ဥပဒေ ချိုးဖောက်မှုများ၊ ယာဉ်စည်းကမ်း လမ်းစည်းကမ်း လိုက်နာခြင်းမရှိသည့် ဆိုင်ကယ်ကယ်ရီများကို အရေးယူလျက်ရှိပြီး တရားဝင် ဂိတ်သတ်မှတ်ပေးရန် မရှိသေးကြောင်း တိုင်းဒေသကြီးဝန်ကြီး ပြောကြား

ဥပဒေ ချိုးဖောက်မှုများ၊ ယာဉ်စည်းကမ်း လမ်းစည်းကမ်း လိုက်နာခြင်းမရှိသည့် ဆိုင်ကယ်ကယ်ရီများကို အရေးယူလျက်ရှိပြီး တရားဝင် ဂိတ်သတ်မှတ် ဆောင်ရွက်ရန် မရှိသေးကြောင်း ရန်ကုန်တိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး အောင်စိုးမိုးက ဒုတိယအကြိမ် ရန်ကုန်တိုင်းဒေသကြီးလွှတ်တော် (၄၆ ရက်မြောက်နေ့) အစည်းအဝေးတွင် ပြောကြားသည်။

မော်တော်ဆိုင်ကယ်များကို ၁၉၈၉ ခုနှစ် မော်တော်ယာဉ် နည်းဥပဒေပါ ဆိုင်ကယ်များကို အငှားယာဉ်အဖြစ် ပြေးဆွဲ ဆောင်ရွက်ခြင်းကို ခွင့်မပြုထားကြောင်း ဗိုလ်မှူးကြီးအောင်စိုးမိုးက ပြောကြားသည်။

“တရားဝင် ဂိတ်သတ်မှတ် ဆောင်ရွက်ခြင်း လက်ရှိတော့ ကျွန်တော်တို့ မဆောင်ရွက်ပေးနိုင်ပါဘူး။ ဆက်လက်ပြီးတော့ ယာဉ်စည်းကမ်း ထိန်းသိမ်းရေးကော်မတီက ဆွေးနွေးပြီး လေ့လာဆန်းစစ်သွားမှာ ဖြစ်ပါတယ်။ အများပြည်သူ သွားလာမှု အဆင်ပြေရေးအတွက် ပြေးဆွဲနေကြသော်လည်း ဥပဒေချိုးဖောက်မှုတွေ၊ ယာဉ်စည်းကမ်း လမ်းစည်းကမ်း လိုက်နာခြင်းမရှိတဲ့ ဆိုင်ကယ်များကို အရေးယူ ဆောင်ရွက်လျက် ရှိပါတယ်” ဟု ဗိုလ်မှူးကြီး အောင်စိုးမိုးက ပြောကြားသည်။

ရန်ကုန်တိုင်းဒေသကြီးအတွင်း ဆိုင်ကယ်စီးနင်းခွင့် မရှိသည့်မြို့နယ်များကို ကြေညာထားပြီး အများပြည်သူ သွားလာရေး အဆင်ပြေစေရန် ဆောင်ရွက်ပေးသင့်သော်လည်း ဆိုင်ကယ် စီးနင်းခွင့်ကို အလွဲသုံးစားပြု၍ ရာဇ၀တ်မှု ကျူးလွန်ခြင်း၊ လိုင်စင်မဲ့ ဆိုင်ကယ် ပိုမိုများပြား စီးနင်းခြင်းရှိသည့်အတွက် စဉ်းစားဆောင်ရွက်မည် ဖြစ်ကြောင်း ဗိုလ်မှူးကြီး အောင်စိုးမိုးက ပြောကြားသည်။

လက်ရှိ မော်တော်ဆိုင်ကယ်များကို ဖမ်းဆီးရန်အတွက် ပူးပေါင်းအဖွဲ့များကို ထားရှိပြီး ပထမအဆင့် အနေဖြင့် မြို့တွင်းမြို့နယ်များကို မ၀င်ရောက်ရန်နှင့် ဖမ်းဆီးရန် ၂၅ နေရာကို သတ်မှတ်ထားကာ ဒုတိယအဆင့်အနေဖြင့် ၁၀ နေရာ သတ်မှတ်၍ ဆိုင်ကယ်များ ဖမ်းဆီးရေး ဆောင်ရွက်လျက်ရှိကြောင်း ၀န်ကြီးက ပြောကြားသည်။

ရန်ကုန်တိုင်းဒေသကြီးအတွင်း မော်တော်ဆိုင်ကယ် စီးနင်းခွင့်ပြုထားသည့် မြို့နယ်များမှာ သန်လျင်၊ ကျောက်တန်း၊ သုံးခွ၊ ခရမ်း၊ တွံတေး၊ ကော့မှူး၊ ကွမ်းခြံကုန်း၊ ဒလ၊ ဆိပ်ကြီးခနောင်တို၊ ကိုကိုးကျွန်း၊ လှည်းကူး၊ မှော်ဘီ၊ တိုက်ကြီး၊ ထန်းတပင်မြို့နယ်တို့ဖြစ်ပြီး ကျန်မြို့နယ်များတွင် မော်တော်ဆိုင်ကယ် စီးနင်းခွင့် မပြုကြောင်း ရန်ကုန်တိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှု ကော်မတီက ထုတ်ပြန်ထားသည်။

ထို့ပြင် မော်တော်ဆိုင်ကယ် စီးနင်းခွင့် မရှိသည့် မြို့နယ်များတွင် စီးနင်းသည်ကို စစ်ဆေးတွေ့ရှိရပါက ဥပဒေအရ ထိရောက်စွာ အရေးယူသွားမည် ဖြစ်ကြောင်း သိရသည်။

 

မိတ္ထီလာ-မြင်းခြံကားလမ်းမတွင် ဆိုင်ကယ်တစ်စီး အရှိန်လွန်ပြီး တံတားအောက်ကျရာမှ ဆိုင်ကယ်စီးနင်းလာသူ သေဆုံး

မိတ္ထီလာ – မြင်းခြံကားလမ်းမမိုင်တိုင် (၈) အနီးတွင် ဆိုင်ကယ်တစ်စီး အရှိန်လွန်ကာ တံတားအောက် ချောက်ထဲသို့ ပြုတ်ကျရာမှ ဆိုင်ကယ်စီးနင်းလာသူတစ်ဦး သေဆုံးမှုဖြစ်ပွားခဲ့ကြောင်း သိရသည်။

ဖေဖော်ဝါရီ ၂၃ ရက် နံနက်ပိုင်းက မိတ္ထီလာမြို့မရဲစခန်း တာဝန်ရှိသူများသည် မိတ္ထီလာ-မြင်းခြံကားလမ်းမမိုင်တိုင် ရှစ်မိုင် သုံးဖာလုံကျော်တွင် လူတစ်ဦး ချောက်ထဲပြုတ်ကျ သေဆုံးနေကြောင်း သတင်းအရ သက်သေများနှင့်အတူ သွားရောက်စစ်ဆေးခဲ့ကြောင်း သိရသည်။

တာဝန်ရှိသူများ သွားရောက်စစ်ဆေးရာတွင် မိတ္ထီလာမြို့နယ် ရေချိုကျေးရွာနေ အောင်ကိုဦး အသက်(၂၅)နှစ် တစ်ဦးတည်း စီးနင်းမောင်းနှင်လာသော ၄၁ ယ/—- နံပါတ်ပါဆိုင်ကယ်သည် မိတ္ထီလာ-မြင်းခြံကားလမ်းမ မိုင်တိုင်အမှတ် ရှစ်မိုင်သုံးဖာလုံ ကျော်အရောက်တွင် အရှိန်မထိန်းနိုင်ဘဲ တံတားမြောက်ဘက် လက်ယာဘက်ထိပ်ရှိ ကွန်ကရစ်တိုင်အား တိုက်မိပြီးနောက် ချောက်အတွင်းထိုးကျသဖြင့် အောင်ကိုဦးမှာ အခင်းဖြစ်နေရာတွင် သေဆုံးခဲ့ခြင်းဖြစ်ကြောင်း ကနဦးစစ်ဆေးချက်အရ သိရသည်။

အဆိုပါအမှုအား မိတ္တီလာမြို့မရဲစခန်းက ယာဉ်(ပ)၁၀/၂၀၁၈ ရာဇသတ်ကြီးပုဒ်မ ၃၀၄ (က) ဖြင့် အမှုဖွင့် စစ်ဆေးဆောင်ရွက်လျက်ရှိကြောင်း သိရသည်။

မန္တလေးမြို့အတွင်း ဆိုင်ကယ်များ တစ်ကိုယ်တော် လှည့်လည်ခိုးယူသူ အမျိုးသားအား ဆိုင်ကယ်၂၄ စီးနှင့်အတူ ဖမ်းဆီးရမိ

ခိုးယူခြင်းခံရသည့် ဆိုင်ကယ်များအား ပြန်လည် သိမ်းဆည်းရမိထားသည်ကို တွေ့ရစဉ်

မန္တလေးမြို့တွင်းရှိ ဆိုင်ကယ်များကို တစ်ဦးတည်း လှည့်လည်ခိုးယူထားသူ အမျိုးသားကို ဆိုင်ကယ် ၂၄ စီးနှင့်အတူ ဒီဇင်ဘာ ၂၀ ရက်က ဖမ်းဆီးထားမိကြောင်း ချမ်းအေးသာစံမြို့မရဲစခန်း အမှတ် (၈) မှ သတင်းရရှိသည်။

မန္တလေးမြို့တွင်း၌ ဆိုင်ကယ် ခိုးယူခံရသည့် ဖြစ်စဉ်များ မကြာခဏဖြစ်ပွားနေပြီး ပျောက်ဆုံးသည့် အမျိုးအစားများလည်း တန်ဖိုးကြီး ထိုင်းဘီးအများစုများ ဖြစ်နေသဖြင့် အမှတ် (၈) ရဲစခန်းမှ ရဲတပ်ဖွဲ့ဝင်များမှ စုံစမ်းနေစဉ် အမျိုးသားတစ်ဦးအား မသင်္ကာသဖြင့် စစ်ဆေးရာမှ ပေါ်ပေါက်ခဲ့ခြင်းဖြစ်ကြောင်း သိရသည်။

“ဆိုင်ကယ်ပျောက်ဆုံးထားသူ တစ်ဦးက သူ့ဆိုင်ကယ်ကို မန္တလေးဆေးရုံကြီးက ဆိုင်ကယ်အပ်နှံတဲ့ နေရာမှာ တွေ့ခဲ့တယ်ဆိုပြီး အကြောင်းကြားတာနဲ့ အဲဒီဆိုင်ကယ် လာရွေးမယ့်အချိန်ကို စောင့်နေခဲ့တာ။ လေးငါးရက်ကြာမှ ဆိုင်ကယ်ကို လာရွေးလို့ သူ့ကို စစ်ဆေးလိုက်တဲ့ခါ အိတ်ထဲမှာ သော့တုတွေနဲ့အတူ ဂွတွေရော တွေ့ခဲ့ရတယ်။ စစ်ဆေးချက်အရ အိမ်မှာ ၁၀ စီး သိမ်းဆည်းရမိခဲ့ပါတယ်။ ဗဟိုအမျိုးသမီးဆေးရုံတို့၊ ဆေးရုံကြီးတို့၊ သင်ကြားရေးဆေးရုံတို့ စတဲ့ ဆိုင်ကယ် အပ်နှံတဲ့နေရာတွေမှာ လိုက်လံ သိမ်းဆည်းခဲ့ပါတယ်။ စုစုပေါင်း ၂၄ စီး သိမ်းဆည်းရမိခဲ့ပါတယ်။ ဘီးတွေက သိန်း ၂၀ အထက် တန်ဖိုးရှိတဲ့ ထိုင်းဘီးနဲ့ ဂျပန်ဘီးတွေချည်းပါ။ တစ်ဦးတည်း ခိုးယူခဲ့တာတွေ ဖြစ်ပါတယ်”ဟု အမှတ်(၈)ရဲစခန်းမှ ရဲအုပ်ကျော်သူရထွန်းက ပြောကြားသည်။

Honda Schoopy ၁၃ စီး၊ Honda Click ခြောက်စီး၊ CBR တစ်စီး၊ KTM နှစ်စီး၊ DT နှစ်စီး စုစုပေါင်း ၂၄ စီးကို ၎င်း၏ နေအိမ်နှင့်ဆေးရုံ ဆိုင်ကယ်အပ်နှံသည့် နေရာအသီးသီးတွင် ပြန်လည်သိမ်းယူထားပြီး ကျူးလွန်သူ နေသူရိန်(ခ) သူရိန် (၁၉ နှစ်) ကို ခိုးယူခဲ့သည့်မြို့နယ် နေရာအလိုက် သက်ဆိုင်ရာရဲစခန်းများတွင် ပုဒ်မ ၃၇၉/၅၄ ဖြင့် အမှုဖွင့်ထားကြောင်း သိရသည်။

ထို့ကြောင့် ဆိုင်ကယ်ပျောက်ဆုံးသူများအနေဖြင့် ဆိုင်ကယ်နှင့် သက်ဆိုင်သည့် အထောက်အထားများ ယူဆောင်လာကာ ချမ်းအေးသာစံမြို့နယ်၊ ၈၁ လမ်း၊ ၂၉ လမ်း နှင့် လမ်း ၃၀ ကြားရှိ အမှတ် (၈) ရဲစခန်းတွင် လာရောက်တိုက်ဆိုင် စစ်ဆေးကြည့်ရှုနိုင်ကြောင်း သိရသည်။

မန္တလေးမြို့တွင် ဆိုင်ကယ်ပျောက်ဆုံးမှုများ မကြာခဏ ဖြစ်ပွားလေ့ရှိသလို ဖမ်းဆီးရမိမှုများလည်းရှိပြီး ဆိုင်ကယ်ခိုးယူသူများမှာ လူငယ်အများစုမှ ကျူးလွန်လေ့ရှိကြောင်း၊ ထိုင်းဘီးဆိုင်ကယ် အသစ်တစ်စီးလျှင် ကျပ်သိန်း ၂၀ အထက် တန်ဖိုးရှိရာ လိုင်စင်မဲ့ အသွင်ပြောင်းကာ နယ်မြို့များတွင် ကျပ် ၁၀ သိန်းဝန်းကျင်ခန့်ဖြင့် ပြန်လည်ရောင်းချလေ့ရှိကြောင်း သိရသည်။

မန္တလေးမြို့တွင် ပထမဆုံးအကြိမ်ပြုလုပ်သည့် မော်တော်ဆိုင်ကယ်ကလပ်များ တွေ့ဆုံပွဲသို့ ဆိုင်ကယ် အစီး ၁၀၀၀ ခန့် လာရောက်

မြန်မာ တစ်နိုင်ငံလုံးရှိ မော်တော်ဆိုင်ကယ် ကလပ်များ တွေ့ဆုံပွဲကို ဒီဇင်ဘာလ  ၂ ရက်က မန္တလေးမြို့တွင် ပထမဆုံးအကြိမ်အဖြစ် မန္တလာသီရီ အားကစားကွင်းအတွင်း ကျင်းပ ပြုလုပ်ခဲ့ကြောင်း သိရသည်။

မြို့ပေါင်း (၇၀)ကျော်မှ ဆိုင်ကယ် အစီးရေ (၁၀၀၀)ခန့် တက်ရောက်လာခဲ့ကြောင်း ပွဲကို ဦးစီး ကျင်းပပြုလုပ်သည့်  MANDALAY KNIGHTS မော်တော်ဆိုင်ကယ်ကလပ်မှ အသင်းခေါင်းဆောင် ဦးထွန်းထွန်းက ပြောကြားသည်။

မော်တော်ဆိုင်ကယ်စီးနှင်းသူများ ယာဉ်စည်းကမ်း၊လမ်းစည်းကမ်း လိုက်နာဆောင်ရွက်လာစေရန်၊ ခရီးသွားလုပ်ငန်းများ ဖွံ့ဖြိုးတိုးတက်လာစေရန် နှင့် မော်တော်ဆိုင်ကယ်ချစ်သူများ ပရဟိတ လုပ်ငန်းများ ပိုမိုဆောင်ရွက်လာစေရန် ရည်ရွယ်ချက်များဖြင့်  မြန်မာတစ်နိုင်ငံလုံးရှိ မော်တော်ဆိုင်ကယ် ချစ်သူများတွေ့ဆုံပွဲအခမ်းအနားကို  ဒီဇင်ဘာလ ၂ ရက်နေ့နှင့် ၃ ရက်နေ့များတွင် မန္တလာသီရီ အားကစားကွင်းတွင်  ကျင်းပ ပြုလုပ်သွားမည် ဖြစ်ကြောင်း MANDALAY KNIGHTS မော်တော်ဆိုင်ကယ်ကလပ်မှ သိရသည်။

”အခြားအခြား မြို့တွေမှာလည်း ကျင်းပပါတယ် ၊အခုက မန္တလေးမြို့ မှာ ပထမဆုံးကျင်းပတဲ့ BIKE WEEK ပေါ့ ၊မြို့ပေါင်း ၇၀ ကျော်ကနေ လာရောက် တက်ပြီတော့ ဆိုင်ကယ်အစီးရေ ၁၀၀၀ လောက်ရှိမယ်လို့ ယူဆပါတယ်၊မြန်မာနိုင်ငံအရပ်ရပ်မှာ ရှိနေတဲ့ ဆိုင်ကယ်ချစ်တဲ့သူတွေ၊ ဆိုင်ကယ်နဲ့ ခရီးသွားရတာ မြတ်နိုးတဲ့သူတွေ  ဒီမှာ စုပြီးတော့ စုပေါင်းပရဟိတ ပွဲလေးတစ်ခု ကျွန်တော်တို့ လုပ်ကြတာပါ၊  ထိုင်းနိုင်ငံထုတ် မော်တော်ဆိုင်ကယ်ဦးထုပ် အလုံး ၃၀၀ ကို မြစ်ငယ်ဘက်မှာ ရှိတဲ့ အထက ကျောင်းသုံးကျောင်းကို  လှူဒါန်းမှာပါ၊ ဒီပွဲကနေ အလှူခံ ရရှိငွေများကိုလည်း  မိဘမဲ့ ကလေးများကို လှူသွားမှာပါ ၊နောက်တပတ်အတွင်းမှာ လှူဒါန်းမှုတွေ ပြုလုပ်သွားမှာပါ ”ဟု MANDALAY KNIGHTS မော်တော်ဆိုင်ကယ် ကလပ်မှ အသင်းခါင်းဆောင် ဦးထွန်းထွန်းကပြောကြားသည်။

ယာဉ်စည်းကမ်း၊လမ်းစည်းကမ်း လိုက်နာဖို့အတွက်  မော်တော်ဆိုင်ကယ်စီးဦးထုပ်၊ မော်တော်ဆိုင်ကယ်စီး ဝတ်စုံ အပြည့် ဝတ်ဆင်ကာ  မော်တော် ဆိုင်ကယ် အစီးရေ (၅၀၀)ခန့်ဖြင့် မန္တလေးမြို့  ကျုံးတစ်ပတ် စီးနင်းပြသသွားမည် ဖြစ်ကြောင်းနှင့် အခမ်းအနားတွင်  Emperor တီးဝိုင်း ဖြင့်  တေးဂီတ ဧည့်ခံ ဖျော်ဖြေပွဲများ ပါဝင်ကာ ယင်းမှ ရရှိ လာမည့် အကျိုး အမြတ်များကို မိဘမဲ့ ကလေးများအား လှူဒါန်းသွားမည် ဖြစ်ကြောင်း သိရသည်။