PSG အသင်းမှ ဥရုဂွေးတိုက်စစ်မှူး ကာဗာနီသည် ပယ်နယ်တီကန်သွင်းရမည့်တာဝန်ကို နေမာအား လွှဲပြောင်းပေးရန် အသင်းပိုင်ရှင်က ကမ်းလှမ်းခဲ့သော်လည်း လက်မခံဘဲ ပယ်ချခဲ့ကြောင်း သိရှိရသည်။
PSG အသင်းသည် ယခုနွေရာသီအပြောင်းအရွှေ့ကာလတွင် နေမာနှင့် ဘာပေတို့ကို အားဖြည့်ခေါ်ယူပြီး ကမ္ဘာ့တန်ဖိုးအကြီးဆုံးတိုက်စစ်အတွဲအဖြစ် ဖွဲ့စည်းခဲ့သည်။
ကာဗာနီ၊ နေမာနှင့် ဘာပေ တိုက်စစ်အတွဲသည် ပြိုင်ဘက်များအတွက် ကြောက်စရာအနေအထားဖြစ်ခဲ့သည့်နည်းတူ အချင်းချင်းကြားတွင်လည်း ပါဝါအားပြိုင်မှု ဖြစ်ပေါ်လာခဲ့သည်။
အထူးသဖြင့် ဝါရင့်တိုက်စစ်မှူး ကာဗာနီနှင့် ကမ္ဘာ့စံချိန်တင်ပြောင်းရွှေ့ကြေးရှင် နေမာတို့ ထိပ်တိုက်တွေ့ခဲ့ကြခြင်းဖြစ်ပြီး ပြီးခဲ့သည့်တစ်ပတ် လိုင်ယွန်နှင့် ယှဉ်ပြိုင်ခဲ့သောပွဲ၌ ဖရီးကစ်နှင့် ပယ်နယ်တီကို လုကန်ရန် ကြိုးစားမှုများ ပေါ်ပေါက်ခဲ့သည်။
ထို့ကြောင့် အသင်းပိုင်ရှင် အယ်လ်ခီလာဖီက ကာဗာနီအား ပယ်နယ်တီကန်သွင်းသည့်တာဝန်ကို နေမာထံ လွှဲပြောင်းပေးလျှင် ဆုကြေးအဖြစ် ယူရို(၁)သန်းပေးမည်ဟု ကမ်းလှမ်းခဲ့ခြင်းဖြစ်ကြောင်း သိရှိရသည်။
သို့သော် အသင်း၏တတိယအသင်းခေါင်းဆောင်ဖြစ်သော ကာဗာနီက လက်မခံခဲ့ကြောင်း သိရှိရသည်။
PSG အသင်းမှ ကစားသမားအတော်များများကလည်း ပယ်နယ်တီကန်သွင်းခွင့်နှင့်ပတ်သက်၍ ကာဗာနီဘက်မှ ထောက်ခံရပ်တည်ခဲ့ကြကြောင်း သိရှိရသည်။