လှိုင်သာယာမြို့နယ်တွင် အမျိုးသားတစ်ဦး ဓာတ်ကြိုးနှင့်ထိနေသည့် သွပ်ပြားအား ကိုင်မိရာမှ ဓာတ်လိုက်သေဆုံး

လှိုင်သာယာမြို့နယ်တွင် အမျိုးသားတစ်ဦး ဓာတ်ကြိုးနှင့် ထိမိနေသည့် အိမ်မိုးသွပ်ပြားအား ကိုင်မိရာမှ ဓာတ်လိုက်သေဆုံးမှု ဖြစ်ပွားခဲ့ကြောင်း သြဂုတ် ၇ ရက်တွင် ရန်ကုန်တိုင်းဒေသကြီး ရဲတပ်ဖွဲ့မှ သိရသည်။

ဓာတ်လိုက်သေဆုံးသည့် အမျိုးသားမှာ လှိုင်သာယာမြို့နယ် ညောင်ကျေးရွာတွင် နေထိုင်သည့် ကို….(၃၅ နှစ်) ဆိုသူ ဖြစ်ပြီး ၎င်းသည် သြဂုတ် ၆ ရက် နံနက် ၁၁ နာရီခန့်က နေအိမ်ခေါင်မိုးသွပ်ပြား လန်နေသဖြင့် အိမ်ခေါင်မိုးပေါ်သို့ တက်ရောက်ပြီး သွပ်ပြားအား ပြုပြင်ခဲ့ကြောင်း သိရသည်။

ထိုသို့ပြုပြင်စဉ် လမ်းဘေးမီးတိုင်မှ တစ်ဆင့် ၎င်း၏နေအိမ်ကိုကျော်၍ အခြားအိမ်တစ်အိမ်သို့ သွယ်တန်းထားသည့် ဓာတ်ကြိုးမှာ ပေါက်ပြဲပြီး သွပ်ပြားနှင့် ထိမိနေခဲ့ကြောင်း၊ ထိုသို့ထိမိနေချိန်တွင် ကို…. မှာ အဆိုပါသွပ်ပြားကို ကိုင်မိရာမှတစ်ဆင့် ဓာတ်လိုက်ခဲ့ခြင်းဖြစ်ကြောင်း၊ ယင်းသို့ဓာတ်လိုက်ခဲ့သဖြင့် ကို….မှာ ယာဘက်လက်မတွင် ဒဏ်ရာတစ်ချက်ရရှိခဲ့ကာ ပန်းလှိုင်ဆေးရုံမှတစ်ဆင့် ရန်ကုန်ပြည်သူ့ ဆေးရုံကြီးသို့ တင်ပို့စဉ် ယင်းနေ့ ည ၇ နာရီခန့်၌ သေဆုံးသွားခဲ့ခြင်း ဖြစ်ကြောင်း သိရသည်။

အဆိုပါဖြစ်စဉ်ကို လှိုင်သာယာမြို့မရဲစခန်းက သေမှုသေခင်း အမှတ်စဉ် (၆၂/၂၀၁၈) ဖြင့် အမှုဖွင့်ထားကြောင်း သိရသည်။

 

ယာဉ်သွားလမ်းပေါ်ရှိ ရေအိုင်ထဲပြတ်ကျနေသော ဓာတ်ကြိုးကိုနင်းမိပြီး အဋ္ဌမတန်းကျောင်းသားတစ်ဦး ဓာတ်လိုက်သေဆုံးမှု တောင်ဥက္ကလာမြို့နယ်တွင် ဖြစ်ပွား

ယာဉ်သွားလမ်းပေါ်ရှိ ရေအိုင်ထဲပြတ်ကျနေသော ဓာတ်ကြိုးကိုနင်းမိသည့် အဋ္ဌမတန်းကျောင်းသားတစ်ဦး ဓာတ်လိုက်သေဆုံးမှုကို စီစီတီဗွီမှတ်တမ်းမှ တွေ့ရစဉ်

ယာဉ်သွားလမ်း လမ်းမပေါ်ရှိ ရေအိုင်ထဲ ပြတ်ကျနေသော ဓာတ်ကြိုးကို နင်းမိသည့် အဋ္ဌမတန်းကျောင်းသားတစ်ဦး ဓာတ်လိုက် သေဆုံးမှု တောင်ဥက္ကလာမြို့နယ်တွင် ဇူလိုင် ၁၃ ရက် ညနေက ဖြစ်ပွားခဲ့ကြောင်း သိရသည်။

ဓာတ်လိုက်သေဆုံးသည့် မောင်….(၁၃ နှစ်) သည် အလက (၂) တောင်ဥက္ကလာတွင် ပညာသင်ကြားနေသော အဋ္ဌမတန်းကျောင်းသားဖြစ်ပြီး ဇူလိုင် ၁၃ ရက် ညနေ ၅ နာရီခန့်တွင် တောင်ဥက္ကလာမြို့နယ် ချယ်ရီဥယျာဉ် လမ်းဘက်မှ သံသုမာလမ်းအတိုင်း လျှောက်လာစဉ်ဖြစ်ပွားခဲ့ခြင်းဖြစ်သည်။

ယင်းသို့ လမ်းလျှောက်လာစဉ် သံသုမာလမ်းအတိုင်းမောင်းနှင်လာသော ကားတစ်စီးကို ရှောင်တိမ်းရာမှ ရေအိုင်ထဲသို့ ပြတ်ကျနေသည့် ဓာတ်ကြိုးနှင့်ထိမိပြီး လဲကျသေဆုံးခဲ့ခြင်းဖြစ်ကြောင်း ဖြစ်စဉ်အနီးတွင် တပ်ဆင် ထားသော စီစီတီဗွီမှတ်တမ်းအရ သိရသည်။

လမ်းမပေါ်ရှိ ရေအိုင်ထဲသို့ ဓာတ်ကြိုး ပြတ်ကျနေသည့်အကြောင်းကို ယင်းနေရာအနီးတွင် နေထိုင်သူတစ်ဦးက တောင်ဥက္ကလာ လျှပ်စစ်ရုံးသို့ ဖုန်းဖြင့် ဆက်သွယ် အကြောင်းကြားခဲ့သည်ဟု သိရသည်။

“၃ နာရီခွဲလောက်မှာ ရှေ့လမ်းမပေါ်မှာ ဓာတ်ကြိုးပြတ်ကျနေလို့ တောင်ဥက္ကလာ EPC ရုံးကို ဖုန်းဆက်ခဲ့တယ်။ ဒါပေမဲ့ ဖုန်းမကိုင်လို့ လျှပ်စစ်ဝန်ထမ်းတစ်ယောက်ကို ဖုန်းဆက်ပြီး ပြောလိုက်တယ်။ အဲဒီတုန်းက မီးပျက်နေတယ်။ မီးပြန်လာရင် ဒီဟာ ဒုက္ခရောက်မယ်လို့ အန်ကယ် သူ့ကို ပြောလိုက်တယ်။  ၄ နာရီကျော်လောက်မှာ မီးပြန်လာတယ်။ မိုးရွာလို့  ရေကတက်လာတော့ ဓာတ်ကြိုးကို ရေမြုပ်သွားတယ်။ ၅ နာရီလောက်မှာ လမ်းလျှောက်လာတဲ့ကလေးက ကြိုးကို တက်နင်းမိပြီး ဓာတ်လိုက်သွားတာ”ဟု ဖြစ်စဉ်အနီးတွင်ရှိနေသူ ဦးကျော်သင်းအောင်က ပြောကြားသည်။

ဖြစ်စဉ်ဖြစ်ပွားပြီးနောက် အဆိုပါ နေရာသို့ တောင်ဥက္ကလာ EPC ရုံးမှ လျှပ်စစ်ဝန်ထမ်းများ လာရောက်၍ ဓာတ်ကြိုး ပြန်လည်တပ်ဆင်ခြင်ခဲ့ပြီး  စည်ပင်သာယာဝန်ထမ်းများက ဓာတ်ကြိုးနှင့်မလွတ်ကင်းသော သစ်ပင်သစ်ကိုင်းများကို  ခုတ်ထွင်ရှင်းလင်းခဲ့သည်။

ဓာတ်လိုက်သေဆုံးမှုနှင့် ပတ်သက်၍ တောင်ဥက္ကလာ EPC ရုံးမှ တာဝန်ရှိသူတစ်ဦးအား ဆက်သွယ်မေးမြန်းရာ ပြတ်ကျနေသော ဓာတ်ကြိုးကိုပြန်လည်ပြုပြင်တပ်ဆင်ထားကြောင်းနှင့် သေဆုံးခဲ့သော ကလေးငယ်၏ အလောင်းရှိရာ သင်္ဃန်းကျွန်းစံပြဆေးရုံသို့ ၎င်းတို့ ရောက်ရှိနေကြောင်း ပြန်လည် ဖြေကြားသည်။

ဓာတ်လိုက်သေဆုံးမှုကို တောင်ဥက္ကလာ မြို့မရဲစခန်းတွင် သေမှုသေခင်းအမှတ်စဉ် ၁၉/၂၀၁၈ ဖြင့် အမှုဖွင့်ထားကြောင်း သိရသည်။

 

 

ဘားအံမြို့နယ် သာမညကျေးရွာတွင် ဖုန်းတိုင်ရွှေ့ရာမှ ဓာတ်လိုက်မှုဖြစ်ပွားပြီး လူငါးဦး သေဆုံး

ဘားအံမြို့နယ် သာမညကျေးရွာ ရေတံခွန်ရပ်ကွက်တွင် ဓာတ်အားလိုင်းပေါ် ဖုန်းတိုင်ပြုတ်ကျရာမှ (စက်ဝိုင်းဖြင့်) လူငါးဦး ဓာတ်လိုက်သေဆုံးခဲ့သည့် နေရာဝန်းကျင်ကို ဇန်န၀ါရီ ၆ ရက် နံနက်ကတွေ့ရစဉ်

ကရင်ပြည်နယ် သာမညကျေးရွာ ရေတံခွန်ရပ်ကွက်၌ ဇန်န၀ါရီ ၆ ရက် နံနက် ၉ နာရီခွဲခန့်က ဖုန်းတိုင်ရွှေ့ရာမှ ဓာတ်လိုက်မှုဖြစ်ပြီး လူငါးဦးသေဆုံးခဲ့ကြောင်း အိန္ဒုနယ်မြေရဲစခန်းမှ သိရသည်။

၂၀၁၈ ဇန်န၀ါရီ ၆ ရက်  နံနက် ၉ နာရီ ခွဲခန့်က သာမညကျေးရွာ  ရေတံခွန်ရပ်ကွက် အိမ်အမှတ် ၉/ ၆၆ တွင် ဦးမောင်ပါးသည် နေရာအခက်အခဲကြောင့် ဖုန်းတိုင်ကို ရွေ့ပြောင်းရန်စီစဉ်ခဲ့ကြောင်း၊ ယင်းဖုန်းတိုင်မှာ သံပိုက်ဖြင့် ပြုလုပ်ထားပြီး ပေအရှည်မှာ (၃၂) ပေခန့် ရှည်လျားသည့်အတွက် ကူညီပေးသူ လခို (၃၄ နှစ်)၊ ကျော်မိုး (၁၉ နှစ်)၊ သားဖြစ်သူ ခွန်သိန်းဝင်း (၃၀ နှစ်) တို့ ကူညီ လုပ်ဆောင်ပေးခဲ့သည်။

သံပိုက်လုံးဖြင့် ထောင်ထားသော ယိုးဒယား ကော့တလဲ့ဖုန်းတိုင်အား မရွှေ့ခြင်းဖြစ်၍ အလေးချိန်ကို မနိုင်သောကြောင့် အိမ်ရှေ့တွင် သာမညမှ ၀င်းစိန်ရွာသို့ သွယ်တန်းထားသော ဓာတ်အားလိုင်းကြိုးပေါ်သို့  ဖုန်းလိုင်းတိုင် ပြုတ်ကျကာလျှပ်စစ်စီးဝင်ပြီး ဓာတ်လိုက်ခဲ့ခြင်းဖြစ်သည်ဟု ဆိုသည်။

သွယ်တန်းထားသည် လျှပ်စစ်ဓာတ်လိုက်ပြီး မီးလောင်နေသူ ဦးမောင်ပါးအား ဇနီးဖြစ်သူက ရေဖြင့်ပက်ရာမှ ဇနီးဖြစ်သူပါ ဓာတ်လိုက်သေဆုံးခဲ့သည့်အတွက် သေဆုံးသူ ငါးဦးရှိခဲ့ကြောင်း သိရသည်။

“တကယ်စိတ်မကောင်းစရာ သတင်းပါ။ မင်္ဂလာဆောင်မယ့် သတိုးသားနဲ့ မိဘဆွေမျိုးတွေက မင်္ဂလာမဏ္ဍပ်ဆောက်ဖို့ အိမ်အရှေ့မှာ သံပိုက်လုံးနဲ့ထောင်ထားတဲ့ ယိုးဒယား ကော့တလဲ့ဖုန်းတိုင်ကို မပြီးရွှေ့ကြတာ၊ ၀ိတ်မနိုင်တော့ အိမ်ရှေ့မှာ သွယ်တန်းထားတဲ့ ဓာတ်အားလိုင်းကြိုးပေါ် ပြုတ်ကျသွားတဲ့အတွက် ဓာတ်လိုက်သေဆုံးသွားခဲ့ပါတယ်” ဟု သာမညကျေးရွာမှခွန်အနိုင်က ဆိုသည်။

အဆိုပါ ဓာတ်လိုက်သေဆုံးသည့်နေရာသို့ အိန္ဒုနယ်မြေရဲစခန်းမှ တာဝန်ရှိသူများက သွားရောက်စစ်ဆေးပြီး ရဲမှုခင်းဆေးစာနှင့်အတူ လူမှုကယ်ဆယ်ရေးအသင်းသားများက သေဆုံးသူ  အမျိုးသားလေးဦး၊ အမျိုးသမီးတစ်ဦးတို့အား ဘားအံပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

အဆိုပါ လျှပ်စစ်ဓာတ်လိုက်သေဆုံးမှုနှင့် ပတ်သက်၍ ကရင်ပြည်နယ်၊ ဘားအံမြို့နယ် အိန္ဒုနယ်မြေရဲစခန်းမှ သေမှုသေခင်း အမှတ်စဉ် ၁/ ၂၀၁၈ ဖြင့် အရေးယူစစ်ဆေးလျက်ရှိကြောင်း အိန္ဒုနယ်မြေရဲစခန်းမှ သိရသည်။