မိတ္ထီလာခရိုင် ပြည်သူ့ဆေးရုံကြီးဝင်းအတွင်း ရပ်ထားသော တာဝန်ကျဆရာဝန်၏ကားကို ခိုးယူခဲ့သူကို သက်သေခံကားနှင့်အတူ ပြန်လည်ဖမ်းဆီးရမိ

မိတ္ထီလာခရိုင် ပြည်သူ့ဆေးရုံကြီးဝင်းအတွင်း ရပ်ထားသော တာဝန်ကျဆရာဝန်၏ကားကို ခိုးယူခဲ့သူကို သက်သေခံကားနှင့်အတူ ခိုးယူပြီး နာရီပိုင်းအကြာတွင် ပြန်လည်ဖမ်းဆီးရမိခဲ့ကြောင်း မိတ္ထီလာခရိုင် မှုခင်းနှိမ်နင်းရေးဌာနစိတ်မှ သိရသည်။

မေ ၃ ရက် နံနက်ပိုင်းက မိတ္ထီလာမြို့ ဇောင်ချမ်းကုန်းကျေးရွာအုပ်စု၊ ၀ါသုတိုးချဲ့ရပ်နေ ဒေါက်တာစုစုဝေ အသက် ၂၅ နှစ်သည် ၎င်းပိုင်ဆိုင်သော Honda Fit အမျိုးအစား MDY 5J/—- နံပါတ်ပါ အနက်ရောင် ကိုယ်ပိုင်ယာဉ်အား မောင်းနှင်ကာ မိတ္ထီလာခရိုင် ပြည်သူ့ဆေးရုံဝင်း ကလေးဆောင်ရှေ့တွင် ရပ်ထားပြီး ပြည်သူ့ဆေးရုံတွင် တာဝန်ထမ်းဆောင်နေခဲ့စဉ် မေ ၄ ရက် နံနက် ၆ နာရီတွင် ကလေးဆောင်ရှေ့ ရပ်ထားသည့်ကားအား မတွေ့ရှိရသဖြင့် လိုက်လံရှာဖွေစုံစမ်းခဲ့ပြီး မွန်းလွဲပိုင်းတွင် မိတ္ထီလာမြို့မရဲစခန်းသို့ ပျောက်ဆုံးကားအား ပြန်လည်ရှာဖွေပေးပါရန် တရားလို ပြုလုပ်တိုင်ကြားခဲ့ကြောင်း သိရသည်။ ထိုသို့ကားပျောက်ဆုံးကြောင်း တိုင်ကြားခဲ့သဖြင့် မိတ္ထီလာမြို့မ ရဲစခန်းမှူး ဒုရဲမှူးကျော်ထင်နှင့် ခရိုင်မှုခင်းနှိမ်နင်းရေးဌာနစိတ်မှ ရဲအုပ်တင်ထွန်းအောင်၊ ဒုရဲအုပ်လှစိုးမိုးတို့ပါဝင်သော ပူးပေါင်းအဖွဲ့မှ လိုက်လံစုံစမ်းခဲ့ရာ ညနေ ၃ နာရီတွင် မိတ္ထီလာမြို့၊ ၀န်ဇင်းရပ်ကွက်အတွင်းရှိ မုန့်ဆိုင်တွင် မသင်္ကာဖွယ်တွေ့ရှိရသူ ကျောက်ပန်းတောင်းမြို့နယ်၊ တလိုင်းကန်ကျေးရွာနေ ဘချစ် (ခ) မျိုးလွင် အသက် ၂၉ နှစ်အား စစ်ဆေးရာမှ ပေါ်ပေါက်ခဲ့ခြင်းဖြစ်ပြီး ခိုးယူခံရသည့်ကားအား ပြန်လည်သိမ်းဆည်းရမိခဲ့ကြောင်း သိရသည်။

“ပျောက်တာက နံနက်ခင်းထဲကပျောက်တာ။ သူတို့ဦးလေးပဲ ယူမောင်းသွားသလိုလို ဖြစ်နေတာ။ နေ့ခင်းပိုင်းကျမှပျောက်တာ သေချာတယ်ဆိုပြီး စခန်းမှာအမှုဖွင့်တော့ ကျွန်တော်တို့ကိုလှမ်းပြောတယ်။ သွားစစ်တော့ ကားဘေးနားမှာ ဆိုင်ကယ်တစ်စီး ကျန်ခဲ့တယ်။ အဲဒါနဲ့ ခရိုင်မှူးက အကုန်လုံးခေါ်ပြီး ကျွန်တော်တို့အဖွဲ့တွေ၊ စခန်းအဖွဲ့တွေ တိုးဂိတ်တွေ လိုက်စုံစမ်းကြတယ်။ အဲဒီလိုစုံစမ်းတော့ နံနက် ၇ နာရီလောက်က သပြေ၀တိုးဂိတ်ကနေ ကားက မိတ္ထီလာမြို့ထဲ ပြန်ဝင်လာတာ သွားတွေ့တယ်။ အဲဒါနဲ့ အခြားတိုးဂိတ်တွေကို လှည့်စုံစမ်းတော့ ဒီကားက ဘယ်မှမထွက်ဘူးဖြစ်နေတယ်။ မြို့ထဲမှာပဲ ရှိမလား။ ရွာလမ်းတွေကများ မြို့ပြင်ထွက်သွားသလား စဉ်းစားရခက်နေတယ်။ အဲဒီလိုဖြစ်နေတုန်းမှာ တပ်ကြပ်ကြီး ထိုက်ဝေက Facebook အကောင့်တစ်ခု ပို့ပေးတယ်။ အဲဒီအကောင့်နဲ့ တိုးဂိတ်မှာ ပိုက်ဆံရှင်းတဲ့လူက တော်တော်တူနေတယ်။ အဲဒီ Facebook အကောင့်ကို ၀င်ရှာကြည့်တော့ ၀န်ဇင်းထဲက တိုက်တန်းတစ်ခုက ကိတ်မုန့်ဆိုင်မှာရိုက်ထားတဲ့ ဓာတ်ပုံတွေ သွားတွေ့တယ်။ အဲဒီဆိုင်မှာစုံစမ်းတော့ ဆိုင်ကို မကြာမကြာလာတတ်တယ်ဆိုတာနဲ့ ဖုန်းဆက်ခေါ်ခိုင်းပြီး သိပ်မကြာဘူး ရောက်လာတယ်။ ရောက်လာမှ ကျွန်တော်တို့ကဘယ်ကတုံး၊ ဘယ်သူတုံးစစ်ပြီး ကိုယ်ခန္ဓာကိုရှာတော့ ကားသော့သွားတွေ့တယ်။ အဲဒီနားမှာ ရပ်ထားတဲ့ကားလည်း လိုက်ပြတယ်။ ခိုးတဲ့လူက ည ၁၂ နာရီလောက်မှာ ထမင်းထွက်စားပြီး ဆေးရုံထဲဝင်တယ်။ တာဝန်ကျ ဆရာမနားနေအခန်းက ပိုက်ဆံအိတ်ကို သွားမြင်တာနဲ့ ၀င်ယူလာတာ၊ ပိုက်ဆံအိတ်ထဲမှာ ကားသော့ပါလာတော့ ကားမောင်းထွက်ချသွားတာ၊ အခုစစ်ဆေးကြည့်တော့ ညခင်းထဲက ပတ်မောင်းပြီး ၀မ်းတွင်းမြို့နားက ဘုရားဝင်းထဲဝင်တယ်၊ ၀င်ပြီးနောက် ပြန်အထွက်မှာ ကားနည်းနည်းတိုက်ခဲ့တယ်။ အဲဒီကနေမှ မိတ္ထီလာကို ပြန်ဝင်လာတယ်။ ဆေးရုံဝန်းထဲ ကျန်နေတာလည်း သူ့ဆိုင်ကယ်ပြောတယ်။ ကျူးလွန်တာလည်း တစ်ယောက်တည်းလို့ပဲ လောလောဆယ် သိရတယ်၊ အရင်ပြစ်မှု ရှိ မရှိ အသေးစိတ်တော့ ထပ်စစ်ဆေးနေတုန်းပဲ” ဟု မိတ္ထီလာခရိုင် မှုခင်းနှိမ်နင်းရေးဌာနစိတ်မှ ရဲအုပ်တင်ထွန်းအောင်က ပြောကြားသည်။

အဆိုပါအမှုအား မိတ္ထီလာမြို့မရဲစခန်းမှ (ပ) ၂၁၃/၂၀၁၈ ရာဇသတ်ကြီးပုဒ်မ ၃၇၉ ဖြင့် အမှုဖွင့် စစ်ဆေးဆောင်ရွက်လျက်ရှိကြောင်း သိရသည်။

ရန်ကုန်မြို့အတွင်း ရပ်တန့်ထားသည့် ယာဉ်များပေါ်မှ ဖုန်းများခိုးယူနေသည့် လူငယ်တစ်ဦးအား အင်းစိန်မြို့နယ်တွင် ဖမ်းမိ

ရန်ကုန်မြို့အတွင်း၌ ရပ်တန့်ထားသည့် ယာဉ်များပေါ်မှ ဖုန်းများ လိုက်လံခိုးယူနေသည့် လူငယ်တစ်ဦးကို အင်းစိန်မြို့နယ်အတွင်း၌ ဖမ်းဆီးရမိခဲ့ကြောင်း မေ ၃ ရက်တွင် ရန်ကုန်တိုင်းဒေသကြီးရဲတပ်ဖွဲ့မှ စုံစမ်းသိရှိရသည်။

ဖမ်းဆီးရမိသူမှာ ဇင်သူ (၁၉ နှစ်) ဆိုသူဖြစ်ပြီး ၎င်းကို ဧပြီ ၉ ရက်က အင်းစိန်မြို့နယ် မြို့သစ် (ဂ) ရပ်ကွက် ပိတောက်လမ်းပေါ်တွင် ရဲတပ်ဖွဲ့က ဖမ်းဆီးရမိခဲ့ခြင်းဖြစ်ကြောင်း သိရသည်။

“သူက ခိုးမှုတွေ ကျူးလွန်ထားတယ်လို့ သတင်းရလို့ လိုက်ပြီးဖမ်းဆီးခဲ့တာ။ ဖမ်းမိတဲ့အချိန်မှာ သူ့ဆီမှာ ဖုန်းတစ်လုံးတွေ့တယ်။ အဲ့ဒီဖုန်းနဲ့ပတ်သက်ပြီး စစ်တော့ပိုင်ဆိုင်ကြောင်း အထောက်အထားမပြနိုင်ဘူး။ အဲဒါကြောင့် စခန်းမှာ အမှုဖွင့်ပြီး ထပ်စစ်ခဲ့တာမှာ နောက်ထပ်အမှုတွေ ထပ်ပေါ်တာ။ အားလုံးက ရပ်ထားတဲ့ကားတွေပေါ်က ခိုးတာ” ဟု ရန်ကုန်တိုင်းဒေသကြီး ရဲတပ်ဖွဲ့မှ ရဲအရာရှိတစ်ဦးက ပြောကြားသည်။

စစ်ဆေးရာ၌ ၎င်းသည် မတ်နှင့် ဧပြီလများအတွင်းက အင်းစိန်မြို့နယ် ကြို့ကုန်းအရှေ့ရပ်ကွက် မင်းဓမ္မလမ်းပေါ်တွင် ရပ်ထားသည့် ယာဉ်တစ်စီးပေါ်မှ ဖုန်းတစ်လုံးကိုလည်းကောင်း၊ အဆိုပါနေရာအနီး၌ပင် ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံးကိုလည်းကောင်း၊ ကျောက်တော်ကြီးဘုရားရှေ့၌ ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံးကိုလည်းကောင်း၊ မရမ်းကုန်းမြို့နယ် ဘုရင့်နောင်ပွဲရုံလမ်းအတွင်း ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံးကိုလည်းကောင်း၊ ကျိုက်ဝိုင်းဘုရားလမ်းပေါ်တွင် ရပ်တန့်ထားသည့် ယာဉ်တစ်စီးပေါ်မှ ဖုန်းလေးလုံးကိုလည်းကောင်း ခိုးယူခဲ့သည်ဟု စစ်ဆေးပေါ်ပေါက်ခဲ့ကြောင်း သိရသည်။

ထို့ပြင် ၎င်းသည် မတ်နှင့် ဧပြီလများ အတွင်းကပင် မရမ်းကုန်းမြို့နယ် သမိုင်းခုံးတံတားပေါ်တွင် ရပ်ထားသည့် ယာဉ်တစ်စီးပေါ်မှ ဖုန်းတစ်လုံး၊ ဗဟိုလမ်းရှိပေါ်တော်မူ ဘုရားအနီးတွင် ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံး၊ ဘုရင့်နောင်ပွဲရုံလမ်းအတွင်း ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံး၊ အဆိုပါပွဲရုံလမ်းအတွင်း၌ ကုန်များချနေသည့် ယာဉ်တစ်စီးပေါ်မှ ဖုန်းတစ်လုံး၊ မရမ်းကုန်းမြို့နယ် သမိုင်းလမ်းဆုံတွင် ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံး၊ အင်းစိန်လမ်းမပေါ်တွင် ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံး၊ ကမာရွတ်မြို့နယ် လှည်းတန်းလမ်းမပေါ်တွင် ရပ်တန့်ထားသည့် ယာဉ်တစ်စီးပေါ်မှ ဖုန်းတစ်လုံး၊ လှည်းတန်းခုံးတံတားအနီး ရပ်တန့်ထားသည့် ယာဉ်များပေါ်မှ ဖုန်းရှစ်လုံးတို့ကိုလည်းကောင်း ခိုးယူကာ ရောင်းချထားသည်ဟု စစ်ဆေးပေါ်ပေါက်ခဲ့ကြောင်း သိရသည်။

ထိုသို့ပေါ်ပေါက်ချက်များအရ ဇင်သူဆိုသူကို သက်ဆိုင်ရာရဲစခန်းများတွင် အမှုများ အသီးသီးရေးဖွင့်ကာ အရေးယူရန် ဆောင်ရွက်လျက်ရှိကြောင်း ရန်ကုန်တိုင်းဒေသကြီးရဲတပ်ဖွဲ့မှ သိရသည်။

ပဲခူးတိုင်းဒေသကြီး ပြည်မြို့တွင် ဆန်ပွဲရုံတစ်ရုံအတွင်းမှ ကျပ်သိန်း ၈၇၀ ကျော် ခိုးယူခံရမှုဖြစ်ပွား

ပဲခူးတိုင်းဒေသကြီး အနောက်ပိုင်း ပြည်မြို့တွင် ဆန်ပွဲရုံ နေအိမ်အတွင်း သိမ်းဆည်းထားသည့် ကျပ် သိန်း ၈၇၀ ကျော် ခိုးယူခံရမှု ဖြစ်ပွားခဲ့ကြောင်း သိရသည်။

ဖြစ်စဉ်မှာ ပြည်မြို့ ဆွေးနွေးဘုရားလမ်းရှိ ရွှေဖလားဆန်ရောင်းဝယ်ရေးပွဲရုံ ပိုင်ရှင်များမှာ ဒီဇင်ဘာ ၂၉ ရက် နံနက်ပိုင်းက ပေါင်းတည်မြို့ရှိ နာရေးအိမ်သို့သွားရန် ပွဲရုံအား ပိတ်သွားခဲ့ပြီး ဒီဇင်ဘာ ၃၀ ရက် ညနေက ပွဲရုံသံပန်းတံခါးများ ပွင့်နေကြောင်း ပွဲရုံတွင် အလုပ်လုပ်ခဲ့ဖူးသူက ဖုန်းဆက်အကြောင်းကြားခဲ့ရာက နေအိမ်သို့ပြန်လာခဲ့ပြီး တိုင်ကြားစစ်ဆေးခဲ့ရာက ခိုးယူခံရခြင်းကို သိရှိခဲ့ခြင်းဖြစ်ကြောင်း ပြည်ခရိုင် ရဲတပ်ဖွဲ့ရုံးမှ သိရသည်။

“ဆန်ပွဲရုံပိုင်ရှင်ဦးရဲနိုင်က ပေါင်းတည်မှာရှိတဲ့ နာရေးကို သူ့ဆန်ပွဲရုံပိတ်ပြီးသွားတယ်။ မနေ့က ညနေ ၅ နာရီလောက်မှာ သူ့ရဲ့ဆန်ပွဲရုံအပေါ်ထပ်က သံပန်းတံခါးတွေ ပွင့်နေတာကို သူ့ရဲ့ ဆန်ပွဲရုံမှာ လုပ်ခဲ့တဲ့ အလုပ်သမားတစ်ယောက်က သူ့ကိုဆက်သွယ်တယ်။ သူ့ညီကိုသွားကြည့်ခိုင်းတော့ ဟုတ်တယ်။ ပွင့်နေတာကိုတွေ့တော့ သူပြန်လာတယ်။ ပြန်လာတော့ မနေ့က ၇ နာရီ ၁၀ မိနစ်လောက် ပြန်ရောက်လာပြီး ရဲစခန်းကိုလည်း အကြောင်းကြားတော့ သက်သေတွေနဲ့ ၀င်စစ်ဆေးတဲ့အခါမှာ သူ့အခန်းထဲမှာ အလူမီနီယံ ရှိုးကေ့စ်နဲ့ထားတဲ့ အပေါ်မှာ လွယ်လင့်တကူပဲ ယူလို့ရတဲ့ ကြွပ်ကြွပ်အိတ်နဲ့ ထည့်ထားတဲ့ငွေတွေ ပျောက်ဆုံးသွားတယ်ဆိုတဲ့ ဖြစ်စဉ်ပဲ ဖြစ်ပါတယ်” ဟု ပြည်ခရိုင် ရဲတပ်ဖွဲ့မှူးရုံး ဒုရဲမှူးပြုံးလွင်က ပြောကြားသည်။

ခိုးယူခံရမှုအတွက် မူလတိုင်ချက်တွင် ကျပ်သိန်း ၁၁၂,၃၃၈,၀၀၀ ဖြစ်ပြီး မီးခံသေတ္တာအတွင်း ကျပ်သိန်း ၂၅၀ ပြန်လည်တွေ့ရှိသဖြင့် ခိုးယူခံရသည့် ငွေပေါင်း ကျပ် ၈၇,၃၃၈,၀၀၀ ဖြစ်ကြောင်း သိရသည်။

ယင်းဖြစ်စဉ်နှင့်ပတ်သက်၍ “ဒီနေရာမှာ လူမရှိတာကိုသိလို့ တက်ရှာရင်း ငွေထုပ်ကိုတွေ့တာလား။ ဒါမှမဟုတ် ဒီအိမ်မှာဒီနေရာမှာ ငွေထားတာကိုသိတဲ့လူ၊ ပြောရရင်တော့ အတွင်းလူပေါ့။ အဲဒီလိုမျိုး နှစ်ပိုင်းထည့် စဉ်းစားရတယ်။ အဲဒါတွေကတော့ မနေ့က ခရိုင်ရဲတပ်ဖွဲ့မှူးကိုယ်တိုင် စီစဉ်ပါတယ်။ ဆက်လက်ပြောပြီးတော့ ထောင်လွတ် အကျဉ်းသားတွေထဲမှာ အရင်တုန်းက ခိုးမှု၊ ဖောက်ထွင်းမှုနဲ့ပတ်သက်ပြီး လွတ်မြောက်လာတာတဲ့သူတွေ ရှိ မရှိပေါ့။ အဲဒီလူတွေ သွားလာလှုပ်ရှားမှု အခြေအနေတွေ ကျန်တဲ့စခန်းတွေနဲ့ ချိတ်ဆက်ဆောင်ရွက်နေတာ ရှိတယ်။ အခြားနယ်က လာကျူးလွန်တဲ့ သူခိုးတွေ လာရောက်တည်းခိုရာ နေအိမ်ရပ်ကွက် မင်္သကာတွေကို စစ်ဆေးခိုင်းနေတာမျိုးတွေ ရှိပါတယ်” ဟု ဒုရဲမှူးပြုံးလွင်က ပြောကြားသည်။