ရွှေဝါရောင်တော်လှန်ရေး (၁၁) နှစ်မြောက် အခမ်းအနား ကျင်းပနေစဉ် (ဓာတ်ပုံ - ကြည်နိုင်)
ယနေ့ နိုင်ငံရေး အခြေအနေအောက်တွင် ဒီမိုကရေစီနှင့် လူ့အခွင့်အရေးများ ဆုံးရှုံးလာခြင်း၊ တိုင်းရင်းသား ပြည်သူလူထု ဘဝများ ဆင်းရဲကျပ်တည်းလာခြင်း စသည့် အခြေအနေများမှာ ပိုမိုဆုတ်ယုတ်လာဟု စက်တင်ဘာ ၁၈ ရက်က ထုတ်ပြန်သည့် နိုင်ငံလုံးဆိုင်ရာ ရွှေဝါရောင်တော်လှန်ရေး (၁၁) နှစ်မြောက် အခမ်းအနား ရွှေဝါရောင် သံဃာတော်များ သဘောထား ထုတ်ပြန်ချက်ပါရှိသည်။
ရွှေဝါရောင် သံဃာတော်များ၏ သဘောထား ထုတ်ပြန်ချက်တွင် အချက်သုံးချက်ကို အဓိကထား တိုက်တွန်းခဲ့ပြီး ၎င်းအချက်များမှာ စစ်မှန်သည့် တွေ့ဆုံဆွေးနွေးပွဲ အမြန်ကျင်းပရေး၊ ၂၀၀၈ ဖွဲ့စည်းပုံ အခြေခံဥပဒေ ဖျက်သိမ်းရေးနှင့် ပြည်သူလူထုဘ၀ ပြေလည်ရေးတို့ဖြစ်သည်။
ထို့ပြင် စစ်အာဏာရှင်များ ဖန်တီးခဲ့သော ၂၀၀၈ ဖွဲ့စည်းပုံ အခြေခံဥပဒေနှင့် နိုင်ငံရေးဖြစ်စဉ်အပေါ် လိုက်ပါသွားခဲ့ကြသော နိုင်ငံရေး လှေကြုံစီးသူများကြောင့် ရဟန်းရှင်လူ၊ ကျောင်းသား၊ ပြည်သူလူထုကြီး၏ အသက်၊ သွေး၊ ချွေး၊ ဘဝများ ရင်းနှီးပေးဆပ်ကာ ရယူခဲ့ရသော နိုင်ငံရေးလမ်းစဉ်နှင့် မျှော်မှန်းချက်များသည် အဟောသိကံ ဖြစ်နေရဆဲ ဖြစ်ကြောင်း သဘောထား ထုတ်ပြန်ချက်တွင် ဖော်ပြထားသည်။
ဆက်လက်၍ ဘက်စုံအကျပ်အတည်းများ ဆိုက်လာပြီး ထွက်ပေါက်ပိတ်လာသည့် တိုင်းပြည်၏ အခြေအနေကို ကျော်လွှားနိုင်ရန်မှာ စေ့စပ်ညှိနှိုင်းရန် တာဝန်ရှိသူ အသီးသီး၏ နိုင်ငံရေးအရ စေ့စပ်ညှိနှိုင်း အဖြေရှာသောနည်းနှင့် ရဟန်းရှင်လူ၊ ကျောင်းသား ပြည်သူလူထုအပေါင်းမှ ဝင်ရောက်ဆုံးဖြတ် အဖြေရှာနည်းဟူ၍ နည်းလမ်းနှစ်ခုဖြင့်သာ ဖြေရှင်နိုင်းမည်ဖြစ်ကြောင်း ထုတ်ပြန်ချက်က ဆိုသည်။
ထို့ကြောင့် နိုင်ငံတော်အစိုးရ၊ တပ်မတော်တို့နှင့် တိုင်းရင်းသား လက်နက်ကိုင် နိုင်ငံရေး အဖွဲ့အစည်းများ အနေဖြင့် အချင်းချင်း သွေးစည်းညီညွတ်ပြီး စစ်မှန်သည့် တွေ့ဆုံဆွေးနွေးရေး (မှု) အရ ငြိမ်းချမ်းရေးကို အာရုံစူးစိုက်ရန် လိုအပ်ကြောင်း၊ ပြည်သူလူထုကို မျက်နှာမူ၍ စစ်မှန်သည့် ထာဝရငြိမ်းချမ်းရေးကို ဦးတည်ဖော်ဆောင်ကြရန် အလေးအနက် တိုက်တွန်းကြောင်း သိရသည်။
တိုင်းပြည်၏ အခြေအနေ အရပ်ရပ်သည် လမ်းဆုံလမ်းခွသို့ ရောက်ရှိနေပြီး လမ်းမှန်သို့ ရောက်ရှိရန်နှင့် အခြေအနေကို ပြောင်းလဲနိုင်ရန်မှာ စစ်မှန်သော စေ့စပ်ညှိနှိုင်း အဖြေရှာသည့်နည်းနှင့် (သို့မဟုတ်) လူထုပါဝင်သော နည်းမှတစ်ပါး အခြားရွေးချယ်စရာ မရှိတော့သည်ကို တွေ့ရှိရကြောင်း၊ ထို့ကြောင့် တာဝန်ရှိသူ အသီးသီးမှ ၂၀၀၈ ဖွဲ့စည်းပုံ အခြေခံဥပဒေကို အမြန်ဆုံးဖျက်သိမ်းပြီး ပြည်သူလူထု၏ သဘောဆန္ဒနှင့် ကိုက်ညီသော အခြေခံဥပဒေအသစ်ဖြင့် အမြန်ဆုံး အစားထိုးနိုင်ရေးအတွက် ဆောင်ရွက်ကြရန်နှင့် နောက်ဆုံးအပြီးသတ် အဆုံးအဖြတ်အဖြစ် ရဟန်းရှင်လူ၊ ကျောင်းသား၊ ပြည်သူလူထု အပေါင်းမှ ဝင်ရောက်အဆုံးအဖြတ် ပြုနိုင်ရေးအတွက် ဘက်ပေါင်းစုံမှ ပြင်ဆင်ထားကြပါရန် တိုက်တွန်းအပ်ကြောင်း ဖော်ပြပါရှိသည်။
