တပ်မတော်နှင့် ကေအိုင်အေတို့ ကချင်ပြည်နယ် ဖားကန့်လမ်းပိုင်းတွင် ပစ်ခတ်မှုဖြစ်ပွားသဖြင့် ယာဉ်အစီးရေရာနှင့်ချီ ပိတ်မိနေ

တိုက်ပွဲများကြောင့် ဖားကန့်အတက်ကားများ နန့်တိန်းကျေးရွာတွင် ပိတ်မိနေစဉ်

တပ်မတော်နှင့် ကေအိုင်အေတို့ ဧပြီ ၆ ရက်က ဖားကန့်မြို့နယ် ဖားကန့်လမ်းမကြီးပေါ် တံတားညီနောင် အနီးတွင် ပစ်ခတ်မှု ဖြစ်ပွားခြင်းကြောင့် ကားအစီးရေ ရာနှင့်ချီ ပိတ်မိနေကြောင်း သတင်းရရှိသည်။

ပစ်ခတ်မှုများမှာ ဧပြီ ၆ ရက် နံနက်ပိုင်း ကတည်းက ဖြစ်ပွားခဲ့ခြင်းဖြစ်ပြီး ဖားကန့်သို့ အတက်ကားများမှာ နန့်ယားကျေးရွာတွင် လည်းကောင်း၊ အဆင်းကားများမှာ နန့်တိန်းကျေးရွာ အနီးတွင်လည်းကောင်း ယာဉ်အစီးရေ ရာနှင့်ချီ ပိတ်မိနေခဲ့ခြင်းဖြစ်ကြောင်း သိရ သည်။

ဖားကန့်မှပြန်လာသည့် ယာဉ်မောင်းတစ်ဦးက “ဖြစ်တာကတော့ မနက်ကတည်းက ဖြစ်နေတာ။ ကားတွေက နှစ်မိုင်လောက် ပိတ်တယ်။ ကားအစီးရေ ၃၀၀ ကျော်မယ်။ လေယာဉ်တွေနဲ့လည်း သွားတယ်ဗျ။ နှစ်စင်း။ ပစ်သလား မပစ်လားတော့ အတိအကျ မသိဘူး။ အတော်ပြင်းတဲ့ သဘောရှိတယ်။ လက်နက်ကြီးသံတွေလည်း ကြားတယ်။ လမ်းပေါ်မှာ ဖြစ်တာက နန့်ယားနဲ့ နန့်တိန်းကြား တံတားညီနောင်မှာ ဖြစ်တာ။ ကားတွေက ပိတ်ဆို့ပြီး မောင်းလာရတော့ ဘေးကိုမကြည့်အားဘူး။ လမ်းပေါ်မှာ အသေအပျောက်တွေ မတွေ့ဘူး။ ကေအိုင်အေရော စစ်သားရော မတွေ့ဘူး။ ဆက်ဖြစ်ရင်တော့ ဒုက္ခပေါ့။ လမ်းမှာလည်း မိုးကောင်း ရှစ်မိုင်ဘက် အထွက်လမ်းမှာလည်း ဂိတ်တွေက ဖြစ်ချင်သလို ဖြစ်နေတာ။ ပိတ်လိုက် လွှတ်လိုက်တာ ဖြစ်နေတာ။ တစ်လမ်းလုံးလည်း ငွေကြေးတွေ တောင်းနေတာ။ များတော့မများဘူး။ အခုဖြစ်ရင် ပိုဆိုးတာပေါ့” ဟု ပြောကြားသည်။

တနိုင်းဒေသ KIA ရင်း (၁၄) တပ်ရင်း နယ်မြေအတွင်း ရွှေနှင့်ပယင်း လုပ်ကိုင်နေသူများအား ဧပြီ ၁၀ ရက် နောက်ဆုံးထား ထွက်ခွာပေးရန်နှင့် ပြောက်ကျားစစ်နှင့် မိုင်းစစ်ဆင်ရေး လုပ်မည်ဟု ဧပြီ ၅ ရက်က သတိပေးချက် ထုတ်ပြန်ပြီးနောက်ပိုင်း ယခုလို ပစ်ခတ်မှုများ ဖြစ်ပွားခဲ့ခြင်းဖြစ်သည်။

ယင်းထုတ်ပြန်ချက်တွင် ရင်း (၁၄) နယ်မြေ၊ ဟူးကောင်းခရိုင် နယ်မြေဒေသ အတွင်းရှိ ရှဒူဇွပ်ဂျာဝမ်၊ နန်ဗျူ၊ နန့်ကွမ်း၊ တုံမဏီ၊ ဒဂွမ်ချောင်း၊ ဒဘားချောင်းဖျားရွှေမှော်နှင့် ပယင်းမှော်များတွင် ခိုးတူးလုပ်ကိုင်နေကြသော လုပ်ငန်းရှင်များ၊ လက်လုပ်လက်စား မိဘပြည်သူများသို့ အသိပေးကြောင်း၊ ဧပြီ ၁၀ ရက်မှစ၍ ပြောက်ကျား စစ်ဆင်ရေးနှင့် မိုင်းစစ်ဆင်ရေးများ ပြုလုပ်မည်ဖြစ်၍ မိမိရပ်ရွာသို့ အမြန်ဆုံး ထွက်ခွာကြပါရန် သတိပေးကြောင်း၊ လိုက်နာခြင်းမရှိဘဲ ဆက်လက်ခိုးတူး လုပ်ကိုင်နေသော မိဘပြည်သူများသည် ဖြစ်ပေါ်လာသော ပြဿနာ အလုံးစုံနှင့် ပတ်သက်၍ မိမိ၏ ကံကြမ္မာနှင့် မိမိသာဖြစ်ကြောင်း၊ မိမိဆွေမျိုးများနှင့် မိတ်ဆွေများအား ဆက်လက် အသိပေးစေလိုကြောင်း ထုတ်ပြန်ချက်များအရ သိရသည်။

မြစ်ကြီးနားအခြေစိုက် KIO နည်းပညာ အကြံပေးအဖွဲ့ရုံးမှ ပြောဆိုခွင့်ရှိသူ ဦးဒေါင်ခါးက “စာထုတ်တာက အမှန်ဖြစ်ပါတယ်။ အဲဒီဒေသတွေမှာက လွန်ခဲ့တဲ့နှစ် မိုးဝင်စ ကာလကတည်းက တပ်မတော်ကလည်း စာတွေဖြန့်ဝေပြီး မောင်းထုတ်ခဲ့တယ်။ ကျေးရွာဒေသခံတွေက တနိုင်းမြို့ပေါ်ကို ရောက်နေကြပါပြီ။ အခုက ဒေသခံနည်းနည်း၊ တခြားအောက်ပြည် အောက်ရွာက လာတဲ့သူတွေ အများစုက ရွှေ၊ ပယင်း ၀င်လုပ်နေတဲ့ သူတွေကို သတိပေးတဲ့ သဘောပါ။ KIA က ပြောက်ကျားစစ်ထိုးရင် မဆိုင်သူတွေ အထိနာမှာကြောင့်လို့ သိရတယ်။ တပ်မဟာ (၂) လက်အောက်ခံ KIA ရင်း (၁၄) က လွန်ခဲ့တဲ့ လပိုင်းကတည်းက တပ်မတော်က ၀င်သိမ်းလိုက်တော့ ရင်း (၁၄) ရယ် ဖားကန့်ဘက်က ရင်း (၆) ရယ်က နေရာအမှန် မရှိတော့ဘဲ လှုပ်ရှားတပ်အသွင် နေကြရတာ ဖြစ်ပါတယ်။ တပ်ရင်းနှစ်ခုစလုံးက တစ်ဆက် တစ်စပ်တည်း ဖြစ်ပါတယ်။ စစ်ရေးအနေနဲ့က ကျွန်တော်တို့အပိုင်း မဟုတ်တော့ သိလည်းမသိသလို ပြောပိုင်ခွင့်လည်း မရှိပါဘူး” ဟု ပြောကြားသည်။

ငြိမ်းချမ်းရေး အကျိုးဆောင်အဖွဲ့က ယင်း တနိုင်း-ဟူးကောင်း ချိုင့်ဝှမ်းဒေသ ပြဿနာများနှင့် ပတ်သက်၍ အစပိုင်းတွင် တပ်မတော်နှင့် ကေအိုင်အေတို့ နှစ်ဖက်အပြန်အလှန် စကားကမ်းလှမ်း ပြောဆိုမှုများ ရှိသော်လည်း ပြင်းထန်သော တိုက်ပွဲများ ဖြစ်ပွားပြီးနောက်ပိုင်း ဆက်ဆံရေး ပြောဆိုမှု မရှိတော့ကြောင်း၊ ယင်းဒေသတွင် စစ်ဆင်ရေးလုပ်မည့် အခြေအနေများကြောင့် ရွှေမှော်၊ ပယင်းမှော်များတွင် ရောက်ရှိနေသူများကို ထိခိုက်မှုများ ရှိနိုင်သည့်အတွက် ထွက်ခွာစေခြင်းဖြစ်ကြောင်း၊ ပစ်ခတ်တိုက်ခိုက်မှုများ ပိုမိုဖြစ်ပွား လာနိုင်ကြောင်း ပြောကြားသည်။

တပ်မတော်နှင့် ကေအိုင်အေတို့သည် ၁၉၉၄ ခုနှစ်တွင် အပစ်အခတ် ရပ်စဲရေးစာချုပ် ချုပ်ဆိုခဲ့ပြီး ၂၀၁၁ ခုနှစ် ဇွန် ၉ ရက်တွင် ဗန်းမော်ခရိုင်အတွင်း တိုက်ပွဲများ ပြန်လည် ဖြစ်ပွားခဲ့သည်။ တစ်ကျော့ပြန် စစ်ပွဲများကြောင့် လူဦးရေ တစ်သိန်းကျော် နေရပ်စွန့်ခွာပြီး ကယ်ဆယ်ရေး စခန်းများတွင် ခိုလှုံနေခဲ့ရသည်မှာ ၂၀၁၈ ခုနှစ် ဇွန် ၉ ရက်တွင် ခုနစ် နှစ်ပြည့်တော့မည်ဖြစ်သည်။

ရှမ်းပြည်နယ်မြောက်ပိုင်း နမ့်ခမ်းမြို့နယ်တွင် တိုက်ပွဲဖြစ်ပွားသဖြင့် ကလေးငယ်တစ်ဦး အပါအ၀င် အရပ်သားလေးဦး ထိခိုက်ဒဏ်ရာရ

ရှမ်းပြည်နယ်မြောက်ပိုင်း မူဆယ်ခရိုင် နမ့်ခမ်းမြို့နယ် ကောင်ဝိုင်းကျေးရွာအုပ်စု ကောင်ဝိုင်းရွာတွင် သြဂုတ် ၁၃ ရက် နံနက် ၅ နာရီခွဲက တိုက်ပွဲဖြစ်ပွားခဲ့ရာ အသက်နှစ်နှစ်ခွဲအရွယ် ကလေးငယ်တစ်ဦး အပါအ၀င် အရပ်သားလေးဦး ထိခိုက်ဒဏ်ရာရရှိသဖြင့် နမ့်ခမ်းခုတင် ၁၀၀ ဆံ့ ဆေးရုံသို့ တင်ထားရကြောင်း သတင်းရရှိသည်။

နမ့်ခမ်းမြို့နယ် ကောင်ဝိုင်းရွာ၌ နံနက် ၅ နာရီခွဲတွင် တပ်မတော်နှင့် တအာင်း (ပလောင်) တပ်ဖွဲ့တို့ တိုက်ပွဲဖြစ်ပွားခြင်းကြောင့် အသက် ၅၀ အရွယ်တစ်ဦး၊ အသက် ၃၀ အရွယ်နှစ်ဦးနှင့် အသက်နှစ်နှစ်ခွဲအရွယ် ကလေးငယ်တစ်ဦး၊ ကျားနှစ်ဦး၊ မနှစ်ဦး စုစု ပေါင်းလေးဦး ထိခိုက်ဒဏ်ရာရရှိသဖြင့် နမ့်ခမ်းကုတင် ၁၀၀ ဆံ့ ဆေးရုံကြီးသို့ အရေးပေါ် လူနာအဖြစ် တက်ရောက် ကုသလျက်ရှိကြောင်း သိရသည်။

“အခု ကျေးရွာအခြေအနေ ငြိမ်သက်သွားပါပြီ။ အခြေအနေကတော့ ကောင်းဝိုင်းရွာထဲမှာ တပ်မတော် ရောက်ရှိသွားပါပြီ။ စိုးရိမ်စရာ မရှိတော့ပါဘူး။ TNLA တော့ ရွာပြင်ထွက်သွားပြီ။ တပ်မတော်က ရွာထဲ နေရာယူလိုက်ပြီ။ ဒဏ်ရာရတဲ့သူကိုတော့ နမ့်ခမ်းခုတင် ၁၀၀ ဆံ့ ဆေးရုံကြီးမှာ အတွင်းလူနာအဖြစ် ကုသထားတယ်။ အငယ်ဆုံးကလေးက နှစ်နှစ်နဲ့ ခြောက်လပေါ့။ ကလေးနာမည် မစန်းစန်းမိုးပေါ့။ သူတို့မိသားစုထဲမှာ သုံးဦးလုံး ဒဏ်ရာရထားတယ်။ အဖေရယ်၊ အမေရယ်၊ ကလေးရယ်ပေါ့။ ကလေးတော့ ခြေထောက်မှာ ဓာတ်မှန်ရိုက်ပြီးတော့ ခွဲစိတ်မယ်လို့ မေးမြန်းကြည့်လို့ သိရတယ်။ နောက်တစ်ယောက်က လူကြီးပါ။ အသက် ၂၇ နှစ်ရှိပါပြီ။ သူက ရင်ဘတ်မှာ ဒဏ်ရာရထားတယ်။ နောက်ကနေ တစ်ယောက်ကို မှီပြီးတော့ ထိုင်နေရတယ်။ ဒီလူကြီးတော့ နည်းနည်းစိုးရိမ်ရတယ်။ အခုတော့ မခွဲထုတ်သေးဘူးပေါ့။ ဒရစ်ပဲသွင်းထားတဲ့ အခြေအနေ ရှိသေးတယ်” ဟု နမ့်ခမ်းမြို့နယ် မဲဆန္ဒနယ် (၁) မှ ပြည်နယ် လွှတ်တော်ကိုယ်စားလှယ် ဦးအေးမောင်က ပြောကြားသည်။

ကောင်းဝိုင်းတွင် ပထမဆုံးအကြိမ် တိုက်ပွဲပြန်လည် ဖြစ်ပွားခြင်းဖြစ်ကာ အဆိုပါ တိုက်ပွဲဖြစ်စဉ်နှင့် ပတ်သက်၍ ကောင်းဝိုင်းရွာသူ ရွာသားများသည် ထိတ်လန့်မှုဖြစ်ခဲ့ကြပြီး အိမ်၌မနေရဲတော့ဘဲ ကောင်းဝိုင်းရွာလယ်ရှိ ဇရပ်တွင် စုပေါင်းနေထိုင်ကြကာ သတိနှင့် နေထိုင်ကြလျက်ရှိကြောင်း သိရသည်။

“ထိခိုက်ဒဏ်ရာရတဲ့သူ လေးဦးရှိပါတယ်။ ရွာပြည်သူ လူထုတွေပဲ။ ကျားနှစ်ဦး၊ မနှစ်ဦး ပေါင်းလေးဦးပေါ့။ ကလေးမလေး တစ်ယောက်ကတော့ ခြေထောက်မှာ ဒဏ်ရာရတယ်။ ကောင်းဝိုင်းကျေးရွာမှာ မနက် ၅ နာရီ ခွဲမှာဖြစ်တယ်။ ဒဏ်ရာရတဲ့သူတွေက နမ့်ခမ်းဆေးရုံကို ရောက်လာပြီ။ ရွာလူထုကတော့ ရွာထဲမှာပဲစုပြီးတော့ နေကြတယ်” ဟု နမ့်ခမ်းမြို့နယ် မဲဆန္ဒနယ် (၂) ပြည်နယ်လွှတ်တော် ကိုယ်စားလှယ် ဦးအောင်ဝင်းက ဆိုသည်။

နမ့်ခမ်းမြို့နယ်တွင် ဒုက္ခသည်စခန်း လေးနေရာရှိပြီး နေ၀န်းနီစခန်း၊ ပန်လုံစခန်း၊ ဂျော် (တစ်)၊ ဂျော် (နှစ်)  စခန်းလေးခုရှိကာ စုစုပေါင်း ဒုက္ခသည် ၂၀၀၀ ခန့် ရှိနေကြောင်း သိရသည်။