အကယ်ဒမီစိုးသူနှင့် တွေ့ဆုံခြင်း

‘အချိန်ကာလတစ်ခုမရောက်ရင် အမှန်တရားဆိုတာ  မပေါ်လာသေးတာရှိတယ်။ အမှန်တရား ပေါ်လာတဲ့အခါကျရင် အားလုံးသိသွားမှာပါ’

 

ပြည်ပမှ မြန်မာနိုင်ငံသို့ပြန်လည်ရောက်ရှိလာပြီးနောက် ဇာတ်ကားရိုက်ကူးခြင်းများ မပြုလုပ် ဖြစ်ဘဲ ဂီတလုပ်ငန်း အနည်းငယ်ကိုသာလုပ်ကိုင်ခဲ့သူ အကယ်ဒမီစိုးသူ၏ ပထမဆုံးပြန်လည်ရိုက်ကူးမှုအဖြစ် ‘တရားလား’ရုပ်ရှင်ဇာတ်ကားတွင် ပါဝင်တော့မည်ဖြစ်သည်။ အကယ်ဒမီပြေတီဦး၊ အကယ်ဒမီ ၀တ်မှုန်ရွှေရည်တို့နှင့်တွဲဖက်ကာ ဇာတ်ကား ရိုက်ကူးမှုများပြုလုပ်သွားမည့် အကယ်ဒမီ စိုးသူက ယင်းဇာတ်ကားတွင် အောင်မြင်သည့် သူဌေးတစ်ဦးဇာတ်ရုပ်တွင် ပါဝင်တော့မည်ဖြစ်သည်။ တစ်ကျော့ပြန် သရုပ်ဆောင်မှုများအားပြန်လည်တွေ့မြင်ရတော့မည်ဖြစ်သည့် အကယ်ဒမီစိုးသူနှင့် တွေ့ဆုံ၍ ဇာတ်ကားအတွက်ပြင်ဆင်ထားမှုများ၊ ကမ်းလှမ်းလာသည့်ဇာတ်ကားများထဲမှ ယခုဇာတ်ကားကို ရွေးချယ်လက်ခံဖြစ်သည့်အကြောင်းနှင့် လတ်တလောတွင် အကယ်ဒမီစိုးသူမှပြန်လည် တရားစွဲဆိုထားသည့်ဖြစ်ရပ်အပေါ် အမြင်များအား မေးမြန်းဖြစ်ခဲ့သည်။

 

မေး- ဒီဇာတ်ကားမှာ ပါဝင်သရုပ်ဆောင်ဖို့ ဘယ်လို ဆုံးဖြတ်ဖြစ်ခဲ့တာလဲ။

ဖြေ- ရိုက်ကြဖို့ပြောထားတဲ့ထဲက တစ်ကားပေါ့နော်။ ဒါကို အရင်ရိုက်ဖြစ်တာပါ။ မရိုက်ဖြစ်တာက ပြည်ပသွားလိုက်တဲ့အချိန်ကတည်းကဆိုတော့ ၂၀၀၁ လောက်ကတည်း ကပေါ့။ ၁၇ နှစ်လောက်ကြာပြီးမှ ပထမဆုံး ပြန်ရိုက်ဖြစ်တာ။ ပြန်ရောက်တော့လည်း သီချင်းတွေဘာတွေပဲ ရိုက်ဖြစ်တယ်။ ဇာတ်လမ်းအနေနဲ့ ပထမဆုံး ပြန်ရိုက်ဖြစ်တာပါ။

 

မေး-ဒီဇာတ်လမ်းကိုမှ ဘာကြောင့်ရွေးဖြစ်ခဲ့တာလဲ ဆိုတာလည်း သိချင်ပါတယ်။

ဖြေ- အကုန်လုံးကခင်နေကြတော့ ရိုက်ပေးချင်တယ်။ ဒါပေမဲ့ ကိုယ့်ဘက်က တာဝန်မကျေမှာစိုးတော့ ငြင်းဖြစ်တာများတယ်။ တိုက်ဆိုင်တဲ့ကားလေးတွေ သုံးလေးကားရွေးထားတဲ့အထဲက အကြောင်းတိုက်ဆိုင်တဲ့ ဒီကားလေး စရိုက်ဖြစ်တာပေါ့။

 

မေး- ဇာတ်ကားထဲမှာ သရုပ်ဆောင်ရမယ့် ကာရိုက်တာကရော။

ဖြေ- စီးပွားရေး လုပ်တယ်။ အောင်မြင်တယ်။ လုပ်တိုင်းအောင်မြင်လာတဲ့အခါမှာ မှားတာ မှန်တာ သိပ်မသိချင်တော့ဘူး။ အတ္တတွေ များလာတဲ့အခါ သူလိုလူတွေနဲ့ ထပ်တွေ့တဲ့အခါ ပေါက်ကွဲကုန်ကြတာပေါ့။ အဲဒီလိုဇာတ်ရုပ်မျိုးပါ။

 

မေး-ဇာတ်လမ်းကနေ ဘယ်လိုရသမျိုးကို ပရိသတ်တွေကို ပေးနိုင်မယ်လို့ရောထင်လဲ။

ဖြေ- ဒီဇာတ်လမ်းကခေတ်နဲ့လည်းကိုက်တယ်။ လူတွေနဲ့လည်း အင်မတန်ကိုက်တယ်။ လူတွေရဲ့ဘ၀ကိုထင်ဟပ်တယ်။ ကြည့်တဲ့ ပရိသတ်တွေအတွက်ရသလည်း ပေးနိုင်မှာဖြစ်သလို အကျိုး ပြုလည်းဖြစ်မယ်လို့ ယုံကြည်တယ်။ အဲဒါကြောင့်လည်း ရိုက်ဖြစ်တာပါ။

 

မေး-ဘယ်ရက်လောက်စရိုက်ဖြစ်မလဲ။

ဖြေ- နောက်လေးရက်လောက်ဆို စရိုက်ပါ ပြီ။ ရန်ကုန်နဲ့ နယ်မြို့တချို့မှာ ရိုက်မှာပါ။

 

မေး- တွဲဖက်သရုပ်ဆောင်မယ့် သရုပ်ဆောင်တွေနဲ့ရော ဘယ်လိုညှိနှိုင်းသရုပ်ဆောင်ဖြစ်မလဲ။

ဖြေ- ကစ်ကစ်နဲ့က ကြော်ငြာလည်း ရိုက်ဖူးတယ်။ မဂ္ဂဇင်းကာဗာလည်းတွဲရိုက်ဖူးတယ်။  တီတီနဲ့ကတွဲမရိုက်ဖူးပေမယ့် အပြင်မှာခင်နေပြီးသားပေါ့။ ဇာတ်ကားထဲမှာကတော့ တစ်ယောက်ချင်းစီရဲ့ကာရိုက်တာအလိုက် သရုပ်ဆောင်ကြမယ်။ အဆင်ပြေမှာပါ။

 

မေး- ပရိသတ်တွေက ကိုစိုးသူဇာတ်ကားရိုက်တာကို တော်တော်လေးစောင့်ခဲ့တယ်ဆိုတော့ သူတို့အတွက် ပြောချင်တာများရှိမလား။

ဖြေ- သူတို့အတွက်ရိုက်ပေးဖြစ်တာက အဓိကပါ။ ပရိသတ်ကကျွန်တော့်ကိုအားပေးကြတယ်ဆိုပေမယ့် ကျွန်တော့်ဘက်က အနုပညာဖန်တီးမှုအသစ်တစ်ခု ရိုက်ကူးတာမျိုး တာဝန်မကျေဘူး။ ဒါကြောင့် သူတို့အတွက် ရိုက်ကူးဖြစ်မှာပါ။ သူတို့အားပေးနေတာကိုလည်း ကျေးဇူးတင်တယ်။

 

မေး-သီချင်းအသစ်တွေရော ထပ်လုပ်ဖြစ်ဖို့ရှိမလား။

ဖြေ- သီချင်းတွေလည်း လုပ်ဖြစ်ပါမယ်။ တီးဝိုင်းက ညီအစ်ကိုတွေရော ကျွန်တော်လည်း လုပ်ချင်တယ်။

 

မေး- ဇာတ်ကားအတွက် ဘယ်လိုပြင်ဆင်ထားလဲ။

ဖြေ- ကာရိုက်တာပိုင်းအတွက်ကတော့ အကြိမ်ကြိမ် တွေ့ဆုံဆွေးနွေးထားပါတယ်။ အားလုံးပြင်ဆင်ပြီးမှပဲ ရိုက်ကူးဖြစ်တာပါ။

 

မေး-ကိုစိုးသူနဲ့ပတ်သက်လို့ အွန်လိုင်းမှာ အားပေးကြတာတွေလည်းရှိသလို ဝေဖန်မှုကြုံရတာလည်း ရှိမှာ ပဲလေ။ အဲဒါတွေအပေါ် ဘယ်လိုမြင်လဲ။

ဖြေ- ဘာမှပြောစရာတော့မရှိပါဘူး။ ဒါက လူတိုင်းကြုံရတဲ့ကိစ္စပဲလေ။ သူတို့မှာလည်း ကိုယ်ပိုင်လွတ်လပ်ခွင့်ရှိတာပဲလေ။ သူတို့အမြင် သူတို့ပြောကြတာပေါ့။ အဲဒီအပေါ်ပြောစရာတော့မရှိပါဘူး။ ကိုယ်ကရိုးသားဖို့လိုတယ်။ မှန်ဖို့လိုတယ်။ ဒီအရွယ်မှာတော့ အကုန်လုံးကိုလည်း နားလည်နိုင်တဲ့အတွက် အရေးမကြီးပါဘူး။ အချိန်တစ်ခုရောက်လာရင်တော့ အားလုံးနားလည်သွားမှာပါ။

 

မေး-လက်ရှိ တရားစွဲဆိုထားတဲ့ကိစ္စနဲ့ပတ်သက်လို့ ပြောပြချင်တာမျိုးရှိမလား။

ဖြေ- အဲဒါကတော့အကျိုးတော်ဆောင်ရှေ့နေကြီးက သူ့ကိုပဲမေးပါလို့ပြောထားပါတယ်။ ကျွန်တော်တို့ကို မဖြေပါနဲ့လို့လည်း ပြောပါတယ်။ သူညွှန်ကြားတာကိုပဲ လိုက်နာပါမယ်။ ကိုယ်က မှန်ဖို့ရိုးသားဖို့ပဲလိုတာပါ။ ဘ၀မှာ လူတိုင်းကြုံကြရတဲ့ကိစ္စပါ။ ကြီးတာနဲ့သေးတာပဲ ကွာမှာပါ။ ဘာသာရေးနဲ့ထိတွေ့မှုလည်းရှိတော့ ခံစားမှုလည်း အထွေအထူး မရှိပါဘူး။ ထေရ၀ါဒဗုဒ္ဓဘာသာဝင်တစ်ယောက်အနေနဲ့ အသက်ရှင်ရပ်တည်နေရ တဲ့အချိန်က တန်ဖိုးရှိပါတယ်။ အကောင်းဆုံး အလုပ်တွေလုပ်နေဖို့ပဲ အရေးကြီးပါတယ်။ ဘက်စုံထောင့်စုံ တာဝန်ကျေတဲ့သူ တစ်ယောက်ဖြစ်ချင်တယ်။ ဒီဆန္ဒပဲရှိပါတယ်။ အချိန်ကာလတစ်ခု မရောက်ရင်အမှန် တရားဆိုတာ မပေါ်လာသေးတာရှိတယ်။ အမှန်တရား ပေါ်လာတဲ့အခါကျရင် အားလုံးသိသွားမှာပါ။

 

ဦးစိုးသူကို ငွေကြေး တောင်းခံသည့်ကြေညာချက်တွင် သက်ဆိုင်ခြင်းမရှိဘဲ နာမည်ဖော်ပြခံရသည့် သရုပ်ဆောင်စိုးမြတ်နန္ဒာက ဦးကျော်ကျော်ထွန်းအား အရေးယူပေးရန် ဦးတိုက်လျှောက်ထားမှု တရားရုံးက ပုဒ်မ ၅၀၀ ဖြင့် စစ်ဆေးရန်ဆုံးဖြတ်

သရုပ်ဆောင်စိုးသူကို ငွေကြေးတောင်းခံသည့် ကြေညာချက်တွင် သက်ဆိုင်ခြင်းမရှိဘဲ နာမည် ထည့်သွင်းဖော်ပြခံသည့်အတွက် ဂုဏ်သိက္ခာကျဆင်းစေသည်ဟုဆိုကာ သရုပ်ဆောင် စိုးမြတ်နန္ဒာက ဦးကျော်ကျော်ထွန်း အရေးယူပေးရန် မရမ်းကုန်းမြို့နယ် တရားရုံးသို့ သြဂုတ် ၂၄ ရက်တွင် သွားရောက်၍ ဦး တိုက်လျှောက်ခဲ့ကြောင်း သိရသည်။

အဆိုပါ ဦးကျော်ကျော်ထွန်းအား အရေးယူပေးရန် သရုပ်ဆောင်စိုးမြတ်နန္ဒာ၏ ဦးတိုက်လျှောက်ထားမှုကို တရားရုံးက လက်ခံခဲ့ပြီး ပုဒ်မ ၅၀၀ ဖြင့် စစ်ဆေးဆုံးဖြတ်ချက် ချမှတ်ခဲ့ကြောင်း သိရသည်။

“ဒီနေ့မှာ သရုပ်ဆောင် စိုးမြတ်နန္ဒာနဲ့ တရားလွှတ်တော်ရှေ့နေ ဒေါ်မင်းမင်းသန့်တို့က မရမ်းကုန်းမြို့နယ်တရားရုံးကို သွားရောက်ပြီး ဦးကျော်ကျော်ထွန်းကို အရေးယူပေးဖို့ ဦးတိုက်သွားလျှောက်ကြတာပေါ့။ ဦးတိုက်လျှောက်ထားမှုကို တရားရုံးကစစ်ဆေးတယ်။ စစ်ဆေးပြီးတဲ့အခါမှာ တရားရုံးက ဒီအမှုကို ပုဒ်မ ၅၀၀ နဲ့ စစ်ဆေးဖို့ ဆုံးဖြတ်ချက်ချတာ လိုက်ပါတယ်။ လာမယ့် စက်တင်ဘာ ၇ ရက် မှာ ဦးကျော်ကျော်ထွန်းကို တရားရုံးလာရောက်ဖို့ တရားရုံးက ဆင့်ခေါ်ထားတယ်လို့ သိရပါတယ်” ဟု တရားလွှတ်တော်ရှေ့နေ ဦးနေလက သြဂုတ် ၂၄ ရက်တွင် ပြောကြားသည်။

သြဂုတ် ၁၈ ရက်တွင်ထွက်ရှိသည့် မြန်မာ့အလင်းသတင်းစာ၌ ဦးကျော်ကျော်ထွန်း၏ရှေ့နေများက သရုပ်ဆောင်စိုးသူနှင့် ပတ်သက်သော ငွေကြေးတောင်းခံသည့် ကြေညာချက်တစ်ခုကိုထည့်သွင်းမှုတွင် ဖြစ်စဉ်နှင့်သက်ဆိုင်ခြင်းမရှိသည့် သရုပ်ဆောင် စိုးမြတ်နန္ဒာ၏ အမည်ကိုပါ ထည့်သွင်းခဲ့ခြင်းဖြစ်ကြောင်း သိရသည်။

ယင်းသို့ အမည်ထည့်သွင်းခဲ့သည့်အတွက် ဂုဏ်သိက္ခာကျဆင်းစေသဖြင့် ကျပ်သိန်း ၁၅၀၀၀ အားနစ်နာကြေးအဖြစ် ပေး ဆပ်ရန် သရုပ်ဆောင်စိုးမြတ်နန္ဒာက သြဂုတ် ၂၀ ရက်ထုတ်သတင်းစာတွင် ပြန်လည်ကြေညာခဲ့ကြောင်း သိရသည်။

သရုပ်ဆောင်စိုးမြတ်နန္ဒာ၏ညွှန်ကြားချက်အရ တရားလွှတ်တော်ရှေ့နေဦးနေလက ကြေညာချက်ထုတ်ပြန်ထားရာတွင် ဦးကျော်ကျော်ထွန်း၏ရှေ့နေက ဦးစိုးသူနှင့်ပတ်သက်သည့် ကြေညာချက်အား ထုတ်ပြန်ရာတွင် ထိုကြေညာချက်ပါငွေကြေးကိစ္စသည် စိုးမြတ်နန္ဒာနှင့် လုံးဝသက်ဆိုင်ခြင်း မရှိသည့်ကိစ္စ ဖြစ်ကြောင်း၊ စိုးမြတ်နန္ဒာသည် ဦးကျော်ကျော်ထွန်းနှင့် ဦးစိုးသူလွင်တို့၏ ငွေအပေးအယူလုပ် ခြင်းကို သိရှိခြင်းမရှိကြောင်း၊ ဦးကျော်ကျော်ထွန်းသည် စိုးမြတ်နန္ဒာအနေဖြင့် ယင်းငွေပေးငွေယူကိစ္စတွင် ပါဝင်ပတ်သက်ထားခြင်းမရှိမှန်း သိပါလျက် တစ်စုံတစ်ရာ ဆက်သွယ်မေးမြန်းခြင်းလည်းမရှိဘဲ အများသိစေရန်ဟုအမည်တပ်ကာ ဂုဏ်သိက္ခာကျဆင်းစေရန် ရည်ရွယ်၍ သတင်းစာမှ ငွေတောင်းခံခဲ့ခြင်းဖြစ် သည်။ စိုးမြတ်နန္ဒာ၏ဂုဏ်သိက္ခာကျဆင်းစေရန် ရည်ရွယ်ဆောင်ရွက်ခဲ့ခြင်းဖြစ်သဖြင့်  ရာဇ၀တ်ကြောင်းအရ တရားစွဲဆိုမည်ဖြစ်ကာ  ဂုဏ်သိက္ခာကျဆင်းစေသော နစ်နာမှုအတွက် ကျပ်သိန်း ၁၅၀၀၀ ကို ခုနစ်ရက်အတွင်း ပေးဆပ်ရန်တောင်းဆိုထားပြီး လိုက်နာခြင်းမရှိပါက တည်ဆဲဥပဒေနှင့်အညီ တရားစွဲဆိုမည်ဖြစ်ကြောင်း ထုတ်ပြန်ကြေညာထားခြင်း ဖြစ်သည်။

သရုပ်ဆောင်တေးသံရှင် စိုးသူကလည်း သြဂုတ် ၂၀ ရက်ထုတ်သတင်းစာမှာပင် ဦးကျော်ကျော်ထွန်း၏ကြေညာချက်အား ပြန်လည်ဖြေရှင်းထုတ်ပြန်ခဲ့ပြီး ဦးကျော်ကျော်ထွန်းသည် မန္တလေးတွင်ပြုလုပ်ခဲ့သည့် စိုးသူ၏ One Night in Mandalay ပွဲအား စီစဉ်သူဖြစ်ကာ စိုးသူစီစဉ်ထားသည့် “အမြတ်နိုးဆုံး မင်းအကြောင်းလေး” အယ်လ်ဘမ် ဖြန့်ချိခဲ့သူလည်းဖြစ်သည်။ ၂၀၁၅ သြဂုတ်တွင် စိုးသူ လိုအပ်သည့်ငွေကြေးကို စာချုပ်စာတမ်းမရှိဘဲ စိုက်ထုတ်ခဲ့ပြီး စိုးသူအတွက် ပေးအပ်ရန်ရှိသည့် အနုပညာကြေးများဖြင့် ခုနှိမ်သွားမည်ဟု ပြောကြားခဲ့ကြောင်း၊ အနုပညာလုပ်ငန်းများ လုပ်ဆောင်ပြီးသွားသော်လည်း အနုပညာကြေးများပေးအပ်ခြင်းမရှိဘဲ ဦးကျော်ကျော်ထွန်းက ရရန်ရှိငွေများကိုသာ အတိုးဖြင့် ပြန် လည်ပေးဆပ်ရန်ပြောကြားခဲ့ကြောင်း၊ ဦးကျော်ကျော်ထွန်းစိုက်ထားသည့် ငွေအပေါ် အတိုးအရင်းပေါင်းကာ အနုပညာကြေးနှင့် ခုနှိမ်ပေးရန် ၂၀၁၇ ခုနှစ် မတ် ၂၄ ရက်တွင် ညှိနှိုင်းခဲ့ကြောင်း၊ ကျပ်သိန်း ၇၅၀ ကျော် ပေးသွင်းရန်ဖြစ်ကြောင်း၊ ၂၀၁၇ နိုဝင်ဘာတွင် ယင်းသို့ ညှိနှိုင်းခြင်းမှာ မျှတမှုမရှိသော်လည်း တေးသံရှင်စိုးသူက ဦးကျော်ကျော်ထွန်းနှင့် ရှေ့ဆက် မပတ်သက်လိုတော့သဖြင့် လေးကြိမ်ခွဲပေးရန် စာချုပ်ချုပ်ဆိုခဲ့ခြင်းဖြစ်ကြောင်း၊ စာချုပ်အရ နောက်ဆုံးပေးချေရန် သတ်မှတ်ရက်မှာ စက်တင်ဘာ ၇ ရက်ဖြစ်ကြောင်း၊ စာချုပ်ပါငွေကြေးကိစ္စသည် ကာယကံရှင် ဦးစိုးသူထံ တိုက်ရိုက်အကြောင်းကြား ရမည်ဖြစ်သော်လည်း တမင်နစ်နာစေရန် ရည်ရွယ်၍ သတင်းစာမှတစ်ဆင့် ကြေညာခဲ့သည့်အတွက် တေးသံရှင် စိုးသူက ဦးကျော်ကျော်ထွန်းအား ဥပဒေနှင့်အညီတရားစွဲဆိုမည်ဖြစ် ကြောင်း ကြေညာခဲ့ခြင်းဖြစ်သည်။

သြဂုတ် ၁၈ ရက်ထုတ်သတင်းစာတွင် ဦးကျော်ကျော်ထွန်းက ကိုစိုးသူနှင့် မစိုးမြတ်နန္ဒာတို့သိရှိစေရန်ဟုဆိုကာ ရရန်ရှိငွေကြေးများ သတ်မှတ်ရက်အတိုင်း လာရောက်ပေးဆပ်ရန်ကြေညာခဲ့သဖြင့် သြဂုတ် ၂၀ ရက် ထုတ်သတင်းစာ၌ သရုပ်ဆောင်စိုးသူနှင့် စိုးမြတ်နန္ဒာတို့က ၎င်းတို့၏ဂုဏ်သိက္ခာကျဆင်းစေသည်ဟုဆိုကာ အသီးသီးထုတ်ပြန်ချက်များ ကြေညာခဲ့ပြီး တရားစွဲဆိုသွားမည်ဖြစ်ကြောင်း ဖော်ပြခဲ့ကြခြင်းဖြစ်သည်။