မြိုင်မြို့နယ်အတွင်း တရားမ၀င်သစ် သယ်ဆောင်လာသည့် မော်တော်ယာဉ်တစ်စီးအား ဒေသခံများက ဖမ်းဆီးပြီး သက်ဆိုင်ရာသို့ အပ်နှံခဲ့

ပခုက္ကူခရိုင် မြိုင်မြို့နယ်တွင် ဇွန် ၃၀ ရက် ညပိုင်းက တရားမ၀င်သစ် သယ်ဆောင်လာသည့် မော်တော်ယာဉ်တစ်စီးအား ဒေသခံများက ၀ိုင်းဝန်းဖမ်းဆီးပြီး သက်ဆိုင်ရာ သစ်တောဦးစီးဌာနနှင့် ရဲစခန်းသို့ အပ်နှံခဲ့ကြောင်း သိရသည်။

မြိုင်မြို့နယ် ညောင်ပင်လယ်ကျေးရွာနှင့် ဗလင်းတိုက်နယ်ကြားလမ်းတွင် တရားမ၀င်သစ်များ သယ်ဆောင်လာသည်ဟု သတင်းရရှိသည့်အတွက် ဒေသခံခြောက်ဦးခန့်က တရားမ၀င်သစ် တင်ဆောင်လာသည့် ယာဉ်အား စောင့်ဆိုင်းဖမ်းဆီးပြီး သက်ဆိုင်ရာသို့ အပ်နှံခဲ့ခြင်းဖြစ်သည်။

“အရင်ကလည်း ပြည်သူတွေက သတင်းပေးတယ်။ သက်ဆိုင်ရာဌာနကို သတင်းပေးတော့ ဖမ်းဆီးခြင်းမရှိတဲ့အတွက် ခုပြည်သူတွေက သစ်မှောင်ခိုတင်လာတဲ့ ကားကိုစောင့်ပြီး ဖမ်းလိုက်တာပါ။ ဖမ်းပြီး သစ်တောကို အပ်လိုက်ပါတယ်” ဟု သစ်ဖမ်းဆီးရာတွင် ပါဝင်သူ မြိုင်မြို့နယ်မှ ကိုမြင့်နိုင်က ပြောကြားသည်။ တရားမ၀င်သစ် တင်ဆောင်လာသည့် ယာဉ်အမှတ် 2A/ – – – – ၊ ခြောက်ဘီးယာဉ်ပေါ်မှ ပိတောက်သစ်အမျိုးအစား စကွဲယားတုံး ၇၃ တုံးနှင့် ယာဉ်မောင်းအား ဖမ်းဆီးရမိခဲ့ပြီး မြိုင်မြို့နယ်၊ ဗဟင်းရဲစခန်းတွင် အမှုဖွင့် စစ်ဆေးဆောင်ရွက်နေကြောင်း သိရသည်။

စစ်ကိုင်းတိုင်းဒေသကြီး၌ ၂၀၁၇-၂၀၁၈ ဘဏ္ဍာနှစ် ဧပြီအထိ တရားမ၀င်သစ်တန်ချိန် ၁၅၀၀ ကျော်နှင့် တရားခံ တစ်ရာကျော် အပါအ၀င် ဆက်စပ်ပစ္စည်းများ ဖမ်းဆီးရမိ

စစ်ကိုင်းတိုင်းဒေသကြီးအတွင်း ဖမ်းဆီးရမိသော တရားမ၀င်သစ်များကို တာဝန်ရှိသူတို့စစ်ဆေးနေစဉ်

၂၀၁၇-၂၀၁၈ ဘဏ္ဍာနှစ် ဧပြီအထိ စစ်ကိုင်းတိုင်းဒေသကြီး၌ တရားမ၀င်သစ်တန်ချိန် ၁၅၀၀ ကျော်နှင့် တရားခံ တစ်ရာကျော် အပါအ၀င် ဆက်စပ်ပစ္စည်းများ ဖမ်းဆီးရမိကြောင်း တိုင်းဒေသကြီးသစ်တောဦးစီးဌာနရုံးမှ သိရသည်။

ယင်းဘဏ္ဍာနှစ် စစ်ကိုင်းခရိုင်တွင် တရားမ၀င်ကျွန်း၊ သစ်မာနှင့် အခြားသစ်မျိုးစုံ တန်ချိန်ပေါင်း ၆ ဒသမ ၉၇၀၀ အား ဖမ်းဆီးရမိခဲ့ပြီး ရွှေဘိုခရိုင်တွင် တရားမ၀င် ကျွန်း၊ သစ်မာနှင့် အခြားသစ်မျိုး တန်ချိန် ၁၀၆ ဒသမ ၄၀၇၂ အား ဖမ်းဆီးရမိကာ မုံရွာခရိုင်တွင် ကျွန်း၊ သစ်မာနှင့် အခြားသစ်မျိုးတန်ချိန်ပေါင်း ၈၈ ဒသမ ၀၁၂၆ ဖမ်းဆီးရမိကြောင်း သိရသည်။

ကသာခရိုင်တွင် ကျွန်း၊ သစ်မာနှင့် အခြားသစ်မျိုးတန်ချိန်ပေါင်း ၇၇၆ ဒသမ ၈၁၃၉ အား ဖမ်းဆီးရမိခဲ့ကြောင်း၊ ကလေးခရိုင်တွင် ကျွန်း၊ သစ်မာနှင့် အခြားသစ်မျိုး တန်ချိန်ပေါင်း ၂၀၀ ဒသမ ၄၁၄၆ ဖမ်းဆီးရမိခဲ့ပြီး မော်လိုက်ခရိုင်တွင် ကျွန်း၊ သစ်မာနှင့်အခြားသစ် တန်ချိန်ပေါင်း ၁၈၇ ဒသမ၀ ၄၃၄ ဖမ်းဆီးရမိကာ ခန္တီးခရိုင်တွင် ကျွန်း၊ သစ်မာနှင့် အခြားသစ်မျိုး တန်ချိန်ပေါင်း ၃၂ ဒသမ ၀၀၁၇ ဖမ်းဆီးရမိကြောင်း၊ တမူးခရိုင်တွင် ကျွန်း၊ သစ်မာနှင့် အခြားသစ်မျိုးတန်ချိန်ပေါင်း ၁၃၀ ဒသမ ၇၉၁၉ ဖမ်းဆီးရမိပြီး စုစုပေါင်း ကျွန်း၊ သစ်မာနှင့် အခြားသစ်မျိုးစုံတန်ချိန် ၁၅၂၈ ဒသမ ၄၅၅၃ ဖမ်းဆီးရမိကြောင်း စစ်ကိုင်းတိုင်းဒေသကြီး သစ်တောဦးစီးဌာနရုံးမှ သိရသည်။

ယင်းနောက်တရားခံ ၁၀၆ ဦး၊ ကား ၄၉ စီး၊ ဆိုက်တွဲ တစ်စီး၊ သုံးဘီး ဆိုင်ကယ် ၁၃ စီး၊ ထော်လာဂျီ ခုနစ်စီး၊ ဆိုင်ကယ် ၂၁ စီး၊ လယ်ထွန်စက် ခြောက်စီး၊ စက်လှေကြီးတစ်စင်း၊ စက်လှေနှစ်စင်း ဖမ်းဆီးရမိခဲ့ကြောင်း သိရသည်။

ထို့ပြင် အင်ဂျင်၊ လွှဝိုင်း၊ ရှပ်တန်း၊ ပူလီ၊ ပတ္တားကြိုး၊ လက်ဆွဲလွှ၊ ချိန်းဆော၊ လွှခုံ၊ စက်လွှ၊ ကျွဲထီး၊ ဒလိမ့်တုံး၊ ထော်လာဘီး၊ ဘတ်ကြိုးတို့ကိုလည်း ဖမ်းဆီးရမိခဲ့ကြောင်း သိရသည်။

၂၀၁၇-၂၀၁၈ ဘဏ္ဍာနှစ် မတ်လအထိ စစ်ကိုင်းတိုင်းဒေသကြီး၌ ဖမ်းဆီးရမိခဲ့သည့် ကျွန်း၊ သစ်မာနှင့် အခြားသစ်မျိုးတန်ချိန်ပေါင်း ၉၆၂၂ ဒသမ ၅၂၂၁ နှင့် တရားခံ ၉၈၉ ဦး အပါအ၀င် ကားအစီးရေ ၅၂၃ စီး ဖမ်းဆီးရမိကြောင်း၊ ထို့ပြင် လယ်ထွန်စက်၊ ထော်လာဂျီ၊ ဆိုင်ကယ် စသည့် ဆက်စပ်ပစ္စည်းမျိုးစုံကိုလည်း ဖမ်းဆီးရမိခဲ့ကြောင်း သိရသည်။

ကျောက်ဆည်မြို့တွင် ဖြစ်ပွားခဲ့သော တရားမ၀င် သစ်သယ်ဆောင်မှုအား ပိုင်ရှင်မဲ့ပြုလုပ်သည့် အမှုနှင့်ပတ်သက်၍ တာဝန်သိရဲဝန်ထမ်းများကို အန္တရာယ်မရှိရန် လွှတ်တော်ကိုယ်စားလှယ်များက ပူးပေါင်းဆောင်ရွက်သွားမည်ဟု ပြောကြား

တွေ့ဆုံညှိနှိုင်းဆွေးနွေးမှုကို မေ ၁၀ ရက် နံနက်ပိုင်းက ဟိုတယ် ကျောက်ဆည်တွင် ပြုလုပ်စဉ်

ကျောက်ဆည်မြို့တွင် ဖြစ်ပွားခဲ့သော တရားမ၀င်သစ် သယ်ဆောင်မှုအား ပိုင်ရှင်မဲ့ ပြုလုပ်ခဲ့သည့် အမှုနှင့်ပတ်သက်၍ တာဝန်သိရဲဝန်ထမ်းများကို အကူအညီပေးနိုင်ရန်အတွက် ကျောက်ဆည်မြို့ ရွေးချယ်ခံလွှတ်တော်ကိုယ်စားလှယ်များနှင့် ကျောက်ဆည်မြို့နယ် ၈၈ မျိုးဆက်ငြိမ်းချမ်းရေးနှင့် ပွင့်လင်းလူအဖွဲ့စည်းမှ အဖွဲ့ဝင်များ တွေ့ဆုံညှိနှိုင်းဆွေးနွေးမှုကို မေလ ၁၀ ရက် နံနက်ပိုင်းက ဟိုတယ်ကျောက်ဆည်တွင် ပြုလုပ်ခဲ့သည်။

ဆွေးနွေးမှုများအရ ကျောက်ဆည်မြို့ လွှတ်တော်ကိုယ်စားလှယ်များက ဖြစ်ပွားခဲ့သည့် ဥပဒေမဲ့လုပ်ရပ်များ ထပ်မံမဖြစ်ပွားအောင်နှင့် ဖြစ်စဉ်တွင်တာဝန်သိစွာ ဖမ်းဆီးခဲ့သည့် ရဲဝန်ထမ်းငါးဦးကို အန္တရာယ်မဖြစ်ရန် လွှတ်တော်ကိုယ်စားလှယ်များက ဥပဒေနှင့်အညီ ကူညီဝိုင်းရန် ဆောင်ရွက်ပေးသွားမည် ဖြစ်ကြောင်း ဆွေးနွေးညှိနှိုင်းခဲ့သည်။

“ဒီနေ့ လွှတ်တော်ကိုယ်စားလှယ်တွေနဲ့ ဆွေးနွေးတဲ့ အကြောင်းရင်းက အချိန်ခပ်မြန်မြန်လုပ်ရမယ့် အခြေအနေတွေဖြစ်တဲ့အတွက် လွှတ်တော်ကိုယ်စားလှယ်တွေနဲ့ ဖုန်းနဲ့ပဲ ဆက်သွယ်ဖြစ်ခဲ့ကြပြီး ထိပ်တိုက်တွေ့ဆုံ ဆွေးနွေးဖို့ အချိန်မရခဲ့ဘူး။ ဒါကြောင့်မို့လို့ ဒီနေ့မှာ တွေ့ဆုံပြီးတော့ ဆွေးနွေးပွဲလုပ်တာပါ။ အခုလက်ရှိဆိုရင် တာဝန်ရှိတဲ့ ရဲတပ်သားတွေကို အရေးယူစစ်ဆေးမှုတွေ ပြုလုပ်နေသလို အဓိက ကျောက်ဆည်မြို့ရဲ့ တရားဥပဒေ စိုးမိုးရေးကို ခြိမ်းခြောက်နေတဲ့ ပျက်ပြားအောင် လုပ်နေတဲ့ ကားနဲ့အတူ ဖမ်းမိတဲ့သူတွေကို ပြန်ခေါ်သွားတဲ့ မုံလာကိုလည်း မနေ့က ဖမ်းဆီးမိခဲ့ပြီဆိုတော့ ရှေ့ဆက် ဘာတွေလုပ်ကြမလဲ။ တာဝန်သိစွာ ဖမ်းဆီးခဲ့တဲ့ ရဲဝန်ထမ်းတွေအတွက် အန္တရာယ်ကင်းအောင် ဘာတွေကာကွယ်မှုပေးနိုင်မလဲဆိုတာကို လွှတ်တော်ကိုယ်စားလှယ်တွေနဲ့ ဆွေးနွေးတာပါ။ ကာကွယ်ပေးတာထက်စာရင် အဲ့ထက်ပိုတဲ့ ချီးမြှင့်မှုတွေ လုပ်ချင်ပါတယ်။ ဒါမှသာလျှင် နောက်နောင် ဒီထက်အခြားဌာနဆိုင်ရာသော်လည်းကောင်း၊ အဖွဲ့အစည်းသော်လည်းကောင်း ပြည်သူနဲ့ပူးပေါင်းဆောင်ရွက်ရင်း တိုင်းပြည်အပြောင်းအလဲကို ၀ိုင်းဝန်းဖော်ဆောင်ဖို့အတွက် အသိလေးတွေ ရစေချင်တယ်။ ဒါကြောင့်ဆောင်ရွက်တာဖြစ်တယ်။ ဒါပေမဲ့ ပြောချင်တာက ဒီမှာ အရေးကြီးတာတစ်ခုရှိတယ်။ အခုလိုပြုလုပ်ခြင်းအပေါ် ထောက်ခံအားပေးမှုတွေ ရှိကြတယ်။ ဒီလိုလုပ်နေခြင်းက ရဲတပ်ဖွဲ့ကို စိတ်ဝမ်းကွဲပြားအောင် လုပ်နေတာမဟုတ်ပါဘူး” ဟု ကျောက်ဆည် ၈၈ မျိုးဆက် ငြိမ်း/ပွင့်မှ ကိုစိုးသီဟက ပြောကြားသည်။

အမှုဖြစ်စဉ်တွင် တာဝန်သိစွာ ပူးပေါင်း ဖမ်းဆီးခဲ့သည့် ရဲတပ်သားငါးဦးအား လက်ရှိအချိန်ထိ တစ်စုံတစ်ရာ ဖိအားပေးခြင်းနှင့် ရဲစည်းကမ်းနှင့် အရေးယူဆောင်ရွက်ခြင်း မရှိသေးဘဲ စုံစမ်းမေးမြန်းခြင်းများသာ ပြုလုပ်လျက်ရှိပြီး ဖမ်းမိသူများ လွှတ်ပေးမှုနှင့် ပတ်သက်၍ စခန်းမှူးအပါအ၀င် ရဲတပ်သား ငါးဦးကိုလည်း ဖမ်းဆီးစစ်ဆေးမှုများ ပြုလုပ်လျက်ရှိကြောင်း သိရသည်။

လွှတ်တော်ကိုယ်စားလှယ်များနှင့် ဆွေးနွေးညှိနှိုင်း အတည်ပြုခဲ့ရာတွင် နောက်နောင်တွင် တရားဥဒေစိုးမိုးရေးအတွက် ယခုကဲ့သို့ ဥပဒေမဲ့လုပ်ရပ်များကို တာဝန်သိသိဖော်ထုတ်ခဲ့သော ရဲတပ်သားငါးဦးအား အန္တရာယ်တစ်စုံတစ်ရာ မဖြစ်စေရေးအတွက် လွှတ်တော်ကိုယ်စားလှယ်များက ဥပဒေနှင့်အညီ ကူညီ ဆောင်ရွက်ပေးသွားမည်၊ နောက်နောင်တွင် ကျောက်ဆည်မြို့နယ်အတွင်း မူးယစ်ဆေးဝါး တားဆီးကာကွယ်ရေးနှင့် ဥပဒေမဲ့လုပ်ရပ်များကို လွှတ်တော်ကိုယ်စားလှယ်များ၊ ပြည်သူ့ရဲတပ်ဖွဲ့၊ အရပ်ဘက် အဖွဲ့အစည်းများနှင့် ပြည်သူများမှ တားဆီးကာကွယ်ရေးကို ပူးပေါင်း ဆောင်ရွက်သွားမည်နှင့် နောက်နောင်တွင် ဥပဒေမဲ့ကိစ္စများကို တာဝန်သိသိ ဖော်ထုတ်ပေးမည့် မည်သည့်နိုင်ငံဝန်ထမ်းကိုမဆို အန္တရာယ်မဖြစ်ပေါ်စေရေးအတွက် လွှတ်တော်ကိုယ်စားလှယ်များမှ ဥပဒေနှင့်အညီ အကာအကွယ်ပေးသွားမည်ဟု ဆွေးနွေးအတည်ပြုခဲ့ကြောင်း သိရသည်။

အမှုမှာ ကျောက်ဆည်မြို့တွင် ဧပြီ ၂၅ ရက် ညပိုင်းက ဖျောက်ဆိပ်ပင်ကျေးရွာအနီးတွင် မှောင်ခိုသစ်သယ်ဆောင်လာသည့် ယာဉ်တစ်စီးကို တာဝန်ကျရဲတပ်သားနှစ်ဦးက တားဆီးဖမ်းမိခဲ့ပြီး လိုအပ်သော စစ်ဆေးမှုများ ပြုလုပ်ရန် စခန်းသို့ခေါ်ဆောင်ခဲ့သော်လည်း စခန်းရောက်မှ အမှုမဖွင့်ဘဲ ပြန်လည်စေလွှတ်ကာ ပိုင်ရှင်မဲ့ ပြုလုပ်ခဲ့ခြင်းဖြစ်ကြောင်း သိရသည်။

မန္တလေးတိုင်းဒေသကြီးတွင်၂၀၁၇ -၂၀၁၈ ဘဏ္ဍာနှစ် တရားမ၀င်သစ် ဖမ်းဆီးရမူသည် ယမန်နှစ်ထက် လျော့နည်းလာသည့်အတွက် တန် ၆၀၀ ခန့်လျော့ပြီး ဖမ်းဆီးရရှိခဲ့

ဖမ်းဆီးရမိသည့် သစ်များအား သစ်တောဦးစီးဌာနမှ တာဝန်ရှိသူများ စစ်ဆေးနေစဉ်

မန္တလေးတိုင်းဒေသကြီးတွင် ၂၀၁၇ – ၂၀၁၈ ဘဏ္ဍာနှစ် ဧပြီမှ မတ်အကုန်အထိ တရားမ၀င် သစ်ဖမ်းဆီးရမူသည် ၂၀၁၆- ၂၀၁၇ ဘဏ္ဍာရေးနှစ်ထက် တရားမ၀င်သစ် များကို စီမံချက်များ ချမှတ်ပြီး ထိထိရောက်ရောက် ဖမ်းဆီးနေသည့်အတွက် တရားမ၀င် ကျူးလွန်မှု လျော့နည်းလာသည့် အတွက်ကြောင့် တန် ၆၀၀ ခန့်လျော့ပြီး ဖမ်းဆီးရရှိခဲ့သည်ဟု မန္တလေးတိုင်းဒေသကြီး သစ်တော ဦးစီးဌာနမှ ညွန်ကြားရေးမှူး ဦးမြင့်သိန်းက ပြောကြားသည်။

“အဖမ်းအဆီးများလာရင်လည်း လျော့လာတယ်။ တစ်ချက်ပေါ့။ နောက်တစ်ခုက အဓိက ကျွန်တော်တို့တိုင်းက ဖြတ်သွားဖြတ် လာလုပ်တာများတော့ တစ်ဖက်နိုင်ငံကိုပို့တဲ့ သစ်အများစုကပေါ့။ ကျန်တဲ့နီးစပ်ရာသစ်ထွက်တဲ့ စစ်ကိုင်းတိုင်း၊ ကချင်ပြည်နယ်၊ ရှမ်း ပြည်နယ် မိုးမိတ်တို့ဘက်ကလည်း သစ်ကုန်ကြမ်း လျော့နည်း လာတာလည်း ဖြစ်ကောင်း ဖြစ်နိုင်တယ်။ ကျွန်တော်ကိုယ်ပိုင် အတွေးအမြင် ယူဆချက်ပါနော်။ နောက်တစ်ခု သူတို့ဘက်မှာလည်း အဖမ်းအဆီးတွေကလည်း အများကြီး လုပ်ပါတယ်။ ဒီအကြောင်း အချက်တွေကြောင့် ဖမ်းဆီးမှုက လျော့နည်းလာတာလည်း ဖြစ်နိုင်ပါတယ်” ဟု ၎င်းက ဆက်လက် ပြောကြားသည်။

မန္တလေးတိုင်းဒေသကြီး၊ သစ်တောဦးစီးဌာန ညွှန်ကြားရေးမှူးရုံး၏ လက်အောက်ရှိ ခရိုင်၊ မြို့နယ် သစ်တောဦးစီးဌာနများ လစဉ်စီမံချက်ရေးဆွဲပြီး ဖမ်းဆီးမှုများ ရှိသလို၊ တိုင်းဒေသကြီး အစုအဖွဲ့များ ဖွဲ့စည်းပြီး ဖမ်းဆီးဆောင်ရွက်မှုများနှင့် ပြည်သူလူထု ပူးပေါင်းပါဝင်မှုများကြောင့် မန္တလေးတိုင်းဒေသကြီးတွင် ယခုနှစ်ဘဏ္ဍာနှစ် ခရိုင်အလိုက် တရားမ၀င်သစ် ဖမ်းဆီးရမှုမှာ မန္တလေးခရိုင် ၄၀၃ ဒသမ ၆၁၀၄ တန်၊ ပြင်ဦးလွင်ခရိုင် ၁၀၈၃ ဒသမ ၅၇၄၄ တန်၊ ကျောက်ဆည်ခရိုင် ၁၆၁ ဒသမ ၆၁၈၄ တန်၊ မိထ္ထီလာခရိုင် ၁၅၃ ဒသမ ၁၆၀၆ တန်၊ မြင်းခြံခရိုင် ၅၈ ဒသမ ၆၈၁၈ တန်၊ ရမည်းသင်းခရိုင် ၈၇ ဒသမ ၅၅၄၂ တန်၊ ညောင်ဦးခရိုင်၂၆ ဒသမ ၂၇၉၂ တန်တို့ ရမိခဲ့ကြောင်း သစ်တောဌာန၏ စာရင်းများအရ သိရသည်။

“အကျိုးသက်ရောက်မှု ကောင်းတယ်လို့ မြင်ပါတယ်။ အရင်တုန်းကတော့ ဒီလိုသတင်းပေးမှုတွေ ဖွင့်မထားတဲ့ အခါကျ သူတို့တိုင်ဖို့ သတင်းပေးဖို့ ဖုန်းနံပါတ်တွေ လိုက်ရှာရတာပေါ့။ အခုကျ တစ်နိုင်ငံလုံး ဖွင့်ပေးထားတယ်။ ကျွန်တော်တို့ မန္တလေးတိုင်းအနေနဲ့က တော်တော်များများ သတင်းပို့တဲ့သူတွေ ရှိပါတယ်။ မိလည်းမိပါတယ်။ သူတို့ပေးတဲ့ သတင်းတွေကလည်း မှန်လည်းမှန်ပါ တယ်။ တချို့အနည်းငယ်တော့ သတင်းမှား တာလည်းရှိတယ်။ ဒါပေမဲ့ အများစုက သူတို့ပေးတာ မှန်ပါတယ်။ သူတို့သတင်းပေးလို့ ပိုပြီးတော့မိတာပါ။ အရင်ထက် သတင်းပေးမှု ပိုရတယ်။ သတင်းလည်း ပိုရတယ်” ဟု မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူး ဦးမြင့်သိန်းက ပြောကြားသည်။

မန္တလေးတိုင်း သစ်တောဦးစီးဌာန အနေဖြင့် တရားမ၀င်သစ် ဖမ်းဆီခြင်း လုပ်ငန်းများကို အဓိက အရေးကြီးသည့် လုပ်ငန်းစဉ်တစ်ရပ် အနေဖြင့် ဆောင်ရွက်လျက်ရှိရာမှ ၂၀၁၆ -၂၀၁၇ ဘဏ္ဍာနှစ် နှစ်စဧပြီလမှ မတ်လကုန်အထိ တရားမ၀င်သစ် ကျွန်း ၇၂၃ ဒသမ ၈၈၃၉ တန်၊ သစ်မာ ၁၂၀၁ ဒသမ ၁၇၅၄ တန်၊ အခြားသစ် ၁၁၁၁ ဒသမ ၀၄၁၄ တန်ဖမ်းဆီးရမိခဲ့ပြီး စုစုပေါင်းတန် ၃၀၃၆ ဒသမ ၁၀၀၇ တန်ဖမ်းဆီးရမိခဲ့ပြီး ၂၀၁၇ -၂၀၁၈ ဘဏ္ဍရေးနှစ်တွင် တရားမ၀င်သစ် ကျွန်း ၅၀၁ ဒသမ ၉၅၇၇ သစ်မာ ၁၁၁၅ ဒသမ ၇၄၈၄ တန် အခြားသစ် ၈၃၅ ဒသမ ၃၅၀၄ တန် စုစုပေါင်းတန် ၂၄၅၃ ဒသမ ၀၅၆၅ တန် ဖမ်းဆီးမူပြီး ယမန်နှစ်ထက်တန် ၆၀၀ လျော့နည်းစွာ ဖမ်းဆီးရမိခဲ့သည်ဟု မန္တလေးတိုင်းဒေသကြီး၊ သစ်တောဦးစီးဌာန ညွန်ကြားရေးမှူးရုံးက သိရသည်။

 

တနင်္သာရီတိုင်းဒေသကြီးတွင် သစ်တန်ချိန် ၂၀၀၀ ကျော် ဖမ်းဆီးရမိခဲ့ပြီး ယခုနှစ်ပိုင်းအတွင်း အများဆုံးဖြစ်ခဲ့

တနင်္သာရီတိုင်းဒေသကြီးအတွင်းရှိ ခရိုင်သုံးခုတွင် ပြီးခဲ့သည့် ၂၀၁၇-၁၈ ဘဏ္ဍာရေးနှစ်အတွင်း၌ တရားမ၀င်သစ်ဖမ်းဆီးရမိမှု ၄၀၀ အထိရှိခဲ့ပြီး သစ်တန်ချိန် ၂၀၀၀ ကျော် ဖမ်းဆီးနိုင်ခဲ့ကာ ယခုနှစ်ပိုင်းအတွင်း အမြင့်ဆုံး ဖမ်းဆီးနိုင်ခဲ့ခြင်းဖြစ်ကြောင်း သိရသည်။

၂၀၁၇ ခုနှစ် ဧပြီ ၁ ရက်မှ ၂၀၁၈ ခုနှစ် မတ် ၃၁ ရက်အထိ တရားမ၀င် သစ်ဖမ်းဆီးရမိမှုအဖြစ် ထားဝယ်ခရိုင်၌ ၅၉ မှုမှ သစ် ၁၉၃ ဒသမ ၁၀၉၉ ကုဗတန်၊ မြိတ်ခရိုင်၌ ၂၆၂ မှုမှ သစ် ၁၂၈၂ ဒသမ ၇၂၂ ကုဗတန်နှင့် ကော့သောင်းခရိုင်၌ ၇၉ မှုမှ သစ် ၆၀၆ ဒသမ ၆၂၇၉ ကုဗတန် ဖမ်းဆီးရမိခဲ့ပြီး စုစုပေါင်း အမှု ၄၀၀ မှ တရားမ၀င်သစ် ၂၀၈၂ ဒသမ ၄၅၉၈ ကုဗတန် ဖမ်းဆီးရမိခဲ့ခြင်းဖြစ်ကာ ယခင်ဘဏ္ဍာရေးနှစ်ထက် သစ်ကုဗတန်၂၀၀ ကျော် ပိုမိုဖမ်းဆီးနိုင်ခဲ့ကြောင်း သိရသည်။

“တရားမ၀င်သစ်တွေကို ရေလမ်းနဲ့ ကုန်းလမ်းတွေကနေ သယ်ကြတယ်။ ခုနောက်ပိုင်းမှလှေနဲ့ သယ်တာတွေ မိတာများလာတယ်။ သစ်တွေကတော့ နေရာအနှံ့ကပါပဲ။ ဒီရေတောကနေ မျောတိုင်နဲ့ မီးသွေးအတွက် ခိုးထုတ်တာတွေ ရှိတယ်။ တရားမ၀င် သစ်အများစုကတော့ ပြည်တွင်းမှာသုံးဖို့ ခိုးတာများပြီး မြို့တွေကို ဦးတည်တာ တွေ့ရတယ်။ ပြည်ပကတော့ ပင်လယ်ကနေလှေနဲ့ ခိုးသယ်ရင်း ရေတပ်နဲ့တွေ့လို့ ဖမ်းမိတာရှိတယ်။ အဲဒီသစ်တွေကတော့ ဒီတိုင်းထဲကမဟုတ်ဘဲ အခြားတိုင်းက သစ်တွေကို သယ်လာရင်းမိတာပေါ့။ မိတဲ့သစ်ကတော့ အခြားသားများတယ်။ ကညင်လည်း ရှိတယ်။ ပိတောက်ကတော့ အနည်းအကျဉ်းပေါ့” ဟု တိုင်းဒေသကြီးသစ်တောဦးစီးဌာနမှ ညွှန်ကြားရေးမှူး ဦးကျော်ဇေယျက ပြောကြားသည်။

ဌာနအနေဖြင့် တရားမ၀င် သစ်ဖမ်းဆီးမှုအတွက် လစဉ်စီမံချက်များ ရေးဆွဲခြင်းနှင့် ရှောင်တခင်လှည့်လည် စစ်ဆေးဖမ်းဆီးများ ဆောင်ရွက်ကြောင်း၊ စီမံချက်အနေဖြင့် တရားမ၀င် သစ်လုပ်ကိုင်တတ်သည့် နေရာများကို လှည့်လည်စစ်ဆေး၍ ဖမ်းဆီးခြင်းများ ရှိသည့်အပြင် ပြည်သူလူထုအခြေပြု စောင့်ကြည့်သတင်းပို့စနစ် (CMRS) ဖြင့် Hot Line ဖုန်းနံပါတ်များ ထုတ်ပြန်ကာ ပြည်သူများထံမှ ပေးပို့လာသည့် သတင်းများကို မှန်ကန်မှု ရှိ၊ မရှိ စိစစ်၍ လိုက်လံဆောင်ရွက်နေခြင်းကြောင့် တရားမ၀င်သစ်များကို နေရာအနှံ့တွင် ဖမ်းဆီးရမိနေခြင်းဖြစ်ကာ ပြည်သူများ၏ ပူးပေါင်းပါဝင်မှုအပိုင်းတွင် ပိုမိုဆောင်ရွက်လာနိုင်သည့် အနေအထားရှိကြောင်း ၎င်းက ဆက်လက်ပြောကြားသည်။ ထို့ပြင် အရပ်ဘက် အဖွဲ့အစည်းများနှင့် ပတ်ဝန်းကျင်ထိန်းသိမ်းရေးနှင့် ပတ်သက်၍ တက်ကြွစွာ ဆောင်ရွက်နေသူများ၊ FLEGT ကဲ့သို့သော အဖွဲ့အစည်းများမှ တရားမ၀င် သစ်ခိုးထုတ်နေမှုများကို အသိပေး အကြောင်းကြားလာခြင်းများ ရှိသောကြောင့် ယခုကဲ့သို့ ဖမ်းဆီးရမိမှု မြင့်တက်လာခြင်းဖြစ်ကြောင်း ဦးကျော်ဇေယျက ပြောကြားသည်။

ပြီးခဲ့သည့်မတ် ၂၆ ရက်ကလည်း ထားဝယ်ခရိုင် ရေဖြူမြို့နယ် ပရဒတ်ကျေးရွာအုပ်စုရှိ ဘ၀ါကမ်းခြေကျေးရွာ၏ မြောက်ဘက် သုံးဖာလုံခန့်အကွာ ထောင်းနီချောင်းဝတွင် တရားမ၀င်အုပ်စု(၁) ပိတောက်သစ်ခွဲသား ၂၀၄ ချောင်း (၂၀ ဒသမ ၀၀၄)တန်အား ပိုင်ရှင်မဲ့ ဖမ်းဆီးရမိခဲ့ကြောင်း၊ မတ် ၂၇ ရက်တွင် ထားဝယ်မြို့နယ် ရွှေဂူတောင်ကျေးရွာ အနီးတွင် တရားမ၀င်ကဒွတ်သစ်ခွဲသား ၃၃၅ ချောင်း (၃ ဒသမ ၅၂၆၄) တန် တင်ဆောင်လာသည့် ယာဉ်တစ်စီးနှင့် လူနှစ်ဦးကို ဖမ်းဆီးရမိခဲ့သည့်အပြင် မတ် ၃၀ ရက်တွင်လည်း လောင်းလုံးမြို့နယ် တီဇစ်ကျေးရွာအုပ်စုရှိ ဗွီးထောင့်ကမ်းခြေ တံငါစခန်းအနီး လောင်းလုံးကြိုးဝိုင်းအကွက် အမှတ် ၁၇ မှ ဦးကျော်မြင့်၏ ပုဂ္ဂလိကသစ်မာစိုက်ခင်း ၂၀ ဧက အတွင်း၌ တရားမ၀င် သစ်ခွဲသား ၃၀ ချောင်း (၀ ဒသမ ၂၅၉၆) တန်နှင့် သုံးပေအောက် အခြားသစ်လုံး ၁၂ လုံး(၀ ဒသမ ၉၉) တန် တရားမ၀င် လက်ကိုင်စက်လွှတစ်လက်တို့အား ပိုင်ရှင်တစ်ဦးနှင့်အတူ ဖမ်းဆီးရမိခဲ့ပြီး သစ်တောဥပဒေအရ အရေးယူထားကြောင်း သိရသည်။

ရေကြောင်းလမ်းမှတစ်ဆင့် သယ်ယူ၍ ဖမ်းဆီးရမိသော တရားမ၀င်သစ်အများစုမှာ မွန်ပြည်နယ်မှတစ်ဆင့် မလေးရှားနိုင်ငံသို့ သွားရောက်ရောင်းချရန် သယ်ယူလာစဉ် တနသာင်္ရီကမ်းရိုးတန်း၌ တပ်မတော်ရေမှ စစ်ရေယာဉ်များနှင့် တွေ့ရှိဖမ်းဆီးနိုင်ခဲ့ခြင်း ဖြစ်ကြောင်း သိရသည်။

တရားမ၀င်သစ်ခိုးထုတ်မှု စဉ်ဆက်မပြတ် ဖြစ်ပွားလျက်ရှိသဖြင့် ပြည်သူများက တရားမ၀င်သစ်နှင့် သစ်တောထွက်ပစ္စည်းများ ခိုးယူထုတ်လုပ် သယ်ဆောင်ရောင်းဝယ်ခြင်းများကိုသိရှိပါက ဆက်သွယ်သတင်းပေးပို့ရန် ထုတ်ပြန်

တရားမ၀င်သစ်ခိုး ထုတ်လုပ်မှုများ စဉ်ဆက်မပြတ် ဖြစ်ပွားလျက်ရှိသဖြင့် ပြည်သူများအနေဖြင့် တရားမ၀င် သစ်နှင့်သစ်တောထွက်ပစ္စည်းများ ခိုးထုတ်သယ်ဆောင်ရောင်းဝယ်ခြင်းများကို သိရှိပါက ဆက်သွယ်သတင်းပေးပို့ရန် သယံဇာတနှင့် သဘာဝပတ်ဝန်းကျင်ထိန်းသိမ်းရေး ၀န်ကြီးဌာနမှ သတင်းထုတ်ပြန်ထားသည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာနသည် တရားမ၀င်သစ် ခိုးထုတ်လုပ်မှုအား နည်းလမ်းမျိုးစုံဖြင့် ရှာဖွေဖော်ထုတ်ဖမ်းဆီးခြင်းကို ဆောင်ရွက်လျက်ရှိကြောင်း သိရသည်။

ထိုသို့ဆောင်ရွက်လျက်ရှိသော်လည်း တရားမ၀င်သစ်ခိုးထုတ်မှုများ ဖြစ်ပွားနေသည်ကို တွေ့ရှိနေရကြောင်း၊ တရားမ၀င်သစ်ခိုးယူထုတ်လုပ်မှု လျော့နည်းပပျောက်ရေးနှင့် ပတ်ဝန်းကျင်စိမ်းလန်းစိုပြည်ရေးအတွက် ဒေသခံပြည်သူများ၊ တာဝန်သိပြည်သူများ၏ ပူးပေါင်းပါဝင်မှုသည် အရေးကြီးသည့်အခန်းကဏ္ဍမှ ပါဝင်လျက်ရှိခြင်းကြောင့် တရားမ၀င်သစ်နှင့် သစ်တောထွက်ပစ္စည်းများ ခိုးယူထုတ်လုပ် သယ်ဆောင်ရောင်းဝယ်ခြင်းများကို သိရှိပါက Hot Line ဖုန်းနံပါတ်များသို့ ဆက်သွယ်၍ သတင်းပေးပို့နိုင်ကြောင်း အသိပေးချက်ထုတ်ပြန်ထားသည်။

အဆိုပါ Hot Line ဖုန်းနံပါတ်များမှာ သစ်တောဦးစီးဌာန၊ မန္တလေးတိုင်းဒေသကြီး ၀၉၂၀၀၀၄၅၂၊ သစ်တောဦးစီးဌာန မန္တလေးခရိုင် ၀၉၄၄၄၀၃၈၈၇၆၊ သစ်တောဦးစီးဌာန ပြင်ဦးလွင်ခရိုင် ၀၉၄၃၁၈၀၄၄၆၊ သစ်တောဦးစီးဌာန ကျောက်ဆည်ခရိုင် ၀၉၅၁၂၉၈၆၇၊ သစ်တောဦးစီးဌာန မိတ္ထီလာခရိုင် ၀၉၅၀၃၈၃၄၄၊ သစ်တောဦးစီးဌာန မြင်းခြံခရိုင် ၀၉၂၅၅၇၄၁၇၈၈၊ သစ်တောဦးစီးဌာန ရမည်းသင်းခရိုင် ၀၉၄၄၄၀၀၂၇၅၄၊ သစ်တောဦးစီးဌာန ညောင်ဦးခရိုင် ၀၉၄၂၀၇၃၈၀၈၅ တို့ဖြစ်ကြောင်း မန္တလေးတိုင်းဒေသကြီး သစ်တောဦးစီးဌာနမှ ထုတ်ပြန်ထားသည်။

ထို့ပြင် တိုင်ကြားနိုင်သည့်နေရာများနှင့် Hot Line ဖုန်းနံပါတ်များမှာ သစ်တောဦးစီးဌာန၊ ရှမ်းပြည်နယ် (လားရှိုး) တွင် ၀၉၄၄၉၅၃၂၁၂၅၊ ၀၉၄၄၉၅၃၂၁၂၅၊ ကျောက်မဲခရိုင်တွင် ၀၉၄၄၉၅၃၂၁၂၈၊ နောင်ချိုမြို့နယ်တွင် ၀၉၄၄၉၅၃၂၁၄၀ တို့ဖြစ်ကြောင်း နောင်ချိုမြို့နယ် သစ်တောဦးစီးဌာနမှ ထုတ်ပြန်ထားသည်။

အလားတူ ပဲခူးတိုင်းဒေသကြီး၊ သစ်တောဦးစီးဌာနသည် လူထုအခြေပြုစောင့်ကြည့်ခြင်းနှင့် သတင်းပို့စနစ်ဖြင့် ပဲခူးတိုင်းဒေသကြီးအတွင်း တရားမ၀င်သစ်ခုတ်လှဲခြင်း၊ ထုတ်လုပ်ခြင်း၊ သယ်ဆောင်ခြင်း၊ ရောင်းဝယ်ခြင်းအား တားဆီးကာကွယ်သွားမည်ဖြစ်ရာ တရားမ၀င်သစ်ဆောင်ရွက်မှု သတင်းများနှင့်ပတ်သက်ပြီး ဆက်သွယ်သတင်းပေးပို့နိုင်မည့် ဖုန်းနံပါတ်များ ထုတ်ပြန်ထားသည်။

မြန်မာနိုင်ငံ၏ သစ်တောဖုံးလွှမ်းမှုသည် ကုလသမဂ္ဂစားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ ၂၀၁၅ ခုနှစ် သစ်တောသယံဇာတ အကဲဖြတ်ဆန်းစစ်မှုအစီရင်ခံစာ (FRA 2015) အရ နိုင်ငံဧရိယာ၏ ၄၂ ဒသမ ၉၂ ရာခိုင်နှုန်းသာ သစ်တောများဖုံးလွှမ်းလျက်ရှိပြီး ကမ္ဘာတွင် သစ်တောပြုန်းတီးမှုနှုန်း တတိယအများဆုံး နိုင်ငံတစ်နိုင်ငံ ဖြစ်လာခဲ့ကြောင်း သိရသည်။

ထိုကဲ့သို့ အကြောင်းများကြောင့် နိုင်ငံတော်၏အတိုင်ပင်ခံပုဂ္ဂိုလ်၏ လမ်းညွှန်မှုဖြင့် သစ်တောဦးစီးဌာနအနေဖြင့် သစ်တောများ ပြန်လည်တည်ထောင်ရေးစီမံကိန်း MRRP (၂၀၁၇-၂၀၁၈ မှ ၂၀၂၆-၂၀၂၇ အထိ) ကို ၂၀၁၇ ခုနှစ်မှစတင်၍ နိုင်ငံတစ်ဝန်း အကောင်အထည်ဖော် ဆောင်ရွက်လျက်ရှိသည်။

မကွေးတိုင်းတွင် တစ်လလျှင် အနည်းဆုံး တရားမ၀င်သစ်တန်ချိန် ၁၀၀ ကျော်အထိ ဖမ်းဆီးရမိနေဟုဆို

မကွေးတိုင်းဒေသကြီးအတွင်းရှိ မြို့နယ်များတွင် တစ်လလျှင် အနည်းဆုံး တရားမ၀င်သစ်တန်ချိန် ၁၀၀ ကျော်အထိ ဖမ်းဆီးရမိနေသည်ဟု မကွေးတိုင်းဒေသကြီး သစ်တောဦးစီးမှူး ဦးမြင့်သိန်းခိုင်က ဆိုသည်။

မကွေးတိုင်းဒေသကြီးအတွင်း တစ်လလျှင် အနည်းဆုံး တရားမ၀င်သစ်တန် ၁၀၀ မှ အများဆုံးတန် ၃၀၀ ကျော်အထိ ဖမ်းဆီးရမိမှုများရှိနေပြီး ဘဏ္ဍာနှစ်တစ်နှစ်လျှင် တရားမ၀င်သစ်တန်ချိန် ၃၀၀၀ ကျော် ဖမ်းဆီးရမိနေကြောင်း သိရသည်။

“တစ်လကို အနည်းဆုံး တရားမ၀င်သစ်တန် ၁၀၀ ကျော်နဲ့ ၂၀၀ ကြားမှာ ဖမ်းမိနေတာပါ။ ပြီးခဲ့တဲ့ ၂၀၁၆-၂၀၁၇ ဘဏ္ဍာနှစ်မှာ တရားမ၀င်သစ်တန်ချိန် ၃၀၀၀ နီးပါး ဖမ်းမိခဲ့ပါတယ်။ အခု ၂၀၁၇-၂၀၁၈ ဘဏ္ဍာနှစ်မှာလည်း မနှစ်က ဘဏ္ဍာနှစ်လောက်တော့ ဖမ်းမိမှာပါ။ ပိုနည်းနည်း လိုနည်းနည်းပေါ့။ ဖမ်းမိတဲ့သစ်ကတော့ မျိုးစုံပါပဲ။ ကျွန်တော်တို့ တိုင်းထဲက ထွက်တဲ့သစ်တွေပါသလို တခြားပြည်နယ်နဲ့ တိုင်းထဲကထွက်တဲ့ သစ်တွေလည်းပါပါတယ်” ဟု မကွေးတိုင်းဒေသကြီး သစ်တောဦးစီးမှူး ဦးမြင့်သိန်းခိုင်က ပြောကြားသည်။

သစ်တောဌာနမှ ၀န်ထမ်းအင်အား နည်းပါးမှုကြောင့် ပြည်ထဲရေးလက်အောက်ရှိ ရဲဝန်ထမ်းများနှင့်ပူးပေါင်းပြီး တရားမ၀င်သစ်များကို ဖမ်းဆီးလျက်ရှိပြီး တရားမ၀င် သစ်ထုတ်လုပ်နေမှုများကို ဖမ်းဆီးရမိရေးကို ပြည်သူများလည်း ပူးပေါင်းပါဝင်ကြရန် ၎င်းက ဆက်လက်ပြောကြားသည်။

ပြီးခဲ့သည့် ၂၀၁၇ ခုနှစ် လစဉ် စာရင်းများအရ မတ်လအတွင်း အများဆုံးအနေဖြင့် တရားမ၀င်သစ် ၃၅၀ဒသမ ၄၈၂၇ တန်အထိ ဖမ်းဆီးရမိခဲ့ပြီး၂၀၁၇ ခုနှစ် နှစ်ကုန်ပိုင်းအထိ မကွေးတိုင်းအတွင်း တရားမ၀င်သစ် တန်ချိန်၂၃၀၀ ကျော်ကို ဖမ်းဆီးရမိခဲ့ကြောင်း သတင်းရရှိသည်။

မကွေးတိုင်းဒေသကြီးအတွင်း ဧရာဝတီမြစ် အနောက်ဘက်ကမ်းရှိ မြို့နယ်များမှ တရားမ၀င် သစ်ဖမ်းဆီးရမိမှု အများဆုံးဖြစ်နေကြောင်း တိုင်းသစ်တောဦးစီးမှူးက ပြောကြားသည်။

မန္တလေးတိုင်းဒေသကြီးတွင် ၂၀၁၇ -၂၀၁၈ ဘဏ္ဍာနှစ် တရားမ၀င်သစ် ဖမ်းဆီးရမိမှု ယမန်နှစ်ထက် လျော့နည်းလာဟု သိရ

မန္တလေးတိုင်းဒေသကြီးအတွင်း၌ တရားမ၀င်သစ်များ ဖမ်းဆီးရမိစဉ်

မန္တလေးတိုင်းဒေသကြီးတွင် ၂၀၁၇- ၂၀၁၈ ဘဏ္ဍာနှစ် ဧပြီမှ ဒီဇင်ဘာကုန်အထိ တရားမ၀င်သစ် ဖမ်းဆီးရမိမှုသည် ၂၀၁၆-၂၀၁၇ ဘဏ္ဍာနှစ်ထက် တရားမ၀င်သစ်များကို စီမံချက်များချမှတ်ပြီး ဖမ်းဆီးသည့်အတွက် တရားမ၀င်ကျူးလွန်မှု လျော့နည်းကာ တန်ပမာဏလျော့ပြီး ဖမ်းဆီးရရှိခဲ့သည်ဟု မန္တလေးတိုင်းဒေသကြီး သစ်တောဦးစီးဌာနမှ ညွှန်ကြားရေးမူး ဦးမြင့်သိန်းက ပြောကြားသည်။

“သစ်တန်အားဖြင့် ကျွန်တော်တို့အခု ဘဏ္ဍာရေးနှစ် လျော့နည်းဖမ်းမိပါတယ်။ ဒါလည်း အကြောင်းရှိပါတယ်။ တရားမ၀င်သစ် ဖမ်းဆီးခြင်းလုပ်ငန်းများကို ဖိဖိစီးစီး ဆောင်ရွက်လာပါတယ်။ အထူးသဖြင့် မန္တလေးတိုင်းဒေသကြီးကတော့ တရားမ၀င်သစ် တစ်ဖက်နိုင်ငံကို ထွက်ရှိမှုအပိုင်းမှာ သစ်ထွက်တဲ့ဒေသ မဟုတ်ပေမယ့် ကျွန်တော်တို့ တိုင်းဒေသကြီးဖြတ်ပြီး တစ်ဖက်နိုင်ငံကို တရားမ၀င်သစ်တွေ စီးဆင်းမှုတွေ ရှိပါတယ်။ အဲဒီအတွက် စီမံချက် ချမှတ်ပြီးတော့မှ ထိထိရောက်ရောက် ဖမ်းဆီးနေတာ ဖြစ်တဲ့အတွက်ကြောင့် ယခုနှစ်မှာ ယမန်နှစ်ထက်စာလို့ရှိရင် တရားမ၀င်သစ် ကျူးလွန်မှု လျော့နည်းလာတဲ့အတွက်ကြောင့် တန်ပမာဏလျော့ပြီး ဖမ်းဆီးရမိခဲ့တယ်” ဟု ၎င်းက ပြောကြားသည်။

မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူးရုံးလက်အောက်ရှိ ခရိုင်၊ မြို့နယ် သစ်တောဦးစီးဌာနများ လစဉ်စီမံချက်ရေးဆွဲပြီး ဖမ်းဆီးမှုများရှိသလို တိုင်းဒေသကြီး အစုအဖွဲ့များ ဖွဲ့စည်းပြီး ဖမ်းဆီး ဆောင်ရွက်မှုများနှင့် ပြည်သူလူထု ပူးပေါင်းပါဝင်မှုများကြောင့် မန္တလေးတိုင်းဒေသကြီးတွင် ယခုဘဏ္ဍာနှစ် ခရိုင်အလိုက် တရားမ၀င် သစ်ဖမ်းဆီးရမှုမှာ မန္တလေးခရိုင် ၄၀၃ ဒသမ ၆၁၀၄ တန်၊ ပြင်ဦးလွင်ခရိုင် ၁၀၈၃ ဒသမ ၅၇၄၄ တန်၊ ကျောက်ဆည်ခရိုင် ၁၆၁ ဒသမ ၆၁၈၄ တန်၊ မိတ္ထီလာခရိုင် ၁၅၃ ဒသမ ၁၆၀၆ တန်၊ မြင်းခြံခရိုင် ၅၈ ဒသမ ၆၈၁၈ တန်၊ ရမည်းသင်းခရိုင် ၈၇ ဒသမ ၅၅၄၂ တန်၊ ညောင်ဦးခရိုင် ၂၆ ဒသမ ၂၇၉၂ တန်တို့ ရမိခဲ့ကြောင်း သစ်တောဌာန၏ စာရင်းများအရ သိရသည်။

“အရင်တုန်းကတော့ တရားမ၀င်သစ်တွေ သွားတဲ့အချိန်က ကားကြီးတွေနဲ့ တန်ဆယ်ချီပြီးတော့မှ သွားခဲ့တာပေါ့။ ဒါပေမဲ့ အခုတော့ ဖမ်းဆီးမှုတွေ များလာတယ်။ များလာတဲ့အခါ သူတို့တွေက တစ်ပိုင်တစ်နိုင် ကားငယ်တွေ တစ်တန်တောင် မပြည့်ပါဘူး။ ကားကြီးဆို တန်ဝက်လောက်ပေါ့။ ဒီလိုမျိုးနဲ့ သွားနေကြတယ်။ ဒါလည်း ဘာကြောင့်လဲဆိုတော့ ဖမ်းဆီးမှုများလာတဲ့အခါ ဆုံးရှုံးမှုပမာဏ များလာတဲ့အတွက် အခုလို ကားငယ်တွေနဲ့ပဲ သွားနေတာဖြစ်တယ်။ အဲဒီအတွက် ကျွန်တော်တို့ အဓိကတော့ ၁၆ မိုင် စစ်ဆေးဂိတ်မှာ အထူးသဖြင့် ယာဉ်ငယ်တွေကိုလည်း ဖိဖိစည်းစည်းနဲ့ စစ်ဆေးဆောင်ရွက်လျက်ရှိတယ်” ဟု မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူး ဦးမြင့်သိန်းက ပြောကြားသည်။

မန္တလေး သစ်တောဦးစီးဌာနအနေဖြင့် တရားမ၀င်သစ် ဖမ်းဆီခြင်းလုပ်ငန်းများကို အဓိက အရေးကြီးသည့် လုပ်ငန်းစဉ်တစ်ရပ် အနေဖြင့် ဆောင်ရွက်လျက်ရှိရာမှ ၂၀၁၆-၂၀၁၇ ဘဏ္ဍာနှစ်စ ဧပြီမှ ဒီဇင်ဘာအထိ တရားမ၀င်သစ် ကျွန်း ၅၈၉ ဒသမ ၁၆၂၉ တန်၊ သစ်မာ ၈၃၁ ဒသမ ၂၀၄၂ တန်၊ အခြားသစ် ၈၀၄ ဒသမ ၇၇၄၆ တန် ဖမ်းဆီးရမိခဲ့ပြီး စုစုပေါင်း တန် ၂၂၂၅ ဒသမ ၁၄၁၇ တန် ဖမ်းဆီးရမိခဲ့ပြီး ၂၀၁၇-၂၀၁၈ ဘဏ္ဍနှစ်တွင် တရားမ၀င်သစ် ကျွန်း ၄၂၈ ဒသမ ၅၇၉၅ တန်၊ သစ်မာ ၉၂၅ ဒသမ ၅၂၅၈ တန်၊ အခြားသစ် ၆၂၀ ဒသမ ၃၇၃၇ တန် စုစုပေါင်း ၁၉၇၄ ဒသမ ၄၇၉၀ တန် ဖမ်းမိခဲ့ပြီး ယမန်နှစ်ထက် တန်လျော့နည်းစွာ ဖမ်းဆီးရမိခဲ့သည်ဟု မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူးရုံးမှ သိရသည်။

အမြန်လမ်းမကြီး ၂၁ မိုင်အနီးတွင် စူပါကာစတန်ယာဉ်တိမ်းမှောက်ရာမှ တရားမ၀င်ကျွန်းသစ်ခွဲသားများ ဖမ်းဆီးရမိ

အမြန်လမ်းမကြီး မိုင်တိုင်အမှတ် ၂၁ အနီး တိမ်းမှောက်ခဲ့သော စူပါကာစတန်ယာဉ်အား တွေ့ရစဉ်

ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၂၁ မိုင်အနီး၌ ဒီဇင်ဘာ ၂ ရက် နံနက်က နေပြည်တော်ဘက်မှ ရန်ကုန်ဘက်သို့ မောင်းနှင်လာသော စူပါကာစတန်ယာဉ်တစ်စီး ဘီးပေါက်တိမ်းမှောက်ရာမှ တရားမ၀င်ကျွန်းသစ်များ ဖမ်းဆီးရမိခဲ့ပြီး ယာဉ်မောင်းဖြစ်သူမှာ ထွက်ပြေးတိမ်းရှောင်သွားခဲ့ကြောင်း သိရသည်။

“ကားက နောက်ဝဲဘက်ဘီးပေါက်ပြီး ကျွတ်ထွက်ပြီးတော့ မှောက်တာ။ လူကတော့ ယာဉ်မောင်းတစ်ယောက်ပဲပါတယ်။ ယာဉ်မောင်းကတော့ ထွက်ပြေးသွားတယ်။ တရားခံပြေးပေါ့။ စုံစမ်းဆဲ။ ကားပေါ်မှာ တရားမ၀င်သစ်တွေပါတယ်။ နောက်ဆက်တွဲကျတော့ သစ်တောကရဲတွေနဲ့ သူတို့ဘာသာသူတို့တိုင်းပြီးတော့ ဌာနကိုပြန်အပ်တာပေါ့။ သစ်တောကိုလွှဲတာပါ။ ကျွန်တော်တို့ကျတော့ သွားကူညီလိုက်တာပဲရှိတယ်” ဟု အမှတ် (၃) လမ်းဆုံ အမြန်လမ်းမီးသတ်စခန်းမှ တာဝန်ရှိသူတစ်ဦးက ပြောကြားသည်။

ဖြစ်စဉ်မှာ ဒီဇင်ဘာ ၂ ရက် နံနက် ၉ နာရီခန့်က လှည်းကူးမြို့နယ် အမှတ် (၃) လမ်းဆုံ အမြန်လမ်းမကြီးရဲစခန်းအပိုင် ရန်ကုန်-မန္တလေး အမြန်လမ်းမကြီးပေါ်တွင် နေပြည်တော်ဘက်မှ ရန်ကုန်ဘက်သို့ ယာဉ်မောင်း (အမည်၊ နေရပ်လိပ်စာ စုံစမ်းဆဲ)၊ မောင်းနှင်လာသော ယာဉ်အမှတ် 3D/—- စူပါကာစတန် နံ့သာရောင်မော်တော်ယာဉ်မှာ လမ်းမကြီးမိုင်တိုင်အမှတ် ၂၁ မိုင် ၅ ဖာလုံနှင့် ၆ ဖာလုံအနီးသို့အရောက်တွင် ယာဉ်၏၀ဲဘက်နောက်ဘီး ပြုတ်ထွက်ပြီး အရှိန်မထိန်းနိုင်ဘဲ လမ်းမပေါ်၌ တိမ်းမှောက်သွားခဲ့ခြင်းဖြစ်သည်။

ယာဉ်မတော်တဆမှုဖြစ်ရာသို့ အမှတ် (၃) လမ်းဆုံ အမြန်လမ်းမကြီးရဲစခန်းမှ စခန်းမှူး၊ အမြန်လမ်းမီးသတ်စခန်းမှ တာဝန်ရှိသူများက သွားရောက်စစ်ဆေးရာ စူပါကာစတန်ယာဉ်မှာ ရှေ့နောက်လေကာမှန်ကွဲ၊ အမိုး၊ ကိုယ်ထည်ဝဲဘက်နှင့် နောက်ပိတ်တံခါးတို့ ပိန်ချိုင့်ပျက်စီးသွားပြီး ယာဉ်အတွင်းမှ တရားမ၀င်ကျွန်းသစ်ခွဲသားများ အပြည့်တင်ဆောင်လာသည်ကို ဖမ်းဆီးရမိခဲ့ခြင်းဖြစ်သည်။

အဆိုပါ ယာဉ်မတော်တဆမှုဖြစ်စဉ်နှင့် ပတ်သက်ပြီး ယာဉ်အားမဆင်မခြင်ပေ့ါဆစွာ မောင်းနှင်သည့် ယာဉ်မောင်း (စုံစမ်းဆဲ) အား ဥပဒေအရေအရေးယူပေးပါရန် ရဲအုပ်ရဲရင့်အောင်က တရားလိုလုပ်အမှုဖွင့် တိုင်ကြားခဲ့သောကြောင့် အမှတ် (၃) လမ်းဆုံ အမြန်လမ်းမကြီးရဲစခန်းက ယာဉ် (ပ) ၃၉/ ၂၀၁၇၊ ပြစ်မှုပုဒ်မ ၂၇၉/၂၀၂ အရ အမှုဖွင့် အရေးယူထားကြောင်း၊ ယာဉ်အတွင်းမှ ဖမ်းဆီးရမိသည့် တရားမ၀င်ကျွန်းသစ်ခွဲသားများအား တိုင်းတာစစ်ဆေးနိုင်ရန် လှည်းကူးမြို့နယ် သစ်တောဦးစီးဌာနသို့ ဆက်သွယ်အကြောင်းကြားထားပြီး သစ်တောဥပဒေဖြင့် ဆက်လက်အရေးယူနိုင်ရန် ဆောင်ရွက်ထားကြောင်း သိရသည်။

ဗန်းမောက်မြို့နယ်တွင် ဆင်ထီးတစ်ကောင်နှင့်အတူ တရားမ၀င်ကျွန်းသစ် ၄၂ တန်ကျော် ဖမ်းဆီးရမိ

ဓာတ်ပုံ – သောင်းနိုင်

စစ်ကိုင်းတိုင်းဒေသကြီး ကသာခရိုင် ဗန်းမောက်မြို့နယ်တွင် နိုဝင်ဘာ ၇ ရက်က ဆင်ထီးတစ်ကောင်နှင့်အတူ တရားမ၀င် ကျွန်းသစ် ၄၂ တန်ကျော် ဖမ်းဆီးရမိခဲ့ကြောင်း ကသာခရိုင် သစ်တောဦးစီးဌာနမှ လက်ထောက် ညွှန်ကြားရေးမှူး ဦးသောင်းနိုင်ထံမှ သိရသည်။

ကသာခရိုင် ဗန်းမောက်မြို့နယ် ကလပ်ကြိုးဝိုင်း အကွက်နံပါတ် (၁၂) ထဲတွင် ဆင်ထီးတစ်ကောင် အပါအ၀င် တရားမ၀င် ကျွန်းသစ် ၄၂ တန်ကျော် ဖမ်းဆီးရမိခဲ့ကြောင်း ဖမ်းဆီးရမိခဲ့သည့် ဆင်သည် စွယ်စုံဆင်ထီး တစ်ကောင်ဖြစ်ကြောင်း ၎င်း၏ ပြောပြချက်အရ သိရသည်။

“ဗန်းမောက်မြို့နယ် ကလပ်ကြိုးဝိုင်း အကွက်နံပါတ် (၁၂) ထဲမှာ ဆွယ်စုံဆင်ထီး တစ်ကောင်နဲ့ ကျွန်းသစ်ခွဲသားရော အလုံးရော ၄၂ တန်ကျော် ဖမ်းဆီးရမိခဲ့တယ်။ နောက်တစ်ခါ တရားခံသုံးဦးပါ ဖမ်းဆီးရမိခဲ့တယ်။ အမှုလည်း ကျွန်တော်တို့ ဖွင့်ထားပါတယ်။ တရားခံသုံးဦးရဲ့ ထွက်ဆိုချက်အရ သစ်စက်ပိုင်ရှင်ကိုလည်း ပေါ်ပေါက်ပါတယ်။ အဲဒါကိုလည်း ကျွန်တော်တို့ အမှုဖွင့်ထားပါတယ်” ဟု ကသာခရိုင် သစ်တောဦးစီးဌာနမှ လက်ထောက်ညွှန်ကြားရေးမှူးက ဆိုသည်။

ဖမ်းဆီးရမိတဲ့ တရားခံသုံးဦးမှာ ဆင်ခေါင်း ချစ်အောင်၊ ဝေယံဦးနှင့် ကျော်သန်းထိုက်တို့ ဖြစ်ကြောင်း သစ်စက်ပိုင်ရှင် အပါအ၀င် လေးဦးအား အမှုဖွင့်ထားသည်။

ဗန်းမောက်မြို့မရဲစခန်းမှ သစ်စက်ပိုင်ရှင် အပါအ၀င် ဆင်ခေါင်းချစ်အောင်၊ ဝေယံဦးနှင့် ကျော်သန်းထိုက် တို့လေးဦးအား ပြည်သူပိုင် ကာကွယ်စောင့်ရှောက်ရေး ဥပဒေ ပုဒ်မ ၆ (၁) အရ အမှုဖွင့် အရေးယူထားကြောင်း သိရသည်။