<

ကြားဖြတ် ရွေးကောက်ပွဲတွင် ကာလလေးခု သတ်မှတ်ကာ လုံခြုံရေးအတွက် ဇာတ်တိုက် လေ့ကျင့်မှုများ ပြုလုပ်မည်

ကြားဖြတ် ရွေးကောက်ပွဲတွင် ကာလလေးခု သတ်မှတ်ကာ လုံခြုံရေးအတွက် ဇာတ်တိုက် လေ့ကျင့်မှုများ ပြုလုပ်မည် ဖြစ်ကြောင်း ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေက ပြောကြားသည်။

သြဂုတ် ၂၀ ရက်က နေပြည်တော်တွင် ပြုလုပ်သည့် ၂၀၁၈ ခုနှစ် ကြားဖြတ်ရွေးကောက်ပွဲ တည်ငြိမ်အေးချမ်းစွာ ကျင်းပနိုင်ရေးအတွက် ရွေးကောက်ပွဲဆိုင်ရာ လုံခြုံရေးစီမံခန့်ခွဲမှု ဗဟိုကော်မတီ ညှိနှိုင်းအစည်းအဝေးတွင် ပြည်ထောင်စုဝန်ကြီးက ပြောကြားခဲ့ခြင်း ဖြစ်သည်။

ယင်းကာလ လေးခုမှာ ကြားဖြတ်ရွေးကောက်ပွဲ အကြိုကာလ၊ မဲဆွယ်စည်းရုံးရေးကာလ၊ ရွေးကောက်ပွဲ ကျင်းပစဉ် ကာလနှင့် ရွေးကောက်ပွဲ ကျင်းပပြီး ကာလတို့ဖြစ်ပြီး လုံခြုံရေးအတွက် ဇာတ်တိုက် လေ့ကျင့်မှုများ ပြုလုပ်မည် ဖြစ်သည်။

အစည်းအဝေးသို့ ရွေးကောက်ပွဲဆိုင်ရာ လုံခြုံရေးစီမံခန့်ခွဲမှု ဗဟိုကော်မတီဥက္ကဋ္ဌ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေ၊ ဒုတိယ၀န်ကြီး ဗိုလ်ချုပ် မြင့်နွယ်နှင့် ဦးစိုးအောင်၊ ဒုတိယ ရှေ့နေချုပ် ဦးဝင်းမြင့်၊ အမြဲတမ်း အတွင်းဝန်များ၊ ညွှန်ကြားရေးမှူးချုပ်များ၊ ဗဟိုကော်မတီ အတွင်းရေးမှူး၊ မြန်မာနိုင်ငံ ရဲတပ်ဖွဲ့ရဲချုပ်၊ တိုင်းဒေသကြီးနှင့် ပြည်နယ်ရွေးကောက်ပွဲဆိုင်ရာ လုံခြုံရေးစီမံခန့်ခွဲမှု ကော်မတီဥက္ကဋ္ဌများ ဖြစ်သည့် တိုင်းဒေသကြီးနှင့် ပြည်နယ်လုံခြုံရေးနှင့် နယ်စပ်ရေးရာဝန်ကြီးများ၊ တိုင်းဒေသကြီးနှင့် ပြည်နယ်ရဲတပ်ဖွဲ့မှူးများနှင့် တာဝန်ရှိသူများ တက်ရောက်ခဲ့ကြောင်း သိရသည်။

လုံခြုံရေး ဆောင်ရွက်ချက်များအပေါ် အခြေခံ၍ လုံခြုံရေး အစီအမံ လိုအပ်ချက်များကို ဖြည့်စွက် ဆောင်ရွက်ပေးရမည် ဖြစ်ကြောင်း၊ လုံခြုံရေးတာဝန် ထမ်းဆောင်ကြသူများ အားလုံးသည်လည်း ဥပဒေ၊ နည်းဥပဒေများနှင့်အညီ စနစ်တကျ လုပ်ကိုင် ဆောင်ရွက်နိုင်ရေးအတွက်လည်း စီမံရမည် ဖြစ်ကြောင်း ပြည်ထောင်စုဝန်ကြီးက အစည်းအဝေးတွင် ပြောကြားသည်။

တိုင်းဒေသကြီးနှင့် ပြည်နယ်အသီးသီးတွင် ရွေးကောက်ပွဲ အောင်မြင်စွာ ကျင်းပနိုင်ရေးအတွက် လုံခြုံရေးသည် အရေးကြီးကြောင်း၊ အချိန်နှင့် တစ်ပြေးညီ သတင်းမှန်များကိုလည်း ထုတ်ပြန်ရမည် ဖြစ်ကြောင်း ၎င်းက ဆက်လက် ပြောကြားသည်။

ကြားဖြတ်ရွေးကောက်ပွဲတွင် တိုင်းဒေသကြီးနှင့် ပြည်နယ် ကိုးခုရှိ ပြည်သူ့လွှတ်တော် မဲဆန္ဒနယ် လေးခု၊ အမျိုးသားလွှတ်တော် မဲဆန္ဒနယ် တစ်ခုနှင့် တိုင်းဒေသကြီးနှင့် ပြည်နယ်လွှတ်တော် မဲဆန္ဒနယ် ရှစ်ခုတို့တွင် နိုင်ငံရေးပါတီ ၂၅ ပါတီမှ ကိုယ်စားလှယ် ၆၅ ဦး ၀င်ရောက် ယှဉ်ပြိုင်မည်ဖြစ်သည်။

August 21, 2018














Copy Protected by Chetan's WP-Copyprotect.