ကချင်လေးပါတီ ပေါင်းစည်း၍ ကချင်ပြည်နယ်ပါတီ (Kachin State Party – KSP) ဟု အမည်ပေးခဲ့ခြင်းကို သြဂုတ် ၁၁ ရက် အစည်းအဝေးတွင် ဆုံးဖြတ်ခဲ့ကြောင်း သတင်းရရှိသည်။ ဆွေးနွေးပွဲတွင် ကချင်ဒီမိုကရက်တစ်ပါတီ KDP၊ ကချင်ပြည်နယ် ဒီမိုကရေစီပါတီ KSDP၊ ကချင်အမျိုးသား ကွန်ကရက်ပါတီ KNC၊ စည်းလုံးညီညွတ်ရေးနှင့် ဖွံ့ဖြိုးရေးပါတီ UPKS စသည့် လေးပါတီ ခေါင်းဆောင်များနှင့် ပေါင်းစည်းရေး ကော်မတီဝင် ၁၇ ဦးက ပါတီအမည်၊ ပါတီအလံ၊ တံဆိပ်များကို ရွေးချယ်နိုင်ခဲ့ခြင်းဖြစ်ကြောင်း သိရသည်။
သဘောတူညီမှုများနှင့် ပတ်သက်၍ ကချင်အမျိုးသား ကွန်ဂရက်ပါတီမှ ဒေါက်တာ အမ်ကောန်လက “ပါတီ နာမည်၊ တံဆိပ်၊ အလံ အတည်ပြုတာပေါ့။ ကချင်ပြည်နယ်ပါတီ (Kachin State Party – KSP) ဆိုပြီး ပါတီအမည်ပေါ့။ လိုဂိုနှင့် အလံပေါ့။ အလံက အပေါ်က အနီ၊ အဖြူ၊ အပြာပေါ်မှာ ကချင်ပြည်နယ်မြေပုံ၊ ပါတီနာမည် အတိုကောက် KSP ထည့်မှာပေါ့။ သဘောထား ကွဲလွဲတာ မရှိပါဘူး။ ဒါက ၁၇ ဦးကော်မတီကို ရွေးခိုင်းတာ။ နောက်ပြီး အလုပ်အဖွဲ့ကော်မတီ (Working Committee) ဖွဲ့ဖို့ သဘောတူထားတယ်။ ပညာတတ်အုပ်စုတွေပါတဲ့ ကချင်ပြည်နယ်ထဲက နိုင်ငံသားအားလုံးကို ဖိတ်ခေါ်မယ်။ အဲဒါပြီးမှ ဗဟိုကော်မတီ ဖွဲ့မယ်။ ၂၀၁၈ ကြားဖြတ်ကို မမီတော့ဘူး။ လေးပါတီပေါင်းအဖွဲ့က ပါဝင်ဖို့ အမည်စာရင်း မသွင်းနိုင်ခဲ့ဘူး။ ဒီနှစ်ကုန်ပြီး ၂၀၁၉ နှစ် ဆန်းပိုင်းမှ မှတ်ပုံတင် လုပ်နိုင်မယ် ထင်ပါတယ်။ လူရွေးတာတွေ၊ ဆပ်ကော်မတီတွေ ထပ်လုပ်ရဦးမယ်။ အားလုံးပါဝင်ဖို့ဆိုရင် အချိန်ယူရဦးမယ်။ ဖိတ်ခေါ်ကာလကို သီးသန့်လုပ်မှရမယ်လို့ စဉ်းစားထားပါတယ်” ဟု ပြောကြားသည်။
ပါတီပေါင်းစည်းရေးအတွက် ၂၀၁၈ ခုနှစ် ဧပြီ ၁၀ ရက် မနောကွင်း မဂျွယ်ခန်းမတွင် သုံးပါတီ ပေါင်းစည်းရေး ဆောင်ရွက်ချိန်တွင် စည်းလုံးညီညွတ်ရေးနှင့် ဖွံ့ဖြိုးရေးပါတီ UDKS ပါဝင်လာပြီး ပါတီလုပ်ငန်းစဉ်တွင် ဆောင်ရွက်ရန် လူထုရွေးချယ်သည့် ၁၇ ဦး ကော်မတီကို ရွေးချယ်ခဲ့သည်။
ကချင်တိုင်းရင်းသား နိုင်ငံရေးပါတီများ ပေါင်းစည်းရေးအတွက် ၂၀၁၄ ခုနှစ်တွင် စတင်ခဲ့သော်လည်း ၂၀၁၈ ဇန်နဝါရီ ၁၃ ရက်တွင် သုံးပါတီပေါင်းစည်းမည်ဟု မြစ်ကြီးနား YMCA ခန်းမတွင် လက်မှတ်ထိုးနိုင်ခဲ့သည်။
လာမည့် ၂၀၁၈ နိုဝင်ဘာ ၃ ရက်တွင် ပြုလုပ်မည့် ကြားဖြတ်ရွေးကောက်ပွဲတွင် မြစ်ကြီးနားမြို့နယ် တစ်ခုလုံး အကျုံးဝင်သည့် (အမျိုးသားလွှတ်တော် မဲဆန္ဒနယ်အမှတ် ၂) အတွက် ပါတီပေါင်းစည်းရာတွင် ပါဝင်ခဲ့သည့် ကချင်ဒီမိုကရက်တစ်ပါတီမှ ဦးအောင်ခမ်းက ကိုယ်စားလှယ်လောင်းအဖြစ် တင်သွင်းထားကြောင်း သိရသည်။
ကချင်ပြည်နယ်တွင် ၂၀၁၅ ရွေးကောက်ပွဲအတွက် ပါတီ ၁၇ ခုဝင်ရောက်ယှဉ်ပြိုင်ခဲ့ပြီး ကချင်ပြည်နယ် အခြေစိုက် ပါတီများဖြစ်သည့် ကချင်ဒီမိုကရက်တစ်ပါတီ၊ ကချင်ပြည်နယ် ဒီမိုကရေစီပါတီ၊ ကချင်အမျိုးသားများ ဒီမိုကရေစီ ကွန်ဂရက်ပါတီ၊ လီဆူအမျိုးသားများ ဖွံ့ဖြိုးတိုးတက်ရေးပါတီ၊ လဝေါ်အမျိုးသားများ ဖွံ့ဖြိုးတိုးတက်ရေးပါတီ၊ ရှမ်းနီအမျိုးသားများ ဖွံ့ဖြိုးတိုးတက်ရေးပါတီနှင့် တိုင်းလိုင် (ရှမ်းနီ) နှင့် မြန်မာပြည်မြောက်ပိုင်း ရှမ်းမျိုးနွယ်စုများ သွေးစည်းညီညွတ်ရေးပါတီ စသည့် တိုင်းရင်းသားပါတီ ခုနစ်ခုကို ပြည်ထောင်စုရွေးကောက်ပွဲ ကော်မရှင်မှ မှတ်ပုံတင် ရရှိခဲ့သည်။