၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့ အနေဖြင့် မဟာမိတ်နိုင်ငံရေး အင်အားစုများနှင့် လက်တွဲ၍ ၂၀၂၀ ရွေးကောက်ပွဲတွင်ဝင်ရောက်ယှဉ်ပြိုင်မည် ဖြစ်ကြောင်း ကြေညာ

၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့ အနေဖြင့် မဟာမိတ်နိုင်ငံရေး အင်အားစုများနှင့် လက်တွဲ၍ ၂၀၂၀ ရွေးကောက်ပွဲတွင်ဝင်ရောက်ယှဉ်ပြိုင်မည် ဖြစ်ကြောင်း ကြေညာ
Published 8 August 2018

၁၉၉၀ ပြည်သူ့လွှတ်တော် ကိုယ်စားလှယ်များ အဖွဲ့နှင့် မိတ်ဖက်နိုင်ငံရေး အင်အားစုများ ညီလာခံ ကျင်းပနေစဉ်

၁၉၉၀ ပြည့်နှစ် ရွေးကောက်ပွဲတွင် အနိုင်ရရှိခဲ့သော ပြည်သူ့လွှတ်တော် ကိုယ်စားလှယ်များက ဦးဆောင်၍ မဟာမိတ်နိုင်ငံရေး အင်အားစုများနှင့် လက်တွဲကာ နိုင်ငံရေးပါတီတစ်ခု တည်ထောင်သွားမည်ဖြစ်ပြီး ယင်းပါတီအနေဖြင့် ၂၀၂၀ ရွေးကောက်ပွဲတွင် ဝင်ရောက်ယှဉ်ပြိုင်သွားမည်ဟု ၁၉၉၀ ပြည်သူ့လွှတ်တော် ကိုယ်စားလှယ် ဒေးဗစ်လှမြင့်က ပြောကြားသည်။

ရန်ကုန်မြို့ ပြည်လမ်းရှိ ယုဒဿန်ရိပ်သာတွင် သြဂုတ် ၇ ရက် မွန်းလွဲပိုင်းက ပြုလုပ်သည့် ၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့နှင့် မိတ်ဖက်နိုင်ငံရေး အင်အားစုများ ညီလာခံတွင် ဒေးဗစ်လှမြင့်က ထိုသို့ ပြောကြားခဲ့ခြင်းဖြစ်သည်။

“အခုက ကျွန်တော်တို့က ကြေညာရုံပဲ ရှိသေးတာပါ။ ချက်ချင်းအမည်ထုတ်လို့ မရသေးပါဘူး။ ဘယ်လိုတွေ ဆောင်ရွက်မယ် ဆိုတာကို ကျွန်တော်တို့ တိုင်ပင်ရဦးမှာပါ။ ပြီးမှ ၁၀ လပိုင်းလောက်ကျရင် အမည်ထုတ်မှာပါ။ ကျွန်တော်တို့ မှတ်ပုံတင်ဖို့ရှိတယ်။ မှတ်ပုံတင်တာကတော့ ကျွန်တော်တို့ ၂၀၁၈ မကျော်ပါဘူး” ဟု ဒေးဗစ်လှမြင့်က ပြောကြားသည်။

ထိုသို့ ပါတီတစ်ခု တည်ထောင်၍ ရွေး ကာက်ပွဲ ဝင်ရောက်ယှဉ်ပြိုင်ရာတွင် ၁၉၉၀ ပြည်သူ့လွှတ်တော် ကိုယ်စားလှယ်များ အနေဖြင့် ပါတီထိပ်ပိုင်း ဦးဆောင်မှု အခန်းကဏ္ဍမှ တာဝန်ယူဆောင်ရွက် သွားမည်ဖြစ်ပြီး ၎င်းတို့အနေဖြင့်မူ ရွေးကောက်ပွဲတွင် ဝင်ရောက် ယှဉ်ပြိုင်သွားမည် မဟုတ်ကြောင်းလည်း ဒေးဗစ်လှမြင့်က ပြောကြားသည်။

ထို့ပြင် ၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့ အနေဖြင့် ၁၉၉၀ ပြည်သူ့လွှတ်တော် ကိုယ်စားလှယ်များ၊ ပြည်သူ့လွှတ်တော် ကိုယ်စားပြု ကော်မတီဝင် တိုင်းရင်းသား ခေါင်းဆောင်များ၊ တိုင်းရင်းသားပါတီ အဖွဲ့အစည်းများ၊ အမျိုးသား ဒီမိုကရေစီအဖွဲ့ချုပ် ပြင်ပရောက်နိုင်ငံရေး လုပ်ဖော်ကိုင်ဖက်များ၊ အသိပညာရှင် အတတ်ပညာရှင်များ၊ ပြည်သူများနှင့်အတူ လက်တွဲ၍ ၂၀၂၀ ရွေးကောက်ပွဲအား ဝင်ရောက်ယှဉ်ပြိုင်မည် ဖြစ်ကြောင်းလည်း ၁၉၉၀ ပြည်သူ့လွှတ်တော် ကိုယ်စားလှယ်များ အဖွဲ့က အခမ်းအနားတွင် ကြေညာချက် ထုတ်ပြန်ခဲ့သည်။

အဆိုပါ ကြေညာချက်တွင် ၂၀၀၈ ဖွဲ့ စည်းပုံ အခြေခံဥပဒေကြောင့် ယနေ့အချိန်တွင် တိုင်းပြည်၏ အခြေအနေ အရပ်ရပ်မှာ ဆုတ်ယုတ်ယိုယွင်း လာနေပြီး ဤအခြေအနေအား ပြောင်းလဲရန်မှာ လွှတ်တော်တစ်ရပ်၊ အစိုးရ တစ်ဖွဲ့တည်းက ဆောင်ရွက်နေရုံမျှဖြင့် မရနိုင်ကြောင်း ၁၉၉၀ ပြည်သူ့လွှတ်တော် ကိုယ်စားလှယ်များ အဖွဲ့က ကြေညာသည်။

လွှတ်တော်ပြင်ပ နိုင်ငံရေးအင်အားစုများ၊ ပြည်သူများနှင့် ဟန်ချက်ညီစွာ ဆောင်ရွက်နိုင်မှ ပြောင်းလဲနိုင်မည် ဖြစ်သော်လည်း လက်ရှိလွှတ်တော်သည် လွှတ်တော်ပြင်ပ နိုင်ငံရေးအင်အားစုများနှင့် အတူလက်တွဲပြီး ဆောင်ရွက်နိုင်ခြင်းမရှိ၊ ယခင်စစ်အစိုးရလက်ထက် လွှတ်တော်တို့နှင့် ထူးမခြားနား၊ တင်ပြ၍လည်းမရ၊ တောင်းဆို၍လည်းမရ၊ အရွေ့လည်းမရှိ၊ အပြောင်းအလဲလည်း မရှိဟု ၎င်းတို့က ကြေညာခဲ့သည်။

ထိုအခြေအနေအား ကျော်ဖြတ်နိုင်ရန် အားလုံးနှင့် တန်းတူရည်တူ လက်တွဲဆောင်ရွက်နိုင်မည့် အပြောင်းအလဲ၊ အရွေ့ကို သွားနိုင်သည့် ပြည်သူ့လွှတ်တော်တစ်ရပ် လိုအပ်နေပြီး ရှောင်လွှဲ၍ မရသည့်အတွက် အဆိုပါတာဝန်ကို ၁၉၉၀ ပြည်သူ့လွှတ်တော် ကိုယ်စားလှယ်များ အဖွဲ့နှင့် မိတ်ဖက်နိုင်ငံရေး အင်အားစုများက ထမ်းဆောင်မည်ဖြစ်ကာ မပြီးဆုံးသေးသော ဒီမိုကရေစီ တော်လှန်ရေးအား ဆက်လက်ဆင်နွှဲမည်ဟု ၁၉၉၀ ပြည်သူ့လွှတ်တော် ကိုယ်စားလှယ်များအဖွဲ့က ကြေညာခဲ့သည်။

 

Most Read

Most Recent