သြစတြေးလျ ရေငုပ်သမားနှစ်ဦး ထိုင်းကလေးများအား မကယ်ထုတ်မီ တရားစွဲဆိုခံရမှုမှ ကင်းလွတ်ခွင့်ရယူ

ဇူလိုင် ၁၄ ရက်တွင် ချင်းရိုင်ဆေးရုံ၌ Wild Boars အသင်းမှ ကလေးများအား တွေ့ရစဉ် (Photo: AFP)

ထိုင်းနိုင်ငံ မြောက်ပိုင်းတွင် ရေလွှမ်းနေသည့် ဂူထဲ၌ ပိတ်မိနေသော လူငယ် ဘောလုံးသမားအဖွဲ့အား ကယ်ထုတ်နိုင်မှုတွင် ကူညီပေးခဲ့သည့် သြစတြေးလျ ရေငုပ်သမားနှစ်ဦးသည် အကယ်၍ ကယ်ဆယ်မှု မအောင်မြင်ခဲ့ပါက တရားစွဲဆိုခံရမှုမှ ကင်းလွတ်ခွင့်ရရန် သဘောတူညီချက် ရယူခဲ့ကြောင်း သြစတြေးလျအစိုးရရုပ်သံ ABC က ဇူလိုင် ၁၆ ရက် တွင် ထုတ်လွှင့်ခဲ့သည်။

Wild Boars အသင်းမှ ကလေးများသည် ဂူထဲတွင် ၁၈ ရက်ကြာ နေထိုင်ခဲ့ရပြီးနောက် ထိုင်းနှင့် နိုင်ငံတကာမှ ရေငုပ်ကျွမ်းကျင်သူများက သုံးရက်ကြာ ကယ်ဆယ်မှုအတွင်း ဘေးကင်းစွာ လွတ်မြောက်ခဲ့ခြင်း ဖြစ်သည်။ ဂူထဲ၌ ရေငုပ်ကျွမ်းကျင် ပညာရှင်များဖြစ်သော သြစတြေးလျ မေ့ဆေးဆရာဝန် ရစ်ချက်ဟာရစ်နှင့် ၎င်း၏ တွဲဘက်ရေငုပ်သမား ခရေ့ချယ်လင်းတို့သည် ထိုကယ်ဆယ်မှုတွင် အဓိက အခန်းကဏ္ဍများမှ ပါဝင်ခဲ့ကြသည်။

အန္တရာယ်များလှသော ကယ်ဆယ်မှုတွင် တစ်စုံတစ်ရာ လွဲချော်ခဲ့လျှင် တရားစွဲဆိုခံရနိုင်မှုမှ ကာကွယ်ပေးရန်အတွက် ၎င်းတို့အား သံတမန်ရေးရာ ကင်းလွတ်ခွင့်ပေးရန် သြစတြေးလျနှင့် ထိုင်းအာဏာပိုင်များအကြား ညှိနှိုင်းခဲ့ကြပြီးနောက် ထိုကယ်ဆယ်ရေးတွင် ၎င်းတို့ ပါဝင်လာခဲ့ခြင်း ဖြစ်သည်ဟု အစိုးရ သတင်းရင်းမြစ်တစ်ဦးအား ကိုးကား၍ ABC က ဖော်ပြခဲ့သည်။

ထိုသတင်းအား သြစတြေးလျ နိုင်ငံခြားရေးရာဌာနက အတည်ပြုခြင်း သို့မဟုတ် ငြင်းဆန်ခြင်း မပြုခဲ့ဘဲ ကယ်ဆယ်ရေးနှင့် သက်ဆိုင်သော အစီအစဉ်နှင့် အကောင်အထည်ဖော်မှုဆိုင်ရာ မေးခွန်းများကို ထိုင်းတာဝန်ရှိသူများကိုသာ မေးရန်ပြောကြားခဲ့သည်။

ထိုကယ်ဆယ်ရေးသည် လုံးဝ သေရေးရှင်ရေး ဖြစ်ကြောင်း၊ ထိုလူငယ် ၁၂ ဦးနှင့် ၎င်းတို့၏ နည်းပြတို့အား အောင်မြင်စွာ ကယ်ဆယ်နိုင်ခြင်း ရှိ၊ မရှိကို ရေငုပ်ကျွမ်းကျင်သူများကပင် မရေမရာ ဖြစ်ခဲ့သေးကြောင်း ချယ်လင်းက နေရပ်သို့ ပြန်ရောက်ခဲ့ပြီးနောက် သြစတြေးလျ မီဒီယာဖြစ်သော Sunday Times သို့ ပြောကြားခဲ့သည်။ “ဒါက ကျွန် တော်တို့အတွက် အန္တရာယ်မရှိပါဘူး။ ဒါပေမဲ့ ကလေးတွေအတွက် အန္တရာယ်များလို့ အာရုံစုစည်းလို့ မရဘူး” ဟု ၎င်းက ပြောကြားခဲ့သည်။ မှောင်မည်း၍ ကျဉ်းမြောင်းသော ဂူထဲမှ ကလေးများအား ရေငုပ်သမားများက ကယ်ထုတ်လာစဉ် ကြောက်လန့်တကြားဖြစ်မှုမှ ကြိုတင်ကာကွယ်နိုင်ရန် ၎င်းတို့အား စိတ်ငြိမ်ဆေး တိုက်ကျွေးခဲ့ကြောင်း၊ ကလေးများသည် ထိတ်လန့်တကြားဖြစ်၍ တုံ့ပြန်ပါက ၎င်းတို့ကိုယ်တိုင်အပြင် ကယ်ဆယ်ရေးများကိုပါ အန္တရာယ်ဖြစ်စေမည် ဖြစ်ကြောင်း ချယ်လင်းက ပြောကြားခဲ့သည်။

ရေငုပ်သမားများက ဂူထဲ၌ ကယ်ဆယ်ရေး မလုပ်ဆောင်မီ ဂူအနီးရှိ ရေကန်တစ်ကန်တွင် ထိုင်းကလေးများနှင့်အတူ ရေငုပ်လေ့ကျင့်ခဲ့ကြောင်းလည်း ၎င်းက ပြောကြားခဲ့သည်။

ထိုကယ်ဆယ်မှုတွင် ပါဝင်ကူညီခဲ့သည့် ဗြိတိန် လိုဏ်ဂူကျွမ်းကျင်ပညာရှင် ဗာနွန် အန်စ၀ုသ်က ၎င်းအား “ကလေးသူငယ်များအား ပုံမှန်မဟုတ်ဘဲ လိင်စွဲလမ်းသူ” pedo guy ဟု သုံးနှုန်းခဲ့သည့် Tesla ကုမ္ပဏီ စီအီးအို အီလန်မက်စ်အား ဥပဒေကြောင်းအရ တုံ့ပြန်သွားမည် ဖြစ်ကြောင်း ဇူလိုင် ၁၆ ရက် တွင် ပြောကြားခဲ့သည်။

Tham Luang ဂူထဲမှ ကျဉ်းမြောင်းပြီး ရေလွှမ်းနေသော လမ်းကြောင်းများမှ တစ်ဆင့် ကလေးများအား ကယ်တင်မှုတွင် မက်စ်က ကမ်းလှမ်းခဲ့သော ရှေ့ပြေး မီနီရေငုပ်သင်္ဘောသည် လုံးဝ အလုပ်ဖြစ်ဖွယ်မရှိဟု ကယ်ဆယ်ရေးများအား လိုဏ်ဂူမြေပုံ အချက်အလက်များ ထောက်ပံ့ပေးခဲ့သည့် အန်စ၀ုသ်က ပြောကြားခဲ့သည်။

ထိုပြောကြားမှုအား မက်စ်က Follower ၂၂ သန်းကျော် ရှိသော Twitter တွင် ဇူလိုင် ၁၅ ရက်၌ တုံ့ပြန်သည့် ပို့စ်များစွာ တင်ခဲ့ပြီး အန်စ၀ုသ် ကိုလည်း အမည်မတပ်ဘဲ Pedo guy ဟု သုံးနှုန်းခဲ့ခြင်း ဖြစ်သည်။ ယင်းနောက် တင်ထားသည့် ထိုစာများအား မက်စ်က နောက်ပိုင်းတွင် ပြန်ဖြုတ်ချခဲ့သော်လည်း မှတ်ချက်ပေးရန် Tesla ကုမ္ပဏီမှတစ်ဆင့် တောင်းဆိုမှုကို တုံ့ပြန်မှု မပြုလုပ်ခဲ့ပေ။

အန်စ၀ုသ်က မက်စ်တင်ခဲ့သော စာအားလုံးကို အပြည့်အ၀ ပြန်လည် မသုံးသပ်ရသေးကြောင်း၊ ကြားရုံသာ ကြားထားရကြောင်း ဇူလိုင် ၁၆ ရက်တွင် ပြောကြားခဲ့သည်။ ထိုစွပ်စွဲချက်များအတွက် မက်စ်အား တရားစွဲမည်လားဟု မေးမြန်းမှုကို အန်စ၀ုသ်က ၎င်းထင်ထားသည့်အတိုင်း မှန်လျှင် တရားစွဲမည် ဖြစ်ကြောင်း ဖြေကြားခဲ့သည်။

လှိုဏ်ဂူအတွင်း ပိတ်မိနေသည့် ထိုင်းကလေး ၁၃ ဦးအနက်မှ လေးဦးအား  စတင်ကယ်ထုတ်နိုင်ပြီဖြစ်ကြောင်း ထိုင်းကာကွယ်ရေးဝန်ကြီးဌာန၏ ပြောရေးဆိုခွင့်ရှိသူပြောကြား

မယ်ဆိုင်လှိုဏ်ဂူအတွင်း ပိတ်မိနေသည့် ထိုင်းကလေးငယ် ၁၃ ဦးအနက်မှ လေးဦးအား ယနေ့ (ဇူလိုင်လ ၈ ရက်) ညနေပိုင်းတွင် စတင်ကယ်ထုတ်နိုင်ခဲ့ကြောင်း ထိုင်းကာကွယ်ရေးဝန်ကြီးဌာန၏ ပြောရေးဆိုခွင့်ရှိသူက AFP သတင်းဌာနသို့ ပြောကြားခဲ့သည်။

ထိုင်းကလေး ၁၃ ဦးထဲမှ လေးဦးမှာ လှိုဏ်ဂူအတွင်းရှိ ကယ်ဆယ်ရေးအခြေစိုက်စခန်းသို့ ရောက်ရှိနေပြီဖြစ်ကြောင်း၊ ယင်းကလေး လေးဦးမှာ မကြာမီအပြင်သို့ ထွက်လာနိုင်လိမ့်မည်ဖြစ်ကြောင်း ကာကွယ်ရေးဝန်ကြီးဌာန ပြောရေးဆိုခွင့်ရှိသူ၏ ပြောကြားချက်ကို ကိုးကား၍ AFP သတင်းဌာနက ဖော်ပြထားသည်။

ထို့ပြင် လှိုဏ်ဂူအတွင်း ပိတ်မိနေသည့် ထိုင်းကလေးငယ် ၁၃ ဦးအနက်မှ နှစ်ဦးအား ယနေ့ ညနေပိုင်းတွင် စတင်ကယ်ထုတ်နိုင်ခဲ့ပြီး ဆေးရုံသို့ ပို့ဆောင်လိုက်ပြီဖြစ်ကြောင်း ထိုင်းနိုင်ငံပြည်တွင်း မီဒီယာများ၏ ဖော်ပြမှုအရ သိရသည်။

အဆိုပါ ပိတ်မိနေသူ ၁၃ ဦးအနက်မှ ၂ ဦးအား စတင်ကယ်ထုတ်နိုင်ကြောင်း အာဏာာပိုင်များ၏ သီးခြားအတည်ပြုချက် ရယူနိုင်ခြင်း မရှိသေးသော်လည်း ထိုင်းပြည်တွင်း မီဒီယာများမှရရှိသော အချက်အလက်များအား ကိုးကား၍ CAN သတင်းဌာနမှလည်း ကလေးနှစ်ဦး လွတ်မြောက်လာကြောင်း ဖော်ပြထားသည်။

ထို့ပြင် လှိုင်ဂူအတွင်း ပိတ်မိနေသည့် ကလေးများနှင့်ပတ်သက်၍ မြေပြင်အခြအနေများကို သွားရောက် သတင်းရယူကာ လူမှုကွန်ရက်စာမျက်နှာတွင် သတင်းများဖော်ပြပေးနေသည့် ကိုစည်သူမောင်၏ facebook တွင်လည်း ကလေးနှစ်ယောက်ထွက်ရှိလာပြီဖြစ်ကြောင်း၊ မယ်ဆိုင်လှိုဏ်ဂူအနီးသို့ ပြည်ထဲရေးဝန်ကြီးလည်း ရောက်ရှိလာကြောင်း ဖော်ပြထားသည်။

စိုးရွံ့စွာ စောင့်ကြည့်ခဲ့ကြရသည့် မယ်ဆိုင်ဂူထဲက ကလေး ၁၃ ဦးရဲ့ အပြန်လမ်း

ထိုင်းနိုင်ငံ မယ်ဆိုင်ဂူအတွင်း ပိတ်မိနေသော ကလေးငယ်များအား ရှာဖွေရန် လုပ်ဆောင်နေသော ကယ်ဆယ်ရေးများကို ဇူလိုင် ၇ ရက်က တွေ့ရစဉ် (ဓာတ်ပုံ – AFP)

ကမ္ဘာ့ဖလားပွဲ ကျင်းပနေသော်လည်း ဘောလုံးပြိုင်ပွဲအား ဖုံးလွှမ်းခဲ့သည့် သတင်းတစ်ပုဒ် ဇူလိုင် ၂၃ ရက်တွင် ထွက်ပေါ်လာခဲ့သည်။ ယင်းသတင်းမှာ ထိုင်းနိုင်ငံ ချင်းရိုင်ခရိုင်ရှိ မယ်ဆိုင်ဂူအတွင်း ၀င်ရောက်သွားကာ ပျောက်ဆုံးလျက်ရှိသည့် ကလေးငယ် ၁၂ ဦးနှင့် နည်းပြတစ်ဦးတို့၏ သတင်းဖြစ်သည်။

၎င်းတို့မှာ ချင်းရိုင်ခရိုင်၏ ဘောလုံးအသင်း (ဒေသအခေါ် တောဝက်အသင်း) မှ လူငယ်ကစားသမားများဖြစ်ပြီး ဇူလိုင် ၂၃ ရက်တွင် မယ်ဆိုင်ဂူအတွင်း ၀င်ရောက်ရာမှ သတင်းအစအနမရဘဲ ပျောက်ဆုံးခဲ့ခြင်း ဖြစ်သည်။ ပျောက်ဆုံးခဲ့သည့် ကစားသမားငယ်များနှင့် နည်းပြတို့၏ အသုံးအဆောင်များကို ဂူဝတွင် တွေ့ရှိမှသာ ဂူအတွင်း ၀င်ရောက်ခဲ့ခြင်း ဖြစ်သည်ဟု ယုံကြည်ပြီး သက်ဆိုင်ရာ ဒေသအာဏာပိုင်များက ရှာဖွေခဲ့ခြင်းဖြစ်သည်။
ပျောက်ဆုံးကလေးငယ်များအတွက် ထိုင်းအစိုးရ ကြိုးပမ်းမှု ဇွန် ၂၃ ရက်တွင် စတင်ပျောက်ဆုံးခဲ့သည့် ကလေးငယ်များ၏ ကျောပိုးအိတ်နှင့် စက်ဘီးများကို မယ်ဆိုင်ဂူဝတွင် တွေ့ရှိကတည်းက ကလေးငယ်များမှာ ဂူအတွင်း ၀င်ရောက်ခဲ့ပြီး ရေပြည့်ခြင်းကြောင့် ထွက်မရ ဖြစ်နေသည်ဟု ထိုင်းအစိုးရက ယုံကြည်ခဲ့သည်။

ဇွန် ၂၄ ရက်တွင် ပျောက်ဆုံးကလေးငယ်များ ရှာဖွေရန် ဒေသခံ ရေငုပ်သမားများနှင့် စတင်ရှာဖွေခဲ့ပြီး ဇွန် ၂၅ ရက်တွင် ထိုင်းတော်ဝင် ရေတပ်မတော်မှ ကျွမ်းကျင်ရေငုပ်သူများ ရောက်ရှိလာကာ ကယ်ဆယ်ရေးလုပ်ငန်းများ ဆက်လက် ဆောင်ရွက်ခဲ့သည်။ သို့သော် မိုးရာသီဖြစ်သဖြင့် မယ်ဆိုင်ဂူအတွင်း ရေပြည့်နေခြင်းကြောင့် ရှာဖွေရေးလုပ်ငန်းစဉ်မှာ လျင်လျင်မြန်မြန်ဖြင့် ရှေ့ဆက်နိုင်ခြင်းမရှိပေ။

ထိုင်းဘုရင် မဟာဗက်ဂျီရာ လောင်ကွန်းကလည်း ပျောက်ဆုံးကလေးငယ်များကို အမြန်ရှာဖွေတွေ့ရှိရေး ဦးစားပေးဆောင်ရွက်ရန် အစိုးရအဖွဲ့ကို တိုက်တွန်းခဲ့သည်။

ဂူဝတွင်လည်း ပျောက်ဆုံး ကလေးငယ်များ၏ မိဘများမှာလည်း ပူဆွေးမှုအပြည့်ဖြင့် စောင့်ဆိုင်းလျက်ရှိသည်။ အလားတူ ထိုင်းအစိုးရကလည်း နိုင်ငံတကာက ကူညီမှုများကို လက်ခံထားပြီး ရှာဖွေရေးအတွက် ဆောင်ရွက်ခဲ့သည်။ ဇွန် ၂၇ ရက်တွင် ဗြိတိန်မှ ရေငုပ်ကျွမ်းကျင်သူ သုံးဦးနှင့် ပစိဖိတ်ဒေသဆိုင်ရာ အမေရိကန်တပ်မတော်၏ အမိန့်ဖြင့် ရောက်ရှိလာသည့် ကူညီကယ်ဆယ်ရေးအဖွဲ့ဝင် ၃၀ တို့ ရောက်ရှိလာခဲ့ပြီး ရှာဖွေရေး လုပ်ငန်းများကို မြှင့်တင်ခဲ့သည်။ အလားတူ ဒေသတွင်းနိုင်ငံများဖြစ်သည့် လာအို၊ စင်ကာပူ၊ ကမ္ဘောဒီးယားနိုင်ငံများမှလည်း ကူညီကယ်ဆယ်ရေး လုပ်ငန်းအတွက် ပညာရှင်များကို စေလွှတ်ပေးခဲ့သည်။ ထိုင်းတော်ဝင်ရေတပ်၊ လေတပ်၊ ရဲတပ်ဖွဲ့၊ သစ်တောနှင့် သက်ဆိုင်ရာဌာနအသီးသီး၊ ကယ်ဆယ်ရေးအဖွဲ့များဖြင့် နိုင်ငံပေါင်း ၁၁ နိုင်ငံကပါ ပူးပေါင်းရှာဖွေခဲ့သည်။

သဘာဝလိုဏ်ဂူဖြစ်သည့် အဆိုပါ မယ်ဆိုင်ဂူမှာ မိုးတွင်းကာလတွင် ရေပြည့်နေခြင်းကြောင့် ဒေသခံများ အနေဖြင့် ဂူအတွင်းပိုင်းအထိ သွားရောက်ခြင်းမပြုသည့် လိုဏ်ဂူတစ်ခုဖြစ်သည်။ အဆိုပါ ဂူအတွင်းသို့ ဂူလေ့လာရေးအဖွဲ့တစ်ခုဖြစ်သည့် ပြင်သစ်အဖွဲ့တစ်ဖွဲ့သာ ၀င်ရောက်နိုင်ခဲ့သည်။ အဆိုပါအဖွဲ့၏ လေ့လာချက်များအရ ယင်းဂူအတွင်း ပတ္တယားကမ်းခြေဟု အမည်ပေးထားသည့်နေရာ၌ ပျောက်ဆုံးကလေးငယ်များ ရှိနိုင်သည်ဟု ရှာဖွေရေးအဖွဲ့များက ယုံကြည်ကြသည်။

ဇွန် ၂ ရက်တွင် ခန့်မှန်းထားသည့်အတိုင်း ဂူအတွင်းရှိ ပတ္တယားကမ်းခြေ အမည်ပေးထားသည့် နေရာတွင် ပျောက်ဆုံးကလေးငယ်များကို ဗြိတိန်ရေငုပ်အဖွဲ့က ရှာဖွေတွေ့ရှိခဲ့သည်။ ကလေးငယ်များကို တွေ့ရှိခဲ့သည့်နေရာမှာ ဂူပေါက်ဝမှ တိုင်းတာပါက ၃ ဒသမ ၈ မိုင် အကွာအဝေးတွင်ရှိပြီး မယ်ဆိုင်ဂူထိပ် အမြင့်ဆုံးအပိုင်းမှ တိုင်းတာပါက နှစ်မိုင်ခွဲတွင် တွေ့ရှိခဲ့ခြင်းဖြစ်သည်။

ကလေးငယ်များ ပျောက်ဆုံးနေသည့် မယ်ဆိုင်ဂူသို့ မိုင်းဖုန်းဆရာတော် ကြွရောက်လာခြင်း

ကမ္ဘာတစ်ဝန်းတွင် ထိပ်တန်းသတင်းအဖြစ် နေရာယူခဲ့သည့် ထိုင်းကလေးငယ်များ ပျောက်ဆုံးနေသည့်ဂူသို့ ရှမ်းတိုင်းရင်းသား ဆရာတော် မိုင်းဖုန်းဆရာတော် ကြွရောက်လာခဲ့သည်။ ကလေးငယ်များ ပိတ်မိနေပြီး တစ်ပတ်အကြာ ဇူလိုင် ၂၉ ရက်တွင် ဆရာတော် ကြွရောက်လာခြင်းဖြစ်သည်။ ယင်းနောက် မေတ္တာပို့ခြင်းများ လုပ်ဆောင်ခဲ့ပြီး ဇူလိုင် ၃၀ ရက်တွင် ဒုတိယအကြိမ် ဆရာတော်ကြွရောက်လာပြီး ပျောက်ဆုံးနေခဲ့သည့် ကလေးငယ်များအားလုံးကို နှစ်ရက်သုံးရက်အတွင်း ပြန်လည်တွေ့ရှိမည်ဟု မိန့်ကြားခဲ့သည်။

ယင်းနောက် မယ်ဆိုင်ဂူရှေ့တွင် မေတ္တာပို့ခြင်းများ လုပ်ဆောင်ခဲ့အပြီးတွင် ကလေးငယ်များကို နှစ်ရက်အကြာတွင် တွေ့ရှိခဲ့ခြင်းဖြစ်သည်။

“ဆရာတော်က သမာဓိအားကောင်းတယ်။ ဆရာတော်က သူအာရုံရတဲ့နေရာကို ချက်ချင်းကြွတာ။ အခု ဒီဂူကိုလည်း ကြွတယ်ဆိုတာက ဘာအစီအစဉ်မှမရှိဘူး။ ဒီအတိုင်းပဲ ချက်ချင်းကြွတာ” ဟု ဆရာတော်နှင့် နှစ်ပေါင်း ၂၀ နီးပါးခန့် အတူရှိနေသူတစ်ဦးက ပြောကြားသည်။

ထို့ပြင် ကလေးငယ်များအား ပြန်လည်တွေ့ရှိအပြီးတွင် တတိယအကြိမ်အဖြစ် မယ်ဆိုင်ဂူသို့ ကြွရောက်ခဲ့ပြီး ဂူအတွင်း မေတ္တာပို့ရွတ်ဖတ်ခြင်းများကို လုပ်ဆောင်ခဲ့ကြောင်း သိရသည်။ ယခုအကြိမ်တွင် ဆရာတော်က ဂူအတွင်း ကြွရောက်ရာ အပြင်တွင် ကလေးများကို စောင့်ဆိုင်းနေကြသည့် ကလေးမိဘများလည်း လိုက်ပါသွားခဲ့ကြသည်။

သက်တော် ၅၅ နှစ်ရှိ မိုင်းဖုန်းဆရာတော်မှာ ရှမ်းပြည်နယ်ဒေသခံများအပြင် ထိုင်း၊ ဘူတန်စသည့် နိုင်ငံများမှလည်း ယုံကြည်စွာ ကိုးကွယ်လျက်ရှိသည့် ဆရာတော်တစ်ပါးဖြစ်သည်။ ဆရာတော်မှာ ဒေသခံများ၏ ပြောကြားချက်အရ သမာဓိအားကောင်းသည့် ဆရာတော်တစ်ပါးဖြစ်ပြီး ဘာသာလူမျိုးခွဲခြားခြင်း မရှိဘဲ အလှူအတန်းကိုလည်း ရက်ရောစွာ လှူဒါန်းကြောင်း သိရသည်။

“မိုင်းဖုန်းဆရာတော် ရှမ်းပြည်နယ်(မြောက်ပိုင်း)ကို ကြွလာရင် ဒေသခံတွေအနေနဲ့ မထင်မှတ်ထားလောက်အောင် ဖူးမြော်ကြည်ညိုလေ့ ရှိကြတယ်။ ကျွန်တော့်အနေနဲ့ မိုင်းဖုန်းဆရာတော်ဘုရားနောက်ကို မှတ်တမ်းဓာတ်ပုံတွေရိုက်ဖို့ သုံးခါလောက် လိုက်ခဲ့ဖူးတယ်။ ဘယ်နေရာ ဘယ်ဒေသရောက်ရောက် ဒေသခံတွေအနေနဲ့ ယုံယုံကြည်ကြည် ကိုးကွယ်ကြတယ်။ မိုင်းဖုန်းဆရာတော်စွန့်တဲ့ လက်ဖွဲ့အဆောင်တွေကို အလုအယက်နဲ့ယူပြီး အလေးအနက်ထား အဆောင်ထားလေ့ ရှိကြတယ်။ ဆရာတော်ဘုရားကို လှူဒါန်းတဲ့ ၀တ္ထုငွေတွေ၊ ပစ္စည်းတွေဆိုလည်း ဆရာတော်ဘုရားက လက်ထဲမထားဘဲ နီးစပ်ရာကို ပေးကမ်းလှူဒါန်း စွန့်ကြဲလိုက်တာမျိုးလည်း တွေ့ရတယ်။ ဒေသခံတွေအနေနဲ့လည်း မိုင်းဖုန်းဆရာတော် ကြွလာမယ့်နေရာကို ဘယ်လောက်ဝေးတဲ့ နေရာကဖြစ်ဖြစ် တကူးတက လာရောက်ဖူးမျှော်ကြတယ်” ဟု ရှမ်းပြည်နယ် ဒေသခံတစ်ဦးက ပြောကြားသည်။

၂၀၀၄ ခုနှစ်တွင် မူးယစ်ရာဇာ နော်ခမ်းနှင့် ပတ်သက်သည်ဟုဆိုကာ ထိုအချိန်က စစ်ထောက်လှမ်းရေးအဖွဲ့က ဖမ်းဆီးရန် ကြိုးစားခဲ့သော်လည်း ဆရာတော်အား ဖမ်းဆီးနိုင်ခဲ့ခြင်းမရှိပေ။ ဆရာတော်မှာ ယင်းကာလတွင် ဘူတန်နိုင်ငံသို့ သာသနာပြုရောက်ရှိခဲ့ပြီး ဘူတန်ဘုရင်က ကိုးကွယ်မှုကြောင့် ကာလအတန်ကြာနေခဲ့သည်။ ယင်းနောက် ထိုင်းနိုင်ငံသို့ ပြန်လာပြီး သာသနာပြု လုပ်ငန်းများ လုပ်ကိုင်ခဲ့သည်။

“အဲဒီတုန်းက ဆရာတော်နဲ့လည်း ဘာမှမဆိုင်ဘူး။ နော်ခမ်းနဲ့ ပတ်သက်တယ်ဆိုပြီးတော့ ထောက်လှမ်းရေးက ဖမ်းဖို့လုပ်တာ။ ဒါပေမဲ့ မမိပါဘူး။ အဲဒီကာလတုန်းက ဆရာတော့်အကြောင်း စာအုပ်ထုတ်ဖို့ စာပေစိစစ်ရေးကို သွားတင်တော့ အဆူတောင်ခံရသေးတယ်။ ဦးသိန်းစိန် လက်ထက်ကျမှ ပြည်ဝင်ခွင့်ပြန်ရတာ” ဟု ဆရာတော်၏ အတ္ထုပတ္တိအား ရေးသားခဲ့သည့် စာရေးဆရာ ကိုလတ်(သီပေါ) က ပြောကြားသည်။

ထိုင်းကလေးငယ်များ ပျောက်ဆုံးမှုနှင့် ပတ်သက်၍ ဆရာတော်၏ မိန့်ကြားချက်မှာ ထိုင်းလူထုအတွင်း ပျံ့နှံ့ခဲ့ပြီးနောက်ပိုင်းတွင် ဆရာတော်အား သက်ဝင်ယုံကြည်သူ များပြားလာနိုင်ကြောင်း ၎င်းက သုံးသပ်ပြောကြားသည်။

ချီလီမိုင်းတွင်းလုပ်သားများကို ကယ်ဆယ်ရေးထက် ပိုခက်သည့် ထိုင်းကလေးငယ်များကို ကယ်ဆယ်မှု

၂၀၁၀ ပြည့်နှစ်တွင် ချီလီနိုင်ငံ၌ နှစ်ပေါင်း ၁၀၀ နီးပါးခန့်ရှိ မိုင်းတွင်းတစ်တွင်း ပြိုကျခဲ့သည့် ဖြစ်စဉ်တွင် မိုင်းလုပ်သား ၃၃ ဦး ပိတ်မိခဲ့သည်။ မိုင်းလုပ်သားများမှာ မြေအောက်မိုင်ဝက်ခန့်တွင် ၆၉ ရက်ကြာ ပိတ်မိခဲ့ပြီး အမေရိကန်၊ ကနေဒါစသည့် နိုင်ငံများမှ ကယ်ဆယ်ရေးလုပ်ငန်းများတွင် ပါဝင်ကူညီခဲ့ရသည်။ ရက်အတန်ကြာ မြေပြင်မှ အပေါက်ဖောက်ကာ ပိတ်မိမိုင်းလုပ်သားများကို ကယ်ဆယ်နိုင်ခဲ့သည်။

မြေအောက်တွင် ပိတ်မိခဲ့သည့် ချီလီမိုင်းတွင်းလုပ်သားများကို ကယ်ဆယ်နိုင်ခဲ့သော်လည်း ထိုင်းနိုင်ငံ မယ်ဆိုင်ဂူအတွင်းမှ ထိုင်းကလေးငယ်များကို အပြင်သို့ပြန်လည်ခေါ်ဆောင်ရန် စိန်ခေါ်မှုများစွာက ဆီးကြိုလျက်ရှိသည်။

“သတင်းစာရှင်းလင်းပွဲမှာ ထိုင်းအာဏာပိုင်တွေက ပြောတယ်။ ကလေးတွေကို တွေ့ရလို့ ပျော်တာခဏပဲရှိတယ်။ အဲဒီကလေးတွေကို ဘယ်လိုအပြင်ထုတ်ရမလဲ ဆိုတာက သူတို့အတွက် ခက်ခဲတယ်လို့ ပြောတယ်။ ချီလီမိုင်းတွင်းထက် ကယ်ရတာ ပိုခက်တယ်တဲ့” ဟု အဆိုပါဂူရှေ့တွင် သတင်းရယူကာ လူမှုကွန်ရက်စာမျက်နှာ Facebook တွင် ထုတ်လွှင့်ပေးနေသည့် ကိုစည်သူမောင်က ပြောကြားသည်။

ဂူအမိုးပေါက်မှ အပေါက်ဖောက်ကာ ကယ်ဆယ်ရန် ကြံစည်ခဲ့သော်လည်း ကလေးများ ရှိနေသည့်နေရာအား အတိအကျ မခန့်မှန်းနိုင်ခြင်းမှာ အတားအဆီးတစ်ခုဖြစ်သည်။ ယင်းကြောင့် ဂူတွင် ကယ်ပေါက်များ ၁၀၀ ကျော် တွေ့ရှိခဲ့သော်လည်း ၁၈ ပေါက်သာ အောက်သို့ အနည်းငယ်ဆင်းနိုင်ကြောင်း သိရသည်။

ဂူဝမှ ကလေးငယ်များထံ သွားရောက်ရာတွင် ခြောက်နာရီကျော် သွားရောက်ရပြီး ရေပြည့်နေသည့် နေရာများကို ရေငုပ်သွားလာရသည်။ လမ်းတွင် အောက်ဆီဂျင် ပြတ်လပ်မှုမရှိစေရန် နေရာများ သတ်မှတ်ပြီး အောက်ဆီဂျင်ဘူးများကို အရန်သင့်ထားရှိရသည်။ ကလေးငယ်များကို ရေငုပ်ပြီး အပြင်သို့ ခေါ်ထုတ်နိုင်ရန်အတွက် ရေကူးလေ့ကျင့်ပေးခြင်း၊ ရေငုပ်လေ့ကျင့်စေခြင်းများကို ပြုလုပ်ခဲ့သည်။ ထို့ပြင် ဂူအတွင်းရှိ အပေါက်များမှတစ်ဆင့် ကယ်ထုတ်နိုင်ရန် ဂူပေါက်များကို ရှာဖွေခြင်း၊ ဂူအတွင်းမှ ရေများ လျော့နည်းစေရန် ရေစုပ်ထုတ်ခြင်းများကို လုပ်ဆောင်လျက်ရှိသည်။

ယင်းသို့ စနစ်တကျ လုပ်ဆောင်လျက်ရှိသော်လည်း သတင်းဆိုးတစ်ပုဒ် ဇူလိုင် ၆ ရက်တွင် ထွက်ပေါ်လာခဲ့သည်။ ယင်းသတင်းမှာ ကယ်ဆယ်ရေးလုပ်ငန်းတွင် ပါဝင်လုပ်ဆောင်နေသည့် ယခင်ရေတပ်အထူး အဖွဲ့ဝင်ဟောင်း စမာန်ကူနန်ဆိုသူသည် ဂူအတွင်း အောက်ဆီဂျင်ဘူးများ သယ်ပေးနေစဉ် ဇူလိုင် ၆ ရက် နံနက် ၂ နာရီဝန်းကျင်တွင် သေဆုံးသွားခဲ့ခြင်းဖြစ်သည်။

ရေတပ်တပ်ဖွဲ့ဝင်ဟောင်း ၃၈ နှစ်အရွယ် စမာန်ကူနန်သည် မယ်ဆိုင်ဂူအတွင်း သတ်မှတ်နေရာများအတိုင်း အောက်ဆီဂျင်ဘူးများ ပို့ဆောင်ရန် ဇူလိုင် ၅ ရက် ညပိုင်းမှ စတင်ကာ ရေငုပ်ခဲ့ခြင်းဖြစ်ပြီး အောက်ဆီဂျင်ဘူးများ ပို့ပြီးအပြန်တွင် ရေထဲတွင် လဲကျနေသည်ကို အခြားရေငုပ်သမားနှစ်ဦးက တွေ့ရသဖြင့် ၎င်းအား အရေးပေါ်ကုသမှုများ လုပ်ဆောင်ပေးခဲ့သော်လည်း သေဆုံးခဲ့ခြင်းဖြစ်ကြောင်း ထိုင်းသတင်းများတွင် ဖော်ပြချက်များအရ သိရသည်။

ယင်းသို့ ဖြစ်ပွားအပြီးတွင် ကလေးငယ်များအပြင်သို့ ရောက်ရှိရန် ခက်ခဲလာခဲ့ခြင်းဖြစ်ကြောင်း ကိုစည်သူမောင်က ပြောကြားသည်။

“ဒီလိုရေငုပ်သမား သေသွားတာက သူတို့အတွက် အဆင်မပြေဘူး ဖြစ်သွားတယ်။ ကျွမ်းကျင်တဲ့ ရေငုပ်သမားတောင် ဒီလိုဖြစ်သွားတော့ ကလေးတွေကို တွေ့ပြီး ကယ်ဆယ်တော့မှ တစ်ခုခုဖြစ်သွားမှာ သူတို့ (ထိုင်းအစိုးရ) တော်တော်စိုးရိမ်နေတယ်” ဟု ကိုစည်သူမောင်က ပြောကြားသည်။

မိုးတွင်းကာလဖြစ်သဖြင့် ယင်းကလေးငယ်များကို ခေါ်ယူမည့်လမ်းတစ်လျှောက်တွင် ရေများပြည့်လျှံနေခြင်းမှာ အဓိက အခက်အခဲတစ်ခုဖြစ်ပြီး မိုးတွင်းကာလလွန်မြောက်မှသာ ခေါ်ယူမည်ဆိုပါက လေးလခန့် ကြာမြင့်မည်ဖြစ်သည်။ သို့သော် ကလေးငယ်များကို မည်သည့်အချိန်တွင် ကယ်ဆယ်နိုင်မည်ကို ထိုင်းအာဏာပိုင်များ အနေဖြင့် ယတိပြတ် ပြောကြားနိုင်ခြင်း မရှိသေးပေ။

“သတင်းစာရှင်းလင်းပွဲတွေမှာ သူတို့ခဏခဏပြောတယ်။ ကျွန်တော်တို့ လုပ်စရာရှိတာတွေ လုပ်နေတယ်။ ကလေးတွေ ဘေးအန္တရာယ်မဖြစ်အောင် အကောင်းဆုံး လုပ်နေတယ်။ ဘယ်အချိန် အပြင်ရောက်မလဲ ဆိုတာကိုတော့ မမေးပါနဲ့။ အကောင်းဆုံး လုပ်ဆောင်နေတယ်။ သူတို့လုပ်နေတာကို သတင်းထုတ်ပြန်ပေးတယ်။ ကလေးတွေကို ဘယ်အချိန် အပြင်ခေါ်ထုတ်နိုင်မလဲ ဆိုတာက သူတို့ကို အကျပ်ရိုက်စေတယ်လို့ အမြဲတမ်းပြောတယ်” ဟု ကိုစည်သူမောင်က ပြောကြားသည်။

ထိုင်းအာဏာသိမ်းအစိုးရအတွက် ဘယ်လိုအကျိုးတွေရမလဲ

ထိုင်းနိုင်ငံတွင် လာမည့်နှစ်အတွင်း ရွေးကောက်ပွဲ ကျင်းပမည်ဟု ထိုင်းအာဏာသိမ်း စစ်ခေါင်းဆောင်တစ်ဦးဖြစ်သည့် ၀န်ကြီးချုပ် ပရာယွတ်ချန်အိုချာက Bloomberg သတင်းဌာနနှင့် အင်တာဗျူးတွင် ပြောကြားထားသည်။
ယင်းသို့ ပြောကြားပြီးနောက်တွင် ယခုလို ထိုင်းဂူအတွင်း ပိတ်မိနေသည့် ကလေးငယ်များ၏ သတင်းထွက်ပေါ်လာခဲ့ခြင်းဖြစ်ပြီး ယင်းဖြစ်ရပ်မှာ ထိုင်းလက်ရှိအစိုးရအတွက် နိုင်ငံရေးအမြတ်ထုတ်နိုင်သည့် အခြေအနေများဖြစ်ကြောင်း နိုင်ငံရေးလေ့လာသူများက ပြောကြားသည်။

ထိုင်းကလေးငယ်များ ပျောက်ဆုံးနေပြီး တစ်ပတ်ခန့်အကြာတွင် ထိုင်းနိုင်ငံ၏ အာဏာသိမ်းစစ်ခေါင်းဆောင် ၀န်ကြီးချုပ် ပရာယွတ်ချန်အိုချာ ရောက်ရှိလာခဲ့သည်။ ယင်းသို့ ရောက်ရှိလာပြီးနောက်တွင် ဂူအတွင်း ၀င်ရောက်စစ်ဆေး ညွှန်ကြားခဲ့ပြီး ဂူအပြင်ဘက်ရှိ ကျောင်းသားမိဘများအား တွေ့ဆုံကာ အားပေးစကား ပြောကြားခဲ့သည်။

ဇွန် ၂၉ ရက် နံနက်ပိုင်းတွင် ရောက်ရှိလာသည့် ထိုင်းဝန်ကြီးချုပ်နှင့်အဖွဲ့မှာ လူငယ် ၁၃ ဦး စက်ဘီးစီးပြီး အိမ်ပြန်လာသည့် ပုံပါရှိသော အင်္ကျီအ၀ါရောင်များကို ၀တ်ဆင်ထားခဲ့သည်ဟု တာချီလိတ်သတင်းအေဂျင်စီ၏ လူမှုကွန်ရက် စာမျက်နှာတွင် ဖော်ပြထားသည်။

ကလေးငယ်များ မတွေ့ရှိမီက လာရောက်ခဲ့သည့် ထိုင်းဝန်ကြီးချုပ်မှာ မိဘများနှင့် တွေ့ဆုံစဉ် အပြီးအထိနေမည်၊ ကလေးများပြန်ထွက်လာမှသာ ပြန်မည်ဟု အားပေးစကားများ ပြောကြားမှုအပေါ် ၀န်ကြီးချုပ်၏ ကတိတည်မတည်ကို စောင့်ကြည့်ရမည်ဟု ထိုင်းမီဒီယာများက ရေးသားလျက်ရှိကြောင်း အဆိုပါ သတင်းအေဂျင်စီတွင် သတင်းဖော်ပြထားသည်။ ထို့ပြင် ကယ်ဆယ်ရေးစခန်းများတွင် ကူညီသူများအတွက် ချက်ပြုတ်နေသူများထံ သွားရောက်ကာ ဟင်းများ ကိုယ်တိုင်ချက်ပြုတ်ခြင်းများကိုလည်း ပြုလုပ်ခဲ့သည်။

ယင်လတ်ရှင်နာဝပ်အစိုးရထံမှ ထိုင်းစစ်တပ်မှ နိုင်ငံရေးအာဏာသိမ်းပြီးနောက်တွင် ထိုင်းကာကွယ်ရေးဦးစီးချုပ်အဖြစ် တာဝန်ထမ်းဆောင်ခဲ့သည့် ပရာယွတ်ချန်အိုချာက ၀န်ကြီးချုပ်အဖြစ် တာဝန်ယူခဲ့သည်။ ယင်းနောက်ပိုင်းတွင် ထိုင်းအခြေစိုက်မီဒီယာများက ဝေဖန်မှု မြင့်တက်ခဲ့သည်။ ထို့ပြင် ထိုင်းပြည်သူများကလည်း ဝေဖန်မှုများရှိခဲ့ပြီး နောက်ပိုင်းတွင် ယခုဖြစ်စဉ်မှာ နိုင်ငံရေး အမြတ်ထုတ်နိုင်သည့် အခြေအနေဖြစ်ကြောင်း နိုင်ငံရေးလေ့လာသူများက သုံးသပ်ပြောကြားသည်။

ကလေးများအား ကယ်ဆယ်ရေး လုပ်ဆောင်ရာတွင် နိုင်ငံတကာ အကူအညီများကို အချိန်မဆိုင်းဘဲ လက်ခံခဲ့ခြင်း၊ ကူညီသူများကို နွေးထွေးစွာ ကြိုဆိုခြင်းများမှာ အတုယူရမည့် အချက်များဖြစ်သည်ဟု ယင်းဖြစ်စဉ်အား စောင့်ကြည့်နေသူများက သုံးသပ်ပြောကြားသည်။

လက်ရှိတွင်လည်း ကယ်ဆယ်ရေး လုပ်ဆောင်နေသည့် မယ်ဆိုင်ဂူဝတွင် အစားအစာများကို အချိန်မရွေး စားနိုင်ရန် စီစဉ်ထားခြင်း၊ တစ်ကိုယ်ရေ သန့်ရှင်းရေးအတွက် ဆံပင်ညှပ်ပေးခြင်း၊ နှိပ်နယ်ပေးခြင်းများကို ထိုင်းပြည်သူများက အခမဲ့ ၀န်ဆောင်မှုများ ပေးလျက်ရှိသည်။

သို့သော် ဂူဝတွင် မိဘများနှင့် အတူနေပြီး ကလေးများပြန်ထွက်လာမည်ဟု ပြောကြားခဲ့သည့် ထိုင်းဝန်ကြီးချုပ် ပရာယွတ်ချန်အိုချာမှာမူ ပြန်သွားပြီဖြစ်သည်။

ကလေးငယ်များ ပျောက်ဆုံးနေမှုကြောင့် တစ်ကမ္ဘာလုံး၏ စိတ်ဝင်စားမှုကို ခံခဲ့ရသည့် ထိုင်းနိုင်ငံ အနေဖြင့် ယခုဖြစ်စဉ်မှာ နိုင်ငံအတွက် ပုံရိပ်တစ်ခုဖြစ်စေခဲ့သည်။ နိုင်ငံ၏ စီးပွားရေးအတွက် အဓိကဒေါက်တိုင်တစ်ခုဖြစ်သည့် ခရီးသွားလုပ်ငန်းအတွက်လည်း ထောက်ပံ့မှုကောင်းကောင်း ဖြစ်စေနိုင်သည့် အချက်ဖြစ်သည်။

ခရီးသွားလုပ်ငန်းအတွက် နိုင်ငံ၏ ပုံရိပ်များကို ဈေးကွက်တင် ရောင်းချခြင်းကျွမ်းကျင်သည့် ထိုင်းအစိုးရအတွက်လည်း ကမ္ဘာလှည့်ခရီးသွားများ အကြိုက်တွေ့လာနိုင်သည့် နေရာတစ်ခုလည်း ဖြစ်နိုင်သည်။

ထိုင်းကလေးတွေ ကယ်ဆယ်ရေးက မြန်မာနိုင်ငံအတွက် ဘာတွေအတုယူသင့်သလဲ

ထိုင်းကလေးငယ်များ ပျောက်ဆုံးမှုနှင့် ပတ်သက်ပြီး မြန်မာနိုင်ငံမှ ကူညီမည်ဟု ဇွန် ၂၈ ရက်တွင် ထုတ်ပြန်ကြေညာခဲ့ပြီး ရှမ်းပြည်နယ်အစိုးရအဖွဲ့မှ ဘဏ္ဍာရေးဝန်ကြီး ဦးဆောင်ပြီး မယ်ဆိုင်ဂူသို့ ရောက်ရှိခဲ့ပြီး ကူညီမှုများ ဆောင်ရွက်ခဲ့သည်။ ထို့ပြင် ရေငုပ်ပြီး ကလေးများကို ဂူပြင်သို့ကယ်ဆယ်ရန် ဆောင်ရွက်နေသော်လည်း နောက်ထပ်နည်းလမ်း တစ်ခုအဖြစ် မြန်မာနိုင်ငံဘက်ခြမ်းရှိ မယ်ဆိုင်ဂူအပေါက်ရှိနိုင်သည့် နေရာအား ရှာဖွေမှုများကို ဇူလိုင် ၇ ရက်က လုပ်ဆောင်ခဲ့သည်။ တာချီလိတ်မြို့ လွယ်တော်ခမ်းကျေးရွာအုပ်စုအတွင်းရှိ အာဒီးရွာအနီးရှိ ဂူတစ်ဂူနှင့် ဆက်စပ်နိုင်သည်ဟု ဒေသခံများက ပြောကြားသဖြင့် ထိုင်းနိုင်ငံဘက်က အကူအညီ တောင်းခံလာခဲ့ခြင်း ဖြစ်သည်။ ယင်းကြောင့် မြန်မာအစိုးရဘက်မှ ဇူလိုင် ၇ ရက် နံနက် ၈ နာရီခန့်မှ စတင်ကာ သွားရောက် ရှာဖွေနေကြောင်း သိရသည်။

ကလေးငယ်များ ပိတ်မိနေသည့် မယ်ဆိုင်ဂူမှာ မြန်မာနိုင်ငံနယ်စပ်အနီးတွင် တည်ရှိပြီး တာချီလိတ်မြို့နှင့် ၁၀ ကီလိုမီတာသာ ကွာဝေးကြောင်း သိရသည်။

ယင်းသို့ ကူညီမှုများရှိနေသော်လည်း ကလေးများကို ကယ်ဆယ်ရေးလုပ်ငန်းများ လုပ်ဆောင်နေသည့် မယ်ဆိုင်ဂူဝရှိ နိုင်ငံတကာ အကူအညီပေးရေးအဖွဲ့များတွင် မြန်မာနိုင်ငံသားတစ်ဦးမျှ မတွေ့ရကြောင်း ဇွန် ၂၄ ရက်မှ စတင်ကာ မယ်ဆိုင်ဂူဝသို့ ရောက်ရှိနေသည့် ကိုစည်သူမောင်က သူ၏ လူမှုကွန်ရက် စာမျက်နှာတွင် ရေးသားထားသည်။

ယခုဖြစ်စဉ်မှာ နိုင်ငံတကာ ကယ်ဆယ်ရေးအဖွဲ့များက ထုတ်ဖော်ပြောကြားထားသည့်အတိုင်း ရှားပါးဖြစ်စဉ်တစ်ခုဖြစ်သဖြင့် မြန်မာနိုင်ငံ အနေဖြင့် ကယ်ဆယ်ရေးလုပ်ငန်းများ လုပ်ကိုင်နေသည်ကို လေ့လာသင့်ကြောင်း ၎င်းက ဆိုသည်။

“US Airforce မှ ရေဒါကျွမ်းကျင်သူ စစ်ဘက်ဆိုင်ရာ အရာရှိကြီးများ၊ စစ်သံအရာရှိကြီများပါမကျန် လာရောက် ပူးပေါင်းခဲ့ကြတယ်။ ဒါတင်ပဲလားဆိုတော့ မဟုတ်သေးပါဘူး။ ရုရှား၊ အင်္ဂလန်၊ သြစတြေးလျား၊ ဒတ်ခ်ျ၊ ဆွီဒင်၊ ဖိလစ်ပိုင်၊ တရုတ်၊ လာအိုနိုင်ငံအသီးသီးတို့က ကျွမ်းကျင်တဲ့ ကယ်ဆယ်ရေးသမား အများအပြား ၀င်ရောက်လာပြီး ကယ်ဆယ်ရေးလုပ်ငန်းတွေမှာ ပူးပေါင်းပါဝင်ကာ တက်ညီလက်ညီ လုပ်ကြကိုင်ကြနေကြပုံတွေက ပူးပေါင်းစစ်ရေး လေ့ကျင့်နေသလားတောင် ထင်ရပါတယ်။ တကယ့် Field အတွေ့အကြုံတွေကို ရယူနေသလား ထင်ရပါတယ်။ ဦး- ၅ လည်း ကောင်းမှကောင်းပေါ့။ ဒီအချိန်ဟာ နှစ်နိုင်ငံ ချစ်ကြည်ရင်းနှီးမှုကိုလည်း အခွင့်ကောင်းယူရမည့် အကောင်းဆုံးကာလ တစ်ခုဖြစ်ပါသည်။ ဝေဟင်မြေပြင်တောင်ကြောတစ်လျှောက် အထူးကွန်မန်ဒိုတပ်မ ဌာနချုပ်မှ ဒုတပ်မမှူး၊ အမှတ်(၃) စစ်ဒေသတိုင်းမှူးများ၊ ရဲချုပ်၊ ဒုရဲချုပ်များ၊ ၀န်ကြီးများ လာရောက် ကြီးကြပ်ကွပ်ကဲကြပြီး ရှာဖွေမှုတွေကို နေ့ညစဉ်ဆက်မပြတ် အင်တိုက်အားတိုက် ကြိုးစားရှာဖွေနေကြပြီး ရှာရင်းလေ့ကျင့်၊ လေ့ကျင့်ရင်းရှာ (တိုက်ရင်းလေ့ကျင့်၊ လေ့ကျင့်ရင်းတိုက်) ပုံသဏ္ဌာန်မျိုးနဲ့ ဇာတ်တိုက်လေ့ကျင့်မှုတွေနဲ့ အတွေ့အကြုံကောင်းတွေ အများကြီး ရယူသွားပါတယ်။ နယ်စပ်ဆိုတော့ နယ်စပ်လုံခြုံရေးအတွက် အများကြီး အရေးကြီးပါတယ်။ သူ့အတွက်ရော ကိုယ့်အတွက်ရော အရေးကြီးပါတယ်။ ကလေးငယ်တွေကို ရှာဖွေနေခြင်းအပေါ် မြန်မာအပါအ၀င် ကမ္ဘာ့နိုင်ငံအသီးသီးက ကရုဏာသက်ဝင်ပြီး စိုးရိမ်သောကရောက်ကြရတယ်။ မိမိ သားသမီးချင်း မိဘချင်းကိုယ်ချင်း စာနာမိကြခြင်းပါ။ ကျွန်တော်တို့ နိုင်ငံအနေဖြင့် နှစ်နိုင်ငံချစ်ကြည်ရင်းနှီးမှုကို ရှေးရှုသည့်အနေဖြင့် ကျွမ်းကျင်ရေငုပ်သမား ငါးယောက်ခန့် အခင်းဖြစ်ပွားပြီးနောက် ကူညီရှာဖွေရေးကဏ္ဍများတွင် ပူပေါင်းပါဝင် ဖြည့်စွက်ခဲ့မည်ဆိုလျှင် ဂူအတွင်း လမ်းကြောင်းတစ်လျှောက် လုပ်ငန်း ဆောင်ရွက်ပုံအဆင့်ဆင့်ကို မြင်တွေ့ခွင့်ရနိုင်သလို နည်းပညာ လျှို့ဝှက်ချက်တွေကို မျက်ဝါးထင်ထင် လေ့လာခွင့်ရရှိနိုင်မည့် အခွင့်အရေးတွေ ရရှိမှာဖြစ်ပါတယ်” ဟု ၎င်း၏ လူမှုကွန်ရက် Facebook တွင် ရေးသားထားသည်။

ကလေးငယ်များ ရှာဖွေရေးအတွက် နိုင်ငံတကာမှ အကူအညီများကို တောင်းခံခဲ့ရာ နိုင်ငံပေါင်း ၁၁ နိုင်ငံမှ အကူအညီများပေးလျက်ရှိနေပြီး ၎င်းတို့အား ထိုင်းအစိုးရအပါအ၀င် ထိုင်းပြည်သူများက ကြိုဆိုလျက်ရှိသည်။ သတင်းလာယူသည့် မီဒီယာများအတွက်လည်း အင်တာနက်ဝိုင်ဖိုင်များ၊ လျှပ်စစ်မီး စသည်တို့ကို လိုလေးသေးမရှိအောင် စီမံဆောင်ရွက်ထားသည်။

မြန်မာနိုင်ငံတွင်လည်း ထိုင်းနိုင်ငံ မယ်ဆိုင်ဂူကဲ့သို့ပင် သဘာဝဂူများစွာရှိသဖြင့် ယင်းသို့ဖြစ်လာပါက မည်သို့တုံ့ပြန်ဆောင်ရွက်မည်ကို ပူးပေါင်းပါဝင်ကာ ကိုယ်တိုင်ကိုယ်ကျ လေ့လာသင့်ပေသည်။

ဇူလိုင် ၈ ရက် နံနက်တွင် ရရှိသော သတင်းများအရ လိုဏ်ဂူအတွင်း ပိတ်မိနေသည့် ကလေးငယ်များကို ကယ်ဆယ်ရေးအဖွဲ့များက ခေါ်ယူနိုင်ရန် လိုဏ်ဂူအတွင်းသို့ ၀င်ရောက်သွားကြပြီဖြစ်သည်။ လိုဏ်ဂူရှေ့တွင်ရှိသော မီဒီယာစင်တာကိုလည်း နေရာရွှေ့ပြောင်းခဲ့ပြီး လိုဏ်ဂူအပေါက်ဝတွင် ပလတ်စတစ်ပိုက်ကွန်များ ကာရံထားကြောင်း၊ ကယ်ဆယ်ရေးအဖွဲ့များနှင့် ကလေးငယ်များ၏ မိသားစုများမှလွဲ၍ မည်သူ့ကိုမျှ အ၀င်မခံကြောင်း အဆိုပါ လိုဏ်ဂူရှေ့တွင် သတင်းရယူနေသည့် ကိုစည်သူမောင်က ပြောကြားသည်။ အလားတူ ထိုင်းတော်ဝင်ရေတပ်မတော်ကလည်း ဇူလိုင် ၈ ရက် မွန်းလွဲပိုင်းတွင် ၎င်းတို့၏လူမှုကွန်ရက် စာမျက်နှာမှတစ်ဆင့် သတင်းတစ်ခု ထုတ်ပြန်ခဲ့သည်။ ထိုင်းတော်ဝင်ရေတပ်မတော်နှင့် နိုင်ငံတကာ ကယ်ဆယ်ရေးအဖွဲ့များက တောဝက်ဘောလုံးအသင်းအား ဂူအပြင်ကို ထုတ်လာခဲ့မည်ဆိုသည့် သတင်းစကားတစ်ခုဖြစ်သည်။

ရာသီဥတု အခြေအနေများအရ မိုးထပ်မံရွာသွန်းမည့် အခြေအနေ ရှိသဖြင့် ကယ်ဆယ်ရေးလုပ်ငန်းများကို တက်သုတ်ရိုက် စီစဉ်လာခြင်းလည်းဖြစ်သည်။ ချီလီမိုင်းတွင်း ပိတ်မိနေသူများကို ကယ်ဆယ်ရေးထက် ပိုမိုခက်ခဲသည့် ယင်းအခြေအနေမှာ နိုင်ငံတကာ ကယ်ဆယ်ရေးအဖွဲ့များ စိန်ခေါ်မှုလည်း ဖြစ်နေသည်။

အသွားအပြန် အနည်းဆုံး ၁၂ နာရီခန့်ကြာမြင့်မည့် ယင်းကယ်ဆယ်ရေးခရီးစဉ်တွင် အထိအခိုက် အနည်းဆုံးဖြစ်အောင် ထိုင်းအစိုးရနှင့် နိုင်ငံတကာ ကယ်ဆယ်ရေးအဖွဲ့များက လုပ်ဆောင်လျက်ရှိသည်။ လူသားများနှင့် သဘာဝ အတားအဆီးကြား အားပြိုင်မှုတွင် မည်သူက အနိုင်ရမလဲဆိုသည်မှာ စောင့်ကြည့်ရမည် ဖြစ်သည်။

ယခုအချိန်သည် မုတ်သုံမိုး အားကောင်းလာပြီဖြစ်သည့်အတွက် ဆက်လက်မိုးကြီးနေပါက ယခုနေရာသည် ရေမြုပ်သွားနိုင်သည့်အတွက် ကလေးများ၏ အသက်ကို အရေးပေါ် ကယ်ဆယ်ရန် လိုအပ်နေပြီဖြစ်သည်။

ထိုင်းကလေးငယ်များ ပျောက်ဆုံးနေမှုအား ရှာဖွေမှု ရက်စွဲမှတ်တမ်း

ဇွန် ၂၃ ■ ကလေးငယ်များအဖွဲ့ ပျောက်ဆုံးနေကြောင်း စတင်သိရှိ။ ၎င်းတို့၏ စက်ဘီးများ၊ ဖိနပ်နှင့် ဘောကန်ဖိနပ်များကို လိုဏ်ဂူအ၀နားတွင် တွေ့ရှိရပြီးနောက် ဒေသအာဏာပိုင်များက ရှာဖွေမှုစတင်ပြုလုပ်။ ၎င်းတို့အနေဖြင့် မိုးသည်းထန်စွာ ရွာသွန်းမှုကြောင့် ပင်မ၀င်ပေါက်အား ပြန်ရှာမတွေ့ခြင်းဖြစ်မည်ဟု ယူဆထား။

ဇွန် ၂၄ ■ လိုဏ်ဂူအတွင်း ရေလွှမ်းမိုးနေသည့်နေရာများတွင် ဒေသခံကယ်ဆယ်ရေးလုပ်သမားများ ရေငုပ်၍ စတင်ရှာဖွေ။

ဇွန် ၂၅ ■ Navy SEAL ရေငုပ်သမားများက ကလေးငယ်များအား စတင်ရှာဖွေ။ ပျောက်ဆုံးနေသူများ၏ ခြေရာ၊ လက်ရာဟု ယူဆရသည့် အရာများ တွေ့ရှိ။

ဇွန် ၂၆ ■ SEAL တပ်ဖွဲ့ဝင်များ၏ ရှာဖွေမှုကို အဟန့်အတားဖြစ်စေသည့် ရေထုထည်ပမာဏကို လျှော့ချရန် ရေစုပ်စက်များတပ်ဆင်။ စစ်သည်အင်အား ၁၀၀၀ ခန့်ကလည်း လိုဏ်ဂူနှင့်အနီးတစ်ဝိုက် ဧရိယာများအား ပိုက်စိပ်တိုက်ရှာဖွေ။ ထိုင်းနိုင်ငံ၏ နာမည်ကြီး ဒိုင်ဗင်နည်းပြများ ရှာဖွေမှုတွင် ပါဝင်လာ။

ဇွန် ၂၇ ■ ကယ်ဆယ်ရေးလုပ်ငန်းတွင် ဗြိတိန်နိုင်ငံမှ ရေငုပ်ကျွမ်းကျင်သူ သုံးဦးပါဝင်လာ။ ၎င်းတို့နှင့်အတူ အမေရိကန်တပ်မတော်မှ စစ်သည် ၃၀ ပါဝင်ပူးပေါင်း။

ဇွန် ၂၈ ■ လိုဏ်ဂူအတွင်းသို့ လွန်တူးစက်ဖြင့် ဖောက်နိုင်မည့်နေရာကို အနီအောက်ရောင်ခြည်သုံး ကင်မရာတပ်ဆင်ထားသည့် ဒရုန်းများဖြင့် လေ့လာ။ လေ့လာရေးအဖွဲ့အနေဖြင့် အနံ့ခံခွေးများကိုပါ အသုံးပြု၍ ပူးပေါင်းရှာဖွေ။ အဖွဲ့အစည်း အသီးသီးမှ လေ့လာသုံးသပ်သူများလည်း ပါဝင်လာပြီး ကယ်ဆယ်ရေး အစီအစဉ် တစ်ခုရေးဆွဲ။ အမေရိကန်ကျွမ်းကျင်သူများက အခြေစိုက်စခန်းတွင် နေထိုင်ပြီး ဗြိတိန်ရေငုပ်သမားများနှင့် အခြားရှာဖွေသူများက တောင်ကုန်းမှ လိုဏ်ဂူအတွင်းဝင်နိုင်မည့် အခြားဝင်ပေါက်များ ရှာဖွေ။

ဇွန် ၂၉ ■ SEAL ရေငုပ်သမားများ ရောက်ရှိနေသည့် လိုဏ်ဂူတတိယ အခန်းသို့ နိုင်ငံခြားသား ကျွမ်းကျင်သူများ သွားရောက်နိုင်ရန် လေထီးတပ်ဖွဲ့ဝင်များကပါ ကူညီ။

ဇွန် ၃၀ ■ လိုဏ်ဂူဝင်ပေါက်အနီးတစ်ဝိုက်ရှိ ရေများကို အဝေးသို့ စွန့်ထုတ်နိုင်ရန် ကြိုးပမ်းမှုအောင်မြင်။ ရေထုထည်ပမာဏ လျှော့ချနိုင်မှသာ ရေငုပ်သမားများ လိုဏ်ဂူအတွင်းပိုင်းသို့ ပိုမိုရောက်ရှိနိုင်မည် ဖြစ်သောကြောင့် ရေထုတ်ပြွန်များ ထပ်မံတပ်ဆင်။

ဇူလိုင် ၁ ■ SEAL တပ်ဖွဲ့က တတိယအခန်းမှနေ၍ ဆက်လက်ကွပ်ကဲနေပြီး ရေငုပ်သမားများ ပတ္တယားကမ်းခြေနှင့် နီးကပ်လာ။ အင်အားကောင်းသည့် ရေစုပ်စက်များ၏ အကူအညီကြောင့် ရေထုထည်လျော့ကျလာ။ ရေငုပ်သမားများ ရေအောက်တွင် အချိန်ကြာကြာနေနိုင်ရန်အတွက် အောက်ဆီဂျင်ဘူး ရာဂဏန်းခန့်အား စက်သီးများဖြင့် ပို့ဆောင်။

ဇူလိုင် ၂ ■ လူငယ် ၁၂ ဦးနှင့် ၎င်းတို့၏နည်းပြအား ရွှံ့နွံများကာရံထားသည့် သောင်ခုံပေါ်တွင် အသက်ရှင်လျက်တွေ့ရှိ။ ယင်းနေရာမှာ ပတ္တယားကမ်းခြေအလွန် မီတာ ၄၀၀ ခန့်တွင်တည်ရှိပြီး ရေများဖုံးလွှမ်းနေ။ ပိတ်သူနေသူများ၏ မိသားစုများနှင့် ကယ်ဆယ်ရေးအဖွဲ့ဝင်များ သတင်းကောင်းအတွက် ပျော်ရွှင်ခဲ့ရပြီး နိုင်ငံသားများလည်း အသက်ရှူချောင်ခဲ့ရ။

ဇူလိုင် ၃■ ပိတ်မိနေသူများထံသို့ ရေငုပ်သမားများ၊ ဆရာဝန်တစ်ဦးနှင့် သူနာပြုတစ်ဦးပို့ဆောင်။ ထိုင်းအာဏာပိုင်များ၊ တော်ဝင်မိသားစုနှင့် အမေရိကန်သံရုံး၊ ဥရောပသမဂ္ဂကိုယ်စားလှယ်ရုံး အပါအ၀င် နိုင်ငံတကာ အသိုင်းအ၀ိုင်းမှ ချီးကျူးဂုဏ်ပြုမှု ရရှိ။

ဇူလိုင် ၄ ■ အသက်ရှင်သန်ခွင့်ရသူ ၁၃ ဦး ရေငုပ်ကိရိယာများနှင့် အကျွမ်းတ၀င်ဖြစ်စေရန် ကိုယ်တိုင်စမ်းသပ်လေ့ကျင့်မှု စတင်။

ဇူလိုင် ၅ ■ ကယ်ဆယ်ရေးလုပ်ငန်း ဆောင်ရွက်ရန် လိုဏ်ဂူအတွင်းမှ စုပ်ထုတ်ခဲ့သည့်ရေပမာဏ လီတာသန်းပေါင်း ၁၃၀ ကျော်အထိရှိ။ အကျိုးဆက်အနေဖြင့် လိုဏ်ဂူတစ်ဝိုက်ရှိ စိုက်ပျိုးမြေဧရိယာ ၁၂၈ ဟက်တာ ရေ၀င်ရောက်မှု ဖြစ်ပွား။

ဇူလိုင် ၆ ■ စေတနာ့ဝန်ထမ်း ကယ်ဆယ်ရေးလုပ်သားဖြစ်သည့် ၃၈ နှစ်အရွယ် Navy SEAL တပ်ဖွဲ့ဝင်ဟောင်းတစ်ဦး သေဆုံး။ ရေငုပ်သမားများအတွက် အောက်ဆီဂျင်ဘူး လဲလှယ်ပေးရန် ဆောင်ရွက်နေစဉ် ၎င်းအား ရေအောက်၌ သတိမေ့မြောလျက် တွေ့ရှိရပြီး ယင်းနောက် သေဆုံးသွားကြောင်း ထုတ်ပြန်။

ကိုစည်သူမောင်နှင့် ဆက်သွယ်မေးမြန်းခြင်း. . .

“ဘယ်အချိန်ခေါ်မလဲဆိုတဲ့ အဖြေရကျပ်တဲ့မေးခွန်းတွေ မမေးပါနဲ့တဲ့။ သူတို့ လုပ်ဆောင်နေတဲ့အရာတွေကို ရှင်းပြမယ်။ ကြုံတွေ့နေရတဲ့ အခက်အခဲတွေကို ပြောပြမယ်။ သူတို့ကို ဘယ်အချိန် ပြန်ထုတ်နိုင်မလဲဆိုတာက သူတို့မှာ အဖြေမရှိသေးဘူး”

ထိုင်းနိုင်ငံ မယ်ဆိုင်မြို့ရှိ ထမ့်လွမ်ဂူတွင် တောဝက်ဟု အမည်ရသည့် ဒေသခံဘောလုံးအသင်းမှ ဘောလုံးသမားကလေးငယ် ၁၂ ဦးနှင့် နည်းပြဆရာတစ်ဦးတို့ ပိတ်မိလျက်ရှိသည်။ ဇွန် ၂၃ ရက်မှစ၍ ပျောက်ဆုံးလျက်ရှိသည့် ၎င်းတို့အား ထိုင်းအာဏာပိုင်များမှ ဂူအတွင်း ရှိနိုင်သည်ဟုယူဆလျက် ရှာဖွေခဲ့ကြသည်။ ၁၀ ရက်ခန့်အကြာတွင် ၎င်းတို့အား ဂူဝမှ ၃ ဒသမ ၈ မိုင်အကွာ ပတ္တယားကမ်းခြေတွင် ရှာဖွေတွေ့ရှိခဲ့သည်။ အဆိုပါဖြစ်စဉ်နှင့် ပတ်သက်ပြီး ဇွန် ၂၄ ရက်မှ စတင်ကာ ဂူဝတွင်စောင့်ဆိုင်းပြီး လူမှုကွန်ရက် Facebook စာမျက်နှာတွင် သတင်းများတင်ပေးနေသည့် ကိုစည်သူမောင်အား The Daily Eleven သတင်းစာက ဇူလိုင် ၇ ရက်တွင် ဆက်သွယ် မေးမြန်းခဲ့ပါသည်။

■ မေး – ဒီနေ့မှာ ကလေးတွေရဲ့ အခြေအနေတွေနဲ့ ပတ်သက်ပြီး ဘာများထူးခြားသေးလဲ ခင်ဗျ။

ဖြေ – ဒီနေ့အခြေအနေကတော့ သိပ်ထူးခြားမှု မရှိသေးပါဘူး။ အားရကျေနပ်ဖွယ် မရှိသေးဘူး။

■ မေး – အခုလက်ရှိအခြေအနေတွေနဲ့ ပတ်သက်ပြီး အာဏာပိုင်တွေဘက်က ဘာတွေများထပ်ပြီး ထုတ်ပြန်ထားပါသလဲ။

ဖြေ – သတင်းစာရှင်းလင်းပွဲမှာ ပြောသွားတာတော့ ဒီကလေးတွေကို ရေလမ်းကြောင်းကနေ ပြန်ခေါ်ထုတ်လာဖို့ဆိုတာ လုံးဝတော့ မဖြစ်နိုင်ဘူး။ အဲဒီတစ်ချက်ပေါ့။ သို့သော် ရာသီဥတုကောင်းမယ် ဆိုလို့ရှိရင်တော့ ရေတွေကို တောက်လျှောက်လည်း စုပ်ထုတ်တယ်။ တောင်ပေါ်မှာရှိတဲ့ ဂူထဲကိုဝင်မယ့် စမ်းချောင်းတွေကိုလည်း လွှဲပေးနေတယ်။ ဒါပေမဲ့ တောင်ပေါ်မှာ မိုးမရွာပေမယ့် ဒီဘယ်လိုခေါ်မလဲ အရင်ရက်တွေက မိုးရွာထားတဲ့အတွက်ကြောင့် သဘာဝ မြေအောက်စမ်းချောင်းတွေက တောက်လျှောက်စိမ့်ဝင် စီးဆင်းနေတာများတယ်။ အဲဒီအခါကျတော့ နံပါတ် ၁ က တောင်ပေါ်မှာရှိတဲ့ ဂူပေါက်ကယ်ပေါက်တွေကို လိုက်ရှာတော့ အပေါက် ၁၀၀ လောက်တွေ့တယ်။ အပေါက် ၁၀၀ လောက် တွေ့ပေမယ့် ၁၈ ပေါက်လောက်ပဲ ဂူအောက်ကို ထိုးဖောက်တဲ့ အပေါက်လောက်ပဲပေါက်တယ်။ ဒါပေမဲ့ အဲဒီအပေါက်တွေလည်း ဒီကလေးတွေရှိနေတဲ့ လိုဏ်ဂူနဲ့ တိုးလျှိုပေါက် မဖြစ်ဘူး။ တွေ့တဲ့အပေါက်တွေကလည်း ပေ ၁၂၀၀ လောက်ပဲ ရှိတယ်။ ပေ ၁၂၀၀ လောက်ပဲရှိတော့ အောက်ကို ထပ်ဖောက်ဖို့ကလည်း ခက်ခဲတယ်။ နောက်တစ်ခုက ချီလီနိုင်ငံလိုမျိုးပေါ့။ ချီလီက မိုင်းတွင်း။ ပြီးတော့ သူကမြေပြန့်။ အဲဒီမှာက ရာသီဥတု အတားအဆီး မရှိဘူး။ သူက ဖောက်ပြီးဝင်သွားလို့ ရတယ်။ ချီလီမှာ တစ်ခုသာတာက တည်နေရာကို GPS နဲ့ဖမ်းပြီးကြည့်နိုင်တယ်။ တန်းဖောက်လို့ရတယ်။ ချီလီမှာတောင်မှ တစ်ကီလိုမီတာကို နှစ်လကြာတယ်ပြောတယ်။ ဖောက်တာက။ ဒီမှာက တောတောင်ဖြစ်နေတော့ ကလေးတွေရဲ့နေရာကို GPS ရှာလို့မရဘူး ဖြစ်နေတယ်။ သစ်ပင်တွေ တအားများတယ်။ သဘာဝ အတားအဆီး ကျောက်တုံးတွေ ထုံးကျောက်တွေ များနေတော့ နည်းပညာမြင့်တဲ့ဟာတွေနဲ့တောင် ရှာလို့မရဘူးဖြစ်နေတယ်။ အခုဟာက ကျောက်တောင်ကြီးဆိုတော့ တုတ်နဲ့လိုက်ထိုးသလို ထိုးလို့ကလည်းမရဘူး။ အဲဒီတော့ ကလေးရှိတဲ့နေရာကို သေနတ်ပစ်သလိုနဲ့ ပစ်လိုက်ရင် အများကြီး လွဲချော်သွားမယ်ပေါ့။ သူတို့အတတ်နိုင်ဆုံးကတော့ ရေတွေကို စုပ်ထုတ်နေတယ်။ အဲဒါက သတင်းစာရှင်းလင်းပွဲမှာပြောတာ။ လောလောဆယ်တော့ ရာသီဥတုက ပူနေပေမယ့် ကောင်းကင်မှာတော့ တိမ်မည်းတွေလည်း ရှိနေတယ်။ နောက်ဆုံးအဆင့်အထိတော့ ဘယ်လိုလုပ်မလဲဆိုတာ မသိရသေးဘူး။

■ မေး – အထဲမှာရှိတဲ့ ကလေးတွေအတွက်ရော သူတို့ဘာတွေလုပ်ထားသလဲ။

ဖြေ – ကလေးတွေအတွက်ကတော့ ရိက္ခာတွေ ပို့ထားပြီးပြီ။ ဒါပေမဲ့အဓိက အခက်အခဲဆုံးက အောက်ဆီဂျင်ပဲ။ ကလေးတွေကို ရေကူးဝတ်စုံနဲ့ ခေါ်ထုတ်လာဖို့ဆိုတာက မလွယ်ဘူး။ ပင်လယ်ထဲမှာကျတော့ အပေါ်ကနေနဲ့ အောက်မှာက မြင်ရတယ်။ အခုဟာက ဂူထဲမှာ။ နောက်ပြီးတော့ ဂူလမ်းကြောင်းထဲမှာ စီးနေတဲ့ရေက ကြည်ကြည်လင်လင် မရှိဘူး။ ရေက တောင်ကျရေဆိုတော့ မည်းညစ်ညစ်တွေချည်းပဲ။ နောက်ပြီး ကလေးတွေကို ခေါ်လာရင် အောက်ဆီဂျင် ပေးထားပေမယ့် ကြောက်လန့်သွားရင် လိုအပ်တာ ထက်ပိုပြီးတော့ အောက်ဆီဂျင် ပေးရမယ်ဆိုရင် ကြားထဲက အောက်ဆီဂျင်ပြတ်သွားရင် မနေ့ကလိုပဲ ဖြစ်သွားလိမ့်မယ်။ ဒါတောင် မနေ့က အသက်ဆုံးရှုံးသွားတဲ့သူက ကျွမ်းကျင်တဲ့ ရေကူးသမားနော်။ သူတို့တောင် ဒီလိုအဖြစ်တွေရှိနေတော့ သူတို့ကို ခေါ်လာဖို့က ခက်ခဲတယ်။

■ မေး – အခုလက်ရှိ ဂူအပြင်ဘက်မှာရော ဘယ်လိုလှုပ်ရှားမှုတွေ ရှိနေသလဲ။

ဖြေ – ပုံမှန်လုပ်ရိုးလုပ်စဉ်တွေကို ဆက်လက်လုပ်ဆောင်နေတယ်။ ရေတွေကိုလည်း စုပ်ထုတ်နေတာပေါ့။ ဒါတောင်မှ တစ်နာရီမှာ တစ်စင်တီမီတာပဲလျော့တယ်။ ရေစတင် စုပ်ထုတ်တဲ့အချိန်ကစပြီး ဒီနေ့ဒီအချိန်အထိ လီတာပေါင်း ၁၂၈ သန်းလောက်တော့ရှိပြီ။ အဲဒီက စုပ်ထုပ်တဲ့ ရေတွေမှန်သမျှကလည်း အနီးအနားမှာရှိတဲ့ လယ်ဧက ၂၆၀၀ လောက်ကို ရေလွှမ်းမိုးနေပြီ။ သတင်းစာ ရှင်းလင်းပွဲမှာကလည်း ထိုင်းအာဏာပိုင်တွေ ပြောသွားတာက ကျွန်တော်တို့ကလေးတွေကို တွေ့ပြီလို့ ၀မ်းသာအားရ ကြေညာလိုက်ပေမယ့် ဒီပျော်ရွှင်မှုက ခဏတာလေးပါပဲတဲ့။ အစစ်အမှန်ပျော်ရွှင်မှုက ကလေးတွေကို ခေါ်ထုတ်နိုင်မှုကသာလျှင် အောင်မြင်မှုပေါ့။ ကလေးတွေကို တွေ့ပြီဆိုပြီး ဗီဒီယိုကလစ်ကို ထုတ်ပြန်နိုင်ပေမယ့် စစ်ပွဲသေးသေးလေးကို အောင်မြင်တာပဲ ရှိသေးတယ်တဲ့။ တွေ့ပြီးကတည်းက တစ်ရက်တစ်ရက် အစည်းအဝေးတွေကို တစ်ခါတစ်ခါလုပ်ရင် လေးနာရီကြာအောင် လုပ်ရတယ်တဲ့။ ဒီကလေးတွေကို ဘယ်လိုကယ်ထုတ်ရမလဲဆိုတာက သူတို့အတွက် ခေါင်းမီးတောက်နေပါတယ်တဲ့။ ဘုရင်ကြီးကလည်း သူတို့ကို မြန်မြန်ခေါ်ထုတ်ဖို့ ပြောထားတာဆိုတော့ သူတုိ့ကိုယ်တိုင်က ဘယ်အချိန်ခေါ်မလဲဆိုတဲ့ အဖြေရကျပ်တဲ့ မေးခွန်းတွေ မမေးပါနဲ့တဲ့။ သူတို့ လုပ်ဆောင်နေတဲ့အရာတွေကို ရှင်းပြမယ်။ ကြုံတွေ့နေရတဲ့ အခက်အခဲတွေကို ပြောပြမယ်။ သူတို့ကိုဘယ်အချိန် ပြန်ထုတ်နိုင်မလဲဆိုတာက သူတို့မှာ အဖြေမရှိသေးဘူးပေါ့နော်။ ဒါပေမဲ့ ဒီကလေးတွေရဲ့ အသက်အန္တရာယ်နဲ့ ကျန်းမာရေးကိုတော့ စိတ်ချ။ ကောင်းကောင်းမွန်မွန် ပြည့်စုံတဲ့ အခြေအနေမှာ ထားထားတယ်ဆိုတာ ပြောတယ်။ နောက်ပြီး အထဲမှာလည်း အောက်ဆီဂျင်ဘူးတွေကိုလည်း တစ်နေရာနဲ့ တစ်နေရာ ၂၅ ပေအကွာမှာ ထားထားတယ်။ နောက်ပြီး ရေငုပ်တဲ့သူတွေကိုလည်း လျှော့ချမယ်။ အထဲမှာ အောက်ဆီဂျင်နဲ့ ကာဗွန်ဒိုင်အောက်ဆိုက်ကို မျှတအောင် လုပ်မယ်တဲ့။

■ မေး – မြန်မာနိုင်ငံသား ကလေးနှစ်ယောက်ပါတယ်ဆိုတဲ့ သတင်းတွေလည်း ထွက်နေတယ် အစ်ကို။ အဲဒါနဲ့ပတ်သက်ပြီးလည်း ပြောပေးပါဦး။

ဖြေ – မြန်မာနိုင်ငံသားဆိုတာက ဒါကတော့ ပွင့်ပွင့်လင်းလင်းပြောရရင် မြန်မာမှာ မွေးတယ်။ ဒီဘက် (ထိုင်း) မှာ ကြီးပြင်းလာတယ်။ နောက်တစ်ခါက ဒီဘက်မှာ နိုင်ငံသား ခံယူထားသလားဘာလား ဆိုတာက အစ်ကိုတို့ တိတိကျကျ ပြောလို့မရဘူး။ ဒီမှာက ဘာမှပြဿနာ မရှိဘူး။ လူကို လူလို့ပဲမြင်တယ်။ ကယ်ထုတ်ဖို့ပဲ လုပ်တယ်။ ပြီးတော့ ဒါနဲ့ပတ်သက်ပြီး အာဏာပိုင်တွေကလည်း အတည်ပြုပြောကြားတာ မရှိဘူး။

■ မေး – အခုလာကူညီတဲ့သူတွေကိုရော ဘယ်လို ကူညီထောက်ပံ့မှုတွေ ပေးနေသလဲ။

ဖြေ – အကုန်လုံးကတော့ တိုက်ရိုက်လွှင့်တဲ့အထဲမှာလည်းပါတယ်။ ကူညီတဲ့သူတွေ ဘာဖြစ်ချင်လဲ။ ဘာလုပ်ချင်လဲ အကုန်ဖြည့်ဆည်းပေးတယ်။ မိန်းကလေးတွေအတွက် အပေါ့အပါးသွားနိုင်ဖို့ Mobile Toilet က အစရှိတယ်။ ဘာမှ လိုလေသေးမရှိဘူး။ ခေါင်းလျှော်ချင်သလား၊ ခေါင်းညှပ်ချင်သလား။ လက်ဆေးဂျယ်လီတွေကအစ ရှိတယ်။ အကုန်အစုံရှိတယ်။ ဆေးဝါး၊ လူသုံးကုန်အစရှိတယ်။ စားချင်တာလဲ ဘာစားချင်သလဲ။ ရေသန့် ကားတွေဆိုလည်း မနည်းဘူး။ တစ်ရက်ကို ရေသန့်ဘူး ၄၀၀၀ ထုတ်လို့ရတဲ့ကားတွေ လာရပ်ပေးထားတာ။ ဘာမှလိုလေသေးမရှိဘူး။ သတင်းသမားတွေအတွက် ဆိုရင်လည်း ၀ိုင်ဖိုင်တွေ လွှတ်ပေးထားတယ်။ မီးပါဝါကြိုးတွေကအစ အကုန်လုပ်ပေးထားတယ်။ တစ်ခုပဲရှိတယ်။ ကန့်သတ်နေရာတွေရှိမယ်။ အမှိုက်မပစ်ရတဲ့နေရာတွေရှိတယ်။ အဲဒါလေးပဲရှိတယ်။

■ မေး – အစ်ကို့အနေနဲ့ ဒီဖြစ်စဉ် စဖြစ်ကတည်းက ရောက်ရှိနေခဲ့တာဆိုတော့ ဒီဖြစ်စဉ်နဲ့ ပတ်သက်ပြီး ကိုယ့်နိုင်ငံအစိုးရအတွက် ဘာများပြောချင်ပါသေးလဲခင်ဗျ။

ဖြေ – အထွေအထူး မရှိပါဘူး။ ဒီဖြစ်စဉ် စဖြစ်ကတည်းက လာအိုနိုင်ငံဆိုရင် ကျွမ်းကျင်သူ သုံးယောက်ပို့ထားတယ်။ ဖိလစ်ပိုင်ဆိုရင်လည်း ပို့ထားတယ်။ တရုတ်ပါတယ်။ ဒတ်ခ်ျပါတယ်။ ယူကေပါတယ်။ သြစတြေးလျပါတယ်။ အစုံပဲ။ အစ်ကိုတို့ မြန်မာနိုင်ငံဆိုတာက ကျောချင်းကပ်နေတဲ့ နိုင်ငံတွေ။ မိတ်ဆွေတွေပဲလေ။ အစ်ကိုတို့အစိုးရအနေနဲ့ကလည်း ဒါမျိုးနဲ့ပတ်သက်ပြီး သဘာဝဘေးတွေကို ဘယ်လိုကျော်ဖြတ်ရမလဲ ဆိုတာက အတွေ့အကြုံရအောင် သုံးယောက်၊ ဒါမှမဟုတ် လေးယောက်လောက် လွှတ်ပေးစေချင်တယ်။ ရေငုပ်ကျွမ်းကျင်တဲ့သူတွေပဲဖြစ်ဖြစ် ကယ်ဆယ်ရေးကျွမ်းကျင်သူတွေပဲဖြစ်ဖြစ် လွှတ်ပေးစေချင်တယ်။ ဒါကဘာပဲပြောပြော ဒီဖြစ်စဉ်က အတွေ့အကြုံ အများကြီးရမှာ ကျိန်းသေတယ်။ ဒီဖြစ်စဉ်က ကမ္ဘာမှာ တစ်ခါမှ မဖြစ်ဖူးသေးတဲ့ ဖြစ်စဉ်ပဲ။ နိုင်ငံခြားပညာရှင်တွေကလည်း ပြောကြတယ်။ ချီလီမှာ ဖြစ်တာက မိုင်းတွင်း။ ဒါကသဘာဝဂူ။ မိုင်းတွင်းက အောက်ထဲမှာ လူ ၁၀၀ လောက် နေလို့ရတယ်။ ဒီမှာက နေရာကလည်း အများကြီး မရှိဘူး။ အစ်ကိုပြောချင်တာကတော့ အဲဒါပဲ။ ကိုယ့်နိုင်ငံက စောစောရောက်လာမယ်ဆိုရင် ချစ်ကြည်ရေးအတွက်လည်း ကောင်းတယ်။ ကိုယ်တွေအတွက်လည်း အတွေ့အကြုံ ကောင်းကောင်းရမယ်။ ဘယ်လိုပဲပြောပြော မိတ်ဆွေနိုင်ငံအတွက်လည်း ကောင်းတယ်။

လှိုဏ်ဂူအတွင်း ကယ်ဆယ်ရေး ဆောင်ရွက်နေစဉ် အောက်စီဂျင် ပြတ်လပ်ခဲ့သဖြင့် ထိုင်းအထူးရေတပ်က ရေငုပ်သမားဟောင်း တစ်ဦးသေဆုံး

လှိုဏ်ဂူအတွင်း ကယ်ဆယ်ရေးဆောင်ရွက်နေသည့် တပ်သားများအား တွေ့ရစဉ် (Photo: Thai NavySEAL)

ထိုင်းနိုင်ငံရှိ ဂူတစ်ခုအတွင်း ပိတ်မိနေခဲ့သော ကောင်လေး ၁၂ ဦးနှင့် ၄င်းတို့၏ ဘောလုံးနည်းပြဆရာတို့ကို ကယ်ဆယ်ရာတွင် အထောက်အကူပေးနေစဉ် အောက်စီဂျင်ပြတ်လပ်မှု ဖြစ်ပွားခဲ့ပြီးနောက် ထိုင်းအထူးရေတပ်က ရေငုပ်သမားဟောင်းသည် သေဆုံးသွားခဲ့သည်ဟု တာဝန်ရှိသူတစ်ဦးက ဇူလိုင်လ ၆ ရက်တွင် ပြောကြားခဲ့သည်။

ရေနစ်မြှပ်နေသော လှိုဏ်ဂူ၏ အတွင်းပိုင်း နက်ရှိုင်းနေသောနေရာမှ ၄င်းတို့ကို ဆွဲထုတ်ရန် ကယ်ဆယ်ရေးလုပ်ငန်းစဉ်၏ အန္တရာယ်ကြီးမားပုံကို ယခုသေဆုံးမှုက မီးမောင်းထိုးပြလျက်ရှိပြီး အလားတူနည်းလမ်းဖြင့် လူငယ်များကို ဆွဲထုတ်ရန် အလားအလားနှင့် ပက်သက်၍ မေးခွန်းထုတ်စရာများ ဖြစ်လာစေခဲ့သည်။ “အကူအညီပေးဖို့ စေတနာ့ဝန်ထမ်း ပါဝင်ဆောင်ရွက်ပေးနေတဲ့ ထိုင်းရေတပ် အထူးတပ်ဖွဲ့ ဝင်ဟောင်းဟာ မနေ့ညက နံနက် ၂ နာရီလောက်မှာ သေဆုံးသွားခဲ့ပါတယ်”ဟု ချင်းရိုင် ဒုတိယအုပ်ချုပ်ရေးမှူး ပါဆက်ကွန်းဘွန်ယာလက်က လှိုဏ်ဂူဝတွင် သတင်းထောက်များကို ပြောကြားခဲ့ပြီး ၀မ်းနည်းစရာသတင်းဟု ဆိုခဲ့သည်။

ဆာမန်ကူနွန့် ဟု ဖော်ထုတ်နိုင်ခဲ့သည့် ရေငုပ်သမားသည် ဇူလိုင်လ ၂ ရက်တွင် သမ်းလူယန်ဂူထဲ၌ လူငယ်များကို ရှာတွေ့ သည့်နေရာမှ ပြန်လာရာတွင် အောက်စီဂျင် ပြတ်လပ်သွားခဲ့ခြင်း ဖြစ်သည်။ “အပြန်လမ်းမှာ သူက သတိမေ့သွားခဲ့တာ ဖြစ်ပါတယ်။ သူငယ်ချင်းတစ်ယောက်ကလည်း သူအပြင်ထွက်ရာမှာ ကူညီဖို့ ကြိုးစားခဲ့ပါတယ်။ ကျွန်တော်တို့ လူတစ်ယောက် ဆုံးရှုံးခဲ့ရပေမယ့်လည်း ကျွန်တော်တို့ရဲ့ ကယ်ဆယ်ရေး လုပ်ငန်းကို ဆက်လက် လုပ်ဆောင်သွားမယ်လို့ ယုံကြည်ထားပါတယ်” ဟု ထိုင်းအထူးရေတပ်က ဒုတိယဗိုလ်မှူးကြီး အပါကွန်ယိုကောင်ကူးက ပြောကြားခဲ့သည်။ အတွေ့ အကြုံရင့် ရေငုပ်သမားတစ်ဦးပင် လှိုဏ်ဂူအပြင်သို့ ပြန်ထွက်ရန် မလွယ်ကူသည့်အနေအထားတွင် ကလေးများ ဘေးကင်းစွာ ပြန်ထွက်နိုင်မည်လားဟု သူ့ကိုမေးမြန်းခဲ့ရာ ကလေးများနှင့်ဆိုလျှင် ပိုမို သတိထားရမည်ဟု သူကပြန်လည် ဖြေကြားခဲ့သည်။

 

ထိုင်းလိုဏ်ဂူထဲတွင် ၁၀ ရက်နီးပါးကြာ ပျောက်ဆုံးနေခဲ့သူ ၁၃ ဦးအား အသက်ရှင်လျက် ရှာဖွေတွေ့ရှိ

Photo: AFP

ထိုင်းနိုင်ငံ ချန်ရိုင်းပြည်နယ်တွင် Tham Luang လိုဏ်ဂူထဲ၌ ၁၀ ရက်နီးပါးကြာ ပျောက်ဆုံးနေခဲ့သော လူငယ်ဘောလုံးသမား ၁၂ ဦးနှင့် ၎င်းတို့၏ နည်းပြဖြစ်သူတို့အား ကယ်ဆယ်ရေးများက ဇူလိုင် ၂ ရက်တွင် အသက်ရှင်လျက် ရှာဖွေတွေ့ရှိခဲ့ကြောင်း ပြည်နယ်အစိုးရက ထုတ်ပြန်ခဲ့သည်။

ဇွန် ၂၃ ရက်နောက်ပိုင်း မိုးသည်းထန်စွာ ရွာသွန်းပြီး ရေလွှမ်းမှုကြောင့် Mu Pa Academy Mae Sai ဘောလုံးအသင်းမှ ထို ၁၃ ဦးသည် ထိုဂူထဲ၌ ပိတ်မိနေခဲ့ခြင်း ဖြစ်သည်။

ထိုပျောက်ဆုံးနေသည့်အဖွဲ့ကို ရှာတွေ့ခဲ့ပြီဖြစ်ကြောင်း ချန်ရိုင်းပြည်နယ်အုပ်ချုပ်ရေးမှူး နာရောင်ဆက်အိုဆော့တာနာကွန် က ဒေသစံတော်ချိန် ည ၁၀ နာရီခန့်တွင် အတည်ပြုခဲ့ခြင်း ဖြစ်သည်။ ထိုရှာတွေ့ခဲ့သူများအား ဂူထဲမှနေ၍ ဘေးကင်းစွာ ပြန်လည် ထွက်ခွာနိုင်ရန်နှင့် ဆေးရုံသို့ ပို့နိုင်ရန်အတွက် ကယ်ဆယ်ရေး လုပ်ငန်းစဉ်များအား ဆက်လက် လုပ်ဆောင်သွားမည်ဖြစ်ကြောင်း ၎င်းက ပြောကြားခဲ့သည်။

ထိုဘောလုံးကစားသမားများအား ရှာတွေ့ခဲ့သည့်နေရာသို့ ရေငုပ်ကျွမ်းကျင်သည့် ဆရာဝန်များက သွားရောက်နေသည်။ ထိုကယ်ဆယ်ခံရသူများသည် မှောင်နေသည့် ဂူထဲမှ အပြင်သို့ ချက်ချင်းရွှေ့ပြောင်း၍ ရ၊ မရကို စမ်းသပ် စစ်ဆေးသွားမည်ဖြစ်ပြီး ထွက်၍ မရသေးပါက ဂူထဲတွင်ပင် အရေးပေါ် အကူအညီများနှင့် စားစရာများကို ဦးစွာပေးသွားမည် ဖြစ်သည်။

ကယ်ဆယ်ခံရသူများအား သယ်ယူပို့ ဆောင်ရေးအတွက် အစီအစဉ်များအား ကြိုတင်ပြင်ဆင်ထားပြီး ဖြစ်ကြောင်းလည်း ချန်ရိုင်းပြည်နယ်အုပ်ချုပ်ရေးမှူးက ပြောကြားခဲသ့ည်။ Ref:The Nation

ထိုင်းလိုဏ်ဂူတွင် ပိတ်မိနေသူများကို ကယ်ဆယ်ရေး မိုးရွာသွန်းမှုကြောင့် အတားအဆီးဖြစ်နေ

ဇွန် ၂၆ ရက်က ပျောက်ဆုံးနေသူများအား ရှာဖွေရန် ချန်ရိုင်းရှိ ဂူအတွင်း၌ ထိုင်းစစ်သားများ စုဝေးနေစဉ် (Photo: AFP)

ထိုင်းနိုင်ငံတွင် လူငယ် ၁၂ ဦးနှင့် ၎င်းတို့၏ ဘောလုံးနည်းပြတစ်ဦးတို့ ရက်ပေါင်းအတော်ကြာ ပိတ်မိနေသည့် ရေကြီးနေသော လိုဏ်ဂူထဲမှ ရေများကို စုပ်ထုတ်ရန် ကယ်ဆယ်ရေးသမားများသည် ဇွန် ၂၇ ရက်ကလည်း ဆက်လက် ကြိုးပမ်းခဲ့ကြသည်။ တစ်ဖက်တွင်မူ ဗုဒ္ဓဘာသာဘုန်းကြီးများသည် ပိတ်မိနေသောသူများအတွက် ဆုတောင်းရွတ်ဖတ်ပေးမှုများ ဆောင်ရွက်ခဲ့ကြသည်။

မုတ်သုံမိုးများရွာသွန်းရာမှ ဂူ၏ ပင်မ၀င်ပေါက် ပိတ်ဆို့သွားခဲ့ခြင်းကြောင့် အသက် ၁၁ နှစ်မှ ၁၆ နှစ်ကြားရှိ ဘောလုံးသမားများနှင့် အသက် ၂၅ နှစ်အရွယ် ၎င်းတို့၏ဘောလုံးနည်းပြတို့သည် ထိုင်းနိုင်ငံမြောက်ပိုင်းရှိ Tham Luang လိုဏ်ဂူ၌ ဇွန် ၂၃ ရက်က စတင် ပိတ်မိခဲ့ခြင်းဖြစ်သည်။

ကယ်ဆယ်ရေးသမား ရာပေါင်းများစွာသည် ဂူအတွင်းမှ ရေများကို စုပ်ထုတ်ရန်အတွက် ဖိအားမြင့်ရေစုပ်စက်များစွာကို တပ်ဆင်ရန် တစ်ညလုံး ကြိုးပမ်းခဲ့ကြသည်။ သို့သော် လာအိုနှင့် မြန်မာနယ်စပ်များအနီးရှိ ချန်ရိုင်းပြည်နယ်ထဲမှ ထိုဒေသတွင် မိုးများဆက်လက် ရွာသွန်းနေသဖြင့် ကြိုးပမ်းမှုများမှာ မအောင်မမြင် ဖြစ်ခဲ့ရသည်။

“ရေတွေကို စုပ်ထုတ်ဖို့ ကျွန်တော်တို့ ကြိုးကြိုးစားစား လုပ်နေကြပေမဲ့ ရေကတော့ အခုအထိ ကြီးနေတုန်းပဲ” ဟု ပြည်နယ်အုပ်ချုပ်ရေးမှူး နာရွန်ဆာအိုဆော့တန်နာကွန်က ပြောခဲ့သည်။

ဇွန် ၂၇ ရက် ညနေပိုင်းတွင်မူ ကယ်ဆယ်ရေးလုပ်ငန်းများကို ကူညီပေးရန် ပြည်ပမှလိုဏ်ဂူ ကျွမ်းကျင်သူသုံးဦး ရောက်လာကြမည်ဟု သိရသည်။ ဝေဟင်၊ မြေပြင်အဖွဲ့များ၊ ရေငုပ်သမား အပါအ၀င် လူပေါင်း ၁၀၀၀ ၀န်းကျင်သည် ကယ်ဆယ်ရေးများလုပ်ရန် ရောက်ရှိလာကြပြီး စစ်တပ်ကလည်း ကူညီရေးအတွက် အထူးအဖွဲ့တစ်ဖွဲ့ကို စေလွှတ်ထားသည်။

ရေသည် ၁၅ စင်တီမီတာ (ခြောက်လက်မ) ညတွင်းချင်း ထပ်မံမြင့်တက်လာပြီး ရှုပ်ထွေးလှသော ဂူကွန်ရက်ထဲမှ ကီလိုမီတာချီ ရှည်လျားသည်ဟု ယူဆရသော တတိယမြောက်ဂူလိုဏ်ခန်းမှာလည်း လက်ရှိတွင် ရေမြုပ်နေပြီဖြစ်သည်ဟု ထိုင်း Navy Seal တပ်ဖွဲ့၏ Facebook စာမျက်နှာတွင် ဖော်ပြခဲ့သည်။ စစ်သားများမှာ ဂူထဲမှ ရေများအား စုပ်ထုတ်ရန် လုပ်ဆောင်နေကြစဉ် ဘုန်းကြီးများမှာမူ စိတ်ဆင်းရဲနေသော မိသားစုဝင် ဆွေမျိုးများနှင့်အတူ ကယ်ဆယ်မှုအောင်မြင်ရန် ဆုတောင်းမှုများ ပြုလုပ်နေခဲ့ကြသည်။

အဆိုပါ အပြင်းအထန် ကယ်ဆယ်ရေး လုပ်ငန်းများသည် ထိုင်းနိုင်ငံတစ်ဝန်းလုံး၏ အာရုံစိုက်မှုကိုရရှိထားပြီး တော်ဝင်မိသားစု၊ နိုင်ငံခေါင်းဆောင်များနှင့် လူမှုမီဒီယာများပေါ်တွင်လည်း အကြီးအကျယ် စိတ်မကောင်း ဖြစ်နေကြသည်။ ဇွန် ၂၆ ရက်ကမူ ဂူပေါက်သစ်သုံးခုကို အစိုးရအရာရှိများက ထပ်မံတွေ့ရှိခဲ့သည်။ သို့သော်ယင်းတို့ထဲမှ တစ်ခုကသာ အဆက်အသွယ်လုပ်၍ ရနိုင်ပြီး ယင်းဂူပေါက်မှတစ်ဆင့် ကယ်ဆယ်ရေးသမားများ၊ အစားအစာများကို လှေဖြင့် လွန်းပြန်ပို့ပေးရန် စီစဉ်နေကြသည်။

Ref: AFP