ရုရှားကိုအင်အားပြမည့် နေတိုး၏ စစ်ရေးလေ့ကျင့်မှုကြီး လာမည့်လတွင် ကျင်းပမည်

ဇွန် ၄ ရက်တွင် ဘော်လ်တစ်ပင်လယ်၌ နေတိုး၏ ရေကြောင်းဦးစားပေး နိုင်ငံစုံလေ့ကျင့်မှုတွင် ကမ်းတက်လေ့ကျင့်နေမှုကို တွေ့ရစဉ် (Photo: AFP)

စစ်အေးခေတ်နောက်ပိုင်း နေတိုး၏အကြီးဆုံး စစ်ရေးလေ့ကျင့်မှုအတွင်း အင်အား ၅၀၀၀၀ ရှိသည့် တပ်ဖွဲ့ဝင်များသည် မည်သည့် တိုက်ခိုက်မှုကိုမဆို တွန်းလှန်ရန် အသင့်ရှိကြောင်း ရုရှားအား ပြသရန်အတွက် နော်ဝေဆောင်းရာသီ၏ ပထမဆုံးနှင်းများ ကျဆင်းစဉ် တပ်ဖြန့်စုဝေးကြမည်ဖြစ်သည်ဟု သက်ဆိုင်ရာ တာဝန်ရှိသူများက အောက်တိုဘာ ၉ ရက်တွင် ပြောကြားခဲ့သည်။

နိုဝင်ဘာလတွင် ကျင်းပမည့် Trident Juncture စစ်ရေးလေ့ကျင့်မှု၌ စိတ်ကူးယဉ်နိုင်ငံတစ်နိုင်ငံ၏ တိုက်ခိုက်ခြင်းကို ခံရသည့်သဖွယ် သဏ္ဌာန်လုပ်လေ့ကျင့်မည် ဖြစ်သည်။ Trident Juncture ကြောင့် ရုရှား၏အလွန်ကြီးမားသော ဗိုစတော့စစ်ရေး လေ့ကျင့်မှုကြီးကျင်းပပြီး လအနည်းငယ် အကြာ၌ ရုရှားအိမ်နီးချင်းနိုင်ငံတစ်နိုင်ငံသို့ ကြီးမားသော စစ်အင်အားကြီးတစ်ခု ရောက်ရှိလာစေမည်ဖြစ်သည်။

နေတိုးအုပ်စုသည် မည်သည့် (တစ်နိုင်ငံတည်းမဟုတ်ဘဲ မည်သူမဆို) ကျူးကျော်မှုကိုမဆို တန်ပြန်ကာကွယ်နိုင်စွမ်းရည်ရှိကြောင်း ယခုစစ်ရေးလေ့ကျင်မှုက ပြသမည်ဖြစ်သည်ဟု နေတိုး၏ မဟာမိတ်ပူးပေါင်းရေး တပ်ဖွဲ့၏ အကြီးအကဲဖြစ်သူ ရေတပ်ဗိုလ်ချုပ်ကြီး ဂျိမ်းစ်ဖောဂိုက ပြောကြားခဲ့သည်။

လေယာဉ်အစင်း ၁၅၀၊ သင်္ဘောအစင်း ၆၀ နှင့် စစ်ယာဉ် ၁၀၀၀၀ ခန့်က ပံ့ပိုးထားသော ထိုကြီးမားသည့် စစ်အင်အားစုကြီးသည် မဟာမိတ်နိုင်ငံတစ်နိုင်ငံကို ကာကွယ်ရန် လျင်လျင်မြန်မြန် ရွှေ့ပြောင်းရောက်ရှိနိုင်သည်ကို ပြသလိမ့်မည်ဟု ဖောဂိုက ပြောကြားခဲ့သည်။

“အဓိကစစ်ရေးလေ့ကျင့်မယ့်နေရာဟာ ရုရှားနယ်စပ်ကနေ ကီလိုမီတာ ၁၀၀၀ ကွာဝေးပါတယ်” ဟု နော်ဝေဗိုလ်ချုပ်ကြီး ရူနီဂျာကော့ဆင်က ပြောကြားခဲ့သည်။ ယခု စစ်ရေးလေ့ကျင့်မှုသည် ရုရှားတို့ကို ခြောက်လှန့်ရန် ရည်ရွယ်ခြင်းမဟုတ်ဘဲ ကာကွယ်ရေးအတွက် စစ်ရေးလေ့ကျင့်မှုတစ်ခုအဖြစ်သာ ရှုမြင်စေလိုသည်ဟု ၎င်းက ပြောကြားခဲ့သည်။ စစ်ရေးလေ့ကျင့်မှုကို လာရောက်ကြည့်ရှုရန် ရုရှားနှင့် ဘီလာရုစ်တို့မှ စစ်ဘက်စောင့်ကြည့်သူနှစ်ဦးစီကို ဖိတ်ခေါ်ထားသည်။

ရုရှားသည် ယူကရိန်းနိုင်ငံထဲမှ ခရိုင်းမီးယားကျွန်းဆွယ်ကို သိမ်းပိုက်ခဲ့သည့် လွန်ခဲ့သော လေးနှစ်ကတည်းက အနောက်မဟာမိတ်များသည် အရှေ့ဥရောပနှင့် ဘော်လ်တစ်နိုင်ငံများ၌ အလှည့်ကျ တပ်ချကာကွယ်မှုများ ပြုလုပ်ခဲ့ပြီး ၎င်းတို့၏ စစ်ရေးတည်ရှိမှုကိုလည်း အဆင့်မြှင့်တင်ခဲ့ကြသည်။

ယခု Trident Juncture 18 ကဲ့သို့ စစ်ရေးလေ့ကျင်မှုသည် နေတိုးအဖွဲ့ဝင်နိုင်ငံ တစ်နိုင်ငံ ကျူးကျော်ခံရသည့် ဖြစ်စဉ်မျိုးတွင် ကြီးမားသည့် စစ်အင်အားတစ်ခုအား မည်သို့ ရွှေ့ပြောင်းမည်ကို တပ်ဖွဲ့ဝင်များအား သင်ကြားရန် ရည်ရွယ်ခြင်းဖြစ်သည်။

ယခုစစ်ရေးလေ့ကျင့်မှုအတွက် ဂျာမနီက အင်အား ၆၀၀၀ ရှိသည့်တပ်မဟာတစ်ခုကို စေလွှတ်မည်ဖြစ်ပြီး ယခုကတည်းက နော်ဝေသို့ ဂျာမန်စစ်သားအမြောက်အမြား ရောက်ရှိနေနှင့်ကြပြီဖြစ်သည်။ ဥရောပတစ်လွှားနှင့် မြောက်အမေရိကမှ အင်အားစုများမှာမူ လေကြောင်း၊ ရေကြောင်းများမှတစ်ဆင့် နော်ဝေသို့ လာမည်ဖြစ်ပြီး ဗြိတိန်တပ်များမှာမူ လေကြောင်း၊ ကုန်းကြောင်းမှ တစ်ဆင့်လာမည်ဖြစ်သည်။

Ref: AFP

ရုရှားက နိုင်ငံ့သမိုင်း၌ အကြီးဆုံးစစ်ရေး လေ့ကျင့်မှုကြီးအား စတင်ရန် ပြင်ဆင်နေ

စက်တင်ဘာ ၈ ရက်တွင် စိန့်ပီတာစဘတ် အပြင်ဘက်ရှီ ဆာတိုလိုဗိုမြို့၌ တင့်ကားနေ့ အခမ်းအနားတွင် T-80 တင့်ကားတစ်စင်းက သရုပ်ပြနေစဉ် (Photo: AFP)

ရုရှားသည် စက်တင်ဘာ ၁၁ ရက်တွင် နိုင်ငံ့သမိုင်း၌ အကြီးဆုံး စစ်ရေးလေ့ကျင့်မှုကြီးကို စတင်ပြုလုပ်တော့မည်ဖြစ်သည်။ ယင်းစစ်ရေးလေ့ကျင့်မှုအတွင်း တရုတ်စစ်သားများနှင့်အတူ တပ်သား ၃၀၀၀၀၀ ပါဝင်မည်ဖြစ်သည်။ ယင်းစစ်ရေးလေ့ကျင့်မှုကို တိုက်ပွဲကြီးအတွက် လေ့ကျင့်နေကြခြင်းဖြစ်သည်ဟုဆိုကာ နေတိုးအဖွဲ့က ရှုတ်ချထားသည်။

တရုတ်နှင့် မွန်ဂိုလီးယားစစ်သားများ ပါဝင်ပြီး သီတင်းတစ်ပတ်ကြာမြင့်မည့် စစ်ရေးလေ့ကျင့်မှုကြီးကို Vostok-2018 (အရှေ့-၂၀၁၈) ဟု အမည်ပေးထားပြီး အရှေ့ဆိုက် ဘေးရီးယား၌ ပြုလုပ်မည်ဖြစ်သည်။

ရုရှားစစ်တပ်က ယခုစစ်အင်အားပြမှုကြီးကို ၁၉၈၁ ခုနှစ်က ဆိုဗီယက်ယူနီယံ၏ Zapad-81 (အနောက်-၈၁) စစ်ရေးလေ့ကျင့်မှုကြီးနှင့် နှိုင်းယှဉ်ခဲ့သည်။ ဆိုဗီယက်ခေတ်အတွင်း အကြီးဆုံးစစ်ရေး လေ့ကျင့်မှုကြီးဖြစ်ခဲ့သော Zapad-81 တွင် ဆိုဗီယက်ယူနီယံမှ စစ်သား ၁၀၀၀၀၀ မှ ၁၅၀၀၀၀ ကြား ပါဝင်ခဲ့သည်။

ယခုတစ်ကြိမ် စစ်ရေးလေ့ကျင့်မှုမှာမူ ပိုမိုကြီးမားပြီး စစ်သားဦးရေ ၃၀၀၀၀၀၊ စစ်တပ်ယာဉ် ၃၆၀၀၀၊ လေယာဉ်အစင်း ၁၀၀၀၊ စစ်သင်္ဘောအစင်း ၈၀ ပါဝင်ကြမည်ဟု ကာကွယ်ရေးဝန်ကြီး ဆာဂေးရွှိုင်ဂူက ပြောကြားခဲ့သည်။ “တင့်ကား၊ သံချပ်ကာယာဉ်၊ ခြေလျင်တပ် တိုက်ခိုက်ရေးယာဉ်အစရှိတဲ့ စစ်တပ်ယာဉ်အစီးပေါင်း ၃၆၀၀၀ တစ်ပြိုင်တည်း ရွေ့လျားနေမယ့်ပုံကို မြင်ယောင်ကြည့်လိုက်ပါ။ အနေအထားကိုလည်း တိုက်ပွဲအခြေအနေနဲ့ အနီးစပ်ဆုံးတူအောင် လုပ်ထားပါတယ်” ဟု ရွှိုင်ဂူက ဆိုသည်။

ရုရှားစစ်တပ်သည် ယင်း၏နောက်ဆုံးထုတ် စစ်လက်နက်ပစ္စည်းများကိုလည်း ယခုစစ်ရေးလေ့ကျင့်မှုကြီးအတွင်း ထုတ်ပြဦးမည် ဖြစ်သည်။ ယင်းတို့တွင် နျူကလီးယားထိပ်ဖူးကို သယ်ဆောင်နိုင်သည့် Iskander ဒုံးများ၊ T-80 နှင့် T-90 တင့်ကားများ၊ မကြာသေးမီကမှ ထုတ်ပြန်ထားသည့် Su-34 နှင့် Su-35 လေယာဉ်များ ပါဝင်သည်။ ပင်လယ်ပြင်တွင်မူ ရုရှားရေတပ်သည် Kalibr ဒုံးကျည် (ဆီးရီးယားတွင် အသုံးပြုခဲ့သည့် ဒုံးကျည်များ) များ တပ်ဆင်ထားသည့် တိုက်သင်္ဘောများကို တပ်ဖြန့်ထားမည် ဖြစ်သည်။

ယခုမတိုင်မီ ဒေသတွင်း၌ နောက်ဆုံးကျင်းပခဲ့သော ရုရှားစစ်ရေးလေ့ကျင်မှုမှာ Vostok-2014 ဖြစ်သည်။ Vostok-2018 ၌ပါမည့် အင်အား၏ ထက်ဝက်နီးပါးသာရှိသော Vostok-2014 တွင် စစ်သား ၁၅၅၀၀၀ ခန့် ပါဝင်ခဲ့သည်။

ရုရှားသည် ယမန်နှစ်ကမူ အရှေ့ဥရောပ၌ Zapad-2017 စစ်ရေးလေ့ကျင့်မှုကို ကျင်းပခဲ့ပြီး တပ်ဖွဲ့ဝင် ၁၂၇၀၀ ပါသည်ဟု အစိုးရက ထုတ်ပြန်ခဲ့သည်။ အမှန်တကယ်ပါသည့် အရေအတွက်မှာ များစွာပိုသည်ဟု ယူကရိန်းနှင့် ဘော်လတစ်နိုင်ငံများက ပြောခဲ့ကြသည်။

ရုရှားသမ္မတ ဗလာဒီမာပူတင်ကမူ နိုင်ငံအရှေ့ပိုင်း ဗလာဒီဗိုစတော့မြို့တွင် ကျင်းပမည့် တရုတ်သမ္မတ ရှီကျင်ပင်း အပါအ၀င် အခြားနိုင်ငံခေါင်းဆောင်များ လာရောက်မည်ဖြစ်သော စီးပွားရေးဖိုရမ်သို့ တက်ပြီးမှသာ Vostok-2018 ကို လာနိုင်မည်ဟု မျှော်လင့်ရသည်။

ရုရှားစစ်ရေးသုံးသပ်သူ ပါဗယ်ဖယ် ဂျန်ဟွာက ယင်းစစ်ရေးလေ့ကျင့်မှုကြီးသည် အနာဂတ်ကမ္ဘာ စစ်ပွဲအတွက် ကြိုတင်ပြင်ဆင်မှုဟု ခေါ်ဆိုခဲ့သည်။

အနောက်နိုင်ငံများ၏ ပြည်တွင်းရေးကို ရုရှားက ၀င်စွက်ဖက်နေသည်ဟု စွပ်စွဲမှုများနှင့်အတူ ယူကရိန်းနှင့် ဆီးရီးယားတို့၌ ဖြစ်ပွားနေသည့် ပဋိပက္ခများတွင် ရုရှား၏ ပါဝင်ပတ်သက်နေမှုတို့ကြောင့် ရုရှားနှင့် အနောက်တိုင်းဆက်ဆံရေး တင်းမာမှုများ ဖြစ်ပေါ်နေစဉ် ယခုစစ်ရေးလေ့ကျင့်မှုကြီး ဖြစ်ပေါ်လာခြင်းဖြစ်သည်။

Ref: AFP