အစိုးရသက်တမ်း နှစ်နှစ်ကျော်ပြီ ဖြစ်သော်လည်း ဖွဲ့စည်းပုံအခြေခံဥပဒေ ပြင်ဆင်ရေး၊ တရားဥပဒေ စိုးမိုးရေးနှင့် ငြိမ်းချမ်းရေးတို့သည် ဆုတ်ယုတ်ဆိုးရွားသည့် အခြေအနေ ရှိနေကြောင်း SNLD ပါတီဥက္ကဋ္ဌ ဦးခွန်ထွန်းဦး ပြောကြား

အစိုးရသက်တမ်း နှစ်နှစ်ကျော်ပြီ ဖြစ်သော်လည်း ဖွဲ့စည်းပုံအခြေခံဥပဒေ ပြင်ဆင်ရေး၊ တရားဥပဒေ စိုးမိုးရေးနှင့် ငြိမ်းချမ်းရေးတို့သည် ဆုတ်ယုတ်ဆိုးရွားသည့် အခြေအနေ ရှိနေကြောင်း SNLD ပါတီဥက္ကဋ္ဌ ဦးခွန်ထွန်းဦး ပြောကြား
Published 8 August 2018

လက်ရှိအချိန်တွင် အစိုးရသက်တမ်း နှစ်နှစ်ကျော်သွားပြီ ဖြစ်သော်လည်း ၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး၊ တရားဥပဒေစိုးမိုးရေးနှင့် ငြိမ်းချမ်းရေး ရရှိရေးတို့သည် ဆုတ်ယုတ်ဆိုးရွားသည့် အခြေအနေတွင် ရှိနေကြောင်း ၁၉၉၀ ပြည်သူ့လွှတ်တော် ကိုယ်စားလှယ် ရှမ်းတိုင်းရင်းသား ခေါင်းဆောင်တစ်ဦးဖြစ်သူ ဦးခွန်ထွန်းဦးက ပြောသည်။

ရန်ကုန်မြို့ ပြည်လမ်းရှိ ယုဒဿန်ရိပ်သာတွင် သြဂုတ် ၇ ရက် မွန်းလွဲပိုင်းတွင် ပြုလုပ်ခဲ့သည့် ၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့နှင့် မိတ်ဖက်နိုင်ငံရေး အင်အားစုများ ညီလာခံ အဖွင့်မိန့်ခွန်း ပြောကြားရာတွင် ညီလာခံ သဘာပတိဖြစ်သူ ဦးခွန်ထွန်းဦးက ထိုသို့ပြောကြားခဲ့ခြင်း ဖြစ်သည်။

“အခုဆိုရင် အစိုးရသက်တမ်း နှစ်နှစ်ကျော်ရှိခဲ့ပြီ။ ဖွဲ့စည်းပုံပြင်ဆင်ရေး၊ တရားဥပဒေစိုးမိုးရေးနဲ့ ငြိမ်းချမ်းရေးတို့ဟာ ဆုတ်ယုတ်ဆိုးရွားတဲ့ အခြေအနေကို ဆိုက်ရောက်နေပါတယ်။ အမျိုးသား ပြန်လည်ရင်ကြားစေ့ရေးနဲ့ ငြိမ်းချမ်းရေး ဖော်ဆောင်မှုတွေဟာ မပီမပြင် လိုအပ်ချက်တွေနဲ့ ပြည့်နေပါတယ်” ဟု ဦးခွန်ထွန်းဦးက ပြောသည်။

၂၀၀၈ ဖွဲ့စည်းပုံ အခြေခံဥပဒေသည် စစ်အစိုးရက ရေးဆွဲခဲ့သည့် ဖွဲ့စည်းပုံ အခြေခံဥပဒေဖြစ်ပြီး အဆိုပါ ဖွဲ့စည်းပုံအောက်မှ ကျင်းပခဲ့သည့် လွှတ်တော်က ယင်းဖွဲ့စည်းပုံ အခြေခံဥပဒေကို ပြင်ဆင်မည်ဆိုခြင်းမှာ မဖြစ်နိုင်သော လုပ်ဆောင်မှုတစ်ခု ဖြစ်ကြောင်းလည်း ၎င်းကအဖွင့်မိန့်ခွန်း ပြောကြားရာတွင် ထည့်သွင်းပြောဆိုသည်။

ထို့ပြင် အမျိုးသား ပြန်လည်ရင်ကြားစေ့ရေးနှင့် ပတ်သက်၍ တိုင်းရင်းသားပြည်သူ အားလုံးနှင့် ရင်ကြားစေ့နိုင်ရေး လိုအပ်နေပြီး အင်အားရှိသူကိုသာ အလေးပေး ရင်ကြားစေ့နေမည် ဆိုပါက တိုင်းရင်းသား အားလုံးနှင့် အလှမ်းဝေးလာမည်ဖြစ်ဟု ဦးခွန်ထွန်းဦးက သတိပေး ပြောကြားခဲ့သည်။

ငြိမ်းချမ်းရေးကို ဖော်ဆောင်ရာတွင်လည်း ပင်လုံစိတ်ဓာတ် တစ်ခုတည်းဖြင့် လုပ်၍မရကြောင်း၊ ပင်လုံစာချုပ် ပင်လုံကတိကဝတ်များကို အခြေခံသည့် ငြိမ်းချမ်းရေး လုပ်ငန်းစဉ်မျိုးဖြင့်သာ စစ်မှန်သည့် ငြိမ်းချမ်းရေးကို တည်ဆောက်နိုင်မည် ဖြစ်သည်ဟု ဦးခွန်ထွန်းဦးက ဆက်လက်ပြောကြားသည်။

“အားလုံးကို ခြုံငုံသုံးသပ် တင်ပြရမယ်ဆိုရင် ဒီနေ့တိုင်းပြည်ကို စီမံခန့်ခွဲအုပ်ချုပ်နေတဲ့ အစိုးရအနေနဲ့ တိုင်းပြည်ရဲ့ အဓိက လိုအပ်ချက်တွေကို ဖြည့်စွမ်းနိုင်ခြင်း မရှိတာ လက်တွေ့ဖြစ်ရပ်များက ထင်ရှားပေါ်လွင် နေပါတယ်” ဟု ၎င်းကပြောသည်။

ယခုပြုလုပ်ခဲ့သည့် ၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့နှင့် မိတ်ဖက်နိုင်ငံရေး အင်အားစုများ ညီလာခံတွင် မိတ်ဖက်အဖွဲ့အစည်းများမှ ပေးပို့သော သဝဏ်လွှာများ ဖတ်ကြားခြင်း၊ ဖွဲ့စည်းပုံ အခြေခံဥပဒေ ဖျက်သိမ်းရေးနှင့် ပတ်သက်၍ ရှင်းလင်းတင်ပြခြင်းနှင့် သက်ဆိုင်ရာ အဖွဲ့အစည်းများ၏ အစီရင်ခံစာများအား ဖတ်ကြားတင်သွင်း ခဲ့ကြသည်။

ယခုညီလာခံတွင် ပစ်ပယ်ခံထားရသော (သစ်ခုတ်သမားများ) နိုင်ငံရေး လုပ်ဖော်ကိုင်ဖက်များအား ဖိတ်ခေါ်လက်တွဲ ဆောင်ရွက်သွားခြင်း၊ ဖွဲ့စည်းပုံ အခြေခံဥပဒေ ဖျက်သိမ်းရေးအား ဆက်လက် ကြိုးပမ်းဆောင်ရွက်သွားခြင်းနှင့် လွှတ်တော်တွင်း နိုင်ငံရေးဖြစ်သည့် ၂၀၂၀ ရွေးကောက်ပွဲအား ဝင်ရောက် ယှဉ်ပြိုင်ခြင်းတို့ကို ညီလာခံ အစည်းအဝေး ဆုံးဖြတ်ချက်အဖြစ် ကြေညာခဲ့သည်။

Most Read

Most Recent