ရုရှားနိုင်ငံအခြေစိုက် VK လူမှုကွန်ရက်တွင် ဗိုလ်ချုပ်မှူးကြီး မင်းအောင်လှိုင် အပါအ၀င် တပ်မတော် ကာကွယ်ရေးဦးစီးချုပ်ရုံးနှင့် မြ၀တီ Page များ ဖွင့်လှစ်

ရုရှားနိုင်ငံအခြေစိုက် VK လူမှုကွန်ရက်တွင် ဖွင့်ထားသော ဗိုလ်ချုပ်မှူးကြီးမင်းအောင်လှိုင်၏ Pageကို တွေ့ရစဉ်

ရုရှားနိုင်ငံ အခြေစိုက် VK လူမှုကွန်ရက်တွင် ဗိုလ်ချုပ်မှူးကြီး မင်းအောင်လှိုင် (Senior General Min Aung Hlaing) အပါအ၀င် တပ်မတော် ကာကွယ်ရေးဦးစီးချုပ်ရုံးနှင့် မြ၀တီသတင်းဌာန၏ page များ ဖွင့်လှစ်ထားကြောင်း သတင်းရရှိသည်။

အဆိုပါ VK လူမှုကွန်ရက်တွင် Senior General Min Aung Hlaing Page အား သြဂုတ် ၂၈ ရက်က စတင် ဖွင့်လှစ်ခဲ့သည်ကို တွေ့ရပြီး ဗိုလ်ချုပ်မှူးကြီး မင်းအောင်လှိုင်၏ ရုရှားခရီးစဉ်များကို ထုတ်ပြန်ထားသည်ကို တွေ့ရပြီး သြဂုတ် ၂၉ ရက် နံနက်ပိုင်းက ဒုတိယသမ္မတ ဦးဟင်နရီဗန်ထီးယူနှင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့ ဆွာမြို့ရှိ ဆွာချောင်း ရေလှောင်တမံ ကျိုးပေါက်မှု အခြေအနေများကို သွားရောက် ကြည့်ရှု စစ်ဆေးနေသည့် သတင်းနှင့် ဓာတ်ပုံများကို ယင်း Page တွင် ထုတ်ပြန်ထားသည်ကို တွေ့ရသည်။

လူ့အခွင့်အရေး ချိုးဖောက်မှုများအတွက် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် အခြား ထိပ်တန်း ဗိုလ်ချုပ်များ၏ အကောင့်များကို Facebook က သြဂုတ် ၂၇ ရက်တွင် ဖယ်ရှားခဲ့ပြီးနောက် ယခုကဲ့သို့ VK လူမှုကွန်ရက်တွင် တပ်မတော်နှင့် ပတ်သက်သည့် Page များ ဖွင့်လှစ်လာခြင်းလည်း ဖြစ်သည်။

Facebook ၏ ထုတ်ပြန်ချက်တွင် စုစုပေါင်း Facebook အကောင့် ၁၈ ခု၊ Instagram အကောင့် တစ်ခုနှင့် Follower ၁၂ သန်းနီးပါး ရှိသော Facebook စာမျက်နှာ ၅၂ ခုအား ဖယ်ရှားလိုက်ကြောင်းနှင့် ယင်းအကောင့်များနှင့် စာမျက်နှာများမှ အချက်အလက်များကိုမူ ထိန်းသိမ်းထားကြောင်း ဖော်ပြခဲ့သည်။

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မြန်မာ့ တပ်မတော်၏ မြ၀တီ ရုပ်မြင်သံကြားကွန်ရက် အပါအ၀င် မြန်မာနိုင်ငံမှ လူပုဂ္ဂိုလ်နှင့် အဖွဲ့အစည်း ၂၀ တို့အား ပိတ်ပင်လိုက်သည်ဟု Facebook က ပြောကြားသည်။

ကုလသမဂ္ဂ လူ့အခွင့်အရေးကောင်စီက အာဏာ အပ်နှင်းထားသော မြန်မာနိုင်ငံနှင့် ပတ်သက်သည့် အချက်အလက် ရှာဖွေရေးမစ်ရှင်က သြဂုတ် ၂၇ ရက်၌ပင် ထုတ်ပြန်ခဲ့သော အစီရင်ခံစာ တစ်ရပ်တွင် ယင်းပုဂ္ဂိုလ်များနှင့် အဖွဲ့အစည်းများသည် မြန်မာနိုင်ငံတွင် ပြင်းထန်သည့် လူ့အခွင့်အရေး ချိုးဖောက်မှုများကို ကျူးလွန်ခဲ့ သို့မဟုတ် ထောက်ကူခဲ့ကြောင်း အထောက်အထားများ တွေ့ရှိရသည်ဟု ပြောကြားထားသည်။

Facebook တွင် ချိတ်ဆက်ထားသည့် အစစ်အမှန် မဟုတ်သော အပြုအမူ၌ ပါဝင်နေသည့် စာမျက်နှာ ၄၆ ခုနှင့် အကောင့် ၁၂ ခုကိုလည်း ဖယ်ရှားခဲ့ကြောင်း Facebook က ပြောကြားသည်။

မကြာသေးမီက စုံစမ်းစစ်ဆေးမှု တစ်ရပ်အတွင်း ၎င်းတို့သည် မြန်မာတပ်မတော်၏ မက်ဆေ့ခ်ျများကို တိတ်တိတ်ပုန်း တွန်းအားပေးသည့် လွတ်လပ်သော သတင်းစာမျက်နှာများနှင့် ထင်မြင်ချက် စာမျက်နှာများအား အသုံးပြုနေကြောင်း တွေ့ရှိခဲ့ရသည်ဟုလည်း Facebook က ပြောကြားခဲ့သည်။ Facebook သည် လူများအား ၎င်းတို့ ပြုလုပ်သည့် အဆက်အသွယ်များကို ယုံကြည်မှုရှိနိုင်စေရန် လိုလားသောကြောင့် ယင်းအပြုအမူမျိုးကို Facebook ၌ ပိတ်ပင်ထားသည်ဟု ဆိုသည်။

ယခုနှစ်အတွင်း အစောပိုင်းက ဖွဲ့စည်းခဲ့သော လွတ်လပ်သည့် လူ့အခွင့်အရေးဆိုင်ရာ ရိုက်ခတ်မှုအား လေ့လာသုံးသပ်မှုမှ တစ်ဆင့် အပါအ၀င် Facebook သည် မြန်မာနိုင်ငံ ၌ Facebook နှင့်ပတ်သက်၍ တလွဲအသုံးပြုမှုများကို ကာကွယ်ရန် ဆက်လက် လုပ်ဆောင်သွားမည်ဟုလည်း Facebook က ပြောကြားခဲ့သည်။

တပ်မတော်သည် အမျိုးသားရေးကို ဦးစားပေး ဆောင်ရွက်နေကြောင်း တပ်မတော်ကာကွယ်ရေးဦးစီးချုပ် ပြောကြား

တပ်မတော်သည် အမျိုးသားရေးကို ဦးစားပေး ဆောင်ရွက်နေကြောင်း တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဇူလိုင် ၂၆ ရက်တွင် ရုရှားဖက်ဒရေးရှင်းနိုင်ငံ အောက်လွှတ်တော် နိုင်ငံတကာရေးရာကော်မတီ၏ ဒုတိယဥက္ကဋ္ဌ Mr. Alexei Chepa နှင့်တွေ့ဆုံရာတွင် ပြောကြားခဲ့ခြင်း ဖြစ်ကြောင်း တပ်မတော် ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

ထိုသို့ တွေ့ဆုံစဉ် တပ်မတော် ကာကွယ်ရေးဦးစီးချုပ်က မြန်မာနိုင်ငံနှင့် ရုရှားနိုင်ငံ နှစ်နိုင်ငံသည် ရှေးယခင်ကတည်းက ချစ်ကြည်ရင်းနှီးသည့် မိတ်ဆွေဟောင်း၊ မိတ်ဆွေကောင်းနိုင်ငံများ ဖြစ်ပြီး နိုင်ငံခေါင်းဆောင်များသည်လည်း ချစ်ကြည်ရင်းနှီးမှု ရှိကြောင်း၊ ယခုကဲ့သို့ ရုရှားလွှတ်တော်မှ ကိုယ်စားလှယ်များနှင့် တပ်မတော် တွေ့ဆုံခြင်းသည် ပထမဆုံးအကြိမ် ဖြစ်ကြောင်း၊ မိမိတို့နိုင်ငံတွင် နိုင်ငံရေးအရ တည်ငြိမ်မှု၊ လုံခြုံရေးအရ တည်ငြိမ်မှုရှိရန် လိုအပ်လျက်ရှိပါကြောင်း၊ ၁၉၈၈ ခုနှစ် မှ ၂၀၁၁ ခုနှစ်အထိ တပ်မတော်အစိုးရ၏ ဦးဆောင်မှုဖြင့် ဆောင်ရွက်ခဲ့ပြီး ပြည်သူများမှ လိုလားသည့် ပါတီစုံ ဒီမိုကရေစီစနစ်ကို လျှောက်လှမ်းနိုင်ရန်အတွက် တပ်မတော်အစိုးရမှ ပြုပြင်ပြောင်းလဲမှုများ ဆောင်ရွက်ခဲ့ကြောင်း၊ ၂၀၁၁ ခုနှစ်တွင် ဖွဲ့စည်းပုံ အခြေခံဥပဒေအသစ်ဖြင့် ရွေးချယ်တင်မြှောက်ခံ အစိုးရသို့ စနစ်တကျ လွှဲပြောင်းပေးနိုင်ခဲ့ကြောင်း၊ ယခုအခါတွင် ဒုတိယမြောက် ရွေးချယ်ခံအစိုးရ ကာလသာ ရှိသေးပြီး အတွေ့အကြုံများစွာ နုနယ်သဖြင့် နိုင်ငံရေးအရ ပြည့်စုံမှု မရှိသေးကြောင်း၊ လွှတ်တော်များသည် ဥပဒေပြုရေးကို အဓိက ဆောင်ရွက်ရကြောင်း၊ မိမိတို့နိုင်ငံ၏ ပထမအစိုးရ လွှတ်တော်သက်တမ်းတွင် လွှတ်တော် ကိုယ်စားလှယ်များကို ရွေးချယ်ရာ၌ နိုင်ငံရေး အတွေ့အကြုံရှိသူများ၊ ပါတီများမှ ရွေးချယ်ခံ လွှတ်တော်ကိုယ်စားလှယ် ၇၅ ရာခိုင်နှုန်းနှင့် တပ်မတော်သား လွှတ်တော် ကိုယ်စားလှယ် ၂၅ ရာခိုင်နှုန်း ပါဝင်ခဲ့ကြောင်း၊ ယခု ဒုတိယအကြိမ် လွှတ်တော်သက်တမ်းတွင်လည်း ရွေးချယ်ခံ နိုင်ငံရေးပါတီ ကိုယ်စားလှယ် ၇၅ ရာခိုင်နှုန်း၊ တပ်မတော်သား လွှတ်တော်ကိုယ်စားလှယ် ၂၅ ရာခိုင်နှုန်းပင် ဖြစ်ကြောင်း၊ တပ်မတော်သည် အမျိုးသားရေးကို ဦးစားပေး ဆောင်ရွက်နေခြင်း ဖြစ်ကြောင်း စသည်ဖြင့် ပြောကြားခဲ့သည်။

 

အဆောက်အအုံများအား အရည်အသွေးပြည့်မီစွာ ဆောက်လုပ်ရန် တပ်မတော်ကာကွယ်ရေးဦးစီးချုပ် ပြောကြား

အဆောက်အအုံများအား အရည်အသွေးပြည့်မီစွာ ဆောက်လုပ်ရန် တပ်မတော်ကာကွယ်ရေးဦးစီးချုပ် ပြောကြားခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ ဇူလိုင် ၁၈ ရက် ညပိုင်းသတင်း ထုတ်ပြန်ချက်အရ သိရသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်သည် တာဝန်ရှိသူများနှင့်အတူ ဇူလိုင် ၁၈ ရက် နံနက်ပိုင်းက ရန်ကုန်တိုင်းဒေသကြီး ဒဂုံဆိပ်ကမ်းမြို့နယ်ရှိ မြန်မာ့သားကောင်းစစ်မှုထမ်းဟောင်းအိမ်ရာ (လေးထောင့်ကန်) တည်ဆောက်နေမှု အခြေအနေများအား သွားရောက်ကြည့်ရှု စစ်ဆေးစဉ် ပြောကြားခဲ့သည်။

တပ်မတော်ကာကွယ်ရေးဦးစီးချုပ်က အဆောက်အအုံများအား အရည်အသွေးပြည့်မီစွာ ဆောက်လုပ်ရန်၊ အရိပ်ရလေကာပင်များအား ရှင်သန်ဖြစ်ထွန်း အောင်မြင်အောင် စိုက်ပျိုး၍ စစ်မှုထမ်းဟောင်းအိမ်ရာ ပတ်ဝန်းကျင် စိမ်းလန်းစိုပြေစေရေး ဆောင်ရွက်ရန်၊ စစ်မှုထမ်းဟောင်းမိသားစုဝင်များ အလုပ်အကိုင် အခွင့်အလမ်းများ ရရှိစေရန်အတွက် အသေးစားစက်မှုလုပ်ငန်းများ လုပ်ဆောင်နိုင်ရေး ဆောင်ရွက်ရန်နှင့် နေထိုင်သူ လူဦးရေ တိုးတက်များပြားလာမှုကြောင့် ဖြစ်ပေါ်လာနိုင်သည့် ပညာသင်ကြားရေးနှင့် ကျန်းမာရေးဆိုင်ရာ လိုအပ်ချက်များကိုလည်း အနာဂတ်အတွက် ကြိုတင်မျှော်တွေးပြီး ဆောင်ရွက်ရန်တို့ကိုလည်း မှာကြားခဲ့ကြောင်း သိရသည်။

အဆိုပါ ဒဂုံဆိပ်ကမ်းမြို့နယ်ရှိ မြန်မာ့သားကောင်းစစ်မှုထမ်းဟောင်းအိမ်ရာ၌ ၂၀၁၇ ခုနှစ်တွင် အခြားအဆင့်နေအိမ် နှစ်ခန်းတွဲ ခြောက်ထပ် ခုနစ်လုံးဆောက်လုပ်မှုမှာ ၈၂ ရာခိုင်နှုန်းခန့် ပြီးစီးပြီဖြစ်ပြီး ၂၀၁၈ ခုနှစ် တွင် အရာရှိငယ်နေအိမ် နှစ်ခန်းတွဲ ခြောက်ထပ် လေးလုံးနှင့် အခြားအဆင့်နေအိမ် နှစ်ခန်းတွဲ ခြောက်ထပ် ကိုးလုံးတို့အား ပိုင်ရိုက်ခြင်းလုပ်ငန်းများ စတင်ဆောင်ရွက်လျက်ရှိကြောင်း ထုတ်ပြန်ချက်တွင် ပါရှိသည်။

ထို့ပြင် စစ်မှုထမ်းဟောင်းမိသားစုများ၏ စားရေးကို အထောက်အကူပြုစေရန်အတွက် ခေတ်မီအဆင့်မြင့် ဥစားကြက်ခြံအား ဆောက်လုပ်လျက်ရှိပြီး အလုပ်အကိုင် အခွင့်အလမ်း ရရှိရေးအတွက်လည်း အထည်ချုပ်စက်ရုံကို ဆက်လက်တည်ဆောက်ပေးမည်ဖြစ်ကြောင်း ထုတ်ပြန်ချက်၌ ဖော်ပြသည်။

ငြိမ်းချမ်းရေးလုပ်ငန်းများကို နိုင်ငံတော်အစိုးရနှင့် တပ်မတော်က တက်ကြွစွာ ဦးဆောင်ဆောင်ရွက်နေခြင်းသည် အင်အားချည့်နဲ့နေ၍ မဟုတ်ဆိုသည်ကို သတိချပ်စေလိုပြီး အမှန်တကယ် ငြိမ်းချမ်းရေးလိုချင်သည့် အဖွဲ့အစည်း မှန်သမျှ သဘောတူညီချက်များကိုသာ လိုက်နာပါက မည်သည့်သေနတ်သံမျှ ကြားရမည် မဟုတ်ကြောင်း တပ်မတော်ကာကွယ်ရေးဦးစီးချုပ် ပြောကြား

တပ်မတော်ကာကွယ်ရေးဦးစီးချုပ်က ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ တတိယအစည်းအဝေးတွင် အမှာစကား ပြောကြားစဉ်

ငြိမ်းချမ်းရေးလုပ်ငန်းများကို နိုင်ငံတော်အစိုးရနှင့် တပ်မတော်က တက်ကြွစွာ ဦးဆောင် ဆောင်ရွက်နေခြင်းသည် မိမိတို့တွင် အင်အားချည့်နဲ့နေ၍မဟုတ်ဘူးဆိုသည်ကို သတိချပ်စေလိုပြီး အမှန်တကယ် ငြိမ်းချမ်းရေးလိုချင်သည့် အဖွဲ့အစည်း မှန်သမျှ သဘောတူညီချက်များကိုသာ လိုက်နာပါက မည်သည့်သေနတ်သံမျှ ကြားရမည်မဟုတ်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ဇူလိုင် ၁၁ ရက်တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းစင်တာတွင် ပြုလုပ်သည့် ပြည်ထောင်စုငြိမ်းချမ်းရေးညီလာခံ-၂၁ ရာစု ပင်လုံတတိယအစည်းအဝေး အဖွင့်တွင် တပ်မတော်ကာကွယ်ရေးဦးစီးချုပ်က ထိုကဲ့သို့ ပြောကြားခဲ့ခြင်းဖြစ်သည်။

NCA စာချုပ်ကို ၂၀၁၅ ခုနှစ် ဒီဇင်ဘာလအတွင်းတွင် ဒီမိုကရေစီ လုပ်ထုံးလုပ်နည်းများနှင့်အညီ ပြည်သူလူထုတစ်ရပ်လုံးကို ကိုယ်စားပြုသည့် ပြည်ထောင်စုလွှတ်တော်က ကန့်ကွက်သူမရှိ အတည်ပြုပေးခဲ့ကြောင်း၊ NCA ကို တိုင်းရင်းသားလက်နက်ကိုင် အဖွဲ့အစည်းတိုင်းက လက်မှတ်ရေးထိုးရမည်ဖြစ်ကြောင်း၊ ပစ်ခတ်တိုက်ခိုက်မှု မရှိသည့်အတွက် လက်မှတ်ထိုးစရာမလိုဟု ပြောဆိုနေခြင်းများ၊ ယခင်သဘောတူညီချက်များ ရှိပြီးသားဖြစ်သည်ဟု ပြောဆိုနေခြင်းများသည် လျှောက်လှမ်းနေသည့် ဒီမိုကရေစီ ကျင့်ဝတ်များနှင့် ညီညွတ်မှုမရှိဘူးဟု ပြောလိုကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က “နိုင်ငံတော်နဲ့ တိုင်းရင်းသားပြည်သူလူထု၏ အကျိုးစီးပွားတစ်ခုတည်းကိုသာ ရှေးရှုပြီး ကျွန်တော်တို့ လက်ထက်မှာပဲ ခေတ်အဆက်ဆက် တောက်လောင်ခဲ့ရတဲ့ လက်နက်ကိုင်ပဋိပက္ခကို အပြီးတိုင် ငြှိမ်းသတ်ပြီး ခေတ်မီဖွံ့ဖြိုးတိုးတက်သော၊ စည်းလုံးညီညွတ်ခိုင်ခံ့သော ဒီမိုကရေစီနိုင်ငံတော်သစ်ကို ပြည်သူ့ဆန္ဒနှင့်အညီ တည်ဆောက်ချင်တာ ဖြစ်ပါတယ်။ ဒီနေ့ ငြိမ်းချမ်းရေးလုပ်ငန်းတွေကို နိုင်ငံတော်အစိုးရနဲ့ တပ်မတော်က တက်ကြွစွာဦးဆောင် ဆောင်ရွက်နေခြင်းဟာ ကျွန်တော်တို့မှာ အင်အားချည့်နဲ့နေလို့ မဟုတ်ဘူးဆိုတာ သတိချပ်စေလိုပါတယ်။ အမှန်တကယ် ငြိမ်းချမ်းရေးလိုချင်တဲ့ အဖွဲ့အစည်းမှန်သမျှ သဘောတူညီချက်တွေကိုသာ လိုက်နာပါက ဘာသေနတ်သံမျှ ကြားရမှာမဟုတ်ပါဘူး။ ကိုယ့်လူကိုသာ နိုင်အောင်ထိန်းဖို့ အဓိပ္ပာယ်ကင်းမဲ့တဲ့ အကြောင်းပြချက်အမျိုးမျိုး မပေးဖို့လိုပါမယ်။ ငြိမ်းချမ်းရေးထက် အရေးကြီးတာ ဘာမှမရှိဘူး။ ဒီကာလမှာ နားလည်မှု လွဲမှားစေနိုင်တဲ့ ကိစ္စမျိုးတွေကို ရှေ့တန်းတင်ခြင်း၊ ငြိမ်းချမ်းရေးလုပ်ငန်းစဉ်နဲ့ မသက်ဆိုင်တဲ့ကိစ္စတွေကို ဆွဲသွင်းလာခြင်းတို့ မပြုလုပ်ဖို့ အရေးကြီးပါတယ်” ဟု ပြောကြားသည်။

ထို့ပြင် အချို့သောဒေသရှိ တိုင်းရင်းသား လက်နက်ကိုင်အဖွဲ့အစည်းများသည် ၅၂ သန်းသော တိုင်းရင်းသားပြည်သူလူထုတစ်ရပ်လုံးကို ကိုယ်စားပြုခြင်းမဟုတ်သကဲ့သို့ နိုင်ငံရေးပါတီများသည်လည်း ၎င်းတို့ကို ထောက်ခံသူများကိုသာ ကိုယ်စားပြုခြင်းဖြစ်ကြောင်း၊ မိမိတို့တပ်မတော်သည် တိုင်းရင်းသားပြည်သူလူထုက ပေါက်ဖွားလာသည့် ပြည်သူ့တပ်မတော်ဖြစ်သည်နှင့်အညီ နိုင်ငံတော်နှင့်ပြည်သူလူထုကို ကိုယ်စားပြုရသော အဖွဲ့အစည်းဖြစ်ကြောင်း၊ မိမိတို့၏ ဖြစ်တည်မှုနှင့် ရပ်တည်မှုတို့သည် မှန်ကန်ရန် အထူးလိုအပ်ကြောင်း၊ ငြိမ်းချမ်းရေးဆွေးနွေးမှုများနှင့် ဆက်စပ်ပြီး ဖွဲ့စည်းပုံအခြေခံဥပဒေ ပြင်ဆင်ရေးကိုလည်း ဆောင်ရွက်လိုသည့် သဘောထားများ မိမိတို့သိရှိကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

တိုင်းရင်းသားပြည်သူလူထု၏ အကျိုးကိုရှေးရှုပြီး ၂၀၁၅ ခုနှစ်တွင် ဖွဲ့စည်းပုံအခြေခံဥပဒေ (၂၀၀၈ ခုနှစ်) ၏ ဇယား (၂) တိုင်းဒေသကြီး (သို့မဟုတ်) ပြည်နယ်ဥပဒေပြုစာရင်းတွင် အချက် ၃၄ ချက်၊ ဇယား (၅) တိုင်းဒေသကြီး (သို့မဟုတ်) ပြည်နယ်များမှ ကောက်ခံရမည့် အခွန်အခများမှ အချက် ၂၀ တို့ကို ပြင်ဆင်ဖြည့်စွက်ပေးပြီး လုပ်ပိုင်ခွင့်များ တိုးချဲ့ပေးခဲ့ကြောင်း၊ ထပ်မံပြင်ဆင်လိုသည်များရှိပါက ဆက်လက်ညှိနှိုင်းဆွေးနွေး လုပ်ဆောင်သွားရမည်ဖြစ်ကြောင်း၊ ယင်းသို့ဆောင်ရွက်ရာတွင် ဖွဲ့စည်းပုံအခြေခံဥပဒေ (၂၀၀၈ ခုနှစ်) အခန်း ၁၂၊ ဖွဲ့စည်းပုံ အခြေခံဥပဒေ ပြင်ဆင်ခြင်းအခန်းပါ ပြဋ္ဌာန်းချက်များအတိုင်း ဆောင်ရွက်ကြရန်လိုကြောင်း၊ ရှိပြီးသား နိုင်ငံတော်အခြေခံမူ ၄၈ ချက် ခိုင်မာတည်တံ့ရန် လိုအပ်ကြောင်း တပ်မတော်ကာကွယ်ရေးဦးစီးချုပ်က ဆက်လက်ပြောကြားသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က “ငြိမ်းချမ်းရေးလုပ်ငန်းစဉ်တွေဟာ လိုအပ်တာထက်ပိုပြီး အချိန်ကြာလာပါက ဘေးပယောဂတွေ၊ ၀င်ရောက်စွက်ဖက်မှုတွေ၊ ကြိုးကိုင်ခြယ်လှယ်တာတွေ၊ ခက်ခက်ခဲခဲ တည်ဆောက်ထားရတဲ့ ရရှိပြီးသဘောတူညီချက်တွေ အားနည်းသွားနိုင်ပါတယ်။ ဒါကြောင့် အချိန်ပြည့် ညှိနှိုင်းဆွေးနွေးခြင်းတွေ၊ ရလဒ်ထွက်လာအောင် ဆွေးနွေးခြင်းတွေကို နိုင်ငံတော်နဲ့ တိုင်းရင်းသားပြည်သူလူထုရဲ့ အကျိုးစီးပွားကို ထာဝစဉ်ရှေးရှုပြီး စိတ်စေတနာ ထက်ထက်သန်သန်နဲ့ စဉ်ဆက်မပြတ် ဆောင်ရွက်သွားကြဖို့ တိုက်တွန်းလိုပါတယ်။ ကိုယ်စားလှယ်တွေအနေနဲ့ တွေ့ဆုံဆွေးနွေးမှုကို ရေရှည်ငြိမ်းချမ်းရေး တည်တံ့ခိုင်မြဲရေး ရလဒ်ထွက်သည်အထိ ဆက်တိုက်ဆောင်ရွက်ဖို့ လိုပါမယ်။ ရလဒ်မထွက်မီ ဆွေးနွေးမှု ရပ်နားပြီးနောက် အခြေအနေ ပြောင်းလဲမှုများ မကြာခဏ တွေ့ရတဲ့အတွက် ရလဒ်ထွက်သည်အထိ ဆွေးနွေးဖို့ ကျွန်တော်တိုက်တွန်းရခြင်း ဖြစ်ပါတယ်” ဟု အဖွင့်မိန့်ခွန်း ပြောကြားစဉ် ပြောကြားသည်။

ငြိမ်းချမ်းရေးလုပ်ငန်းစဉ်များကို အကောင်အထည်ဖော်ရာတွင် အချိန်မဆွဲဘဲ ရဲရဲဝံ့ဝံ့ လုပ်ဆောင်ကြရန် လိုအပ်ကြောင်းနှင့် ၂၀၂၀ ပြည့်နှစ်တွင် ပြုလုပ်မည့် ပြည်ထောင်စုငြိမ်းချမ်းရေးညီလာခံ အစည်းအဝေးတွင် ငြိမ်းချမ်းရေးလုပ်ငန်းစဉ်များ ပြီးပြတ်စေရေး ဆောင်ရွက်သွားရန် အလေးထား တိုက်တွန်းလိုကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

“ဒီနေ့ အမျိုးသားဒီမိုကရေစီအဖွဲ့ချုပ်ပါတီက ဦးဆောင်နေတဲ့ အစိုးရလက်ထက်မှာလည်း ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC)၊ ပစ်ခတ်တိုက်ခိုက်မှု ပူးတွဲစောင့်ကြည့်ရေးအဖွဲ့ အဆင့်ဆင့်တို့မှာ တပ်မတော်ကာ ပူးပေါင်း ပါဝင်ဆောင်ရွက်လျက်ရှိပြီး အစိုးရရဲ့ ငြိမ်းချမ်းရေး လုပ်ငန်းစဉ်များ လျင်မြန်အောင်မြင်စေရေးအတွက် အတွေ့အကြုံများနဲ့ယှဉ်ပြီး ကိုယ်စွမ်းဥာဏ်စွမ်းရှိသရွေ့ ဆောင်ရွက်လျက် ရှိပါတယ်။ ရှေ့တန်းစစ်မြေပြင်မှာ မလွှဲမရှောင်သာ ရင်ဆိုင်တိုက်ခိုက်နေရတဲ့ ကျွန်တော်တို့ တပ်မတော်သားတွေက ငြိမ်းချမ်းရေးကို အလိုလားဆုံး ဖြစ်ပါတယ်။ စစ်မှန်တဲ့ ငြိမ်းချမ်းရေး၊ ပြည်ထောင်စုနဲ့ တိုင်းရင်းသားစည်းလုံးညီညွတ်ရေးကို မထိခိုက်တဲ့ ငြိမ်းချမ်းရေးကို ဖြစ်နိုင်သမျှ အမြန်ဆုံး ရချင်တယ်လို့ ပြောလိုပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ဒီမိုကရေစီစနစ်ကျင့်သုံးသည့် နိုင်ငံအပြင် မည်သည့်စနစ်ကျင့်သုံးသည့် နိုင်ငံတွင်မဆို တစ်ခုတည်းသော တပ်မတော်တစ်ရပ်သာရှိကြောင်း၊ ထို့ကြောင့် တိုင်းရင်းသား လက်နက်ကိုင် အဖွဲ့အစည်းများအနေဖြင့်လည်း နိုင်ငံတကာက ကျင့်သုံးနေသည့် ငြိမ်းချမ်းရေးဆိုင်ရာ လုပ်ထုံးလုပ်နည်းများနှင့်အညီ ဆောင်ရွက်သွားရန် လိုအပ်ကြောင်း၊ ယခုအချိန်တွင် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုပေါ်ပေါက်လာရန် လက်နက်ကိုင်လမ်းစဉ်များ ချုပ်ငြိမ်းသွားရေးသည် ပထမဦးစားပေး ဆောင်ရွက်သွားရမည်ဖြစ်ကြောင်း၊ မလိုလားအပ်သည်များကို ဆွဲထည့်ဆွေးနွေးပြီး အချိန်ဆွဲနေမယ့်အစား တစ်နိုင်ငံလုံး ငြိမ်းချမ်းရေးရရှိလာချိန်တွင် ရှေ့ဆက်ဆောင်ရွက်ရမယ့် လုပ်ငန်းများကို ဒီမိုကရေစီ နည်းလမ်းတကျ ဆွေးနွေးညှိနှိုင်းအကောင်အထည်ဖော် ဆောင်ရွက်သွားရန် လိုအပ်ကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

တပ်မတော်ကာကွယ်ရေးဦးစီးချုပ်နှင့် ‘၀’ အဖွဲ့၊ မိုင်းလားအဖွဲ့၊ SSPP/SSA အဖွဲ့နှင့် KIO/KIA အဖွဲ့ခေါင်းဆောင်များ တွေ့ဆုံ

တပ်မတော်ကာကွယ်ရေးဦးစီးချုပ်က မြောက်ပိုင်းတိုင်းရင်းသား လက်နက်ကိုင်လေးဖွဲ့ တွေ့ဆုံပွဲသို့ တက်ရောက်လာသည့် KIA မှ ဗိုလ်ချုပ်ဂွန်မော်အား နှုတ်ဆက်နေသည်ကို တွေ့ရစဉ် (Photo- Senior General Min Aung Hlaing Facebook)

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်သည် NCA ရေးထိုးရခြင်းမရှိသေးသည့် ‘၀’ အဖွဲ့ (UWSP/UWSA)၊ မိုင်းလားအဖွဲ့ (NDAA)၊ ရှမ်းပြည်တိုးတက်ရေးပါတီ (SSPP/SSA) နှင့် ကချင်လက်နက်ကိုင်အဖွဲ့ (KIO/KIA) တို့မှ ခေါင်းဆောင်များအား ဇူလိုင် ၁၁ ရက် မွန်းလွဲပိုင်းက နေပြည်တော်ရှိ ဘုရင့်နောင်ဧည့်ရိပ်သာ ဧည့်ခန်းမဆောင်၌ လက်ခံတွေ့ဆုံခဲ့ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်သည်။

ထိုသို့တွေ့ဆုံရာတွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA) လက်မှတ်ရေးထိုးနိုင်ရေးဆိုင်ရာ ကိစ္စရပ်များ၊ တွေ့ဆုံဆွေးနွေးညှိနှိုင်းမှုမှသည် ငြိမ်းချမ်းရေးလုပ်ငန်းစဉ်များ တိုးတက်လာရေးဆိုင်ရာ ကိစ္စရပ်များအား ဆွေးနွေးခဲ့ကြောင်း ထုတ်ပြန်ချက်အရ သိရသည်။

အဆိုပါ လေးဖွဲ့အပါအ၀င် မြောက်ပိုင်းတိုင်းရင်းသား လက်နက်ကိုင်ခုနစ်ဖွဲ့သည် တရုတ်နိုင်ငံ၏ လုံခြုံရေးတာဝန်ယူမှုဖြင့် နေပြည်တော်၌ ဇူလိုင် ၁၁ ရက်က စတင်ပြုလုပ်သည့် ၂၁ ရာစုပင်လုံ တတိယအစည်းအဝေး တက်ရောက်ရန် ရောက်ရှိနေခြင်းဖြစ်သည်။

တပ်မတော်ကာကွယ်ရေးဦးစီးချုပ်နှင့် တွေ့ဆုံမှုတွင် မပါဝင်သည့် ရခိုင်လက်နက်ကိုင်အဖွဲ့ (AA)၊ ကိုးကန့်လက်နက်ကိုင်အဖွဲ့ (MNDAA) နှင့် တအန်းလက်နက်ကိုင်အဖွဲ့ (TNLA) တို့အား ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီးစိုးဝင်းက လက်ခံတွေ့ဆုံခဲ့ကြောင်း သတင်းများ ထွက်ပေါ်နေသော်လည်း ဇူလိုင် ၁၁ ရက် ည ၇ နာရီခွဲအထိ တရားဝင် သတင်းထုတ်ပြန်မှုများ မရှိသေးပေ။

မြောက်ပိုင်းတိုင်းရင်းသားလက်နက်ကိုင်အဖွဲ့များက NCA စာချုပ်အား လက်မခံကြောင်း မကြာခဏ ထုတ်ဖော်ပြောကြားပြီး တပ်မတော်ကာကွယ်ရေးဦးစီးချုပ်က တိုင်းရင်းသားလက်နက်ကိုင်အဖွဲ့အားလုံး NCA တွင် ပါဝင်ရေးထိုးရမည်ဖြစ်ကြောင်း ပြောကြားထားသည်။

ငြိမ်းချမ်းရေးနှင့်ပတ်သက်ပြီး KIO အနေဖြင့် တစ်ဖက်နှင့်တစ်ဖက် အဆက်အသွယ် ပြတ်တောက်နေမှုများကို အဆက်အသွယ်ပြန်လုပ်နိုင်ရန် မျှော်လင့်ထားကြောင်း KIO/KIA ခေါင်းဆောင်တစ်ဦးဖြစ်သူ ဗိုလ်ချုပ်ဂွန်မော်က တပ်မတော်ကာကွယ်ရေးဦးစီးချုပ်နှင့် မတွေ့ဆုံမီ နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းစင်တာတွင် ပြုလုပ်သည့် ပြည်ထောင်စုငြိမ်းချမ်းရေးညီလာခံ ၂၁ ရာစုပင်လုံ တတိယအစည်းအဝေးဖွင့်ပွဲ တက်ရောက်လာစဉ် သတင်းထောက်များ၏ မေးမြန်းချက်များအား ဖြေကြားသည်။

သတင်းထောက်တစ်ဦးက KIO/KIA အနေဖြင့် NCA တွင် လက်မှတ်ထိုးမည့် အခြေအနေနှင့်ပတ်သက်ပြီး ဖြေကြားပေးရန် မေးမြန်းခဲ့သည်။

အဆိုပါမေးမြန်းမှုအား ဗိုလ်ချုပ်ဂွန်မော်က “KIO အနေနဲ့ တစ်ဖက်နဲ့တစ်ဖက် အဆက်အသွယ်ပြတ်တောက်နေတဲ့ အနေအထားကို ဘယ်လိုပြန်ပြီး အဆက်အသွယ် လုပ်နိုင်မလဲဆိုတဲ့ မျှော်လင့်ချက်ရှိတယ်။ ကျွန်တော်တို့ ထူးခြားတဲ့အစီအစဉ်တော့ မရှိသေးပါဘူး။ ဖွင့်ပွဲနဲ့ ညစာစားပွဲတက်တာပါ။ ကျန်တာကတော့ ညှိရမှာပါ။ NCA ထိုးမလား မထိုးဘူးလားဆိုတာ FPNCC အနေနဲ့ အစိုးရနဲ့ သဘောထားတွေ အရင်ဆွေးနွေးဖို့လိုပါတယ်။ အဲဒါပြီးမှပဲ NCA ကို လက်မှတ်ထိုးမလား မထိုးဘူးလားဆိုတဲ့အဖြေက ထွက်လာမှာပါ” ဟု သတင်းထောက်များအား ပြောကြားသည်။

ငြိမ်းချမ်းရေးနှင့်ပတ်သက်ပြီး တစ်ဖက်နှင့်တစ်ဖက် အဆက်အသွယ် ပြတ်တောက်နေမှုများကို ပြန်လည်ဆက်သွယ်နိုင်ရန် မျှော်လင့်ထားကြောင်း၊ တပ်မတော်ကာကွယ်ရေးဦးစီးချုပ်နှင့် တွေ့ဆုံပါက စစ်ပွဲများအရှိန်လျှော့ရန်ပြောမည်ဖြစ်ကြောင်း ဗိုလ်ချုပ်ဂွန်မော်က ပြောကြားသည်။

ထို့ပြင် ‘၀’ အဖွဲ့ (UWSA) ဦးဆောင်သည့် FPNCC အဖွဲ့ဝင် အဖွဲ့များအနေဖြင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် လက်မှတ် ထိုး မထိုးကိစ္စသည် FPNCC မှ တင်သွင်းထားသည့် မူဝါဒနှင့်ပတ်သက်ပြီး အစိုးရ၊ ငြိမ်းချမ်းရေးကော်မရှင်နှင့် FPNCC တို့ ဦးစွာဆွေးနွေးရန် လိုအပ်မည်ဖြစ်ကြောင်း၊ မြောက်ပိုင်းမဟာမိတ်အဖွဲ့ကို ၂၁ ရာစု ပင်လုံအစည်းအဝေးဖွင့်ပွဲတက်ရန် အစိုးရဘက်မှ တရုတ်သံရုံးမှတစ်ဆင့် ဖိတ်ကြားခဲ့ခြင်းဖြစ်ပြီး ခေါင်းဆောင်ပိုင်းများ ဦးဆောင်ပြီး တက်ရောက်လာကြခြင်းဖြစ်ကြောင်း ဗိုလ်ချုပ်ဂွန်မော်က ပြောကြားသည်။

နီပေါနိုင်ငံရှိ ကုလသမဂ္ဂငြိမ်းချမ်းမှု ထိန်းသိမ်းရေး သင်တန်းကျောင်းတွင် မြန်မာ့တပ်မတော်မှ သင်တန်းသားများ တက်ရောက်ရေး အပါအ၀င် နှစ်နိုင်ငံတပ်မတော်အကြား ပူးပေါင်းဆောင်ရွက်ရေး ဗိုလ်ချုပ်မှူးကြီးမင်းအောင်လှိုင်နှင့် နီပေါတပ်မတော်ကြည်းတပ်ဦးစီးချုပ် ဆွေးနွေး

ဗိုလ်ချုပ်မှူးကြီးမင်းအောင်လှိုင်နှင့် နီပေါတပ်မတော်ကြည်းတပ်ဦးစီးချုပ်တို့ ဂုဏ်ပြုတပ်ဖွဲ့၏ အလေးပြုခြင်းကို ခံယူစဉ် (ဓာတ်ပုံ-တပ်မတော်ကာကွယ်ရေးဦးစီးချုပ်ရုံး)

နီပေါနိုင်ငံရှိ ကုလသမဂ္ဂငြိမ်းချမ်းမှု ထိန်းသိမ်းရေး သင်တန်းကျောင်းတွင် မြန်မာ့တပ်မတော်မှ သင်တန်းသားများ တက်ရောက်ရေး အပါအ၀င် နှစ်နိုင်ငံတပ်မတော်အကြား ပူးပေါင်းဆောင်ရွက်ရေး ကိစ္စရပ်များနှင့် စပ်လျဉ်း၍ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် နီပေါတပ်မတော် ကြည်းတပ်ဦးစီးချုပ် General Rajendra Chhetri တို့သည် ဇူလိုင် ၄ ရက်က နေပြည်တော်ရှိ ဇေယျာသီရိဗိမာန် ဧည့်ခန်းမဆောင်တွင် တွေ့ဆုံဆွေးနွေးခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ သတင်းထုတ်ပြန်ချက်အရ သိရသည်။

ဆွေးနွေးပွဲတွင် နှစ်နိုင်ငံနှင့် နှစ်နိုင်ငံ တပ်မတော်နှစ်ရပ်အကြား ချစ်ကြည်ရင်းနှီးမှု တိုးမြှင့်ဆောင်ရွက်ရေးနှင့် ကုန်သွယ်မှုမြှင့်တင်ရေးဆိုင်ရာ ကိစ္စရပ်များ၊ နှစ်နိုင်ငံ တပ်မတော်နှစ်ရပ်အကြား စစ်ဘက်ဆိုင်ရာသင်တန်းများ အပြန်အလှန် စေလွှတ်ရေး၊ ဆေးဘက်နည်းပညာများ၊ သဘာဝဘေးအန္တရာယ် ကာကွယ်ရေးနှင့် အခြားကိစ္စရပ်များတွင် အပြန်အလှန် ပူးပေါင်းဆောင်ရွက်ရေး၊ ယဉ်ကျေးမှုအဖွဲ့များနှင့် အားကစားအဖွဲ့များ အပြန်အလှန် စေလွှတ်ရေး၊ နီပေါနိုင်ငံရှိ ကုလသမဂ္ဂငြိမ်းချမ်းမှု ထိန်းသိမ်းရေး သင်တန်းကျောင်းတွင် မြန်မာ့တပ်မတော်မှ သင်တန်းသားများ တက်ရောက်ရေး၊ ဘာသာစကားဆိုင်ရာ သင်တန်းများ အပြန်အလှန် စေလွှတ်ရေး၊ မြန်မာနိုင်ငံ၏ ထာဝရငြိမ်းချမ်းရေး ရရှိစေရန်အတွက် တပ်မတော်မှ ဆောင်ရွက်နေမှု အခြေအနေများနှင့် နှစ်နိုင်ငံ တပ်မတော် နှစ်ရပ်အကြား ချစ်ကြည်ရင်းနှီးမှု တိုးမြှင့်ဆောင်ရွက်ရေးဆိုင်ရာ ကိစ္စရပ်များကို အမြင်ချင်းဖလှယ် ဆွေးနွေးခဲ့ကြကြောင်း သတင်းထုတ်ပြန်မှုအရ သိရသည်။

ထိုသို့ တွေ့ဆုံဆွေးနွေးရာ၌ တပ်မတော်ကာကွယ်ရေးဦးစီးချုပ်က ယခုချစ်ကြည်ရေးခရီးစဉ်သည် မြန်မာ-နီပေါ နှစ်နိုင်ငံ ဆက်ဆံရေးနှင့် တပ်မတော်နှစ်ရပ်အကြား ဆက်ဆံရေးအတွက် သမိုင်းဝင်ခရီးစဉ်တစ်ခုဖြစ်ပြီး နှစ်နိုင်ငံ ချစ်ကြည်ရင်းနှီးမှု တိုးတက်ရေးအတွက် ခြေလှမ်းတစ်ရပ်ဖြစ်ကြောင်း၊ မြန်မာ့တပ်မတော် ချစ်ကြည်ရေးကိုယ်စားလှယ်အဖွဲ့ နီပေါနိုင်ငံသို့ ချစ်ကြည်ရေးခရီး လာရောက်စဉ်က အကောင်းဆုံးဖြစ်အောင် ဆောင်ရွက်ပေးခဲ့မှုများအပေါ် ကျေးဇူးတင်ရှိကြောင်း၊ နှစ်နိုင်ငံနှင့် နှစ်နိုင်ငံတပ်မတော် နှစ်ရပ်အကြား ချစ်ကြည်ရင်းနှီးမှု တိုးတက် ခိုင်မာစေရေးအတွက် ဆက်လက် ဆောင်ရွက်မည်ဖြစ်ကြောင်း ပြောကြားသည်။

ထို့အတူ နီပေါတပ်မတော်ကြည်းတပ် ဦးစီးချုပ်ကလည်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၏ ဖိတ်ကြားချက်အရ ချစ်ကြည်ရေးခရီး လာရောက်ရသည့်အတွက် ကျေးဇူးတင်ရှိပါကြောင်း၊ နီပေါကြည်းတပ်ဦးစီးချုပ်တစ်ဦး အနေဖြင့် မြန်မာနိုင်ငံသို့ ပထမဦးဆုံးအကြိမ် လာရောက်သည့် ချစ်ကြည်ရေးခရီးစဉ်ဖြစ်ကြောင်း၊ ယခုကဲ့သို့ ချစ်ကြည်ရေးခရီးစဉ်များ အပြန်အလှန် လည်ပတ်ခြင်းဖြင့် နှစ်နိုင်ငံနှင့် နှစ်နိုင်ငံတပ်မတော် နှစ်ရပ်အကြား ချစ်ကြည်ရင်းနှီးမှုများ ပိုမိုတိုးတက်ခိုင်မာလာမည်ဟု ယုံကြည်ကြောင်း၊ ရင်းနှီးနွေးထွေးစွာ ကြိုဆိုမှုများကိုလည်း ကျေးဇူးတင်ရှိကြောင်း ပြောကြားသည်။

တွေ့ဆုံဆွေးနွေးပွဲမပြုလုပ်မီ အဆိုပါနေ့ နံနက်ပိုင်းက တပ်မတော်ကာကွယ်ရေး ဦးစီးချုပ်သည် နီပေါတပ်မတော်ကြည်းတပ်ဦးစီးချုပ်အား ဇေယျသီရိဗိမာန်ရှေ့တွင် ဂုဏ်ပြုတပ်ဖွဲ့ဖြင့် ကြိုဆိုခဲ့ကြောင်း၊ ယင်းနောက် တပ်မတော်ကာကွယ်ရေးဦးစီးချုပ်နှင့် နီပေါတပ်မတော် ကြည်းတပ်ဦးစီးချုပ်တို့သည် ဂုဏ်ပြုတပ်ဖွဲ့၏ အလေးပြုခြင်းကို ခံယူကြပြီး ဂုဏ်ပြုတပ်ဖွဲ့ကို လိုက်လံကြည့်ရှု စစ်ဆေးခဲ့ကြောင်း သတင်းရရှိသည်။

အဆိုပါ ဂုဏ်ပြုကြိုဆိုပွဲသို့ တပ်မတော်ကာကွယ်ရေးဦးစီးချုပ်နှင့်အတူ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီးစိုးဝင်း၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီးမြထွန်းဦး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး မောင်မောင်ကျော်၊ ကာကွယ်ရေးဦးစီးချုပ်ရုံး (ကြည်း)မှ တပ်မတော်အရာရှိကြီးများနှင့် နေပြည်တော်တိုင်းစစ်ဌာနချုပ်တိုင်းမှူးတို့ တက်ရောက်ကြပြီး နီပေါတပ်မတော် ကြည်းတပ်ဦးစီးချုပ်နှင့်အတူ မြန်မာနိုင်ငံဆိုင်ရာ နီပေါနိုင်ငံသံအမတ်ကြီး H.E.Mr.Bhim K. Udas၊ နီပေါတပ်မတော် အရာရှိကြီးများ တက်ရောက်ကြကြောင်း သိရသည်။

ထို့ပြင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဇနီး ဒေါ်ကြူကြူလှတို့သည် နီပေါတပ်မတော်ကြည်းတပ်ဦးစီးချုပ် General Rajendra Chhetri နှင့်ဇနီး Mr.Rita Chhetri ဦးဆောင်သည့် ချစ်ကြည်ရေး ကိုယ်စားလှယ်အဖွဲ့အား ဂုဏ်ပြုနေ့လယ်စာဖြင့် တည်ခင်းဧည့်ခံခဲ့ရာ တပ်မတော် ဂုဏ်ပြုစစ်တီးဝိုင်းတပ်ဖွဲ့က နှစ်နိုင်ငံ နိုင်ငံတော်သီချင်းများအား ဂုဏ်ပြုတီးမှုတ်၍ တပ်မတော်ကာကွယ်ရေးဦးစီးချုပ်က ကြိုဆိုနှုတ်ခွန်းဆက် စကားပြောကြားပြီး နီပေါတပ်မတော်ကြည်းတပ်ဦးစီးချုပ်က ကျေးဇူးတင်စကား ပြန်လည်ပြောကြားခဲ့ကြောင်း သိရသည်။

နေ့လယ်စာသုံးဆောင်အပြီး တပ်မတော် ကာကွယ်ရေးဦးစီးချုပ်နှင့် နီပေါတပ်မတော် ကြည်းတပ်ဦးစီးချုပ်တို့သည် အမှတ်တရ လက်ဆောင်ပစ္စည်းများ အပြန်အလှန် ပေးအပ်ကြကြောင်း၊ သီဆိုဖျော်ဖြေခဲ့ကြသည့် အဖွဲ့များအား ဂုဏ်ပြုလက်ဆောင်နှင့် ဂုဏ်ပြုပန်းခြင်းများ ပေးအပ်ခြင်း အမှတ်တရ စုပေါင်းဓာတ်ပုံရိုက်ခြင်းများ ဆောင်ရွက်ခဲ့ကြောင်း တပ်မတော်ကာကွယ်ရေးဦးစီးချုပ်ရုံးက ထုတ်ပြန်ထားသည်။

မြေပြိုကျမှုများ ဖြစ်ပွားခဲ့သည့် ဆံတော်ရှင် ကျိုက်သလ္လံ စေတီတော်သို့ တပ်မတော်ကာကွယ်ရေး ဦးစီးချုပ် လာရောက်ကြည့်ရှု

ဓာတ်ပုံ – ဘိုဘိုမြင့်

တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် အဖွဲ့သည် ဇွန်လ (၁၉) ရက် နံနက် ၁၁ နာရီ ၃၀ မိနစ် အချိန်ခန့်က လွန်ခဲ့သည့် နှစ်ရက်က မိုးသည်းထန်စွာ ရွာသွန်းမှုကြောင့် မြေပြိုမှုများ ဖြစ်ပေါ်ခဲ့သည့် မော်လမြိုင်မြို့ တောင်ရိုးတန်းရှိ ဆံတော်ရှင် ကျိုက်သလ္လံ စေတီတော်သို့ လာရောက် ကြည့်ရှုခဲ့သည်။

ဓာတ်ပုံ – ဘိုဘိုမြင့်

ဗိုလ်ချုပ်မှူးကြီး မင်းအောင်လှိုင်နှင့်အတူ တပ်မတော် အရာရှိကြီးများ၊ မွန်ပြည်နယ်ဝန်ကြီးချုပ် ဒေါက်တာအေးဇံနှင့် ပြည်နယ်အစိုးရအဖွဲ့ ဝင် ဝန်ကြီးများ လိုက်ပါလာခဲ့သည့် ဇွန်လ ၁၇ ရက် နံနက်ပိုင်းက မိုးသည်းထန်စွာ ရွာသွန်းမှုကြောင့် ကျိုက်သလ္လံစေတီတော် အနောက်ဘက် စောင်းတန်းအနီး မြေပြိုမှုနှင့် အရှေ့ဘက် စောင်းတန်းအနီး မြေပြိုကျ ပျက်ဆီးနေမှုများအား လိုက်လံကြည့်ရှုခဲ့ပြီးနောက် ပျက်ဆီးမှုများအား ပြန်လည် ပြုပြင်နိုင်ရန်အတွက် တပ်မတော်မိသားစုများ လှူဒါန်းငွေ ကျပ်သိန်း (၈၀) ကျော်နှင့် ဘိလပ်မြေအိတ် (၁၀၀၀) အား ကျိုက်သလ္လံစေတီတော် ဘဏ္ဍာတော်ထိန်း ဂေါပကအဖွဲ့ထံ လှူဒါန်းခဲ့ကြောင်း ဂေါပကအဖွဲ့ထံမှ သိရသည်။

ထို့နောက် ဗိုလ်ချုပ်မှူးကြီး မင်းအောင်လှိုင်နှင့် အဖွဲ သည် မွန်ပြည်နယ် ရေးမြို့သို့ ဆက်လက်ထွက်ခွာ သွားကြောင်း သိရသည်။

 

လျှပ်စစ်နှင့် စက်မှုအင်ဂျင်နီယာတပ်ဖွဲ့မှ အရာရှိနှင့်စစ်သည်များအား ပညာရှင်ဖြစ်အောင် နှစ်ကာလများစွာအချိန်ပေး၍ လေ့ကျင့်ထားရသဖြင့် သက်ပြည့်သည်အထိ တာဝန်ထမ်းဆောင်စေလိုကြောင်း တပ်မတော်ကာကွယ်ရေးဦးစီးချုပ် ပြောကြား

လျှပ်စစ်နှင့် စက်မှုအင်ဂျင်နီယာတပ်ဖွဲ့မှ အရာရှိနှင့် စစ်သည်များအား ပညာရှင်များဖြစ်အောင် တပ်မတော်မှ နှစ်ကာလများစွာ အချိန်ပေး၍ လေ့ကျင့်ပေးထားရသဖြင့် သက်ပြည့်သည်အထိ တာဝန်ထမ်းဆောင်ပြီး တပ်မတော်ကို ပြန်လည်အကျိုးပြုစေလိုကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဧပြီ ၂၇ ရက်တွင် ပြောကြားသည်။

တပ်မတော်သည် နိုင်ငံတော်ကာကွယ်ရေးတာဝန်ကို ထမ်းဆောင်လျက်ရှိပြီး ထိုသို့ ကာကွယ်ရေးတာဝန်များ ထမ်းဆောင်ချိန်၌ တပ်မတော်တွင်အသုံးပြုသည့် စစ်လက်နက်များ၊ ယန္တရားများနှင့် အသုံးအဆောင်ပစ္စည်းများအား စွမ်းအားပြည့် အသုံးပြုနိုင်ရမည်ဖြစ်ကြောင်း၊ မိမိတို့အသုံးပြုသည့် စစ်လက်နက်ပစ္စည်းများ စစ်ဆင်ရေးတာဝန် ထမ်းဆောင်ချိန်တွင် ချို့ယွင်းမှုများရှိပါက ဆုံးရှုံးမှုများဖြစ်ပေါ်နိုင်ကြောင်း၊ ထိုကဲ့သို့ ချို့ယွင်းချက်များ မဖြစ်ပေါ်စေရေးအတွက် ပြုပြင်ထိန်းသိမ်းခြင်းလုပ်ငန်းများကို ဆောင်ရွက်နေရသည့် တပ်မတော်လျှပ်စစ်နှင့် အင်ဂျင်နီယာတပ်ဖွဲ့သည် အရေးကြီးသည့်ကဏ္ဍတွင်ပါဝင်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြင်ဦးလွင်တပ်နယ်ရှိ တပ်မတော်လျှပ်စစ်နှင့် စက်မှုအင်ဂျင်နီယာကျောင်းမှ နည်းပြအရာရှိ၊ စစ်သည်များနှင့် မိသားစုဝင်များအား တွေ့ဆုံအမှာစကားပြောကြားရာတွင် ထည့်သွင်းပြောကြားကြောင်း တပ်မတော်ကာကွယ်ရေးဦးစီးချုပ်ရုံး၏ ဧပြီ ၂၇ ရက် သတင်းထုတ်ပြန်ချက်အရ သိရသည်။

စစ်လက်နက်ပစ္စည်းများနှင့် ယန္တရားများ ပြုပြင်ထိန်းသိမ်းခြင်းလုပ်ငန်းများအား စဉ်ဆက်မပြတ်ဆောင်ရွက်နေသည့် တပ်မတော် လျှပ်စစ်နှင့်အင်ဂျင်နီယာတပ်ဖွဲ့ဝင်များအနေဖြင့် အင်ပြည့်အားပြည့်ဖြင့် ဆောင်ရွက်နိုင်ရမည်ဖြစ်ကြောင်း၊ ထို့ကြောင့် မိမိတို့သင်ကြားပေးလိုက်သည့် သင်တန်းသားများ အရည်အချင်းပြည့်ဝစေရန်အတွက် အခြေခံမှစ၍ အဆင့်လိုက် မြှင့်တင်လေ့ကျင့်ပေးရမည်ဖြစ်ကြောင်း သတင်းထုတ်ပြန်ချက်တွင် ပါရှိသည်။

ထို့နောက် တာဝန်ထမ်းဆောင်မှုနှင့် ပတ်သက်၍ မိမိတို့တပ်မတော်သားများသည် မိမိတို့သဘောဆန္ဒအလျောက် တပ်မတော်အတွင်း ၀င်ရောက်တာဝန်ထမ်းဆောင်ကြသူများဖြစ်သဖြင့် သတ်မှတ်ထားသည့် စစ်မှုထမ်းသက်ပြည့်အောင် ဆောင်ရွက်ရမည်ဖြစ်ကြောင်း၊ မည်သူမဆို သတ်မှတ်ချက်များနှင့်အညီ တာဝန်ထမ်းဆောင်နိုင်ခွင့်ရှိကြောင်း၊ မိမိတို့ လျှပ်စစ်နှင့်စက်မှု အင်ဂျင်နီယာတပ်ဖွဲ့မှ အရာရှိ၊ စစ်သည်များအား ပညာရှင်များဖြစ်အောင် တပ်မတော်မှ နှစ်ကာလများစွာ အချိန်ပေး၍ လေ့ကျင့်ပေးထားရသဖြင့် သက်ပြည့်သည်အထိ တာဝန်ထမ်းဆောင်ပြီး တပ်မတော်ကို ပြန်လည်အကျိုးပြုစေလိုကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

ထို့အတူတပ်မတော်သားများ ပညာရည်မြင့်မားရေးအတွက်လည်း စီမံချက်များချမှတ်ပြီး ဆောင်ရွက်ခဲ့ကြောင်း၊ မှီခိုသူကျောင်းသား၊ ကျောင်းသူများ၏ ပညာရည်မြင့်မားရေးအတွက်လည်း တပ်မတော်က တစ်ဖက်တစ်လမ်းမှ ထောက်ပံ့ပေးထားကြောင်း၊ မိမိတို့မိဘများအနေဖြင့်လည်း သားသမီးများအား ပညာအမွေပေးရန်လိုပြီး ပညာတတ်မှသာ မိမိတို့၏သားသမီးများသည် ကိုယ်တိုင်ရပ်တည် ဆောင်ရွက်နိုင်မည်ဖြစ်ကြောင်း၊ မိမိတို့ကိုယ်တိုင်လည်း အသိပညာများ တိုးတက်စေရန်အတွက် စာဖတ်ရန်လိုကြောင်း၊ သို့မှသာ မိမိတို့ဘ၀တိုးတက်မည်ဖြစ်သည်ဟု တပ်မတော် ကာကွယ်ရေးဦးစီးချုပ်က မှာကြားကြောင်း သတင်းထုတ်ပြန်ချက်အရ သိရသည်။

နိုင်ငံရေး တည်ငြိမ်မှုမရှိချိန်တွင် တပ်မတော်သည် နိုင်ငံရေး အသုံးချခံ မဖြစ်ရန် လိုအပ်ကြောင်း တပ်မတော်ကာကွယ်ရေးဦးစီးချုပ် ပြောကြား

နိုင်ငံရေး တည်ငြိမ်မှု မရှိချိန်တွင် တပ်မတော်သည် နိုင်ငံရေး အသုံးချခံ မဖြစ်ရန် လိုအပ်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဧပြီ ၁၈ ရက်တွင် ပြင်ဦးလွင်တပ်နယ်၊ တပ်မတော် အုပ်ချုပ်မှုကျောင်း၌ တက်ရောက်လျက်ရှိသည့် ဥပဒေ (အရာရှိ) ဒီပလိုမာသင်တန်းမှ တပ်မတော် အရာရှိကြီးများအား တွေ့ဆုံ အမှာစကားပြောကြားရာတွင် ထည့်သွင်းပြောကြားခဲ့ခြင်း ဖြစ်ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

တပ်မတော်သည် နိုင်ငံတော် ကာကွယ်ရေးတာဝန် ထမ်းဆောင်လျက်ရှိပြီး ပြည်သူလူထုကို စောင့်ရှောက်နေသည့် အဖွဲ့အစည်း၊ နိုင်ငံတကာနှင့် ဆက်ဆံ ဆောင်ရွက်နေသည့် အဖွဲ့အစည်းတစ်ခု ဖြစ်ကြောင်း၊ အထူးသဖြင့် နယ်စပ်ဒေသတွင် နှစ်နိုင်ငံ တပ်မတော် နှစ်ရပ် ဆက်ဆံရေးများရှိပြီး ရေပြင်ပိုင်နက်၊ မြေပြင်ပိုင်နက်များတွင် ပူးပေါင်းလေ့ကျင့်မှုများ ရှိကြောင်း၊ လိုအပ်ပါက ပူးပေါင်း တာဝန်ထမ်းဆောင်မှုများ ရှိနိုင်သဖြင့် တပ်မှူးများအနေဖြင့် နိုင်ငံတကာဥပဒေများကို သိရှိနေရန်၊ လက်အောက်ကို သိရှိ လိုက်နာအောင် ဦးဆောင်မှုပေးရန် လိုအပ်ကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

ထို့ပြင် ယခုအချိန်တွင် ဒီမိုကရေစီ လမ်းကြောင်းပေါ် လျှောက်လှမ်းကြရာ၌ စစ်ဘက်၊ အရပ်ဘက် ဆက်ဆံရေးမှာ ပိုမိုအရေးကြီးလာသဖြင့် ဥပဒေများကို ပိုမိုသိရှိ နားလည်ရန် လိုအပ်ကြောင်း၊ မိမိတို့ နိုင်ငံတွင် ပြည်တွင်း လက်နက်ကိုင်ပဋိပက္ခများ ချုပ်ငြိမ်းမှု မရှိသေးခြင်း၊ နိုင်ငံရေးအရ တည်ငြိမ်မှု မရှိခြင်းတို့ကြောင့် ငြိမ်းချမ်းမှု ရှိအောင် ဆောင်ရွက်ရန်လိုပြီး နိုင်ငံရေး တည်ငြိမ်မှု မရှိချိန်တွင် မိမိတို့ တပ်မတော်သည် နိုင်ငံရေးအရ အသုံးချခံ မဖြစ်ရန်လိုကြောင်း၊ မိမိတို့ သွားနေသည့် လမ်းကြောင်းမှာ အမျိုးသားနိုင်ငံရေး ဖြစ်ကြောင်း၊ ထို့ကြောင့် အဆင့်အလိုက် တပ်မတော်အရာရှိများ အားလုံး ဖွဲ့စည်းပုံ အခြေခံဥပဒေကို သိရှိနားလည်ရန် လိုကြောင်း၊ စစ်ဘက် တရားစီရင်ရေးများ ဆောင်ရွက်ရာတွင် ဖြစ်စဉ် အကြောင်းအရာအလိုက် ပြစ်မှု၊ ပြစ်ဒဏ်များ ရှိကြောင်း၊ အုပ်ချုပ်ရေးနှင့် စစ်ဘက် တရားစီရင်ရေး စနစ်အရ တပ်မှူးများသည် ရှေ့နေ၊ တရားသူကြီး နှင့် အုပ်ချုပ်သူ စသည်ဖြင့် အသီးသီးသော တာဝန်များ ဆောင်ရွက်ရကြောင်း၊ အုပ်ချုပ်သူ အနေဖြင့် ဖခင်စိတ်ထား၊ တပ်မှူးစိတ်ထားဖြင့် ညီညွတ်မျှတစွာ ဆောင်ရွက်ရမည် ဖြစ်ပြီး တရားသူကြီး အနေဖြင့် ဆင်ခြင်တုံတရားဖြင့် တရားမျှတစွာ ဆောင်ရွက်ရမည် ဖြစ်ကြောင်း၊ ရှေ့နေ အနေဖြင့် မိမိလူအား အပြစ်မရှိပါက ပြစ်ဒဏ် မကျအောင်၊ အပြစ်ရှိပါက ထိုက်သင့်သည့် ပြစ်ဒဏ်သာ ကျခံစေရန် ဆောင်ရွက်ရကြောင်း၊ တပ်မှူးများ အနေဖြင့် လက်အောက်ငယ်သားများအား အုပ်ချုပ်ရာတွင် ဘက်လိုက်မှုမရှိဘဲ ညီညွတ်မျှတစွာ အုပ်ချုပ်ရမည် ဖြစ်ကြောင်း၊ ဥပဒေနှင့် ပတ်သက်လျှင် ပုဂ္ဂိုလ်စွဲ၊ ဆန္ဒစွဲ ကင်းစွာဖြင့် တရားမျှတစွာ ဆောင်ရွက်ရမည်ဖြစ်ကြောင်း တပ်မတော်ကာကွယ်ရေးဦးစီးချုပ် က ပြောကြားသည်။

တပ်မတော်တွင် စစ်မှုထမ်း ဥပဒေအရ ၁၈ နှစ် ပြည့်ပြီးမှသာ တစ်နည်းအားဖြင့် ဥပဒေအရ မဲပေးခွင့် ရှိသူများသာ တပ်မတော်အတွင်း တာဝန်ထမ်းဆောင်ခွင့် ရှိကြောင်း၊ ထို့ကြောင့် တရားဥပဒေကို မသိနားမလည်ဟု ဆိုပြီးချိုးဖောက်၍ မရသကဲ့သို့ ဥပဒေအထက်တွင် မည်သူမှ နေ၍မရကြောင်း၊ ဥပဒေ ချိုးဖောက်ပါက ဥပဒေအရ အရေးယူခံရမည် ဖြစ်ကြောင်း၊ ရခိုင်ပြည်နယ်၊ ဘူးသီးတောင်- မောင်တောဒေသ၊ အင်းဒင်ကျေးရွာတွင် ဖြစ်ပွားခဲ့သည့် ပြဿနာများအား ဂျီနီဗာကွန်ဗန်းရှင်းနှင့်အညီ တပ်မတော်မှ ဆောင်ရွက်ခဲ့ပြီး တစ်ဦးချင်း လိုက်နာမှု အားနည်းသည့် အရာရှိ၊ စစ်သည်များအား ဥပဒေနှင့်အညီ အရေးယူ ဆောင်ရွက်ခဲ့ရသည်များလည်း ရှိကြောင်း၊ ဘင်္ဂါလီ အကြမ်းဖက်သမားများက ၂၀၁၆ ခုနှစ် အောက်တိုဘာလတွင် လုံခြုံရေး ကင်းစခန်းများအား လူအင်အား များစွာဖြင့် လက်နက်ကိုင် အကြမ်းဖက် တိုက်ခိုက်ခြင်း၊ လက်နက်များ လုယူခြင်း၊ ဒေသခံ တိုင်းရင်းသားများနှင့် လုံခြုံရေး တပ်ဖွဲ့ဝင်များအား ရက်စက်စွာ သတ်ဖြတ်ခြင်းများအား ဥပဒေမဲ့ ကျူးလွန်ခဲ့ခြင်းကြောင့် တပ်မတော်က ဥပဒေနှင့်အညီ နယ်မြေရှင်းလင်းရေး ဆောင်ရွက်ခဲ့ရကြောင်း၊ ၂၀၁၇ ခုနှစ် သြဂုတ်လတွင် အလားတူ အကြမ်းဖက် တိုက်ခိုက်မှုများ ထပ်မံ လုပ်ဆောင်လာသဖြင့် ဥပဒေနှင့်အညီ နယ်မြေရှင်းလင်းနိုင်ခဲ့သဖြင့် ၎င်းတို့၏ ရည်ရွယ်ချက် မအောင်မြင်ခဲ့ကြောင်း၊ အကြမ်းဖက်သမားများ အနေဖြင့် လူအင်အား များစွာဖြင့် ဥပဒေမဲ့ ပြစ်မှုကျူးလွန်ခဲ့ခြင်းအပေါ် ပြစ်ဒဏ်ကျခံရမည်ကို စိုးရိမ်သဖြင့် ၎င်းတို့ကိုယ်တိုင်နှင့် မိသားစု၊ ဆွေမျိုး၊ ပတ်သက် ဆက်နွယ်သူများ အားလုံး တစ်ဖက်နိုင်ငံသို့ ထွက်ပြေး တိမ်းရှောင်သွားကြခြင်းသာ ဖြစ်ပြီး ဥပဒေအရ ပြစ်ဒဏ်ပေးခံရမည်ကို စိုးရိမ်ကာ ပြန်မလာရဲခြင်းကို ၎င်းတို့အပေါ် တပ်မတော်သားများက နှိပ်စက် အနိုင်ကျင့်မှုများကြောင့်ဟု နိုင်ငံတကာသိအောင် မဟုတ်မမှန် ပြောကြားခြင်းဖြင့် မိမိတို့အပေါ် အထင်အမြင်လွဲအောင် စွပ်စွဲပြောကြားလျက်ရှိကြောင်း ၎င်းကပြောကြားသည်။

တပ်မတော်သားများအနေဖြင့် လူမှုကွန်ရက်စာမျက်နှာများ သုံးစွဲရာတွင် လုံခြုံရေးမကျိုးပေါက်စေရန်၊ မူးယစ်ဆေးဝါးနှင့် တရားမ၀င် သစ်မှောင်ခိုလုပ်ငန်းများတွင် ပါဝင်ပတ်သက်မှုမရှိစေရန် ဒုတိယတပ်မတော်ကာကွယ်ရေးဦးစီးချုပ် ပြောကြား

Photo: တပ်မတော်ကာကွယ်ရေးဦးစီးချုပ်ရုံး

တပ်မတော်သားများအနေဖြင့် လူမှုကွန်ရက်စာမျက်နှာများ သုံးစွဲရာတွင် လုံခြုံရေးမကျိုးပေါက်စေရန်၊ မူးယစ်ဆေးဝါးနှင့် တရားမ၀င် သစ်မှောင်ခိုလုပ်ငန်းများတွင် ပါဝင်ပတ်သက်မှုမရှိစေရန် ဒုတိယတပ်မတော်ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်းမှ ပြောကြားခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

အဆိုပါကိစ္စအား ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်းသည် ဧပြီ ၇ ရက် နံနက်ပိုင်းနှင့် မွန်းလွဲပိုင်းတို့တွင် ဗထူးတပ်နယ်နှင့် လွိုင်ကော်တပ်နယ်တို့အတွင်း စိုက်ပျိုးမွေးမြူရေး ဆောင်ရွက်ထားရှိမှုများအား လှည့်လည်ကြည့်ရှုစစ်ဆေးပြီး တပ်နယ်မှအရာရှိ၊ စစ်သည်၊ မိသားစုများအား တွေ့ဆုံစဉ်ပြောကြားခဲ့ခြင်းဖြစ်သည်။

တွေ့ဆုံပွဲတွင် ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) က နိုင်ငံတော်ကာကွယ်ရေးနှင့် လုံခြုံရေးဆိုင်ရာ သိသင့်သိထိုက်သော ကိစ္စရပ်များနှင့် စဉ်ဆက်မပြတ် လေ့ကျင့်ရေးဆိုင်ရာကိစ္စရပ်များ၊ စစ်သည်တော် ကျင့်ဝတ်အပါး ၆၀ အား လိုက်နာကျင့်သုံး၍ ညီညွတ်မျှတသော အုပ်ချုပ်မှုဖြင့် တပ်တွင်းစည်းလုံးညီညွှတ်မှုကို ပိုမိုကျစ်လျစ်ခိုင်မာအောင် တည်ဆောက်ရေးဆိုင်ရာကိစ္စရပ်များ၊ တပ်မတော်အား ခေတ်မီတပ်မတော် (Standard Army) တည်ဆောက်ရာတွင် လိုအပ်သည့်တိုက်စွမ်းအား၊ တိုက်စွမ်းရည်မြင့်မားစေရေး စဉ်ဆက်မပြတ် ဆောင်ရွက်နေရမည့်လုပ်ငန်းများနှင့် စစ်သည်များ၏ ပညာရည်မြှင့်တင်ရေးအတွက် ဆောင်ရွက်ရမည့်လုပ်ငန်းများ၊ ပြည်သူ့စစ်မဟာဗျူဟာကို လက်တွေ့အကောင်အထည်ဖော် ဆောင်ရွက်နိုင်ရေးအတွက် လေ့ကျင့်သားပြည့်ဝသော စစ်သည်၊ ရဲမေများဖြစ်လာစေရေး လေ့ကျင့်ရန်လိုအပ်သည့် ကိစ္စရပ်များကို ပြောကြားခဲ့သည်။

ထို့ပြင် တပ်မိသားစုများ သက်သာချောင်ချိရေးနှင့် ကုန်ဈေးနှုန်းကြီးမြှင့်မှုကို အထိုက်အလျောက် သက်သာစေမည့် တပ်ပိုင်နှင့် တစ်ပိုင်တစ်နိုင် စိုက်ပျိုးမွေးမြူရေးလုပ်ငန်းများ အောင်မြင်စွာ အကောင်အထည်ဖော် ဆောင်ရွက်နိုင်ရေးဆိုင်ရာ ကိစ္စရပ်များ၊ လူမှုကွန်ရက်စာမျက်နှာများ သုံးစွဲရာတွင် လုံခြုံရေးဆိုင်ရာ မကျိုးပေါက်စေရေး သတိပြုဆင်ခြင်စောင့်ထိန်းရမည့် ကိစ္စရပ်များ၊ မူးယစ်ဆေးဝါးနှင့် တရားမ၀င်သစ် မှောင်ခိုလုပ်ငန်းများတွင် စစ်သည်၊ မိသားစုဝင်များ ပါဝင်ပတ်သက်မှုမရှိစေရေး ဆိုင်ရာကိစ္စရပ်များအား ဒုတိယတပ်မတော်ကာကွယ်ရေးဦးစီးချုပ်က ပြောကြားခဲ့သည်။