ကန့်ကွက်နေသည့်ကြားမှ လပွတ္တာမြို့နယ် ကံရွာကျေးရွာ စာသင်ကျောင်းအနီးတွင် တာဝါတိုင် စိုက်ထူရန်ပြုလုပ်မှုကြောင့် ဒေသခံများ လုစုလူဝေးဖြင့်တားမြစ်မှုဖြစ်ပွား

တာဝါတိုင်စိုက်ထူမည်ဆိုခြင်းကြောင့် ဒေသခံများက လူစုလူဝေးဖြင့် တားမြစ်နေစဉ်

ဧရာဝတီတိုင်းဒေသကြီး လပွတ္တာမြို့နယ် ဥာဏ်ကွင်း ကံရွာကျေးရွာအုပ်စု ကံရွာကျေးရွာတွင် စာသင်ကျောင်းနှင့် အလွန်နီးကပ်စွာ တာဝါတိုင်လာရောက် စိုက်ထူမှုအား ဆရာ၊ ဆရာမများနှင့် ဒေသခံပြည်သူများ ကန့်ကွက်နေသည့်ကြားမှ ဇူလိုင် ၂၈ ရက် တွင် တာဝါတိုင်ဆောက်လုပ်ရန် ဆက်လက် လုပ်ဆောင်ခဲ့ကြောင်း ဒေသခံများထံမှ သိရသည်။

ယင်းသို့ ဖုန်းတာဝါတိုင် ဆက်လက်ဆောင်လုပ်ရန်လုပ်ဆောင်မှုကို ကံရွာကျေးရွာမှ ဒေသခံများအပါအ၀င် ကျောင်းဆရာ၊ ဆရာမများက လူစုလူဝေးဖြင့် တားမြစ်မှုဖြစ်ပွားခဲ့ကြောင်း သိရသည်။

အဆိုပါ စိုက်ထူမည့် ဖုန်းတာဝါတိုင်မှာ ကျောင်းသား ကျောင်းသူ ၃၀၀ ကျော် ပညာသင်ကြားနေသည့် စာသင်ကျောင်းနှင့် အလွန်နီးကပ်နေပြီး ကျောင်းအားကစားကွင်း၊ ဘုန်းတော်ကြီးကျောင်းများနှင့်အလွန် နီးကပ်စွာ တည်ရှိနေခြင်းကြောင့် ပညာသင်ကြားရင်တွင် မီးစက်သံဆူညံခြင်း၊ လျှပ်စစ်အန္တရာယ်၊ မိုးကြိုးအန္တရာယ်များနှင့် ရင်ဆိုင်ရနိုင်ခြင်း၊ ဘုန်းကြီးကျောင်းနှင့် နီးကပ်နေသဖြင့် ဒေသခံများ အလှူအတန်း ပြုလုပ်ရာ တွင် မြေနေရာအခက်အခဲ ဖြစ်ပေါ်နိုင်ခြင်းတို့ကြောင့် ကန့်ကွက်ခြင်းဖြစ်ကြောင်း သိရသည်။

“ဒီဖုန်းတာဝါတိုင်ကိစ္စက စလုပ်မယ်လို့ သတင်းကြားတဲ့ အချိန်ကတည်းက စာသင်ကျောင်းနဲ့ အရမ်းနီးနေတော့ ကလေးတွေ ပညာသင်ကြားတဲ့အခါမှာ အနှောင့်အယှက် ဖြစ်မှာမို့လို့ ကျွန်တော်တို့ ရပ်မိရပ်ဖတွေက လက်မခံခဲ့တဲ့ကိစ္စပါ။ အဲဒီအတွက်လည်း ကျွန်တော်တို့ အကြိမ်ကြိမ် ကန့်ကွက်ခဲ့ပါတယ်။ အခုက ကန့်ကွက်နေတဲ့ကြားထဲက ဆက်လုပ်နေကြတာပါ။ ဒီကိစ္စကို မြို့နယ်က သက်ဆိုင်ရာ ဌာနအသီးသီးကိုလည်း ကန့်ကွက်စာ ပို့ပြီးပါပြီ။ သက်ဆိုင်ရာဌာနတွေက ဘာမှ ဖြေရှင်းဆောင်ရွက်ပေးခြင်း မရှိဘူးဆိုရင် ကျွန်တော်တို့ တိုင်းဒေသကြီးအစိုးရရုံးကို ကန့်ကွက်စာသွားပို့ဖို့ ရှိပါတယ်။ တာဝါတိုင် လာဆောက်တာကတော့ Mytel ကလို့ သိရပါတယ်” ဟု ကံရွာကျေးရွာ၏ ရပ်မိရပ်ဖတစ်ဦးဖြစ်သူ ဦးသိန်းကြည်က ပြောကြားသည်။

ယင်း ဖုန်းတာဝါတိုင် လာရောက်စိုက်ထူမှုအား ကန့်ကွက်ကြောင်းကို ဆရာ၊ ဆရာမ၊ ကျောင်းသား မိဘများနှင့် ဒေသခံပြည်သူတို့၏ လက်မှတ် ၂၀၀ ခန့်ဖြင့် ဇူလိုင် ၂၃ ရက်က လပွတ္တာမြို့နယ် အထွေထွေအုပ် ချုပ်ရေးဦးစီးဌာန၊ မြို့နယ်ပညာရေးမှူးရုံး၊ လပွတ္တာမြို့နယ် မြန်မာ့ဆက်သွယ်ရေးလုပ်ငန်းသို့ ကန့်ကွက်စာပေးပို့ထားကြောင်း သိရသည်။ အဆိုပါကိစ္စနှင့်ပတ်သက်၍ ကျေးရွာအုပ်ချုပ်ရေးမှူးအား ဖုန်းဖြင့်ဆက်သွယ်မေးမြန်းခဲ့သော်လည်း ဖုန်းလက်ခံဖြေကြားခြင်း မရှိခဲ့ပေ။

ကြော်ငြာဆိုင်းဘုတ်များတွင် ဆက်သွယ်ရေး တာဝါတိုင်များ၊ အင်တာနာများ တပ်ဆင်ထားမှုအပေါ် တရားဝင် ခွင့်ပြုချက်ရှိမရှိ တိုင်းပြည်အခွန်ငွေ ရရှိမှုများနှင့် ပတ်သက်ပြီး ရန်ကုန်တိုင်းဒေသကြီး လွှတ်တော်၌ မေးမြန်းမည်

ဇွန် ၂၅ ရက်က လေပြင်းတိုက်ခတ်မှုကြောင့် လဲကျခဲ့သည့် တာဝါတိုင်နှင့် အင်တာနာများ တပ်ဆင်ထားသည့် ကြေငြာဆိုင်းဘုတ်အား တာဝန်ရှိသူများ ရှင်းလင်းစဉ် (ဓာတ်ပုံ- ကျော်ဇင်ဖြိုး)

ရန်ကုန်တိုင်းဒေသကြီးအတွင်း ကြော်ငြာဆိုင်းဘုတ်များတွင် ဆက်သွယ်ရေး တာဝါတိုင်များ၊ အင်တာနာတိုင်များ တပ်ဆင်ထားမှုအပေါ် တရားဝင်ခွင့်ပြုချက် ရှိ မရှိ တိုင်းပြည်အခွန်ငွေ ရရှိမှုများနှင့် ပတ်သက်ပြီး တိုင်းဒေသကြီး လွှတ်တော်တွင် မေးမြန်းမည်ဖြစ်ကြောင်း ပန်းဘဲတန်းမြို့နယ် မဲဆန္ဒနယ် အမှတ် (၁) တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။

အဆိုပါကိစ္စနှင့် ပတ်သက်ပြီး လွှတ်တော်ကိုယ်စားလှယ် ဦးသန်းနိုင်ဦးက လာမည့် သတ္တမပုံမှန် လွှတ်တော်အစည်းအဝေးတွင် မေးခွန်းမေးမြန်းမည် ဖြစ်ကြောင်း ပြောကြားသည်။

“မေးမြန်းသွားဖို့တော့ ရှိတယ်။ ဒါတွေက တိုင်းပြည်ရဲ့ ဘဏ္ဍာငွေထဲကိုဝင်သလား။ ဘယ်လို ခွင့်ပြုချက်တွေနဲ့ လုပ်ထားသလဲ။ ဒီလိုမျိုး အော်ပရေတာတွေက သီးခြားမဟုတ်ဘဲနဲ့  ဘေဘုတ်တွေ အပေါ်မှာ ထပ်ဆင့်ထူပြီးတော့ ဆက်သွယ်ရေးတိုင်တွေက အခွန်ရရဲ့လား။ အဲဒီလို မေးမြန်းသွားဖို့ အစီအစဉ် ရှိပါတယ်။ အခုလွှတ်တော်မှာ မမီတော့ဘူး။ လွှတ်တော် အစည်းအဝေး တစ်ခုမှာ လွှတ်တော် ကိုယ်စားလှယ်က မေးခွန်း ၁၀ ခုပဲ တင်လို့ရတာ။ ကျွန်တော်က အခုလွှတ်တော်မှာ မေးခွန်းတွေ ပြီးသွားပြီးတော့ နောက်လာမယ့်လွှတ်တော် သတ္တမအစည်းအဝေးမှာ မေးမြန်းဖို့ စီစဉ်ထားပါတယ်” ဟု တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။

ကြော်ငြာဘေဘုတ်များကို စည်ပင်သာယာမှ စီမံခန့်ခွဲခြင်းဖြစ်ပြီး ခွင့်ပြုချက်ရရှိပါက ဆက်သွယ်ရေး တာဝါတိုင်များကို တပ်ဆင်နိုင်ကြောင်း၊ သို့သော်လည်း တပ်ဆင်ထားမှုများမှ တိုင်းပြည်အတွက် အခွန်ရမရသည် အဓိကဖြစ်ပြီး အန္တရာယ်ရှိပါက တပ်ဆင်ခွင့် မပြုသင့်ကြောင်း၊ ဆက်သွယ်ရေးကြိုးများနှင့် ပတ်သက်ပြီး ခွင့်ပြုချက် မရှိပါက ပြန်ဖြုတ်သိမ်းမည်ဟု ၀န်ကြီးဌာနက ညွှန်ကြားခြင်းများ ရှိသည့်အတွက်  ယခုကိစ္စကိုလည်း ပြန်လည်စိစစ်သင့်ကြောင်း ၎င်းကဆက်လက် ပြောကြားသည်။

“ရန်ကုန်မှာရှိတဲ့ ဘေဘုတ်တွေမှာ ဆက်သွယ်ရေး တာဝါတိုင် အင်တာနက်တွေ ချိတ်ခွင့်ပြုထားတာ ဟုတ်တယ်။ ပြည်လမ်းမှာ ဘေဘုတ်လဲသွားတယ် ဆိုတာလည်း လေဆင်နှာမောင်း တိုက်ခဲ့လို့ပါ။ အခြားဘေဘုတ်တွေက အခုလိုမှ မဖြစ်တာ” ဟု ရန်ကုန်မြို့တော် စည်ပင်သာယာရေး ကော်မတီ၊ အင်ဂျင်နီယာဌာန (လမ်း/တံတား) မှ ဒုတိယဌာနမှူး ဦးစိုးသိန်းအောင်က ပြောကြားသည်။

ရန်ကုန်တိုင်းဒေသကြီးအတွင်း မြန်မာ့ဆက်သွယ်ရေး လုပ်ငန်းပိုင် ဆက်သွယ်ရေးတိုင်များတွင် ခွင့်ပြုချက် မရှိဘဲ တရားမ၀င် သွယ်တန်းထားသည့် fiber cable များကို ဇူလိုင် ၂ ရက်တွင် ဖယ်ရှားမည်ဖြစ်ပြီး သက်ဆိုင်ရာ ကုမ္ပဏီများအား တည်ဆဲဥပဒေ၊ နည်းဥပဒေနှင့်အညီ အရေးယူမည်ဖြစ်ကြောင်း မြန်မာ့ဆက်သွယ်ရေး လုပ်ငန်းက ဇွန် ၂၄ ရက်တွင် အသိပေး ကြေညာထားသည်။

တာဝါတိုင် တည်ဆောက်ခြင်းနှင့် fiber network လုပ်ကိုင်ရန် ခွင့်ပြုချက်ရရှိထားသည့် ကုမ္ပဏီ ငါးခုသာရှိပြီး တရားဝင်ခွင့်ပြုချက်မရှိဘဲ လုပ်ကိုင်နေသော ကုမ္ပဏီများကို အရေးယူမည်ဖြစ်ကြောင်း၊ ရန်ကုန်တိုင်းဒေသကြီးအတွင်း YESC နှင့် တရားဝင်စာချုပ် ချုပ်ဆိုပြီး ခွင့်ပြုချက် ရရှိထားသည့် ကုမ္ပဏီ သုံးခုနှင့် YCDC တွင်၂၀၁၇ ခုနှစ် ဒီဇင်ဘာလအထိ စာရင်းပေးပြီး ခွင့်ပြုချက်ရရှိသည့် ကုမ္ပဏီ နှစ်ခုသာရှိကြောင်း ရန်ကုန်တိုင်းဒေသကြီး အစိုးရအဖွဲ့ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က မေ ၂၂ ရက်က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေးတွင် ပြောကြားခဲ့သည်။

 

Mytel အနေဖြင့် ဒေါ်လာ တစ်ဘီလျံကျော် ရင်းနှီးမြှုပ်နှံထားပြီး ကာကွယ်ရေးဦးစီးချုပ်၏သားဖြစ်သူ ရှယ်ယာ ပါဝင်ခြင်းမရှိကြောင်း ရှင်းလင်း

ပြင်ပတွင် ပျံ့နှံ့နေသည့် သတင်းများနှင့်ပတ်သက်ပြီး Mytel မှ တာဝန်ရှိသူတစ်ဦး မီဒီယာများအား ရှင်းလင်းနေစဉ် (ဓာတ်ပုံ-စောရည်နန္ဒာ)

Mytel အနေဖြင့် အမေရိကန်ဒေါ်လာ တစ်ဘီလျံကျော် ရင်းနှီးမြှုပ်နှံထားပြီး ကာကွယ်ရေးဦးစီးချုပ်၏သားဖြစ်သူ ရှယ်ယာ ပါဝင်ခြင်းမရှိကြောင်း Mytel ၏ ပြင်ပဆက်ဆံရေး အရာရှိချုပ် ဦးဇော်မင်းဦးက ဇွန် ၂၁ ရက် က  Park Royal ဟိုတယ်၌ ပြုလုပ်သည့် မီဒီယာ တွေ့ဆုံရှင်းလင်းပွဲတွင် ပြောကြားသည်။

Mytel အနေဖြင့် လက်ရှိတွင် တစ်နိုင်ငံလုံး အတိုင်းအတာဖြင့် ဆင်းမ်ကတ်ပေါင်း သုံးသန်းကျော်ဖြန့်ချိထားပြီး လာမည့် ၂၀၂၀ တွင် အသုံးပြုသူပေါင်း ငါးသန်းကျော်ထိ ရောက်ရှိနိုင်မည်ဟု ခန့်မှန်းထားကြောင်း သိရသည်။

လက်ရှိတွင် တာဝါတိုင်ပေါင်း ၅၀၀၀ ကျော် တည်ဆောက်ထားပြီး ၂၀၁၈ ကုန်အထိ တာဝါတိုင် ၆၀၀၀ ကျော် တည်ဆောက်ရန် မျှော်လင့်ထားကြောင်း သိရသည်။

“ကျွန်တော်တို့ Mytel ကို ပြည်တွင်းက ၅၁ ရာခိုင်နှုန်းနဲ့ ပြည်ပက ၄၉ ရာခိုင်နှုန်း ပါဝင်ပါတယ်။ ပြည်တွင်း ၅၁ ရာခိုင်နှုန်းထဲမှာမှ ကာကွယ်ရေးဝန်ကြီးဌာနလက်အောက်မှာရှိတဲ့ Star Hight ကုမ္ပဏီက ၂၈ ရာခိုင်နှုန်း ပါဝင်ပါတယ်။ အပြင်မှာလူတွေပြောနေကြသလို ကာကွယ်ရေးဦးစီးချုပ်ရဲ့သားဖြစ်သူက ရှယ်ယာတွေပါဝင်ထားတယ်ဆိုတာ လုံးဝ မဟုတ်ပါဘူး။ သူ့အနေနဲ့က ရှယ်ယာ လုံးဝ ပါဝင်ထားခြင်း မရှိပါဘူး။ အခုလက်ရှိအချိန် ထိတော့ ရင်းနှီးမြှုပ်နှံထားတဲ့ပမာဏက အမေရိကန်ဒေါ်လာ တစ်ဘီလျံကျော် ရှိသွားပါပြီ။ နှစ်ဘီလျံကျော်အထိ ရင်းနှီးမြှုပ်နှံသွားမှာပါ” ဟု Mytel ၏ ပြင်ပဆက်ဆံရေးအရာရှိချုပ် ဦးဇော်မင်းဦးက ပြောကြားသည်။

Mytel အနေဖြင့် ပထမဆုံး ဖုန်းခေါ်ဆိုမှု စမ်းသပ်ခြင်းကို ၂၀၁၈ ဖေဖော်ဝါရီ ၁၁ ရက်က နေပြည်တော်တွင်ပြုလုပ်ခဲ့ပြီး ၂၀၁၈ မတ် ၁၅ ရက်က နေပြည်တော်၊ ကရင်ပြည်နယ်နှင့် ပဲခူးတိုင်းဒေသကြီး (အရှေ့ပိုင်း) တို့ တွင် ဆင်းမ်ကတ်များကို စတင်ရောင်းချပေးခဲ့ကြောင်း သိရသည်။ ရန်ကုန်အပါအ၀င် တစ်နိုင်ငံလုံးအတိုင်းအတာဖြင့်  ဆင်းမ်ကတ် မိတ်ဆက်အသုံးပြုခြင်းကို ဇွန် ၉ ရက်တွင် ပြုလုပ်ခဲ့ပြီး လက်ရှိတွင် အသုံးပြုသူပေါင်း တစ်သန်းကျော်ရှိကြောင်း သိရသည်။

Mytel အနေဖြင့် ဝေးလံခေါင်သီသည့် ကျေးလက်ဒေသများတွင် ဆက်သွယ်ရေးရရှိနိုင်ရေးကို အဓိက ဦးစားပေးလုပ်ကိုင်နေပြီး တာဝါတိုင်တည်ဆောက်ခြင်းလုပ်ငန်းများတွင် တိုင်းဒေသကြီးအစိုးရအဖွဲ့က ပါဝင် ကူညီဆောင်ရွက်သော်လည်း ခက်ခဲသည့် အနေအထားများရှိကြောင်း ယင်းက ဆက်လက်ပြောကြားသည်။ Mytel အနေဖြင့် နောက်ပိုင်းတွင် ငွေကြေးဝန်ဆောင်မှုလုပ်ငန်းဖြစ်သည့် Mobile Money ၀န်ဆောင်မှုလုပ်ငန်းကို လုပ်ကိုင်ရန်အတွက် မြန်မာနိုင်ငံတော် ဗဟိုဘဏ်တွင် လျှောက်ထားပြီး ခွင့်ပြုချက် ရရှိပါက လုပ်ကိုင်သွားမည်ဖြစ်ပြီး မကြာခင် အသုံးပြုနိုင်မည်ဖြစ်ကြောင်း သိရသည်။

Mytel ၏ အခြေခံဝန်ဆောင်မှုနှုန်းထားများမှာ Mytel အချင်းချင်း ခေါ်ဆိုပါက တစ်မိနစ်လျှင် ၁၀ ကျပ်နှင့် အခြားအော်ပရေတာများ၏ဖုန်းသို့ခေါ်ဆိုပါက တစ်မိနစ်လျှင် ၂၃ ကျပ်ဖြစ်သည်။ သုံးသလောက်ပေး အင်တာနက်အစီအစဉ်တွင် 1MB လျှင် ငါးကျပ် ဖြစ်ပြီး ယင်းမှာ ရာခိုင်နှုန်း ၄၀ သက်သာစေမည်ဟု ဆိုသည်။ ၁၀၀ ရာခိုင်နှုန်း  ပြန်လည်ရရှိမည့် ငွေဖြည့် အစီအစဉ်ကိုလည်း မိတ်ဆက်ခဲ့ပြီး ဥပမာအားဖြင့် ကျပ် ၅၀၀၀ ဖြည့်ပါက ကျပ် ၅၀၀၀ အပိုရရှိမည်ဖြစ်သည်။

ဖုန်းပြောခကောက်ခံရာတွင် တစ်စက္ကန့်ချင်းအခြေခံပြီးကောက်ခံမည်ဟု ဆိုသည်။ ဆင်းမ်ကတ်မှာ တစ်ကတ်လျှင် ကျပ် ၁၅၀၀ ဖြစ်သည်။

“မြန်မာနိုင်ငံမှာ ၂၀၁၄ ခုနှစ်က ဆင်းမ်ကတ်သုံးစွဲမှု ငါးသန်းပဲရှိခဲ့ပြီး ၂၀၁၈ ခုနှစ်မှာ သန်း ၅၀ လောက် ရှိလာပါတယ်။ ဒီလေးနှစ်အတွင်းမှာ ဆင်းမ်ကတ်သုံးစွဲနိုင်မှုက ရာခိုင်နှုန်း ၉၀ လောက်တိုးတက်ခဲ့တာ ဖြစ်ပါတယ်။ ဒါပေမဲ့ အဓိကအားဖြင့် နိုင်ငံ့လူဦးရေရဲ့ ရာခိုင်နှုန်း ၇၀ လောက် နေထိုင်နေကြတဲ့ကျေး  လက်ဒေသတွေမှာ တစ်ဝက်လောက်က မိုဘိုင်းဖုန်းတွေသုံးစွဲနိုင်ခြင်း မရှိသေးဘူးဆိုတာကို တွေ့ရမှာဖြစ်ပါတယ်။ မြန်မာနိုင်ငံရဲ့ မိုဘိုင်းဖုန်းသုံးစွဲမှုဟာ ခုချိန်မှာ ရာခိုင်နှုန်း ၉၀ ကျော်လာပြီဆိုပေမယ့် ဒေသတွင်းနိုင်ငံတွေနဲ့ နှိုင်းယှဉ်ရင်တော့ အလယ်အလတ် အဆင့်ပဲရှိပါသေးတယ်။ အိန္ဒိယနဲ့ထိုင်းမှာဆိုရင် မိုဘိုင်းဖုန်းသိပ်သည်းဆဟာ ၁၀၀ ရာခိုင်နှုန်း အထက်မှာ ရှိနေတာဖြစ်ပါတယ်။ ဒါကြောင့် ကျွန်တော်တို့ဆီမှာ အလားအလာတွေအများကြီး ရှိနေပါသေးတယ်။ အထူးသဖြင့် မိုဘိုင်း အင်တာနက်နဲ့ Broadband အင်တာနက်တွေမှာ အများကြီးလုပ်လို့ ရပါသေးတယ်” ဟု Mytel ၏ ပြင်ပဆက်ဆံရေးအရာရှိချုပ် ဦးဇော်မင်းဦးက ပြောကြားသည်။

Mytel ၏ မိုက်တယ် Package အစီအစဉ်မှာလည်း အော်ပရေတာအားလုံးအနက် စိတ်ဝင်စားစရာဖြစ်လာပြီး ပထမတစ်လအတွင်း ကျပ် ၄၀၀၀ ဖြင့် အင်တာနက်အတွက်  5 GB  နှင့် ဖုန်းပြောခြင်းအတွက် မိနစ်၂၅၀ (Mytel အချင်းချင်း) အသုံးပြုခွင့်ကိုရရှိမည် ဖြစ်သည်။

Mytel ကုမ္ပဏီသည် မြန်မာနှင့်ဗီယမ်နမ်နှစ်နိုင်ငံမှ ကုမ္ပဏီများ ပူးပေါင်းတည်ထောင်ထားသည့် အော်ပရေတာတစ်ခုဖြစ်ပြီး မြန်မာ့ ဆက်သွယ်ရေးဈေးကွက်ဆိုင်ရာ အသိအမြင်များကို မြန်မာကုမ္ပဏီများဘက်မှ တာဝန်ယူ လုပ်ဆောင်ရမည်ဖြစ်ပြီး ဗီယက်နမ်ဆက်သွယ်ရေးကုမ္ပဏီ Viettel မှ နည်းပညာပိုင်း တာဝန်ယူဆောင်ရွက်ခြင်းဖြစ်သည်။

Mytel က Fiber နည်းပညာကို အသုံးပြုပြီး ဒေတာ(အင်တာနက်)နှင့် အသံနှစ်မျိုးစလုံးကို တစ်ပြိုင်နက် အသုံးပြုနိုင်မည့် VOLTE နည်းပညာဖြင့် ၀န်ဆောင်မှုပေးမည်

Mytel က Fiber နည်းပညာကို အသုံးပြုပြီး ဒေတာနှင့်အသံနှစ်မျိုးကို တစ်ပြိုင်နက် အသုံးပြုနိုင်မည့် VOLTE နည်းပညာဖြင့် ၀န်ဆောင်မှုပေးမည်ဖြစ်ကြောင်း Mytel မြန်မာကုမ္ပဏီမှ သိရသည်။

ပြည်တွင်း၌ စတုတ္ထမြောက် ဆက်သွယ်ရေးအော်ပရေတာ Mytel က ဆင်းကတ်များကို ပြီးခဲ့သည့် မတ် ၁၅ ရက်တွင် နေပြည်တော်၊ ကရင်ပြည်နယ်နှင့် ပဲခူးတိုင်း အရှေ့ပိုင်းတို့တွင် စတင်ရောင်းချပေးခဲ့ပြီး 4G ကွန်ရက်ဝန်ဆောင်မှုကို တစ်မိနစ်လျှင်၂၃ ကျပ်ဖြင့် အသုံးပြုနိုင်ပြီဖြစ်သည်။ ကျန်ရှိနေသည့် အခြားပြည်နယ်နှင့် တိုင်းဒေသကြီး ၁၅ ခုတွင် ကွန်ရက်ချဲ့ထွင်နေပြီး အသုံးပြုရန် အသင့်ဖြစ်သည့် ဇွန်လတွင် အပြီးသတ် အကောင်အထည်ဖော် ဆောင်ရွက်ပေးသွားမည်ဖြစ်သည်။

Mytel သည် Fiber နည်းပညာကို အသုံးပြထားသည့်အတွက် မြန်ဆန်သောအင်တာနက်နှင့် ကောင်းမွန်သော လိုင်းဆွဲအားကို အသုံးပြုနိုင်မည်ဖြစ်သည်။ Fiber နည်းပညာသည် မြန်မာပြည်၏ ကွန်ရက်သိပ်သည်းဆအား လူတစ်သန်းလျှင် ၁၅၀၀ ကီလိုမီတာအထိ မြှင့်တင်ပေးနိုင်မည်ဖြစ်သည်။

“ဆက်သွယ်ရေးလုပ်ငန်းက မြန်မာနိုင်ငံအတွက် အရမ်းအခရာကျပါတယ်။ ဒီဈေးကွက်မှာ အထူးလိုအပ်နေတဲ့ နေရာလွတ်တွေကိုလည်းဖြည့်ရင်း တစ်နိုင်ငံလုံးအတွက် 4G ကွန်ရက်နဲ့ အကောင်းဆုံး ဒေတာဝန်ဆောင်မှုတွေကို ပေးအပ်သွားဖို့ ရည်ရွယ်ထားပါတယ်။ Mytel ဟာ မြန်နှုန်းမြင့် 4G အင်တာာနက်ကို အသင့်တော်ဆုံးဈေးနှုန်းနဲ့ အကောင်းဆုံး အသုံးပြုနိုင်အောင် လုပ်ဆောင်ပေးသွားမှာ ဖြစ်ပါတယ်” ဟု Mytel ၏ Chief External Relations Officer ဖြစ်သူ ဦးဇော်မင်းဦးက ပြောကြားသည်။

လာမည့်ဇွန်လကုန်ပိုင်းတွင် ရန်ကုန်နှင့် အခြားသော မြို့ကြီးများသို့ ဆင်းမ်ကတ်များကို ဆက်လက် ရောင်းချပေးသွားမည်ဖြစ်သည်။ Mytel အနေဖြင့် အသံခေါ်ဆိုမှုကို မြန်မာနိုင်ငံ လူဦးရေ၏ ၉၂ ရာခိုင်နှုန်းအထိ ကွန်ရက်လွှမ်းခြုံနိုင်မည်ဖြစ်ပြီး မြို့ပြတွင် ၉၉ ဒသမ ၃ ရာခိုင်နှုန်းနှင့် ကျေးလက်ဒေသတွင် ၈၈ ရာခိုင်နှုန်းဖြစ်ကြောင်း သိရသည်။ ဒေတာ (အင်တာနက်) ၀န်ဆောင်မှုတွင်မူ မြန်မာနိုင်ငံ လူဦးရေ၏ ၇၈ ရာခိုင်နှုန်းအထိ ယခုနှစ်အတွင်း ကွန်ရက်လွှမ်းခြုံ ဖြန့်ကြက်နိုင်ရန် ရည်မှန်းထားကြောင်း Mytel မှ သိရသည်။ ဒေတာဝန်ဆောင်မှုတွင် မြို့ပြ၌ ၉၆ ရာခိုင်နှုန်းနှင့် ကျေးလက်ဒေသတွင် ၆၆ ရာခိုင်နှုန်းဖြစ်ကြောင်း သိရသည်။

၂၀၁၆-၂၀၁၇ ဘဏ္ဍာနှစ်အတွင်း ဆက်သွယ်ရေး အော်ပရေတာ သုံးခု၏ ဈေးကွက်ဝေစုရယူမှု အချိုးအစားမှာ MPT က ၅၁ ရာခိုင်နှုန်း၊ တယ်လီနောက ၃၈ ရာခိုင်နှုန်းနှင့် အူရီဒူးက ၁၁ ရာခိုင်နှုန်း ဖြစ်ကြောင်း သိရသည်။ Mytel ကုမ္ပဏီကို ၂၀၁၆ ခုနှစ်တွင် တည်ထောင်ခဲ့ပြီး ဗီယက်နမ်အခြေစိုက် Viettel ကုမ္ပဏီနှင့် ပူးပေါင်းကာ ပြည်တွင်း၌ ဆက်သွယ်ရေး လုပ်ငန်းများကို ၀န်ဆောင်မှု ပေးသွားမည်ဖြစ်သည်။

 

ဆက်သွယ်ရေး အော်ပရေတာများ၏ ဈေးနှုန်းပြိုင်ဆိုင်မှုအပေါ် ထိန်းကျောင်းကြပ်မတ်ရခြင်းမှာ ၀န်ဆောင်မှု အရည်အသွေးများ ထိန်းသိမ်းနိုင်ရန် အတွက်ဟု ဆက်သွယ်ရေး ညွှန်ကြားမှုဦးစီးဌာနဆို

နည်းပညာဆွေးနွေးပွဲ တစ်ခုတွင် လက်ကိုင်ဖုန်း အသုံးပြုနေသူများအား တွေ့ရစဉ်

ဆက်သွယ်ရေး အော်ပရေတာများ၏ ဈေးနှုန်းပြိုင်ဆိုင်မှုအပေါ် ထိန်းကျောင်းကြပ်မတ်ရခြင်းမှာ ၎င်းတို့၏၀န်ဆောင်မှု အရည်အသွေးများကို ထိန်းသိမ်းနိုင်ရန်နှင့် ကျဆင်းသွားခြင်း မရှိစေရေးအတွက် ကာကွယ်ရန်အတွက်ဖြစ်ကြောင်း ဆက်သွယ်ရေး ညွှန်ကြားမှုဦးစီးဌာနမှ သိရသည်။

လက်ရှိတွင် ဆက်သွယ်ရေး အော်ပရေတာ သုံးခုအပေါ် အနိမ့်ဆုံး ဈေးနှုန်းသတ်မှတ်ချက်နှင့် ပတ်သက်၍ ကန့်သတ်ထားချက်များ ရှိနေပြီး နောက်ဆုံးဈေးကွက် ၀င်ရောက်လာမည့် စတုတ္ထမြောက် ဆက်သွယ်ရေး အော်ပရေတာဖြစ်သည့် Mytel အနေဖြင့် အဆိုပါ ကန့်သတ်ချက်များကို ကျော်လွန်၍ ၎င်းတို့စိတ်ကြိုက် အထူးနှုန်းထားများဖြင့် စတင်မိတ်ဆက် ရောင်းချနိုင်ရန် အခက်အခဲများ ကြုံတွေ့နေရကြောင်း သိရသည်။  လက်ရှိ သတ်မှတ်ချက်နှုန်းထားများဖြင့် စတင်ဝန်ဆောင်မှုပေးပါက လျင်မြန်စွာ စတင်နိုင်မည် ဖြစ်သော်လည်း ၎င်းတို့စိတ်ကြိုက် နှုန်းထားဖြင့် ၀န်ဆောင်မှုပေးနိုင်ရန်မူ ကြန့်ကြာခြင်းများ ရှိနိုင်ကြောင်း သိရသည်။

“ဆက်သွယ်ရေး အော်ပရေတာတွေရဲ့ ဈေးနှုန်းပြိုင်ဆိုင်မှုတွေအပေါ် ထိန်းကျောင်းနေရတာက သူတို့ရဲ့ ၀န်ဆောင်မှု အရည်အသွေးတွေ အရမ်းကျဆင်း မသွားစေဖို့အတွက် ဖြစ်ပါတယ်။ အမှန်ဆိုရင် ဒီလိုမျိုး ကန့်သတ်ချက်တွေ သိပ်မလုပ်ချင်ပေမယ့် တခြားနိုင်ငံတွေမှာ ဈေးနှုန်းပြိုင်ဆိုင်မှုတွေ ဆင်နွှဲရင်း ၀န်ဆောင်မှု အရည်အသွေးအပေါ် ထိခိုက်မှုတွေဖြစ်ခဲ့တဲ့ သာဓကတွေကို နမူနာယူပြီး သင်ခန်းစာယူရတာ ဖြစ်ပါတယ်။ အမြတ်ရနေမှသာ ပြန်ရင်းနှီးမြှုပ်နှံပြီး ပိုကောင်းလာအောင် လုပ်နိုင်မှာ ဖြစ်ပါ တယ်။ ဈေးတွေအပြိုင်အဆိုင် လျှော့ကြတဲ့အခါ အရင်းနီးပါးလောက် ဖြစ်လာမယ်၊ အရှုံးပေါ်လာမယ်ဆိုရင် အရည်အသွေးကို ဂရုမစိုက်တော့ဘဲ ဖြစ်သလို လုပ်တာတွေကနေ အရည်အသွေး ကျဆင်းမှုတွေ ကြုံရနိုင်တယ်” ဟု ဆက်သွယ်ရေး ညွှန်ကြားမှု ဦးစီးဌာနမှ တာဝန်ရှိသူက ပြောကြားသည်။

လက်ရှိတွင် ၀န်ဆောင်မှုဈေးနှုန်းနှင့် ပတ်သက်၍ ဆက်သွယ်ရေး ညွှန်ကြားမှု ဦးစီးဌာနအနေဖြင့် Mytel နှင့်ဆွေးနွေးမှုများ မရှိသေးကြောင်း သိရသည်။ သို့သော် အခြားဆက်သွယ်ရေး အော်ပရေတာများ ပါဝင်သော ဆွေးနွေးမှုများ ပြုလုပ်ဖွယ်ရှိကြောင်း သိရသည်။

“သူက အခုမှဝင်ခါစ အသစ်ဖြစ်လို့ အထူးနှုန်းထားတွေကို ခွင့်ပြုမလား ဆိုတာက အခြားဆက်သွယ်ရေး အော်ပရေတာတွေရဲ့ အကြံပြုချက်၊ ခွင့်ပြုချက်တွေ အပါအ၀င်နဲ့ ဆွေးနွေးရမှာ ဖြစ်ပါတယ်” ဟု အဆိုပါ တာဝန်ရှိသူက ပြောကြားသည်။

ဆက်သွယ်ရေး အော်ပရေတာ သုံးခုစလုံးအနေဖြင့် ဆင်းမ်ကတ်များကို အခမဲ့ ဖြန့်ဝေခြင်း၊ ၀န်ဆောင်မှုနှင့် ဈေးနှုန်းများကို သတ်မှတ်နှုန်းထားအောက် လျှော့ချခြင်းများ မပြုလုပ်ရန် ပြီးခဲ့သည့် နှစ်အတွင်းက သဘောတူညီ ထားခဲ့ရကြောင်း ဖေဖော်ဝါရီ ၉ ရက်က ဆက်သွယ်ရေး အော်ပရေတာ သုံးခုစလုံးက ပူးတွဲထုတ်ပြန်ခဲ့သည်။

ဆက်သွယ်ရေး လုပ်ငန်းများအနေဖြင့် မြန်မာနိုင်ငံ၏ ဖွံ့ဖြိုးတိုးတက်မှုကို ပံ့ပိုးရန်အတွက် ကတိပြုခဲ့ကြပြီး တာဝန်ရှိသော အော်ပရေတာများ အနေဖြင့် သုံးစွဲသူများက ပိုကောင်းသည့် ၀န်ဆောင်မှုများ ရရှိစေရန်နှင့် ကောင်းမွန်သော ဈေးကွက်တစ်ခု၏ သင်္ကေတများဖြစ်သော မှန်ကန်သည့် ဈေးနှုန်းယှဉ်ပြိုင်မှု အလေ့အထများကို လိုက်နာရန် အသေအချာ ဆောင်ရွက်ခဲ့ကြောင်း သိရသည်။ သက်ဆိုင်ရာ အာဏာပိုင်များက ချမှတ်ထားသော စည်းမျဉ်းစည်းကမ်းများ အပေါ်တွင် အခြေခံပြီး မျှတစွာ ယှဉ်ပြိုင်ရန် သဘောတူညီခဲ့ကြပြီး ဆက်သွယ်ရေးဆိုင်ရာ အကောင်းဆုံး အလေ့အထများနှင့် ကျင့်ဝတ်ဆိုင်ရာ စီးပွားရေး လမ်းညွှန်ချက်များကို လိုက်နာရန် သဘောတူညီခဲ့ကြကြောင်း သိရသည်။ ဆက်သွယ်ရေး အော်ပရေတာများ လိုက်နာကျင့်သုံးရမည့် စည်းကမ်းဘောင်များကို ၂၀၁၇ ခုနှစ်၊ ဇွန် ၂၈ ရက်တွင် ဆက်သွယ်ရေး ညွှန်ကြားမှု ဦးစီးဌာန၏ Pricing and Tariff Regulatory Framework ပါ သတ်မှတ်ကြမ်းခင်းဈေးအတိုင်း လိုက်နာဆောင်ရွက်ရန် ဆိုသည်မှာလည်း ယင်းကဲ့သို့ စည်းမျဉ်းစည်းကမ်းများ အနက်မှ အချက်တစ်ခုပင် ဖြစ်သည်။

 

အင်တာနက်ဝန်ဆောင်မှုအတွက် 2600 MHz လိုင်စင်လုပ်ကိုင်ခွင့်တွင် လစ်လပ်တစ်နေရာ အစားထိုးရွေးချယ်ခြင်းကို လတ်တလော လုပ်ဆောင်ဦးမည်မဟုတ်သေး

အင်တာနက်ဝန်ဆောင်မှုအတွက် 2600 MHz လှိုင်းနှုန်းစဉ်လိုင်စင် လုပ်ကိုင်ခွင့်တွင် မူလကရွေးချယ်ခံခဲ့ရသည့် ရတနာပုံတယ်လီပို့အနေဖြင့် လုပ်ကိုင်ခြင်းမရှိတော့သဖြင့် ပြန်လည်အစားထိုးရွေးချယ်ရန် လတ်တလောတွင် လုပ်ဆောင်ဦးမည်မဟုတ်ကြောင်း ဆက်သွယ်ရေးညွှန်ကြားမှုဦးစီး ဌာနမှ သတင်းရရှိသည်။

လစ်လပ်သွားသော တစ်နေရာမှာ နယ်မြေ (၂) နှင့် နယ်မြေ (၃) တို့ဖြစ်သော ကြောင့် သုံးစွဲသူများပြားနိုင်သည့် ရန်ကုန်တိုင်းဒေသကြီး၊ မန္တလေးတိုင်းဒေသကြီးနှင့် ဧရာဝတီတိုင်းဒေသကြီးတို့ ပါဝင်နေကြောင်း သိရသည်။

“လက်ရှိမှာ ဈေးကွက်အခြေအနေကို ကြည့်ရဦးမယ်။ လိုအပ်မှပဲ လစ်လပ်သွားတဲ့ နေရာအတွက် တင်ဒါခေါ်မှာဖြစ်ပါတယ်။ မကြာသေးခင်က ဆက်သွယ်ရေးအော်ပရေတာတွေအတွက်လည်း 1800 MHz ကို ချပေးခဲ့ပြီးပြီဆိုတော့ အင်တာနက်အတွက်  လုံလောက်မှုရှိနေတဲ့ အခြေအနေမျိုးတွေ့ ရတယ်။ ဒါကြောင့် လောလောဆယ်မှာတော့ ထပ်ရွေးချယ်ဦးမှာ မဟုတ်ပါဘူး” ဟု ဆက်သွယ်ရေးညွှန်ကြားမှုဦးစီးဌာနမှ တာဝန်ရှိသူက ပြောကြားသည်။

2600 MHz လှိုင်းနှုန်းစဉ် လိုင်စင်ရရှိခဲ့သော ကုမ္ပဏီလေးခုမှာ Fortune International, Global Technology, Amara Communications နှင့် ရတနာပုံတယ်လီပို့တို့ဖြစ်ကြပြီး လက်ရှိတွင် ရတနာပုံတယ်လီပို့မှာ သတ်မှတ်အချိန်အတွင်း ပေးသွင်းစရာရှိသည်များကို ဆက်လက်ပေးသွင်းခြင်း မရှိ တော့သောကြောင့် ဆက်လက်လုပ်ကိုင်မှု မရှိတော့ခြင်းဖြစ်ကြောင်း သိရသည်။

2600 MHz လှိုင်းနှုန်းစဉ်မှာ နယ်မြေ (၁) အဖြစ် နေပြည်တော်၊ မကွေး၊ ပဲခူး၊ မွန်၊ ကရင်၊ တနင်္သာရီ၊ နယ်မြေ (၂) အဖြစ် ရန်ကုန်၊ ဧရာဝတီ၊ ရခိုင်နှင့် နယ်မြေ (၃)အဖြစ် မန္တလေး၊ စစ်ကိုင်း၊ ချင်း၊ ရှမ်း၊ ကချင်၊ ကယားစသည့် နယ်မြေသုံးခု သတ်မှတ်ထားရာ နယ်မြေ (၁) တွင် Fortune International က ဒေါ်လာ ၆ ဒသမ ၀၉ သန်းဖြင့်လည်းကောင်း၊ Global Technology က ဒေါ်လာ  ၇  ဒသမ ၀၃ သန်းဖြင့်လည်းကောင်း၊ နယ်မြေ (၂) တွင် Amara Communications က ဒေါ်လာ ၉၅ ဒသမ ၈၁ သန်း၊ ရတနာပုံတယ်လီပို့က ၈၃ ဒသမ ၄၄ သန်းဖြင့် လည်းကောင်း၊ နယ်မြေ (၃) တွင် ရတနာပုံတယ်လီပို့က ဒေါ်လာ ၂၇ ဒသမ ၂၄ သန်း၊ Amara Communications က ဒေါ်လာ ၂၄ ဒသမ ၅၅ သန်းဖြင့်လည်းကောင်း လေလံအောင်ပြီး လုပ်ကိုင်ခွင့်ရရှိခဲ့ကြခြင်း ဖြစ်သည်။

2600 MHz လှိုင်းနှုန်းစဉ်အတွက် ၁၅ နှစ်ကြာလုပ်ကိုင်ခွင့် လိုင်စင်ကို ၂၀၁၆ အောက်တိုဘာလအတွင်း လေလံစနစ်ဖြင့် ရောင်းချပေးခဲ့ပြီး စည်းကမ်းချက်အရ လိုင် စင်ကြေး၏ ရာခိုင်နှုန်း ၅၀ ကို ဦးစွာပေး သွင်းရမည်ဖြစ်ပြီး ကျန်ရှိသည့် ရာခိုင်နှုန်း  ၅၀ ကို တစ်နှစ်လျှင် ၂၅ ရာခိုင်နှုန်းဖြင့်ဆက် လက်ပေးသွင်းရမည်ဖြစ်ကြောင်း သိရသည်။ ပေးသွင်းထားရသည့် အာမခံကြေးငွေမှာ ဒေါ်လာငါးသိန်းဖြစ်သည်။

2600 MHz လှိုင်းနှုန်းစဉ် လိုင်စင်လုပ်ကိုင်ခွင့်ရထားသော Amara Communications အနေဖြင့် 4G အင်တာနက် ၀န်ဆောင်မှုများကို ၂၀၁၈ ခုနှစ် ပထမသုံးလအတွင်း ၀န်ဆောင်မှုစတင်နိုင်ရန်ပြင်ဆင်လျက်ရှိသည်။

ပြည်တွင်းဆက်သွယ်ရေးကုမ္ပဏီဖြစ်သော Amara Communications ကုမ္ပဏီအနေဖြင့် TD-LTE နည်းပညာအခြေခံ 4G အသုံးပြုနိုင်သော 2600 MHz ရေဒီယိုလှိုင်းနှုန်းစဉ်မြင့်ကို ၂၀၁၆ ခုနှစ်က တင်ဒါ  အောင်မြင်ခဲ့ပြီး ယင်းနည်းပညာမြင့် Mobile Broadband ၀န်ဆောင်မှုကို ပထမဆင့် အနေဖြင့် ရန်ကုန်နှင့် မန္တလေးတို့တွင် သုံးစွဲ နိုင်ရန် စီစဉ်နေပြီဖြစ်ကြောင်း သိရသည်။

၂၀၁၈ ခုနှစ်အတွင်း မြန်မာနိုင်ငံသို့ တယ်လီကွန်းဆက်သွယ်ရေးနှင့် ဆက်သွယ်ရေးဆိုင်ရာ ၀န်ဆောင်မှုလုပ်ငန်းများတွင် နိုင်ငံခြားရင်းနှီးမြှုပ်နှံမှု ဆက်လက်အားကောင်းနေမည်ဟု MIC အတွင်းရေးမှူး ပြောကြား

ရန်ကုန်မြို့ မရမ်းကုန်းမြို့နယ်ရှိ ဆက်သွယ်ရေးတာဝါတိုင်တစ်ခုကို တွေ့ရစဉ် (ဓာတ်ပုံ-ကြည်နိုင်)

ပြီးခဲ့သည့် ၂၀၁၇ ခုနှစ်အတွင်း မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု ၀င်ရောက်မှုတွင် ဆက်သွယ်ရေးကဏ္ဍမှ အများဆုံးဝင်ရောက်ခဲ့ခြင်းဖြစ်ပြီး ၂၀၁၈ ခုနှစ်အတွင်းတွင်လည်း တယ်လီကွန်းဆက်သွယ်ရေးနှင့် ဆက်သွယ်ရေးဆိုင်ရာဝန်ဆောင်မှု လုပ်ငန်းများတွင် နိုင်ငံခြားရင်းနှီးမြှုပ်နှံမှု ဆက်လက်အားကောင်းနေမည်ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်အတွင်း ရေးမှူးဦးအောင်နိုင်ဦးက ပြောကြားသည်။

“ဆက်ပြီး အားကောင်းနေမှာက တယ်လီကွန်းကဏ္ဍ ဖြစ်ပါတယ်။ တယ်လီကွန်းနဲ့ ပတ်သက်ပြီး value added ပေါ့။ တယ်လီကွန်းနဲ့ပတ်သက်တဲ့ ၀န်ဆောင်မှုလုပ်ငန်းတွေ ၂၀၁၈ ခုနှစ်ထဲမှာ ပိုပြီးဝင်လာနိုင်တယ်” ဟု ဦးအောင်နိုင်ဦးက ပြောကြားသည်။

၂၀၁၈ ခုနှစ်အတွင်း ကောင်းသည့် အလားအလာ မျှော်မှန်းချက်များရှိသကဲ့သို့ မျှော်မှန်းသကဲ့သို့ မဖြစ်နိုင်သည့် ဖြစ်စဉ်များလည်းရှိကြောင်း သိရသည်။

“၂၀၁၈ ခုနှစ်မှာ ကောင်းတာတွေရှိနေသလို ကျွန်တော်တို့ မျှော်မှန်းသလို မဖြစ်တာတွေ ရှိနေပါသေးတယ်။ အဲဒါကတော့ မောင်တောဒေသမှာဖြစ်တဲ့ ဖြစ်စဉ်တွေက ကျွန်တော်တို့တိုင်းပြည်ရဲ့ ပုံရိပ်ကိုထိခိုက်မှုတွေရှိ ခဲ့တယ်။ အဲဒါနဲ့ဆက်စပ်ပြီး ဘာဖြစ်သွားလဲဆိုတော့ ကျွန်တော်တို့နဲ့အီးယူနဲ့ နှစ်နိုင်ငံ ရင်းနှီးမြှုပ်နှံမှုအကာအကွယ်ပေးရေး စာချုပ်နဲ့ ပတ်သက်ပြီး ညှိနေတာက ပြီးသလောက် ရှိနေပြီ။ အဲဒီအချိန်မှာ ဒါကို ရပ်လိုက်တယ်။ ရပ်လိုက်တဲ့အတွက် မူလကျွန်တော်တို့ မျှော်မှန်းခဲ့တာက ၂၀၁၇ မှာ ဒီစာချုပ်က ပြီးအောင်ညှိမယ်၊ လက်မှတ်ထိုးမယ်၊ ၂၀၁၈၊ ၂၀၁၉ မှာ တိုင်းပြည်ထဲမှာအီးယူ ရင်းနှီးမြှုပ်နှံမှုတွေ အများကြီးဝင်လာအောင် Promote လုပ်မယ်ဆိုပြီးတော့မှ အားကြိုးမာန်တက် ဆောင်ရွက်ခဲ့ပါတယ်။ သုံးနှစ်လောက် အချိန်ယူပြင်ဆင်ခဲ့ပါတယ်” ဟု ဦးအောင်နိုင်ဦးက ပြောကြားသည်။

သို့သော်လည်း ရပ်ဆိုင်းလိုက်တဲ့အတွက် ၂၀၁၈ခုနှစ်အတွင်း အနောက်နိုင်ငံများမှ ရင်းနှီးမြှုပ်နှံများစွာ ၀င်ရောက်လာရန် မျှော်မှန်း၍မရနိုင်ကြောင်း ၎င်းကဆိုသည်။

“အဲဒီတော့ ခြုံပြောရရင် ၂၀၁၈ သည် တိုင်းပြည်အတွက် Legal Infrastructure ပိုင်းကပြောရင် ပိုပြီးအားကောင်းတဲ့ ဥပဒေတွေ Legal Framework ဖြစ်လာတဲ့အတွက်ကြောင့် စီးပွားရေးဘက်မှာ လုပ်သာကိုင်သာ ပိုပြီးရှိလာတယ်။ အခွင့်အလမ်းတွေ ပိုပြီးများလာတယ်။ ကဏ္ဍအလိုက် လုပ်သားအင်အား အခြေပြုတဲ့လုပ်ငန်းတွေ ပိုပြီးဝင်လာမယ်” ဟု ၎င်းက သုံးသပ်သည်။

လက်ရှိအချိန်တွင် မြန်မာနိုင်ငံတွင် နိုင်ငံတကာမှ လာရောက်ရင်းနှီးမြှုပ်နှံရန် စိတ်ဝင်စားမှုမြင့်တက်နေပြီး အထူးသဖြင့် အာဆီယံနိုင်ငံများ၊ ဂျပန်နှင့် တရုတ်နိုင်ငံတို့မှ အဓိကစိတ်ဝင်စားမှု မြင့်တက်နေခြင်းဖြစ်ကြောင်း မြန်မာနိုင်ငံရင်းနှီးမြှုပ်နှံမှု ကော်မရှင် ဒုတိယဥက္ကဋ္ဌ ဒေါက်တာသန်းမြင့်က ပြောကြားသည်။

“နိုင်ငံခြားကလည်း ကျွန်တော်တို့နိုင်ငံမှာ လာရောက်ရင်းနှီးမြှုပ်နှံဖို့ စိတ်ဝင်စားမှု ရှိပါတယ်။ အထူးသဖြင့် အာဆီယံနိုင်ငံများနဲ့ ဂျပန်၊ တရုတ် စသည်ဖြင့် အလားအလာကောင်းတွေ ရှိပါတယ်” ဟု ဒေါက်တာသန်းမြင့်က ပြောကြားသည်။

၂၀၁၇-၂၀၁၈ ဘဏ္ဍာနှစ် ဒီဇင်ဘာ တတိယပတ်အထိ မြန်မာနိုင်ငံအတွင်းသို့ ရင်းနှီးမြှုပ်နှံမှု တိုးမြှင့်ခြင်းအပါအ၀င် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ငါးဘီလျံကျော် ၀င်ရောက်ထားပြီး စင်ကာပူနိုင်ငံက  အများဆုံး ၀င်ရောက်မြှုပ်နှံထားကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် သတင်းထုတ်ပြန်ချက် အမှတ်စဉ် (၁၄/ ၂၀၁၇) အရ သိရသည်။

Wifi Internet Service များ ခွင့်ပြုမိန့်ချပေးရာတွင် ဆက်သွယ်ရေးညွှန်ကြားမှု ဦးစီးဌာနက တိုင်းဒေသကြီးနှင့် ပြည်နယ်အစိုးရ၏ သဘောထားမှတ်ချက် တောင်းခံခြင်း မပြုဘဲ ဆောင်ရွက်ခဲ့ကြောင်း တိုင်းဒေသကြီးဝန်ကြီး ပြောကြား

ရန်ကုန်မြို့၊ တာမွေမြို့နယ်ရှိ ဓာတ်တိုင် တစ်တိုင်တွင် Wireless Wifi တပ်ဆင်ထားသည်ကို တွေ့ရစဉ်

Wifi Internet Service များ ခွင့်ပြုမိန့်ချပေးရာတွင် ဆက်သွယ်ရေးညွှန်ကြားမှု ဦးစီးဌာနမှ တိုင်းဒေသကြီးနှင့် ပြည်နယ်အစိုးရ၏ သဘောထားမှတ်ချက် တောင်းခံခြင်းမပြုဘဲ ဆောင်ရွက်ခဲ့ကြောင်း ရန်ကုန်တိုင်းဒေသကြီး လျှပ်စစ်၊ စက်မှု လက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က နိုဝင်ဘာ ၇ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ပဉ္စမပုံမှန် အစည်းအဝေး ၁၅ ရက်မြောက် နေ့တွင် ပြောကြားခဲ့ခြင်းဖြစ်သည်။

အဆိုပါကိစ္စအား စမ်းချောင်းမြို့နယ် မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဦးအောင်မျိုးက ရန်ကုန်မြို့ရှိ မြို့နယ်များတွင် တပ်ဆင်နေသည့် Wifi Internet Service ၀န်ဆောင်မှုပေးမည့် ပစ္စည်းများကို မည်သည့်အဖွဲ့အစည်းများက တာဝန်ယူ စစ်ဆေးခဲ့ပါသနည်း။ ထုတ်လွှင့်သည့် လှိုင်းအားများကြောင့် ကလေးသူငယ်များနှင့် ကိုယ်ဝန်ဆောင်မိခင်များ ကျန်းမာရေးထိခိုက်မှု ရှိ မရှိ၊ YESC မှ အခွန်၊ အခ မည်မျှရရှိသည်ကို သိလိုကြောင်း ကြယ်ပွင့်ပြ မေးခွန်းနှင့် ပတ်သက်၍ ၀န်ကြီးက ပြန်လည် ဖြေကြားရာတွင် ထည့်သွင်းပြောကြား ခဲ့ခြင်းဖြစ်သည်။

“Wifi Internet Service အသုံးပြု ပစ္စည်းများသည် ပြည်သူလူထု ကျန်းမာရေးကို ထိခိုက်နိုင်မှု မရှိနိုင်ပါ ဆိုတာကို တစ်ခါတုန်းက လွှတ်တော်မှာ ဖြေပါတယ်။ Wifi Internet တွေ၊ ဆက်သွယ်ရေး Fiber Cable တွေ ဆက်သွယ်မှုနဲ့ ပတ်သက်ပြီးတော့ ခွင့်ပြုမိန့်၊ ခွင့်ပြုချက်ကို ပေးနေတာကို ပို့ဆောင်ဆက်သွယ်ရေး ၀န်ကြီးဌာနရဲ့ ဆက်သွယ်ရေး ညွှန်ကြားမှု ဦးစီးဌာနက ပေးနေတာ ဖြစ်ပါတယ်။ ထိုသို့ပေးနေရာမှာလည်း ဆက်သွယ်ရေး ညွှန်ကြားမှု ဦးစီးဌာနကနေပြီးတော့ သက်ဆိုင်ရာ တိုင်းဒေသကြီး ပြည်နယ်အစိုးရတွေရဲ့ သဘောထားမှတ်ချက်ကို တောင်းခံခြင်းမရှိဘဲ ခွင့်ပြုမိန့်တွေ ပေးနေတာ ဖြစ်တဲ့အတွက် ကျွန်မတို့အနေနဲ့ ရန်ကုန်တိုင်းဒေသကြီး အစိုးရအဖွဲ့က ခေါ်ယူပြီး တွေ့ဆုံညှိနှိုင်းပြီး ဖြစ်ပါတယ်” ဟု ၀န်ကြီး ဒေါ်နီလာကျော်က ပြောကြားသည်။

ထို့ပြင် ဆက်သွယ်ရေး ညွှန်ကြားမှု ဦးစီးဌာနက ခွင့်ပြုမိန့်ပေးလိုက်သည့် Wifi နှင့် ပတ်သက်၍ သော်လည်းကောင်း၊ Fiber Cable နှင့်ပတ်သက်၍ သော်လည်းကောင်း ဆက်သွယ်ရေး လုပ်ငန်းများတွင် ရန်ကုန်တိုင်း လျှပ်စစ်ဓာတ်အားပေးရေး ကော်ပိုရေးရှင်း၏ ဓာတ်တိုင်များတွင် လာရောက် တပ်ဆင်ထားမှုသည် ရန်ကုန်လျှပ်စစ် ဓာတ်အားပေးရေး ကော်ပိုရေးရှင်းမှ Wifi Internet Service လုပ်ငန်း လုပ်ကိုင်ခွင့်ပြုထားတဲ့ ကုမ္ပဏီများ၏ ယခင်အစိုးရ လက်ထက်က ရန်ကုန်လျှပ်စစ် ဓာတ်အားပေးရေး ကော်ပိုရေးရှင်း ဓာတ်တိုင်များ၌  Fiber Cable သွယ်တန်းခြင်း၊ ကြိုးမဲ့ Wifi တပ်ဆင်ခြင်းလုပ်ငန်းကို ကုမ္ပဏီငါးခုကို စာချုပ်ချုပ်ဆို ခွင့်ပြုထားပြီး ဖြစ်ကြောင်း ၎င်းကဆက်လက် ပြောကြားသည်။

“ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းအနေနဲ့ Cable သွယ်တန်းခြင်းအတွက် တစ်ကီလိုမီတာလျှင် တစ်လ ကျပ် ၃၀၀၀၀ နှုန်းနဲ့လည်းကောင်း၊ ဓာတ်တိုင် တစ်တိုင်လျှင် Wireless Wifi တပ်ဆင်ခြင်းအတွက် တစ်လလျှင် ကျပ် ၁၅၀၀၀ နှုန်းဖြင့် လည်းကောင်း ငှားရမ်းခ ရရှိပါတယ်။ ကုမ္ပဏီငါးခုအတွက် တစ်နှစ်လျှင် စုစုပေါင်း ငှားရမ်းခ ကျပ်သိန်း ၇၀၀ ကျော် YESC မှ ရရှိနေပါတယ်။ YCDC မှလည်း သီးခြားဓာတ်တိုင်နဲ့ မဟုတ်ဘဲနဲ့ YCDC မှတိုင်များ စိုက်ခွင့်ပြုပြီးတော့ ခွင့်ပြုထားတဲ့ တချို့သော ဆက်သွယ်ရေး ကုမ္ပဏီတွေလည်း ရှိပါတယ်။ ဒီအတွက် ရန်ကုန်တိုင်းဒေသကြီး အစိုးရအဖွဲ့ရုံးမှာ ဆက်သွယ်ရေး ညွှန်ကြားမှုဦးစီးဌာန၊ မြန်မာ့ဆက်သွယ်ရေးလုပ်ငန်း၊ YESC နဲ့ YCDC တို့ ညှိနှိုင်းပြီး အစည်းအဝေးလုပ်တာ နှစ်ကြိမ်ရှိသွားပြီ” ဟု ဒေါ်နီလာကျော်က ပြောကြားသည်။