ဗမာနိုင်ငံလုံးဆိုင်ရာ တက္ကသိုလ်ကျောင်းသားများသမဂ္ဂမှ ဦးဆောင်၍ တက္ကသိုလ်ပေါင်းစုံ ကျောင်းသား၊ ကျောင်းသူများက ပညာရေးအသုံးစရိတ် တိုးမြှင့်ပေးရန်အတွက် ရတနာပုံတက္ကသိုလ်ကျောင်းဝင်းအတွင်း ဆန္ဒပြတောင်းဆို

ပညာရေးအသုံးစရိတ်နှင့်ပတ်သက်ပြီး ရတနာပုံတက္ကသိုလ်ကျောင်းဝင်းအတွင်း တောင်းဆိုဆန္ဒပြကြစဉ် (ဓာတ်ပုံ-သီရိ)

မန္တလေးမြို့ ရတနာပုံတက္ကသိုလ်ကျောင်းဝင်းအတွင်း၌ ဗမာနိုင်ငံလုံးဆိုင်ရာ တက္ကသိုလ်ကျောင်းသားများသမဂ္ဂမှ ဦးဆောင်၍ တက္ကသိုလ်ပေါင်းစုံမှ ကျောင်းသား၊ ကျောင်းသူများက ပညာရေးအသုံးစရိတ် တိုးမြှင့်ပေးရန် ဆန္ဒပြတောင်းဆိုလျက်ရှိကြောင်း သိရသည်။

ဆန္ဒထုတ်ဖော်မှုအား ဇန်န၀ါရီ ၂၂ ရက် နံနက် ၉ နာရီမှ စတင်ပြုလုပ်ခဲ့ခြင်းဖြစ်ပြီး မန္တလေးမြို့ ရတနာပုံတက္ကသိုလ်ဝင်းအတွင်း ဆန္ဒထုတ်ဖော်တောင်းဆိုခဲ့ခြင်းဖြစ်ကာ မန္တလေးတိုင်းအတွင်းရှိ တက္ကသိုလ်ပေါင်းစုံမှ ကျောင်းသားကျောင်းသူ ၁၀၀ ကျော် ပါဝင်ကြောင်း သိရသည်။

“အခု ကျွန်တော်တို့ဆန္ဒပြတောင်းဆိုနေတယ်။ ပြည်သူ့အစိုးရအနေနဲ့ အမြန်ဆုံးညှိနှိုင်းမှု ပြုလုပ်မယ်လို့ မျှော်လင့်တယ်။ တကယ်လို့ ဒီနေ့တစ်နေကုန်သွားတဲ့အထိ ညှိနှိုင်း ဆောင်ရွက်မှုမရှိရင် မနက်ဖြန်ဆက်ပြီးလုပ်သွားမယ်။ မနက်ဖြန်ညှိနှိုင်းမှုမရှိရင် နောက် နေ့ဆက်လုပ်မယ်။ ညှိနှိုင်းမှုမရမချင်း ရက်အကန့်အသတ်မရှိ ဆောင်ရွက်သွားမှာပါ။ ဒီအပေါ်မှာ ဂရုမစိုက်မချင်း ကျွန်တော်တို့ဘက်က ဆောင်ရွက်သွားမှာပါ” ဟု ရမည်းသင်း နည်းပညာတက္ကသိုလ်မှ ကိုရာဇာထွန်းက ပြောကြားသည်။

အဆိုပါ ဆန္ဒပြတောင်းဆိုမှုကို ဗမာ နိုင်ငံလုံးဆိုင်ရာ ဗကသများအဖွဲ့ချူပ်၊ ပညာရေး အသုံးစရိတ်တိုးမြှင့်ရေးတိုက်ပွဲကော်မတီက ဦးဆောင်ဆောင်ရွက်ခြင်းဖြစ်ကြောင်း၊ ပညာရေးအသုံးစရိတ် တိုးမြှင့်ရေးတိုက်ပွဲ ကော်မတီကို ဇန်န၀ါရီ ၂၁ ရက်က ပြုလုပ်ခဲ့သည့် ဗကသများအဖွဲ့ချူပ် ပညာရေးနှီးနှော ဖလှယ်ပွဲတွင် ဖွဲ့စည်းခဲ့ကြောင်း၊ နှီးနှောဖလှယ်ပွဲတွင် တက္ကသိုလ် ၂၆ ခုမှ တက္ကသိုလ် ကျောင်းသား ကျောင်းသူများ တက်ရောက် ဆွေးနွေးခဲ့ကြောင်း သိရသည်။

ရတနာပုံတက္ကသိုလ်ကျောင်းဝင်းအတွင်း ဗမာနိုင်ငံလုံးဆိုင်ရာတက္ကသိုလ်ကျောင်းသားများသမဂ္ဂမှ ကျောင်းသား၊ ကျောင်းသူများက ပညာရေးအသုံးစရိတ်တိုးမြှင့်ပေးရန် ဆန္ဒပြတောင်းဆိုစဉ်

တိုက်ပွဲကော်မတီကို တက္ကသိုလ်ခြောက်ခုမှ ကျောင်းသားများဖြင့် ဖွဲ့စည်းထားကြောင်း၊ ဆန္ဒပြတောင်းဆိုမှုတွင် ပညာရေးအသုံးစရိတ် တိုးမြှင့်ရေး၊ ကျောင်းတွင်းအဆောင်များ တည်ဆောက်ရေး၊ သင်ထောက်ကူပစ္စည်း လုံလောက်ရေးတို့အတွက် တောင်းဆိုခဲ့ ကြောင်း၊ ကျောင်းသားသမဂ္ဂ တေးသီချင်းများကိုလည်း သီဆိုခဲ့ကြောင်း၊ ပညာရေး အသုံးစရိတ်မြှင့်တင်ရေးအတွက် လက်ကမ်းစာစောင်များလည်း ဝေငှခဲ့ကြောင်း၊ ဆန္ဒထုတ်ဖော်မှုအား သက်ဆိုင်ရာတာဝန်ရှိသူများ လာရောက်ညှိနှိုင်းဆောင်ရွက်မှု ရရှိသည်အထိ ပြုလုပ်သွားမည်ဖြစ်ကြောင်း သိရသည်။

“ပညာရေးအသုံးစရိတ်တိုးမှ အားလုံးအတွက် အဆင်ပြေမှာပါ။ ကျွန်တော်တို့ ဘွဲ့ရပြီးရင် အလုပ်မရဘူး။ ဘာလို့လဲဆိုတော့ ဘာမှမတတ်လို့ပါ။ အထူးသဖြင့် ဓာတုဗေဒ၊ ရူပဗေဒဘာသာရပ်တွေအတွက် သင်ထောက်ကူ ပစ္စည်းမရှိဘူး။ ရူပဗေဒနဲ့ ကျောင်းပြီးတဲ့ သူက နာရီတစ်လုံး မပြင်တတ်ပါဘူး။ ဓာတုဗေဒနဲ့ကျောင်းပြီးတဲ့သူတစ်ယောက်က အဆုံးစွန်ပြောရရင် ကျွန်တော်တို့သောက်နေကြတဲ့ အရက်တောင် မချက်တတ်ဘူး။ ပညာရေး အခြေအနေ ဘယ်လိုရှိတယ်ဆိုတာ ကောင်းကောင်းသိဖို့လိုနေပြီ။ ပညာရေးအသုံးစရိတ် မြှင့်တင်ပေးဖို့ ကျွန်တော်တို့ဘက်က လှည့်လည်ဟောပြောဆောင်ရွက်သွာ့းမယ်။ ရက်အကန့်သတ်မရှိဘူး။ အစိုးရဘက်က ညှိနှိုင်းမှုမလုပ်မချင်း ကျောင်းထဲမှာပဲ ဆက်ရှိနေမယ်။ ဒီကျောင်းမှာပဲ ဆက်လုပ်သွားမှာပါ။ ဆောင်ရွက်မပေးမချင်း ကျောင်းထဲမှာပဲရှိနေ မှာပါ” ဟု ရတနာပုံတက္ကသိုလ်မှ ကိုရဲမျိုးဆွေက ပြောကြားသည်။

ဆန္ဒပြတောင်းဆိုမှုအား ရတနာပုံတက္ကသိုလ် ကျောင်းဝင်းအတွင်း ပင်မလေးထပ် ဆောင်ရှေ့မှစတင်ကာ ကျောင်းဝင်းအတွင်း လှည့်လည်တောင်းဆိုခဲ့ကြောင်း၊ ညှိနှိုင်း ဆောင်ရွက်မှု ရရှိသည်အထိ ရက်အကန့်အသတ်မရှိ ပြုလုပ်သွားမည်ဖြစ်ကြောင်း သိရသည်။ မြန်မာနိုင်ငံ ပညာရေးအသုံးစရိတ်ကို ယခင်နှစ် ၂၀၁၆-၂၀၁၇ ပညာသင်နှစ်အတွက် ဘီလျံ ၁၆၉၀ ရရှိခဲ့ပြီး ဘီလျံ ၁၀၀၀ ခန့်ကို ပညာရေးဝန်ထမ်းများအတွက် အသုံး ပြုခဲ့ကြောင်း၊ နိုင်ငံတစ်ဝန်းရှိ အခြေခံကျောင်းများမှစတင်ကာ တက္ကသိုလ်အဆင့်အထိ ကျောင်းသားဦးရေ ကိုးသန်းခန့်ရှိပြီး ၎င်းတို့ အတွက် ဘီလျံ ၆၉၀သာရရှိခဲ့ကြောင်း၊ ယခု နှစ် ၂၀၁၈ ခုနှစ်အတွက် ခြောက်လစာ ပညာရေး အသုံးစရိတ် ဘီလျံ ၈၀၀ကျော်ခန့်သာ အသုံးပြုခွင့်ရရှိထားကြောင်း သိရသည်။

နိုင်ငံတော် အကြည်ညိုပျက်စေမှုဖြင့် တရားစွဲဆိုထားသည့် မန္တလေး အမျိုးသားရေးသပိတ် ဦးဆောင်သံဃာနှင့် လူပုဂ္ဂိုလ်များအား ချမ်းမြသာစည်မြို့နယ် တရားရုံးတွင် (၁၇) ကြိမ်မြောက် ရုံးထုတ်စစ်ဆေး

နိုင်ငံတော် အကြည်ညိုပျက်စေမှုဖြင့် တရားစွဲဆိုထားသည့် မန္တလေး အမျိုးသားရေးသပိတ် ဦးဆောင်သံဃာနှင့် လူပုဂ္ဂိုလ်များအား ချမ်းမြသာစည်မြို့နယ် တရားရုံး၌် (၁၇) ကြိမ်မြောက်ရုံးထုတ်တွင် တွေ့ရစဉ်

အစိုးရအား ကန့်ကွက်ဆန္ဒပြသည့်  မန္တလေးအမျိုးသားရေးသပိတ် ဦးဆောင်သံဃာနှင့်လူပုဂ္ဂိုလ်များအား နိုင်ငံတော် အကြည်ညိုပျက်စေမှု ပုဒ်မ ၅၀၅(ခ) ဖြင့် ချမ်းမြသာစည်မြို့နယ် တရားရုံးတွင် စွဲဆိုထားရာ ဒီဇင်ဘာ၂၀ ရက်က (၁၇) ကြိမ်မြောက် ရုံးထုတ်စစ်ဆေးခဲ့ပြီး ဒီဇင်ဘာ၂၇ ရက်တွင် သံဃာတော်များအား အပြီးသတ် အမိန့်ချမည်ဖြစ်ကြောင်း သိရသည်။

“ဒီနေ့ရုံးချိန်မှာ သံဃာတော်ခြောက်ပါးကို စွဲဆိုထားတဲ့အမှုက တရားခံတွေကို စစ်ဆေးခဲ့ပြီးတဲ့နောက် အပြီးသတ် လျှောက်လဲချက် တစ်ခါတည်း ပေးခဲ့ပါတယ်။ ဒါကြောင့် ဒီဇင်ဘာ ၂၇ ရက်မှာ အပြီးသတ် အမိန့်ချမှတ်ပါမယ်။ ကိုကျော်မျိုးရွှေကို စွဲဆိုထားတဲ့ အမှုကတော့ စစ်ဆေးဆဲ ဖြစ်ပါတယ်” ဟု ချမ်းမြသာစည်မြို့နယ် တရားရုံး ပြန်ကြားရေး အရာရှိ တွဲဖက်မြို့နယ် တရားသူကြီး ဦးကျော်စွာလင်းက အမှုနှင့် ပတ်သက်၍ မီဒီယာများအား ရှင်းလင်းပြောကြားသည်။

သံဃာတော်များကို စွဲဆိုထားသည့်အမှုမှာ အပြီးသတ် အမိန့်ချမှတ်တော့မည် ဖြစ်သော်လည်း ကိုကျော်မျိုးရွှေ အမှုတွင်မူ တရားလိုသက်သေများကိုသာ စစ်ဆေးဆဲဖြစ်ကြောင်း သိရသည်။ ကိုကျော်မျိုးရွှေမှာ ၎င်းအား အချုပ်လွတ်ထုချေခွင့် အာမခံကို အထက်ရုံးသို့ တင်ပြလျှောက်ထားခဲ့ရာ လက်မခံဘဲ ပယ်ချခဲ့သောကြောင့် မူလမြို့နယ် တရားရုံးသို့ အမှုတွဲ ပြန်ရောက်မှသာ စစ်ဆေးရသဖြင့် ယင်းအမှုမှာ ကြန့်ကြာနေခြင်းဖြစ်သည်။

မန္တလေးမြို့ ချမ်းမြသာစည်မြို့နယ်၊ ကျွန်းလုံးဥသျှောင်ရပ်ကွက်၊ ဘုရားကြီး အနောက်ဘက်မုခ်ရှိ သာသနာ၂၅၀၀ ဗိမာန်တွင် ဖွင့်လှစ်ထားသည့် သပိတ်စခန်းအား သြဂုတ် ၅ ရက် နံနက်၂ နာရီ ၁၅ မိနစ်က တိုင်းဒေသကြီး အစိုးရလမ်းညွှန်မှုဖြင့် ပူးပေါင်းအဖွဲ့က ၀င်ရောက်ရှင်းလင်းရာ သံဃာ ၁၁ ပါးနှင့် အမျိုးသမီးနှစ်ဦးကို ထိန်းသိမ်းခဲ့ပြီး ဖမ်းဆီးရမိသည့် သံဃာ ၁၁ ပါးအနက် ခြောက်ပါးအား သြဂုတ် ၉ ရက်တွင် စတင်ရုံးထုတ် စစ်ဆေးခဲ့ခြင်းဖြစ်သည်။

သပိတ်စခန်း ဦးဆောင်သံဃာရှစ်ပါး (နှစ်ပါးမှာ ဖမ်းမိခြင်းမရှိသေး) အား ခရိုင်သာသနာရေး ဦးစီးမှူးက တရားလိုပြုလုပ် စွဲဆိုခဲ့သလို ဦးကျော်မျိုးရွှေ ပါဝင်သည့် လူပုဂ္ဂိုလ်ငါးဦးကိုလည်း မြို့နယ်ထွေအုပ်က တရားလိုပြုလုပ်၍ ပုဒ်မ ၅၀၅ (ခ) ဖြင့် အသီးသီး စွဲဆိုထားခြင်းဖြစ်သည်။

သြဂုတ် ၅ ရက် နံနက် ၂ နာရီ သပိတ်စခန်း ဖြိုခွဲစဉ်က ဖမ်းဆီးခံရပြီး လူဝတ်လဲကာ ပုဒ်မ ၅၀၅ (ခ)ဖြင့် အမှုဖွင့် ခံထားရသည့် သံဃာခြောက်ပါးမှာ ဦးအဂ္ဂဓဇ (၃၅ နှစ်၊ ၁၄ ၀ါ၊ သာသနာဝင်အမှတ် ၉/မထလ (သ) ၀၀၂၇၅၃ မိတ္ထီလာမြို့နယ် မဘသ အတွင်းရေးမှူး၊ အောင်သာကျောင်း၊ ၀န်ဇင်းရပ်၊ မိတ္ထီလာမြို့)၊ ဦးဝိဝေကာနန္ဒ (၂၉ နှစ်၊ ၁၀ ၀ါ၊ သာသနာဝင်အမှတ် ၇/ပခန (သ) ၀၁၁၁၁၄ မျိုးချစ်မြန်မာ ရဟန်းတော်များသမဂ္ဂ၊ ချမ်းသာကြီး ချမ်းရကျောင်း၊ တံခွန်တိုင်ရပ်၊ ပြည်ကြီးတံခွန်မြို့နယ်၊ မန္တလေးမြို့)၊ ဦးဣန္ဒက (၂၆ နှစ်၊ ငါးဝါ၊ သာသနာဝင် အမှတ် ၉/ခမစ (သ) ၀၀၄၇၄၅၊ မျိုးချစ်မြန်မာ ရဟန်းတော်များသမဂ္ဂ၊ ဓမ္မသုခကျောင်း၊ နှမ်းကြဲကျေးရွာ၊ ပုသိမ်ကြီးမြို့နယ်၊ မန္တလေးမြို့)၊ ဦးပဏ္ဍိတ (၄၈ နှစ်၊ ၂၈ ၀ါ၊ သာသနာဝင် အမှတ် ၉/ညဥန(သ) ၀၀၁၂၁၈၊ (မည်သည့် အဖွဲ့ဝင်မှမဟုတ်) ကြံခင်းဝန်ကျောင်း၊ ညောင်ဦးမြို့နယ်)၊ ဦးအာစာရ (၂၂ နှစ်၊ နှစ်ဝါ၊ သာ သနာဝင်အမှတ် ၉/ပကခ (သ) ၀၀၂၃၉၁၊ ဓမ္မသုခကျောင်း၊ နှမ်းကြဲကျေးရွာ ပုသိမ်ကြီးမြို့နယ်) နှင့် ဦးအရိယာဝံသ (၃၀ နှစ်၊ ၁၀ ၀ါ၊ သာသနာဝင်အမှတ် (မသိရသေး) မျိုးချစ်မြန်မာ ရဟန်းတော်များသမဂ္ဂ၊ ငါးဆူ ကျောင်းတိုက်၊ ပလိုင်းရပ်၊ ချမ်းအေးသာစံ မြို့နယ် မန္တလေးမြို့) တို့ဖြစ်ကာ သပိတ်စခန်း ဦးဆောင်သည့် သံဃာဖြစ်ပြီး လက်ရှိဖမ်းဆီး မခံရသေးသည့် နှစ်ပါးမှာ ဦးဣန္ဒောဘာသ (ရခိုင်ဘုန်းကြီး) (၄၅ နှစ်၊ ၁၆ ၀ါ၊ မျိုးချစ်မြန် မာရဟန်းတော်များသမဂ္ဂ၊ သာသနာဝင်အမှတ် ၉/ပကသ (သ) ၀၀၂၁၀၀၊ ဓမ္မသုခကျောင်း၊ နှမ်းကြဲကျေးရွာ၊ ပုသိမ်ကြီးမြို့နယ်၊ မန္တလေးမြို့) နှင့် ဦးစန္ဒာသီရိ (၄၁ နှစ်၊ ၂၀ ၀ါ၊ သာသနာဝင်အမှတ် ၉/မဟမ (သ) ၀၀၁၂၉၁၊ မျိုးချစ်မြန်မာ ရဟန်းတော်များသမဂ္ဂ ဓမ္မသုခကျောင်း၊ နှမ်းကြဲကျေးရွာ၊ ပုသိမ်ကြီးမြို့နယ်၊ မန္တလေးမြို့) တို့ဖြစ်သည်။

 

ပလိပ်မြို့ရှိ ပန်ဒါ ချည်မျှင်အထည်နှင့် အချောကိုင်စက်ရုံမှ အလုပ်သမားများ ၎င်းတို့၏ တောင်းဆိုချက်များ မရရှိသေးသဖြင့် မန္တလေးမြို့သို့ လာရောက်ဆန္ဒထုတ်ဖော်

ပုလိပ်မြို့ရှိ ပန်ဒါချည်မျှင်အထည်နှင့် အချောကိုင်စက်ရုံမှ ၀န်ထမ်းများ မန္တလေးမြို့သို့ လာရောက်ဆန္ဒထုတ်ဖော်နေစဉ်

မန္တလေးတိုင်းဒေသကြီး ကျောက်ဆည်ခရိုင် ပလိပ်မြို့မှ ပန်ဒါချည်မျှင် အထည်နှင့် အချောကိုင်စက်ရုံမှ အလုပ်သမားများသည် ဒီဇင်ဘာ ၁၇ ရက် နံနက်ပိုင်းက အဆိုပါစက်ရုံရှေ့မှ စတင်ကာ မန္တလေးမြို့အထိ လာရောက်၍ အလုပ်သမားများ တောင်းဆိုထားသည့် အချက် ၂၈ ချက်အား စက်ရုံနှင့် သက်ဆိုင်ရာ တိုင်းဒေသကြီး အစိုးရအဖွဲ့က လက်ရှိအချိန်အထိ ဖြေရှင်းဆောင်ရွက်ပေးခြင်း မရှိသေးသဖြင့် မန္တလေးမြို့ မဟာအောင်မြေမြို့နယ် အတွင်းရှိ မနော်ရမ္မံ ဟစ်တိုင်ကွင်းတွင် ဆန္ဒထုတ်ဖော်ခဲ့ကြသည်။

ဆန္ဒထုတ်ဖော်မှုကို အလုပ်သမားများက ပလိပ်မြို့ရှိ ပန်ဒါချည်မျှင်အထည်နှင့် အချောကိုင်စက်ရုံမှ စတင်ထွက်ခွာခဲ့ကြပြီး မန္တလေးမြို့ မဟာအောင်မြေမြို့နယ်အတွင်းရှိ  ၆၂ လမ်း၊ မနော်ရမ္မံ ဟစ်တိုင်ကွင်းအတွင်း စုဝေးဟောပြောခြင်း ကြွေးကြော်ခြင်းများဖြင့် ဆန္ဒထုတ်ဖော်ခဲ့ကြသည်။

“ကျွန်မတို့ တောင်းဆိုထားတဲ့ တောင်းဆိုချက် ၂၈ ချက်ကို လက်ရှိအချိန်အထိ စက်ရုံဘက်ကရော တိုင်းဒေသကြီး အစိုးရအဖွဲ့ ဘက်ကပါ လိုက်လျောပေးတာ ဖြေရှင်း ဆောင်ရွက်ပေးတာ မရှိသေးပါဘူး။ ကျွန်မတို့ အလုပ်သမားတွေ တောင်းဆိုထားတဲ့ တောင်း ဆိုချက် ၂၈ ချက်ကို စက်ရုံဘက်ကရောအလုပ် ရှင်၊ အလုပ်သမား ပြန်လည်စေ့စပ်ညှိနှိုင်း ရေးအဖွဲ့တွေ သက်ဆိုင်ရာအစိုးရ ဌာနဆိုင်ရာ အဖွဲ့တွေရဲ့ရှေ့မှာ နှစ်ဦးနှစ်ဖက် သဘောတူညီ လိုက်နာဆောင်ရွက်ပါမည်ဆိုပြီး သဘောတူညီမှု စာချုပ်လည်း ချုပ်ဆိုထားပါတယ်။ သူတို့ဘက်က စာချုပ်ပါအချက် အလက်တွေကို လိုက်နာဆောင်ရွက်ပါမယ် ဆိုလို့ စက်ရုံဘက်ကို အမှုဖွင့်တရားစွဲဆို ထားတာကိုလည်း ရုပ်သိမ်းပေးလိုက်ပါတယ်။ ဒါ ပေမဲ့ ကျွန်မတို့အလုပ်သမားတွေနဲ့ သဘော တူညီပြီးချုပ်ဆိုထားတဲ့ စာချုပ်ထဲက အချက် ၂၈ ချက်ကို အခုအချိန်အထိ မလိုက်လျောပေးသေးပါဘူး။ အလုပ်ကနေ ထုတ်ပယ်ထားသူ တွေကိုလည်း လုပ်ငန်းခွင် ပြန်ခန့်အပ်တာ မရှိသေးဘူး။ ဒါကြောင့် အခုလို မန္တလေးမြို့ကို လာရောက်ပြီးတော့ ဆန္ဒထုတ်ဖော်ရတာ ဖြစ်ပါတယ်။ အလုပ်သမားတွေရဲ့ တောင်းဆိုချက်တွေအားလုံး မရမချင်း ဆက်လက်တောင်းဆို သွားမှာပါ” ဟု အလုပ်သမား ခေါင်းဆောင်တစ်ဦးဖြစ်သူ မဇာခြည်ဝင်းက ပြောကြားသည်။

ပန်ဒါချည်မျှင်အထည်နှင့် အချောကိုင်စက်ရုံမှ အလုပ်သမားများက ဆန္ဒထုတ်ဖော်ရာတွင် လွှဲပြောင်းခံ နိုင်ငံ့ဝန်ထမ်းဟောင်းများ ဘ၀အာမခံချက် ရရှိရေး တို့အရေး၊ ၂၈ ချက်ပါ သဘောတူညီချက် စာချုပ်အား အပြည့်အ၀ အကောင်အထည် ဖော်ပေးရေး တို့အရေး၊ လုပ်ငန်းခွင် ၀င်ရောက်ရန် ကျန်အလုပ်အမှုဆောင် နှစ်ဦးအား ပြန်လည်ခန့်ထားပေးရေး တို့အရေး၊ အလုပ်သမားဥပဒေ စိုးမိုးရေး တို့အရေး၊ ဥပဒေအထက်၌ရှိသော အလုပ်ရှင်များ အလိုမရှိ၊ အလုပ်သမားများအရေး ထိရောက်စွာ ဆောင်ရွက်မပေးသော လူကြီးများ အလိုမရှိ အစရှိသည့် စာသားများ ပါဝင်သည် ဗွီနိုင်းဆိုင်းဘုတ်များ ကိုင်ဆောင်ကာ ကြွေးကြော်သံများဖြင့် ဆန္ဒထုတ်ဖော် ခဲ့ကြသည်။

 

အမေရိကန်သံရုံးရှေ့ ဆန္ဒပြမှုဖြင့် ဆရာတော်ဦးပါမောက္ခအား ပုဒ်မ ၅၀၅ (ခ) ဖြင့် တရားစွဲဆိုထားမှု ရုပ်သိမ်းပေးရန် လျှောက်ထားမှု ပယ်ချခံရ

ပုဒ်မ ၅၀၅ (ခ) ဖြင့် တရားစွဲဆို ခံထားရသော ဆရာတော်ဦးပါမောက္ခအား ဒီဇင်ဘာ ၁၂ ရက် စတုတ္ထအကြိမ် ရုံးထုတ်တွင် တွေ့ရစဉ်

အမေရိကန်သံရုံးရှေ့ ဆန္ဒပြမှုနှင့်ပတ်သက်၍ နိုင်ငံတော် အကြည်ညိုပျက်စေမှု ပုဒ်မ ၅၀၅ (ခ) ဖြင့် တရားစွဲဆို ခံထားရသော ဆရာတော်ဦးပါမောက္ခအား ဒီဇင်ဘာ ၁၂ ရက် နံနက်က စတုတ္ထအကြိမ် ရုံးထုတ်စစ်ဆေးခဲ့ကြောင်း သိရသည်။

ထိုနေ့ရုံးချိန်း၌ ဆရာတော်ဦးပါမောက္ခအား ပုဒ်မ ၅၀၅ (ခ) ဖြင့် တရားစွဲဆိုထားသည့် အမှုတွင် တရားလိုဖြစ်သူ ကမာရွတ်မြို့နယ် ဒုတိယအထွေထွေ အုပ်ချုပ်ရေးမှူး ဦးသန်းထွန်းအောင်မှာ လာရောက်ခြင်း မရှိသောကြောင့် အမှုကိုရုပ်သိမ်းပေးရန် လျှောက်ထားမှုကို တရားသူကြီးက စွဲဆိုထားသော ပုဒ်မ ၅၀၅ (ခ) သည် ထောင်ဒဏ် နှစ်နှစ်အထိ ချမှတ်နိုင်သော ပုဒ်မဖြစ်၍ အမှုရုပ်သိမ်းပေးရန် လျှောက်ထားမှုကို ပယ်ချခဲ့ကြောင်း သိရသည်။

ထို့ပြင် ဆရာတော် ဦးပါမောက္ခအား ပုဒ်မ ၅၀၅ (ခ) ဖြင့် တရားစွဲဆိုရန် ဦးတိုက်လျှောက်ထားမှုတွင် တရားလိုဘက်မှ လက်မှတ် မမှန်မကန် ဖြစ်သည်ဟုဆိုကာ ဦးတိုက်လျှောက်လွှာကို ရုပ်သိမ်း၍ ဆရာတော်ကို ပြန်လွှတ်ပေးရန် လျှောက်ထားမှုအား တရားသူကြီးက ကြားဖြတ်အမိန့်ချရန် အဆင့်သင့် မဖြစ်သေးသောကြောင့် အမိန်မချဖြစ်ဘဲ ဒီဇင်ဘာ ၂၁ ရက်သို့ ရုံးချိန်းပြန်လည် ချိန်းဆိုခဲ့ကြောင်း သိရသည်။

“ပြီးခဲ့တဲ့အပတ်က ချိန်းထားတဲ့ကိစ္စက တရားလို မလာတဲ့အတွက်ကြောင့်မို့ အမှုကို ပိတ်သိမ်းပေးဖို့ လျှောက်ထားတာကို ဆုံးဖြတ်တာက နှစ်နှစ်ထောင်ဒဏ်ရှိတဲ့ ပုဒ်မဖြစ်တာကြောင့် လျှောက်ထားချက် လွဲတယ်ဆိုပြီးတော့ သုံးသပ်ပြီးတော့ ပယ်ပါတယ်။ နောက်တစ်ခုက ဦးတိုက်လျှောက်ထားလွှာပေါ်မှာ လက်မှတ်မမှန်မကန် ဖြစ်မှုကြောင့် အမှုကို ပိတ်သိမ်းပြီးတော့ ဆရာတော်ကို ပြန်လွှတ်ပေးဖို့ ပြီးခဲ့တဲ့ ရုံးချိန်းတုန်းက လျှောက်လဲချက် ပေးခဲ့တယ်။ အဲဒီကိစ္စနဲ့ ပတ်သက်ပြီးတော့ အဆင်မပြေသေးတဲ့ အတွက်ကြောင့် လာမယ့်ရုံးချိန်းကျမှ ဆုံးဖြတ်ချက် ချပေးမယ်ဆိုပြီး ရုံးချိန်းကို ဒီဇင်ဘာ ၂၁ ရက်ကို ရုံးချိန်းပေးပါတယ်” ဟု ဦးပါမောက္ခအမှုအား ကူညီဆောင်ရွက်သူများအဖွဲ့ ပြန်ကြားရေး ဦးအောင်မြိုင်က မီဒီယာများ၏ မေးမြန်းမှုကို ဖြေကြားသည်။

၂၀၁၆ ခုနှစ် ဧပြီ ၂၈ ရက်က ကမာရွတ်မြို့နယ် တက္ကသိုလ်ရိပ်သာလမ်းပေါ်ရှိ အမေရိကန်သံရုံးရှေ့တွင် မြန်မာနိုင်ငံ၌ ရိုဟင်ဂျာ မရှိကြောင်း ဆန္ဒပြမှုနှင့် ပတ်သက်၍ မကွေးကျောင်းဆရာတော် ဦးပါမောက္ခအား ပုဒ်မ ၁၉၊ ပုဒ်မ ၅၀၅ (ခ) တို့ဖြင့် တရားစွဲဆို ထားခြင်းဖြစ်ပြီး နိုဝင်ဘာ ၂၁ ရက် ဒုတိယအကြိမ် ရုံးထုတ် စစ်ဆေးမှုတွင် ပုဒ်မ ၁၉ အပေါ် ၀န်ခံသဖြင့် ထောင်ဒဏ်တစ်လ ချမှတ်ခဲ့သည်။

ဆရာတော် ဦးပါမောက္ခအား အမေရိကန်သံရုံးရှေ့ ဆန္ဒပြမှုနှင့် ပတ်သက်၍ တရားစွဲဆိုကာ ဖမ်းဝရမ်း ထုတ်ပြန်ထားချိန် ဆရာတော်သည် မြောက်ဒဂုံမြို့မရဲစခန်းသို့ နိုဝင်ဘာ ၁၂ ရက်က သွားရောက်၍ အဆိုပါ မြို့နယ်အတွင်းရှိ မြေယာကိစ္စတစ်ခုကို ဆန္ဒပြရန် အကြောင်းကြားစာ သွားတင်ခဲ့ကြောင်း၊ ယင်းအချိန်မှာပင် ဆရာတော်အား ၀ရမ်းအရ မြောက်ဒဂုံမြို့မရဲစခန်းက ထိန်းသိမ်းခဲ့ပြီး ရန်ကုန်တိုင်းဒေသကြီး သံဃနာယကသို့ ခေါ်ဆောင်ခဲ့ကြောင်း၊ ရဟန်းသိက္ခာချရန်နှင့် လူဝတ်လဲရန် ဖိအားပေးခဲ့သော်လည်း သိက္ခာချခြင်းကို လက်မခံသဖြင့် လူဝတ်လဲ ဖမ်းဆီးခြင်းခံရပြီး တရားရင်ဆိုင်နေခြင်း ဖြစ်သည်။

ရွှေသံလွင် ဟိုင်းဝေးကုမ္ပဏီ၏ ကတိက၀တ်ပျက်ယွင်းမှု၊ ပြည်နယ်အစိုးရ၏ တာဝန်ယူ ညှိနှိုင်းဖြေရှင်းပေးမှု မရှိခြင်းကြောင့် အလုပ်မှ ရပ်စဲခံရသည့် စက္ကူစက်ရုံ (စစ်တောင်း) မှ ၀န်ထမ်းများ ဆန္ဒထုတ်ဖော်

ရွှေသံလွင်ဟိုင်းဝေးကုမ္ပဏီမှ ကတိက၀တ် ပျက်ယွင်းမှု၊ ပြည်နယ်အစိုးရမှ တာဝန်ယူညှိနှိုင်းဖြေရှင်းပေးခြင်း မရှိခြင်းကြောင့် လက်ရှိအလုပ်အကိုင်မှ ရပ်ဆိုင်းခံရသည့် စက္ကူစက်ရုံ (စစ်တောင်း) မှ ၀န်ထမ်း ၂၄၀ ခန့်က ဒီဇင်ဘာ ၉ ရက် နံနက် ၈ နာရီတွင် မွန်ပြည် နယ် ကျိုက်ထိုမြို့နယ် သိမ်ဇရပ်မြို့၌ ဆန္ဒထုတ်ဖော်ခဲ့ကြသည်။

“ဒီစက်ရုံက ရွှေသံလွင်ကုမ္ပဏီက လွှဲပြောင်းပြီးတော့ လုပ်ကိုင်တဲ့အချိန် အရင်အစိုးရ လက်ထက်ကစပြီးတော့ ကတိက၀တ်တွေ အများကြီး ကျွန်တော်တို့ဝန်ထမ်းတွေကို ပေးခဲ့ပြီးမှ ကျွန်တော်တို့ နိုင်ငံ့ဝန်ထမ်းကနေ ကုမ္ပဏီဝန်ထမ်း ဖြစ်ခဲ့ရတယ်။ ကုမ္ပဏီက လည်း ဘာတွေပြောခဲ့လဲဆိုလို့ရှိရင် သူတို့ ကုမ္ပဏီမှာ စစ်တောင်းစက္ကူစက်က ၀န်ထမ်းတွေ အလုပ်ကို စဉ်ဆက်မပြတ် လုပ်ခွင့်ရမယ်။ နောက်ဆုံး ဘယ်လိုပြောခဲ့လဲဆိုရင် အသက် ၆၀ ပြည့်တဲ့အထိကို တာဝန်ထမ်းဆောင်ခွင့်ရမယ်။ နောက်ပြီးတော့ သူတို့ကုမ္ပဏီကြောင့် ဒီက၀န်ထမ်းတွေ နစ်နာသွားတာ။ အလုပ်ပြုတ်သွားတာ။ ဒုက္ခရောက်သွားတာ မဖြစ်စေရဘူးလို့ ပြောခဲ့ပါတယ်။ အခု ကျွန်တော်တို့ ဆန္ဒထုတ်ဖော်တာကလည်း အဲဒီ ကတိက၀တ်တွေကို ပြောခဲ့ပြီးမှ အမှတ်မထင် လစာတွေ ရပ်ဆိုင်းတယ်။ ဥပဒေအတိုင်း နစ်နာကြေးကိုပေးပြီး လစာတွေ ရပ်ဆိုင်းမယ်ဆိုပြီး လုပ်တော့ ဒီကိစ္စအပေါ် ကျွန်တော်တို့ ၀န်ထမ်းထုက ကျေလည်မှုမရှိဘူး။ ဒါကြောင့် ကျွန်တော်တို့က ဆန္ဒထုတ်ဖော်ရတာ ဖြစ်ပါတယ်” ဟု ယခင် စက္ကူစက် (စစ်တောင်း) တွင် အလုပ်ရုံ စိတ်မှူးအဖြစ် တာဝန်ထမ်းဆောင်ခဲ့သူ ဦးဆန်းဝင်းက ပြောကြားသည်။

“ကျွန်တော်တို့ ဖြစ်ချင်တဲ့ဆန္ဒကတော့ အခု ကုမ္ပဏီဘက်ကပေးတဲ့ နစ်နာကြေးဆိုတာကို လက်မခံနိုင်ဘူး။ ကျွန်တော်တို့ကို ကုမ္ပဏီက ကတိက၀တ်ပြုထားခဲ့တဲ့အတိုင်း လုပ်ငန်းတစ်ခု အကောင်အထည်မဖော်မချင်း လစာခံစားခွင့် ပေးထားရမယ်။ ဒါလေးတွေ ကျွန်တော်တို့ ပြောထားတာရှိပါတယ်။ မွန်ပြည်နယ် အစိုးရအနေနဲ့ကလည်း ဒီစစ်တောင်း စက္ကူစက်မှာ လုပ်ငန်းတစ်ခု အမြန်ဆုံး အကောင်အထည်ဖော်ပေးဖို့ဆန္ဒ ကျွန်တော်တို့မှာ ရှိပါတယ်။ ဒါမှလည်း ဒီဒေသမှာ အလုပ်အကိုင်အခွင့်အလမ်းတွေ ပြန်ပေါ်လာမယ်။  ဒါမှလည်း ဒီဒေသမှာ တစ်ဦးချင်းဝင်ငွေတွေ ရှိလာမယ်ပြီးတော့ မိသားစုဘ၀တွေရဲ့ ရှေ့ရေးရပ်တည်လို့ရသွားမှာ ဖြစ်ပါတယ်” ဟု ဦးဆန်းဝင်းက ဆက်လက်ပြောကြားသည်။

“ရွှေသံလွင်ကုမ္ပဏီက နိုဝင်ဘာ ၂၉ ရက်မှာ နို့တစ်စာသုံးစောင် ကပ်ပြီးတော့ နိုဝင်ဘာ ၃၀ ရက်မှာ နောက်ဆုံးလစာအဖြစ် သတ်မှတ်ပြီးတော့ နစ်နာကြေးအဖြစ် သုံးလစာ ပေးပြီးတော့ အလုပ်ကနေ ရပ်ဆိုင်းခိုင်းပါတယ်။ ကျွန်မတို့က ကုမ္ပဏီဝန်ထမ်း စစ်စစ် မဟုတ်ဘူး။ ရွှေသံလွင်ကုမ္ပဏီမှာ တိုက်ရိုက် အလုပ်လျှောက်ပြီးတော့ အလုပ်ဝင်လာတဲ့ ကုမ္ပဏီဝန်ထမ်းစစ်စစ် မဟုတ်ဘူး။ အစိုးရ၀န်ထမ်းဘ၀ကနေပြီးတော့ ရွှေသံလွင်ကုမ္ပဏီကို အသွင်ပြောင်းဝန်ထမ်းအဖြစ် ကူးပြောင်းခဲ့ရတဲ့ ၀န်ထမ်းတွေဖြစ်တဲ့အတွက် ဒါကို နစ်နာကြေး ငါးလစာပေးပြီး အလုပ်ထုတ်တာကို ကျွန်မတို့က လက်မခံနိုင်ဘူး။ ဒါပေမဲ့ လက်ရှိ ကျွန်မတို့ဝန်ထမ်းတွေမှာ နို့တစ်ကြေး တစ်လစာဆိုပြီးတာ့ အချိန်တစ်လ ရှိသေးတယ်။ ကျွန်မတို့ ဒီအချိန် တစ်လအတွင်းမှာ ၀န်ထမ်းတွေ အဆင်ပြေအောင် လှုပ်ရှားသွားမှာဖြစ်ပါတယ်” ဟု ယခင်စက်ရုံမန်နေဂျာအဖြစ် တာဝန်ထမ်းဆောင်ခဲ့သူ ဒေါ်စုစုလှိုင်က ပြောကြားသည်။

“လက်ရှိမှာ ၀န်ထမ်းတွေက အလုပ်ရပ်ဆိုင်းသွားပြီဆိုတော့ နောက်လကစပြီး ၀န်ထမ်းအားလုံးက ကစင့်ကလျားဖြစ်ကုန်မယ်။ ကျွန်မတို့မှာက တစ်ဦးတစ်ယောက်တည်းရဲ့ ဘ၀ရပ်တည်မှု မဟုတ်ဘူး။ စက်ရုံဝန်ထမ်း ၄၇၃ ယောက်နဲ့ နောက်မှာ မိသားစုကလည်း ရှိသေးတယ်။ အခု ပြည်နယ်အစိုးရက ဒီစက်ရုံကို ပြန်လက်ခံလိုက်တယ်ဆိုတဲ့အတွက် ပြည်နယ်အစိုးရမှာ တာဝန်လုံးလုံးလျားလျား ရှိပါတယ်။ သူတို့အနေနဲ့ကလည်း တာဝန်ယူ ဖြေရှင်းပေးရမှာဖြစ်ပါတယ်။ ပြည်နယ်အစိုးရကနေ ဒီစက်ရုံ ထိန်းသိမ်းကြပ်မတ်ဖို့အတွက် ကော်မတီတစ်ခု ဖွဲ့ပေးခဲ့တယ်ဆိုပေမယ့် ကျွန်မတို့ ၀န်ထမ်းတွေ မသိရဘူး။ ၀န်ထမ်းတွေနဲ့လည်း ဘာမှဆွေးနွေးတာတွေမရှိဘူး။ သူတို့ဟာသူတို့ စက်ရုံအနေအထားကိုကြည့်သွားတာပဲ ရှိတယ်။ ကျွန်မတို့ဝန်ထမ်းတွေနဲ့ ဆွေးနွေးခြင်း၊ ညှိနှိုင်းခြင်း ဘာမှမရှိပါဘူး”  ဟု ဒေါ်စုစုလှိုင်က ဆက်လက်ပြောကြားသည်။

အဆိုပါစက္ကူစက်ရုံ (စစ်တောင်း) မှ ၀န်ထမ်းများက ဆန္ဒထုတ်ဖော်မှုကို စက်ရုံအ၀င်ဝ ဂိတ်ရှေ့မှ သိမ်ဇရပ်မြိ့ န၀ရတ်ရပ်ကွက်ရှိ ပြည်သူ့အားကစားဝင်းအထိ ‘ဒေသ အလုပ်အကိုင်ရရှိရေး ဒို့အရေး၊ အိမ်ရာနေထိုင်မှု ခိုင်မြဲရေးဒို့အရေး၊ လစာမပြတ်ရရှိရေး ဒို့အ ရေး၊ ပြည်နယ်အစိုးရအဖွဲ့မှ ညှိနှိုင်းပေးရေး ဒို့အရေး၊ ရွှေသံလွင်ကုမ္ပဏီ၏ ပျက်ကွက်မှုအား အရေးယူပေးရေး ဒို့အရေး’ စသည့်ကြွေးကြော်သံများ ကြွေးကြော်ကာ လမ်းလျှောက်ချီတက် ဆန္ဒထုတ်ဖော်ခဲ့ကြသည်။

 

ဟောင်ကောင်တွင် အာဏာရှင်စနစ် ဆန့်ကျင်ရေး ချီတက်ဆန္ဒပြမှုအား တက်ကြွလှုပ်ရှားသူ ဂျိုရှာဝေါင် ဦးဆောင်

ဒီဇင်ဘာ ၃ ရက်က ဟောင်ကောင်တွင် ဆန္ဒပြမှု၌ ဦးဆောင်နေသည့် ဂျိုရှာဝေါင်(လယ်) (photo – AFP)

ဟောင်ကောင်တွင် အာဏာရှင်စနစ်အား ဆန့်ကျင်သည့် ဆန္ဒပြမှုဟု သတ်မှတ်သော ဒီဇင်ဘာ ၃ ရက်က ချီတက်ဆန္ဒပြမှုကို တက်ကြွလှုပ်ရှားသူ ဂျိုရှာဝေါင်အပါအ၀င် ထင်ရှားသော ဒီမိုကရေစီ တက်ကြွလှုပ်ရှားသူအချို့ ဦးဆောင်ခဲ့ပြီး လူ ၁၀၀၀ ခန့် ပါဝင်ခဲ့ကြသည်။

တရုတ်၏ အထူးကိုယ်ပိုင်အုပ်ချုပ်ရဒေသ ဟောင်ကောင်တွင် တရုတ်၏ ဖိအားပေးမှု မြင့်တက်လာစဉ် အခွင့်အရေးများနှင့် လွတ်လပ်ခွင့်များ ဆုံးရှုံးနိုင်သည့် အန္တရာယ်ကြုံတွေ့နေရသည်ဟု တက်ကြွလှုပ်ရှားသူများက ပြောကြားခဲ့သည်။ တရားရုံး၌ ကြားနာမှုများအပြီး တက်ကြွလှုပ်ရှားသူများ ထောင်ဒဏ်ချမှတ်ခံခဲ့ရပြီး ဟောင်ကောင်တွင် အဖျက်အမှောင့်လုပ်ရပ်များ ဆန့်ကျင်သည့် ဥပဒေတစ်ရပ် ပြဋ္ဌာန်းမည်ကိုလည်း ၎င်းတို့က စိုးရိမ်နေသည်။

၂၀၁၄ ခုနှစ်က ထင်ရှားသော ဒီမိုကရေစီလိုလားသည့် ထီးလှုပ်ရှားမှုတွင် ပါဝင်ခဲ့မှုအတွက် အသက် ၂၁ နှစ်ရှိ ဝေါင်သည် ပြီးခဲ့သောသြဂုတ်တွင် ထောင်ဒဏ်ချမှတ်ခံခဲ့ရပြီး ၎င်းက အယူခံဝင်ထားစဉ် အာမခံဖြင့် လွတ်မြောက်နေသည်။ ဝေါင်သည် နောက်ထပ် ဆန္ဒပြမှုတစ်ခုနှင့် ဆက်နွှယ်၍ ဒီဇင်ဘာ ၇ ရက်တွင် ပြစ်ဒဏ်ချမှတ်ခံရမည်ဖြစ်ပြီး ပိုမိုပြင်းထန်သော ထောင်ဒဏ်ချမှတ်ခံရနိုင်ကြောင်း သိရသည်။

မည်သူမျှ ထောင်ဒဏ်ကျခံလိုခြင်းမရှိကြောင်း၊ (သို့သော်) အကယ်၍ ယင်းက ဟောင်ကောင်တွင် တရားစီရင်ရေးနှင့် ဒီမိုကရေစီတို့အား ပို၍ဂရုတစိုက်ရှိလာစေရန် လူများအား လှုံ့ဆော်နိုင်ပါက ယင်းသည် တန်ဖိုးရှိပြီး ၎င်းက ပေးဆပ်သွားမည်ဖြစ်ကြောင်း ဝေါင်က ပြောကြားခဲ့သည်။

ဆန္ဒပြသူများက ‘ဟောင်ကောင်၏ စိတ်ဓာတ်သည် မည်သည့်အခါမျှ အကျဉ်းချခံထားရမည်မဟုတ်’ နှင့် ‘ကြံ့ကြံ့ခံတော်လှန်သူများနှင့် အတူယှဉ်တွဲပြီး အာဏာရှင် အုပ်ချုပ်မှုအား တိုက်ဖျက်ကြ’ ဟု ရေးထားသည့် စာတန်းများအား ကိုင်ဆောင်ခဲ့ကြသည်။ ဆန္ဒပြသူအချို့ကမူ ဟောင်ကောင်ခေါင်းဆောင်များ၏ ရုပ်ပြောင်များကို ကိုင်ဆောင်ခဲ့ကြသည်။

ဆန္ဒပြသူအချို့ကလည်း အသံသွင်းထားသော တရုတ်အမျိုးသားသီချင်းအား ဖွင့်ပြခဲ့ပြီး ‘အမျိုးသားသီချင်းသံအားကြားလျှင် အစာစားမှုအားရပ်၍ ချက်ချင်းထရပ်ကြ’ ဟု ရေးထားသည့် အရုပ်တစ်ရုပ်ကိုလည်း ကိုင်ဆောင်ခဲ့ကြသည်။ တရုတ်အမျိုးသား သီချင်းအား မလေးမစားလုပ်သူများအား အပြစ်ပေးရန်ပေကျင်းတွင် ပြဋ္ဌာန်းခဲ့သည့် ဥပဒေသစ်တစ်ရပ်သည် ဟောင်ကောင်တွင်လည်း အကျုံးဝင်မည်ဖြစ်ကြောင်း သိရသည်။

ဆန္ဒပြမှုတွင် ပူးပေါင်းပါဝင်ခဲ့သည့် အသက် ၂၀ အရွယ် ကျောင်းသား ကယ်လ်ဗင်မက်က သူသည် နောင်တွင် ယင်းကဲ့သို့ ဆန္ဒပြနိုင်သည့်အခွင့်အရေးများ တဖြည်းဖြည်း ပျောက်ဆုံးသွားမည်ကို စိုးရိမ်သဖြင့် ယခုကဲ့သို့ ပါဝင်ခဲ့ခြင်းဖြစ်ကြောင်း ပြောကြားခဲ့သည်။ အနည်းဆုံးအနေဖြင့် ၎င်းတို့ရရှိနေသည့် လွတ်လပ်ခွင့်များအား ကြံ့ကြံ့ခံသည့် နောက်ဆုံးနေရာတစ်ခု ဖြစ်လိုသောကြောင့် ၎င်းတို့သည် ဆန္ဒပြမှုများကို တိုးမြှင့်ပြုလုပ်နေရခြင်းဖြစ်ကြောင်း ၎င်းက ပြောကြားခဲ့သည်။

ဗြိတိန်က ဟောင်ကောင်အား ၁၉၉၇ တွင် တရုတ်ထံလွှဲပေးခဲ့ပြီးနောက် တစ်နိုင်ငံ စနစ်နှစ်မျိုးအရ ပြည်မကြီးတွင်မရနိုင်သော လွတ်လပ်ခွင့်များအား ဟောင်ကောင်၌ ခံစားခွင့်များရရှိထားသည်။

Ref ; AFP

၂၀၀၈ ဖွဲ့စည်းပုံအခြေခံဥပဒေ ဖျက်သိမ်းပေးရန် ဆန္ဒထုတ်ဖော်မှုကြောင့် တရားစွဲခံထားရသူက ရန်ကုန်မြို့ မြို့နယ် ၁၁ ခုတွင် ဆန္ဒမထုတ်ဖော်ရန် တားမြစ်ခြင်းသည် ဒီမိုကရေစီမဟုတ်ဟု ဝေဖန်

၂၀၀၈ ဖွဲ့စည်းပုံအခြေခံဥပဒေ အမြန်ဆုံးဖျက်သိမ်းပေးရန် တစ်ကိုယ်တော်ဆန္ဒထုတ်ဖော်မှုကို အောက်တိုဘာ ၃၀ ရက်က ပြုလုပ်စဉ်

၂၀၀၈ ဖွဲ့စည်းပုံအခြေခံဥပဒေကို အမြန်ဆုံး ဖျက်သိမ်းပေးရန် တစ်ကိုယ်တော် ဆန္ဒထုတ်ဖော်မှုနှင့်ပတ်သက်၍ ငြိမ်း၊ စု၊ စီ ဥပဒေ ပုဒ်မ ၁၉ ဖြင့် တရားစွဲခံထားရသူ ဦးမိုးသူက ဆန္ဒထုတ်ဖော်ခွင့်ပိတ်ပင်ခြင်းသည် ဒီမိုကရေစီ မဟုတ်ကြောင်း နိုဝင်ဘာ ၂၁ ရက်က ၎င်း၏ရုံးချိန်းတွင် ပြောကြားသည်။

ရန်ကုန်တိုင်းအစိုးရက မြို့နယ် ၁၁ မြို့ နယ်တွင် ဆန္ဒထုတ်ဖော်မည့်သူများကို တာမွေဟစ်တိုင်တွင်သာ ဆန္ဒထုတ်ဖော်ရန် နိုဝင် ဘာ ၇ ရက်က သက်ဆိုင်ရာမြို့နယ်များသို့ အကြောင်းကြားစာ ပေးပို့ခဲ့ခြင်းနှင့် ပတ်သက်၍ ဦးမိုးသူက ထိုကဲ့သို့ ဝေဖန်ခဲ့ခြင်းဖြစ်သည်။

“လွှတ်တော်ထဲမှာရှိနေတဲ့ လွှတ်တော်ဥက္ကဋ္ဌကြီး ဦးဝင်းမြင့်ပြောခဲ့တဲ့ စကား ငြိမ်း၊ စု၊ စီ ပုဒ်မနဲ့ပတ်သက်ပြီးတော့မှပေါ့နော်။ ဥပဒေပြဋ္ဌာန်းထားတာလေးက ရှိတယ်။ အဲဒါ ဘာလဲဆိုတော့ တက်ကြွ လှုပ်ရှားသူတွေ နိုင်ငံရေးသမားတွေ၊ ပြည်သူတွေ အကြောင်းကြားစာလေးပို့ရုံနဲ့ ဆန္ဒပြပိုင်ခွင့်ရှိတယ်လို့ပြောတယ်။ အခုမကြာသေးခင်က ဆန္ဒပြပိုင်ခွင့် မရှိတော့ဘူးတဲ့။ ကျွန်တော်တို့က ဘယ်ဥပဒေကို ယုံရတော့မှာလဲ” ဟု ဦးမိုးသူက ရုံးထုတ်စဉ် ပြောကြားသည်။

ဆန္ဒထုတ်ဖော်သူများအနေဖြင့် အများ ပြည်သူ သိရှိစေရန်ပြုလုပ်ခြင်းဖြစ်ပြီး မည်သူမျှမရှိသည့်နေရာတွင် ဆန္ဒထုတ်ဖော်ရန် စီစဉ်မည်မဟုတ်ကြောင်း၊ ဒီမိုကရေစီအစိုးရအနေဖြင့် အခြေခံ စံချိန်စံညွှန်းများနှင့်အညီ လုပ်ကိုင်ဆောင်ရွက်သင့်ကြောင်း ၎င်းက ဆက်လက်ပြောကြားသည်။

“ဒီမိုကရေစီ စံချိန်စံညွန်းနဲ့မညီတဲ့ အလုပ်တွေမလုပ်ပါနဲ့။ ဟိုနားမှာဆန္ဒမပြနဲ့ ဒီနားမှာဆန္ဒမပြနဲ့ ဟစ်တိုင်မှာသွားပြ။ အုတ်နံရံ လေးဖက်လေးတန်ကြားထဲမှာ ဆန္ဒသွားပြနေလို့ ပြည်သူက သိမှာမဟုတ်ဘူး။ လမ်းပေါ်ထွက်ပြီး ဆန္ဒပြနေတယ်ဆိုတာ ပြည်သူသိအောင် ပြည်သူမြင်အောင် လမ်းပေါ်ထွက်ပြီး ဆန္ဒပြနေတာကဖြစ်ပါတယ်” ဟု ဦးမိုးသူက ပြောကြားသည်။

၂၀၀၈ ဖွဲ့စည်းပုံအခြေခံဥပဒေကို အမြန်ဆုံးဖျက်သိမ်းပေးရန် တစ်ကိုယ်တော်ဆန္ဒ ထုတ်ဖော်ခဲ့သည့် ဦးမိုးသူအား နိုဝင်ဘာ ၁၄ ရက်တွင် ပန်းဘဲတန်းမြို့နယ်တရားရုံး၌ ပန်းဘဲတန်းမြို့နယ်ရဲတပ်ဖွဲ့ မြို့နယ်မှူးက တရားလိုပြုလုပ်ကာ ပုဒ်မ ၁၉ ဖြင့် စတင်တရားစွဲဆိုခဲ့ကြောင်း သိရသည်။

“ဖွဲ့စည်းပုံဖျက်သိမ်းပေးပါဆိုတာ ကျွန်တော်တစ်ယောက်တည်းပြောတာ မဟုတ်ဘူး။ ပြည်သူတစ်ရပ်လုံးက ပြောတဲ့အသံပါ”  ဟု ဦးမိုးသူက ဆက်လက်ပြောကြားသည်။

ပြီးခဲ့သည့် အောက်တိုဘာ ၃၀ ရက်က တစ်ကိုယ်တော်ဆန္ဒထုတ်ဖော်ခဲ့သူ ဦးမိုးသူသည် ၂၀၀၈ ဖွဲ့စည်းပုံအခြေခံဥပဒေကို အမြန်ဆုံးဖျက်သိမ်းပေးရန် တစ်ကိုယ်တော် ဆန္ဒထုတ်ဖော်မှုကို သိမ်ကြီးဈေးမှ မဟာဗန္ဓုလ လမ်းအတိုင်း မြို့တော်ခန်းမရှေ့သို့ ချီတက်လမ်းလျှောက်ဆန္ဒထုတ်ဖော်ခဲ့သည်။

၂၀၀၈ ဖွဲ့စည်းပုံအခြေခံဥပဒေကို အမြန်ဆုံးဖျက်သိမ်းပေးရန် တစ်ကိုယ်တော် ဆန္ဒထုတ်ဖော်မှုကို ဦးမိုးသူအနေဖြင့် သက်ဆိုင်ရာတာဝန်ရှိသူများကို အသိပေးအကြောင်း မကြားခဲ့ကြောင်း သိရသည်။

မအူပင်မြို့ မလက်တိုကျေးရွာအုပ်စုမှ ဒေသခံအင်အား ၆၀၀ ခန့်က ကျေးရွာအုပ်ချုပ်ရေးမှူးအား တရားစွဲဆိုထားသည့် အော့ချက်ကုမ္ပဏီအား အလိုမရှိကြောင်း ဆန္ဒထုတ်ဖော်

မအူပင်မြို့တွင် နိုဝင်ဘာလ ၂၁ ရက် (ယနေ့) နံနက် ၁၀ နာရီခန့်က မလက်တိုကျေးရွာအုပ်စုရှိ ကျေးရွာ ၁၅ ရွာမှ ဒေသခံပြည်သူ အင်အား ၆၀၀ ခန့်က ကျေးရွာအုပ်ချုပ်ရေးမှူးဖြစ်သူအား တရားစွဲဆိုထားသည့် အော့ချက်ကုမ္ပဏီအား အလိုမရှိကြောင်းနှင့် ဒေသတွင်း ဖြစ်ပွါးနေသည့် မြေယာပြသနာများကို တိုင်းဒေသကြီးအစိုးရနှင့် နိုင်ငံတော်သမ္မတမှ ဖြေရှင်းဆောင်ရွက်ပေးစေလိုကြောင်း ဆန္ဒထုတ်ဖော်မှုတစ်ခုကို ပြုလုပ်ခဲ့ကြကြောင်း သတင်းရရှိသည်။

အော့ချက်ကုမ္ပဏီမှ မလက်တိုကျေးရွာအုပ်စုအတွင်း ငါးမွေးမြူရေးလုပ်ငန်းများ လုပ်ဆောင်ရန်အတွက်ဟုဆိုကာ မြေယာများစွာကို ရယူထားကြောင်း၊ မြေယာပိုင်ဆိုင်မှု အငြင်းပွါးမှု ပြသနာများကြောင့် လွန်ခဲ့သော ငါးနှစ်ခန့်က ဒေသခံများနှင့် ကုမ္ပဏီအကြား ပဋိပက္ခများဖြစ်ပွါးခဲ့သေးပြီး ထိုအချိန်က ရဲတပ်ဖွဲ့ဝင်တစ်ဦး သေဆုံးခဲ့သေးကြောင်း၊ ယင်းမြေနေရာအငြင်းပွါးနေသည့် နေရာတွင် အော့ချက်ကုမ္ပဏီမှ လုပ်ငန်းများ ဆက်လက်ဆောင်ရွက်နေမှုကို မလက်တိုကျေးရွာ အုပ်ချုပ်ရေးမှူးဖြစ်သူ ဦးလှကြိုင်မှ ပဋိပက္ခများဆက်လက်မဖြစ်ပွါးစေရေးအတွက် တားမြစ်ခဲ့သည်ကို အော့ချက်ကုမ္ပဏီမှ လုပ်ငန်းများအကောင်ထည်ဖော် ဆောင်ရွက်နေမှုကို နှောင့်ယှက်မှုများ ပြုသည်ဟုဆိုကာ၂၀၁၇ ခုနှစ် အောက်တိုဘာလ ၂၃ ရက်နေ့က ပုဒ်မ ၂၈ ဖြင့် တရားစွဲဆိုခဲ့ကြောင်း၊ ယင်းကဲ့သို့ ကုမ္ပဏီမှ တရားစွဲဆိုခဲ့မှုကို မကျေနပ်သောကြောင့် ဒေသခံပြည်သူများမှ ယခုကဲ့သို့ ဆန္ဒထုတ်ဖော်ရခြင်းဖြစ်ကြောင်း၊ ဆန္ဒထုတ်ဖော်သူများသည့် မအူပင်မြို့ မဟာဗောဓိဘုရားကြီးရှေ့တွင် စတင်စုဝေးကာ ကမ်းနားလမ်းတလျှောက် ဒေသခံပြည်သူများကို အကျိုးမပြုသော အော့ချက်ကုမ္ပဏီ အလိုမရှိ၊ မလက်တိုကျေးရွာအုပ်ချုပ်ရေးမှူးကို တရားစွဲဆိုထားသော ဒေါက်တာမြင့်စိန် အလိုမရှိ၊ မြေသိမ်း အော့ချက်ကုမ္ပဏီ အရေးယူပေး၊ တရားမျှတမှု ပေါ်ပေါက်ရေး၊ တရားစွဲဆိုခံထားရသည့် ဦးကြိုင်ကိစ္စ ဖြေရှင်းပေးရေး ဒို့အရေး စသည့်ကြွေးကြော်သံများ ဟစ်ကြွေးကာ နိုင်ငံတော်သမ္မတကြီး အနေဖြင့် မြေသိမ်း အော့ချက်ကုမ္ပဏီကိစ္စ စုံစမ်းစစ်ဆေးပေးပါ။ တိုင်းဒေသကြီးဝန်ကြီးချုပ်အနေဖြင့် တရားမျှတမှုကို ဖော်ဆောင်ပေးပါ၊ အော့ချက်ကုမ္ပဏီသည် အမိနှင့်အဖ မဟုတ် ပြည်သူသာ အမိ ပြည်သူသာ အဖဖြစ်သည်၊ ပြည်သူ့ဆန္ဒဖြင့် ရွေးချယ်ထားသည့် မလက်တိုကျေးရွာအုပ်စု အုပ်ချုပ်ရေးမှူးအား တရားစွဲဆိုထားမှုကို တိုင်းဒေသကြီး ဝန်ကြီးချုပ်မှ ပြန်လည်စိစစ်ပေးပါ စသည့် ဆိုင်းဘုတ်များ ကိုင်ဆောင်ကာ ဆန္ဒထုတ်ဖော်ခဲ့ကြကြောင်း သိရသည်။

“ရည်ရွယ်ချက်ကတော့ဗျာ ကျွန်တော်ကျေးရွာအုပ်ချုပ်ရေးမှူးက အော့ချက်ကုမ္ပဏီက အဆောက်အဦးတွေ ဆောက်နေတာကို အရင်လို ပဋိပက္ခဖြစ်မှာဆိုးလို့ သွားတားတယ် ဒါကို တရားစွဲဆိုတယ် ဒါ့ကြောင့်မို့ ကျွန်တော်တို့က ဒီလိုတရားစွဲဆိုတာကို အလိုမရှိကြောင်း အခုဖြစ်နေတဲ့ မြေသိမ်းပြသနာတွေကို နိုင်ငံတော်သမ္မတကြီးဖြေရှင်းပေးဖို့ရယ်တောင်းဆိုတာပါ အော့ချက်က လုပ်ဆောင်နေပါတယ်ဆိုတဲ့ မွေးမြူရေးလုပ်ငန်းကလည်း လုပ်ငန်းပျက်ကြီးဖြစ်နေပါပြီ”ဟု ဆန္ဒထုတ်ဖော်ရာတွင် ပါဝင်ခဲ့သည့် ဒေသခံတစ်ဦးဖြစ်သူ ဦးငြိမ်းမောင်ကပြောသည်။

အော့ချက်ကုမ္ပဏီမှလည်း လက်ရှိလုပ်ငန်းများလုပ်ဆောင်နေသည့် မြေနေရာများမှ ဒေသခံတောင်သူများအား နစ်နာကြေးများ ပေးကာ ဝယ်ယူလုပ်ဆောင်ထားသည့် မြေနေရာများသာဖြစ်ကြောင်း သတင်းစာရှင်းလင်းပွဲများ ပြုလုပ်ကာ ပြောကြားထားမှုများလည်း ရှိသည်။

မင်းသူဝင်းထွဋ်

အမေရိကန်သံရုံးရှေ့ ဆန္ဒပြမှုနှင့် ပတ်သက်၍ ဆရာတော်ဦးပါမောက္ခအား ပုဒ်မ ၁၉ ဖြင့် ထောင်ဒဏ်တစ်လချမှတ်ခဲ့ပြီး ပုဒ်မ ၅၀၅ (ခ) အမှုတွင် တရားလိုပြသက်သေအား စတင်စစ်ဆေး

အမေရိကန်သံရုံးရှေ့ ဆန္ဒပြမှုနှင့်ပတ်သက်၍ တရားစွဲခံထားရသည့် မကွေးကျောင်းဆရာတော်ဦးပါမောက္ခအား ကမာရွတ်မြို့နယ်တရားရုံး ရုံးချိန်းတွင် တွေ့ရစဉ် (ဓာတ်ပုံ-ကြည်နိုင်)

အမေရိကန်သံရုံးရှေ့ ဆန္ဒပြမှု နှင့် ပတ်သတ်၍ တရားစွဲခံထားရ သည့် မကွေးကျောင်းဆရာတော်ဦး ပါမောက္ခအား ကမာရွတ်မြို့နယ် တရားရုံးတွင် နိုဝင်ဘာ ၂၁ ရက်၊ နံနက် ၁၀ နာရီ ၃၀ မိနစ်ခန့်က ဒုတိယအကြိမ် ရုံးထုတ်ခဲ့ကြောင်း သိရသည်။

အဆိုပါရုံးချိန်း၌ ဆရာတော် ဦးပါမောက္ခအား တရားစွဲဆိုထား သည့် ပုဒ်မ-၅၀၅(ခ)နှင့် ပုဒ်မ-၁၉ အားစစ်ဆေးခဲ့ရာ ပုဒ်မ-၁၉ အတွက် ဆရာတော်မှဝန်ခံခဲ့သည့် အတွက် ထောင်ဒဏ်တစ်လချ မှတ် ခဲ့ပြီး ပုဒ်မ-၅၀၅(ခ) အမှုတွင်တရား လိုပြသက်သေစတင် စစ်ဆေးခဲ့ ကြောင်းသိရသည်။
“ ဒီကနေ့ရုံးချိန်းက အဓိက အားဖြင့် တရားလိုအဖြစ် တာဝန်ယူ စွဲတဲ့ ဒုမြို့နယ်အုပ်ချုပ်ရေးမှူး ဦးသန်းထွန်းအောင်ကို အဓိကစစ် မေးတဲ့ရုံးချိန်းဖြစ်ပါတယ်။ ပုဒ်မ- ၁၉ အတွက် သူတို့က ဆန္ဒပြဖို့ ခွင့်ပြုတာက ဗိုလ်စိန်မှန်ကွင်းမှာ ပြုတယ်။ ပြတာက အမေရိကန်သံ ရုံးရှေ့မှပြတယ်။ အဲ့ဒီအတွက် နေရာလွဲမှားခြင်းကို စွပ်စွဲခံရသူဆရာ တော်ဦးပါမောက္ခက ၀န်ခံတဲ့ အတွက်ကြောင့် မြို့နယ်တရားသူ ကြီးက ဒီမှားယွင်စွာဆောင်ရွက်မှု ပေါ်ပေါက်နေသဖြင့် ပြစ်ဒဏ်တစ်လ ချမှတ်တယ်လို့ ဆောင်ရွက်ပါတယ် ” မကွေး ကျောင်းဆရာတော်အမှု ဦးပါမောက္ခ အမှု ကူညီဆောင်ရွက်သူများအဖွဲ့ မှ ပြန်ကြားရေး ဦးအောင်မြိုင်က မီဒီယာများသို့ ဖြေကြားသည်။

နောက်တစ်ပတ်ရုံးချိန်းအား နိုဝင်ဘာ ၂၈ ရက်သို့ ပြန်လည်ချိန်း ဆိုခဲ့ပြီး ပုဒ်မ-၅၀၅(ခ)အတွက် အာမခံလျောက်ရန် လိုအပ်သော သက်သေခံအထောက်များ ပေါ်ပေါက်လာပါက လျောက်ထား သွားမည်ဖြစ်ကြောင်း ဦးအောင်မြိုင် က ဆက်လက်ပြောကြားသည်။

ဆရာတော်ဦးပါမောက္ခအား အမေရိကန် သံရုံးရှေ့ဆန္ဒပြမှုနှင့် ပတ်သတ်၍ တရားစွဲဆိုကာ ဖမ်းဝ ရမ်းထုတ် ပြန်ထားချိန် ဆရာတော် သည် မြောက်ဒဂုံမြို့မရဲစခန်းသို့ နိုဝင်ဘာ ၁၂ ရက်က သွားရောက်၍ အဆိုပါမြို့နယ်အတွင်းရှိ မြေယာကိစ္စတစ်ခုအား ဆန္ဒပြရန် အကြောင်းကြားစာသွားတင်ခဲ့ ကြောင်း၊ ယင်းအချိန်မှာပင် ဆရာ တော်အား ၀ရမ်းအရ မြောက်ဒဂုံမြို့ မရဲစခန်းမှ ထိန်းသိမ်းခဲ့ပြီး ရန်ကုန် တိုင်းဒေသကြီးသံဃနာယကသို့ ခေါ်ဆောင်ခဲ့ကြောင်း၊ ရဟန်သိက္ခာ ချရန်နှင့် လူဝတ်လဲရန် ဖိအားပေး ခဲ့သော်လည်း သိက္ခာချခြင်းအား လက်မခံသဖြင့် လူဝတ်လဲခံခဲ့ရ ကြောင်းသိရသည်။

၂၀၁၆ ခုနှစ်၊ ဧပြီ ၂၈ ရက်က ကမာရွတ်မြို့နယ်၊ တက္ကသိုလ် ရိပ်သာလမ်းပေါ်ရှိ အမေရိကန် သံရုံးရှေ့တွင် ဆန္ဒပြမှုကြောင့် ဆရာတော်ဦးပါ မောက္ခ အပါအ၀င် သံဃာသုံးပါးနှင့် ကိုဝင်းကို လတ်လတ်အပါအ၀င် အမျိုးသား လေးဦးတို့ကို ငြိမ်းချမ်းစွာစုဝေး ခွင့်နှင့် စီတန်းလှည့်လည်ခွင့်ဥပဒေ ပုဒ်မ-၁၉၊ နိုင်ငံတော်အကြည်ညို ပျက်စေမှုဥပဒေ ပုဒ်မ-၅၀၅(ခ) တို့ဖြင့် ကမာရွတ် မြို့နယ်တရားရုံး ၌ တရားစွဲဆိုထားခဲ့ပြီး အဆိုပါအမှုတွဲနှင့် ပတ်သတ် ၍ ကိုဝင်းကိုကိုလတ်၊ကိုသက်မျိုးဦး၊ ကိုနောင်တော်လေး(ခ)နိုင်ဝင်း ထွန်း၊ နေ၀င်းအောင်တို့ လေးဦးကို ကမရွတ်မြို့နယ်တရားရုံးမှ စက်တင် ဘာ ၂၈ ရက်တွင် ပုဒ်မ -၁၉ဖြင့် ထောင်ဒဏ်တစ်လစီနှင့် ပုဒ်မ၅၀၅-(ခ)ဖြင့် ထောင်ဒဏ် ခြောက်လစီ စုစုပေါင်းထောင်ဒဏ် ခုနှစ်လ အမိန့်ချမှတ်ခဲ့ကာ ချုပ်ရက်များ ထုတ်နှုတ်ခံစားခွင့်ပြုခဲ့ကြောင်း သိရသည်။

အလုပ်သမား ဆန္ဒပြမှုများတွင် ဥပဒေချိုးဖောက်ပြီး အကြမ်းဖက်မှုအသွင် ဆောင်လာခြင်းများ ဆက်တိုက် ဖြစ်လာခြင်းကြောင့် ပြည်ထောင်စုအဆင့် ကော်မရှင်၊ အစိုးရတာဝန်ရှိသူများနှင့် ရန်ကုန်တိုင်းအစိုးရအဖွဲ့၊ လွှတ်တော် ကိုယ်စားလှယ်များ ဆွေးနွေး

ရန်ကုန်မြို့ စက်မှုဇုန်တစ်ခုမှ အလုပ်သမားများအား စက်ရုံအပြင်ဘက်တွင် တွေ့ရစဉ်

အလုပ်သမား ဆန္ဒပြမှုများတွင် ဥပဒေချိုးဖောက်ပြီး အကြမ်းဖက်မှုအသွင် ဆောင်လာခြင်းများ ဆက်တိုက် ဖြစ်လာခြင်းကြောင့်  သူရဦးရွှေမန်း ဥက္ကဋ္ဌအဖြစ် တာဝန်ယူထားသည့် ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင်၊ အစိုးရတာဝန်ရှိသူများ၊ နှင့် လွှတ်တော်ကော်မတီမှ တာဝန်ရှိသူများ၊ ရန်ကုန်တိုင်း အစိုးရအဖွဲ့ တာဝန်ရှိသူများ၊ လွှတ်တော် ကိုယ်စားလှယ်များ အောက်တိုဘာ ၂၇ ရက်က နေပြည်တော်တွင် ဆွေးနွေးမှုများ ပြုလုပ်ခဲ့ကြောင်း သိရသည်။

“လက်ရှိ တဖြည်းဖြည်း အခြေအနေတွေက ဆိုးလာတယ်။ ဆန္ဒပြတာကို မပြောဘူး။ ကွန်တိန်နာတွေ၊ အော်ဒါတွေ အပြင်ထွက်လို့မရအောင် ပိတ်ဆို့ထားတဲ့ ဟာမျိုးတွေက ဒီလိုမျိုးဟာတွေက ဆန္ဒပြတာထက် ကျော်လွန်ပြီးတော့ ဥပဒေချိုးဖောက်တဲ့ အပိုင်းကို ရောက်သွားတယ်။ အကြမ်းဖက်မှုအသွင် ဖြစ်သွားတယ်။ ဒါမျိုးကိစ္စတွေက စက်ရုံတွေ တစ်ခုပြီးတစ်ခု ဆက်တိုက်ဖြစ်လာတယ်” ဟု ဆိပ်ကြီးခနောင်တိုမြို့နယ် မဲဆန္ဒနယ် အမှတ် (၁) တိုင်းဒေသကြီး လွှတ်တော်ကိုယ်စားလှယ် ဒေါ်စန္ဒာမင်းက ပြောကြားသည်။

ဆွေးနွေးမှုများကို သူရဦးရွှေမန်း ဥက္ကဋ္ဌအဖြစ် တာဝန်ယူထားသည့် ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်၊ ရန်ကုန်တိုင်းဒေသကြီးအစိုးရ အလုပ်သမားဝန်ကြီး၊ ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါ်စန္ဒာမင်းနှင့် လှိုင်သာယာ လွှတ်တော်ကိုယ်စားလှယ် ဦးဝင်းမောင်၊ ပြည်ထဲရေး ၀န်ကြီးဌာနမှ တာဝန်ရှိသူများ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန၊ ပြည်ထောင်စုအဆင့် လွှတ်တော် အလုပ်သမားရေးရာ ကော်မတီများ၊ မြန်မာနိုင်ငံ အထည်ချုပ် လုပ်ငန်းရှင်များ ပါဝင်ဆွေးနွေး ခဲ့ကြကြောင်း သိရသည်။

“အခုနောက်ပိုင်းမှာ စက်ရုံတွေကို ဖျက်ဆီးလာတဲ့ ဟာမျိုးတွေ၊ စက်ရုံတွေကို ပိတ်ဆို့တဲ့ ဟာမျိုးတွေ၊ နိုင်ငံခြားသားတွေကို ပိတ်ဆို့ပြီးတော့ အထဲကို ပေးမ၀င်တဲ့ ကိစ္စမျိုးတွေ၊ အတွင်းကနေပြီးတော့ အပြင်ကို ပေးမထွက်တဲ့ ကိစ္စမျိုးတွေ ဒါတွေကို ဥပဒေအရ အရေးယူဖို့ဆိုတာ ဘယ်လိုစီမံ ဆောင်ရွက်မလဲ ဆွေးနွေးတာပါ။ ဆန္ဒမပြချင်တဲ့ အလုပ်သမားတွေကလည်း ရန်ရှာခြင်းခံရတယ်။ ဆန္ဒမပြချင်တဲ့ အလုပ်သမားတွေကလည်း ဆန္ဒပြလို့ စက်ရုံတွေ ပိတ်ထားရတဲ့အတွက် သူတို့မှာ အလုပ်ကို ထိခိုက်နစ်နာလာတယ်။ လစာတွေ လျော့နည်းလာတယ်။ ဒါကြောင့်မို့လို့ ဆန္ဒပြတဲ့သူတွေနဲ့ မပြတဲ့သူတွေ ပြဿနာ ဖြစ်လာတယ်” ဟု တိုင်းဒေသကြီး လွှတ်တော်ကိုယ်စားလှယ် ဒေါ်စန္ဒာမင်းက ပြောကြားသည်။