၂၀၁၇-၂၀၁၈ ဘဏ္ဍာနှစ်တွင် ပို့ကုန်တန်ဖိုး ဒေါ်လာ ၁၅ ဘီလျံရှိ၍ ယခင်နှစ်ထက် တိုးလာပြီး ကုန်သွယ်မှုလိုငွေ ကျဆင်းကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ရှင်းလင်း

၂၀၁၇-၂၀၁၈ ဘဏ္ဍာနှစ်တွင် ပို့ကုန်တန်ဖိုး အမေရိကန်ဒေါ်လာ ၁၅ လီလျံရှိ၍ ယမန်နှစ်ထက် တိုးလာပြီး ကုန်သွယ်မှုလိုငွေသည် ၂၀၁၆-၂၀၁၇ ဘဏ္ဍာနှစ်ထက် ကျဆင်းခဲ့ကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ကိုယ်စား စက်မှုဝန်ကြီးဌာန၊ ပြည်ထောင်စုဝန်ကြီး ဦးခင်မောင်ချိုက ပြောကြားသည်။

နေပြည်တော်၌ စက်တင်ဘာ ၁၀ ရက်က ပြုလုပ်သော ဒုတိယအကြိမ် ပြည်ထောင်စု လွှတ်တော် န၀မပုံမှန် အစည်းအဝေး ၁၉ ရက်မြောက်တွင် ပြည်ထောင်စု စာရင်းစစ်ချုပ်ရုံး၏၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ ငွေစာရင်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ အမှတ်စဉ် (၇/၂၀၁၈) နှင့် လွှတ်တော် ကိုယ်စားလှယ်များ၏ ဆွေးနွေးချက်များအပေါ် စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနကိုယ်စား စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ရှင်းလင်း ပြောကြားရာတွင် အထက်ပါအတိုင်း ပြောကြားခဲ့ခြင်း ဖြစ်သည်။

“ပို့ကုန် အမယ်တွေကို ပိုမို တိုးချဲ့ခြင်း၊ တင်ပို့တဲ့ နိုင်ငံတွေကို တိုးချဲ့ခြင်း၊ တင်ပို့တဲ့ ပမာဏကို တိုးချဲ့ခြင်းတို့ဖြင့် ပို့ကုန်တိုးမြှင့်ရေးကို ဆောင်ရွက်သွားမှာ ဖြစ်ပါတယ်။ ဒီလို ဆောင်ရွက်ခဲ့တဲ့အတွက် ၂၀၁၆-၂၀၁၇ ဘဏ္ဍာနှစ်မှာ မြန်မာနိုင်ငံရဲ့ ပို့ကုန်တန်ဖိုးဟာ အမေရိကန် ဒေါ်လာ ၁၂ ဘီလျံ ရှိခဲ့ပေမယ့် ၂၀၁၇-၂၀၁၈ ဘဏ္ဍာနှစ်မှာ ပို့ကုန်အမေရိကန် ဒေါ်လာ ၁၅ ဘီလျံသို့ တိုးလာပြီး ကုန်သွယ်မှုလိုငွေဟာ ၂၀၁၆-၂၀၁၇ ဘဏ္ဍာနှစ်မှာ အမေရိကန် ဒေါ်လာ ၅ ဒသမ ၂ ဘီလျံကနေ၂၀၁၇- ၂၀၁၈ ဘဏ္ဍာနှစ်မှာ အမေရိကန် ဒေါ်လာ ၃ ဒသမ ၈ ဘီလျံသို့ ကျဆင်းခဲ့ပါကြောင်းကိုလည်း တင်ပြလိုပါတယ်” ဟု စက်မှုဝန်ကြီးက ပြောကြားသည်။

၂၀၁၁ ခုနှစ်မှ စတင်ခဲ့သည့် ပြုပြင်ပြောင်းလဲမှုများနှင့်အတူ ကုန်သွယ်မှုဆိုင်ရာ ဖြေလျော့ ပြုပြင်ပြောင်းလဲမှုများ ပြုလုပ်ခြင်း၊ မြန်မာနိုင်ငံတော် ဗဟိုဘဏ်မှ နိုင်ငံခြားငွေ လွတ်လပ်စွာ စီးဆင်းခွင့်ပြု၍ ပို့ကုန်တင်ပို့မှ တင်သွင်းနိုင်သည့် စနစ်ကို ပယ်ဖျက်ခဲ့ခြင်း၊ နိုင်ငံတော်၏ တည်ဆောက်ရေး လုပ်ငန်းများအတွက် ရင်းနှီးမြှုပ်နှံမှုနှင့် လုပ်ငန်းသုံးပစ္စည်းများ၊ စက်ယန္တရားများ ပိုမိုတင်သွင်းခဲ့ခြင်း၊ အထူးစီးပွားရေးဇုန် စီမံကိန်းများ အကောင်အထည်ဖော် ဆောင်ရွက်ခြင်း၊ နိုင်ငံခြား ရင်းနှီးမြှုပ်နှံမှုများအတွက် တင်သွင်းမှုများနှင့် ပုဂ္ဂလိကကဏ္ဍ ဖွံ့ဖြိုးတိုးတက်စေရေးအတွက် လွတ်လပ်စွာ တင်သွင်းခွင့်ပြုမှုများအရ သွင်းကုန်တင်သွင်းမှု ပိုမိုလာပြီး ပို့ကုန်နှင့် သွင်းကုန်တိုးတက်မှု အချိုးမညီမျှဘဲ ၂၀၁၂-၂၀၁၃ ဘဏ္ဍာနှစ်မှစ၍ ကုန်သွယ်မှု လိုငွေများ ဖြစ်ပေါ်ခဲ့ကြောင်း ၎င်းက ပြောကြားသည်။

ထို့ပြင် နိုင်ငံတော် တည်ဆောက်ဆဲ ကာလဖြစ်သည့်အတွက် နိုင်ငံတကာမှ ရင်းနှီးမြှုပ်နှံသူများကို ဖိတ်ခေါ်နေသည့် ကာလဖြစ်ပြီး ၀င်ရောက်လာသည့် နိုင်ငံခြား ရင်းနှီးမြှုပ်နှံမှုများမှ လိုအပ်သည့် ကုန်ပစ္စည်းများ တင်သွင်းမှု များပြားနေခြင်းကြောင့် သွင်းကုန်တိုးချဲ့ တင်သွင်းမှုသည်လည်း အခြားသော ဖွံ့ဖြိုးဆဲနိုင်ငံများကဲ့သို့ မဖြစ်မနေ ဆက်လက် ဖြစ်ပေါ်နေမည်ဟု သုံးသပ်ရကြောင်း၊ အထူးစီးပွားရေးဇုန်များသည် ပို့ကုန်တိုးချဲ့ တင်ပို့ နိုင်သလို သွင်းကုန်များကိုလည်း အစားထိုးနိုင်သည်ကို တွေ့ရကြောင်း စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ပြောကြားသည်။

ဆက်လက်ပြီး စက်မှုဝန်ကြီးက ကုန်သွယ်မှု သာမန်စာရင်းအပိုင်းတွင် ကုန်စည်များသာမက ၀န်ဆောင်မှုအပိုင်းသည်လည်း ပါဝင်နေခြင်းကြောင့် နိုင်ငံတော် ၀င်ငွေရရှိသည့် ၀န်ဆောင်မှုလုပ်ငန်းများ ဖြစ်သော ခရီးသွားလုပ်ငန်း၊ လေယာဉ်ဖြတ်သန်းခ၊ လေဆိပ်ရပ်နားခ၊ လေယာဉ်ဆီဖြည့်ခ၊ သင်္ဘောဆိပ်ကမ်း ရပ်နားခ၊ သင်္ဘောဆိပ်ကမ်းများအတွက် ၀င်ထွက်မှုဆိုင်ရာ အခွန်အခများ၊ လေယာဉ်လိုင်းများမှ ပြည်တွင်းပြည်ပ နိုင်ငံခြားသား ခရီးသွားများအတွက် ရရှိမည့် လေယာဉ်ခများ၊ ပြည်ပ အလုပ်အကိုင်များမှ ရရှိမည့် ၀င်ငွေများ စသည်တို့ကို ထည့်သွင်း တွက်ချက်ပါက ကုန်သွယ်မှုလိုငွေကို ပိုမို လျော့ကျစေမည် ဖြစ်ကြောင်း ပြောကြားသည်။

 

လာမည့်ဘဏ္ဍာနှစ်တွင် ကုန်သွယ်မှုလိုငွေ ဒေါ်လာ သန်း ၅၀၀ သာရှိရန် ဆောင်ရွက်မည်ဟု မျှော်မှန်းထားမှုမှာ ကုန်သွယ်မှုလိုငွေ နှစ်စဉ်ကျဆင်းလာနေခြင်းကြောင့် ဟုဆို

နယ်စပ်ကုန်သွယ်မှုတွင် ပါဝင်သည့် ထိုင်းနိုင်ငံနှင့် ကုန်သွယ်ရေးအတွက် ထိုင်းကုန်​ကားများ မြ၀တီချစ်​ကြည်​​ရေးတံတားမှ ၀င်​​ရောက်လာမှုကို တွေ့ရစဉ်​ (ဓာတ်ပုံ-ကိုရွှေသိန်း)

၂၀၁၈-၂၀၁၉ ဘဏ္ဍာနှစ်တွင် ပြည်ပ ပို့ကုန်/သွင်းကုန်တန်ဖိုး ဒေါ်လာ ၃၁ ဒသမ ၁ ဘီလျံ ကုန်သွယ်နိုင်ရန် ရည်မှန်းထားပြီး ကုန်သွယ်မှုလိုငွေ ဒေါ်လာ သန်း ၅၀၀ သာ ဖြစ်ပေါ်စေရန် ရည်မှန်းဆောင်ရွက်မည်ဟု မျှော်မှန်းထားမှုမှာ ကုန်သွယ်မှုလိုငွေ နှစ်စဉ်ကျဆင်းနေ၍ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

၂၀၁၇-၂၀၁၈ ဘဏ္ဍာနှစ်တွင် မြန်မာနိုင်ငံ၏ ပြည်ပကုန်သွယ်မှုပမာဏ ဒေါ်လာ ၂၉ ဘီလျံခန့်မှန်းခဲ့ပြီး အဆိုပါ ဘဏ္ဍာနှစ်တွင် ပြည်ပပို့ကုန်တန်ဖိုး ဒေါ်လာ ၁၄၀၀၀ သန်းနှင့် သွင်းကုန်တန်ဖိုး ဒေါ်လာ ၁၅၀၀၀ သန်းဟု ခန့်မှန်းထားပြီး ကုန်သွယ်မှု လိုငွေဒေါ်လာ တစ်ဘီလျံရှိမည်ဟု ခန့်မှန်းခဲ့ရာမှ ၂၀၁၈-၂၀၁၉ ဘဏ္ဍာနှစ်အတွက် ခန့်မှန်းရာတွင်မူ ဒေါ်လာ သန်း ၅၀၀ အထိ လျှော့ချခန့်မှန်းလာခြင်း ဖြစ်သည်။

မြန်မာနိုင်ငံတွင် နှစ်အလိုက် ကုန်သွယ်မှုလိုငွေများအဖြစ် ၂၀၁၅-၂၀၁၆ ဘဏ္ဍာနှစ်တွင် ပို့ကုန် ဒေါ်လာ ၁၁,၁၃၇ သန်းနှင့် သွင်းကုန် ဒေါ်လာ ၁၆,၅၇၈ သန်း တင်သွင်းခဲ့ပြီး ဒေါ်လာ ၅,၄၄၁ သန်း ကုန်သွယ်မှုလိုငွေ ဖြစ်ပေါ်ခဲ့သည်။ ထို့နောက် NLD အစိုးရ လက်ထက်တွင် ၂၀၁၆-၂၀၁၇ ဘဏ္ဍာနှစ်၌ ပို့ကုန်ဒေါ်လာ ၁၁,၉၉၉ သန်းနှင့် သွင်းကုန် ဒေါ်လာ ၁၇,၂၁၁ သန်း တင်သွင်းခဲ့ပြီး ဒေါ်လာ ၅,၂၁၂ သန်းသို့ ကုန်သွယ်မှုလိုငွေ လျော့ကျခဲ့သည်။ ထို့ပြင် ၂၀၁၇-၂၀၁၈ ဘဏ္ဍာနှစ်၌ ပို့ကုန် ဒေါ်လာ ၁၄,၈၅၁ သန်းနှင့် သွင်းကုန် ဒေါ်လာ ၁၈,၆၈၇ သန်း တင်သွင်းခဲ့ပြီး ဒေါ်လာ ၃,၈၃၆ သန်းသို့ ကုန်သွယ်မှုလိုငွေ လျော့ကျခဲ့သည်။

“ပို့ကုန်ထက် သွင်းကုန်က တန်ဖိုးအားဖြင့် များနေတာရှိလို့ Trade Deficit ရှိတယ်ဆိုတာ တော်တော်များများလည်း သိသလို လုပ်ငန်းရှင်တွေကလည်း ထောက်ပြထားတာ ရှိပါတယ်။ ပို့ကုန်နဲ့ပတ်သက်ပြီး ပို့ကုန်တိုးမြှင့်ရောင်းနိုင်ရင် Trade Deficit လျော့သွားပြီး အလားအလာ ကောင်းမွန်လာမှာပါ။ ပြန်ကြည့်မယ်ဆိုရင် မြန်မာပြည်က ထွက်သမျှ ပစ္စည်းတိုင်းဟာ ရောင်းကုန်တာ များပါတယ်။ နောက်ပိုင်းအခြေအနေမှာ ကုန်သည်များနဲ့ ပူးပေါင်းဆောင်ရွက်မှု၊ အစိုးရရဲ့ အားထုတ်မှုတွေကြောင့် ပို့ကုန်ဈေးကွက်တိုးမြင့်လာပြီး ထွက်သမျှပစ္စည်း မကျန်လောက်အောင်ကို ရောင်းလို့ရတဲ့ သဘောတရားရှိပါတယ်” ဟု စီးပွားနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

NLD အစိုးရလက်ထက်တွင် ပို့ကုန်သုံးဆမြှင့်တင်ရန် ကြိုးပမ်းမည်ဟု ကြွေးကြော်ထားသည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အနေဖြင့် ပို့ကုန်တင်ပို့မှု အနည်းငယ်နှင့် ကုန်သွယ်မှု လိုငွေအနည်းငယ်သာ လျော့ကျရန် ဆောင်ရွက်ထားနိုင်ပြီး ပြီးခဲ့သည့် ၂၀၁၇-၂၀၁၈ ဘဏ္ဍာနှစ်တွင် ကုန်သွယ်မှုလိုငွေ ဒေါ်လာ တစ်ဘီလျံသာရှိရန် ရည်မှန်းခဲ့သော်လည်း အမှန်တကယ်တွင်မူ ပို့ကုန်ဒေါ်လာ ၁၄၆၇၅ ဒသမ ၂ သန်းနှင့် သွင်းကုန်ဒေါ်လာ ၁၈၆၄၈ ဒသမ ၆ သန်း ရှိသည့်အတွက် လိုငွေပမာဏမှာ ဒေါ်လာ ၃ ဒသမ ၈၃ သန်းကျော် ဖြစ်ပေါ်ခဲ့သည်။

လက်ရှိ ၂၀၁၈ ဘဏ္ဍာနှစ်တို ခြောက်လတွင်လည်း ကုန်သွယ်မှုပမာဏ ဒေါ်လာ သန်း ၁၃၇၀၀ ရရှိရန် ခန့်မှန်းထားပြီး လိုငွေကို ကုန်သွယ်မှုလိုငွေကို ဒေါ်လာ သန်း ၂၉၀ သာ ဖြစ်ပေါ်မည်ဟု လျှော့ချခန့်မှန်းထားသော်လည်း ၂၀၁၈ သြဂုတ်လ ၃ ရက်အထိ ကုန်သွယ်မှုစာရင်းများအရ ပို့ကုန်ဒေါ်လာ ၅၆၉၃ သန်းနှင့် သွင်းကုန်ဒေါ်လာ ၆၆၄၇ သန်းကျော်အထိ ရှိနေခဲ့ပြီး လိုငွေဒေါ်လာ ၉၅၄ သန်း ဖြစ်ပေါ်နေသည်။