'အားကစားအဖွဲ့ သုံးဖွဲ့စလုံး အလားအလာကောင်းတွေ ရှိပါတယ်'
အာရှအားကစားပြိုင်ပွဲကို မြို့နှစ်မြို့၌ ကျင်းပလျက်ရှိပြီး ပလန်ဘမ်မြို့၌ ကျင်းပမည့် အားကစားနည်းများတွင် မြန်မာအားကစားအဖွဲ့ ဆုတံဆိပ်မျှော်မှန်းနိုင်သည့် အားကစားအဖွဲ့များ ပါဝင်နေသည်။ ထို့ကြောင့် ပလန်ဘမ်မြို့တွင် မြန်မာအားကစားသမားများအား ကြီးကြပ်ဆောင်ရွက်နေသည့် အားကစားအဖွဲ့ ဒုတိယအဖွဲ့ခေါင်းဆောင် ဦးကျော်ဇင်မိုးကို မြန်မာအားကစားသမားများ၏ အလားအလာ၊ အိမ်ရှင် အင်ဒိုနီးရှားနိုင်ငံ၏ ဆောင်ရွက်ပေးထားမှုများနှင့် ပတ်သက်၍ မေးမြန်းထားမှုများအား ဖော်ပြအပ်ပါသည်။
မေး - ပလန်ဘမ်မြို့မှာ မြန်မာ အားကစားသမားတွေကို ထားရှိတဲ့နေရာနဲ့ အိမ်ရှင်နိုင်ငံရဲ့ စီစဉ်ဆောင်ရွက်ပေးမှုက အဆင်ပြေရဲ့လား။
ဖြေ - တည်းခိုမှုအပိုင်းက အဆင်ပြေပါတယ်။ လေ့ကျင့်မှုလုပ်တာလည်း အဆင်ပြေပါတယ်။ နံနက်စာ အဆင်မပြေတာလေးတွေရှိလို့ သူတို့ကို ပြောပြထားပါတယ်။
မေး - ပိုက်ကျော်ခြင်းကစားသမားတွေ အခက်အခဲကြုံခဲ့တာနဲ့ပတ်သက်ပြီး ဝေဖန်မှုတွေ မြင့်တက်လာတာတွေ့ ရပါတယ်။ ဘာကြောင့် အဲဒီလိုဖြစ်သွားတာလဲ။
ဖြေ - လေကြောင်းလိုင်း စီစဉ်ပေးတာက အဓိကဖြစ်တာပါ။ ကျွန်တော်က ပလန်ဘမ်မှာ ကြို ရောက်နေတဲ့အတွက် သူတို့ကို လေဆိပ်မှာသွားကြိုတယ်။ သူတို့ရဲ့ အခက်အခဲတွေကို Facebook မှာ တွေ့လိုက်တာကြောင့် လေဆိပ်ကနေ အားကစားရွာ စားရိပ်သာကို တစ်ခါတည်း ခေါ်သွားပြီး ညစာအတွက် စီစဉ်ပေးခဲ့ပါတယ်။ လေယာဉ်က စရိတ်နည်းလေကြောင်းလိုင်းဖြစ်ပြီး အစားအသောက်အတွက် မဝယ်ထားလို့ အခုလိုဖြစ်သွားတာပါ။
မေး - ပလန်ဘမ်မြို့မှာ မြန်မာအားကစားသမားတွေ အဆင်ပြေအောင် ဘယ်လိုဆောင်ရွက်ပေးနေပါသလဲ။
ဖြေ - ပလန်ဘမ်မှာ ပိုက်ကျော်ခြင်း၊ လှေလှော်နဲ့ သေနတ်ပစ်အားကစားအဖွဲ့ သုံးဖွဲ့ပဲ ရှိပေမဲ့ အင်အားက ၁၀၀ ကျော်ရှိပါတယ်။ သူတို့တွေအားလုံး အဆင်ပြေအောင် ဆောင်ရွက်ပေးထားပါတယ်။
မေး - မြန်မာအားကစားအဖွဲ့တွေ ဆုတံဆိပ်ရနိုင်တဲ့ အလားအလာကရော ဘယ်လိုရှိနိုင်မလဲ။
ဖြေ - မြန်မာ အားကစားအဖွဲ့တွေ အကောင်းဆုံးပြင်ဆင်ထားပေမဲ့ ပြိုင်ဘက်ကစားသမားတွေကလည်း အရမ်းကိုတိုးတက်နေပါတယ်။ ပိုက်ကျော်ခြင်းကို အရင်ဆုံးပြောရမယ်ဆိုရင် ကိုယ့်ဘက်က နှစ်ဆလောက်ကြိုးစားမှ ပြိုင်ပွဲမှာ အကောင်းဆုံးယှဉ်ပြိုင်နိုင်မှာပါ။ ကျွန်တော်တို့ ရွှေဆုယူခဲ့တဲ့ နှစ်ယောက်တွဲပြိုင်ပွဲကလည်း မပါဘူးဆိုတော့ ပိုပြီးကြိုးစားရမှာပါ။ လှေလှော်ပြိုင်ပွဲမှာတော့ ရိုးရာလှေပြိုင်ပွဲကို မျှော်လင့်ထားပါတယ်။ သေနတ်ပစ်ပြိုင်ပွဲမှာက Final ပြိုင်ပွဲကို တက်ရောက်နိုင်ဖို့ အရင်ဆုံးကြိုးစားရမှာပါ။ ဒီမှာယှဉ်ပြိုင်မယ့် သုံးဖွဲ့စလုံး အလားအလာကောင်းတွေ အများကြီးရှိပါတယ်။
