၂၀၁၇ ခုနှစ်တွင် ကချင်ပြည်နယ်အတွင်း မူးယစ်ဆေးဝါးကြောင့် တစ်နေ့လျှင် ၁၂ ဦးနီးပါး ဖမ်းဆီးခဲ့ပြီး အများဆုံးနှစ်အဖြစ် စံချိန်တင်

၂၀၁၇ ခုနှစ်တွင် ကချင်ပြည်နယ်အတွင်း မူးယစ်ဆေးဝါးကြောင့် တစ်ရက်လျှင် ၁၂ ဦး နီးပါး ဖမ်းဆီးခဲ့ပြီး အများဆုံးနှစ်အဖြစ် စံချိန်တင်ခဲ့ကြောင်း သတင်းရရှိသည်။

၂၀၁၇ ခုနှစ် ဇန်န၀ါရီ ၁ ရက်မှ ဒီဇင်ဘာ ၁၂ ရက်အထိ အမှုပေါင်း ၃၂၅၀ မှု၊ တရား ကျား ၃၇၆၆ ဦး၊ မ တရားခံ ၅၃၀ ဦး စုစုပေါင်း ၄၂၉၆ ဦးအထိ စံချိန်တင် ဖမ်းဆီးနိုင်ခဲ့ကြောင်း သိရသည်။

ကချင်ပြည်နယ်တွင် ၂၀၁၂ ခုနှစ်တွင် မူးယစ်ဆေးဝါးအမှု ၁၁၃၈ မှု တရားခံဦးရေ ၁၆၉၆ ဦး၊၂၀၁၃ ခုနှစ်တွင် ၁၅၀၂ မှုတရားခံ ဦးရေ ၂၂၉၉ ဦး ၊၂၀၁၄ ခုနှစ်တွင် အမှုပေါင်း  ၁၈၉၀ မှု တရားခံဦးရေ  ကျား ၂၃၆၅ ဦး၊ မ ၃၈၄ ဦး စုစုပေါင်း၂၇၄၉ ဦး၊၂၀၁၅ ခုနှစ်တွင် အမှုပေါင်း ၁၆၇၁ မှု၊ တရားခံ ကျား ၁၈၄၇ ဦး မ ၂၉၅ ဦး စုစုပေါင်း ၂၁၄၂ ဦး၊ ၂၀၁၆ ခုနှစ်တွင်  ၁၅၂၉ မှု၊ တရားခံပေါင်း ၂၀၉၀ ဦးတို့ကို အရေးယူခဲ့ကြောင်း သိရသည်။

ကချင်ပြည်နယ် ရဲတပ်ဖွဲ့ ဒုပြည်နယ် ရဲတပ်ဖွဲ့မှူး ရဲမှူးကြီး လွင်မောင်သိန်းက “ဒီနှစ်ကတော့ အများဆုံး ပြောရမှာပေါ့။ လူပေါင်း  ၄၀၀၀ ကျော်သွားတယ်။ ငွေသိမ်းဆည်းမိတာက ၁၂၄၁ သိန်းကျော်တယ်။ ယွမ်ငွေက  ၈၇၁ ယွမ်ပေါ့။ ဘိန်းဖြူက ၄၈၄၁၆ ဂရမ်၊ ဘိန်းမည်းက ၄၇၄၄၉ ဂရမ်၊ ဆေးပြားက ၂၂ သိန်းကျော်တယ်။ ဒါက ဒီဇင်ဘာ ၁၂ ရက်ချုပ် စာရင်းပေါ့။ အများကြီး မိတာက မူးယစ်တပ်ဖွဲ့တွေ တိုးချဲ့နိုင်တယ်။ ပြည်သူတွေ တတ်နိုင်သလောက် ပါလာတယ်။ အခု ဧရာဦး စစ်ဆင်ရေးက တစ်လခွဲမှာတင် မနည်းဘူး မိတာ။ မူးယစ်ဆေးတွေကတော့ ကချင်မှာ လုပ်တာ မရှိဘူးလို့ တွက်ရမှာပေါ့။ ဘိန်းမည်းကတော့ ထွက်တာ ရှိတာပေါ့။ ရှမ်းမြောက် နယ်စပ်ကနေ စစ်ကိုင်း၊ မန္တလေးဖြတ်လာတာပဲ။ ဖားကန့်လို၊ ရွှေမှော်၊ ကျောက်မှော်တွေက ဈေးကွက်ကြီး ဖြစ်နေတာ။ အခုက ဘက်ပေါင်းစုံ ဘက်ကလည်း မူးယစ်ဆေးဝါးကို ချည်းကပ် ဖြေရှင်းနေကြတယ်” ဟု ပြောကြားသည်။

၂၀၁၇ခုနှစ် ဒီဇင်ဘာ  ၆ ရက်က မူးယစ် ဆေးဝါးတားဆီးနှိမ်နှင်းရေး ထိရောက်စွာ ပူးပေါင်းဆောင်ရွက်ပေးဖို့ ပြည်နယ်အစိုးရနှင့် ပြည်ထောင်စု အစိုးရအား တိုက်တွန်းကြောင်းအဆို ကချင်ပြည်နယ် လွှတ်တော်တွင် အတည်ပြုခဲ့သည်။

ကချင်ပြည်နယ်တွင် ဖားကန့်ကျောက်စိမ်းမှော် ဒေသများ၊ ဧရာဝတီမြစ်ဖျားပိုင်းရှိ ရွှေမှော်၊ ကျောက်မှော်များ၊ မြန်မာ-တရုတ် နယ်စပ်တစ်လျောက်ရှိ သစ်မှောင်ခိုမှော်များတွင် လူတိုင်းနီးပါး သုံးစွဲမှုများ ရှိလာခဲ့ပြီး တက္ကသိုလ်ကျောင်းများအထိပါ ပျံနှံခဲ့သည်။ မူးယစ်ဆေးဝါး ရောင်းသူပေါများလာခြင်းမှာ သုံးစွဲသူများမှ မိမိအသုံးစရိတ် လည်ပတ်နိုင်ရေးအတွက် တစ်နိုင်တစ်ပိုင် ရောင်းချမှု၊ ငွေကြေးတစ်ခုတည်းကိုသာ ရလိုမှု၊ မူးယစ်ဆေးဝါး ရောင်းဝယ်သည့် လုပ်ငန်းများနှင့် ဆက်စပ်နေမှု၊ မူးယစ်ဆေးဝါး ရောင်းချခြင်းဖြင့် အလွယ်တကူ ငွေရလွယ်မှုတို့ကြောင့် ဖြစ်ကြောင်း သိရသည်။

တရုတ်နိုင်ငံသို့ ကချင်ပြည်နယ်မှ သစ်မှောင်ခိုသယ်ယူမှု လျော့ကျနေသော်လည်း ရှမ်းပြည်နယ်မြောက်ပိုင်းမှ သယ်ဆောင်နေဆဲ ဖြစ်ကြောင်းသိရ

ရွှေ့လီမြစ်ကြောင်းအတွင်း သိမ်းဆည်းရမိသည့် တရားမ၀င်သစ်လုံးများအား တွေ့ရစဉ် (ဓာတ်ပုံ-သစ်တောဦးစီးဌာန)

တရုတ်နိုင်ငံသို့ ကချင်ပြည်နယ်မှ သစ်မှောင်ခိုသယ်ယူမှု လျော့ကျနေသော်လည်း ရှမ်းပြည်နယ် မြောက်ပိုင်းမှ သယ်ဆောင်နေဆဲ ဖြစ်ကြောင်း သစ်မှောင်ခို အသိုင်းအ၀ိုင်းမှ ယာဉ်မောင်းများနှင့် ပါဝင်ပတ်သက်သူများက ပြောကြားသည်။

တရုတ်နိုင်ငံသို့ ကချင်ပြည်နယ်ဘက်မှ သစ်မှောင်ခိုသယ်သည့် လမ်းကြောင်းမှာ စစ်ကိုင်းတိုင်း အတွင်းမှ သစ်များကို ဧရာဝတီမြစ်ရိုးအတိုင်း ဆန်တက်ကာ ဗန်းမော်မြို့အောက်ပိုင်း ညောင်ပင်သာ၊ စာစတီးကျေးရွာ ဆိပ်ကမ်းများတွင် ဆိုက်ကပ်၍ ဆိုင်ကယ်များဖြင့် တင်ဆောင်ပြီး မန်စီမြို့ ဘုရားကုန်းသစ်ကွင်း မှတစ်ဆင့် ကေအိုင်အေ ထိန်းချုပ်နယ်မြေ အင်ဘာပါဘက်သို့ သယ်ဆောင်နေခြင်းဖြစ်ကြောင်း သိရသည်။

သစ်မှောင်ခိုလုပ်ငန်းနှင့် ဆက်စပ်သူ တစ်ဦးက “ဗန်းမော်ဘက်လမ်းကြောင်းက နည်းသွားပြီ။ သုံးပေ၊ လေးပေ တိုလေးတွေကို ဆိုင်ကယ်ကယ်ရီနှင့် တင်နေကြတာ။ ဧရာဝတီမြစ်နံဘေးက စာဝတီး၊ ညောင်ပင်သာ ကပ်ပြီး ဆိုင်ကယ်နဲ့ မန်စီဘုရားကုန်းမှာ သစ်ကွင်းရှိတယ်။ အဲဒီကနေ အင်ဘာပါကို သယ်တယ်။ လွန်ခဲ့တဲ့ ရက်ပိုင်းက မန်စီ -ဂုတ်ထိပ် လမ်းပိုင်းက မဒံယံဘက်မှာ ဆိုင်ကယ်ကယ်ရီ ၂၀ လောက် ဖမ်းသေးတယ်။ အခု မန်စီရဲစခန်း အချုပ်ကို တပ်ကပို့ထားတယ်” ဟု ဆိုသည်။

ယခုနှစ် သစ်မှောင်ခို လုပ်ငန်းများတွင် ယခင်လမ်းကြောင်းဖြစ်သည့် မန်ဝိန်းကြီးဒေသမှ တရုတ်နိုင်ငံ နောင်တောင်းမြို့သို့ ထွက်သည့် လမ်းကြောင်းမှာ အထွက်မရှိသလောက်ဖြစ်ပြီး ရှမ်းပြည်မြောက်ပိုင်း မိုးမိတ်-မိုးလို-မန်တုံ-မုံးဝီး-နန့်ခမ်း လမ်းကိုသာ အဓိက အသုံးပြုနေကြောင်း သိရသည်။

“မန်ဝိန်းကြီးလမ်းက ဒီနှစ်သွားတာ မကြားမိဘူး။ မိုးမိတ်-မန်တုံ-မုံးဝီး-နန့်ခမ်း ဘက်ကနေ ထွက်ကြတာ။ နည်းသေးတယ်။ နှစ်တိုင်းလောက်တော့ အလုပ်မဖြစ်သေးဘူး။ ကားကြီးတွေ မလာသေးဘူး။ ကေအိုင်အေ ဘက်ကလည်း သစ်သယ်တိုင်း တိုက်ပွဲတွေ ဖြစ်နေတော့ စိုးရိမ်တဲ့ သဘောရှိတယ်။ လွန်ခဲ့တဲ့ နှစ်တွေက တစ်ရက်ကို တန် ၆၀၀ လောက် တရုတ်ဘက်ကို သယ်တယ်။ အခုက တန် ၅၀၊ ၆၀ လောက်ပဲ။ လျှော့သွားတယ်။ သစ်အများစုက တွင်းငယ်၊ တကောင်းတို့ဘက်နေ လာကြတာ။ ကသာဘက်ကလည်း ပါတာရှိတယ်။ ကျွန်းသစ်အများဆုံးပါ။ အများဆုံး သယ်တာက နှစ်လလောက်ပဲ ရှိဦးမယ်။ လမ်းက သုံးရာသီစလုံး သုံးရတယ်။ ကျောက်ခင်းလမ်းပေါ့” ဟု ဗန်းမော်မြို့မှ သစ်မှောင်ခိုလုပ်ငန်းနှင့် နီးစပ်သူတစ်ဦးက ပြောကြားသည်။

လက်ရှိတွင် မြန်မာနိုင်ငံ အလယ်ပိုင်း မန္တလေးတိုင်း၊ စစ်ကိုင်းတိုင်း၊ အလောင်းတော်ကဿဖ၊ မဟာမြိုင်၊ ပုံတောင်ပုံညာ ဒေသရှိ ဂန့်ဂေါကြိုးဝိုင်း စသည့်ဒေသများမှ သစ်များကို ပြင်ဦးလွင်နှင့် နောင်ချိုမြို့ အနီးမှတစ်ဆင့် ပြည်သူ့စစ် အမည်ခံ အဖွဲ့အစည်း အချို့က တာဝန်ယူ ပို့ဆောင်နေကြောင်း သစ်မှောင်ခိုကား မောင်းသူများမှတစ်ဆင့် သိရသည်။

“မန္တလေးဘက်ကထွက်တဲ့ သစ်တွေက ပြင်ဦးလွင်မြို့ဘက်က သစ်ကွင်းမှာရော၊ နောင်ချိုဘက်က သစ်ကွင်းမှာရော သူ့နည်းသူ့ဟန်နဲ့ ရောက်လာရင် အဲဒီမှာ ပြည်သူ့စစ်အဖွဲ့တွေ ရှိတယ်။ တာဝန်ယူပြီး သယ်တာ။ မန္တလေး-မူဆယ် လမ်းမကြီးအတိုင်း တက်ပြီး မူဆယ် ၁၀၅ မိုင် မရောက်ခင် ကြူကုတ်၊ ပန်ဆိုင်းဘက်ထွက်တဲ့ လမ်းကနေ ရွှေလီမြစ်ကို ဖြတ်ပြီးသယ်တာ။ လမ်းတော့ အသေးစိတ် မသိတော့ဘူး။ အောက်တုန်ခမ်းလမ်းဘက် ဖြတ်တာပဲ။ အဲဒီဘက်တော့ အရှည်တွေ အလုပ်ဖြစ်တယ်။ နောက်ပြီး ရှမ်းမြောက်နှင့် ရှမ်းတောင်ကြားက လဲချားဘက်ကလည်း ထွက်နေတယ်။ အဖွဲ့အစည်းတွေက အဓိကပေါ့။ တရုတ်ဘက်ကတော့ ကျွန်းက တစ်တန် သိန်း ၅၀ ကနေ သိန်း ၈၀ လောက်အထိရှိတယ်။ လှရင်လှသလိုပေါ့။ ပိတောက်က ဈေးနည်းနည်းလျော့တယ်” ဟု တရုတ်နိုင်ငံ ရွှေလီမြို့မှ ကုန်သည်တစ်ဦးက ပြောကြားသည်။

တရုတ်နိုင်ငံတွင် မြန်မာပြည်မှ သစ်များကို နောင်တောင်းမြို့နှင့် ရွေလီမြို့ ကျယ်လန့် ရပ်ကွက်တို့တွင် စုပုံကာ ပရိဘောဂနှင့် ကုန်ကြမ်းများ ထုတ်လုပ်လျက်ရှိပြီး အဖိုးတန်းသစ်များကို တရုတ်နိုင်ငံ ပြည်တွင်းမြို့ကြီးများ အထိ ပို့ဆောင်နေကြောင်း သိရသည်။

ကချင်ပြည်နယ် ၀န်ကြီးချုပ် ဒေါက်တာခက်အောင်က ၂၀၁၇ ခုနှစ် မတ် ၂၀ ရက် ဒုတိယအကြိမ် ဆဋ္ဌမ အကြိမ်မြောက် ပထမနေ့ လွှတ်တော်အစည်းအဝေးတွင် အစိုးရသစ် ကာလအတွင်း ကျွန်း ၆၇၄ ဒသမ ၁၉၇၄ တန်၊ သစ်မာ ၅၆ ဒသမ ၇၉၅၁ တန်၊ အခြား ၉၁၂၁ ဒသမ ၂၇၅၂ တန် စုစုပေါင်း ၉၈၅၂ ဒသမ ၂၆၇၇ တန် ဖမ်းဆီးခဲ့ကြောင်း ပြည်နယ်လွှတ်တော်တွင် တင်ပြခဲ့သည်။

လုံးခင်း-ဖားကန့် ရတနာမြေတွင် သက်တမ်းကုန် လုပ်ကွက်များမှ ယာဉ်ယန္တရားများပါ ဖြည့်တင်း၍ ယာဉ်ယန္တရား ကန့်သတ်ချက်ထက် ကျော်လွန်ကာ စည်းကမ်းမဲ့ တူးဖော်မှုများကြောင့် ဆုံးရှုံးနစ်နာမှုများရှိနေ

ကချင်ပြည်နယ် ဖားကန့်ဒေသရှိ ကျောက်စိမ်းလုပ်ကွက် အချို့ကို တွေ့ရစဉ် (ဓာတ်ပုံ-အောင်ဟိန်းမင်း)

လုံးခင်း-ဖားကန့် ရတနာမြေတွင် သက်တမ်းကုန် လုပ်ကွက်များမှ ယာဉ်ယန္တရားများပါ ဖြည့်တင်း၍ လုပ်ကွက်ဧရိယာအလိုက် သတ်မှတ်ထားသည့် ယာဉ်ယန္တရား ကန့်သတ်ချက်ထက် အဆမတန် ကျော်လွန်ကာ စည်းကမ်းမဲ့ ကျောက်စိမ်းတူးဖော်မှုများကြောင့် အကြီးအကျယ် ဆုံးရှုံးနစ်နာမှု ရှိနေကြောင်း သိရသည်။

လုံးခင်း-ဖားကန့် ရတနာမြေတွင် ကျောက်စိမ်းတူးဖော်နေသော ကုမ္ပဏီအများအပြားမှာ လုပ်ကွက် ဧရိယာအလိုက် သတ်မှတ်ထားသည့် ယာဉ်ယန္တရား ကန့်သတ်ချက်အား လိုက်နာဆောင်ရွက်ခြင်း မရှိကြောင်း၊ သက်တမ်းကုန်လုပ်ကွက်များမှ ယာဉ်ယန္တရားများပါ သက်တမ်းကျန် လုပ်ကွက်များတွင် ပူးပေါင်း ဖြည့်တင်း၍ ကန့်သတ်ချက်ထက် ကျော်လွန်ကာ စည်းကမ်းမဲ့ တူးဖော်ကြကြောင်း၊ ထို့ကြောင့် ယင်းအခြေအနေအား သက်ဆိုင်ရာ အစိုးရသို့ တင်ပြသော်လည်း အစိုးရဘက်မှ တုံ့ပြန်ဆောင်ရွက်မှုမှာ အားနည်းနေကြောင်း ဖားကန့်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးတင့်စိုးက ပြောကြားသည်။

“နိုင်ငံတော်နဲ့ နိုင်ငံသားတို့ ပိုင်ဆိုင်တဲ့ သယံဇာတပစ္စည်းတွေကို နောင်လာနောက်သားတွေ ရေရှည်သုံးဆောင်နိုင်အောင် လုပ်ကွက်တွေကို ဘယ်လိုထိန်းသိမ်းရမလဲဆိုတဲ့ ကဏ္ဍမှာ (လွှတ်တော်မှာ) ကျွန်တော်ဆွေးနွေးခဲ့တဲ့ အထဲမှာ အဲဒါတွေပါတယ်။ လုပ်ကွက်တစ်ခုထဲကို ရှိသမျှယန္တရားတွေ အကုန်စုပြုံပြီး လုပ်လိုက်တဲ့ အခါမှာ ခဏလေးနဲ့ ကုန်သွားတယ်။ ထိုနည်းတူစွာပဲ လုပ်ကွက်သက်တမ်း ကုန်တဲ့သူက ကုန်တယ်။ အဲဒီသက်တမ်း ကုန်တဲ့သူတွေက သက်တမ်းကျန်နေတဲ့ သူတွေနဲ့ စက်တွေလာပေါင်းပြီး လုပ်တယ်။ လုပ်တဲ့အခါကျတော့ မကုန်သင့်ဘဲနဲ့ ခဏလေး ခဏလေး  ကုန်သွားတယ်။ အဲဒီတော့ ကျွန်တော်တို့က ယန္တရားကိုလည်း ထိန်းချုပ်ရမယ် ဆိုပြီိးတော့ ဒီတစ်ခေါက်မှာပဲ ကျွန်တော်ဆွေးနွေးခဲ့တယ်။ ဥပဒေအရ ဆိုလို့ရှိရင် ကျွန်တော့်မှာ လုပ်ကွက်ရှိတယ်။ ခင်ဗျားမှာ ယန္တရားရှိတယ်။ ခင်ဗျားနဲ့ ကျွန်တော်နဲ့ အကျိုးတူလုပ်လို့ မရဘူး။ ကိုယ့်လုပ်ကွက် ကိုယ့်ဟာကိုယ်ပဲ လုပ်ရမယ်။ ဥပဒေမှာလည်း ဒါပြဋ္ဌာန်းထားပြီးသား။ အခုဒါမျိုးတွေပဲ လုပ်နေတယ်။ ဒါကိုလည်း ကျွန်တော်လွှတ်တော်မှာ တင်ပြပြီးပြီ။ ကျွန်တော့်တာဝန်က ဒါပဲ။ အများသိအောင်၊ အစိုးရသိအောင် အကုန်လုံး ဒီကိစ္စတွေကို လွှတ်တော်မှာ အများသိအောင်ချပြပြီးပြီ။ အရေးယူမှု အပိုင်းက ဘယ်သူ့တာဝန်လဲ။ ကျွန်တော်ဘယ်လောက်အထိ ဆွေးနွေးခဲ့လဲဆိုရင် ၂၀၁၇ ကျောက်မျက် ဥပဒေကလည်း အဆင်သင့် မဖြစ်သေးဘူး။ ယန္တရားတွေကလည်း ဒီမှာ စည်းမဲ့ကမ်းမဲ့ လုပ်နေတယ်။ အဲဒီ ၂၀၁၇ ကျောက်မျက်ဥပဒေ ကြီိးလည်း အဆင်သင့်ဖြစ်ရော မြေပြင်မှာ ကျောက်စိမ်းတူးစရာ နေရာမရှိ ဖြစ်တော့မယ်ဆိုပြီး အဲဒီလောက် ကျွန်တော်ဆွေးနွေးခဲ့ပြီ။ ကျွန်တော်တို့ဟာ ကိုယ်တိုင်အရေးယူ ဆောင်ရွက်လို့မရဘူး။ အရေးယူဆောင်ရွက်မယ့် အစိုးရကို တွန်းအားပေးဖို့၊ သိအောင်ချပြဖို့ပဲ ကျွန်တော်တို့မှာ တာဝန်ရှိတယ်။ ကျွန်တော်တို့ လုပ်ရမယ့် အလုပ်ကိုတော့ တာဝန်ကျေပွန်အောင်လုပ်တယ်။ အစိုးရဘက်က ဘာမှတုံ့ပြန်မှုမလာတဲ့ အပေါ်မှာတော့ ကျွန်တော်တို့လည်း သိပ်အားရကျေနပ်မှု မရှိဘူး” ဟု ဖားကန့်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးတင့်စိုးက ပြောကြားသည်။

လုံးခင်း-ဖားကန့် ရတနာမြေတွင် လုပ်ကိုင်ခွင့်ရ လုပ်ကွက်ဧရိယာ အကျယ်အ၀န်းအလိုက် ခွင့်ပြုမည့် စက်ယန္တရား၊ မြေသယ်ယာဉ် အရေအတွက်နှင့် ၀န်ဆောင်မှုအားကို လျာထားသတ်မှတ်ထားမှု အခြေအနေအား အစိုးရသစ် မတက်မီ ၂၀၁၅ ခုနှစ် မတ် ၉ ရက်ကပင် သတ္တုတွင်းဝန်ကြီးဌာန မြန်မာ့ကျောက်မျက်ရတနာ ရောင်းဝယ်ရေး လုပ်ငန်းမှ ကျောက်မျက်ကုမ္ပဏီများအား လိုက်နာဆောင်ရွက်ရန် ညွှန်ကြားထားပြီးဖြစ်ကြောင်း သိရသည်။

အဆိုပါ ညွှန်ကြားချက်အရ လုပ်ကွက်အကျယ်အ၀န်း ၁၀ ဧကနှင့်အောက်ဖြစ်ပါက ဘက်ဟိုးအရေအတွက် ငါးစီး ၀န်ဆောင်မှုအား စုစုပေါင်း တန် ၃၅၀၊ မြေသယ်ယာဉ်အရေ အတွက် အစီး ၂၀ ၀န်ဆောင်မှုအား စုစုပေါင်း တန် ၁၄၀၀ အသုံးပြုရမည်ဖြစ်သည်။ လုပ်ကွက်အကျယ်အ၀န်း ၁၀ ဧကအထက်မှ ဧက ၃၀ အထိဖြစ်ပါက ဘက်ဟိုးအရေအတွက် ၁၂ စီး ၀န်ဆောင်မှုအား စုစုပေါင်း တန် ၈၄၀၊ မြေသယ်ယာဉ် အရေအတွက် ၃၆ စီး ၀န်ဆောင်မှုအား စုစုပေါင်း တန် ၂၅၂၀ အသုံးပြုရမည်ဖြစ်ပြီး လုပ်ကွက်အကျယ်အ၀န်း ၃၀ ဧကအထက် ဖြစ်ပါက ဘက်ဟိုးအရေအတွက် အစီး ၂၀ ၀န်ဆောင်မှုအား စုစုပေါင်း တန် ၁၄၀၀၊ မြေသယ်ယာဉ် အရေအတွက် ၄၈ စီး ၀န်ဆောင်မှုအား စုစုပေါင်း တန် ၃၃၆၀ အသုံးပြုရမည်ဖြစ်သည်။

ဖားကန့်ဒေသတွင် ယာဉ်ယန္တရား ကန့်သတ်ချက်ထက် အဆမတန် ကျော်လွန်တူးဖော်နေမှုနှင့် ပတ်သက်၍ ကချင်အမျိုးသား ကွန်ဂရက်ပါတီ (ဗဟို) ဥက္ကဋ္ဌ ဒေါက်တာအမ်ကောန်လက “စက်ယန္တရား ကန့်သတ်ချက်ကို သတ္တိရှိရှိလုပ်ပါ။ နိုင်ငံတော်အစိုးရရဲ့ အာဏာကိုကိုင်စွဲပြီး အကောင်အထည် ဖော်ရမယ်။ ဒါကိုမှ မလုပ်ရဲရင်တော့ အခက်အခဲ ရှိလိမ့်မယ်။ ဒါကို တတ်နိုင်သလောက် အရွေ့တော့ တွန်းရလိမ့်မယ်။ စက်ယန္တရားမှ မကန့်သတ်ရင်တော့ ဒီနယ်မြေဟာ ၁၀ နှစ်အတွင်း မခံတော့ဘူး။ ဒါကိုတော့ ကျွန်တော် အပြင်းအထန် တိုက်တွန်းလိုပါတယ်။ ဒီအစိုးရဟာ အရင်အစိုးရထက်စာရင် ဥပဒေဆောင်ရွက်ပုံ ဆောင်ရွက်နည်း အများကြီးပိုတယ်။ ပွင့်လင်းမြင်သာမှုအပိုင်း အားကောင်းပေမဲ့ ဥပဒေရဲ့ အနှစ်သာရကို အကောင်အထည် ဖော်တဲ့နေရာမှာတော့ အားနည်းသေးတယ်” ဟု ပြောကြားသည်။

ကျောက်စိမ်းတူးဖော်ရေး လုပ်ကွက်များမှာ လစဉ်သက်တမ်းကုန်ဆုံးလျက်ရှိပြီး ၂၀၁၅ ခုနှစ် သတ္တုတွင်း ၀န်ကြီးဌာန၏ စာရင်းများအရ ဖားကန့်ဒေသတွင် ပုဂ္ဂလိကကုမ္ပဏီ ၈၀၈ ခု တစ်ဧက လုပ်ကွက်ပေါင်း ၁၅၆၃၈ ကွက်၊ အကျိုးတူကုမ္ပဏီ ၂၂၂ ခု လုပ်ကွက်ပေါင်း ၃၀၂ ကွက်ရှိခဲ့ရာမှ NLD အစိုးရ တက်လာပြီးနောက်ပိုင်း လုပ်ကွက်များ သက်တမ်းတိုးခွင့် မရှိတော့သည့်အတွက် ၂၀၁၇ ခုနှစ် အောက်တိုဘာ ၃၁ ရက် စာရင်းချုပ်အရ အကျိုးတူ လုပ်ကွက် ၉၅ ကွက်၊ ပုဂ္ဂလိကလုပ်ကွက် ၇၄၅ ကွက်ခန့်သာ ကျန်ရှိတော့ကြောင်း မြစ်ကြီးနားမြို့တွင် ပြုလုပ်ခဲ့သည့် ကျောက်မျက်ရတနာ မူဝါဒဆွေးနွေးပွဲတွင် မြန်မာ့ကျောက်မျက်ရတနာ ရောင်းဝယ်ရေး လုပ်ငန်းမှ ဦးဆောင်ညွှန်ကြားရေးမှူး ဦးအောင်ညွန့်သိန်း၏ ပြောကြားချက်အရ သိရသည်။

ဖားကန့်ဒေသတွင် ဥရုချောင်းအတွင်း ရေကျော်လမ်းများ ဖောက်လုပ်ခြင်းကြောင့် ချောင်းတိမ်ကော ပျက်စီးမှုများ ရှိနေသော်လည်း ယခုနှစ် ပွင့်လင်းရာသီချိန်တွင် ရေကျော်လမ်းကိုးခု ထပ်မံခွင့်ပြုထား

မမုံကျေးရွာအနီးတွင် ဥရုချောင်းအတွင်း ရေကျော်လမ်း ဖောက်လုပ်နေသည်ကို ဒီဇင်ဘာ ၂ ရက်က တွေ့ရစဉ်

ဖားကန့်ဒေသတွင် ဥရုချောင်းအတွင်း ရေကျော်လမ်းများ ဖောက်လုပ်ခြင်းကြောင့် ချောင်းတိမ်ကော ပျက်စီးမှုများ ရှိနေသော်လည်း ယခုနှစ် ပွင့်လင်းရာသီချိန်တွင် ရေကျော်လမ်း ကိုးခုအား ဖောက်လုပ်ရန် ထပ်မံခွင့်ပြုထားကြောင်း ဖားကန့်မြို့နယ် အုပ်ချုပ်ရေးမှူးရုံးမှ သိရသည်။

“မနှစ်ကတော့ ရေကျော်လမ်းရှစ်ခု ရှိပါတယ်။ ဒီနှစ်ရာသီချိန်မှာတော့ ရေကျော်လမ်းလုပ်ဖို့ ကိုးနေရာ ခွင့်ပြုထားပါတယ်။ ရေကျော်လမ်း ကိုးခုအပြင် ကူးတို့ဆိပ်နှစ်ခုပါ ပါတယ်” ဟု ဖားကန့်မြို့နယ် ဒုတိယမြို့နယ် အုပ်ချုပ်ရေးမှူး ဦးမြင့်ခိုင်က ပြောကြားသည်။

အဆိုပါ ရေကျော်လမ်းများမှာ ဥရုချောင်းအတွင်း ပြွန်ပိုက်လုံးကြီးများခံ၍ ကျောက်တုံး ကျောက်ခဲကြီးများနှင့် မြေစာများဖို့ကာ ကျောက်စိမ်းတူးဖော်ရေး ကုမ္ပဏီလုပ်ငန်းများမှ စွန့်ပစ်မြေစာသယ်ယာဉ်များ ဖြတ်သန်း သွားလာနိုင်ရန် ဖောက်လုပ်ခြင်းဖြစ်ကြောင်း၊ နှစ်စဉ်ပွင့်လင်းရာသီ ရောက်ရှိချိန်တွင် ဥရုချောင်းဖြတ် ရေကျော်လမ်းများအား ဖောက်လုပ်လေ့ရှိပြီး မိုးဦးကာလသို့ မရောက်ခင် အချိန်မီ ဖျက်သိမ်းရကြောင်း၊ ထိုသို့ ဖျက်သိမ်းချိန်ရောက်၍ ကုမ္ပဏီများမှ ၎င်းတို့နှင့် သက်ဆိုင်သည့် ရေကျော်လမ်းများအား ဖျက်သိမ်းကြရာတွင် အဆိုပါလမ်းများ ဖောက်လုပ်ရာ၌ အသုံးပြုထားသည့် ကျောက်တုံးကျောက်ခဲနှင့် မြေစာများကို ကုန်စင်အောင် ပြန်လည် မကျုံးနိုင်သည့်အတွက် ဥရုချောင်းမှာ နှစ်စဉ်တိမ်ကောမှု ဖြစ်ပေါ်နေရကြောင်း၊ ထို့ကြောင့် ဥရုချောင်းအတွင်း ရေကျော်လမ်းများ ဖောက်လုပ်ခြင်းအား ဒေသခံများ ကန့်ကွက်မှုများ ရှိနေပြီး ယခုနှစ် ရာသီချိန်တွင် ရေကျော်လမ်းများ ဖောက်လုပ်ခြင်း မပြုတော့ရန် တောင်းဆိုခဲ့ကြသော်လည်း ရေကျော်လမ်း ကိုးခုအား ယခုကဲ့သို့ ဖောက်လုပ်ခွင့်ပြုထားခဲ့ခြင်း ဖြစ်ကြောင်း သိရသည်။

“ဥရုချောင်း ရေစီးရေလာ ပိတ်ဆို့မှုတွေ ဖြစ်ပေါ်စေတဲ့ အထဲမှာ ဒီရေကျော်တံတားတွေက တစ်ခုအပါအ၀င် ဖြစ်ပါတယ်။ ဥရုချောင်းမှာ အနည်တွေက အမြဲတမ်းပါနေတယ်။ အဲဒီရေကျော်နား ရောက်တဲ့အခါမှာ ရေကသေသွားတယ်။ အပေါက်လေးတွေကပဲ ရေကထွက်တော့တာ။ အဲဒီတော့ အနည်တွေပို့ချတယ်။ ချောင်းကြမ်းပြင် မြင့်တက်လာတယ်။ ဒီတံတားတွေကို မေလဆိုရင် ၁၅ ရက်နောက်ဆုံးထားပြီး ဖျက်ကြရတယ်။ တချို့ဆိုရင် ဥရုချောင်းရေက တက်နေပြီ။ ဒီလမ်းတွေကို ကမန်းကတန်း ဖျက်ရတဲ့အခါမှာ သူတို့ဖို့ထားတဲ့ ကျောက်တုံးကြီးတွေကို အပြည့်အ၀ မဆယ်နိုင်တော့ဘူး။ ဥပမာ ကားအစီးရေ ၁၀၀ လောက် ဖို့ထားတဲ့ မြေစာတွေကို ပြန်ကျုံးတဲ့အခါ အလွန်ဆုံး ကျုံးနိုင်မှ ၆၀၊ ၇၀ စာ လောက်ပဲ ပြန်ကျုံးနိုင်တယ်။ ကျန်တဲ့ဟာတွေက ဥရုချောင်းထဲကို မျောပါသွားတယ်။ ဒီလို တစ်ခုတစ်ခုဆိုရင် နည်းတာမဟုတ်ဘူး။ ဒီလိုတံတားတွေ များလာတာနဲ့အမျှ ရေစီးရေလာတွေ နှေးသွားတယ်။ ဒီလိုတံတားတွေ ဆောက်တာကို ကျွန်တော်လည်း သိပ်လက်မခံနိုင်ဘူး။ ကျွန်တော်တို့ ကိုယ်တိုင်လည်း ဒီလိုဆောက်ခွင့်ပြုတာနဲ့ ပတ်သက်ပြီး ဘာမှမသိရဘူး။ ဒါတွေဟာ သက်ဆိုင်ရာ မြို့နယ်အုပ်ချုပ်ရေးပိုင်းနဲ့ ကျောက်စိမ်းဌာနက သူတို့တွေ ညှိနှိုင်းပြီး လုပ်ဆောင်ကြတာ ဖြစ်တယ်” ဟု ဖားကန့်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးတင့်စိုးက ပြောကြားသည်။

ဥရုချောင်းကူး ယာယီရေကျော်လမ်းများ ဖောက်လုပ်ရာတွင် ကုမ္ပဏီများမှ လိုက်နာရမည့် စည်းကမ်းချက်များအား ကြီးကြပ်ရေးအဖွဲ့မှ ချမှတ်ထားကြောင်း၊ အဆိုပါ စည်းကမ်းချက်များတွင် လုပ်ငန်းခွင်သုံးယာဉ် အသွားလမ်းနှင့် အပြန်လမ်း နှစ်ကြောင်းထက်ပို၍လမ်းအကျယ် ဖောက်လုပ်ခြင်း မပြုရန်၊ တစ်တန်ထက်ကျော်သော ကျောက်တုံးကြီးများဖြင့် တည်ဆောက်ခြင်း မပြုရန်၊ ရေကျော် ဖောက်လုပ်ထားစဉ် ကာလအတွင်း ရေကျော် အထက်ဘက်ကိုက် ၂၀၀ ခန့်အထိ အနည်းဆုံး တစ်လလျှင်တစ်ကြိမ် ပွန်တွန်းအား အသုံးပြု၍ ချောင်းရှင်းလင်းရေး ဆောင်ရွက်ရန်၊ ရေကျော်လမ်းများအား မေ ၁၅ ရက် နောက်ဆုံးထားပြီး ရှင်းလင်းဖျက်သိမ်းရန်နှင့် ရာသီဥတု အခြေအနေအရ လိုအပ်ပါက စောစီးစွာ ဖျက်သိမ်းရန်၊ ရေကျော် ဖောက်လုပ်စဉ် အသုံးပြုထားသည့် ကျောက်ခဲနှင့် မြေသားများအား ဖယ်ရှားရှင်းလင်းသည့် အခါတွင် မူလ အခြေအနေကဲ့သို့ ဖြစ်အောင် ဆောင်ရွက်ရန်နှင့် ရေကျော်များ ဖျက်သိမ်းပြီးပါက ချောင်းရှင်းလင်းရေးများ ဆောင်ရွက်ရန် စသည့် စည်းကမ်းချက်များ ပါဝင်ကြောင်း သိရသည်။

 

အရေးကြီးအဆိုအား ကတိအတိုင်း လုပ်ဆောင်ရန် ကချင်ပြည်နယ် အစိုးရအဖွဲ့အား ပြည်နယ်လွှတ်တော်၌ မေးမြန်း

အရေးကြီး အဆိုအား ကတိအတိုင်း လုပ်ဆောင်ရန် ကချင်ပြည်နယ် အစိုးရအဖွဲ့အား ဒုတိယအကြိမ် ကချင်ပြည်နယ်လွှတ်တော် န၀မပုံမှန် အစည်းအဝေး စတုတ္ထနေ့တွင် မေးမြန်းခဲ့ကြောင်း သတင်းရရှိသည်။

အဆိုပါမေးခွန်းကို တနိုင်းမြို့နယ်၊ မဲဆန္ဒနယ်အမှတ် (၂) မှ ပြည်နယ်လွှတ်တော် ကိုယ်စားလှယ် ဦးဇော်ဝင်းက မေးမြန်းခဲ့ခြင်းဖြစ်ပြီး ကချင်ပြည်နယ် လွှတ်တော်တွင် ၂၀၁၇ ခုနှစ် မတ် ၃၁ ရက်က တနိုင်းမြို့နယ်သို့ စက်သုံးဆီနှင့် ဆန်ကုန်တင်ယာဉ်များ လွတ်လပ်စွာ သယ်ယူရောင်းချခွင့်ပြုပါရန် အရေးကြီးအဆိုနှင့် ပတ်သက်ပြီး အစိုးရအဖွဲ့ အနေဖြင့် မည်ကဲ့သို့ လုပ်ဆောင်နေကြောင်း မေးမြန်းခဲ့ခြင်းဖြစ်သည်။

ပြည်နယ်လွှတ်တော် ကိုယ်စားလှယ် ဦးဇော်ဝင်းက “တစ်နိုင်ငံလုံးမှာရှိတဲ့ တိုင်းနှင့် ပြည်နယ် အချို့မှာ NTC ဒေသအဖြစ်သတ် မှတ်ထားတာရှိပါတယ်။ တနိုင်းဒေသလို့ စက်သုံးဆီနှင့် ဆန်တွေကို ကန့်သတ်ထားတာ မရှိပါဘူး။ ဖွဲ့စည်းပုံ အခြေခံဥပဒေအရလည်း တူညီသော အခွင့်အလမ်း ရရှိရပါမယ်။ ကုန်သွယ်ရောင်းဝယ်မှုတို့ကို ဖော်ပြထားပါတယ်။ တနိုင်းဒေသကို ဆန်နှင့် ဆီများကို တားဆီးပိတ်ပင်ထားတာ ၂၀၁၆ ခုနှစ် ဒီဇင်ဘာ ၂၆ ရက်ကတည်းက ဖြစ်ပါတယ်။ အရေးကြီးအဆိုကို လွှတ်တော်မှာ အတည်ပြု ဆုံးဖြတ်ခဲ့သော်လည်း အဆိုပါအတိုင်း အစိုးရအဖွဲ့က ဆောင်ရွက်ခဲ့ခြင်း မရှိပါကြောင်း တင်ပြလိုပါတယ်။ တနိုင်းဒေသကိုသွားတဲ့ သူတွေကို ဆန်၊ ဆီ စစ်ဆေးရုံမက မှတ်ပုံတင်တွင် ကချင်ပြည်နယ်သား မဟုတ်ပါက ရှေ့ဆက်မသွားရဆိုသည့် အခြေအနေ ဖြစ်နေပါတယ်။ တနိုင်းအထွေထွေ အုပ်ချုပ်ရေး ဦးစီးဌာနနှင့် ရှင်ဗွေယန် အုပ်ချုပ်ရေး ဦးစီးဌာနတို့မှ တွက်ချက်မှုအရ ခွင့်ပြုပေးသင့်သော စက်သုံးဆီနှင့် ဆန်ကို တစ်လလျှင် နှစ်ကြိမ်နှုန်းဖြင့် ဝေငှရန် စီစဉ်သော်လည်း နှစ်လမှ တစ်ကြိမ်ရရှိနေပါတယ်။ တနိုင်းမြို့တွင် ၂၀၁၇ ခုနှစ် မေလမှ ယနေ့အချိန်အထိ လုံခြုံရေးနှင့် တရားဥပဒေ စိုးမိုးရေးဌာနမှ ခွင့်ပြုချက်အရ အခုမှတစ်ကြိမ်ပဲ ရပါသေးတယ်။ အခု တနိုင်းကိုပို့တဲ့ ဆန်ကားက ဆီးဒီယန်ဂိတ်မှာ ပိတ်ထားတာ တစ်လခွဲလောက် ရှိနေပါပြီ။ ဂိတ်ပေါင်းလည်း ၁၅ ဂိတ်လောက် ဖြတ်ရပါတယ်။ ဘယ်လို ခွင့်ပြုခွင့်ပြု ရှင်ဗွေယန်ကို တစ်လလောက် သွားနေရတယ်။ ပြည်သူတွေက တပ်မတော်နှင့် အစိုးရဘက်ကိုလည်း အမြင်မကြည်လင်ကြဘူး။ ပြည်သူတွေ အဆင်မပြေလို့ ဒီအဆိုကို မေးမြန်းတာပါ” ဟု ပြောကြားသည်။

ယင်းအဖြေကို ကချင်ပြည်နယ် အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး သူရမျိုးတင်က “ကချင်ပြည်နယ် တနိုင်းမြို့နယ်မှာ အသုံးပြုတဲ့ ဆီနဲ့ဆန်တွေ KIA အဖွဲ့ထံသို့ ရောက်နေကြောင်း၊ တရားဥပဒေ မစိုးမိုးတဲ့ နေရာတွေမှာ KIA အဖွဲ့ကို ဆက်ကြေးများ ပေးဆောင်စေ၍ ရွှေ၊ ပယင်းနှင့် ကျောက်များကို တူးဖော်နေကြောင်း၊ ပတ်ဝန်းကျင် ပျက်စီးမှုများရှိပြီး ဒေသခံအတွက် အကျိုးမရှိစေဘဲ အဖျက်အမှောင့် လုပ်ငန်းတွေမှာ အသုံးပြုနေတဲ့အတွက် ပို့နေတဲ့ ဆန်၊ ဆီတွေကို ကန့်သတ်ပေးဖို့ မြောက်ပိုင်းတိုင်း စစ်ဌာနချုပ်က ၂၀၁၆ အောက်တိုဘာတွင် ကချင်ပြည်နယ် အစိုးရကို အကြောင်းကြားလာကြောင်း၊ အစိုးရအဖွဲ့က ဒေသလိုအပ်ချက်ကို စိစစ်ခဲ့ကြောင်း၊ လူတစ်ဦးလျှင် တစ်ရက်လျှင် ဆန်နို့ဆီဘူး သုံးဘူးနှုန်း ဖြင့်တနိုင်းဒေသရှိ လူဦးရေ ၃၄၁၇၅ ဦး၊ အိမ်ထောင်စုလိုက် ရွှေ့ပြောင်းလုပ်သား ဦးရေ ၇၅၀၀၊ ရှင်ဗွေယန် မြို့နယ်တွင်း နေထိုင်သူများ လူဦးရေ ၈၂၄၆ ဦး စုစုပေါင်း တနိုင်းဒေသနှင့် ရှင်ဗွေယန်ဒေသအတွက် တစ်နှစ်စာ ဆန် ၈၉၃၄၄ အိတ်နှင့် စက်သုံးဆီ လိုအပ်ချက်မှာ တစ်နှစ်လျှင်၂၇၇၂၀ ပေပါ လိုအပ်ပါကြောင်း၊ လိုအပ်ချက်များအလိုက် ခွင့်ပြုခဲ့ကြောင်း၊ နိုင်ငံတော်သမ္မတရုံး နိုင်ငံရေးနှင့် လုံခြုံရေးဌာနသို့ တင်ပြရာတွင် လိုအပ်သည့်ဆန်ကို သယ်ယူရန် ခွင့်ပြုခဲ့သော်လည်း စက်သုံးဆီကို မည်သည့်နေရာတွင် သုံးမည်ကို တင်ပြစေလိုကြောင်း လွှတ်တော်တွင် ရှင်းလင်းခဲ့သည်။

ယင်းအဖြေကို မေးခွန်းမေးမြန်းသည့် လွှတ်တော်ကိုယ်စားလှယ်က “အခုရှင်ဗွေယန်မှာ ဆန်တစ်အိတ် ခြောက်သောင်း ရှိနေပါတယ်။ ပြည်သူတွေက ဆင်းရဲနေချိန်မှာတော့ အစိုးရဘက်က ကြည့်သင့်ပါတယ်။ လွတ်လွတ်လပ်လပ် ရောင်းဝယ်ခွင့်ကို ဘယ်အချိန်အထိ ကန့်သတ်မလဲ ဆိုတာလဲ မေးလိုပါတယ်။ တခြားသောတိုင်းနှင့် ပြည်နယ်တွေမှာရော တခြားတရားမ၀င်လုပ်ငန်း မရှိတော့ဘူးလား ဆိုတာလည်း မေးစရာရှိတယ်။ အရေးကြီး အဆိုကို တင်ပြပေမယ့် အခုလို အဆင်မပြေမှုတွေက ဒီတိုင်းသွားတော့မလား မေးချင်ပါတယ်” ဟု ပြောကြားသည်။

ကချင်ပြည်နယ် လုံခြုံရေးနှင့် နယ်စပ်ရေးရာဝန်ကြီးက မေးခွန်းများကို လွှတ်တော်တွင် ဥပဒေအတိုင်း မေးမြန်းနိုင်မှသာ ဖြေကြားနိုင်တော့မည် ဖြစ်ကြောင်း ပြောကြားသည်။

ကချင်ပြည်နယ် တနိုင်းမြို့နယ်သို့ ဆန်ကုန်တင်ကားများနှင့် ဆီကုန်တင်ကားများ လွတ်လပ်စွာ သယ်ယူရောင်းချခွင့်ပြုရေး ၂၀၁၇ ခုနှစ် မတ် ၃၁ ရက်တွင် တင်သွင်းခဲ့ပြီး လွှတ်တော်ကိုယ်စားလှယ် ၅၃ ဦးအနက် ၄၅ ဦး တက်ရောက်ခဲ့ရာ ၄၃ ဦး ထောက်ခံမဲ ပေးခဲ့သဖြင့် ကချင်ပြည်နယ် တနိုင်းမြို့နယ်သို့ ဆန်ကုန်တင်ကားများနှင့် ဆီကုန်တင်ကားများ လွတ်လပ်စွာ သယ်ယူရောင်းချခွင့်ပြုရေး ကချင်ပြည်နယ် လွှတ်တော်တွင် အရေးကြီး အဆိုမှာ အနိုင်ရရှိခဲ့သည်။

 

တရုတ်နိုင်ငံက မြန်မာနိုင်ငံထွက် မီးသွေးများကို တရားမ၀င် အမြောက်အမြား ၀ယ်ယူနေခြင်းကြောင့် မီးသွေးဈေး ဆက်တိုက်မြင့်တက်နေ

တာလောကြီး ဆိပ်ကမ်းတွင် စက်လှေပေါ်မှ မီးသွေးအိတ်များကို တရုတ်နိုင်ငံသို့ တင်ပို့ရန် ဆယ်ဘီးကားဖြင့် သယ်ယူနေစဉ်

မြန်မာနိုင်ငံထွက် မီးသွေးများကို တရုတ်နိုင်ငံမှ တရားမ၀င် အမြောက်အမြား ၀ယ်ယူနေခြင်းကြောင့် မီးသွေးဈေးနှုန်းများ ဆက်တိုက်မြင့်တက်နေကြောင်း သတင်းရရှိသည်။

မီးသွေးကို ကချင်ပြည်နယ်မှတစ်ဆင့် တရုတ်နိုင်ငံသို့ တင်ပို့နေသည်မှာ တစ်လကျော် ကြာမြင့်ခဲ့ပြီဖြစ်ပြီး မြစ်ကြီးနားမြို့တွင် မီးသွေးတစ်တင်းခွဲအိတ်မှာ အကောင်းစားဆိုပါက ကျပ် ၈၀၀၀ မှ ၁၂၀၀၀ သို့လည်းကောင်း၊ အညံ့စား တစ်တင်းခွဲအိတ်မှာ ကျပ် ၄၀၀၀ မှ ၅၅၀၀ သို့လည်းကောင်း လပိုင်းအတွင်း မြင့်တက်သွားခြင်း ဖြစ်ကြောင်း သိရသည်။

ကချင်ပြည်နယ်နယ်နှင့် စစ်ကိုင်းတိုင်း မြောက်ပိုင်းမှ ရောက်ရှိလာသည့် မီးသွေးများကို ဧရာဝတီ မြစ်ကြောင်းမှတစ်ဆင့် တရုတ်နိုင်ငံသို့ ၀ိုင်းမော်-ဆဒုံး-ကန်ပိုင်တည် တရားဝင်လမ်းကြောင်းကို အသုံးပြုကာ သယ်ဆောင်နေခြင်းဖြစ်ကြောင်း သိရသည်။

မြစ်ကြီးနားမြို့နယ် တာလောကြီးကျေးရွာ ဒေသခံ ရပ်မိရပ်ဖ တစ်ဦးက “အခုတစ်ရက်ကို စက်လှေကြီးတွေ တစ်စင်း၊ နှစ်စင်း ရာချီပါတဲ့ မီးသွေးအိတ်တွေ တရုတ်နိုင်ငံဘက်ကို သယ်ဆောင်နေကြတယ်။ စစ်ကိုင်းတိုင်း ကသာ၊ ထီးချိုင့်တွေဘက်က တက်လာတာ။ အဲဒါကို တရုတ်နိုင်ငံဘက်ကို ဆယ်ဘီးကား၊ တုဖုန်းယာဉ်တွေနဲ့ ပို့နေတာ။ တစ်လကျော်ပြီ။ ရွာနားက သစ်တောလည်း စစ်ဒဏ်ကြောင့် လယ်မလုပ်နိုင်ကြတော့ အားလုံး မီးသွေးဖုတ်လိုက်ပြီ။ အခုဆိုရင် ကျေးရွာသုံးဖို့ ဘာမှမကျန်တော့ဘူး။ ကြိုးဝိုင်းတွေပါ မီးသွေးဖုတ်နေကြတာ။ ၀ယ်တာကတော့ တရုတ်ပေါ့။ သယ်တာက ဒေသခံတွေပဲ။ ဖမ်းရင်လည်း ဒေသခံတွေပဲမိမှာ။ သက်ဆိုင်ရာကလည်း ဒီအတိုင်းပဲ ထိုင်ကြည့်နေတယ်။ မီးသွေးက သစ်ကဖြစ်တော့ သစ်သယ်တာနဲ့ ဘာမှမထူးဘူးလေ။ အစိုးရကတော့ တရားဝင်ခွင့်ပြုတာ မရှိဘူးလို့ သိရတယ်။ အခုက ရွာဝန်းကျင်တွေက မခံနိုင်တော့ဘူး” ဟု ပြောကြားသည်။

တရုတ်နိုင်ငံသားများသည် မီးသွေးအဆင့်အတန်း ခွဲခြားခြင်းမရှိဘဲ ၀ယ်ယူနေခြင်းဖြစ်ပြီး အမှုန်ကအစ ဈေးပေးဝယ်နေမှုကြောင့် ဈေးမြင့်တက်ရခြင်း ဖြစ်ကြောင်း မြစ်ကြီးနား ဒေသခံများက ပြောကြားသည်။

လက်ဖက်ရည်ဆိုင်ရှင် တစ်ဦးက “ကျွန်တော်တို့ကတော့ ၈၀၀၀ ကို ၁၂၀၀၀ ၀ယ်သုံးနေရတယ်။ နံပြားတစ်ချပ်ကို ကျပ် ၅၀ တက်လိုက်ရတယ်။ ကြက်သွန်၊ အခြားကုန်ကြမ်းဈေး တက်နေတာလေ။ မတက်လို့မရဘူး။ တရုတ်က မီးသွေးမှုန့်တွေကအစ မြို့ထဲအထိ လာဝယ်တာတော့ လွန်ပါတယ်ဗျာ။ ဗြောက်အိုးတို့၊ မီးရှူးမီးပန်း လုပ်တဲ့နေရာမှာ သုံးတယ်လို့ ကြားရတယ်။ တားလို့ရရင် တားဆီးသင့်တာပေါ့” ဟု ပြောကြားသည်။

မီးသွေးကုန်သည်များက မီးသွေးများ တင်ဆောင်ရာတွင် သက်ဆိုင်ရာဌာနသို့ ငွေပေးရမှု များပြားခြင်း၊ မီးသွေးကုန်ကြမ်း ရှားပါးလာခြင်း၊ သယ်ဆောင်ရသည့် ခရီးဝေးလွန်းခြင်းနှင့် ၀ယ်ယူသူ မြင့်တက်လာခြင်း ကြောင့်လည်း ဈေနှုန်းမြင့်တက်နေကြောင်း ဝေဖန်ကြသည်။ ကချင်ပြည်နယ် အစိုးရအဖွဲ့သို့ ယင်းကိစ္စနှင့် ပတ်သက်၍ ဆက်သွယ် မေးမြန်းသော်လည်း မသိရှိရသေးကြောင်း ပြောကြားသည်။

ကချင်ပြည်နယ် နယ်စပ်ဂိတ်မှ တစ်ရက်လျှင် တန် ၁၀၀ နီးပါး တင်ပို့နေမှုကို ၂၀၁၅ ခုနှစ် မတ် ၂၃ ရက်က ကချင်ပြည်နယ် လွှတ်တော်တွင် မေးမြန်းဆွေးနွေးမှုများ ရှိခဲ့ပြီး သစ်သားမီးသွေးကို နိုင်ငံခြားတိုင်းပြည်သို့ တရားဝင်တင်ပို့ရောင်းဝယ်ခွင့် ရှိ/မရှိ ကို ဗန်းမော်မဲဆန္ဒနယ် အမှတ်(၂) မှ ပြည်နယ် လွှတ်တော် ကိုယ်စားလှယ် ဦးထွန်းရှိန်က မေးမြန်းခဲ့ခြင်းဖြစ်သည်။

ကချင်ပြည်နယ် လွှတ်တော်တွင် တင်ပြရသည့် အကြောင်းမှာ ကချင်ပြည်နယ် ဗန်းမော်ခရိုင်တွင် သစ်တောများ ပြုန်းတီးသွားပြီး မီးသွေးပြုလုပ်နိုင်သည့် သစ်မာအမျိုး အစားမှာ ကျန်ရှိခြင်း မရှိတော့သည့် အချိန်တွင် မြန်မာနိုင်ငံ စစ်ကိုင်းတိုင်းဒေသကြီး အလယ်ပိုင်းနှင့် ရှမ်းပြည်မြောက်ပိုင်း၊ မန္တလေးတိုင်းဒေသကြီး မြောက်ပိုင်းမှ မီးသွေးများသည် ဗန်းမော်မြို့သို့ ရေလမ်း၊ ကုန်းလမ်းများမှ ၀င်ရောက်လာပြီး ဗန်းမော်မြို့မှတစ်ဆင့် လွယ်ဂျယ်နယ်စပ်ဂိတ်ကို  ဆယ်ဘီးကားကြီးများဖြင့် တစ်ရက်လျှင် အနည်းဆုံး သုံးစီး တရုတ်နိုင်ငံသို့ ခိုးထုတ်နေသည်ကို မြင်တွေ့နေရပြီး ရေရှည်တွင် မြန်မာနိုင်ငံမှ အဖိုးတန်သစ်မာများ ရှားပါးလာနိုင်သည့် အန္တရာယ် ရှိနေသည့်အတွက် လွှတ်တော်တွင် တင်ပြရခြင်းဖြစ်ကြောင်း တင်ပြခဲ့သည်။

တရုတ်နိုင်ငံသို့ မှောင်ခိုတင်ပို့နေသည့် မီးသွေးများသည် ဗန်းမော်-မန္တလေး ကားလမ်းမှလည်းကောင်း၊ ဗန်းမော် – မန္တလေး ရေလမ်းကြောင်းမှ လည်းကောင်း လမ်းနှစ်သွယ်ဖြင့် ၀င်ရောက်လာပြီး ဗန်းမော်မှတစ်ဆင့် ကားဖြင့် လွယ်ဂျယ်ဂိတ်ကိုဖြတ်ကာ တရုတ်နိုင်ငံသို့ တင်ပို့နေသည်မှာ နှစ်ဆယ်ချီ ကြာမြင့်ခဲ့ပြီဖြစ်ကြောင်း၊ စစ်ကိုင်းတိုင်းဒေသကြီး ဧရာဝတီမြစ်ရိုးနှင့် မန္တလေးကားလမ်းကြောမှ သယ်ယူပို့ဆောင်နေသည်မှာ ကချင်တိုင်းရင်းသား လက်နက်ကိုင် အဖွဲ့နှင့် တပ်မတော်တို့ ပစ်ခတ်မှုများ ဖြစ်ပွားလာသည့် ၂၀၁၁ ခုနှစ် နောက်ပိုင်းတွင်သာ ဖြစ်ကြောင်း တရုတ်သို့ မီးသွေးခိုးထုတ်ခဲ့သည့် ကုန်သည်များ၏ ပြောပြချက်အရ သိရသည်။

NLD အစိုးရလက်ထက်တွင် ကချင်ပြည်နယ်၌ အခွန်ကောက်ခံရရှိမှု နှစ်ဆကျော်တိုး

NLD အစိုးရလက်ထက်တွင် ကချင်ပြည်နယ်၌ အခွန်ကောက်ခံရရှိမှု နှစ်ဆကျော် တိုးလာခဲ့ကြောင်း ကချင်ပြည်နယ် အစိုးရအဖွဲ့ ဘဏ္ဍာ၊ အခွန်၊ စီမံကိန်းနှင့် စီးပွားရေးဝန်ကြီး ဦးဝေလင်းက The Daily Eleven သတင်းစာသို့ ပြောကြားသည်။

ဘဏ္ဍာ၊ အခွန်၊ စီမံကိန်းနှင့် စီးပွားရေးဝန်ကြီး ဦးဝေလင်းက “အခွန်က ပြည်နယ်အစိုးရ တိုက်ရိုက်ကိုင်တွယ်တဲ့အခွန်နဲ့ ပြည်ထောင်စုက တိုက်ရိုက်ကိုင်တွယ်တဲ့ အခွန်ဆိုပြီး ခွဲလို့ရမယ်။ ပြည်နယ်က တိုက်ရိုက်ကိုင်တွယ်ပြီး ရတဲ့ဟာက ပြည်ထောင်စုကို ပို့စရာ မလိုဘူး။ ဒီပြည်နယ်တွင်းမှာ သုံးရတာပေါ့။ ပြည်နယ်တွင်း တိုက်ရိုက်ရတဲ့အခွန်က ၂၀၁၆- ၂၀၁၇ ဘဏ္ဍာနှစ်မှာ အခွန်ရတာက ၁၃ ဒသမ ၆၁၇ ဘီလျံ ရတယ်။ သုံးတာက ၁၇၁ ဒသမ ၅၂၈ ဘီလျံ သုံးတယ်။ ပြည်ထောင်စုက ထောက်ပံ့တာက ၁၅၇ ဒသမ ၉၁၁ ဘီလျံ ရှိတယ်။ ၂၀၁၇-၂၀၁၈ ဘဏ္ဍာနှစ်မှာ ပြည်နယ်တွင်း တိုက်ရိုက်ရတဲ့အခွန်က ၃၂ ဒသမ ၈၅၁ ဘီလျံ ဖြစ်ပါတယ်။ အသုံးစရိတ်က ၁၉၂ ဒသမ ၆၂၁ ဘီလျံဖြစ်ပါတယ်။ ပြည်ထောင်စုက ထောက်ပံ့တာက ၁၅၉ ဒသမ ၇၆၉ ဘီလျံ ဖြစ်ပါတယ်။ ပထမနှစ်ထက်တော့ နှစ်ဆကျော် ရတယ်လို့ တွက်လို့ရပါတယ်။ ၁၈ ဘီလျံ လောက် များလာတာပေါ့။ ပြည်ထောင်စုက တိုက်ရိုက်ကိုင်တွယ်တဲ့ အခွန်တွေလည်း ဒီနှစ်မှာ ဘီလျံ ၆၀ လောက် ရတယ်လို့ သိရပါတယ်။ စာရင်းအင်းတော့ ကျွန်တော် မသိရသေးဘူး။ အခွန်များတော့ ဘတ်ဂျက်ပိုများတာပဲ။ အရင် ဦးသိန်းစိန် အစိုးရလက်ထက်ကတော့ ကချင်ပြည်နယ်က အခွန်က ၁၀ ဘီလျံ ၀န်းကျင်အောက်မှာပဲ ရှိပါတယ်။ အဓိက အခွန်ထမ်းပြည်သူတွေက အခွန်စည်းကြပ် ကောက်ခံမှုကို ပူးပေါင်းပါဝင်လာတဲ့ အပိုင်းတွေ ရှိလို့ပါတယ်။ အခွန်ထမ်းပြည်သူတွေနဲ့ တစ်ယောက်ချင်း ဟောပြောပြီး လုပ်ခဲ့ရတာလည်း ရှိပါတယ်။ လာမယ့် ဘဏ္ဍာနှစ်တွေမှာလည်း ပြည်နယ်တွင် နယ်မြေအေးချမ်းမှု သာမန်လောက်ဆိုရင်ပဲ ဒီနှစ်လောက်တော့ ရမယ်ထင်တယ်။ ဒီမိုကရေစီနိုင်ငံတိုင်းက အခွန်နဲ့ပဲ လည်ပတ်ကြရတော့ အခွန်ကိစ္စက အင်မတန်အရေးကြီးပါတယ်။ အခွန်တွေတိုးဖို့ ပြည်နယ်ဖွံ့ဖြိုးအောင်လုပ်ဖို့ဆိုရင် ပြည်နယ် အေးချမ်းမှုက အဓိကပါပဲ။ ဖွံ့ဖြိုးဖို့လုပ်မယ်ဆိုရင် အေးချမ်းဖို့လိုမယ်။ နောက်ပြီး ခရီးသွား လုပ်ငန်းကနေလည်း အခွန်ငွေ၊ ၀င်ငွေတွေ အများကြီးတိုးအောင် လုပ်လို့ရပါတယ်။ ၀န်ကြီးဌာနတွေကလည်း ပူးပေါင်းဆောင်ရွက်ဖို့ လိုပါတယ်။ ကချင်ပြည်နယ်မှာက နှစ်ရှည် ဥယျာဉ်ခြံမြေတွေကိုလည်း အခွန်မကောက်နိုင်သေးဘူး။ ဧကသောင်းချီတဲ့ တရုတ် တစ်ရှူး ငှက်ပျောခင်းတွေလိုပေါ့။ တရားမ၀င်တော့ အခွန်ကောက်လို့မရဘူး။ အခွန်ကောက်နိုင်အောင်တော့ အားလုံးဆွေးနွေးနေကြတယ်။ မြေခွန်တွေ ကျပ်၊ ပြား စွန်းတွေနဲ့ ကောက်နေတာလည်း ပြောင်းလဲပြီးကောက်ဖို့ လုပ်နေကြပါတယ်။ အခွန်ကောက်ခံမှုနှုန်းဟာ ၄၀ ကျော်လောက်ပဲ ရှိမယ်လို့ ထင်ပါတယ်။ တိုင်းနှင့် ပြည်နယ်ထဲမှာတော့ အလယ် အလတ်အဆင့်တော့ ရှိပါတယ်”ဟု ပြောကြားသည်။

ကချင်ပြည်နယ်အတွင်း ရေရှည်ဖွံ့ဖြိုးရန်နှင့် အခွန်တိုးမြှင့်ရရှိနိုင်ရန် ခရီးသွားလုပ်ငန်း ဖွံ့ဖြိုးရေး၊ စက်မှုဇုန်များ ပေါ်ထွက်လာရေး၊ ပို့ဆောင်ဆက်သွယ်ရေး လုပ်ငန်းများ တိုးတက်နိုင်ရေး၊ ထုတ်ကုန်တိုးမြှင့်နိုင်ရေးအတွက် ပြည်နယ်အစိုးရအဖွဲ့က အကောင်အထည်ဖော်နိုင်ရေး ကြိုးစားနေကြောင်း သိရသည်။

 

 

ဖားကန့်ဒေသရှိ လုပ်ကွက်တစ်ခုအတွင်း ရေမဆေးကျောက် ရှာဖွေသူများအား ရဲတပ်ဖွဲ့က ခြောက်လှန့်ပစ်ခတ်ရာမှ ပဋိပက္ခဖြစ်ပြီး ရဲတပ်ဖွဲ့ဝင်တစ်ဦးနှင့် ရေမဆေးကျောက်ရှာသူနှစ်ဦး သေဆုံး

ဖားကန့်ဒေသ လုပ်ကွက်တစ်ခုအတွင်း ပဋိပက္ခဖြစ်ပွားပြီး သေဆုံးခဲ့သူတို့အား တွေ့ရစဉ် (ဓာတ်ပုံ – ဖားကန့်မြို့နယ် ရဲတပ်ဖွဲ့မှူးရုံး)

ဖားကန့်ဒေသရှိ လုပ်ကွက်တစ်ခုအတွင်း ရေမဆေးကျောက် ရှာဖွေသူများအား ရဲတပ်ဖွဲ့က ခြောက်လှန့်ပစ်ခတ်ရာမှ ပဋိပက္ခဖြစ်ပွားပြီး ရဲတပ်ဖွဲ့ဝင်တစ်ဦးနှင့် ရေမဆေးကျောက်ရှာဖွေသူနှစ်ဦး သေဆုံးခဲ့ကြောင်း သတင်းရရှိသည်။

ဖြစ်စဉ်မှာ နိုဝင်ဘာ ၆ ရက် ညနေ ၄ နာရီခန့်က ဖားကန့်မြို့၊ နမ့်မှော်ကျေးရွာအနီးရှိ နိုင်ငံတော်နှင့်အကျိုးတူ ပတ္တမြားနဂါး ကျောက်မျက်တူးဖော်ရေး ကုမ္ပဏီလုပ်ကွက် အတွင်းရဲတပ်ရင်းအမှတ် (၃၀)၊ တပ်ခွဲ (၂) မှ ရဲအုပ် ကျော်တေဇဦးစီးသည့် ရဲတပ်ဖွဲ့ဝင် ၁၀ ဦးသည် လုံခြုံရေးတာဝန်ဆောင်ရွက်နေစဉ် သတ်မှတ်ချိန်မတိုင်မီ ရေမဆေးကျောက်ရှာဖွေသူ အင်အား ၅၀၀ ခန့်သည် လုပ်ကွက်အတွင်းသို့ ၀င်ရောက်လာသဖြင့် ရဲအုပ်ကျော်တေဇက ရဲတပ်ဖွဲ့ဝင်များအား နောက်ဆုတ်ခိုင်းပြီး သေနတ်ဖြင့်ခြောက်လှန့်ပစ်ခတ်ခိုင်းရာ ရှေ့သို့ကျွံထွက်နေသည့် ရဲဒုတပ်ကြပ်အောင်ခိုင်မှ ၎င်းကိုင်ဆောင်ထားသည့် ဘီအေ-၆၃ မောင်းပြန်ရိုင်ဖယ်ဖြင့် ကမ်းပါးယံဘက်သို့ ခြောက်လှန့်ပစ်ခတ်စဉ် ကမ်းပါးယံမှ ကျောက်ခဲစသည်ရေမဆေးသမား အောင်ပိုင်စိုး၏ ဦးခေါင်းနောက်စေ့သို့ ကျောက်ခဲစထိမှန်ခဲ့၍ လဲကျသွားပြီး အောက်တွင်ရှိသည့် ကျောက်တုံးနှင့်ဦးခေါင်း ပြန်လည်ထိခိုက်မိရာ အောင်ပိုင်စိုးမှာ အဆိုပါနေရာတွင် သေဆုံးသွားခဲ့ကြောင်း သိရသည်။

အောင်ပိုင်စိုး သေဆုံးသွားသောကြောင့် ကျန်ရှိရေမဆေးသမားများမှာ မကျေနပ်သဖြင့် ခြောက်လှန့်ပစ်ခတ်သူ ရဲဒုတပ်ကြပ် အောင်ခိုင်အား ၀င်ရောက်လုံးထွေးရန်ကြိုးစားရာ ထပ်မံခြောက်လှန့်ပစ်ခတ်ခဲ့သည့်အတွက် ရေမဆေးကျောက်ရှာဖွေသူ ခင်ဝင်းမောင်၏ ယာဘက်ပေါင်ရင်းရှေ့ဘက် သေနတ်ကျည်ဖောက်ဝင်ဒဏ်ရာ တစ်ချက်၊ ယာဘက်တင်ပါးနှစ်လက်မခန့် သေနတ်ကျည်ထိမှန် ဒဏ်ရာတစ်ချက်ရရှိခဲ့ပြီး ဖားကန့်မြို့နယ် ပြည်သူ့ဆေးရုံသို့ပို့ဆောင်စဉ် သေဆုံးသွားကြောင်း သိရသည်။

ယင်းဖြစ်စဉ်ကြောင့် ရေမဆေးကျောက် ရှာဖွေသူများမှာ ငြာသံပေးကာစိန်တူများ၊ ကျောက်ခဲများဖြင့် ပစ်ပေါက်မှုများပြုလုပ်ခဲ့ပြီး ရေမဆေးသမားများ၏ စိန်တူများဖြင့် ရိုက်နှက်မှုကြောင့် ရဲဒုတပ်ကြပ်အောင်ခိုင်တွင် ယာဘက်ပါးနှစ်လက်မခန့် ပေါက်ပြဲဒဏ်ရာတစ်ချက်၊ ယာဘက်နဖူးနှစ်လက်မခန့် ပေါက်ပြဲဒဏ်ရာတစ်ချက်၊ ယာဘက်ချိုစောင်း နှစ်လက်မခန့် ပေါက်ပြဲဒဏ်ရာတစ်ချက်၊ ဦးခေါင်းနောက်စေ့ တစ်လက်မခန့်ပေါက်ပြဲဒဏ်ရာ တစ်ချက်၊ ယာဘက်နားထင် နှစ်လက်မခန့် ပေါက်ပြဲဒဏ်ရာတစ်ချက်တို့ ရရှိခဲ့သဖြင့် ဖားကန့်မြို့နယ် ပြည်သူ့ဆေးရုံသို့ ပို့ဆောင်စဉ် သေဆုံးသွားခဲ့ကြောင်း သိရသည်။

အဆိုပါအခင်းဖြစ်စဉ်အတွင်း ပါဝင်သည့် သိန်းလွင်၊ ကျော်ကျော်မြင့်၊ ဦးသာဇံ၊ ဦးအေးသိန်းမောင်၊ အောင်ပိုင်စိုး (သေဆုံး)၊ ခင်ဝင်းမောင် (သေဆုံး) တို့အား ဖားကန့်မြို့မရဲစခန်းတွင် (ပ) ၁၇၈/၁၇၊ ရာဇသတ်ကြီး ဥပဒေပုဒ်မ ၃၀၂/၁၁၄ တို့ဖြင့်အမှုဖွင့်ခဲ့ပြီး အခင်းဖြစ်စဉ်နှင့်ပတ်သက်၍ စုံစမ်းဖော်ထုတ် အရေးယူလျက်ရှိကြောင်း သိရသည်။

ကချင်ပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး သူရမျိုးတင်က “လုပ်ကွက်ထဲမှာ တရားမ၀င်,၀င်ပြီး ကျောက်လုရှာတာပေါ့။ ပြည်နယ်အစိုးရအဖွဲ့ကတော့ ဥပဒေနဲ့အညီ ဆောင်ရွက်မှာပါ။ တချို့သောလုပ်ကွက်တွေက အစိုးရနဲ့အကျိုးတူဆိုတော့ နိုင်ငံတော်ရဲ့ အကျိုးစီးပွားဆိုတော့ တားဆီးရတာပေါ့။ ကျောက်မျက်ဥပဒေရေးဆွဲပြီးရင်တော့ သာမန်လက်လုပ်လက်စားတွေပါတဲ့ ဥပဒေထွက်ရင် အဆင်ပြေနိုင်တယ်။ အခုက နိုင်ငံတော်နဲ့အကျိုးတူရှိတယ်။ ပုဂ္ဂလိကရှိတယ်။ ပုဒ်မ ၁၄၄ လိုဟာမျိုးလည်းထုတ်ဖို့ တပ်မတော်က တင်ပြဖူးတယ်။ ဖားကန့်ဒေသက လုပ်ကွက်နဲ့ မြို့ဧရိယာက ဆက်စပ်နေတာ။ ခွဲပြီးလုပ်ဖို့လည်း အစိုးရကိုတင်သေးတယ်။ အစိုးရဘက်က မလိုအပ်သေးဘူးဆိုပြီး ပယ်လိုက်တာ။ အခုအောက်ခြေမှာ နိုင်ငံတော်နဲ့ အကျိုးတူလုပ်ကွက်တွေမှာ လုံခြုံရေးလုပ်ကြရတာပေါ့။ တရားမ၀င် ကျောက်ရှာဖွေသူတွေကို စနစ်တကျကိုင်တွယ်ဖို့ကောင်းတာပေါ့။ နည်းလမ်းတွေလည်း ရှာနေတယ်။ ဥပဒေအသစ်ထွက်ရင်တော့ ဖြစ်လာနိုင်မယ်ထင်တယ်” ဟုပြောကြားသည်။

ဖားကန့်မြို့နယ် ရဲတပ်ဖွဲ့မှူး ရဲမှူး ဦးကျော်ဦးက “အခင်းဖြစ်စဉ်နဲ့ပတ်သက်ပြီး စုံစမ်းဖော်ထုတ်မှုတွေ လုပ်နေပါတယ်။ ဒီကိစ္စနဲ့ ပတ်သက်ပြီးပြောရရင် တရားဥပဒေကိုသိတဲ့လူရှိတယ်။ မသိတဲ့လူရှိတယ်။ ဥပဒေထဲမှာက ကျောက်မျက်လုပ်ကွက်ထဲကို တရားဝင် ,၀င်ရောက်ရှာဖွေခြင်း၊ တူးဖော်ခြင်း၊ စမ်းသပ်တိုင်းတာခြင်း မပြုရဆိုတဲ့ဟာက ရှိပြီးသားလေ။ အဲ့ဒါကိုသူတို့ကမသိဘူး။ သိရင်လည်း မသိချင်ယောင်ဆောင်နေတယ်။ လုံခြုံရေးဆောင်ရွက်တဲ့သူတွေကလည်း နိုင်ငံတော်နဲ့ အကျိုးတူလုပ်ကွက်တွေကိုပဲ လုံခြုံရေးယူပေးရတာပါ။ ဒါကိုသူတို့မြင်တာက ပုဂ္ဂလိကကို ရဲကလုံခြုံရေးလုပ်ပေးတယ်လို့ပဲမြင်တယ်။ နိုင်ငံတော်နဲ့ အကျိုးတူလုပ်ကွက်တွေကိုပဲ လုံခြုံရေးလုပ်ပေးရတယ်ဆိုတာမသိဘဲ တရုတ်ကုမ္ပဏီကြီးတွေကိုပဲ လုပ်ပေးတယ်ဆိုပြီး တလွဲမြင်ကြတယ်ပေါ့ဗျာ။ ဒီလိုဖြစ်စဉ်တွေ လျော့နည်းသွားအောင်ကတော့ ဥပဒေကိုနားလည်အောင် အားလုံးက၀ိုင်းပြောဖို့လိုတယ်။ ရှေ့ဆက်မဖြစ်ဖို့ ကျွန်တော်တို့လည်း ပညာပေးဟောပြောမှုတွေ လုပ်နေပါတယ်” ဟုပြောကြားသည်။

လုပ်ကွက်လုံခြုံရေးတပ်ဖွဲ့ဝင်များနှင့် ရေမဆေးကျောက်ရှာဖွေသူများ မကြာခဏပဋိပက္ခဖြစ်ပွားနေခြင်းနှင့် ပတ်သက်၍ ဖားကန့်ဒေသခံတစ်ဦးဖြစ်သူ ဦးတင်လှိုင်က “နှစ်ဦးနှစ်ဖက်စလုံးက အလွန်တွေပဲ။ ဒီလိုရဲနဲ့ ရေမဆေးပြဿနာမျိုးက စနစ်တကျမကိုင်တွယ်ရင်တော့ မရဘူး။ အစိုးရအနေနဲ့ လေးလေးနက်နက်စဉ်းစားပြီး လုပ်သင့်တယ်။ ဒါမှမဟုတ်ရင် သေကုန်ပျောက်ကုန်တော့မှာ။ ဒါမျိုးကထပ်ဖြစ်ဦးမှာ။ အခုမှ ရာသီအစပဲရှိသေးတယ်။ နောက်ကိုပိုဆိုးမှာ။ ပညာရှင်နည်းနဲ့စဉ်းစားပြီး လုပ်သင့်တယ်” ဟုပြောကြားသည်။

အောက်တိုဘာ ၁၈ ရက်ကလည်း ဖားကန့်မြို့နယ်၊ လုံးခင်းကျေးရွာအုပ်စု၊ မဇွပ်ယန်ကျေးရွာအနီးရှိ တစ်သုံးလုံးကျောက်မျက် ကုမ္ပဏီလုပ်ကွက်အတွင်း လုံခြုံရေးဆောင်ရွက်နေသော ရဲတပ်ဖွဲ့ဝင်များနှင့် ရေမဆေးကျောက်ရှာဖွေသူများ ပြဿနာဖြစ်ပွားပြီး ရေမဆေးကျောက်ရှာဖွေသူ ငါးဦးသေဆုံးကာ ဒဏ်ရာရရှိသူ ၂၀ ခန့်ရှိခဲ့ကြောင်း သိရသည်။

ကချင်ပြည်နယ် အတွင်းရှိ စစ်ဘေးရှောင်ကျေးရွာ ၃၀၀ ကျော်အနက် ကျေးရွာ ၂၇ ရွာကို နေရပ်ပြန်နိုင်ရေး ဆောင်ရွက်နေ

တရုတ်နိုင်ငံ နယ်စပ်အနီးမှ ရောက်ရှိလာသူများကို နေရာချပေးထားသည့် ၀ိုင်းမော်မိုင်းနား KBC စစ်ရှောင်စခန်းအား တွေ့ရစဉ်

ကချင်ပြည်နယ် အတွင်းရှိ စစ်ဘေးရှောင် ကျေးရွာပေါင်း ၃၀၀ ကျော်အနက် ကျေးရွာ ၂၇ ရွာကို နေရပ်ပြန်နိုင်ရေး ဆောင်ရွက်နေကြောင်း သတင်းရရှိသည်။

စစ်ဘေးရှောင်များ နေရပ်ပြန်နိုင်ရေးကို  ၂၀၁၅ ခုနှစ် အစိုးရသစ် တက်လာပြီးနောက် ကချင်နှစ်ခြင်း ခရစ်ယာန် အဖွဲ့ချုပ်က ကြိုးစားနေခြင်းဖြစ်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ အစိုးရအဖွဲ့၊ တပ်မတော်အရာရှိများ၊ ကေအိုင်အို ဒုက္ခသည်များဆိုင်ရာ ကော်မတီ၊ ကေအိုင်အို ဗဟိုအဖွဲ့များနှင့် ညှိနှိုင်းမှုများ ရှိခဲ့ကြောင်း၊ နယ်မြေအခြေအနေအရ နှစ်ဖက်တပ်များနှင့် ထိတွေ့မှု နည်းနိုင်သည့် မြစ်ကြီးနား-ဗန်းမော် ကားလမ်းနံဘေးမှ ကျေးရွာများကို လုပ်ဆောင်နေကြောင်း ကချင်နှစ်ခြင်း ခရစ်ယာန်အဖွဲ့ချုပ် (KBC) မှ သိရသည်။

ကချင်နှစ်ခြင်း ခရစ်ယာန်အဖွဲ့ချုပ်မှ အထွေထွေ အတွင်းရေးမှူး ဒေါက်တာခလမ်ဆမ်ဆွမ်က “ပြန်နိုင်ခြေရှိတဲ့ရွာတွေကို စာရင်းကောက်တော့ ကျေးရွာ ၂၇ ရွာက လူဦးရေ တစ်သောင်းကျော်မယ်။ မြစ်ကြီးနား-ဗန်းမော် ကားလမ်းပိုင်းပေါ့။ ရှမ်းမြောက်ဘက်ရောပေါ့။ ခက်တာက စစ်ဘေးရှောင်တွေက မြစ်ကြီးနားဘက် ပြေးတာရှိတယ်။ လိုင်ဇာကို ပြေးတာရှိတယ်။ အစိုးရဘက်ကိုလည်း ဒေါ်အောင်ဆန်းစုကြည် အပါအ၀င် အစိုးရအဖွဲ့နဲ့ တွေ့တယ်။ တပ်မတော်ပိုင်းက ကထစမှူး ဒုတိယဗိုလ်ချုပ်ကြီး ထွန်းထွန်းနောင်၊ လိုင်ဇာက ဒုက္ခသည်များဆိုင်ရာ ကော်မတီ၊ ကေအိုင်အိုဗဟိုနဲ့ တွေ့ဆုံဆွေးနွေးတာရှိတယ်။ အစိုးရဘက်ကတော့ ပြန်စေချင်တယ်။ ကေအိုင်အို ဗဟိုကတော့ နှစ်ဖက်ညှိနှိုင်း အဖြေရမှာသာ စံချိန်အတိုင်း ပြန်စေချင်တယ်။ ကေအိုင်အေနဲ့ တပ်မတော်တို့ ညှိနှိုင်းဆွေးနွေးမှုတော့ လိုကိုလိုအပ်နေတယ်။ စံချိန်အတိုင်း ပြန်ရမယ်ဆိုရင် လုပ်ငန်းစဉ်တွေက များလွန်းနေတယ်။ စစ်ရှောင်တွေ အတွက်လည်း အချိန်အများကြီး နစ်နာနိုင်တယ်။ မိုင်းရှင်း၊ တိုက်ပွဲစောင့်ကြည့်ရေး၊ အသက်မွေးဝမ်းကျောင်းလုပ်ငန်း ပြန်လည်ထူထောင်ရေး အများကြီး လုပ်ရမယ်။ အဲဒီတော့ အတိုင်းအတာ တစ်ခုအထိပဲ လုပ်နိုင်မယ်။ တချို့ရွာတွေက အစိုးရဘက်ရော၊ ကေအိုင်အေဘက်ရော နှစ်ခြမ်းကွဲသွားတယ်။ အားလုံးပြန်ဖို့တော့ ဆွေးနွေးနေပါတယ်။ တစ်ဖက်တည်းက ပြန်လို့လည်း မဖြစ်နိုင်ဘူး။ ရွာတွေကွဲမယ်။ ပြန်တဲ့သူလည်း အားမရှိဘူး။ စိန်ခေါ်မှုတွေများတယ်။ ပြန်ထူထောင်ရမယ်။ ရွာတွေမှာ တပ်တွေက များနေတယ်။ နောက်တစ်ခုက စိုက်ပျိုးမြေတွေမှာ တရုတ်ငှက်ပျော စိုက်ခင်းလို၊ ကုမ္ပဏီလိုတွေ ၀င်လာတယ်” ဟု ပြောကြားသည်။

စစ်ဘေးရှောင် ပြည်သူများနှင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည့်တို့ ၂၀၁၇ ခုနှစ် မတ်လအတွင်းက တွေ့ဆုံရာတွင်လည်း  စစ်ဘေးရှောင်များက လယ်ယာမြေဆုံးရှုံးမှုများ၊ အကူအညီ အထောက်အပံ လျှော့ချမှုများ၊ အလုပ်အကိုင် ရှားပါးမှုများကို တင်ပြခဲ့ကြသည်။

ကချင်ပြည်နယ်အတွင်း နေရပ်အစောဆုံး ပြန်ခဲ့သူများမှာ မြစ်ကြီးနားမြို့နယ် တာလောကြီးတိုက်နယ်၊ စံကင်းကျေးရွာမှ ရှမ်းတိုင်းရင်းသားများဖြစ်ပြီး ၂၀၁၃ ခုနှစ် ဒီဇင်ဘာ ၁ ရက်တွင် အိမ်ထောင်စု ၁၅ စု၊ လူဦးရေ ၈၃ ဦးဖြစ်ပြီး ဒုတိယအနေဖြင့် ၂၀၁၄ ခုနှစ် မတ် ၃၁ ရက်တွင် ဆွမ်ပရာဘွမ်မြို့၌ ခိုလှုံနေသည့် အိမ်ထောင်စု ခုနစ်စု လူဦးရေ ၄၂ ဦး နေရပ်ပြန်နိုင်ခဲ့သည်။

၂၀၁၁ ခုနှစ်မှစ၍ တပ်မတော်နှင့် ကေအိုင်အေတို့ တိုက်ပွဲများ ပြန်လည်ဖြစ်ပွားမှုကြောင့် စစ်ဘေးဒုက္ခသည် တစ်သိန်းကျော်မှာ နေရပ်သို့ မပြန်နိုင်ဘဲ ကယ်ဆယ်ရေးစခန်းများ၌ ခိုလှုံနေခဲ့ရသည်မှာ ခြောက်နှစ်ကျော် ကြာမြင့်ခဲ့ပြီ ဖြစ်သည်။

ကချင်ပြည်နယ်တွင် ၂၀၁၁ ခုနှစ် တိုက်ပွဲများ ဖြစ်ပွားခဲ့ပြီးနောက် ကျေးရွာပေါင်း ၃၀၀ ကျော်မှ ဒေသခံများမှာ စစ်ဘေးရန်မရှိသည့် ဒေသများသို့ ထွက်ပြေးတိမ်းရှောင်လာခဲ့ပြီး ခရစ်ယာန် ဘုရားရှိခိုးကျောင်းများ၊ ဘုန်းတော်ကြီးကျောင်းများ၊ နီးစပ်ရာဆွေမျိုးများထံ မှီခိုနေထိုင်ခဲ့ကြသည်။

အစိုးရလက်အောက် ခိုလှုံလာသည့် စစ်ဘေးရှောင်များမှာ မြစ်ကြီးနားခရိုင်တွင် စခန်းပေါင်း ၄၁ စခန်း၊ ဗန်းမော်ခရိုင်တွင် ၂၈ စခန်း၊ မိုးညှင်းခရိုင်တွင် ၂၈ စခန်း၊ ပူတာအိုခရိုင်တွင် နှစ်စခန်း၊ စုစုပေါင်း ၉၅ စခန်းရှိ ပြီး အိမ်ထောင်စု ၉၃၉၂ စု၊ လူဦးရေ ၄၃၃၈၀ မှာ ဒုက္ခသည်စခန်းများတွင် ခိုလှုံနေရဆဲဖြစ်ကြောင်း ၂၀၁၆ ခုနှစ် မေလကုန်တွင် အစိုးရအဖွဲ့ ကောက်ယူထားသည့် စာရင်းအရ သိရသည်။

ကေအိုင်အို ထိန်းချုပ်နယ်မြေအတွင်း စစ်ရှောင်သူပေါင်း ရှစ်သောင်းကျော်ရှိနေပြီး အစိုးရ ထိန်းချုပ်နယ်မြေတွင် နေထိုင်သူများထက် အကူအညီရရှိမှု လျော့ကျကာ ချို့တဲ့မှုများ ရှိနေကြောင်း သိရသည်။

ငါးနှစ်တာ ကာလအတွင်း အစိုးရ စိုးမိုးမှု ဒေသအတွင်း ခိုလှုံနေသူ လေးသောင်းကျော်အတွက် ငါးနှစ်တာအတွင်း ကျပ်သန်းပေါင်း တစ်သောင်းကိုးထောင်ကျော် အသုံးပြုခဲ့ပြီး ကေအိုင်အေ ထိန်းချုပ်နယ်မြေ အတွင်းရှိ စစ်ရှောင်ရှစ်သောင်းကျော် အတွက် ငါးနှစ်တာအတွင်း မည်မျှအသုံးပြုခဲ့သည်ကို မသိရပေ။

ကချင်ပြည်နယ်ဝန်ကြီးချုပ် ဒေါက်တာခက်အောင်က ၂၀၁၇ ခုနှစ် မတ် ၂၀ ရက်က ပြည်နယ်လွှတ်တော်တွင် နယ်မြေလုံခြုံရေး အခြေအနေကြောင့် ထွက်ပြေးတိမ်းရှောင် လာသူများကို ကူညီစောင့်ရှောက်လျက်ရှိရာ DIP စခန်းပေါင်း ၉၄ ခု၊ အိမ်ထောင်စု ၈၀၀၁ စု၊ လူဦးရေ ၃၉၀၂၀ ဦးအား ကချင်ပြည်နယ် အစိုးရအဖွဲ့၊ လူမှုအသင်းအဖွဲ့များ၊ ကုလသမဂ္ဂ လက်အောက်ခံ အဖွဲ့များက လစဉ်ထောက်ပံ့လျက်ရှိပြီး ၂၀၁၇ ခုနှစ် ဖေဖော်ဝါရီ တစ်လအတွင်း ကျပ် ၅၇၇၉ သိန်း ထောက်ပံခဲ့ပြီး အလုပ်အကိုင် အခွင့်အလမ်း၊ ၀င်ငွေတိုးလုပ်ငန်း၊ အသက်မွေးဝမ်းကျောင်းလုပ်ငန်း စသည့် လူမှုစီးပွား အဆောက်အအုံများကိုလည်း တည်ဆောက်ထားကြောင်း တင်ပြခဲ့သည်။

 

ကချင်ပြည်နယ်တွင် ယခင်နှစ်ထက် ဘိန်းစိုက်ခင်းဧရိယာ တိုးလာ

ကချင်ပြည်နယ်ရှိ ဘိန်းစိုက်ခင်း အချို့ကို တွေ့ရစဉ်

ကချင်ပြည်နယ်တွင်  တရုတ်နယ်စပ်ဒေသများ၊ တနိုင်းဒေသများတွင် ယခင်နှစ်ထက် ဘိန်းစိုက်ခင်းဧရိယာ တိုးလာကြောင်း ဒေသခံများ၊ ဘိန်းတိုက်ဖျက်ရေး လုပ်ငန်းများ လုပ်ကိုင်နေသည့် ဓမ္မဆရာများနှင့် ပြည်နယ်ရဲတပ်ဖွဲ့ဝင်များက ပြောကြားသည်။

ကချင်ပြည်နယ် ရဲတပ်ဖွဲ့ ရဲမှူးကြီးထွန်းဦးက “မနှစ်ကတော့ ကချင်ပြည်နယ် တစ်ခုလုံးမှာ လုံခြုံရေး အခြေအနေကြောင့် ဆဒုံး၊ ကန် ပိုင်တည်ဒေသ၀န်းကျင်မှာ ဘိန်းခင်းဖျက်ဆီး တာ ၆၉ ဧကပဲရှိပါတယ်။ စိုက်တာအနည်းဆုံး နှစ်ပေါ့။ တခြားဒေသမှာလည်း စိုက်တာတွေ ရှိတယ်။ UNODC ကုလမူးယစ်တိုက်ဖျက်ရေး အဖွဲ့ကလည်း နှစ်တိုင်း မြေပုံကြမ်းတွေ ခန့်မှန်းဧရိယာတွေပို့တယ်။ အခုမပို့တာ မနှစ်ကရယ် ဒီနှစ်ရယ် နှစ်နှစ်ရှိပြီ။ အခုမြေပြင်ကပို့တဲ့ သတင်းတွေအရတော့ တရုတ်နယ်စပ်မှာ စိုက်ဧရိယာ မနှစ်ကထက် တိုးလာတာ သေချာတယ်။ ဘိန်းခင်းနဲ့ တခြားစိုက်ခင်းကတော့ မကွဲသေးဘူး” ဟု ပြောကြားသည်။

မြန်မာ-တရုတ် နယ်စပ်အနီးရှိ ဘိန်းခင်းများမှာ တရုတ်နိုင်ငံဘက်မှ အရင်းအနှီးဖြင့် မြန်မာနိုင်ငံအတွင်းရှိ ဒေသခံများကို တစ်ဆင့်ခံ ဘိန်းစိုက်ခိုင်းမှုများ ရှိနေပြီး ဘိန်းခင်းများ အကြောင်းအမျိုးမျိုးကြောင့် မအောင်မြင်သည့် ကာလများတွင် တရုတ်နိုင်ငံရှိ ငွေရှင်ထံ လုပ်အားအကြွေး ဆပ်ရမှုများ ရှိနေသည်ကိုသတင်းစကားများ ကြားနေရကြောင်း ပြည်နယ်ရဲမှူးကြီးက ဆက်လက်ပြောကြားသည်။

ဘိန်းစိုက်သူများ၏ ပြောပြချက်အရ ဘိန်းခင်းစိုက် ကုန်ကျစရိတ်မှာ တစ်နှစ်ထက် တစ်နှစ် ပိုများလာပြီး ဘိန်းခင်းတစ်ဧကလျှင် ကျပ် ၂၅ သိန်းအထက် ကုန်ကျမည်ဖြစ်ကြောင်း၊ လက်ရှိတွင် ဘိန်းတစ်ဟောင် (နှစ်ကျပ်ခွဲသား) တရုတ်ယွမ်ငွေ ၂၅၀ ၀န်းကျင် ဈေးပေါက်နေကြောင်း၊ ဘိန်းခင်းအလုပ်သမား ရှားပါးကာ အလုပ်သမားခအဖြစ် တစ်ရက်လျှင် ယွမ်ငွေ ၅၀ (မြန်မာငွေကျပ် ၁၀၀၀) အထိ မြင့်မားနေကြောင်း ၂၀၁၇ ခုနှစ် စက်တင်ဘာလ အတွင်းက သတင်းအချက်အလက်များအရ သိရသည်။

မူးယစ်ဆေးဝါး တိုက်ဖျက်ရာတွင် ပါဝင်နေသည့် ဘာသာရေး ဓမ္မဆရာတစ်ဦးက “ဆဒုံး အထက်ပေါ့ တိုးလာတာက။ မနှစ်ကထက် အများကြီးများတယ်။ ဧရိယာတော့ မခန့်မှန်း တတ်ဘူး။ နောက်တစ်ခုက တနိုင်းဘက်ရယ်။နာဂနဲ့စပ်တဲ့ဧရိယာရယ် ဒီနှစ်က ပိုများမှာသေချာတယ်။ ကျွန်တော်တို့အဖွဲ့တွေလည်း ကွင်းမဆင်းနိုင်သေးဘူး။ အစိုးရပြောင်းလဲနေတဲ့ အချိန်မှာ ဘိန်းခင်းစိုက်ဧက တိုးတာက လုံးဝ မဖြစ်သင့်တော့ဘူးလေ။ ပြည်သူတွေ၊ အဖွဲ့အစည်းတွေ၊ အစိုးရတွေက ၀ိုင်းပြီးဖြေရှင်းကြရမှာပေါ့။ ဆဒုံးဒေသဆိုတာက ပြည်သူ့စစ်၊ နယ်ခြားစောင့်ပဲရှိတယ်။ ဒါတောင် အစိုးရက ထပ်မတိုးအောင် မကိုင်တွယ်နိုင်ဘူးဆိုတော့ မစဉ်းစားတတ်တော့ဘူး” ဟု ပြောကြားသည်။

တရုတ်နိုင်ငံနယ်စပ်မှ ဘိန်းခင်းကိစ္စများအား ကချင်ပြည်နယ် လွတ်တော်တွင် ဖေဖော်ဝါရီ ၂၉ ရက်က ကျင်းပသည့် ဒုတိယအကြိမ် ကချင်ပြည်နယ်လွတ်တော် ပထမပုံမှန် အစည်းအဝေးတွင် အရေးကြီးအဆို တင်သွင်းခဲ့သည်။

ယင်းအဆိုကို ၀ိုင်းမော်မြို့နယ် မဲဆန္ဒနယ် အမှတ် (၂) မှ ဦးနော်လီက တင်သွင်းခဲ့ခြင်းဖြစ်ပြီး မူးယစ်ဆေးဝါး တိုက်ဖျက်ဖို့ အစိုးရနှင့် လူထုပေါင်းစည်းရေး၊ အကြမ်းဖက်မှုများ ထပ်မဖြစ်ရေးနှင့် ဘိန်းစိုက်သူများအား ရေတို၊ ရေရှည် ထောက်ပံ့နိုင်ရေးအတွက် အရေးကြီး အဆိုကို ဖေဖော်ဝါရီ ၂၉ ရက်က ချင်ပြည်နယ် လွှတ်တော် ဒုတိယအကြိမ် ပထမပုံမှန်အစည်းတွင် တင်းသွင်းခဲ့ခြင်းဖြစ်သည်။

ဝိုင်းမော်မြို့နယ် မဲဆန္ဒနယ်အမှတ် (၂)မှ ပြည်နယ်လွှတ်တော် ကိုယ်စားလှယ် ဦးနော်လီက “ဆဒုံး၊ ကန်ပိုင်တည် ဒေသတွေက ကျွန်တော့်ရဲ့ မဲဆန္ဒနယ်ထဲပါပါတယ်။ ဒါပေမဲ့ မဲရုံက ဆဒုံးမြို့နဲ့ ကန်ပိုင်တည်မြို့ပေါ်မှာပဲ လုပ်နိုင်တယ်။ အရင်က ဘိန်းစိုက်ခင်း ကိစ္စတွေကို အဆိုတင်ခဲ့တာလည်း ဟုတ်ပါတယ်။ အောင်လည်းအောင်ပါတယ်။ ဒီနှစ်ဘိန်းစိုက်ခင်းတွေ တိုးလာတယ် ဆိုတာတော့ ကျွန်တော် မကြားမိသေးဘူး။ ကျွန်တော်သိသလောက်တော့ ဘိန်းခင်းလုပ်တဲ့ ဒေသခံတွေကို ကူညီတာ မတွေ့ရဘူး။ မူးယစ်ဆေးဝါး ကိစ္စရပ်က တစ်နိုင်ငံလုံးကို ဒုက္ခပေးနေတာ။ အထူးသဖြင့် ဒေသခံတွေကိုပေါ့။ ဒီလိုအခြေအနေမျိုးမှာ အားလုံးပါဝင်ကြဖို့ လိုတာပေါ့” ဟု ပြောကြားသည်။

မူးယစ်ဆေးဝါး တိုက်ဖျက်နှိမ်နှင်းရာတွင် ပြည်သူလူထု ပါဝင်မှုအပေါ် ကြိုဆိုထောက်ခံရန်၊ အန္တရာယ်မှ ကာကွယ်ပေးရန်အပြင် ထိရောက်သော ကူညီပံ့ပိုးမှုများ အမြန်ဆုံးဆောင်ရွက်ရန် အစိုးရအား တိုက်တွန်းကြောင်း အရေးကြီးအဆိုကို ဖေဖော်ဝါရီ ၂၄ ရက်က ပြည်သူ့လွှတ်တော် ကိုယ်စားလှယ် ကချင်ပြည်နယ် ၀ိုင်းမော်မြို့နယ် မဲဆန္ဒနယ်မှ ဦးလဂန်ဇယ်ဂျုံးက တင်သွင်းသည်။

ကချင်ပြည်နယ် မြစ်ကြီးနားခရိုင်အတွင်းရှိ ကန်ပိုင်တည်၊ ဆဒုံး၊ ချီဖွေဒေသများတွင် ကျေးရွာပေါင်း ၃၃ ရွာ၊ အိမ်ထောင်စုပေါင်း ၁၃၇၉ စု၊ လူဦးရေ ၅၉၅၄ ဦးမှာဘိန်းခင်း စိုက်ပျိုးသည့် ကျေးရွာများဖြစ်ကြောင်း ကချင်ပြည်နယ် အစိုးရအဖွဲ့၏ ၂၀၁၆ ခုနှစ် စာရင်းအရ သိရသည်။

မြန်မာနိုင်ငံသည် ကမ္ဘာပေါ်တွင် ဒုတိယ အများဆုံး စိုက်ပျိုးသော နိုင်ငံအဖြစ် ရပ်တည်နေ ပြီး ၁၉၉၉ ခုနှစ်မှစ၍ မူးယစ်ဆေးဝါး ပပျောက်မှုစီမံကိန်း ၁၅ နှစ်ကို ချမှတ်ခဲ့သော်လည်း မအောင်မြင်သဖြင့် နောက်ငါးနှစ် ထပ်တိုးကာ ၂၀၂၀ ပြည့်နှစ်အထိ တိုးမြှင့်ထားကြောင်း သိရသည်။

ကချင်ပြည်နယ်တွင် ၂၀၁၁ ခုနှစ်နောက် ပိုင်း တပ်မတော်နှင့် ကေအိုင်အေတို့ တိုက်ပွဲများ ပြန်လည်ဖြစ်ပွားလာပြီး နောက်ပိုင်း ဘိန်းစိုက်ပျိုးမှု ရုတ်တရက် မြင့်တက်ခဲ့ကြောင်း မှတ်တမ်းများအရ သိရသည်။ ဘိန်းဖျက်ဆီးသည့် ဧကများလည်း နှစ်စဉ်တက်လာကြောင်း သိရပြီး ၂၀၁၂-၂၀၁၃ ခုနှစ် ဘိန်းစိုက်ရာသီတွင် ၆၁၈ ဧက၊ ၂၀၁၃-၂၀၁၄ ခုနှစ်တွင် ၄၉၂ ဧက၊ ၂၀၁၄-၂၀၁၅ ခုနှစ်တွင် ၁၃၂၂   ဧက၊ ၂၀၁၅-၂၀၁၆ ခုနှစ်တွင် ၃၇၃၆ ဧက၊ ၂၀၁၆-၂၀၁၇ ခုနှစ်တွင် စိုက်ဧက ၆၉ ဧက ဖျက်ဆီးနိုင်ခဲ့ကြောင်း သိရသည်။

မြန်မာနိုင်ငံတွင် ရှမ်းပြည်နယ်ပြီးနောက် ကချင်ပြည်နယ်သည် ဒုတိယဘိန်းစိုက်ပျိုးမှု အများဆုံးဖြစ်ပြီး  မြို့နယ်ကိုးမြို့နယ်တွင် ဘိန်းစိုက်ပျိုးမှုများရှိနေရာ ကန်ပိုက်တည် ဒေသ၊ ဆဒုံးဒေသနှင့် တနိုင်းဒေသမှာ အများဆုံးစိုက်ပျိုးကြပြီး ဖားကန့်ဒေသ၊ ပန်ဝါဒေသ၊ ချီဖွေဒေသ၊ ဆွမ်ပရာဘွမ်ဒေသ၊ ဗန်းမော်ခရိုင်နှင့် ပူတာအိုခရိုင် တို့တွင်လည်း စိုက်ပျိုးကြသည်။