ဇူလိုင် ၂၃ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးအပြီး ပြန်လည်ထွက်ခွာလာသည့် လွှတ်တော်ကိုယ်စားလှယ်များအား တွေ့ရစဉ်

ပို့ဆောင်ရေးဝန်ကြီးဌာန အနေဖြင့် ရငွေကျပ် ၂၀၁၂ ဒသမ ၂၀၄ ဘီလျံ ရရှိရန် လျာထားပြီး သုံးငွေကျပ် ၁၇၂၅ ဒသမ ၅၅၉ ဘီလျံ လျာထားသည့်အတွက် အသားတင်ပိုငွေ ကျပ် ၂၈၆ ဒသမ ၆၄၅ ဘီလျံ ဖြစ်ကြောင်း ပြည်ထောင်စု လွှတ်တော်သို့ တင်ပြခဲ့သည်။

၂၀၁၈-၂၀၁၉ခု ဘဏ္ဍာရေးနှစ် အမျိုးသားစီမံကိန်း ဥပဒေကြမ်းပါ စီမံကိန်းလုပ်ငန်းများနှင့် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်းပါ ရငွေသုံးငွေများနှင့် စပ်လျဉ်းပြီး ပို့ဆောင်ရေးနှင့် ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုးက ပြည်ထောင်စု လွှတ်တော်သို့ တင်ပြခဲ့ခြင်းဖြစ်သည်။

ပို့ဆောင်ရေးနှင့် ဆက်သွယ်ရေး ဝန်ကြီးဌာနတစ်ခုလုံး အနေဖြင့် ရငွေကျပ် ၂၀၁၂ ဒသမ ၂၀၄ ဘီလျံ ရရှိရန် လျာထားပြီး သုံး ငွေကျပ် ၁၇၂၅ ဒသမ ၅၅၉ ဘီလျံ လျာထားသည့်အတွက် အသားတင်ပိုငွေ ကျပ် ၂၈၆ ဒသမ ၆၄၅ ဘီလျံဖြစ်သည်ကို အဆင့်ဆင့်စိစစ်ပြီး ဖြစ်သည့်အတွက် ပြည်ထောင်စု လွှတ်တော်က ဆွေးနွေးအတည်ပြုပေးနိုင်ရန် တင်ပြခြင်းဖြစ်ကြောင်း ဒုတိယဝန်ကြီး ဦးကျော်မျိုးက ပြောကြားသည်။

ပို့ဆောင်ရေးနှင့် ဆက်သွယ်ရေး ဝန်ကြီးဌာန အနေဖြင့် လုပ်ငန်းလိုအပ်ချက်အရ မဖြစ်မနေ ဆောင်ရွက်ရမည့် လုပ်ငန်းများကိုသာ ဦးစားပေး လျာထားကြောင်း၊ ရငွေများကိုလည်း ရနိုင်သမျှ အစွမ်းကုန် ကြိုးစားရှာဖွေမည်ဖြစ်ကြောင်း၊ ပို့ဆောင်ရေးနှင့် ဆက်သွယ်ရေး ဝန်ကြီးဌာနရှိ ဦးစီးဌာနများ၊ နိုင်ငံတော်ပိုင် စီးပွားရေး အဖွဲ့အစည်းများ အနေဖြင့် ရငွေအပိုင်းတွင် သာမန်ရငွေ ကျပ် ၉၈၀ ဒသမ ၇၅၂ ဘီလျံ၊ ပြည်ပအကူအညီရငွေ ၆၅ ဒသမ ၁၂၅ ဘီလျံ၊ ပြည်ပချေးယူရငွေ ကျပ် ၅၇၆ ဒသမ ၃၃၂ ဘီလျံ၊ စုစုပေါင်း ကျပ် ၁၆၂၂ ဒသမ ၂၀၉ ဘီလျံ လျာထားကြောင်း၊ သုံးငွေအပိုင်းတွင် သာမန်သုံးငွေ ကျပ် ၃၁၀ ဒသမ ၈၄၈ ဘီလျံ၊ ငွေလုံးငွေရင်းသုံးငွေ ကျပ် ၉၈၄ ဒသမ ၁၄၄ ဘီလျံ၊ ကြွေးမြီသုံးငွေ ကျပ် ၃၈ ဒသမ ၆၂၂ ဘီလျံ၊ စုစုပေါင်း ကျပ် ၁၃၃၃ ဒသမ ၆၁၄ ဘီလျံ လျာထားသည့်အတွက် အသားတင်ပိုငွေ ကျပ် ၂၈၈ ဒသမ ၅၉၅ ဘီလျံဖြစ်ကြောင်း ဒုတိယဝန်ကြီးက ပြည်ထောင်စု လွှတ်တော်တွင် တင်ပြခဲ့သည်။

ထို့အပြင် ပြည်ထောင်စုဘဏ္ဍာရန်ပုံငွေ အစီအစဉ်ပြင်ပမှ ဆောင်ရွက်နေသည့် နိုင်ငံတော်ပိုင် စီးပွားရေး အဖွဲ့အစည်းများ အနေဖြင့် ရငွေပိုင်းတွင် သာမန်ရငွေကျပ် ၂၅၄ ဒသမ ၇၄၁ ဘီလျံ၊ ပြည်ပချေးယူရငွေ ကျပ် ၁၃၅ ဒသမ ၂၅၄ ဘီလျံ၊ စုစုပေါင်း ကျပ် ၃၈၅ ဒသမ ၉၉၅ ဘီလျံ လျာထားကြောင်း၊ သုံး ငွေပိုင်းတွင် သာမန်သုံးငွေ ကျပ် ၂၀၇ ဒသမ ၄၉၇ ဘီလျံ၊ ငွေလုံးငွေရင်း သုံးငွေမှာ ကျပ် ၁၇၁ ဒသမ ၉၈၀ ဘီလျံ၊ ေ<ကးမြီသုံးငွေ ကျပ် ၁၂ ဒသမ ၄၆၈ ဘီလျံ၊ စုစုပေါင်း ကျပ် ၃၉၁ ဒသမ ၉၄၅ ဘီလျံ လျာထားသည့်အတွက် အသားတင်လိုငွေ ကျပ် ၁ ဒသမ ၉၅၀ ဘီလျံ ဖြစ်ကြောင်း၊ သာမန်ရငွေတွင် ကုန်းလမ်းပို့ဆောင်ရေး ညွှန်ကြားမှုဦးစီးဌာနနှင့် ဆက်သွယ်ရေး ညွှန်ကြားမှုဦးစီးဌာနတို့၏ အခွန်အကောက်ရငွေ၊ လေကြောင်းပို့ဆောင်ရေး ညွှန်ကြားမှုဦးစီးဌာန၏ လေယာဉ်ဖြတ်ကျော် ဖြတ်သန်းခရငွေ၊ မြန်မာ့ဆက်သွယ်ရေး လုပ်ငန်း၏ ဆက်သွယ်ရေး ဝန်ဆောင်ခရငွေနှင့် မြန်မာ့ဆိပ်ကမ်း အာဏာပိုင်၏ ဆိပ်ကမ်းအခွန်အခ ရငွေတို့သည် အဓိက ရငွေများဖြစ်ကြောင်း ဒုတိယဝန်ကြီးက ပြောကြားသည်။

ငွေလုံးငွေရင်း ရငွေများတွင် ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာန၏ မန္တလေးဆိပ်ကမ်း အဆင့်မြှင့်တင်ရေး စီမံကိန်းနှင့် မဲခေါင်-လန်ချန်း အထူးရန်ပုံငွေ ဝမ်ပုံဆိပ်ကမ်း အဆင့်မြှင့်တင်ခြင်းအတွက် ဖြစ်မြောက်နိုင်စွမ်း လေ့လာခြင်းလုပ်ငန်း၊ လေကြောင်းပို့ဆောင်ရေး ညွှန်ကြားမှု ဦးစီးဌာန၏ ရန်ကုန်၊ မန္တလေးနှင့် နေပြည်တော် လေဆိပ်များတွင် အဆင့်မြင့် ရေဒါစနစ်များ တပ်ဆင်ခြင်း လုပ်ငန်းအတွက် အတိုင်ပင်ခံ ငှားရမ်းခ ပေးချေခြင်း၊ ပြည်တွင်းရေကြောင်း ပို့ဆောင်ရေး၏ ရခိုင်ဒေသ ဖွံ့ဖြိုးတိုးတက်ရေးအတွက် ရေယာဉ်အသစ်များ တည်ဆောက်ခြင်းလုပ်ငန်း၊ ဒလသင်္ဘောကျင်း အဆင့်မြှင့်တင်ခြင်းလုပ်ငန်း၊ မြန်မာ့မီးရထား၏ ရထားပြေးဆွဲမှုကို ဗဟိုဌာနမှ ထိန်းချုပ်သည့် စနစ်နှင့် ဘေးအန္တရာယ် ကင်းရှင်းရေးဆိုင်ရာ ကိရိယာပစ္စည်းများ တပ်ဆင်ရေး စီမံကိန်းတို့အတွက် ရရှိမည့် ပြည်ပအကူအညီ ရငွေများဖြစ်ပြီး ငွေလုံးငွေရင်း အသုံးစရိတ်တွင် ပြန်လည်သုံးစွဲမည် ဖြစ်ကြောင်း၊ မဲခေါင်-လန်ချန်း အထူးရန်ပုံငွေဖြင့် ဆောင်ရွက်သည့် လုပ်ငန်းမှလွဲ၍ ကျန်သည့်လုပ်ငန်း စီမံကိန်းများအားလုံး ဂျပန်နိုင်ငံ အကူအညီ အထောက်အပံ့ဖြင့် ဆောင်ရွက်မည်ဖြစ်ကြောင်း ဒုတိယဝန်ကြီးက ပြောကြားသည်။

ငွေလုံးငွေရင်း အသုံးစရိတ်တွင် ဧရာဝတီမြစ်ဝှမ်း ဘက်စုံစီမံခန့်ခွဲမှု စီမံကိန်း၊ တွံတေးတူးမြောင်း ဖွံ့ဖြိုးတိုးတက်ရေး စီမံကိန်း၊ ရန်ကုန်-မန္တလေး ရထားလမ်း အဆင့်မြှင့်တင်ရေး စီမံကိန်း၊ မန္တလေး-မြစ်ကြီးနား ရထားလမ်းပိုင်း အဆင့်မြှင့်တင်ရေးလုပ်ငန်း၊ စက်ခေါင်းသစ် သံလမ်းပြုပြင်ရေးစက်များ၊ စက်ခေါင်းသစ် ဆောက်လုပ်ရေးစက်ရုံ၊ လူစီးတွဲ၊ ကုန်တွဲသစ်များ ဆောက်လုပ်ရေးစက်ရုံ တည်ထောင်ခြင်းများ ပါဝင်ကြောင်း ဆက်လက်ပြောကြားသည်။

ပြည်ထောင်စုဘဏ္ဍာ ရန်ပုံငွေဖြင့် ဆောင်ရွက်မည့် လုပ်ငန်းများမှာ ဖလမ်းလေဆိပ်သစ် တည်ဆောက်ရေးလုပ်ငန်း၊ သတင်းအချက်အလက်၊ နည်းပညာနှင့် Cyber လုံခြုံရေး ဦးစီးဌာန၏ မြန်မာဂြိုလ်တုစနစ် စီမံကိန်းအတွက် ရင်းနှီးမြှုပ်နှံမှု ထည့်ဝင်ခြင်း၊ Microsoft လိုင်စင်ခများ ပေးချေခြင်း၊ သက်တမ်းလွန်ရေယာဉ်များ အစားထိုး ဆောင်ရွက်ရန် ရေယာဉ်သစ် တည်ဆောက်ခြင်း၊ ၁၅၀၀ တန် ကုန်တွဲရေယာဉ် တည်ဆောက်ခြင်းများကို အဓိက လျာထားကြောင်း၊ ပြည်ပအကူအညီနှင့် ပြည်ပချေးငွေတို့ဖြင့် ဆောင်ရွက်မည့် လုပ်ငန်းများမှာ နိုင်ငံတော်အပိုင်းမှ ဆက်စပ်ဆောင်ရွက်ရမည့် လုပ်ငန်းများအတွက် မဖြစ်မနေ ကျခံရမည့် အသုံးစရိတ်များကို လျာထားခဲ့ကြောင်း ဒုတိယဝန်ကြီး ဦးကျော်မျိုးက ပြောကြားသည်။