ဆီးဂိမ်းစ်အမျိုးသမီးဖူဆယ်ပြိုင်ပွဲ ဒုတိယနေ့ပွဲစဉ်အဖြစ် သြဂုတ် ၂၀ ရက် နံနက်ပိုင်း တွင် မြန်မာအသင်းနှင့် သုံးကြိမ်ဆက်ချန်ပီယံ ထိုင်းအသင်းတို့ ယှဉ်ပြိုင်ကစားရာ မြန်မာ အမျိုးသမီးအသင်း ဂိုးပြတ်ရှုံးနိမ့်ခဲ့ကြောင်း သိရသည်။ အုပ်စုအဖွင့်ပွဲတွင် ရှုံးပွဲကြုံတွေ့ထား သည့် မြန်မာအသင်းသည် ယခုပွဲတွင် ရလဒ် ကောင်းရယူနိုင်ရန် ကြိုးပမ်းခဲ့သော်လည်း ခြေစွမ်းပိုင်းကွာဟမှုကြောင့် (၂-၁၀) ဂိုးဖြင့် ဂိုးပြတ်ရှုံးနိမ့်ခဲ့ခြင်းဖြစ်သည်။
ဆီးဂိမ်းစ်ပြိုင်ပွဲ ၌ အမျိုးသမီးဖူဆယ်ပြိုင်ပွဲ ထည့်သွင်းကျင်းပ သည့် သုံးကြိမ်စလုံး (၂၀၀၇၊ ၂၀၁၁၊ ၂၀၁၃) ရွှေတံဆိပ်ဆုဆွတ်ခူးရရှိထားသည့် ထိုင်း အသင်းသည် မြန်မာအသင်းအား သက် သောင့်သက်သာ အနိုင်ရခဲ့ခြင်းဖြစ်ပြီး ပထမ ပိုင်းတွင် (၅-၂) ဂိုးဖြင့် ဦးဆောင်ကစားကာ လက်ကျန်မိနစ်များတွင် ငါးဂိုးထပ်မံသွင်းယူ ခဲ့သည်။ မြန်မာအသင်းသည် ယခုပြိုင်ပွဲ၌ နှစ်ပွဲဆက် ရှုံးနိမ့်ခြင်းဖြစ်ပြီး အဖွင့်ပွဲတွင် အိမ်ရှင်မလေးရှားအသင်းအား ဦးဆောင်ဂိုး စတင်သွင်းယူနိုင်သော်လည်း (၁-၂) ဂိုးဖြင့် ရှုံးနိမ့်ခဲ့သည်။
မြန်မာအသင်းအနေဖြင့် ယခုပွဲ ရလဒ်ကြောင့် ဆုတံဆိပ်ရရှိရန် ရုန်းကန်ရ တော့မည်ဖြစ်ပြီး အင်ဒိုနီးရှား၊ ဗီယက်နမ်တို့ နှင့် ဆက်လက်ယှဉ်ပြိုင်ရမည်ဖြစ်သည်။
