တိုင်းရင်းသားများ၏ အခွင့်အရေးကို လက်မခံ၊ အသိအမှတ် မပြုခြင်းသည် ပြည်တွင်းစစ် ဖြစ်ပွားနေရခြင်း၏ အဓိက အရင်းခံပြဿနာဟု TNLA အထွေထွေအတွင်းရေးမှူး ပြောကြား

တိုင်းရင်းသားများ၏ အခွင့်အရေးကို လက်မခံ၊ အသိအမှတ် မပြုခြင်းသည် ပြည်တွင်းစစ် ဖြစ်ပွားနေရခြင်း၏ အဓိက အရင်းခံပြဿနာဟု TNLA အထွေထွေအတွင်းရေးမှူး ပြောကြား
Published 12 August 2018

ကချင်ပြည်နယ်အတွင်း တိုက်ပွဲများကြောင့် ထွက်ပြေးလာကြသူ ဒေသခံများအား နမ္မတီးမြို့ နှစ်ခြင်းဘုရားကျောင်းအတွင်း ဧပြီလအတွင်းက တွေ့ရစဉ် (ဓာတ်ပုံ-မုန်ဆန်အောင်)

လူမျိုးပေါင်းစုံနေထိုင်သည့် မြန်မာနိုင်ငံတွင် လူမျိုးစုများ၏ နိုင်ငံရေးအခွင့်အရေး ဆိတ်သုဉ်းပျက်စီးနေခြင်း၊ တိုင်းရင်းသား အခွင့်အရေးကို လက်မခံ၊ အသိအမှတ် မပြုခြင်းများသည် ပြည်တွင်းစစ် ဖြစ်ပွားနေရခြင်း၏ အဓိက အရင်းခံပြဿနာ ဖြစ်သည်ဟု တအန်းလက်နက်ကိုင်အဖွဲ့ (TNLA) ၏ အထွေထွေ အတွင်းရေးမှူးဖြစ်သူ ဗိုလ်မှူးချုပ်တားဘုန်းကျော်က ပြောကြားသည်။

TNLA သတင်းနှင့် ပြန်ကြားရေးဌာနက လစဉ်ထုတ်ဝေသည့် စာစောင်တွင် “မြန်မာပြည်တွင်းစစ် ရာစုနှစ်ထိအောင် ရှည်ကြာမှာလား” ဟူသော ခေါင်းစဉ်ဖြင့် TNLA အထွေထွေအတွင်းရေးမှူး ဗိုလ်မှူးချုပ် တားဘုန်းကျော်က ဆောင်းပါးရေးသားခဲ့ပြီး ၎င်းက အဆိုပါ ဆောင်းပါးတွင် ထိုသို့ထည့်သွင်း ရေးသားခဲ့ခြင်းဖြစ်သည်။

မြန်မာနိုင်ငံအတွင်းရှိ တိုင်းရင်းသားများ အနေဖြင့် ၎င်းတို့၏ ကိုယ်ပိုင်ပြဋ္ဌာန်းခွင့် နိုင်ငံရေး အခွင့်အရေးကို ကျင့်သုံးခွင့်ရရှိမည်ဆိုပါက ဗြိတိသျှကိုလိုနီများ မည်သို့ပင် သိမ်ဖျင်းသော သွေးခွဲအုပ်ချုပ်မှုမျိုး လုပ်ခဲ့ပါစေ၊ အဆိုပါ သွေးခွဲမှုသည် အလုပ်ဖြစ်မည် မဟုတ်သကဲ့သို့ ပြည်တွင်းစစ်လည်း ဖြစ်ပွားမည်မဟုတ်ဘဲ မြန်မာနိုင်ငံတွင် တိုင်းရင်းသား လူမျိုးများ၏ ကိုယ်ပိုင်ပြဋ္ဌာန်းခွင့်နှင့် နိုင်ငံရေး အခွင့်အရေးကို အတိအကျ အသိအမှတ်ပြုကာ အကောင်အထည်ဖော်ဆောင်ရန် လိုအပ်နေသည်ဟု ဗိုလ်မှူးချုပ် တားဘုန်းကျော်က ပြောကြားသည်။

ထို့ပြင် မြန်မာအစိုးရ အဆက်ဆက်သည်လည်း တိုင်းရင်းသားလူမျိုး အခွင့်အရေးကို အနည်းငယ်သာ အသိအမှတ်ပြုချင်ပြီး ဟန်ပြအသုံးချရုံလောက်သာ သဘောထားရှိခဲ့ကာ တော်လှန်ရေးလှုပ်ရှားသည့် အင်အားစုများကလည်း တိုင်းရင်းသားများ၏ ကိုယ်ပိုင်ပြဋ္ဌာန်းခွင့် ပြဿနာအပေါ် နားလည်လက်ခံသလို ရှိသော်လည်း အရေးကြုံ ဆုံးဖြတ်ချက်ပေးရမည့် အချိန်တွင်မူ မှန်ကန်သော ပြဿနာဖြေရှင်းသည့်ဘက်မှ ပြတ်ပြတ်သားသား မရပ်တည်ဝံ့ဟု ၎င်းက အဆိုပါဆောင်းပါးတွင် ဝေဖန်ထောက်ပြထားသည်။

“မြန်မာနိုင်ငံ လွတ်လပ်ရေးရပြီးကတည်းက အခုအချိန်အထိ တိုင်းရင်းသားအရေးကိစ္စကို တကယ်ကိုင်တွယ် ဖြေရှင်းဝံ့သူ ဗမာခေါင်းဆောင်၊ ဗမာနိုင်ငံရေးပါတီ မရှိသေးပါ။ သူတို့ကိုယ်ကျိုးနဲ့ ပါတီအကျိုးအတွက်ပဲ တိုင်းရင်းသားတွေကို ခရီးသွားဟန်လွဲ အသုံးချခဲ့ကြတာကို တွေ့ရမှာပါ” ဟု ဗိုလ်မှူးချုပ် တားဘုန်းကျော်က ပြောဆိုသည်။

အချို့သော တိုင်းရင်းသား အင်အားစုများနှင့် ဒီမိုကရေစီအင်အားစုများသည် ကိုယ့်ကြမ္မာကိုယ် မဖန်တီးနိုင်တော့သည့်အတွက် ဒေါ် အာင်ဆန်းစုကြည်နှင့် ၂၀၀၈ ဖွဲ့စည်းပုံ အခြေခံဥပဒေထံ ပုံအပ်လိုက်ကြပြီး ထိုသု့ိပုံအပ်မှုကြောင့် တိုင်းရင်းသားများနှင့် ဒီမိုကရေစီ အင်အားစုများအကြား အဓိက ဆုံးရှုံးမှုသည် တော်လှန်ရေး တိုက်ဖော် တိုက်ဖက် စိတ်ဓာတ်ဟု ဗိုလ်မှူးချုပ် တားဘုန်းကျော်က ပြောကြားသည်။

ဒေါ်အောင်ဆန်းစုကြည်အနေဖြင့် အမျိုးသားပြန်လည် သင့်မြတ်ရေးကို တပ်မတော်နှင့်သာ လုပ်ဆောင်ရန် ကြိုးပမ်းခဲ့ပြီး အခက်အခဲများကြားတွင် နှစ်ကာလ ကြာရှည်စွာ အတူရုန်းကန်ခဲ့ကြသည့် ဘဝတူ မဟာမိတ် တိုင်းရင်းသားပါတီများအပေါ် လစ်လျူရှူ ခွဲခြားဆက်ဆံခဲ့သည်ဟု ဗိုလ်မှူးချုပ် တားဘုန်းကျော်က ပြောကြားသည်။

“တိုင်းပြည်တည်ဆောက်ရေး အတွက် အတူလက်တွဲလုပ်ဆောင်ဖို့ တန်ဖိုးထားမှု မရှိတာဟာ တိုင်းပြည်အတွက် တကယ် အင်မတန် နစ်နာတဲ့ဆုံးရှုံးမှု ဖြစ်ပါတယ်” ဟု ဗိုလ်မှူးချုပ် တားဘုန်းကျော်က ပြောကြားသည်။

၂၀၀၈ ဖွဲ့စည်းပုံ အခြေခံဥပဒေအရ ၂၀၁၆ ခုနှစ်တွင် အစိုးရဖြစ်လာသော NLD ပါတီအနေဖြင့် ဆိုးဝါးသော အစိုးရဖွဲ့စည်းမှုနှင့် ပြည်ထောင်စုမဆန်သော လုပ်နည်းလုပ်ဟန်နှင့် ရပ်တည်ချက်များကြောင့်   တိုင်းရင်းသား လူမျိုးများ၏ ယုံကြည်မှုကို ပျက်ယွင်းစေခဲ့ပြီး လက်ရှိ နိုင်ငံ့ခေါင်းဆောင်များ၏ တိုင်းရင်းသားများအပေါ် သဘောထားသည် စစ်မှန်သော ပြည်ထောင်စု တည်ဆောက်ရေးအတွက် အဆင့်မီ ပြည့်စုံခြင်းမရှိဟု ၎င်းက ထောက်ပြဝေဖန်ခဲ့သည်။

ပြည်တွင်းစစ်သည် တိုင်းပြည်၏ ဒီမိုကရေစီ အခြေခံအဆောက်အအုံများကို အင်အားချည့်နဲ့စေပြီး တိုင်းပြည် ဖွံ့ဖြိုးတိုးတက်မှုကို နှေးကွေးနောက်ကျစေကာ အဆိုပါ ပြည်တွင်းစစ် ရပ်တန့်နိုင်ရေးသည် တိုင်းရင်းသားများ၏ ကိုယ်ပိုင်ပြဋ္ဌာန်းခွင့်နှင့် တန်းတူရေး၊ နိုင်ငံရေးပြဿနာကို ဖြေရှင်းနိုင်မှသာ ဖြစ်မည်ဟု ဗိုလ်မှူးချုပ် တားဘုန်းကျော်က ၎င်း၏ “မြန်မာပြည်တွင်းစစ် ရာစုနှစ်ထိအောင် ရှည်ကြာမှာလား” ဟူသော ဆောင်းပါးတွင် သုံးသပ်ရေးသားခဲ့သည်။

 

Most Read

Most Recent