ဓာတ်ပုံ - မြန်မာနိုင်ငံပိုက်ကျော်ခြင်းအဖွဲ့ချုပ်
အာရှအားကစားပြိုင်ပွဲ အမျိုးသမီးပိုက်ကျော်ခြင်း သုံးယောက်တွဲအသင်းလိုက်ပြိုင်ပွဲတွင် မြန်မာအသင်းက ကြေးတံဆိပ်ဆွတ်ခူးရရှိခဲ့ကြောင်း သိရသည်။
မြန်မာအသင်းသည် ဆီမီးဖိုင်နယ်တွင် ရေပန်းအစားဆုံး ထိုင်းအသင်းနှင့်တွေ့ဆုံခဲ့ပြီး (ဝ-၂)ပွဲဖြင့် (၂)ပွဲပြတ် အရေးနိမ့်ခဲ့ရသည်။
အခြားဆီမီးဖိုင်နယ်ပွဲစဉ်တွင်မူ တောင်ကိုရီးယားအသင်းက ဗီယက်နမ်အသင်းကို (၂-ဝ)ပွဲဖြင့်ပင် အနိုင်ရကာ ဗိုလ်လုပွဲ တက်ရောက်နိုင်ခဲ့သည်။
ပိုက်ကျော်ခြင်းပြိုင်ပွဲတွင် တတိယနေရာလုပွဲ ကျင်းပခြင်းမရှိသောကြောင့် မြန်မာအသင်းမှာ ဗီယက်နမ်နှင့်အတူ ပူးတွဲကြေးတံဆိပ်ရရှိခဲ့ခြင်းဖြစ်သည်။
မြန်မာအမျိုးသမီးအသင်းသည် အုပ်စုပွဲများတွင် အိမ်ရှင်အင်ဒိုနီးရှားကို (၂-၁) ပွဲ၊ မလေးရှားကို (၃-ဝ) ပွဲ၊ ဂျပန်ကို (၃-ဝ) ပွဲဖြင့် အနိုင်ရပြီး ဗီယက်နမ်ကို (၁-၂) ပွဲဖြင့် ရှုံးနိမ့် ခဲ့သည်။
မြန်မာအမျိုးသမီးအသင်းသည် အုပ်စုတွင် ဗီယက်နမ်အသင်းကို ရှုံးနိမ့်ခဲ့သောကြောင့် ဆီမီးဖိုင်နယ်တွင် နာမည်ကြီးထိုင်းအသင်းနှင့် တွေ့ဆုံခဲ့ခြင်းဖြစ်သည်။
ဗိုလ်လုပွဲကို သြဂုတ် ၂၂ ရက် ညနေပိုင်းတွင် ဆက်လက်ကျင်းပမည်ဖြစ်သည်။
အိမ်ရှင်အင်ဒိုနီးရှားနိုင်ငံသည် ပိုက်ကျော်ခြင်းပြိုင်ပွဲတွင် အမျိုးသား ပြိုင်ပွဲလေးမျိုး၊ အမျိုးသမီးပြိုင်ပွဲနှစ်မျိုးသာ ထည့်သွင်းကျင်းပနေပြီး ပြိုင်ပွဲဝင်နိုင်ငံတစ်နိုင်ငံလျှင် နှစ်မျိုးစီသာ ယှဉ်ပြိုင်ရခြင်းဖြစ်သည်။
သုံးယောက်တွဲအသင်းလိုက် အမျိုးသားနှင့် အမျိုးသမီးပြိုင်ပွဲပြီးပါက အမျိုးသား နှစ်ယောက်တွဲအသင်းလိုက်ပြိုင်ပွဲ ဆက်လက် ကျင်းပမည်ဖြစ်သည်။
မြန်မာပိုက်ကျော်ခြင်းအသင်းသည် အမျိုးသားပြိုင်ပွဲတွင် လေးယောက်တွဲပြိုင်ပွဲ နှင့် နှစ်ယောက်တွဲအသင်းလိုက်ပြိုင်ပွဲ၊ အမျိုး သမီးပြိုင်ပွဲတွင် လေးယောက်တွဲပြိုင်ပွဲနှင့် သုံးယောက်တွဲအသင်းလိုက်ပြိုင်ပွဲတွင် ယှဉ်ပြိုင်မည်ဖြစ်သည်။
