ယုံကြည်မှု တည်ဆောက်နေဆဲကာလတွင် ထိပ်တိုက်ရင်ဆိုင်မှုများကို ရှောင်ရှားနိုင်ရန် နယ်မြေတည်ဆောက်ခြင်း၊ အင်အားတည်ဆောက်ခြင်းများကို ဆောင်ရွက်ခြင်းမပြုကြရန် JMC-U ဥက္ကဋ္ဌ တိုက်တွန်း

အစိုးရနှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသော တိုင်းရင်းသားလက်နက်ကိုင် အဖွဲ့အစည်းများအကြား ယုံကြည်မှု တည်ဆောက်နေဆဲကာလတွင် ထိပ်တိုက်ရင်ဆိုင်မှုများကို ရှောင်ရှားနိုင်ရေးအတွက် နယ်မြေတည်ဆောက်ခြင်းနှင့် အင်အားတည်ဆောက်ခြင်းများကို ဆောင်ရွက်ခြင်းမပြုကြရန် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ဥက္ကဋ္ဌ ဒုတိယဗိုလ်ချုပ်ကြီးရာပြည့်က တိုက်တွန်း ပြောကြားသည်။

ရန်ကုန်မြို့ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် စက်တင်ဘာ ၁၂ ရက်က JMC-U ၏ (၁၈) ကြိမ်မြောက်အစည်းအဝေး ကျင်းပခဲ့ပြီး ယင်းအစည်းအဝေး အဖွင့်အမှာစကား ပြောကြားရာတွင် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ထိုသို့တိုက်တွန်းခဲ့ခြင်း ဖြစ်သည်။

“လက်ရှိအနေအထားမှာ ဖြစ်ပေါ်နေတဲ့ ပဋိပက္ခတွေကိုကြည့်ရင် အင်အားတည်ဆောက်တာတွေ၊ နယ်မြေတည်ဆောက်တာတွေ ဒီအပေါ်မှာ အခြေခံပြီးတော့မှ ဖြစ်ပွားနေတာကို တွေ့ရပါတယ်။ ကျွန်တော်တို့တပ်မတော် အနေနဲ့ကတော့ ထာဝရငြိမ်းချမ်းရေးနဲ့ ပါတီစုံဒီမိုကရေစီလမ်းကြောင်းကို ဦးတည်ဖော်ဆောင်နေတာဖြစ်တဲ့အတွက် အင်အားတည်ဆောက်တာတွေ၊ နယ်မြေတည်ဆောက်တာတွေဟာ ကျွန်တော်တို့ ထာဝရ ငြိမ်းချမ်းရေး တည်ဆောက်မှုအတွက် ကြီးမားတဲ့ အဟန့်အတား ဖြစ်စေတဲ့အတွက် တစ်ဖက်နဲ့တစ်ဖက် သံသယကိုလည်း ပိုပြီးတော့ ကြီးထွားစေပါတယ်။ အခုလို တစ်ဖက်နဲ့တစ်ဖက် ယုံကြည်မှု တည်ဆောက်နေတဲ့ ကာလမှာ ထိပ်တိုက်ရင်ဆိုင်မှုများကို ရှောင်ရှားဖို့အတွက် နယ်မြေတည်ဆောက်တာတွေ၊ အင်အားတည်ဆောက်တာတွေကို ကျွန်တော်တို့ ဆောင်ရွက်ခြင်းမပြုဖို့အတွက် ကျွန်တော့်အနေနဲ့ သတိပေး ပန်ကြားလိုပါတယ်” ဟု ၎င်းက ပြောကြားသည်။

ထို့ပြင် ပဋိပက္ခများ ဖြစ်ပွားလာပါကလည်း အဖွဲ့အစည်းအတွက် သို့မဟုတ် ဒေသခံပြည်သူလူထုအတွက် ဆိုးကျိုးများ ဖြစ်ပေါ်လာစေမည် ဖြစ်သောကြောင့် ပဋိပက္ခများကို အလေးအနက်ထား ရှောင်ရှားကြရန်ကိုလည်း JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က တိုက်တွန်းခဲ့သည်။

JMC အနေဖြင့် ၎င်း၏လုပ်ငန်းများကို အကောင်အထည်ဖော် ဆောင်ရွက်ရာတွင် နှစ်ဖက်သဘောတူညီချက်အတိုင်းသာ ပူးတွဲဆောင်ရွက်ရခြင်းဖြစ်သည့်အတွက် အဖွဲ့အစည်းတစ်ခုခုက ပူးပေါင်းပါဝင် ဆောင်ရွက်ခြင်းမရှိပါက JMC ၏ လုပ်ငန်းစဉ်များ နှောင့်နှေးကြန့်ကြာပြီး မလိုအပ်သော ပဋိပက္ခများ ပိုမိုကြီးထွားလာနိုင်သည်ကိုလည်း သတိပြု ဆောင်ရွက်ကြရန် ၎င်းက မှာကြားခဲ့သည်။

ပစ်ခတ်တိုက်ခိုက်မှု လျှော့ချရပ်စဲရေးအတွက် လိုက်နာဆောင်ရွက်ရန် NCA တွင် တပ်ပိုင်းဆိုင်ရာ ကိစ္စရပ်များနှင့်စပ်လျဉ်း၍ လိုက်နာရမည့် သဘောတူညီချက်များ၊ အရပ်သားများကို ကာကွယ်ပေးရမည့်အချက်များ ပါဝင်ပြီး JMC တွင်လည်း ပစ်ခတ်တိုက်ခိုက်မှု ရပ်စဲရေး ခိုင်မာအောင်ဆောင်ရွက်နိုင်ရေး အတွက် လိုအပ်သောအကြောင်း အချက်များကို JMC ၏ ပုံမှန်အစည်းအဝေးများတွင် ညှိနှိုင်းဆောင်ရွက်ကာ လုပ်ငန်းလမ်းညွှန်များ၊ လုပ်ထုံးလုပ်နည်းများ ရေးဆွဲပြဋ္ဌာန်းလျက်ရှိကြောင်း ဒုတိယဗိုလ်ချုပ်ကြီး ရာပြည့်က ပြောကြားသည်။

“အဲဒီပြဋ္ဌာန်းချက်တွေနဲ့ ယခင်သဘောတူညီချက်တွေကို လက်နက်ကိုင်အဖွဲ့အစည်းတိုင်းရဲ့ တပ်ဖွဲ့ဝင်တိုင်းက သိရှိပြီးတော့မှ ဒါတွေကို ကျွန်တော်တို့ တိတိကျကျ လိုက်နာမှသာ ပစ်ခတ်တိုက်ခိုက်မှု ရပ်စဲရေးကို ပိုမိုခိုင်မာအောင် ကျွန်တော်တို့ ဆောင်ရွက်နိုင်မှာ ဖြစ်ပါတယ်” ဟု ၎င်းက ဆိုသည်။

ထို့ပြင် တစ်ဖက်နှင့်တစ်ဖက် ရန်မူခြင်း သို့မဟုတ် စော်ကားမူခြင်းကို ဖြစ်စေသည့် တိုက်ရိုက် သို့မဟုတ် သွယ်ဝိုက်သောလုပ်ငန်းများကို မပြုလုပ်ကြရန် NCA စာချုပ် အခန်း (၃) အပိုဒ် (၅) (ခ) တွင် တိတိကျကျ ဖော်ပြထားသည့် အတွက်ကြောင့်လည်း သိရှိလိုက်နာ ဆောင်ရွက်သွားကြရန် JMC-U ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားသည်။

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ၏ (၁၈) ကြိမ်မြောက် အစည်းအဝေးကို ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင် စက်တင်ဘာ ၁၂ ရက်မှ ၁၄ ရက်အထိ ပြုလုပ်လျက်ရှိသည်။

မွန်ပြည်သစ်ပါတီအနေဖြင့် ကရင်နှင့် တနင်္သာရီ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီများ၌ ပါဝင်ခွင့်မရမချင်း ဆွေးနွေးသွားမည်

မွန်ပြည်သစ်ပါတီအနေဖြင့် ကရင်ပြည်နယ်နှင့် တနင်္သာရီတိုင်းဒေသကြီးတို့ရှိ  ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC –S) များ၌ ပါဝင်ခွင့်မရမချင်း ဆွေးနွေးသွားမည်ဖြစ်ကြောင်း မွန်ပြည်သစ်ပါတီ (NMSP) ဗဟိုအလုပ်အမှုဆောင်ကော်မတီဝင် နိုင်ဝင်းလှက ပြောကြားသည်။

NCA စာချုပ်တွင် ပါဝင်လက်မှတ်ရေးထိုးပြီးနောက် မွန်ပြည်သစ်ပါတီသည် ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC –U)တွင် ကိုယ်စားလှယ်ပါဝင်ခွင့် ရရှိပြီး ပြည်နယ်အဆင့်တွင် မွန်ပြည်နယ်၌သာ ပါဝင်ခွင့်ရရှိမည်ဖြစ်ကြောင်း ၎င်းတို့ လှုပ်ရှားဒေသများတွင်ပါဝင်သည့် ကရင်ပြည်နယ်နှင့် တနင်္သာရီတိုင်းဒေသကြီး ကော်မတီ များ၌လည်း ပါဝင်ခွင့်ရရေး အစဉ်တစိုက် တောင်းဆိုနေခြင်း ဖြစ်သည်။

“တပ်ဘက်ကတော့ မွန်ပြည်နယ်မှာ အရင်လက်ခံလိုက်။ နောက်ပြီးကျန်တာ ဆက်ပြီးလက်ခံလိုက်လို့ သူတို့ပြောတာပေါ့။ သူတို့အကြောင်းပြချက်က ကရင်တစ်ခုကျတော့ ကျွန်တော်တို့ ဆက်ဆံနေရတဲ့ အရှေ့တောင် တိုင်းစစ်ဌာချုပ်လက်အောက်ခံနယ်မြေဖြစ်နေတော့ ဟိုမှာမပါလည်းပဲ ဖြေရှင်းလို့ရတဲ့ အနေအထားပေါ့လေ။ ကျွန်တော်တို့ပြောတဲ့ ကရင်မှာ KNU ပါမယ်။ DKBA တို့ဘာတို့ PC တို့ သူတို့လည်းပါခွင့်ရတော့ ကျွန်တော်တို့လည်း ပါချင်တာပေါ့” ဟု နိုင်ဝင်းလှက ပြောကြားသည်။

လက်ရှိတွင် မွန်ပြည်သစ်ပါတီအနေဖြင့် NCA ရေးထိုးပြီးသော်လည်း ကရင်နှင့် တနင်္သာရီတိုင်းတွင်ရှိသည့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီများတွင် မည်သည့်အတွက်ကြောင့် ပါဝင်ခွင့်မရသည်ကို မေးမြန်းခြင်းခံနေရကြောင်း ဗဟိုကော်မတီဝင် နိုင်ဝင်းလှက ဆက်လက်ပြောကြားသည်။

“ကျွန်တော်တို့ဘက်ကလည်း တကယ်လို့ မပါဘူးဆိုရင် ဖြေရှင်းချက် ပြည်သူလူထုကြားမှာ ပြောဖို့ခက်နေတယ်” ဟု နိုင်ဝင်းလှက ပြောကြားသည်။

တနင်္သာရီတွင်လည်း မွန်ပြည်သစ်ပါတီ တပ်ဖွဲ့ဝင်များနှင့် မွန်ပြည်သူများရှိနေသည့် အတွက် တနင်္သာရီတိုင်းဒေသကြီး ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီတွင်လည်း မွန်ပြည်သစ်ပါတီအနေဖြင့် ပါဝင်သင့်ကြောင်း နိုင်ဝင်းလှက ပြောကြားသည်။

မွန်ပြည်သစ်ပါတီအနေဖြင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် ယခုနှစ် ဖေဖော်ဝါရီ ၁၃ ရက်တွင် လက်မှတ်ရေးထိုးခဲ့ပြီးဖြစ်သည့်အပြင် မေလဆန်းပိုင်းကလည်း မွန်ပြည်သစ်ပါတီနှင့် မွန်နိုင်ငံရေးပါတီများ ပူးပေါင်းကာ မွန်လူမျိုးအလိုက် အမျိုးသားအဆင့်နိုင်ငံ ရေးဆွေးနွေးပွဲအား မွန်ပြည်နယ် ရေးမြို့တွင် သုံးရက်ကြာ ပြုလုပ်ခဲ့ပြီး ဖြစ်သည်။