တောင်ကိုရီးယားနိုင်ငံ၏ စစ်မှုထမ်းဥပဒေကြောင့် စပါးအသင်းသည် ၎င်းတို့၏တောင်ပံကစားသမား ဆွန်ဟောင်မင်ကိုလက်လွှတ်ရဖွယ်ရှိကြောင်း ဗြိတိန်သတင်းစာ The Sun ကသုံးသပ်ဖော်ပြခဲ့သည်။
တောင်ကိုရီးယားနိုင်ငံ၏ စစ်မှုထမ်းဥပဒေအရ အရွယ်ရောက်သူ ယောက်ျားလေးများအနေဖြင့် အသက်(၂၈)နှစ်မပြည့််မီ (၂၁)လကြာစစ်မှုထမ်းရမည်ဖြစ်သည်။ သို့ဖြစ်ရာ အသက်(၂၅)နှစ်ရှိပြီဖြစ်သည့် ဆွန်ဟောင်မင်အနေဖြင့် လာမည့်(၃)နှစ်အတွင်း တောင်ကိုရီးယားနိုင်ငံသို့ပြန်ကာ စစ်မှုထမ်းရဖွယ်ရှိနေခြင်းဖြစ်သည်။
အကယ်၍ စစ်မှုထမ်းရမည်ဆိုပါက ၎င်းအနေဖြင့် စပါးအသင်း၏ ၂၀၁၉-၂၀ ရာသီနှင့် ၂၀၂၀-၂၁ ရာသီများမှ ပွဲစဉ်အချို့ကိုလွဲချော်ရဖွယ်ရှိနေသည်။ သို့သော်တောင်ကိုရီးယား အစိုးရသည် ယခင်က ပြိုင်ပွဲကြီးများ၌ အစွမ်းပြခဲ့သည့် နိုင်ငံံ့ဂုဏ်ဆောင်အားကစားသမားအချို့ကို စစ်မှုထမ်းခြင်းမှ ကင်းလွတ်ခွင့်ပေးခဲ့သည့် သာဓကများရှိခဲ့ဖူးသည်။
သို့ဖြစ်ရာ ဆွန်ဟောင်မင်အနေဖြင့် စစ်မှုထမ်းခြင်းမှကင်းလွတ်ခွင့်ရရှိနိုင်ရန် လာမည့်၂၀၁၈ ကမ္ဘာ့ဖလားပြိုင်ပွဲ၌ ခြေစွမ်းပြကစားရန် လိုအပ်နေသည်ဟုလည်း The Sun သတင်းစာကဖော်ပြခဲ့သည်။
တောင်ကိုရီးယားအသင်းသည် ၂၀၁၈ ကမ္ဘာ့ဖလားပြိုင်ပွဲတွင် ဂျာမနီ၊ဆွီဒင်၊မက္ကဆီကို အစရှိသည့်အသင်းများနှင့် တစ်အုပ်စုတည်း ကျရောက်လျက်ရှိသည်။