ဇွန်လက ကျင်းပသည့် ONE မစ်ဒယ်ဝိတ်တန်း ကမ္ဘာ့ချန်ပီယံဆုကာကွယ်ပွဲတွင် အောင်လအန်ဆန်နှင့် ဟဆဲဂါဝါတို့ ယှဉ်ပြိုင်ထိုးသတ်နေစဉ်
ONE Championship အဖွဲ့အစည်းသည် ၂၀၁၉ ခုနှစ်တွင် MMA ပြိုင်ပွဲ ကျင်းပမည့်နေရာနှင့် ရက်တို့ကို ပြီးခဲ့သည့်ရက်ပိုင်းက ထုတ်ပြန်ခဲ့ရာ ရန်ကုန်မြို့၌ တစ်ပွဲသာ ကျင်းပမည်ဖြစ်ကြောင်း သိရသည်။
လာမည့်နှစ်တွင် MMA ပြိုင်ပွဲ ၂၄ ပွဲ ကျင်းပမည်ဖြစ်ပြီး လစဉ်ပြုလုပ်မည်ဖြစ်ကာ အချို့လများတွင် သုံးပွဲအထိ ကျင်းပရန် စီစဉ်ထားသည်။ သို့သော် မြန်မာနိုင်ငံတွင် ကျင်းပမည့်ပြိုင်ပွဲမှာ တစ်ပွဲသာပါဝင်ပြီး မတ် ၈ ရက်တွင် ရန်ကုန်မြို့၌ ကျင်းပမည်ဖြစ်သည်။ ယခုနှစ်တွင် မူလပြိုင်ပွဲ ပွဲစဉ်ရေးဆွဲရာတွင် မြန်မာ နိုင်ငံ၌ တစ်ပွဲသာပြုလုပ်ရန် စီစဉ်ထားသော်လည်း ထပ်တိုးပြီး သုံးပွဲအထိ ပြုလုပ်မည်ဖြစ်သည်။ ONE Championship အဖွဲ့အစည်းသည် MMA ပြိုင်ပွဲကို အာရှနိုင်ငံများတွင် တိုးမြှင့်ကျင်းပလျက်ရှိပြီး လာမည့်နှစ်တွင် တောင်ကိုရီးယား၊ ဗီယက်နမ်နိုင်ငံတို့၌ ပြိုင်ပွဲအသစ် တိုးချဲ့ခဲ့ခြင်းဖြစ်ကာ တရုတ်နိုင်ငံတွင် ပြိုင်ပွဲလေးကြိမ်အထိ ကျင်းပမည်ဖြစ်သည်။ မြန်မာနိုင်ငံတွင် ၂၀၁၅ ခုနှစ်မှစ၍ MMA ပြိုင်ပွဲများ စတင်ကျင်းပခဲ့ပြီး အောင်လအန်ဆန် လာရောက်ထိုးသတ်သည့် ၂၀၁၆ ခုနှစ်မှစ၍ ပရိသတ် စိတ်ဝင်စားမှုများပြားလာသလို ပြိုင်ပွဲကို နှစ်စဉ်ပြုလုပ်နိုင်သည်အထိ အောင်မြင်လာခဲ့သည်။ အောင်လအန်ဆန်သည် ၎င်းရထားသည့် ခါးပတ်နှစ်ခုစလုံးကို ရန်ကုန်မြို့၌ ကျင်းပသည့်ပြိုင်ပွဲများတွင် ရယူ ထားနိုင်ခြင်းဖြစ်ပြီး ၂၀၁၇ ခုနှစ်တွင် မစ်ဒယ်ဝိတ်တန်း ကမ္ဘာ့ချန်ပီယံဆု၊ ၂၀၁၈ ခုနှစ်တွင် လိုက်ဟဲဗီးဝိတ် ကမ္ဘာ့ချန်ပီယံဆုတို့ ရရှိခဲ့သည်။ ယခုနှစ်တွင် ရန်ကုန်မြို့၌ MMA ပြိုင်ပွဲ နှစ်ကြိမ်ကျင်းပထားပြီး အောက်တိုဘာတွင် တတိယအကြိမ် ကျင်းပမည်ဖြစ်သည်။ ၂၀၁၇ အောက်တိုဘာတွင် အောင်လအန်ဆန်၏ လိုက်ဟဲဗီးဝိတ် ကမ္ဘာ့ချန်ပီယံလုပွဲ၊ ၂၀၁၈ ဇွန်လတွင် အောင်လအန်ဆန်၏ မစ်ဒယ်ဝိတ်တန်း ကမ္ဘာ့ချန်ပီယံဆုကာကွယ်ပွဲတို့ ယှဉ်ပြိုင်ထိုးသတ်ခဲ့သည်။
၂၀၁၉ ခုနှစ်တွင် မြန်မာနိုင်ငံ၌ ကျင်းပမည့်ပြိုင်ပွဲ တစ်ပွဲသာပါဝင်သော်လည်း ပရိသတ်အားပေးမှုများပြားပြီး ကျင်းပရန်စီစဉ်ထားသည့် မြို့များတွင် မပြုလုပ်ဖြစ်ပါက အစားထိုးကျင်းပရန် အခွင့်အရေးရှိကြောင်း သိရသည်။
