တာမွေမြို့နယ် တာမွေဈေးရှေ့တွင် အုပ်စုနှစ်စု ခိုက်ရန်ဖြစ်ပွားပြီး ဓားခုတ်ခံရသောကြောင့် တစ်ဦးသေ၊ နှစ်ဦးဒဏ်ရာရ

အခင်းဖြစ်နေရာအား တာဝန်ရှိသူများ လာရောက်စစ်ဆေးနေသည်ကို တွေ့ရစဉ် (ဓာတ်ပုံ – ကြည်နိုင်)

တာမွေမြို့နယ် တာမွေဈေးရှေ့တွင် အုပ်စုနှစ်စု ခိုက်ရန်ဖြစ်ပွားပြီး  ဓားခုတ်ခံရသောကြောင့် အခင်းဖြစ်နေရာတွင် တစ်ဦးသေဆုံးခဲ့ပြီး နှစ်ဦးဒဏ်ရာရရှိမှု  စက်တင်ဘာ ၁၁ ရက် ည ၁၀ နာရီခန့်က ဖြစ်ပွားခဲ့ကြောင်း ကနဦးသတင်းများအရ သိရသည်။

ယင်းနှင့်ပတ်သက်၍ တာမွေမြို့မ ရဲစခန်းသို့ သွားရောက်မေးမြန်းခဲ့ရာ ကျူးလွန်သူများကို လိုက်လံဖမ်းဆီးဆဲဖြစ်ပြီး အခင်းဖြစ်စဉ် အသေးစိတ်အား ရန်ကုန်တိုင်းဒေသကြီးရဲတပ်ဖွဲ့မှ သတင်းထုတ်ပြန် ရေးကိုမေးမြန်းရန် ပြန်လည်ဖြေကြားခဲ့သည်။

“တစ်ယောက်သေပြီး နှစ်ယောက်ဒဏ်ရာရတယ်၊ အခုတော့ ကျူးလွန်တဲ့သူတွေကို လိုက်ဖမ်းနေဆဲဖြစ်တယ်။ ဖြစ်စဉ်ကို တိုင်းရဲတပ်ဖွဲ့ သတင်းထုတ်ပြန်ရေးကိုမေးပါလို့ တာဝန်မှူးကပြောတယ်” ဟု တာမွေ မြို့မရဲစခန်းမှ တာဝန်ကျရဲတပ်ဖွဲ့ဝင်တစ်ဦးက ည ၁၁ နာရီ ၄၅ မိနစ်ခန့်က ပြောသည်။

ရန်ဖြစ်ပြီး ဓားခုတ်မှုဖြစ်ပွားသည့် နေရာမှ ဓားအရှည်နှင့် ဓားအတို လေးချောင်းခန့် တာမွေမြို့နယ်ရဲတပ်ဖွဲ့မှ တာဝန်ရှိသူများ သိမ်းဆည်းရမိသည်ကို  Daily Eleven  မှ သတင်းသွားယူရာတွင် တွေ့မြင်ခဲ့ရသည်။

တာမွေဈေးအနီးနေထိုင်သူတစ်ဦးက “အုပ်စုနှစ်စု ရန်ဖြစ်တာမှာ ဓားတွေနဲ့ ၀ိုင်းခုတ်ကြတယ်လို့ သိရတယ်။ တခြားမြို့နယ်က လူတွေနဲ့ တာမွေမြို့နယ်က လူတွေလို့တော့ ကြားတယ်။ ညနေကတည်းက ဂိမ်းဆိုင်တစ်ခုမှာ ရန်ဖြစ်ခဲ့ကြသေးတယ်လို့လည်း ကြားမိတယ်” ဟု ပြောကြားသည်။

ဖြစ်ပွားခဲ့သည့် ဖြစ်စဉ်အား တာမွေမြို့မရဲစခန်းမှ ဆက်လက်စစ်ဆေးလျက်ရှိပြီး ကျုးလွန်သူများအား ဖမ်းဆီးရမိရန် ဆောင်ရွက်နေကြောင်း သိရသည်။

အုပ်စုနှစ်ဖွဲ့၏ အခင်းဖြစ်ပွားမှုမှ ရရှိသည့် စစ်ဆေးဖော်ထုတ်ချက်များကို ဆက်လက်ဖော်ပြသွားပါမည်။

တာမွေတွင် စစ်ပွဲရပ် ဆန္ဒထုတ်ဖော်မှု ပြုလုပ်သူများနှင့် တန်ပြန် ဆန္ဒထုတ်ဖော်သူများကို တာဝန်ရှိသူများက ကြိုတင်တွေ့ဆုံ ညှိနှိုင်းခြင်း၊ တားဆီးခြင်းများ မပြုလုပ်ခဲ့သဖြင့် မလိုလားအပ်သော ပြဿနာများ ဖြစ်ပွားခဲ့ကြောင်း လူ့အခွင့်အရေးကော်မရှင် ထုတ်ပြန်

တာမွေတွင် စစ်ပွဲရပ် ဆန္ဒထုတ်ဖော်သူများနှင့် တန်ပြန်ဆန္ဒပြသူများကို တာဝန်ရှိသူများက ကြိုတင်တွေဆုံ ညှိနှိုင်းခြင်း၊ တားဆီးခြင်းများ မရှိသဖြင့် မလိုလားအပ်သော ပြဿနာများ ဖြစ်ပွားခဲ့ကြောင်း မြန်မာနိုင်ငံ အမျိုးသားလူ့အခွင့်အရေး ကော်မရှင်က ဇွန် ၂၇ ရက်တွင် သတင်းထုတ်ပြန်သည်။

လူ့အခွင့်အရေးကော်မရှင်က စုံစမ်းမေးမြန်းချက်များအရ စစ်ပွဲရပ် ဆန္ဒထုတ်ဖော်သူများသည် ငြိမ်းစုစီ ဥပဒေနှင့်အညီ တာဝန်ရှိသူများကို အသိပေးခဲ့သော်လည်း တာဝန်ရှိသူများအနေဖြင့် ဒေသန္တရ အမိန့်အရ ခွင့်ပြုနိုင်ခြင်း မရှိပါက မည်သည့်အတွက် ခွင့်မပြုနိုင်ကြောင်းကို ကြိုတင်တွေ့ဆုံ ညှိနှိုင်းခြင်း၊ ရှင်းလင်း အသိပေးခြင်း၊ နှစ်ဦးနှစ်ဖက် နားလည်မှုရယူခြင်းများကို ဆောင်ရွက်ခြင်း မပြုခဲ့သည်ကို တွေ့ရရှိရသည့်အပြင် ငြိမ်းစုစီ ဥပဒေနှင့်အညီ ခွင့်ပြုချက် တောင်းခံခြင်းမရှိဘဲ တန်ပြန်ဆန္ဒပြမည့် ဆန့်ကျင်ဘက် လူပုဂ္ဂိုလ်အဖွဲ့အစည်းများကိုလည်း ထိုသို့ပြုလုပ်မည်ကို သတင်းရရှိပါလျက် တာဝန်ရှိသူများက ကြိုတင်ဆွေးနွေး ညှိနှိုင်းတားဆီးခြင်း မပြုခဲ့ခြင်းကြောင့် မလိုလားအပ်သော ပြဿနာများ ဖြစ်ခဲ့ရကြောင်း ထုတ်ပြန်ချက်တွင် ရေးသားထားသည်။

အဆိုပါဖြစ်စဉ်မှ ခွင့်ပြုချက်မရဘဲ စစ်ပွဲများရပ် ဆန္ဒထုတ်ဖော်သူများကို ငြိမ်းစုစီ ဥပဒေပုဒ်မ ၂၀ ဖြင့် အမှုဖွင့် အရေးယူထားသကဲ့သို့ တရားဝင် တာဝန်ပေးအပ်ခြင်း မရှိဘဲ တန်ပြန် ဆန္ဒပြသူများကို အရပ်ဝတ်ဖြင့် ၀င်ရောက် ဖမ်းဆီးခဲ့သူများအနက် ရှစ်ဦးကို မေ ၂၈ ရက်တွင် ဗဟန်းမြို့နယ် ရဲတပ်ဖွဲ့က မြို့နယ်တရားရုံးသို့ ဦးတိုက်လျှောက်ထား တရားစွဲဆိုခဲ့သောကြောင့် စုံစမ်းစစ်ဆေးလျက် ရှိသည်ကို တွေ့ရှိရကြောင်း၊ သတင်းရယူသည့် သတင်းမီဒီယာသမားများ အနေဖြင့်လည်း သတင်းမီဒီယာသမားအဖြစ် သိသာ ထင်ရှားစေသော အမှတ်အသားများကို အသုံးပြု၍ သတင်းရယူသင့်ကြောင်း ထုတ်ပြန်ချက်တွင် ဖော်ပြသည်။

ပြီးခဲ့သည့် မေ ၁၂ ရက် ညနေပိုင်းက တာမွေအ၀ိုင်းရှိ အိုးရှင်းစင်တာရှေ့တွင် စစ်ပွဲများ ရပ်တန့်ရေးအတွက် ဆန္ဒထုတ်ဖော်သူများကို ရဲတပ်ဖွဲ့က တားဆီးရာတွင် အရပ်ဝတ်အချို့က ဆန္ဒထုတ်ဖော်သူများကို ချုပ်နှောင် ဖမ်းဆီးပေးခြင်း၊ သတင်းရယူနေသော မီဒီယာသမားများကို ခြိမ်းခြောက်မှုများ ပြုလုပ်ခဲ့ခြင်းတို့ ဖြစ်ပွားခဲ့ကြောင်း သိရသည်။

တာမွေမြို့နယ်၌ ငြိမ်းချမ်းရေးဆန္ဒထုတ်ဖော်သူများနှင့် သတင်းမီဒီယာသမားများအား အရပ်ဝတ်ဖြင့်လူအချို့က ခြိမ်းခြောက်ခြင်းများနှင့်ပတ်သက်၍ ပြည်ထဲရေးဝန်ကြီးဌာနနှင့် ရန်ကုန်တိုင်းဒေသကြီး အစိုးရအဖွဲ့ထံ ညှိနှိုင်းအကြောင်းကြားပြီးဖြစ်ကြောင်း လူ့အခွင့်အရေးကော်မရှင်ဥက္ကဋ္ဌ ပြောကြား

တာမွေမြို့နယ်တွင် ငြိမ်းချမ်းရေးဆန္ဒထုတ်ဖော်သူများနှင့် သတင်းမီဒီယာသမားများအား အရပ်ဝတ်ဖြင့်လူအချို့က ခဲဖြင့်ပေါက်ခြင်း၊ ဆဲဆိုခြင်း၊ ခြိမ်းခြောက်ခြင်းများနှင့် ပတ်သက်ပြီး ပြည်ထဲရေးဝန်ကြီးဌာနနှင့် ရန်ကုန်တိုင်းဒေသကြီး အစိုးရအဖွဲ့ထံ ညှိနှိုင်းအကြောင်းကြားပြီးဖြစ်ကြောင်း လူ့အခွင့်အရေးကော်မရှင်ဥက္ကဋ္ဌက ပြောကြားသည်။

မေ ၂၈ ရက်ကပြုလုပ်သည့် ပြည်ထောင်စုလွှတ်တော်အစည်းအဝေးတွင် မြန်မာနိုင်ငံ အမျိုးသား လူ့အခွင့်အရေးကော်မရှင်၏ ၂၀၁၇ ခုနှစ် နှစ်ပတ်လည်အစီရင်ခံစာအား လွှတ်တော်ကိုယ်စားလှယ်များ၏ ဆွေးနွေးချက်များအပေါ်တွင် ပြန်လည်ရှင်းလင်းခဲ့ခြင်း ဖြစ်သည်။

ကော်မရှင်ဥက္ကဋ္ဌဦးဝင်းမြက “လွှတ်တော်ကိုယ်စားလှယ် ဦးရဲထွဋ်ရဲ့ ဆွေးနွေးချက်မှာပါတဲ့ မေ ၁၂ ရက်က တာမွေမြို့နယ်မှာ ငြိမ်းချမ်းရေးဆန္ဒဖော်ထုတ်သူတွေနဲ့ သတင်းမီဒီယာသမားတွေကို အရပ်ဝတ်နဲ့လူတချို့က ခဲဖြင့်ပေါက်ခြင်း၊ ဆဲဆိုခြင်း၊ ခြိမ်းခြောက်ခြင်းတွေနဲ့ပတ်သက်လို့ မြန်မာသတင်းသမားများ ကာကွယ်ရေးကော်မတီက တိုင်ကြားချက် ရရှိထားတဲ့အတွက် ပြည်ထဲရေးဝန်ကြီးဌာနနဲ့ ရန်ကုန်တိုင်းဒေသကြီးအစိုးရအဖွဲ့တို့ထံ ညှိနှိုင်းအကြောင်းကြားပြီး ဖြစ်ပါတယ်။ ဆန္ဒပြမှုကြောင့် အရေးယူခြင်းခံခဲ့ရတဲ့သူတွေက ကျွန်တော်တို့ကော်မရှင်ကို ဓာတ်ပုံ၊ စာရွက်စာတမ်း အထောက်အထားတွေနဲ့ ဂဃနဏတိုင်ကြားမယ်လို့ ပြောကြားခဲ့သော်လည်း ယနေ့ အချိန်အထိ ရောက်ရှိလာခြင်းမရှိသေးတဲ့အတွက် တိုင်တန်းချက်ရရှိတာနဲ့ အမြန်ဆုံးစိစစ်ဆောင်ရွက်သွားမှာ ဖြစ်ပါတယ်” ဟု ပြောကြားသည်။

ထို့ပြင် ကော်မရှင်အနေဖြင့် လူတစ်ဦးချင်းစီ၏ လူ့အခွင့်အရေးများကို လက်လှမ်းမီ သိရှိသမျှ စွမ်းအားရှိသရွေ့ ညှိနှိုင်းဖြေရှင်းပေးနေသည့် တစ်ချိန်တည်းမှာပင် လူအများစု၏ လူ့အခွင့်အရေးဆုံးရှုံးမှုများကိုလည်း လျစ်လျူရှုထားခြင်းမရှိဘဲ ကြိုးပမ်းဆောင်ရွက်လျက်ရှိကြောင်း၊ ဥပမာအားဖြင့် ရခိုင်ပြည်နယ်တွင် လူ့အခွင့်အရေး ချိုးဖောက်မှုများအတွက် ၂၀၁၇ ခုနှစ်အတွင်းတွင် တိုင်တန်းချက် မရှိသော်လည်း ယင်းဒေသသို့ သုံးကြိမ်သွားရောက်ပြီး ဒေသခံတိုင်းရင်းသားများဖြစ်သည့် မြို၊ ခမီ၊ ဒိုင်းနက်၊ ရခိုင်များအပြင် ဟိန္ဒူဘာသာဝင်၊ ဘင်္ဂါလီများ၏ လူ့အခွင့်အရေး ချိုးဖောက်ခံရမှုများကို ဖော်ထုတ်တင်ပြခဲ့ကြောင်း ၎င်းက ဆက်လက်ပြောကြားသည်။

ယခုနှစ်အတွင်းတွင် ကချင်ပြည်နယ်နှင့် ရှမ်းပြည်နယ်ရှိ စစ်ပွဲဖြစ်ပွားရာဒေသများမှ အိုးအိမ်လယ်ယာပိုင်ဆိုင်မှုများ စွန့်ပစ်ပြီး စစ်ရှောင်နေကြရသည့်သူများနှင့် ပညာသင်ခွင့် ဆုံးရှုံးနေသည့် ၎င်းတို့၏ သားသမီးများ၊ အလုပ်အကိုင်အခွင့်အလမ်း ဆုံးရှုံးနေကြရသည့် လူငယ်များအတွက် သက်ဆိုင်ရာဒေသများသို့ သွားရောက်လေ့လာပြီး လူ့အခွင့်အရေးဆိုင်ရာရှုထောင့်မှ ကူညီဆောင်ရွက်ပေး နိုင်ရန်အတွက် စီစဉ်ဆောင်ရွက်နေပြီဖြစ်ကြောင်း ကော်မရှင်ဥက္ကဋ္ဌ ဦးဝင်းမြက ပြောကြားသည်။

မြန်မာနိုင်ငံအမျိုးသားလူ့အခွင့်အရေး ကော်မရှင်၏ ၂၀၁၇ ခုနှစ် နှစ်ပတ်လည် အစီရင်ခံစာနှင့်ပတ်သက်ပြီး လွှတ်တော်ကိုယ်စားလှယ်များ၏ ဆွေးနွေးချက်များအား ကော်မရှင်ဥက္ကဋ္ဌ ဦးဝင်းမြက ပြန်လည်ဖြေရှင်းဆွေးနွေးမှုများပြုလုပ်ခဲ့ကာ ကော်မရှင်၏ အစီရင်ခံစာအား ပြည်ထောင်စုလွှတ်တော်က မှတ်တမ်းတင်ခဲ့သည်။