ဝယ်ယူရန် သဘောတူညီမှု ရထားသည့် Su-30 SM တိုက်လေယာဉ် အမျိုးအစားအား ကာကွယ်ရေးဦးစီးချုပ် (လေ) ကိုယ်တိုင် မောင်းနှင်ပျံသန်းခဲ့ဟု ရုရှားသတင်းဌာန ဖော်ပြ

ဝယ်ယူရန် သဘောတူညီမှု ရထားသည့် Su-30 SM တိုက်လေယာဉ် အမျိုးအစားကို ရုရှားနိုင်ငံ မော်စကိုမြို့သို့ အလည်အပတ်ခရီး ရောက်ရှိနေစဉ် ကာကွယ်ရေးဦးစီးချုပ် (လေ) ဗိုလ်ချုပ်ကြီး မောင်မောင်ကျော် ကိုယ်တိုင် ပျံသန်းခဲ့ကြောင်း ရုရှား TASS သတင်းဌာနက သြဂုတ် ၂၃ ရက်မှာ ဖော်ပြခဲ့သည်။

ရုရှား စစ်ဘက်ဆိုင်ရာ ထုတ်လုပ်ရေး သတင်းရင်းမြစ်မှ TASS သတင်းဌာနကို ပြောကြားမှုအရ ဗိုလ်ချုပ်ကြီး မောင်မောင်ကျော်သည် သြဂုတ် ၁၇ ရက်က မော်စကိုမြို့တော် အနောက်ဘက်ရှိ Kubinka လေတပ် အခြေစိုက်စခန်းတွင် Su-30 SM တိုက်လေယာဉ်ကို မောင်းနှင်ခဲ့ခြင်း ဖြစ်သည်ဟု သိရသည်။

သတင်းရင်းမြစ်၏ ပြောကြားမှုအရ ဗိုလ်ချုပ်ကြီး မောင်မောင်ကျော် အနေဖြင့် တွဲဖက်လေယာဉ်မှူး အနေဖြင့် မောင်းနှင်ခဲ့ခြင်းဖြစ်ပြီး ဦးစီးလေယာဉ်မှူး ပြောင်းလဲ တာဝန်ယူခဲ့ကာ သရုပ်ပြ မောင်းနှင်ပျံသန်းမှု အမျိုးမျိုးလည်း မောင်းနှင်ပြခဲ့ကြောင်း သိရသည်။

တွဲဖက် ရုရှားလေယာဉ်မှူး ဖြစ်သည့် ဗိုလ်ကြီးအဆင့်ရှိသူက ကာကွယ်ရေးဦးစီးချုပ် (လေ) ဗိုလ်ချုပ်ကြီး၏ လေယာဉ်မောင်းနှင်မှု စွမ်းရည်ကို အမြင့်ဆုံးရမှတ်ပေးခဲ့ပြီး လျင်မြန်စွာ ချည်းကပ် သင်ယူနိုင်စွမ်းရှိသူဟုလည်း ချီးကျူးခဲ့ကြောင်း ရုရှားစစ်ဘက်ဆိုင်ရာ သတင်းရင်းမြစ်က TASS သတင်းဌာနကို ထပ်လောင်း ပြောကြားခဲ့သည်ဟု ဖော်ပြခဲ့သည်။

“ဗိုလ်ချုပ်ကြီးဟာ တိုက်လေယာဉ်ကို ယုံကြည်မှုရှိစွာနဲ့ ညက်ညောစွာ ထိန်းသိမ်း ပျံသန်းတတ်သူပါ”ဟုလည်း အဆိုပါ ရုရှားစစ်ဘက် သတင်းရင်းမြစ်က ပြောကြားသည်။

ယခုမောင်းနှင် ပျံသန်းမှုသည် ပြီးခဲ့သည့် ဇန်န၀ါရီလအတွင်းက ရုရှားကာကွယ်ရေးဝန်ကြီး၏ မြန်မာနိုင်ငံ ခရီးစဉ်အတွင်း ရောင်းချရန် သဘောတူညီမှု ရခဲ့သည့် Su-30 တိုက်လေယာဉ် ခြောက်စင်းအတွက် စမ်းသပ် မောင်းနှင်မှုဖြစ်သည် ဟုလည်း ရုရှား စစ်ဘက်ဆိုင်ရာ သတင်းရင်းမြစ်က ပြောကြားခဲ့သည်ဟု TASS သတင်းတွင် ဖော်ပြခဲ့သည်။

Su-30 တိုက်လေယာဉ် အမျိုးအစားသည် နေတိုးအခေါ် Flanker-C ဖြစ်ပြီး လေသူရဲ နှစ်ဦးမောင်း၊ အင်ဂျင် နှစ်လုံးတပ် ၄+မျိုးဆက် ဘက်စုံသုံး တိုက်ခိုက်ရေး လေယာဉ်ဖြစ်ပြီး Su-30 SM အမျိုးအစားသည် ယခင်က ရုရှားတပ်မတော် အတွက်သာ အဓိက ထုတ်လုပ်ထားခြင်း ဖြစ်ကာ ကာဇတ်စတန်နိုင်ငံ တစ်နိုင်ငံတည်းကိုသာ ခြောက်စီး ရောင်းချထားကြောင်း သိရသည်။

လက်ရှိတွင် မြန်မာ့တပ်မတော် (လေ) ၏ အဓိက တိုက်လေယာဉ်အဖြစ် ရုရှားထုတ် MiG-29 အမျိုးအစား ဘက်စုံသုံး တိုက်လေယာဉ်များကို အသုံးပြုနေသလို ပြီးခဲ့သည့်နှစ် ဒီဇင်ဘာလ အတွင်းကလည်း ရုရှားထုတ် YaK-130 အမျိုးအစား တန်းမြင့် အမောင်းသင် ဂျက်လေယာဉ်များကို တပ်တော်ဝင်ခဲ့သည်။

ထို့ပြင် တပ်မတော် (လေ) သည် ရုရှားထုတ် Mi-2 ၊ Mi -17 ၊ Mi-35 အမျိုးအစား ရဟတ်ယာဉ်များကို အသုံးပြုနေပြီး နှစ်နိုင်ငံ ကာကွယ်ရေး သဘောတူစာချုပ်တစ်ရပ်ကိုလည်း ၂၀၁၇ ခုနှစ်အတွင်းက ချုပ်ဆိုခဲ့ကြောင်း သိရသည်။

 

ပြင်သစ်က ဂျာမနီနှင့်ပူးတွဲ၍ တိုက်လေယာဉ်တည်ဆောက်မည့် စီမံကိန်းအား ဦးဆောင်မည်

၂၀၁၇ ခုနှစ် ဇန်န၀ါရီ ၆ ရက်က ပြင်သစ်အနောက်တောင်ပိုင်းရှိ လေတပ်စခန်းတစ်ခု၌ ပြင်သစ်ရာဖေးတိုက်လေယာဉ်နှစ်စင်းကို တွေ့ရစဉ် (Photo: AFP)

ဇွန် ၂၀ ရက်က ပြင်သစ်နှင့် ဂျာမနီအစိုးရတို့ကြား၌ ရရှိခဲ့သည့် သဘောတူညီမှုတစ်ခုအရ ဂျာမနီနှင့်အတူ ဂျက်တိုက်လေယာဉ် မျိုးဆက်သစ်တစ်ခုအား တည်ဆောက်ရေးတွင် ပြင်သစ်က ဦးဆောင်မည်ဟု ပြင်သစ်ကာကွယ်ရေးဝန်ကြီးဌာနက ထုတ်ပြန်ခဲ့သည်။

အဆိုပါ ဂျက်တိုက်လေယာဉ်သစ်သည် ၂၀၄၀ ပြည့်နှစ်၌ ပြင်သစ်၏ Dassault လေကြောင်းလုပ်ငန်းမှ ရာဖေးလေယာဉ်များ၊ ဂျာမနီ၏ယူရိုဖိုက်တာများ (ဥရောပအကျိုး တူလုပ်ငန်းတစ်ခုက ထုတ်လုပ်) အား အစားထိုးရန်အတွက် ရည်ရွယ်ထားသည်။

ယခုဖရန်ကို-ဂျာမန် သဘောတူညီချက်အရ ယင်းတိုက်လေယာဉ်စီမံကိန်းကို လေ့လာရေးမှ အစပြုပြီး ယခုနှစ်ကုန်မတိုင်မီ အစပြုရန် တောင်းဆိုထားကြောင်း သိရသည်။

မျိုးဆက်သစ် အဆိုပါလေယာဉ်သည် ကိုယ်တိုင်လည်း စွမ်းဆောင်ရည်ရှိသည့်အပြင် ကျယ်ပြန့်လှသော လက်နက်စနစ်ကြီး တစ်ခု၏ ဗဟိုချက်သို့ ရောက်လာလိမ့်မည်ဟု ခန့်မှန်းရသည်။ ထို့ပြင် မောင်းသူမဲ့တပ်ရင်းတစ်ခုကို ထိန်းချုပ်နိုင်စွမ်းရှိလိမ့်မည် ဖြစ်သည်။

လေယာဉ်စီမံကိန်းသစ်အား အတူတကွ ပူးတွဲလုပ်ဆောင်ကြမည့် သဘောတူညီချက် တစ်ခုကို Dassault နှင့် ယူရိုဖိုက်တာအကျိုးတူအုပ်စုမှ အဖွဲ့ဝင်ဖြစ်သည့် Airbus တို့က ဧပြီလကတည်းက လက်မှတ်ရေးထိုးခဲ့ကြသည်။ သို့သော် မည်သူက ကြီးကြပ်မည်ဖြစ်ကြောင်းကို ထုတ်ဖော်ခဲ့ခြင်း မရှိပေ။ လက်ရှိတွင် ပြင်သစ်က ဦးဆောင်မည်ဟု သိရသဖြင့် စီမံကိန်းအားကြီးကြပ်ရန် Dassault တွင် တာဝန်ရှိသွားပြီဖြစ်သည်။ Airbus ၏ ကာကွယ်ရေးလှုပ်ရှားမှု အများစုမှာမူ ဂျာမနီတွင်ဖြစ်သည်။

“ပြင်သစ်နဲ့ ဂျာမနီအတွက် လုပ်ဆောင်နိုင်စွမ်းရည်များစွာပါတဲ့ တိုက်လေယာဉ်တစ်စင်း တည်ဆောက်ရေးဟာ ဥရောပ မဟာဗျူဟာလုပ်ပိုင်ခွင့်မှာ အဓိကဖြစ်လာမယ့် လက်နက်စနစ်တစ်ခုနဲ့ ပူးပေါင်းသွားမှာ ဖြစ်ပါတယ်” ဟု Dassault မှ အမှုဆောင် ဥက္ကဋ္ဌဖြစ်သူ အဲရစ်ထရစ်ပါက ပြောခဲ့သည်။

ယူရိုဖိုက်တာအကျိုးတူ ပူးပေါင်းရေးအဖွဲ့ထဲမှ အခြားအဖွဲ့ဝင်များမှာ ဗြိတိန်မှကာကွယ်ရေးအုပ်စု BAE Systems နှင့် အီတလီမှ Leonardo တို့ ဖြစ်ကြသည်။

၂၀၁၇ ခုနှစ် မေလက ပြင်သစ်သမ္မတအဖြစ် ရွေးကောက်ခံရကာစ အီမန်နျူရယ် မက်ခရွန်နှင့် ဂျာမနီဝန်ကြီးချုပ်အင်ဂျလာ မာကယ်တို့သည် လေယာဉ်သစ် ပူးတွဲတည်ဆောက်ရေးအတွက် ပထမဆုံးအကြိမ် သဘောတူခဲ့ကြသည်။ ထိုနှစ်နိုင်ငံသည် ပိုမိုနီးကပ်သော ကာကွယ်ရေး သဘောတူညီချက်ရရှိရေးအတွက် ယခင်က ယှဉ်ပြိုင်ဘက်များဖြစ်ခဲ့ခြင်းကို မေ့ပစ်ခဲ့ကြသည်။

တိုက်ခိုက်ရေးတင့်ကားတစ်စီးတည် ဆောက်ရေးစီမံကိန်းတစ်ခုအတွက်လည်း ဇွန် ၁၉ ရက်က ပြင်သစ်နှင့် ဂျာမနီတို့ကြားတွင် သဘောတူညီချက် ရရှိခဲ့သည်။ ၂၀၁၉ ခုနှစ်နှစ်လယ်တွင် စတင်ပြီး ၂၀၃၅ ခုနှစ်တွင် စတင်အသုံးပြုနိုင်ရန် ရည်ရွယ်ထားသည့် တင့်ကားစီမံကိန်းကိုမူ ဂျာမနီက ဦးဆောင်မည်ဖြစ်သည်။ ထို့ပြင် ပူးတွဲအမြောက်စနစ်နှင့် ဖရန်ကို-ဂျာမန်စစ်ရေးဂြိုဟ်တုလွှတ်တင်ရေး အစီအစဉ်များအတွက်လည်း ထိုနှစ်နိုင်ငံသည် သဘောတူ လက်မှတ်ရေးထိုးခဲ့ကြသည်။

Ref:Reuters

ကျွန်းကုန်းရွာပေါ်သို့ လေယာဉ်ပျက်ကျမှု မရှိစေရေးအတွက် အသက်ကို ပဓာနမထားဘဲ ဆောင်ရွက်ခဲ့သည့် ဗိုလ်မှူး အာကာဝင်းအား တပ်မတော်ကာကွယ်ရေးဦးစီးချုပ်က ချီးကျူးဂုဏ်ပြုကြောင်း ထုတ်ပြန်

လေ့ကျင့် ပျံသန်းမှု ဆောင်ရွက်နေစဉ် အင်ဂျင်ချို့ယွင်း၍ ပျက်ကျခဲ့သည့် F-7 လေယာဉ်အား ဧပြီ ၃ ရက်က တွေ့ရစဉ် (Photo: AFP)

ကျွန်းကုန်းရွာပေါ်သို့ လေယာဉ်ပျက်ကျမှု မရှိစေရေးအတွက် အသက်ကို ပဓာနမထားဘဲ လေယာဉ်အား အတတ်နိုင်ဆုံး ထိန်းကျောင်း မောင်းနှင်ခဲ့စဉ် အသက်ဆုံးရှုံး ခဲ့ရသည့် လေသူရဲဖြစ်သူ ဗိုလ်မှူး အာကာဝင်း အား တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ချီးကျူး ဂုဏ်ပြုကြောင်း ဧပြီ ၄ ရက်တွင် တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်သည်။

တောင်ငူ လေတပ်စခန်းဌာနချုပ်မှ ဗိုလ်မှူး အာကာဝင်း မောင်းနှင်သည့် အက်ဖ်- ၇ လေယာဉ်သည် လေ့ကျင့် ပျံသန်းမှု ဆောင်ရွက်နေစဉ် အင်ဂျင်ချို့ယွင်း၍ ပျက်ကျခဲ့မှုဖြစ်စဉ်နှင့် ပတ်သက်၍ အသေးစိတ် သိရှိနိုင်ရန်အတွက် ကာကွယ်ရေးဦးစီးချုပ်ရုံး (ကြည်း) နှင့် တပ်မတော် (လေ) မှ ပညာရှင်များ ပါဝင်သောအဖွဲ့သည် ဧပြီ ၄ ရက်တွင် တောင်ငူ လေတပ်စခန်းဌာနချုပ်နှင့် ဖြစ်စဉ်ဖြစ်ပွားရာ နေရာသို့ သွားရောက် စစ်ဆေးခြင်းနှင့် မျက်မြင်တွေ့ရှိခဲ့သည့် ဒေသခံ ပြည်သူများအား တွေ့ဆုံမေးမြန်းခြင်းများ ဆောင်ရွက်ခဲ့ကြောင်း၊ မျက်မြင် စစ်ဆေးချက်များနှင့် ကျွန်းကုန်းကျေးရွာမှ ကျေးရွာသားအချို့၏ မျက်မြင်တွေ့ရှိ ပြောကြားချက်များအရ ၎င်းနေရာသည် အင်ဒိုင်းရွာအထက် အမြင့်မီတာ ၃၀၀ ခန့်တွင် ရောက်ရှိနေပြီး လေယာဉ်၏ ဦးတည်ရာအရပ်မှာ ကျွန်းကုန်းရွာသို့ ဦးတည်လျက် ရှိသည်ဟု တွေ့ရှိရကြောင်း၊ ထိုအချိန်တွင် အရေးပေါ် လေထီးဖြင့် ခုန်ထွက်မည် ဆိုပါက လေသူရဲတစ်ဦးအတွက် လုံလောက်သည့် အချိန်နှင့် အမြင့်ပေတွင် ရှိနေနိုင်ပြီး အသက်အန္တရာယ် လွတ်ကင်းနိုင်သည့် အခြေအနေရှိကြောင်း တွေ့ရှိရသော်လည်း အသက်ကယ် လေထီးပါ ထိုင်ခုံ၏ တွန်းကန်အားကြောင့် လေယာဉ်ပေါ် ဖိအား သက်ရောက်စေ၍ ကျွန်းကုန်းရွာအတွင်းသို့ လေယာဉ်ပျက်ကျနိုင်သည့် အနေအထားတွင် ရှိသည်ဟု တွေ့ရှိရကြောင်း၊ ဗိုလ်မှူး အာကာဝင်းသည် ၎င်းနေရာတွင် အရေးပေါ် ခုန်ထွက်ခြင်းကို ပြုလုပ်ခဲ့ခြင်း မရှိဘဲ လေယာဉ်အား ကြိုးစား၍ ဆက်လက် ထိန်းသိမ်းခဲ့ပြီး ကျွန်းကုန်းရွာ အလွန်မြေပြင်မှ အမြင့်ပေ ၃၀ မီတာခန့် ရောက်ရှိချိန်မှသာ အရေးပေါ်ခုန်ထွက်ခြင်း ပြုလုပ်ခဲ့သည်ဟု တွေ့ရကြောင်း၊ သို့ဖြစ်၍ လုံလောက်သည့် အချိန်နှင့်အမြင့်ပေ ရရှိတော့ခြင်း မရှိဘဲ လေယာဉ်မြေပြင်သို့ ဆောင့်မိချိန်နှင့် တစ်ပြိုင်နက်တည်း ခုန်ထွက်ခဲ့သည့် အခြေအနေမျိုး ရောက်ရှိခဲ့သဖြင့် ပြင်းထန်စွာ ဒဏ်ရာရရှိခဲ့ပြီး တပ်မတော်ဆေးရုံသို့ ဆက်လက် ပို့ဆောင်စဉ် သေဆုံးခဲ့ကြောင်း တွေ့ရှိရသည်ဟု ထုတ်ပြန်ချက်တွင် ဖော်ပြထားသည်။

တရုတ်ခြိမ်းခြောက်မှု ကြုံနေရစဉ် ထိုင်ဝမ်သို့ F-35 တိုက်လေယာဉ်များ ရောင်းချရန် အမေရိကန်အမတ်များ ဖိအားပေး

၂၀၁၇ ခုနှစ် ဇွန် ၁၆ ရက်က ပါရီအပြည်ပြည်ဆိုင်ရာ လေကြောင်းပြပွဲမတိုင်မီ F-35 တိုက်လေယာဉ်တစ်စင်း ပျံသန်းနေမှုအား တွေ့ရစဉ် (Photo: AFP)

ထိုင်ဝမ်သို့ လော့ဟိမာတင်ကော်ပိုရေးရှင်း၏ F-35 တိုက်လေယာဉ်များအား ရောင်းချရန် အမေရိကန်ရီပက်ဘလီကင် အထက်လွှတ်တော်အမတ်နှစ်ဦးက သမ္မတဒေါ်နယ်ထရန့် အစိုးရအား မတ် ၂၆ ရက်တွင် တောင်းဆိုခဲ့ပြီး ယင်းရောင်းချမှုသည် တရုတ်၏ခြိမ်းခြောက်မှု ရင်ဆိုင်နေရစဉ် ထိုင်ဝမ်ဒီမိုကရေစီ တည်မြဲစေရန် အထောက်အကူဖြစ်စေမည်ဟု ပြောကြားခဲ့သည်။

၂၀၁၆ ခုနှစ်တွင် ထိုင်ဝမ်သမ္မတ ရွေးကောက်ပွဲ၌ လွတ်လပ်ရေးလိုလားသော Democratic Progressive Party (DPP) မှ ဆန်အင်းဝမ်က အနိုင်ရခဲ့ပြီးနောက် ကိုယ့်ကိုယ်ကိုယ်အုပ်ချုပ်သော ထိုင်ဝမ်ကို တရုတ်၏ ရန်လိုမှု မြင့်တက်လာခဲ့သည်။ တရုတ်က ထိုင်ဝမ်အား ၎င်း၏ပိုင်နက်အဖြစ် အခိုင်အမာ ပြောကြားထားသည်။

F-35 တိုက်လေယာဉ်များသည် ထိုင်ဝမ်၏ ကိုယ့်ကိုယ်ကိုယ်ကာကွယ်ရေးကို အပြုသဘော သက်ရောက်မည်ဖြစ်ပြီး အာရှ-ပစိဖိတ်ဒေသတစ်ဝန်း၌ တရုတ်၏ ရန်လိုသော စစ်ဘက်ရပ်တည်မှုကို ဟန့်တားရန်အတွက် လိုအပ်ကြောင်း အများစုခေါင်းဆောင်၏ လက်ထောက် အထက်လွှတ်တော်အမတ် ဂျွန်ကော်နင်းနှင့် အထက်လွှတ်တော် လက်နက်ကိုင်ရေးရာကော်မတီ ထိပ်တန်းအဖွဲ့ဝင် ဂျိမ်းစ်အင်ဟိုဖီတို့က ထရန့်ထံ စာရေးသား တောင်းဆိုခဲ့ခြင်းဖြစ်သည်။ စစ်တပ်ခေတ်မီစေရန်အတွက် နှစ်ပေါင်းများစွာ လုပ်ဆောင်ခဲ့ပြီးနောက် တရုတ်သည် ၁၉၅၀ ပြည့်လွန်နှစ်များနှောင်းပိုင်း၌ ပထမဆုံးအကြိမ်အဖြစ် ထိုင်ဝမ်ကို စစ်ပွဲဆင်နွှဲနိုင်သည့်စွမ်းရည်ကို ပြသခဲ့ကြောင်း ၎င်းတို့က ရေးသားခဲ့သည်။

သို့သော် သမ္မတထရန့်၏ ဦးဆောင်မှုဖြင့် ထိုင်ဝမ်အား ဒီမိုကရေစီအဖြစ် ဆက်လက်တည်ရှိနိုင်ရန်၊ စစ်ရေးအကျပ်ကိုင်မှုကြောင့် မဟုတ်ဘဲ တရုတ်နှင့် ဆက်ဆံရေးကို လွတ်လပ်စွာ ထူထောင်ရန်အတွက် ထိုင်ဝမ်ကို ကူညီနိုင်ရန် ဖြစ်နိုင်ခြေရှိကြောင်း ယင်းစာတွင် ရေးသားခဲ့သည်။

ထိုင်ဝမ်စစ်တပ်အား ၄၈ နာရီအတွင်း အလုပ်မဖြစ်စေရန်အတွက် ဟန့်တားနိုင်မည့် အကြီးအကျယ် ဗုံးကြဲတိုက်ခိုက်မှု အပါအ၀င် တရုတ်သည် ထိုင်ဝမ်အား တိုက်ခိုက်ရာတွင် လွယ်ကူသည့်အကြောင်းကို အငြိမ်းစားတရုတ်ဗိုလ်ချုပ် ၀မ်ဟောင်ကွမ်က အစိုးရသတင်းစာ ဂလိုဘယ်တိုင်းမ်တွင် မတ် ၂၇ ရက်၌ ရေးသားခဲ့သည်။ တိုင်ပေအပြင်ဘက်ရှိ ထိုင်ဝမ်အဓိကကွပ်ကဲစင်တာအား ဂူဂဲမြေပုံများတွင် ရှင်းရှင်းလင်းလင်း ဖော်ပြထားရာ ထိပ်ပြောင်နေသူ၏ခေါင်းမှ သန်းများကို ဖယ်ရှားသလို ဖြစ်နေမည်ဖြစ်ကြောင်း ၀မ်က ပြောကြားခဲ့သည်။

အမေရိကန်ထိပ်တန်းတာဝန်ရှိသူများအား ထိုင်ဝမ်ထိပ်တန်း တာဝန်ရှိသူများနှင့် တွေ့ဆုံရန် အားပေးသည့် ဥပဒေကြမ်းတစ်ရပ်ကို ထရန့်က ယခုလတွင် လက်မှတ်ထိုးခဲ့မှုအတွက် တရုတ်က ဒေါသထွက်ခဲ့ပြီးနောက် ယခုကဲ့သို့ ဂျက်လေယာဉ်များ ရောင်းချပါက ပေကျင်းနှင့် တင်းမာမှုကို ပိုမိုမြင့်တက်စေနိုင်သည်။

လော့ဟိမာတင်သည် ပြီးခဲ့သောနှစ်တွင် အမေရိကန်နှင့် ၎င်း၏မဟာမိတ်များထံသို့ F-35 တိုက်လေယာဉ် ၆၆ စင်း ပေးပို့နိုင်ခဲ့ပြီး ၂၀၁၇ ခုနှစ်၏ လျာထားချက်ကို ပြည့်မီခဲ့သည်။

Ref: Reuters