဆို ခဲ့ခြင်းဖြစ်သည်။

ထောက်ကြန့်မြို့ ရဲစခန်းအနီးရှိ လမင်းသာ (၂) စားသောက်ဆိုင်တွင် နိုဝင်ဘာ ၂၈ ရက်က သံဃာတစ်ပါးကို ၀ိုင်းဝန်းရိုက်နှက်ခဲ့သည့် အမှုအတွက် ဆိုင်ပိုင်ရှင် ဦးအောင်မိုးနှင့် လက်ပံတန်းမြို့မှ မြင့်ကျော်ဆိုသူတို့ကို ပုဒ်မ ၂၉၄၊ ၂၉၅-က၊ ၃၂၃၊ ၄၀၃ တို့ဖြင့် ထောက်ကြန့်နယ်မြေရဲစခန်းမှ စခန်းမှူး ရဲအုပ်မြင့်လွင်က တရားလိုပြုလုပ် တရားစွဲဆိုထားခြင်း ဖြစ်ကြောင်း မင်္ဂလာဒုံမြို့နယ် တရားရုံးမှ တာဝန်ရှိသူ တစ်ဦးက ပြောကြားသည်။

သံဃာတစ်ပါးကို ၀ိုင်းဝန်းရိုက်နှက်ခဲ့သည့် အမှုအတွက် ဆိုင်ပိုင်ရှင် ဦးအောင်မိုးကို ဒီဇင်ဘာ ၃ ရက်က ဖမ်းဆီးခဲ့ပြီး မြင့်ကျော်ဆိုသူကို ဒီဇင်ဘာ ၅ ရက်က လက်ပံတန်းမြို့နယ်၌ ဖမ်းဆီးရမိခဲ့ခြင်းဖြစ်ကာ ၎င်းတို့နှစ်ဦးကို တရားလို အပါအ၀င် တရားလိုသက်သေ ၁၉ ဦးဖြင့် တရားစွဲဆိုထားခြင်း ဖြစ်ကြောင်း သိရသည်။

“ဒီနေ့က တရားလိုဖြစ်တဲ့ ထောက်ကြန့်စခန်းမှူး ရဲအုပ်မြင့်လွင်ကို စစ်ဆေးတယ်။ နောက်လာမယ့် ရုံးချိန်းမှာတော့ တရားလိုပြ သက်သေကို စစ်ဆေးသွားမှာ ဖြစ်ပါတယ်” ဟု မင်္ဂလာဒုံမြို့နယ် တရားရုံးမှ တာဝန်ရှိသူ တစ်ဦးက ပြောကြားသည်။

အဆိုပါ ရုံးချိန်းတွင် တရားစွဲဆိုခံထားရသူ လမင်းသာ (၂) ဆိုင်ပိုင်ရှင် ဦးအောင်မိုး၏ အကျိုးတော်ဆောင် ရှေ့နေများက ဒုတိယအကြိမ်အဖြစ် အာမခံ လျှောက်ထားခဲ့သော်လည်း တရားစွဲဆိုထားသည့် ပုဒ်မများတွင် အာမခံပေး၍ မရသည့် ပုဒ်မပါရှိသောကြောင့် အာမခံမပေးကြောင်း တရားရုံးမှ အမိန့်ချမှတ်ခဲ့ပြီး ရုံးချိန်းကို ၂၀၁၈ ခုနှစ် ဇန်န၀ါရီ ၁၁ ရက်သို့ ပြန်လည် ချိန်းဆိုလိုက်သည်။

ပြီးခဲ့သည့် နိုဝင်ဘာ ၂၈ ရက်က ထောက်ကြန့်ရဲစခန်း အနီးရှိ လမင်းသာ (၂) စားသောက်ဆိုင်သို့ ဆရာတော် ဘဒ္ဒန္တဣန္ဒ (ဓမ္မာစရိယ) မှ ဆေးသောက်ရန်အတွက် ရေနွေးတောင်းသောက်စဉ် “ဘုန်းကြီးနဲ့ အရက်ဆိုင်နဲ့ ဘာဆိုင်လို့လဲ။ အရက်သမား ဘုန်းကြီးလား။ ဘုန်းကြီးအတုကွ၊ ဖမ်းကွာ ရိုက်ကွာ” ဟု ပြောဆိုပြီး လူတချို့က ၀ိုင်းဝန်းရိုက်နှက်ခဲ့ခြင်း ဖြစ်ကြောင်း၊ နိုင်ငံတော်ဗဟို သံဃာ့ဝန်ဆောင် ပုသိမ်ပစ္ဆိမာရုံကျောင်း ဆရာတော်ကြီးနှင့် ကာယကံရှင် ဆရာတော်ဘဒ္ဒန္တဣန္ဒ (ဓမ္မာစရိယ) အပါအ၀င် သံဃာတော်များ သတင်းစာ ရှင်းလင်းပွဲတွင် ဆရာတော်များက မိန့်ကြားသည်။

တရားစွဲဆို ခံထားရသည့် မြင့်ကျော်ဆိုသူသည် ဥူးပညာသာရဘွဲ့ အမည်ဖြင့် ခမုံ ရွာမ၊ ခမုံကျေးရွာအုပ်စု၊ အေးမြစံပျော် ကျောင်းတိုက်၏ ကျောင်းထိုင်ဆရာတော် တစ်ပါးဖြစ်ပြီး လူမှုရေးကိစ္စများ၊ အရက်သေစာ သောက်စားခြင်းများ မကြာခဏ ပြုလုပ်တတ်၍ ရွာနှင့်အဆင်မပြေသည့် ဘုန်းကြီးတစ်ပါးဖြစ်ကာ ပြစ်မှုဖြစ်ပွားရာ လမင်းသာ (၂) စားသောက်ဆိုင်သို့ Facebook မှ ရည်းစားဖြစ်သူနှင့် ချိန်းတွေ့ရန် လူဝတ်လဲ၍ ရောက်ရှိသောက်စား နေခြင်းဖြစ်ကြောင်း ရဲတပ်ဖွဲ့၏ ထုတ်ပြန်ချက်တွင် ပါရှိသည်။

ရိုက်နှက်ခံရသည့် ဆရာတော်ဘဒ္ဒန္တဣန္ဒ (ဓမ္မာစရိယ) သည် ရခိုင်ပြည်နယ် ရမ်းဗြဲမြို့နယ်၊ ကျက်သရေရွာ ဇာတိဖြစ်ပြီး ၁၃၂၅ ခုနှစ်တွင် မိဘနှစ်ပါးတို့၏ ပစ္စယာနုဂ္ဂဟဖြင့် ရှင်သာမဏေအဖြစ်သို့ စတင်ရောက်ရှိခဲ့ခြင်း ဖြစ်သည်။ ကျက်သရေရွာ သိမ်တောင်ကျောင်းတိုက်၊ မြောင်းမြမြို့၊ ပဇ္ဇောတာရုံ ကျောင်းတိုက်၊ ညောင်တုန်းမြို့၊ ရွှေဟင်္သာတောရ ကျောင်းတိုက်၊ ပုသိမ်မြို့၊ ပစ္ဆိမာရုံကျောင်းတိုက်တို့၌ ပညာသင်ကြားခဲ့ပြီး ၁၃၃၁ ခုနှစ် ပုသိမ်မြို့ ပစ္ဆိမာရုံကျောင်းတိုက် ဆရာတော် ကိုဥပ္ပဇ္ဈာယ်ပြု၍ ပစ္ဆိမာရုံခဏ္ဍသိမ်တွင် ရဟန်းအဖြစ်သို့ ရောက်ရှိခဲ့ခြင်းဖြစ်သည်။

၁၃၃၂ ခုနှစ်တွင် ဒုတိယအကြိမ် သိက္ခာထပ် ရဟန်း၊ ၁၃၅၁ ခုနှစ်တွင် တတိယအကြိမ် သိက္ခာထပ် ရဟန်းအဖြစ် ရောက်ရှိခဲ့ပြီး ၁၃၇၄ ခုနှစ်တွင် ယောဂီတို့ရှေ့ဆောင်၊ ၁၃၇၅ ခုနှစ် တွင် ယောဂီတို့ထွက်လမ်း၊ ၁၃၇၆ ခုနှစ်တွင် ယောဂီတို့ အလင်းရောင် (ပ၊ ဒု)၊ ၁၃၇၇ ခုနှစ်တွင် ဗုဒ္ဓနှင့် ဘာသာသိစရာဆိုသည့် စာအုပ်များ ရေးသားထုတ်ဝေခဲ့ပြီး နောက်ဆုံးအနေဖြင့် ယခုနှစ် လေးလပိုင်းက ဗုဒ္ဓဘာသာဝင် သိစေချင်ဆိုသည့် စာအုပ်ကို ရေးသားထုတ်ဝေခဲ့ကြောင်း သိရသည်။

ထောက်ကြန့်စစ်သင်္ချိုင်းရှိ ပင်မအဆောက်အအုံမှ အမိုးများကို နှစ်ပေါင်း ၆၀ အတွင်း ပထမဆုံးအကြိမ် အကြီးစား ပြင်ဆင်ရာ ရာခိုင်နှုန်း ၅၀ ခန့် ပြီးစီး

အာရှပစိဖိတ် ဧရိယာတွင် အကြီးဆုံးဖြစ်သော ရန်ကုန်တိုင်းဒေသကြီး မင်္ဂလာဒုံမြို့နယ် ထောက်ကြန့်မြို့ စစ်သင်္ချိုင်းရှိ ပင်မအဆောက်အအုံမှ အမိုးများအား နှစ်ပေါင်း  ၆၀ အတွင်း ပထမဆုံးအကြိမ် အကြီးစား ပြင်ဆင်မှုများ ပြုလုပ်ရာ လက်ရှိအချိန်တွင် ရာခိုင်နှုန်း ၅၀ ခန့် ပြီးစီးပြီဖြစ်ကြောင်း ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာထံမှ ဒီဇင်ဘာ ၁၂ ရက်က သိရသည်။

၁၉၅၇ ခုနှစ်က စတင်ဖွင့်လှစ်ခဲ့သည့် ထောက်ကြန့်စစ်သင်္ချိုင်းရှိ ပင်မအဆောက်အအုံမှ အမိုးများသည် လက်ရှိအချိန်တွင် မိုးယိုခြင်းများ ရှိလာသောကြောင့် အကြီးစား ပြင်ဆင်မှုများကို အောက်တိုဘာ ၁၆ ရက်က စတင်ပြီး နိုင်ငံခြား ကန်ထရိုက်များဖြင့် ပြုလုပ်ခြင်းဖြစ်သည်။

“ရာခိုင်နှုန်း ၅၀ ပြီးပြီလို့ ပြောလို့ရတာပေါ့။ သူက နှစ်ပိုင်းရှိတယ်လေ။ တောင်ဘက်နဲ့ မြောက်ဘက်။ အမိုးကို သန့်ရှင်းရေးလုပ်ပြီး အမိုးကြမ်းကို ခွာ/ရေဆေး သန့်ရှင်းရေးလုပ်ပြီး အကြမ်းထည် ရှင်းလင်းတယ်။ ပြီးတော့မှ ပြန်ခင်းရမှာ။ အခုက အကြမ်းထည် အကုန်ပြီးသွားပါပြီ” ဟု ဓနသဟာရစစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ ဦးသက်မွန်က ပြောကြားသည်။

ထောက်ကြန့် စစ်သင်္ချိုင်း ပင်မအဆောက်အအုံ၏ အမိုးများအား ပြင်ဆင်မှုများ ပြုလုပ်ရန်အတွက် ငြမ်းတည်ဆောက်ခြင်း လုပ်ငန်းများကို ပြီးခဲ့သည့် အောက်တိုဘာ ၁၆ ရက် မတိုင်ခင် တစ်ပတ်အလိုက  စတင်လုပ်ဆောင် ခဲ့ခြင်းဖြစ်ပြီး ပြင်ဆင်မှု လုပ်ငန်းများသည် ဇန်န၀ါရီလကုန်တွင် ပြီးစီးမည်ဖြစ်ကြောင်း ဦးသက်မွန်က ပြောကြားသည်။

အကြီးစားပြုပြင်မှုများ လုပ်ဆောင်နေချိန်အတွင်း ပင်မအဆောက်အအုံကို ပိတ်ပင်ထားသော်လည်း တခြားနေရာများကို လေ့လာခွင့်ပြုထားပြီး စစ်သင်္ချိုင်း ဖွင့်ချိန်ကိုလည်း ယခင်အချိန်များအတိုင်း ထားရှိပေးထားသဖြင့် လာရောက်လည်ပတ် လေ့လာသူဦးရေသည် ပုံမှန်အတိုင်း ရှိနေကြောင်း သိရသည်။

လက်ရှိအချိန်တွင် မြန်မာနိုင်ငံ၌ ထောက်ကြန့်စစ်သင်္ချိုင်း၊ သံဖြူဇရပ် စစ်သင်္ချိုင်းနှင့် ဟံသာဝတီ စစ်သင်္ချိုင်း ဆိုသည့် စစ်သင်္ချိုင်း သုံးခုရှိရာ ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ အပါအ၀င် စုစုပေါင်း ၁၈ ဦးဖြင့် ပြုပြင်ထိန်းသိမ်း လျက်ရှိကြောင်း သိရသည်။

တစ်ကမ္ဘာလုံးရှိ နိုင်ငံပေါင်း ၁၅၃ နိုင်ငံတွင် စစ်သင်္ချိုင်းပေါင်း ၂၅၀၀၀ ရှိရာ မြန်မာနိုင်ငံက ထောက်ကြန့် စစ်သင်္ချိုင်းသည် အာရှပစိဖိတ် ဧရိယာတွင် အကြီးဆုံးဖြစ်ကြောင်း  ဓနသဟာရ စစ်သင်္ချိုင်းများ ကော်မရှင်၏ မြန်မာနိုင်ငံဆိုင်ရာ မန်နေဂျာ ဦးသက်မွန်ထံမှ သိရသည်။

ဒုတိယကမ္ဘာစစ် အတွင်းက မြန်မာနိုင်ငံ အထက်ပိုင်းတွင် ကျဆုံးခဲ့သည့် စစ်သားများအတွက် ထောက်ကြန့် စစ်သင်္ချိုင်းတွင် အမှတ်တရ ထားခြင်းဖြစ်ပြီး စစ်သင်္ချိုင်းရှိ ပင်မအဆောက်အအုံတွင် အမည်ပေါင်း ၂၇၀၀၀ ကို အမည်ရေးထိုးထားကာ  မြေပြင်ရှိ အုတ်ဂူစာရင်းမှာ ၆၃၇၄ ဂူရှိ၍ သိမ်ဇရပ်စစ်သင်္ချိုင်းတွင် သေမင်းတမံ ရထားလမ်း တစ်လျှောက် ကျဆုံးခဲ့သည့် စစ်သားများကို အမှတ်တရ ထားခြင်းဖြစ်ပြီး ၃၇၇၁ ဦးရှိကာ ဟံသာဝတီ စစ်သင်္ချိုင်းတွင် ရန်ကုန်အကျဉ်းထောင်မှ စစ်သားများအတွက် အမှတ်တရထားခြင်းဖြစ်ပြီး ဦးရေ ၁၅၀၀ နီးပါး စာရင်းရှိကြောင်း သိရသည်။

လက်ရှိအချိန်တွင် ထောက်ကြန့်စစ်သင်္ချိုင်းသို့ ဧည့်သည်ဝင်ရောက်မှုမှာ ပုံမှန်ရက်များတွင် လူဦးရေ ၁၀၀ မှ ၂၀၀ အတွင်းရှိပြီး အခါကြီးရက်ကြီးနှင့် အစိုးရရုံးပိတ်ရက်များတွင် လူဦးရေ ၄၀၀ မှ ၅၀၀ အတွင်းရှိ ကြောင်း သိရသည်။

 

မင်္ဂလာဒုံမြို့နယ် စက်မှုဇုန်တိုးချဲ့ (၁) လမ်းရှိ နေအိမ် ၅၀ ခန့်အား ဇေကမ္ဘာကုမ္ပဏီက နိုဝင်ဘာ ဒုတိယပတ်အတွင်း ထပ်မံဖယ်ရှားမည်

နိုဝင်ဘာလအတွင်း ဇေကမ္ဘာကုမ္ပဏီက ဖျက်သိမ်းမည့် နေအိမ်များကို တွေ့ရစဉ်

မင်္ဂလာဒုံမြို့နယ် စက်မှုဇုန်တိုးချဲ့ (၁) လမ်းရှိ နေအိမ် ၅၀ ခန့်အား ဇေကမ္ဘာကုမ္ပဏီက  နိုဝင်ဘာ ဒုတိယပတ်အတွင်း ထပ်မံဖယ် ရှားမည်ဖြစ်ကြောင်း ဇေကမ္ဘာကုမ္ပဏီမှ တာဝန်ရှိသူတစ်ဦး၏ ပြောကြားချက်အရ သိရသည်။

“၃၁ ရက်မှာ မြောက်ပိုင်းခရိုင်တရားရုံးကို ဘီလစ်အရာရှိက အပ်ဝရမ်း ပြန်အပ်ရမယ်။ ၀ရမ်းပြန်အပ်တဲ့အခါမှာ ဘိလစ်အရာရှိက အကုန်လုံးကို မဖယ်နိုင်ဘူး။ ဒုတိယအကြိမ် ၀ရမ်းပြန်ကပ်မယ်။ နိုဝင်ဘာ ၁၃၊ ၁၄ လောက်တော့ ခန့်မှန်းတယ်။ ဒီကြားထဲမှာ ဘာမှမလုပ်ပါဘူး။ လာမယ့် နိုဝင်ဘာ ၁၃၊ ၁၄ ရက်မှာ ဦးကံထွန်းရဲ့ မြေဧကတွေပေါ်မှာ အိမ်မြေ ၅၀ ရှိပါတယ်။ အဲဒီအိမ်တွေကို ဖယ်ရှားသွားမှာပါ” ဟု ဇေကမ္ဘာကုမ္ပဏီမှ တာဝန်ရှိသူ တစ်ဦးဖြစ်သည့် ဦးမြင့်ဇော်က ပြောကြားသည်။

ရန်ကုန်တိုင်းဒေသကြီး မင်္ဂလာဒုံမြို့နယ် အောင်မင်္ဂလာ (၁) လမ်းနှင့် စက်မှုဇုံတိုးချဲ့  (၁) လမ်းကြားရှိ မြေဧက ၁၁ ဧကကျော်နှင့် ပတ်သက်ပြီး ဇေကမ္ဘာကုမ္ပဏီနှင့် လယ်သမား များအကြား ၂၀၁၂ ခုနှစ်ကတည်းက အမှုရင်ဆိုင် ခဲ့ခြင်းဖြစ်ပြီး ခြောက်နှစ်ကျော် အမှုရင် ဆိုင်ပြီးနောက် လယ်သမားများဘက်က ရှုံးနိမ့်ခဲ့ကြောင်း သိရသည်။

ယင်းသို့ အမှုရင်ဆိုင်ရာတွင် လယ်သမားများဘက်က အမှုရှုံးနိမ့်ခဲ့သည့်အတွက် အောက်တိုဘာ ၃၀ ရက်တွင် စက်မှုဇုံတိုးချဲ့ (၁) လမ်းရှိ လယ်သမားဟုဆိုသူ ဦးလှဌေး၏ နေအိမ်နှစ်လုံးအား ဇေကမ္ဘာကုမ္ပဏီမှ အနီရောင်အ၀တ်များ ၀တ်ဆင်ထားသည့် အလုပ်သမား ၁၅၀ ခန့် လာရောက်ဖယ်ရှားခဲ့ပြီး သွပ်ပြားများဖြင့် ခြံစည်းရိုး ကာရံခဲ့ကြောင်း သိရသည်။

ထို့ပြင် ဇေကမ္ဘာကုမ္ပဏီဘက်က နိုဝင်ဘာလ ဒုတိယပတ်တွင် လယ်သမားဟုဆိုသူ ဦးကံထွန်း အငှားချထားသည့် နေအိမ် ၅၀ ခန့်အား လာရောက် ဖယ်ရှားမည်ဖြစ်ကြောင်း သိရသည်။

နိုဝင်ဘာ ဒုတိယပတ်အတွင်း နေအိမ်များ ဖယ်ရှားမည်ဆိုခြင်းနှင့် ပတ်သက်၍ ဦးကံထွန်း၏ မြေကွက်ပေါ်တွင် ငှားရမ်းနေထိုင်သူများက နေစရာမရှိသည့် အခက်အခဲများ ဖြစ်ပေါ်လာမည်ကို စိုးရိမ်နေကြကြောင်း သိရသည်။

“အစ်မအိမ်မှာ ကျောင်းတက်နေတဲ့ ကလေးက လေးတန်းတစ်ယောက်နဲ့ တစ်တန်းတစ်ယောက်ရှိတယ်။ နောက်တစ်ခေါက် သူတို့လာဖျက်ရင် ကလေးတွေကို အခြားကျောင်း အပ်ဖို့အတွက်က စာသင်နှစ်ပြီးတော့ မှာဆိုတော့ ဘယ်ကျောင်းကမှ လက်ခံတော့မှာ မဟုတ်ဘူး။ စားဖို့တောင် အနိုင်နိုင်ဖြစ်နေတော့ ရွှေ့ဖို့ပြောင်းဖို့က မလွယ်ဘူး။ ကလေးတွေ ကျောင်းလေးပြီးမှပဲ လာဖျက်ပါလို့ မေတ္တာရပ်ခံချင်ပါတယ်” ဟု ဦးကံထွန်း မြေကွက်ပေါ်တွင် မြေကွက်ငှားရမ်းနေထိုင်သည့် မတင်တင်အေးက ပြောကြားသည်။

ဇေကမ္ဘာကုမ္ပဏီက ဖယ်ရှားမည့် မြေနေရာများပေါ်တွင် နေအိမ် ၅၀ ခန့်ရှိပြီး စာသင်ကြားနေသည့် ကလေး ၅၀ ကျော်နှင့် သက်ကြီးရွယ်အိုများလည်း ရှိကြောင်း သိရသည်။

“လာဖျက်ရင် အခြားဘယ်မှာ သွားနေရမလဲမသိဘူး။ မစီစဉ်ရသေးဘူး။ ဦးကံထွန်းဆီမှာ ငှားနေတဲ့ အိမ်တွေထဲမှာ သက်ကြီးရွယ်အိုက ၁၅ ယောက်လောက်ရှိတယ်။ ကလေးတွေလည်းရှိတယ်။ လာဖျက်ရင် ကလေးတွေ ပညာရေးလည်း ဒုက္ခရောက်ပြီပေါ့” ဟု ဒေါ်သန်းရီက ပြောကြားသည်။

“သူတို့ဖျက်ရင်တော့ မတတ်နိုင်ဘူး။ ကိုယ့်ဘက်က တတ်နိုင်သလောက် ရှင်းရမှာပဲ။ တရားရေးနဲ့ စီစဉ်တော့ တရားရေးနဲ့ပဲ လိုက်ရမှာပါ။ ဒီမြေကွက်ပေါ် နေထိုင်တဲ့သူတွေ အတွက်တော့ ဘာမှမစဉ်းစား နိုင်သေးဘူး။ သူတို့က အဓမ္မဆိုတော့ ကိုယ့်ကလည်း ဒါတွေ တားမြစ်တာပဲလေ။ မနေ့ကလည်း တားမြစ်ထားတဲ့ ကြားထဲကပဲ စာမထုတ်ဘာမထုတ်နဲ့ အဓမ္မ၀င်ဖျက်တာ။ မြေတိုင်းတာ လွဲသွားလို့သာ ပြန်သွားတာ” ဟု ဦးကံထွန်းက ဆိုသည်။

အဆိုပါ မြေနေရာများအား ဇေကမ္ဘာကုမ္ပဏီမှ အောက်တိုဘာ ၃၀ ရက် နံနက်မှ စတင်ကာ ဖျက်သိမ်းခြင်းများကို လုပ်ဆောင်ခဲ့ပြီး ယင်းနေ့တွင် နေအိမ်နှစ်လုံးအား ဖျက်သိမ်းခဲ့ကြောင်း၊ ကျန်ရှိသည့် နေအိမ်များအား မြေတိုင်းတာရန် ရှိသဖြင့် ဖျက်သိမ်းခြင်း မပြုသေးခြင်းဖြစ်ကြောင်း သိရသည်။